វល័ក្ខ - La Reine Media

ឌីម៉ា ផ្តួលថៃ វគ្គផ្តាច់ព្រ័ត្រ ដើម្បីជួយឲ្យកម្ពុជា ឈ្នះមេដាយមាសទី2ក្នុងស៊ីហ្គេម

កីឡាករប្រដាល់គុនខ្មែរ ឃីម ឌីម៉ា របស់កម្ពុជាបានបង្ហាញពីសេចក្តីក្លាហាន និងទឹកចិត្តប្រយុទ្ធដ៏គួរឲ្យស្ងើចសរសើរដោយបានផ្តួលកីឡាករថៃនៅក្នុងព្រឹត្តិការណ៍ស៊ីហ្គេមលើវិញ្ញាសាប្រដាល់សេរី វគ្គផ្តាច់ព្រ័ត្រ ទម្ងន់៦៣,៥គីឡូក្រាមនៅថ្ងៃនេះ ក្នុងទីក្រុងគូឡាឡាំពួ។

ក្រោយពីដឹងថា ខ្លួនចាញ់ពិន្ទុគូប្រកួតក្នុងទឹកទី1 ឌីម៉ាបានធ្វើការវាយសម្រុកភ្លាមៗនៅក្នុងទឹកទី2 មុននឹងធ្វើការគ្រប់គ្រងបានទាំងស្រុងលើគូប្រកួតរបស់ខ្លួនក្នុង2ទឹកចុងក្រោយនេះ និងឈ្នះមេដាយមាសសម្រាប់កម្ពុជា ក្នុងយុទ្ធនាការកីឡាស៊ីហ្គេម ឆ្នាំ2017 នេះតែម្តង។

ជ័យជម្នះរបស់ឌីម៉ា មានន័យថា បច្ចុប្បន្នកម្ពុជាបានឈ្នះមេដាយមាសចំនួន2 ពីការប្រកួតក្នុងទីក្រុងគូឡាឡាំពួនេះ ក្រោយពីក្រុមកីឡាប៉េតង់ ជួយឲ្យកម្ពុជាឈ្នះមេដាយមាស1រួចហើយកាលសប្តាហ៍មុន៕

August 29, 2017

យុវជនកម្ពុជាអាចបាក់ទឹកចិត្តនៅពេលបារម្ភជ្រុលជាមួយទីផ្សារការងារ

ចាប់ផ្តើមដើរចូលសាលាភ្លាម ចំណុចដំបូងដែលនិស្សិតគិត និងបារម្ភគឺទីផ្សារការងារ កត្តានេះធ្វើឱ្យនិស្សិតពិបាកសម្រេចចិត្តព្រោះពួកគេខ្លាចក្រែង រៀនហើយមិនអាចរកការងារបានធ្វើ។

ជាស្ថានភាពទូទៅ យុវជនកម្ពុជាមួយចំនួនបានទុកចិត្តលើខ្លួនឯងសម្រាប់ធ្វើការងារឱ្យគេ ឬបង្កើតអាជីវកម្មដោយខ្លួនឯងផ្ទាល់ ក្រោយពេលចេញពីសាកលវិទ្យាល័យ តែនិស្សិតមួយចំនួនទៀតហាក់នៅមានភាពរារែកចំពោះកត្តាគុណភាពនៃការអប់រំ ទាំងការសង្ស័យលើគុណភាពសាលា និងគុណភាពរបស់ខ្លួនឯងផ្ទាល់។

ពាក់ព័ន្ធនឹងបញ្ហានេះអតីតឯកអគ្គរាជទូតយុវជន របស់អូស្ត្រាលី លោក រិន រ៉ាវុធ ធ្លាប់បានលើកឡើងថា យុវជននាពេលបច្ចុប្បន្នហាក់មានការបារម្ភជ្រុលពីបញ្ហាទីផ្សារការងារ ព្រោះពួកគេបានឮសំឡេងមិនល្អជាច្រើនពីមជ្ឈដ្ឋានជុំវិញខ្លួន។ មាននិស្សិតខ្លះមានការរារែកមិនចង់ប្រឹងប្រែង ព្រោះបានឮថាទីផ្សារការងារចង្អៀត ប្រកួតមិនឈ្នះកូនអ្នកធំ ឬខ្លាចលើបញ្ហានានាផ្សេងៗទៀតដែលធ្វើឱ្យពួកគេមានភាពរារែក។

អ្នកអប់រំខាងលើបានលើកឡើងផងដែរថា ការដែលបារម្ភជ្រុលបែបនេះ អាចធ្វើឱ្យនិស្សិតកម្ពុជាមិនមានកម្លាំងចិត្តក្នុងការប្រឹងប្រែង ព្រោះខណៈពេលដែលពួកគេប្រឹងប្រែង អារម្មណ៍ភ័យខ្លាចបានបង្អាក់ការខិតខំប្រឹងប្រែងនោះ។ កត្តានេះអាចធ្វើឱ្យនិស្សិតឆ្លងមិនផុតពីដំណាក់កាលសាកលវិទ្យាល័យ ឬផ្តោតច្រើនទៅលើចំណុចដែលមិនគួរផ្តោត ហើយមិនគិតចំពោះចំណុចដែលត្រូវគិតទៅវិញ។

លោកបានបញ្ជាក់ថា សម្រាប់ទីផ្សារការងារនៅកម្ពុជាមិនគួរឱ្យបារម្ភដូចនិស្សិតគិតនោះទេ អ្វីដែលត្រូវធ្វើគឺ ខំរៀនឱ្យបានច្បាស់លាស់ និងបង្កើនសមត្ថភាពឱ្យទទួលយកបានសម្រាប់ទីផ្សារ ព្រោះមានការងារជាច្រើនណាស់ដែលកំពុងខ្វះមនុស្សធ្វើការ៕

August 29, 2017

មហាជនចង់ឃើញកីឡាប្រដាល់ខ្មែរ «ពីង ឡាំ» ឡើងវាយលើសង្វៀនប៉ុស្ដិ៍ទូរទស្សន៍ខ្មែរ

ថ្មីៗនេះកីឡាករប្រដាល់សេរីគុណខ្មែរ ឈ្មោះថា ពីង ឡាំ បានធ្វើឱ្យមហាជន ដែលស្នេហាវិស័យកីឡាប្រដាល់ មានការភ្ញាក់ផ្អើល និងចាប់អារម្មណ៍ជាខ្លាំងនូវក្បាច់វាយលុករបស់គេ នៅក្នុងការប្រកួតជាមួយកីឡាករថៃ ចៃផេត ស្រីសុពុង នៅសង្វៀងប៉ុស្ដិ៍លេខ8 ថៃ។

បើនិយាយពីកីឡាករកម្ពុជារូបនេះ គេពុំធ្លាប់ឃើញវត្ដមានប្រកួតនៅសង្វៀងទីក្រុងភ្នំពេញឡើយ ប៉ុន្ដែក្រោយពីបានឃើញក្បាច់ប្រយុទ្ធ និងការវាយលុក ពោរពេញទៅដោយកម្លាំង និងបទពិសោធរបស់គេ មានអ្នកទស្សនាជាច្រើនរំពឹងថាកីឡាករ ពីង ឡាំ និងមានឱកាសបានឡើងមកលើសង្វៀនក្នុងទីក្រុងភ្នំពេញ ដើម្បីបញ្ចេញសមត្ថភាព ឬប្រកួតដណ្ដើមខ្សែក្រវ៉ាត់នៅក្នុងកម្មវិធីណាមួយរបស់ស្ថានីយទូរទស្សន៍ខ្មែរ។

ទោះយ៉ាងណា យើងមិនមែនលើកសរសើរតែមាត់នោះទេ យើងក៏មានវីដេអូឃ្លីបជុំវិញការប្រកួតរបស់ ពីង ឡាំ ជាមួយកីឡាករថៃផងដែរ។ ធានាថាទស្សនិកជនចំណាយទស្សនាហើយពិតជាជក់ចិត្ដនិងមិនស្ដាយក្រោយនោះទេ៕

August 29, 2017

ខេត្តណាខ្លះដែលមានប្រជាពលរដ្ឋជំពាក់ប្រាក់ធនាគារច្រើនជាងគេ?

ភ្នំពេញ៖ យោងតាមរបាយការណ៍ការិយាល័យឥណទានកម្ពុជា ទីប្រជុំជនធំៗគឺជាកន្លែងប្រមូលផ្តុំឥណទានច្រើនជាងគេ។ ការឱ្យខ្ចីសរុបនៅភ្នំពេញមានចំនួនលើសពី1ប៊ីលានដុល្លារអាមេរិក និងបណ្តាខេត្តមួយចំនួនផ្សេងទៀត ដូចជាខេត្តកំពង់ចាម កណ្តាល ត្បូងឃ្មុំ សៀមរាប និងបាត់ដំបង មានបរិមាណឥណទានចន្លោះពី 700លានដុល្លារអាមេរិក ទៅ1ប៊ីលានដុល្លារអាមេរិក។

របាយការណ៍បានធ្វើការបែងចែកឥណទានទៅតាមបណ្តាខេត្ត និងស្រុកដូចខាងក្រោម៖

1/ ចំនួនអតិថិជនដែលទទួលបានឥណទានតាមខេត្ត និងស្រុក
ចំនួនអតិថិជនដែលទទួលបានឥណទានច្រើនជាងគេគឺរាជធានីភ្នំពេញ ដោយមានអតិថិជនច្រើនជាង200.000នាក់ និងខេត្តកណ្តាលមានអតិថិជនចន្លោះពី 150,001នាក់ ដល់200.000 នាក់។ បន្ទាប់ពីនេះរួមមាន ខេត្តកំពង់ស្ពឺ សៀមរាប កំពង់ចាម ព្រៃវែង តាកែវ កំពង់ធំ និង បាត់ដំបងដោយមានអ្នកខ្ចីចន្លោះពី100.001នាក់ ដល់150.000នាក់។

2/ ការបែងចែកឥណទានមិនដំណើរការតាមខេត្ត
ចំពោះគុណភាពឥណទានវិញឃើញថា រាជធានីភ្នំពេញ ខេត្តកំពង់ចាម ត្បូងឃ្មុំ ក្រចេះ ស្ទឹងត្រែង រតនគីរី និងកោះកុង មានឥណទានមិនដំណើការខ្ពស់ជាងគេ ជាមួយនឹងអត្រាធំជាង 1,51% ខណៈដែលខេត្តកណ្តាល បាត់ដំបង បន្ទាយមានជ័យ និង ស្វាយរៀង មានអត្រាឥណទានមិនដំណើការតែក្នុងចន្លោះពី1,01% ទៅ1,50% ប៉ុណ្ណោះ ។

3/ ករណីសិក្សាដោយឡែកអំពីខេត្តស្វាយរៀង
ខេត្តស្វាយរៀងមានស្រុកចំនួន8ដែលមានប្រជាជនចំនួន87.828នាក់បានខ្ចីប្រាក់ពីធនាគារគ្រឹះស្ថានមីក្រូហិរញ្ញវត្ថុ និងប្រតិបត្តិករឥណទានផ្សេងៗសរុបចំនួនសរុប 267 លានដុល្លារអាមេរិក ក្នុងនោះចំនួនប្រជាជន65%នៃចំនួនគ្រួសារទូទាំងខេត្តបានទទួលឥណទានពីគ្រឹះស្ថានហិរញ្ញវត្ថុ (ដោយសន្មតថា ក្នុង1គ្រួសារមានមនុស្សតែម្នាក់គត់ដែលអាចទទួលបានឥណទាន) ហើយ23%នៃចំនួនប្រជាជនដែលមានអាយុលើសពី18ឆ្នាំទទួលបានឥណទានពីគ្រឹះស្ថានហិរញ្ញវត្ថុ៕

August 29, 2017

សាលាស្រណោះតន្ត្រីត្រូវការយុវជន 30នាក់ បង្ហាត់ Free លើជំនាញតន្ដ្រី និងចម្រៀង

ភ្នំពេញ- លោក សូរ ស្រណោះ បណ្ឌិតឧបករណ៍តន្ត្រីព្យ៉ាណូដ៏មានទេពកោសល្យ និងមានកេរ្ដិ៍ឈ្មោះល្បីល្បាញនៅក្នុងសង្គមសិល្បៈបានប្រកាសស្វែងរកកុមារ និងសិស្សជំទង់សម្រាប់ធ្វើការប្រឡងសមត្ថភាពដើម្បីបង្រៀនជំនាញព្យ៉ាណូក្នុងសាលាស្រណោះតន្ត្រីដោយពុំគិតថ្លៃ។

លោក សូរ ស្រណោះ នាយកសាលា និងជាគ្រូ Piano បានឲ្យដឹងថា សាលាស្រណោះតន្ត្រីរៀបចំកម្មវិធីនេះឡើងក្នុងគោលបំណងផ្តល់អាហារូបករណ៍ដល់សិស្សចំនួន 30នាក់ ដោយមិនប្រកាន់ឋានៈអ្វីទាំងអស់ឲ្យតែជាសញ្ជាតិខ្មែរមានអាយុពី 13ឆ្នាំ ដល់25ឆ្នាំ ដែលយើងបានផ្តោតជាសំខាន់។

លោកបន្ដថា ការប្រកាសស្វែងរកសិស្សថ្មីៗមកធ្វើការហ្វឹកហាត់បណ្តុះបណ្តាលដើម្បីបណ្ដុះគំនិតយុវជនសម័យទំនើបឱ្យកាន់តែពេញចិត្ត និងលើកតម្កើងវិស័យព្យ៉ាណូ។ អ្វីដែលពិសេសជាងនេះគឺចង់ឲ្យកូនខ្មែរអាចមានសមត្ថភាពចូលរួមប្រកួតលើឆាកអន្តរជាតិ ដូចពេលកន្លងមកដែលកុមារកម្ពុជាបានចេញទៅប្រកួតនៅប្រទេសសិង្ហបុរីដែលសិស្សសាលាស្រណោះតន្ត្រីជាច្រើននាក់ដណ្តើមបានមេដាយ និងបង្ហាញនូវភាពលេចធ្លោនាំឲ្យកម្ពុជាមានមុខមាត់ល្បី។

ក្រៅពីបង្ហាត់ជំនាញព្យ៉ាណូហើយនោះសាលាក៏នឹងផ្ដល់ការបង្ហាត់ទៅលើផ្នែកចម្រៀងផងដែរដោយមានគ្រូមានបទពិសោធក្នុងការបង្ហាត់ដើម្បីរង់ចាំផ្ទេរចំណេះដឹង។

បណ្ឌិតជំនាញព្យ៉ាណូរូបនេះបញ្ជាក់ថា យើងចង់ជួយប្រជាជនខ្មែរពិសេសអ្នកខ្វះខាតថវិកា សំខាន់នៅពេលធ្វើតេស្ដឲ្យតែបុគ្គលនោះមានសំឡេងល្អទៅលើបច្ចេកទេសច្រៀង។ ក្រៅពីមានសំឡេងល្អហើយត្រូវច្រៀងឲ្យត្រូវតុង និងចេះប្រើមនោសញ្ចេតនាដាក់ឲ្យចំបទនៅពេលច្រៀងទៀតផង។ ចំពោះការទទួលពាក្យគឺចាប់ពីថ្ងៃទី29 ខែសីហា ឆ្នាំ2017 ដល់ថ្ងៃទី11 ខែកញ្ញា ឆ្នាំ2017 នៅសាខាទួលគោក និងបឹងកេងកង។ បេក្ខជនដែលអាចដាក់ពាក្យបានគឺត្រូវចេះច្រៀង1បទបើអាចជាភាសាអង់គ្លេសរឹតតែប្រសើរដើម្បីកត់សម្គាល់សំឡេង។ មានវគ្គជម្រុះមួយទៀតបេក្ខជនត្រូវស្តាប់សំឡេងព្យ៉ាណូហើយស្រែកតាមសំនៀងព្យ៉ាណូ ដើម្បីកំណត់កម្ពស់សំឡេង និងចង្វាក់៕

August 29, 2017

រដ្ឋមន្ត្រីកសិកម្ម៖ កម្ពុជាគ្រោងផលិតស្រូវ 2ប្រភេទទៀត

ភ្នំពេញៈ មន្ត្រីជាន់ខ្ពស់ក្រសួងកសិកម្មបានថ្លែងថា កម្ពុជាគ្រោងនឹងដាំដុះស្រូវថ្មីចំនួន2ប្រភេទទៀតដើម្បីនាំចេញទៅកាន់ប្រទេសជប៉ុន និងប្រទេសមួយចំនួននៅតំបន់មជ្ឈិមបូព៌ា។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានថ្លែងឲ្យដឹងកាលពីពេលថ្មីៗនេះថា កម្ពុជានឹងធ្វើការផលិតស្រូវ2ប្រភេទទៀតសម្រាប់នាំចេញនាពេលអនាគត គឺស្រូវឈ្មោះ Japanica និងស្រូវដែលមានគ្រាប់វែងៗសម្រាប់នាំចេញទៅកាន់ប្រទេសអ៊ីស្រាអែល និងប្រទេសនៅក្នុងតំបន់មជ្ឈិមបូព៌ាដទៃទៀត។ លោកបន្តថា ស្រូវ Japanica ជាប្រភេទស្រូវដែលគេកិនជាអង្ករសម្រាប់ធ្វើស៊ូស៊ី ដែលមានភាពពេញនិយមខ្លាំងនៅប្រទេសជប៉ុន។

លោកបន្តថា “ប្រទេសក្នុងតំបន់បានធ្វើការផលិតស្រូវទាំង2ប្រភេទនេះដើម្បីនាំចេញហើយ និងនាពេលអនាគតក្រុមហ៊ុននៅកម្ពុជាក៏អាចនឹងផលិត ដែរប្រសិនជាមានការបញ្ជាទិញ។

លោក វេង សាខុន បានបន្តថា តាមព័ត៌មានក្រុមហ៊ុន Golden Rice និងក្រុមហ៊ុនសោមាគ្រុបបានពិចារណានាំចូលពូជស្រូវទាំងពីរប្រភេទនេះដើម្បីធ្វើការផលិតនាំចេញផងដែរ ប៉ុន្តែព័ត៌មានលម្អិតយ៉ាងណានោះលោកមិនទាន់បញ្ជាក់ឲ្យដឹងនៅឡើយទេ។

លោកឧកញ៉ា សុង សារ៉ន អគ្គនាយកក្រុមអេមរូរ៉ាយបានថ្លែងថា យើងមានគំនិតផលិតស្រូវនេះតាំងពីយូរមកហើយ ប៉ុន្តែធ្វើមិនទាន់ចេញជាលទ្ធផលនៅឡើយទេ ព្រោះលោកកំពុងស្ថិតក្នុងដំណាក់កាលសិក្សា ដោយសារស្រូវប្រភេទនេះមិនមែនចេះតែដាំបាននៅគ្រប់តំបន់នោះទេ ព្រោះការដាំស្រូវប្រភេទនេះ វាពាក់ព័ន្ធនឹងលក្ខខណ្ឌអាកាសធាតុ និងភូមិសាស្ត្រ។ លោកបន្តថា ស្រូវប្រភេទនេះ ប្រសិនជាស្ថិតនៅក្រោមលក្ខខណ្ឌអាកាសធាតុលើស 25អង្សារសេនៅពេលយប់គឺមិនអាចដាំបាននោះទេ។

លោកបន្តថា ស្រូវប្រភេទនេះវាក៏ពាក់ព័ន្ធនឹងរបាយទឹកភ្លៀងផងដែរ ហេតុនេះទោះបីជាស្រូវប្រភេទនេះមានទីផ្សារល្អក្តី ក៏មិនសុទ្ធតែប្រទេសណាក៏អាចដាំបាននោះដែរ។ លោកបន្តថា ខេត្តដែលមានភាពអំណោយផល សម្រាប់ដាំស្រូវ Japanica នេះគឺ ខេត្តព្រះវិហារ រតនគិរី និងខេត្តមណ្ឌលគិរី៕

August 29, 2017

តំបន់ជនបទនឹងមានអ៊ីនធើណិតប្រើពេញលេញដូចទីក្រុងក្នុងរយៈពេល 3 ឆ្នាំទៀត

រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានថ្លែងឱ្យដឹងក្នុងពិធីបើកកិច្ចប្រជុំកំពូលអន្តរជាតិស្តីពីហេដ្ឋារចនាសម្ព័ន្ធវិស័យ ICT កាលពីថ្ងៃទី28 ខែសីហា ឆ្នាំ2017 នេះថា តំបន់ជនបទទូទាំងប្រទេសនឹងមានប្រព័ន្ធអ៊ីនធើណិតប្រើបានដូចទីក្រុងដែរក្នុងរយៈពេល 3 ឆ្នាំទៀត។

ឯកឧត្តម ត្រាំ អ៊ីវតឹក រដ្ឋមន្ត្រីបានបង្ហាញពីបរិយាកាសនៃវិស័យទូរគមនាគមន៍នៅកម្ពុជា និងបានលើកឡើងអំពីមហិច្ឆតារបស់កម្ពុជាក្នុងការតភ្ជាប់ទំនាក់ទំនងតាមប្រព័ន្ធឌីជីថលនៅត្រឹមឆ្នាំ 2020 ហើយបានទទួលស្គាល់ពីតួនាទីដ៏សំខាន់មិនអាចខ្វះបាននៃភាពជាដៃគូរវាងស្ថាប័នរដ្ឋ និងវិស័យឯកជនក្នុងការសម្រេចបាននូវការត្រៀមខ្លួនជាស្រេចក្នុងវិស័យ ICT។

ឯកឧត្តមថ្លែងថា៖«រាជរដ្ឋាភិបាលសង្ឃឹមថា កម្ពុជានឹងមានប្រព័ន្ធអ៊ិនធើណិតប្រើប្រាស់100%នៅតំបន់ប្រជុំជន និង70%នៅតំបន់ជនបទនាឆ្នាំ 2020»។

ដើម្បីសម្រេចបានគម្រោងមួយនេះ មន្ត្រីរដ្ឋាភិបាល អ្នកដឹកនាំធុរកិច្ច និងអ្នកជំនាញផ្នែកទូរគមនាគមន៍ និងហេដ្ឋារចនាសម្ព័ន្ធបានមកជួបជុំគ្នាក្នុងកិច្ចប្រជុំកំពូលនេះដើម្បីរួមគ្នាដោះស្រាយបញ្ហា និងស្វែងរកឱកាសជុំវិញការចែករំលែកបទពិសោធ និងចំណេះដឹងស្តីពីការគ្រប់គ្រងបង្គោលអង់តែន បទប្បញ្ញត្តិនៃវិស័យទូរគមនាគមន៍ និងក្របខ័ណ្ឌអាជ្ញាប័ណ្ណនៅកម្ពុជា។ ក្នុងនោះ ក្រសួងបានធ្វើការសហការគ្នាយ៉ាងសកម្ម និងជិតស្និទ្ធជាមួយក្រុមហ៊ុនហេដ្ឋារចនាសម្ព័ន្ធដែលមានជំនាញ គឺជាគន្លឹះដ៏សំខាន់ដើម្បីធានាថា យើងកំពុងស្ថិតនៅលើផ្លូវត្រឹមត្រូវ។

ឯកឧត្តមបញ្ជាក់ទៀតថា ជាមួយនឹងកំណើន GDP ថេរក្នុងកម្រិត 7.០% កម្ពុជា គឺជាប្រទេសមួយក្នុងចំណោមបណ្តាប្រទេសដែលមានការរីកចម្រើនលូតលាស់លឿនបំផុតក្នុងទ្វីបអាស៊ី ហើយក៏បានត្រៀមខ្លួនជាស្រេចក្នុងការអភិវឌ្ឍវិស័យICTផងដែរ។ បច្ចុប្បន្នកម្ពុជាមានអ្នកប្រើប្រាស់អ៊ិនធើណិតរហូតដល់ទៅ 7.2 លាននាក់ និងអ្នកប្រើប្រាស់ទូរស័ព្ទជិត 20 លាននាក់ ទីផ្សារអ៊ិនធើណិតនឹងផ្តល់ជូននូវឱកាសដ៏ធំធេងសម្រាប់ការអភិវឌ្ឍប្រទេស ខណៈដែលការជ្រៀតចូលនូវអ៊ិនធើណិត ត្រូវបានគេរំពឹងថានឹងបន្តកើនឡើងយ៉ាងខ្លាំងបន្ថែមទៀត៕

August 29, 2017

ភាពខុសគ្នារវាងតម្លៃទឹកចាស់ និងតម្លៃទឹកថ្មីរបស់រដ្ឋាករទឹក

ភ្នំពេញ៖ បន្ទាប់ពីប្រមុខរដ្ឋាភិបាលតម្រូវឱ្យក្រសួងឧស្សាហកម្ម និងសិប្បកម្ម និងរដ្ឋាករទឹកស្វយ័តក្រុងភ្នំពេញសងប្រាក់ទៅប្រជាពលរដ្ឋនូវតម្លៃទឹកដែលមានការគណនាតាមរបៀបថ្មីថ្លៃជាងការគណនាចាស់នោះមក ក្រសួងក៍ដូចជាអង្គភាពរដ្ឋាករទឹកដែរបានចេញមុខសុំទោសប្រជាពលរដ្ឋ និងប្រាប់ពីភាពខុសគ្នានូវតម្លៃទឹកចាស់ និងថ្មីដើម្បីសងទៅប្រជាពលរដ្ឋវិញហើយ។

យោងតាមសេចក្តីជូនដំណឹងរបស់ក្រសួងឧស្សាហកម្ម និងសិប្បកម្មដែលបានជម្រាបជូនសាធារណជនដែលជាអតិថិជនប្រើប្រាស់ទឹកនៅក្នុងភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាលឱ្យដឹងថា ក្រសួងបានចេញសេចក្តីសម្រេចស្តីពីការកែសម្រួលថ្លៃលក់ទឹកស្អាតដែលបានផលិតនិងផ្គត់ផ្គង់ដោយរដ្ឋាករទឹកស្វយ័តក្រុងភ្នំពេញលេខ 149MIH/2017 ចុះថ្ងៃទី15 ខែឧសភា ឆ្នាំ2017 ដោយបានបន្ថែមកម្រិតប្រើប្រាស់ចាប់ពី 0ម៉ែត្រគូបទៅដល់ 03ម៉ែត្រគូបក្នុងតម្លៃ 400រៀលប៉ុណ្ណោះក្នុងមួយម៉ែត្រគូប ខណៈដែលការគណនាថ្មីមានតម្លៃរហូតដល់550 រៀលឯណោះក្នុងមួយម៉ែត្រគូប។

សេចក្តីជូនដំណឹងនេះបានដាក់ការស្តីបន្ទោសទៅលើកំហុសបច្ចេកទេសរបស់រដ្ឋាករទឹកស្វយ័តក្រុងភ្នំពេញដែលបានធ្វើការគណនា និងចេញវិក្កយបត្រពុំត្រឹមត្រូវបណ្តាលឱ្យមានការកើនឡើងនៃតម្លៃទឹកប្រើប្រាស់របស់ប្រជាពលរដ្ឋនៅរាជធានីភ្នំពេញ និងក្រុងតាខ្មៅ។

ជាមួយគ្នានេះ រដ្ឋាករទឹកស្វយ័តក្រុងភ្នំពេញ ក៏បានសុំអភ័យទោសពីសំណាក់ប្រជាពលរដ្ឋនៅក្រុងភ្នំពេញ និងក្រុងតាខ្មៅ និងបានប្រកាសធ្វើការកែតម្រូវនូវការគណនាតម្លៃទឹកត្រឡប់ទៅតាមរបៀបគណនាចាស់ និងសងជូនអតិថិជនវិញនូវរាល់ទឹកប្រាក់លម្អៀង ឬទឹកប្រាក់ដែលបានយកលើសជាបន្ទាន់។ សូមជម្រាបដែរថា បន្ទាប់ពីមានការព្រមានពីប្រមុខរដ្ឋាភិបាលភ្លាមៗ ទាំងក្រសួង និងរដ្ឋាករទឹកបានសន្យាថា នឹងមិនឱ្យមានកំហុសឆ្គងជាលើកទី2ទៀតឡើយ៕

August 29, 2017

ប្រធាន CVEA ប្រាប់លេខទូរស័ព្ទឲ្យប្រជាពលរដ្ឋសាកសួរព័ត៌មានរឿងអចលនទ្រព្យ

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោក គីម ហ៊ាង បានថ្លែងថា ប្រជាពលរដ្ឋដែលមានចម្ងល់ចង់ដឹងពីក្រុមហ៊ុនវិនិយោគលើលំនៅដ្ឋានជាបុរីក្តី ជាខុនដូក្តី អាចទូរស័ព្ទមកសាកសួរសមាគមបាន។

លោកបានថ្លែងឲ្យដឹងនៅថ្ងៃម្សិលមិញថា កន្លងមកមានក្រុមហ៊ុនមួយចំនួនថា ខ្លួនជាក្រុមហ៊ុន ប៉ុន្តែពេលឆែកព័ត៌មានទៅបានរកឃើញថា ពួកគេមិនមានអាជ្ញាប័ណ្ណអភិវឌ្ឍន៍ពីក្រសួងសេដ្ឋកិច្ច និងហិរញ្ញវត្ថុ និងក្រសួងដែនដី នគរូបនីយកម្ម និងសំណង់ឡើយ គឺពួកគេមានតែអាជ្ញាប័ណ្ណចុះបញ្ជីក្រុមហ៊ុនពីក្រសួងពាណិជ្ជកម្មប៉ុណ្ណោះ។ លោកបន្តថា ដើម្បីស្រាយចម្ងល់ទាក់ទងនឹងបុរី ឬខុនដូថា តើមានអាជ្ញាប័ណ្ណឬអត់ ប្រជាពលរដ្ឋអាចសាកសួរមកកាន់សមាគមតាមរយៈទូរស័ព្ទលេខ 023 63 24 834។

លោកគីម ហ៊ាងបានបន្តថា ករណីខ្លះទៀតប្រជាពលរដ្ឋអាចសាកសួរទៅអាជ្ញាធរមូលដ្ឋានដើម្បីធ្វើឲ្យប្រាកដថា អចលនទ្រព្យដែលខ្លួនបានទិញនោះមិនមានហានិភ័យកើតឡើង។ ដូចជាដីឡូត៍ពុះលក់ជាដើម ប្រជាពលរដ្ឋគួរតែសាកសួរព័ត៌មានរកម្ចាស់ប័ណ្ណពិតប្រាកដ។ លោកបន្តថា បច្ចុប្បន្នមានប្រជាពលរដ្ឋមួយចំនួនបានរងគ្រោះពីការទិញដីឡូត៍ ដោយសារម្ចាស់ដីឡូត៍មួយចំនួនបានកក់ប្រាក់10ភាគរយ ហើយម្ចាស់ដីបានត្រឹមតែបានចុះឈូសឆាយដី ហើយលើកស្លាកលក់រួចប្រមូលប្រាក់បានមួយចំនួនក៏រត់ចោលអ្នកទិញតែម្តងក៏មាន៕

August 29, 2017

Liverpool យល់ព្រមលើតម្លៃខ្លួនជាកំណត់ត្រាដើម្បីទិញ Keita ពីក្លិប Leipzig

ក្លិបហង្សក្រហម Liverpool បានយល់ព្រមលើតម្លៃខ្លួនជាកំណត់ត្រារបស់ក្លិបដើម្បីចុះហត្ថលេខាជាមួយនឹង Naby Keita មកពីក្លិប RB Leipzig ខណៈដែលខ្សែបម្រើដ៏មានឥទ្ធិពលរូបនេះនឹងបំពេញការផ្ទេររបស់គេទៅកាន់កីឡដ្ឋាន Anfield នៅខែកក្កដា ឆ្នាំ2018។

ក្រុមហង្សក្រហម បានយល់ព្រមលើទឹកប្រាក់រំលាយកិច្ចសន្យា48លានផោន (ស្មើនឹង 62លានដុល្លារអាមេរិក) ដើម្បីអនុញ្ញាតឲ្យកីឡាករវ័យ 22ឆ្នាំរូបនេះផ្ទេរចូលមកនៅរដូវក្តៅក្រោយ បូករួមទាំងប្រាក់លើកទឹកចិត្តជាច្រើនផ្សេងទៀត។ Keita បានក្លាយជាកីឡាករម្នាក់ក្នុងចំណោមកីឡាករជាអាទិភាពរបស់គ្រូបង្វឹកនៃក្រុម Liverpool គឺលោក Jurgen Klopp នៅរដូវក្តៅនេះ ប៉ុន្តែ ក្លិប Leipzig បានបដិសេធក្នុងការលក់រូបគេចេញនៅពេលនេះ។ ការផ្ទេរនេះនឹងបំបែកកំណត់ត្រាលើតម្លៃខ្លួន35លានផោន ដែល Liverpool បានចំណាយទៅឲ្យក្លិប Newcastle ដើម្បីបំពេញការផ្ទេរខ្សែប្រយុទ្ធ Andy Carroll កាលពីឆ្នាំ2011។ ក្លិប RB Leipzig បានបញ្ចប់ដោយស្ថិតក្នុងចំណាត់ថ្នាក់លេខ2 បន្ទាប់ពីក្រុម Bayern Munich នៅលើតារាងក្របខ័ណ្ឌ Bundesliga កាលពីរដូវកាលមុន ដែលមានន័យថា ពួកគេបានឈ្នះសិទ្ធិទៅលេងក្នុងក្របខ័ណ្ឌ Champions League វគ្គចែកពូល។

ក្រុម Liverpool បានរងនូវការច្រានចោលចំពោះសំណើដេញថ្លៃចំនួន2លើករបស់ខ្លួនរួចមកហើយសម្រាប់តារាឆ្នើមអន្តរជាតិហ្គីណេរូបនេះនៅរដូវក្តៅនេះ ខណៈដែលសំណើលើកទី2ត្រូវបានគេជឿជាក់ថា មានតម្លៃខ្លួនដល់ទៅ70លានផោន ប៉ុន្តែបច្ចុប្បន្នការព្រមព្រៀងគ្នាមួយត្រូវបានឈានដល់ ស្របពេលដែល Leipzig នឹងរក្សាទុករូបគេនៅរដូវកាលនេះ ហើយលោក Klopp នឹងទទួលបានរូបគេនៅរដូវកាលក្រោយ។

ក្នុងរដូវកាលមកទល់ពេលនេះ Liverpool បានចុះហត្ថលេខាជាមួយនឹងខ្សែបម្រើស្លាប Mohamed Salah ពីក្លិប Roma ក្នុងតម្លៃខ្លួន34លានផោន ខ្សែការពារ Andrew Robertson ពីក្លិប Hull ក្នុងតម្លៃខ្លួន8លានផោន និងខ្សែប្រយុទ្ធ Dominic Solanke ក្រោយពីកិច្ចសន្យារបស់គេផុតកំណត់នៅក្លិប Chelsea៕

ប្រភពពី៖ BBC

August 29, 2017

Author: វល័ក្ខ