វល័ក្ខ - La Reine Media

សុខ ដែន កំពុងតែប្រឹងអភិវឌ្ឍលើវិស័យចម្រៀង (វីដេអូ)

បន្ទាប់ពីចេញបទ «មន្ដគាថាស្នេហ៍» ទទួលបានការគាំទ្រមក ថ្មីៗនេះតារាសម្ដែងក្បាច់គុន សុខ ដែន បានចេញបទថ្មីមួយទៀតមានចំណងជើងថា «ខ្យល់បក់ដីហុយ»។

លោក សុខ ដែន បញ្ជាក់ថា ដំបូងឡើយលោកចង់ធ្វើបទ «មន្ដគាថាស្នេហ៍» ឡើងគ្រាន់តែចង់សាកល្បងមើលពីចំណាប់អារម្មណ៍របស់សាធារណជនប៉ុណ្ណោះ ខណៈដែលលោកកំពុងតែចង់វិវឌ្ឍខ្លួនទៅជាតារាចម្រៀងមួយទៀតក្រៅពីអាជីពសម្ដែង និងបង្ហាត់កីឡាហើយនោះ។ ក្រោយពីមើលឃើញបទទីមួយមានការគាំទ្រពីមហាជន ទើបលោកមានគំនិតធ្វើបទមួយទៀតមានចំណងជើងថា «ខ្យល់បក់ដីហុយ»។

តារាសម្ដែងក្បាច់គុនរូបនេះបញ្ជាក់ថា បច្ចុប្បន្នបទថ្មីនេះមានការគាំទ្រខ្លាំងជាងបទមុន ព្រោះជាបទទី2ដែលលោកបានផលិតឡើងក្រោយពីទទួលបានបទពិសោធច្រើន និងទទួលការរិះគន់ស្ថាបនាពីអ្នកជំនាញផលិតបទចម្រៀងមួយចំនួនទើបធ្វើឱ្យស្នាដៃទីពីររបស់លោកកាន់តែមានគុណភាព។

សុខ ដែន បញ្ជាក់ប្រាប់ថា ទោះបីជាបទលោកមិនទាន់ល្អគ្រប់ជ្រុងជ្រោយក៏ដោយ តែប្រសិនបើនៅតែមានការគាំទ្រពីមហាជនលោកនឹងប្រឹងប្រែងរកគំនិតថ្មីៗ និងអភិវឌ្ឍខ្លួនឱ្យកាន់តែល្អឡើងៗលើវិស័យចម្រៀងនេះ៕

September 18, 2017

អភិបាលខេត្តព្រះសីហនុរំពឹងថា ខេត្តនេះនឹងជំនួសខេត្តសៀមរាបនៅពេលឆាប់ៗ

ភ្នំពេញៈ អភិបាលខេត្តព្រះសីហនុ លោក យន្ត មីន បានថ្លែងថា លោករំពឹងថា ខេត្តព្រះសីហនុនឹងជំនួសខេត្តសៀមរាបនៅក្នុងរយៈពេល5ឆ្នាំខាងមុខ ដោយសារតែសក្តានុពលជាច្រើនរបស់ខេត្តនេះកំពុងតែមានសកម្មភាពយ៉ាងរស់រវើក។

អភិបាលខេត្តព្រះសីហនុបានថ្លែងឲ្យដឹងតាមទូរស័ព្ទកាលពីព្រឹកថ្ងៃទី17 កញ្ញាថា ខេត្តព្រះសីហនុមានសក្តានុពលសេដ្ឋកិច្ចច្រើន ដោយខេត្តនេះនឹងមានកំពង់ផែទឹកជ្រៅតែមួយគត់ដែលជួយសម្រួលដល់ការដឹកជញ្ជូន មានឆ្នេរខ្សាច់ដ៏ទាក់ទាញបំផុត ព្រោះឆ្នេរខ្សាច់កម្ពុជាជាប់ជាសមាជិកក្លិបឆ្នេរស្អាតជាងគេនៅលើពិភពលោក និងទាក់ទាញភ្ញៀវទេសចរជាតិ-អន្តរជាតិ មានតំបន់ឧស្សាហកម្មដែលស្ថិតនៅជិតកំពង់ផែ មានអាកាសយានដ្ឋានអន្តរជាតិដែលកាន់តែសកម្ម មានការតភ្ជាប់ផ្លូវរថភ្លើងងាយស្រួលក្នុងការដឹកជញ្ជូន និងផលិតភាពកសិកម្មអាចចិញ្ចឹមខ្លួនឯងបាន។

លោកបន្តថា “ខ្ញុំជឿថា ខេត្តព្រះសីហនុនឹងជំនួសខេត្តសៀមរាបបាន ព្រោះខេត្តសៀមរាបពឹងផ្អែកសំខាន់តែលើភ្ញៀវទេសចរប៉ុណ្ណោះ ប៉ុន្តែខេត្តព្រះសីហនុមានសក្តានុពលចម្រុះ។ លោកបានបន្តថា “បច្ចុប្បន្នតម្លៃដីធ្លី និងអចលនទ្រព្យក្នុងខេត្តនេះបានកើនលើសពីទ្វេដង ឬច្រើនជាងនេះ ប៉ុន្តែលោកគិតថា តម្លៃនេះនឹងឡើងកល់នៅពេលឆាប់ៗនេះ។

បច្ចុប្បន្នតំបន់ឧស្សាហកម្មក្នុងខេត្តព្រះសីហនុមានរោងចក្រសហគ្រាសចិនជាង110សហគ្រាសកំពុងវិនិយោគនៅតំបន់នេះ និងដែលបានផ្តល់ការងារដល់ប្រជាពលរដ្ឋជាង16,000នាក់។ តំបន់សេដ្ឋកិច្ចពិសេសនេះជាផ្នែកមួយនៃជំនួយរបស់ចិនតាមរយៈគោលនយោបាយផ្លូវមួយ ខ្សែក្រវាត់មួយ។

រាជរដ្ឋាភិបាលកម្ពុជាបានដាក់ខេត្តព្រះសីហនុជាតំបន់ឧស្សាហកម្មនៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ2015-2025។

លោកបណ្ឌិត សុក ស៊ីផាន់ណា ទីប្រឹក្សារាជរដ្ឋាភិបាលកម្ពុជាបានថ្លែងថា ខេត្តព្រះសីហនុពិតជានឹងជំនួសខេត្តសៀមរាបបានមែនក្នុងរយៈពេល5ឆ្នាំទៀតយ៉ាងយូរ ដោយសារតែខេត្តនេះមានសក្តានុពលច្រើន ពិសេសវិស័យឧស្សាហកម្មដែលមានការគាំទ្រពីកំពង់ផែ និងផ្លូវរថភ្លើង អាកាសយានដ្ឋានអន្តរជាតិ និងតំបន់ឆ្នេរដ៏ទាក់ទាញ។

លោកបន្តថា “ក្នុងផែនការ រដ្ឋាភិបាលមានបំណងប្រែក្លាយតំបន់ផ្លូវជាតិលេខ4 ពីរាជធានីភ្នំពេញទៅខេត្តព្រះសីហនុជាតំបន់ឧស្សាហកម្ម”៕

September 18, 2017

សុទ្ធតែខ្លាំង ហើយស្អាត ប៉ុន្តែមើលតែប៉ុន្មានចំណុចនេះ អ្នកអាចវិនិច្ឆ័យដោយខ្លួនឯងបានហើយ

ចេញមុនក្រោយគ្នាតែជាង 20 ថ្ងៃប៉ុណ្ណោះ ស្មាតហ្វូនកំពូលៗមកពីក្រុមហ៊ុនធំៗ 2 បានធ្វើឱ្យអ្នកប្រើប្រាស់មានការលំបាកក្នុងការសម្រេចជ្រើសរើស ខណៈពួកវាសុទ្ធតែមានសមត្ថភាពខ្លាំង និងមានរូបរាងស្រស់ស្អាតម្យ៉ាងម្នាក់។ ក្រុមហ៊ុន Samsung បានបញ្ចេញ Note 8 ធ្វើឱ្យគាំទ្ររបស់ខ្លួនស្រក់ទឹកមាត់ជាមួយនឹងរូបរាងថ្មីអេក្រង់លាតពេញផ្ទៃខាងមុខ រួមនឹងសមត្ថភាពសំខាន់ៗមួយចំនួនទៀត។ ដោយឡែក Apple ក៏មិនអន់ដែរជាមួយនឹង iPhone X ដែលវាជាស្មាតហ្វូនគម្រប់ខួប 10 ឆ្នាំសម្រាប់ឧទ្ទិសដល់ស្នាដៃរបស់លោក Steve Jobs។ យ៉ាងណាក៏ដោយ បើទោះបីពួកវាទាំងសុទ្ធតែខ្លាំង ហើយស្អាត ប៉ុន្តែបើមើលប៉ុន្មានចំណុចនេះ អ្នកអាចវិនិច្ឆ័យបានថា តើគួរជ្រើសរើសយកមួយណាសម្រាប់ប្រើប្រាស់។

1/-រូបរាង និងអេក្រង់

កាលពីថ្ងៃទី23 ខែសីហា Samsung បានធ្វើឱ្យអ្នកតាមដានមានការភ្ញាក់ផ្អើលជាមួយនឹងទូរស័ព្ទ Galaxy Note 8 ខណៈវាត្រូវបានកែប្រែចំណុចប្លែកៗជាច្រើនពី Note 7 ដោយយកគំរូពី Galaxy S8/S8+ ជាមួយនឹងអេក្រង់គុណភាពខ្ពស់ Super AMOLED ហើយក៏មានកម្រិត បង្ហាញរូបភាពដល់ Quad HD 1440 x 2960 Pixel ដង់ស៊ីតេអេក្រង់ដល់ទៅ 521ppi និងមានមុខងារ Always-On-Display និងទ្រាំទ្រ HDR 10 ។ ដោយឡែកស៊ុមព័ទ្ធជុំវិញតួរបស់ Note 8 ត្រូវបានផលិតឡើងពីអាលុយមីញ៉ូមមានភាពធន់ និងស្រោបដោយកញ្ចក់ជាប់ស្វិតនៅផ្ទៃខាងក្រោយ។

កម្រិតពន្លឺ Brightness ខ្ពស់បំផុតរបស់អេក្រង់ Galaxy Note 8 អាចបង្ហាញបាន ភ្លឺជាង Galaxy S8 ដល់ទៅ 22% ហើយពន្លឺ ដែលបង្ហាញចេញមកសមស្របជាមួយកាលៈទេសៈ ឬស្ថានភាពបានល្អជាងស្មាតហ្វូនដទៃ ទាំងមើលនៅក្រោមពន្លឺថ្ងៃ និងនៅពេលយប់។ ចំណុចមួយទៀតនោះគឺ អេក្រង់របស់ Note 8 អាចបង្ហាញពណ៌បានដិតជាង Galaxy S8 ទៅទៀត ទាំងមើលពីគ្រប់ជ្រុងនៅតែច្បាស់ មិនប្រែពណ៌ ដូចនេះធ្វើឱ្យការទស្សនាវីដេអូ មិនបាត់បង់ពណ៌ដើម ហើយមានសភាពផុសអណ្តែតល្អទៀតផង។

រំលងគ្នាបាន19 ថ្ងៃ Apple បានដាក់ចេញកាំភ្លើងធំប្រចាំឆ្នាំរបស់ខ្លួនចំនួន 3 គ្រឿង ប៉ុន្តែមានតែមួយគ្រឿងប៉ុណ្ណោះមានរូបរាងប្លែក និងគួរឱ្យចាប់អារម្មណ៍ជាងគេ ព្រោះតែវាមានអេក្រង់ថ្មី និងមុខងារថ្មីច្រើនជាង iPhone 8/8+។ អេក្រង់ iPhone X ត្រូវបានបំពាក់ដោយអេក្រង់Super AMOLED ទំហំ 5.8 អ៊ីញអាចបង្ហាញរូបភាពកម្រិត1125 x 2436 Pixel មានដង់ស៊ីតេអេក្រង់ 458ppi មានមុខងារ 3D Touch, អាចគាំទ្រ មុខងារ HDR 10 ដូចគ្នា។

សរុបត្រង់ចំណុចនេះ iPhone X របស់ Apple ហាក់មានការរចនា និងកម្រិតអេក្រង់ទាបជាង Note 8។ បើយើងមើលអេក្រង់របស់ស្មាតហ្វូនរបស់ក្រុមហ៊ុនកូរ៉េ វាមានភាពប្លែក ស្រស់ស្អាត និងមិនទាន់មានគូប្រជែងណាធ្វើដូចនៅឡើយទេ ប៉ុន្តែសម្រាប់អេក្រង់របស់ Apple វិញ គឺចេញរាងក្រោយគេបន្តិច ហើយដូចអេក្រង់របស់ LG និង Xiaomi។

2/-កាមេរ៉ា

ចូលដល់ចំណុចនេះ យើងអាចនិយាយបានស្មាតហ្វូនទាំង 2 មានចំណុចល្អប្រសើរដូចគ្នាច្រើន បើទោះបីជា iPhone X ទើបចេញក៏ដោយក្ដី។ វាទាំង 2 បំពាក់កាមេរ៉ាភ្លោះ រួមនឹងប្រភេទកាមេរ៉ាដូចគ្នា គ្រាន់តែមួយដាក់សម្រាប់បែបផ្ដេក ហើយមួយទៀតបែបបញ្ឈរតែប៉ុណ្ណោះ។

កាមេរ៉ាភ្លោះ iPhone X មានទំហំ 12MP ដូចគ្នា ដោយមួយគ្រាប់ជាប្រភេទ Wide angle មានកម្រិត Aperture F/1.8 និងមួយទៀតជាប្រភេទ Telephoto មានកម្រិត Aperture F/2.4។ ចំពោះកាមេរ៉ាមុខមានទំហំ 7MP អាចធ្វើការថតរូបបែប Portrait បានទៀតផង ធ្វើឱ្យផ្ទៃមុខរបស់យើងផុសដាច់ពីផ្ទៃ Background បានល្អ អមមកជាមួយនឹងមុខងារផ្លាស់ប្ដូរពន្លឺនៃផ្ទៃខាងក្រោយរូបភាពទៀតផង ដែលអាចប្រើប្រាស់ជាមួយនឹងកម្មវិធីកាមេរ៉ាបាន។

កាមេរ៉ាទាំង 2 នេះមានមុខងារ OIS ទាំង 2 តែម្ដងដូចទៅនឹង Galaxy Note 8 ដែលធ្វើឱ្យការថតរូបកាន់តែមានភាពប្រសើរ ជួយកាត់បន្ថយរំញ័របានល្អ នៅពេលកាន់ជាប់ដៃ ពិសេសគឺវីដេអូថតបានកម្រិត 4K ហើយកម្រិត 1080p អាចថតបានដល់ល្បឿន 240fps ។ Apple បានអះអាងទៀតថា ជាមួយនឹងកាមេរ៉ា iPhone X វាអាចទទួលពន្លឺបានច្រើនជាង iPhone 7 Plus ដល់ទៅ 60% អនុញ្ញាតឱ្យម្ចាស់ iPhone ធ្វើការថតរូបបានកាន់តែច្បាស់ ស្រស់ស្អាត មានកម្រិតគ្រាប់ Noise រំខានតិចជាងមុន ថែមទាំងអាចថតរូបមានសកម្មភាពលឿនបានល្អទៀតផង។

កាមេរ៉ាភ្លោះរបស់ Galaxy Note 8 វិញមានទំហំ 12MP តែមានសមត្ថភាព និងមុខងារខុសគ្នា ដោយមួយជាប្រភេទកាមេរ៉ា Telephoto មានកម្រិត Aperture ធំបំផុត F/2.4 អាចធ្វើការ Zoom ដោយមិនបាត់បង់គុណភាពបាន 2x និងមួយផ្សេងទៀតមានកម្រិត Aperture ធំដល់ទៅ F/1.7 អាចធ្វើការ Zoom បានដល់ទៅ 10x ពិសេសគឺមានមុខងារ Dual Pixel Focus ធ្វើឱ្យការចាប់យករូបភាពបានរហ័សគួរជាទីពេញចិត្ត។

កាមេរ៉ាក្រោយទាំង 2 បំពាក់មកជាមួយនូវមុខងារជួយរក្សាលំនឹង (OIS) ជួយទៅដល់ការថតរូបភាព Blur និងការថតវីដេអូបានកាន់តែប្រសើរ ដោយជួយកាត់បន្ថយរំញ័របានយ៉ាងល្អ ដែល Samsung បានអះអាងជាផ្លូវការថា Note 8 គឺជាស្មាតហ្វូនដំបូងគេ ដែលមានមុខងារ OIS ជួយកាត់បន្ថយរំញ័រនៅក្នុងកែវលេនស៍ទាំង 2 ដំបូងបំផុតលើពិភពលោក។ បច្ចេកវិទ្យា Lens 2 គ្រាប់នេះ Samsung ក៏បានកែប្រែកម្មវិធីថតរូបឱ្យកាន់តែប្រសើរជាងមុនលើការថត Portrait លើមុខងារថ្មី Live Focus ដែលអនុញ្ញាតឱ្យអ្នកថតកំណត់នូវភាពព្រាលតាមចិត្ត មុន និងក្រោយពេលថត។

យោងតាមលក្ខណៈទាំងនេះ iPhone X និង Galaxy Note 8 មានចំណុចប្រសើរដូចគ្នាច្រើនលើសមត្ថភាពក្នុងកាថតរូប ប៉ុន្តែបើយើងមើលលើកម្រិត Aperture ទូរស័ព្ទ Note 8 អាចថតពេលយប់ ឬពេលខ្សោយពន្លឺបានប្រសើរជាងបន្តិច ដោយឡែកមុខងារផ្សេងទៀតមានលក្ខណៈប្រដំប្រសងគ្នា។

3/-សមត្ថភាពម៉ាស៊ីន

និយាយដល់ផ្នែកម៉ាស៊ីន Note 8 និង iPhone X សុទ្ធតែមានសមត្ថភាពម៉ាស៊ីនខ្លាំងដូចគ្នា ដែលយើងអាចបញ្ចូលពួកវាក្នុងតារាងកំពូលស្មាតហ្វូននាដើមឆ្នាំ 2018 នេះបាន។ Note 8 ប្រើនូវបន្ទះឈីប Exynos 8895/Snapdragon 835 ជំនាន់ថ្មី ដែលវាមានទំហំ 10nm អាចដំណើរការបានលឿនតែប្រើប្រាស់ថាមពលតិចតួចបំផុត។ រីឯ iPhone X នោះវិញក៏មិនធម្មតាដែរ វាបានបំពាក់នូវបន្ទះឈីបថ្មីA11 Bionic ជាមួយសម្ទុះដ៏ខ្លាំងមួយដែលខ្លាំងជាងឈីប A10 លើiPhone 7 និង iPhone 7 Plus ដល់ទៅ 25%។

CPU របស់ Note 8 វាមានចំនួន 8 ដែលវាចែកជើងដំណើរការបានល្អ និងសន្សំសំចៃថ្មខ្ពស់ និងមាន Ram ទំហំ 6GB អាចធានាបានថា គ្មានបញ្ហាពេលដំណើរការកម្មវិធី និងហ្គេមធំៗឡើយ ហើយចំពោះ CPU របស់ iPhone X មាន Core ចំនួន6 គ្រាប់ មាន 2 ខ្លាំង និង 4ទៀតមធ្យម បើផ្អែកតាមការបញ្ជាក់របស់ Apple វាអាចរត់បានលឿន។ ជាងនេះទៀត Apple ក៏បានបង្កើនសមត្ថភាពកម្លាំង GPU ឱ្យកាន់តែលឿនជាងមុនផងដែរ ដោយវាដំណើរការបានលឿនជាងមុន 30% ធ្វើឱ្យការប្រើប្រាស់ទៅលើកម្មវិធី លេងហ្គេម រហ័សទាន់ចិត្ត ជាមួយ RAM ទំហំ 3GB ។

សរុបជារួមទាំងនេះ គ្រាន់តែជាចំណុចខ្លះៗរបស់ស្មាតហ្វូនទាំង 2 តែប៉ុណ្ណោះ ហើយក្រុមការងារឡារ៉ែន ក៏មិនអាចសម្រេចបានថារវាងពួកវាទាំង 2 មួយណាខ្លាំងជាងមួយណាដែរ ព្រោះថា យើងមិនទាន់បានចុចសាកល្បងប្រើ iPhone X នៅឡើយទេ គឺត្រឹមដឹងពីលក្ខណៈសម្បត្តិ និងការអួតពី Apple ប៉ុណ្ណោះ។ ដោយឡែក Galaxy Note 8 យើងបានចុច និងប្រើប្រាស់សាកល្បងជាង 2 សប្ដាហ៍មកហើយ ឃើញថាមានសមត្ថភាពខ្លាំង ហើយការថតរូបបានច្បាស់ល្អ ទាំងកន្លែងមានពន្លឺ និងខ្សោយពន្លឺ។ តែយ៉ាងណា យើងអាចនិយាយបានថា វាមានសមត្ថភាពមិនជាងគ្នាប៉ុន្មានទេ ប៉ុន្តែអាចខុសគ្នាលើផ្នែក Software ព្រោះថា Galaxy Note 8 ប្រើនូវប្រព័ន្ធ Android 7.1.1 (Nougat)ដែលម្ចាស់ដើមពី Google ខណៈ iPhone X ប្រើ iOS 11 បង្កើតឡើងផ្ទាល់ពី Apple ។

សូបបញ្ជាក់ថា ទាំងនេះគ្រាន់តែជាការប្រៀបធៀបលើអ្វីដែលក្រុមហ៊ុនទាំង 2 បានលើកឡើង រួមនឹងបទពិសោធផ្ទាល់មួយចំនួន ក្រោយការចុចសាកប្រើ Galaxy Note 8 មួយរយៈប៉ុណ្ណោះ។ ប្រិយមិត្តអាចធ្វើការបញ្ចេញមតិលើចំណុចផ្សេងៗដែលគិតថា ទូរស័ព្ទទាំង 2 អាចស៊ីដាច់គ្នា ហើយក្រុមការងារយើងនឹងលើកយកអត្តបទនេះមកនិយាយម្ដងទៀត ពេលដែល iPhone X បានមកដល់ស្រុកខ្មែរយើង៕

September 18, 2017

Lukaku ជួយឲ្យ Man United លត់អតីតក្រុមរបស់ខ្លួនយ៉ាងចាស់ដៃ

ខ្សែប្រយុទ្ធ Romelu Lukaku បានរកគ្រាប់បាល់បញ្ចូលទីនៅពេលប្រកួតជាមួយនឹងអតីតក្រុមរបស់គេ ខណៈដែល Manchester United លត់ក្រុមទូកក្តោង Everton យ៉ាងចាស់ដៃក្នុងលទ្ធផល 4-0 ដើម្បីឡើងទៅឈរលេខ2នៅលើកំពូលតារាងនៃក្របខ័ណ្ឌ Premier League។

ការវិលត្រឡប់របស់ Wayne Rooney ទៅកាន់កីឡដ្ឋាន Old Trafford បានបញ្ចប់ដោយការរងបរាជ័យយ៉ាងខកចិត្ត ខណៈដែលការរបូតគ្រាប់បាល់ដល់ទៅ3គ្រាប់នៅជិតបញ្ចប់ការប្រកួត បានធ្វើឲ្យក្រុម Everton ធ្លាក់ទៅឈរក្នុងតំបន់កាត់ចោលទាំង3ក្រុមតែម្តង។ ក្រុមទូកក្តោងមួយនេះ បានចាប់ផ្តើមយ៉ាងយ៉ាងត្រដាបត្រដួសនៅរដូវកាលនេះ និងមិនបានរកគ្រាប់បាល់បញ្ចូលទីសោះក្នុងពេលពួកគេរងបរាជ័យ4លើកជាប់ៗគ្នាក្នុងរាល់យុទ្ធនាការទាំងអស់។ ខ្សែការពារស្លាបស្តាំ Antonio Valencia បានស៊ុតបាល់ផុតដៃរបស់អ្នកចាំទី Jordan Pickford ដើម្បីជួយឲ្យក្រុមរបស់លោក Jose Mourinho មានគ្រាប់បាល់នាំមុខមុន មុននឹងបន្តធ្វើការដាក់សម្ពាធលើក្រុមភ្ញៀវ។ Rooney ដែលជាអ្នករកបានគ្រាប់បាល់ច្រើនជាងគេរបស់ Man United បានទទួលឱកាសល្អៗចំនួន2លើក ប៉ុន្តែធ្វើមិនបានសម្រេច។ ក្រោយមក គ្រាប់បាល់ស៊ុតបញ្ចូលទីពីសំណាក់កីឡាករ Henrikh Mkhitaryan, Lukaku និងគ្រាប់បាល់ប៉េណាល់ទីពី Anthony Martial បានបំពេញជ័យជម្នះដ៏កក់ក្តៅសម្រាប់ក្រុមម្ចាស់ផ្ទះតែម្តង។

លោក Mourinho អ្នកចាត់ការទូទៅរបស់ក្រុម Man United បានឲ្យដឹងថា៖ «រយៈពេល30 និង35នាទីដំបូង គឺជាការបង្ហាញពីទម្រង់លេងដ៏ល្អឥតខ្ចោះរបស់យើងនៅរដូវកាលនេះ។ ក្រុម Everton ចង់ធ្វើការស្រោចស្រង់វិញ ប៉ុន្តែ ពួកគេកំពុងតែស្ថិតក្នុងដំណាក់កាលដ៏លំបាកមួយ»៕

ប្រភពពី៖ BBC

September 18, 2017

ថៃ រិទ្ធី វាយឲ្យ S Paye សន្លប់ធំ ខណៈប៊ុនស្រ៊ុន និងសូដា ចាញ់លើទឹកដីហ្សាការតា

កីឡាករថៃ រិទ្ធី របស់កម្ពុជា បានបង្កើតការភ្ញាក់ផ្អើលនៅពីមុខអ្នកគាំទ្រដ៏ច្រើនកុះករនៅសង្វៀនដាក់ទ្រុង Jakarta Convention Center ក្នុងការបង្ហាញខ្លួនជាលើកទី១របស់ខ្លួនក្នុងកម្មវិធីរបស់ ONE Championship ពេលប្រកួតកីឡាករសញ្ជាតិលលីប៊ឺរី Jerome S Paye ក្នុងការប្រកួតព្រឹត្តិការណ៍គុនចម្រុះ ONE: Total Victory កាលពីយប់ថ្ងៃសៅរ៍។

ទោះបីជាយ៉ាងណា កីឡាករកម្ពុជាពីរនាក់ផ្សេងទៀតដែលរួមមានស៊ីម ប៊ុនស្រ៊ុន និងផាត់ សូដា បានជួបលទ្ធផលដ៏ខកចិត្តដូចគ្នា ក្រោយពីចាញ់កីឡាករម្ចាស់ផ្ទះ Stefer Rahardian និង Adrian Matheis រៀងៗខ្លួន។ កីឡាករថៃ រិទ្ធី វ័យ 22ឆ្នាំរបស់កម្ពុជា បានចាប់ផ្តើមយ៉ាងល្អក្នុងទឹកទី1 តាមរយៈការប្រើប្រាស់កណ្តាប់ដៃវាយចំគោលដៅយ៉ាងល្អលើដៃគូ មុននឹងគេចផុតពីការព្យាយាមក្លេរបស់កីឡាករ S Paye។

ការភ្ញាក់ផ្អើលផ្សេងៗបានកើតឡើងភ្លាមៗ ក្នុងទឹកទី2 ក្រោយពីកីឡាករទាំងពីរបានសម្រេចចិត្តប្តូរកណ្តាប់ដៃគ្នា ខណៈដែលការបញ្ចេញចលនាដ៏រហ័ស និងការវាយចំគោលយ៉ាងល្អយ៉ាងសន្ធាប់ៗ បានជួយឲ្យ រិទ្ធី វាយដៃគូរបស់ខ្លួនសន្លប់តែម្តងទៀត ក្នុងរយៈពេលតិចជាងមួយ១នាទី ក្នុងទឹកដដែលនោះ។

ដោយឡែក កីឡាករស៊ីម ប៊ុនស្រ៊ុន និងផាត់ សូដា សុទ្ធសឹងបានសម្តែងនូវការសោកស្តាយរបស់ខ្លួន បន្ទាប់ពីចាញ់កីឡាករ Rahardian និង Matheis ដោយសារតែស្នៀតក្លេ ត្រឹមការប្រកួតនៅទឹកទី1ដូចគ្នា។ ក្នុងការប្រកួតក្នុងទម្ងន់ 56,7គីឡូក្រាមរបស់ខ្លួន ប៊ុនស្រ៊ុន បានចាប់ផ្តើមយ៉ាងល្អ និងហាក់មានប្រៀបលើដៃគូជាមួយនឹងស្នៀតប្រកួតគុនខ្មែររបស់ខ្លួន ប៉ុន្តែ ការភ្នាត់ ធ្វើឲ្យចូលស្នៀតក្លេរបស់ដៃគូ និងចាញ់ការប្រកួតនេះតែម្តង។ ស្របពេលជាមួយគ្នានេះ សូដា ក៏បានសម្តែងនូវការសោកស្តាយរបស់ខ្លួនផងងដែរ ក្រោយពីចាញ់ Matheis ដោយស្នៀតក្លេក្នុងទឹកទីមួយដូចគ្នា៕

September 18, 2017

ទូរស័ព្ទបំពាក់កាមេរ៉ា 4 គ្រាប់របស់ Huawei ត្រៀមបង្ហាញខ្លួនក្នុងទីផ្សារកម្ពុជា

ក្រោយបែកធ្លាយព័ត៌មានថា Huawei នឹងធ្វើការដាក់ចេញស្មាតហ្វូនថ្នាក់កណ្ដាលបំពាក់នូវកាមេរ៉ាភ្លោះទាំងខាងមុខ និងខាងក្រោយ លើត្រកូល Nova ពេលវាបានក្លាយជាពិតហើយ បន្ទាប់ពីលោកលោក អែម យុទ្ធូ ប្រធានផ្នែកទីផ្សារជាន់ខ្ពស់របស់ស្មាតហ្វូន Huawei ប្រចាំប្រទេសកម្ពុជា បានបញ្ជាក់ក្នុងពិធីជប់លៀងថ្លែងអំណរគុណដល់មិត្តអ្នកសារព័ត៌មាន កាលពីចុងសប្ដាហ៍នេះ។

លោក យុទ្ធូ បានឱ្យដឹងថា កន្លងមកមានព័ត៌មានជាច្រើនបានចុះផ្សាយពីរឿងទូរស័ព្ទបំពាក់កាមេរ៉ាភ្លោះទាំងខាងមុខ និងខាងក្រោយរបស់ Huawei ឥឡូវពេលនេះ វាក្លាយជាការពិតហើយ។ ស្មាតហ្វូននេះមានឈ្មោះថា Huawei Nova 2i ដែលវាមានប្រើកាមេរ៉ាចំនួន 4 គ្រាប់ ខាងមុខ 2 និងខាងក្រោយ 2 ។

លោកថ្លែងថា៖ «ថ្ងៃមុនវាជាព័ត៌មានចចាមអារ៉ាម តែឥឡូវ វាជាការពិត។ យើងត្រៀមនាំវាមកលក់ក្នុងពេលឆាប់ៗនេះ ជាមួយនឹងតម្លៃដ៏ល្អមួយ ដែលអតិថិជននឹងភ្ញាក់ផ្អើល»។

លោកបន្ដថា ទូរស័ព្ទ Nova 2i នេះប្រើនូវអេក្រង់ 5.9 អ៊ីញ ប្រភេទ FullHD+ មានកម្រិតបង្ហាញរូបភាព 2160x1080p លើខ្នាតបង្ហាញរូបភាពធំទូលាយ 18:9 Aspect Ratio ធ្វើឱ្យអេក្រង់លាតពេញផ្ទៃខាងមុខទូរស័ព្ទ។ ចំពោះសមត្ថភាពដំណើរការ វាប្រើនូវ Ram ទំហំ 4GB និង Memory ក្នុងម៉ាស៊ីនទំហំ 64GB ដំណើរការលើបន្ទះឈីប HiSilicon Kirin octa-core SoC មានល្បឿន 2.36GHz ថាមពលថ្ម 3,240mAh ហើយប្រើនូវប្រព័ន្ធប្រតិបត្តិការ Android 7.0 Nougat ស្រោបដោយផ្ទាំងប្រើប្រាស់ EMUI5.1។ចំពោះកាមេរ៉ាទាំង 4 របស់ស្មាតហ្វូននេះ ផ្នែកខាងក្រោយមានទំហ 16MP + 2MP ចំណែកកាមេរ៉ាភ្លោះខាងមុខគឺ 13MP + 2MP រួមជាមួយនឹងភ្លើង LED Flash ផងដែរ។

ប្រធានផ្នែកទីផ្សារជាន់ខ្ពស់ខាងលើឱ្យទៀតថា សម្រាប់ព័ត៌មានពីទូរស័ព្ទ Huawei Nova 2i ក្រុមហ៊ុននឹងជម្រាបនៅពេលក្រោយទៀត ប៉ុន្ដែអ្វីដែលលោកចង់ជម្រាបជូននៅពេលនេះ គឺការផ្ដល់ជូនដ៏ពិសេសក្នងឱកាសបុណ្យភ្ជុំបិណ្យនេះ។ Huawei បានត្រៀមនូវកាដូពិសេសសរុបទូទាំងប្រទេសជាង 10 ម៉ឺនដុល្លារដោយគ្រាន់តែជាវនូវស្មាតហ្វូនស៊េរីណាមួយរបស់ក្រុមហ៊ុននៅគ្រប់សាខាហាងលក់ទូរស័ព្ទដែលមានបុគ្គលិក Huawei និងស្លាកសញ្ញា Huawei។

ជាចុងក្រោយលោកបន្ថែមថា សម្រាប់ទីផ្សារបច្ចុប្បន្ន Huawei មានស្មាតហ្វូនចំនូន 4 ម៉ូដែលដូចជា GR5 2017, Huawei P10, P10 Plusនិង Mate9 ដែលកំពុងឡើងកូដខ្លាំងសម្រាប់ទីផ្សារកម្ពុជា ខណៈពួកវាសុទ្ធសឹងបំពាក់កាមេរ៉ាភ្លោះ និងមានតម្លៃសមរម្យ ហើយនៅចុងឆ្នាំនេះ ក្រុមហ៊ុននឹងធ្វើការណែនាំស្មាតហ្វូនថ្មី Huawei Mate 10 បំពាក់បន្ទះឈីប Kirin 970 ទ្រទ្រង់បច្ចេកវិទ្យា AI ក្នុងតម្លៃដ៏ភ្ញាក់ផ្អើលជាមួយនឹងការថែមដ៏អស់ស្ទះផងដែរ៕

September 18, 2017

តើអ្នកចង់ក្លាយជាអ្នកតំណាងផ្ដាច់មុខពីផលិតផលល្បីៗអត់?

មិនបាច់ចំណាយពេលទៅពិនិត្យផលិតផលដល់បរទេស និងមិនចាំបាច់ចំណាយពេលយូរទើបអាចរើសដៃគូ និងផលិតផលមួយដែលត្រូវនឺងទីផ្សារនោះទេ លោកអ្នកអាចមកទទួលបានផលិតផល Demo ពីខាងយើងខ្ញុំដើម្បីសាកល្បង និងដាក់លក់ ឬមកទទួលសេវាកម្មដោយផ្ទាល់នៅតាមស្ដង់ក្រុមហ៊ុននីមួយៗដើម្បីយល់ដឺងពីគុណភាព។

គួរបញ្ជាក់ផងដែរថា ផលិតផលទាំងអស់នោះ សុទ្ធតែជាផលិតផលម៉ាកល្បី និងមានគុណភាពល្អមកពីបណ្ដាលប្រទេសជាច្រើនដូចជា សហរដ្ឋអាមេរិក អាល្លឺម៉ង់ តួកគី កូរ៉េ ហុងកុង សិង្ហបុរី ម៉ាឡេស៊ី ថៃ និងវៀតណាម។

កុំភ្លេចណា! ជួបគ្នានៅកោះពេជ្រ អាគារ A!!!

September 16, 2017

ស្មាតហ្វូនកាមេរ៉ា 4 គ្រាប់របស់ Huawei អាចមិនមែន Mate 10

កន្លងមកធ្លាប់មានព័ត៌មានជាច្រើននិយាយថា ក្រុមហ៊ុន Huawei អាចនឹងដាក់ចេញនូវទូរស័ព្ទត្រកូល Mate បំពាក់នូវកាមេរ៉ារហូតដល់ 4 គ្រាប់ ប៉ុន្ដែពេលនេះប្រហែលជាមិនមែនទេ ខណៈរូបភាពបែកធ្លាយបានបង្ហាញថា វាជាត្រកូល Nova ទៅវិញទេ។

យោងតាមព័ត៌មានបែកធ្លាយលើប្រព័ន្ធអ៊ីនធើណិត ឱ្យដឹងថាក្រុមហ៊ុន Huawei បានបំពាក់កាមេរ៉ា 4 គ្រាប់ (មុខ 2 និងក្រោយ 2) លើស្មាតហ្វូនស៊េរីថ្មី គឺ Huawei nova 2i ដែលឆ្លុះបញ្ចាំងពីភាពខ្លាំងនៃបច្ចេកវិជ្ជា ការថតរូបបែប Selfie-Centric ស៊េរីថ្មីទំនើប។ Nova 2i មិនមែនជាស្មាតហ្វូនដែលមានទំហំតូធំ ខណៈវាមានទំហំអេក្រង់ 5.9 អ៊ីញ ជាមួយនឹងកម្រិតអេក្រង់ FullHD+ (2160x1080p) ដែលមាន 18:9 Aspect Ratio មាន Ram ទំហំ 4GB និង Memory ក្នុងម៉ាស៊ីនទំហំ 64GB អាចបន្ថែម microSD ទំហំដល់ទៅ 256GB។ ក្នុងនោះ វាអាចបំពាក់នូវឈីប HiSilicon Kirin octa-core SoC ដែលមានល្បឿន 2.36GHz ថាមពលថ្ម 3,240mAh ប្រព័ន្ធប្រតិបត្តិការ Android 7.0 Nougat ដំណើរការជាមួយនឹង EMUI5.1 ផងដែរ។ ចំពោះកាមេរ៉ាទាំង 4 របស់ស្មាតហ្វូននេះ គឺភ្លោះមុខ និងភ្លោះក្រោយ ដោយនៅផ្នែកខាងក្រោយមានទំហ 16MP + 2MP ចំណែកកាមេរ៉ាភ្លោះខាងមុខគឺ 13MP + 2MP រួមជាមួយនឹងភ្លើង LED Flash ផងដែរ។

សម្រាប់ Huawei Nova ជាស្មាតហ្វូនដែលត្រូវបានដាក់បង្ហាញកាលនៅឆ្នាំ 2016 ដោយឈ្មោះរបស់វាមានប្រភពមកពីពាក្យ “ការបង្កើតថ្មី (Innovation)” ដែលជាទិដ្ឋភាពស្នូលនៃទស្សនវិជ្ជារបស់ក្រុមហ៊ុន Huawei ហើយរូបរាងរបស់វាត្រូវបានរចនាឡើងយ៉ាងល្អប្រណីតជាស្មាតហ្វូនស៊េរីទំនើប ថ្នាក់កណ្តាល មានសមត្ថភាពល្អ គ្រប់ចំណុចលើសពីតម្លៃ ដោយផ្តល់នូវលក្ខណៈពិសេស និងមុខងារល្អបំផុតមិនគួរឱ្យជឿ សម្រាប់អតិថិជន ហើយជាពិសេស ភ្ជាប់ជាមួយទាំងកាមេរ៉ាដ៏ល្អឥតខ្ចោះ រស់រវើក និងមានអាយុកាលយូរអង្វែង៕

September 16, 2017

Bournemouth ទទួលបាន3ពិន្ទុជាលើកដំបូង

ការស៊ុតបាល់បញ្ចូលទី1គ្រាប់ដ៏ល្អរបស់ខ្សែប្រយុទ្ធ Jermain Defoe បានជួយឱ្យក្រុមម្ចាស់ផ្ទះBournemouth ទទួលបានពិន្ទុជាលើកដំបូងក្នុងការប្រកួតក្របខណ្ឌ English Premier League ក្នុងរដូវកាលនេះ បន្ទាប់ពីយកឈ្នះលើក្រុមចំណូលថ្មី Brighton ក្នុងលទ្ធផល 2-1។

ក្នុងការប្រកួតនាសប្តាហ៍ទី5នេះម្ចាស់ផ្ទះ Bournemouth ស្ទើរតែក្លាយទៅជាក្រុមរងគ្រោះជាថ្មីម្តងទៀតទៅហើយ ខណៈត្រូវក្រុមភ្ញៀវ Brighton រកបានគ្រាប់បាល់បញ្ចូលទីនាំមុខ1គ្រាប់មុនក្នុងនាទីទី55 ដោយខ្សែបម្រើ March S។ តែយ៉ាងណាក៏ដោយ នៅនាទីទី 67 Bournemouth មានឱកាសរកគ្រាប់បាល់បាន1គ្រាប់វិញ ពីការលេងសហការគ្នាល្អរវាង Jordon Ibe ដែលទើបផ្ទេរមកពីក្រុម Liverpool ជាមួយនឹង Andrew Surman។ 6នាទីក្រោយមក Jermain Defoe បានទម្លុះសំណាញទី Brighton ជាថ្មីម្តងទៀត។

បើទោះបីជាទទួលបាន3ពិន្ទុពីការប្រកួតនេះ ក៏ Bournemouth មិនអាចឡើងផុតពីចំណាត់ថ្នាក់ទី19 ក្នុងតារាងឡើយ។

ក្រុមទាំងពីរនឹងត្រូវជួបគ្នាម្តងទៀតនៅឯកីឡដ្ឋាន Vitality នៅថ្ងៃអង្គារក្នុងជុំទី 3 នៃក្របខណ្ឌ EFL Cup៕

September 16, 2017

ហ្គេមអ្នកស៊ើបអង្កេត ដែលសូម្បីតែអ្នកស៊ើបអង្កេត ឬប៉ូលិសមួយចំនួនក៏រកមិនឃើញដែរ

ហ្គេមស៊ើបអង្កេតគឺជាហ្គេមដែលចាំបាច់ត្រូវប្រើការសង្កេត ភាពឈ្លាសវៃ ការថ្លឹងថ្លែងរកភាពដែលអាចទៅរួច និងចំណេះដឹងជុំវិញខ្លួនខ្ពស់ ដូច្នេះបើលោកអ្នកជឿជាក់លើខ្លួនឯងថា ជាមនុស្សដែលមានសមត្ថភាពគ្រប់គ្រាន់នោះ ថ្ងៃនេះគេហទំព័រ ឡារ៉ែន សូមនាំលោកអ្នកមកលេងហ្គេមអ្នកស៊ើបអង្កេតដូចខាងក្រោមនេះ។ ចូរសង្កេតមើលរូបភាព និងអានសំណួរឱ្យបានច្បាស់ រួចហើយយើងនាំគ្នាមកមើលថា តើលោកអ្នកមានសមត្ថភាពអាចរកឃើញចម្លើយដែលល្អ និងត្រឹមត្រូវបំផុតបានដែរឬទេ?

(ចំពោះអ្នកចូលរួមលេងហ្គេមនេះ ហើយឆ្លើយត្រូវ ឬរកឃើញចម្លើយដែលល្អ និងត្រឹមត្រូវបំផុតនោះ ឡារ៉ែន នឹងមានរង្វាន់ជាទីគាប់ចិត្តចំនួន 1 រង្វាន់ ដូច្នេះសូមមិត្តអ្នកអានដែលគិតថា ខ្លួនឯងមានភាពឆ្លាតវាងវៃ ប៉ិនសង្កេត និងមានសមត្ថភាពគ្រប់គ្រាន់នោះ សូមឆ្លើយនៅក្នុងComment ព្រមទាំងដាក់លេខទូរស័ព្ទរបស់លោកអ្នកមកជាមួយផង ដើម្បីឱ្យក្រុមការងាររបស់គេហទំព័រ ឡារ៉ែនងាយស្រួលក្នុងការទំនាក់ទំនងទៅវិញដើម្បីជូនរង្វាន់។ ចំណែកឯចម្លើយ គេហទំព័រ ឡារ៉ែននឹងផ្សាយជូននៅព្រឹកថ្ងៃច័ន្ទស្អែក)

តើលោកអ្នកត្រៀមខ្លួនរួចហើយឬនៅ? បើរួចរាល់ហើយ…សូមមើលសំណួរដូចតទៅៈ

ឃាតកម្មក្នុងសាលារៀន

ក្នុងថ្ងៃដំបូងនៃបវេសនកាល លោកគ្រូបង្រៀនមុខវិជ្ជាភូមិវិទ្យាមួយរូបត្រូវរងអំពើឃាតកម្មដ៏អាថ៌កំបាំង។ ប៉ូលិសចាប់ជនសង្ស័យបានចំនួន 4នាក់ រួមមាន អ្នកមើលថែសួនច្បារក្នុងសាលា លោកគ្រូបង្រៀនមុខវិជ្ជាគណិតវិទ្យា លោកគ្រូកីឡា និងលោកគ្រូនាយក ដែលនៅពេលកើតហេតុឃាតកម្មនោះ ទាំង 4នាក់ សុទ្ធតែអះអាងថា ខ្លួនកំពុងធ្វើការងាររៀងៗខ្លួន ដូចជា ៖
– អ្នកមើលថែសួនច្បារ អះអាងថា ខ្លួនកំពុងតែកាត់មែកឈើ និងរៀបចំសួនច្បារ។
– គ្រូគណិតវិទ្យាអះអាងថា ខ្លួនកំពុងតែកែលំហាត់ប្រឡងរបស់សិស្ស។
– គ្រូកីឡាអះអាងថា ខ្លួនកំពុងតែលេងបាល់បោះនៅឯតារាងបាល់។
– លោកគ្រូនាយកអះអាងថា ខ្លួនកំពុងតែធ្វើការនៅក្នុងបន្ទប់ធ្វើការរបស់ខ្លួនឯង។

ឃាតករត្រូវបានចាប់ខ្លួនភ្លាមតែម្ដងបន្ទាប់ពោលពាក្យអះអាងរបស់ខ្លួនរួច។ តើនរណាជាឃាតករដែលសម្លាប់លោកគ្រូភូមិវិទ្យា និងតើហេតុអីបានប៉ូលិសដឹង?
ស្រាវជ្រាវ និងជូនរង្វាន់ដោយ តាវ៉ែនតា

September 16, 2017

Author: វល័ក្ខ