វល័ក្ខ - La Reine Media

ទីភ្នាក់ងារជាតិមុខរបរ និងការងារបង្រៀនជំនាញទន់ (Soft Skills) ដោយឥតគិតថ្លៃ

ទីភ្នាក់ងារមុខរបរ និងការងារ (NEA) ជាស្ថាប័នយ៉ាងសំខាន់មួយដែលជួយប្រជាជនកម្ពុជាឱ្យទទួលបានការងារធ្វើ និងបណ្តុះបណ្តាលជំនាញនានាបន្ថែមទៀតដល់សិស្ស និស្សិត ឱ្យមានសមត្ថភាពក្នុងការបំពេញកិច្ចការងារឱ្យកាន់តែប្រសើរ ព្រមទាំងជាស្ថាប័នផ្សព្វផ្សាយពីទីផ្សារការងារយ៉ាងសំខាន់សម្រាប់កម្ពុជា។

នៅក្នុងសកម្មភាពសំខាន់ៗ របស់ទីភ្នាក់ងារមុខរបរ និងការងារទាំងអស់ ការងារបណ្តុះបណ្តាលត្រូវបានគេមើលឃើញថា ជាសកម្មភាពថ្មីមួយប្រកបដោយភាពផុលផុស និងមានសក្តានុពលដើម្បីជួយដល់ប្រជាជនកម្ពុជាឱ្យកាន់តែមានសមត្ថភាព ទាំងលទ្ធភាពធ្វើការងារ សមត្ថភាពក្នុងការគិត និងសមត្ថភាពក្នុងការអភិវឌ្ឍជីវិតជាដើម។

ជាទូទៅ ស្ថាប័នជាតិមួយនេះបានបើកវគ្គបណ្តុះបណ្តាលជំនាញទន់ជាបន្តបន្ទាប់ដល់យុវជនកម្ពុជាដោយឥតគិតថ្លៃ ដែលវគ្គនេះនឹងបណ្តុះបណ្តាលជំនាញសំខាន់ៗដូចជា ជំនាញប្រាស្រ័យទាក់ទង ជំនាញដោះស្រាយបញ្ហា និងជំនាញធ្វើការងារជាក្រុម។

យោងតាមការបង្ហាញរបស់អ្នកជំនាញការងារបានឱ្យដឹងថា ជំនាញដែលយុវជនកម្ពុជាត្រូវចេះដើម្បីទទួលបានការងារល្អធ្វើ បន្ថែមលើជំនាញក្នុងសាលាគឺ ជំនាញភាសាបរទេស ជំនាញគ្រប់គ្រងអតិថិជន ជំនាញបច្ចេកវិទ្យាព័ត៌មានវិទ្យា និងកុំព្យូទ័រមូលដ្ឋាន ជំនាញទំនាក់ទំនងផ្ទាល់មាត់ ជំនាញធ្វើការងារជាក្រុមជំនាញរៀបចំគម្រោង ជំនាញទំនាក់ទំនងតាមរយៈការសរសេរ ជំនាញរដ្ឋបាល ជំនាញគិតលេខ និងជំនាញរៀបចំយុទ្ធសាស្ត្រគ្រប់គ្រង៕

September 8, 2017

ប្រយ័ត្នផង! ចាហួយដូងពីវៀតណាមប៉ះពាល់ខ្លាំងដល់សុខភាពកុមារ

ភ្នំពេញ៖ កម្លាំងសមត្ថកិច្ច សហការជាមួយមន្ត្រីជំនាញកាំកុងត្រូលខេត្តកំពង់ធំ បានចុះពិនិត្យទំនិញដែលអាជីវករដាក់លក់ដូរនៅក្នុងផ្សារបារាយណ៍ ដោយបានរកឃើញទំនិញប្រភេទចាហួយដូង និងតំណាប់ដូងមានផ្ទុកដោយសារធាតុគីមីខ្ពស់ធ្វើឱ្យប៉ះពាល់សុខភាពកុមារយ៉ាងធ្ងន់ធ្ងរ។

លោក លៀង សុភា ប្រធានសាខាកាំកុងត្រូលខេត្តកំពង់ធំបានឱ្យដឹងថា កាលពីថ្ងៃទី7 ខែកញ្ញានេះ មន្ត្រីជំនាញបានសហការជាមូយអាជ្ញាធរមូលដ្ឋានដោយបានចុះពិនិត្យទំនិញនានា ដែលដាក់លក់នៅលើទីផ្សារដោយក្នុងនោះបានរកឃើញទឹកក្រូចម៉ាកហ្វាន់តាចំនួន24ដប ទឹកក្រូចម៉ាកឌីដូ ចំនួន34ដប ទឹកក្រូចម៉ាកកូតូ 12ដប និងទឹកក្រូចចំណុះ220មីល្លីលិត្រចំនួន8ដប ដែលផលិតនៅប្រទេស6ថៃ និងទឹកក្រូចម៉ាកហ៊ីដូផលិតនៅប្រទេសកូរ៉េផងដែរ ដោយបានពិនិត្យឃើញថា ជាប្រភេទទំនិញដែលខូចគុណភាពមិនអាចលក់ទៅឱ្យអតិថិជនបានឡើយ។

លោកបន្តថា ក្នុងចំណោមទំនិញខូចគុណភាពទាំង8មុខនោះ មន្ត្រីជំនាញបានរកឃើញផងដែរថា ចាហួយដូង ឬតំណាប់ដូងដែលផលិតនៅក្នុងប្រទេសវៀតណាម ហើយត្រូវបានចរាចរដាក់លក់នៅលើទីផ្សារនានានៅក្នុងប្រទេសកម្ពុជានោះបានបង្កឱ្យមានផលប៉ះពាល់ដល់សុខភាពយ៉ាងធ្ងន់ធ្ងរ ពិសេសកុមារ ដោយសារតែវាមានផ្ទុកនូវសារធាតុគីមីខ្ពស់។

ចំណែកផលប៉ះពាល់វិញត្រូវបានគេដឹងថា នឹងធ្វើឱ្យកុមាររាក ក្អួតចង្អោរ រាករួស ក្តៅខ្លួនជាដើម ហើយវាអាចបង្កទៅជាជំងឺផ្សេងៗបានទៀតផង ដូច្នេះអាណាព្យាបាលគួរប្រុងប្រយ័ត្ន ចៀសវាងកុំបណ្តោយឱ្យកូនតូចទិញនំចំណីបរិភោគដោយខ្លួនឯង ជាពិសេសនៅតាមសាលារៀននានា ដែលលោកគ្រូអ្នកគ្រូគួរតែជួយអប់រំកូនសិស្សតូចៗឱ្យបានយល់ពីបញ្ហានេះផង៕

September 8, 2017

ក្រសួងអប់រំ នឹងបើកថ្នាក់អក្ខរកម្មឱ្យកាន់តែច្រើនដល់កម្មករតាមរោងចក្រនៅឆ្នាំនេះ

ព្រឹកនេះ ជាទិវាអក្ខរកម្មជាតិ-អន្តរជាតិលើកទី17 ដែលប្រព្រឹត្តទៅនៅខេត្តបាត់ដំបង ក្រោមប្រធានបទ «អក្ខរកម្មផ្សារភ្ជាប់ជាមួយនឹងសហគមន៍»។

នៅក្នុងព្រឹត្តិការណ៍នេះឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងនៅព្រឹកនេះថា ទិវាអក្ខរកម្មជាតិ-អន្តរជាតិ 8កញ្ញានេះ ជាទិវាមួយដែលមានសារៈសំខាន់ និងមានអត្ថន័យដ៏ថ្លៃថ្លាបំផុតក្នុងការលើកកម្ពស់ការងារអក្ខរកម្ម ព្រមទាំងជំរុញមនសិការរបស់បងប្អូនជនរួមជាតិយើងទាំងអស់រួមគ្នាលើកកម្ពស់ការងារនេះ ឱ្យកាន់តែល្អប្រសើរ ដើម្បីឧត្ដមប្រយោជន៍របស់កម្ពុជាយើងផង និងមនុស្សជាតិទាំងមូលផង។

ឯកឧត្តម ហង់ ជួនណារ៉ុន បានមានប្រសាសន៍ថា៖ «សមិទ្ធផលនៃការអនុវត្តកម្មវិធីអក្ខរកម្មវិជ្ជាជីវៈនេះ បានបង្ហាញឱ្យឃើញពីការយកចិត្តទុកដាក់របស់ក្រសួងអប់រំ យុវជន និងកីឡា ក្រសួង និងស្ថាប័នពាក់ព័ន្ធ ព្រមទាំងអង្គការយូណេស្កូ និងដៃគូអភិវឌ្ឍន៍នានា ជាពិសេសពីកិច្ចខិតខំប្រឹងប្រែង អស់ពីកម្លាំងកាយចិត្ត របស់មន្ត្រីអប់រំគ្រប់លំដាប់ថ្នាក់ ព្រះសង្ឃ សិស្ស និស្សិត បញ្ញវន្ត និងក្រុមយុវជនស្ម័គ្រចិត្តនៅទូទាំងប្រទេស»។

នៅក្នុងឆ្នាំ 2017 នេះ ក្រុមការងារអក្ខរកម្មបានបើកថ្នាក់បន្ថែមដើម្បីបង្រៀនអក្ខរកម្មដល់កម្មករ-កម្មការិនី នៅរោងចក្រចំនួន 11 ដែលមានអ្នកចូលរួមចំនួន166នាក់ ដោយក្នុងនោះមានកម្មការិនី ចំនួន 154នាក់។ កម្មវិធីនេះនឹងធ្វើឱ្យបងប្អូនកម្មករ-កម្មការិនី ទទួលបានការរៀនសូត្រផ្នែកអក្សរ លេខ និងមានឱកាសការងារកាន់តែប្រសើរឡើង។

ពាក់ព័ន្ធជាមួយនឹងកម្មវិធី អក្ខរកម្មនេះផងដែរ ក៏មានបើកបង្រៀនសម្រាប់ប្រជាជនទូទៅ នៅទូទាំងប្រទេសដែលចង់អភិវឌ្ឍខ្លួនឯង ឬដែលមិនបានចូលសិក្សាកាលពីនៅក្មេង ដើម្បីបានសិក្សាពីអក្សរ ដែលវាជាមូលដ្ឋានគ្រឹះសម្រាប់រៀនជំនាញដទៃ សម្រាប់អភិវឌ្ឍមុខរបរប្រចាំថ្ងៃ រួមទាំងអាចធ្វើឱ្យគាត់ក្លាយជាអ្នកបច្ចេកទេសនៅក្នុងសហគមន៍របស់ពួកគាត់ថែមទៀតផង ប្រសិនបើគាត់តស៊ូប្រើចំណេះដឹងដែលមានទៅសិក្សាបន្ថែមលើជំនាញខ្ពស់ៗបន្ថែមទៀត៕

September 8, 2017

កម្ពុជា-ថៃ គ្រោងបង្កើនទំហំពាណិជ្ជកម្មឲ្យដល់15ពាន់លានដុល្លារ

ភ្នំពេញៈ ប្រមុខនៃរាជរដ្ឋាភិបាលកម្ពុជា និងថៃគ្រោងពង្រីកទំហំពាណិជ្ជកម្មឲ្យកើនឡើងដល់ 15ពាន់លានដុល្លារនៅឆ្នាំ 2020ខាងមុខនេះ ខណៈកាលពីឆ្នាំមុនទំហំពាណិជ្ជកម្មរវាងប្រទេសទាំងពីរបានកើនឡើងដល់ជិត6ពាន់លានដុល្លាររួចទៅហើយ។

បន្ទាប់ពីកិច្ចប្រជុំគណៈរដ្ឋមន្ត្រីរួមលើកទី3 រវាងគណៈរដ្ឋមន្ត្រីកម្ពុជា និងគណៈរដ្ឋមន្ត្រីថៃនៅវិមានសន្តិភាពទីក្រុងភ្នំពេញក្នុងអំឡុងដំណើរទស្សនកិច្ចរបស់នាយករដ្ឋមន្ត្រីថៃ លោកប្រាយុទ្ធ ចាន់អូចា កាលពីម្សិលមិញនេះរួចមក សម្តេច តេជោហ៊ុន សែនបានថ្លែងថា តាមរយៈកិច្ចពិភាក្សាដោយរលូន និងមានការយោគយល់គ្នាទៅវិញទៅមករវាងសម្តេច និងលោកប្រាយុទ្ធ ចាន់អូចា ប្រទេសទាំងពីរបានប្តេជ្ញាចិត្តបង្កើនទំហំពាណិជ្ជកម្មរវាងប្រទេសទាំងពីរ និងបើកច្រកថ្មី និងភ្ជាប់បណ្តាញផ្លូវគោក ផ្លូវរថភ្លើង និងផ្លូវទឹកបន្ថែមទៀត ពិសេសប្រទេសថៃបានសន្យាជួយទិញកសិផលកម្ពុជាបន្ថែមទៀត ប៉ុន្តែសម្តេចមិនបានបញ្ជាក់ថាក្នុងចំនួនប៉ុន្មានជាក់លាក់នោះទេ។

សម្តេចបន្តថា “នៅពេលមានបញ្ហាកសិផលមិនអាចមានការនាំចូលប្រទេសថៃបាននោះ សម្តេចបានធ្វើអន្តរាគមន៍ និងមានការជួយសម្របសម្រួលពីភាគីថៃបានទាន់ពេលវេលា។ សម្តេចបានបន្តថា “បច្ចុប្បន្នប្រទេសថៃនាំចូលមកកម្ពុជា5 តែកម្ពុជានាំចូលទៅកាន់ប្រទេសថៃវិញមានតែ1ប៉ុណ្ណោះ ហេតុនេះទើបយើងត្រូវស្វែងរកយុទ្ធសាស្ត្រធ្វើយ៉ាងណាឲ្យទំហំពាណិជ្ជកម្មប្រទេសទាំងពីរកើនឡើងបន្ថែមទៀត។

នាយករដ្ឋមន្ត្រីថៃ លោកប្រាយុទ្ធ ចាន់អូចា បានថ្លែងថា ការតភ្ជាប់រវាងប្រទេសថៃ និងកម្ពុជាជាប្រវត្តិសាស្ត្រមួយរវាងប្រទេសថៃ និងប្រទេសក្នុងតំបន់និងជាមួយប្រទេសកម្ពុជា ហើយតាមរយៈការតភ្ជាប់នេះនឹងជួយបង្កើនទំហំពាណិជ្ជកម្មរវាងប្រទេសទាំងពីរ ពិសេសតាមរយៈច្បាប់គយថ្មីរបស់ប្រទេសថៃនឹងជួយឱ្យកម្ពុជាអាចនាំចេញទៅកាន់ប្រទេសទី3ផងដែរ។ លោកបន្តថា យើងរីករាយសហការគ្នាតាមរយៈគោលនយោបាយថៃបូក1 និងកម្ពុជាបូក1 ដើម្បីផលប្រយោជន៍របស់ប្រជាជននៃប្រទេសទាំងពីរ។

លោកបន្តថា “យើងនឹងដើរទៅមុខជាមួយគ្នា ប្រទេសថៃនឹងមិនទុកកម្ពុជាចោលហើយរីកចម្រើនតែម្នាក់ឯងនោះទេ គឺយើងនឹងធ្វើយ៉ាងណាឆ្ពោះទៅមុខក្នុងវិបុលភាពជាមួយគ្នា។

យោងតាមរបាយការណ៍របស់ស្ថានទូតថៃប្រចាំកម្ពុជាបានឲ្យដឹងថា ទំហំពាណិជ្ជកម្មរវាងប្រទេសថៃ និងកម្ពុជាក្នុងរយៈពេល6ខែដើមឆ្នាំនេះសម្រេចបាននូវទឹកប្រាក់2.9ពាន់លានដុល្លារអាមេរិក កើនឡើងប្រមាណ10ភាគរយធៀបរយៈពេលដូចគ្នាកាលពីឆ្នាំមុន។

ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឈន៍នៃក្រុមហ៊ុន Emerging Market Consuting លោក ង៉ែត ជូ បានថ្លែងថា ដើម្បីធ្វើការអភិវឌ្ឍសេដ្ឋកិច្ច និងធ្វើឲ្យជញ្ជីងពាណិជ្ជកម្មរវាងប្រទេសទាំងពីរមានតុល្យភាព យើងត្រូវតែព្យាយាមធ្វើយ៉ាងណាដើម្បីពង្រឹង និងបង្កើនការផលិតរបស់ខ្លួនដើម្បីផ្គត់ផ្គង់ការប្រើប្រាស់ក្នុងស្រុក និងកាត់បន្ថយការនាំចូលពីប្រទេសថៃ។

លោកបានបន្តថា “កម្ពុជាគួរតែព្យាយាមផលិតអ្វីដែលមានតម្លៃខ្ពស់ ហើយមានលក្ខណៈខុសប្លែកពីរបស់ប្រទេសដទៃ ដើម្បីមានលទ្ធភាពកាន់តែខ្ពស់ក្នុងការចាប់យកទីផ្សារជាមួយប្រទេសថៃ និងបណ្តាប្រទេសដទៃផ្សេងទៀតផងដែរ”៕

September 8, 2017

Coutinho និង Sanchez ត្រៀមបង្ហាញថ្វីជើង ពេលប៉ះ Man City និង Bournmouth រៀងៗខ្លួន

លោក Pep Guardiola និង Jurgen Klopp គឺជាគូប្រជែងដែលរៀបចំក្រុមឲ្យលេងកីឡាបាល់ទាត់បែបវាយសម្រុកលើដៃគូ ដែលគួរតែធ្វើឲ្យការប្រកួតក្របខ័ណ្ឌ Premier League រវាងក្រុម Manchester City និង Liverpool នៅថ្ងៃសៅរ៍នេះ ក្លាយជាការប្រកួតដ៏គួរឲ្យចាប់អារម្មណ៍បំផុតប្រចាំសប្តាហ៍។

ប៉ុន្តែ ទោះបីជាយ៉ាងណា ទាំងលោក Guardiola របស់ក្លិប Man City និងលោក Klopp របស់ក្លិប Liverpool កំពុងតែស្ថិតក្រោមសម្ពាធដូចគ្នានៅរដូវកាលនេះ ក្នុងការផ្លាស់ប្តូរទម្រង់លេងបែបវាយសម្រុកឲ្យឆ្ពោះទៅរកការឈ្នះពាន។

ស្របពេលដែលក្លិបទាំងមាន7ពិន្ទុដូចគ្នា និងមិនស្គាល់ចាញ់សោះបន្ទាប់ពីការប្រកួត3លើក ពួកគេសង្ឃឹមថា កីឡាកររបស់ពួកគេនឹងមិនបានបង្ហាញពីការអស់កម្លាំងឡើយ ក្រោយពីការបំពេញកាតព្វកិច្ចជាមួយនឹងក្រុមជម្រើសជាតិរួច។ ទាំង Liverpool និង Man City កំពុងតែដេញតាមពីក្រោយក្រុម Manchester United ចំនួន2ពិន្ទុដូចគ្នា ខណៈដែលក្រុមរបស់លោក Jose Mourinho មិនទាន់បណ្តោយឲ្យមានគ្រាប់បាល់ចូលទីរបស់ខ្លួន1គ្រាប់ណានៅឡើយទេនៅរដូវកាលនេះ មុនពេលធ្វើដំណើទៅកាន់ទឹកដីក្រុម Stoke នៅថ្ងៃសៅរ៍នេះ។

ជាមួយគ្នានេះដែរ កីឡាករជាច្រើននឹងចាប់ផ្តើមធ្វើការប្រជែងជាមួយនឹងក្លិបថ្មីរបស់ពួកគេ ក្រោយពីទីផ្សារដោះដូរកីឡាករបានបិទអំឡុងពេលបំពេញកាតព្វកិច្ចសម្រាប់ក្រុមជម្រើសជាតិ។ Philippe Coutinho អាចនឹងធ្វើការបង្ហាញខ្លួនជាលើកទី1របស់គេ នៅរដូវកាលនេះសម្រាប់ក្រុម Liverpool ហើយការចាប់អារម្មណ៍ផ្សេងៗនឹងស្ថិតនៅលើអារម្មណ៍របស់គេ ក្រោយពីរូបគេបានខកខានក្នុងការផ្ទេរទៅកាន់ក្លិប Barcelona។

ជាមួយគ្នានេះ Alexis Sanchez នឹងក្លាយជាតួអង្គដ៏សំខាន់ចំពោះក្លិប Arsenal និងលោក Arsene Wenger ក្នុងយុទ្ធនាការនៃការប្រជែងលើកពានរបស់ពួកគេ។ ប៉ុន្តែ ការត្រៀមលក្ខណៈផ្នែកស្មារតីរបស់ខ្សែប្រយុទ្ធអន្តរជាតិស៊ីលីរូបនេះ ក្រោយពីក្លិប Arsenal បដិសេធមិនឲ្យរូបគេចាកចេញទៅកាន់ក្លិប Manchester City នឹងពិតជាសំខាន់ណាស់ ដើម្បីបង្ហាញថា តើ Arsenal នឹងទទួលជោគជ័យឬយ៉ាងណា។

Arsenal នឹងធ្វើជាម្ចាស់ផ្ទះទទួលក្រុម Bournemouth នៅថ្ងៃសៅរ៍នេះ ខណៈដែលពួកគេកំពុងតែត្រូវការជ័យជម្នះដ៏សំខាន់មួយ ដើម្បីស្តារមុខមាត់ឡើងវិញ ក្រោយពីឈ្នះ1លើក និងចាញ់2លើកពីការប្រកួតបើកឆាក3លើកដំបូងរបស់ពួកគេ៕

កម្មវិធីប្រកួតថ្ងៃសៅរ៍នេះមាន

ថ្ងៃសៅរ៍ ទី៩ ខែកញ្ញា
Manchester City v Liverpool – 6:30 ល្ងាច
Arsenal v Bournemouth – 9 យប់
Brighton v West Brom – 9 យប់
Everton v Tottenham – 9 យប់
Leicester v Chelsea – 9 យប់
Southampton v Watford – 9 យប់
Stoke City v Manchester United – 11:30 យប់

ថ្ងៃអាទិត្យ ទី១០ ខែកញ្ញា
Burnley v Crystal Palace – 7:30 យប់
Swansea v Newcastle Utd – 10 យប់

ប្រភពពី៖ The Straits Times

September 8, 2017

Premier League នឹងបិទទីផ្សារដោះដូរកីឡាករមុនចាប់ផ្តើមរដូវកាលថ្មី

ក្លិបស្ថិតក្នុងក្របខ័ណ្ឌ Premier League កាលពីថ្ងៃព្រហស្បតិ៍ បានធ្វើការបោះឆ្នោតដើម្បីបិទទីផ្សារដោះដូរកីឡាករបន្ទាប់ពីបញ្ចប់រដូវកាលក្នុងឆ្នាំ2017 នៅមុនពេលចាប់ផ្តើមយុទ្ធនាការឆ្នាំ2018-2019។

ក្រោយពីមានការតវ៉ាពីសំណាក់អ្នកចាត់ការទូទៅជាច្រើនថា សកម្មភាពនៃការដោះដូរកីឡាកររំខានដល់ការត្រៀមលក្ខណៈរបស់ពួកគេនោះ ក្លិបទាំងអស់នោះនឹងមិនអាចទិញចូលកីឡាករថ្មីបានឡើយ បន្ទាប់ពីឆ្លងផុតថ្ងៃព្រហស្បតិ៍ មុនពេលរដូវកាលថ្មីចាប់ផ្តើម។

ទីផ្សារដោះដូរកីឡាករក្នុងក្របខ័ណ្ឌកំពូលៗជាច្រើននៅអឺរ៉ុប បន្តរហូតដល់ថ្ងៃទី31 ខែសីហា ដែលមានន័យថា ក្លិបទាំងអស់នៅក្រៅប្រទេសអង់គ្លេស នៅតែអាចទិញកីឡាករពីក្របខ័ណ្ឌកំពូលរបស់អង់គ្លេសបាន បន្ទាប់ពីថ្ងៃបិទផ្សារដោះដូរកីឡាករនៅក្របខ័ណ្ឌ Premier League។ ក្របខ័ណ្ឌ Premier League បានឲ្យដឹងនៅក្នុងសេចក្តីថ្លែងការណ៍មួយថា៖ «នៅថ្ងៃនេះ ក្លិបស្ថិតក្នុងក្របខ័ណ្ឌ Premier League បានយល់ព្រមទៅលើការកែទម្រង់ច្បាប់មួយដែលនឹងធ្វើឲ្យទីផ្សារដោះដូរកីឡាករនៅរដូវក្តៅចាប់ពីពេលនេះទៅនឹងបញ្ចប់នៅម៉ោង5 (ម៉ោងក្នុងស្រុក) ល្ងាច នៅថ្ងៃព្រហស្បតិ៍ នៅមុនពេលចាប់ផ្តើមរដូវកាលថ្មី។

សេចក្តីសម្រេចនេះសម្រាប់តែក្លិបស្ថិតក្នុងក្របខ័ណ្ឌ Premier League ប៉ុណ្ណោះ និងមិនមានឥទ្ធិពលដល់លីក ឬយុទ្ធនាការផ្សេងឡើយ»។ ក្របខ័ណ្ឌលីកធំៗផ្សេងទៀតនៅអឺរ៉ុប ដូចជា La Liga របស់អេស្ប៉ាញ Serie A របស់អ៊ីតាលី Bundesliga របស់អាល្លឺម៉ង់ និង Ligue 1 របស់បារាំង បច្ចុប្បន្នកំពុងប្រឈមមុខនឹងការសម្រេចចិត្តថា តើត្រូវដើរតាមអង់គ្លេស ឬយ៉ាងណា?៕

ប្រភពព័ត៌មាន៖ BBC

September 8, 2017

សេដ្ឋវិទូ និងអ្នកផលិត និយាយពីការកាត់បន្ថយឱនភាពពាណិជ្ជកម្មកម្ពុជា-ថៃ

ភ្នំពេញៈ ស្របពេលដំណើរទស្សនកិច្ចរបស់នាយករដ្ឋមន្ត្រីថៃលោក ប្រាយុទ្ធ ចាន់អូចា មកកាន់កម្ពុជា ទំហំពាណិជ្ជកម្មរវាងប្រទេសទាំងពីរក៏បានកើនឡើងផងដែរ ប៉ុន្តែជញ្ជីងពាណិជ្ជកម្មរវាងប្រទេសទាំងពីរ មិនមានតុល្យភាពនៅឡើយ ដោយសេដ្ឋវិទូ និងអ្នកផលិតបានលើកឡើងពីដំណោះស្រាយចំពោះបញ្ហានេះ។

ទីប្រឹក្សាជាន់ខ្ពស់នៃក្រុមហ៊ុន Emerging Market Consulting លោក ង៉ែត ជូ បានថ្លែងប្រាប់ឲ្យដឹងតាមទូរស័ព្ទនាព្រឹកថ្ងៃទី៧ ខែកញ្ញាម្សិលមិញនេះថា ដើម្បីកាត់បន្ថយឱនភាពពាណិជ្ជកម្ម និងធ្វើឲ្យជញ្ជីងពាណិជ្ជកម្មរវាងប្រទេសទាំងពីរមានតុល្យភាព កម្ពុជាត្រូវតែព្យាយាមធ្វើយ៉ាងណាពង្រឹង និងបង្កើនការផលិតរបស់ខ្លួនដើម្បីផ្គត់ផ្គង់ការប្រើប្រាស់ក្នុងស្រុក និងកាត់បន្ថយការនាំចូលពីប្រទេសថៃ។ លោកបានបន្ថែមថា យើងគួរតែព្យាយាមផលិតអ្វីដែលមានតម្លៃខ្ពស់ ហើយមានលក្ខណៈខុសប្លែកពីរបស់ប្រទេសដទៃដើម្បីមានលទ្ធភាពកាន់តែខ្ពស់ក្នុងចាប់យកទីផ្សារជាមួយប្រទេសថៃ និងបណ្តាប្រទេសដទៃផ្សេងទៀតផងដែរ។

ពាណិជ្ជកម្មរវាងប្រទេសកម្ពុជា និងប្រទេសថៃនាពាក់កណ្ដាលដើមឆ្នាំ2017 នេះត្រូវបានឃើញថា មានការកើនឡើងគួរឲ្យកត់សម្គាល់ ដោយមានទំហំទឹកប្រាក់រហូតដល់ 2.9ពាន់លានដុល្លារ កើនឡើងប្រមាណជា10ភាគរយបើធៀបជាមួយរយៈពេលដូចគ្នាកាលពីឆ្នាំមុន ដែលមានចំនួនទឹកប្រាក់ត្រឹមតែ 2.6ពាន់លានដុល្លារប៉ុណ្ណោះ។ នេះបើយោងតាមទិន្នន័យដែលបានបង្ហាញដោយខាងស្ថានទូតថៃ។

ក្នុងរយៈពេលដូចគ្នានេះ ការនាំចេញផលិតផលរបស់ប្រទេសកម្ពុជាទៅកាន់ប្រទេសថៃមានការធ្លាក់ចុះប្រមាណជា 20ភាគរយ ដោយវាមានតម្លៃទឹកប្រាក់ត្រឹម 453លានដុល្លារប៉ុណ្ណោះ។ ផ្ទុយទៅវិញការនាំចូលផលិតផលពីប្រទេសថៃមកកម្ពុជាវិញ មានការកើនឡើង18ភាគរយ ស្មើនឹង 2.4លានដុល្លារ។

ប្រធានសម្ព័ន្ធសមាគមសហគ្រាសធុនតូច និងមធ្យមលោកឧកញ៉ា តែ តាំងប៉ បានមានប្រសាសន៍ឲ្យដឹងផងដែរថា ប្រទេសកម្ពុជាត្រូវតែធ្វើយ៉ាងណាដើម្បីជំរុញការនាំចេញ បង្កើនផលិតផលក្នុងស្រុក និងកាត់បន្ថយការនាំចូល។ ក្នុងនោះលោកក៏បានលើកឡើងបន្ថែមថា ក្នុងករណីនេះប្រទេសកម្ពុជាក៏អាចចរចាជាមួយភាគីថៃដើម្បីឲ្យមានការបើកទូលាយចំពោះការនាំចូលពីប្រទេសកម្ពុជាវិញដែរ ដោយយកការនាំចូលទំនិញពីប្រទេសថៃដ៏ច្រើនមកកម្ពុជា ធ្វើជាឆ្នួនសម្រាប់ការចចា។

លោកបន្តថា “ជាមួយគ្នានេះ លោកបានស្នើសុំឲ្យប្រជាជនកម្ពុជាជួយគាំទ្រ និងឲ្យតម្លៃដល់ផលិតផលក្នុងស្រុករបស់ខ្លួនផងដែរ ដើម្បីលើកកម្ពស់ផលិតផលក្នុងស្រុក និងបន្ថយការប្រើប្រាស់ទំនិញពីបរទេស”៕

September 8, 2017

FlexWash ម៉ាស៊ីនបោកខោអាវទ្វារ 3ដំបូងគេពី Samsung

ក្រោយបញ្ចេញនូវម៉ាស៊ីនបោកគក់សម្លៀកបំពាក់ AddWash បំពាក់ទ្វារ2 កាលពីឆ្នាំទៅរួចមក ពេលនេះក្រុមហ៊ុន Samsung បានធ្វើការណែនាំផលិតថ្មី FlexWash™ មានទ្វារ3 ដំបូងគេក្នុងពិភពអេឡិចត្រូនិក ព្រមជាមួយនឹងការបំពាក់មុខងារសម្ងួតក្រោយពេលដំណើរការរួចរាល់ទៀតផង។
ម៉ាស៊ីនបោកគក់ FlexWash™ មានទ្វារចំនួន3 និងមានកន្លែងបោកគក់ 2 កន្លែងផ្សេងគ្នានេះ អាចដំណើរការក្នុងពេលតែមួយ ដែលក្រុមហ៊ុនបង្កើតឡើងសម្រាប់តម្រូវទៅតាមប្រភេទនៃសម្លៀកបំពាក់ ដោយទ្វារខាងមុខធំអាចបោកបាន 21 គីឡួក្រាម អាចបោកសម្លៀកបំពាក់បានច្រើន ហើយវាអាចផ្ទុកទឹកបានចំនួន 5 ម៉ែត្រគុប ស្មើនឹង141.50 លីត្រ។

បន្ថែមពីលើទ្វារធំមួយនោះ វានៅមានកូនទ្វារតូចមួយទៀតដែលចំណុចពិសេសរបស់វាគឺ យើងអាចទម្លាក់សម្លៀកបំពាក់ប្រឡាក់បន្ថែមទៀតចូលទៅបានក្នុងករណីដែលលោកអ្នកភ្លេច ឬចង់ដាក់បោកបន្ថែម នៅពេលដែលម៉ាស៊ីនកំពុងដំណើរការ ដូចនឹងស៊េរី AddWash ដែរ។ ដោយឡែកទ្វារខាងលើ អាចបោកសម្លៀកបំពាក់ក្នុងចំនួនសមល្មមដែលវាផ្ទុកទឹកបានទំហំ 1 ម៉ែត្រគុបស្មើនឹង 28.31លីត្រ ឬអាចបោកបាន 3.5 គីឡួក្រាម។

ចំណុចពិសេសមួយទៀត គឺម៉ាស៊ីន FlexWash™ មានដំណើរការស្ងាត់ ការបោកគក់រហ័ស សន្សំសំចៃភ្លើងបានច្រើន ការបោកសម្លៀកបំពាក់បានស្អាត និងស្ងួតល្អ ទោះបីជាមិនបានហាលថ្ងៃក៏ដោយ។ មួយវិញទៀត វាក៏មានបំពាក់បច្ចេកវិទ្យាបោកគក់ទំនើបៗចំនួន3 ដូចជា មុខងារបោកគក់បានយ៉ាងស្អាតដោយចំណាយពេលតិចជាងមួយម៉ោង (SuperSpeed™) មុខងារកម្ចាត់ស្នាមប្រទ្បាក់ដែលដិតជាប់ខ្លាំង (PowerFoam™) ប្រព័ន្ធរំញ័រមិនមានសំឡេងរំខាន (Vibration Reduction Technology) និងបច្ចេកវិទ្យា Digital Inverter Technology ដែលជួយឱ្យការប្រើប្រាស់បានយូរកាត់បន្ថយសំឡេងរំខាន និងអាចភ្ជាប់ជាមួយនឹងស្មាតហ្វូនដើម្បីតាមដានការដំណើរការ និងដាក់ពេលវេលាឱ្យម៉ាស៊ីនធ្វើការតាមរយៈទូរស័ព្ទពីគ្រប់ទីកន្លែង ហើយថែមទាំងមានការធានារហូតទៅដល់រយៈពេល10 ឆ្នាំទៀតផងទៅលើម៉ូទ័រ៕

វីដេអូ៖

https://www.youtube.com/watch?v=egVhTDZMyf0&feature=youtu.be

September 7, 2017

អ្នកវិនិយោគនឹងមិនទុកឱ្យអគារ Golden Tower 42 នៅជាប់គាំងដូច្នេះទេ

ភ្នំពេញ – គម្រោងអភិវឌ្ឍន៍ក្រោមទុនវិនិយោគ 240លានដុល្លារអាមេរិក Golden Tower 42 ដែលធ្លាប់តែទុកចោល រហូតគេគិតថា គម្រោងដ៍ធំដំបូងគេនៅក្នុងរាជធានីមួយនេះនឹងលែងដំណើរការ តែថ្មីៗនេះត្រូវបានមន្រី្ដជំនាញបញ្ជាក់ថា គេនឹងមិនទុកគម្រោងនេះឱ្យនៅជាប់គាំងបែបហ្នឹងទេ។

ពាក់ព័ន្ធគម្រោងនេះអគ្គនាយក និងជាប្រធានក្រុមប្រឹក្សាភិបាលនៃក្រុមហ៊ុន YONWOO CAMBODIA Co., Ltd. ដែលជាម្ចាស់គម្រោងមជ្ឈមណ្ឌលពាណិជ្ជកម្ម Gold Tower42 ក៏ធ្លាប់បានផ្ញើលិខិតផ្លូវការមួយដងជាពីរដងរួចមកហើយមកកាន់ទីស្ដីការក្រសួងរៀបចំដែនដី នគរូបនីយកម្ម និងសំណង់ដើម្បីស្នើសុំបន្តសាងសង់អគារនេះទ្បើងវិញនៅក្នុងខែកុម្ភៈ ឆ្នាំ2016 ប៉ុន្តែរហូតមកដល់ពេលនេះនៅតែមិនទាន់ឃើញមានដំណើរការអ្វីឡើយ។

ឯកឧត្ដម ឡៅ ទិព្វសីហា អនុរដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ បានលើកឡើងថា គេមិនអាចទុកឱ្យគម្រោងដ៏ធំមួយនៅចំកណ្តាលរាជធានីភ្នំពេញស្ថិតនៅក្នុងស្ថានភាពបែបនោះទេ។ ឯកឧត្ដមបន្ដថា៖ «សូមបងប្អូនមេត្ដាជឿចុះ រឿងអគារ 42 ជាន់នេះគឺម្ចាស់គម្រោងនៅតែព្យាយាមខិតខំធ្វើឱ្យមានការអភិវឌ្ឍ អត់មានឈប់អ៊ីចឹងទេ ហើយក្រសួងក៏បានទទួលលិខិតរបស់ក្រុមហ៊ុនថា យ៉ាងនេះយ៉ាងនោះដែរ ប៉ុន្ដែយើងក៏បានធ្វើការឆ្លើយតបទៅវិញ ឱ្យក្រុមហ៊ុនធ្វើការអភិវឌ្ឍឆាប់ៗដើម្បីលើកកម្ពស់សោភ័ណភាពរាជធានីភ្នំពេញបន្ថែមទៀត»។

អនុរដ្ឋលេខាធិការបានបន្តទៀតថា អគារខ្ពស់ៗមួយចំនួននៅក្នុងរាជធានីភ្នំពេញក៏ត្រូវជាប់គាំងដែរព្រោះអគារមួយចំនួនត្រូវការកែតម្រូវប្លង់។ គម្រោងខ្លះទៀតត្រូវបានម្ចាស់ស្វែងរកដៃគូថ្មី អគារខ្លះទៀតពាក់ព័ន្ធផ្លូវច្បាប់។ អ៊ីចឹងហើយទើបធ្វើឱ្យអ្នកវិនិយោគទាំងក្នុងស្រុក និងក្រៅស្រុកត្រូវតែសិក្សាឱ្យច្បាស់លាស់ទើបគេដំណើរការទៅមុខទៀត។ ទោះជាយ៉ាងនេះក្ដី គម្រោង Gold Tower42 ដែលទុកចោលរាប់ឆ្នាំនេះ គេពុំទាន់បានដឹងច្បាស់ពីមូលហេតុនៃការផ្អាកការសាងសង់នៅឡើយទេ។

ឯកឧត្ដម ឡៅ ទិព្វសីហា បញ្ជាក់ថា មិនអាចបញ្ជាក់ពីឧបសគ្គដែលធ្វើឱ្យក្រុមហ៊ុនត្រូវបានផ្អាកដំណើរការនេះឡើយ ប៉ុន្ដែឯកឧត្ដម រំពឹងថា ដំណើរការអភិវឌ្ឍន៍គម្រោងនឹងកើតឡើងនៅឆ្នាំក្រោយ។

ទោះជាគម្រោងនេះត្រូវទុកចោលរាប់ឆ្នាំមិនទាន់ដំណើរការទៀតក៏ដោយ ក៏ត្រូវបានឯកឧត្ដម ឡៅ ទិព្វសីហា បញ្ជាក់ថា គម្រោងនេះក៏មានក្រុមហ៊ុនថែទាំសោភ័ណភាព និងគុណភាពនៃសំណង់អគារទាំងមូលឱ្យរក្សាបានភាពយូរអង្វែងដែរដោយមិនទុកឱ្យវាទ្រុឌទ្រោមទៅតាមពេលវេលានោះឡើយ។ គម្រោង Gold Tower42 ជាអតីតគម្រោងអគារខ្ពស់ជាងគេនៅរាជធានីភ្នំពេញ ដែលបានផ្អាកការសាងសង់នៅចុងឆ្នាំ 2008 និងបានចាប់ផ្តើមឡើងវិញនៅឆ្នាំ 2010 ដែលបានសាងសង់រហូតដល់ជាន់ទី32 និងបន្ទាប់មកក៏បានផ្អាករហូតមកទល់ពេលនេះ៕

September 7, 2017

ជំនន់ទំនាក់ទំនងអាចធ្វើឱ្យមនុស្សមានបញ្ហា តែយើងអាចទប់ស្កាត់បាន

ការទំនាក់ទំនងជារឿងសំខាន់សម្រាប់មនុស្ស ជាពិសេសគឺអ្នករកស៊ីដែលត្រូវការជាចាំបាច់ដើម្បីផ្តល់ឱ្យ និងទាញយកផលប្រយោជន៍ពីដៃគូអាជីវកម្ម និងអតិថិជនរបស់ខ្លួន។

ទោះជាការទំនាក់ទំនងមានសារៈសំខាន់យ៉ាងណាក៏ដោយ តែជាទូទៅវាក៏ផ្តល់នូវផលអវិជ្ជមានមកកាន់មនុស្សផងដែរ ប្រសិនបើមនុស្សម្នាក់មានទំនាក់ទំនងជាមួយនឹងមនុស្សប្រភេទផ្សេងគ្នាច្រើនឡើងៗ ព្រោះដើម្បីរក្សាទំនាក់ទំនងយើងត្រូវកាត់បន្ថយពេលវេលាផ្ទាល់ខ្លួន និងគ្រួសារ ដែលវាអាចធ្វើឱ្យជីវិតមានបញ្ហាបាន។

លោក សោម សម្បត្តិ នាយកប្រតិបត្តិនៃសហគ្រាសផលិតថ្នាំពណ៌ជាតិ Cam-Paint បានលើកឡើងថា នៅពេលដែលទំនាក់ទំនងជាមួយមនុស្សកាន់តែកើនឡើង វានឹងក្លាយជាជំនន់នៃទំនាក់ទំនង ហើយរឿងនេះអាចប៉ះពាល់ដល់ជីវិតប្រចាំថ្ងៃរបស់យើង។ ហេតុនេះយើងត្រូវមានវិធានការដើម្បីដោះស្រាយវា។ កត្តាសំខាន់ដែលត្រូវធ្វើគឺ ត្រូវបែងចែកប្រភេទនៃការទំនាក់ទំនងឱ្យបានច្បាស់លាស់ ហើយកំណត់ពីជំពូកមនុស្សដែលត្រូវទាក់ទងដោយផ្ទាល់ និងមនុស្សដែលត្រូវទាក់ទងដោយប្រយោល។

លោក សោម សម្បត្តិ បាននិយាយថា៖ «មនុស្សម្នាក់អាចមានទាក់ទងមនុស្សច្រើនបាន តែអាចស្និទ្ធជាមួយមនុស្សក្នុងចំនួនតិចតួចល្មមបានហើយ ព្រោះជីវិតយើងគ្មានចន្លោះសម្រាប់ដាក់មនុស្សច្រើនពេកនោះទេ»។

បើតាមលោក សោម សម្បត្តិ អ្នកដែលពូកែទំនាក់ទំនង ហើយមិនមានបញ្ហាដល់ជីវិតត្រូវចេះមើលកាលៈទេសៈ ហើយក៏ជាអ្នកដែលមានភាពប៉ិនប្រសប់។ យើងត្រូវមើលឱ្យឃើញពីពពួកមនុស្សប្រមាណ 20% ដែលមានឥទ្ធិពលដល់អាជីវកម្ម 80% ហើយធ្វើការទាក់ទងដោយផ្ទាល់ ព្រោះគាត់ជាផ្នែកសំខាន់មិនអាចខ្វះបាន តែចំពោះមនុស្ស 80% ទៀតដែលមានឥទ្ធិពលសម្រាប់អាជីវកម្មត្រឹមតែ 20% វិញ គឺយើងអាចធ្វើការទំនាក់ទំនងដោយប្រយោល ដូចជាការទុកតួនាទីឱ្យអ្នកគ្រប់គ្រងបន្តបន្ទាប់ចាត់ចែងដោយយកចិត្តទុកដាក់ទៅតាមការទទួលខុសត្រូវរៀងៗខ្លួន ព្រោះមនុស្សម្នាក់មិនអាចមើលបុគ្គលិកគ្រប់គ្នាដល់ទៅរាប់រយ រាប់ពាន់អ្នកនោះទេ៕

September 7, 2017

Author: វល័ក្ខ