វល័ក្ខ - La Reine Media

ដំណឹងល្អ! កម្មករ-កម្មការិនីអាចជិះរថយន្តក្រុងគ្រប់ខ្សែដោយឥតគិតថ្លៃ

ជាដំណឹងមួយដ៏គួរឱ្យរំភើប សម្រាប់បងប្អូនកម្មករ-កម្មការិនីទាំងអស់គ្នាដែលចាប់ពីពេលនេះតទៅរដ្ឋបាលរាជធានីភ្នំពេញបានចេញសេចក្ដីប្រកាសឱ្យដឹងថា នឹងមិនយកថ្លៃលើសេវារថយន្តក្រុងគ្រប់ខ្សែទាំងអស់ក្នុងរាជធានីភ្នំពេញចាប់ពីថ្ងៃទី20 ខែសីហា ឆ្នាំ2017 តទៅ។

សេចក្ដីជូនដំណឹងនេះបានប្រកាសឱ្យដឹងថា កម្មករ-កម្មការិនីទាំងអស់អាចជិះរថយន្តក្រុងសាធារណៈរបស់រដ្ឋាករស្វយ័តដឹកជញ្ជូនសាធារណៈ ក្នុងភូមិសាស្ត្ររាជធានីភ្នំពេញដោយឥតគិតថ្លៃរយៈពេល2 ឆ្នាំ គិតចាប់ពីថ្ងៃចេញសេចក្តីប្រកាសនេះរហូតដល់ថ្ងៃទី20 ខែសីហា ឆ្នាំ2019។

សេចក្ដីជូនដំណឹងនេះបានធ្វើឡើងភ្លាមៗបន្ទាប់ពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាចេញនូវអនុសាសន៍ក្នុងពិធីជួបសំណេះសំណាលជាមួយកម្មករ-កម្មការិនីចំនួន4,270 នាក់នៅមជ្ឈមណ្ឌលពិព័រណ៍ និងសន្និបាតកោះពេជ្រកាលពីព្រឹកថ្ងៃទី20 ខែសីហា ឆ្នាំ2017 ម្សិលមិញនេះ។

រដ្ឋបាលរាជធានីភ្នំពេញបានឱ្យដឹងបន្ថែមទៀតលើគណនី Facebook ផ្លូវការទៀតថា នេះជាកាដូថ្មីមួយបន្ថែមទៀតពីសម្តេចតេជោ បន្ទាប់ពីការគិតគូរពីអត្ថប្រយោជន៍ផ្សេងៗជូនកម្មករ កម្មការិនីរួមមានការដំឡើងប្រាក់ខែអប្បបរមាជារៀងរាល់ឆ្នាំ ការបញ្ចុះតម្លៃទឹកភ្លើង និងតបណ្តាញដល់ផ្ទះជួល/បន្ទប់ជួល។ល។ ទន្ទឹមនឹងនេះ រដ្ឋាករស្វយ័តដឹកជញ្ជូនសាធារណៈរថយន្តក្រុងក៏បានកែសម្រួល និងបន្ថែមខ្សែរត់ ដើម្បីផ្តល់សេវាកាន់តែច្រើនគោលដៅជូនបងប្អូនប្រជាពលរដ្ឋក្នុងរាជធានីភ្នំពេញផងដែរ៕

August 21, 2017

Conte សរសើរពីស្មារតីរបស់ Chelsea ខណៈ Huddersfield ឈ្នះម្តងទៀត

ក្រុម Chelsea ដែលជាម្ចាស់ការពារតំណែងជើងឯកក្របខ័ណ្ឌ Premier League បានទទួលនូវការជឿជាក់ដែលពួកគេត្រូវការជាចាំបាច់កាលពីថ្ងៃអាទិត្យ ខណៈដែលគ្រាប់បាល់ស៊ុតបញ្ចូលទី2គ្រាប់ពីសំណាក់ខ្សែការពារ Marcos Alonso បានជួយឲ្យក្រុមតោខៀវមួយនេះ កត់ត្រាជ័យជម្នះក្នុងលទ្ធផល 2-1 លើក្រុមម្ចាស់ជើងឯករងកាលពីរដូវកាលមុន Tottenham Hotspur ក្នុងការប្រកួតជាលើកទី50របស់លោក Antonio Conte ក្នុងនាមជាគ្រូបង្វឹក។

ខ្សែការពារអន្តរជាតិអេស្ប៉ាញវ័យ26ឆ្នាំរូបនេះបានរកគ្រាប់បាល់ឈ្នះខណៈដែលនៅសល់រយៈពេលតិចជាង3នាទីនៅពេលក្រុម Chelsea បានបង្ហាញពីទម្រង់លេងយ៉ាងល្អ ក្រោយពីពួកគេត្រូវបានតាមស្មើវិញ នៅពេលដែលខ្សែប្រយុទ្ធបម្រុង Michy Batshuayi បានតែតបាល់ចូលក្នុងទីរបស់ខ្លួនឯងនៅរយៈពេល8នាទីចុងក្រោយ។ លោក Conte បានប្រាប់ទូរទស្សន៍ Sky Sports ថា៖ «នេះគឺជាការឆ្លើយតបដ៏ល្អឥតខ្ចោះរបស់ក្រុមម្ចាស់ជើងឯក។ ប៉ុន្តែ ទោះបីជាយ៉ាងណា យើងត្រូវតែបន្តធ្វើការងារជានិច្ច»។ គ្រូបង្វឹកសញ្ជាតិអ៊ីតាលីវ័យ48ឆ្នាំរូបនេះដែលមានបញ្ហាដោយសារតែជម្លោះជាមួយនឹងខ្សែប្រយុទ្ធអន្តរជាតិអេស្ប៉ាញ Diego Costa នោះ បាននិយាយថា រូបលោកមិនអាចស្នើសុំការខិតខំប្រឹងប្រែងឲ្យខ្លាំងជាងនេះពីសំណាក់កីឡាករឡើយ។ លទ្ធផលនេះមានន័យថា ក្រុម Chelsea បានបំពេញនូវការស្តារមុខមាត់មួយ ក្រោយពីចាញ់ក្រុម Burnley ក្នុងលទ្ធផល 3-2 លើទឹកដីខ្លួនឯង កាលពីថ្ងៃប្រកួតបើកឆាក។

ក្នុងការប្រកួតនាថ្ងៃដដែលនេះផងដែរ Huddersfield ដែលជាក្រុមចំណូលថ្មីទី3នោះបានកត់ត្រាជ័យជម្នះជាលើកទី2ពីការប្រកួតបើកឆាកទាំង2លើករបស់ខ្លួន ក្រោយពីបានផ្តួលក្រុម Newcastle 1-០ ខណៈដែលកីឡាករ Aaron Mooy គឺជាអ្នករកបានគ្រាប់បាល់តែមួយគ្រាប់នោះ៕

ប្រភពពី៖ Sport24

August 21, 2017

សំណាង រងពិន័យកាតក្រហម ខណៈកម្ពុជាធ្លាក់ចេញពីស៊ីហ្គេមក្រោមស្នាដៃថៃ

ក្រុមយុជនអាយុក្រោម22ឆ្នាំរបស់កម្ពុជា បានធ្លាក់ចេញត្រឹមវគ្គចែកពូលក្នុងព្រឹត្តិការណ៍ស៊ីហ្គេម លើកទី29 ក្នុងទីក្រុងគូឡាឡាំពួ ប្រទេសម៉ាឡេស៊ីកាលពីថ្ងៃអាទិត្យ ក្រោយពីបានរងបរាជ័យជាលើកទី3ក្នុងការប្រកួត3លើកដំបូងក្នុងពូល B ពេលប្រកួតជាមួយនឹងជើងខ្លាំងថៃ។

ក្រុមកម្ពុជា U22 បានឈានទៅកាន់ការប្រកួតកាលពីថ្ងៃម្សិលមិញដោយត្រូវការឈ្នះជាដាច់ខាត ដើម្បីរក្សាក្តីសង្ឃឹមក្នុងការប្រជែងយកកៅអីទៅវគ្គពាក់កណ្តាលផ្តាច់ព្រ័ត្រ ក្រោយពីបានរងបរាជ័យក្នុងលទ្ធផល 2-០ ពេលជួបក្រុមយុវជនហ្វីលីពីនកាលពីថ្ងៃបើកឆាក និងចាញ់ក្រុមជម្រើសជាតិវៀតណាម U22 ក្នុងលទ្ធផល 4-1 កាលពីថ្ងៃសុក្រ។ ទោះបីជាយ៉ាងណា កម្ពុជា U22 បានជួបការខកចិត្ត ខណៈដែលពួកគេបានរងបរាជ័យយ៉ាងដំណំក្នុងលទ្ធផល 3-០ ក្រោមស្នាដៃក្រុមជម្រើសជាតិថៃ បើទោះបីទាំងកម្ពុជា និងថៃបានរងពិន័យកាតក្រហមលើកីឡាករម្នាក់មួយដូចគ្នាក៏ដោយ។ ក្នុងពេលថៃកំពុងតែនាំមុខ 1-០ នៅជិតបញ្ចប់ការប្រកួតតង់ទី1 កំហឹងផ្សេងៗបានផ្ទុះឡើងក្រោយពីកីឡាករថៃ Chaiyawat Buran បានប្រព្រឹត្តកំហុសលើកីឡាករកម្ពុជា ហើយការចូលទៅធ្វើអន្តរាគមន៍ទាំងខឹងសម្បារបស់កីឡាករ សុខ សំណាង របស់ក្រុមកម្ពុជាបានធ្វើឲ្យរូបគេរងពិន័យកាតក្រហម បន្ទាប់ពីអាជ្ញាកណ្តាលបានពិន័យកាតក្រហមដូចគ្នានេះទៅលើ Chaiyawat ដែរ។

បើទោះបីលេងជាមួយនឹងសមាជិកតែ10នាក់ដូចគ្នាក្តី ក៏ក្រុមជម្រើសជាតិថៃបានរកគ្រាប់បាល់បញ្ចូលទី2គ្រាប់បន្ថែមទៀត ដើម្បីបំពេញថ្ងៃដ៏ខកចិត្តរបស់កម្ពុជាបានដែរ។ ប៉ុន្តែ ក្រុមជម្រើសជាតិថៃ U22 នៅតែស្ថិតក្នុងចំណាត់ថ្នាក់លេខ3 ដោយមាន7ពិន្ទុ ខណៈដែលវៀតណាម និងឥណ្ឌូនេស៊ី កំពុងតែស្ថិតក្នុងចំណាត់ថ្នាក់លេខ1 និងលេខ2 ដោយមាន9ពិន្ទុ និង7ពិន្ទុរៀងៗខ្លួន ស្របពេលដែលមានតែ2ក្រុមប៉ុណ្ណោះក្នុងពូល B នេះ ដែលមានសិទ្ធិឆ្លងទៅវគ្គពាក់កណ្តាលផ្តាច់ព្រ័ត្រ។ ក្រុមជម្រើសជាតិកម្ពុជា នឹងត្រូវធ្វើការប្រកួតបង្គ្រប់កិច្ចរបស់ខ្លួនជាមួយនឹងក្រុមជម្រើសជាតិទីម័រ និងឥណ្ឌូនេស៊ី នៅថ្ងៃអង្គារ និងថ្ងៃព្រហស្បតិ៍ ខណៈដែលថៃ នឹងត្រូវជួបក្រុមហ្វីលីពីន និងវៀតណាម នៅថ្ងៃប្រកួតចុងក្រោយក្នុងពូល៕

August 21, 2017

ការប្រឡងបាក់ឌុបព្រឹកនេះ មានការស្ងប់ស្ងាត់នៅទីក្រុង តែខេត្តមួយចំនួនមានឧបសគ្គ

ព្រឹកថ្ងៃទី21 ខែសីហា ឆ្នាំ2017 នេះជាពេលបើកសម័យប្រឡងមធ្យមសិក្សាទុតិយភូមិ (បាក់ឌុប) ដោយក្នុងនោះយើងឃើញថា គ្រប់រាជធានី-ខេត្តបានរៀបចំគ្រប់សកម្មភាពដើម្បីសម្រួលឱ្យការប្រឡងដ៏សំខាន់នេះទទួលបានជោគជ័យ។

យោងតាមទំព័រ Facebook ផ្លូវការរបស់ក្រសួងអប់រំ យុវជន និងកីឡា បានបង្ហាញថា ដំណើរការនៅមណ្ឌលប្រឡងវិញ្ញាសាទី1 គឺប្រវត្តិសាស្ត្រ សម្រាប់ថ្នាក់វិទ្យាសាស្ត្រពិត និងផែនដី និងបរិស្ថានវិទ្យា សម្រាប់ថ្នាក់វិទ្យាសាស្ត្រសង្គម មានសភាពស្ងប់ស្ងាត់ និងមានសណ្តាប់ធ្នាប់ល្អទាំងក្នុង និងក្រៅមណ្ឌល តែនៅខេត្តមួយចំនួនកំពុងមានឧបសគ្គដោយសារតែមានភ្លៀងធ្លាក់។ ទោះបីជាយ៉ាងណាក៏ដោយ ដំណើរការប្រឡងអាចធ្វើទៅបានទាន់ពេលវេលាកំណត់។

សម្រាប់ការប្រឡងមធ្យមសិក្សាទុតិយភូមិនៅថ្ងៃនេះ គឺមានការបើកវិញ្ញាសាសម្រាប់ដំណើរការប្រឡង ដោយមានការចូលរួមពីថ្នាក់ដឹកនាំក្រសួង គណៈអភិបាលរាជធានី-ខេត្ត គណៈមេប្រយោគទូទាំងប្រទេស ប្រធាន អនុប្រធានមណ្ឌល អ្នកត្រួតពិនិត្យតាមអគារ អ្នកសង្កេតការណ៍ និងអ្នកពាក់ព័ន្ធនានា រួមទាំងអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា។

សូមបញ្ជាក់ផងដែរថា ការប្រឡងបាក់ឌុបនៅឆ្នាំ 2017 នេះមានមណ្ឌលប្រឡង 179មណ្ឌល ស្មើនឹង 4,093បន្ទប់ នៅទូទាំងប្រទេស បេក្ខជនចូលរួមប្រឡងមានចំនួន101,410នាក់ ក្នុងនោះមានសិស្សស្រីចំនួន 50,049នាក់៕

August 21, 2017

ចង់ឃើញស្នាមសាក់របស់ សុខ សោម៉ាវត្ដី នៅជិតចំណុចពិសេសអត់?

អ្នកនាង សុខ សោម៉ាវត្ដី ត្រូវបានមហាជនផ្គូផ្គងគ្នាជាមួយកីឡាករបាល់ទាត់រូបសង្ហាគឺលោក លី វ៉ាហេត ក្រោយពីពួកគេបានសម្ដែងរួមគ្នាក្នុងរឿង «ខូចចិត្ដអាជីព» គ្រាដែលអ្នកទាំងពីរកាន់តែបង្កើនភាពស្និទ្ធស្នាលជាមួយគ្នាបន្ថែមទៀតនៅក្នុងជីវិតខាងក្រៅ។

ក្រៅពីបញ្ហាផ្ទាល់ខ្លួនរបស់អ្នកទាំងពីរដែលមហាជនទូទៅកំពុងតែចាប់អារម្មណ៍តាមដានហើយនោះ ថ្មីៗនេះអ្នកនាង សុខ សោម៉ាវត្ដី បានបង្ហាញស្នាមសាក់នៅក្បែរចំណុចសំខាន់ ដែលកាន់តែធ្វើឱ្យមានការទាក់ទាញយ៉ាងខ្លាំងពីសាធារណជន។

តាមពិតទៅការសាក់នៅលើដងខ្លួនវាគ្មានបញ្ហាអ្វីទាស់ខុសឡើយ ពិសេសនៅតាមបណ្តាប្រទេសបែកអឺរ៉ុបត្រូវបានគេចាត់ទុកថា ការសាក់នេះជាសិល្បៈមួយសម្រាប់លម្អដល់រាងកាយតែប៉ុណ្ណោះ។ ជុំវិញការសាក់នេះយើងឃើញថា បើទោះជានៅប្រទេសកម្ពុជាហាក់មិនទាន់មានភាពពេញនិយមខ្លាំងក្លាក៏ដោយ ប៉ុន្ដែសិល្បៈនៃការសាក់រូបលើដងខ្លួនក៏ត្រូវបានមហាជន និងតារាៗ ជាពិសេសសិល្បការិនីល្បីៗជាច្រើនរូបបានសាក់ផងដែរ ពិសេសស្នាមសាក់ថ្មីៗរបស់អ្នកនាង សុខ សោម៉ាវត្ដីដែលទើបតែបង្ហាញនេះតែម្ដង។

ជុំវិញការបង្ហាញរូបភាពសាក់នៅជិតចំណុចសំខាន់របស់អ្នកនាង សុខ សោម៉ាវត្ដី ត្រូវបានមហាជនជាច្រើនលើកសរសើរថា ក្រោយពីនាងប្រកាសខ្លួនថា នៅលីវមក នាងហាក់ដូចជាបើកចិត្ដទូលាយច្រើនមិនសូវគិត ឬរិតត្បិតលើអារម្មណ៍ខ្លួនឯងខ្លាំងដូចពេលមានគូជីវិតនោះទេ។ ពិសេសចាប់តាំងពីលេចឮថា នាងមានទំនាក់ទំនងស្នេហាជាមួយកីឡាករបាល់ទាត់លី វ៉ាហេតមក ជីវិតរបស់នាងហាក់ដូចជាលេងបែប Free Style ច្រើន ពោលគឺនាងចង់ធ្វើអ្វី នាងធ្វើហ្នឹង ចង់សាក់ ក៏សាក់ ជាងនេះទៅទៀតនាងកាន់តែមានភាពក្លាហានជាងមុនថែមទៀតផងក្នុងការទទួលស្គាល់នូវអ្វីដែលខ្លួនបានធ្វើ៕

August 21, 2017

បើឡឹងកុំខេង! តែបើលេងខឹងប្ដឹងមែន លោក សុវណ្ណ មករា!

បើឡឹងកុំខេង! បើលេងកុំខឹង ប៉ុន្ដែឥឡូវនេះលេងទៅលេងមកពិតជាខឹងមែនទែនហើយ ពោលគឺក្រោយមានពាក្យឌឺដងគ្នាយ៉ាងចាស់ដៃរវាងលោក ហេង ឡុង និងតារាសម្ដែងបទពិសោធក្រាស់ក្រែល សុវណ្ណ មករា និងការបង្ហើរពាក្យពីសំណាក់លោក ហេង ឡុង ថា ត្រៀមមេធាវីមិនតិចជាង3នាក់ទេ និងបានប្រាប់ថា កុកជិតជាប់ជុងហើយឱ្យទ្រាំបន្តិចរួចមក ឥឡូវនេះពាក្យបណ្ដឹងក៏បានចេញមកមែន។

ជុំវិញការប្ដឹងពីបទ៖ «បរិហាកេរ្ដិ៍ជាសាធារណៈ និងជេរប្រមាថជាសារធាណៈ» ពីសំណាក់លោក ហេង ឡុង ទៅកាន់ចុងបណ្ដឹងលោក សុវណ្ណ មករា គេសង្កេតឃើញថា តារាសម្ដែងរូបនេះហាក់បីដូចជាមិនប្រកែកតវ៉ានឹងបណ្ដឹងទាំងនោះទេគ្រាន់តែបង្ហើបថា លោកនឹងតវ៉ាទៅតាមនោះដោយយុត្ដិធម៌តបទៅវិញ។

`តទៅនេះជាពាក្យពេចន៍ដែលលោកសុវណ្ណ មករា បានសរសេរលើបណ្ដាញសង្គម «អូ! ចង់លាងខ្លួនហើយ អន្ទិតចេកឡុងកំពិតឯង យកលេសប្តឹងដើម្បីបង្វែរការចាប់អារម្មណ៍ពីសំណាក់ម្ចាស់ប្រាក់ដែលគេចូលមូលនិធិហ្នឹងឬ ? សូមប្តឹងតាមក្បាលវ៉ាល់ឡុងកំពិតឯងចុះ ខ្ញុំនឹងតតាំងដោយយុត្តិធម៌ បើខ្ញុំចាញ់ដោយការបំផ្លើសការពិតឡុងឯងមែន ខ្ញុំសុខចិត្តបង់ប្រាក់រំលស់ក្នុង1ខែ 4ម៉ឺនរៀល តាមប្រព័ន្ធបក្ស CNRP ដែលជាបក្សឡុងកំពិតឯងធ្លាប់គាំទ្រពីមុននោះ ឥឡូវក៏ឡុងឯងនៅតែគាំទ្រដដែលហ្នឹង! តែមកយកផលប្រយោជន៍ពី CPP ម៉ាអាខ្ទើយថោកទាប! អាពស់ក្បាលពីរ! បញ្ចាក់ម្តងទៀត ត្រូវតោងជាយសារុងចនចាន់ឲ្យជាប់វើយ! ប្រយត្ន័ចនចាន់ធាក់ក្បាលចោល ឡុងកំពិតឯងច្បាស់ជាគុកហើយ អាគុក អាខ្ទើយឯងបោកប្រាស់អ្នកសិល្បៈដើម្បីផលប្រយោជន៍ផ្ទាល់ខ្លួនឯង ម៉ាអាខ្ទើយយួនកាត់ចិន ឯងកុំមកចង់ស៊ីខ្សែលើសិល្បៈខ្មែរឲ្យសោះ ការពិតកំពុងលាតត្រដាងហើយ ឡុងកំពិតឯងវ័ណ្ឌកហើយ 😽😽😽😽good by ឆ្មាចេក»។

គ្រាដែលលោក សុវណ្ណ មករា បានសរសេរសារតាមហ្វេសប៊ុកថា ខ្លួនសុខចិត្ដតតាំងជាមួយលោកហេង ឡុងតាមយុត្ដិធម៌នោះ មហាជនជាច្រើនបានមើលឃើញ និងសន្និដ្ឋានថា ឥឡូវលោក សុវណ្ណ មករា ហាក់ដូចជាដឹងខ្លួនខ្លះដែរថា ខ្លួនអាចខុស។ ប៉ុន្ដែរាល់ការលើកឡើងជាច្រើនរបស់លោកសុវណ្ណ មករា ទៅលើលោកហេង ឡុង ហាក់ដូចផ្ដោតតែទៅលើរឿងលុយរបស់សមាគមតែម្ដង ដែលធ្វើឱ្យអ្នកតាមដានរឿងនេះកន្លងមកមានការងឿងឆ្ងល់ និងចោទជាសំណួរក្នុងចិត្ដថា ចុះបើលោក ហេង ឡុង ចង់ទទួលបានភាពយុត្ដិធម៌ និងចង់ឈ្នះចិត្ដរបស់លោក សុវណ្ណ មករា ពិតមែន ក្រៅពីដាក់ពាក្យបណ្ដឹងហើយនោះលោកគួរតែ បញ្ចេញភ័ស្ដុតាងពាក់ព័ន្ធនឹងលុយកាក់នោះទៅ? ព្រោះធ្វើយ៉ាងនេះលោក សុវណ្ណ មករា នឹងបិទមាត់ជិតឈឹងលែងហ៊ានសួរពីរឿងនេះទៀតមិនខាន ម្យ៉ាងវាក៏ជាការបញ្ជាក់ពីភាពស្អាតស្អំសម្រាប់លោក និងអ្នកនាងចន ច័ន្ទលក្ខិណា ដែលចំណាយពេលវេលា ភាពនឿយហត់ សេចក្ដីសុខផ្ទាល់ខ្លួនដើម្បីជួយសង្គមដូចពាក្យចាស់ថា មាសសុទ្ធមានរឿងអីត្រូវខា្លចភ្លើង ? ហ្នឹងឯង។ ណាមួយក្នុងនាមមហាជនក៏មិនចង់ឱ្យអ្នកនៅក្នុងសង្គមសិល្បៈបង្កជាជម្លោះប្ដឹងផ្ដល់គ្នាបែបនេះដែរ៕

August 21, 2017

Neymar រកបាន2គ្រាប់ ខណៈ PSG លត់ Toulouse ចាស់ដៃ

ខ្សែប្រយុទ្ធ Neymar បានស៊ុតបាល់បញ្ចូលទី2គ្រាប់ ខណៈដែលក្រុម Paris St-Germain បានធ្វើការវាយបកដើម្បីផ្តួលក្រុម Toulouse យ៉ាងចាស់ដៃក្នុងលទ្ធផល 6-2 ដើម្បីដណ្តើមបាន9ពិន្ទុពេញពីការប្រកួតបើកឆាកទាំង3លើករបស់ពួកគេក្នុងក្របខ័ណ្ឌ Ligue 1 កាលពីថ្ងៃអាទិត្យ។

ការទទួលជ័យជម្នះដ៏កក់ក្តៅនេះបានធ្វើឲ្យក្រុម PSG របស់លោក Unai Emery ឡើងទៅឈរនៅលើកំពូលតារាងនៃក្របខ័ណ្ឌ Ligue 1 បើទោះបីពួកគេបានដេញតាមពីក្រោយនៅកីឡដ្ឋាន Parc des Princes តាមរយៈគ្រាប់បាល់បើកឆាករបស់កីឡាករ Max Gradel នៅនាទីទី18ក៏ដោយ។ Neymar បានរកគ្រាប់បាល់តាមស្មើវិញសម្រាប់ក្រុម PSG មុនពេលកីឡាករ Adrien Rabiot រកគ្រាប់បាល់នាំមុខសម្រាប់ក្រុមខ្លួននៅមុនពេលបញ្ចប់តង់ទី1។

បន្ទាប់មក ខ្សែប្រយុទ្ធ Edinson Cavani បានបន្ថែមគ្រាប់បាល់ទី3 ដោយការស៊ុតបាល់ប៉េណាល់ទី2 មុនពេលការធ្វើឲ្យបាល់ចូលទីខ្លួនឯងរបស់ខ្សែការពារ Thiago Silva បានជួយឲ្យក្រុមភ្ញៀវវាយបកបាន1គ្រាប់វិញ។ ប៉ុន្តែ កីឡាករ Javier Pastore, Layvin Kurzawa និង Neymar ដែលជាកីឡាករមានតម្លៃខ្លួនខ្ពស់ជាងគេបំផុតក្នុងពិភពលោកបានរកគ្រាប់បាល់បំប៉ោងសំណាញ់ទីដើម្បីផ្តល់ជ័យជម្នះដ៏កក់ក្តៅសម្រាប់ក្រុមខ្លួនតែម្តង។

ក្រោយពីបានរកគ្រាប់បាល់នៅថ្ងៃនៃការបង្ហាញខ្លួនជាលើកទី1របស់គេនៅលើទឹកដីក្រុម Guingamp រួចមក ខ្សែប្រយុទ្ធអន្តរជាតិប្រេស៊ីល Neymar បច្ចុប្បន្នបានស៊ុតបាល់បញ្ចូលទី3គ្រាប់ក្នុងការប្រកួត2លើកសម្រាប់ក្រុម PSG ចាប់តាំងពីផ្ទេរមកពីក្លិប Barcelona ក្នុងតម្លៃខ្លួន 222លានអឺរ៉ូ (ស្មើនឹង261លានដុល្លារអាមេរិក)។

ក្រោយពីបញ្ចប់ការប្រកួត Neymar វ័យ 25ឆ្នាំបាននិយាយថា៖ «ខ្ញុំពិតជាមានអារម្មណ៍រីករាយ និងធូរស្រាលណាស់។ ខ្ញុំមានអារម្មណ៍ហាក់ដូចជាលេងនៅក្នុងផ្ទះអ៊ីចឹង។ ខ្ញុំកំពុងតែសម្របខ្លួនឲ្យបានរហ័សតាមដែលអាចធ្វើបាន។ ខ្ញុំកាន់តែមានភាពរឹងមាំផ្នែករាងកាយ ហើយខ្ញុំនៅតែអាចធ្វើបានល្អប្រសើរជាងនេះ»៕

ប្រភពពី៖ The Guardian

August 21, 2017

ធនាគារភ្នំពេញពាណិជ្ជ សេវាកម្មធនាគារ និងលើសពីនេះ

ដំណើរប្រតិបត្តិការធនាគារតាមបែបប្រពៃណីបានផ្លាស់ប្តូរយឺតៗជាមួយនឹងការចាប់ផ្តើមនៃគោលការណ៍ទំនើបកម្មយ៉ាងឆាប់រហ័សដែលមនុស្សភាគច្រើនបានភ្ញាក់ផ្អើលនៅពេលជួបប្រទះនាប៉ុន្មានទសវត្សចុងក្រោយនេះ។ ពីដំណើរប្រតិបត្តិការធនាគារដោយផ្តល់តែសេវាដាក់ប្រាក់សន្សំ និងសេវាឥណទាន បានផ្លាស់ប្តូរទៅជាការផ្តល់អោយមានជម្រើសជាច្រើននូវផលិតផលថ្មីៗដ៏សម្បូរបែប ហើយរយៈពេលចុងក្រោយនេះបានផ្លាស់ប្តូរទៅជាការប្រើប្រាស់សេវាកម្មអេឡិចត្រូនិចសម្រាប់ប្រតិបត្តិការផ្សេងៗ ខណៈបច្ចុប្បន្នធនាគារបានបោះជំហានកាន់តែឆ្ងាយជាងនេះទៀត ។

ភាពប្រកួតប្រជែងនៃសេវាកម្មធនាគារនៅកម្ពុជា បានរីកកាន់តែខ្លាំងឡើងនៅពេលការរីកចំរើនយ៉ាងខ្លាំង នៃវិស័យតិចនូឡូជីដូចជាការចូលមកដល់នៃទូរស័ព្ទទំនើប និងគ្រឿងអេឡិចត្រូវនិចផ្សេងៗ ដែលធ្វើអោយធនាគារ ផ្លាស់ប្តូរការប្រតិបត្តិការសេវាកម្មរបស់ពួកគេជាលក្ខណៈអេឡិចត្រូនិច ដែលផ្តោតទៅលើភាពងាយស្រួលរបស់អតិថិជន ជាហេតុនាំឱ្យអតិថិជនកាន់តែច្រើនកំពុងជួបប្រទះភាពខ្វះខាតនូវការបម្រើសេវាកម្មល្អក្នុងសេវាកម្មធនាគារដែលធ្លាប់ផ្តល់ជូននៅពេលពួកគេមកកាន់សាខានានា។ ដោយដឹងថាព្រំដែនដែលមិនមានការកំណត់ ជាពិសេសខណៈដែលវិស័យហិរញ្ញវត្ថុនៅកម្ពុជាបាននឹងបន្តរីកលូតលាស់ ធនាគារត្រូវពង្រឹងខ្លួនឱ្យលើសពីដែនកំណត់នៃនិន្នាការវិស័យធនាគារនៅកម្ពុជាបច្ចុប្បន្ន។

នាពេលថ្មីៗនេះ ធនាគារភ្នំពេញពាណិជ្ជ បានផ្តួចផ្តើមយុទ្ធសាស្ត្រក្នុងការលើកកម្ពស់សេចក្តីពេញចិត្តរបស់អតិថិជន ដើម្បីបញ្ជាក់ពីភាពខុសគ្នា របស់សេវាកម្មធនាគារនេះ។ ធនាគារបានឈានលើសពីដំណើរវិវដ្តន៍នៃបច្ចេកវិទ្យាប្រព័ន្ធធនាគារចល័តឈានដល់ ការពង្រឹងយុទ្ធសាស្ត្រ ដើម្បីផ្តល់សេវាកម្មមានលក្ខណៈពិសេសជាងធនាគារដទៃដល់អតិថិជនដែលមិនធ្លាប់ទទួលបទពិសោធន៍បែបនេះពីមុនមក។

គ្រប់សាខាទាំងអស់នៃធនាគារភ្នំពេញពាណិជ្ជ បានចាប់ផ្តើមផ្តល់ជូននូវការ៉េមដល់អតិថិជនដែលមកដល់សាខាផ្ទាល់ ដើម្បីធ្វើប្រតិបត្តិការធនាគារនានាក្នុងគោលបំណង បង្ហាញឱ្យអតិថិជនឃើញពីភាពខុសគ្នារវាងសេវាកម្មរបស់ធនាគារភ្នំពេញពាណិជ្ជជាមួយការដាក់បញ្ចូល គោលការណ៍«សេវាកម្មធនាគាររីករាយ»។ ធនាគារជឿជាក់ថាតាមការផ្តល់នូវការ៉េមត្រជាក់ៗទាំងនេះ អតិថិជនអាចរីករាយនិងពេលវេលាម្តងម្កាលដែលអាចឱ្យគេចផុតពីកាលវិភាគរស់នៅដ៏មមាញឹកនៅពេលដែលពួកគេអញ្ជើញមកកាន់ធនាគារ។ ទន្ទឹមនឹងនេះ ធនាគារបានធ្វើការផ្តល់អាវភ្លៀងដោយឥតគិតថ្លៃសម្រាប់អតិថិជននៅពេលមកកាន់សាខាធនាគារខណៈពេលដែលមានភ្លៀងធ្លាក់។ មុនពេលផ្តួចផ្តើមនេះ ធនាគារក៏បានធ្លាប់ផ្តល់អតិថិជននូវ ផ្លែប៉ោមស្រស់ៗ ដើម្បីឱ្យអតិថិជនមានភាពរីករាយក្នុងការមកកាន់ធនាគារជាពិសេសជួយឱ្យរាងកាយមានភាពស្វាហាប់ ដើម្បីរក្សាសុខភាពអោយនៅមាំមួនដូចជាពាក្យស្លោកពោលថា “ផ្លែប៉ោមមួយក្នុងមួយថ្ងៃ ធ្វើឱ្យអ្នកជៀសឆ្ងាយពីជម្ងឺផ្សេង” ។ ជាមួយនឹងយុទ្ធសាស្ត្រផ្តួចផ្តើមនៃការផ្តល់ជូននូវការ៉េមនៅតាមបណ្តាសាខាធនាគារភ្នំពេញពាណិជ្ជខាងលើនេះ ធនាគារក៏សង្ឃឹមថាវាអាចជួយលើកកម្ពស់ ដល់កម្រិតនៃការរំពឹងទុករបស់អតិថិជនលើវិស័យសេវាកម្មធនាគារនៅក្នុងប្រទេសកម្ពុជា និងផ្លាស់ប្តូរបទពិសោធន៍ចាស់ៗនៃសេវាទទួលភ្ញៀវនៅតាម ធនាគារផ្សេងៗក្នុងគោលដៅឱ្យសេវាកម្មធនាគារជាទីកន្លែងដែលផ្តល់ភាពរីករាយនៅពេលដែលអតិថិជន។ ធនាគារបានយល់ឃើញថាភាពមមាញឹកនៃការ រស់នៅរបស់ប្រជាជនបានកើនឡើង ហើយធនាគារចង់ចូលរួមចំណែកដល់ការជម្រុះភាពតានតឹងតាមរយៈការផ្តួចផ្តើមនេះ និងសង្ឃឹមថាវាអាចជាកត្តាចម្បងមួយក្នុងការបង្កើននូវសេចក្តីពេញចិត្តដល់អតិថិជននៅក្នុងវិស័យធនាគារទាំងមូល។

គោលបំណងរួមនៃការបង្កើតសេវាកម្មដូចដែលបានរៀបរាប់ខាងលើនេះ លោក SHIN Chang Moo នាយកប្រតិបត្តិនៃធនាគារភ្នំពេញពាណិជ្ជបានមានប្រសាសន៍បញ្ជាក់ថា ៖ «ចក្ខុវិស័យរបស់ពួកយើង គឺយើងចង់ក្លាយជាក្រុមហិរញ្ញវត្ថុផ្តល់សេវាកម្មខ្នាតរាយល្អបំផុត។ ចក្ខុវិស័យនេះ ពណ៌នាពីពួកយើង វាបង្ហាញពីអ្វីដែលយើងចង់បាន និងអ្វីដែលពួកយើងចង់សម្រេច។ ពួកយើងតែងតែដឹងថាក្នុងការធ្វើអោយចក្ខុវិស័យនេះក្លាយជាការពិត ពួកយើងមានអ្វីជាច្រើនទៀតដើម្បីសម្រេច ហើយជំនាញតែមួយមុខនឹងមិនគ្រប់គ្រាន់ឱ្យពួកយើងសម្រេចនូវអ្វីដែលយើងចង់បាននោះទេ ប៉ុន្តែត្រូវខិតខំរុញច្រានឱ្យលើសពីនេះ ក្នុងការធ្វើឱ្យចក្ខុវិស័យនេះឈានទៅដល់ការសម្រេចភាពជាក់ស្តែងសម្រាប់អតិថិជន និងវិស័យធនាគារនៅប្រទេសកម្ពុជាទាំងមូល» ៕

August 21, 2017

ក្រុមហ៊ុននួន អានុង អះអាងថា ផលិតផលថ្មីគ្មានសារធាតុគីមី និងគ្មានសារធាតុក្លែងក្លាយ

ស្របពេលប្រទេសកម្ពុជាកំពុងតែមានការអភិវឌ្ឍផ្ដាស់ប្ដូររបៀបរស់នៅទៅរកភាពទំនើប ស៊ីវីល័យ សម្ភារប្រើទំនើបៗ ពិសេសផលិតផលក្នុងការថែរក្សាសម្រស់មានគុណភាព ក្រុមហ៊ុននួន អានុង ដែលមានវត្ដមានក្នុងទីផ្សារកម្ពុជាជិត 20ឆ្នាំហើយនោះ កាន់តែប្រឹងប្រែងបង្កើតផលិតថ្មីដើម្បីដើរឱ្យស្របទៅតាមតម្រូវការប្រជាជនកម្ពុជា។

នៅសាលតាំងពិព័រណ៌កោះពេជ្រចាប់តាំងពីថ្ងៃទី17-20 គេសង្កេតឃើញថា អតិថិជនដែលជាច្រើនបានចោមរូមទិញនូវផលិតផលនួន អានុង ជាច្រើន ខណៈក្រុមហ៊ុននេះបានបង្កើតនូវផលិតផលថ្មីមួយគឺសាប៊ូដុសខ្លួនអានុង ពិសេសដំបូងគេបង្អស់ដោយមិនបញ្ចូលសារធាតុគីមី SLS និង Paraben និងមិនបញ្ចូលសារធាតុក្លែងក្លាយដែលបណ្ដាលឱ្យប៉ះពាល់ដល់សុខភាពស្បែកធ្វើឱ្យសាប៊ូជាប់លំដាប់ GMP &ISO 9901-2008 ទាំងការវេចខ្ចប់និងគុណភាព។ បន្ថែមពីលើការពារស្បែក និងធានាសុវត្ថិភាព100% សាប៊ូដុសខ្លួននួនអានុងមាពីរក្លិន គឺក្លិនផ្កាសាគូរ៉ា និងក្លិនក្រូច ដែលបានរួមធាតុផ្សំពីធម្មជាតិដូចជា ប្រេងអូលីវ ប្រេងអាល់ម៉ុន ប្រទាលកន្ទុយក្រពើ វីតាមីន E និងវីតាមីន B3 សម្រាប់ការពារសុខភាពស្បែកធ្វើឱ្យមានសម្រស់ពីធម្មជាតិ។ ពិសេសអ្នកបានប្រើប្រាស់ផលិតផលនេះនឹងធ្វើឱ្យស្បែកមានសំណើមសាច់ម៉ដទន់រលោង ស្រស់ថ្លា និងមានក្លិនក្រអូបសាយពេញដងខ្លួនពេញមួយថ្ងៃ។

គ្រាដែលមានការចូលចោមរោមអ្នកអតិថិជនជាច្រើនបានចាប់ទិញផលិតផលថ្មីរបស់ក្រុមហ៊ុននួន អានុង នេះត្រូវបានបងស្រីម្នាក់អះអាងថា ជាអ្នកគាំទ្រផលិតផលនួនអានុង ជាច្រើនឆ្នាំហើយបានបញ្ជាក់ថា តាមរយៈការប្រើប្រាស់ផលិតផលនួន អានុង កន្លងមកយើងឃើញថា វាមានគុណភាពល្អទៅហើយ ប៉ុន្ដែពេលក្រុមហ៊ុនមានផលិតផលថ្មីៗដែលមិនដាក់បញ្ចូលសារធាតុគីមី និងសាធាតុក្លែងក្លែងដែលមិនធ្វើឱ្យប៉ះពាល់ដល់ស្បែកដូច្នេះក្នុងនាមយើងជាអតិថិជន និងជាអ្នកប្រើប្រាស់ក៏កាន់តែមានសប្បាយចិត្ដនិងមានទំនុកចិត្ដប្រើប្រាស់វាកាន់តែខ្លាំងឡើង។ ការប្រើប្រាស់ផលិតផលសម្រាប់ ថែរក្សាស្បែកជាកក្ដាសំខាន់ណាស់ដែលចាំបាច់ឱ្យយើងត្រូវតែចេះជ្រើសរើសនិងមើលវាឱ្យបានត្រឹមត្រូវឱ្យប្រាកដថា វាជាផលិតផលមានគុណភាពនិងប៉ះពាល់ដល់ស្បែក៕

August 20, 2017

សុខភាពរបស់កុមារនៅតែជាបញ្ហាធំនៅឡើយសម្រាប់កម្ពុជា

ស្របពេលដែលកំណើនសេដ្ឋកិច្ចរបស់កម្ពុជាបានកើនឡើងខ្លាំង វិស័យវិនិយោគ និងផ្នែកនានាក្នុងសង្គមក៏ចាប់ផ្តើមអភិវឌ្ឍខ្លាំងឡើងជារៀងរាល់ថ្ងៃដែរ។ នៅក្នុងដំណើរនៃការរៀបចំសង្គមដែលប្រកបដោយការប្រកួតប្រជែងផ្នែកអាជីវកម្ម ធនធានមនុស្សចាប់ផ្តើមក្លាយជាចំណុចអាទិភាពដែលត្រូវយកចិត្តទុកដាក់ ព្រោះគ្រប់ចង្វាក់ផលិតកម្ម ឬសេវាកម្មនានាសុទ្ធតែត្រូវការមនុស្សទៅធ្វើការ។

ជាក់ស្តែង ក្រសួងអប់រំ និងស្ថាប័នពាក់ព័ន្ធនានាខំជំរុញឱ្យមានការគិតគូរពីបញ្ហាសុខភាព និងការគាំពារកុមារតាមរយៈគម្រោងនានាដូចជាការគាំពារមិនឱ្យមានអំពើហិង្សា គាំពារផ្នែកសិទ្ធិកុមារ និងការគាំពារផ្នែកសុខភាពជាដើម។ តែទោះបីជាយ៉ាងណាក៏ដោយ របាយការណ៍ដែលចេញដោយអង្គការ Unicefនៅកម្ពុជាឆ្នាំ 2016 បានបង្ហាញថា ជំងឺកង្វះអាហារូបត្ថម្ភលើកុមារ នៅតែជាបញ្ហាធំនៅក្នុងប្រទេសកម្ពុជា ដោយក្នុងនោះកុមារក្រោមអាយុ 5 ឆ្នាំ ចំនួន 32% មានជំងឺក្រិសក្រិន។ តាមការរកឃើញរបស់អង្គការអន្តរជាតិមួយនេះបានបង្ហាញផងដែរថា កុមារចំនួន 10% មានបញ្ហាស្គមស្គាំង និងចំនួន 24% មានបញ្ហាមិនគ្រប់ទម្ងន់។

យោងតាមរបាយការណ៍របស់ Unicef ដដែលបានបង្ហាញផងដែរថា នៅឆ្នាំ 2013 មានការបាត់បង់ថវិកាយ៉ាងហោចណាស់168លានដុល្លារអាមេរិកក្នុងមួយឆ្នាំ ដោយសារតែផលវិបាកអវិជ្ជមានផ្នែកសុខភាពមួយចំនួនដែលបង្កើតឡើងដោយអំពើហិង្សាលើកុមារនៅក្នុងប្រទេសកម្ពុជា។

ទោះជាយ៉ាងណាក៏ដោយ គេសង្កេតឃើញថា ស្ថាប័នពាក់ព័ន្ធនានាបាន និងកំពុងពង្រឹងកិច្ចសហប្រតិបត្តិការ ដើម្បីដោះស្រាយបញ្ហាប្រឈមទាំងអស់នេះ ដើម្បីជាផ្នែកមួយនៃការជំរុញឱ្យអនាគតធនធានមនុស្សនៅកម្ពុជាមានលក្ខណៈល្អប្រសើរឡើង៕

August 19, 2017

Author: វល័ក្ខ