ភ្នំពេញៈ ស្របពេលកំណើននៃការទៅដល់របស់ភ្ញៀវទេសចរណ៍ជាតិ និងអន្តរជាតិ អភិបាលខេត្តព្រះសីហនុ បានអំពាវនាវឲ្យអ្នកវិនិយោគក្នុងស្រុក និងអន្តរជាតិចូលទៅវិនិយោគ សាងសង់សណ្ឋាគារក្នុងខេត្តនៃតំបន់ឆ្នេរនេះ។
លោក យន្ត មីន អភិបាលខេត្តព្រះសីហនុ បានថ្លែងឲ្យដឹងតាមទូរស័ព្ទនាពេលថ្មីៗនេះថា ខេត្តព្រះសីហនុកំពុងខ្វះបន្ទប់សម្រាប់ភ្ញៀវស្នាក់នៅជាប្រចាំ ពិសេសចុងសប្តាហ៍ និងពិធីបុណ្យទាននានា ហេតុនេះបើអ្នកវិនិយោគណាមានលទ្ឋភាពសូមមកវិនិយោគសាងសង់សណ្ឋាគារ ឬផ្ទះសំណាក់នៅក្នុងខេត្តនេះ ហើយលោកជឿជាក់ថា ការវិនិយោគបែបនេះនឹងទទួលបានជោគជ័យ និងប្រាក់ចំណេញខ្ពស់។
លោកបន្តថា “បច្ចុប្បន្នសណ្ឋាគារជាច្រើន ត្រូវបានជួលដោយជនជាតិចិន ធ្វើកាស៊ីណូ ដែលធ្វើឲ្យចំនួនបន្ទប់សណ្ឋាគារមានការខ្វះខាតខ្លាំង ស្របពេលភ្ញៀវទេសចរណ៍ជាតិ និងអន្តរជាតិបានមកទស្សនាខេត្តនេះ កើនឡើងជាប្រចាំ។
លោកបន្តថា “ខេត្តព្រះសីហនុ កំពុងបង្ហាញសក្តានុពលលើវិស័យជាច្រើន ដែលខ្ញុំគិតថារយៈពេល 5ឆ្នាំខាងមុខ ខេត្តនេះនឹងក្លាយជាប៉ូលសេដ្ឋកិច្ចទី2បន្ទាប់ពីរាជធានីភ្នំពេញ។
ទោះជាយ៉ាងណា រដ្ឋមន្ត្រីក្រសួងទេសចរណ៍លោក ថោង ខុន បានថ្លែងថា ចំនួនសណ្ឋាគារនៅខេត្តព្រះសីហនុ ពិតជាប្រឈមមុខនឹងការខ្វះខាតមែននាពេលបច្ចុប្បន្ននេះ ប៉ុន្តែសណ្ឋាគារចន្លោះពី 2000 ទៅ 3000បន្ទប់ទៀតនឹងដាក់ឲ្យដំណើរការនៅឆ្នាំ 2018- 2019ខាងមុខនេះ ដែលធ្វើឲ្យចំនួនសណ្ឋាគារលែងសូវចោទជាបញ្ហាហើយ។
លោកបន្តថា “ចាប់តាំងពីតំបន់ឆ្នេរត្រូវបានដាក់បញ្ចួលជាសមាជិកក្លឹបឆ្នេរស្អាតជាងគេនៅលើពិភពលោក ចំនួនភ្ញៀវទេសចរណ៍ជាតិ និងអន្តរជាតិមានការកើនឡើងយ៉ាងច្រើន។ លោកបន្តថា “ខេត្តព្រះសីហនុ កំពុងបង្ហាញសក្តានុពលយ៉ាងខ្លាំង រាប់តាំងពីកំពង់ផែ ព្រលានយន្តហោះ ការតភ្ជាប់ផ្លូវគោក ផ្លូវទឹក និងការមកដល់នូវអ្នកវិនិយោគកាន់តែច្រើន។
ទោះជាយ៉ាងណាលោកថោង ខុនបានសម្តែងកង្វល់ជាច្រើនផងដែរទាក់ទងនឹងការបំពុលបរិស្ថាននៅតំបន់ឆ្នេរ នៅពេលមានវត្តមានអ្នកទេសចរណ៍កាន់តែច្រើន នៅពេលមានការអភិវឌ្ឍកាន់តែច្រើន ដែលទាមទារឲ្យមានការគិតគូយ៉ាងម៉ត់ចត់ផងដែរ ពីស្ថាប័នពាក់ព័ន្ឋ ដើម្បីធ្វើឲ្យខេត្តព្រះសីហនុមាននិរន្តរភាព៕
