ភ្នំពេញៈ ឧកញ៉ាដែលមានឈ្មោះបោះសំឡេងក្នុងវិស័យអចលនទ្រព្យបានថ្លែងថា ស្រុកខ្មែរនាពេលនេះមិនទាន់ដល់ពេលត្រូវវិនិយោគលើផលិតផលដែលមានប្រ៊េនដ៍ល្បីៗទេ វាទាមទារពេលវេលាយ៉ាងហោចណាស់ក៏5ឆ្នាំទៀតដែរ។
លោកឧកញ៉ា សៀ រិទ្ធី អគ្គនាយកក្រុមហ៊ុន World Bridge Group បានថ្លែងឲ្យដឹងនាព្រឹកថ្ងៃទី២ ខែកញ្ញាកន្លងទៅថា ពេលណានិយាយពីផលិតផលប្រណីត គេនិយាយពីផ្នត់គំនិតរបស់មនុស្សក្នុងការទិញ ព្រោះជនជាតិខ្មែរក៏ដោយ ជនជាតិថៃក៏ដោយនៅតែនិយមទៅទិញទំនិញនៅបរទេស។ សំណួរសូរថា ហេតុអីបានខ្មែរទៅទិញនៅប្រទេសថៃ ឯជនជាតិថៃទៅទិញទំនិញនៅក្រុងប៉ារីស ប្រទេសបារាំង ដោយសារគាត់យល់ថា ទំនិញនៅទីនោះមានតម្លៃថោកជាង ប៉ុន្តែការទៅទិញនៅប្រទេសថៃមិនមែនដោយសារថោកជាងនោះទេ តែពួកគាត់គិតថា ផលិតផលនៅទីនោះជាផលិតផលសុទ្ធ (មិនមែនផលិតផលក្លែងបន្លំ)។
លោកបន្តថា “ការពិតផលិតផលដែលនាំមកកាន់កម្ពុជាក៏ជាផលិតផលសុទ្ធដែរ តែបើអារម្មណ៍មិនចង់ទិញហើយ មើលទៅវាទាស់ចិត្តទាំងអស់។ លោកបន្តថា “នៅប្រទេសវៀតណាមក៏មានស្ថានភាពដូចកម្ពុជាដែរ ជនជាតិវៀតណាមមិនទិញទំនិញប្រ៊េនដ៍ៗនៅក្នុងប្រទេសរបស់ខ្លួនទេ តែអ្នកធ្វើពាណិជ្ជកម្មយីហោ ឬប្រ៊េនដ៍ល្បីៗ ពួកគេមិនខ្វល់ទេ ព្រោះពួកគេបើកលក់ជុំវិញពិភពលោក អ្វីដែលសំខាន់ពួកគេអាចចែកចាយទូទាំងពិភពលោក។
លោកឧកញ៉ា សៀ រិទ្ធី បានបន្តថា ប្រសិនជានិយាយពីកម្លាំងទិញ និងនិយាយពីចំណូល វាមិនទាន់ស័ក្តិសមក្នុងការបោះទុនវិនិយោគក្នុងវិស័យនេះនៅឡើយទេ។
អ្នកនាង អាន សុធីតា នាយិកាក្រុមហ៊ុនអចលនទ្រព្យលំដាប់អន្តរជាតិ CBRE Cambodia បានលើកឡើងស្រដៀងគ្នាដែរថា ទោះជាផលិតផលប្រ៊េនដ៍ម៉ាកល្បីៗចូលមកកាន់ទីផ្សារកម្ពុជាក្តី តែវាមិនទាន់មានចំនួនច្រើននៅឡើយ ហើយផលិតផលប្រ៊េនដ៍ល្បីៗខ្លាំងមិនទាន់បានចូលមកកាន់ទីផ្សារនេះនៅឡើយទេ ទោះជាចូលមកខ្លះៗមែន តែក៏មិនទាន់មានចំនួនច្រើននៅឡើយ។ អ្នកនាងបន្តថា កត្តាទំនុកចិត្តលើផលិតផលទាំងនោះក៏ជាផ្នែកមួយផងដែរ ប៉ុន្តែតាមធម្មតាបើធៀបកម្ពុជាជាមួយប្រទេសឡាវ កម្ពុជាមានភាពស៊ីវិល័យជាង និងប្រជាជនចំណាយប្រាក់ច្រើនជាង ទោះជាប្រាក់ចំណូលសម្រាប់ប្រជាជនម្នាក់របស់កម្ពុជានៅទាបជាងប្រទេសឡាវក៏ដោយ។
អ្នកនាងបន្តថា “កម្លាំងទិញនៅកម្ពុជានៅមានកម្រិតនៅឡើយ ទោះជាប្រាក់ចំណូលប្រជាពលរដ្ឋកើនឡើងក្តី ប៉ុន្តែទំហំនៃការចំណាយលើផលិតផលប្រ៊េនដ៍ៗក៏នៅមានកម្រិតដែរ”៕
