ភ្នំពេញៈ ប្រធានមន្ទីរកសិកម្មខេត្តកណ្តាលបានបង្ហាញពីមហិច្ឆតាចង់ប្រែក្លាយខេត្តកណ្តាលជាខេត្តផលិតបន្លែសរីរាង្គ ឬបន្លែគ្មានជាតិគីមីសម្រាប់ចែកចាយទូទាំងប្រទេស ដោយសារខេត្តនេះមានសក្តានុពលខាងការដាំបន្លែ។
លោក ប៊ុនទួន ស៊ីម៉ូណា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកណ្តាលបានថ្លែងឲ្យដឹងតាមទូរស័ព្ទនាព្រឹកថ្ងៃទី15 កញ្ញានេះថា មន្ទីរកំពុងរៀបចំការងារនេះដោយបានជួបប្រជុំជាមួយស្ថានទូតជប៉ុនចំនួន2ដងរួចមកហើយ និងត្រូវជួបពិភាក្សាជាមួយសភាពាណិជ្ជកម្មដើម្បីសុំការគាំទ្រលើគម្រោងនេះ ប៉ុន្តែភាគីជប៉ុនបានគាំទ្រគម្រោងនេះរួចហើយ។ លោកបន្តថា មហិច្ឆតារបស់លោកចង់ប្រែក្លាយខេត្តកណ្តាលឱ្យទៅជាខេត្តដែលមានសក្តានុពលខាងការផលិតបន្លែ ជាគោលដៅនៃការផលិតបន្លែសរីរាង្គដ៏ធំមួយ ដែលអាចផ្គត់ផ្គង់ទូទាំងប្រទេស និងបម្រើឲ្យការនាំចេញនាពេលអនាគត។
លោកបន្តថា “ខ្ញុំចង់ឲ្យមន្ទីរកសិកម្មខេត្តកណ្តាលក្លាយជាមន្ទីរគំរូមួយក្នុងក្របខ័ណ្ឌទូទាំងប្រទេស និងចង់ឱ្យក្លាយជាកន្លែងផលិតបន្លែសុវត្ថិភាពសម្រាប់ផ្គត់ផ្គង់ចូលទីផ្សារ ព្រោះបន្លែចរាចរលើទីផ្សារបច្ចុប្បន្ន មិនមានសុវត្ថិភាពនោះទេ។
គម្រោងខាងលើនេះ បានទទួលការគាំទ្រពីស្ថានទូតជប៉ុន ក្រុមហ៊ុន Hayashida Japan Agriculture Co., Ltd រដ្ឋាភិបាល និងសភាពាណិជ្ជកម្មកម្ពុជាផងដែរ។
ទោះជាយ៉ាងណាលោក ប៊ុនទួន ស៊ីម៉ូណា មិនបានបញ្ជាក់ឲ្យដឹងពីដើមទុនដែលត្រូវវិនិយោគក្នុងគម្រោងនេះទេ ប៉ុន្តែលោកបញ្ជាក់ថា ភាគីជប៉ុនបានគាំទ្រគម្រោងនេះរួចហើយ រង់ចាំតែការងារបច្ចេកទេស ការរៀបចំនិតិវិធី និងពេលវេលាចាប់ផ្តើមអនុវត្តប៉ុណ្ណោះ។
លោកឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជាបានថ្លែងឲ្យដឹងថា រដ្ឋាភិបាល និងសភាពាណិជ្ជកម្មគាំទ្រគម្រោងនេះ ជាគម្រោងដែលនឹងអនុវត្តជាជំហានដំបូងដោយមន្ទីរកសិកម្មខេត្តកណ្តាល ដែលជប៉ុនមានបច្ចេកទេសក្នុងការត្រួតពិនិត្យបន្លែដើម្បីរកសារធាតុគីមីដែលមានផលប៉ះពាល់ដល់សុខភាពជាមុនៗបន្លែទាំងនោះត្រូវដាក់ចូលឲ្យចរាចរលើទីផ្សារ។ លោកឧកញ៉ាបន្តថា កិច្ចការនេះប្រសិនជាទទួលបានជោគជ័យយើងនឹងពង្រីកការនាំចេញទៅក្រៅប្រទេសបន្ថែមទៀត និងនៅពេលប្រព័ន្ធត្រួតពិនិត្យនេះដំណើរការ និងកម្ពុជាមានលទ្ធភាពក្នុងការនាំចេញមិនខាន។
លោកឧកញ៉ាបន្តថា តាមព័ត៌មានដែលលោកទទួលបានគឺ ភាគីជប៉ុនបានផ្តល់ទុន20លានដុល្លាររួចហើយ ដើម្បីអនុវត្តគម្រោងនេះ ប៉ុន្តែរហូតមកទល់ពេលនេះ ការវិវឌ្ឍនៃគម្រោងនេះជាក់លាក់ ឬយ៉ាងណាលោកមិនមានព័ត៌មានលម្អិតនោះទេ៕
