វល័ក្ខ - La Reine Media

ទូរទស្សន៏ LG OLED ឈ្នះពានរង្វាន់ EISA AWARDS

ថ្មីៗនេះ ទូរទស្សន៍ LG OLED ត្រូវបានសមាគមរូបភាព និងសំឡេងអឺរ៉ុប (EISA) ឱ្យឈ្មោះជាទូរទស្សន៍ OLED ដ៏ល្អបំផុតប្រចាំឆ្នាំម្ដងទៀត ដែលនេះជាជ័យជម្នះ 5 ឆ្នាំជាប់គ្នាសម្រាប់បច្ចេកវិទ្យា OLED របស់ LG ។ ដោយក្នុងនោះ ទូរទស្សន៏ដំបូងគេរបស់ LG ដែលឈ្នះពានរង្វាន់ EISA OLED TV 2017-2018 គឺទូរទស្សន៍ OLED ម៉ូដែល (OLED65E7) ត្រូវបានគេកោតសរសើរយ៉ាងខ្លាំងចំពោះគុណភាពរូបភាពដ៏ល្អឥតខ្ចោះ និង Wide Angle យ៉ាងធំទូលាយ។

ពានរង្វាន់ EISA ត្រូវបានរៀបចំឡើងជារៀងរាល់ឆ្នាំដោយមានការចូលរួមពីក្រុមចៅក្រមផ្នែកសម្រួលពីទស្សនាវដ្តីសំឡេងដែលមានឥទ្ធិពល (AV) ដែលមានមូលដ្ឋាននៅបណ្តាប្រទេសអឺរ៉ុប សហរដ្ឋអាមេរិក និង អូស្ត្រាលី។ ការវិនិច្ឆ័យផ្អែកលើបច្ចេកវិទ្យាការនៃការរចនានឹងការច្នៃប្រឌិតខ្ពស់។

សម្រាប់ទូរទស្សន៍ LG ស៊េរីផ្សេងទៀតដែលបានទទួលស្គាល់នៅក្នុងកម្មវិធី EISA AWARDS គឺ LG SUPER UHD TV (model 55SJ850V)។ លក្ខណៈពិសេសរបស់ LG SUPER UHD TV មានដូចជា៖ ពណ៏ដែលមានភាពច្បាស់ល្អ រូបភាពផ្ដុំជ្រុងធំដែលជំរុញដោយបច្ចេកវិទ្យា LG’s Nano Cell™ និង បំពាក់ទៅដោយ webOS 3.5។ LG SUPER UHD TV ក៏បានបំពាក់ទៅដោយបច្ចេកវិទ្យា Active HD ដែលធ្វើឱ្យឈុតឆាកទាំងអស់មានភាពរស់រវើកមកពីគ្រប់ជ្រុងទាំងអស់។

លើសពីនេះទៀត LG Sound Bar (ម៉ូដែល SJ9) ក៏បានទទួលពានរង្វាន់ EISA Sound bar 2017-2018 លើការរចនាយ៉ាងឆើតឆាយរបស់វា ជាមួយនឹងសំឡេងច្បាស់ល្អតាមរយៈការបំពាក់ទៅដោយបច្ចេកវិទ្យា Dolby Atmos ។ ជាមួយនឹង Dolby Atmos សំឡេងអាចមានប្រភពចេញពីកន្លែងណាមួយនៃ dimensional space ទាំង 3។

លោក Brian Kwon ប្រធានក្រុមហ៊ុន LG Home Entertainment បានមានប្រសាសន៏ថា៖ ក្រុមហ៊ុន LG សូមអរគុណដល់សមាជិកនៃគណៈកម្មធិការពានរង្វាន់ EISA ដែលបានវិនិច្ឆ័យ និងទទួលស្គាល់ជាថ្មីម្តងទៀតលើបច្ចេកវិទ្យា OLED និង ឧបករណ៍កម្សាន្តរបស់យើង។ លោក Brian Kwon ក៏បានមានប្រសាសន៏ទៀតដែរថា ទូរទស្សន៍ OLED យើង និងនៅតែបន្តជាអ្នកដឹកនាំនៅក្នុងទីផ្សារ premium TV ជាមួយនឹងផលិតផលដែលទទួលស្គាល់សម្រាប់បច្ចេកវិជ្ជាល្អឥតខ្ចោះ រូបភាពច្បាស់ល្អ និងរស់រវើក៕

August 26, 2017

ចំនួនភ្ញៀវទេសចរទស្សនាខេត្តព្រះសីហនុកើនឡើងជាង 10%

ភ្នំពេញ៖ បន្ទាប់ពីឆ្នេរសមុទ្រកម្ពុជាត្រូវបានប្រកាសចូលជាសមាជិកឆ្នេរសមុទ្រស្អាត នៅលើពិភពលោក ឬហៅថាតារារះនៅទិសនិរតីមក បានធ្វើឱ្យឆ្នេរសមុទ្រកំពង់សោម កាន់តែមានសក្តានុពលខ្លាំងឡើងក្នុងការទាក់ទាញភ្ញៀវទេសចរ។

ជាក់ស្តែងភ្ញៀវទេសចរដែលមកកម្សាន្តនៅខេត្តព្រះសីហនុ រយៈពេល6ខែ ដើមឆ្នាំ2017 មានចំនួនប្រមាណជិត25ម៉ឺននាក់ កើនឡើង10.65%ដែលក្នុងនោះទេសចរជនជាតិចិនមានចំនួន58,943នាក់ កើនឡើង132,43%ធៀបនឹងរយៈពេលដូចគ្នាក្នុងឆ្នាំ2016 ដែលកំណើនដ៏ខ្លាំងនេះបានបង្ហាញឱ្យឃើញនូវឱកាសការងារដ៏ធំធេងសម្រាប់កម្ពុជាយើង។

ក្នុងពិធីបើកវគ្គបណ្តុះបណ្តាលមគ្គុទ្ទេសក៍ទេសចរណ៍តំបន់ឆ្នេរឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍បានមានប្រសាសន៍ជំរុញឱ្យយុវជននៅតំបន់ឆ្នេរខិតខំពង្រឹងសមត្ថភាពឱ្យកាន់តែខ្លាំងឡើងដើម្បីក្លាយជាមគ្គុទ្ទេសក៍ទេសចរណ៍ដ៏ពូកែឆ្លើយតបនឹងសេចក្តីត្រូវការរបស់ទេសចរដែលមកទស្សនាតំបន់ឆ្នេរដ៏ច្រើនកុះករក្រោយចូលជាសមាជិកនៃក្លិបឆ្នេរដ៏ស្អាតបំផុតលើពិភពលោក។ ឯកឧត្តមមានប្រសាសន៍ថា វគ្គបណ្តុះបណ្តាលនេះគឺជាការផ្តល់ជំនាញ និងការងារជូនយុវជនកម្ពុជា ជាយុទ្ធសាស្ត្រអាទិភាពមួយដែលក្រសួងទេសចរណ៍បានយកចិត្តទុកដាក់ខ្ពស់ដើម្បីអភិវឌ្ឍវិស័យទេសចរណ៍ប្រកបដោយនិរន្តរភាព និងបរិយាបន្នដោយឈរលើទស្សនទាន «ស្អាត និងបៃតង»។ ក្នុងន័យនេះ ក្រសួងបានលើកទឹកចិត្តដល់ប្រតិបត្តិករទេសចរណ៍ គ្រឹះស្ថានអប់រំបណ្ដុះបណ្ដាល និងភាគីពាក់ព័ន្ធនានាឱ្យខិតខំបណ្ដុះបណ្ដាលអ្នកកំពុងបម្រើការងារ និងយុវជនក្មេងៗឱ្យទទួលបានជំនាញច្បាស់លាស់ស្របតាមស្តង់ដារកម្មវិធីសិក្សា និងវិធីអភិវឌ្ឍន៍ជំនាញទេសចរណ៍ ដែលក្រសួងទេសចរណ៍បានផ្សព្វផ្សាយនិងដាក់ឱ្យប្រើប្រាស់។

សូមរំឭកថា ដោយមានសុខសន្តិភាព និងសុវត្ថិភាពពេញផ្ទៃប្រទេស ទេសចរអន្តរជាតិមកទស្សនាកម្ពុជាមានការកើនឡើងជាលំដាប់ពីមួយឆ្នាំទៅមួយឆ្នាំ។ ជាក់ស្តែងកាលពីឆ្នាំ2016 កម្ពុជាទទួលបានទេសចរអន្តរជាតិជាង5លាននាក់ ក្នុងកំណើន5% នាំចំណូលចូលជាតិប្រមាណ3,400លានដុល្លារ ស្មើនឹង13.5នៃផលិតផលក្នុងស្រុកសរុប (GDP) និងបានបង្កើតការងារផ្ទាល់ប្រមាណ62ម៉ឺននាក់ ស្មើនឹង13%នៃការងារសរុប។ 6ខែដើមឆ្នាំ2017នេះ កម្ពុជាទទួលបានទេសចរអន្តរជាតិប្រមាណ2,6លាននាក់កើនឡើងប្រមាណ12,8% ធៀបនឹងរយៈពេលដូចគ្នាឆ្នាំ2016 ។ ជាចក្ខុវិស័យឆ្នាំ 2020 កម្ពុជារំពឹងទទួលបានទេសចរអន្តរជាតិប្រមាណ7លាននាក់ នាំចំណូលចូលជាតិប្រមាណ5ពាន់លានដុល្លារ និងបង្កើតការងារផ្ទាល់ជិត1លាននាក់៕

August 26, 2017

កម្ពុជា-ថៃ ត្រៀមរៀបចំសិក្ខាសាលាជំរុញពាណិជ្ជកម្មរវាងប្រទេសទាំងពីរ

ភ្នំពេញ៖ ដើម្បីជំរុញពាណិជ្ជកម្មទ្វេភាគីរវាងកម្ពុជា និងថៃពិសេសបង្កើនការនាំចេញពីប្រទេសកម្ពុជាទៅប្រទេសថៃសំដៅកាត់បន្ថយគម្លាតពាណិជ្ជកម្មនាំចេញ-នាំចូលនោះកម្ពុជា-ថៃ ត្រៀមរៀបចំសិក្ខាសាលាមួយដើម្បីជំរុញទំហំពាណិជ្ជកម្មទ្វេភាគីឱ្យកាន់តែប្រសើរឡើង។

ក្នុងជំនួបទ្វេភាគីជាមួយឯកឧត្តម ដាម ប៊ុនថាំ អគ្គរាជទូត និងអនុប្រធានបេសកកម្មប្រចាំស្ថានឯកអគ្គរាជទូតនៃព្រះរាជាណាចក្រថៃប្រចាំនៅកម្ពុជានេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មមានប្រសាសន៍សង្កត់ធ្ងន់ថា ការរៀបចំសិក្ខាសាលា និងជំនួបពាណិជ្ជករខាងលើគ្រោងនឹងធ្វើឡើងនៅរាជធានីភ្នំពេញនាថ្ងៃទី12 ខែកញ្ញា ឆ្នាំ2017 ដើម្បីពិភាក្សាទៅលើវិស័យមួយចំនួនដូចជាវិស័យកសិកម្ម វិនិយោគ និងដឹកជញ្ជូន ដែលជាវិស័យសំខាន់ក្នុងកិច្ចសម្រួលពាណិជ្ជកម្ម។ ទន្ទឹមនឹងនេះ ភាគីទាំងពីរក៏បានឯកភាពគ្នារៀបចំឱ្យមានការជួបពិភាក្សាដោយផ្ទាល់រវាងសភាពាណិជ្ជកម្ម និងពាណិជ្ជករនៃប្រទេសទាំងពីរ ជាពិសេសអ្នកនាំចេញផលិតផលខ្មែរ សមាគមកសិករ និងអាជ្ញាធរមានសមត្ថកិច្ចនៃបណ្តាខេត្តជាប់ព្រំដែននៃប្រទេសទាំងពីរ។

របាយការណ៍ពាណិជ្ជកម្មនៃស្ថានឯកអគ្គរាជទូតថៃប្រចាំកម្ពុជាបង្ហាញថា ឆ្នាំ2017នេះ ពាណិជ្ជកម្មទ្វេភាគីរវាងកម្ពុជាថៃនឹងកើនដល់ទឹកប្រាក់ 5,800 លានដុល្លារអាមេរិក កើនឡើងប្រមាណជា3.6%។ ការកើនឡើងសម្រាប់ឆ្នាំ2017 គឺជាសញ្ញាល្អឡើងវិញរវាងប្រទេសទាំងពីរ ខណៈទំហំពាណិជ្ជកម្មប្រទេសទាំងពីរ កាលពីឆ្នាំ2016កន្លងទៅ ពាណិជ្ជកម្មទ្វេភាគីកម្ពុជា-ថៃ មានទំហំទឹកប្រាក់តែ 5,600លានដុល្លារអាមេរិក។

គួរបញ្ជាក់ថា ផលិតផលដែលកម្ពុជានាំចេញទៅប្រទេសថៃរួមមានដូចជា ពោត ដំឡូងមី សណ្តែក ជាដើម ខណៈប្រទេសថៃនាំចូលមកកម្ពុជាវិញមានដូចជាគ្រឿងឧបភោគបរិភោគ គ្រឿងសម្អាង សម្រាប់សម្ភារប្រើប្រាស់ក្នុងផ្ទះ គ្រឿងចក្រ ឧបករណ៍អេឡិចត្រូនិច ប្រេងឥន្ធនៈ និងសម្ភារសំណង់ជាដើម៕

August 26, 2017

Motorola វិលចូលទីផ្សារកម្ពុជា

ជិត10 ឆ្នាំក្រោយបាត់មុខពីទីផ្សារទូរស័ព្ទកម្ពុជា ពេលនេះក្រុមហ៊ុនទូរស័ព្ទ Motorola បានវិលត្រឡប់ចូលមកវិញហើយ ជាមួយនឹងការដាក់បង្ហាញផលិតស្មាតហ្វូនស៊េរីថ្មីចុងក្រោយបំផុត នាឡិកាឆ្លាតវៃ និងគ្រឿងប្រើប្រាស់ជាច្រើនទៀត។

តាមការឱ្យដឹងពីលោក Nheb Chantha ជាអ្នកគ្រប់គ្រងទូទៅនៃក្រុមហ៊ុន ECI Distribution Co., Ltd ដែលជាក្រុមហ៊ុនទទួលសិទ្ធិចែកចាយផ្ដាច់មុខទូរស័ព្ទ Motorola ទូទាំងប្រទេសបានឱ្យដឹងថា Motorola ជាម៉ាកសញ្ញាក្រុមហ៊ុនទូរស័ព្ទដែលល្បីល្បាញមួយក្នុងពិភពស្មាតហ្វូន ប៉ុន្ដែបានបាត់មុខពីទីផ្សារកម្ពុជាជាច្រើនឆ្នាំ និងទើបតែពេលនេះត្រូវបាន ECI យកចូលមកវិញ ដោយមានក្រុមហ៊ុន NMKH Limited ជាអ្នកចែកចាយបន្ដទៅគ្រប់ហាងទូរស័ព្ទ។

អ្នកគ្រប់គ្រងទូទៅរូបនេះថ្លែងថា៖ «ដូចអ្វីដែលយើងបានដឹងហើយថា Motorola កាលពីមុនគឺទទួលបានការគាំច្រើនណាស់ពីអ្នកប្រើប្រាស់ខ្មែរយើង ប៉ុន្តែដោយគ្មានក្រុមហ៊ុននាំចូលផ្លូវការទើបវាស្ងាត់ទៅវិញ។ ប៉ុន្ដែពេលនេះ យើងនឹងធ្វើឱ្យវាល្បីល្បាញម្ដងទៀត»។

លោក Liu Wenchuan អ្នកគ្រប់គ្រងផ្នែកទូរស័ព្ទ Motorola សម្រាប់ទីផ្សារកម្ពុជា បានឱ្យដឹងដែរថា Motorola ជាប្រភេទឧស្សាហកម្មទូរស័ព្ទចល័តដែលត្រូវបានច្នៃប្រឌិតឡើងដោយបច្ចេកវិទ្យាខ្ពស់ស្របតាមយុគសម័យបច្ចុប្បន្ន ដើម្បីផ្តល់ជូននូវភាពងាយស្រួលកាន់តែប្រសើរ។ អស់រយៈពេល 80 ឆ្នាំមកហើយ ដែលក្រុមវិស្វករ Motorola បានធ្វើការស្រាវជ្រាវទៅលើការច្នៃប្រឌិតថ្មី និងស្វែងរកនូវវិធីសាស្ដ្រថ្មីៗក្នុងការដោះស្រាយបញ្ហាផ្សេង។ យើងជឿជាក់ថាលក្ខណៈពិសេសថ្មីៗនិងបច្ចេកវិទ្យាទំនើបៗនៃទូរស័ព្ទដៃចល័តមួយនេះនឹងពាំនាំមកនូវប្រជាប្រិយភាព និងបំពេញនូវតម្រូវការក្នុងទីផ្សារប្រទេសកម្ពុជា។

សម្រាប់ថ្ងៃវិលចូលទីផ្សារនេះ ក្រុមហ៊ុនបានដាក់ចេញនូវស្មាតហ្វូន Motorolamoto z ដែលទូរស័ព្ទនេះមានអេក្រង់ 5.5 អ៊ីញ ប្រភេទ QHD ទំហំ Ram 4GB និងថាមពលថ្ម 2600mAh ដាក់ក្នុងតម្លៃប្រមាណ 659 ដុល្លារ ហើយទូរស័ព្ទ moto z2 Play អេក្រង់ 5.5 អ៊ីញ ប្រភេទ QHD ទំហំ Ram 4GB និងថាមពលថ្ម 3000mAh ដាក់ក្នុងតម្លៃប្រមាណ 555 ដុល្លារ។ ក្រៅពីនេះ ក្រុមហ៊ុនក៏មាននាំចូលទូរស័ព្ទធូរថ្លៃដូចជា moto m,moto g5 Plus,moto e4,moto e4 Plus,moto c និង moto c Plus ផងដែរ៕

August 26, 2017

ធ្លាយរឿង អាង សុនីតា ខឹងសុខ ដែន និយាយពីរឿងជញ្ជក់មាត់ Free

បន្ទាប់ពីតារាសម្ដែង សុខ ដែន បង្ហើបថា កញ្ញា អាង សុនីតា ដែលទទួលសម្ដែងឱ្យលោកក្នុងបទ «មន្តគាថាស្នេហ៍» មានឈុតឆាកថើបជញ្ជក់មាត់ដោយនាងមិនគិតថ្លៃរួចមក ក៏មានព័ត៌មានលេចឮថា តារាសម្ដែងស្រីរូបនេះកំពុងតែខឹងយ៉ាងខ្លាំងគ្រាដែលចាត់ទុកថា ការលើកឡើងបែបនេះហាក់មិនឱ្យតម្លៃនាង។

ចាប់តាំងពីកញ្ញា អាង សុនីតា ចាប់អាជីពសម្ដែងមកនាងពុំដែលសម្ដែងឈុតស្និទ្ធស្នាលថើបជញ្ជក់មាត់ជាមួយតារាសម្ដែងប្រុសរូបណាឡើយ ទើបតែក្នុងបទ «មន្តគាថាស្នេហ៍» មួយនេះទេដែលនាងសម្ដែងក្នុងឈុតនេះ។ តាមព័ត៌មានលេចឮពីអ្នកសិល្បៈផ្សេងទៀតថា អាង សុនីតា កំពុងតែខឹងយ៉ាងខ្លាំងចំពោះការលើកឡើងរបស់លោក សុខ ដែន ហាក់ដូចជាមិនឱ្យតម្លៃនាងគ្រាដែលនាងខំលះបង់ឈុតសម្ដែងបឺតជញ្ជាក់មាត់ដែលនាងមិនធ្លាប់សម្ដែងពីមុនមក។

ទោះយ៉ាងណាយើងពុំអាចសុំការបំភ្លឺពីកញ្ញា អាង សុនីតា បានទេ តែដោយឡែកលោកសុខ ដែន បានប្រាប់ថា លោកគ្មានបំណងចង់លើកឡើងក្នុងន័យមិនផ្ដល់តម្លៃឱ្យកញ្ញា អាង សុនីតា ទេ ផ្ទុយទៅវិញលោកចង់បង្ហាញពីការរាប់អានរវាងលោក និងនាង ដែលសុខចិត្ដជួយសម្ដែងឱ្យលោកដោយឥតគិតថ្លៃ និងថែមទាំងលះបង់ច្រើនទៀតផង។

លោកសុខ ដែន បញ្ជាក់ថា៖ «ខ្ញុំអត់ដឹងច្បាស់ថា នាងខឹងរឿងអ្វីទេ តែយ៉ាងណាក៏ខ្ញុំសុំទោសពីចម្ងាយផងប្រសិនបើការលើកឡើងខុសឆ្គងដោយប្រការណាមួយ។ ជាងនេះខ្ញុំក៏សូមថ្លែងអំណរគុណដោយកញ្ញា អាង សុនីតា រួមនិងលោក ពៅ គីសាន់ ហៅនាយឆើត លោកវង់ ណយ និងតារាសម្ដែងដទៃទៀតដែលជួយក្នុងការសម្ដែងបទនេះ»៕

August 26, 2017

លោក Klopp៖ ការជួបជាមួយនឹងក្រុម Arsenal គឺជាការសាកល្បងសមត្ថភាពរបស់យើង

លោក Jurgen Klopp អ្នកចាត់ការទូទៅរបស់ក្រុម Liverpool នៅតែជឿជាក់ថា ការជួបជាមួយនឹងក្រុម Arsenal នៅថ្ងៃអាទិត្យនេះ នឹងសាកល្បងសមត្ថភាពក្រុមរបស់លោក បើទោះបីក្រុមកាំភ្លើងធំមួយនេះបានធ្លាក់ចេញពីក្របខ័ណ្ឌ Champions League ក៏ដោយ។

ក្រុម Arsenal បានបញ្ចប់ក្នុងចំណាត់ថ្នាក់លេខ5 ក្នុងក្របខ័ណ្ឌ Premier League កាលពីរដូវកាលមុន និងបានខកខានក្នុងការឈ្នះកៅអីទៅលេងក្នុងក្របខ័ណ្ឌកំពូលអឺរ៉ុប ជាលើកទី1 បើគិតចាប់តាំងពីលោក Arsene Wenger បានចូលកាន់តំណែងក្នុងនាមជាគ្រូបង្វឹកកាលពីឆ្នាំ1996មក។ ប៉ុន្តែ លោក Klopp នៅតែគិតថា ពួកគេគឺជាក្រុមមួយក្នុងចំណោមក្រុមដ៏ខ្លាំងបំផុតរបស់កីឡាបាល់ទាត់អង់គ្លេស ហើយលោករំពឹងទុកថា នឹងមានការប្រកួតដ៏ស្វិតស្វាញមួយ បើទោះបីក្រុម Liverpool ដណ្តើមបានជ័យជម្នះទាំងការប្រកួតក្នុង និងក្រៅទឹកដីលើក្រុមកាំភ្លើងធំកាលពីរដូវកាលមុនក៏ដោយ។ លោក Klopp បានឲ្យដឹងថា៖ «Arsenal នៅតែជាក្រុមដ៏ខ្លាំងមួយ។

កីឡាករ Alexis Sanchez អាចនឹងវិលចូលលេងនៅលើទីលានជាលើកទី1 ហេតុនេះវត្តមានរបស់គេនឹងផ្តល់នូវការជឿជាក់ដល់ក្រុមនេះ ហើយពិតណាស់ វានឹងផ្តល់នូវការមានប្រៀបដល់ក្រុម Arsenal»។ គ្រូបង្វឹកសញ្ជាតិអាល្លឺម៉ង់រូបនេះបានបន្ថែមទៀតថា៖ «វាពិតជាការប្រកួតដ៏សំខាន់ខ្លាំងណាស់។ កាលពីឆ្នាំមុន យើងមានកំណត់ត្រាយ៉ាងល្អនៅពេលប្រកួតជាមួយនឹងក្រុមខ្លាំងៗទាំង6»។ ក្រុម Liverpool និង Arsenal បានជួបលទ្ធផលខុសគ្នាស្រឡះកាលពីពេលថ្មីៗនេះ ដោយក្រុមហង្សក្រហមបានចាប់ផ្តើមយុទ្ធនាការក្របខ័ណ្ឌ Premier League នៅរដូវកាលនេះដោយបញ្ចប់ក្នុងលទ្ធផលស្មើ 3-3 ជាមួយនឹងក្រុម Watford មុននឹងយកឈ្នះលើក្រុម Crystal Palace 1-។ ដោយឡែក ក្រុម Arsenal បានយកឈ្នះលើក្រុម Leicester ទាំងប្រផិតប្រផើយក្នុងលទ្ធផល 3-2 កាលពីថ្ងៃបើកឆាក មុននឹងចាញ់ក្រុមម្ចាស់ផ្ទះ Stoke 1-។ ស្របពេលជាមួយគ្នានេះ ក្រុម Liverpool ទើបតែមានការជឿជាក់ តាមរយៈការឈានទៅវគ្គចែកពូលនៃក្របខ័ណ្ឌ Champions League ក្រោយពីបានបង្ហាញពីទម្រង់លេងយ៉ាងល្អដើម្បីផ្តួលក្រុម Hoffenheim ក្នុងលទ្ធផល 4-2។ ការប្រកួតនេះនឹងចាប់ផ្តើមនៅម៉ោង10យប់៕

ប្រភពពី៖ Sport24

August 26, 2017

ផ្សាររាត្រីកុងតឺន័រមួយទៀតនឹងបើកដំណើរការនៅថ្ងៃនេះ

ភ្នំពេញៈ ផ្សាររាត្រីកុងតឺន័រមួយទៀតនឹងបើកដំណើរការជាផ្លូវការល្ងាចថ្ងៃទី26 សីហានេះបន្ទាប់ពីចំណាយពេលរៀបចំអស់រយៈពេលជាច្រើនខែកន្លងមកនេះ។

ផ្សារកុងតឺន័រថ្មីនេះមានឈ្មោះ Arts Container Market ដែលមានទីតាំងនៅក្នុងតំបន់អតីតបឹងកក់ ឬ CITY Centerដែលជាតំបន់មួយកំពុងមានការអភិវឌ្ឍយ៉ាងឆាប់រហ័ស។

អ្នកវិនិយោគផ្សារទំនើបនេះ លោក ប៊ុន សេង បានថ្លែងឲ្យដឹងកាលពីពេលថ្មីៗនេះថា ការបង្កើតអាជីវកម្មនេះ (Art’s Container Market) គឺដើម្បីគាំទ្រទាំងអាជីវកម្មដែលបង្កើតថ្មីក្នុងស្រុក និងក្រៅស្រុកក្នុងការបំពេញតម្រូវការដល់អតិថិជន។ ការបង្កើតកន្លែងអាជីវកម្មនេះមិនមែនជាលើកដំបូងទេ សំណង់ផ្សារកុងតឺន័រជិត80តូបដែលស្ថិតក្នុងផ្ទៃដីជិត3ពាន់ម៉ែត្រការ៉េបានខិតខំធ្វើការឌីហ្សាញជាលក្ខណៈស្តង់ដារថ្មីដោយផ្តោតសំខាន់ទៅលើទម្រង់សិល្បៈដែលកំពុងពេញនិយមសម្រាប់ប្រជាជនកម្ពុជា។

លោក ប៊ុន សេង បានសម្តែងសុទិ្ទដ្ឋិនិយម និងរំពឹងទទួលបានជោគជ័យពីផ្សារទំនើបនៅកម្ពុជា។

ផ្សាររាត្រីកុងតឺន័របានរីកដុះដាលយ៉ាងច្រើននៅកម្ពុជាទាំងនៅរាជធានីភ្នំពេញ ក្រុងព្រះសីហនុ និងខេត្តសៀមរាប បន្ទាប់ពីផ្សាររាត្រី Jet Container Night Market ដែលមានទីតាំងនៅទល់មុខរដ្ឋសភាជាតិបានបើកដំណើរការ និងទទួលបានជោគជ័យយ៉ាងខ្លាំងរួចមក៕

August 26, 2017

ADB ៖ សេដ្ឋកិច្ចកម្ពុជាអាចសម្រេចបាន6.9ភាគរយក្នុងឆ្នាំ2018

ភ្នំពេញៈ ធនាគារអភិវឌ្ឍន៍អាស៊ី(ADB)បានព្យាករថា សេដ្ឋកិច្ចកម្ពុជានឹងសម្រេចបានកំណើនត្រឹម6.9ភាគរយនៅឆ្នាំ2018ខាងមុខនេះជាការព្យាករមួយមានភាពស្រដៀងគ្នានឹងការព្យាកររបស់ធនាគារពិភពលោក និងមូលនិធិរូបិយប័ណ្ណអន្តរជាតិដែរ។

ថ្លែងនៅក្នុងជំនួបជាមួយឯកឧត្តមសភាចារ្យ អូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗនេះ លោក ក្សាត្រាប៉ាទី ស៊ីវ៉ាជី (Kshratrapati Shivaji) នាយកប្រតិបត្តិនៃធនាគាADBបានថ្លែងលើកឡើងថា សេដ្ឋកិច្ចកម្ពុជាមានការអភិវឌ្ឍរីកចម្រើនយ៉ាងឆាប់រហ័ស ជាពិសេសស្ថានភាពការរីកចម្រើននៃសេដ្ឋកិច្ចដែលសម្រេចបានកំណើនក្នុងរង្វង់7ភាគរយក្នុងរយៈពេល2ទស្សវត្សរ៍មកនេះក្នុងនោះបើតាមការព្យាករកំណើនសេដ្ឋកិច្ចនៅកម្ពុជានឹងអាចសម្រេចបានប្រមាណ6.9ភាគរយនៅក្នុងឆ្នាំ2018ផងដែរ នេះគឺជាចក្ខុវិស័យចំពោះអនាគតកម្ពុជាដែលនៅតែសម្រេចបានមានលក្ខណៈវិជ្ជមាន។

លោកបានលើកឡើងទៀតថា សេដ្ឋកិច្ចកម្ពុជាត្រូវបានរំពឹងថានឹងរក្សាកំណើនសេដ្ឋកិច្ចរយៈពេលវែងប្រកបដោយចីរភាពក្នុងរង្វង់7ភាគរយក្នុងមួយឆ្នាំៗ និងបានកាត់បន្ថយភាពក្រីក្របានលើស1ភាគរយក្នុងមួយឆ្នាំផងដែរ។ ការបន្តសម្រេចបានកំណើនសេដ្ឋកិច្ចខ្ពស់បែបនេះនឹងធ្វើឲ្យចំណូលជាតិសរុបសម្រាប់ប្រជាជនម្នាក់ៗកើនឡើងដល់1,434ដុល្លារអាមេរិកនៅក្នុងឆ្នាំ2017 និងអាចរក្សាបានអតិផរណាជាមធ្យមប្រចាំឆ្នាំស្ថិតក្នុងរង្វង់3.5ភាគរយក្នុងមួយឆ្នាំ៕

August 26, 2017

ក្លិប Barcelona បំពេញការចុះហត្ថលេខាជាមួយ Dembele ពីក្លិប Dortmund ជាផ្លូវការហើយ

ក្លិបយក្ស Barcelona បានបំពេញការចុះហត្ថលេខាជាមួយនឹងខ្សែបម្រើប្រយុទ្ធ Ousmane Dembele ពីក្លិប Borussia Dortmund របស់អាល្លឺម៉ង់ក្នុងកិច្ចសន្យារយៈពេល5ឆ្នាំក្នុងតម្លៃខ្លួនជាកំណត់ត្រារបស់ក្លិបចំនួន105លានអឺរ៉ូ (ស្មើនឹង125លានដុល្លារអាមេរិក) បូកទាំងប្រាក់ឧបត្ថម្ភចំនួន42លានអឺរ៉ូផ្សេងទៀត។ នេះបើយោងទៅតាមការបញ្ជាក់របស់ក្លិបអេស្ប៉ាញមួយនេះ កាលពីថ្ងៃសុក្រ។

ខ្សែបម្រើអន្តរជាតិបារាំង Dembele បានស៊ុតបាល់បញ្ចូលទី10គ្រាប់ និងជួយឲ្យមិត្តរួមក្រុមរកបាន20គ្រាប់ផ្សេងទៀតក្នុងរាល់យុទ្ធនាការទាំងអស់ដើម្បីជួយឲ្យក្រុម Dortmund បញ្ចប់ក្នុងចំណាត់ថ្នាក់លេខ2នៅលើតារាងក្របខ័ណ្ឌ Bundesliga កាលពីរដូវកាលមុន។ ក្រុមនេះក៏បានឈ្នះពាន German Cup ផងដែរ។ សេចក្តីប្រកាសមួយពីក្លិប Barca បានបញ្ជាក់ថា Dembele នឹងធ្វើដំណើរទៅដល់ទីក្រុង Barcelona នៅថ្ងៃអាទិត្យស្អែកនេះ ហើយនិងត្រូវពិនិត្យសុខភាពនៅថ្ងៃចន្ទមុនពេលចុះហត្ថលេខាលើកុងត្រាមួយដែលនឹងមានលក្ខខណ្ឌរំលាយកិច្ចសន្យាក្នុងទឹកប្រាក 400លានអឺរ៉ូ។ រូបគេក៏នឹងត្រូវប្រកាសជាកីឡាកររបស់ Barca ជាផ្លូវការនៅថ្ងៃចន្ទដដែលនោះផងដែរ នៅឯកីឡដ្ឋាន Nou Camp របស់ក្លិបនេះ។

Barcelona បានឲ្យដឹងក្នុងសេចក្តីថ្លែងការណ៍មួយលើគេហទំព័ររបស់ខ្លួនថា៖ «ពិតណាស់ រូបគេជាកីឡាករដ៏មានទេពកោសល្យម្នាក់ និងជាកីឡាករម្នាក់ក្នុងចំណោមកីឡាករឆ្នើមបំផុតប្រចាំទ្វីបនេះ»។ ភ្លាមៗក្រោយពីការប្រកាសរបស់ក្លិប Barceona សេចក្តីប្រកាសមួយពីក្លិប Dortmund ក៏បានអះអាងពីការលក់កីឡាកររូបនេះផងដែរ។ ក្លិបស្ថិតក្នុងក្របខ័ណ្ឌ Bundesliga មួយនេះ បានឲ្យដឹងថា៖ «ក្លិប FC Barcelona នឹងត្រូវទូទាត់សំណងពីការផ្ទេរក្នុងទឹកប្រាក់ដុលចំនួន105លានអឺរ៉ូ។ ក្រៅពី ក៏មានការព្រមព្រៀងគ្នាមួយទៅលើសំណងផ្សេងៗទៀតដែលមានចំនួនរហូតដល់ទៅ40ភាគនៃតម្លៃខ្លួនក្នុងការផ្ទេរនេះ»៕

ប្រភពពី៖ BBC

August 26, 2017

គីមីទៀតហើយ! អាហារគ្រឿងសមុទ្រនៅកំពង់សោម

ភ្នំពេញ៖ ជាទូទៅនៅពេលធ្វើដំណើរទៅលម្ហែកាយនៅតំបន់មាត់សមុទ្រ អ្នកទេសចរមិនថាខ្មែរឬបរទេសនោះទេតែងប៉ងប្រាថ្នាញ៉ាំគ្រឿងសមុទ្រស្រស់ថ្មីៗគ្មានសារធាតុគីមីទើបស្រង់ចេញពីទឹកសមុទ្រ។ ប៉ុន្តែមិនមែនដូច្នោះទេ ព្រោះកាលពីម្សិលមិញនេះមន្ត្រីកាំកុងត្រូលដែលចុះពិនិត្យទំនិញដាក់លក់នៅទីនោះបានរកឃើញទៀតហើយ គឺបន្លែ 4ប្រភេទ និងគ្រឿងសមុទ្រផងដែរនោះមានផ្ទុកទៅដោយសារធាតុគីមីខ្ពស់ដែលនាំឱ្យប៉ះពាល់ដល់សុខភាពធ្ងន់ធ្ងរ។

ក្នុងប្រតិបត្តិការរបស់អគ្គនាយកដ្ឋានកាំកុងត្រូលដែលមានរថយន្តមន្ទីពិសោធចល័ត និងសហការជាមួយមន្ទីរពាណិជ្ជកម្ម អាជ្ញាធរដែនដី បានធ្វើតេស្តបឋមលើផលិតផលម្ហូបអាហារ សរុបចំនួន77គំរូ ក្នុងនោះមានគ្រឿងសមុទ្រស្រស់ៗ (បង្គា មឹក) ចំនួន 36គំរូ និងបន្លែ ផ្លែឈើ និងខ្ញីហាន់រួច ជ្រក់គ្រប់ប្រភេទ ត្រីប្រឡាក់ សាច់ជ្រូកងៀត សសៃគុយទាវ បាញ់កាញ់ ប្រហិត យ៉ាវហេ ប្រហុក សរុបចំនួន41គំរូផ្សេងទៀត ដើម្បីរកសារធាតុគីមីហាមឃាត់លើម្ហូបអាហារដែលដាក់តាំងលក់នៅក្នុងផ្សារលើ។

ជាលទ្ធផលការធ្វើតេស្តបឋមលើផលិតផលម្ហូបអាហារខាងលើយើងបានរកឃើញ និងដកហូតផលិតផលដែលមានបញ្ហាចំនួន4គំរូបានចំនួនសរុប 35.80kgs ដែលមានដូចខាងក្រោមៈ

1.មឹកស្រស់មួយគំរូមានសារធាតុគីមីហាមឃាត់ FORMALINE ស្មើនឹង 2.2 kgs។

2.ស្លឹកគូឆាយមួយគំរូមានសំណល់ថ្នាំកសិកម្មស្មើនឹង3kgs។

3.ត្រសក់ស្រស់មួយគំរូមានសំណល់ថ្នាំកសិកម្មស្មើនឹង23kgs។

4.ស្លឹកខ្ទឹមមួយគំរូមានសំណល់ថ្នាំកសិកម្មស្មើនឹង0.6kgs។

5.ម្ទេសប្លោកមួយគំរួមានសំណល់ថ្នាំកសិកម្មស្មើនឹង7kgs។

គួរបញ្ជាក់ថាពេលថ្មីៗកន្លងទៅនេះ គេហទំព័រកាសែតឡារ៉ែន បានចុះផ្សាយម្តងជាពីរដងរួចមកហើយអំពីករណីរកឃើញចំណីអាហារផ្ទុកសារធាតុគីមី ហើយមន្ត្រីជំនាញកាំកុងត្រូលតែងតែអប់រំណែនាំកុំឱ្យអាជីវករលក់ចំណីអាហារ ឬបន្លែផ្ទុកសារធាតុគីមីដូច្នេះទៀត ប៉ុន្តែអំពើអសកម្មទាំងនេះនៅតែកើតមានជារឿយៗ ដូច្នេះមានតែអតិថិជនជាអ្នកទិញទេដែលត្រូវប្រុងប្រយ័ត្នខ្លួនឯងគឺ ពេលទិញចំណីអាហារគួរពិនិត្យឱ្យបានច្បាស់លាស់ជាមុន។ យើងមិនបន្តុះបង្អាប់លើផលិតផលគ្រឿងសមុទ្ររបស់អ្នកនេសាទនៅកំពង់សោមទេ តែសូមលើកទឹកចិត្តកុំឱ្យដាក់សារធាតុ FORMALINE នេះដើម្បីកុំឱ្យខូចឈ្មោះអាហារសមុទ្ររបស់យើង និងកុំឱ្យប៉ះពាល់សុខភាពរបស់ប្រជាជនខ្មែរយើង៕

August 26, 2017

Author: វល័ក្ខ