វល័ក្ខ - La Reine Media

ការអភិរក្សតំបន់អេកូទេសចរណ៍ បានធ្វើឱ្យប្រជាជនប្ដូរឥរិយាបថឈប់កាប់ព្រៃឈើ និងឈប់ប្រមាញ់សត្វ

កន្លងមកមានប្រជាជនកម្ពុជាជាច្រើនដែលរស់នៅតាមតំបន់ព្រៃភ្នំបានចិញ្ចឹមជីវិតដោយពឹងផ្អែកការលើការរកចំណូលបានពីអនុផល និងកាប់ព្រៃឈើ និងប្រមាញ់សត្វជាដើម ប៉ុន្ដែក្រោយពីមានការអភិវឌ្ឍលើវិស័យអេកូទេសចរណ៍មក ប្រជាជនទាំងនោះបានផ្លាស់ប្ដូរឥរិយាបថមកស្រឡាញ់ និងថែរក្សាធម្មជាតិដើម្បីទាញយកប្រាក់ចំណូលជាជាងកាប់បំផ្លាញព្រៃឈើ និងធម្មជាតិ។

ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍ បានលើកឡើងថា អេកូទេសចរណ៍ជាផ្នែកមួយនៃវិស័យទេសចរណ៍ធម្មជាតិ ឬជាសកម្មភាពទេសចរណ៍ទៅក្នុងតំបន់ទេសចរណ៍ធម្មជាតិមួយដែលមានការទទួលខុសត្រូវ។ វិស័យនេះត្រូវបានពិភពលោក ពិសេសអង្គការទេសចរណ៍ពិភពលោកយកចិត្ដទុកដាក់ និងណែនាំទៅគ្រប់ប្រទេសទាំងអស់ឱ្យមានការយកចិត្ដទុកដាក់លើវិស័យនេះ ព្រោះវិស័យនេះអាចរួមចំណែកទប់អត្រាការកើនឡើងនៃកម្ដៅភពផែនដីបាន និងថែមទាំងជួយកាត់បន្ថយភាពក្រីក្ររបស់ប្រជាជនតាមរយៈការកាត់បន្ថយការធ្វើចំណាកស្រុកបានទៀតផង ដូច្នេះហើយទើបវិស័យអេកូទេសចរណ៍មានការកើនឡើងក្នុងរង្វង់20% ខណៈដែលវិស័យទេសចរណ៍វប្បធម៌កើនឡើងក្នុងរង្វង់8%។

លោករដ្ឋមន្ដ្រីក្រសួងទេសចរណ៍បានបញ្ជាក់ទៀតថា មូលហេតុដែលវិស័យអេកូទេសចរណ៍មានការពាក់ព័ន្ធ និងអាចជួយទប់ស្កាត់ការកើនឡើងនៃកម្ដៅផែនដីនោះ ព្រោះនៅពេលក្រុមភ្ញៀវទេសចរទៅដល់កន្លែងមួយដែលមានតំបន់អេកូទេសចរណ៍ សហគមន៍ និងប្រជាជនដែលរស់នៅទីនោះនឹងទទួលបានចំណូលពីធនធានធម្មជាតិទាំងអស់នោះ។

ឯកឧត្ដម ថោង ខុន បញ្ជាក់ថា៖ «សព្វថ្ងៃបើគ្មានសកម្មភាពទេសចរណ៍នៅទីនោះ (តំបន់អេកូទេសចរណ៍) ប្រជាជនបានចំណូលពីព្រៃឈើតាមរយៈការបោចវល្លិ៍ (អនុផលព្រៃឈើ) ប៉ុន្ដែជួនកាលពួកគាត់អាចទៅហួសពីការបោចវល្លិ៍ ឈានទៅដល់ការកាប់ព្រៃឈើ និងប្រមាញ់សត្វព្រៃជាដើម ដូច្នេះយើងអត់ចង់ឱ្យប្រជាជនធ្វើសកម្មភាពបែបនេះទេ គឺពួកគេត្រូវរក្សាទុកព្រៃឈើ រក្សាទុកសត្វព្រៃស្អាតៗឱ្យភ្ញៀវទេសចរមើលកម្សាន្ត ព្រោះនៅពេលភ្ញៀវទេសចរទៅដល់ទីនោះ ការចំណាយរបស់ពួកគាត់នឹងបានចូលទៅដល់ដៃរបស់ប្រជាជនរស់នៅក្នុងសហគមន៍របស់ពួកគាត់ផ្ទាល់ ដូច្នេះគាត់ឈប់បាញ់សត្វ គាត់ឈប់កាប់ឈើ ហើយប្ដូរឥរិយាបថងាកមកជួយការពារធនធានធម្មជាតិទាំងនោះវិញម្ដង»។

ជាមួយគ្នានេះ ឯកឧត្ដមបានបង្ហាញពីអំណះអំណាងថា៖ «ដូចជាប្រជាជនរស់នៅតំបន់ជីផាត តំបន់ម្លប់បៃតង និងកន្លែងដទៃទៀត ពួកគាត់បានបង្ហាញពីអារម្មណ៍ថា គាត់អត់ចង់បាញ់សម្លាប់សត្វព្រៃទេ គាត់មិនចង់កាប់ព្រៃឈើទេ តែអ្វីដែលគាត់ចង់បានគឺលុយ ដូច្នេះបើគាត់អាចរកលុយបានពីទេសចរណ៍ហើយ មានរឿងអីដែលគាត់ត្រូវទៅកាប់ព្រៃឈើ និងសម្លាប់សត្វព្រៃទៀត ដូច្នេះការបញ្ជ្រាបចូលចំណេះដឹង និងការអភិរក្សតំបន់អេកូទេសចរណ៍ពិតបានទទួលបានលទ្ធផលល្អមែន»៕

September 27, 2017

រូបមន្តបំពោកផ្ទៃមុខប្រឆាំង នឹងបញ្ហាមុខមុន ដោយបន្លែផ្លែឈើពណ៌ក្រហម

រូបមន្តបំពោកផ្ទៃ មុខដែលបានពីធម្មជាតិកំពុងតែក្លាយជាទីពេញនិយមរបស់កំលោះក្រមុំយ៉ាង ខ្លាំង ព្រោះក្រៅ ពីគ្មានអាការប្រតិកម្មចាញ់លើផ្ទៃមុខហើយនោះ រូបមន្តបំពោកផ្ទៃមុខដោយធម្មជាតិនេះនៅជួយសន្សំប្រាក់របស់លោកអ្នកបានទៀតផង។

រូបមន្តបំពោកផ្ទៃមុខដោយផលិតផលធម្មជាតិនេះភាគច្រើននឹងជួយឱ្យលោកអ្នកមានផ្ទៃមុខស្អាតស្រស់ថ្លា និងគ្មានស្លាកស្នាមហើយ ថ្ងៃនេះ ឡារ៉ែន មានរូបមន្តបំពោកផ្ទៃមុខពីធម្មជាតិមួយទៀត ដែលជួយប្រឆាំងនឹងការកើតមុននៅលើផ្ទៃមុខមកជម្រាបជូន នោះគឺរូបមន្តបំពោកផ្ទៃមុខដោយបន្លែផ្លែឈើពណ៌ក្រហម ព្រោះបន្លែ និងផ្លែឈើពណ៌ក្រហមមានគុណសម្បត្តិជួយកាត់បន្ថយភាពឡើងខ្លាញ់ កម្ចាត់កោសិកាស្បែកដែលងាប់ចេញមិនឱ្យនៅញ៉ុកណែនបង្កកើតជាមុនកាត់បន្ថយស្លាកស្នាមឱ្យរលុបបាត់អស់ដូចធម្មជាតិព្រមទាំងថែបំប៉នស្បែកមុខឱ្យមានសំណើមស្រស់បស់ទៀតផង។

រូបមន្តផ្លែប៉ោមទឹកឃ្មុំ ការពារមុននិងលុបស្នាមអុចខ្មៅ
វិធីធ្វើ : កិនផ្លែប៉ោម 1ផ្លែឱ្យម៉ដ្ឋ លាយជាមួយទឹកឃ្មុំ 2ស្លាបព្រាកាហ្វេ រួចហើយយកមកលាបបំពោកនៅលើកន្លែង ដែលកើតមុន ទុកចោលប្រមាណជា 15 នាទី រួចសឹមលាងចេញដោយទឹកក្តៅឧណ្ហៗ ហើយលាងសម្អាតម្ដងទៀតដោយទឹកធម្មតា និងជូតមុខឱ្យស្ងួត។

រូបមន្តផ្លែប៉េងប៉ោះ កាត់បន្ថយខ្លាញ់ និងកម្ចាត់កោសិកាខូចៗចេញ
វិធីធ្វើ : ចិញ្ច្រាំប៉េងប៉ោះ 1ផ្លែឱ្យល្អិតយកមកលាបបំពោកឱ្យសព្វពេញផ្ទៃមុខ យកម្រាមដៃលុញម៉ាស្សាជារាងរង្វង់ថ្នមៗ រួចទុកចោលឱ្យរាងស្ងួតបន្តិច ឬមានអារម្មណ៍ថា ស្បែកមុខរាង តឹងសឹមលាងចេញដោយទឹកស្អាត រួចជូតមុខឱ្យស្ងួតជាការស្រេច។

រូបមន្តផ្លែឪឡឹកបង្កើនសំណើម និងភាពស្រស់បស់ដល់ស្បែកមុខ
វិធីធ្វើ : កិនសាច់ឪឡឹក 2ដុំធំៗល្មមឱ្យល្អិត រួចយកមកលាបបំពោកឱ្យសព្វលើផ្ទៃមុខ ទុកចោល ប្រមាណ10នាទី ឬរហូតមានអារម្មណ៍ថាតឹងស្បែកសឹមលាងចេញដោយទឹកក្តៅឧណ្ហៗ រួចតាមដោយទឹកធម្មតា និងបញ្ចប់ដោយការជូតមុខឱ្យស្អាត។

លាបបំពោកថែទាំស្បែកមុខឆ្លាស់គ្នា ដោយរូបមន្តផ្លែឈើដែលបានណែនាំនេះក្នុងមួយសប្តាហ៍1ដង ស្បែកមុខនឹងស្អាតភ្លឺថ្លាជាក់ជាមិនខាន៕

September 27, 2017

គម្រោងរថយន្តអគ្គិសនីរបស់ Mercedes ចាប់ផ្ដើមនៅឆ្នាំក្រោយ

ក្រោយពីក្រុមហ៊ុនផលិតរថយន្តល្បីៗមួយចំនួនចាប់ផ្ដើមគម្រោងផលិតរថយន្តអគ្គិសនីរួចមក ក្រុមហ៊ុន Daimler AG ដែលជាក្រុមហ៊ុនមេរបស់ រថយន្តម៉ាកល្បី Mercedes-Benz ក៏បានប្រកាសកាលពីពេលថ្មីៗនេះដែរ ដោយបាននិយាយថា នឹងបោះទុនជាង1ពាន់លានដុល្លារ សម្រាប់គម្រោងអភិវឌ្ឍន៍រថយន្តអគ្គិសនីសម្រាប់វាយលុកទីផ្សារឆ្នាំ 2022 ក្រោមម៉ាក EQ។

ក្នុងកម្មវិធីបង្ហាញពិព័រណ៍រថយន្ត Motor Show នៅទីក្រុងប៉ារីស ប្រទេសបារាំង ក្រុមហ៊ុន Mercedes បង្ហាញនូវគំរូរថយន្តប្រើប្រាស់ថាមពលអគ្គិសនី EQ ដែលជាគម្រោងសម្រាប់វាយលុកទីផ្សារអាមេរិក។ គម្រោងនេះ មានការសហការជាមួយនឹងរោងចក្រមួយដែលមានទីតាំងនៅក្រៅទីក្រុង Daimler នៃរដ្ឋ Alabama ហើយនឹងចាប់ផ្ដើមដំណើរការចាប់ពីឆ្នាំ 2018 ខាងមុខនេះតទៅ។

រថយន្ត EQ នេះ នឹងមានកម្លាំង 400 សេះ និងមានសម្ទុះល្បឿនពី 0 ទៅ 100 km/h ប្រើពេល 5 វិនាទី ជាមួយនឹងកម្លាំងថាមពលអាគុយ 70 KW អាចបើកបានចម្ងាយប្រហែល 500 Km ក្រោយពីសាកថ្មពេញ។ បន្ទាប់ពីគម្រោងនេះជោគជ័យ ក្រុមហ៊ុនអាចនឹងត្រៀមបញ្ចេញបច្ចេកវិទ្យាសាកថ្មកម្រិតលឿន ដែលអាចសាកតែ 5 នាទីហើយជិះបាន 100 Km ដូចនឹងរថយន្តរបស់ក្រុមហ៊ុន Tesla ដែរ៕

វីដេអូ៖

September 26, 2017

ការដាំដុះផ្កា ជាឱកាស «មាស» សម្រាប់កសិករ

កម្ពុជាហាក់មើលរំលងមុខរបរដាំផ្កា ខណៈដែលប្រទេសកម្ពុជា មានតម្រូវការប្រើប្រាស់ផ្កាក្នុងបរិមាណដ៏ច្រើនជារៀងរាល់ថ្ងៃ។ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ថ្មីនេះបានជំរុញឱ្យមន្ត្រីក្រោមឱវាទក្រសួង ធ្វើការសិក្សាស្រាវជ្រាវទៅលើពូជផ្កាសម្រាប់យកមកដាំដុះនៅក្នុងស្រុក ដោយសារតម្រូវការផ្កានៅកម្ពុជានាពេលបច្ចុប្បន្នកំពុងមានការកើនឡើងយ៉ាងច្រើន។

ក្នុងឱកាសធ្វើជាគណៈអធិបតីក្នុងពិធីប្រកាសដាក់ឱ្យប្រើប្រាស់សៀវភៅសមិទ្ធផលនៃការស្រាវជ្រាវ និងអភិវឌ្ឍន៍បច្ចេកវិទ្យាចំនួន3ក្បាល និងខួបទី18ឆ្នាំ របស់វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (Cardi) ឯកឧត្តមរដ្ឋមន្ត្រី បានជំរុញឱ្យថ្នាក់ដឹកនាំវិទ្យាស្ថាននេះសិក្សាស្រាវជ្រាវលើប្រភេទពូជផ្កាសម្រាប់ដាំដុះនៅកម្ពុជា ដើម្បីបំផុសឱ្យប្រជាពលរដ្ឋដាំផ្កាឱ្យបានច្រើនឆ្លើយតបទៅនឹងតម្រូវការទីផ្សារ ដែលរួមចំណែកដល់ការជំរុញកំណើនសេដ្ឋកិច្ចជាតិ។

ឯកឧត្តម វេង សាខុន មានប្រសាសន៍ថា៖ “ការជំរុញការដាំដុះបន្លែចេះតែធ្វើទៅ តែយើងក៏កុំភ្លេចរឿងដំណាំផ្កាដែរ។ ខ្ញុំពេលទៅចូលរួមពិធីមង្គលការខ្លះ គេហ៊ានចំណាយប្រាក់រហូតដល់10ម៉ឺនដុល្លារក៏មានដែរ ហើយកន្លែងខ្លះទៀតហ៊ានចំណាយរហូតដល់កន្លះលានដុល្លារ។ យើងគិតតែរឿងហូប តែយើងភ្លេចគិតរឿងលម្អ។ យើងឃើញក្នុងកម្មវិធីតុបតែងផ្កា កន្លែងណាក៏គេត្រូវការផ្កាដែរ។ នេះជាឱកាសមាសរបស់យើង។ តម្រូវការផ្កាដើម្បីដាក់តាំងលម្អនៅកម្ពុជាបានកើនឡើង ស្របពេលដែលជីវភាពរបស់ប្រជាជនខ្មែរមានភាពកាន់តែប្រសើរ ដែលធ្វើឱ្យជីវិតរស់នៅកាន់តែមានភាពស៊ីវិល័យ។

លោកបណ្ឌិត អ៊ុក ម៉ាការ៉ា នាយកវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា បានថ្លែងថា វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ក៏ធ្លាប់បានផ្តោតលើការសិក្សាពីពូជផ្កានាពេលកន្លងមកដែរ តែត្រូវជាប់គាំងវិញដោយសារកង្វះខាតទឹកស្អាតសម្រាប់បន្តការងារ។ ការប្រើប្រាស់ទឹកស្រះដែលល្អក់ និងមានសារធាតុខ្លះនៅក្នុងនោះ មិនទាន់សមស្របសម្រាប់ការងារស្រាវជ្រាវលើដំណាំផ្កានេះទេ។ លោកបណ្ឌិត បានបញ្ជាក់ថា៖“យើងនឹងបន្តការងារនេះឡើងវិញ នៅពេលដែលទឹកស្អាតទៅដល់វិទ្យាស្ថាននេះនៅពេលខាងមុខ។

កញ្ញា ឡេង សុជាតិ អ្នកគ្រប់គ្រងហាងផ្កា Phnom Penh Flower ដែលបានបើកដំណើរការរយៈពេលប្រហែល2ឆ្នាំកន្លងមក បានប្រាប់ថា ហាងរបស់់ខ្លួនបាននាំចូលផ្កាភាគច្រើនពីប្រទេសវៀតណាម ថៃនិងប្រទេសចិន ដោយសារពិបាករកផ្កានៅក្នុងស្រុកដែលមានស្ថិរភាព និងស្តង់ដារកម្រិតខ្ពស់។ កញ្ញាអះអាងថា ប្រសិនបើមានការដាំដុះពិតប្រាកដនៅកម្ពុជាហាងរបស់ខ្លួនក៏មិនចង់ទៅនាំចូលផ្កាពីក្រៅប្រទេសដែលមានតម្លៃថ្លៃនោះទេ។

កញ្ញា សុជាតិ និយាយថា៖“ខ្ញុំយល់ថាវាពិតជាល្អណាស់ បើសិនមានការបំផុសឱ្យមានការដាំដុះផ្កាមែននោះ យើងនឹងទទួលបានវត្ថុធាតុដើមក្នុងស្រុក ហើយយើងមិនលំបាកបំពេញបែបបទសម្រាប់ការនាំចូលអីនោះទេ។ លើសពីនេះចំណូលពីផ្កានេះ ទោះតិច ឬច្រើនវានឹងធ្លាក់ទៅលើដៃអ្នកដាំដុះក្នុងស្រុករបស់យើងទាំងអស់”៕

September 26, 2017

Jaguar ចេញរថយន្តអគ្គិសនី យកគំរូតាមស៊េរីឆ្នាំ 1968

កាលពីថ្ងៃម្សិលមិញក្រុមហ៊ុន Jaguar របស់ចក្រភពអង់គ្លេស បានបញ្ចេញនូវរថយន្តប្រើប្រាស់ថាមពលអគ្គិសនី E Type Zero ថ្មីម៉ូដែលយកគំរូតាមរថយន្តស៊េរីចាស់ដែលខ្លួនធ្លាប់បានផលិតតាំងពីឆ្នាំ 1968 ដែលអាចសាកថ្មម្ដងអាចជិះបានចម្ងាយ 273 គីឡូម៉ែត្រ។

ការបញ្ចេញរថយន្តប្រើប្រាស់ថាមពលអគ្គិសនីនេះ Jaguar ធ្វើឡើងដើម្បីរំឭកដល់ភាពជោគជ័យរបស់ខ្លួនកាលពីអតីតកាល និងចង់ប្រាប់ទៅពិភពលោកពីគម្រោងបង្កើតរថយន្តមិនប្រើប្រេងឥន្ធនៈជាលើកដំបូងរបស់ខ្លួនចាប់ពីឆ្នាំ 2020 នេះតទៅ។ រថយន្តថ្មីតែធ្វើតាមគំរូចាស់នេះ នឹងមានកម្លាំងថាមពល 220 KW ជាមួយនឹងកម្លាំង 294 សេះ ដែលអាចរត់បានក្នុងល្បឿនសម្ទុះពី 0 ទៅ 100 គីឡូម៉ែត្រប្រើរយៈពេលដោយ 5.5វិនាទី ជាមួយទំហំម៉ាស៊ីន 1.5 L ដែលអាចជិះបាន 170 ម៉ាយល៍ ដោយគ្រាន់តែសាកថ្មពី 6 ទៅ 7 ម៉ោងប៉ុណ្ណោះ។

ចំពោះគម្រោងរថយន្តប្រើប្រាស់ថាមពលអគ្គិសនីនេះ JLR Group អាចដើរក្រោយគេបន្ដិច ខណៈដែលក្រុមហ៊ុនធំៗជាច្រើនក្នុងពិភពលោកបានបង្កើត និងដាក់លក់រួចមកហើយ។ នាយកប្រតិបត្តិរបស់ JLR លោក Ralf Speth បានឱ្យដឹងថា ក្រុមហ៊ុនលោកនឹងដាក់ចេញនូវស៊េរីរថយន្តប្រើប្រាស់ថាមពលអគ្គិសនី និងប្រភេទរថយន្ត Plug-in Hybrid និងពាក់កណ្ដាល Hybrid ប៉ុន្ដែសម្រាប់ឆ្នាំក្រោយ ក្រុមហ៊ុននឹងធ្វើការដាក់ចេញរថយន្តប្រភេទSUV Jaguar I-Pace ដំបូងដែលប្រើថាមពលអគ្គិសនី៕

September 26, 2017

សេវាតាក់ស៊ីអនឡាញថ្មីមួយទៀតនឹងមានវត្តមាននៅកម្ពុជាឆាប់ៗនេះ

ភ្នំពេញ៖ គេថា កម្ពុជាជាប្រទេសដែលមានទីផ្សារតូចមួយនៅក្នុងតំបន់អាស៊ី តែមានសក្តានុពលខ្លាំងក្នុងការវិនិយោគលើគ្រប់វិស័យ ដោយក្នុងនោះសេវាតាក់ស៊ីតាមអនឡាញថ្មីមួយទៀតគ្រោងនឹងមកវិនិយោគនៅកម្ពុជាក្នុងពេលឆាប់ៗខាងមុខនេះ។

កាលពីថ្ងៃទី25 ខែកញ្ញា ឆ្នាំ2017 លោក Yee Wee Tang ប្រធានគ្រប់គ្រងក្រុមហ៊ុន Grab Taxi ប្រចាំនៅប្រទេសថៃ និងគណៈប្រតិភូអមដំណើរបានចូលជួបពិភាក្សាការងារជាមួយឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដើម្បីស្នើសុំប្រតិបត្តិការអាជីវកម្មរបស់ខ្លួនលើវិស័យដឹកជញ្ជូននៅកម្ពុជា។

ក្នុងជំនួបជាលើកដំបូងនេះ លោក Yee Wee Tang បានស្នើសុំការគាំទ្រពីក្រសួងសាធារណការ និងដឹកជញ្ជូនលើដំណើរការចាប់ផ្តើមនៃប្រតិបត្តិការអាជីវកម្មរបស់ក្រុមហ៊ុន Grab Taxi នៅក្នុងប្រទេសកម្ពុជា បន្ទាប់ពីក្រុមហ៊ុនបានរៀបចំលិខិតស្នាម និងបំពេញសំណុំបែបបទផ្សេងៗដើម្បីទទួលបានការធ្វើអាជីវកម្មលើវិស័យដឹកជញ្ជូននេះដោយស្របច្បាប់។

ជាការឆ្លើយតប ឯកឧត្តមទេសរដ្ឋមន្ត្រី ស៊ុន ចាន់ថុល បានបង្ហាញនូវការគាំទ្រដោយបានគូសបញ្ជាក់ថា៖ សេវារថយន្តតាក់ស៊ីតាមប្រព័ន្ធអនឡាញទាំងនេះនឹងជួយធ្វើឱ្យការដឹកជញ្ជូនសាធារណៈកាន់តែមានភាពងាយស្រួលឡើងក្នុងកម្រិតថ្មីមួយទៀតនៅក្នុងព្រះរាជាណាចក្រកម្ពុជា។

ជាមួយគ្នានេះ ឯកឧត្តមបានស្នើឱ្យក្រុមហ៊ុន Grab Taxi ធ្វើប្រតិបត្តិការដោយស្របតាមច្បាប់នៃព្រះរាជាណាចក្រកម្ពុជា និងបានជំរុញឱ្យក្រុមហ៊ុនធ្វើការជាមួយក្រុមអ្នកជំនាញរបស់ក្រសួងសាធារណការ និងដឹកជញ្ជូនទាក់ទងនឹងនីតិវិធីសុំស្នើអាជ្ញាប័ណ្ណ។

យ៉ាងណាក៏ដោយ ពាក់ព័ន្ធនឹងករណីនេះដែរ ឯកឧត្តម កែន រដ្ឋា នាយករងខុទ្ទកាល័យនៃក្រសួងសាធារណការ និងដឹកជញ្ជូនមានប្រសាសន៍ថា គេមិនទាន់ដឹងច្បាស់ថា ក្រុមហ៊ុននេះនឹងចាប់ផ្តើមនៅពេលណានៅឡើយទេ ដោយសារតែនេះជាជំនួបបឋមដើម្បីស្នើសុំការណែនាំពីថ្នាក់ដឹកនាំក្រសួងតែប៉ុណ្ណោះ តែទោះជាដូច្នេះក្តី ក៏ឯកឧត្តមគាំទ្រគម្រោង Grab Taxi ដែលមានបំណងចូលមកវិនិយោគបន្ថែមនៅកម្ពុជាដើម្បីជំរុញដល់វិស័យនេះឱ្យកាន់តែមានភាពប្រសើរឡើងនៅលើទីផ្សារក្នុងប្រទេសកម្ពុជាដែរ៕

September 26, 2017

ពេលមេឃងងឹត ការរៀនសូត្ររបស់កុមារក្នុងតំបន់ខ្លះត្រូវបញ្ចប់…

កង្វះខាតភ្លើងអគ្គិសនីរបស់ប្រជាជននៅតំបន់ជនបទដាច់ស្រយាលមួយចំនួននៅកម្ពុជា បានបង្អាក់ដល់ការរៀនសូត្ររបស់កុមារ ព្រោះតំបន់នៅឆ្ងាយៗពីផ្លូវជាតិទាំងអស់នោះពិបាកក្នុងការស្វែងរកភ្លើងអគ្គិសនីប្រើប្រាស់ និងភូមិខ្លះមិនមានទាំងកន្លែងបញ្ជូលភ្លើងអាគុយផង។

នៅតំបន់ខ្លះកុមារត្រូវប្រើប្រាស់ចង្កៀងប្រេងកាតបំភ្លឺ តែកុមារនៅតំបន់ខ្លះទៀតដែលអាណាព្យាបាលមិនសូវមានចំណេះដឹងខ្ពស់ ហាក់មិនបានគិតគូរដិតដល់លើការសិក្សារបស់កូននៅពេលយប់នោះទេ។

ដើម្បីដោះស្រាយបញ្ហាទាំងអស់នោះ អង្គការទស្សនៈពិភពលោក បានសហការជាមួយនឹងគម្រោង Panasonic 100 Thousand Solar Lanterns ដើម្បីផ្តល់ចង្កៀងដើរដោយពន្លឺព្រះអាទិត្យដល់ប្រជាជននៅតំបន់ជនបទដែលនៅឆ្ងាយពីចរន្តអគ្គិសនី។ គម្រោងនេះត្រូវបានគេរំពឹងថា នឹងអាចជួយកុមារតូចៗឱ្យទទួលបានពន្លឺគ្រប់គ្រាន់ដើម្បីអានសៀវភៅ និងសិក្សាបន្តនៅពេលយប់ ព្រោះពួកគេមានពេលមិនច្រើនទេក្នុងការរៀនសូត្រនៅពេលថ្ងៃដែលត្រូវចែកពេលវេលាសម្រាប់រៀនផង និងជួយធ្វើការងារផ្ទះផងនោះ។

អំពូលភ្លើងទាំងអស់នោះ ក៏ត្រូវបានគេរំពឹងថា នឹងអាចជួយផ្លាស់ប្តូរវាសនារបស់ពួកគេឱ្យមានភាពល្អប្រសើរឡើង ព្រោះថានៅពេលដែលកុមារនៅតំបន់ជនបទមានចំណេះដឹងគ្រប់គ្រាន់ដើម្បីការសិក្សារៀនសូត្រដែលល្អសមរម្យ ពួកគេនឹងអាចស្វែងរកអាជីពដែលល្អសមរម្យបាននៅថ្ងៃអនាគតដែរ៕

September 26, 2017

អគារបុរាណក្នុងក្រុងបាត់ដំបង កំពុងរង់ចាំមន្ដ្រី UNESCO មកពិនិត្យដើម្បីចុះបញ្ជីបេតិកភណ្ឌពិភពលោក

ភ្នំពេញ – ប្រជាជនទូទាំងប្រទេស ក៏ដូចជាប្រជាពលរដ្ឋរស់នៅក្នុងខេត្ដបាត់ដំបងដែរនោះ កំពុងតែមានភាពអបអរសាទរជាខ្លាំង ខណៈដំណើរការស្នើដាក់សំណង់អគារចាស់ៗ បុរាណៗប្រមាណជាង 800អគារក្នុងខេត្ដបាត់ដំបងចូលទៅក្នុងបញ្ជីបេតិកភណ្ឌពិភពលោកកំពុងតែបង្ហាញសញ្ញាណវិជ្ជមាន។

មុនសម័យអាណានិគមនិយមបារាំង ខេត្ដបាត់ដំបងគ្រាន់តែជាទីប្រជុំជនតូចមួយលាតសន្ធឹងតាមបណ្ដាយដងស្ទឹងសង្កែត្រើយខាងលិច និងមានផ្លូវតែមួយខ្សែ ព្រមទាំងមានប្រជាពលរដ្ឋរស់នៅក្នុងរង្វង់តែជាង 2,500នាក់ប៉ុណ្ណោះ។

ប៉ុន្មានខែក្រោយសន្ឋិសញ្ញាបារាំង-សៀម ព្រះករុណាព្រះបាទស៊ីសុវត្ថិទ្រង់បានចេញព្រះរាជប្រកាសលេខ66 ចុះថ្ងៃទី6 ខែធ្នូ ឆ្នាំ1907កំណត់ដែនដីបាត់ដំបងត្រូវបែងចែកជា3ខេត្ត គឺ ខេត្តបាត់ដំបង ខេត្តសៀមរាប និងខេត្តសិរីសោភ័ណ ហើយនៅឆ្នាំនេះដែរ បារាំងបានរៀបចំអភិវឌ្ឍក្រុងបាត់ដំបងដែលធ្វើឱ្យមានផ្លូវចំនួន3សំខាន់ៗគឺផ្លូវលេខ1 លេខ2 លេខ3 និងបានសាងសង់សំណង់ផ្ទះល្វែង អគារមួយចំនួន ព្រមទាំងផ្សារធំថ្មីនៅក្នុងឆ្នាំ1936។

គ្រាដែលកម្ពុជាទទួលបានឯករាជ្យក្នុងឆ្នាំ 1953 ក្រុងបាត់ដំបងត្រូវបានពង្រីកធំជាងមុន5ដង។រហូតធ្វើឱ្យខេត្ដបាត់ដំបងមានដល់ទៅ9ស្រុក គឺស្រុកបាត់ដំបង ស្រុកសង្កែ ស្រុកមោងឬស្សី ស្រុកមង្គលបូរី ស្រុកសិរីសោភ័ណ ស្រុកអូរជ្រៅ ស្រុកព្រះនេត្រព្រះ ស្រុកបាណន់ ស្រុកគាស់ក្រឡ និងតំបន់រដ្ឋបាលចំនួន2គឺ តំបន់រដ្ឋបាលបាក់ព្រា និងតំបន់រដ្ឋបាល ល្វា។

អាជ្ញាធរខេត្ដបាត់ដំបងបានបញ្ជាក់ថា នៅចំកណ្ដាលក្រុងចាប់ពីផ្លូវជាតិលេខ1 លេខ2 និងលេខ3 ដល់វត្ដដំរីស មានសំណង់ផ្ទះល្វែង ហាងលក់ទំនិញ វត្ដអារាម សារមន្ទីរ និងផ្សារធំបាត់ដំបងដែលបានសាងសង់ក្នុងដំណាក់កាល 3 ផ្សេងៗគ្នានោះនឹងត្រូវបានបង្កើតទៅជាទីក្រុងបេតិកភណ្ឌ។ ក្រោយពីបានស្នើសុំដាក់សំណង់អគារបុរាណៗទៅក្នុងបញ្ជីបេតិកភណ្ឌពិភពលោករួចមក ខេត្តបាត់ដំបងបានទាក់ទាញភ្ញៀវទេសចរមកពីប្រទេសចំនួនជាង20 ឱ្យចូលមកទស្សនាសម្រស់របស់ខ្លួន។

សំណង់អគារចាស់បុរាណៗដ៏ល្អៗដែលកំពុងឈរបង្អួតរាងនៅក្នុងខេត្ដបាត់ដំបងត្រូវបានគេមើលឃើញថា នៅមានច្រើន និងគុណភាពសំណង់ថែមទាំងនៅល្អប្រសើរទៀតផង។ ទោះជាយ៉ាងនេះក្ដី ត្រូវបានអាជ្ញាធរពាក់ព័ន្ធបញ្ជាក់ថា វាមិនមែនជារឿងងាយស្រួលទេដើម្បីទទួលបានជោគជ័យក្នុងការដាក់បញ្ចូលអគារទាំងនោះទៅក្នុងបញ្ជីបេតិកភណ្ឌពិភពលោកនោះ គឺត្រូវទាមទារឱ្យកម្ពុជាមានភាពអត់ធ្មត់ និងចំណាយពេលវេលាច្រើន ដើម្បីឱ្យតំណាងអង្គការ UNESCO ចុះមកត្រួតពិនិត្យដើម្បីវាយតម្លៃ។ ទោះយ៉ាងណា បច្ចុប្បន្នខេត្ដមួយនេះកំពុងតែទាក់ទាញភ្ញៀវទេសចរឱ្យមានការចាប់អារម្មណ៍ជាខ្លាំង ដែលអាចជំរុញឱ្យមានលំហូរសេដ្ឋកិច្ចយ៉ាងល្អមួយនៅក្នុងខេត្ដទាំងមូល៕

September 26, 2017

មនុស្សវ័យក្មេងដែលចង់រកស៊ី ត្រូវរកដើមទុនដោយវិធីណា?

ការបានក្លាយជាសហគ្រិន គឺជាក្តីស្រមៃរបស់យុវជនជាច្រើននាពេលបច្ចុប្បន្ន ព្រោះពួកគេមានគោលបំណងច្រើនផ្សេងៗគ្នា ដោយអ្នកខ្លះចង់ក្លាយជាអ្នកមាន អ្នកខ្លះចង់ក្លាយជាអ្នកជួយមនុស្សឱ្យមានការងារធ្វើច្រើន និងអ្នកខ្លះទៀតចង់បង្កើតផលិតផល ឬសេវាកម្មថ្មីៗសម្រាប់សង្គម។

ដើម្បីអាចក្លាយជាអ្នកជំនួញបាន “ដើមទុន”ជារឿងសំខាន់មួយដែលអ្នកចង់ក្លាយជាសហគ្រិនត្រូវគិតគូរឱ្យបានដិតដល់ ព្រោះមិនថាការរកស៊ីអ្វីក៏ដោយ ថវិកាមួយចំនួនដំបូងគឺទាមទារឱ្យត្រូវតែមានជាដាច់ខាត បើមិនដូច្នោះទេ អាជីវកម្មដែលនឹងបង្កើតឡើងនោះនឹងពិបាករក្សាតុល្យភាព និងស្ថេរភាពណាស់។

លោក ឃន ឈុនដារ៉ា ម្ចាស់ហាងកាហ្វេ KOI និង Tube Café បានលើកឡើងថា ការបង្កើតទុនរកស៊ីគឺមានវិធីច្រើន ដោយក្នុងនោះអ្នករកស៊ីអាចខ្ចីពីគ្រួសារ ពីកម្ចីធនាគារ ឬអាចចូលរួមគ្នាជាមួយនឹងដៃគូសហការ។ បន្ថែមពីលើនេះ លោកបានបង្ហាញពីរឿងរ៉ាវផ្ទាល់ខ្លួនរបស់លោកថា ដោយសារតែលោកមិនចង់ប្រើលុយរបស់ឪពុកម្តាយ លោកបានបដិសេធជំនួយពីអ្នកមានគុណ និងប្រើប្រាស់លុយដែលសន្សំបានផ្ទាល់ខ្លួន។

លោក ឃន ឈុនដារ៉ា បាននិយាយថា៖ «ខ្ញុំមានលុយសន្សំប្រហែល 3ម៉ឺនដុល្លារ ហើយដាក់កម្ចីបានខ្លះ បន្ទាប់មកក៏ស្វែងរកដៃគូចំនួន 3នាក់បន្ថែមទៀតមុននឹងបើកអាជីវកម្មជាលើកដំបូង»។

សហគ្រិនវ័យក្មេងខាងលើបានលើកឡើងថា ដើមទុនជារឿងសំខាន់ណាស់ តែក៏សូមកុំគិតថា វាជាឧបសគ្គធំរហូតដល់មិនហ៊ានធ្វើអ្វីសោះនោះ។ ចំណុចដែលអ្នករកស៊ីដំបូងគួរគិតផងដែរនោះគឺ គម្រោងអាជីវកម្មដែលល្អ។ អ្នកខ្លះអាចជ្រើសរើសយកការធ្វើការងារឱ្យគេសិនដើម្បីសន្សំទុន បន្ទាប់មកអាចជ្រើសរើសដៃគូសហការដើម្បីឱ្យលុយដើមទុនដែលចូលគ្នានោះមានភាពរឹងមាំមុននឹងចាប់ផ្តើមអាជីវកម្មមួយឡើង។ ក្រោយពេលដែលអាជីវកម្មមានស្ថេរភាព និងមានចំណូលរឹងមាំហើយ យើងអាចនឹងបើកអាជីវកម្មថ្មីដោយមិនបាច់មានដៃគូបាន។

បង្ហាញលើចំណុចនេះផងដែរ ឧកញ៉ា ស្រ៊ាត មុំសុភា ស្ថាបនិករបស់ Sophiya Travel & Tour បានថ្លែងថា ដើមទុនដែលសំខាន់ជាងនេះទៅទៀតនោះគឺ គំនិតរកស៊ី។ សូមកុំខ្វល់ខ្លាំងពេកថា អាជីវកម្មមួយត្រូវចំណាយដើមទុនប៉ុន្មាន តែអ្វីដែលត្រូវគិតគឺលុយនៅក្នុងដៃមានប៉ុន្មាន ហើយមានវិធីអ្វីខ្លះដើម្បីប្រើលុយនេះបង្កើតអាជីវកម្មមួយឱ្យបាន។

ម្ចាស់អាជីវកម្មខាងលើបានលើកឡើងផងដែរថា ប្រភពទុនអាចមានច្រើនប្រភេទដូចជា ទុនជាសាច់ប្រាក់ ទុនជាចំណេះដឹង និងបានមកពីកម្ចីដែលកើតមកពីទំនាក់ទំនងជាដើម តែទោះបីជាយ៉ាងណាក៏ដោយ មុននឹងសម្រេចចិត្តបង្កើតអាជីវកម្មមួយ ក៏គួរតែស្ទង់មើលទីផ្សារជាមុនសិនដែរ ព្រោះបើមិនប្រយ័ត្នលុយដែលមាននោះអាចមិនបានចំណេញ តែបែរជាខាតបង់ទៅវិញ។

ម្ចាស់ហាង SM Memory Shop កញ្ញា ហង្ស ម៉ារីនី បានប្រាប់ថា កញ្ញាបានទទួលទុនដំបូងតាមរយៈការប្រើប្រាស់លុយសន្សំ និងប្រើលុយនេះទៅបង្កើតលុយបន្តទៀតតាមរយៈការលក់ទំនិញតាម Online។ កញ្ញាបានបញ្ជាក់លម្អិតថា ដំបូងឡើយកញ្ញាបានស្ទង់មើលសម្ទុះអ្នកគាំទ្រតាម Online មុនពេលដែលចាប់ផ្តើមលក់វត្ថុអនុស្សាវរីយ៍។ ក្រោយពេលដែលបានឃើញពីតម្រូវការដែលមនុស្សទូទៅចង់បានហើយ កញ្ញាក៏ចាប់ផ្តើមផ្តល់នូវសេវាកម្មលក់ផលិតផលទាំងអស់នោះដោយប្រើលុយចំណេញពីការលក់ទំនិញតាម Online ទាំងអស់នោះមកបើកហាង៕

September 26, 2017

ក្រុមហ៊ុនឋានសួគ៌បូកគោ មិនមានសិទ្ធិកាន់កាប់អចលនទ្រព្យដោយស្វ័យប្រវត្តិទេ!

ភ្នំពេញ៖ បន្ទាប់ពីមានការរិះគន់យ៉ាងព្រោងព្រាតពីសំណាក់សាធារណជន ក្រសួងពាណិជ្ជកម្មបានចេញលិខិតបកស្រាយចំពោះការផ្លាស់ប្តូរនាមករណ៍ (ផ្លាស់ប្តូរឈ្មោះ) ពីរមណីយដ្ឋាន “ឋានសួគ៌បូកគោ” ទៅជា “សុខាឋានសួគ៌” ដោយបានបញ្ជាក់ថា ក្រុមហ៊ុននេះមិនមានសិទ្ធិកាន់កាប់អចលនទ្រព្យដោយស្វ័យប្រវត្តិនោះទេ។

យោងតាមខ្លឹមសារនៃសេចក្តីជូនដំណឹងរបស់ក្រសួងពាណិជ្ជកម្ម ចុះថ្ងៃទី24 ខែកញ្ញានេះបានបញ្ជាក់ថា ការផ្តល់ឈ្មោះឱ្យក្រុមហ៊ុន គឺជាការបញ្ជាក់អត្តសញ្ញាណឱ្យនីតិបុគ្គល សំដៅចៀសវាងការជាន់នាមករណ៍គ្នាជាមួយក្រុមហ៊ុនផ្សេង។ ប្រសិនបើមានឈ្មោះស្រដៀងគ្នា ឬអាចធ្វើឱ្យមានការភាន់ច្រឡំឈ្មោះគ្នាបណ្តាលឱ្យមានការតវ៉ានោះ ក្រុមហ៊ុនដែលចុះឈ្មោះក្រោយគេ ត្រូវលុបឈ្មោះចោលវិញ និងទទួលខុសត្រូវចំពោះមុខច្បាប់។

ចំណែកលក្ខន្តិកៈរបស់ក្រុមហ៊ុនមានបញ្ជាក់ពីបុគ្គលទទួលខុសត្រូវ មុខរបរ និងប្រភេទអាជីវកម្មជាដើម តែពុំមែនមានន័យថា ការផ្តល់នាមករណ៍ឱ្យក្រុមហ៊ុននោះមានបង្កប់នូវសិទ្ធិកាន់កាប់អចលនទ្រព្យដោយស្វ័យប្រវត្តិនោះឡើយ។

ករណីក្រុមហ៊ុនសុខាអូតែលដែលបានស្នើសុំបើកសាខាក្រុមហ៊ុន និងប្តូរនាមករណ៍ពីសាខាក្រុមហ៊ុនសុខាអូតែល «ឋានសួគ៌បូកគោ» ទៅជាសាខាក្រុមហ៊ុនសុខាអូតែល «សុខាឋានសួគ៌» គឺក្នុងគោលបំណងបញ្ជាក់ថា ក្រុមហ៊ុនសុខាអូតែលមានសាខាធ្វើអាជីវកម្មនៅតាមខេត្ត។ ចំពោះការលើកស្លាក គឺត្រូវលើកនៅលើអគារជាទីស្នាក់ការសាខាក្រុមហ៊ុនតែប៉ុណ្ណោះ ដើម្បីសម្រួលដល់អាជ្ញាធរមានសមត្ថកិច្ចបំពេញបែបបទពន្ធដារ និងនីតិវិធីនានាស្របតាមច្បាប់កំណត់។

ចំណែកការអនុញ្ញាតដោយក្រសួងពាណិជ្ជកម្មកាលពីថ្ងៃទី1 ខែកញ្ញា ឆ្នាំ2017កន្លងទៅនោះ គឺជាការអនុញ្ញាតឱ្យប្តូរនាមករណ៍របស់ក្រុមហ៊ុនសុខាអូតែលតែប៉ុណ្ណោះ មិនមែនប្តូរឈ្មោះ រមណីយដ្ឋានបូកគោនោះទេ។ ក្រសួងពុំមានសិទ្ធិឱ្យក្រុមហ៊ុនសុខាអូតែលប្តូរឈ្មោះរមណីយដ្ឋានប្រវត្តិសាស្ត្រដែលបានកំណត់ដោយព្រះរាជក្រឹត្យនោះឡើយ ហើយបើមានការតវ៉ាត្រូវទទួលខុសចំពោះមុខច្បាប់៕

September 26, 2017

Author: វល័ក្ខ