វល័ក្ខ - La Reine Media

Tottenham បំពេញការផ្ទេរ Llorente និង Aurier ពី Swansea និង PSG

ក្លិបមាន់ខ្នាយមាស Tottenham បានបំពេញការចុះហត្ថលេខាជាមួយនឹងខ្សែប្រយុទ្ធ Fernando Llorente របស់ក្លិប Swansea ក្នុងកិច្ចសន្យារយៈពេល2ឆ្នាំ ក្នុងតម្លៃខ្លួនបិទជិតមួយ។

ការផ្ទេរនេះបានកើតឡើង ក្រោយពីក្រុម Chelsea ដែលជាម្ចាស់ជើងឯកក្របខ័ណ្ឌ Premier League បានស្ថិតយ៉ាងប្រកៀកក្នុងការនាំយកខ្សែប្រយុទ្ធវ័យ32ឆ្នាំរូបនេះ ក្នុងតម្លៃខ្លួន15លានផោន (ស្មើនឹង19.4លានដុល្លារអាមេរិក) ក្រោយពីរូបគេធ្លាប់បានលេងក្រោមការដឹកនាំរបស់លោកគ្រូបង្វឹក Antonio Conte នៅឯក្លិប Juventus រួចមកហើយ។

ប៉ុន្តែ ខ្សែប្រយុទ្ធសញ្ជាតិអេស្ប៉ាញរូបនេះបានជ្រើសរើសយកការចូលរួមជាមួយ Spurs ជំនួសវិញ ដើម្បីក្លាយជាកីឡាករចំណូលថ្មីទី5របស់ក្លិបនេះ។ Llorente បានចូលរួមជាមួយនឹងក្លិប Swansea កាលពីខែសីហា ឆ្នាំ2016 និងបានស៊ុតបាល់បញ្ចូលទីសរុប 15គ្រាប់ ខណៈដែលក្លិបនេះបានគេចផុតពីការកាត់ចេញកាលពីរដូវកាលមុន។ ខ្សែប្រយុទ្ធរូបរាងខ្ពស់រូបនេះ បានចំណាយពេល9រដូវកាលជាមួយនឹងក្លិប Athletic Bilbao មុនពេលមកលេងនៅឯក្លិប Juventus 2ឆ្នាំ និងបន្ទាប់មកទៅក្លិប Sevilla រយៈពេលមួយឆ្នាំ។

រូបគេបានស៊ុតបាល់បញ្ចូលទី7គ្រាប់ក្នុងការបង្ហាញខ្លួន24លើកសម្រាប់ក្រុមបាល់ទាត់ជម្រើសជាតិអេស្ប៉ាញ ហើយក៏បានឈ្នះពាន World Cup ឆ្នាំ2010 ជាមួយនឹងពួកគេផងដែរ។

ការផ្ទេរ Llorente ទៅកាន់ Spurs ក្រោយពីក្លិបមានខ្នាយមាសមួយនេះបានបំពេញការចុះហត្ថលេខាជាមួយនឹងខ្សែការពារ Serge Aurier ពីក្លិប Paris St-Germain ក្នុងតម្លៃខ្លួន 23លានផោន នៅថ្ងៃចុងក្រោយនៃការបិទទីផ្សារដោះដូរកីឡាករ៕

ប្រភពព័ត៌មាន៖ BBC

September 1, 2017

ទីក្រុងទេសចរណ៍ទាំង 5 ដែលមានការចាយវាយថោកបំផុតលើលោក

ក្នុងពេលបច្ចុប្បន្ននេះ ការធ្វើដំណើរនាសម័យថ្មីមានថ្លៃចាយវាយតិចជាងកាលពីសម័យមុនច្រើន តែទោះជាយ៉ាងនោះមែន ក៏មិនមែនមានន័យថា ការធ្វើដំណើរទេសចេណ៍ទាំងអស់នឹងមានតម្លៃថោកជានិច្ចនោះដែរ តែវាស្ថិតលើការរៀបផែនការលើការចាយវាយរបស់លោកអ្នក រួមទាំងផែនការធ្វើដំណើរឱ្យបានល្អទៅវិញទេ ដែលជាអ្នកជួយសន្សំសំចៃថ្លៃចាយវាយក្នុងដំណើរទេសចរណ៍របស់លោកអ្នកនោះ។

ខាងក្រោមនេះគឺបណ្តាទីក្រុងដែលមានថ្លៃចាយវាយថោកបំផុតក្នុងការធ្វើដំណើរកម្សាន្តសម្រាប់អ្នកទេសចរដែលចូលចិត្តសន្សំសំចៃ៖

1/ ទីក្រុង ហ្លួងព្រះបាង ប្រទេសឡាវ

ក្រៅពីការធ្វើដំណើរដែលហាក់ដូចជាងាយស្រួល និងនៅជាប់នឹងប្រទេសយើងហើយនោះ ហ្លួងព្រះបាង ទីក្រុងចម្បងមួយរបស់ប្រទេសឡាវនៅមានថ្លៃចាយវាយដែលថោកលើការហូបចុក និងដើរលេងកម្សាន្តទៀតផង។ ដោយតម្លៃរបស់អាហារក្នុងមួយពេលៗគិតជាមធ្យមប្រមាណជា2ដុល្លារអាមេរិក ឬប្រហែលជា8,200រៀលប៉ុណ្ណោះ និងថ្លៃចាយវាយក្នុងការធ្វើដំណើរដោយរថយន្តក្រុងសាធារណៈវិញ គឺប្រមាណជា0.25ដុល្លារអាមេរិក ឬប្រហែលជា1,000រៀលលុយខ្មែរប៉ុណ្ណោះ។

2/ ទីក្រុងខៃរ៉ូ ប្រទេសអេហ្ស៊ីប

ទោះជាប្រទេសអេហ្ស៊ីបត្រូវរងទុក្ខបុកម្នេញដោយវិបត្តិនយោបាយ និងគ្រោះភ័យក្នុងរូបបែបផ្សេងៗក៏ដោយ ក៏មិនបានធ្វើឱ្យអ្នកទេសចរគេចចៀសពីការធ្វើដំណើរទៅទស្សនាប្រាសាទពីរ៉ាមីដដែរ។ ជាពិសេសថ្លៃចាយវាយក្នុងការហូបចុកស្ថិតជាមធ្យមក្នុងអាហារមួយពេលត្រឹមតែ3.42ដុល្លារ ឬប្រហែលនឹង14,000រៀលប៉ុណ្ណោះ។ សម្រាប់ទេសចរណ៍មួយកំណាត់ថ្ងៃដែលនឹងនាំលោកអ្នកទៅទស្សនាប្រាសាទពីរ៉ាមីដវិញគឺមានតម្លៃចាប់ផ្តើមត្រឹមតែ 23ដុល្លារអាមេរិក ឬប្រមាណជា93,000 រៀលហ្នឹងឯង។

3/ ទីក្រុងហាណូយ ប្រទេសវៀតណាម ប៉ែកខាងជើង

ជាប្រទេសមួយទៀតដែលស្ថិតនៅជាប់នឹងប្រទេសកម្ពុជាយើង អាចធ្វើដំណើរទៅដល់តាមរយៈរថយន្តក្រុងបាន។ ប្រទេសវៀតណាមប៉ែកខាងជើងមានទេសភាពជួរភ្នំដ៏លេចធ្លោ និងស្រស់ស្អាតជាច្រើន។ ចំណែកឯតម្លៃទីកន្លែងស្នាក់នៅឯកជនដែលជាសណ្ឋាគារមានតម្លៃត្រឹមតែពី10-15ដុល្លារអាមេរិក ឬប្រមាណជា41,000-62,000រៀលប៉ុណ្ណោះក្នុងមួយយប់ និងនៅតាមផ្ទះសំណាក់វិញមានតម្លៃ 5ដុល្លារអាមេរិក ឬស្មើនឹង 20,500រៀលប៉ុណ្ណឹងឯង។

4/ ទីក្រុងលីសបោន ប្រទេសព័រទុយហ្កាល់

ទោះជាប្រទេសព័រទុយហ្កាល់ជាផ្នែកមួយរបស់ទ្វីបអឺរ៉ុបក៏ដោយ តែលីសបោនអាចរាប់បានថា ជាទីក្រុងមួយដែលមានថ្លៃចាយវាយហាក់ដូចជាថោកណាស់ បើធៀបនឹងប្រទេសដទៃទៀតក្នុងតំបន់អឺរ៉ុប ហើយថែមទាំងជាទីក្រុងដែលមានប្រវត្តិសាស្ត្រ និងមណ្ឌលទេសចរណ៍ល្អៗជាច្រើន មិនខុសពីទីក្រុងល្បីៗក្នុងទ្វីបអឺរ៉ុប ដូចជា ប៉ារីស ឬមីឡានប៉ុន្មានឡើយ។ រីឯតម្លៃបន្ទប់ស្នាក់នៅក្នុងសណ្ឋាគារបែបសន្សំសំចៃមានចាប់ផ្តើមពីតម្លៃ 30ដុល្លារ ឬប្រហែលជាង120,000រៀលប៉ុណ្ណោះក្នុងមួយយប់។

5/ ទីក្រុងតៃប៉ិ កោះតៃវ៉ាន់

បន្ទាប់ពីប្រទេសតៃវ៉ាន់ប្រកាសលើកលែងទិដ្ឋាការទេសចរណ៍សម្រាប់អ្នកធ្វើដំណើរកម្ពុជាហើយនោះ ប្រាកដណាស់ទីក្រុងតៃប៉ិបានក្លាយជាកន្លែងមួយនៃទីកន្លែងជាច្រើនទៀតដែលអ្នកទេសចរបែបសន្សំសំចៃទាំងឡាយត្រូវការទៅដើរលេងកម្សាន្ត។ តម្លៃក្នុងការហូបចុកបីពេលរួមគ្នាគិតជាប្រាក់ដុល្លារគឺត្រឹមតែ 9.20 ឬប្រមាណជាជិត40,000រៀលប៉ុណ្ណោះ និងទីកន្លែងស្នាក់នៅភាគច្រើនមានថែមអាហារពេលព្រឹកឱ្យស្ទើរតែទាំងអស់ ធ្វើឱ្យលោកអ្នកបានសន្សំសំចៃថ្លៃចាយវាយបានច្រើនឡើងទៀតផង៕

September 1, 2017

អ្នកម្តាយដឹងទេ ហេតុអីបានជាកូនកណ្តាលរឹងប៉ឹងជាងកូនបង និងកូនប្អូន?

សម្រាប់គ្រួសារដែលមានកូន 3នាក់ឡើងទៅ តើធ្លាប់សង្កេតឬទេថា កូនកណ្តាលច្រើនតែជាមនុស្សដែលមានភាពរឹងប៉ឹង និងមាំមួនជាងគេបំផុត ដោយអាចចាត់ការ និងកែបញ្ហាចំពោះមុខផ្សេងៗបានយ៉ាងល្អ តើរឿងហ្នឹងបណ្តាលមកពីអ្វីទៅ? ថ្ងៃនេះ ឡារ៉ែន នឹងនាំអាណាព្យាបាលទាំងអស់ទៅមើលចម្លើយដែលពាក់ព័ន្ធនឹងរឿងនេះទាំងអស់គ្នា។

ចេះចែករំលែកជានិច្ចការដែលកូនកណ្តាលត្រូវចេះចែករំលែករបស់លេង ឬសម្លៀកបំពាក់ដែលបានមកពីបងទៅឱ្យប្អូន ហើយថែមទាំងរូបគេសឹងតែមិនមានអ្វីជារបស់ខ្លួនឯងទៀតផងនោះ ធ្វើឱ្យគេមិនប្រកាន់ខ្ជាប់លើវត្ថុរបស់របរខ្លាំងនោះទេ បានមកហើយក៏ចែករំលែកទៅវិញ ទើបយើងច្រើនតែបានឃើញថា កូនកណ្តាលគ្មាននិស្ស័យហួងហែងរបស់របរខ្លួនឯងនោះឡើយ ហើយថែមទាំងចូលចិត្តចែករំលែក និងមានទឹកចិត្តល្អទៀតផង។ នេះអាចនិយាយបានថា ជាការសាងទម្លាប់និស្ស័យមួយដែលល្អខ្លាំងបំផុត។

ចេះធ្វើអ្វីដោយខ្លួនឯងជានិច្ចឪពុកម្តាយភាគច្រើនច្រើនតែយកចិត្តកូនបង និងលួងកូនប្អូនខ្លាំងជាងដោយមិនបានដឹងខ្លួនឡើយ ទើបធ្វើឱ្យកូនកណ្តាលត្រូវព្យាយាមធ្វើអ្វីដោយខ្លួនឯងជានិច្ច រឿងនេះហើយដែលធ្វើឱ្យគេអាចរៀនយល់ដឹង និងរស់នៅដោយការពឹងលើខ្លួនឯងបានយ៉ាងមានសេចក្តីសុខ ដែលនៅពេលធំឡើង ក៏នឹងធ្វើឱ្យរូបគេក្លាយជាមនុស្សដែលរឹងប៉ឹង និងរស់នៅក្នុងសង្គមបានយ៉ាងគ្មានបញ្ហាអ្វីឡើយ។

ជាអ្នកហាមសង្គ្រាមនៅពេលកើតការឈ្លោះទាស់ទែងគ្នានៅពេលកើតមានការឈ្លោះគ្នាឡើងរវាងកូនបង និងកូនប្អូន កូនកណ្តាលច្រើនតែធ្វើជាអ្នកនៅចាំហាម និងបញ្ឈប់ការឈ្លោះគ្នានោះជានិច្ច ទើបធ្វើឱ្យគេរៀនយល់ដឹងក្នុងការសម្របខ្លួននៅពេលកើតហេតុការណ៍ឈ្លោះទាស់ទែងគ្នាឡើង និងមានជំនាញក្នុងការនិយាយដែលល្អៗដើម្បីបញ្ឈប់បញ្ហាដែលកំពុងកើតឡើងចំពោះមុខទៀតផង។

ធ្វើអ្វីក៏ត្រូវមើលឃើញថាមិនល្អដែរកូនកណ្តាល មិនថាធ្វើអ្វីក៏ដោយ ក៏ច្រើនតែត្រូវបានមើលឃើញថា មិនល្អជាប់ជានិច្ច ឬគ្រាន់តែធ្វើអ្វីខុសតែបន្តិច ក៏អាចត្រូវមើលឃើញថា ជាក្មេងមានបញ្ហាតែម្តង ហើយរឿងទាំងនេះឯងដែលធ្វើឱ្យគេកើតសេចក្តីត្រូវការក្នុងការរឹងប៉ឹងឡើង ធ្វើអ្វីក៏តែងតែប្រយ័ត្នប្រយែង និងហ្មត់ចត់បំផុត ព្រោះមិនចង់ត្រូវឪពុកម្តាយស្តីបន្ទោសហ្នឹងឯង ដែលវាហុចផលឱ្យរូបគេក្លាយជាក្មេងដែលមានហេតុផល និងមានភាពរឹងប៉ឹងយ៉ាងខ្លាំង។

មិនសូវជាត្រូវបានសរសើរប៉ុន្មានឡើយបើសិនជាសាកល្បងសង្កេតមើល ក៏នឹងឃើញថា ភាគច្រើនកូនកណ្តាលនឹងមិនសូវត្រូវបានកោតសរសើរប៉ុន្មានឡើយ ធ្វើឱ្យគេមិនភ្លើតភ្លើនជាមួយនឹងពាក្យកោតសរសើរ និងចេះក្នុងការសាងនូវគុណតម្លៃឱ្យខ្លួនឯងតាំងពីក្មេង ទើបគេអាចធំធាត់ឡើងក្លាយជាមនុស្សដែលទទួលបានភាពជោគជ័យក្នុងជីវិតច្រើនបំផុត និងមានភាពរឹងប៉ឹងខ្លាំងទៀតផង។

ឥឡូវនេះល្មមនឹងយល់ហើយមែនទេថា តើហេតុអីបានជាកូនកណ្តាលច្រើនតែជាមនុស្សដែលមានភាពរឹងប៉ឹង និងមាំមួនបំផុតនោះ តែយ៉ាងណាក៏ដោយ លោកឪពុក និងអ្នកម្តាយគួរតែផ្តល់នូវការយកចិត្តទុកដាក់ចំពោះគេឱ្យបានច្រើន និងស្មើៗគ្នាផង ដើម្បីការពារកុំឱ្យកើតមានក្តីច្រណែនឡើងនៅក្នុងចំណោមបងប្អូន៕

September 1, 2017

កម្ពុជាឈ្នះពានរង្វាន់ចំនួន 2 ពីការប្រកួតរ៉ូបូតនៅប្រទេសជប៉ុន

ក្នុងព្រឹត្តិការណ៍ប្រកួតរ៉ូបូតអន្តរជាតិ ABU Robocon ឆ្នាំ 2017 ដែលធ្វើឡើងនៅទីក្រុងតូក្យូ ប្រទេសជប៉ុន ក្រុមរ៉ូបូតតំណាងកម្ពុជាបានឈ្នះពានរង្វាន់ចំនួន 2 ពីការប្រកួត ដែលនេះជាមោទនភាពមួយសម្រាប់ប្រទេសយើងលើឆាកអន្តរជាតិ។

លោក ប៉ាង ចំណាន មន្ត្រីសម្របសម្រួលកម្មវិធីប្រកួតរ៉ូបូតកម្ពុជាបានឱ្យដឹងតាមទូរស័ព្ទថា នេះជាលើកទីមួយហើយដែលកម្ពុជាមានសិទ្ធិចូលរួមប្រកួតក្នុងព្រឹត្តិការណ៍ប្រកួតរ៉ូបូតអន្តរជាតិ ABU (Asia-Pacific Robot Contest ) ហើយលោកមានមោទនភាពណាស់ដែលក្រុមរ៉ូបូតមកពីវិទ្យាស្ថានជាតិពហុបច្ចេកទេសកម្ពុជាបានឈ្នះពានរង្វាន់ផ្នែកគំនិត (Best Idea Award) និង Special Award (NOK)ពីកម្មវិធីប្រកួតថ្នាក់អន្ដរជាតិមួយនេះ។

ការប្រកួតនៅប្រទេសជប៉ុននេះមាន 18 ប្រទេសចូលរួម និងមានក្រុមត្រូវប្រកួតគ្នាចំនួន 19 ក្រុម ហើយត្រូវបែងចែកជា 7 ក្រុមធំៗផ្សេងគ្នាដើម្បីប្រកួតជម្រុះដោយមួយក្រុមមាន 3 ប្រទេស ហើយក្រុមខ្លះមាន 2 ប្រទេស។ លើវិញ្ញាសាការបាញ់ថាសជ័រឱ្យទើរលើទីតាំង មានន័យថា រ៉ូបូតនីមួយៗរបស់បេក្ខជនដែលបានចូលរួមត្រូវប្រកួតប្រជែងគ្នាក្នុងការបាញ់ថាសជ័រឱ្យទៅទើរជាប់នៅលើទម្រមួយដែលមានទំហំ និងកម្ពស់ខុសៗគ្នាដើម្បីទទួលបានពិន្ទុ។ ក្នុងការចាប់ក្រុម កម្ពុជាបានប៉ះជាមួយនឹងជប៉ុន និងចិន។ ជាលទ្ធផលយើងបានយកឈ្នះចិន ប៉ុន្ដែចាញ់ជប៉ុន។

លោកថ្លែងថា៖« យើងបានឈ្នះចិន តែមិនអាចទៅរួចជាមួយជប៉ុន អ៊ីចឹងហើយយើងមិនអាចទៅវគ្គបន្ដបាន។ ប៉ុន្តែអ្វីដែលពិសេស ក្រុមយើង គឺបានឈ្នះពាន់រង្វាន់ 1 ពីកម្មវិធីនេះដែលគេឱ្យទៅលើគំនិតច្នៃប្រឌិត និងរង្វាន់មួយទៀតផ្ដល់ដោយក្រុមហ៊ុនចូលរួមឧបត្ថម្ភ»។

សម្រាប់ឆ្នាំ 2017នេះ វៀតណាមដណ្ដើមបានលេខ1 ខណៈលេខ 2 បានទៅលើប្រទេសម៉ាឡេស៊ី ហើយជប៉ុនដែលជាម្ចាស់ផ្ទះនោះបានលេខ 3 ពីការប្រកួតនេះ ។ យ៉ាងណាមិញ ក្រុមរ៉ូបូតរបស់កម្ពុជាធ្វើបានកម្រិតនេះ គឺជាផ្លែផ្កាដ៏ល្អមួយណាស់ទៅហើយ ដើម្បីបន្ដដំណើរទៅធ្វើការប្រកួតនៅឆ្នាំ 2018ទៀតដែលវៀតណាមនឹងធ្វើជាម្ចាស់ផ្ទះម្ដង៕

August 31, 2017

ធនាគារជាតិ បើកឱ្យពលរដ្ឋយកលុយចាស់ទៅដូរយកលុយថ្មីក្នុងឱកាសបុណ្យភ្ជុំបិណ្ឌ

ភ្នំពេញ៖ ដើម្បីអបអសាទរក្នុងឱកាសបុណ្យភ្ជុំបិណ្ឌដែលហៀបនឹងចូលមកដល់ឆាប់ៗនេះ ធនាគារជាតិនៃកម្ពុជា(NBC)បានប្រកាសឱ្យប្រជាពលរដ្ឋយកក្រដាសប្រាក់រៀលដែលចាស់ៗ ទក់ៗ ឬរហែកៗមកដូរយកក្រដាសប្រាក់ថ្មីៗដើម្បីយកទៅលេងបុណ្យភ្ជុំបិណ្ឌ ជូនពុកម៉ែ ជូនយាយ ជូនតា ឬដាក់បាត្របួងសួងជូនបុព្វការីជន ជាដើម។

ខឹ្លមសារនៃសេចក្តីជូនដំណឹង ស្តីពីយុទ្ធនាការស្រឡាញ់ប្រាក់រៀល ចុះថ្ងៃទី31 នេះបានបញ្ជាក់ថា យុទ្ធនាការនេះនឹងផ្តល់ជូននូវឱកាសល្អដល់សាធារណជនដែលមានក្រដាសប្រាក់រៀល ចាស់ៗ រហែកៗ ឬទក់ៗ មកប្តូរយកក្រដាសប្រាក់ថ្មីពីបញ្ជរបេឡាធនាគារជាតិនៃកម្ពុជា។ ការប្តូរប្រាក់នេះនឹងប្រព្រឹត្តទៅចាប់ពីថ្ងៃទី11 ដល់ថ្ងៃទី15 ខែកញ្ញា ឆ្នាំ2017 នៅគ្រប់សាខាធនាគារជាតិរាជធានីភ្នំពេញ-ខេត្ត(លើកលែងស្នាក់ការកណ្តាល)។

លោក ឈឹម ច័ន្ទកុសល ប្រធាននាយកដ្ឋានបោះផ្សាយនៃធនាគារជាតិនៃកម្ពុជា មានប្រសាសន៍ថា ការផ្តល់ជូននូវការដូរយកក្រដាសប្រាក់ថ្មីៗទៅធ្វើបុណ្យនេះ គឺជាឱកាសសម្រាប់ឱ្យសាធារណជនយកលុយចាស់ៗ ឬរហែកៗទៅដូរដោយមិនមានកាត់ទឹកដូចនៅតាមផ្សារ ឬតាមទីតាំងដូរប្រាក់ឯកជននោះទេ។ ទាំងអស់នេះគឺដើម្បីលើកទឹកចិត្តឱ្យប្រជាពលរដ្ឋចាយប្រាក់រៀលកាន់តែច្រើនឡើង និងធ្វើជាកាដូសម្រាប់ឱកាសបុណ្យភ្ជុំបិណ្ឌខាងមុខនេះផងដែរ៕

August 31, 2017

ម្ដាយ នី មុន្នីនាថ ធ្វើឱ្យកាន់តែមានមន្ទិលដោយពាក្យថា «ពួកគេទាំងពីរនៅតែស្រឡាញ់គ្នា»

មានការភ្ញាក់ផ្អើលពេញបណ្ដាញសង្គមជុំវិញការបង្ហោះសារថា នី មុន្នីនាថ បានបោកប្រាស់គូដណ្ដឹងដោយនាងមិនត្រឹមតែពួកែសម្ដែងក្នុងសាច់រឿងប៉ុណ្ណោះទេ សូម្បីតែក្រៅសាច់រឿងក៏ប៉ិនប្រសប់រហូតទទួលបានពីគូដណ្ដឹងនូវលុយកាក់ គ្រឿងអលង្ការមាសពេជ្រជាច្រើន រួចហើយសុំផ្ដាច់ពាក្យពីគូដណ្ដឹងតែម្តងក្រោយពីបោកប្រាស់បានសម្រេចហើយ។

ការលើកឡើងជារឿងជារ៉ាវនេះ ត្រូវបានម្ដាយកញ្ញានី មុន្នីនាថ បានបញ្ជាក់ប្រាប់សារព័ត៌មានក្នុងស្រុកមួយដោយច្រានចោលនូវពាក្យចោទប្រកាន់ទាំងនោះ និងចាត់ទុកថា ការសរសេរបែបនេះជាការបង្កាច់បង្ខូចកេរ្តិ៍ឈ្មោះកូនស្រីគាត់។ អ្នកស្រីបន្ដថា វាមិនមែនជាការពិតទេ ព្រោះកូនរបស់អ្នកស្រីមិនបានទៅបោកប្រាស់គូដណ្ដឹង ដើម្បីចង់បានផលប្រយោជន៍ ឬទ្រព្យសម្បត្ដិដូចអ្វីដែលគេបានលើកឡើងនោះឡើយ។

ជាមួយគ្នានេះអ្នកស្រីបានបញ្ជាក់ថា ចំពោះពាក្យដែលគេលើកឡើងថា ក្រោយពីមុន្នីនាថ បោកប្រាស់គូដណ្ដឹងបានសម្រេចហើយ នាងសុំផ្ដាច់ពាក្យនោះ វាមិនអាចទៅរួចទេ។ ពិសេសអ្នកស្រីបានសង្កត់ធ្ងន់ថា៖ “ខ្ញុំពិតជាភ្ញាក់ផ្អើលខ្លាំងណាស់នៅពេលឃើញហ្វេសប៊ុកមួយបង្ខូចឈ្មោះកូនស្រីខ្ញុំបែបហ្នឹង ចេះទៅរួចដែរដែលថា កូនខ្ញុំសុំផ្ដាច់ពាក្យពីគូដណ្ដឹងក្រោយពីបោកបានសម្រេចហើយ។ ផ្ដាច់ពាក្យយ៉ាងម៉េចបើពួកគេទាំងពីរនៅតែស្រឡាញ់គ្នាហ្នឹង!?”។

ការលើកឡើងរបស់ម្ដាយកញ្ញានី មុន្នីនាថតាមរយៈពាក្យសម្ដីខាងលើ គឺកាន់តែធ្វើឱ្យមហាជនវង្វេងវង្វាន់អស់ហើយ ដោយសារតែពាក្យសំដីដែលអ្នកស្រីបានអះអាងនោះគឺថា កូនស្រីរបស់អ្នកស្រីនៅតែស្រឡាញ់គ្នាជាមួយគូដណ្ដឹង។ តែផ្ទុយទៅវិញ គូដណ្ដឹងរបស់កញ្ញានី មុន្នីនាថ បែរជាបានសរសេរសារនៅក្នុងបណ្ដាញសង្គមដោយបានបង្ហាញពីអារម្មណ៍ស្ដាយក្រោយចំពោះការចំណាយចិត្ដស្រឡាញ់របស់លោកទៅលើមនុស្សដែលខ្លួនស្រឡាញ់ ទៅវិញ។ ទោះយ៉ាងណាយើងមិនដឹងថា គណនីហ្វេសប៊ុកឈ្មោះថា Solang Ung ជាគណនីពិត ឬក៏ក្លែងក្លាយនោះទេ។

យើងបានស្នើសុំការបកស្រាយពីម្ដាយរបស់កញ្ញានី មុន្នីនាថដែរ តែពុំបានសម្រេច ហើយយើងនៅតែស្វាគមន៍ចំពោះការបកស្រាយពីសាមីខ្លួន ពិសេសអ្នកពាក់ព័ន្ធជុំវិញរឿងនេះដើម្បីឈានទៅដល់ការបញ្ចប់ក្តីមន្ទិលរបស់មហាជន៕

August 31, 2017

រយៈពេល7ខែ ទុនវិនិយោគក្នុងវិស័យសំណង់មានទឹកប្រាក់ជិត4ពាន់លានដុល្លារ

ភ្នំពេញៈ ទុនវិនិយោគក្នុងវិស័យសំណង់មិនមានសញ្ញាថមថយទេនៅក្នុងឆ្នាំនេះ ដោយគិតត្រឹមរយៈពេល7ខែឆ្នាំនេះទំហំទឹកប្រាក់វិនិយោគក្នុងវិស័យនេះមានជិត4ពាន់លានដុល្លារអាមេរិក កើនឡើងជាង27ភាគរយ ធៀបទៅនឹងរយៈពេលដូចគ្នាកាលពីឆ្នាំមុន។

រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ភឿង សោភ័ណ្ឌ បានថ្លែងឲ្យដឹងកាលពីម្សិលមិញថា មកដល់បច្ចុប្បន្ន វិស័យសំណង់ និងស្ថាបត្យកម្មនៅកម្ពុជាកំពុងមានការចាប់អារម្មណ៍យ៉ាងខ្លាំងពីអ្នកវិនិយោគជាតិ និងអន្តរជាតិ ជាក់ស្តែងមកដល់ពេលនេះក្រុមហ៊ុនធំៗមកពីក្រៅប្រទេស និងក្រុមហ៊ុននៅក្នុងស្រុកបានបោះទុនយ៉ាងច្រើនលើការងារសំណង់ខ្ពស់ៗ និងទំនើបៗដូចជាទីក្រុងរណប ឬជាអគារពាណិជ្ជកម្មជាដើម ហើយបើគិតក្នុងរយៈពេល2ឆ្នាំនេះទុនវិនិយោគក្នុងវិស័យនេះបានកើនឡើងជាលំដាប់ ជាក់ស្តែងកាលពីឆ្នាំ2016 វិស័យនេះមានទុនវិនិយោគចំនួន5ពាន់លានដុល្លាអាមេរិក និងរយៈពេល7ខែឆ្នាំនេះទុនវិនិយោគមានរហូតដល់ជិត4ពាន់លានដុល្លារ។

លោកបន្តថា នៅក្នុងរយៈពេលប៉ុន្មានឆ្នាំមកនេះ វិស័យស្ថាបត្យកម្ម និងសំណង់នៅកម្ពុជាមានការរីកចម្រើនយ៉ាងខ្លាំង ដោយយើងសង្កេតឃើញថា មានអគារខ្ពស់ៗជាច្រើនដែលបានរីកដុះដាលឡើងរួមជាមួយការរចនាម៉ូតយ៉ាងល្អប្រណីត និងទាន់សម័យ ជាក់ស្តែងព្រឹត្តិការណ៍ការតាំងពិព័រណ៍ពាណិជ្ជកម្មលំដាប់អន្តរជាតិនៅថ្ងៃខាងមុខនេះគឺមានសារៈសំខាន់ណាស់សម្រាប់អ្នកវិនិយោគក្នុងវិស័យឧស្សាហកម្មសំណង់ដែលមិនអាចមើលរំលងបានឡើយ ។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកជាសំណួរថា តើទឹកប្រាក់ប៉ុន្មានពិតប្រាកដដែលចូលមកក្នុងវិស័យនេះ? ខណៈគម្រោងខ្លះប្រកាសពីការសាងសង់ចំណាយទុនអស់10លានដុល្លារ ប៉ុន្តែប្រកាសគម្រោងរបស់ខ្លួនមានទុនវិនិយោគរហូតដល់50លានដុល្លារ ដោយសារពួកគេបានបូកបញ្ចូលនូវតម្លៃដែលគេព្យាករថាលក់បាន។ ទំហំទុនវិនិយោគដែលបានប្រកាស និងទឹកប្រាក់ដែលហូរចូលមកក្នុងវិស័យនេះពិតប្រាកដ ទំនងជាមិនស៊ីចង្វាក់គ្នាទេ។

ការលើកឡើងរបស់លោក គីម ហ៊ាង ហាក់មានលក្ខណៈវិទ្យាសាស្ត្រ ព្រោះជាក់ស្តែងគម្រោងវិនិយោគដែលបានប្រកាសសាងសង់នៅឆ្នាំនេះមានចំនួនតិចតូចបំផុតធៀបរយៈពេលដូចគ្នាកាលពីឆ្នាំមុន។ ឆ្នាំនេះមានគម្រោងវិនិយោគតែមិនប៉ុន្មានកន្លែងប៉ុណ្ណោះដែលបានប្រកាសសាងសង់មានដូចជា គម្រោងខុនដូអ័រគីដេវីឡា គម្រោងខុនដូនៅខេត្តព្រះសីហនុ និងគម្រោងបុរីមួយចំនួនទៀតប៉ុណ្ណោះ៕

August 31, 2017

ប្រជាជននឹងចេះបច្ចេកទេសដាំត្រប់ចេញផ្លែប៉េងប៉ោះ

កម្ពុជាជាប្រទេសដែលមានប្រជាជនភាគច្រើនជាកសិករ ហើយនាពេលថ្មីៗនេះប្រទេសយើងក៏ជួបបញ្ហាមួយចំនួនផងដែរ ព្រោះមានបន្លែជាច្រើនមានបញ្ហាខ្វះទីផ្សារ ខណៈមានបន្លែមួយចំនួនបែរជាខ្វះខាតច្រើន រហូតនាំចូលបន្លែពីបរទេសរាប់រយតោនជារៀងរាល់ថ្ងៃ។

ដើម្បីដោះស្រាយបញ្ហាទាំងអស់នោះ គម្រោងសាកវប្បកម្មកម្ពុជា សហការជាមួយនឹងមន្ទីរកសិកម្មមួយចំនួននៅក្នុងប្រទេសកម្ពុជាដើម្បីបណ្តុះបណ្តាលជំនាញបន្ថែមដល់មន្ត្រីបច្ចេកទេសកសិកម្មពីរបៀបបង្កាត់ពូជបន្លែ និងដំណាំដើម្បីឱ្យមន្ត្រីទាំងអស់នោះយកចំណេះជំនាញដែលមានទៅបង្ហាត់បន្តដល់កសិករក្នុងគោលបំណងជំរុញការដាំបន្លែសរីរាង្គនៅក្នុងស្រុក និងទប់ស្កាត់ការនាំចូល។

ទីប្រឹក្សាគម្រោងសាកវប្បកម្មកម្ពុជា លោក ប៊ុន សាបន បានលើកឡើងថា សាកវប្បកម្មជាបច្ចេកទេសថ្មីមួយទៀតដែលមន្ត្រីជំនាញ នឹងចុះទៅផ្តល់បទពិសោធដល់កសិករឱ្យទទួលចំណេះដឹងបន្ថែមសម្រាប់ការអនុវត្តដាំបន្លែសរីរាង្គនៅតាមមូលដ្ឋាន។

លោក ប៊ុន សាបន បាននិយាយថា៖ «បន្លែសរីរាង្គ ទទួលបានទិន្នផលខ្ពស់មានទីផ្សារងាយស្រួលលក់ដូរ ហើយជួយគាំពារសុខភាពអ្នកបរិភោគទៀតផង។ ដូចនេះការបង្ហាត់បង្រៀនការជ្រើសរើសពូជ ការបង្កាត់ពូជ បច្ចេកទេសថែទាំ ដាំដំណាំជាចំណែកលើកស្ទួយផ្នែកកសិកម្មហើយមន្ត្រីយើងអាចជួយកសិករបាន»។

លោកបានបញ្ជាក់ផងដែរថា តាមរយៈបច្ចេកទេសសាកវប្បកម្មនេះ អាចធ្វើឱ្យប្រជាពលរដ្ឋដាំដំណាំបានច្រើនដោយមិនបាច់សូវខ្វល់ពីរឿងបញ្ហាដីនោះទេ ព្រោះកសិករអាចដាំដំណាំណាដែលត្រូវនឹងដី បន្ទាប់មកបង្កាត់ពូជផ្លែឈើដែលមិនអាចដាំដោយផ្ទាល់នៅលើដើមឈើនោះ កសិករនឹងទទួលបានផ្លែឈើដែលគាត់ចង់បានដោយងាយ។

អ្នកស្រី លឹម សុផាត អនុប្រធានការិយាល័យផ្សព្វផ្សាយកសិកម្មខេត្តស្ទឹងត្រែងដែលមានការគាំទ្រពីគម្រោងសាកវប្បកម្មកម្ពុជាបានលើកឡើងថា ចំណេះដឹងដែលទទួលបានពីមន្ត្រីជំនាញ អាចនឹងក្លាយជាមូលដ្ឋានសំខាន់ក្នុងការបង្ហាត់បង្រៀនដល់កសិករ។ ចំណេះដឹងទាំងនេះអាចជួយឱ្យកសិករបង្កាត់ពូជប៉េងប៉ោះជាមួយត្រប់បាន ដែលវាជារឿងល្អមួយដែលអ្នកកស្រីត្រូវការសម្រាប់ខេត្តរបស់អ្នកស្រី ព្រោះប្រជាកសិករមានបញ្ហាដីដែលមិនអាចដាំដើមប៉េងប៉ោះបាន ព្រោះនៅគ្រប់ចម្ការមានទឹកជោគជាំច្រើនដែលធ្វើឱ្យវារលួយគល់ តែបន្ទាប់ពីបានសិក្សាកម្មវិធីនេះហើយ លោកស្រីអាចដាំដើមត្រប់ជំនួសដើមប៉េងប៉ោះ បន្ទាប់មកទើបបង្កាត់ពូជប៉េងប៉ោះឱ្យវាផ្លែនៅលើដើមត្រប់ដែលស៊ាំជាមួយនឹងស្ថានភាពដីបាន។

បង្ហាញលើចំណុចស្រដៀងគ្នានេះ លោក លៀង សេង ប្រធានមន្ទីរកសិកម្មខេត្តស្ទឹងត្រែងបានលើកឡើងថា បច្ចេកទេសសាកវប្បកម្មជាបច្ចេកទេសដែលអាចជួយកសិករអនុវត្តបានដោយជោគជ័យ ព្រោះវាអាចជួយឱ្យកសិករផលិតបានផលដំណាំច្រើន ទទួលបានប្រាក់ចំណូលខ្ពស់ ហើយអាចទប់ស្កាត់ការនាំចូលបន្លែពីបរទេសបាន។

លោកប្រធានមន្ទីរបានបន្ថែមទៀតថា ចំណែកឯការបង្កាត់ពូជប៉េងប៉ោះជាមួយនឹងត្រប់នេះ ជាលើកទី1 ហើយដែលស្ថាប័នពាក់ព័ន្ធយកមកបណ្តុះបណ្តាល បន្ទាប់ពីវិធីសាស្ត្រផ្សេងៗទៀតដែលលោកបានបង្ហាត់បង្រៀនជាច្រើនលើកនៅបណ្តាស្រុកនានា។

គម្រោងសាកវប្បកម្មកម្ពុជាទទួលបានថវិកាគាំទ្រពីប្រទេសស្វ៊ីស និងបានបង្ហាត់បង្រៀនដល់មន្ត្រីកសិកម្ម និងអ្នកពាក់ព័ន្ធពីខេត្តចំនួន 5 ដែលមានកសិករកំពុងចាប់យកអាជីពដាំបន្លែ ដូចជាខេត្តក្រចេះ ខេត្តស្ទឹងត្រែង ខេត្តព្រះវិហារ ខេត្តឧត្តរមានជ័យ និងខេត្តកណ្តាល៕

August 31, 2017

ក្រោយចប់បាក់ឌុបសិស្សគួរធ្វើអ្វីខ្លះ?

សិស្សជាច្រើន ឬស្ទើរតែ 100% សុទ្ធតែមានការសប្បាយចិត្ត លាយឡំនឹងការសោកស្តាយ ភ័យ អរ និងរំភើបបន្ទាប់ពីការប្រឡងបាក់ឌុបចប់ តែទោះជាយ៉ាងណាក៏ដោយ ក៏ពួកគេត្រូវតែសម្រួលអារម្មណ៍ដើម្បីបន្តដំណើរដ៏វែងឆ្ងាយបន្ថែមទៀតទៅថ្ងៃអនាគត។

ស្ថាបនិកគ្រឹះស្ថានអប់រំ Start Up Cambodia លោក គីម ដារ៉ាបានលើកឡើងថា រំលឹកដល់អារម្មណ៍ពេលបាក់ឌុបហើយ កាលពី10ឆ្នាំមុន លោកមានអារម្មណ៍ថាសោកសៅជាខ្លាំង ពិសេសអន់ចិត្តដោយធ្វើកិច្ចការមានការធ្វើប្រហែលច្រើន តែនៅពេលដែលលោកគិតដល់ក្តីសុបិន្តដែលត្រូវចូលរៀនសាលាវិស្វកម្មដោយអាហារូបករណ៍លោកបានទុកភាពសោកសៅមួយឡែក ហើយវេចបង្វិចមកភ្នំពេញដើម្បីរៀននៅសាលាតិចណូ។

លោកបានបញ្ជាក់ថា គិតឡើងវិញ បើលោកនៅតែសោកសៅជាមួយនឹងបញ្ហាមួយចំនួននៃការប្រឡងបាក់ឌុប លោកប្រហែលជាមិនអាចប្រឡងបានអាហារូបករណ៏នោះទេ មិនតែប៉ុណ្ណោះលោកបានប្រើភាពសោកសៅ ដើម្បីទាញយកភាពជោគជ័យបន្ថែមទៀត ដោយលោកតែងតែប្រាប់ខ្លួនឯងថា ឈប់ប្រហែស ឈប់អំនួត ហើយត្រូវធ្វើការដោយផ្ចិតផ្ចង់។ ជាលទ្ធផល ក្រោយចប់បាក់ឌុបរយៈពេល 2ឆ្នាំ លោកប្រឡងជាប់អាហារូបករណ៍ទៅសិក្សានៅប្រទេសជប៉ុន។

លោក គីម ដារ៉ា បាននិយាយថា៖ «និយាយបកមកវិញ ខ្ញុំចង់និយាយថា ក្រោយចប់បាក់ឌុប បើទោះបីជាមិនទាន់ចេញលទ្ធផលក៏ដោយ ប្អូនៗមិនត្រូវទុកពេលវេលាឱ្យកន្លងទៅដោយឥតប្រយោជន៍នោះទេ ត្រូវតែប្រើវាក្នុងការសម្រួចសមត្ថភាពដើម្បីឈានទៅសម្រេចក្តីសុបិនរបស់ខ្លួន»។

និស្សិតកម្ពុជាដែលកំពុងសិក្សានៅបរទេស លោក សុខ ពិសី បានលើកឡើងថា ក្រោយប្រឡងបាក់ឌុបចប់ អ្វីដែលត្រូវធ្វើគឺសម្រាកប៉ុន្មានថ្ងៃ បន្ទាប់មកត្រូវត្រៀមចិត្ត ត្រៀមកាយដើម្បីសម្រួចគោលដៅរបស់ខ្លួន។ លោកបានចាប់ផ្តើមគិតពីចំណង់ចំណូលចិត្តដែលលោកមានពិតប្រាកដ បន្ទាប់មកសម្រេចចិត្តជ្រើសរើសជំនាញសិក្សានៅមហាវិទ្យាល័យ ដើម្បីដឹងឱ្យច្បាស់ថាតើលោកត្រូវត្រៀមអ្វីខ្លះសម្រាប់ការចូលរៀននៅមហាវិទ្យាល័យ។

លោក សុខ ពិសី និយាយថា៖ «ទោះបីជាយើងមិនទាន់ដឹងច្បាស់ថាយើងជាប់ឬធ្លាក់ក៏ដោយ តែយើងអាចត្រៀមខ្លួនមុនឱ្យបានល្អដើម្បីចូលមហាវិទ្យាល័យ ឬធ្វើអ្វីបន្តទៀតបន្ទាប់ពីបញ្ចប់ការប្រឡង។ បើសិនជាយើងបានត្រៀមទុករួចរាល់នោះយើងនឹងដើរបានលឿន តែបើយើងបណ្តោយខ្លួនឱ្យខ្វល់ខ្វាយជាមួយនឹងរឿងដែលប្រឡង ហើយមិនព្រមធ្វើសកម្មភាពអ្វីសោះយើងអាចនឹងស្តាយក្រោយ»។

និស្សិតខាងលើបានបន្ថែមទៀតថា ចំណុចដែលសិស្សគួរធ្វើគឺ ចាប់ផ្តើមស្វែងយល់ពីខ្លួនឯងដោយការប្រឹក្សាជាមួយនឹងមនុស្សជុំវិញខ្លួន ឬសរសេរចូលនូវចំណុចដែលខ្លួនចង់ធ្វើនៅថ្ងៃអនាគត ដើម្បីត្រៀមខ្លួនដាក់ពាក្យចូលរៀន ឬប្រឡងអាហារូបករណ៍លើជំនាញដែលយើងស្រឡាញ់ពិតប្រាកដ៕

August 31, 2017

BOOYOUNG បោះទុន 160លានដុល្លារវិនិយោគគម្រោងដំណាក់កាលទី1

ភ្នំពេញៈ ក្រុមហ៊ុន BOOYOUNG GROUP បានសម្រេចចិត្តបោះទុន 160លានដុល្លារអាមេរិកដើម្បីវិនិយោគលំនៅដ្ឋាន និងមជ្ឈមណ្ឌលពាណិជ្ជកម្មរបស់ខ្លួននៅទីក្រុងភ្នំពេញ។

ថ្នាក់ដឹកនាំក្រុមហ៊ុន BOOYOUNG Group ប្រចាំកម្ពុជាបានថ្លែងឲ្យដឹងក្នុងជំនួបអាហារថ្ងៃត្រង់កាលពីពេលថ្មីៗនេះថា បច្ចុប្បន្ននេះគម្រោងអចលនទ្រព្យដ៏ធំនេះបាននិងកំពុងសាងសង់យ៉ាងសកម្ម និងត្រៀមបញ្ចប់គម្រោងរបស់ខ្លួនដំណាក់កាលទី1នៅឆ្នាំ 2019ខាងមុខនេះ។ គម្រោងនេះបានបញ្ចប់ការជីកដី និងបុកគ្រឹះហើយកាលពីចុងឆ្នាំមុន និងកំពុងបន្តសាងសង់ឡើងយ៉ាងសកម្ម។ លោកបន្តថា ការសាងសង់លំនៅដ្ឋាន និងមជ្ឈមណ្ឌលពាណិជ្ជកម្មដ៏ធំនេះនឹងបែងចែកជា10ដំណាក់កាល ឬតិចជាងនេះអាស្រ័យលើការសម្រេចរបស់ថ្នាក់ដឹកនាំក្រុមហ៊ុននៅប្រទេសកូរ៉េ។

គម្រោងដំណាក់កាលទី1នេះរួមមានអគារខុនដូចំនួន4 និងមានកម្ពស់ 23ជាន់ដោយមិនបូកបញ្ចូលជាន់ក្រោមដីដែលជាចំណតយានយន្តនោះឡើយ។ គម្រោងនេះមានផ្ទះសរុបចំនួន 1.474យូនីតយ៉ាងប្រណីតៗនាពេលនេះ។ គម្រោងដំណាក់កាលទី1នេះក៏មានផ្សារទំនើបកម្ពស់3ជាន់ដែលមានទំហំ47,000ម៉ែត្រការ៉េផងដែរ។ ផ្សារទំនើបនេះរួមបញ្ចូលនូវការលក់ទំនិញ មជ្ឈមណ្ឌលវប្បធម៌ មន្ទីរពេទ្យ សាលារៀន សេវាកម្មកម្សាន្ត និងហាងថែរក្សាសម្ផស្សជាដើម។

គម្រោងវិនិយោគរបស់ BOOYOUNG TOWN ស្ថិតនៅស្របនឹងមហាវិថីសហព័ន្ធរុស្ស៊ីក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ គម្រោងដ៏ធំនេះមានទំហំ23.5ហិកតា និងគ្រោងចំណាយទឹកប្រាក់វិនិយោគចំនួន1,000លានដុល្លារអាមេរិក។

ថ្នាក់ដឹកនាំក្រុមហ៊ុនដដែលបានបន្តថា “ខុនដូក្នុងគម្រោងនេះនឹងផ្តោតចាប់យកអតិថិជនជាប្រជាជនខ្មែរសុទ្ធសាធ ហើយតម្លៃផ្ទះរបស់យើងកំពុងស្ថិតក្នុងការពិចារណាយ៉ាងប្រុងប្រយ័ត្ន។ លោកបន្តថា “ការប្រកាសលក់ផ្ទះក្នុងគម្រោងនេះអាចធ្វើឡើងបន្ទាប់ពីបញ្ចប់ការបោះឆ្នោតជាតិនៅឆ្នាំ2018ខាងមុខ។

អ្នកជំនាញអចលនទ្រព្យអន្តរជាតិលោក វ៉ា វីរៈ នាយកប្រតិបត្តិក្រុមហ៊ុនFortuna Investment បានថ្លែងថា គម្រោងនេះនឹងទទួលបានជោគជ័យ ព្រោះវាមានទីតាំងស្ទើរតែស្ថិតនៅតំបន់កណ្តាលក្រុងភ្នំពេញ ហើយហេដ្ឋារចនាសម្ព័ន្ធតភ្ជាប់ទៅតំបន់នេះកាន់តែមានភាពងាយស្រួលនាពេលអនាគតដែលអាចនឹងមានរថយន្តក្រុងសាធារណៈ និងរទេះភ្លើងលើអាកាសទៀតផង។ លោកបន្តថា គម្រោងនេះធំ និងស្ថិតនៅលើទំហំដីធំដែលបច្ចុប្បន្នពិបាកក្នុងការរកដីធំនៅកណ្តាលក្រុងបែបនេះបានណាស់ ហើយគម្រោងនេះប្រសិនសាងសង់ចប់អាចដាក់មនុស្សបានរាប់ម៉ឺននាក់។

លោកបន្តថា “ប្រសិនជាម្ចាស់គម្រោងនេះសាងសង់ចប់ និងមានប្លង់មេត្រឹមត្រូវគម្រោងនេះនឹងទទួលបានជោគជ័យ ប៉ុន្តែវាអាស្រ័យលើគុណភាពសំណង់ និងការរៀបចំផងដែរ។ លោកបន្តថា “គម្រោងនេះគួរតែផ្តោតលើប្រជាជនមានជីវភាពកម្រិតមធ្យមរហូតដល់កម្រិតខ្ពស់ ព្រោះអចលនទ្រព្យនៅតំបន់នេះអាចលក់ក្នុងតម្លៃចន្លោះពី2,000 ទៅ3,000ដុល្លារក្នុងមួយម៉ែត្រការ៉េ”៕

August 31, 2017

Author: វល័ក្ខ