វល័ក្ខ - La Reine Media

iOS 11 ដែល Apple ត្រៀមដាក់ឱ្យ Update មានអ្វីប្លែកខ្លះ?

ក្នុងព្រឹត្តិការណ៍កាលពីយប់មិញ ក្រៅពីទូរស័ព្ធ iPhone 8 និង X ហើយនោះ ក្រុមហ៊ុន Apple ក៏បានប្រកាសឱ្យអ្នកប្រើប្រាស់របស់ខ្លួនត្រៀមធ្វើការ Update លើប្រព័ន្ធប្រតិបត្តិការជំនាន់ថ្មី iOS 11 ផងដែរ ចាប់ពីថ្ងៃទី19 ខែកញ្ញា ឆ្នាំ2017 ខាងមុខនេះ។ ដូច្នេះសួរថា តើ iOS 11 ថ្មីនេះមានអ្វីខ្លះទៅដែលប្លែកពិសេសលើសពីជំនាន់មុន?

ប្រព័ន្ធប្រតិបត្តិការ iOS 11 បានកំណត់ស្តង់ដារថ្មីមួយ គឺអ្វីដែលប្រព័ន្ធប្រតិបត្តិការទូរស័ព្ទចល័តទំនើបបំផុតរបស់ពិភពលោកគួរតែមាន។ វាធ្វើឱ្យ iPhone ប្រសើរជាងមុន។ វាធ្វើឱ្យ iPad កាន់តែមានសមត្ថភាពជាងមុន។ ជាមួយiOS11នេះ iPhone និងiPad គឺជាឧបករណ៍ដែលមានឥទ្ធិពលបំផុត និងឆ្លាតវៃជាងគេ ដែលអ្នកប្រើមិនធ្លាប់មានពីមុន ហើយចំពោះ iOS ថ្មីនេះ វាមានចំណុចដែលប្លែក និងពិសេសមួយចំនួនដែលអ្នកគាំទ្រទាំងអស់គួរស្វែងយល់។

ប្រព័ន្ធដំណើរការល្អជាងមុន៖ វាជាអ្វីដែលអ្នកប្រើប្រាស់ត្រូវការបំផុត iOS 11 ត្រូវបាន Apple បង្កើតឡើងមានភាពស្រឡះល្អ រស់រវើក វៃឆ្លាត និងមានសមត្ថភាពកាន់តែខ្លាំង ការបើកប្រើប្រាស់កម្មវិធី និងល្បឿនការលេងហ្គេមកាន់តែល្អ។

ផ្ទៃប្រើប្រាស់ស្អាត និងស្រឡះល្អ៖ ចំពោះផ្ទៃប្រើប្រាស់នៅលើ iOS ទោះជាមិនសូវមានអ្វីប្លែកច្រើនមែន ប៉ុន្តែបើមើលឱ្យច្បាស់ វាមានភាពស្រឡះល្អ និងងាយស្រួលប្រើជាងមុន ហើយនៅលើ iPad វាបានបន្ថែមនូវ Dock ថ្មីដែលមានសណ្ឋាន និងរបៀបប្រើប្រាស់ដូចទៅនឹង macOS ដែរ។

Control Center៖ ម្ដងនេះ Apple បានដុសក្អែលស្អាតច្រើន ដោយបានបន្ថែមនូវផ្ទាំង Control Center ថ្មី រួមនឹងដាក់ចូលនូវមុខងារផ្លូវកាត់ចាំបាច់បំផុតសម្រាប់អ្នកប្រើ ដូចជាមុខងារចូលទៅបើកអ៊ីនធើណិត (3/4GLTE)ជាដើម។

App Store ថ្មី៖ ជំនាន់ថ្មីនេះ យើងទទួលបាន App Store ថ្មីសន្លាងដែលមានកម្មវិធីថ្មីៗជាច្រើនសម្រាប់ទាញយកទៅប្រើប្រាស់ ហើយ Apple បានកាត់ចោលនូវកម្មវិធី ឬហ្គេមទាំងឡាយណាដែលដំណើរការដោយប្រព័ន្ធ 32bit។ ចំណុចនេះ យើងនឹងមានតែកម្មវិធី និងហ្គេមល្អៗតែប៉ុណ្ណោះ។

មុខងារ និង Drag & Drop៖ សម្រាប់មុខងារប្រើសម្រាប់បែងចែកអេក្រង់ជា 2 ដែលវាមិនមែនជារឿងថ្មីទេសម្រាប់ស្មាតហ្វូន Android ប៉ុន្ដែវាថ្មី សម្រាប់ iOS នេះ ដោយយើងអាចទាញ រូបភាព អក្សរ និង File នានាពីកន្លែងមួយទៅមួយបានកាន់តែងាយ។ ប៉ុន្តែវាអាចប្រើបានតែលើ iPadប៉ុណ្ណោះ។

មុខងារទទួលដំណឹង Notification៖ Apple បានអនុញ្ញាតឱ្យឧបករណ៍របស់ខ្លួនមើលដំណឹងទូទៅបានទាំងអស់តែម្តង បើទោះជាដំណឹងមកច្រើនក៏ដោយ គ្រាន់តែអូសនៅលើ Lock Screen ប៉ុណ្ណោះ។

កាមេរ៉ាថ្មី៖ ក្រៅពីបន្ថែមសមត្ថភាពផ្នែក Hardware ក្រុមហ៊ុន Apple ក៏នៅពង្រីងបន្ថែមផ្នែក Software ផងដែរ។ ដោយ iOS 11 មានចំណុចល្អៗជាច្រើនជំនួសដល់ការថតរូប ដូចជា Live Photos មានបន្ថែមនូវមុខងារ Loop, Bounce, Long Exposure ហើយមុខងារថតរូប Portrait Mode មានបន្ថែម Menu ថ្មី ដែលអាចបើក Flash ពន្លឺ ឬ HDR នៅក្នុង Portrait mode និងមាន Effect បន្ថែមជាច្រើន និងពេលថតហើយយើងអាចកែកុនភាពព្រាល Portrait បាន។

Apple Music ថ្មី៖ Apple Music ថ្មីនេះ មានភាពស្រឡះ ងាយស្រួលស្វែងរកបទចម្រៀង មិនថាការស្វែករកតាម Album ឬ Playlist ឡើយ។

សារ Message ៖ សម្រាប់មុខងារនេះ Apple បានបន្ថែមនូវ Sticker, Emoji, Games ជាដើម ហើយថែមទាំងអាចបង្រួម Keyboard ឱ្យតូចទៅម្ខាងដើម្បីងាយស្រួលចុចដៃម្ខាងបានទៀតផង។

ARKit៖ ចំពោះចំណុចមួយចុងក្រោយនេះ វាជាបច្ចេកវិទ្យាថ្មី ដែលយើងអាចបង្កើតរូបភាពសិប្បនិម្មិត ជាមួយនឹងទិដ្ឋភាពពិតនៅខាងក្រៅបាន៕

September 13, 2017

ភាពខុសគ្នារវាងសណ្តែកបណ្តុះគីមី និងសណ្តែកបណ្តុះធម្មជាតិ

ភ្នំពេញ៖ ជារៀងរាល់ព្រឹកប្រជាពលរដ្ឋនៅរាជធានីភ្នំពេញ និងនៅតាមទីប្រជុំជនផ្សេងៗនៅទូទាំងប្រទេសកម្ពុជាតែងចូលទទួលទានអាហារនៅតាមអាហារដ្ឋាននានា ដូចជាបាយ គុយទាវ ឬបបរគ្រឿងជាដើម ដែលអាហារទាំងនោះភាគច្រើនគេដាក់សណ្តែកបណ្តុះស្រស់ដើម្បីបន្ថែមរសជាតិរបស់វា។

ដើម្បីឱ្យដឹងថា សណ្តែកបណ្តុះទាំងនោះជាសណ្តែកធម្មជាតិ ឬជាសណ្តែកដែលផ្ទុកសារធាតុគីមីនោះ អ្នកយកព័ត៌មានកាសែត ឡារ៉ែន បានជួបសម្ភាសជាមួយលោក ភុន រតនា អតីតនិស្សិត និងជាអ្នកឯកទេសដាំបន្លែធម្មជាតិនៅសាកលវិទ្យាល័យភូមិន្ទកសិកម្មចំការដូងដែលមានសំនួរ-ចម្លើយដូចខាងក្រោម៖

សំនួរ៖ ដើម្បីឱ្យប្រិយមិត្តអ្នកអានយើងលោកបានយល់ច្បាស់ ចូរប្អូនលើកឡើងត្រួសៗថា តើសណ្តែកបណ្តុះផ្ទុកសារធាតុគីមីនោះមានរូបរាង និងសណ្ឋានដូចម្តេចខ្លះ?

ចម្លើយ៖ ងាយស្រួលចំណាំទេបង លក្ខណៈសម្គាល់សណ្តែកបណ្តុះផ្ទុកសារធាតុគីមីនេះ យើងអាចមើលនឹងភ្នែកទទេបានដោយងាយ ទៅតាមលក្ខណៈសំខាន់ៗចំនួន3 ៖

ទី1.មានរាងថ្លោសធំៗ

ទី2.មានសម្បុរសក្បុស

និងទី3.មិនមានឫសដូចសណ្តែកធម្មជាតិនោះទេ ដោយសារគេដាក់ថ្នាំផ្តាច់ឫសឱ្យសណ្តែកនោះរីកថ្លោសបានល្អ។

សំនួរ៖ តើគេធ្វើដូចម្តេចបានជាសណ្តែកនោះមានសម្បុរស ថ្លោស ហើយគ្មានឬសដូច្នេះ? ហើយគេធ្វើបែបនេះដើម្បីប្រយោជន៍អ្វី?

ចម្លើយ៖ បាទបង គ្មានអ្វីជាជាងប្រយោជន៍ជាធំនោះទេ គេដាក់ថ្នាំគីមីច្រើនឱ្យសណ្តែកថ្លោសធំ និងសល្អ ហើយមានទម្ងន់ធ្ងន់លក់បានចំណេញច្រើន បើយើងជាអតិថិជនមិនបានដឹងប្រាកដជាទិញសណ្តែកសម្បុរស មិនយកសម្បុរមិនសូវ(ស)ល្អនោះទេ។ ការផ្តាច់ឫសនេះងាយស្រួលទេ គឺគ្រាន់តែអ្នកបណ្តុះយកអ័រម៉ូន(គីមី)មករោយលើសណ្តែកនោះ វានឹងផ្តាច់ឫសដោយឯកឯង រួចហើយដាក់ថ្នាំគីមីឱ្យសណ្តែកនោះឡើងសក្បុស ដើម្បីទាក់ទាញចំណាប់អារម្មណ៍អ្នកទិញ ឬអតិថិជនឱ្យលក់ឆាប់ដាច់។

សំនួរ៖ បើតាមប្អូនជាអ្នកជំនាញ តើការដាក់ថ្នាំនោះប៉ះពាល់សុខភាពឬទេ?

ចម្លើយ៖ ប្រាកដណាស់បង សារធាតុគីមីដែលដាក់ឱ្យសណ្តែកឡើងស ថ្លោស ឬផ្តាច់ឬសនេះ វាពិតជាប៉ះពាល់សុខភាពធ្ងន់ធ្ងរ ស្រដៀងទៅនឹងសារធាតុម្សៅបូរ៉ាក់ដែលគេដាក់លើចំណីអាហារដើម្បីឱ្យទុកបានយូរដូច្នោះដែរ ដែលវានឹងប៉ះពាល់សុខភាពទាំងរយៈពេលខ្លី និងវែង។ សម្រាប់រយៈពេលខ្លី វានឹងធ្វើឱ្យយើងរាករូស ក្អួតចង្អោរ ឈឺក្បាល វិលមុខជាដើម ចំណែកប៉ះពាល់រយៈពេលវែងវាបណ្តាលឱ្យរលាកក្រពះពោះវៀន កើតជំងឺបេះដូង ឈឺសន្លាក់រុំារ៉ៃជាដើម។ សារធាតុគីមីប្រភេទនេះនៅប្រទេសថៃ វៀតណាម ឬកូរ៉េ គេហាមមិនឱ្យប្រើប្រាស់ជាដាច់ខាត។

សំនួរ៖ ចុះសណ្តែកបណ្តុះតាមរបៀបធម្មជាតិគេសម្គាល់ដូចម្តេច ហើយមានវិធីសាស្ត្របណ្តុះបែបណាដែរ?

ចម្លើយ៖ វិធីសាស្ត្របណ្តុះងាយស្រួលទេ ដោយគ្រាន់តែយើងយកគ្រាប់សណ្តែកបាយដែលគ្មានផ្ទុកសារធាតុគីមី ហើយប្រើទឹកចម្រោះសុទ្ធល្អ ឬទឹកដែលមិនមានផ្ទុកសារធាតុគីមីមកដាក់បណ្តុះ នោះគេនឹងទទួលបានសណ្តែកបណ្តុះធម្មជាតិហើយ។ ចំណែកសណ្ឋានរបស់វាគេអាចសម្គាល់បានដោយឃើញមានឫស សម្បុរសរាងក្រម៉ៅ និងមិនសូវថ្លោសធំដូចសណ្តែកគីមីនោះទេ។ បើយើងបណ្តុះតាមរបៀបធម្មជាតិ គ្រាប់សណ្តែកបាយ1គីឡូក្រាម យើងនឹងទទួលបានសណ្តែកបណ្តុះ4-5គីឡូក្រាម ហើយបើសណ្តែកបណ្តុះតាមបែបគីមីវិញ គ្រាប់សណ្តែកបាយ1គីឡូក្រាម ទទួលបានសណ្តែកបណ្តុះដល់ទៅ9-10គីឡូឯណោះ។

សំនួរ៖ ជាចុងក្រោយតើប្អូនមានអ្វីផ្តាំផ្ញើទៅដល់ប្រជាពលរដ្ឋខ្មែរយើងដែរឬទេពាក់ព័ន្ធនឹងសណ្តែកបណ្តុះនេះ?

ចម្លើយ៖ បាទបង ជាធម្មតាសណ្តែកគីមីមានតម្លៃថោកជាងសណ្តែកធម្មជាតិ ប៉ុន្តែសណ្តែកគីមីនោះធ្ងន់ដោយសារតែសារធាតុទឹកច្រើន និងឡើងសដោយសារថ្នាំជួយឱ្យធំ តែវាប៉ះពាល់សុខភាព ចំណែកសណ្តែកធម្មជាតិមានតម្លៃថ្លៃបន្តិចមែន តែវាមានសារធាតុ Fibber និង Vitamin C ជួយដល់សុខភាពយើងបានច្រើន ដូច្នេះប្រជាពលរដ្ឋខ្មែរគួរទទួលទានបន្លែណា ដែលជួយដល់សុខភាពរបស់យើង មិនប៉ះពាល់សុខភាពនាំឱ្យខាតបង់ថវិកាថ្លៃព្យាបាលជំងឺ៕

September 13, 2017

Tottenham រំពឹងបញ្ចប់ភាពវេទនានៅ Wembley ពេលប៉ះ Dortmund រាត្រីនេះ

ក្រោយពីបានជួបការខកចិត្តជាបន្តបន្ទាប់នៅឯកីឡដ្ឋាន Wembley ក្រុម Tottenham Hotspur នឹងសម្លឹងរកការបញ្ចប់ភាពសំណាងអាក្រក់ផ្សេងៗដែលតាមពីក្រោយពួកគេនៅពេលធ្វើជាម្ចាស់ផ្ទះទទួលក្រុមជើងខ្លាំង Borussia Dortmund នៅរាត្រីនេះ នៅកីឡដ្ឋានជាតិរបស់អង់គ្លេសមួយនេះ។

វានឹងក្លាយជាការប្រជែងដណ្តើមពិន្ទុដ៏សំខាន់មួយ នៅពេលដែលក្រុម Spurs របស់លោក Mauricio Pochettino ចាប់ផ្តើមយុទ្ធនាការនៃក្របខ័ណ្ឌ Champions League របស់ពួកគេជាមួយនឹងក្រុមយក្សរបស់អាល្លឺម៉ង់មួយនេះ។

សម្រាប់ក្រុម Tottenham កីឡដ្ឋាន Wembley គឺជាកន្លែងដ៏គ្រោះថ្នាក់មួយដែលកំពុងតែរំខានដល់មហិច្ឆតារបស់ពួកគេក្នុងការប្រជែងដណ្តើមពានទាំងក្នុងស្រុក និងក្រៅស្រុក។ ក្រុមមាន់ខ្នាយមាស Tottenham បានបង្ខំចិត្តផ្លាស់ប្តូរទៅលេងនៅកីឡដ្ឋាន Wembley នៅពេលដែលកីឡដ្ឋាន White Hart Lane របស់ពួកគេកំពុងស្ថិតក្នុងការសាងសង់ជាថ្មី។

ប៉ុន្តែ បច្ចុប្បន្នក្រុម Spurs បានលេងការប្រកួតចំនួន12លើកមកហើយនៅកីឡដ្ឋាន Wembley ចាប់តាំងពីកីឡដ្ឋានចាស់របស់ខ្លួនត្រូវបានជួសជុល ដោយពួកគេដណ្តើមបានជ័យជម្នះត្រឹមតែ2លើកគត់ និងចាញ់ដល់ទៅ8លើក។ ភាពត្រដាបត្រដួសរបស់ក្រុម Tottenham នៅ Wembley បានកើតឡើងចំពេលដ៏សំខាន់កាលពីរដូវកាលមុនក្នុងក្របខ័ណ្ឌ Champions League ដោយនៅពេលនោះពួកគេដណ្តើមបានជ័យជម្នះតែ1លើកគត់ក្នុងការប្រកួតជម្រុះតាមពូល។

CSKA Moscow គឺជាក្រុមតែមួយដែលពួកគេបានផ្តួល ខណៈដែលការរងបរាជ័យពេលប្រកួតជាមួយនឹងក្រុម Monaco និង Bayer Leverkusen បានធ្វើឲ្យពួកគេធ្លាក់ចេញពីយុទ្ធនាការនោះតែម្តង។ លើសពីនេះទៅទៀត មានការខកចិត្តដ៏ធំបន្ថែមទៀតនៅ Wembley សម្រាប់ក្រុម Spurs នៅមុនពេលបញ្ចប់រដូវកាលមុន ខណៈដែលពួកគេបានចាញ់ក្រុម Chelsea ក្នុងការប្រកួតពាន FA Cup វគ្គពាក់កណ្តាលផ្តាច់ព្រ័ត្រ ក្នុងលទ្ធផល 4-2។ ប៉ុន្តែ Tottenham បានកម្តៅសាច់ដុំក្នុងការប្រកួតនេះ តាមរយៈការផ្តួលក្រុម Everton 3-០ ក្នុងក្របខ័ណ្ឌ Premier League កាលពីថ្ងៃសៅរ៍ ខណៈដែល Dortmund បានបញ្ចប់ក្នុងលទ្ធផលស្មើ ០-០ លើទឹកដីក្រុម SC Freiburg ក្នុងការប្រកួតក្របខ័ណ្ឌ Bundesliga។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

September 13, 2017

ជើងឯកអ៊ីតាលី Juventus ខកចិត្តពេលធ្វើជាភ្ញៀវរបស់ Barcelona

ក្រុមរងតំណែងជើងឯកពានរង្វាន់ UEFA Champions League រដូវកាលមុន Juventus បានទទួលនូវការខកចិត្តជាខ្លាំងនៅពេលធ្វើដំណើរទៅប្រកួតក្នុងទឹកដីក្រុមយក្សអេស្ប៉ាញ Barcelona ដោយលទ្ធផល 3-0 ក្នុងការប្រកួតសន្សំពិន្ទុក្នុងពូល D កាលពីរាត្រីថ្ងៃអង្គារកន្លងមក។

បន្ទាប់ពីទទួលបានជោគជ័យក្នុងការប្រកួតចំនួន3លើកជាប់ៗគ្នាក្នុងក្របខណ្ឌកំពូលអីតាលី Serie A រួចមក ក្រុមជើងខ្លាំង Juventus មិនអាចស្វែងរកគ្រាប់បាល់បញ្ចូលទីគូបដិបក្សរបស់ខ្លួនបន្តទៀតទេ ប៉ុន្តែបែរជាត្រូវគូប្រកួតទម្លុះសំណាញ់ទីរបស់ខ្លួនដល់ទៅ3 គ្រាប់ ។

ក្នុងការប្រកួតដែលធ្វើឡើងក្នុងទឹកដីរបស់ខ្លួន នាកីឡដ្ឋាន Camp Nou ខ្សែប្រយុទ្ធអន្តរជាតិអាហ្សង់ទីន Leonel Messi របស់ Barcelona រកគ្រាប់បាល់បញ្ចូលទីម្នាក់ឯងបានចំនួន2គ្រាប់ ដោយគ្រាប់ទី1 ក្នុងនាទី ទី45 និងគ្រាប់ទី2 ក្នុងនាទីទី69 ចំណែក1គ្រាប់ទៀតរកបានដោយខ្សែបម្រើអន្តរជាតិក្រូអាត Ivan Rakitić ក្នុងនាទីទី 56។ ជ័យជម្នះនេះអាចចាត់ទុកថា ជាការសងសឹកមួយផងដែររបស់ Barcelona ដែលធ្លាប់ត្រូវបាន Juventus ទម្លាក់ចេញពីការប្រកួតក្នុងក្របខណ្ឌនេះកាលពីឆ្នាំមុន ក្នុងវគ្គ8ក្រុមចុងក្រោយ ដោយលទ្ធផលសរុបទាំង2 ជើង 3-0។

ក្នុងការប្រកួតក្របខណ្ឌនេះផងដែរ ក្រុមជើងឯករបស់អង់គ្លេស Chelsea បានផ្តល់នូវមេរៀនដ៏ជូរចត់មួយសម្រាប់ក្រុមមកពីប្រទេសអាហ្សាបៃហ្សង់ Qarabag ដោយលទ្ធផល 6-0 ខណៈម្ចាស់ផ្ទះ Celtic ត្រូវក្រុមភ្ញៀវទៅលត់ដល់ផ្ទះ 0-5៕

លទ្ធផលការប្រកួត UEFA Champions League កាលពីរាត្រីថ្ងៃអង្គរ

AS Roma 0 0 Atl. Madrid
Bayern Munich 3-0 Anderlecht
Benfica1-2 CSKA Moscow
Manchester United 3-0 Basel
Olympiakos Piraeus 2-3 Sporting

September 13, 2017

ថៃសន្យាទិញទំនិញកសិផលពីកម្ពុជាឱ្យបានកាន់តែច្រើន

ភ្នំពេញ៖ ឯកអគ្គរាជទូតថៃប្រចាំព្រះរាជាណាចក្រកម្ពុជា ឯកឧត្តម ណាត់ថាវុធ ភោធិសារ៉ូ បានសន្យាជំរុញឱ្យពាណិជ្ជករថៃទិញទំនិញកសិផលពីកសិករខ្មែរឱ្យបានកាន់តែច្រើនឡើងៗ ដើម្បីជួយលើកកម្ពស់ជីវភាពកសិករខ្មែរ ពិសេសពលរដ្ឋរស់នៅតាមបន្ទាត់ព្រំដែនឱ្យមានជីវភាពកាន់តែប្រសើរឡើង។

ថ្លែងក្នុងសិក្ខាសាលា ស្តីពីការពង្រីកសក្តានុពលពាណិជ្ជកម្មតាមបន្ទាត់ព្រំដែនកាលពីម្សិលមិញនេះ ឯកឧត្តម ឯកអគ្គរដ្ឋទូតបានមានប្រសាសន៍បញ្ជាក់ថា វឌ្ឍនភាពដ៏ប្រសើរនៃទំនាក់ទំនងពាណិជ្ជកម្មរវាងថៃ និងកម្ពុជា ពិតជាមានសារៈសំខាន់នៃការធ្វើពិពិធកម្មទំហំពាណិជ្ជកម្មនៅតាមបន្ទាត់ព្រំដែន ដើម្បីលើកកម្ពស់ជីវភាពប្រជាជននៃប្រទេសទាំងពីរ និងការឈានទៅសម្រេចផែនការពង្រីកទំហំពាណិជ្ជកម្មទ្វេភាគីចំនួន14ពាន់លានដុល្លារនៅត្រឹមឆ្នាំ2020 ដែលប្រមុខរាជរដ្ឋាភិបាលនៃប្រទេសទាំងពីរបានដាក់ចេញកាលពីពេលថ្មីៗនេះ។ ឯកឧត្តមមានប្រសាសន៍ដូច្នេះថា «ជំហររបស់អាជ្ញាធរថៃ គឺការជួយសម្រួលការដឹកជញ្ជូនទំនិញរបស់ពាណិជ្ជករកម្ពុជាទៅកាន់ប្រទេសទីបី និងការគាំទ្ររបស់ពាណិជ្ជករថៃក្នុងការជួយទិញទំនិញកសិផលកាន់តែច្រើនពីកម្ពុជា»។

ជាមួយគ្នានេះ ឯកឧត្តម កឹម ស៊ីថន រដ្ឋលេខាធិការក្រសួងពាណិជ្ជកម្មមានប្រសាសន៍ថាកំណើនសេដ្ឋកិច្ចដ៏រឹងមាំរបស់កម្ពុជាដែលសម្រេចបានជាមធ្យម7%រៀងរាល់ឆ្នាំ ក្នុងរយៈពេលជាងពីរទសវត្សរ៍ និងការប្តេជ្ញាចិត្តរបស់រាជរដ្ឋាភិបាល ក្នុងការធ្វើពិពិធកម្មវិស័យកម្មន្តសាលធុនស្រាល ដើម្បីបន្តធ្វើសមាហរណកម្មទៅក្នុងបណ្តាញផលិតកម្មកម្រិតតំបន់ និងសកល។ ឯកឧត្តមរដ្ឋលេខាធិការក៏បានលើកយកគោលដៅអាទិភាពសំខាន់ៗនៃ «គោលនយោបាយអភិវឌ្ឍន៍វិស័យឧស្សាហកម្ម ឆ្នាំ2014-1024» ដែលជា «យុទ្ធសាស្ត្រកំណើនថ្មី» ឬជាផែនទីបង្ហាញផ្លូវសម្រាប់ការអភិវឌ្ឍចង្វាក់តម្លៃផលិតកម្មសហគ្រាសធុនតូច និងមធ្យមនៅកម្ពុជា។

ក្នុងនាមក្រសួងពាណិជ្ជកម្មកម្ពុជា ឯកឧត្តមបានសន្យាជួយសម្រួលធុរជនថៃ តាមរយៈការផ្តល់ជូននូវភាពអនុគ្រោះជាមួយលក្ខខណ្ឌវិនិយោគពិសេសៗ ព្រមទាំងគោលនយោបាយលើកទឹកចិត្តល្អៗ ដើម្បីរួមចំណែកដល់ការពង្រីកទំហំពាណិជ្ជកម្ម និងវិនិយោគនៅតាមព្រំដែនកម្ពុជា-ថៃ សំដៅរក្សាតុល្យភាពជញ្ជីងពាណិជ្ជកម្ម និងធានាសេ្ថរភាពម៉ាក្រូសេដ្ឋកិច្ចប្រទេសទាំងពីរ។

យោងតាមទិន្នន័យរបស់មជ្ឈមណ្ឌលពាណិជ្ជកម្មអន្តរជាតិ ទំហំពាណិជ្ជកម្មសរុបរវាងកម្ពុជា និងថៃក្នុងឆ្នាំ2014 មានចំនួន4,418លានដុល្លារអាមេរិក និងឆ្នាំ2016 មានចំនួន4,441លានដុល្លារអាមេរិក ពោលគឺបានកើនឡើង 0,6%។ ជាមួយគ្នានេះ ការនាំចេញរបស់កម្ពុជាទៅកាន់ប្រទេសថៃ ក្នុងឆ្នាំ2014 មានចំនួន 638លានដុល្លារអាមេរិក និងឆ្នាំ2016 មានចំនួន 944លានដុល្លារអាមេរិក ពោលគឺបានកើនឡើង 47,96% រីឯការនាំចូលរបស់កម្ពុជាពីប្រទេសថៃ ក្នុងឆ្នាំ2014 មានចំនួន 4,880លានដុល្លារអាមេរិក និងឆ្នាំ2016 មានចំនួន 4,607លានដុល្លារអាមេរិក ពោលគឺបានថយចុះ 4,49%៕

September 13, 2017

Chelsea លត់ Qarabag ចាស់ដៃ ខណៈ Barcelona ផ្តួល Juventus

ក្រុមតោខៀវ Chelsea បានចាប់ផ្តើមយ៉ាងល្អឥតខ្ចោះចំពោះយុទ្ធនាការប្រជែងដណ្តើមពាន Champions League របស់ពួកគេ ខណៈដែលការស៊ុតបាល់បញ្ចូលទីយ៉ាងល្អពីសំណាក់ខ្សែបម្រើ Pedro និង Davide Zappacosta បានជួយឲ្យពួកគេលត់ក្រុម Qarabag យ៉ាងចាស់ដៃក្នុងលទ្ធផល 6-0 កាលពីថ្ងៃអង្គារ។

ក្រុមរបស់លោក Antonio Conte បានបង្ហាញពីទម្រង់លេងយ៉ាងល្អនៅពេលប្រកួតជាមួយនឹងក្រុមម្ចាស់ជើងឯករបស់អាស៊ែរបៃហ្សង់ ខណៈដែលការស៊ុតបាល់ពីចម្ងាយចូលទីយ៉ាងល្អរបស់ Pedro បានជួយឲ្យក្រុម Chelsea រកបានគ្រាប់បាល់នាំមុខមុននៅកីឡដ្ឋាន Stamford Bridge។

Zappacosta បានធ្វើការអបអរការបង្ហាញខ្លួនលើទឹកដីខ្លួនឯងជាលើកទី1របស់គេ ក្រោយពីបានផ្ទេរពីក្លិប Torino តាមរយៈការស៊ុតបាល់ពីចម្ងាយចូលទីយ៉ាងល្អដើម្បីរកគ្រាប់បាល់បញ្ចូលទីលើកទី1របស់គេ។ Chelsea បានបន្តធ្វើការគ្រប់គ្រងលើគូប្រកួតរបស់ខ្លួនទាំងស្រុង ខណៈដែលពួកគេបានស៊ុតបាល់បញ្ចូលទី4 គ្រាប់បន្តបន្ទាប់គ្នាទៀត ដើម្បីបំពេញការទទួលជ័យជម្នះដ៏រីករាយតែម្តង។ ស្របពេលជាមួយគ្នានេះ ខ្សែប្រយុទ្ធ Lionel Messi បានស៊ុតបាល់បញ្ចូលទី2គ្រាប់ក្នុងពេលក្រុម Barcelona ដណ្តើមបានជ័យជម្នះយ៉ាងកក់ក្តៅក្នុងលទ្ធផល 3-០ លើក្រុមសេះបង្កង់ Juventus ដើម្បីចាប់ផ្តើមយុទ្ធនាការនៃក្របខ័ណ្ឌ Champions League របស់ពួកគេទាំងភាពជឿជាក់។

ក្រោយពីជួបបញ្ហាផ្ទៃក្នុងនៅរដូវក្តៅនេះ ការជួបប្រកួតជាមួយនឹងក្រុមម្ចាស់ជើងឯករងកាលពីឆ្នាំមុននៅលើទឹកដីខ្លួនឯង ប្រហែលវាមិនមែនជាការប្រកួតដែលក្រុម Barcelona ចង់បានឡើយ ប៉ុន្តែ Messi បានលេងយ៉ាងល្អឥតខ្ចោះដើម្បីជួយឲ្យ Barca ទទួលបាន3ពិន្ទុពេញ៕

ប្រភពពី៖ Sport24

September 13, 2017

អាមេរិកជួយទិញសម្ភារប្រើប្រាស់តម្លៃ 100លានដុល្លារពីកម្ពុជា

ភ្នំពេញៈ សហរដ្ឋអាមេរិកបានជួយទិញទំនិញប្រើប្រាស់សម្រាប់ធ្វើដំណើរតម្លៃ100លានដុល្លារនៅកម្ពុជាដែលវិស័យនេះបានផ្តល់ការងារដល់ប្រជាពលរដ្ឋប្រមាណ 10ម៉ឺននាក់។

ឯកអគ្គរដ្ឋទូតសហរដ្ឋអាមេរិកប្រចាំកម្ពុជាលោក វីល្លៀម ហេដស៍ បានថ្លែងក្នុងកិច្ចប្រជុំតុមូលជាមួយនឹងអ្នកសារព័ត៌មានជាតិ និងអន្តរជាតិនារសៀលថ្ងៃទី12 កញ្ញាម្សិលមិញថា កាលពីឆ្នាំមុនយើងបានបង្កើតឧស្សាហកម្មថ្មីសន្លាងមួយសម្រាប់កម្ពុជាដែលមានទឹកប្រាក់ 100លានដុល្លារសហរដ្ឋអាមេរិក ហើយវិស័យនេះបានផ្តល់ការងារដល់ប្រជាពលរដ្ឋកម្ពុជាប្រមាណជា10ម៉ឺននាក់។

លោកបន្តថា “យើងជាអ្នកគាំទ្រដ៏ខ្លាំងក្លាមួយចំពោះការអភិវឌ្ឍសេដ្ឋកិច្ចរបស់ប្រទេសកម្ពុជា យើងបានជួយកម្ពុជាក្នុងក្របខ័ណ្ឌការងារមួយដែលបានទាក់ទាញក្រុមហ៊ុនសម្លៀកបំពាក់ល្បីៗនៅក្នុងពិភពលោក រួមទាំងក្រុមហ៊ុនអាមេរិករាប់សិបទៀតផងដែរ។

លោកឯកអគ្គរដ្ឋទូតបានបន្តថា នៅឆ្នាំនេះយើងបានសម្ពោធកម្មវិធីកសិកម្មថ្មីមួយដែលបានគិតគូរចំពោះតម្លៃកសិផលទាបខ្លាំងដែលប៉ះពាល់ដល់កសិករកម្ពុជា យើងក៏បានជួយកម្ពុជាក្នុងការដោះស្រាយបញ្ហានៃផលិតភាពកសិកម្មទាប និងអសន្តិសុខស្បៀងរយៈពេលជាង20ឆ្នាំមកហើយ។

ជំនួបជាមួយអ្នកសារព័ត៌មានរបស់ឯកអគ្គរដ្ឋទូតសហរដ្ឋអាមេរិកនេះជាផ្នែកមួយនៃការបង្ហាញជំហររបស់សហរដ្ឋអាមេរិកសម្រាប់រដ្ឋាភិបាលកម្ពុជាដែលឯកអគ្គរដ្ឋទូតអាមេរិកបានលើកឡើងថា សហរដ្ឋអាមេរិកមិនបានលូកដៃចូលកិច្ចការផ្ទៃក្នុងកម្ពុជាទេ ប៉ុន្តែកម្ពុជាបានទាញសហរដ្ឋអាមេរិកឲ្យចូលរួមពាក់ព័ន្ធ ហើយរដ្ឋាភិបាល និងប្រជាជនអាមេរិកមានការឈឺចាប់ពេលដែលកម្ពុជាប្រកាសថា អាមេរិកជាប់ពាក់ព័ន្ធនឹងការកកូរកកាយកម្ពុជាដែលតាមការពិតសហរដ្ឋអាមេរិកមិនបានពាក់ព័ន្ធសោះឡើយ។

លោក វីល្លៀម ហេដស៍ បានថ្លែងថា “ជាការពិត អាមេរិកមិនមែនជាប្រទេសស្មុគស្មាញ និងពិបាកធ្វើការជាមួយទេ តែសូមធ្វើមកលើយើងដោយយុត្តិធម៌ និយាយជាមួយយើងដោយស្មោះត្រង់ ធ្វើកិច្ចសហប្រតិបត្តិការគ្នាតាមដែលអាចធ្វើទៅបាន ប្រើប្រាស់អំណាចទីផ្សាររបស់យើងដើម្បីជាប្រយោជន៍របស់អ្នក ស្វាគមន៍កម្មវិធីជំនួយ និងក្រុមហ៊ុនរបស់យើង”៕

September 13, 2017

កក្រើក ជាមួយព្រឹត្តិការណ៍បង្ហាញម៉ូដពីសំណាក់តារាថៃ និងតារាខ្មែរកណ្តាលផ្សារទំនើប អ៊ីអន

ជាមួយនឹងវត្តមានថ្មីនៃក្រុមហ៊ុនជាច្រើនមកពីប្រទេសថៃ ក្នុងគោលបំណងចាប់ដៃសហការយ៉ាងជិតស្និទ្ធជាមួយពាណិជ្ជករកម្ពុជាលើគ្រប់វិស័យនោះ កាលពីល្ងាចថ្ងៃទី12 ខែកញ្ញា ឆ្នាំ2017 ម្សិលមិញនេះ មហាជនជាច្រើននាក់បានសម្ដែងនូវភាពភ្ញាក់ផ្អើលយ៉ាងខ្លាំងខណៈដែលបានឃើញវេទិការនៃការព្រឹត្តិការណ៍ Thailand Fashion & Lifestyle 2017 បង្ហាញម៉ូដសម្លៀកបំពាក់យ៉ាងស្រស់ស្អាតនៅចំកណ្តាលផ្សារទំនើប AEON ក្រោមវត្តមានរបស់កំពូលតារាបង្ហាញម៉ូដជនជាតិថៃ និងជនជាតិខ្មែរជាច្រើននាក់ឡើងបង្ហាញរូបសម្រស់ជាមួយការគ្រងម៉ូដសម្លៀកបំពាក់បែបទាន់សម័យគួរជាទីទាក់ទាញបំផុត។

នៅក្នុងព្រឹត្តិការណ៍ជាមួយគ្នានេះ ក្រៅពីមានការបង្ហាញម៉ូដសម្លៀកបំពាក់ដ៏ស្រស់ស្អាតជាច្រើនឈុតសម្រាប់សុភាពនារី ក៏មានការបង្ហាញម៉ូដឈុតសម្លៀករបស់កុមារផងដែរ ដែលរាល់ម៉ូដសម្លៀកបំពាក់ទាំងនោះសុទ្ធតែបានកែច្នៃដោយអ្នកជំនាញល្បីៗជាជនជាតិថៃ។

ថ្លែងនៅក្នុងកម្មវិធីនេះ លោក ជីរ៉ាវុធ សុវណ្ណាអាត អគ្គទីប្រឹក្សាពាណិជ្ជកម្មប្រចាំស្ថានឯកអគ្គរាជទូតថៃនៅកម្ពុជា បានលើកឡើងថា តាមរយៈព្រឹត្តិការណ៍ Thailand Fashion & Lifestyle 2017 នេះ បានបង្ហាញឱ្យឃើញពីភាពជោគជ័យនៃកិច្ចសហការពាណិជ្ជកម្មទ្វេភាគីរវាង កម្ពុជា-ថៃ ក្រោមរូបភាពនាំចូលទំនិញគ្រប់ប្រភេទមកផ្គត់ផ្គង់តាមតម្រូវការរបស់ប្រទេសមួយនេះ ។

លោក ជីរ៉ាវុធ សុវណ្ណាអាត បានសង្កត់ធ្ងន់ទៀតថា ប្រទេសកម្ពុជា គឺជាដៃគូពាណិជ្ជកម្មយ៉ាងសំខាន់បំផុតរបស់ប្រទេសថៃ ដែលកាលពីឆ្នាំ2016កន្លងទៅនោះ ទំហំពាណិជ្ជកម្មនៃប្រទេសទាំងពីរមានទឹកប្រាក់រហូតដល់ 5,609 លានដុល្លារសហរដ្ឋអាមេរិក ហើយនៅឆ្នាំ 2017នេះ ក៏នៅតែមានការកើនឡើងគួរជាទីមោទនបំផុត ។

នៅក្នុងឱកាសជាមួយគ្នានេះ លោក ជីរ៉ាវុធ សុវណ្ណាអាត ក៏បានប្តេជ្ញាថា ក្នុងនាមជាអគ្គទីប្រឹក្សាពាណិជ្ជកម្មប្រចាំស្ថានឯកអគ្គរាជទូតថៃនៅកម្ពុជា លោកនឹងព្យាយាមខិតខំជំរុញវិស័យពាណិជ្ជកម្មទ្វេភាគីរវាងកម្ពុជា-ថៃ ឱ្យកាន់តែមានភាពរីកចម្រើនបន្ថែមទៀត ៕

September 13, 2017

អគ្គនាយកដ្ឋានពន្ធដារនឹងរៀបចំការបង់ពន្ធអចលនទ្រព្យ ឱ្យដូចពន្ធមធ្យោបាយធ្វើដំណើរ

ភ្នំពេញ – បច្ចុប្បន្នមានម្ចាស់អចលនទ្រព្យមួយចំនួនហាក់ពុំទាន់យល់ដឹងពីការបំពេញព័ត៌មានឱ្យបានត្រឹមត្រូវ និងគ្រប់គ្រាន់លើអចលនទ្រព្យរបស់ខ្លួនដែលត្រូវបង់ពន្ធនៅឡើយទេ ដែលធ្វើឱ្យការធ្វើបច្ចុប្បន្នភាពនៃអចលនទ្រព្យពុំទទួលបានព័ត៌មានគ្រប់ជ្រុងជ្រោយ។

ឯកឧត្ដម គង់ វិបុល ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានពន្ធដារ បានលើកឡើងថា នៅពេលបង់ពន្ធ ព័ត៌មានអចលនទ្រព្យខ្លះត្រូវបានប្រែប្រួល ជួនកាលដីមួយដុំកាត់ទៅជា10ដុំ ឬដីច្រើនដុំបង្រួមចូលគ្នាធ្វើជាបុរីក៏មាន ដើម្បីបញ្ចៀសពីការបង់ពន្ធទៅតាមតែទិន្នន័យចាស់ ដូច្នេះយើងត្រូវធ្វើបច្ចុប្បន្នភាពលើអចលនទ្រព្យនោះ។

ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានពន្ធដារបញ្ជាក់ថា៖ «ប្រជាពលរដ្ឋមួយចំនួនគាត់អត់ទាន់យល់ពីការធ្វើបច្ចុប្បន្នភាពលើអចលនទ្រព្យរបស់ខ្លួនទេ ក្នុងករណីមានព័ត៌មានប្រែប្រួលលើអចលនទ្រព្យ ពួកគាត់ត្រូវតែមកធ្វើបច្ចុប្បន្នភាពនោះ។ ឥឡូវខ្ញុំកំពុងតែចាត់ចែងរៀបចំឱ្យមន្ដ្រីជាប់កិច្ចសន្យាចំនួន 100 នាក់ដើម្បីចុះទៅដល់គេហដ្ឋាន ឬទីតាំងអចលនទ្រព្យនោះដើម្បីបំពេញ ឬធ្វើបច្ចុប្បន្នភាពជូនពួកគាត់តែម្ដងដើម្បីកុំឱ្យពួកគាត់មានការលំបាក»។

ឯកឧត្ដម គង់ វិបុល បន្ដទៀតថា ការចុះធ្វើសម្រង់ទិន្នន័យបច្ចុប្បន្នភាពអចលនទ្រព្យជូនប្រជាពលរដ្ឋយកមកបញ្ចូលក្នុងព័ត៌មានដេតាបេសរបស់អគ្គនាយកដ្ឋានពន្ធដារ គឺដើម្បីធ្វើឱ្យពួកគាត់មានភាពងាយស្រួល ដូចទៅនឹងអ្វីដែលអគ្គនាយកដ្ឋានពន្ធដារធ្លាប់បានធ្វើទៅលើការប្រមូលពន្ធលើមធ្យោបាយធ្វើដំណើររួចមកហើយដូច្នោះដែរ។

បច្ចុប្បន្នមានអ្នកបង់ពន្ធលើមធ្យោបាយធ្វើដំណើរដោយប្រើកាតក្នុងរង្វង់ 90%ហើយ។ ឯកឧត្ដមបន្ថែមថា៖ «ជាទិសដៅ អគ្គនាយកដ្ឋានពន្ធដារចង់ធ្វើឱ្យការប្រមូលពន្ធលើអចលនទ្រព្យមានដំណើរការដូចគ្នានឹងការប្រមូលពន្ធលើពន្ធមធ្យោបាយធ្វើដំណើរដែរ»។

ទោះជាយ៉ាងណាដំណើរការនេះក៏ត្រូវការមានកិច្ចសហការរវាងមន្ដ្រីជាមួយនឹងម្ចាស់អចលនទ្រព្យផងដែរ ដើម្បីបញ្ចៀសកុំឱ្យម្ចាស់អចលនទ្រព្យជូបការលំបាកក្នុងការរកប័ណ្ណកម្មសិទ្ធិ ឬឯកសារពាក់ព័ន្ធនានារបស់ពួកគាត់យកមកបង់ពន្ធរាល់ឆ្នាំ។ ពលរដ្ឋគ្រាន់តែបំពេញព័ត៌មានទាំងនោះតែមួយដងគត់នៅក្នុងកាតមួយ លុះនៅពេលមកបង់ពន្ធលើអចលនទ្រព្យរបស់ខ្លួន គាត់គ្រាន់តែយកកាតនោះមកស្គែនបារកូដ ទិន្នន័យទាំងអស់នឹងចេញនៅក្នុងប្រព័ន្ធរបស់អគ្គនាយកដ្ឋានពន្ធដារហើយ ដែលវានឹងជួយសម្រួលដល់ការបង់ពន្ធយ៉ាងងាយស្រួល៕

September 12, 2017

ខ្សែភាពយន្តរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» ផ្តើមចាក់បញ្ចាំងនៅតាមរោងកុនទូទាំងប្រទេសកម្ពុជា

ខ្សែភាពយន្តរឿង «មុនដំបូងខ្មែរក្រហមសម្លាប់ប៉ារបស់ខ្ញុំ (First They Killed My Father)» ជាភាសាខ្មែរដែលបានផលិតឡើងដោយក្រុមហ៊ុន Netflix ផ្តើមចាក់បញ្ចាំងនៅតាមរោងភាពយន្តក្នុងប្រទេសកម្ពុជា នៅថ្ងៃទី 08 ខែកញ្ញា ឆ្នាំ2017 ក្រោមការនាំចូលផ្តាច់មុខដោយក្រុមហ៊ុន Westec Media Limited ហើយនឹងចាក់បញ្ចាំងនៅទូទាំងពិភពលោកដោយក្រុមហ៊ុន Netflix ត្រឹមថ្ងៃទី 15 ខែកញ្ញាខាងមុខនេះ ។

ក្រោមការដឹកនាំដោយ លោកស្រី Angelina Jolie ខ្សែភាពយន្តរឿង «មុនដំបូង ខ្មែរក្រហមសម្លាប់ប៉ារបស់ខ្ញុំ» គឺជាខ្សែភាពយន្តប្រែសម្រួលចេញពីការចងចាំដ៏ឈឺចាប់របស់អ្នកស្រី អ៊ឹង លួង ដែលជាអ្នកនិពន្ធសៀវភៅ និងសកម្មជនការពារសិទ្ធិមនុស្ស ដែលបានរួចផុតជីវិតពីរបបខ្មែរក្រហមដ៏សាហាវយង់ឃ្នងក្នុងអំឡុងពីឆ្នាំ 1975 ដល់ឆ្នាំ1979 ។

នៅក្នុងសាច់រឿងត្រូវបានរៀបរាប់តាមការមើលឃើញរបស់អ្នកស្រីតាំងពី អាយុ5ឆ្នាំ នៅពេលដែលខ្មែរក្រហមឡើងកាន់អំណាច រហូតដល់គាត់អាយុ9ឆ្នាំ។ ខ្សែភាពយន្តនេះបានឆ្លុះបញ្ចាំងអំពីស្មារតីយ៉ាងមោះមុត និងការតស៊ូយ៉ាងប្តូរផ្តាច់របស់គ្រួសារអ្នកស្រី ដើម្បីបានរស់នៅជាមួយគ្នាយ៉ាងវេទនាអំឡុងសម័យខ្មែរក្រហម។ ជាមួយគ្នានេះ ខ្សែភាពយន្តខ្នាតធំមួយនេះក៏ធ្វើឡើងដើម្បីជាការឧទ្ទិសដល់អ្នកដែលបានស្លាប់ និងអ្នកដែលបានរួចផុតពីការស្លាប់ក្រោមរបបខ្មែរក្រហមផងដែរ។ វាបានផ្តោតសំខាន់លើសេចក្ដីស្រឡាញ់ និងការលះបង់របស់ក្រុមគ្រួសារខ្មែរ និងឆ្លុះបញ្ចាំងពីភាពស្រស់ស្អាត ដួងវិញ្ញាណ និងស្មារតីរឹងមាំរបស់ប្រជាជនខ្មែរ និងវប្បធម៌ខ្មែរ។

ខ្សែភាពយន្តរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» ធ្លាប់បានចាក់បញ្ចាំងជាផ្លូវការកាលពីថ្ងៃទី 18 ខែកម្ភៈ កន្លងទៅ នៅលានជល់ដំរីនៃបរិវេណប្រាសាទអង្គរវត្តនៅក្នុងខេត្តសៀមរាប ក្រោមវត្តមានព្រះរាជធិបតីភាពដ៏ខ្ពង់ខ្ពស់បំផុតនៃព្រះករុណា ព្រះបាទសម្តេចព្រះនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនីនាថ សីហនុ ហើយនឹងមានការអញ្ជើញចូលរួមពីមន្ត្រី និងឥស្សរជនសំខាន់ៗ ដោយផ្តល់អាទិភាពដល់អ្នករស់រានមានជីវិតពីរបបខ្មែរក្រហម ក៏ដូចជាអ្នកជំនាញផ្នែកប្រវត្តិសាស្ត្រ និងអង្គការអប់រំប្រវត្តិសាស្ត្រនៅក្នុងតំបន់ផងដែរ ។ ខ្សែភាពយន្តនេះត្រូវបានថតក្នុងប្រទេសកម្ពុជាចាប់ពីខែវិច្ឆិកា ឆ្នាំ 2015 រហូតដល់ខែកុម្ភៈ ឆ្នាំ 2016 ដែលនិយាយជាភាសាខ្មែរទាំងស្រុង ហើយជាខ្សែភាពយន្តខ្នាតធំជាងគេដែលមិនធ្លាប់បានផលិតឡើងក្នុងប្រទេសមួយនេះ។ អ្នកបច្ចេកទេស សិប្បករ និងអ្នកជំនាញផ្នែកសិល្បៈជនជាតិខ្មែរ បានចូលរួមយ៉ាងច្រើនបំផុតក្នុងក្រុមការងារថតខ្សែភាពយន្តនេះ រួមជាមួយតួអង្គសម្តែងផ្សេងៗទៀតសរុបប្រមាណជាង 3500 នាក់។

ជាមួយគ្នានេះ កុមារី ស្រីម៉ុច សារឿម ដែលបានដើរជាតួអង្គសំខាន់របស់អ្នកស្រី អ៊ឹង លួង ដែលមានអាយុពី 5-9 ឆ្នាំ ហើយនឹងលាតត្រដាងពីទិដ្ឋភាពនៃរឿងនេះ ស្ថិតនៅក្នុងសាលារៀនអង្គការមនុស្សធម៌មួយក្នុងតំបន់។ តួអង្គឪពុកម្តាយរបស់អ្នកស្រី អ៊ឹង លួង ត្រូវបានសម្តែងដោយលោក ភឿង កុម្ភៈ និងអ្នកនាង ស្វែង សុជាតា។ បងប្អូនរបស់អ្នកស្រី អ៊ឹង លួង ត្រូវបានសម្តែងដោយនីតា និងនីកាសារុន (ហៅហ្គិច), រុន ចិន្តា (ហៅជូ) , មុន គឹមហាក់ (ហៅ គឹម) , អូន ស្រីនាង (ហៅ គាវ) , ឃួន សុធា (ហៅគួយ) និង ហេង តារា (ហៅម៉េង) ។

គួរបញ្ជាក់ផងដែរថា ខ្សែភាពយន្តរឿង «មុនដំបូង ខ្មែរក្រហមសម្លាប់ប៉ារបស់ខ្ញុំ» គឺជាខ្សែភាពយន្តដើមរបស់ក្រុមហ៊ុន Netflix Inc ដែលផលិតដោយអ្នកស្រី អែនជឺលីណា ជោលី, លោក ប៉ាន់រិទ្ធី ជាអ្នកដឹកនាំរឿង និងជាផលិតករខ្សែភាពយន្តខ្មែរដ៏ល្បីល្បាញ ដែលធ្លាប់បានដឹកនាំរឿង «ការបាត់បង់រូបភាព» ជាភាសាអង់គ្លេសហៅថា «the missing picture» បានជាប់ឈ្មោះជាបេក្ខជនក្នុងការប្រកួតប្រជែងវគ្គផ្តាច់ព្រ័ត្រដណ្តើមពានរង្វាន់អូស្កា និងលោក Michael Vieira ផលិតករខ្សែភាពយន្តល្បីល្បាញនៃរឿង (By the Sea) ។ លោក Xavier Box (រឿងUmrika) និងអ្នកស្រី Patricia Rommel (រឿង The Lives of Others) គឺជាអ្នកកាត់តនៃខ្សែភាពយន្តនេះ។

លោកអ្នកអាចកក់សំបុត្រដោយផ្ទាល់ ឬតាមរយៈអនឡាញ តាមម៉ោងបញ្ចាំងភាពយន្តនេះ ដែលអ្នកអាចជ្រើសរើសនៅលើគេហទំព័រដូចខាងក្រោម ៖

https://cinema.org.kh
https://legend.com.kh
https://www.majorcineplex.com.kh/cinema/
https://primecineplex.com
https://barayandetcinema.com/

September 12, 2017

Author: វល័ក្ខ