វល័ក្ខ - La Reine Media

Samsung រំពឹងថា ការលក់ Galaxy Note 8 នឹងខ្លាំងជាង Note 5

ក្រុមហ៊ុន Samsung រំពឹងថា ការលក់ស្មាតហ្វូន Galaxy Note 8 ថ្មីរបស់ខ្លួននឹងកើនឡើងបានច្រើនជាង 11លានគ្រឿងក្រោយពេលចេញលក់លើទីផ្សារភ្លាម។ នេះបើតាមការបង្ហើបឱ្យដឹងពីលោក DJ Koh ប្រធានផ្នែកទូរស័ព្ទចល័តរបស់កូរ៉េខាងត្បូង។

ប្រធានផ្នែកទូរស័ព្ទខាងលើបានឱ្យដឹងថា ទូរស័ព្ទ Galaxy Note 5 ជាម៉ូដែលទូរស័ព្ទចុងក្រោយបង្អស់របស់ក្រុមហ៊ុនSamsung ធ្លាប់លក់ចេញបានចំនួន 11 លានគ្រឿងហើយ ហើយលោករំពឹងថា Note 8 នឹងលក់បានច្រើនជាងចំនួននេះទៅទៀត។លោកបានបន្ថែមថា ការដឹកជញ្ជូន Note 8 អាចនឹងមានការប្រែប្រួលខ្លះ ព្រោះក្រុមហ៊ុនក៏ចង់បន្ដលក់ទូរស័ព្ទ Galaxy S 8 ឱ្យបានច្រើនបន្ថែមទៀតផងដែរ។ ជាគោលដៅរបស់ Samsung សម្រាប់ការលក់ Galaxy S 8 គឺ 48 លានគ្រឿង ហើយបច្ចុប្បន្នស្មាតហ្វូននេះលក់បានច្រើនជាងកាលពីលក់ Galaxy S 7 ប្រមាណជា 15% ហើយ។

ចំពោះទូរស័ព្ទ Galaxy Note 8 នេះប្រើនូវអេក្រង់ Super AMOLED កម្រិត QHD+ និងគាំទ្រ Mobile HDR Premium ហើយមានមុខងារ Always on Display និង Screen off memos ។ កាមេរ៉ាក្រោយរបស់វាមាន 2 គ្រាប់ទំហំ 12MP ដូចគ្នា មួយជាកម្រិត f/1.7 សម្រាប់ Lens ធម្មតា និងមួយទៀតកម្រិត f/2.4 សម្រាប់ Telephoto lensហើយក៏មានបំពាក់នូវបច្ចេកវិទ្យា Optical Stabilization ដូចគ្នា។ ស្មាតហ្វូននេះ មាន RAM ទំហំ 6GB ដំណើរការដោយប្រព័ន្ធ Android 7.0 Nougat និងមានថាមពលថ្ម 3300mAh។

យ៉ាងណាមិញ ចំពោះទីផ្សារកម្ពុជា ទូរស័ព្ទ Galaxy Note 8 អាចនឹងមានវត្តមាននៅចុងខែកញ្ញា ឆ្នាំ2017 នេះ ជាមួយនឹងតម្លៃប្រមាណ 900 ដុល្លារស្ដើង៕

August 31, 2017

កម្ពុជាមានរថយន្តចល័តពិនិត្យគុណភាពសាំងតាមស្ថានីយជាលើកដំបូង

ភ្នំពេញ៖ ដើម្បីចៀសវាការបន្លំគុណភាពពីសាំងធម្មតា តែកុហកអតិថិជនថាជាសាំងស៊ុបពែរនោះ ក្រសួងពាណិជ្ជកម្មនៅព្រឹកថ្ងៃទី31 ខែសីហានេះបានដាក់ឱ្យដំណើរការជាផ្លូវការនូវមន្ទីរពិសោធចល័ត (Mobile Lab) ផ្នែកប្រេងឥន្ធនៈរបស់អគ្គនាយកដ្ឋានកាំកុងត្រូលដើម្បីចៀសវាងកុំឱ្យឈ្មួញអ្នកលក់សាំងបន្លំអតិថិជន។

ការដាក់ឱ្យប្រើមន្ទីរពិសោធចល័តដ៏ទំនើបដែលអាចត្រួតពិនិត្យគុណភាពសាំង ឬប្រេងឥន្ធនៈនៅតាមស្ថានីយទូទាំងប្រទេសនេះ ធ្វើឡើងបន្ទាប់ពីបានរកឃើញថា មានស្ថានីយមួយនៅរាជធានីភ្នំពេញបន្លំអតិថិជនដោយចាក់សាំងធម្មតាឱ្យ តែប្រាប់ថាជាសាំងស៊ុបពែរ និងលក់ក្នុងតម្លៃថ្លៃជាងប្រហែល200រៀល។

រថយន្តមន្ទីរពិសោធចល័តផ្នែកប្រេងឥន្ធនៈនេះម៉ាកFord ជាម៉ូដែលឆ្នាំ2016 មានតម្លៃប្រមាណជា152,982.49 ដុល្លារអាមេរិក ហើយគឺជារថយន្តទី2 បន្ទាប់ពីរថយន្តមន្ទីរពិសោធចល័តទី1ដែលត្រូវបានដាក់ឱ្យដំណើរការដើម្បីតាមដាន និងត្រួតពិនិត្យគុណភាព និងសុវត្ថិភាពម្ហូបអាហារកាលពីចុងឆ្នាំ 2016កន្លងទៅ។

នៅក្នុងឱកាសនោះឯកឧត្តម ប៉ាន សូរស័ក្តិ បានគូសបញ្ជាក់ថា ការដាក់ដំណើរការរថយន្តមន្ទីរពិសោធចល័តផ្នែកប្រេងឥន្ធនៈនេះ គឺជាការបង្ហាញពីការគិតគូរ យកចិត្តទុកដាក់ ប្រកបដោយស្មារតីទទួលខុសត្រូវខ្ពស់ក្នុងនាមជាអាជ្ញាធរដែលមានបេសកកម្ម និងភារកិច្ចត្រួតពិនិត្យទំនិញនីហរ័ណ-អាហរ័ណ និងបង្ក្រាបអំពើក្លែងបន្លំនៅក្នុងព្រះរាជាណាចក្រកម្ពុជា។ ឯកឧត្តមបន្តថា រថយន្តនេះនឹងជួយពង្រឹងប្រសិទ្ធភាពការងាររបស់មន្ត្រីកាំកុងត្រូលក្នុងការចុះត្រួតពិនិត្យប្រេងឥន្ធនៈនៅតាមស្ថានីយ ឬដេប៉ូចែកចាយនៅក្នុងរាជធានី និងតំបន់ឆ្ងាយៗទូទាំងប្រទេស ព្រោះវាមានបំពាក់ដោយឧបករណ៍ទំនើប ដែលអាចវិភាគរកនូវប៉ារ៉ាម៉ែត្រនៃផលិតផលទំនិញជាប្រេងឥន្ធនៈទាំងផ្នែកគុណភាព និងបរិមាណ។

សូមបញ្ជាក់ថា បន្ទាប់ពីដាក់ឱ្យដំណើរការរថយន្តមន្ទីរពិសោធចល័តផ្នែកប្រេងឥន្ធនៈថ្ងៃនេះ មន្ត្រីនៃអគ្គនាយកដ្ឋានកាំកុងត្រូល នឹងចុះត្រួតពិនិត្យគុណភាពប្រេងឥន្ធនៈគ្រប់ប្រភេទដូចជា ប្រេងម៉ាស៊ូត ប្រេងសាំង (ស៊ុបពែរ និងសាំងធម្មតា) និងប្រេងម៉ាស៊ីននៅតាមស្ថានីយ និងដេប៉ូចែកចាយប្រេងឥន្ធនៈទូទាំងប្រទេស សំដៅធានាភាពជឿជាក់ជូនប្រជាពលរដ្ឋក្នុងការទទួលបានទំនិញជាប្រេងឥន្ធនៈប្រកបដោយគុណភាព និងមានបរិមាណត្រឹមត្រូវ ព្រមទាំងធានានូវការធ្វើធុរកិច្ចប្រកបដោយសមធម៌ និងរក្សាសណ្តាប់ធ្នាប់ទីផ្សារប្រេងឥន្ធនៈនៅកម្ពុជា៕

August 31, 2017

ឱកាសរបស់វិនិយោគិនក្នុងស្រុកបានមកដល់ហើយ!!

ភ្នំពេញ៖ ដើម្បីលើកកម្ពស់ផលិតផលក្នុងស្រុក និងដើម្បីពង្រីកទំនិញរបស់លោកអ្នកក៏ដូចជាស្វែងរកដៃគូលក់បន្តនៅក្រៅប្រទេសដែរនោះ ពេលនេះក្រសួងពាណិជ្ជកម្មកម្ពុជាបានជំរុញដល់ពាណិជ្ជករ ឬអាជីវករទាំងអស់ឱ្យចូលរួមក្នុងពិព័រណ៍ពាណិជ្ជកម្មចិន-អាស៊ានលើកទី14 ដែលនឹងប្រព្រឹត្តទៅចាប់ពីថ្ងៃទី12-15 ខែកញ្ញា ឆ្នាំ2017 នៅទីក្រុងណាន់នីង ខេត្តក្វាងស៊ី ប្រទេសចិន។

ឯកឧត្តម ស៊ាង ថៃ អគ្គនាយកជំរុញពាណិជ្ជកម្មនៃក្រសួងពាណិជ្ជកម្មមានប្រសាសន៍ក្នុងកិច្ចប្រជុំជាមួយវិនិយោគិនក្នុងស្រុកថា ដើម្បីពង្រីកទំនិញរបស់ខ្លួនឱ្យទទួលបានការគាំទ្រនៅលើទីផ្សារក្រៅប្រទេស វិនិយោគិនគួរចូលរួមពិព័រណ៍បង្ហាញផលិតផលក្នុងស្រុកដែលនឹងប្រព្រឹត្តទៅតាមកាលបរិច្ឆេទខាងលើ។ ហើយដើម្បីឱ្យការរៀបចំ និងការចូលរូមរបស់កម្ពុជាក្នុងពិព័រណ៍ពាណិជ្ជកម្មចិន-អាស៊ានលើកទី14នេះប្រព្រឹត្តទៅដោយជោគជ័យ ឯកឧត្តមបានណែនាំ និងចែករំលែកនូវចំណុចសំខាន់ៗមួយចំនួនជូនដល់ពាណិជ្ជករ-អាជីវករដែលត្រូវចូលរួមតាំងពិព័រណ៍ទាំងអស់រួមមាន៖

1.ការបែងចែកទីតាំងរបស់ក្រុមហ៊ុនចូលរួមតាំងពិព័រណ៍។

2.ការរៀបចំបែបបទគយ និងឯកសារពាក់ព័ន្ធផ្សេងៗរួមមាន៖ Invoice និង Packing List របស់ក្រុមហ៊ុនសម្រាប់ដាក់តាមខ្លួន និងបំពេញបែបបទគយនៅព្រលានយន្តហោះប្រទេសចិន។

3.ការស្នាក់នៅ និងការធ្វើដំណើរនៅក្នុងប្រទេសចិន។

4.ការរៀបចំបែបបទ និងឯកសារពាក់ព័ន្ធផ្សេងៗសម្រាប់ធ្វើ Pass ចេញ-ចូល រួមមានរូបថត លិខិតឆ្លងដែន និង IDចំពោះជនជាតិខ្មែរ។

5.ចំពោះក្រុមហ៊ុនដែលយកស្តង់លក្ខណៈ Upgrade Booth ត្រូវធ្វើការទំនាក់ទំនងជាមួយគណៈកម្មការរៀបចំពិព័រណ៍ដើម្បីបំពេញបែបបទសាងសង់ស្តង់

6.ក្រុមហ៊ុនត្រូវរៀបចំឯកសារពាក់ព័ន្ធសម្រាប់ស្នើសុំទិដ្ឋការចេញ-ចូលប្រទេសចិនដោយខ្លួនឯងជាដើម។ល។
ជាមួយគ្នានេះ ក្រសួងស្នើសុំឱ្យក្រុមហ៊ុននីមួយៗត្រូវគោរពតាមលក្ខខណ្ឌ និងបទបញ្ជាផ្ទៃក្នុងរបស់គណៈកម្មការរៀបចំពិព័រណ៍រួមមានជាអាទិ៍ដូចជា ពុំអនុញ្ញាតឱ្យក្រុមហ៊ុនធ្វើការផ្ទេរ ឬជួលស្តង់របស់ខ្លួនទៅឱ្យក្រុមហ៊ុនដ៏ទៃ មិនអនុញ្ញាតិឱ្យដាក់តាំង និងលក់ផលិតផលរបស់បរទេសឡើយជាពិសេសផលិតផលចិន ត្រូវរក្សាគុណភាពជាចម្បង និងមិនត្រូវផ្សព្វផ្សាយបំផ្លើសពីការពិត និងត្រូវធ្វើការរៀបចំ និងតុបតែងស្តង់របស់ខ្លួនឱ្យមានសោភ័ណភាព និងមានភាពទាក់ទាញ។

ក្រោយពីបានទទួលការណែនាំរួច ក្រុមពាណិជ្ជករ-អាជីវករបានយល់ច្បាស់ពីនីតិវិធីនៃការចូលរួមពិព័រណ៍ពាណិជ្ជកម្មចិន-អាស៊ានលើកទី14 ហើយបានយល់ព្រមគោរពតាមលក្ខខណ្ឌខាងលើ និងយល់ស្របតាមមតិណែនាំនេះដើម្បីត្រៀមនាំទំនិញឬផលិតផលរបស់ខ្លួនចូលរួមតាំងពិព័រណ៍ស្វែងរកដៃគូពង្រីកទំនិញរបស់ខ្លួនទៅលក់នៅលើទីផ្សារក្រៅប្រទេស៕

August 31, 2017

អ្នកជំនាញបង្ហាញពីមូលហេតុដែលកម្ពុជាមានអត្រាអត់ការងារធ្វើតិច

ភាពគ្មានការងារធ្វើ ឬនិកម្មភាព (Unemployment) នៅកម្ពុជាត្រូវបានស្ថាប័នអន្តរជាតិមួយចំនួន រួមទាំងក្រសួងការងារ និងបណ្តុះបណ្តាលវិជ្ជាជីវៈបង្ហាញថា មានចំនួនតិចជាង 1% ដែលចំណុចទាំងអស់នេះបានបង្ហាញពីវឌ្ឍនភាពរបស់សង្គម តែក៏មានប្រតិកម្មមួយចំនួនពាក់ព័ន្ធនឹងចម្ងល់ពីនិយមន័យនៃការកំណត់ពីភាពគ្មានការងារធ្វើនេះ។

នៅព្រឹកថ្ងៃទី29 ខែសីហា ឆ្នាំ2017 នេះ នៅទីស្តីការក្រសួងព័ត៌មាន បានរៀបចំសិក្ខាសាលាផ្សព្វផ្សាយស្តីពី «ក្របខ័ណ្ឌគោលនយោបាយជាតិគាំពារសង្គម ឆ្នាំ2016-2025» ដោយមានអ្នកជំនាញមកពីក្រសួងសេដ្ឋកិច្ច និងហិរញ្ញវត្ថុ ធ្វើបទបង្ហាញពីចំណុចសំខាន់ៗជាច្រើនស្តីពីការគាំពារសង្គម ដែលមានលក្ខណៈជិតសិ្នទ្ធជាមួយនឹងវិស័យការងារនៅកម្ពុជាលើគ្រប់វិស័យ។

នៅក្នុងសិក្ខាសាលានោះ លោក ទូច ម៉េងឡេង វាគ្មិនមកពីក្រសួងសេដ្ឋកិច្ច និងហិរញ្ញវត្ថុ បានលើកឡើងក្នុងបទបង្ហាញថា និកម្មភាព (Unemployment) សំដៅទៅលើជនដែលមានសមត្ថភាពការងារ តែមិនអាចរកការងារធ្វើបាន។ និកម្មភាព នៅកម្ពុជាបើតាមអង្គការពលកម្មអន្តរជាតិ បានបង្ហាញថាមានចំនួនប្រហែលជា 0.7% តែប៉ុណ្ណោះព្រោះបើតាមនិយមន័យនេះ គឺវាជាស្ថានភាពជាក់ស្តែងដែលប្រជាជនកម្ពុជាគ្រប់គ្នាមានការងារធ្វើ គ្រាន់តែក្នុងចំនួនប្រជាជនដែលមានការងារធ្វើទាំងអស់នោះធ្វើការក្នុងប្រព័ន្ធខ្លះ និងធ្វើការក្រៅប្រព័ន្ធខ្លះ។

បង្ហាញពីចំណុចនេះផងដែរ លោក ប៊ូ ច័ន្ទភីរូ ជាអគ្គនាយករងនៃអគ្គនាយកដ្ឋានឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ បានបង្ហាញថាតាមពិតប្រជាជនកម្ពុជាភាគច្រើនមានការងារធ្វើ គ្រាន់តែប្រជាជនដែលធ្វើការងារនៅក្នុងប្រព័ន្ធមានចំនួនតិចជាងប្រជាជនដែលធ្វើការងារនៅក្រៅប្រព័ន្ធ។ ការងារក្នុងប្រព័ន្ធ គឺសំដៅលើការងារមួយចំនួនដូចជាការងារក្នុងក្រុមហ៊ុន ការងារសេវាកម្ម ឬផលិតកម្មមួយចំនួន ហើយការងារក្រៅប្រព័ន្ធគឺសំដៅលើការងារតូចៗដូចជារបររត់ម៉ូតូឌុប ធ្វើកសិកម្មជាលក្ខណៈគ្រួសារ ឬការងារមួយចំនួនផ្សេងទៀតដែលមិនស្ថិតក្នុងប្រព័ន្ធការងារដែលត្រូវបង់ភាគទានចូលរដ្ឋ។

លោក ប៊ូ ច័ន្ទភីរូ បានលើកឡើងផងដែរថា នៅកម្ពុជាដោយសារតែមានមនុស្សបម្រើការងារនៅក្រៅប្រព័ន្ធច្រើនជាមនុស្សដែលបម្រើការងារនៅក្នុងប្រព័ន្ធ ហេតុនេះស្ថាប័នគាំពារសង្គមក៏មានការពិបាកផងដែរ ព្រោះមនុស្សដែលត្រូវបង់ភាគទានចូលរដ្ឋតិច ខណៈមនុស្សដែលពិបាកគ្រប់គ្រងការបង់ភាគទានមានចំនួនច្រើន។ កត្តានេះ ជាកត្តាប្រឈមមួយដែលត្រូវគិតគូរ និងដោះស្រាយ តែទោះជាយ៉ាងណាក៏ដោយ ក៏រដ្ឋាភិបាល កំពុងព្យាយាមពង្រឹងប្រព័ន្ធគាំពារសង្គមនៅកម្ពុជាឱ្យកាន់តែមានលក្ខណៈប្រសើរឡើង ដើម្បីផ្តល់ប្រយោជន៍ដល់អ្នកធ្វើការងារទាំងអស់នៅកម្ពុជា ជាពិសេសអ្នកធ្វើការងារនៅក្នុងប្រព័ន្ធ៕

August 31, 2017

Gibbs និង Krychowiak ចេញពីក្លិប Arsenal និង PSGទៅចូល West Brom រៀងៗខ្លួន

ក្លិប West Brom បានបំពេញការចុះហត្ថលេខាជាមួយនឹងខ្សែការពារស្លាបឆ្វេង Kieran Gibbs ពីក្លិប Arsenal ក្នុងតម្លៃខ្លួនប្រមាណជា7លានផោន (ស្មើនឹង9លានដុល្លារអាមេរិក) និងខ្សែបម្រើ Grzegorz Krychowiak ពីក្លិប Paris St-Germain ក្នុងលក្ខខណ្ឌខ្ចីជើង។

ខ្សែការពារអន្តរជាតិអង់គ្លេស Gibbs វ័យ27ឆ្នាំ បានយល់ព្រមលើកិច្ចសន្យារយៈពេល4ឆ្នាំ។ ដោយឡែក ខ្សែបម្រើអន្តរជាតិប៉ូឡូញ Krychowiak បានចូលលេងត្រឹមតែ10ប្រកួតប៉ុណ្ណោះសម្រាប់ក្លិបបារាំង ចាប់តាំងពីផ្ទេរមកពីក្លិប Sevilla ក្នុងតម្លៃខ្លួន28លានផោន កាលពីឆ្នាំមុន។ Krychowiak បានឈ្នះពានក្របខ័ណ្ឌ Europa League ពីរលើកជាមួយនឹងក្លិប Sevilla និងបានឈ្នះពាន Trophee des Champions, Coupe de la Ligue និង Coupe de France នៅឯក្លិប PSG កាលពីរដូវកាលមុន។

ខ្សែបម្រើរូបនេះ ដែលបានបង្ហាញខ្លួនជាអន្តរជាតិចំនួន45លើកសម្រាប់ក្រុមជម្រើសជាតិប៉ូឡូញនោះបានឲ្យដឹងថា៖ «ខ្ញុំមានសំណើជាច្រើនពីសំណាក់ក្លិបនៅអេស្ប៉ាញ និងអ៊ីតាលី។ ប៉ុន្តែ នេះគឺជាក្លិបពោរពេញដោយមហិច្ឆតាមួយ។ វាមានបរិយាកាសដ៏ល្អមួយនៅទីនេះ»។

Gibbs ក៏បានធ្វើការពិភាក្សាជាមួយនឹងក្លិប Watford និងក្លិបតួកគី Galatasaray នៅរដូវក្តៅនេះផងដែរ ស្របពេលដែល Krychowiak បានទទួលការចាប់អារម្មណ៍ពីសំណាក់ក្លិបជាច្រើនក្នុងនោះរាប់បញ្ចូលទាំង Chelsea និង Juventus ទៀតផង។ Gibbs ដែលបាននៅជាមួយនឹងក្លិប Arsenal តាំងពីវ័យ14ឆ្នាំមកនោះ បានឲ្យដឹងថា៖ «ពួកគេបានបង្កើតឲ្យមានការចុះហត្ថលេខាដ៏ល្អមួយ ហើយខ្ញុំមានអារម្មណ៍ថា នេះគឺជាការផ្ទេរដ៏ល្អមួយសម្រាប់ខ្ញុំ»៕

ប្រភពពី៖ BBC

August 31, 2017

កាដូថ្មី! ផ្លូវជាតិលេខ3 នឹងត្រូវអភិវឌ្ឍឱ្យមាន 4គន្លង

ភ្នំពេញ – ដើម្បីឆ្ពោះទៅរកការអភិវឌ្ឍប្រកបដោយនិរន្ដរភាព និងកាត់បន្ថយការកកកស្ទះចរាចរណ៍សម្រួលដល់ការធ្វើដំណើររបស់ប្រជាពលរដ្ឋ ថ្មីៗនេះប្រមុខរាជរដ្ឋាភិបាលបានប្រកាសចេញនូវគម្រោងថ្មីមួយទៀត គឺគ្រោងពង្រីកផ្លូវជាតិលេខ3។

ការពង្រីកផ្លូវនេះត្រូវធ្វើឡើងចាប់ពីរង្វង់មូលចោមចៅទៅដល់ផ្លូវបំបែកទៅខេត្ដតាកែវ និងកំពត ដោយផ្លូវនេះនឹងត្រូវពង្រីកទៅជា4គន្លងផ្លូវ និងមានកន្លែងខ្លះទៀតត្រូវពង្រីកទទឹងផ្លូវដល់ទៅ12ម៉ែត្រទៀតផងដើម្បីជួយសម្រួលដល់ការដឹកជញ្ជូន និងការធ្វើដំណើររបស់ប្រជាពលរដ្ឋ។

សម្ដេចនាយករដ្ឋមន្ដ្រីហ៊ុន សែន បានលើកឡើងថា៖«ថ្ងៃនេះខ្ញុំអាចបញ្ជាក់ជូនប្រជាពលរដ្ឋដែលរស់នៅតាមផ្លូវជាតិលេខ3 ឱ្យបានជ្រាបថា ផ្លូវជាតិលេខ3របស់យើងមិនត្រូវទុកឱ្យនៅត្រឹមតែ9-10ដូច្នេះម៉ែត្រទៀតទេ។ យើងនឹងធ្វើផ្លូវនេះពីចោមចៅទៅទល់ទីរួមខេត្ដទៅកំពត និងជាង2ភាគ3 នឹងធ្វើ4គន្លង 2ទៅ2មក នៅសល់1ភាគ3 គឺយើងនឹងធ្វើទទឹង12ម៉ែត្រ»។

សម្ដេចបន្ដថា កាលពីមុន ផ្លូវនេះមានទទឹងតែ7ម៉ែត្រប៉ុណ្ណោះ ហើយសម្ដេចបានធ្វើការចចារជាមួយសាធារណរដ្ឋកូរ៉េទើបបានពង្រីកមកបានទំហំដូចសព្វថ្ងៃ។ ទោះយ៉ាងណាទំហំប៉ុណ្ណឹងវាលែងស័ក្កិសមជាមួយការរីកចម្រើនសេដ្ឋកិច្ចរបស់ប្រទេសកម្ពុជាទៀតហើយ ។

ជាមួយនឹងការបញ្ជាក់បែបនេះ មហាជនជាច្រើនពិសេសអ្នកដែលប្រើប្រាស់ផ្លូវមួយនេះ និងធ្លាប់ជួបការកកស្ទះចរាចរណ៍ស្ទើររៀងរាល់ថ្ងៃនោះ បានសាទរជាមួយនឹងគម្រោងអភិវឌ្ឍន៍ផ្លូវជាតិលេខ3នេះជាខ្លាំង ព្រោះថា ការកកស្ទះមិនត្រឹមតែបានធ្វើឱ្យប៉ះពាល់ដល់ពេលវេលានៃការធ្វើដំណើររបស់ប្រជាពលរដ្ឋប៉ុណ្ណោះទេ តែថែមទាំងប៉ះពាល់យ៉ាងច្រើនដល់សេដ្ឋកិច្ចជាតិទៀតផង តាមរយៈព័ត៌មាននេះដែរ ម្នាក់ៗកំពុងរំពឹងថា គម្រោងមួយនេះនឹងលេចចេញជារូបរាងក្នុងពេលឆាប់ៗខាងមុខ៕

August 31, 2017

ក្លិប Liverpool យល់ព្រមលើតម្លៃខ្លួនដើម្បីទិញ Oxlade-Chamberlain ពី Arsenal

ក្លិបហង្សក្រហម Liverpool បានយល់ព្រមលើតម្លៃខ្លួន 35លានផោន (ស្មើនឹង 46លានដុល្លារអាមេរិក) ជាមួយនឹងក្លិប Arsenal ដើម្បីចុះហត្ថលេខាជាមួយនឹងខ្សែបម្រើអន្តរជាតិអង់គ្លេស Alex Oxlade-Chamberlain។ នេះបើយោងតាមប្រភពព័ត៌មាននានាកាលពីថ្ងៃពុធ។

Oxlade-Chamberlain ស្ទើរតែបានចូលរួមជាមួយនឹងក្លិប Chelsea កាលពីដើមសប្តាហ៍នេះទៅហើយ ក្រោយពីក្រុមម្ចាស់ជើងឯករបស់ក្របខ័ណ្ឌ Premier League មួយនេះបានដាក់សំណើដេញថ្លៃ និងត្រូវបានទទួលយកដោយ Arsenal សម្រាប់កីឡាករវ័យ24ឆ្នាំរូបនេះ។ ប៉ុន្តែ ក្លិប Liverpool ហាក់ដូចជាឈ្នះក្នុងការប្រជែងដើម្បីចុះហត្ថលេខាជាមួយនឹង Oxlade-Chamberlain នៅមុនពេលទីផ្សារដោះដូរកីឡាករត្រូវបិទនៅរាត្រីនេះ។

វាត្រូវបានគេជឿជាក់ថា Liverpool គឺជាក្លិបដែល Oxlade-Chamberlain ចង់ផ្ទេរទៅ ហើយរូបគេមិនបានធ្វើការពិភាក្សាជាមួយនឹងក្លិប Chelsea ឡើយ ស្របពេលដែលរូបគេបានរង់ចាំមើលថា តើក្រុមរបស់លោក Jurgen Klopp នឹងដាក់សំណើដេញថ្លៃយករូបគេ ឬយ៉ាងណាដែរ?។ បច្ចុប្បន្ន Oxlade-Chamberlain កំពុងតែបំពេញកាតព្វកិច្ចជាមួយនឹងក្រុមជម្រើសជាតិអង់គ្លេស និងត្រូវបានរំពឹងទុកថា បានទទួលការពិនិត្យសុខភាពនៅឯទីលានហ្វឹកហាត់ St George’s Park កាលពីល្ងាចថ្ងៃពុធមុនពេលចុះហត្ថលេខារយៈពេល 6ឆ្នាំជាមួយនឹងក្លិប Liverpool។

លោក Arsene Wenger អ្នកចាត់ការទូទៅរបស់ Arsenal បានសម្រេចចិត្តលក់ Oxlade-Chamberlain ពីព្រោះអតីតកីឡាកររបស់ក្លិប Southampton រូបនេះ នឹងផុតកិច្ចសន្យា ហើយនិងត្រូវចាកចេញដោយគ្មានតម្លៃខ្លួននៅចុងរដូវកាលនេះ៕

ប្រភពពី៖ Sport24

August 31, 2017

ស្ថាបត្យករបរទេសនឹងត្រូវបញ្ជូនទៅប្រទេសកំណើតវិញ បើមិនអនុវត្ដច្បាប់របស់កម្ពុជា

ភ្នំពេញ – ដើម្បីរក្សាឱ្យបានសណ្ដាប់ធ្នាប់ក្នុងវិស័យស្ថាបត្យកម្ម និងទប់ស្កាត់ការហូរចូលនៃជនបរទេសដែលមានជំនាញស្ថាបត្យកម្មមកធ្វើការងារខុសច្បាប់ ថ្មីៗនេះក្រសួងរៀបចំដែនដី នគរូបនីយកម្ម និងសំណង់បានដាក់ចេញនូវវិធានការចុះត្រួតពិនិត្យដល់ការដ្ឋានសំណង់ដើម្បីរកជនបរទេសទាំងនោះឱ្យអនុវត្ដច្បាប់របស់កម្ពុជា។

ឯកឧត្ដម ភឿង សោភ័ណ្ឌ រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់បញ្ជាក់ថា៖ «យើងមិនប្រកាន់ពូជសាសន៍ទេ តែប្រទេសមួយត្រូវមានច្បាប់អនុវត្ដឱ្យបានត្រឹមត្រូវ ដូច្នេះជនបរទេសដែលមកប្រកបការងារនៅប្រទេសយើង ពិសេសក្នុងវិស័យស្ថាបត្យកម្មសំណង់ត្រូវតែអនុវត្ដតាមច្បាប់របស់យើង»។

ពាក់ព័ន្ធនឹងការងារនេះត្រូវបានបែងចែកជា2 ៖

ទី1 – ស្ថាបត្យកម្មក្របខ័ណ្ឌតំបន់អាស៊ានមានន័យថា ស្ថាបត្យករកម្ពុជាដែលបានចុះបញ្ជីនៅគណៈស្ថាបត្យកម្មកម្ពុជាអាចទៅធ្វើការនៅប្រទេសទាំង10ក្នុងតំបន់អាស៊ានបាន ដោយប្រទេសទាំងអស់នេះមានកាតព្វកិច្ចទទួលស្គាល់ស្ថាបត្យករយើង។ ដូចគ្នានេះដែរនៅពេលស្ថាបត្យករនៃប្រទេសទាំង10ក្នុងតំបន់អាស៊ាននោះបានចុះបញ្ជីនៅប្រទេសគេរួចហើយ ក៏នឹងអាចមកធ្វើការងារក្នុងវិស័យនេះនៅកម្ពុជាដោយស្របច្បាប់បានដែរ។

ទី2 – ស្ថាបត្យករបទេសដែលមិនស្ថិតនៅក្នុងប្រទេសនៅក្នុងតំបន់អាស៊ានដែលមកបំពេញការងារនៅប្រទេសកម្ពុជា ដូចជាមកពីប្រទេសជប៉ុន កូរ៉េ ចិន ជាដើមគាត់ត្រូវតែមកចុះបញ្ជីនៅក្នុងប្រទេសកម្ពុជា។

រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ បន្ដថា ថ្មីៗនេះឯកឧត្ដមទេសរដ្ឋមន្ដ្រី ជា សុផារ៉ា បានចាត់ឱ្យមានការជួបប្រជុំជាមួយគណៈស្ថាបត្យករ និងវិស្វករចុះត្រួតពិនិត្យតាមការដ្ឋានដូច្នេះយើងត្រូវចុះអនុវត្ដ និងធ្វើការណែនាំស្ថាបត្យករជាជនបរទេសទាំងនោះឱ្យមកចុះបញ្ជីតាមច្បាប់របស់ប្រទេសកម្ពុជា។

ឯកឧត្ដម ភឿង សោភ័ណ្ឌ សង្កត់ធ្ងន់ថា៖« ក្នុងករណីគាត់មិនព្រមអនុវត្ដតាមច្បាប់ទេ យើងនឹងធ្វើការងារជាមួយក្រសួងការបរទេសជាលក្ខណៈការទូតដោយធ្វើលិខិតជូនទៅស្ថានទូតរបស់គាត់ ដើម្បីឱ្យបញ្ជូនគាត់ទៅប្រទេសរបស់គាត់វិញ»។

ការអនុវត្ដបែបនេះត្រូវបានគេមើលឃើញថា ដើម្បីពង្រឹងនីតិវិធីគ្រប់គ្រងក៏ដូចជាផ្ដល់ឱកាសការងារដល់ស្ថាបត្យករ និងវិស្វករកម្ពុជាដែលទើបចេញពីសាលាឱ្យមានការងារធ្វើ ព្រោះក្នុងករណីពុំសូវមានជនបរទេសមកធ្វើការងារនៅកម្ពុជាលើផ្នែកនេះវាជាឱកាសរបស់និស្សិតកម្ពុជា៕

August 30, 2017

Smart បង្ហាញសសរស្តម្ភ 4 ដែលធ្វើឱ្យខ្លួនរឹងមាំក្នុងទីផ្សារកម្ពុជា

ក្រោយចាប់ផ្ដើមប្រតិបត្តិការតាំងពីឆ្នាំ 2008 ក្នុងប្រទេសកម្ពុជា លើដើមទុនប្រតិបត្តិការអស់ជាង 967 លានដុល្លារមក ក្រុមហ៊ុន Smart បានបង្ហាញនូវសសរស្តម្ភចំនួន 4 ដែលធ្វើឱ្យខ្លួនមានភាពរឹងមាំ និងមានភាពរីកចម្រើនរហ័សក្នុងទីផ្សារដែលពេញដោយការប្រកួតប្រជែងមួយនេះ។

នៅក្នុងរបាយការណ៍ស្តីពីនិរន្តរភាពឆ្នាំ 2015-2016 លោក ថូម៉ាស ហ៊ុន នាយកប្រតិបត្តិក្រុមហ៊ុន Smart បានឱ្យដឹងថា មានហេតុផលជាច្រើនដែលធ្វើឱ្យក្រុមហ៊ុនមួយនេះអាចឈរជើងបានយ៉ាងល្អក្នុងទីផ្សារដែលពេញដោយការប្រកួតប្រជែង។ ប៉ុន្ដែមានរឿងតែ 4 ប៉ុណ្ណោះ ដែលជួយឱ្យ Smart រឹងមាំ ដោយធ្វើឡើងស្របតាមក្របខ័ណ្ឌរៀបរៀងរបស់ក្រុមហ៊ុន Axiata និងអនុលោមតាមគោលការណ៍ណែនាំ G4 របស់ស្ថាប័ន Global Reporting Initiative (GRI-G4) ។ ការប្តេជ្ញាចិត្ត និងសមិទ្ធផលរបស់ក្រុមហ៊ុន ធ្វើឡើងស្របតាមវិស័យសេដ្ឋកិច្ច បរិស្ថាន និងសង្គមក្រោមសសរស្តម្ភនិរន្តរភាពគន្លឺះចំនួន 4 គឺ៖

សសរទី 1៖ លើសពីប្រាក់ចំណេញរយៈពេលខ្លីៈ ការបង្កើតគុណតម្លៃរយៈពេលវែងតាមរយៈការវិនិយោគរបស់Smart ក៏ដូចជាការធានាឱ្យបាននូវការរួមបញ្ជូលជាច្រើនទៀតដែរទៅក្នុងផលិតផល និងសេវាកម្មរបស់ពួកយើង។
សសរទី 2៖ ការកសាងធនធានមនុស្ស: ជាការបណ្តុះបណ្តាលធនធានមនុស្សលំដាប់ពិភពលោក ដែលបង្កើតឡើងលើគុណតម្លៃស្នូលរបស់ Axiata ព្រមទាំងផ្តល់កន្លែងធ្វើការដែលអំណោយផលចំពោះភាពច្នៃប្រឌិត និងការអភិវឌ្ឍ។
សសរទី 3៖ ដំណើរការល្អឥតខ្ចោះ: ការកែលម្អលើដំណើរការដើម្បីធានាបាននូវប្រសិទ្ធភាពក្នុងការបម្រើអតិថិជនរបស់យើង និងប្រតិបត្ដិការផ្ទៃក្នុងរបស់ក្រុមហ៊ុន។
សសរទី 4៖ ពិភពលោក និងសង្គម: ការផ្តួចផ្តើមគម្រោងក្នុងបំណងជួយកាត់បន្ថយផលប៉ះពាល់ដល់បរិស្ថានរបស់យើង និងការរួមចំណែកការងារសង្គមកម្ពុជា។

នៅឆ្នាំ 2015 និង 2016 ក្រុមហ៊ុនបានចំណាយទុនវិនិយោគសរុបចំនួន 140 លានដុល្លារ ដើម្បីកែលម្អហេដ្ឋារចនាសម្ព័ន្ធបណ្តាញរបស់ខ្លួន។ ក្រុមហ៊ុនបង្កើតការងារដល់មនុស្សចំនួន 40,656 នាក់នៅប្រទេសកម្ពុជា ដោយក្នុងនោះក្រុមហ៊ុនបានជួលបុគ្គលិកឱ្យបម្រើការងារដោយផ្ទាល់ចំនួន 1,047 នាក់ ក្នុងនោះ 98% ជាជនជាតិខ្មែរ និងមាន 37% ជាស្ត្រី ។ Smart បានប្តេជ្ញាចិត្តក្នុងការលើកកម្ពស់ទេពកោសល្យ ការអភិវឌ្ឍខ្លួន និងការអភិវឌ្ឍវិជ្ជាជីវៈរបស់បុគ្គលិក តាមរយៈការបង្កើតបរិយាកាសការងារអំណោយផល មានកម្មវិធីបណ្តុះបណ្តាល ការហ្វឹកហ្វឺន និងការផ្តល់រង្វាន់ដល់បុគ្គលិកឆ្នើមទៀតផង ។

ក្រៅពីផ្តោតលើអាជីវកម្មស្នូលរបស់ខ្លួន ក្រុមហ៊ុនក៏បានផ្តួចផ្តើម និងឧបត្ថម្ភកម្មវិធី គម្រោង និងព្រឹត្តិការណ៍ការងារសង្គមជាច្រើន ដោយផ្តោតលើវិស័យសំខាន់ 3 គឺ ការអប់រំ បរិស្ថានបៃតង និងកីឡាសហគមន៍។ ក្រុមហ៊ុនបានឈ្នះពានរង្វាន់ “ក្រុមហ៊ុនដែលមានភាពទទួលខុសត្រូវសង្គមល្អជាងគេ” ពីស្ថាប័ន Global Banking និង Finance Review សម្រាប់រយៈពេល3ឆ្នាំជាប់ៗគ្នាគឺ 2015 2016 និង 2017 ដោយសារបានចូលរួមចំណែកក្នុងកិច្ចការសង្គមជាច្រើននៅកម្ពុជា។ យុទ្ធនាការលើកកម្ពស់អក្ខរកម្មជាតិ ដែលគាំទ្រដោយក្រុមហ៊ុន Smart ក៏បានទទួលស្គាល់ដោយ TelecomAsia ថា ជាគម្រោងសហគមន៍ល្អបំផុតប្រចាំឆ្នាំ 2016 ផងដែរ។

នាយកប្រតិបត្តិខាងលើបញ្ជាក់ថា ក្នុងឆ្នាំ 2016 ក្រុមហ៊ុន Smart បានចូលរួមចំណែកទឹកប្រាក់ 313 លានដុល្លារ ចូលសេដ្ឋកិច្ចជាតិរបស់ប្រទេសកម្ពុជា។ ចំនួនទឹកប្រាក់នេះគឺស្មើនឹង 1,6% នៃផលិតផលសរុបក្នុងស្រុក (GDP) របស់ប្រទេសកម្ពុជា ដែលមានប្រភពចេញពីក្រុមហ៊ុនតែមួយប៉ុណ្ណោះ ។ ក្រុមហ៊ុន Smart ក៏បានបង់ពន្ធថ្លៃសេវាឯកសារ និងថ្លៃសេវាផ្សេងៗ សរុបចំនួន 65 លានដុល្លារផងដែរ ដែលធ្វើឱ្យក្រុមហ៊ុនក្លាយជាអ្នកបង់ពន្ធធំជាងគេមួយនៅកម្ពុជា ដែលប្រាក់ចំណូលពន្ធនេះស្មើនឹង 3,6 % នៃចំណូលពន្ធជាតិសរុបកាលពីឆ្នាំមុន គឺបានពីក្រុមហ៊ុន Smart ។ នេះគឺជាភ័ស្តុតាងច្បាស់ដែលបង្ហាញថា ក្រុមហ៊ុន Smart តែងតែយកចិត្តទុកដាក់យ៉ាងខ្លាំងលើការទទួលខុសត្រូវពន្ធដាររបស់យើង និងជាអ្វីដែលអតិថិជន ដៃគូ ភាគីពាក់ព័ន្ធ និងភាគហ៊ុនិករបស់យើងគប្បីមានមោទនភាព៕

August 30, 2017

កសិករថា ការដាំស្លឹកខ្ទឹមបានថ្លៃខ្ពស់ និងឆាប់ទទួលបានផលជាងដំណាំដទៃ

កសិករនៅស្រុកស្អាង ខេត្តកណ្តាលដែលប្រកបរបរដាំខ្ទឹមបាននិយាយទាំងទឹកមុខរីករាយ ដោយហេតុថា ចំណាយដីដាំខ្ទឹម1ហិកតាបានផលខ្ពស់ជាងដំណាំដទៃ ដែលអាចលក់ចេញបានប្រាក់ច្រើនរហូតដល់ជាង30 ទៅ40លានរៀលក្នុងមួយលើកៗហើយចំណាយពេលដាំតែ1ខែ5ថ្ងៃប៉ុណ្ណោះ។

អ្នកស្រី ថូ រី កសិករដាំខ្ទឹមនៅភូមិព្រែកខ្មែរ ឃុំស្អាងភ្នំ ស្រុកស្អាង បានឱ្យដឹងថា អ្នកស្រីមានផ្ទៃដីប្រមាណជា 50អា ដែលជាទូទៅគេត្រូវប្រើពូជអស់ជាង 600គីឡូក្រាមហើយពេលទទួលទិន្នផលមកវិញគឺបានចន្លោះពីជាង 3ទៅ4តោនឯណោះ។ កសិករខាងលើដដែលបន្តថា ឆ្នាំនេះ គឺហាក់បីដូចអំណោយផលល្អសម្រាប់ដំណាំខ្ទឹម ឯតម្លៃនោះទៀតសោតក៏គ្រាន់បើជាងឆ្នាំកន្លងទៅដែរ។ កាលពីរដូវទឹកសម្រកខ្ទឹមបានតម្លៃប្រមាណពី 2000ទៅ2500រៀលប៉ុណ្ណោះក្នុងមួយគីឡូក្រាម ប៉ុន្តែបច្ចុប្បន្នខ្ទឹមបានថ្លៃខ្ពស់ចន្លោះពី 3500ទៅ4000រៀលក្នុងមួយគីឡូដែលនេះសម្រាប់ខ្ទឹមទើបដកចេញពីដីភ្លាមៗ តែបើដកហើយបកសំបកស្អាតផងនោះ គឺបានតម្លៃដល់ទៅពី4000 ទៅ4500រៀលឯណោះ។

ចំណែកឯលោក ដុក ភា កសិករនៅភូមិពាមសាលា ឃុំស្អាងភ្នំ ក៏បានប្រាប់ដែរថា ខ្ទឹមឆ្នាំនេះមិនត្រឹមតែទទួលបានទិន្នផលខ្ពស់ទេ សូម្បីតម្លៃលើទីផ្សារក៍ខ្ពស់ជាងឆ្នាំមុនដែរ ធ្វើឱ្យពួកគាត់ជាកសិករបានប្រាក់ចំណេញគ្រាន់បើ។ កសិករដដែលក៏បានប្រាប់អំពីវិធីសាស្ត្រដាំដុះថា ខ្ទឹមជាដំណាំមួយប្រភេទមិនពិបាកថែទាំណាស់ណាទេ ដោយគ្រាន់តែត្រូវស្រោចទឹកច្រើនបន្តិច។ មុននឹងដាំគេត្រូវភ្ជួរដីហាល2ទៅ3ដងដើម្បីឱ្យដីឆ្អិនល្អ បើដីមិនឆ្អិនល្អក៏ដាំមិនសូវបានផលដែរ ក្រោយពីហាលដីរួចត្រូវយកជីកំប៉ុស ឬជីលាមកគោទៅបាចហើយភ្ជួរលុប រួចទើបលើកជាងរង។

រួចយកពូជទៅដាំដោយគ្របចំបើងពីលើ និងស្រោចទឹកក្នុងមួយថ្ងៃ2ដង ព្រឹកល្ងាចជាប្រចាំ ព្រមទាំងមើលថែដកស្មៅ ហើយនិងដាក់ជី ព្រមទាំងពិនិត្យមើលសត្វល្អិត បើសិនជាមានត្រូវតែបាញ់ថ្នាំសម្លាប់។ ចាប់តាំងពីដាំរហូតដល់ដកលក់គឺត្រូវប្រើរយៈពេលពី1ខែ5ថ្ងៃ ទៅ1ខែ10ថ្ងៃ ហើយក្នុងមួយហិកតាអាចទទួលបានទិន្នផលពីជាង5ទៅ6តោន។ តែទោះយ៉ាងនេះក្តី ពួកគាត់ក៏បានសំណូមពរដល់មន្ត្រីកសិកម្ម ក៏ដូចជារដ្ឋាភិបាលឱ្យមេត្តាចុះជួយអប់រំផ្សព្វផ្សាយបច្ចេកទេសកសិកម្មដល់កសិករផង ឱ្យពួកយើងដឹង និងចេះអំពីរបៀបនៃការដាំដុះ បែបថ្មីដើម្បីទទួលបានទិន្នផលខ្ពស់ ហើយក៏សូមជួយទប់ស្កាត់ការនាំចូលពីប្រទេសជិតខាងផង ជាពិសេសនៅពេលដែលកសិករប្រមូលផល ដើម្បីអាចលក់បានតម្លៃសមរម្យ និងមានស្ថេរភាព។

ចំណែកឯឈ្មួញកណ្តាលម្នាក់គឺលោក ភួង ចាន់ថុល ក៏បានប្រាប់ដែរថា ក្នុងមួយថ្ងៃលោកទិញខ្ទឹមពីបងប្អូនទៅលក់នៅផ្សារដើមគរមិនតិចជាង1តោននោះទេក្នុង1ថ្ងៃ ហើយឆ្នាំនេះឃើញថាតម្លៃ គឺបានឡើងថ្លៃជាងឆ្នាំកន្លងទៅមែនគឺ1គីឡូក្រាម4000 ឬ5000រៀលសម្រាប់ជិតចូលថ្ងៃភ្ជុំ។

ជាមួយគ្នានោះដែរ លោក ស្រេង ប៊ុនសុខ មន្ត្រីការិយាល័យកសិកម្មស្រុកស្អាងក៏បានប្រាប់ឱ្យដឹងដែរថា ស្អាងគឺជាស្រុកមួយរបស់ខេត្តកណ្តាលដែលជាប់ចំណាត់ថ្នាក់លេខមួយទូទាំងប្រទេសក្នុងការផលិតបន្លែផ្គត់ផ្គង់លើទីផ្សារ ដែលក្នុងមួយថ្ងៃៗគិតជាមធ្យមប្រមូលផលបានប្រមាណពី20ទៅ25តោន ហើយលោកក៏បានក្រើនរំឭកដល់កសិករដែរថា ដើម្បីអាចដណ្តើមទីផ្សារពីប្រទេសជិតខាងបាននោះ គឺមានតែបងប្អូននាំគ្នាងាកមកធ្វើការដាំដុះបន្លែសរីរាង្គក៏ដូចជាបន្លែសុវត្ថិភាពដើម្បីចៀសវាងកុំឱ្យប៉ះពាល់សុខភាពទើបអាចទទួលបានការគាំទ្រខ្លាំង៕

August 30, 2017

Author: វល័ក្ខ