វល័ក្ខ - La Reine Media

iPhone X ក្លាយជាស្មាតហ្វូនដែលថ្លៃបំផុតក្នុងប្រវត្តិសាស្ដ្រ Apple

ចាប់តាំងពីថ្ងៃកកើតទូរស័ព្ទ iPhone កាលពីឆ្នាំ 2007 រហូតដល់ឆ្នាំ 2017 នេះ ទូរស័ព្ទ iPhone X បានក្លាយជាស្មាតហ្វូនដំបូងគេក្នុងប្រវត្តិសាស្ដ្ររបស់ Apple ដែលមានតម្លៃថ្លៃជាងគេ ទោះបីជា iPhone 8 និង 8 Plus ដែលកើតក្នុងថ្ងៃតែមួយដូចគ្នាក៏ថ្លៃមិនស្មើដែរ។

Apple បានដាក់ចេញនូវទូរស័ព្ទ iPhone X អំឡុងពេលព្រឹត្តិការណ៍កាលពីថ្ងៃទី12 ខែកញ្ញា នៅកន្លែងចាស់ដែលលោក Steve Jobs ធ្លាប់បានឡើងបង្ហាញទូរស័ព្ទ iPhone ជំនាន់ដំបូងគេ។ iPhone ជំនាន់ក្រោយរបស់Apple មានភ្ជាប់មកជាមួយនូវប្រព័ន្ធដំណើរការដែលមានភាពទាន់សម័យ និងមានអេក្រង់ធំទូលាយជាងមុន មានបច្ចេកវិទ្យាសាកថ្មឥតខ្សែ និងមុខងារដោះសោទូរស័ព្ទតាមបច្ចេកវិទ្យា Face ID។

តម្លៃរបស់វាគឺ 999ដុល្លារ ហើយធ្វើឱ្យវាក្លាយជាទូរស័ព្ទ iPhone ថ្លៃជាងគេបំផុតរបស់Apple បើប្រៀបធៀបនឹងទូរស័ព្ទ iPhone 8 និង iPhone 8 Plus ដែលចេញក្នុងពេលជាមួយគ្នាដែលមានតម្លៃចាប់ពីត្រឹមតែ 699 ដុល្លារប៉ុណ្ណោះ៕

September 14, 2017

ឃើញរបាយការណ៍នេះហើយ ស្ដ្រីកម្ពុជាគួរតែផ្លាស់ប្ដូរឥរិយាបថនៃការថែរក្សាសុខភាព

ភ្នំពេញ – យោងតាមរបាយការរណ៍បញ្ជាក់ពីអង្គការសុខភាពពិភពលោក (WHO) ស្ដ្រីកម្ពុជាត្រូវបានគេរកឃើញថា មានជំងឺមហារីកមាត់ស្បូនប្រមាណ 60% ជាអត្រាខ្ពស់ជាងគេបើប្រៀបធៀបទៅនិងស្ដ្រីក្នុងបណ្ដាប្រទេសទាំងអស់នៅក្នុងតំបន់អាស៊ាន ជាពិសេស គឺមានស្ដ្រីប្រមាណ60%ហើយដែលបានស្លាប់ដោយសារជំងឺនេះ។

លោកជំទាវ ញ៉េប សុភាព ប្រធាននាយកដ្ឋានសុខមាលភាពស្រី្ដ និងកុមារនៃក្រសួងសង្គមកិច្ចបានលើកឡើងថា ផលប៉ះពាល់នេះកើតឡើងបណ្ដាលមកពីស្ដ្រីនៅកម្ពុជាខ្វះការការពារ និងអនាម័យ ក្រៅពីនេះប្រទេសកម្ពុជានៅមានការប្រកាន់ខ្ជាប់នូវប្រពៃណី ដែលធ្វើឱ្យស្ដ្រីមានការខ្មាសអៀនច្រើនពុំសូវហ៊ាននិយាយដោយបើកចំហអំពីបញ្ហានេះ ម្យ៉ាងពុំទាន់មានការផ្សព្វផ្សាយឱ្យបានទូលំទូលាយទៅដល់ស្ត្រីជាមាតានៅឡើយ។

មន្ដ្រីអង្គការសុខភាពពិភពលោកបានបញ្ជាក់ថា ជំងឺមហារីកមាត់ស្បូនមិនមែនជាជំងឺតំណពូជទេ ពិសេសជំងឺនេះអាចការពារបានស្ទើរតែ100%តាមរយៈការការពារដោយចាក់ថ្នាំវ៉ាក់សាំង ដូច្នេះស្ដ្រីកម្ពុជាទាំងអស់គួរតែទៅពិនិត្យសុខភាពឱ្យបានទៀងទាត់ដើម្បីដឹងពីស្ថានភាពនៃសុខភាពរបស់ខ្លួន។ ជំងឺនេះច្រើនតែកើតឡើងលើស្ដ្រីដែលមានដៃគូរួមភេទច្រើន និងស្ដ្រីដែលមានកូនច្រើន គ្រាដែលពួកគាត់មានកូនដំបូងស្ថិតក្នុងវ័យក្មេងនៅឡើយ។

ប្រធាននាយកដ្ឋានសុខមាលភាពស្រី្ដ និងកុមារនៃក្រសួងសង្គមកិច្ចបានបញ្ជាក់បន្ថែមថា៖«ស្ត្រីជាមាតាត្រូវតែហ៊ានបង្ហាញចេញអ្វីដែលជាបញ្ហាលើសុខភាពរបស់ខ្លួនឯង ព្រោះបញ្ហាសុខភាព និងការពិនិត្យសុខភាពជារឿងសំខាន់ដែលស្ដ្រីគ្រប់រូបត្រូវតែដឹង នឹងត្រូវតែធ្វើដើម្បីបញ្ចៀសនូវបញ្ហាទាំងនេះ»៕

September 14, 2017

អាជ្ញាធរកំពុងពន្លឿនរំដោះយកប្រឡាយបឹងត្របែកមកវិញ

ដើម្បីសម្រួលដល់ការអភិវឌ្ឍ និងរៀបចំប្រព័ន្ធរំដោះទឹកស្អុយចេញពីកណ្ដាលក្រុងបង្ហូរចូលអាងស្ដុកទឹកបឹងត្របែក រដ្ឋបាលសាលារាជធានីភ្នំពេញបាន និងកំពុងធ្វើការងារយ៉ាងដុតដៃដុតជើងក្នុងការដោះស្រាយលើបញ្ហាដែលប្រជាពលរដ្ឋបានរំលោភយកដីប្រឡាយបង្ហូរទឹកស្អុយបឹងត្របែកខុសច្បាប់ ធ្វើយ៉ាងណាដើម្បីបានមកវិញនូវអាងស្ដុកទឹកស្អុយដើម្បីរំដោះការជន់លិចក្នុងរាជធានីភ្នំពេញ។

ឯកឧត្ដម អៀង អូននី អភិបាលរងរាជធានីភ្នំពេញបានលើកឡើងថា ជារឿងចាំបាច់ណាស់ដែលសាលារាជធានីភ្នំពេញត្រូវតែធ្វើការដោះស្រាយលើប្រឡាយបឹងត្របែក និងអាងស្តុកទឹកស្អុយបឹងត្របែកឱ្យបានឆាប់រហ័សបំផុត បើពុំដូច្នោះទេនឹងអាចធ្វើឱ្យមានការរាំងស្ទះដល់ការអភិវឌ្ឍគម្រោងនានាដែលមានដូចជា ការចាក់បេតុងការពារមាត់ប្រឡាយ និងរៀបចំស្ថានីយបូមទឹក និងគម្រោងប្រព័ន្ធលូនានារបស់អង្គការ JICA ដែលបម្រើដល់ការបូមទឹកស្អុយចេញពីតំបន់កណ្ដាលក្រុងទៅចូលស្ថានីយបូមទឹកបឹងត្របែក។

អាងស្ដុកទឹកស្អុយបឹងត្របែកមានទំហំ30ហិកតា ប៉ុន្ដែត្រូវបានប្រជាជនចាក់ដីរំលោភយកធ្វើជាកម្មសិទ្ធិផ្ទាល់ខ្លួនដែលសព្វថ្ងៃនៅសល់មិនដល់10ហិកតាផង។ យោងតាមរបាយការណ៍អាជ្ញាធរខណ្ឌចំការមនបង្ហាញថា ប្រជាពលរដ្ឋរស់នៅប៉ះពាល់ដល់ផ្ទៃទឹកស្អុយបឹងត្របែកសរុបមានផ្ទះចំនួន676ខ្នង ដែលត្រូវចែកចេញជា3តំបន់ គឺមានប្រជាពលរដ្ឋរស់នៅតាមមាត់ប្រឡាយមានផ្ទះចំនួន378ខ្នង ប្រជាពលរដ្ឋរស់នៅតាមមាត់អាងមានចំនួនផ្ទះ195ខ្នង និងប្រជាពលរដ្ឋរស់នៅក្នុងបឹងតែម្តង តែពុំមានផ្ទះនិងបានចាប់យកធ្វើកម្មសិទ្ធិផ្ទាល់ខ្លួនមានចំនួន100ក្បាលដី។

ជាមួយគ្នានេះឯកឧត្ដមអភិបាលរងរាជធានីភ្នំពេញក៏បានជំរុញឱ្យអាជ្ញាធរខណ្ឌចុះស្រង់ស្ថិតិប្រជាពលរដ្ឋឱ្យបានច្បាស់លាស់អំពីទំហំនៃផលប៉ះពាល់ និងតម្រូវការរបស់ប្រជាពលរដ្ឋដែលចង់ឱ្យអាជ្ញាធរធ្វើការដោះស្រាយដើម្បីធ្វើយ៉ាងណាពន្លឿនការដោះស្រាយ និងធ្វើការអភិវឌ្ឍឱ្យបានឆាប់រហ័សទៅលើការងារនេះ។

យោងតាមរបាយការណ៍ពីមន្ទីរសាធារណការរាជធានីភ្នំពេញបញ្ជាក់ថា ក្នុងមួយឆ្នាំៗសំរាមដែលត្រូវបានកាយចេញពីប្រឡាយទឹកស្អុយបឹងត្របែកមានក្នុងរង្វង់350ឡាន និងដឹកចេញពីតំបន់នេះ៕

September 14, 2017

ជ្រើសរើសជំនាញខុស មិនខុសពីជ្រើសរើសគូស្រករខុសនោះទេ

ការជ្រើសរើសជំនាញជារឿងយ៉ាងសំខាន់មួយសម្រាប់ការរៀបចំដំណើរអនាគត ព្រោះដំណាក់កាលនេះជាដំណាក់កាលនៃការចាប់ផ្តើមដំណើរជីវិតឆ្ពោះទៅរកអនាគតដ៏ត្រចះត្រចង់។

ការជ្រើសរើសជំនាញ ក៏ជាដំណាក់កាលសម្រេចជោគវាសនារបស់ខ្លួន ព្រោះអនាគតរបស់សិស្សនិស្សិតម្នាក់ៗស្ថិតនៅក្នុងកណ្តាប់ដៃរបស់ខ្លួនហើយ ព្រោះបន្ទាប់ពីជ្រើសរើសជំនាញហើយ អ្នកនឹងត្រូវដើរតាមផ្លូវនេះអស់មួយជីវិតប្រសិនបើអ្នកជ្រើសរើសត្រូវ តែប្រសិនបើអ្នកជ្រើសរើសខុសវិញ អ្នកក៏នឹងជួបបញ្ហាក្នុងជីវិតដូចទៅនឹងជ្រើសរើសគូស្រករខុសដូច្នោះដែរ។

1.ជ្រើសរើសជំនាញខុសខាតពេលវេលាកសាងខ្លួនឡើងវិញ

អ្នកដែលជ្រើសរើសជំនាញខុស ភាគច្រើនត្រូវខាតបង់ពេលវេលាដើម្បីចាប់ផ្តើមដំណើរជីវិតសិក្សារបស់ខ្លួនឡើងវិញ បន្ទាប់ពីបានសិក្សាអស់រយៈពេលជាច្រើនឆ្នាំតែមិនអាចអភិវឌ្ឍខ្លួនឯងបានល្អ។ ចំណុចនេះ វាមិនខុសពីការជ្រើសរើសគូស្រករខុស ហើយលែងលះទៅចាប់ផ្តើមជីវិតសាជាថ្មី ដែលធ្វើឱ្យខាតបង់ពេលវេលាច្រើន។ ការបកមករៀនសាដើម ដើម្បីស្វែងរកនូវអ្វីដែលខ្លួនស្រឡាញ់អាចធ្វើឱ្យនិស្សិតត្រូវខាតពេល ហើយដើរយឺតជាងគេ ព្រោះមិត្តភ័ក្តិរបស់គាត់អាចនឹងបញ្ចប់ការសិក្សាមុនគាត់ 2 ឬ3 ឆ្នាំឯណោះ។

2.ជ្រើសរើសជំនាញខុសបាត់បង់កិត្តិយសខ្លះ

ការជ្រើសរើសជំនាញខុស នឹងធ្វើឱ្យយើងទ្រាំរស់នៅជាមួយនឹងស្ថានភាពដែលខ្លួនមិនពេញចិត្ត អានសៀវភៅដែលមិនចង់អាន ឬស្តាប់នូវអ្វីដែលមិនមែនជាចំណង់ចំណូលចិត្ត។ កត្តានេះ បានធ្វើឱ្យពួកគេចាំបាច់ត្រូវតែដើរចេញពីមុខវិជ្ជានេះ បើទោះបីជាពួកគេដឹងខ្លួនថា ការចាកចេញនេះអាចធ្វើឱ្យគេបាត់បង់ទំនុកចិត្តពីក្រុមគ្រួសារ ឬអ្នកនៅជុំវិញខ្លួនក៏ដោយ។

3.ជ្រើសរើសជំនាញខុសខាតថវិកាច្រើន

ជាធម្មតាទេ នៅពេលដែលមនុស្សណាម្នាក់ដើរចេញពីសាលា ដើម្បីទៅសិក្សាជំនាញថ្មីមួយទៀតដែលខ្លួនស្រឡាញ់ ជារឿងដែលត្រូវចាយលុយ តែអ្វីដែលកាន់តែសំខាន់នោះគឺសោហ៊ុយក្នុងការសិក្សាកន្លងមកគឺច្រើនលើសលុប បើប្រៀបធៀបជាមួយនឹងតម្លៃបង់ថ្លៃសាលាតែមួយមុខ។ ក្រៅពីនេះ អ្នកសិក្សារូបនោះក៏ខាតពេលក្នុងការធ្វើការងារ ដែលត្រូវយឺតជាងគេច្រើនឆ្នាំ ដែលចំណុចនេះសុទ្ធតែធ្វើឱ្យគាត់ខាតបង់ពេលវេលារកប្រាក់ចំណូលក្នុងជីវិតរបស់គាត់៕

September 14, 2017

G-Devith អរគុណ សីហា ហា ដែលបានបំភ្លឺការពិត

បន្ទាប់ពី G-Devith ត្រូវគណនី Facebook មានឈ្មោះ RiKo DelLa Gz II ធ្វើការវាយប្រហារដោយសារជាអក្សរយ៉ាងវែងអន្លាយ បានធ្វើឲ្យតារាចម្រៀងហង្សមាសរូបនេះ ខឹងខ្ញាល់ ទ្រាំលែងបាន រហូតគាស់កកាយរឿងចាស់ៗមកនិយាយ ។ ដោយឡែកកាលពីថ្ងៃទី12 ខែកញ្ញា ឆ្នាំ 2017 តារាចម្រៀងប្រុសរូបនេះបានតបតទៅកាន់ក្រុមអ្នកបង្កាច់បង្ខួចឈ្មោះលោកទាំងកំហឹងយ៉ាងខ្លាំង។

ករណីលោក សីហា ហា តារាចម្រៀងផលិតកម្ម M ដែលត្រូវរងនូវការដុតកម្តៅឱ្យក្ដៅគគុកដោយប្រវត្តិអតីតកាលជាមួយតារាចម្រៀងរ៉េបដែលមានល្បឿនលឿនរូបនេះដែរនោះ ថ្ងៃម្សិលមិញនេះ បន្ទាប់ពីការ Live វីដេអូចប់ G-Devith បានបង្ហោះសារអះអាងបកស្រាយបំភ្លឺពី សីហា ថា ៖ «លោក សីហា ហា បានប្រាប់ខ្ញុំថា គាត់មិនដែលស្គាល់ក្មេងម្នាក់ដែលនិយាយពីបញ្ហាររបស់ពួកខ្ញុំឡើយ អរគុណ បងសីហា ហា ដែលបានបកស្រាយប្រាប់ប្អូន ពួកយើងអភ័យទោសឱ្យគ្នាទៅវិញទៅមក និងប្រើជីវិតរស់នៅរៀងខ្លួន សូមជ្រាប ផ្តាំទៅប្អូនប្រុសម្នាក់នោះផងថា ប្អូនកំពុងបង្កបញ្ហាដល់គាត់ហើយ ទាំងដែលគាត់មិនដែលស្គាល់ប្អូនផង សូមប្អូនធ្វើការសុំទោសទៅកាន់គាត់ភ្លាម អរគុណ»៕

September 13, 2017

លុយក៏ខាត ប្រយោជន៍ក៏បាត់ បើអ្នកទប់ចិត្តមិនបាន

យប់មិញក្រុមហ៊ុន Apple បើកសម្ពោធទូរស័ព្ទ iPhone 8 / 8 Plus និងទូរស័ព្ទ iPhone X ដែលមានការរចនាឡើងប្លែក និងស្រស់ស្អាត ដោយភ្ជាប់ជាមួយនឹងមុខងារប្រើប្រាស់ថ្មីៗជាច្រើន ដែលធ្វើឱ្យអ្នកគាំទ្រមួយចំនួនធំទ្រាំមិនទិញមិនបាន។ Apple នឹងដាក់ឱ្យធ្វើការ Pre-Order ចាប់ពីថ្ងៃទី15 ខាងមុននេះតទៅ ហើយវានឹងចេញលក់ក្នុងទីផ្សារទូទាំងពិភពលោកនៅថ្ងៃទី22 ខែកញ្ញា ឆ្នាំ 2017 ហើយទីផ្សារកម្ពុជា អាចនឹងមានលក់តាមហាងនាំចូលក្រោយគ្នាបន្ដិចដូចរាល់ៗឆ្នាំដែរ។ គ្រាន់តែថា ការមកដល់នោះ មិនមែនជាផលិតផលផ្លូវការ មិនមានការធានាពីក្រុមហ៊ុន និងអាចមានតម្លៃថ្លៃកប់ពពកក្នុងពេល 2 ឬ 3 សប្ដាហ៍ដំបូង។

អ្វីទាំងអស់នេះ វានឹងធ្វើឱ្យអ្នកប្រើប្រាស់ខ្មែរយើងអាចខាតបង់ទាំងលុយកាក់ និងផលប្រយោជន៍ផ្សេងៗ ប្រសិនបើទប់ចិត្តមិនបាន ចង់ទិញស្មាតហ្វូនទាំងនោះយកមកប្រើឱ្យបានមុនគេ។ ជាទូទៅពេល iPhone ចេញថ្មីម្ដងៗ តម្លៃក្នុងទីផ្សារខ្មែរយើងអាចខុសគ្នាពីតម្លៃដើម ដល់ទៅ 300 ទៅ 400 ដុល្លារ ហើយបើពណ៌ណាត្រូវប៉ាន់ផង អាចខុសគ្នាច្រើនជាងនេះក៏មាន។

លោក អ៊ូ ភានិត ប្រធានផ្នែកលក់នៃក្រុមហ៊ុន Falcon Tech ដែលជាក្រុមហ៊ុនទទួលសិទ្ធិស្របច្បាប់ក្នុងការចែកចាយផលិតផល Apple សម្រាប់ទីផ្សារកម្ពុជា បានឱ្យដឹងតាមរយៈទូរស័ព្ទថា សម្រាប់វត្តមានទូរស័ព្ទជំនាន់ថ្មី iPhone 8 / 8 Plus និង iPhone X ខាងក្រុមហ៊ុនលោកនៅមិនទាន់មានដំណឹងច្បាស់ការណាមួយនៅឡើយទេ។ ចំពោះវត្តមានក្នុងទីផ្សារកម្ពុជានៅពេលណា ក៏ខាងលោកមិនទាន់អាចជម្រាបបានដែរ ។ ប៉ុន្តែលោកថា ខាងលោកកំពុងស្នើទៅខាង Apple ធ្វើយើងណា ឱ្យដំណើរការលក់អាចប្រព្រឹត្តទៅលឿនជាងរាល់ឆ្នាំ ដើម្បីអាចបំពេញតម្រូវការអតិថិជនខ្មែរយើងបានលឿន។

លោកថា៖ «ពេលនេះខាងយើងមិនទាន់អាចជម្រាបព័ត៌មានអ្វីបានទាំងអស់។ ប៉ុន្តែខាងក្រុមហ៊ុន Falcon នឹងព្យាយាម បើមានដំណឹងអ្វីថ្មី»។

ប្រធានផ្នែកលក់ខាងលើបានឱ្យទៀតថា ចំពោះតម្លៃ iPhone 8 / 8 Plus និង iPhone X ពេលមកដល់កម្ពុជា អាចមានការប្រែប្រួលខ្លះពីតម្លៃដើម អាស្រ័យលើពន្ធនាំចូល និងលក្ខខណ្ឌមួយចំនួនទៀត ប៉ុន្តែមិនច្រើនទេ។ យ៉ាងណា លោកស្នើឱ្យអ្នកប្រើប្រាស់ជួយគាំទ្រផលិតស្របច្បាប់ ដើម្បីទទួលបានអត្ថប្រយោជន៍ជាច្រើនពី Apple ព្រមជាមួយនឹងតម្លៃដែលល្អ។

លោកពន្យល់ថា បើចំនួនអ្នកប្រើប្រាស់នៅកម្ពុជា កើនឡើងច្រើន Apple អាចសម្រេចផ្ដល់អ្វីពិសេសៗច្រើនដល់ទីផ្សារមួយនេះ ទាំងតម្លៃ រយៈពេលចេញលក់ ព្រមជាមួយនឹងការអភិវឌ្ឍកម្មវិធី Software សម្រាប់ខ្មែរយើងផ្ទាល់ផងដែរ។ មួយវិញទៀត អ្នកប្រើប្រាស់ក៏មិនខាតបង់លុយលើការចំណាយខ្ពស់ពេលទូរស័ព្ទមានលក់តាមហាងនាំចូលដំបូង ដែលនាំឱ្យខាតប្រយោជន៍ពីការធានា ពេលមានបញ្ហាណាមួយកើតឡើងទៀតផង។ ចំពោះទីផ្សារកម្ពុជា គ្រប់ផលិតផលទាំងអស់នឹងមានការធានារយៈពេល1ឆ្នាំពី Apple និងធានាដូរថ្មីវិញក្នុងរយៈពេល 30ថ្ងៃ ក្នុងករណីមានបញ្ហាខាងបច្ចេកទេស៕

September 13, 2017

ហេតុអ្វីបានជាគេថា អ្នកបាននិទ្ទេស C ភាគច្រើនជោគជ័យ?

មានអត្ថបទបរទេសមួយចំនួនបានចេញផ្សាយ ដោយបង្ហាញឱ្យឃើញពីអ្នកដែលទទួលបាននិទ្ទេស C ភាគច្រើនជាបុគ្គលជោគជ័យ ឬជាអ្នកដែលបានបង្កើតស្នាដៃថ្មីៗសម្រាប់ពិភពលោក ខណៈដែលចំណុចនេះបានស្ថិតក្នុងការសន្និដ្ឋានផ្សេងៗពីគ្នា។

បង្ហាញពីចំណុចទាំងអស់នេះ លោក គីម ដារ៉ា នាយកគ្រឹះស្ថានអប់រំ Start Up Cambodia បានលើកឡើងថា អ្នកនិទ្ទេស A ភាគច្រើនគឺខ្លាចស្រមោលខ្លួនឯង ហេតុនេះហើយទើបពេលខ្លះបញ្ហានេះបានបង្អាក់ដល់ដំណើរនៃភាពជោគជ័យរបស់គាត់។ លោកបានបញ្ជាក់ដោយអះអាងថា និទ្ទេស A ឬ និទ្ទេស B ជានិទ្ទេសខ្ពស់ៗ ហេតុនេះពួកគាត់ស្ថិតក្នុងការចាប់អារម្មណ៍របស់សង្គម ហេតុនេះរាល់សកម្មភាពរបស់គាត់គឺគាត់មានការប្រុងប្រយ័ត្នខ្លាំងណាស់ រហូតពេលខ្លះគាត់មិនហ៊ានធ្វើសកម្មភាព ឬប្រកួតប្រជែងនោះទេ។ ប្រសិនបើទទួលបាននិទ្ទេសខ្ពស់ ហើយនៅតែខ្លាចការទិតៀនរបស់សង្គមនោះ និទ្ទេសខ្ពស់នេះនឹងមិនផ្តល់ផលល្អសម្រាប់ពួកគាត់ឡើយ។

លោក គីម ដារ៉ា បាននិយាយថា៖ «អ្នកខ្លះលើកឡើងថា និទ្ទេស C ភាគច្រើនជោគជ័យ ព្រោះនិទ្ទេសនេះមិនខ្លាចការទិតៀន។ តាមការពិតអ្នកបាននិទ្ទេស C មានសមត្ថភាពមួយដែលពេលខ្លះគាត់អាចឈោងទៅ A ឬ ទៅBបាន តែដោយសារការភ្លាំងភ្លាត់ អាចធ្វើឱ្យគាត់ធ្លាក់ទៅដល់ C ឬ D ជាដើម»។

លោក គីម ដារ៉ា បានបន្ថែមថា អ្នកដែលបាននិទ្ទេស C មានលក្ខណៈពិសេសមួយ គឺគាត់មិនខ្លាចការទិតៀននោះទេ គឺចំណុចនេះហើយដែលធ្វើឱ្យគាត់ហ៊ានប្រកួតប្រជែង ទាំងអាហារូបករណ៍ និងការប្រកួតប្រជែងនានា។ អ្នកនៅក្នុងនិទ្ទេសនេះភាគច្រើនគាត់មិនខ្លាចបរាជ័យនោះទេ ព្រោះទោះបីជាបរាជ័យក៏ដោយ ក៏គាត់មិនសូវខ្វល់ដែរ ព្រោះគាត់មិនមែនជាផ្ទាំងស៊ីបរបស់សង្គម ដែលកត្តានេះធ្វើឱ្យគាត់ទទួលបានលទ្ធផលល្អច្រើន។

តែទោះជាយ៉ាងណាក៏ដោយ សម្រាប់អ្នកដែលបាននិទ្ទេស A ឬ B វិញ បើគាត់មិនខ្លាចការទិតៀនរបស់សង្គម គាត់នឹងទទួលបានជោគជ័យ ព្រោះគាត់មានសមត្ថភាពស្រាប់ ហើយគាត់ហ៊ានចូលរួមក្នុងការប្រកួតប្រជែងទៀតគាត់នឹងទទួលបានលទ្ធផលល្អ។ លោកបានបញ្ជាក់ថា គ្រប់ការងារទាំងអស់មិនអាចមានអ្នកណាម្នាក់ចាប់ផ្តើមឡើងល្អឥតខ្ចោះនោះទេ វាទាមទារឱ្យមានការហ្វឹកហាត់ ទោះអ្នកនោះទទួលបាននិទ្ទេសអ្វីក៏ដោយ ហេតុនេះការដែលចេះដាក់ខ្លួនទទួលយកការអភិវឌ្ឍខ្លួនឯងទើបជាចំណុចល្អបំផុតសម្រាប់សិស្សគ្រប់គ្នា៕

September 13, 2017

សិក្ខាសាលាស្តីពី “របៀបជ្រើសរើសមុខជំនាញក្នុងសតវត្សទី 21”

សិក្ខាសាលានេះ រៀបចំឡើងដោយក្រុម The Luminous Night នឹងមានការធ្វើបទបង្ហាញរួមជាមួយការចែករំលែកនូវបទពិសោធពិតៗពីវាគ្មិនល្បីៗ ហើយកម្មវិធីនេះផងដែរ ក៏ផ្ដល់ឱកាសសម្រាប់យុវជនធ្វើការសួរឆ្លងឆ្លើយជាមួយវាគ្មិនកិត្តិយស ដែលជារៀមច្បងបានប្រឡូកក្នុងការងារសង្គម និងមានបទពិសោធច្រើនក្នុងបរិបទសង្គមការងារនាសតវត្សទី21នេះ។ លើសពីនេះក៏មានការចូលរួមពីតារាចម្រៀង Original Song ដូចជា Seyha Ha, Sai BT និងកញ្ញា Hang Mariny។

កម្មវិធីនេះនឹងធ្វើឡើងពេញ1ថ្ងៃគឺ ថ្ងៃព្រហស្បតិ៍ទី14 ខែកញ្ញា ឆ្នាំ2017នេះនៅមជ្ឃមណ្ឌលសហប្រតិបត្តិការកម្ពុជា-កូរ៉េ (CKCC)។ សំបុត្រចូលរួមមានតម្លៃ3ដុល្លារហើយនឹងទទួលបាននូវទឹកអាហារសម្រន់ អាហារថ្ងៃត្រង់ និងបន្តោងសោរដ៏ស្រស់ស្អាតមួយពី ICE WATCH ជាអ្នកឧបត្ថម្ភដល់កម្មវិធីនេះ ហើយយើងក៏សូមអរគុណដល់ទស្សានវដ្តី ឡារ៉ែន ដែលបានចូលរួមជាមួយពួកយើងដើម្បីអោយកម្មវិធីនេះដំណើរការទៅមុខ។

សំបុត្រមានលក់នៅមជ្ឈមណ្ឌលសហប្រតិបត្តិការកម្ពុជាជាជា-ជប៉ុន (CJCC) ទំនាក់ទំនងទិញសំបុត្រ៖ 012 531 478/ 077 207 501/ 070 812 708 និង 096 91 89 104 អ្នកទាំងអស់គ្នាក៏អាចចុះឈ្មោះកក់សំបុត្រតាមតំណភ្ជាប់នេះបាន៖

https://goo.gl/forms/iHECPRBFeLJ274Fo2

September 13, 2017

ខុនដូចំនួន11,300យូនីត នឹងដាក់ចូលទីផ្សារក្នុងដំណាច់ឆ្នាំនេះ

ភ្នំពេញៈ ការផ្គត់ផ្គង់ខុនដូបានចាប់ផ្តើមកើនឡើងយ៉ាងគំហុកហើយចាប់ពី ចុងឆ្នាំនេះទៅ ដោយការសិក្សាមួយបានរកឃើញថា ខុនដូចំនួន 11,300យូនីតទៀតនឹងត្រូវដាក់ចូលទីផ្សារនៅដំណាច់ឆ្នាំនេះ។

យោងតាមការសិក្សារបស់ក្រុមហ៊ុន CBRE Cambodia ដែលបានបញ្ចប់កាលពីពេលថ្មីៗនេះបានរកឃើញថា ខុនដូចំនួន 1,911យូនីតត្រូវបានដាក់ចូលទីផ្សារក្នុងឆមាសទី1ឆ្នាំនេះ និងរំពឹងកើនឡើងដល់ 11,300យូនីតនៅដំណាច់ឆ្នាំនេះ សម្រាប់ចំនួនយូនីតខុនដូសរុប ដែលបានផ្គត់ផ្គង់តាំងពីមុនដល់ពេលបច្ចុប្បន្ន។

ការសិក្សាដដែលក៏បានរកឃើញផងដែរថា តម្លៃនៃការលក់ខុនដូប្រណីតបានធ្លាក់ចុះ1ភាគរយគិតត្រឹមឆមាសទី1ឆ្នាំនេះធៀបនឹងដំណាច់ឆ្នាំមុន ប៉ុន្តែនិន្នាការអ្នកទិញខុនដូមានការប្រែប្រួល ដោយអ្នកទិញខុនដូភាគច្រើនផ្តោតលើខុនដូដែលបានបញ្ចប់ការសាងសង់ជាជាងទិញគម្រោងដែលកំពុងសាងសង់។ លើសពីនេះអ្នកទិញខុនដូ គឺទិញសម្រាប់រស់នៅជាជាងសម្រាប់វិនិយោគ ហើយចំនួនប្រជាជនខ្មែរដែលទិញខុនដូបានកើនឡើងចន្លោះពី5ទៅ10ភាគរយ។

ខុនដូប្រភេទ High-end មានតម្លៃមធ្យម 3,108ដុល្លារ ខុនដូប្រភេទ Mid-end មានតម្លៃ 2,659ដុល្លារ និងខុនដូប្រភេទAffordable មានតម្លៃជាមធ្យម 1,498ដុល្លារក្នុងមួយម៉ែត្រការ៉េ។

អ្នកនាង អាន សុធីតា នាយិកាក្រុមហ៊ុន CBRE Cambodia បានថ្លែងថា ស្ថានភាពទីផ្សារខុនដូមិនមានអ្វីគួរឲ្យបារម្ភនោះទេ បើទោះបីជាតម្លៃជួល និងតម្លៃលក់ចេញបានធ្លាក់ចុះក៏ដោយ។

យោងតាមការសិក្សារបស់ក្រុមហ៊ុន ប៊ុណ្ណារៀលធីគ្រុប ដែលទើបបញ្ចប់កាលពីពេលថ្មីៗនេះក៏បានរកឃើញដែរថា ចំនួនខុនដូបានកើនពី121គម្រោងដល់125គម្រោង និងចំនួនផ្ទះសរុបបានកើនពី 43,604យូនីត ដល់ចំនួន 47,204យូនីតក្នុងឆមាសទី1ឆ្នាំនេះ ធៀបរយៈពេលដូចគ្នាកាលពីឆ្នាំមុន។

លោក ស៊ុន ហួត នាយកផ្នែកទីផ្សារនៃគម្រោង Olympia CITY បានថ្លែងស្រដៀងគ្នាថា ស្ថានភាពនៃការលក់ខុនដូនៅឆ្នាំនេះមិនមានភាពប្រែប្រួលខុសពីឆ្នាំមុននោះទេ ប៉ុន្តែក្នុងស្ថានភាពបែបនេះការលក់ខុនដូក្នុងគម្រោងនេះមិនបានបញ្ចុះតម្លៃនោះទេ។ ខុនដូក្នុងគម្រោង Olympia City មានតម្លៃចន្លោះពី2,300 ទៅ2,600ដុល្លារក្នុងមួយម៉ែត្រការ៉េ។

លោកបន្តថា “ក្នុងចំណោមអ្នកទិញខុនដូក្នុងគម្រោងនេះមានប្រជាជនខ្មែរប្រមាណ70ភាគរយដែលអ្នកខ្លះទិញសម្រាប់ស្នាក់នៅ និងខ្លះទៀតទិញសម្រាប់ជួល”៕

September 13, 2017

តើអាមេរិកធ្វើអ្វីខ្លះដើម្បីវិបុលភាពនៅកម្ពុជា?

ភ្នំពេញ៖ ស្ថានទូតអាមេរិកប្រចាំនៅកម្ពុជាបានបញ្ចេញសារតាមគណនីហ្វេសប៊ុក របស់ខ្លួនថា ចាប់តាំងពីឆ្នាំ1997មក កម្ពុជាបាននាំទំនិញទៅកាន់ទីផ្សារសហរដ្ឋអាមេរិកដែលមានទឹកប្រាក់សរុបប្រមាណជា 36 ពាន់លានដុល្លារ ស្មើនឹង144ពាន់ពាន់លានរៀល។

សារដែលបង្ហោះនោះមានចំណងជើងថា «តើសហរដ្ឋអាមេរិកធ្វើអ្វីខ្លះនៅកម្ពុជា?» និង«យើងធ្វើឱ្យមានវិបុលភាព!» ដោយបានអត្ថាធិប្បាយថា ទោះគិតជាដុល្លាក្តី ជារៀលក្តី វាគឺជាចំនួនលុយដ៏ច្រើនមួយ! នេះគឺជាតម្លៃនៃទំនិញដែលប្រទេសកម្ពុជាបាននាំចេញទៅកាន់សហរដ្ឋអាមេរិកគិតតាំងពីឆ្នាំ1997មក ដោយនៅក្នុងនោះ 90% ជាសម្លៀកបំពាក់ និងស្បែកជើង។

សម្លៀកបំពាក់ និងស្បែកជើងគឺជាឧស្សាហកម្មសម្រាប់នាំចេញទីមួយរបស់ប្រទេសកម្ពុជា។ សព្វថ្ងៃនេះ ឧស្សាហកម្មនេះប្រើប្រាស់កម្លាំងកម្មករកម្ពុជាដែលខំប្រឹងប្រែងក្នុងការងារចំនួនប្រហែល70ម៉ឺននាក់។ ប្រទេសអាមេរិកបានជួយរដ្ឋាភិបាលកម្ពុជានៅក្នុងការកសាងឧស្សាហកម្មកាត់ដេរក្នុងគ្រប់ជំហានទាំងអស់។ កិច្ចព្រមព្រៀងឆ្នាំ 1996 របស់យើងបានធ្វើឱ្យមានការចាប់ផ្តើមឡើងនៃឧស្សាហកម្មនេះ។

ស្ថានទូតអាមេរិកបញ្ជាក់ថា អស់រយៈពេល 20 ឆ្នាំមកហើយដែលអាមេរិកបានគាំទ្រជាថវិកាដល់កម្មវិធីរោងចក្រល្អ (Better Factories Program) ដែលធ្វើឱ្យក្រុមហ៊ុនអ្នកទិញនៅប្រទេសអាមេរិក និងនៅអឺរ៉ុបមានទំនុកចិត្តនៅក្នុងការទិញទំនិញទាំងនោះពីកម្ពុជា។ នៅក្នុងពេលថ្មីៗនេះទៀតសោត យើងបានធ្វើការជាមួយរដ្ឋាភិបាលកម្ពុជានៅក្នុងការបង្កើតក្រុមប្រឹក្សាអាជ្ញាកណ្តាល ដែលដោះស្រាយជម្លោះរវាងកម្មករ និងថៅកែដោយសន្តិភាព។

ឧស្សាហកម្មកាត់ដេរកម្រិតពិភពលោករបស់ប្រទេសកម្ពុជាផ្តល់ឱ្យប្រទេសកម្ពុជានូវមូលដ្ឋានរឹងមាំមួយសម្រាប់ពង្រីកដល់កម្មន្តសាលដែលប្រើបច្ចេកទេសខ្ពស់៕

September 13, 2017

Author: វល័ក្ខ