វល័ក្ខ - La Reine Media

Hoffenheim សម្លឹងរកការបង្កើតប្រវត្តិសាស្ត្រ ពេលប៉ះ Liverpool រាត្រីនេះ

ក្រុម Hoffenheim នឹងធ្វើដំណើរទៅជួបក្រុម Liverpool របស់លោក Jurgen Klopp ដោយសម្លឹងរកការបង្កើតប្រវត្តិសាស្ត្រមួយតាមរយៈការលុបចោលការដេញតាមពីក្រោយក្នុងលទ្ធផល 2-1 ក្នុងការប្រកួតជើងទី2នៃក្របខ័ណ្ឌ Champions League វគ្គ Playoff នៅរាត្រីនេះ ដើម្បីក្លាយជាក្រុមអាល្លឺម៉ង់ដំបូងគេក្នុងការដណ្តើមបានជ័យជម្នះនៅលើទឹកដីនៃកីឡដ្ឋាន Anfield។

ក្រុមហង្សក្រហម Liverpool ហាក់ស្ទើរតែបានបោះជំហានយ៉ាងរឹងមាំឆ្ពោះទៅកាន់វគ្គចែកពូលទៅហើយ ក្រោយពីបាននាំមុខ 2-០ ក្នុងការប្រកួតជើងទីមួយកាលពីសប្តាហ៍មុនក្នុងប្រទេសអាល្លឺម៉ង់ នៅមុនពេលកីឡាករ Mark Uth បានរកគ្រាប់បាល់វាយបកមួយគ្រាប់វិញនៅនាទីទី87 ដើម្បីផ្តល់ក្តីសង្ឃឹមឡើងវិញដល់ក្រុម Hoffenheim។ ជាមួយគ្នានេះ ក្រុមរបស់អាល្លឺម៉ង់មួយនេះ នឹងសម្លឹងរកក្នុងការឈានទៅប្រកួតក្នុងក្របខ័ណ្ឌ Champions League វគ្គចែកពូលជាលើកទី1ក្នុងប្រវត្តិសាស្ត្ររបស់ក្លិបនេះ។

ប៉ុន្តែ ទោះបីជាយ៉ាងណា ក្រុម Liverpool មិនធ្លាប់ចាញ់ក្រោមស្នាដៃក្រុមរបស់អាល្លឺម៉ង់ឡើយក្នុងចំណោមការប្រកួត14លើកលើទឹកដីខ្លួនឯងក្នុងក្របខ័ណ្ឌអឺរ៉ុប ដោយឈ្នះដល់ទៅ11លើក និងស្មើ3លើក។ ខ្សែបម្រើអន្តរជាតិអាល្លឺម៉ង់ Kerem Demirbay វ័យ 24ឆ្នាំរបស់ក្លិប Hoffenheim បានប្រាប់កាសែតកីឡាប្រចាំថ្ងៃរបស់អាល្លឺម៉ង់ Bild ថា៖ «នេះគឺជាលើកទីមួយហើយដែលយើងចង់ឈ្នះការប្រកួតនេះ ប៉ុន្តែអ្វីដែលគួរឲ្យចាប់អារម្មណ៍ខ្លាំងជាងនេះទៅទៀតនោះ គឺការបង្កើតប្រវត្តិសាស្ត្ររបស់យើងផ្ទាល់។ វាជាពេលវេលាដ៏អស្ចារ្យមួយក្នុងការបង្កើតប្រវត្តិសាស្ត្រ»។ បើទោះបីពួកគេត្រូវតែស៊ុតបាល់បញ្ចូលទីឲ្យបានយ៉ាងហោចណាស់2គ្រាប់ក៏ដោយ ប៉ុន្តែ Demirbay បានបញ្ជាក់ថា ក្រុមអាល្លឺម៉ង់របស់គេនឹងមិនមើលស្រាលទៅលើដៃគូប្រកួតឡើយ ប៉ុន្តែពោរពេញដោយការគោរពលើក្រុមរបស់លោក Klopp។

ស្របពេលជាមួយគ្នានេះដែរ លោក Klopp ក៏បានរំពឹងទុកពីភាពស្វិតស្វាញក្នុងការប្រកួតនៅរាត្រីនេះផងដែរ។ គ្រូបង្វឹកសញ្ជាតិអាល្លឺម៉ង់រូបនេះបានឲ្យដឹងថា៖ «យើងមិនអាចធ្វើឲ្យមានការភ្លាត់ស្នៀតណាមួយកើតឡើងក្នុងការប្រកួតជម្រុះ Champions League នេះបានឡើយ។ វានឹងលំបាកសម្រាប់ក្រុមទាំងពីរ»។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

ប្រភពព័ត៌មាន៖ Sky Sports

August 23, 2017

អ្នកវិនិយោគជប៉ុន៖ រដ្ឋាភិបាលកម្ពុជាបើកចំហ និងលើកទឹកចិត្តការវិនិយោគ

ភ្នំពេញៈ ថ្នាក់ដឹកនាំជាន់ខ្ពស់នៃក្រុមហ៊ុនអចលនទ្រព្យជប៉ុនមួយបានលើកឡើងថា ការវិនិយោគនៅកម្ពុជាមានភាពល្អប្រសើរណាស់ ដោយសារដ្ឋាភិបាលកម្ពុជាបានបើកចំហគោលនយោបាយ និងលើកទឹកចិត្តដល់ការវិនិយោគ។

លោក TAKASHI Eguchi អគ្គនាយកក្រុមហ៊ុន CREED ASIA (Cambodia) Co,Ltd បានថ្លែងឲ្យដឹងនៅការិយាល័យរបស់លោកកាលពីថ្ងៃម្សិលមិញថា លោកមិនមានអ្វីនិយាយច្រើនទេ តែអ្វីដែលជាការយល់ឃើញរបស់លោកគឺរដ្ឋាភិបាលកម្ពុជាមានគោលនយោបាយបើកចំហយ៉ាងខ្លាំងសម្រាប់អ្នកវិនិយោគបរទេសដែលជាការផ្តល់ភាពងាយស្រូលយ៉ាងខ្លាំងដល់អ្នកវិនិយោគ និងវាជារឿងដែលល្អមួយសម្រាប់អ្វីដែលយើងមានអារម្មណ៍កក់ក្តៅក្នុងការរស់នៅទីនេះ។

លោកបន្តថា ប៉ុន្តែបើនិយាយពីហេដ្ឋារចនាសម្ព័ន្ធវិញរដ្ឋាភិបាលកម្ពុជាហាក់មិនមានគម្រោងវិនិយោគសាងសង់ផ្លូវនៅក្នុងទីក្រុងជាក់លាក់ទេដែលធ្វើឱ្យយើងត្រូវវិនិយោគលើផ្លូវដែលជាការងាររបស់រដ្ឋាភិបាលខ្លួនឯងត្រូវធ្វើ តែយើងសម្រេចចិត្តធ្វើវាដើម្បីភ្ជាប់ទៅកាន់គម្រោងរបស់យើង ប៉ុន្តែយើងរីករាយនូវការចូលរួមចំណែកអភិវឌ្ឍលើហេដ្ឋារចនាសម្ព័ន្ធទាំងនោះ។

លោកបណ្ឌិត សុក ស៊ីផាន់ណា ទីប្រឹក្សាជាន់ខ្ពស់នៃរាជរដ្ឋាភិបាលកម្ពុជាបានមានប្រសាសន៍ថា រដ្ឋាភិបាលកម្ពុជាបានបើកចំហយ៉ាងខ្លាំងបើធៀបជាមួយប្រទេសក្នុងតំបន់អាស៊ាននានា លើកលែងតែប្រទេសសិង្ហបុរីមួយដែលយើងមិនចង់និយាយដល់ ប៉ុន្តែក្នុងចំណោមប្រទេសជិតខាងកម្ពុជា និងប្រទេសមួយចំនួនទៀត កម្ពុជាបានអនុវត្តគោលនយោបាយបើកចំហខ្លាំងណាស់ដែលអាចឲ្យអ្នកវិនិយោគមកពីគ្រប់ទិសទីអាចវិនិយោគនៅកម្ពុជាបាន និងអាចបោះទុន100ភាគរយដោយខ្លួនឯងបាន។

លោកបន្តថា ចាប់តាំងពីកម្ពុជាបានចូលជាសមាជិកអង្គការពាណិជ្ជកម្មពិភពលោក និងនៅពេលក្រោយមកកម្ពុជាបានចូលសមាជិកសហគមន៍សេដ្ឋកិច្ចអាស៊ានរួចមក កម្ពុជាបានបើកចំហជើងមេឃរបស់ខ្លួនទទួលយករាល់ការវិនិយោគដែលធ្វើឲ្យកម្ពុជាក្លាយជាទីកន្លែងមួយដែលស្ថិតក្នុងក្រសែភ្នែករបស់អ្នកវិនិយោគមកពីជុំវិញពិភពលោក។

លោកបណ្ឌិត សុក ស៊ីផាន់ណា បានបន្តថា “កម្ពុជាមានច្បាប់ បទប្បញ្ញត្តិពាក់ព័ន្ធស្ទើរតែគ្រប់អស់ហើយសម្រាប់ធ្វើជាមូលដ្ឋានក្នុងការកសាងប្រទេស និងផ្តល់ទំនុកចិត្តដល់អ្នកវិនិយោគ”៕

August 22, 2017

ប្រយ័ត្ន! ទិញទំនិញនៅផ្សារត្រូវមើលកាលបរិច្ឆេទផុតពេលប្រើប្រាស់ឱ្យបានគ្រប់ពេល

ភ្នំពេញ៖ ការពិនិត្យមើលកាលបរិច្ឆេទផលិត និងថ្ងៃផុតកំណត់ប្រើប្រាស់នៅលើទំនិញដាក់លក់នៅលើទីផ្សារគឺជារឿងមួយសំខាន់ណាស់ដែលអាណាព្យាបាល ឬស្ត្រីមេផ្ទះទាំងឡាយមិនត្រូវមើលរំលងឡើយ ព្រោះថា ការប្រើប្រាស់ទំនិញផុតកាលបរិច្ឆេទប្រើប្រាស់គឺជាទំនិញដែលខូចគុណភាពដែលបង្កផលប៉ះពាល់ដល់សុខភាពរាងកាយមនុស្សយើងយ៉ាងធ្ងន់ធ្ងរ។នេះជាការលើកឡើងរបស់មន្ត្រីជំនាញ។

ការលើកឡើងនេះបានធ្វើឡើងនៅពេលដែលមន្ត្រីជំនាញសាខាកាំកុងត្រូលខេត្តពោធិ៍សាត់ បានសហការជាមួយមន្ទីរពាណិជ្ជកម្មខេត្ត និងអាជ្ញាធរដែនដីនៅថ្ងៃទី22 ខែសីហានេះរួមគ្នាចុះពិនិត្យទំនិញម្ហូបអាហារនៅផ្សារបន្ទាយយួន ស្ថិតក្នុងឃុំស្យា និងផ្សារភូមិពោធិ ស្ថិតនៅក្នុងឃុំស្រែស្តុក ស្រុកកណ្តៀង ខេត្តពោធិ៍សាត់ ហើយបានរកឃើញ និងធ្វើការដកហូតទំនិញផុតកាលបរិច្ឆេទប្រើប្រាស់ និងទំនិញហាមឃាត់សរុបចំនួន10មុខ ស្មើនឹង 594.3 គីឡូក្រាមដែលកំពុងចរាចរដាក់លក់នៅលើទីផ្សារដើម្បីយកទៅរក្សាទុកសម្រាប់ធ្វើការកម្ទេចចោល។

មន្ត្រីជំនាញសាខាកាំកុងត្រូលនិយាយថា ទំនិញចំនួន10មុខដែលបានដកហូតនោះមានដូចជា ភេសជ្ជៈគ្រឿងកំប៉ុង មី ចាហួយដូងយួន និងគ្រឿងទេសផ្សេងៗដែលទាំងអស់នេះសុទ្ធតែជាទំនិញហួសកាលបរិច្ឆេទប្រើប្រាស់ និងត្រូវហាមឃាត់មិនឱ្យដាក់លក់នៅលើទីផ្សារ ព្រោះវានឹងបង្កផលប៉ះពាល់យ៉ាងធ្ងន់ធ្ងរដល់សុខភាពមនុស្ស ពិសេសអ្នកដែលជាអ្នកប្រើប្រាស់ដោយមិនបានពិនិត្យមើលកាលបរិច្ឆេទនេះ។

ក្នុងយុទ្ធនាការចុះពិនិត្យទំនិញខាងលើ មន្ត្រីសាខាកាំកុងត្រូលក៏ដូចជាអាជ្ញាធរពាក់ព័ន្ធបានណែនាំដល់អាជីវករកុំឱ្យលក់ដូរសម្ភារប្រើប្រាស់ ភេសជ្ជៈ និងអាហារហូបចុកផ្សេងៗណាដែលផុតកំណត់កាលបរិច្ឆេទដូច្នេះទៀត ដោយត្រូវចេះមើលកាលបរិច្ឆេទទំនិញឱ្យបានច្បាស់ មុននឹងយកមកដាក់លក់នៅលើទីផ្សារទៅឱ្យអតិថិជនប្រើប្រាស់។ ជាមួយគ្នានេះដែរអតិថិជនខ្លួនឯង ក៏ត្រូវចេះពិនិត្យមើលស្លាកសញ្ញា កាលបរិច្ឆេទប្រើប្រាស់ឱ្យបានគ្រប់ពេល ចៀសវាងការបោកប្រាស់ ឬបន្លំពីឈ្មួញខិលខូចដែលចង់បានតែប្រាក់ដោយមិនគិតពីសុខភាពអ្នកប្រើប្រាស់ដូច្នេះនោះ៕

August 22, 2017

អ្នកទៅលេងសៀមរាបខែ11 មានកន្លែងសប្បាយទៀតហើយ កុំភ្លេចផ្សារកុងតឺន័រ!

ភ្នំពេញ – ក្រៅពីមានតំបន់ប្រាសាទបុរាណជាច្រើនដែលមានសក្ដានុពលក្នុងការទាក់ទាញភ្ញៀវទេសចរហើយនោះ ក្នុងខេត្ដសៀមរាបនៅខែវិច្ឆិកា ឆ្នាំ2017ខាងមុខភ្ញៀវជាតិ និងអន្ដរជាតិនឹងបានកម្សាន្ដអារម្មណ៍បន្ថែមទៀតជាមួយតំបន់កម្សាន្ដ Palm Container Night Market ដែលមានបរិវេណដ៏ធំទូលាយ។

លោក ចេង គឹមសែ ជំនួយការផ្នែកលក់នៅក្នុងគម្រោង Palm Container Night Market បាននិយាយថា មូលហេតុដែលឈានទៅដល់ការវិនិយោគផ្សារនេះ ព្រោះសៀមរាបជាទីក្រុងមានសក្ដានុពលផ្នែកទេសចរណ៍។ ជាងនេះទៀត តំបន់ដែលក្រុមហ៊ុនយើងបានជ្រើសរើសធ្វើ គឺជាទីប្រជុំជន ពិសេសជិតឃ្យុងយូផង ដូច្នេះយើងជឿថា ក្រោយពីគម្រោងនេះដំណើរការនឹងមានភ្ញៀវអន្ដរជាតិមកកម្សាន្ដនៅទីនេះច្រើនជាមិនខាន»។

គម្រោង Palm Container Night Market ត្រូវបានអភិវឌ្ឍលើផ្ទៃដីជាង2ហិកតា មានទីតាំងនៅទល់មុខសណ្ឋាគារសុខា ផ្លូវ60 ជិតតំបន់អង្គរឃ្យុងយូ ជាការរួមសហការគ្នារវាងអ្នកវិនិយោគកម្ពុជា និងថៃ។ បច្ចុប្បន្នគម្រោងនេះសាងសង់បាន30%ហើយ នឹងឈានទៅបញ្ចប់នៅក្នុងខែវិច្ឆិកាខាងមុខ។ ក្នុងនោះមានទូកុងតឺន័រប្រមាណជា100ទូ និងតូបលក់ក្នុងរង្វង់ជាង 300តូប។ រហូតមកដល់ពេលនេះមានអតិថិជនកក់តូប40% និងបានទិញយកPub ធំៗចំនួន4ហើយ ពិសេសមានទីលានដែលអាចធ្វើជាចំណតរថយន្តបានជាច្រើនរយគ្រឿងទៀតផង។ គម្រោងនេះនឹងអាចត្រូវបែងចែកជាកន្លែងលក់ និងកន្លែងកម្សាន្ដ PUB និងកន្លែងកម្សាន្ដរបស់កុមារដាច់ដោយឡែកពីគ្នា។

ជំនួយការផ្នែកលក់នៅក្នុងគម្រោង Palm Container Night Market បានលើកឡើងថា នៅខែវិច្ឆិកាខាងមុខនេះ បងប្អូនប្រជាជនកម្ពុជា និងភ្ញៀវអន្ដរជាតិទាំងអស់នឹងទទួលបាននូវអារម្មណ៍សប្បាយរីករាយជាមួយតំបន់កម្សាន្ដនាពេលរាត្រីនោះ។ លោកបន្ដថា នៅក្នុងក្រុងសៀមរាបមានកន្លែងកម្សាន្ដនាពេលរាត្រីច្រើន ប៉ុន្ដែផ្សារកុងតឺន័រ ផាម ដែលនឹងដំណើរការនៅខែ11ខាងមុខនេះ គឺមានលក្ខណៈធំទូលាយជាង និងអាចរក្សាសុវត្ថិភាពជូនអ្នកចូលទៅកម្សាន្ដនៅទីនោះបានយ៉ាង100%។ ជាងនេះទៀតយើងនឹងមានរៀបចំកម្មវិធីការប្រគំតន្ដ្រីនានាដែលយើងនឹងអញ្ជើញតារាចម្រៀងថៃមកចូលរួមថែមទៀតផង។

លោក ចេង គឹមសែ បញ្ជាក់ថា ក្រោយពេលគម្រោងនេះបើកដំណើរការហើយ វានឹងបង្កើនភាពទាក់ទាញឱ្យភ្ញៀវទេសចរកាន់តែច្រើនបន្ថែមទៀតចូលមកទស្សនានៅក្នុងខេត្ដបុរាណមួយនេះ។ ជាងនេះទៀត ផ្សារកុងតឺន័រ ផាម ក៏បានត្រៀមរួចជាស្រេចដើម្បីទទួលភ្ញៀវទេសចរឱ្យមកកម្សាន្ដយ៉ាងមានសុវត្ថិភាព និងគ្មានការណែនស្ទះនាំឱ្យពិបាកឡើយ៕

August 22, 2017

ធនាគារពិភពលោករៀបចំគម្រោងថ្មីមួយជួយដល់កម្ពុជាផលិតបន្លែ និងផ្លែឈើសរីរាង្គ

ភ្នំពេញ៖ លោកស្រី Inguna Dobraja ប្រធានធនាគារពិភពលោកប្រចាំនៅកម្ពុជាបានថ្លែងថាធនាគារពិភពលោកនឹងជួយដល់ភាគីកម្ពុជាក្នុងការផលិតផលិតផលបន្លែ និងផ្លែឈើសរីរាង្គ ដើម្បីលើកកម្ពស់ដល់សុខភាពប្រជាពលរដ្ឋខ្មែរក៏ដួចជាពលរដ្ឋនៅទូទាំងពិភពលោកដែរ។

ការថ្លែងបែបនេះធ្វើឡើងនៅពេលដែលលោកស្រី និងលោក Nathan M. Belete ប្រធានធនាគារពិភពលោកប្រចាំអាស៊ីខាងកើតបានដឹកនាំប្រតិភូចូលជួបពិភាក្សាការងារជាមួយឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទដើម្បីពិភាក្សាអំពីវឌ្ឍនភាពនិងគម្រោងអភិវឌ្ឍន៍វិស័យកសិកម្មសម្រាប់រយៈពេល5ឆ្នាំផ្តោតជាសំខាន់លើការងារអភិវឌ្ឍន៍ការស្រាវជ្រាវ និងហេដ្ឋារចនាសម្ព័ន្ធ។

ក្នុងជំនួបពិភាក្សាខាងលើលោកស្រីបញ្ជាក់ថា គម្រោងអភិវឌ្ឍន៍សម្រាប់រយៈពេល5ឆ្នាំ ដែលជំរុញ និងលើកទឹកចិត្តលើការផលិតផលិតផលបន្លែ និងផ្លែឈើសរីរាង្គ ដោយមិនចាំបាច់ពឹងផ្អែកតែលើផលិតកម្មស្រូវជាចម្បង អនុវត្តកសិកម្មឱ្យបានល្អប្រសើរសមស្របតាមស្ថានភាពនៃការប្រែប្រួលអាកាសធាតុ លើកកម្ពស់ និងយកចិត្តទុកដាក់ដល់អាហារូបត្ថម្ភ ដើម្បីសុខុមាលភាព និងការលូតលាស់របស់ប្រជាពលរដ្ឋ ជាពិសេសកុមារក្រោមអាយុ5ឆ្នាំ និងការគ្រប់គ្រងប្រព័ន្ធធារាសាស្ត្រកសិកម្មឱ្យមានចីរភាព និងនិរន្តរភាព។

ក្នុងជំនួបនេះដែរឯកឧត្តម វេង សាខុន រដ្ឋមន្ត្រីក្រសួងកសិកម្មបានថ្លែងសាទរដល់ធនាគារពិភពលោកដែលបានជួយគាំទ្រយ៉ាងពេញទំហឹងលើគ្រប់គម្រោងដែលពាក់ព័ន្ធនឹងវិស័យកសិកម្ម។ ទាក់ទងនឹងសកម្មភាពគម្រោងរយៈពេល5ឆ្នាំដែលបានលើកឡើងខាងលើ ឯកឧត្តមរដ្ឋមន្ត្រីក៏បានស្នើសុំឱ្យធនាគារពិភពលោកគិតគូរពិចារណាចំណុចសំខាន់ៗមួយចំនួនទៀតដូចជាៈ

1.គួរមានការសិក្សាស្រាវជ្រាវបច្ចេកទេសថ្មីៗធ្វើយ៉ាងណាជំរុញផលិតភាពផលិតកម្មឱ្យសមស្របតាមតម្រូវការទីផ្សារ។

2.លើកកម្ពស់ផលិតកម្មសត្វ សុខភាពសត្វ និងសុខភាពសាធារណៈតាមរយៈការបង្កើនប្រសិទ្ធភាពលើការគ្រប់គ្រងអនាម័យសត្វ និងផលិតផលមានដើមកំណើតពីសត្វ។

3.សិក្សាពីលទ្ធភាពលើការផ្តល់ឥណទានដល់ប្រជាកសិករ និងវិស័យឯកជនដែលមានលទ្ធភាពធ្វើការកែច្នៃកសិផល និងជំរុញការអនុវត្តការធ្វើអនាម័យ និងភូតគ្រាមអនាម័យជាអាទិភាព។

4.ជំរុញការងារគ្រប់គ្រងប្រព័ន្ធធារាសាស្ត្រកសិកម្ម និងការប្រើប្រាស់ទឹកឱ្យមានប្រសិទ្ធភាព។

តាមរយៈគម្រោងរបស់ធនាគារពិភពលោកខាងលើ គេរំពឹងថា គម្រោងលើកកម្ពស់បន្លែផ្លែឈើសរីរាង្គនេះនឹងដំណើរការទៅដោយជោគជ័យក្នុងពេលឆាប់ៗក្នុងគោលបំណងជួយលើកកម្ពស់សុខភាពមនុស្សនៅទូទាំងពិភពលោក ពិសេសគឺពលរដ្ឋខ្មែរតែម្តងឱ្យចៀសផុតពីការប្រើប្រាស់បន្លែផ្លែឈើដែលមានសារធាតុគីមី៕

August 22, 2017

រយៈពេល7ខែ រោងចក្របិទច្រើនជាងបើកថ្មី

ភ្នំពេញៈ រយៈពេល7ខែដើមឆ្នាំនេះ ចំនួនរោងចក្របិទទ្វារបានកើនលើសចំនួនរោងចក្រដែលបានបើកថ្មីនៅកម្ពុជា នេះជាសញ្ញាមួយបង្ហាញថា សុខភាពក្នុងវិស័យមួយនេះមិនល្អប្រសើរនោះទេ។

លោក តោ ដារ៉ារិទ្ធ មន្ត្រីការងារ និងច្បាប់នៃសមាគមរោងចក្រកាត់ដេរកម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី22 សីហានេះថា គិតត្រឹមដំណាច់ខែកក្កដាកន្លងមកនេះរោងចក្រកាត់ដេរចំនួន49បានបិទទ្វារ និងមានរោងចក្រថ្មីចំនួនតែ18ប៉ុណ្ណោះដែលបានបើកដំណើរការ។ តួលេខនេះយើងនិយាយតែក្នុងក្របខ័ណ្ឌរោងចក្រដែលជាសមាជិកសមាគមកាត់ដេរកម្ពុជាប៉ុណ្ណោះ។

លោកបន្តថា សមាគមរោងចក្រកាត់ដេរបច្ចុប្បន្នមានសមាជិកចំនួន588 ក្នុងនោះរោងចក្រផលិតស្បែកជើង និងកាបូបមានចំនួន488 រោងចក្រផលិតស្បែកជើងចំនួន57 និងរោងចក្រផលិត តែមិននាំចេញមានចំនួន43រោងចក្រ។

លោកបន្តថា “វាជាសញ្ញាមិនសូវល្អឡើយសម្រាប់វិស័យនេះព្រោះតួលេខបិទមានចំនួនច្រើនជាងតួលេខរោងចក្របើកថ្មី។

អគ្គលេខាធិការសមាគមរោងចក្រកាត់ដេរកម្ពុជាលោកបណ្ឌិត កាំង ម៉ូនីកា បានថ្លែងថា ចំនួនរោងចក្របិទច្រើនជាងបើកនេះ និងការដំឡើងប្រាក់ឈ្នួលនិយោជិតជាសញ្ញាមួយគួរឲ្យបារម្ភហើយ ប៉ុន្តែយើងកំពុងរង់ចាំមើលគោលនយោបាយរបស់រដ្ឋាភិបាលពាក់ព័ន្ធវិស័យកាត់ដេរ និងស្បែកជើងរយៈពេល8ឆ្នាំថា តើរដ្ឋាភិបាលអាចជួយអ្វីខ្លះសម្រាប់វិស័យនេះ។

រដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ និងសមាគមរោងចក្រកាត់ដេរកម្ពុជា ភាគីនិយោជក និងតំណាងសហជីពនានាកំពុងព្រាងគោលនយោបាយក្នុងវិស័យវាយនភណ្ឌដើម្បីអភិវឌ្ឍវិស័យនេះឲ្យមាននិរន្តរភាព និងមានភាពសុខដុមរមនារវាងភាគីនិយោជក និងនិយោជិត៕

August 22, 2017

វិធីដោះខ្លួនឱ្យរួចពីស្ថានការណ៍អាសន្ន

ដោយការរស់នៅបែបប្រក្រតីរបស់មនុស្សយើងដូចសព្វថ្ងៃនេះ ប្រហែលជាមិនងាយធ្លាក់ចូលទៅក្នុងស្ថានការណ៍ដែលអាសន្ន ឬអាក្រក់ប៉ុន្មានឡើយ តែតើលោកអ្នកនឹងប្រាកដក្នុងចិត្តយ៉ាងណាបានទៅថា ក្នុងមួយជីវិតនេះលោកអ្នកនឹងមិនជួបហេតុការណ៍អាសន្ន ឬអាក្រក់ណាមួយនោះ? ដូច្នេះបើលោកអ្នកស្គាល់ពីវិធីដោះខ្លួនឱ្យរួចផុតពីស្ថានការអាសន្នទាំងនោះបាន ជីវិតរបស់លោកអ្នកនឹងកាន់តែមានសុវត្ថិភាពច្រើនឡើងមិនខាន។ ខាងក្រោមនេះគឺជាវិធីដោះខ្លួនឱ្យរួចពីស្ថានការណ៍គ្រោះថ្នាក់ផ្សេងៗដែលលោកអ្នកអាចនឹងជួបប្រទះនៅថ្ងៃណាមួយក៏អាចថាបានដែរ។

1 – វិធីបង្កាត់ភ្លើងពីថ្មទូរស័ព្ទដៃ

ក្នុងអំឡុងពេលដែលលោកអ្នកត្រូវវង្វេងផ្លូវ និងស្ថិតនៅកន្លែងណាមួយដែលឆ្ងាយពីមនុស្សម្នា និងទូរស័ព្ទរបស់លោកអ្នកក៏អស់ថ្មមិនអាចធ្វើអ្វីបានទៀត តែវាក៏មិនបានគ្មានប្រយោជន៍ទាល់តែសោះនោះដែរ ព្រោះថ្មបាត់តេរីនៅក្នុងទូរស័ព្ទដៃ ឬថេបប្លេតរបស់លោកអ្នកគឺជាថ្មបាត់តេរី “លិធៀមអៃអន់” ដែលអាចយកមកបង្កាត់ភ្លើងបាន ដោយនៅក្នុងកម្មវិធី Man VS Wild របស់ ប៊ែរ៍ ហ្គ្រីល ធ្លាប់បានណែនាំពីវិធីបង្កាត់ភ្លើងដោយថ្មទូរស័ព្ទនេះរួចមកហើយ គឺប្រើកាំបិតចាក់យឺតៗទៅក្នុងថ្មបាត់តេរីនោះ សារធាតុគីមីដែលនៅខាងក្នុងនឹងបញ្ចេញប្រតិកម្មកើតចេញជាអណ្តាតភ្លើងឡើង និងអ្វីដែលសំខាន់នោះគឺ លោកអ្នកគួរត្រៀមឱស ឬវត្ថុសម្រាប់បំពក់ភ្លើងទុកជាស្រេចឱ្យហើយ។

2 – ការគេចខ្លួនឱ្យរួចពីខ្សែទឹកហូរកួចបញ្ច្រាស់ (Rip Current)

ខ្សែទឹកកួចបញ្ច្រាស់ ឬ Rip Current ជាលក្ខណៈរបស់ទឹករលកដែលបោកមកលើច្រាំង ហើយហូរកួចទៅសមុទ្រវិញតាមប្រឡោះផ្ទាំងថ្ម ដែលនេះគឺជាឃាតករលាក់មុខដែលសម្លាប់ជីវិតមនុស្សអស់ជាច្រើនមកហើយ ព្រោះពេលដែលលោកអ្នកត្រូវទឹករលកកួចចេញពីច្រាំងទៅហើយ នឹងគ្មានផ្លូវហែលត្រឡប់មករកច្រាំងវិញបានឡើយ ដូច្នេះវិធីដោះខ្លួនឱ្យរួចពីស្ថានការណ៍បែបនេះគឺ យើងមិនត្រូវហែលត្រឡប់មករកច្រាំងវិញបែបត្រង់ៗតាមសញ្ជាតិញាណរបស់យើងឡើយ តែចូរយើងហែលចេញទៅខាងស្ដាំ ឬខាងឆ្វេងជាមុនសិន ដើម្បីគេចវាងពីផ្ទាំងថ្មដែលធ្វើឱ្យកើតខ្សែទឹកហូរកួចបញ្ច្រាស់នោះ។

3 – រត់គេចពីសត្វក្រពើដេញត្របាក់

បើចៃដន្យលោកអ្នកទៅវាក់អ៊ើនឹងសត្វក្រពើបែបតទល់មុខគ្នានោះ ការរត់គេចពីវាទៅមុខត្រង់ៗ គឺជាកំហុសឆ្គងមួយ ព្រោះវាអាចរត់លឿនជាងលោកអ្នក ដូច្នេះ ការរត់ទៅឆ្វេងផងទៅស្តាំផង ឬរត់បែបបត់បែនឆ្វេងស្តាំនឹងធ្វើសត្វក្រពើដែលមានជើងខ្លីៗនោះនឹងមានបញ្ហាពេលបត់ និងរត់តាមលោកអ្នកមិនទាន់ និងដែលសំខាន់ គឺពេលលោកអ្នករត់រួចផុតពីខ្សែភ្នែករបស់វាហើយ នឹងធ្វើឱ្យលោកអ្នកមានឱកាសរស់ជីវិតច្រើន។

4 – ច្បាប់របស់លេខ 3 សម្រាប់ជីវិត

ច្បាប់ពាក់ព័ន្ធនឹងលេខ 3 ដែលមានសម្ព័ន្ធជាមួយនឹងការដោះខ្លួនឱ្យរួចជីវិតរបស់មនុស្សយើងគឺ ជាមធ្យមបើមនុស្សយើងគ្មានខ្យល់អាកាសដកដង្ហើម 3 នាទី នឹងអាចសន្លប់បាត់ស្មារតី បើគ្មានទឹកបរិភោគ 3 ថ្ងៃ រាងកាយនឹងចាប់ផ្តើមខ្វះជាតិទឹក និងបើគ្មានអាហារបរិភោគ 3 សប្តាហ៍ នឹងហុចផលអាក្រក់ដល់រាងកាយ និងពិតប្រាកដណាស់ បើសិនជាយូរជាងរយៈពេលនេះ វានឹងហុចផលឱ្យមនុស្សយើងស្លាប់បាត់បង់ជីវិតជាមិនខាន។

5 – បើមានវត្ថុអ្វីមួយមុតជាប់នៅនឹងរបួស

មនុស្សជាច្រើនជឿថា ការដែលត្រូវវត្ថុមុតស្រួច ឬកម្ទេចកែវមុតជាប់នៅក្នុងមុខរបួស រឿងដែលយើងគួរធ្វើមុនគេបំផុតគឺ ការយកវត្ថុនោះ ឬកម្ទេចកែវទាំងនោះចេញពីមុខរបួស តែនៅក្នុងស្ថានភាពពិតវិញ លោកអ្នកមិនគួរដក ឬយកកម្ទេចកែវ ឬវត្ថុអ្វីដែលមុតជាប់នៅលើមុខរបួសនោះចេញដោយខ្លួនឯងឡើយ ព្រោះនៅពេលណាដែលលោកអ្នកដក ឬយកវាចេញ ឈាមនឹងចាប់ផ្តើមហូរចេញមកឥតឈប់ឡើយ ហើយលោកអ្នកក៏មិនអាចបញ្ឈប់ឈាមដែលហូរចេញមកច្រើននោះដោយខ្លួនឯងបានដែរ។ រឿងដែលត្រូវធ្វើគឺ នៅឱ្យស្ងៀម ដើម្បីរង់ចាំគេនាំទៅមន្ទីរពេទ្យគឺជាការប្រសើរបំផុត៕

ស្រាវជ្រាវដោយ តាវ៉ែនតា

August 22, 2017

Smart ដាក់ឱ្យដំណើរការបច្ចេកវិទ្យា 4.5G ដោយអះអាងថា មានល្បឿនលឿនជាងមុន 8ដង

ក្រុមហ៊ុនបណ្ដាញទូរស័ព្ទចល័ត Smart កាលពីម្សិលមិញបានធ្វើការសម្ពោធដាក់ឱ្យប្រើប្រាស់នូវបច្ចេកវិទ្យា 4.5G មុខគេបង្អស់នៅកម្ពុជា ដែលក្រុមហ៊ុនមួយនេះនិយាយថា បច្ចេកវិទ្យាថ្មីនេះនឹងធ្វើឱ្យល្បឿនអ៊ីនធើណិតរបស់ខ្លួនមានល្បឿនលឿនជាងមុនរហូតដល់ 8 ដងបើប្រៀបធៀបនឹងប្រព័ន្ធចាស់។

លោក ថូម៉ាសហ៊ុន នាយកប្រតិបត្តិនៃក្រុមហ៊ុន Smart បានឱ្យដឹងថា បច្ចេកវិទ្យាថ្មីដែលខ្លួនទើបធ្វើការសម្ពោធដាក់ឱ្យប្រើប្រាស់នេះមានឈ្មោះថា 4.5G វាជាបច្ចេកវិទ្យាថ្មីដំបូងបង្អស់នៅកម្ពុជា អាចបង្កើនប្រសិទ្ធភាពបណ្តាញទូរស័ព្ទដែលនឹងផ្តល់ជូនអតិថិជន Smart នូវអ៊ីនធើណិតល្បឿនលឿនជាងមុន រួមផ្សំជាមួយបទពិសោធ និងការកម្សាន្តផ្សេងទៀតដែលផ្តល់ជូនដោយ Smart នៅលើសេវា 4G+ និង 4.5G ។ លោកថា៖ «បច្ចេកវិទ្យាថ្មីនេះ វាលឿនជាង 4G ធម្មតារហូតដល់ 8 ដង ក្នុងល្បឿនអតិបរមា 1Gbps»។

លោកបន្ដថា បច្ចុប្បន្ន Smart មានស្ថានីយបណ្តាញ 2G និង 3G ចំនួន 2300 កន្លែង និងស្ថានីយបណ្តាញ 4G LTE ចំនួន 1800 កន្លែងនៅទូទាំង 25 រាជធានី-ខេត្ត។ ការប្តេជ្ញាចិត្តរបស់ក្រុមហ៊ុន Smart ក្នុងការផ្តល់បណ្តាញអ៊ិនធើណិតចល័តលឿន និងធំបំផុតនៅកម្ពុជាអាចមើលឃើញយ៉ាងច្បាស់តាមរយៈការបង្កើនការវិនិយោគរបស់ខ្លួនជារៀងរាល់ឆ្នាំដើម្បីពង្រីកបណ្តាញ និងហេដ្ឋារចនាសម្ព័ន្ធរបស់ខ្លួនដែលស្របតាមចក្ខុវិស័យរបស់រាជរដ្ឋាភិបាលកម្ពុជាដែលចង់សម្រេចឱ្យបានការគ្របដណ្តប់ទូរស័ព្ទចល័ត100% នៅទីក្រុង និង70 % នៅទីជនបទត្រឹមឆ្នាំ 2020។

លោកបន្ថែមទៀតថា នៅឆ្នាំ 2017 នេះ Smart បានបោះទុនវិនិយោគចំនួន80លានដុល្លារដើម្បីពង្រីក និងកែលម្អបណ្តាញដើម្បីផ្តល់ជូនសេវាអ៊ីនធើណិត និងសេវាកម្មបែបឌីជីថលនានាបន្ថែមទៀត។ បន្ទាប់ពីបានក្លាយជាប្រតិបត្តិករដំបូងបង្អស់ដែលនាំយក 4G LTE និង 4G + មកកម្ពុជា ឥឡូវនេះ Smart បាននាំមកនូវ 4.5G ដល់កម្ពុជាទៀតហើយ ឯ5G ក៏នឹងគង់តែនាំមកដែរមិនខាន។

ក្រុមហ៊ុនកំពុងតែសិក្សាពីលទ្ធភាពបច្ចេកវិទ្យា 5G ដែលរួមមានបច្ចេកវិទ្យា Massive MIMO ដើម្បីធានាថា ខ្លួនបានត្រៀមរួចរាល់សម្រាប់ពេលដែលបទដ្ឋាន និងបច្ចេកវិទ្យានេះបានមកដល់។ 5G នឹងនាំមកនូវល្បឿនជាច្រើន Gbps សមត្ថភាពបណ្តាញធំទូលាយភាពយឺតយ៉ាវទាប និងសមត្ថភាពតភ្ជាប់ភ្លាមៗទៅនឹងឧបករណ៍ក្នុងពេលដំណាលគ្នា ដែលវានឹងអាចចាប់ផ្តើមដំណើរការនៅឆ្នាំ 2020៕

August 22, 2017

Costa ត្រូវបានបញ្ជាដោយ Atletico ឲ្យបង្កើតសន្តិភាពជាមួយ Chelsea

ខ្សែប្រយុទ្ធ Diego Costa ត្រូវបានប្រាប់ដោយក្លិប Atletico Madrid ឲ្យបង្កើតសន្តិភាពជាមួយនឹងក្លិប Chelsea នៅមុនពេលពួកគេនឹងធ្វើការពិចារណាទៅលើការទិញយករូបគេត្រឡប់ចូលក្លិបវិញ។ វាមានន័យថា ខ្សែប្រយុទ្ធរបស់ក្រុមតោខៀវរូបនេះ បច្ចុប្បន្នកំពុងតែស្ថិតក្រោមសម្ពាធកាន់តែធំក្នុងការវិលទៅកាន់ប្រទេសអង់គ្លេសវិញ ខណៈដែលការដោះស្រាយលើបញ្ហារបស់រូបគេកំពុងតែក្លាយជាដុំពពកខ្មៅនៅដើមរដូវកាលនេះ។

ក្លិបទាំងពីរ ពិតជាចង់បង្កើតឲ្យមានការព្រមព្រៀងគ្នាមួយ បើទោះបីពួកគេមិនចុះសម្រុងនឹងគ្នាទៅលើតម្លៃខ្លួនក៏ដោយ។ ក្លិប Chelsea បានស្នើសុំតម្លៃខ្លួន50លានផោន (ស្មើនឹង64.5លានដុល្លារអាមេរិក) ប៉ុន្តែ Atletico ត្រៀមផ្តល់តម្លៃខ្លួនត្រឹមតែពាក់កណ្តាលនៃតម្លៃស្នើសុំនោះប៉ុណ្ណោះ។ ខ្សែប្រយុទ្ធអន្តរជាតិអេស្ប៉ាញរូបនេះបានអវត្តមានអស់រយៈពេល5សប្តាហ៍មកហើយ ក្រោយពីមានជម្លោះជាមួយនឹងលោកគ្រូបង្វឹក Antonio Conte។ ស្របពេលជាមួយគ្នានេះ វាមានសញ្ញាតិចតួចណាស់ដែលអ្នកទាំងពីរអាចស្រុះស្រួលគ្នាវិញនោះ។ Costa វ័យ29ឆ្នាំ បាននិយាយថា រូបគេចង់លេងឲ្យតែអតីតក្លិបរបស់គេនៅលើទឹកដីអេស្ប៉ាញប៉ុណ្ណោះ ប្រសិនបើរូបគេគ្មានអនាគតជាមួយនឹង Chelsea ដែលជាម្ចាស់ជើងឯកក្របខ័ណ្ឌ Premier League។ ប៉ុន្តែ បញ្ហាជម្លោះនៅរដូវក្តៅនេះ កំពុងតែស្ថិតក្នុងភាពស្រពេចស្រពិល ខណៈដែលកីឡាកររូបនេះបានបដិសេធក្នុងការវិលទៅកាន់ការហ្វឹកហាត់នៅអង់គ្លេស ស្របតាមការទាមទាររបស់ក្លិប Chelsea។

Costa បានចោទប្រកាន់ថា រូបគេត្រូវបានចាត់ទុកដូចជា «ជនឧក្រិដ្ឋម្នាក់» អ៊ីចឹង ហើយថា រូបគេដូចជាសំរាមអ៊ីចឹង ក្រោយពីលោក Conte បានផ្ញើសារប្រាប់រូបគេថា រូបគេលែងមានអនាគតនៅក្នុងក្លិប Chelsea ហើយ។ Chelsea អាចនឹងធ្វើការពិន័យទៅលើប្រាក់បៀវត្សរ៍របស់គេរាល់ពេល2សប្តាហ៍ម្តង នៅពេលដែលរូបគេអវត្តមានដោយគ្មានការអនុញ្ញាត៕

ប្រភពពី៖ The Sun

August 22, 2017

ស្ដាប់សំដីរបស់តូតាហើយ ប្រុសៗដឹងតែពេញចិត្ដហ្មង!

បើទោះជាកញ្ញាតូតា ជាតារាសម្ដែងមានកេរ្ដិ៍ឈ្មោះបោះសំឡេង និងរូបសម្រស់ស្រស់ស្អាតក៏ដោយ តែនាងធ្លាប់បញ្ជាក់ថា នាងពុំចង់នៅលីវយូរពេកនោះទេ។

កាលពីមុនកញ្ញា ម៉ាក សែនសូនីតា ហៅតូតា ធ្លាប់បានបង្ហើបប្រាប់សារព័ត៌មានក្នុងស្រុកថា ពេលនាងមានអាយុត្រឹម 24-25 នាងនឹងជ្រើសរើសគូជីវិតហើយ ដ្បិតអីនាងមានអ្នកស្រឡាញ់ពេញបេះដូងទៅហើយ។ លុះមកដល់វ័យប៉ុណ្ណឹងនាងបែរជាលើកឡើងថា នាងមិនទាន់ចង់គិតទេ រហូតដល់គេគិតថា ការពន្យារពេលនេះបែបនេះបណ្ដាលមកពីនាងជួបបញ្ហាស្នេហា?

ជួបជាមួយកញ្ញាតូតា នាងបញ្ជាក់ថា សព្វថ្ងៃមានបុរសច្រើនណាស់ស្រឡាញ់នាង ម្នាក់ៗសុទ្ធតែជាបុរសល្អ និងស្ថិតនៅក្នុងលក្ខខណ្ឌដែលនាងចង់បាន ដែលមានទាំងអ្នកធ្វើការងារជាមន្ដ្រីរាជការអាចឱ្យនាងមានសិទ្ធិក្នុងការសម្រេចចិត្ដជ្រើសរើស។ នាងបន្ដថា៖ «មូលហេតុខ្ញុំចង់ពន្យារពេលគិតពីរឿងនេះ ដោយសារតែខ្ញុំចង់ទុកពេលវេលាមើលចិត្ដពួកគាត់ឱ្យបានច្បាស់ជាមុនសិន ដ្បិតអីរឿងអនាគតត្រូវគិតឱ្យបានល្អិតល្អន់។ ម្យ៉ាងក៏ជាពេលវេលាសម្រាប់ខ្ញុំចាប់យកឱកាសការងារក្នុងសិល្បៈដើម្បីបន្សល់កេរ្ដិ៍ឈ្មោះឱ្យបានច្រើនបន្ដិចសិនដែរ»។

កញ្ញាតូតា ប្រាប់ថា នាងដឹងថា បុរសទាំងនោះស្រឡាញ់នាង តែនាងត្រូវធ្វើយ៉ាងណាឱ្យប្រាកដក្នុងចិត្ដសិនថា ការស្រឡាញ់នោះចេញពីបេះដូងពិតមិនមែនជាក្ដីស្រឡាញ់ក្លែងក្លាយ។ ណាមួយនាងក៏ចង់ទុកពេលបង្កើតអាជីវកម្មផ្ទាល់ខ្លួនមួយដើម្បីឱ្យមានភាពរឹងប៉ឹងក្នុងជីវិតដែរ។ ជាមួយគ្នានេះដែរ តូតា ក៏បានបង្ហើបឱ្យដឹងថា ទោះបីនាងជាស្ដ្រីមែន តែក៏មិនចង់ដាក់បន្ទុកទាំងស្រុងលើស្វាមីក្រោយពេលរៀបការហើយដែរ។

នាងបញ្ជាក់ថា៖ «ចិត្ដខ្ញុំ បើទោះមានមុខរបរផ្ទាល់ខ្លួនធំដុំក៏ដោយ ក៏យើងមិនត្រូវធ្វើចរិតឆ្មើងឆ្មៃដាក់ស្វាមីដែរ ត្រូវមានការគោរពគ្នាទៅវិញទៅមកទៅរស់នៅមានសុភមង្គល»៕

August 22, 2017

Author: វល័ក្ខ