វល័ក្ខ - La Reine Media

ស្ពានជ្រោយចង្វារចាស់ នឹងចាប់ផ្ដើមបិទការធ្វើចរាចរនៅថ្ងៃទី1 ខែតុលា

ដើម្បីសម្រួលដល់ការធ្វើដំណើរ និងបញ្ចៀសការកកស្ទះគ្រាដែលស្ពានមិត្ដភាពកម្ពុជា-ជប៉ុន (ជ្រោយចង្វារទី1) ត្រូវធ្វើការជួសជុលកែលំអនៅថ្ងៃទី1 ខែតុលា ឆ្នាំ2017 ខាងមុខ ហើយនិងត្រូវបិទការធ្វើចរាចរទាំងស្រុងលើស្ពាននេះ។ រដ្ឋបាលសាលារាជធានីភ្នំពេញបានជូនដំណឹងដល់សាធារណជនដែលមានយានជំនិះ និងមធ្យោបាយធ្វើដំណើរផ្សេងទៀតដែលត្រូវឆ្លងកាត់ស្ពាននេះឱ្យបានដឹងពីខ្សែផ្លូវដែលខ្លួនត្រូវធ្វើដំណើរដូចខាងក្រោមនេះ ៖

1.រថយន្ដធុនធំដែលធ្វើដំណើរតាមផ្លូវជាតិលេខ6 ចូលមកភ្នំពេញត្រូវវាងទៅតាមផ្លូវលីយ៉ុងផាត់។

2.ចំពោះយានយន្ដគ្រប់ប្រភេទធ្វើដំណើរតាមផ្លូវជាតិលេខ6 ចូលភ្នំពេញ ពេលមកដល់ចំណុចផ្លូវកែងត្រូវបត់ស្ដាំធ្វើដំណើរឆ្ពោះទៅស្ពានព្រែកក្ដាមនឹងធ្វើដំណើរបន្ដចូលរាជធានីភ្នំពេញតាមផ្លូវជាតិលេខ5។

ក្នុងករណីមានការកកស្ទះចរាចរណ៍ធ្ងន់ធ្ងរនៅចំណុចការដ្ឋាន អ្នកបញ្ជាយានយន្ដត្រូវអនុវត្ដតាមការបញ្ជាចរាចរណ៍របស់សមត្ថកិច្ច។ ខណៈស្ពានមិត្ដកម្ពុជា-ចិន (ជ្រោយចង្វារទី2) ត្រូវដាក់ឱ្យធ្វើដំណើរសម្រាប់ទិសចេញ និងចូលរាជធានីភ្នំពេញ៕

September 27, 2017

ពលរដ្ឋចេះប្រើអ៊ីនធើណិត គឺជួយជំរុញសេដ្ចកិច្ចជាតិ

យោងតាមទិន្នន័យមូលដ្ឋានចេញផ្សាយដោយក្រសួងប្រៃសណីយ៍ និងទូរគមនាគមន៍ ក្នុងខែមិថុនា ឆ្នាំ2016 ចំនួនអ្នកប្រើប្រព័ន្ធអ៊ិនធើណិតបានកើនឡើងពី 1.7 លាននាក់កាលពីឆ្នាំ 2011 ដល់ 7.16 លាននាក់នៅឆ្នាំ 2016 ដោយក្នុងនោះមានអ្នកប្រើបែបចល័តចំនួន 7,074,483 នាក់ ស្មើនឹង 98.84 % និងអចល័តចំនួន 82,926 នាក់ ស្មើនឹង 1.16 %។

កំណើនអ្នកប្រើប្រាស់នេះ បានរួមចំណែកយ៉ាងសកម្មមួយក្នុងការជំរុញកំណើនសេដ្ឋកិច្ចកម្ពុជាឱ្យមានសម្ទុះទៅមុខជាលំដាប់។ នេះបើតាមប្រសាសន៍របស់ លោកជំទាវ រស់ សូរក្ខា រដ្ឋលេខាធិការក្រសួងប្រៃសណីយ៍ និងទូរគមនាគមន៍ ថ្លែងនៅក្នុងកម្មវិធីសិក្ខាសាលាស្តីពីការវិវឌ្ឍនៃបច្ចេកវិទ្យា 4G LTE ដែលរៀបចំដោយក្រសួងប្រៃសណីយ៍ និងទូរគមនាគមន៍ នៅសណ្ឋាគារសុខាភ្នំពេញកាលពីពេលកន្លងទៅ។

តាមរយៈការវិវឌ្ឍផ្នែកបច្ចេកវិទ្យាទូរគមនាគមន៍ និងព័ត៌មាននៅក្នុងប្រទេសនេះត្រូវបានផ្សារភ្ជាប់ជាមួយនឹងតម្រូវការរបស់សាធារណជន និងស្របទៅតាមនិន្នាការថ្នាក់តំបន់ និងសកលលោក។ ក្នុងនោះ កំណើនពលរដ្ឋចេះប្រើប្រព័ន្ធអ៊ិនធើណិតកាន់តែច្រើន វាបានជួយជំរុញដល់សេដ្ឋកិច្ចជាតិ តាមរយៈការប្រើប្រាស់កម្មវិធី និងសេវាកម្មផ្សេង ដែលបម្រើដល់ចរន្ដសេដ្ឋកិច្ច ដូចជាកម្មវិធីរបស់ធនាគារ កម្មវិធីផ្ទេរប្រាក់ Wing, eMoney, Pipay, PayGo ជាដើម។

លោកជំទាវបញ្ជាក់ថា៖ «កម្ពុជា ជាប្រទេសមានសក្តានុពលមួយក្នុងចំណោមប្រទេសដែលមានការអភិវឌ្ឍវិស័យ ICT ជាមួយនឹងចំនួនអ្នកប្រើប្រាស់ទូរស័ព្ទចល័តកើនឡើងខ្ពស់ ហើយការប្រើប្រាស់អ៊ិនធើណិតមានរហូតដល់ទៅជាង 7 លាននាក់។ ទាំងនេះ វាជាកត្តាជំរុញកំណើនសេដ្ឋកិច្ចកម្ពុជាយើងឱ្យទៅមុខបានលឿន»។

ចំនួនអ្នកប្រើទាំងនោះ សរុបរួមមកពីក្រុមហ៊ុនចំនួន 8 ដែលផ្ដល់សេវាអ៊ិនធើណិត រួមមាន Smart Axiata , Viettel, CamGSM, Sotelco, XinWei, South East Asia Telecom, Cadcomms និង Star Digital MUDS TV។ ក្នុងនោះ មានអ្នកប្រើប្រាស់ទូរស័ព្ទចល័ត 19,484,692 (98,79 % នៃចំនួនអ្នកប្រើប្រាស់សរុប) និងមានអ្នកប្រើប្រាស់ទូរស័ព្ទអចល័ត 238,118 (1,21% នៃចំនួនអ្នកប្រើប្រាស់សរុប) ហើយមានចំនួនអ្នកប្រើប្រាស់សរុបធៀបទៅនឹងចំនួនប្រជាជន 133%។

ដោយឡែកនៅក្នុងកិច្ចប្រជុំទ្វេភាគីជាមួយប្រតិភូនៃក្រុមប្រឹក្សាធុរកិច្ចអាស៊ាន-សហរដ្ឋអាមេរិក (Bilateral Meeting with the U.S.-ASEAN Business Council Delegates)ឯកឧត្តមរដ្ឋមន្ត្រីក្រសួងពាណិជ្ជកម្មបានលើកឡើងពីកំណើននៃអ្នកប្រើប្រាស់អ៊ីនធើណិតនេះ និងបានអំពាវនាវឱ្យក្រុមហ៊ុនអាមេរិកមកវិនិយោគក្នុងប្រទេសកម្ពុជា លើវិស័យបច្ចេកវិទ្យា ICT នេះទៀតផង៕

September 27, 2017

និស្សិតជាច្រើនយល់ច្រឡំថា ទាល់តែរៀន ICT ទើបមានការងារធ្វើ

«និស្សិតខ្មែរភាគច្រើនយល់ច្រឡំថា ឱ្យតែចង់ចេះមុខវិជ្ជាពាក់ព័ន្ធនឹងកុំព្យូទ័រសុទ្ធតែត្រូវសិក្សាផ្នែកបច្ចេកវិទ្យា ព័ត៌មានវិទ្យា (ICT)ទាំងអស់» នេះជាការលើកឡើងរបស់បណ្ឌិត ឯក មនោសែន សាកលវិទ្យាធិការនៃសាកលវិទ្យាល័យធនធានមនុស្ស ដែលបានថ្លែងនៅក្នុងសិក្ខាសាលាដ៏ធំប្រចាំឆ្នាំស្តីពី យុទ្ធសាស្ត្រក្នុងការជ្រើសរើសមុខជំនាញដែលត្រឹមត្រូវ និងឱកាសទទួលបានអាហារូបករណ៍ទៅសិក្សានៅបរទេស។

លោកបណ្ឌិត ឯក មនោសែន បានលើកឡើងផងដែរថា យុវជនបច្ចុប្បន្នតែងតែឮគេនិយាយថា ការងារនាពេលបច្ចុប្បន្នទាមទារឱ្យចេះ ICT ហើយម្នាក់ៗក៏សម្រុកមករៀនផ្នែក ICT ព្រោះតែមានការយល់ច្រឡំ។ តាមពិតទៅការងារទាំងអស់សុទ្ធតែត្រូវការចំណេះដឹងកុំព្យូទ័រ តែមិនមែនត្រូវការជំនាញបច្ចេកវិទ្យា ព័ត៌មានទាំងអស់នោះទេ។

បណ្ឌិត ឯក មនោសែន បាននិយាយថា៖ «គ្រប់ការងារទាំងអស់មិនមែនត្រូវការជំនាញផ្នែកកូដ ឬផ្នែកកម្មវិធីជ្រៅៗនៃមុខជំនាញព័ត៌មានវិទ្យានោះទេ តែការសិក្សាជំនាញកុំព្យូទ័រវាមានបែបផែនផ្សេងៗគ្នា។ ជាឧទាហរណ៍ អ្នកសិក្សាគណនេយ្យត្រូវការជំនាញកុំព្យូទ័រ តែគេមិនចាំបាច់ត្រូវរៀន ICT នោះទេ គេរៀនតែកម្មវិធីមួយចំនួនដូចជា Quick Book ឬ Peach Tree ជាដើមក៏បាន ហើយអ្នកសិក្សាព័ត៌មានវិទ្យាក៏មិនប្រាកដថា ចេះកម្មវិធីទាំងអស់នេះដែរ»។

អ្នកជំនាញផ្នែកអប់រំខាងលើបានលើកឡើងផងដែរថា តាមពិតទៅអ្នកណាក៏ត្រូវចេះកុំព្យូទ័រដែរ តែកម្មវិធីមួយចំនួនយើងអាចសិក្សាវគ្គខ្លីៗ ឬរៀនដោយខ្លួនឯងបាន ហើយនៅសាកលវិទ្យាល័យក៏គេមានបង្រៀនវគ្គកុំព្យូទ័រដែលត្រូវជាមួយនឹងអាជីពការងារនោះដែរ។ សូមនិស្សិតកម្ពុជាកុំមានការយល់ច្រឡំគិតថា បើចង់រៀនជំនាញណាមួយហើយ ត្រូវតែរៀនជំនាញ ICT មួយមុខទៀតទើបមានការងារធ្វើ ដែលតាមពិតទៅវាមិនមែនដូច្នោះទេ៕

September 27, 2017

សេចក្តីប្រកាសរបស់ក្រសួងនឹងធ្វើឱ្យក្រុមហ៊ុនភ្នាក់ងារវាយតម្លៃអចលនវត្ថុងាយស្រួលធ្វើការ

ដើម្បីធានាឱ្យមាននិរន្ដរភាព និងជំរុញការអភិវឌ្ឍលើវិស័យអចលនទ្រព្យឱ្យដំណើរការកាន់តែប្រសើរថ្មីៗនេះក្រសួងសេដ្ឋកិច្ច និងហិរញ្ញវត្ថុ បានចេញសេចក្តីប្រកាសច្បាប់ស្តីពីថ្លៃសេវា និងកម្រៃជើងសាវិជ្ជាជីវៈ សម្រាប់ការផ្តល់សេវាកម្មវាយតម្លៃ និងសេវាកម្មអចលនវត្ថុដល់ក្រុមហ៊ុនអចលនទ្រព្យនានា។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងថា ក្រោយពីបានដឹងដំណឹងនៃការចេញសេចក្ដីប្រកាសរបស់ក្រសួង លោកពិតជាមានការសាទរជាខ្លាំង និងបានគាំទ្រ100% ទៅលើចំណាត់ការរបស់ក្រសួង ព្រោះវាល្អចំពោះសមាគមផង និងល្អសម្រាប់ឧស្សាហកម្មអចលនទ្រព្យទាំងមូលផង។ លោកបន្ដថា ចំណាត់ការនេះក្រៅពីបានផ្ដល់នូវទំនុកចិត្ដដល់អតិថិជន និងផ្ដល់ភាពងាយស្រួលក្នុងការធ្វើសកម្មភាពជួញដូរលើអចលនទ្រព្យហើយនោះ វាក៏បានចូលរួមចំណែកក្នុងការរៀបចំក្រុមហ៊ុនអចលនទ្រព្យនានាដែលរកស៊ីលើវិស័យនេះឱ្យកាន់តែមានសណ្ដាប់ធ្នាប់ និងរបៀបរៀបរយល្អទៀតផង។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងថា ៖«កន្លងមក មានភ្ញៀវខ្លះបានលើកឡើងថា ក្រុមហ៊ុនចេះតែទារថ្លៃសេវាតាមចិត្ដ អត់មានក្បួនអត់មានច្បាប់ នៅពេលពួកគាត់និយាយអ៊ីចឹងយើងក៏ពិបាកនិយាយទៅវិញដែរ ប៉ុន្ដែក្រោយពេលក្រសួងចេញសេចក្ដីប្រកាសបែបនេះ យើងនឹងងាយស្រួលក្នុងការធ្វើការងារ និងពេលជជែកជាមួយអតិថិជន ព្រោះយើងមានភ័ស្ដុតាងបង្ហាញទៅពួកគាត់ថា យើងធ្វើអ្វីទៅតាមការកំណត់របស់ក្រសួង»។

ដោយយោងតាមឧបសម្ព័ន្ធនៃការប្រកាសលេខ 761.សហវ.ប្រក ចុះថ្ងៃទី31 ខែកក្កដា ឆ្នាំ2017 រូបមន្តនៃការគណនា និងមូលដ្ឋាននៃការកំណត់ថ្លៃសេវា និងកម្រៃជើងសាវិជ្ជាជីវៈសម្រាប់ការបំពេញសេវាកម្មវាយតម្លៃ និងសេវាកម្មអចលនវត្ថុដែលត្រូវទិញ-លក់ត្រូវបានកំណត់ដូចជា៖

សម្រាប់ក្រុមហ៊ុនវាយតម្លៃអចលនទ្រព្យដូចជា ដីធ្លី និងផ្ទះសំបែងដែលទិញ ឬលក់មានតម្លៃស្មើនឹង៖

– 100,000 ដុល្លារ ឬក្រោមនេះ ត្រូវកំណត់ថ្លៃសេវាវិជ្ជាជីវៈ 0,170 % ឬ អប្បបរមាស្មើនឹង170 ដុល្លារ។

– 1,000,001 – 5,000,000ដុល្លារ ត្រូវកំណត់ថ្លៃសេវាវិជ្ជាជីវៈ 0,050%

– 5,000,001 – 10,000,000ដុល្លារ ត្រូវកំណត់ថ្លៃសេវាវិជ្ជាជីវៈ 0,030%

– លើសពី 10,000,000ដុល្លា ត្រូវកំណត់ថ្លៃសេវាវិជ្ជាជីវៈ 0,025% ។

សម្រាប់ក្រុមហ៊ុនភ្នាក់ងារអចលនទ្រព្យ និងក្រុមហ៊ុនគ្រប់គ្រងអចលនវត្ថុ

1. ការទិញ និងលក់អចលនវត្ថុ ដូចជា ដីធ្លី និងផ្ទះសំបែង

-ចំពោះការទិញ និងលក់ទាំងអស់ត្រូវបានកំណត់ថ្លៃសេវាវិជ្ជាជីវៈ អប្បបរមា ៣% ក្នុងរយៈពេលដែលមិនកំណត់។

2. ការជួលអចលនវត្ថុ

– ការជួលអចលនវត្ថុ ដែលមានរយៈពេលក្រោម 1 ឆ្នាំ កម្រៃសេវាវិជ្ជាជីវៈអាចកំណត់បានទៅតាមកិច្ចព្រមព្រៀងរវាងភាគីទាំងសងខាង គឺអ្នកជួល និងម្ចាស់អចលនវត្ថុ។

– ការជួលអចលនវត្ថុ រយៈពេល1 ឆ្នាំ កម្រៃសេវាវិជ្ជាជីវៈ គឺត្រូវតែស្មើនឹងតម្លៃជួលអចលនទ្រព្យ 1 ខែ។

– ការជួលអចលនទ្រព្យលើសពី 1 ឆ្នាំ កម្រៃសេវាវិជ្ជាជីវៈ គឺត្រូវតែស្មើនឹងតម្លៃជួលអចលនទ្រព្យ 1 ខែ បូករួមនឹងចំនួន 25% បន្ថែម ទៅតាមសមាមាត្រនៃការជួលតាមឆ្នាំនីមួយ។

ពាក់ព័ន្ធនឹងក្រុមហ៊ុន និងភ្នាក់ងារវាយតម្លៃអចលនទ្រព្យ ត្រូវបានលោកគីម ហ៊ាង បញ្ជាក់ថា នៅពេល មិនទាន់មានច្បាប់កំណត់អំពីកម្រៃជើងសាច្បាស់លាស់ លោកសង្កេតឃើញថា មានក្រុមហ៊ុនខ្លះទារថ្លៃបានច្រើន ក្រុមហ៊ុនខ្លះទារថ្លៃបានតិច ដោយសារតែវាមិនមានតម្លៃស្ដង់ដារច្បាស់លាស់ ដូច្នេះនៅពេលក្រសួងចេញសេចក្ដីប្រកាសតម្លៃជាស្ដង់ដារអ៊ីចឹង គឺវាល្អ។ ទន្ទឹមនឹងនេះដែរ យើងចាំបាច់ណាស់ត្រូវតែផ្សព្វផ្សាយព័ត៌មានទាំងអស់នេះដល់សាធារណជនឱ្យយល់ច្បាស់ពីបញ្ហានេះ។

លោក គីម ហ៊ាង បញ្ជាក់ថា៖ «បើទោះជាក្រសួងបានចេញសេចក្ដីប្រកាសហើយក៏ពិតមែន ប៉ុន្ដែសមាគមអត់ទាន់បានធ្វើការអីទេ ព្រោះយើងរង់ចាំមើលសិន ក្រែងលោមានការប្រែប្រួល ប្រសិនបើអត់មានការប្រែប្រួលអ្វីទេ យើងនឹងធ្វើកម្មវិធីផ្លូវការមួយដើម្បីប្រកាសពីព័ត៌មានទាំងអស់ហ្នឹង»។ លោកបន្ដថា ការផ្សព្វផ្សាយព័ត៌មានបែបហ្នឹង វានឹងធ្វើឱ្យដំណើរការធ្វើការងាររវាងក្រុមហ៊ុនភ្នាក់ងារអចលនទ្រព្យ និងអតិថិជនកាន់តែមានភាពល្អប្រសើរ និងកាត់បន្ថយការតថ្លៃគ្នាលើបញ្ហាកម្រៃជើងសា។

ទោះបីជាមានការចេញសេចក្ដីប្រកាសពីក្រសួងសេដ្ឋកិច្ច និងហិរញ្ញវត្ថុ ដើម្បីធ្វើឱ្យក្រុមហ៊ុនភ្នាក់ងារ និងវាយតម្លៃអចលនវត្ថុប្រកួតប្រជែងគ្នាដោយភាពស្មោះត្រង់ក៏ដោយ ក៏លោកគីម ហ៊ាង បញ្ជាក់ថា វាមានការលំបាកដែរក្នុងការធ្វើឱ្យក្រុមហ៊ុននីមួយៗរកស៊ីដោយស្មោះត្រង់។ យ៉ាងណា ក៏នៅតែមានក្រុមហ៊ុនមួយចំនួនខូចខិល តែបើយើងមានច្បាប់ហើយ អ្នកឯងមិនគោរពច្បាប់ គឺស្មើនឹងអ្នកឯងនៅក្រៅច្បាប់។ អ្នកខ្លះគេបង្កើតច្បាប់ហើយ អត់គោរពទេ ដល់ពេលគេអនុវត្ដច្បាប់ ខ្លួនចាប់ផ្ដើមនិយាយថា អយុត្ដិធម៌៕

September 27, 2017

ដល់ពេលដែលប្រទេសអាស៊ានបើករបាំងពន្ធគយហើយ

ភ្នំពេញ៖ មកទល់ឆ្នាំ2017នេះ ការងារក្នុងប្រទេសអាស៊ានកាន់តែមានភាពវិវឌ្ឍទៅមុខគួរឱ្យកត់សម្គាល់ ដោយក្នុងនោះប្រទេសជាសមាជិកអាស៊ានបានរួមឯកភាពគ្នាជាធ្លុងមួយក្នុងការលើកលែងពន្ធដល់គ្នាទៅវិញទៅមក។ តើមានប្រទេសណាខ្លះហើយ ដែលបានលើកលែងពន្ធនាំចេញនាំចូលនេះ?

នៅខែកញ្ញា ឆ្នាំ2017 កិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធលើកទី49បានធ្វើឡើងនៅទីក្រុងប៉ាសៃ ប្រទេសហ្វីលីពីន រួមមានតំណាងប្រតិភូថ្នាក់ដឹកនាំប្រទេសជាសមាជិកអាស៊ានជាមួយនឹងដៃគូពិភាក្សារបស់អាស៊ានរួមមាន អូស្ត្រាលី ចិន ឥណ្ឌា ជប៉ុន សាធារណរដ្ឋកូរ៉េ នូវែលហ្សេឡង់ រុស្សី និងសហរដ្ឋអាមេរិក។

កិច្ចប្រជុំនេះទទួលបានលទ្ធផលជាផ្លែផ្កាដោយប្រទេសក្នុងអាស៊ានបានរួមគ្នាលើកលែងរបាំងពន្ធស្ទើរតែ 100% ទៅហើយ ដោយក្នុងនោះការលុបចោលរបាំងពន្ធគយក្រោមក្របខ័ណ្ឌកិច្ចព្រមព្រៀងពាណិជ្ជកម្មលើទំនិញ បានបង្ហាញថា ប្រទេសប្រ៊ុយណេ ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី និងថៃ (ASEAN 6) បានលុបចោល 99.2% នៃបន្ទាត់ពន្ធគយ។ ដោយឡែកកម្ពុជា ឡាវ មីយ៉ាន់ម៉ា និងវៀតណាម (CLMV) បានលុបបំបាត់នូវ 90.9% នៃបន្ទាត់ពន្ធគយសរុបដែលគិតជាមធ្យមមាន96.01នៃបន្ទាត់ពន្ធគយសរុបត្រូវបានលុបបំបាត់រវាងប្រទេសជាសមាជិកអាស៊ាន។

ជាមួយកិច្ចពិភាក្សារវាងរដ្ឋមន្ត្រីសេដ្ឋកិច្ចអាស៊ាន និងកាណាដា រួមបញ្ចូលកិច្ចពិភាក្សាក្រុមប្រឹក្សាធុរកិច្ចអាស៊ាន-កាណាដា (6th AEM-Canada Consultations including Dialogue with Canada – ASEAN Business Council (CABC)៖ រដ្ឋមន្ត្រីសេដ្ឋកិច្ចអាស៊ានស្វាគមន៍ចំពោះការបញ្ចប់នូវការសិក្សាបឋមរួមក្នុងការបង្កើតកិច្ចព្រមព្រៀងពាណិជ្ជកម្មសេរី អាស៊ាន-កាណាដា។ ក្រៅពីនោះផងដែរ រដ្ឋមន្ត្រីអាស៊ានក៏បានកត់សម្គាល់ពីវឌ្ឍនភាពនៃការអនុវត្តផែនការ 2016-2020 ក្នុងការអនុវត្តសេចក្ដីប្រកាសរួមស្ដីពីពាណិជ្ជកម្ម និងវិនិយោគអាស៊ាន-កាណាដា ដែលមានគោលបំណងជំរុញសកម្មភាពពាណិជ្ជកម្ម និងវិនិយោគទ្វេភាគី និងគាំទ្រដល់កិច្ចផ្ដួចផ្ដើមផ្សេងៗដោយវិស័យឯកជន។

គួរបញ្ជាក់ថា កិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងរដ្ឋមន្ត្រីពាណិជ្ជកម្មចិនលើកទី16 (16th AEM-MOFCOM (China) Consultations) កន្លងទៅបានបង្ហាញឱ្យដឹងថា ពាណិជ្ជកម្មលើទំនិញរវាងអាស៊ាន និងចិនមានតម្លៃ 368 ប៊ីលានដុល្លារអាមេរិកនៅឆ្នាំ2016 ស្មើនឹង 16.5% នៃទំហំពាណិជ្ជកម្មលើទំនិញសរុបរបស់អាស៊ាន។ ចំណែកលំហូរវិនិយោគដោយផ្ទាល់ពីបរទេស(FDI) ពីប្រទេសចិនមកអាស៊ាន មានតម្លៃ 9.2ប៊ីលានដុល្លារអាមេរិក នៅឆ្នាំ2016 ស្មើនឹង 9.5% នៃលំហូរសរុបរបស់អាស៊ាន៕

September 27, 2017

និស្សិតធ្លាប់បានជាប់អាហារូបករណ៍ប្រាប់ពីជីវិតពិតនៃការទៅរៀនបរទេស

ការជាប់អាហារូបករណ៍ទៅសិក្សានៅបរទេសគឺជាក្តីរំពឹងរបស់និស្សិតជាច្រើននៅកម្ពុជា តែមាននិស្សិតមួយចំនួនហាក់មានការយល់ច្រឡំ បន្ទាប់ពីពួកគេត្រូវខកចិត្តក្រោយពេលត្រឡប់មកប្រទេសកម្ពុជាវិញ។

ពាក់ព័ន្ធនឹងបញ្ហានេះ កញ្ញា ឡៅ ដានេ អតីតនិស្សិតទទួលបានអាហារូបករណ៍ទៅសិក្សានៅសាកលវិទ្យាល័យ Bridgewater State University បានលើកឡើងថា ការទៅសិក្សានៅបរទេសមិនមែនទៅតែរៀនទាំងស្រុងនៅក្នុងសាលានោះទេ តែគោលបំណងសំខាន់គឺការទៅមើលពីរបៀបរស់នៅ និងការអភិវឌ្ឍ ឬរៀនពីសង្គមរបស់គេដើម្បីយកចំណេះដឹងមួយចំនួនមកអភិវឌ្ឍសង្គមរបស់យើង។

កញ្ញាបានបន្ថែមទៀតថា សូមកំណត់គោលបំណងឱ្យបានច្បាស់មុនពេលសម្រេចចិត្តទៅ ព្រោះថា ការជាប់អាហារូបករណ៍ទៅផ្លាស់ប្តូរការសិក្សា (exchange)នៅបរទេសមិនមែនសុទ្ធតែចំណេញទាំងអស់នោះទេសម្រាប់និស្សិតម្នាក់ៗ ប្រសិនបើកម្មវិធីណាដែលយើងមិនពេញចិត្ត យើងមិនបាច់ទៅក៏បានដែរ ព្រោះវាអាចធ្វើឱ្យយើងខាតពេលវេលាជាជាងរៀននៅសាកលវិទ្យាល័យក្នុងស្រុកទៅវិញទេ។

បង្ហាញលើចំណុចស្រដៀងគ្នានេះដែរ លោក ឌុច ឡាលីន និស្សិតដែលទទួលបានអាហារូបករណ៍ទៅផ្លាស់ប្តូរបទពិសោធនៅសហរដ្ឋអាមេរិកបានលើកឡើងថា សូមឈប់គិតថា ការជាប់អាហារូបករណ៍ជាការត្រូវឆ្នោតរង្វាន់ធំ តែត្រូវគិតថា វាគ្រាន់តែជាបទពិសោធ និងដំណើរផ្សងព្រេងថ្មីមួយសម្រាប់ជីវិតតែប៉ុណ្ណោះ។

លោក ឌុច ឡាលីន បាននិយាយថា៖ «ការសិក្សានៅបរទេស វាគ្រាន់តែជាបទពិសោធដែលយើងត្រូវទទួលយកពីបរិស្ថានថ្មីមួយ ហើយដកស្រង់យកនូវអ្វីដែលយើងបានឃើញពីសង្គម និងពីចំណេះដឹងជុំវិញខ្លួនមកធ្វើជាបទពិសោធសម្រាប់ជំនួយដល់ការងារ និងការរស់នៅពេលត្រឡប់មកស្រុកវិញតែប៉ុណ្ណោះ»។

បើតាមនិស្សិតដែលជាប់អាហារូបករណ៍ទៅសិក្សានៅបរទេសខាងលើ និស្សិតកម្ពុជាមិនគួរផ្តោតវាសនាទាំងស្រុងតែលើការសិក្សានៅបរទេសនោះទេ ព្រោះថា ចំណេះដឹងពិតប្រាកដទើបជាចំណុចដែលសំខាន់សម្រាប់វិស័យការងារនៅកម្ពុជា ហើយការចង់ផ្លាស់ប្តូរជីវិតដោយផ្អែកលើសញ្ញាបត្រពីបរទេសទាំងស្រុងមិនមែនជារឿងត្រឹមត្រុវពេកឡើយសម្រាប់និស្សិតកម្ពុជាយើង។

ស្រដៀងគ្នានេះដែរ លោក គីម ដារ៉ា អតីតនិស្សិតដែលជាប់អាហារូបករណ៍ទៅសិក្សានៅប្រទេសជប៉ុន បានលើកឡើងថា ការប្រឡងជាប់អាហារូបករណ៍ទៅសិក្សានៅបរទេស ត្រូវតែមានគោលបំណងឱ្យបានច្បាស់លាស់ បើមិនដូច្នេះទេ យើងនឹងខាតបង់ជាក់ជាមិនខាន។ និស្សិតត្រូវដឹងឱ្យច្បាស់ពីអ្វីដែលយើងចង់បាន ហើយទៅយកចំណុចសំខាន់ៗទាំងអស់នោះពីបរទេសមកដើម្បីបំពេញនូវចំណុចខ្វះខាតរបស់ខ្លួនសម្រាប់អភិវឌ្ឍសង្គមបន្ទាប់ពីត្រឡប់មកប្រទេសដើមវិញ ជាឧទាហរណ៍ ដូចជានិស្សិតទៅសិក្សាផ្នែកបច្ចេកទេសនៅបរទេស គឺពួកគាត់ទៅប្រើប្រាស់បន្ទប់ពិសោធទំនើបៗនៅបរទេសដើម្បីយកចំណេះដឹងទាំងអស់នោះមកដោះស្រាយបញ្ហានៅកម្ពុជាដែលកំពុងជួបប្រទះជាដើម៕

September 27, 2017

មួយនេះហើយ ជាស្មាតហ្វូនដែល Huawei ថា អាចស៊ីដាច់ Samsung និង Apple…

កាលពីដើមខែកញ្ញា លោក Richard Chu ដែលជានាយកជាន់ខ្ពស់ផ្នែកទូរស័ព្ទរបស់ក្រុមហ៊ុន Huawei បានបង្ហើបម្ដងរួចមកហើយស្ដីពីសមត្ថភាពដ៏ខ្លាំងរបស់ស្មាតហ្វូនរបស់ខ្លួនដែលអាចស៊ីដាច់គូប្រកួតប្រជែងដូចជា Apple និង Samsung បាន ហើយទាំងអស់នេះជារូបរាង និងលក្ខណសម្បត្តិរបស់ Mate 10 ដែលត្រូវបានចែកចាយពេញបណ្ដាញអ៊ីនធើណិត។

តាមការចុះផ្សាយលើគេហទំព័របច្ចេកវិទ្យា GSM Arena បានបញ្ជាក់ថា ទាំងអស់នេះជារូបភាពរបស់ស្មាតហ្វូន Mate 10 ថ្មីរបស់ Huawei ដែលក្រុមហ៊ុនត្រៀមបើកសម្ពោធនៅខែតុលា។ ក្រុមហ៊ុនអាចចេញ 2 ស៊េរី ដោយមួយជាម៉ូដែល Pro មានសមត្ថភាពខ្លាំង និងមានរាងប្លែកជាងម៉ូដែលធម្មតា ហើយប្រើប្រាស់បន្ទះឈីប Kirin 970 ដែលអាចគាំទ្របច្ចេកវិទ្យា AI។

រូបភាពដែលទទូលបានបញ្ជាក់ថា ម៉ូដែល Mate 10 មានទ្រនាប់ស្គែនខ្ចៅដៃនៅផ្នែកខាងមុខ ចំណែកឯ Mate 10 Pro វិញមានទ្រនាប់ស្គែនខ្ចៅដៃនៅផ្នែកខាងក្រោយស្ថិតនៅខាងក្រោមបណ្ដុំកាមេរ៉ាភ្លោះ ហើយមានថាមពលថ្ម 4000 mAh ភ្ជាប់នូវមុខងារ Super Charge។ ចំពោះផ្នែកកាមេរ៉ាវិញ វាទាំង 2 នៅតែប្រើកាមេរ៉ាភ្លោះមកពីក្រុមហ៊ុន Leica ដដែល ដោយមានកម្រិត Aperture ទំហំធំជាងគេក្នុងលោក F/1.6 លើ Lens ទាំង 2 តែម្ដង និងអ្វីដែលថ្មីមួយទៀតនោះ គឺពួកវានឹងមានបំពាក់នូវមុខងារការពារជម្រាបទឹក IP67 និងប្រព័ន្ធអ៊ីនធើណិត LTE មានល្បឿនដល់ 1.2Gbps (Cat. 18)៕

September 27, 2017

PSG ស្រេកឃ្លានក្នុងការបង្ហាញភាពខ្លាំងពេលជួប Bayern នៅរាត្រីនេះ

ក្រុមយក្សរបស់បារាំង Paris Saint-Germain កំពុងសម្លឹងរកការបង្ហាញពីភាពខ្លាំងរបស់ខ្លួនក្នុងក្របខ័ណ្ឌកំពូលអឺរ៉ុប នៅពេលដែលពួកគេធ្វើជាម្ចាស់ផ្ទះទទួលក្រុមម្ចាស់ជើងឯករបស់អាល្លឺម៉ង់ Bayern Munich នាកីឡដ្ឋាន Parc des Princes នៅរាត្រីនេះ។

Paris SG នឹងឈានទៅកាន់ការប្រកួតជុំទី2នៃពូល B ក្នុងក្របខ័ណ្ឌ Champions League នៅរាត្រីនេះ ទាំងការជឿជាក់ ក្រោយពីបានផ្តួលក្រុម Celtic ក្នុងលទ្ធផល 5-០ កាលពីថ្ងៃប្រកួតបើកឆាក2សប្តាហ៍មុន ខណៈដែលតារាឆ្នើម Neymar ក៏បានចូលហ្វឹកហាត់វិញដែរ ក្រោយពីរងរបួសមេជើង។ ហេតុនេះ ខ្សែប្រយុទ្ធអន្តរជាតិប្រេស៊ីលរូបនេះ ត្រូវបានគេរំពឹងទុកថា នឹងចូលលេងក្នុងជម្រើសទាំង11នាក់ដំបូងរួមជាមួយនឹង Kylian Mbappe និង Edinson Cavani ក្នុងតំបន់ប្រយុទ្ធ។ ក្រុម Paris SG បានកត់ត្រាជ័យជម្នះ4លើកជាប់ៗគ្នា និងស្មើ1លើកពីការប្រកួត5លើកចុងក្រោយរបស់ពួកគេ ក្នុងនោះពួកគេបានរបូតគ្រាប់បាល់តែ1គ្រាប់គត់។ ក្រុម Paris SG ក៏ដណ្តើមបានជ័យជម្នះ4លើក និងស្មើ1លើកពីការប្រកួតផ្លូវការក្នុងផ្ទះខ្លួន5លើកចុងក្រោយរបស់ពួកគេផងដែរ។

ដោយឡែក ក្រុម Bayern Munich របស់អាល្លឺម៉ង់ ក៏បានទទួលជ័យជម្នះកាលពីថ្ងៃបើកឆាកផងដែរ តាមរយៈការផ្តួលក្រុម Anderlecht 3-០ ហើយពួកគេបានកត់ត្រាជ័យជម្នះ3លើក ស្មើ1លើក និងចាញ់1លើកពីការប្រកួត5លើកចុងក្រោយរបស់ពួកគេ ក្នុងនោះពួកគេបានរបូតគ្រាប់បាល់2គ្រាប់។ ក្រុម Bayern Munich ដណ្តើមបានជ័យជម្នះ4លើក និងចាញ់1លើកពីការប្រកួតក្រៅទឹកដី5លើកចុងក្រោយរបស់ពួកគេ។ សម្រាប់ការជួបគ្នា5លើកចុងក្រោយរវាងក្រុមទាំងពីរ Paris SGធ្វើបានល្អជាង ដោយដណ្តើមបានជ័យជម្នះ3លើក និងចាញ់2លើក។ ហេតុនេះ ជាមួយនឹងការមានប្រៀបដោយការលេងក្នុងផ្ទះខ្លួនឯង និងការស្ថិតក្នុងទម្រង់លេងយ៉ាងល្អនាពេលថ្មីៗនេះផងនោះ ការរំពឹងទុកគឺ ក្រុមម្ចាស់ផ្ទះគួរតែដណ្តើមបានជ័យជម្នះពីការប្រកួតនេះ។

ខ្សែបម្រើ Marco Verratti របស់ PSG បាននិយាយកាលពីថ្ងៃអង្គារថា៖ «យើងត្រូវតែបញ្ជូនសញ្ញាមួយដើម្បីបង្ហាញពីខ្លួនរបស់យើង។ ការយកឈ្នះពេលជួបក្រុម Bayern និងការលេងឲ្យបានល្អ នឹងផ្តល់ការជឿជាក់ដល់យើងជាច្រើន»។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

កម្មវិធីប្រកួតរាត្រីនេះ

Qarabag v AS Roma ម៉ោង 11 យប់
Anderlecht v Celtic ម៉ោង 1:45 ទៀបភ្លឺ
Atl. Madrid v Chelsea ម៉ោង 1:45 ទៀបភ្លឺ
Basel v Benfica ម៉ោង 1:45 ទៀបភ្លឺ
CSKA Moscow v Manchester United ម៉ោង 1:45 ទៀបភ្លឺ
Juventus v Olympiakos Piraeus ម៉ោង 1:45 ទៀបភ្លឺ
Paris SG v Bayern Munich ម៉ោង 1:45 ទៀបភ្លឺ
Sporting v Barcelona ម៉ោង 1:45 ទៀបភ្លឺ

ប្រភពពី៖ Sport24

September 27, 2017

Kane រកបាន 3គ្រាប់ ខណៈ Ronaldo ជួយឲ្យ Real បំបាក់ Dortmund

ខ្សែប្រយុទ្ធ Harry Kane បានស៊ុតបាល់បញ្ចូលទី3គ្រាប់ ខណៈដែលក្រុម Tottenham បានរក្សាកំណត់ត្រាឈ្នះ100ភាគរយរបស់ពួកគេក្នុងក្របខ័ណ្ឌ Champions League តាមរយៈការផ្តួលក្រុមម្ចាស់ផ្ទះ Apoel Nicosia ក្នុងលទ្ធផល 3-0 ក្នុងការប្រកួតពូល H កាលពីថ្ងៃអង្គារ។

Kane ដែលបានរកគ្រាប់បាល់បញ្ចូលទី2គ្រាប់ក្នុងពេលក្រុម Spurs បានយកឈ្នះលើក្រុម Borussia Dortmund កាលពីថ្ងៃប្រកួតបើកឆាកនោះ បានជួយឲ្យក្រុមខ្លួនមានគ្រាប់បាល់នាំមុខមុននៅនាទីទី39 តាមរយៈការរកបានគ្រាប់បាល់បញ្ចូលទីយ៉ាងល្អ ក្រោមជំនួយពីខ្សែបម្រើ Toby Alderweireld។ បន្ទាប់មកខ្សែប្រយុទ្ធអន្តរជាតិអង់គ្លេសរូបនេះ បានទទួលបាល់ពីការបញ្ជូនឱ្យរបស់ Moussa Sissoko ដើម្បីស៊ុតបាល់បញ្ចូលទីយ៉ាងងាយស្រួលម្ដងទៀតនៅនាទីទី62 ដើម្បីបន្ថែមការនាំមុខរបស់ក្រុមខ្លួន មុននឹងបំពេញគ្រាប់បាល់ទី3របស់គេក្នុងរយៈពេល 5នាទីក្រោយមកដោយការតែតបាល់បញ្ចូលទីពីជ្រុងម្ខាងនៃសំណាញ់ទី។

លោក Mauricio Pochettino អ្នកចាត់ការទូទៅរបស់ក្រុម Tottenham បានឲ្យដឹងថា៖ «វាជាការប្រកួតដ៏តានតឹងមួយ។ ពួកគេពិតជាមានការលើកទឹកចិត្តខ្ពស់។ វាពិតជាសំខាន់ណាស់ក្នុងការទទួលបាន3ពិន្ទុ។ វាជាការប្រកួតដែលត្រូវតែឈ្នះជាដាច់ខាត ហើយយើងពិតជាលេងបានយ៉ាងល្អមែន»។ ក្នុងការប្រកួតពូល H ដដែលនេះ ខ្សែប្រយុទ្ធ Cristiano Ronaldo បានស៊ុតបាល់បញ្ចូលទី2គ្រាប់ នៅថ្ងៃនៃការបង្ហាញខ្លួនលើកទី 400របស់គេសម្រាប់ក្លិប Real Madrid ខណៈដែលក្រុមម្ចាស់ការពារតំណែងជើងឯកនៃក្របខ័ណ្ឌ Champions League មួយនេះ បានផ្តួលក្រុម Borussia Dortmund ក្នុងលទ្ធផល 3-1។

លទ្ធផលនេះ មានន័យថា បច្ចុប្បន្នក្រុមទាំងពីរកំពុងតែនាំមុខនៅលើតារាងនៃពូល ដោយមាន6ពិន្ទុដូចគ្នា ពីការប្រកួតបើកឆាក2លើក៕

លទ្ធផលនៃការប្រកួតគូផ្សេងទៀត

Besiktas 2 0 RB Leipzig
Manchester City 2-0 Shakhtar Donetsk
Monaco 0-3 FC Porto
Napoli 3-1 Feyenoord
Sevilla 3-0 Maribor
Spartak Moscow 1-1 Liverpool

ប្រភពពី៖ BBC

September 27, 2017

ការនាំចូលសត្វរស់ពីបរទេសបាននាំឱ្យផលិតកម្មក្នុងស្រុកមានការធ្លាក់ចុះ

ការនាំចូលសាច់សត្វពីប្រទេសជិតខាងដើម្បីបំពេញតម្រូវការក្នុងស្រុកបានធ្វើឱ្យកម្ពុជាត្រូវចំណាយប្រាក់ជាច្រើនលានដុល្លារក្នុង1ឆ្នាំៗ ខណៈការនាំចូលនេះក៏បានបង្កើតឱ្យមានការត្អូញត្អែរយ៉ាងច្រើនផងដែរពីសំណាក់អ្នកចិញ្ចឹមសត្វក្នុងស្រុក។

តួលេខរបស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា កាលពីឆ្នាំ2016 កន្លងមកកម្ពុជាមានសត្វក្របីចំនួន520ពាន់ក្បាល ដោយធ្លាក់ចុះចំនួន6% បើធៀបនឹងឆ្នាំ2015 សត្វគោមានចំនួន 2.9លានក្បាល ខណៈការចិញ្ចឹមជ្រូកមានជាង2លានក្បាល។ ចំនួនខាងលើមិនអាចឆ្លើយតបទៅនឹងតម្រូវការទីផ្សារក្នុងស្រុកដែលមានកំណើនយ៉ាងច្រើនបានទេ។ ឆ្លើយតបនឹងកង្វល់នេះអ្នកយកព័ត៌មាននៃកាសែត ឡារ៉ែន ពាណិជ្ជ បានជួបសម្ភាសន៍ជាមួយ ឯកឧត្តម សេន សុវណ្ណ អគ្គនាយកនៃអគ្គនាយក-ដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទដើម្បីសាកសួរពីស្ថានភាពទូទៅនៃការចិញ្ចឹមសត្វ និងវិធានរបស់មន្ត្រីពាក់ព័ន្ធក្នុងផលិតកម្មសត្វនៅកម្ពុជា។

តើស្ថានភាពនៃការចិញ្ចឹមសត្វនៅកម្ពុជានាពេលនេះមាននិន្នាការបែបណា? ការចិញ្ចឹមសត្វនាពេលនេះ គឺផ្អែកទៅលើតម្រូវការទីផ្សារជាចម្បង ដោយបច្ចុប្បន្នតម្រូវការ គឺផ្តោតទៅលើគុណភាពជាចម្បង។ ស្ថានភាពនៃការចិញ្ចឹមសត្វនៅក្នុងស្រុកបានប្រែប្រួលខ្លាំង ដោយសារការចិញ្ចឹមខ្នាតតូចមានការធ្លាក់ចុះ ហើយការចិញ្ចឹមសត្វពាហនៈសម្រាប់ប្រើប្រាស់ជាកម្លាំងអូសទាញរបស់ប្រជាកសិករក៏បានធ្លាក់ចុះយ៉ាងគំហុកផងដែរ។ គិតត្រឹមដំណាច់ឆ្នាំ2016 កម្លាំងអូសទាញដែលប្រើប្រាស់សត្វពាហនៈនៅកម្ពុជានៅសល់ត្រឹមតែ8.8%ប៉ុណ្ណោះ។ ចំណែកការចិញ្ចឹមជ្រូកខ្នាតតូចៗ (លក្ខណៈគ្រួសារ) ក៏បានធ្លាក់ចុះយ៉ាងច្រើនផងដែរ ដោយសារតែមិនអាចប្រកួតប្រជែងជាមួយការចិញ្ចឹមខ្នាតធំ ដែលមានបច្ចេកទេសទំនើបៗ និងធានាបាននូវអនាម័យ ព្រមទាំងគុណភាព។ នៅពេលនេះអគ្គនាយកដ្ឋានសុខភាពសត្វ និងផលិតកម្មសត្វ ក៏បានដាក់ចេញនូវយុទ្ធសាស្ត្ររយៈពេលវែងដោយផ្តោតលើការកែលម្អពូជ របៀបចិញ្ចឹម និងការផ្តល់សេវាកម្មសុខភាពសត្វ។ អ្នកចិញ្ចឹមក្នុងស្រុកតែងត្អូញត្អែរពីការអនុញ្ញាតឱ្យនាំចូលសាច់សត្វយ៉ាងច្រើនមកកាន់ទីផ្សារកម្ពុជា។

តើឯកឧត្តមអាចបកស្រាយដូចម្តេច? នេះជាបញ្ហាប្រឈមពិតប្រាកដដែលប្រជាពលរដ្ឋតែងត្អូញត្អែរតាមរយៈវេទិកាសាធារណៈនានា។ យើងត្រូវដឹងថា ការផ្គត់ផ្គង់សាច់នៅក្នុងស្រុកនាសព្វថ្ងៃនេះ គឺមិនអាចឆ្លើយតបទៅនឹងតម្រូវការក្នុងស្រុកបានឡើយ ហេតុនេះទើបហើយក្រសួងកសិកម្ម រុក្ខាប្រមាញ់ និងនេសាទ ដាក់ចេញនូវវិធានការនាំចូលសាច់ពីក្រៅប្រទេសដើម្បីរក្សាលំនឹងទីផ្សារ។ ក្រសួងបានអនុញ្ញាតឱ្យនាំចូលជ្រូកដែលមានគុណភាព សុវត្ថិភាព និងមានការត្រួតពិនិត្យច្បាស់លាស់ ដែលចំនួនសរុបប្រហែល40ម៉ឺនក្បាលក្នុងមួយឆ្នាំដើម្បីទប់កុំឱ្យថ្លៃសាច់ហក់ឡើងខ្ពស់ពេក។ បញ្ហាដែលកើតឡើងនោះគឺការរត់ពន្ធ។ បើយើងក្រឡេកទៅមើលតារាងពន្ធគយ សត្វជ្រូកមួយក្បាលដែលនាំចូលមកកម្ពុជាគឺត្រូវជាប់ពន្ធរហូតដល់ 750រៀលក្នុងមួយគីឡូក្រាម។ បើសិនការនាំចូលមានបង់ពន្ធត្រឹមត្រូវតាមតារាងដែលបានកំណត់ ការនាំចូលស្របច្បាប់ក៏មិនងាយប្រកួតប្រជែងជាមួយការចិញ្ចឹមក្នុងស្រុកបានដែរ។ យើងពិតជាត្រូវការខ្លាំងណាស់ចំពោះការនាំចូលស្របច្បាប់ ដើម្បីអាចរក្សាបាននូវគុណភាព និងរក្សាបាននូវការផ្គត់ផ្គង់មួយដែលបំពេញតម្រូវការទីផ្សារ។

ការរត់ពន្ធសត្វ គឺជាចំណុចគ្រោះថ្នាក់បំផុត។ គ្រោះថ្នាក់ចម្បងមានចំនួន2 គឺទី1 សត្វនាំចូលមកលួចលាក់មានប្រភពមិនច្បាស់លាស់ មានជំងឺឆ្លង និងមានគុណភាពអន់ ដែលប្រទេសនាំចូលនោះមិនឱ្យចែកចាយនៅក្នុងប្រទេសរបស់គេ ហើយគេត្រូវរុញចេញទៅក្រៅប្រទេស ព្រមទាំងអាចលក់បង្ខូចថ្លៃទៀតផង។ ទី2 ការប៉ះពាល់ធំបំផុត គឺដោយសារប្រភពមិនច្បាស់លាស់នោះវាបានបង្កកង្វល់សុខភាពសាធារណៈធ្ងន់ធ្ងរ។ ការចិញ្ចឹមជ្រូកនៅតាមប្រទេសជិតខាង បើតាមខ្ញុំដឹងថា មានការប្រើប្រាស់សារធាតុហាមឃាត់មួយចំនួនដែលធ្វើឱ្យប៉ះពាល់ដល់សុខភាពអ្នកបរិភោគទៅថ្ងៃអនាគត។

ដោយសារបញ្ហាកង្វល់មានច្រើន តើឯកឧត្តមមានយុទ្ធសាស្ត្រអ្វីដើម្បីអប់រំអ្នកប្រើប្រាស់ក្នុងស្រុកឱ្យគាំទ្រផលិតផលក្នុងស្រុក? យើងមានកម្មវិធីរួចហើយ គឺកម្មវិធីគ្រប់គ្រងអនាម័យសត្វ និងសាច់សត្វ តាមរយៈការគ្រប់គ្រងសត្វឃាតដ្ឋាន និងការត្រួតពិនិត្យគុណភាពសាច់នៅមុនពេលកាប់ ក្រោយពេលកាប់ និងពេលចែកចាយនៅទីផ្សារ។ អគ្គនាយកដ្ឋានសុខភាពសត្វ និងផលិតកម្មសត្វ មើលឃើញថា មានការចាំបាច់ត្រូវពង្រឹងសមត្ថកិច្ចនេះឱ្យមានបច្ចេកទេសរឹងមាំ និងគួរឱ្យជឿទុកចិត្តបាន ហើយធានាបាននូវសត្វដែលបានអូសត្រាពិនិត្យរួចនោះជាសាច់ដែលធានាបាននូវគុណភាពសម្រាប់ការបរិភោគ។ យើងប្រាកដជាមានការប្រឈមច្រើន ហើយត្រូវការកិច្ចសហការជាមួយអាជ្ញាធរពាក់ព័ន្ធទាំងអស់ ពិសេសការផ្សព្វផ្សាយទៅដល់អ្នកប្រើប្រាស់។

ការពិឃាតសត្វឈឺ គឺមានតម្លៃថោក តែវាមានហានិភ័យខ្ពស់ ដោយសារការពិឃាតនោះគឺការពិឃាតលួចលាក់។ សាច់ដែលមានការពិឃាតនៅសត្តឃាតដ្ឋានស្របច្បាប់ យើងធានាបាននូវគុណភាព។

តាមការមើលឃើញរបស់ឯកឧត្តម តើទីផ្សារកម្ពុជាមានសក្តានុពលធំដែរ ឬទេសម្រាប់របរចិញ្ចឹមសត្វដើម្បីផ្គត់ផ្គង់ទីផ្សារ? បើយើងក្រឡេកមើលតម្រូវការរបស់ទីផ្សារបច្ចុប្បន្ន និងស្ថិតិនាំចូល យើងឃើញថាទីផ្សារកម្ពុជាកំពុងមាននិន្នាការកើនឡើងនូវតម្រូវការសាច់ដែលមានគុណភាព។ និន្នាការនៃកំណើនប្រាក់ចំណូលដែលមានចន្លោះពី25%ទៅ50% គឺត្រូវចំណាយទៅលើអាហារ ហើយនៅក្នុង25%នៃការចំណាយទៅលើអាហារ គឺចំណាយទៅលើសាច់។ ដូច្នេះយើងអាចនិយាយដោយខ្លីថា និន្នាការនៃតម្រូវការសាច់ដែលមានគុណភាពគឺកំពុងកើនឡើងច្រើន។ បានសេចក្តីថា កម្ពុជាមានទីផ្សារនៅក្នុងស្រុករួចទៅហើយ ឥឡូវនេះវាស្ថិតនៅក្នុងស្ថានភាពថា តើប្រជាពលរដ្ឋយើងអាចដណ្តើមយកចំណែកទីផ្សារក្នុងស្រុកបានដែរ ឬទេ? ទាំងនេះយើងមិនទាន់និយាយទៅដល់ភ្ញៀវទេសចរបរទេសដែលមកកម្សាន្តនៅប្រទេសកម្ពុជាឡើយ។ ដូច្នេះនេះជាឱកាស និងសក្តានុពលសម្រាប់ពង្រីកវិស័យចិញ្ចឹមសត្វផងដែរ។ ភាពចន្លោះប្រហោងគឺនៅត្រង់ថាតើយើងត្រូវរៀបចំគោលនយោបាយទៅជួយប្រជាកសិករខ្នាតតូច សហគមន៍កសិកម្ម ឬក៏ការបើកដៃគូវិនិយោគរបស់ឯកជន។ ទាំងនេះស្ថិតនៅក្នុងការឆ្លុះបញ្ចាំងដើម្បីរៀបចំគោលនយោបាយកសាងភាពជាដៃគូរវាងរដ្ឋ និងឯកជនដែលផ្សារភ្ជាប់នឹងសហគមន៍កសិកម្ម។

ហេតុអ្វីការធ្វើការងារជាមួយសហគមន៍កសិកម្មមានភាពចាំបាច់? តើវាអាចធានានិរន្តរភាពក្នុងផលិតកម្មសាច់យ៉ាងដូចម្តេចខ្លះ? ក្រសួងកសិកម្ម រុក្ខាប្រមាញ់ និងនេសាទ បានជំរុញការអនុវត្តកសិកម្មតាមកិច្ចសន្យា ព្រោះវាជាមធ្យោបាយផ្សារភ្ជាប់ខ្សែសង្វាក់ផលិតកម្ម និងខ្សែសង្វាក់តម្លៃ។ ឥឡូវនេះយើងចាប់ផ្តើមសម្លឹងមើល និងរៀបចំតាមស្រុកនីមួយៗតាមរយៈការបង្កើតទីផ្សារសត្វ ដោយមិនអនុញ្ញាតឱ្យមានអាជីវកម្មដែលធ្លាប់តែដើរទិញសត្វឈឺចម្លងពីកន្លែងមួយទៅកន្លែងមួយទៀតទេ គឺឱ្យប្រជាពលរដ្ឋយកសត្វមកលក់នៅកន្លែងមួយ ដែលមានការផ្សព្វផ្សាយ និងត្រួតពិនិត្យសុខភាពច្បាស់លាស់ដើម្បីធានាបាននូវសុវត្ថិភាពសម្រាប់អ្នកបរិភោព។ ចំពោះផ្នែកផលិតកម្ម យើងនឹងជំរុញឱ្យមានការផ្លាស់ប្តូរពូជ ការអភិវឌ្ឍចំណីសត្វ និងការថែទាំបែបថ្មី ដែលធានាបានទាំងអនាម័យ ការពារជំងឺឆ្លង និងការលូតលាស់របស់សត្វ ហើយយើងនឹងជំរុញឱ្យកសិករខ្នាតតូចប្រើប្រាស់បច្ចេកទេសទាំងអស់នោះ។ ចំពោះឥណទាន យើងនឹងខិតខំធ្វើការងារជាមួយស្ថាប័នហិរញ្ញវត្ថុទាំងថ្នាក់ជាតិ និងអន្តរជាតិ ដើម្បីផ្តល់ផលប្រយោជន៍ឱ្យគា្នទៅវិញទៅមក។ ជាចុងក្រោយយើងលើកទឹកចិត្តឱ្យមានការកែច្នៃផលិតផលសាច់ទាំងនោះ។

អគ្គនាយកដ្ឋានសុខភាពសត្វ និងផលិតកម្មសត្វ កំពុងត្រៀមខ្លួនចរចា “Breeding Protocol”ជាមួយប្រទេសអូស្ត្រាលី និងប្រទេសមួយចំនួនទៀត ដើម្បីនាំពូជគោយកមកបង្កាត់នៅកម្ពុជា ហើយបង្កើតជាឧស្សាហកម្មនៅកម្ពុជា។ ពេលនោះកសិករខ្នាតតូចនឹងទទួលបានផលប្រយោជន៍ពីគោលនយោបាយនេះ ដោយកសិករខ្នាតតូចអាចចូលរួមតាមរយៈការទិញគោយកទៅចិញ្ចឹម។ គោនោះនឹងបង្កើតកូនមួយក្នុងរយៈពេល15ខែ និងអាចលក់បានតម្លៃ 700ទៅ800ដុល្លារ ដោយប្រើប្រាស់តែស្មៅ និងចំណីកែច្នៃមួយចំនួនប៉ុណ្ណោះ។ យើងដឹងថា ការចិញ្ចឹមគោពិតជាមានសក្តានុពលបង្កើតប្រាក់ចំណេញ ព្រោះគោស៊ីស្មៅដែលមិនប្រជែងជាមួយចំណីរបស់មនុស្ស។

នេះជាអ្វីដែលអ្នកតាក់តែងគោលនយោបាយមើលឃើញ តើវាអាចទៅរួចទេសម្រាប់ការអនុវត្ត ហើយវាអាចនឹងលេចរូបរាងឡើងពេលណាដែរ? ខ្ញុំមានការតាំងចិត្ត! កិច្ចការទាំងអស់នេះយើងពិតជាត្រូវការពេលវេលា។ សម្រាប់យើង គឺបានចាប់ផ្តើមធ្វើជាបណ្តើរៗហើយ។ បើពិនិត្យមើលពីកត្តាភូមិសាស្ត្រ កសិដ្ឋាន ទំនៀមទម្លាប់ និងស្ថានភាពសេដ្ឋកិច្ចរបស់យើងគឺអាចទៅរួច ដោយវាអាចទៅមុខលឿនទៀតផង តែកត្តាប្រឈមដែលត្រូវដោះស្រាយគឺបញ្ហាដើមទុន និងការផ្តល់សេវាគាំទ្រដល់សុខភាពសត្វ។ រឿងសេវាសុខភាពសត្វនេះ អគ្គនាយកដ្ឋានទើបបានប្រជុំ ដែលដាក់ចេញនូវកិច្ចការសំខាន់ក្នុងការធ្វើកិច្ចសហប្រតិបត្តិការជាមួយអង្គការសុខភាពសត្វពិភពលោក និង អង្គការសំខាន់ៗផ្សេងទៀត ព្រមទាំងកិច្ចសហប្រតិបត្តិការជាមួយបរទេស ដូចជាជប៉ុន ដើម្បីឱ្យគេជួយគាំទ្រផ្នែកបច្ចេកទេស និងងាយស្រួលបញ្ជ្រាបបទដ្ឋានបច្ចេកទេសនានាដែលតម្រូវដោយអន្តរជាតិ។

ចំពោះមុខនេះ បើយើងចង់ស្តារមុខរបរនៃការចិញ្ចឹមសត្វ ជាពិសេសការចិញ្ចឹមជ្រូកដែលអ្នកចិញ្ចឹមក្នុងស្រុកប្រឈមខ្លាំងដោយសារថ្លៃដើមផលិតកាន់តែខ្ពស់ ព្រោះកត្តាមួយចំនួនដូចជាកត្តាដឹកជញ្ជូន កត្តាភ្លើង និងកត្តាចំណីមូលដ្ឋាន។ ចំណីជ្រូកពឹងផ្អែកលើការនាំចូលរហូតដល់60% ដែលមានតម្លៃរហូតដល់135 លានដុល្លារក្នុងមួយឆ្នាំ។ ដោយសារការពឹងផ្អែកនេះហើយ ទើបធ្វើឱ្យផលិតកម្មក្នុងស្រុកមានតម្លៃខ្ពស់ តែយើងមិនត្រូវទុទ្ទិដ្ឋិនិយមពេកនោះទេ។ សម្រាប់ខ្ញុំ គឺនៅតែមានសុទិដ្ឋិនិយមចំពោះរឿងចិញ្ចឹមសត្វ ថ្វីត្បិតតែការចិញ្ចឹមមានថ្លៃដើមខ្ពស់បន្តិចមែន តែដំណើរការចិញ្ចឹមសត្វនៅតែមាន។ រឿងដែលមានគ្រោះថ្នាក់ខ្លាំងបំផុត គឺការបើកដៃឱ្យនាំចូលជ្រូករស់ដែលមានជំងឺមកកាន់ទីផ្សារកម្ពុជាដោយលក់បង្ខូចថ្លៃ (លក់ថោកជាងតម្លៃចំណាយផលិតក្នុងស្រុក)។ នេះជារឿងដែលត្រូវតែចូលរួមជួយគ្នាដើម្បីធ្វើការទប់ស្កាត់ ដោយអគ្គនាយកដ្ឋានសុខភាពសត្វ និងផលិតកម្មសត្វ មិនអាចធ្វើតែឯងបានទេ៕

September 27, 2017

Author: វល័ក្ខ