វល័ក្ខ - La Reine Media

ក្រុមហ៊ុនអចលនទ្រព្យជប៉ុនមួយទៀតចូលមកវិនិយោគនៅកម្ពុជា

ភ្នំពេញៈ ក្រុមហ៊ុនអចលនទ្រព្យជប៉ុនថ្មីមួយទៀតបានសម្រេចចិត្តឈានជើងចូលមកវិនិយោគនៅកម្ពុជាតាមរយៈការវិនិយោគលើគម្រោង ARATA។

លោក TAKASHI Eguchi អគ្គនាយកក្រុមហ៊ុន CREED ASIA (Cambodia) Co,Ltd បានថ្លែងឲ្យដឹងនៅការិយាល័យរបស់លោកនាព្រឹកថ្ងៃទី21 សីហាម្សិលមិញនេះថា ការវិនិយោគលើគម្រោង ARATA ដែលបានសម្ពោធកាលពីថ្ងៃទី20 សីហាកន្លងទៅនេះមានការចូលរួមពីក្រុមហ៊ុនជប៉ុនថ្មីមួយទៀតគឺក្រុមហ៊ុន Hoosiers បានមកចាប់ដៃគូជាមួយយើង។លោកបន្តថា ដូច្នេះគម្រោងវិនិយោគថ្មីនេះមានការសហការពីក្រុមហ៊ុនចំនួន3 គឺក្រុមហ៊ុន CREED GROUP ក្រុមហ៊ុន TRIPLE GEM និងក្រុមហ៊ុន Hoosiers។

លោកបន្តថា “យើងមានសុទិដ្ឋិនិយមលើទីផ្សារកម្ពុជា ដោយសារចំនួនប្រជាជនកាន់តែច្រើនឡើងមានប្រាក់ចំណូលកើនឡើង និងប្រជាជនកម្ពុជានៅតែពេញនិយមរស់នៅតាមលំនៅដ្ឋានក្នុងបុរីនានា។ លោកបន្តថា “កម្ពុជាជាប្រទេសមានភាពបើកចំហយ៉ាងខ្លាំងដែលផ្តល់នូវភាពកក់ក្តៅដល់អ្នកវិនិយោគមកបណ្តាក់ទុននៅទីនេះ។

គម្រោងបុរី ARATA ស្ថិតនៅលើផ្ទៃដីជាង 12ហិកតា និងមានផ្ទះជាច្រើនប្រភេទដែលបានលក់ក្នុងតម្លៃចាប់ពីជាង 87,000ដុល្លារ ដល់ជាង 200,000ដុល្លារអាមេរិក។

លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអឹលស៊ីដែលជាធនាគារផ្តល់សេវាទូទាត់សាច់ប្រាក់ជាមួយអ្នកវិនិយោគជប៉ុនជាង1,000ក្រុមហ៊ុននោះបានថ្លែងថា អ្នកវិនិយោគជប៉ុនមុនពេលពួកគេសម្រេចចិត្តវិនិយោគនៅប្រទេសណាមួយ ពួកគេបានសិក្សាច្បាស់លាស់ណាស់លើកត្តាសំខាន់ៗចំនួន3 គឺស្ថិរភាពនយោបាយ ស្ថិរភាពសង្គមដែលមិនមានអ្វីប្រែប្រួលជាដុំកំភួន និងស្ថិរភាពនៃកំណើនសេដ្ឋកិច្ចដែលកម្ពុជាសម្រេចបាន។

លោកបន្តថា “ក្រៅពីកត្តាទាំង3នេះហើយ បទប្បញ្ញត្តិ និងច្បាប់នានាក៏មានភាពអំណោយផល ពិសេសច្បាប់វិនិយោគរបស់កម្ពុជា និងច្បាប់ទាក់ទងនឹងពន្ធដែលបានផ្តល់ភាពអនុគ្រោះ និងលើកទឹកចិត្តដល់អ្នកវិនិយោគយ៉ាងខ្លាំង មិនថាតែអ្នកវិនិយោគជាតិ ឬអន្តរជាតិឡើយ គឺរដ្ឋាភិបាលបបានអនុវត្តស្មើៗគ្នាដោយគ្មានការរើសអើងឡើយ៕

August 22, 2017

លោក Guardiola បារម្ភពីភាពមុតស្រួចរបស់ក្រុម ក្រោយ Man City ស្មើជាមួយ Everton

លោក Pep Guardiola អ្នកចាត់ការទូទៅរបស់ក្រុម Manchester City បានសម្តែងនូវការព្រួយបារម្ភថា បញ្ហានៃការរកគ្រាប់បាល់បញ្ចូលទីរបស់ក្រុមលោកនៅតែជាកង្វល់មួយ ក្រោយពីពួកគេបានបញ្ចប់ក្នុងលទ្ធផល 1-1 ជាមួយនឹងក្រុម Everton ក្នុងការប្រកួតក្របខ័ណ្ឌ Premier League លើទឹកដីរបស់ពួកគេកាលពីថ្ងៃចន្ទ។

ខ្សែប្រយុទ្ធ Wayne Rooney បានជួយឲ្យក្រុមទូកក្តោង Everton មានគ្រាប់បាល់នាំមុខមុននៅនាទីទី35 កាលពីថ្ងៃចន្ទ ហើយ Man City បានបាត់បង់ខ្សែការពារ Kyle Walker ដោយសារតែការពិន័យកាតក្រហមដ៏ចម្រូងចម្រាសមួយនៅមុនពេលបញ្ចប់តង់ទី1 ប៉ុន្តែ ក្រុមម្ចាស់ផ្ទះបានធ្វើការវាយបកដើម្បីតាមស្មើវិញតាមរយៈគ្រាប់បាល់របស់កីឡាករបម្រុង Raheem Sterling នៅរយៈពេល 8នាទីចុងក្រោយ។ Man City បានជួបបញ្ហាជារឿយៗក្នុងការរកគ្រាប់បាល់ផ្តួលគូប្រកួតកាលពីរដូវកាលមុន តាមរយៈការបញ្ចប់ក្នុងលទ្ធផលស្មើ7លើកក្នុងការប្រកួតលើទឹកដីខ្លួនឯងក្នុងការប្រកួតក្របខ័ណ្ឌលីក។ នៅពេលដែលត្រូវបានចោទសួរថា តើលោកគិតយ៉ាងណាដែរចំពោះទម្រង់លេងនាពេលថ្មីៗនេះរបស់ក្រុមលោក?

លោក Guardiola បានឆ្លើយតបថា៖ «ពិតណាស់ យើងបានបង្កើតឱកាស3លើក ទៅ4លើកមុនពេលបានគ្រាប់បាល់តាមស្មើនេះ។ ពួកគេបានធ្វើការវាយសម្រុកខ្លាំងក្លា ពោលគឺមួយទល់នឹងមួយ ដោយមានកីឡាករដល់ទៅ6 ទៅ8នាក់នៅក្នុងតំបន់ប្រយុទ្ធ។ )។ “(Ashley) Williams, (Phil) Jagielka, (Michael) Keane, (Leighton) Baines សុទ្ធសឹងជាខ្សែការពារដ៏រឹងមាំពេលលេងមួយទល់មួយ»។

គ្រូបង្វឹកសញ្ជាតិអេស្ប៉ាញរូបនេះបានបន្ថែមទៀតថា៖ «យើងស្ថិតនៅទីនេះដើម្បីដណ្តើមឲ្យបានលទ្ធផលល្អ។ ទីបំផុត យើងត្រូវតែព្យាយាមធ្វើការវិភាគទៅលើទម្រង់លេងនេះ។ ការប្រកួតរបស់ក្រុមមានកីឡាករ 10នាក់ ជាមួយនឹងក្រុមមានកីឡាករ11នាក់ និងជាក្រុមលេងក្នុងក្របខ័ណ្ឌ Europa League។ យើងបានខិតខំព្យាយាម ហើយយើងបានខ្ជះខ្ជាយឱកាសជាច្រើន។ បើទោះបីយើងបានរកគ្រាប់បាល់បញ្ចូលទី ប៉ុន្តែ យើងមិនអាចទទួលបានជ័យជម្នះឡើយ»៕

ប្រភពពី៖ Sky Sports

August 22, 2017

តើអាយុគភ៌ប៉ុន្មានខែ ទើបកូនចាប់ផ្តើមរើ?

ជាប្រក្រតី បន្ទាប់ពីមានការចាប់បដិសន្ធិ តួកំណើតនឹងចាប់ផ្តើមសាងប្រព័ន្ធប្រសាទផ្នែកកណ្តាលជាមុន និងប្រព័ន្ធសរសៃឈាម តាមដោយប្រព័ន្ធសាច់ដុំច្រើនឡើងជាបណ្តើរ។ បើស្ត្រីតាំងគភ៌បានប្រមាណ6សប្តាហ៍ ពេលឆ្លុះអេកូមើល នឹងឃើញតួកំណើតតូចមួយទំហំប៉ុនគ្រាប់អង្ករនៅឡើយ តែបើឆ្លុះមើលនៅសប្តាហ៍ទី8 ដែលបេះដូងរបស់ទារកដំណើរការហើយនោះ អ្នកម្តាយនឹងមើលឃើញថា កូនចាប់ផ្តើមចេះរើហើយ។ អ្នកម្តាយមួយចំនួននឹងមានអារម្មណ៍រំភើបញាប់ញ័ររហូតដល់ស្រក់ទឹកភ្នែកក៏មាន ព្រោះនៅពេលមើលឃើញថា កូនចេះរើបានហើយ ម្តាយនឹងមានអារម្មណ៍ថា ខ្លួនលែងមានតែម្នាក់ឯងទៀតហើយ តែនៅមានកូននៅក្នុងផ្ទៃម្នាក់ទៀត។

ក្នុងអំឡុងតាំងគភ៌ដំបូងៗ ស្ត្រីមានគភ៌មិនទាន់មានអារម្មណ៍ដឹងថា កូនរើនៅឡើយទេ ព្រោះខ្លួនកូននៅតូចណាស់ លាដៃលាជើងទៅខាងណាក៏មិនទាន់ប៉ះនឹងសាច់ជញ្ជាំងខាងក្នុងពោះដែរ តែពេលបន្ទាប់ពីតាំងគភ៌ចុងខែទី4ឡើងទៅហើយ ស្ត្រីមានគភ៌ខ្លះអាចនឹងមានអារម្មណ៍ដឹងថា ដូចមានអី្វម្យ៉ាងរុញនៅក្នុងពោះតិច។ ស្ត្រីមានគភ៌នឹងមានអារម្មណ៍ថា កូនរើយឺតៗ ឬលឿនខ្លាំងខុសៗពីគ្នា។ ស្ត្រីមានគភ៌លើកដំបូងនឹងចាប់ផ្តើមមានអារម្មណ៍ដឹងថា កូនក្នុងផ្ទៃរើ ក៏នៅពេលដែលគភ៌មានអាយុប្រមាណ18-20សប្តាហ៍ចំណែកស្ត្រីដែលធ្លាប់តាំងគភ៌ហើយ អាចនឹងមានអារម្មណ៍ដឹងថា កូនរើ ប្រមាណជាក្នុងសប្តាហ៍ទី16-18ឡើងទៅ។

រូបរាងកាយរបស់ស្ត្រីមានគភ៌ក៏មានចំណែកក្នុងការរើដោលរបស់កូនដែរ អនាគតអ្នកម្តាយដែលមានរូបរាងកាយស្គមស្តើងក្បាលពោះមិនធំ មិនក្រាស់ ស្បូននឹងឆាប់អណ្តែតមកប៉ះនឹងស្បែកក្បាលពោះ ទើបធ្វើឱ្យឆាប់មានអារម្មណ៍បានដឹងថា កូនចាប់ផ្តើមរើលឿនជាងស្ត្រីមានគភ៌ដែលធាត់ ត្រគាកធំ ក្បាលពោះក្រាស់… រឹតតែស្ត្រីមានគភ៌ដែលមានមាឌធំ ដងខ្លួនក្រាស់នឹងរឹតតែធ្វើឱ្យក្រមានអារម្មណ៍ដឹងថា កូនរើ។

គិតពេលវេលាជាភាគរយវិញ ក្នុងមួយថ្ងៃៗ កូននឹងរើប្រមាណជា20% ចំណែក80%ទៀត កូននឹងគេងលក់។ កូននឹងរើខ្លាំងក្នុងអំឡុងពេលមុន និងក្រោយទទួលទានអាហាររៀងរាល់ពេល ហើយនឹងរើខ្លាំងក្នុងអំឡុងពេលយប់ តាំងពីម៉ោង9រហូតដល់ប្រមាណជាម៉ោង1រំលងអាធ្រាត្រ។ជួនកាលកូនក៏រើខ្លាំងនៅពេលថ្ងៃដែរ គឺរើមិនសូវជាទៀងពេលប៉ុន្មានឡើយ ព្រោះកូនមិនទាន់ស្គាល់ពេលយប់ ឬពេលថ្ងៃនៅឡើយ។ ភ្ញាក់ពេលណា ក៏រើភ្លាមតែម្តង ហើយនឹងរើខ្លាំងនៅពេលដែលម្តាយឃ្លាន ព្រោះសំឡេងកូរពោះរបស់ម្តាយអាចទៅរំខានការគេងរបស់កូន ដោយសារតែពោះវៀនរបស់ម្តាយស្ថិតនៅផ្នែកខាងលើស្បូនដែលជាកន្លែងកូននៅ។

ការរើរបស់កូននៅក្នុងផ្ទៃ ជាសញ្ញាមួយដែលល្អខ្លាំងណាស់សម្រាប់ស្ត្រីមានគភ៌ ព្រោះនៅពេលកូនរើ វាគឺជាការបញ្ជាក់ពីសញ្ញាជីវិតរបស់កូនហ្នឹងឯង ដូច្នេះស្ត្រីមានគភ៌គួររាប់ការរើរបស់កូនក្នុងមួយថ្ងៃៗផងទើបជាការល្អ៕

August 22, 2017

សុភាពនារីគួរយល់ដឹង! ឈឺចាប់ពេលមករដូវទ្រាំមិនបានគួរធ្វើបែបណា?

ស្ត្រីយើងរមែងតែងតែប្រឈមមុខជាមួយនឹងភាពឈឺចាប់នៅមុនពេល និងក្នុងនៅអំឡុងពេលមករដូវ ហើយមាននារីៗជាច្រើននាក់ណាស់ប្រហែលជាធុញទ្រាន់ជាមួយនឹងអាការឈឺចាប់នាពេលមករដូវម្ដងៗនេះ។ ក្នុងថ្ងៃនេះ ឡារ៉ែន បានពាំនាំនូវវិធីខ្លះៗក្នុងការថែរក្សាសុខភាពនារីដោយខ្លួនឯង ទាំងមុនពេល និងក្នុងអំឡុងពេលមករដូវមកជម្រាបជូនប្រិយមិត្តអ្នកអានទាំងអស់ ដើម្បីជួយបន្ថយភាពឈឺចាប់បានខ្លះ អីចឹងសូមអានទាំងអស់គ្នា ថាតើគួរធ្វើបែបណាខ្លះ?

1/ កំណត់ការទទួលទានអាហារមួយចំនួន
អ្នកគួរកំណត់ការទទួលទានជាតិស្ករ អំបិល ជាតិកាហ្វេអីុន ស្រា និងភេសជ្ជៈមានជាតិអាកុល ហើយបែរមកទទួលទានអាហារដូចជា បន្លែ ផ្លែឈើ គ្រាប់ធញ្ញជាតិ និងអាហារដែលមានសារធាតុកាបូនអីុដ្រាតមួយចំនួន ក្រោយពីសម្រាកការងារ ដើម្បីថែរក្សាសុខភាព តែមិនបណ្ដាលខ្លួនឱ្យធាត់នោះទេ។

2/ អាហារដែលសម្បូរដោយសារធាតុដែក
អ្នកគួរទទួលទានអាហារដែលមានសារធាតុដែកឱ្យបានច្រើន ដែលសារធាតុដែកទាំងនោះមាននៅក្នុង ថ្លើមសត្វ ស៊ុតលឿងនិងបន្លែពណ៌បៃតងចាស់-ល- ដើម្បីឱ្យរាងកាយបង្កើតគ្រាប់ឈាមក្រហមថ្មីៗ និងគួរទទួលទានបន្លែ ផ្លែឈើដែលមានវីតាមីន C ច្រើនដូចជា ក្រូចឆ្មារ ក្រូចពោធិ៍សាត់ ត្របែក ខាត់ណា និងប៉េងប៉ោះជាដើម ព្រោះវីតាមីន C នឹងជួយឱ្យរាងកាយស្រូបយកសារធាតុចិញ្ចឹម និងសារធាតុដែកចូលទៅក្នុងរាងកាយបានយ៉ាងល្អប្រសើរ។

3/ បំបាត់ការឈឺចាប់ដោយវិធីធម្មជាតិ
នៅក្នុងអំឡុងពេលមករដូវ ប្រសិនបើអ្នកមានអាការចុកពោះ និងឈឺចាប់ខ្លាំងក៏សូមណែនាំឱ្យឆុងតែឱសថបុរាណងាយៗដូចជា តែ Chamomile ឬប្រភេទតែ Peppermint ដោយឆុងទទួលទានក្ដៅៗ រួចលេបវីតាមីន C កាល់ស្សូម និងថ្នាំ Evening Primrose Oil។ ក្រៅពីនោះ អ្នកគួរតែងូតទឹកក្ដៅឧណ្ហៗ និងស្អំទឹកក្ដៅនៅលើបរិវេណពោះរបស់អ្នក ដើម្បីកាត់បន្ថយអាការឈឺចាប់។

4/ ហាត់ប្រាណ
ការហាត់ប្រាណយ៉ាងថ្មមជារឿយៗ ដើម្បីជំរុញឱ្យរាងកាយមានកម្លាំង និងថាមពល Endorphine ចេញមកក្រៅ ពីព្រោះថាមពលសារធាតុនេះ អាចជួយកាត់បន្ថយការឈឺចាប់របស់រាងកាយបានតាមបែបធម្មជាតិ ដោយជួយឱ្យរាងកាយមានអារម្មណ៍ធូរស្បើយ និងបំបាត់អារម្មណ៍តានតឹងមួយចំនួនដែលជាដើមហេតុបង្កឱ្យកើតមានអាការឈឺចាប់បែបនេះ ដែលជាផ្នែកមួយជួយកាត់បន្ថយការឈឺចាប់នៅមុន និងក្រោយពេលមករដូវ។

នារីៗជាច្រើនដែលមានអាការឈឺចាប់ពេលមករដូវខ្លាំងបំផុត ក៏ត្រូវរកវិធីកាត់បន្ថយការឈឺចាប់បន្ថែមទៀត មិនថាជាការសម្រាកឱ្យបានគ្រប់គ្រាន់ ការស្អំទឹកក្ដៅនៅបរិវេណពោះ និងក្រោមខ្នង ក៏ប៉ុន្ដែនៅពេលដែលការឈឺចាប់មិនបាត់សោះ ក៏គួរតែចេញទៅហាត់ប្រាណបន្ថែមថ្នមៗ ហើយបើនៅតែមិនបាត់ទៀតនោះ ក៏គួរតែលេបថ្នាំបំបាត់ការឈឺចាប់ដូចជា Aspirin, ibuprofen, Naproxen ឬលេបបញ្ចូលគ្នាក៏បានដែរ។ ក្រៅពីនោះ ការប្រើប្រេងកូឡា ឬប្រេងខ្យល់លាបនៅបរិវេណពោះ ក៏អាចជួយបន្ថយអាការឈឺចាប់បានដូចគ្នាដែរ នៅក្នុងអំឡុងពេលមករដូវ ក៏ប៉ុន្ដែត្រូវប្រើតាមការណែនាំរបស់គ្រូពេទ្យទើបត្រឹមត្រូវ។ ទោះបីជាយ៉ាងណាក៏ដោយប្រសិនបើនារីៗយើង ជួបនូវអាការឈឺចាប់ខ្លាំងនោះ អ្នកមិនគួរនៅសម្ងំស្ងៀមនោះទេ គួរតែរូតរះប្រញាប់ទៅមន្ទីរពេទ្យជាបន្ទាន់ បើសង្កេតឃើញមានអាការមិនប្រក្រតីណាមួយកើតឡើងគ្រូពេទ្យអាចនឹងពិនិត្យព្យាបាលអ្នកបានភ្លាមៗទាន់ពេលវេលា។

ជាចុងក្រោយ អាហារដែលគួរជៀសវាងទទួលទាននៅក្នុងអំឡុងពេលមករដូវមានដូចជា សាច់ក្រហម ទឹកដោះគោ និងអាហារដែលមានរសជាតិប្រៃ ព្រោះវាមិនបានជួយកាត់បន្ថយអាការឈឺចាប់នៅក្នុងពេលមករដូវរបស់អ្នកនោះទេ ហើយអ្នកគួរតែបែរមកទទួលទានសាច់ត្រីជំនួសវិញ ព្រោះជាតិខ្លាញ់អូមេហ្កា 3 ពីសាច់ត្រី និងត្រីសមុទ្រ អាចជួយកាត់បន្ថយការឈឺចាប់បានមួយចំនួនដែរ៕

August 22, 2017

One Residence អគារ អាផាតមិន ដ៏ទំនើបកណ្តាលរាជធានីភ្នំពេញចាប់បើកលក់ជាផ្លូវការណ៍ហើយ

ជាអគារដ៏ទំនើប ខ្ពស់ស្គឹមស្កៃ និងទាន់សម័យ ដែលផុសឡើងបង្ហាញខ្លួននៅចំកណ្តាលបេះដូងនៃមជ្ឈមណ្ឌលពាណិជ្ជកម្ម នៃរាជធានីភ្នំពេញ អាផាតមិន One Residence ស្ថិតនៅអគារលេខ168 តាមបណ្តោយផ្លូវព្រះនរោត្តម ខណ្ឌចំការមន បានប្រកាសចាប់បើកដំណើរការលក់ជាផ្លូវការណ៍ហើយ ដែលពិធីនេះត្រូវបានធ្វើឡើងកាលពីរសៀលថ្ងៃទី18 ខែសីហា ឆ្នាំ2017 នៅផ្នែកខាងលើនៃអគារ One Residence ផ្ទាល់តែម្ដង ក្រោមការចូលរួមពីសំណាក់ម្ចាស់ទុនវិនិយោគសាងសង់ នាយកគ្រប់គ្រងក្រុមហ៊ុនទទួលសិទ្ធិលក់ និងបណ្តាអ្នកវិនិយោគជាតិ និងអន្តរជាតិ ក៏ដូចជាភ្ញៀវកិត្តិយស រួមទាំងអ្នកសារព័ត៌មានជាច្រើនរូបទៀត ។

នៅក្នុងពិធីដ៏រីករាយដែលបង្ហាញពីការស្វាគមន៍វត្តមានថ្មីនៃអគារដ៏ល្អប្រណីត កម្រិតស្តង់ដារមួយនេះ ត្រូវបានគេដឹងថា សម្រាប់ការគ្រប់គ្រងទីផ្សារនៃការលក់ ឬជួលនៅក្នុងអគារមួយនេះ គឺជាការទទួលខុសត្រូវ និងផ្ដល់សិទ្ធិទាំងស្រុងទៅឱ្យក្រុមហ៊ុនដែលមានជំនាញ និងមានបទពិសោធន៍ផ្នែកខាងវិស័យអចលនទ្រព្យ CMS (Capital Management Solutions) ។ នៅក្នុងឱកាសដ៏សែនមនោរម្យនេះផងដែរ សម្រាប់ភ្ញៀវកិត្តិយសទាំងអស់ដែលបានចូលរួម ក្រៅពីបានរីករាយដោយការជួបសំណេះសំណាលគ្នារវាងអ្នកជំនួញទាំងក្នុង និងក្រៅស្រុក ក៏ដូចជាការបង្កើនភាពស្និទ្ធស្នាល ថែមទាំងមានឱកាសបានពិនិត្យមើលពីភាពអស្ចារ្យ ស្អាតប្លែក ត្រជាក់ភ្នែក ជាមួយនឹងទិដ្ឋភាពនៃបន្ទប់ស្នាក់នៅដ៏ទំនើប ទាន់សម័យ ដែលពោរពេញទៅដោយការតុបតែងលម្អនៅក្នុងបន្ទប់ទាំងមូលរួមមានគ្រឿងអេឡិចត្រូនិកសម្រាប់កម្សាន្ត ចង្កៀងអគ្គិសនីដ៏ស្រស់ស្អាត សាឡុងគ្រែពូកដ៏ទន់ល្មើយ ផ្តល់ផាសុកភាពខ្ពស់ ដ៏ដូចជាសម្ភារៈប្រើប្រាស់ផ្សេងៗទៀត រួមនឹងប្រព័ន្ធកាមេរ៉ាសុវត្ថិភាព ដែលទាំងអស់នេះត្រូវបានបង្ហាញជូន និងណែនាំដោយអ្នកតំណាងផ្នែកលក់របស់ក្រុមហ៊ុន CMS (Capital Management Solutions) ។

សម្រាប់បន្ទប់ស្នាក់នៅក្នុងអគារដ៏ខ្ពស់ស្គឹមស្កៃមួយនេះ ត្រូវបានរៀបចំឡើងចាប់ពីទំហំ 42 ម៉ែត្រការ៉េ រហូតដល់ 67 ម៉ែត្រការ៉េ ដោយមានការបែងចែកចេញជា 4 ប្រភេទ រួមមាន ប្រភេទ Studio , 2 Bedroom Suite , 1Bedroom Deluxe Suite , និងប្រភេទ 1Bedroom Executive Suite ខណៈដែលតម្លៃគឺអាស្រ័យទៅតាមទំហំ និងប្រភេទបន្ទប់ រួមជាមួយនឹងរយៈពេលនៃការស្នាក់នៅ ។

គួរបញ្ជាក់ផងដែរថា អគារ One Residence ក្រៅពីមានបម្រើលើសេវាស្នាក់នៅ ក៏មានសេវាផ្សេងៗទៀតជាច្រើន ដូចជា ភោជនីយដ្ឋាន ការកុម្ម៉ង់អាហារជាលក្ខណៈឯកជននៅតាមបន្ទប់ មានកន្លែងហាត់ប្រាណជាមួយឧបករណ៍ទំនើបទាន់សម័យ មានអាងហែលទឹកដ៏ធំទូលាយនៅផ្នែកខាងលើនៃអគារ មានសេវាបោកអ៊ុតសម្លៀកបំពាក់ សេវាជួលរថយន្ត សេវាជួលកង់ រួមជាមួយនឹងការប្រើសេវាអ៊ីនធឺណែតដោយសេរី ។

សូមបង្កើនភាពស្រស់ថ្លានៃការរស់នៅរបស់លោកអ្នកជាមួយអាផាតមិន One Residence ចាប់ពីពេលនេះតទៅ ៕

August 21, 2017

ទិញ iPhone ថ្មី បើមិនទាន់ដឹងវិធីបង្កើត Apple ID ទេ អាចចូលអានបានទីនេះ

វាមិនមែនជារឿងថ្មីអ្វីទេ បើនិយាយពីរឿងការបង្កើតគណនី Apple ID សម្រាប់ប្រើទុកទាញយកកម្មវិធី ហ្គេម និងទុកប្រើក្នុងសេវាកម្មមួយចំនួនទៀតរបស់ Apple នោះ ប៉ុន្តែវាអាចជារឿងថ្មីក៏ថាបានដែរ ប្រសិនបើប្រិយមិត្តទើបរៀនប្រើស្មាតហ្វូនមួយនេះជាលើកដំបូង ឬមានប្រើយូរហើយ តែយកគណនីគេជំនួយ។ ហេតុដូច្នេះហើយ គេហទំព័រឡារ៉ែន សូមលើកយកវិធីមួយក្នុងការបង្កើតគណនី Apple ID ដោយមិនចាំបាច់ត្រូវប្រើ Credit Card មកជម្រាបជូនប្រិយមិត្តអ្នកអានម្ដងទៀតដូចខាងក្រោម។

1/- ជាជំហានទី1 នៅលើទូរស័ព្ទ iPhone ដែលមិនទាន់មាន Signed in Apple ID សូមចូលទៅកាន់ App Store(សម្រាប់កុំព្យូទ័រ សូមចូលទៅកាន់កម្មវិធី iTunes > iTunes store > App Store ហើយធ្វើតាមលំនាំផ្សេងៗ ដូចនៅលើ iDevice ដែរ)

2/- ជ្រើសរើសយក App មួយដែលមិនគិតថ្លៃ (FREE) ហើយចុចលើប៊ូតុង FREE បន្ទាប់មកចុចលើប៊ូតុង install។

4/-ក្រោយនោះបន្តិច វាលោតចេញផ្ទាំង Sign In ដោយជ្រើសរើសយក Create New Apple ID។

5/- ជ្រើសរើសយកប្រទេសក្នុងតារាង Country OR Region ករណីនេះសូមអ្នកធីកលើប្រទេស Cambodia ឬវាអាចកំណត់ដោយស្វ័យប្រវត្តិតែម្តង បន្ទាប់អ្នកអាចចុច Nextបាន។

6/- ចុចលើប៊ូតុង Agree ចំនួន 2 ដងលើ Terms and Conditions។

7/- ត្រង់នេះទាមទារឱ្យបំពេញក្នុងការបង្កើត User Name / Email និង Password របស់ Apple ID ដោយបំពេញត្រង់ចន្លោះ Email Address, Password ថ្ងៃខែកំណើត , សំណួរចម្លើយសុវត្ថិភាព 2 ទៅ 3 ចំណុច។ បំពេញរួចរាល់ចុចលើប៊ូតុង Next។

8/-ត្រូវជ្រើសយក None ដើម្បីមិនចាំបាច់ប្រើ Credit Card ផ្សេងៗ បន្ទាប់មកចុចលើប៊ូតុង Next។

ជាជំហានបញ្ចប់Apple នឹងផ្ញើការទទួលស្គាល់ Apple ID ដែលបានបង្កើត ដោយចូលទៅកាន់ Email ដើម្បីទៅ Verify បន្ទាប់មកប្រិយមិត្តអាច Log In Apple ID ដោយវានឹងទាមទារឱ្យយើងបញ្ចូលអ៊ីមែល និងលេខសម្ងាត់ម្តងទៀត ចុច Verify Adress ជាការស្រេច។ចុងក្រោយចូលទៅកាន់ App Store ម្តងទៀតដើម្បីទាញយក App ដែលប្រិយមិត្តពេញចិត្តបាន ប៉ុន្តែបានតែកម្មវិធី ឬហ្គេមដែលឥតគិត (Free)ថ្លៃប៉ុណ្ណោះ៕

August 21, 2017

ពិតអត់! ក្មេងខ្មែរ ហេង ពិទូ និងអេដា ត្រៀមខ្លួនចូលសាន់ដេ?

ស្របពេលមានតារាចម្រៀងមួយចំនួន ពិសេសលោក ខេមរៈ សិរីមន្ដ បានចាកចេញពីផលិតកម្មសាន់ដេទៅកាន់ផលិតកម្មថ្មីនោះ ក៏ស្រាប់តែមានព័ត៌មានលេចឮឡើងថា សាន់ដេ ក៏មិនព្រមឱ្យខ្លួនអស់ធនធានមនុស្សសម្រាប់ធ្វើការងារដែរ ពោលគឺផលិតកម្មមួយនេះកំពុងត្រៀមទទួលវត្ដមានតារាចម្រៀងល្បីៗជាច្រើនរូបបន្ថែមទៀត ដូចជា ក្រុមក្មេងខ្មែរ លោក ហេង ពិទូ និងអេដា ជាដើម។

ដើម្បីស្រាយនូវចម្ងល់នេះ លោក ឡាយ សុខចំរើន អ្នកគ្រប់គ្រងទូទៅនៃផលិតកម្មសាន់ដេ បានបញ្ជាក់ថា ការចេញចូលទៅមករបស់តារាចម្រៀងនៅក្នុងផលិតកម្មនីមួយៗ វាជារឿងធម្មតាទេ ប៉ុន្ដែផលិតកម្មនៅតែមានធនធានមនុស្សប្រើជាធម្មតា ពិសេសគឺផលិតកម្មសាន់ដេក៏បានត្រៀមបញ្ចូលធនធានមនុស្សល្អៗបន្ថែមទៀត ដើម្បីដំណើរការនៅក្នុងទីផ្សារ។

គ្រាន់តែចោទជាសំណួរថា តើធនធានថ្មីនោះជាក្រុមក្មេងខ្មែរ លោក ហេង ពិទូ និងអេដា ដូចគេលើកឡើងនោះតើមែនទេ? លោកឡាយ សុខចំរើន បញ្ជាក់ថា៖ «អូ! បញ្ហានេះខ្ញុំមិនអាចឆ្លើយបានទេ ខ្ញុំគ្រាន់តែឮមកពីខាងក្រៅវិញតែប៉ុណ្ណោះ ប៉ុន្ដែព័ត៌មានច្បាស់ការយ៉ាងណា ខ្ញុំក៏មិនទាន់អាចបញ្ជាក់បានដែរ»។

ទោះយ៉ាងណាអ្នកគ្រប់គ្រងរូបនេះ បានលើកសរសើរនូវសមត្ថភាពតារាចម្រៀងខាងលើនេះ ដោយលោកបានបញ្ជាក់ថា លោកមានការសប្បាយចិត្ដ ព្រមទាំងស្វាគមន៍ជានិច្ចចំពោះតារាចម្រៀងទាំងនោះ ប្រសិនបើរឿងនោះកើតឡើងពិតប្រាកដមែន ព្រោះក្រុមហ៊ុនមួយដែលមានធនធានមនុស្សល្អៗបែបហ្នឹង វាងាយស្រួលក្នុងធ្វើការងារដើម្បីអភិវឌ្ឍក្រុមហ៊ុនឱ្យមានភាពរីកចម្រើន៕

August 21, 2017

ការចិញ្ចឹមឃ្មុំតាមបច្ចេកវិទ្យាថ្មីអាចជួយឱ្យកសិកររកចំណូលបានខ្ពស់

ការចិញ្ចឹមឃ្មុំតាមបច្ចេកទេសថ្មីកំពុងទទួលបានការចាប់អារម្មណ៍ខ្លាំងពីកសិករនៅតាមបណ្តាខេត្តមួយចំនួន ដោយសារវាអាចជួយគ្រួសារពួកគាត់រកចំណូលបានខ្ពស់ពីការលក់ទឹកឃ្មុំ ហើយធ្វើឱ្យជីវភាពកាន់តែប្រសើរឡើងផងដែរ។

លោក ឈាង ឈូក ម្ចាស់កសិដ្ឋានចិញ្ចឹមឃ្មុំនៅភូមិរហាល ឃុំត្បែង ស្រុកបន្ទាយស្រី ខេត្តសៀមរាបមានប្រសាសន៍ថា ដោយមើលឃើញពីតម្រូវការទឹកឃ្មុំខ្ពស់នៅលើទីផ្សារកម្ពុជាលោកបានសម្រេចចិត្តនាំយកពូជឃ្មុំចិញ្ចឹមពីអ៊ឺរ៉ុបមកចិញ្ចឹមជាលើកដំបូងនៅប្រទេសកម្ពុជាកាលពីឆ្នាំ2013កន្លងទៅ ដោយសាកល្បងចិញ្ចឹមតាមបែបបច្ចេកទេសថ្មី ហើយក៏ទទួលបានជោគជ័យ និងមានការគាំទ្រខ្ពស់នៅលើទីផ្សារទៀតផង «ទឹកឃ្មុំនេះមានគុណភាពល្អ ហើយមានតម្រូវការខ្លាំងនៅលើទីផ្សារ លក់មិនដែលសល់ទេ ដោយសារភាគច្រើនគេយកទឹកឃ្មុំទៅធ្វើជាថ្នាំព្យាបាលជំងឺ»។

លោកថា នៅក្នុងឆ្នាំ2013 លោកបានសម្រេចចិត្តទិញពូជឃ្មុំ60ធុង (ក្នុងមួយធុងមាន8បង្គង) យកមកចិញ្ចឹមនៅទីតាំងខាងលើដែលជាទីតាំងសម្បូរទៅដោយផ្ការីកស្ទើរគ្រប់រដូវពីដើមឈើព្រៃ ដើមឈើហូបផ្លែ និងដំណាំបន្លែផ្សេង។ ក្រោយពីសាកល្បងជោគជ័យលោកបានពង្រីកការចិញ្ចឹមឃ្មុំនេះបានដល់ទៅជាង200ធុងបន្ថែមទៀត និងបានចែកចាយលក់បន្តទៅឱ្យកសិករមកពីខេត្តផ្សេងៗយកទៅចិញ្ចឹមបន្ត ដើម្បីជួយរកចំណូលបន្ថែមដល់គ្រួសារពួកគាត់។

សម្រាប់ឃ្មុំមួយធុងដែលមាន8-10បង្គងនេះ នៅពេលរដូវប្រាំងដែលសម្បូរផ្ការីកច្រើនឃ្មុំឱ្យផលក្នុងមួយខែពីរដង ដោយមួយដងក្នុង1ធុងយើងអាចប្រមូលបានទឹកឃ្មុំ2លីត្រ ប៉ុន្តែសម្រាប់តែខែដែលសម្បូរផ្កាមានតែ3ខែប៉ុណ្ណោះក្នុងមួយឆ្នាំ ហើយក្រៅពីនោះយើងអាចទាញយកទឹកឃ្មុំបានតែម្តងប៉ុណ្ណោះក្នុងមួយខែ។ ជាទូទៅទឹកឃ្មុំចិញ្ចឹម គេតែងគិតថា មិនមានគុណភាពល្អដូចឃ្មុំធម្មជាតិនោះទេ ប៉ុន្តែវាមិនមែនដូច្នេះឡើយ គឺវាមានគុណភាព និងមានរសជាតិផ្អែមឆ្ងាញ់ដូចគ្នា ដោយសារឃ្មុំក្រេបលម្អងផ្កាធម្មជាតិដូចគ្នា។ យ៉ាងណាក៍ដោយលោក ឈាង ឈូក បញ្ជាក់ថា នៅរដូវវស្សាដោយសារមិនមានលម្អងផ្កា គេអាចលាយចំណីមានដូចជាសណ្តែកសៀង ស្ករនិងលម្អងស្ងួតដាក់ឱ្យឃ្មុំបឺតដើម្បីឱ្យវាមានកម្លាំងរស់បាន តែបើយកល្អគេត្រូវចល័តឃ្មុំទៅរកទីតាំងណា ដែលសម្បូរផ្កាដើម្បីឱ្យឃ្មុំបឺតបានគ្រប់គ្រាន់។

ជាមួយគ្នានេះដែរលោក ប៉ត សុផល ប្រធានគ្រប់គ្រងគម្រោងអង្គការបណ្តុះបណ្តាលថ្នាក់មូលដ្ឋានដែលមានទីតាំងនៅឃុំជីរោ ស្រុកត្បូងឃ្មុំ ខេត្តត្បូងឃ្មុំ ឯណោះវិញក៏បានចាប់ផ្តើមគម្រោងចិញ្ចឹមឃ្មុំតាមបែបបច្ចេកវិទ្យាថ្មីនេះដែរដើម្បីរកចំណូលបន្ថែមផ្គត់ផ្គង់ដំណើរការរបស់អង្គការ និងដើម្បីចែករំលែកពូជឃ្មុំទៅឱ្យកសិករក្នុងសហគមន៍ចិញ្ចឹមបន្តដើម្បីរកចំណូលបន្ថែមសម្រាប់គ្រួសារពួកគាត់។

លោកថា ការសម្រេចចិត្តចិញ្ចឹមឃ្មុំនេះ ដោយសារទីតាំងនោះសម្បូរដើមកៅស៊ូ និងសម្បូរទៅដោយចម្ការបន្លែ និងដំណាំផ្សេងៗរបស់កសិករ ប៉ុន្តែចម្ការទាំងនោះភាគច្រើនមានតែក្នុងរដូវប្រាំងប៉ុណ្ណោះ ដូច្នេះលោកបានដាំដើមផ្កាឈូករ័ត្នជាច្រើនដើម្បីទុកឱ្យឃ្មុំបឺតយកលម្អងផ្កាបានគ្រប់រដូវ និងដើម្បីទុកបេះយកគ្រាប់ផ្កាឈូករ័ត្នលក់រកចំណូលបន្ថែមបានទៀតផង។ យ៉ាងណាគម្រោងដំបូងនេះលោកសាកល្បងទិញឃ្មុំតែ6ធុងប៉ុណ្ណោះ ហើយខិតខំពង្រីកពូជឃ្មុំឱ្យបានកាន់ច្រើនថែមទៀត៕

August 21, 2017

សិស្សនិទ្ទេស A លឹម រស្មី បង្ហាញវិធីសាស្ត្រជោគជ័យសម្រាប់ថ្ងៃប្រឡងបាក់ឌុបនេះ

ការប្រឡងមធ្យមសិក្សាទុតិយភូមិ ឬហៅថាការប្រឡងបាក់ឌុប ជាថ្ងៃប្រឡងយា់ងសំខាន់មួយដែលសិស្សជាច្រើនកំពុងយកចិត្តទុកដាក់ ហើយអាណាព្យាបាលក៏សុទ្ធតែចង់ដឹងផងដែរពីគន្លឹះសំខាន់ៗដើម្បីប្រឡងឱ្យបានជោគជ័យដើម្បីយកដំណឹងល្អនេះទៅប្រាប់កូនៗរបស់គាត់ដែលនឹងចូលប្រឡងវិញក្នុងពេលប៉ុន្មានម៉ោងទៀតនេះ។

ដើម្បីបង្ហាញពីគន្លឹះនៃការប្រឡងបាក់ឌុបឱ្យទទួលបានជោគជ័យ និងបានពិន្ទុខ្ពស់ យុវជន លឹម រស្មី ដែលជាអតីតសិស្សប្រឡងជាប់និទ្ទេស A នៅឆ្នាំ 2015 ជាឆ្នាំទី2 នៃកំណែទម្រង់ការប្រឡងមធ្យមសិក្សាទុតិយភូមិ បានចែករំលែកបទពិសោធរបស់ខ្លួនជាច្រើនដល់សិស្សដែលប្រឡងនៅថ្ងៃនេះ និងថ្ងៃស្អែក។

យុវជន លឹម រស្មី បានលើកឡើងថា អ្នកណាក៏ដូចជាអ្នកណាដែរ នៅពេលប្រឡងមកដល់ប្រាកដជាមានអារម្មណ៍ភ័យ ព្រោះអាចមកពីការគិតថាលំហាត់ដែលគ្រូដាក់មកនឹងមិនចេះ ឬព្រួយបារម្ភលើរឿងផ្សេងៗទៀត។ កត្តាទាំងអស់នេះ អាចធ្វើឱ្យពួកគេភ្លេចរូបមន្ត ឬមេរៀនដែលគេធ្លាប់ចេះ ដែលវាអាចជាគ្រោះថ្នាក់ធំមួយសម្រាប់ពេលប្រឡង។

ជាគន្លឹះមួយចំនួនដើម្បីដោះស្រាយបញ្ហាខាងលើ រស្មី បានផ្តល់ជាបទពិសោធថា នៅពេលចូលក្នុងថ្នាក់ប្រឡងគឺត្រូវដកដង្ហើមឱ្យវែងៗដើម្បីទប់លំនឹងអារម្មណ៍ខ្លួនឯងកុំឱ្យភ័យខ្លាំងពេក។ បន្ទាប់មក នៅពេលដែលវិញ្ញាសាមកដល់លើតុភ្លាម បេក្ខជនត្រូវមើលពីក្រោមដល់លើឱ្យអស់ ហើយមើលថាមានរ៉ូម៉ាំងប៉ុន្មាន ហើយចំណុចនៅរ៉ូម៉ាំងណាខ្លះចេះ និងចំណុចណាខ្លះមិនចេះ។ ក្រោយពេលដែលមើលដឹងហើយ យុវជនត្រូវចេះសន្សំពេលវេលាដោយចាប់ផ្តើមធ្វើលំហាត់ដែលចេះឱ្យអស់សិន មុននឹងឈានទៅដល់ចំណុចដែលមិនទាន់ចេះ។

សិស្សពូកែនិទ្ទេស A ខាងលើបានបង្ហាញផងដែរថា ទោះបីជាចំណុចណាមួយយើងចេះហើយក៏ដោយ តែយើងមិនអាចប្រហែសបានដែរ សូមធ្វើលំហាត់ទាំងអស់នោះមួយៗ កុំរំភើបខ្លាំងពេក ព្រោះវាអាចធ្វើឱ្យយើងសរសេរ ឬគិតខុស។ ចំពោះអក្សរ និងលេខវិញ គឺត្រូវសរសេរឱ្យបានច្បាស់ៗ ដកឃ្លាឱ្យបានល្មម ហើយបើមានរូបគឺត្រូវគូរឱ្យធំ កុំខ្លាចអស់ក្រដាស ព្រោះបើសន្លឹកកិច្ចការរបស់យើងស្អាត អ្នកកែគាត់អាចនឹងមានអារម្មណ៍ល្អ គាត់នឹងដាក់ពិន្ទុឱ្យល្អតាមនោះដែរ។

ចំណែកឯការសរសេរចម្លើយ គឺត្រូវសរសេរតាមដំណាក់កាលរបស់វាកុំកាត់ជាដាច់ខាត ទោះបីជាយើងចេះហើយក៏ដោយ ព្រោះការសរសេរកាន់តែច្រើន គឺកាន់តែល្អ។ ម្យ៉ាងវិញទៀត នៅពេលដែលអង្គុយប្រឡងកុំខ្វល់ពីបរិស្ថានជិតខាង ដូចជាអ្នកប្រឡងដូចគ្នា អនុរក្ស ឬអ្នកសង្កេតការណ៍ជាដើម ហើយអ្វីដែលយើងត្រូវផ្តោតនោះគឺ ត្រូវផ្ចង់អារម្មណ៍តែលើក្រដាសខ្លួនឯងបានហើយ។

យុវជនខាងលើបានបន្ថែមទៀតថា ចំពោះវិញ្ញាសាគណិតវិទ្យាវិញ សិស្សជាច្រើនបានត្អូញត្អែរលើអនុគមន៍គណិត។ តាមពិតទៅលំហាត់នេះពិបាកតែមួយចំណុច ឬពីរចំណុចតែប៉ុណ្ណោះ ក្រៅពីនេះគឺសុទ្ធតែធម្មតា ហេតុនេះក្រៅពីធ្វើអ្វីដែលចេះខាងលើហើយ យើងត្រូវបន្តធ្វើលំហាត់ផ្នែកស្រួលៗឱ្យអស់ ព្រោះថាបើយើងធ្វើអស់ចំណុចមិនសូវពិបាកហើយ ចំណុចពិបាកគឺអាចសល់តិចតួចប៉ុណ្ណោះ៕

August 21, 2017

ក្រសួងបញ្ចេញថវិកា 30លានដុល្លារ ត្រៀមទប់ស្កាត់កុំឱ្យឈ្មួញទម្លាក់តម្លៃទិញស្រូវ

ភ្នំពេញ៖ ដើម្បីទប់ស្កាត់ការទម្លាក់តម្លៃទិញស្រូវពីសំណាក់ឈ្មួញ ក្រសួងសេដ្ឋកិច្ច និងហិរញ្ញវត្ថុបានចំណាយថវិកាប្រមាណជា30លានដុល្លារដើម្បីប្រមូលទិញស្រូវពីកសិករនៅក្នុងរដូវកាលប្រមូលផលដែលនឹងជិតចូលមកដល់នាពេលខាងមុខនេះ។

យោងតាមសេចក្តីប្រកាសព័ត៌មាននៅក្នុងសិក្ខាសាលាផ្សព្វផ្សាយអំពីយន្តការអន្តរាគមន៍របស់រាជរដ្ឋាភិបាលនៅក្នុងកាប្រមូលទិញស្រូវបានបញ្ជាក់ថា ដើម្បីដោះស្រាយបញ្ហារក្សាស្ថិរភាពថ្លៃស្រូវនេះ ក្រសួងនឹងបង្កើនការវិនិយោគដល់30លានដុល្លារលើមជ្ឈមណ្ឌលប្រមូលទិញស្រូវពីកសិករ និងបង្កើនឥណទាន 50លានដុល្លារសម្រាប់ប្រមូលទិញស្រូវក្នុងអត្រាការប្រាក់5%។ យន្តការអន្តរាគមន៍របស់រាជរដ្ឋាភិបាលនៅក្នុងការប្រមូលទិញស្រូវនេះត្រូវបានសម្រេចដាក់ចេញដោយរាជរដ្ឋាភិបាលកម្ពុជាដោយផ្អែកលើលទ្ធផលនៃការសិក្សាស្រាវជ្រាវរបស់ក្រុមការងារ នៃគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ។

ចំណែកឯល្បឿននៃការបង្កបង្កើនផលដំណាំរដូវវស្សាឆ្នាំ2017 របស់ក្រសួងកសិកម្មឱ្យដឹងថាការងារប្រមូលផលស្រូវស្រាល នៅដើមរដូវរហូតមកទល់ខែកក្កដា ឆ្នាំ2017 នេះសម្រេចបានប្រមាណជា79,749ហិកតាលើផ្ទៃដីសរុបទូទាំងប្រទេសចំនួន583,486ហិកតាដោយទទួលបានបរិមាណផលសរុបចំនួន324,207តោន កើនលើសឆ្នាំមុនប្រមាណជា190,964តោន ដោយក្នុងនោះទិន្នផលគិតជាមធ្យមប្រមាណជា4.065តោនក្នុងមួយហិកតា។ ទិន្នផលនេះទទួលបានទាបជាងឆ្នាំមុនដោយកាលពីឆ្នាំ2016ទិន្នផលគិតជាមធ្យមទទួលបានប្រមាណជា 4.066 តោនក្នុងមួយហិកតា។

គួរបញ្ជាក់ថា គោលនយោបាយស្តីពីការជំរុញផលិតកម្មស្រូវ និងការនាំចេញអង្ករដែលត្រូវបានដាក់ចេញនៅក្នុងឆ្នាំ2010កន្លងទៅបានកំណត់នូវគោលដៅសំខាន់ៗចំនួន3គឺ៖

1.បង្កើនផលិតផលស្រូវលើសពីសេចក្តីត្រូវការឱ្យដល់ 4 លានតោន។
2.ជំរុញការនាំចេញអង្ករឱ្យបានយ៉ាងតិច1លានតោន។
3.ធ្វើឱ្យអង្ករកម្ពុជាត្រូវបានទទួលស្គាល់ជាអន្តរជាតិនៅឆ្នាំ2015៕

August 21, 2017

Author: វល័ក្ខ