អេ អឹម ខេ សូមជូនដំណឹងដល់អតថិជនថា ដើម្បីធ្វើការផ្លាស់ប្ដូរទីតាំងទិន្នន័យរបស់សាខាមួយចំនួនទៅប្រព័ន្ធធនាគារស្នូលថ្មី អេ អឹម ខេ នឹងផ្អាកប្រតិបត្តិការនៅតាមម៉ាស៊ីនដាក់/ដកប្រាក់ និងភ្នាក់ងារទាំងអស់ជាបណ្ដោះអាសន្ន ចាប់ពីម៉ោង 10យប់ ថ្ងៃទី07 ខែធ្នូ ឆ្នាំ2018 ដល់ម៉ោង 10 ព្រឹកថ្ងៃទី 10 ខែធ្នូ ឆ្នាំ 2018។
សម្រាប់ព័ត៌មានបន្ថែម៖ 023 22 02 02 ឬ 1800 200 200
នៅថ្ងៃពិព័រណ៍សៀវភៅខាងមុខនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គ្រោងនឹងចែកសៀវភៅរាប់ម៉ឺនក្បាលដល់ប្រជាជនកម្ពុជាដែលចូលចិត្តអានសៀវភៅ។
សៀវភៅដែលនឹងចែកជូននោះមាន 3ចំណងជើង គឺសៀវភៅស្រីហិតោបទេស សៀវភៅក្រមង៉ុយ និងសៀវភៅអ៊ូចុង។ សៀវភៅទាំងអស់នេះសុទ្ធតែបង្កប់ដោយទស្សនអប់រំខ្ពស់ និងមានតម្លៃអប់រំខ្ពស់សម្រាប់ប្រជាជនកម្ពុជា។
ពិព័រណ៍សៀវភៅថ្នាក់ជាតិនៅឆ្នាំនេះធ្វើឡើងនៅថ្ងៃទី7 ដល់ថ្ងៃទី9 ខែធ្នូ ឆ្នាំ2018 ខាងមុខនេះ ក្រោមប្រធានបទ «សៀវភៅរស់ ចំណេះរីក» នៅទីតាំងបណ្ណាល័យជាតិ។ ក្នុងកម្មវិធីដ៏ធំប្រចាំឆ្នាំនេះក៏មានការចូលរួមពីស្តង់លក់សៀវភៅ និងការរៀបចំកម្មវិធីល្អៗជាច្រើនផ្សេងទៀតដើម្បីជំរុញការអាននៅកម្ពុជាឱ្យកានតែមានសម្ទុះខ្លាំងឡើង៕
ព្រឹត្តិការណ៍រត់ប្រណាំងម៉ារ៉ាតុងអូឡាំពិកទីក្រុងតូក្យូ ឆ្នាំ2020 នឹងចាប់ផ្តើមនៅចន្លោះម៉ោង5:30 និងម៉ោង 6ព្រឹក នេះបើយោងតាមការប្រកាសរបស់គណៈកម្មការរៀបចំព្រឹត្តិការណ៍នេះកាលពីថ្ងៃពុធ ក្រោយពីក្រុមមន្ត្រីជំនាញបានលើកឡើងពីកង្វល់ផ្សេងៗ ជុំវិញសុខភាពរបស់អ្នកចូលរួមប្រកួត និងអ្នកគាំទ្រ អំឡុងពេលការឡើងកម្តៅដ៏ក្តៅក្នុងទីក្រុងនេះ។
គណៈកម្មាធិការសុខភិបាលដែលជាមន្ត្រីជំនាញ បានស្នើឱ្យចាប់ផ្តើមការប្រកួត «នៅចន្លោះម៉ោង5:30ព្រឹក និងម៉ោង6ព្រឹក»។ នេះបើយោងតាមការបញ្ជាក់របស់មន្ត្រីជាន់ខ្ពស់របស់អូឡាំពិកលោក John Coates ក្រោយពីមានកិច្ចប្រជុំជាបន្តបន្ទាប់ ក្នុងរដ្ឋធានីរបស់ជប៉ុន។
គណៈកម្មការរៀបចំការប្រកួត បានផ្លាស់ប្តូរម៉ោងប្រកួតរត់ម៉ារ៉ាតុង ទៅកាន់ម៉ោង 7ព្រឹករួចជាស្រេច ខណៈដែលក្រុមការងារសុខាភិបាល បានព្រមានថា វិញ្ញាសានេះ អាចនឹងនាំឱ្យមានការស្លាប់មនុស្ស ដោយសារតែធាតុអាកាសក្ដៅខ្លាំងពេក។
គណៈកម្មការរៀបចំកីឡាអូឡាំពិក ទីក្រុងតូក្យូឆ្នាំ2020 នៅតែត្រូវយល់ព្រមជាមួយនឹងសមាគមអន្តរជាតិនៃសហព័ន្ធកីឡាអត្តពលកម្មជាមុនសិន មុនពេលដោះស្រាយក្នុងពេលជាក់ស្តែង។ នេះបើយោងទៅតាមលោក Coates ដែលជាប្រធានក្រុមប្រឹក្សាសម្របសម្រួលរបស់អូឡាំពិក។
ការប្រកួតកីឡា Rugby Seven ក៏នឹងចាប់ផ្តើមក្នុងរយៈពេល 90នាទី មុនផែនការផងដែរ ហើយការប្រណាំងកង់ឡើងភ្នំ នឹងចាប់ផ្តើមក្នុងរយៈពេល 1ម៉ោងមុន ដើម្បីចៀសវាងពីកម្តៅដ៏ក្តៅពីព្រះអាទិត្យ។ ការប្រកួតដើរចម្ងាយ 50គីឡូម៉ែត្រ ក៏នឹងដាក់ឱ្យដំណើរការផងដែរ។
ទីក្រុងរបស់ជប៉ុន បានឡើងកម្តៅយ៉ាងខ្លាំងជាបន្តបន្ទាប់នៅរដូវក្តៅនេះ ខណៈដែលជប៉ុន ក៏បានរងបញ្ហាដោយសារតែខ្យល់ព្យុះជាបន្តបន្ទាប់ ដែលបានបណ្តាលឱ្យមានការស្លាប់មនុស្ស ការខូចខាតទ្រព្យសម្បត្តិ និងការពន្យារពេលផងដែរ៕
ប្រភពពី៖ Channel News Asia
ប្រជាជនភាគច្រើននៅក្នុងប្រទេសកម្ពុជា ក៏ដូចជាប្រជាជននៅតាមបណ្តាលប្រទេសជាច្រើនលើពិលោក បានទទួលស្គាស់ថា រាល់ផលិតផលភាគច្រើន ដែលផលិតដោយប្រទេសជប៉ុនដូចជា៖ គ្រឿងអេឡិចត្រូនិក សម្ភារៈប្រើប្រាស់ ការសាងសង់អាគារដោយបច្ចេកវិទ្យារបស់ប្រទេសជប៉ុន ជាពិសេសគឺ គ្រឿងបរិភោរ ម្ហូបអាហារ សុខភាព និង ការរស់នៅរបស់ប្រជាជនជប៉ុនគឺជាកត្តាសំខាន់បំផុតរបស់ប្រទេសដែលជឿនលឿនមួយនេះ។
នៅថ្ងៃអង្គារ ទី4 ខែធ្នូ នៅឯភោជនីយដ្ឋាន Yakitori Ginza ក្នុងតំបន់ បឹងកក់ សមាគមសាច់មាន់ដែលមកពីប្រទេសជប៉ុន បានរៀបចំកម្មវិធីសិក្ខាសាលាស្តីអំពីការ ចិញ្ចឹមមាន់យកសាច់ និង យក ស៊ុត តាមបែបស្តងដាររបស់ប្រទេសជប៉ុន។
គួរបញ្ជាក់ថាកម្មវិធីសិក្ខាសាលាក៏បានរៀបចំនៅឯសណ្ឋាគារសុខាភ្នំពេញ – Sokha Hotel Phnom Penh នៅថ្ងៃទី 5 ខែធ្នូ ឆ្នាំ2018 ចាប់ពីម៉ោង 2 រសៀល រហូតដល់ម៉ោង 4ល្ងាច ហើយចំពោះភ្ញៀវដែលបានចូលរួមកម្មវិធីបានភ្លក្សសាច់មាន់ដែលមានរសជាតិឈ្ងុយឆាញ់ និងជាពិសេសសាច់មាន់ដែលជាគុណភាពស្តង់ដាររបស់ប្រទេសជប៉ុនដោយសេរី។
សរុបពីរថ្ងៃក្នុងកម្មវិធីសិក្ខាសាលាមានការអញ្ចីញចូលរួមពីភ្ញៀវកិត្តិយសជាច្រើនប្រមាណជាង 100នាក់មកពីបណ្តាលក្រុមហ៊ុនជាច្រើនដែលមកពីវិស័យ ម្ហូប អាហារ និង សណ្ឋាគារ។ ជាពិសេសវត្តមានរបស់វាគ្មិនមកពីប្រទេសជប៉ុន 4រូប គឺលោក Minoru Sato ប្រធានប្រតិបត្តិកំពូលនៃវិទ្យាស្ថាន និង សមាគមសាច់មាន់ប្រចាំប្រទេសជប៉ុន, លោក Yamanaka Bungo សមាជិកនៃសហគមសាច់មាន់ប្រចាំប្រទេសជប៉ុន និងជានិយោជិកតំណាឱ្យសហគមចិញ្ចឹមមាន់ប្រចាំប្រទេសជប៉ុន, លោក Ito, ជាសមាជិកនៃសហគមសាច់មាន់ប្រចាំប្រទេសជប៉ុន និងជានិយោជិក The Maruto Poulty Co., Ltd និង លោក Suzuki សមាជិកនៃសហគមសាច់មាន់ប្រចាំប្រទេសជប៉ុន។
លោក Minoru Sato ប្រធានប្រតិបត្តិកំពូលនៃវិទ្យាស្ថាន និង សមាគមសាច់មាន់ ប្រចាំប្រទេសជប៉ុន បានលើកឡើងថា “ប្រទេសជប៉ុនគឺជាប្រទេសដែលផលិត និង ចិញ្ចឹមមាន់យកសាច់, ស៊ុតដែលមានស្តងដារជាអន្តរជាតិ ហើយ ប្រទេសជប៉ុនបាននាំយកសាច់មាន់ទៅកាន់បណ្តាលប្រទេសជាច្រើនក្នុងតំបន់អាស៊ី លោកសង្ឃឹមថាប្រជាជនកម្ពុជានឹងមានឱកាសទទួលទានសាច់មាន់របស់ជប៉ុនក្នុងពេលឆាប់ៗ នេះ បន្ទាប់ពីសមាគមអាចរកដៃគូរសហការនាំចូលសាច់មាន់នេះបាន។
លោកបានបន្ថែមទៀតថាសមាគមន៍សាច់មាន់ប្រចាំប្រទេសជប៉ុន កំពុងតែស្វែររកដៃគូរសហការក្នុងការនាំយកសាច់មាន់ដែលមានគុណភាពខ្ពស់មកកាន់ប្រទេសកម្ពុជា អ្នកដែលមានចាប់ណាប់អារម្ម ណ៍អាចទំនាក់ទំនងទៅកាន់លោក Minoru Sato តាមរយៈអ៊ីម៉ែល [email protected] [email protected] ៕
ក្រោយពេលកំណែទម្រង់ប្រព័ន្ធអប់រំនៅកម្ពុជា ក្រសួងអប់រំ យុវជន និងកីឡា បានបោះជំហានកាន់តែស្វាហាប់ឡើងដើម្បីពង្រឹងគុណភាពវិស័យអប់រំ តាមរយៈការបណ្តុះបណ្តាលគ្រូ ការបន្ថែមសម្ភារបរិក្ខារ និងការធ្វើបច្ចុប្បន្នភាពកម្មវិធីសិក្សាជាដើម។
នាព្រឹកមិញនេះ រដ្ឋមន្ត្រីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ ជួនណារ៉ុន បានបង្ហាញពីគម្រោងកែលម្អការអប់រំកម្រិតឧត្តមសិក្សា ក្រោមថវិកាគាំទ្រពីមូលនិធិធនាគារពិភពលោកប្រមាណ 90លានដុល្លារ រួមទាំងកញ្ចប់ថវិការបស់រាជរដ្ឋាភិបាលចំនួន 2.5លានដុល្លារបន្ថែមទៀត។
កម្មវិធីកំណែទម្រង់នេះផ្តោតសំខាន់លើការកែលម្អការស្រាវជ្រាវផ្នែកវិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា និងផ្នែកកសិកម្ម។ ដើម្បីសម្រេចបាននូវផែនការនេះ ក្រសួងអប់រំនឹងបែងចែកខ្ទង់ចំណាយទាំងនេះលើការកសាងបន្ទប់ពិសោធន៍ ការបណ្តុះបណ្តាល និងការបំពាក់បរិក្ខារថ្មីៗឱ្យស្របនឹងតម្រូវការជាក់ស្តែង និងកម្មវិធីថ្មីដែលកំពុងអនុវត្តនៅលើពិភពលោក។ ក្រៅពីនេះថវិកាមួយចំនួនក៏នឹងត្រូវប្រើប្រាស់ដើម្បីពង្រឹងអភិបាលកិច្ច និងការគ្រប់គ្រងលើគ្រឹះស្ថានឧត្តមសិក្សា រួមទាំងការអនុវត្ត និងសម្របសម្រួលគម្រោងនេះផងដែរ។
គួរបញ្ជាក់ថា គម្រោងនេះនឹងដាក់ឱ្យអនុវត្តលើគោលដៅគ្រឹះស្ថានឧត្តមសិក្សាសំខាន់ៗចំនួន5 ដូចជា សាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទកសិកម្ម វិទ្យាស្ថានបច្ចេកវិទ្យាកម្ពុជា (ITC) សាកលវិទ្យាល័យស្វាយរៀង និងសាកលវិទ្យាល័យបាត់ដំបង។ ក្រៅពីនេះ ក្រសួងក៏មានគោលដៅពង្រីកវិសាលភាពគម្រោងនេះទៅកាន់គ្រឹះស្ថានសិក្សានានានៅទូទាំងប្រទេសផងដែរនៅថ្ងៃខាងមុខ៕
ភ្នំពេញ៖ រំភើប សប្បាយៗ និងកាន់តែកក្រើកជាមួយការប្រគំតន្រ្តី Bella nova 3 series Live Concert នាំជូនដោយក្រុមហ៊ុន Huawei ដែលមានការចូលរួមពីកំពូលតារាស្រីឯកអគ្គរដ្ឋទូតប្រចាំតំបន់ ដែលមានបីប្រទេស កម្ពុជា ថៃ ឡាវ របស់ក្រុមហ៊ុន Huawei កញ្ញា Bella Ranne និងកំពូលតារាចម្រៀងលោក នីកូ កញ្ញា សុខ ស្រីនាង សុវត្ថិ មុនីវណ្ណ និង សុវត្ថិ មុនីនាគ នៅថ្ងៃ 10 ធ្នូ នៅស្ទូឌីយូហង្សមាស ផ្សារទំនើបអ៊ីអនម៉ល 1 ជាន់ទី 4 ដែលមានការផ្សាយផ្ទាល់លើកញ្ចក់ទូរទស្សន៍រស្មីហង្សមាស 2 ម៉ោងពេញចាប់ពីម៉ោង 7:00 យប់តទៅ។
ក្នុងឱកាសសម្ពោធស្មាតហ្វូនត្រកូល nova3 ស៊េរី គឺ nova3 Lite ជាផ្លូវការ ក្រុមហ៊ុន Huawei នឹងរៀបចំព្រឹត្តិការណ៍ដ៏អស្ចារ្យមិនធ្លាប់មាននេះ ជាជំនួបឯកអគ្គរដ្ឋទូតក្រុមហ៊ុន Huawei កញ្ញា Bella Ranne ជាមួយអ្នកគាំទ្រនៅប្រទេសកម្ពុជា និងអបអរសាទរការលក់ដាច់បំផុតស្មាតហ្វូន nova3 Lite។
ងាយៗ គ្រាន់តែទៅថតរូប ឬសែលហ្វី ជាមួយ T-stand ដែលមានរូបកញ្ញា Bella នៅហាង Huawei សាខា Aeon 1 ឬ nojima នៅAeon 1 ឬ ផ្លាកផ្សព្វផ្សាយនានារបស់ Huawei ដែលមានរូបកញ្ញា Bella ហើយបង្ហោះក្នុងគណនី Facebook របស់អ្នកជា Public ជាមួយ #BellanovaConcert អ្នកដែលមានចំនួន Like ច្រើនជាងគេ នឹងមានឱកាសទៅទទួលកញ្ញា Bella ពីព្រលានយន្តហោះ និងឈ្នះសំបុត្រ VIP ចូលរួមការប្រគំតន្ត្រី។
លើសពីនេះទៅទៀត អ្នកអាចចូលរួមលេងក្នុងការប្រកួតប្រជែងនៅលើ Huawei Facebook Page: Huawei Mobile (KH) និង Instagram: huaweimobilekh ដើម្បីទទួលបានសំបុត្រចូលរួមការប្រគំតន្ត្រីឥតគិតថ្លៃ ដើម្បីមានឱកាសជួបផ្ទាល់ជាមួយ Bella។ មិនតែប៉ុណ្ណោះ អ្នកក៏អាចទៅសាកសួរនៅតាមបណ្តាហាងលក់ទូរស័ព្ទធំៗដែលមានស្លាកសញ្ញា Huawei នៅទីក្រុងភ្នំពេញដើម្បីទទួលបានសំបុត្រឥតគិតថ្លៃផងដែរ ដោយគ្រាន់តែទិញ Huawei nova 3/nova 3i/ nova 3 lite និងធ្វើតាមលក្ខខណ្ឌផ្សេងៗ។
លោក អែម យុទ្ធូ នាយកជាន់ខ្ពស់ផ្នែកទីផ្សាររបស់ក្រុមហ៊ុន Huawei ប្រចាំនៅកម្ពុជាបានលើកឡើងថា៖ «យើងរៀបចំកម្មវិធីដ៏ពិសេសនេះ ដើម្បីឆ្លើយតបតាមការសន្សារបស់ក្រុមហ៊ុនដែលនឹងអញ្ជើញកញ្ញា Bella មកប្រទេសកម្ពុជាបន្ទាប់ពីការតែងតាំងកញ្ញាជាឯកអគ្គរដ្ឋទូត ការសំនូមពរយ៉ាងខ្លាំងពីអ្នកគាំទ្រ Huawei និងការសម្ពោធស្មាតហ្វូនត្រកូល nova3 ស៊េរី ដែលមានកញ្ញា Bella ជាអ្នកតំណាង»។
គួរបញ្ជាក់ផងដែរថា ស្មាតហ្វូន nova3 Lite តម្លៃត្រឹមតែ $259 ដែលមានអេក្រង់កោង 3D ពេញតួ ធំកប់កែម បែបឆកទំហំបង្ហាញ 6.5 FHD+ FullView Display អេក្រង់លាតរហូតដល់ 90.1% និងកំរិតបង្ហាញ 2349 * 1080 High Resolution បំពាក់ដោយ AI កាមេរ៉ាបួនគ្រាប់ កាមេរ៉ាមុខពីរគ្រាប់ទំហំ 16MP + 2MP និងកាមេរ៉ាក្រោយពីរគ្រាប់ 13MP + 2MP ជាមួយមុខងារ Master AI Photography ស្គាល់បាន 22 ប្លង់ខុសៗគ្នា ដែលរូបភាពតាមប្លង់ និមួយៗល្អឥតខ្ចោះ មុខងារ Wide Aperture Mode និងមុខងារ Hand-held Night Mode ថតរូបពេលយប់ស្អាតកប់តែម្តង។ ថាមពលថ្មរបស់ nova3 Lite មានទំហំធំមហាសាល រហូតដល់ 4000mAh។
អ៊ែមហ្មង់! អតិថិជន ឬមិត្តៗយុវវ័យទាំងអស់ អាចមកថតរូបម៉ាឡូយ សែលហ្វីម៉ាកប់ តេស្តប្រើ និងទទួលបទពិសោធន៍ថ្មីស្មាតហ្វូនស៊េរីថ្មីបំផុត Huawei nova 3 / nova 3i និង nova 3 lite ដែលមាន AI ស្មាត កាមេរ៉ាឆ្លាតវៃ 4 គ្រាប់ នៅថ្ងៃ ចន្ទ ទី 10 ធ្នូ 2018 នេះ ចាប់ពីម៉ោង 6 ល្ងាចតទៅ នៅស្ទូឌីយោហង្សមាស HDTV ផ្សារទំនើប AEON MALL Phnom Penh ជាន់ទី4 និងអាចចូលរួមលេងហ្គេម ដើម្បីឈ្នះសំបុត្រចូលរួមទស្សនាក៌ដូចជារង្វាន់ផ្សេងៗទៀតផងដែរ។
តើកញ្ញា Bella នឹងមានអ្វីដែលពិសេស និងភ្ញាក់ផ្អើលសម្រាប់ការមកប្រទេសកម្ពុជាលើកនេះ? អីចឹងតាមដានទាំងអស់គ្នា! សម្រាប់ព័ត៌មានបន្ថែម សូមចូលទៅកាន់ https://www.facebook.com/huaweimobilekh/ ៕
បុរសវ័យចំណាស់ម្នាក់មានឈ្មោះ ចាន់ ឃឿម អាយុ 64ឆ្នាំ បច្ចុប្បន្នជាកសិករ និងជាប្រជាពលរដ្ឋរស់នៅភូមិក្រាំងស្វាត ឃុំឆ្នាល់មាន់ ស្រុកគាស់ក្រឡ ខេត្តបាត់ដំបង មានសំណាងបានឈ្នះរង្វាន់ធំពីភេសជ្ជៈប៉ូវកម្លាំង ខារ៉ាបាវ នូវទឹកប្រាក់ចំនួន 70លានរៀល បន្ទាប់ពីទិញទទួលទានក្រោយមកពីចំការ។
ថ្លែងប្រាប់ក្រុមការងារដែលចុះប្រគល់រង្វាន់ដល់លំនៅដ្ឋាន លោក ចាន់ ឃឿមបានឱ្យដឹងថា កាលពីសប្ដាហ៍កន្លងទៅនេះ បន្ទាប់សម្រាកពីធ្វើចំការ លោកបានទៅអង្គុយលេងផ្ទះអ្នកជិតខាង ដែលមានលក់គ្រឿងទេស ហើយក៏ទិញភេសជ្ជៈប៉ូវកម្លាំងខារ៉ាបាវមួយកំប៉ុងដើម្បីទទួលទាន លុះស្រាប់តែពេលគាស់ក្រវិលកំប៉ុងក៏ឃើញមានរង្វាន់ 70លានរៀលនៅនឹងក្រវិលកំប៉ុងតែម្ដង។
ភ្លាមនោះ លោកពិតជារំភើបរីករាយជាខ្លាំងស្ទើរមិនជឿភ្នែកខ្លួនឯង ហើយក៏យកបង្ហាញអ្នកលក់ដែលនៅជិតគ្នាស្រាប់ និងទូរស័ព្ទប្រាប់ដំណឹងដល់ក្រុមហ៊ុនតាមរយៈលេខទូរស័ព្ទមាននៅនឹងក្រវិលកំប៉ុង។
លោកបានបញ្ជាក់ថាបច្ចុប្បន្ននេះ ចំពោះកម្រិតជីវភាពគ្រួសារគឺមានភាពលំបាកគួរសម ព្រោះខ្លួនមិនអាចរកចំណូលអ្វីបាននោះឡើយ ក្រៅពីការធ្វើចំការដាំដំឡូងតែប៉ុណ្ណោះ ប៉ុន្តែពេលនេះបន្ទាប់ពីទទួលបានលុយរង្វាន់70លានរៀលពីភេសជ្ជៈប៉ូវកម្លាំងខារ៉ាបាវ លោកនឹងយកមួយចំនួនទៅសងបំណុលគេ និងធ្វើបុណ្យជូនអ្នកម្តាយដែលកំពុងចាស់ជរា ហើយទុកមួយចំនួនទៀតដោះស្រាយបន្ទុកគ្រួសារដែលកំពុងជួបសព្វ និងបន្តទៅថ្ងៃអនាគត។
សូមបញ្ជាក់ផងដែរថា ជាការថ្លែងអំណរគុណដល់អតិថិជនដែលតែងតែគាំទ្ររហូតនោះ ក្រុមហ៊ុន ភេសជ្ជៈប៉ូវកម្លាំង ខារ៉ាបាវ បានបន្ថែមរង្វាន់យ៉ាងសន្ធឹកសន្ធាប់នូវចំនួនទឹកប្រាក់រហូតដល់ 70លានរៀល ចំនួន50រង្វាន់ ម៉ូតូ HONDA Dream 125 ចំនួន50 រង្វាន់ , ទូរស័ព្ទដៃ iPhone ចំនួន50រង្វាន់ រួមជាមួយការផ្តល់ជូនរង្វាន់1កំប៉ុង រាប់លានកំប៉ុង និងគ្មានការកំណត់កាលបរិច្ឆេទនោះទេ ។
អ្នកទទួលទានអាចមានសំណាងបានឈ្នះរង្វាន់ធំ , អ្នកលក់ឱ្យគេត្រូវរង្វាន់ធំនឹងមានសំណាងបានទទួលរង្វាន់7លានរៀល ដោយឡែកសម្រាប់អ្នកតាំងលក់ស្អាតជាងគេនៅពេលក្រុមការងារចុះទៅឃើញ នឹងទទួលបានប្រាក់រង្វាន់ចំនួន70ម៉ឺនរៀល ។
សូមចំណាំ ៖ សម្រាប់រង្វាន់ពិតប្រាកដ គឺមានតែនៅសម្បកកំប៉ុង ដែលមានអក្សរខ្មែរជាសញ្ញាសម្គាល់តែប៉ុណ្ណោះ ៕
ក្នុងរយៈពេល 11ខែ ចាប់ពីខែមករា ដល់ខែវិច្ឆិកា ឆ្នាំ2018នេះ កម្ពុជាទទួលបានចំនួន104,527,531ដុល្លារពីការលក់ប័ណ្ណចូលទស្សនារមណីយដ្ឋានអង្គរដែលចំនួននេះបានកើនឡើង 9.27%បើធៀបនឹងរយៈពេលដូចគ្នាកាលពីឆ្នាំ2017។ នេះបើតាមរបាយការណ៍ផ្លូវការរបស់គ្រឹះស្ថានអង្គរ។
ប៉ុន្តែនៅក្នុងតួលេខចំនួនភ្ញៀវទេសចរបរទេសដែលបានទិញប័ណ្ណចូលទស្សនាអង្គរសម្រាប់ខែវិច្ឆិកាមានចំនួន 233,125នាក់ ដែលចំនួននេះមានការថយចុះ 6.46%។
រីឯចំណូលពីការលក់ប័ណ្ណចូលទស្សនារមណីយដ្ឋានអង្គរសម្រាប់ខែវិច្ឆិកា មានចំនួន10,599,604ដុល្លារ មានការថយចុះ7,40% បើធៀបនឹងរយៈពេលដូចគ្នាកាលពីឆ្នាំ2017។
របាយការណ៍ក៏បានបញ្ជាក់ឱ្យដឹងថា នៅរយៈពេល 11ខែដូចគ្នានេះ ភ្ញៀវទេសចរបរទេសបានទិញប័ណ្ណចូលទស្សនាអង្គរ ចំនួន 2,323,168នាក់ ចំនួននេះមានកំណើន 6.09%។
រីឯចំណូលពីការលក់ប័ណ្ណចូលទស្សនារមណីយដ្ឋានអង្គរ សម្រាប់រយៈពេល 11ខែដូចគ្នានេះមានចំនួន104,527,531ដុល្លារ កើនឡើង 9.27% បើធៀបនឹងរយៈពេលដូចគ្នាកាលពីឆ្នាំ2017។
បើតាមរបាយការណ៍ដដែល ចំណូលដែលទទួលបានជាង 104លានដុល្លារនេះ រាជរដ្ឋាភិបាលបានបរិច្ចាគចំនួន 4,646,336ដុល្លារ ឧបត្ថម្ភចូលមន្ទីរពេទ្យគន្ធបុប្ផាដើម្បីទ្រទ្រង់ដំណើរការពិនិត្យ និងព្យាបាលកុមារកម្ពុជា។
សូមជម្រាបថា ប័ណ្ណចូលទស្សនាតំបន់អង្គរ ត្រូវបានបែងចែកជា 3ប្រភេទ៖
* ប្រភេទប័ណ្ណចូលទស្សនា 1ថ្ងៃ មានតម្លៃ 37ដុល្លារ។
* ប្រភេទប័ណ្ណចូលទស្សនា 3ថ្ងៃ មានតម្លៃ 62ដុល្លារ និងមានសុពលភាព 10ថ្ងៃ។
* ប្រភេទប័ណ្ណចូលទស្សនា 7ថ្ងៃ មានតម្លៃ 72ដុល្លារ និងមានសុពលភាព 1ខែ៕
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានជំរុញសហភាពអារ៉ាប់រួមឱ្យធ្វើការវិនិយោគនៅកម្ពុជាដើម្បីពន្លឿនកំណើនសេដ្ឋកិច្ច និងកាត់បន្ថយភាពក្រីក្រស្របតាមយុទ្ធសាស្ត្រចតុកោណដំណាក់កាលទី4 របស់រាជរដ្ឋាភិបាលទៅលើវិស័យសំខាន់ៗចំនួន4 រួមមានកសិកម្ម ទេសចរណ៍ ឧស្សាហកម្ម និងហេដ្ឋារចនាសម្ព័ន្ធ។
ឯកឧត្តម រដ្ឋមន្ត្រី បានលើកសំណើនេះឡើង នៅក្នុងជំនួបពិភាក្សាទ្វេភាគីជាមួយលោកស្រី រីម អាល់ ហាស្ហ៊ីមី (REEM Al Hashimy) រដ្ឋមន្ត្រីក្រសួងសហប្រតិបត្តិការអន្តរជាតិ និងជាប្រធានរៀបចំពិព័រណ៍ពិភពលោកឌូបៃ ឆ្នាំ2020 នៃប្រទេសសហភាពអារ៉ាប់រួម ដើម្បីពង្រឹងទំនាក់ទំនងសេដ្ឋកិច្ច និងពាណិជ្ជកម្ម។
ឯកឧត្តមក៏បានអញ្ជើញភាគីសហភាពអារ៉ាប់រួមចូលរួមព្រឹត្តិការណ៍ «ពិព័រណ៍ផលិតផលខ្មែរ និងផលិតផលនាំចេញ-នាំចូលកម្ពុជា»កម្រិតអន្តរជាតិដែលគ្រោងនឹងរៀបចំឡើងនៅក្នុងខែធ្នូ ឆ្នាំ2019ដើម្បីស្វែងរកដៃគូពាណិជ្ជកម្ម និងផ្សព្វផ្សាយព្រឹត្តិការណ៍ពិព័រណ៍ពិភពលោកឌូបៃ2020 ដល់ប្រជាជនកម្ពុជា និងប្រជាជននៃប្រទេសអាស៊ាន។
លោកស្រីរដ្ឋមន្ត្រី រីម អាល់ ហាស្ហ៊ីមី បានថ្លែងអំណរគុណដល់លោក ប៉ាន សូរស័ក្តិ ដែលបានចែករំលែកព័ត៌មានល្អៗទាក់ទងនឹងឱកាសវិនិយោគនៅកម្ពុជា និងបានសន្យាជួយជំរុញវិស័យឯកជនប្រទេសសហភាពអារ៉ាប់រួមឱ្យចូលមកសិក្សាអំពីលទ្ធភាពវិនិយោគនៅកម្ពុជា ក៏ដូចជាចូលរួមពិព័រណ៍ ដែលរៀបចំឡើងដោយក្រសួងពាណិជ្ជកម្ម។
នៅក្នុងឱកាសនោះ ឯកឧត្តម ប៉ាន សូរស័ក្តិ ក៏បានជម្រាបជូនលោកស្រី រីម អាល់ ហាស្ហ៊ីមី អំពីវឌ្ឍនភាពនៃកំណើនសេដ្ឋកិច្ចកម្ពុជា ចក្ខុវិស័យរបស់រាជរដ្ឋាភិបាល យុទ្ធសាស្ត្រចតុកោណដំណាក់កាលទី4 គោលនយោបាយគាំពារវិនិយោគ និងគោលការណ៍លើកទឹកចិត្តផ្សេងៗ ដែលរាជរដ្ឋាភិបាលបានផ្តល់ជូនវិនិយោគិនបរទេសដែលកំពុងធ្វើធុរកិច្ចនៅកម្ពុជា។
ជាការឆ្លើយតប លោកស្រី រីម អាល់ ហាស្ហ៊ីមី បានបង្ហាញចេតនាមកបំពេញទស្សនកិច្ចនៅកម្ពុជាក្នុងពេលឆាប់ៗខាងមុខ ដើម្បីស្វែងយល់កាន់តែច្បាស់ពីសក្តានុពលនៃវិស័យទេសចរណ៍ និងវប្បធម៌ដ៏សម្បូរបែបរបស់កម្ពុជាសំដៅពង្រឹងទំនាក់ទំនងការទូត និងកិច្ចសហប្រតិបត្តិការរវាងប្រទេសទាំងពីរ៕
រដ្ឋាភិបាលជប៉ុនបានផ្តល់ជំនួយឥតសំណងសរុបចំនួន 353,276ដុល្លារអាមេរិក សម្រាប់ជួយដល់ការអភិវឌ្ឍលើវិស័យសុខាភិបាល, វិស័យអប់រំ និងវិស័យហេដ្ឋារចនាសម្ព័ន្ធនៅកម្ពុជា។ នេះបើតាមការឱ្យដឹងពីស្ថានទូតជប៉ុនប្រចាំនៅកម្ពុជា។
ពិធីចុះហត្ថលេខាសម្រាប់ការផ្តល់ជំនួយឥតសំណងនេះបានធ្វើឡើងនៅថ្ងៃទី29 ខែវិច្ឆិកា ឆ្នាំ2018 នៅស្ថានទូតជប៉ុន ក្នុងនោះភាគីជប៉ុន តំណាងដោយលោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជា និងស្ថាប័នចំនួន4 តំណាងឱ្យភាគីកម្ពុជា។
ទឹកប្រាក់ជំនួយឥតសំណងទាំងនេះនឹងគាំទ្រដល់មន្ទីរចំនួន4 នៅកម្ពុជាដែលស្ថិតក្រោមគ្រោងការជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចនៃសន្តិសុខមនុស្សជាតិរួមមាន៖
-មន្ទីរធនធានទឹក និងឧតុនិយម ខេត្តកំពង់ស្ពឺ ថវិកាចំនួន 88,995ដុល្លារ
-មន្ទីរសុខាភិបាលខេត្តតាកែវ ថវិកាចំនួន 87,304ដុល្លារ
-មន្ទីរអប់រំយុវជន និងកីឡាខេត្តកណ្តាល ថវិកាចំនួន 8,9162ដុល្លារ
-មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម ថវិកាចំនួន 87,810ដុល្លារ។
សូមបញ្ជាក់ថា ជំនួយឥតសំណង គូសាណូណិ របស់ជប៉ុន បានចាប់ផ្តើមផ្តល់ឱ្យប្រទេសកម្ពុជា នៅឆ្នាំ1991 ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញនៅតាមមូលដ្ឋាន។
គម្រោងផ្តល់ជំនួយនេះ មានទិសដៅការពារដល់ជនងាយរងគ្រោះពីកត្តាមួយចំនួនដូចជា៖ ភាពក្រីក្រ និងភាពអកុសលដែលអាចគំរាមកំហែងដោយផ្ទាល់ដល់ជីវភាពរស់នៅ ការចិញ្ចឹមជីវិត និងសេចក្តីថ្លៃថ្នូររបស់ពួកគេក៏ដូចជាជំរុញនូវភាពម្ចាស់ការលើខ្លួនឯងរបស់ប្រជាសហគមន៍ផងដែរ។
ចាប់តាំងពីឆ្នាំ1991មក រដ្ឋាភិបាលជប៉ុនបានផ្តល់ថវិកាជាង 58លានដុល្លារអាមេរិកដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តគម្រោង គូសាណូណិ ចំនួន 594គម្រោងនៅទូទាំងប្រទេសកម្ពុជា៕