វល័ក្ខ - La Reine Media

អ្នកចង់បើកអាជីវកម្មលក់កាហ្វេ គួរតែអានអត្ថបទនេះ

ភ្នំពេញ – ស្របពេលអាជីវកម្មលក់កាហ្វេខ្នាតតូច-មធ្យមកាន់តែផុសផុលច្រើនឡើងនោះ មានយុវជនជាច្រើនចាប់ផ្ដើមមានគំនិតចង់បង្កើតអាជីវកម្មផ្ទាល់ខ្លួនផងដែរ។ ពួកគេតែងតែសួរខ្លួនឯងថា ប្រសិនអត់ចេះជំនាញនេះតើគួរចាប់ផ្ដើមអាជីវកម្មបែបណា?។

ថ្ងៃនេះឡារ៉ែន Online សូមនាំយកនូវពាក្យពេចន៍របស់អ្នកតំណាងក្រុមហ៊ុនមួយចំនួនដែលពាក់ព័ន្ធនឹងកិច្ចការទាំងនេះមកជម្រាបជូនទុកជាមធ្យោបាយដើម្បីឈានទៅដល់ការបើកអាជីវកម្ម។ អ្នកមានបទពិសោធក្នុងអាជីវកម្មលក់កាហ្វេជាច្រើននាក់បានប្រាប់ថា ដើម្បីចាប់អាចផ្ដើមអាជីវកម្មលក់កាហ្វេបានត្រូវគិតលើ3ចំណុចធំៗគឺ រកប្រភពកាហ្វេ ការរៀបចំទីតាំងឬតូប និងរកប្រភពផ្គត់ផ្គង់សម្ភារដូចជាកំប៉ុង ឬកែវជាដើម។

លោកភ្លី រ៉ហ្វីគីន បុគ្គលិកផ្នែកលក់នៃ Founan Café បានលើកឡើងថា សព្វថ្ងៃអ្នកមានបំណងចង់បង្កើតអាជីវកម្មលក់កាហ្វេច្រើនណាស់ ពិសេសក្រុមហ៊ុនលោកតែងតែទទួលបានម្ចាស់អាជីវកម្មថ្មីៗជាយុវវ័យ។ លោកបន្ដថា ការបើកហាងលក់កាហ្វេខ្នាតតូច និងមធ្យមលែងលំបាកដូចមុនហើយ ពោលគឺគ្រាន់តែទាក់ទងក្រុមហ៊ុនយើងខ្ញុំ និងបញ្ជាទិញម៉ាស៊ីនឆុងកាហ្វេខ្នាតតូច មធ្យម ឬធំ ពួកគាត់នឹងអាចទទួលបានការបង្រៀនពីវិធីឆុងកាហ្វេ និងការធ្វើភេសជ្ជៈជាច្រើនប្រភេទពីអ្នកជំនាញដោយឥតគិតថ្លៃ។

ម៉ាស៊ីនដែលក្រុមហ៊ុនលក់ មានខ្នាតតូចដែលមានតម្លៃក្នុងរង្វង់1700ដុល្លារ ខ្នាតមធ្យមក្នុងរង្វង់3500ដុល្លារ រីឯម៉ាស៊ីនខ្នាតធំចាប់ពី5000-6000ដុល្លារអាមេរិក។ ក្រុមហ៊ុនក៏មានផ្គត់ផ្គង់វត្ថុធាតុដើមសម្រាប់ដំណើការអាជីវកម្មនោះផងដែរ។

លោក គង់ ឈៀងឈុន ម្ចាស់អាជីវកម្ម គង់កី ជាក្រុមហ៊ុនទទួលច្នៃរទេះលក់កាហ្វេ បានលើកឡើងថា អាជីវកម្មរបស់លោកបានចាប់ផ្ដើមតាំងពីឆ្នាំ1992មកម្ល៉េះ ប៉ុន្ដែអ្នកប្រកបអាជីវកម្មលក់កាហ្វេមានការផុសផុលខ្លាំងនាពេលបច្ចុប្បន្នតាមរយៈការកុម្ម៉ង់ទិញរទេះរបស់លោក។ លោកបញ្ជាក់ថា អតិថិជនមានបំណង់ចង់បញ្ជាទិញរទេះលក់កាហ្វេ ពួកគាត់អាចមកក្រុមហ៊ុនដោយផ្ទាល់មើលគំរូរទេះ ឬក៏កុម្ម៉ង់ទៅតាមតម្រូវការរបស់ខ្លួន។ ក្នុងនោះមានតម្លៃចាប់ពីជាង300ដល់ជាង1000ដុល្លារអាមេរិក។

ម្ចាស់អាជីវកម្មរូបនេះបញ្ជាក់ថា៖ «អតិថិជនគាត់អាចកុម្ម៉ង់រទេះបានគ្រប់ប្រភេទទៅតាមតម្រូវការ តម្លៃវាអាស្រ័យទៅតាមប្រភេទរទេះនីមួយ។ ក្នុងករណីអតិថិជនពុំមានគំនិតក្នុងការកុម្ម៉ង់ក្រុមហ៊ុនយើងមានគំរូសម្រាប់ជ្រើសរើស»។

តំណាងក្រុមហ៊ុន TPH Display Equipment Supply ជាក្រុមហ៊ុនចែកចាយកំប៉ុងកាហ្វេ និងសម្ភារមួយចំនួនឱ្យក្រុមហ៊ុនកាហ្វេមានBrand ធំចំនួនពីរនៅក្នុងប្រទេសកម្ពុជា បានលើកឡើងថា ពាក់ព័ន្ធនឹងវិស័យកាហ្វេនេះក្រុមហ៊ុនលោកកំពុងតែផ្គត់ផ្គត់កំប៉ុងសម្រាប់ធ្វើការវេចខ្ចប់កាហ្វេ។

មានអ្នកនិយមញ៉ាំកាហ្វេជាច្រើនបានលើកឡើងថា ការញ៉ាំកាហ្វេក្រៅពីត្រូវការកាហ្វេរសជាតិឆ្ងាញ់ហើយនោះ សោភ័ណភាពរបស់កំប៉ុងក៏ជាចំណុចទាក់ទាញមួយយ៉ាងសំខាន់ដែរ។

តំណាងក្រុមហ៊ុនរូបនេះបញ្ជាក់ថា នៅក្រុមហ៊ុនរបស់យើងមានគំរូកំប៉ុងជាច្រើនសម្រាប់អតិថិជនសុទ្ធតែម៉ូដស្ដង់ដារទាំងអស់ ប៉ុន្ដែបើអតិថិជនមានគំនិតច្នៃប្រឌិតអ្វីប្លែកខុសពីគំរូនានានោះ ក្រុមហ៊ុនលោកក៏អាចមានសមត្ថភាពផលិតជូនបានដែរ៕

August 25, 2017

អ្នកអប់រំផ្តល់ដំបូន្មានដើម្បីគេចពីការបង្ខំឱ្យរៀនជំនាញដែលមិនពេញចិត្ត

ការសិក្សានៅថ្នាក់មហាវិទ្យាល័យ ជាជំហានថ្មីមួយដែលសិស្សកម្ពុជាត្រូវយកចិត្តទុកដាក់ ហើយក្នុងនោះការជ្រើសរើសជំនាញសិក្សាជាក្តីបារម្ភមួយដែលសិស្សទាំងអស់ពិបាកសម្រេចចិត្ត។ មានគ្រួសារខ្លះអាណាព្យាបាលដើរតួនាទីជាអ្នកតម្រង់ទិសសិក្សា តែគ្រួសារខ្លះឪពុកម្តាយបានកំណត់ដោយអត្តនោម័តិពីជំនាញដែលគាត់ស្រឡាញ់ខ្លួនឯងដើម្បីឱ្យកូនរបស់គាត់ចាប់ជាអាជីពសម្រាប់ជីវិត។

បញ្ហានៃការបង្ខំកូនឱ្យជ្រើសរើសជំនាញសិក្សានេះ បានជះឥទ្ធិពលអវិជ្ជមានដល់ការសិក្សារបស់កូន ឬអាចបង្កើតជាសម្ពាធធំមួយសម្រាប់ជីវិតរបស់ពួកគេ ព្រោះថានៅពេលដែលគេមិនបានសិក្សានូវជំនាញដែលខ្លួនស្រឡាញ់ គេនឹងមិនអាចទទួលបានផលល្អក្នុងការសិក្សានោះទេ។

ពាក់ព័ន្ធនឹងបញ្ហានេះ លោក គីម ដារ៉ា ស្ថាបនិកគ្រឹះស្ថានអប់រំ Start Up Cambodia បានលើកឡើងថា ការដែលអាណាព្យាបាលបង្ខំឱ្យរៀននូវអ្វីដែលយើងមិនស្រឡាញ់ វាធ្វើឱ្យយើងបាត់បង់កត្តាជំរុញ ហើយនៅពេលដែលយើងគ្មានកត្តាជំរុញវិជ្ជមាន យើងនឹងមិនអាចទទួលបានលទ្ធផលល្អក្នុងការសិក្សានោះទេ។ លោកបានបញ្ជាក់ផងដែរថា ដើម្បីដោះខ្លួនចេញពីការបង្ខំរបស់អាណាព្យាបាល លោកបានបង្កើនភាពរឹងមាំខ្លួនឯង តាមរយៈការពន្យល់ និងឧស្សាហ៍ប្រាប់ពីគុណតម្លៃ នៃអាជីពដែលគាត់ស្រឡាញ់ទៅឪពុកម្តាយ ដើម្បីឱ្យម្តាយឪពុកបានយល់ និងដឹងថាគាត់អាចមានជីវិតបែបណានៅថ្ងៃអនាគត។

លោក គីម ដារ៉ា បាននិយាយថា៖ «ឪពុកម្តាយចង់ឱ្យកូនក្លាយជាមនុស្សល្អនៅថ្ងៃអនាគត តែពេលខ្លះគាត់ស្តាប់យោបល់ពីមនុស្សជុំវិញខ្លួន ឬមិនទាន់ស្គាល់ពីអាជីពដែលយើងចង់រៀន ហេតុនេះប្រសិនបើយើងគ្មានជំហរច្បាស់លាស់ គាត់នឹងទាញយើងឱ្យសិក្សានូវជំនាញអ្វីដែលគាត់ខ្លួនឯងចូលចិត្ត»។

បង្ហាញពីចំណុចនេះដែរ លោកសាស្ត្រាចារ្យ ស៊ិន បញ្ញាវុឌ្ឍី សាស្ត្រាចារ្យសេដ្ឋកិច្ច និងជាសហអ្នកនិពន្ធសៀវភៅស្តីពីការជ្រើសរើសជំនាញសិក្សា ធ្លាប់បានបង្ហាញថា អាណាព្យាបាលដែលបង្ខំកូនឱ្យសិក្សានូវជំនាញដែលកូនមិនពេញចិត្តជាច្រើន តែងតែមិនសូវស្គាល់ពីអ្វីដែលកូននឹងធ្វើ ហើយគាត់ស្គាល់ជំនាញតិច និងសង្ឃឹមថាកូនរបស់គាត់អាចក្លាយជាមនុស្សដូចជាអ្នកដែលគាត់បានឃើញនៅជុំវិញខ្លួនគាត់។ ការដែលកូនព្យាយាមបង្ហាញនូវចំណុចវិជ្ជមាន ឬហ៊ាននិយាយដោយត្រង់ៗ ទៅកាន់អាណាព្យាបាល គាត់នឹងអាចបើកចិត្តទទួលយកគំនិតរបស់កូនៗ ព្រោះថាប្រសិនបើកូនៗមានភាពច្បាស់លាស់ អាណាព្យាបាលអាចនឹងទុកចិត្ត ឬមិនមានភាពរារែកនោះទេ ក្នុងការផ្គត់ផ្គង់ឱ្យរៀននៅថ្នាក់មហាវិទ្យាល័យ។

លោក សាស្ត្រាចារ្យ ស៊ិន បញ្ញាវុឌ្ឍី បានមានប្រសាសន៍ថា៖ «ដើម្បីឱ្យអាណាព្យាបាលយល់ពីអ្វីដែលយើងចង់ធ្វើនៅថ្ងៃអនាគត យើងត្រូវព្យាយាមសម្របជាមួយនឹងគាត់ជាមុនសិន ដើម្បីចូលឱ្យកៀកជាមួយគាត់ ហើយចាប់ផ្តើមបង្ហាញពីចំណង់ចំណូលចិត្តរបស់ខ្លួនពិតប្រាកដ និងបង្ហាញពីចំណុចដែលមិនអាចទៅរួច រួមទាំងផលវិបាកមួយចំនួនដែលកើតចេញពីជម្រើសរបស់អាណាព្យាបាលមកលើពួកយើង។ នៅពេលដែលធ្វើបែបនេះបាន អាណាព្យាបាលប្រាកដជាអាចបើកចិត្តទទួលយកនូវអ្វីដែលកូនស្រឡាញ់ ដើម្បីផ្តល់ឱកាសឱ្យពួកគេអភិវឌ្ឍខ្លួនឯងបានល្អ»៕

August 25, 2017

ក្រុមហ៊ុនជប៉ុន នឹងធ្វើឲ្យមនុស្សជំនាន់ថ្មីកម្ពុជា ចូលចិត្តរស់នៅក្នុងខុនដូ

ភ្នំពេញៈ ក្រុមហ៊ុនជប៉ុន បានសម្រេចបោះទុនប្រមាណ 60លានដុល្លារអាមេរិកដើម្បីវិនិយោគលើគម្រោងអចលនទ្រព្យចំនួន3 នៅទីក្រុងភ្នំពេញបន្ទាប់ពីក្រុមហ៊ុនមួយនេះ បានមើលឃើញពីឱកាសរីកចម្រើនខ្លាំងនៅកម្ពុជា។

លោក TAKASHI Eguchi អគ្គនាយកក្រុមហ៊ុនជប៉ុន CREED ASIA (Cambodia) Co, Ltd ដែលជាបុត្រសម្ព័ន្ធរបស់ CREED GROUP បានថ្លែងឲ្យដឹងកាលពីចុងសប្តាហ៍មុនថា ក្រុមហ៊ុនរបស់លោកបានសហការចាប់ដៃគូជាមួយក្រុមហ៊ុន TRIPLE GEM នៅឆ្នាំ2012 និងបានចាប់ផ្តើមវិនិយោគខុនដូ Bodaiju Residences នៅឆ្នាំ2013 ដែលរហូតមកទល់ពេលនេះ បានវិនិយោគលើគម្រោងខុនដូ និងបុរីមហាសែនសុខ និងបន្ទាប់ពីបុរីនេះ ទទួលបានជោគជ័យ ក្រុមហ៊ុនទាំងពីរបានចាប់ដៃគូជាមួយក្រុមហ៊ុន Hoosiers ដើម្បីចាប់ផ្តើមគម្រោងលំនៅដ្ឋានថ្មីមួយឈ្មោះ ARATA ដែលស្ថិតនៅលើទំហំផ្ទៃដី 12ហិកតា។

លោកបន្តថា “គម្រោងទាំង3នេះ ក្រុមហ៊ុនបានបោះទុនវិនិយោគប្រមាណ60លានដុល្លារអាមេរិក ដើម្បីឆ្លើយតបនឹងតម្រូវការរបស់ប្រជាពលរដ្ឋ ព្រោះប្រជាពលរដ្ឋកម្ពុជាមានការពេញនិយមរស់នៅក្នុងលំនៅដ្ឋានដែលនៅជាប់នឹងដី។ “តែរយៈពេល10ឆ្នាំខាងមុខ ខ្ញុំគិតថាប្រជាជនកម្ពុជានឹងផ្លាស់ប្តូរការគិត ហើយពួកគេចាប់ផ្តើមរស់នៅខុនដូ ដោយសារតម្លៃដីធ្លីនៅកណ្តាលក្រុងឡើងថ្លៃខ្ពស់។ នេះជាការបញ្ជាក់បន្ថែមរបស់លោក អគ្គនាយកក្រុមហ៊ុន។

លោកបានលើកយកបទពិសោធពីប្រទេសក្នុងតំបន់ថា ប្រជាជននៅទីក្រុងបាងកកក៏ដូចគ្នា ពួកគេចង់បានលំនៅដ្ឋានជាប់នឹងដី ប៉ុន្តែដោយសារទីក្រុងរីកចម្រើន តម្លៃដីធ្លីមានការកើនឡើងខ្ពស់ ពួកគេបានចាប់ផ្តើមរស់នៅតាមខុនដូវិញ។ នៅក្នុងទីក្រុងហូជីមីញក៏ដូចគ្នា ប្រជាជនប្រាថ្នារស់នៅផ្ទះជាប់នឹងដីដូចគ្នាប៉ុន្តែដោយសារដីមានតម្លៃថ្លៃ និងទីក្រុងកាន់តែចង្អៀត ពួកគេសម្រេចចិត្តរស់នៅតាមខុនដូ។ នាពេលអនាគតប្រជាជនវ័យក្មេងនៅទីនេះ ពួកគេនឹងរស់នៅតាមខុនដូដែលមានទីតាំងនៅក្បែរ ឬកណ្តាលទីក្រុង។

លោក TAKASHI Eguchi បានបន្តថា “ការរីកចម្រើនសេដ្ឋកិច្ចកម្ពុជា និងការកើនឡើងនូវក្នុងស្រទាប់ប្រជាជនមានប្រាក់ចំណូលមធ្យម ជាកាលានុវត្តន៍ភាពសម្រាប់យើងដែលត្រូវផ្តោតលើការវិនិយោគលំនៅដ្ឋានដើម្បីបំពេញតម្រូវការដល់ពួកគេ។ លោកបន្តថា “យើងនឹងវិនិយោគលើមូលដ្ឋានប្រជាជនដែលមានតម្រូវការពិតប្រាកដសម្រាប់ទីផ្សារជាក់ស្តែង”៕

August 25, 2017

Kane រំភើបពេលប៉ះ Real ខណៈ Spurs នឹងត្រូវជួប Bale ក្នុង Champions League

ក្រុមមាន់ខ្នាយមាស Tottenham នឹងត្រូវជួបក្រុមម្ចាស់ការពារតំណែងជើងឯក Real Madrid ក្នុងវគ្គចែកពូលនៃក្របខ័ណ្ឌ Champions League ក្រោយពីការចាប់ឆ្នោតមួយដែលត្រូវបានរៀបចំឡើងក្នុងប្រទេសម៉ូណាកូ កាលពីថ្ងៃព្រហស្បតិ៍កន្លងទៅ។

ក្រុម Spurs ត្រូវបានចាប់ឆ្នោតឲ្យស្ថិតក្នុងពូល H រួមជាមួយនឹងក្រុមយក្ស Real Madrid របស់អេស្ប៉ាញ ក្រុម Borussia Dortmund របស់អាល្លឺម៉ង់ និងក្រុម Apoel របស់ប្រទេសស៊ើប។ ការចាប់ឆ្នោតនេះ ក៏ធ្វើឲ្យ Tottenham ដែលជារងជើងឯកក្របខ័ណ្ឌ Premier League ត្រូវប៉ះជាមួយនឹងអតីតតារាឆ្នើមរបស់ខ្លួន Gareth Bale ដែលបានចាកចេញពីក្លិប Spurs ទៅកាន់ Real ក្នុងតម្លៃខ្លួនជាកំណត់ត្រាពិភពលោកកាលពីឆ្នាំ2013 ហើយ Bale នឹងត្រូវជួបជាមួយនឹងអតីតក្រុមរបស់គេជាលើកទី1ដែរ។ ដោយឡែក ក្រុមម្ចាស់ជើងឯករបស់ស្កុតលែនដ៍Celtic ស្ថិតក្នុងពូលដ៏តានតឹងមួយ ខណៈដែលពួកគេនឹងត្រូវជួបជាមួយនឹងក្រុម Bayern Munich, Paris St-Germain និង Anderlecht។

ក្រុម Chelsea ដែលជាម្ចាស់ជើងឯកក្របខ័ណ្ឌ Premier League ត្រូវបានចាប់ឆ្នោតឲ្យស្ថិតក្នុងពូលជាមួយនឹងក្រុម Atletico Madrid, Roma និង Qarabag ក្នុងពូល C ហើយក្រុម Manchester United ដែលជាម្ចាស់ជើងឯកក្របខ័ណ្ឌ EuropaLeague នឹងត្រូវប៉ះជាមួយនឹងក្រុម Benfica, Basel និង CSKA Moscow ក្នុងពូល A។ ខ្សែប្រយុទ្ធ Harry Kane របស់ Tottenham បានឲ្យដឹងថា៖ «វាជាការចាប់ឆ្នោតដ៏អស្ចារ្យមួយ។ អ្នកនឹងរំពឹងទុកពីការលេងជាមួយនឹងក្រុមខ្លាំងបំផុតនៅអឺរ៉ុបក្នុងក្របខ័ណ្ឌ Champions League ហើយវាពិតជារំភើបខ្លាំងណាស់សម្រាប់យើង។ យើងសម្លឹងឆ្ពោះទៅកាន់ការប្រកួតនេះ។ យើងចង់សាកល្បងខ្លួនយើងជាមួយនឹងក្រុមខ្លាំងបំផុត ហើយ Real Madrid គឺជាក្រុមខ្លាំងបំផុតនៅពេលនេះ»។ ការប្រកួតជុំបើកឆាកនឹងប្រព្រឹត្តទៅនៅថ្ងៃទី12 និងទី13 ខែកញ្ញា៕

ការចាប់ឆ្នោតកាលពីថ្ងៃព្រហស្បតិ៍ៈ
ពូល B
Bayern Munich, PSG, Anderlecht, Celtic

ពូល C
Chelsea, Atletico Madrid, Roma, Qarabag

ពូល D
Juventus, Barcelona, Olympiakos, Sporting Lisbon

ពូក E
Spartak Moscow, Sevilla, Liverpool, Maribor

ពូល F
Shakhtar Donetsk, Manchester City, Napoli, Feyenoord

ពូល G
Monaco, Porto, Besiktas, RB Leipzig

ពូល H
Real Madrid, Borussia Dortmund, Tottenham, APOEL

ប្រភពពី៖ BBC

August 25, 2017

វ៉ាន់ នីឡា ធ្វើឱ្យអ្នកគាំទ្រភ័យអរ និងលេបទឹកមាត់ក្អឿកៗ

ថ្មីៗនេះកញ្ញា វ៉ាន់ នីឡា បានធ្វើឱ្យអ្នកគាំទ្ររបស់ខ្លួនពិសេសមហាជននិយមលេងបណ្ដាញសង្គមហាក់មានអារម្មណ៍ព្រឺព្រួចភ័យអរជាមួយវីដេអូឃ្លីបដែលបានបង្ហោះពីសកម្មភាពនាងនៅពេលស្លៀកពាក់ឈុតរ៉ូបកូនក្រមុំ។

តើអ្វីទៅដែលធ្វើឱ្យមហាជនព្រឺព្រួចនោះ? គ្រាដែលវីដេអូឃ្លីបរបស់កញ្ញា វ៉ាន់ នីឡា តារាកំប្លែងប្រចាំស្ថានីយទូរទស្សន៍ CTN ត្រូវបានបង្ហោះខណៈនាងថតស្ប៉តឱ្យសម្អាងការមួយក្នុងសម្លៀកបំពាក់រ៉ូបកូនក្រមុំ គេមើលសឹងតែមិនស្គាល់ថាជារូបនាងផង ព្រោះនៅពេលនាងតុបតែងខ្លួនក្នុងឈុតកូនក្រមុំ រូបសម្ផស្សរបស់នាងពិតជាស្រស់ស្អាតខ្លាំងណាស់។

តែអ្វីដែលពិសេសនោះគឺ នៅពេលអ្នកកាន់ទូរស័ព្ទថតចុះឡើងដើរក្រឡឹងជុំវិញខ្លួននាងនោះបានធ្វើឱ្យអ្នកកំពុងតែទស្សនាភ័យអរៗក្នុងអារម្មណ៍ និងបុកពោះជំនួសនាង ព្រោះម្នាក់ៗគិតថា ប្រសិនបើនាងហ៊ានធ្វើប្រហែសតែបន្ដិច ច្បាស់ជាលេចចេញកន្លែងសំខាន់ឱ្យគេឯងឃើញមិនខាន ហើយក្នុងគ្រានោះទៀតសោត មើលទៅរូបនាងផ្ទាល់ក៏ហាក់ដូចជាពុំបានដឹងខ្លួនឡើយថា ប្រសិនបើនាងប្រហែសតែបន្តិច អ្នកមើលច្បាស់ជាបះសក់ និងលេបទឹកមាត់ក្អឿកមិនខាន៕

August 25, 2017

មន្ត្រីជាន់ខ្ពស់៖ កម្ពុជាកំពុងក្លាយទៅជាប្រទេសមានប្រាក់ចំណូលធុនកណ្តាល

ភ្នំពេញៈ មន្ត្រីជាន់ខ្ពស់ក្រសួងឧស្សាហកម្មបានថ្លែងថា កម្ពុជានឹងប្រែក្លាយទៅជាប្រទេសសេដ្ឋកិច្ចមួយដែលមានប្រាក់ចំណូលធុនកណ្តាល ដោយពឹងផ្អែកលើការអភិវឌ្ឍវិស័យឧស្សាហកម្ម កសិកម្ម ដែលជាកម្លាំងជំរុញកំណើនសេដ្ឋកិច្ចដ៏សំខាន់។

រដ្ឋលេខាធិការក្រសួងឧស្សាហកម្ម និងសិប្បកម្មលោក សាត សាមី បានថ្លែងលើកឡើងនៅក្នុងពិធីសម្ពោធពិព័រណ៍ឧស្សាហកម្មគ្រឿងយន្តកម្ពុជា-អន្តរជាតិឆ្នាំ2017 និងពិព័រណ៍ឧស្សាហកម្មសម្លៀកបំពាក់ និងវាយនភណ្ឌកម្ពុជា-អន្តរជាតិឆ្នាំ2017នាព្រឹកថ្ងៃទី25 ខែសីហានេះថា វិស័យឧស្សាហកម្មបានដើរតួយ៉ាងសំខាន់នៅក្នុងការជំរុញកំណើនសេដ្ឋកិច្ចជាតិ ក្នុងនោះរាជរដ្ឋាភិបាលកម្ពុជាបានអនុម័តនយោបាយអភិវឌ្ឍន៍វិស័យឧស្សាហកម្មកម្ពុជាសម្រាប់ឆ្នាំ2015-2025 យោងតាមទស្សនវិស័យឆ្នាំ2030 និងយុទ្ធសាស្ត្រចតុកោណដំណាក់កាលទី3 ក្នុងការប្រែក្លាយកម្ពុជាឲ្យក្លាយទៅជាប្រទេសសេដ្ឋកិច្ចមួយដែលមានប្រាក់ចំណូលធុនកណ្តាលដោយសង្កត់ធ្ងន់លើតួនាទីឧស្សាហកម្មជាកម្លាំងជំរុញកំណើនសេដ្ឋកិច្ចដ៏សំខាន់មួយនៅពេលអនាគត។

លោកបានបន្តទៀតថា សម្រាប់គោលបំណងរបស់ព្រិត្តិការណ៍តាំងពិព័រណ៍នេះ គឺជាការជំរុញអភិវឌ្ឍន៍វិស័យឧស្សាហកម្ម និងការវិនិយោគបរទេសនៅកម្ពុជា ជាពិសេសដើម្បីជំរុញសកម្មភាពនាំចេញ និងនាំចូល ហើយក្នុងពេលជាមួយគ្នានេះដែរ គឺជាការបង្កើតឱកាសសម្រាប់បណ្តាឧស្សាហករក្នុងការលើកកម្ពស់គ្រឿងឧបករណ៍ បរិក្ខារ ការស្វែងរកកិច្ចសហប្រតិបត្តិការគ្នា និងកាលានុវត្តន៍ធុរកិច្ចថ្មីៗ ក្នុងនោះកម្ពុជាត្រូវការធ្វើពិពិធកម្មលើសកម្មភាពសេដ្ឋកិច្ច និងជំរុញការនាំចេញឲ្យបានសម្រេចកំណើនសេដ្ឋកិច្ចខ្ពស់ប្រកបដោយនិរន្តរភាព និងការអភិវឌ្ឍផលិតផលបន្ថែមទៀតលើតម្លៃឲ្យកាន់តែខ្ពស់៕

August 25, 2017

កម្ពុជាស្នើឱ្យអាមេរិក គោរពការសន្យាក្នុងការអនុគ្រោះពន្ធក្រោមក្របខ័ណ្ឌ WTO

ភ្នំពេញ៖ ក្នុងកិច្ចជំនួបពិភាក្សាការងារជាមួយលោកស្រី Marta Prado នាយិកាកិច្ចការអាស៊ីអាគ្នេយ៍ និងប៉ាស៊ីហ្វិកតំណាងពាណិជ្ជកម្មសហរដ្ឋអាមេរិក អមដោយលោកស្រី Desiree GANZ នាយិកាផ្នែកការងារតំណាងពាណិជ្ជកម្មសហរដ្ឋអាមេរិក លោក Scott Schlossberg មន្ត្រីនយោបាយសេដ្ឋកិច្ច និងលោក David Sequeira មន្ត្រីសេដ្ឋកិច្ច និងពាណិជ្ជកម្មរបស់ស្ថានទូតសហរដ្ឋអាមេរិកប្រចាំនៅកម្ពុជា ឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្ម បានស្នើឱ្យសហរដ្ឋអាមេរិកបំពេញកាតព្វកិច្ចដែលខ្លួនបានសន្យាក្នុងនាមជាប្រទេសអភិវឌ្ឍន៍ថា នឹងផ្តល់ជូនកម្ពុជា និងប្រទេសអភិវឌ្ឍន៍តិចតួចដទៃទៀតនូវការអនុគ្រោះពន្ធក្រោមក្របខ័ណ្ឌអង្គការពាណិជ្ជកម្មពិភពលោក (WTO)។

ក្នុងជំនួបនេះឯកឧត្តមរដ្ឋលេខាធិការបានលើកឡើងថា យោងតាមស្មារតីនៃសេចក្តីប្រកាសរួមរបស់សន្និសីទថ្នាក់រដ្ឋមន្ត្រីនៅទីក្រុងហុងកុង រដ្ឋាភិបាលសហរដ្ឋអាមេរិកបានសន្យាថា នឹងផ្តល់ឱ្យប្រទេសអភិវឌ្ឍន៍តិចតួច (ក្នុងនោះរួមមានកម្ពុជា) នូវការអនុគ្រោះពន្ធនាំចូលទៅកាន់ទីផ្សារសហរដ្ឋអាមេរិកឱ្យបានយ៉ាងតិច 97% ក្នុងលក្ខខណ្ឌពន្ធគយសេរី-កូតាសេរី (GSP-DFQF) របស់អង្គការពាណិជ្ជកម្មពិភពលោក។ ប៉ុន្តែគិតមកត្រឹមឆ្នាំ2017នេះ ប្រទេសដែលជាដៃគូពាណិជ្ជកម្មធំបំផុតទី2របស់កម្ពុជាមួយនេះបានផ្តល់នូវការអនុគ្រោះពន្ធត្រឹមតែ 82,6%តែប៉ុណ្ណោះ។ ឯកឧត្តមរដ្ឋលេខាធិការបានបន្តថា ប្រទេសអភិវឌ្ឍន៍មួយចំនួនធំបានបំពេញកាតព្វកិច្ចត្រឹមត្រូវទៅតាមការសន្យារបស់ពួកគេរួចរាល់ហើយ ក្នុងនោះមានប្រទេសអូស្ត្រាលី នូវែលហ្សេឡង់ ន័រវេស៍ និងស្វ៊ីស បានផ្តល់នូវការអនុគ្រោះពន្ធចំនួន 100% សហគមន៍អឺរ៉ុបបានផ្តល់ចំនួន 99% ក្រោមក្របខ័ណ្ឌ EBA (Everything But Arms) កាណាដា 98,6% ជប៉ុន 97,9% ហើយចិនបានផ្តល់ 97%។

ឯកឧត្តមរដ្ឋលេខាធិការបានបន្ថែមថា មុខទំនិញដែលសហរដ្ឋអាមេរិកបានផ្តល់ឱ្យកម្ពុជាក្នុងរង្វង់ 82,6% នោះ មិនមានផលិតផលសក្តានុពលសំខាន់ៗណាដែលកម្ពុជាអាចផលិត និងនាំចេញទៅកាន់ទីផ្សារសហរដ្ឋអាមេរិកក្នុងនាមជាប្រទេសក្រីក្រនោះទេ ពោលគឺផលិតផលសក្តានុពលទាំងនោះសុទ្ធតែជាប់កាតព្វកិច្ចបង់ពន្ធដូចបណ្តាប្រទេសអភិវឌ្ឍន៍នានាដទៃទៀត ដែលមានសេដ្ឋកិច្ចរីកចម្រើនជាងកម្ពុជាដែរ។ ក្នុងនាមក្រសួង ឯកឧត្តមរដ្ឋលេខាធិការបានស្នើឱ្យសហរដ្ឋអាមេរិកដាក់បញ្ចូលមុខទំនិញសំខាន់ៗរបស់កម្ពុជា រួមមាន ខោអាវ និងផលិតផលផ្សេងទៀតដែលស្ថិតនៅក្នុងលេខកូដ 338, 339, 347, 348, 647, 648, 334, 634, 638, 639, 335និង635ឱ្យស្ថិតក្នុងប្រព័ន្ធអនុគ្រោះពន្ធ ដើម្បីធានាថា កម្ពុជានឹងទទួលបានអត្ថប្រយោជន៍ពិតប្រាកដពីការនាំចេញទៅកាន់សហរដ្ឋអាមេរិក។

ជាការឆ្លើយតបលោកស្រី Marta Prado បានស្នើឱ្យភាគីកម្ពុជាពិនិត្យឡើងវិញនូវមុខទំនិញដែលកម្ពុជាទទួលបានការអនុគ្រោះពន្ធពីសហរដ្ឋអាមេរិក ស្របពេលដែលអាមេរិកបាននិងកំពុងប្រកាសឱ្យបណ្តាប្រទេសដែលនឹងត្រូវទទួលផលក្រោមច្បាប់របស់ខ្លួនពិនិត្យឡើងវិញនូវប្រព័ន្ធអនុគ្រោះពន្ធ (GSP) សម្រាប់ឆ្នាំ2017។ ភាគីសហរដ្ឋអាមេរិកបានស្នើឱ្យក្រសួងពាណិជ្ជកម្មចូលរួមពិនិត្យបន្ថែមលើសេចក្តីព្រាងច្បាប់ស្តីអំពីប្រាក់ឈ្នួលអប្បបរមា និងសេចក្តីព្រាងច្បាប់ស្តីអំពីការដោះស្រាយវិវាទដែលស្ថិតក្រោមដែនសមត្ថកិច្ចរបស់ក្រសួងការងារ និងបណ្តុះបណ្តាលវិជ្ជាជីវៈ។

គួររំឭកផងដែរថា ជំនួបពិភាក្សាលើកនេះគឺជាការពិភាក្សាការងារបន្តក្រោយពីកម្ពុជាបានដឹកនាំប្រតិភូទៅកាន់សហរដ្ឋអាមេរិកដើម្បីចូលរួមកិច្ចប្រជុំក្រុមប្រឹក្សាចម្រុះស្តីពីក្របខ័ណ្ឌកិច្ចព្រមព្រៀងពាណិជ្ជកម្ម និងវិនិយោគលើកទី4 នៅរដ្ឋធានីវ៉ាស៊ីនតោនកាលពីពេលកន្លងទៅថ្មីៗនេះ។ នៅក្នុងកិច្ចប្រជុំខាងលើ កម្ពុជា-អាមេរិកបានឯកភាពគ្នាបង្កើតឱ្យមានក្រុមការងារជំនាញតូចៗ ដើម្បីពន្លឿនការអនុវត្តកិច្ចព្រមព្រៀង TIFA នេះ៕

August 25, 2017

គ្រូបង្រៀន «សាលារៀនជំនាន់ថ្មី NGS» ទទួលបានកុំព្យូទ័រ Google Chromebooks ក្នុងការបង្រៀន

សាលារៀនជំនាន់ថ្មី (NGS) ដែលស្ថិតក្នុងបរិវេណវិទ្យាល័យស៊ីសុវត្ថិ រាជធានីភ្នំពេញត្រូវបានបំពាក់សុទ្ធតែកុំព្យូទ័រ Google Chromebooks សម្រាប់គ្រូបង្រៀនដើម្បីផ្ដល់លទ្ធភាពដល់ការបង្រៀនឱ្យកាន់តែមានប្រសិទ្ធភាពដល់សិស្សានុសិស្ស។

ការដាក់ឱ្យប្រើប្រាស់កុំព្យូទ័រថ្មីនេះ ធ្វើឡើងរវាងក្រុមហ៊ុន MYTEB សហការជាមួយនឹងអង្គការ KAPE និងក្រសួងអប់រំយុវជន និងកីឡា (MoEYS) ក្នុងការដាក់សាកល្បងឱ្យប្រើប្រាស់កុំព្យូទ័រ Google Chromebooks សម្រាប់គ្រូបង្រៀននៅក្នុងសាលារៀនជំនាន់ថ្មី NGS។ គម្រោងកម្មវិធីរបស់សាលារៀន NGS មានគោលដៅក្នុងការបង្កើតសាលារៀនដែលជួយរៀបចំយុវជនកម្ពុជាដើម្បីធ្វើការប្រកួតប្រជែងនៅក្នុងសតវត្សរ៍ទី 21 តាមរយៈការពង្រឹងទៅលើការសិក្សារៀនសូត្រនៅក្នុងមុខវិជ្ជាជាច្រើនរបស់ STEM។

ឆាប់ៗនេះ គ្រូបង្រៀនជាច្រើននៅសាលារៀនជំនាន់ថ្មី (NGS) ទូទាំងប្រទេសនឹងមានឱកាសបានប្រើប្រាស់កុំព្យូទ័រ HP Chromebook 11 ក្នុងការបង្រៀនហើយ។ កុំព្យូទ័រ HP Chromebook 11 នឹងផ្តល់ឱ្យពួកគេនូវវិធីសាស្ត្រថ្មីមួយទៀតក្នុងការបង្រៀន និងការរៀនសូត្រដោយបញ្ចូលនូវដំណោះស្រាយពីប្រភពដ៏មានប្រយោជន៍ជាច្រើនដែលជួយឱ្យការសិក្សា និងការសហការរបស់ពួកគេកាន់តែប្រសើរឡើងតាមរយៈការប្រើប្រាស់សេវាកម្ម Cloud ។

កុំព្យូទ័រ HP Chromebook 11 ដំណើរការភ្លាមៗ (Instant Boot) មិនរង់ចាំចំណាយពេលយូរក្នុងការបើកដំណើរការ មានការការពារពីមេរោគបាន 100% មានការទាញយកកម្មវិធីសម្រាប់សិក្សារាប់ពាន់ចេញពី Chrome Web Store ឥតគិតថ្លៃ និងការប្រើប្រាស់សេវាកម្ម Cloud Storage ឥតដែនកំណត់សម្រាប់សាលារៀន។ នេះហើយជាហេតុផលដែលកុំព្យូទ័រ Google Chromebooks ត្រូវបានជ្រើសរើសប្រើប្រាស់នៅក្នុងសាលារៀនច្រើនជាង 50% នៅក្នុងទឹកដីសហរដ្ឋអាមេរិក។

គួររំឭកដែរថា៖ សាលារៀនជំនាន់ថ្មីត្រូវបានបង្កើតឡើងក្រោយពីមានការចុះកិច្ចព្រមព្រៀងរវាងក្រសួងអប់រំ យុវជន និងកីឡា ជាមួយនឹងអង្គការសកម្មភាពសម្រាប់បឋមសិក្សានៅកម្ពុជា (KAPE) កាលថ្ងៃទី1 ខែតុលា ឆ្នាំ 2015 ក្រោមអធិបតីភាពឯកឧត្តមបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក សៅ វណ្ណា នាយកប្រតិបត្តិអង្គការ KAPE ។

គម្រោង “សាលារៀនជំនាន់ថ្មី” ជាគម្រោងពិសេសដើម្បីណែនាំពីគោលការណ៍ អភិបាលកិច្ចដ៏មានប្រសិទ្ធភាព ដែលត្រូវបានប្រើប្រាស់នៅក្នុងវិស័យឯកជនទៅដល់ប្រព័ន្ធសាលារៀនសាធារណៈ ដោយប្រើប្រាស់គម្រោងការគ្រប់គ្រងបែបជាដៃគូរវាងគ្រឹះស្ថានសិក្សាសាធារណៈ និងឯកជន ដើម្បីរក្សានិរន្តរភាព បរិស្ថានសាលាកុមារមេត្រី ដែលមានគុណភាពខ្ពស់សម្រាប់សិស្សានុសិស្សនៅតាមជនបទ និងជុំវិញរាជធានីភ្នំពេញ៕

August 25, 2017

Mayweather នឹងទទួលបានតម្លៃខ្លួនច្រើនជាង McGregor ពីរដង ពេលប៉ះគ្នាថ្ងៃសៅរ៍នេះ

រយៈពេល2ឆ្នាំ ក្រោយពីការចូលនិវត្តន៍ពីកីឡាប្រដាល់ កីឡាករ Floyd Mayweather នឹងត្រូវវិលទមកកាន់សង្វៀនប្រកួតវិញនៅថ្ងៃសៅរ៍នេះ (ត្រូវនឹងព្រឹកថ្ងៃអាទិត្យនៅកម្ពុជា) ដើម្បីបង្កើតប្រវត្តិសាស្ត្រ និងទទួលបានប្រាក់តម្លៃខ្លួនដ៏ច្រើនសន្ធឹកសន្ធាប់ម្តងទៀត។

អតីតម្ចាស់ខ្សែក្រវាត់ពិភពលោកទម្ងន់ 66.7គីឡូក្រាមវ័យ 40ឆ្នាំរូបនេះ នឹងក្លាយជាកីឡាករប្រដាល់ដំបូងគេក្នុងប្រវត្តិសាស្ត្រ ក្នុងការកត់ត្រាជ័យជម្នះដល់ទៅ 50លើក ប្រសិនបើរូបគេអាចយកឈ្នះលើអ្នកប្រយុទ្ធក្បាច់គុនចម្រុះ Conor McGregor ដែលធ្វើការប្រកួតប្រដាល់អាជីពជាលើកទី1របស់គេ។ បើទោះបីជាប្រកួតក្នុងប្រភេទកីឡាផ្សេងគ្នាក៏ដោយ ប៉ុន្តែកីឡាករទាំងពីរនឹងត្រូវប្រកួតគ្នាក្រោមច្បាប់កីឡាប្រដាល់អាជីពរយៈពេល12ទឹកនៅថ្ងៃសៅរ៍នេះ ខណៈដែល McGregor សញ្ជាតិអៀរឡង់ ត្រូវបានគេរំពឹងទុកថា ជាកីឡាករមានក្តីសង្ឃឹមតិចណាស់ក្នុងការឈ្នះការប្រកួតនេះ។ ប៉ុន្តែ ទោះបីជាយ៉ាងណា ម្ចាស់ខ្សែក្រវាត់ពីរសម័យកាលរបស់ស្ថាប័នរៀបចំការប្រកួតយុទ្ធគុនចម្រុះ UFC របស់អាមេរិករូបនេះ បានបញ្ជាក់ក្នុងសន្និសីទសារព័ត៌មានកាលពីថ្ងៃពុធថា រូបគេនឹងបំបាក់ឆ្អឹងរបស់ Mayweather ហើយនិងបញ្ចប់ការប្រកួតនៅត្រឹមទឹកទី1 ឬទឹកទី2ប៉ុណ្ណោះ។

McGregor វ័យ 29ឆ្នាំ មានកំណត់ត្រាឈ្នះក្នុងការប្រកួតវាយដាក់ទ្រុងចំនួន21លើក ចាញ់ 3លើក ក្នងនោះផ្តួលដៃគូឲ្យសន្លប់18លើក។ ជាមួយគ្នានេះដែរ មានមតិជាច្រើនទៅលើតម្លៃខ្លួនរបស់កីឡាករទាំងពីរសម្រាប់ការប្រកួតនៅព្រឹកថ្ងៃអាទិត្យនេះ ប៉ុន្តែ បើយោងទៅតាមការព្យាករនានា Mayweather អាចនឹងទទួលបានតម្លៃខ្លួន 200លានដុល្លារអាមេរិក ខណៈដែល McGregor នឹងទទួលបាន 100លានដុល្លារអាមេរិក៕

ប្រភពពី៖ ESPN

August 25, 2017

សុវណ្ណ មករា បន្ដសំណួរចាក់ដោតបេះដូងគូជម្លោះទៀតហើយ

ក្រោយលោក ហេង ឡុង បានដាក់ពាក្យបណ្ដឹងទៅលើលោកសុវណ្ណ មករា ពីបទបរិហាកេរ្ដិ៍ និងនៅមិនទាន់មានចំណាត់ការណាមួយពីសមត្ថកិច្ចនោះ ស្រាប់តែថ្មីៗនេះលោកសុវណ្ណ មករា បានសរសេរសារចាក់ដោតបេះដូងលោក ហេង ឡុង ទៀតហើយ។

វាមិនខុសពីអ្វីដែលមហាជនបានលើកឡើងនោះទេ ដើម្បីបញ្ចប់រឿងរ៉ាវទាំងឡាយ ឬធ្វើឱ្យលោក សុវណ្ណ មករា លែងហ៊ានសួរនាំពីរឿងនេះមានតែលោកហេង ឡុង ឬអ្នកនាងចន ច័ន្ទលក្ខិណា បង្ហាញភ័ស្ដុតាងដែលអាចបញ្ជាក់ពីការចំណាយថវិកាដែលបានមកពីការប្រមូលមូលនិធិរាត្រីកតញ្ញូដោយតម្លាភាពទេ ទើបវាចប់រឿង ព្រោះចាប់តាំងពីផ្ទុះរឿងឡើងមក ស្ទើរតែរាល់លើកលោកសុវណ្ណ មករា សរសេរសារមិនដែលចោលសំណួរដែលសួរពីរឿងលុយនោះទេ។

ទោះយ៉ាងណាអ្នកទាំងពីរ (ហេង ឡុង និងចន ច័ន្ទលក្ខិណា)អាចធ្វើតាមរយៈបណ្ដាញសង្គម ឬធ្វើសន្និសីទកាសែតក៏បាន ដើម្បីឱ្យអ្នកសារព័ត៌មានក្នុងស្រុកជួយធ្វើការផ្សព្វផ្សាយបន្ថែមទៀតឱ្យមហាជនលែងមានការយល់ច្រឡំ។ ដូច្នេះ សួរថា តើលោកហេង ឡុង និងអ្នកនាង ចន ច័ន្ទលក្ខិណា ពេញចិត្ដបញ្ចប់រឿងនេះដែរឬទេ? ឬក៏អ្នកទាំងពីរមានវិធីអ្វីផ្សេងដើម្បីបញ្ចប់រឿងនេះ? យ៉ាងណាមហាជននឹងរងចាំមើលបន្ដទៀត។

តទៅនេះជាសារដែលលោកសុវណ្ណ មករា សរសេរបន្ថែមទៀត៖ «ល្មមឆ្លើយបាននៅពូថាតើប្រាក់ដែលបានមកពីមូលនិធិរាត្រី កតញ្ញូ ដែលធ្វើនៅអូតែលសុខា មានចំនួនទឹកប្រាក់ដូចជាប្រហែល សាមសិបប្រាំម៉ឺនដុល្លារសហរដ្ឋ អាមេរិក នោះ តើសល់ប៉ុន្មាន អីប៉ុន្មាន? តើប្រើការទៅលើអីខ្លះ? អូភ្លេច! រឿងដែលលោកប្ដឹងនោះ ក៏ប្ដឹងទៅ តែខ្ញុំនៅប្រកាន់គោលការណ៍ដដែល បើចាញ់ក្ដីសុំសងតាមគោលការណ៍បក្សរបស់អ្នកឯងដែលធ្លាប់ជ្រកកោន កាលគ្រានៅក្រ។ ទោះឈ្នះ ឬចាញ់មិនសំខាន់ទេ តែអ្វីដែលសំខាន់នោះគឺសូមមេត្តាឆ្លើយមក តើនៅសល់ប៉ុន្មាន? ហើយចាយទៅលើអីខ្លះ? បើឃើញតែចែកជូន លោកអ៊ុំ ពូមីង ដូចជា ម្នាក់ៗបើគិតជាប្រាក់ដុល្លារទៅប្រហែល 200$ ទៅ300$ ដុល្លារតែប៉ុណ្ណោះ»៕

August 25, 2017

Author: វល័ក្ខ