វល័ក្ខ - La Reine Media

ស្ថាប័នរដ្ឋ និងឯកជនចាប់ផ្តើមមើលឃើញពីគុណសម្បត្តិរបស់គ្រូចូលនិវត្តន៍កាន់តែខ្លាំង

សាលារៀនជាថ្នាលបណ្តុះបណ្តាលធនធានមនុស្ស តែអ្នកដែលកែច្នៃ និងថែទាំមនុស្សពិតប្រាកដនោះគឺគ្រូបង្រៀនដែលកំពុងបម្រើការងារយ៉ាងមមាញឹកនៅក្នុងសាលាឱ្យមានសកម្មភាពរស់រវើក។ គ្រូបង្រៀនជាកម្លាំងចលករយ៉ាងសំខាន់ដែលធ្វើឱ្យសង្គមមួយមានស្ថានភាពស្រស់បំព្រង ពោរពេញទៅដោយការអភិវឌ្ឍលើគ្រប់វិស័យតាមរយៈការបង្កើនចំនួនធនធានមនុស្សទៅតាមជំនាញរៀងៗខ្លួនរបស់យុវជនដែលជាអ្នកបន្តវេនរបស់កម្ពុជា។

ប៉ុន្មានថ្ងៃទៀតនេះ ជាទិវាគ្រូបង្រៀន ដែលគ្រប់សមាសភាពក្នុងសង្គមចាប់ផ្តើមនាំគ្នាលើកឡើងពីបញ្ហាគ្រូបង្រៀន និងក៏ជាពេលដែលសិស្សគ្រប់គ្នារំឭកឡើងវិញនូវគុណបំណាច់របស់លោកគ្រូ-អ្នកគ្រូ សាស្ត្រាចារ្យដែលបានយកចិត្តទុកដាក់ បណ្តុះបណ្តាលសិស្សទាំងឡាយឱ្យក្លាយជាមនុស្សដែលមានសមត្ថភាពខ្ពស់ និងមានភាពថ្កុំថ្កើងនៅពេលបច្ចុប្បន្ននេះ។

ទោះជាយ៉ាងនេះក្តី ជាទូទៅគ្រូដែលជាវិស្វករនៃព្រលឹងរបស់មនុស្សម្នាក់ៗនេះ ត្រូវបានគេយកចិត្តទុកដាក់ដោយពេលម្ដងម្កាលតែប៉ុណ្ណោះកាលពីប៉ុន្មានឆ្នាំមុន។ ជារៀងរាល់ទិវាសំខាន់ៗ សិស្សជាច្រើននាំគ្នារំឭកគុណ និងដឹងគុណគ្រូ តែពេលក្រៅពីនោះមក គ្រូបង្រៀន ជាពិសេសគ្រូចាស់ៗដែលចូលនិវត្តន៍ នៅមិនទាន់ទទួលបានការលើកទឹកចិត្តខ្លាំងៗពីសិស្សនៅឡើយទេ ដូចជាស្ថាប័ននានា ជាពិសេសស្ថាប័នឯកជនតែម្ដង។ តែនាពេលថ្មីៗនេះ សាធារណជនបានចាប់ផ្ដើមមើលឃើញថា ការយកចិត្តទុកដាក់លើគ្រូបង្រៀនហាក់មានលក្ខណៈផុសផុលខ្លះៗហើយតាមរយៈការបង្ហាញជំហរបស់សាលាឯកជនមួយចំនួនក្នុងការជ្រើសរើសគ្រូបង្រៀនចូលនិវត្តន៍ឱ្យមកបង្រៀនក្នុងសាលារបស់ខ្លួន ដើម្បីជាការលើកទឹកចិត្ត និងដើម្បីជាផ្តល់ប្រាក់ចំណូលបន្ថែមដល់គាត់ផងដែរ។

ពាក់ព័ន្ធជាមួយនឹងបញ្ហានេះ លោក ប៉ិច ប៉ូឡែន ស្ថាបនិកសាលាវេស្ទឡាញន៍ ធ្លាប់បានលើកឡើងថា លោកសាស្ត្រាចារ្យ ចូលនិវត្តន៍ជាធនធានមនុស្សដែលមានតម្លៃ និងជាជនដែលមានទេពកោសល្យខ្ពស់ក្នុងការបង្រៀន។ ម្យ៉ាងវិញទៀតយើងសង្កេតឃើញថា គ្រូបង្រៀនចាស់ៗជាមនុស្សដែលពោរពេញទៅដោយទេពកោសល្យខ្ពស់ក្នុងជីវិតបង្រៀន ដែលអាចបណ្តុះបណ្តាលសិស្សជំនាន់ក្រោយឱ្យក្លាយជាធនធានដ៏រឹងមាំសម្រាប់សង្គមបាន។

ស្រដៀងគ្នានេះដែរ អតីតនាយកវិទ្យាល័យទួលទំពូង លោកសាស្ត្រាចារ្យ ស៊ិន ស៊ីថុន និងជាស្ថាបនិកនៃសាលា មហាសាស្ត្រា ក៏បានលើកទឹកចិត្តគ្រូបង្រៀនចូលនិវត្តន៍ដើម្បីមកបង្រៀនក្នុងសាលារបស់លោក ដើម្បីជាការលើកទឹកចិត្តផង និងដើម្បីផ្តល់ឱកាសឱ្យលោកគ្រូ-អ្នកគ្រូចូលនិវត្តន៍បានជួបជុំគ្នា ពិភាក្សាគ្នាផងដើម្បីផ្ទេរចំណេះដឹងដល់ក្មេងជំនាន់ក្រោយ។

ក្រៅពីនេះគេមើលឃើញសាលាឯកជនមួយចំនួនផ្សេងទៀតក៏បានចាប់អារម្មណ៍ និងជ្រើសរើសគ្រូបង្រៀនចូលនិវត្តន៍មកបង្រៀនដែរ ដែលជាការផ្តល់ឱកាសច្រើនសម្រាប់សាស្ត្រាចារ្យចាស់ៗដើម្បីរកប្រាក់ចំណូលបន្ថែម និងដើម្បីជាការយកចិត្តទុកដាក់ចំពោះរូបគាត់ផងដែរ៕

October 2, 2017

សណ្ឋគារ សុខាសៀមរាប ត្រូវបានដាក់សម្ពោធបើកដំណើរការជាផ្លូវការ

សៀមរាប៖ សណ្ឋាគារ និងរមណីយដ្ឋានសុខា បានប្រកាសសម្ភោធជាផ្លូវការនូវរមណីយដ្ឋានថ្មីមួយទៀត ស្ថិតនៅក្នុងខេត្តសៀមរាប ដែលជារមណីយដ្ឋានដ៏ប្រណិតធំជាងគេបំផុតនៅក្នុងព្រះរាជាណាចក្រកម្ពុជា។

នៅថ្ងៃទី០២ ខែតុលានេះ រមណីយដ្ឋានសុខាសៀមរាប និងសណ្ឋាគារសុខាផាឡែស បានបើកទទួលស្វាគមន៍ជាផ្លូវការ ចំពោះភ្ញៀវកិត្តិយស អ្នកសារព័ត៌មានជាតិ និងអន្តរជាតិ។ ជាមួយនឹងការផ្តល់ជូននូវបទពិសោធន៍នៃបដិសណ្ឋារកិច្ចជាលក្ខណៈអន្តរជាតិថ្មីមួយមកកាន់ទីក្រុង ភ្ញៀវជាតិ និង អន្តរជាតិ នឹងទទួលបាននូវជម្រើសក្នុងការស្នាក់នៅក្នុងសណ្ឋាគារទាំងពីរនេះ ដែលមានបន្ថែមចំនួន 1264បន្ទប់ រួមមានបន្ទប់ធម្មតា បន្ទប់ស្វីត និងបន្ទប់ប្រភេទវីឡា ព្រមទាំងមានភោជនីយដ្ឋានចំនួន 09បន្ថែម ដែលផ្តល់ជូននូវ អាហារមកពីគ្រប់តំបន់ដ៏មានឱជារស។ រមណីយដ្ឋានមានមជ្ឈមណ្ឌលសន្និសីទដ៏ប្រណិតដែលមានទំហំ 2190ម៉ែត្រការ៉េ ជាសាលប្រជុំធំជាងគេនៅក្នុងខេត្តសៀមរាប។

អ្នកស្រី គុណ ថាណែត ដែលជានាយិកាផ្នែកលក់ប្រចាំតំបន់ បានមានប្រសាសន៍ថា៖ យើងខ្ញុំ មានសេចក្តីរីករាយយ៉ាងខ្លាំងក្នុងការពង្រីកសេវាកម្មរបស់យើងខ្ញុំនៅក្នុងខេត្តសៀមរាប ដែលមានរមណីយដ្ឋាន សុខាសៀមរាបលំដាប់ផ្កាយប្រាំ និងសណ្ឋាគារសុខាផាឡែសសៀមរាបលំដាប់ផ្កាយបួន ស្ថិតនៅជិតគ្នា។ ជាមួយ គ្នានឹងរមណីយដ្ឋានសុខាអង្គរដែលបានបើកដំណើរការនៅក្នុងអំឡុងឆ្នាំ2006 បច្ចុប្បន្ននេះយើងមានជាង 1500បន្ទប់ជារៀងរាល់ថ្ងៃ ឆ្លើយតបទៅនឹងកំណើននៃភ្ញៀវទេសចរណ៍មកទស្សនាប្រាសាទអង្គរវត្ត ដែលជាសម្បត្តិបេតិកភណ្ឌពិភពលោក។ យើងខ្ញុំមានការជឿជាក់យ៉ាងខ្លាំងថា ការពង្រីកបន្ថែមនូវបន្ទប់ទាំងនេះនឹងផ្តល់អត្ថប្រយោជន៍ជាច្រើន ជូនដល់ភ្ញៀវក៏ដូចជាសេដ្ឋកិច្ចក្នុងតំបន់ ជាពិសេសគឺផ្តល់ការងារដល់ប្រជាជនក្នុងតំបន់ ជាមួយនឹងបដិសណ្ឋារ កិច្ចលំដាប់អន្តរជាតិរបស់សណ្ឋាគារនិងរមណីយដ្ឋានសុខា ។

នាយកចាត់ការទូទៅប្រចាំតំបន់លោក Ingo បានមានប្រសាសន៍បន្ថែមថា ការបើកសម្ភោធជាផ្លូវការរបស់ ពួកយើងនឹងផ្តល់ជូននូវឱកាសដ៏ល្អឥតខ្ចោះ ជូនដល់ភ្ញៀវក្នុងការទទួលយក បដិសណ្ឋារកិច្ចលំដាប់ពិភពលោកថ្មី បំផុតរបស់ សណ្ឋាគារសុខាសៀមរាប និងសាលសន្និសីទ។ វាជាមោទនភាពដ៏អស្ចារ្យមួយដែលអាចចែករំលែកនូវ ការចាប់ផ្តើមទំព័រថ្មីដ៏គួរឲ្យរំភើបមួយ ក្នុងការវិវត្តន៍របស់សណ្ឋាគារសុខា។

រមណីយដ្ឋានមានទីតាំងស្ថិតនៅលើផ្លូវទៅកាន់ប្រាសាទអង្គរវត្ត នៅជិតមជ្ឈមណ្ឌលលក់សំបុត្រអង្គរ មានលក្ខណៈពិសេសដែលផ្តល់ភាពងាយស្រួលក្នុងការធ្វើដំណើរទៅកាន់កន្លែងទេសចរណ៍ដ៏គួរឲ្យទាក់ផ្សេងៗដូចជា ផ្សាររាត្រីខេត្តសៀមរាប ផាប់ស្ត្រីតដ៏ទំនើប និងមជ្ឈមណ្ឌលវប្បធម៌ និងទេសចរណ៍អង្គរ។ លើសពីនេះ រមណីយដ្ឋានមានមជ្ឈមណ្ឌលហាត់ប្រាណ កន្លែងស្ប៉ាដ៏ទំនើប អាងហែលទឹកធំទូលាយ ស្ទីម សូណា ចាគូស៊ី អាងហែលទឹកក្តៅ និងទឹកត្រជាក់ និងក្លឹបកុមារដែលមានល្បែងកម្សាន្តជាច្រើនប្រភេទសម្រាប់កុមារ។

សម្រាប់សំនួរផ្សេងៗទាក់ទងនឹងផ្នែកលក់
សូមទំនាក់ទំនងមកកាន់៖

អ្នកស្រី គុណ ថាណែត ជានាយិកាផ្នែកលក់ប្រចាំតំបន់
លេខទូរស័ព្ទដៃ៖ 096 616 1888 / 063 961 999
អ៊ីមែល៖ [email protected]

សម្រាប់ផ្នែកសារព័ត៌មានផ្សេងៗ
អ្នកស្រី សំរិទ្ធប៊ុននិច្ច ដែលជាប្រធានផ្នែកទីផ្សារ
សណ្ឋាគារ និងរមណីយដ្ឋានសុខា
ទីស្នាក់ការកណ្តាលផ្នែកលក់ និងទីផ្សារ
លេខទូរស័ព្ទដៃ៖ 097 561 6104
លេខទូរស័ព្ទ៖ 023 99 80 75
អ៊ីមែល៖ [email protected]

គេហទំព័រៈ        www.sokhahotels.com/siemreap
ហ្វេសប៊ុកៈ        https://www.facebook.com/sokhasiemreapresort
វាយបូៈ           https://weibo.com/sokhasiemreapresort
វីឆាតៈ           SokhaSiemReapResort
យូធូបៈ           www.youtube.com/channel/UCA0zj04gJyY4dmbiW03q_SQ
ហ្គូហ្គលៈ https://plus.google.com/107884396709942570302
ព្រីនធ័ររេសៈ       www.pinterest.com/sokhasiemreap
ទ្វីតធ័រៈ www.twitter.com/SokhaSiemReap
អិនស្តារក្រាមៈ https://www.instagram.com/sokhahotels

អំពីសណ្ឋាគារ និងរមណីយដ្ឋានសុខា

សណ្ឋាគារ និងរមណីយដ្ឋានសុខា ត្រូវបានគេស្គាល់ថាជាក្រុមហ៊ុនសុខាអូតែលគ្រុប មានទីតាំងស្ថិតនៅរាជ ធានីភ្នំពេញ និងគ្រប់គ្រងដោយជនជាតិខ្មែរដែលមាន “សូគីម៉ិចអ៊ិនវេសមេនគ្រុប” ជាក្រុមហ៊ុនមេ។ សណ្ឋាគារ និងរមណីយដ្ឋានសុខាត្រូវបានបង្កើតឡើងក្នុងឆ្នាំ2004 ដោយអ្នកឧកញ៉ាបណ្ឌិត សុខ គង់។ បច្ចុប្បន្ន សណ្ឋាគារ និងរមណីយដ្ឋានសុខាមានសណ្ឋាគារសរុបចំនួន 06ដែលមានទីតាំងស្ថិតនៅក្នុង រាជធានីនិងខេត្តសំខាន់ៗ ចំនួន 04 ក្នុងប្រទេសកម្ពុជា។

ក្នុងនាមជាអ្នកប្រតិបត្តិផ្នែកបដិសណ្ឋារកិច្ចដ៏ធំបំផុតក្នុងប្រទេសកម្ពុជា សុខាត្រូវបានគេស្គាល់ថាជាសណ្ឋាគារ លំដាប់ផ្កាយ៥ក្នុងស្រុកដែលជាមោទនៈភាពរបស់ប្រទេសកម្ពុជា។ ភាពជោគជ័យរបស់យើង ទទួលបានមកពី បុគ្គលិករបស់យើងទាំងអស់គ្នា និងការប្តេជ្ញាចិត្តយ៉ាងមុតមាំរបស់ពួកគេក្នុងការឈានទៅដល់គោលដៅ ដើម្បី ផ្តល់ជូនភ្ញៀវនូវបទពិសោធន៍ពីសេវាកម្មដ៏ល្អបំផុត និងស្នាមញញឹមដែលមិនអាចបំ ភ្លេចបានរបស់ប្រជាជន កម្ពុជា៕

October 2, 2017

កម្ពុជាមិនទាន់ប្រមូលពន្ធបានគ្រប់តាមផែនការកំណត់នៅឡើយ

ភ្នំពេញ៖ ត្រឹមរយៈពេល8 ខែដើមឆ្នាំ2017 អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុប្រមូលពន្ធបានប្រមាណជា 5,657 ពាន់លានរៀលស្មើនឹងប្រមាណជា 1,414.43លានដុល្លារសហរដ្ឋអាមេរិក ដែលមិនទាន់គ្រប់តាមផែនការកំណត់នៅឡើយទេ។

ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយក នៃនាយកដ្ឋានពន្ធដារបានឱ្យដឹងក្នុងពិធីជួបសម្តែងការគួរសមរបស់ប្រតិភូនាវាយុវជនអាស៊ីអាគ្នេយ៍ថា ត្រឹមរយៈពេល8ខែ ដើមឆ្នាំ2017នេះ ការប្រមូលពន្ធទើបតែសម្រេចបានប្រមាណជា 82.43% នៃផែនការកំណត់ដោយច្បាប់ប៉ុណ្ណោះ បានន័យថា មិនទាន់គ្រប់100%នៅឡើយទេ។

ឯកឧត្តមមានប្រសាសន៍ថា ការអនុវត្តកំណែទម្រង់នេះ ចៀសមិនផុតពីផលប៉ះពាល់នោះទេ គ្រាន់តែតិច ឬច្រើនប៉ុណ្ណោះ ជាពិសេសការផ្លាស់ប្តូរផ្នត់គំនិត និងវប្បធម៌ការងាររបស់ «មន្ត្រីពន្ធដារជាអ្នកត្រួតត្រាអ្នកជាប់ពន្ធទៅជាអ្នកផ្តល់សេវា និងការប្រឈម ដែលសត្រូវនៃការកែទម្រង់គឺជាអ្នកមិនចង់កែទម្រង់» ក្នុងភាពជាអ្នកដឹកនាំស្ថាប័នដើម្បីឈានទៅទទួលបានជោគជ័យលើការងារ កំណែទម្រង់ត្រូវការឆន្ទៈខ្ពស់ ការតាំងចិត្តពុះពារមិនរាថយ ចំណេះដឹង ភាពជឿជាក់ ការបំពេញការងារប្រកបប្រតិសកម្ម និងផ្នត់គំនិតនៃការផ្តួចផ្តើម។

ឆ្លៀតក្នុងពេលនោះឯកឧត្តមបានផ្ញើសារតាមរយៈក្រុមយុវជនអាស៊ីអាគ្នេយ៍ឱ្យជួយផ្សព្វផ្សាយចែករំលែកបន្តចំណេះដឹង និងបទពិសោធការងារ ពាក់ព័ន្ធនឹងវិស័យពន្ធដារ ក្នុងន័យពង្រឹង និងបញ្ជ្រាបវប្បធម៌ នៃពន្ធដារ និងក្នុងន័យពង្រឹង និងបញ្ជ្រាបវប្បធម៌នៃការបង់ពន្ធនៅកម្ពុជាឱ្យបានកាន់តែជ្រួតជ្រាបដល់មជ្ឈដ្ឋានអ្នកជាប់ពន្ធនានា ក៍ដូចជាមន្ត្រីរាជការស៊ីវិល និងកងកម្លាំងប្រដាប់អាវុធទាំងអស់ដែរ។

គួររំឭកដែរថា ក្នុងរយៈពេល5ឆ្នាំចុងក្រោយនេះ ចាប់តាំងពីឆ្នាំ2012មក គឺតែងតែសម្រេចបានលើសផែនការ ហើយការប្រមូលចំណូលពន្ធបានកើនឡើងជាមធ្យមប្រមាណ 20% ក្នុងមួយឆ្នាំ ដែលជាក់ស្តែងបានកើនឡើងជាមធ្យមប្រមាណពី736លានដុល្លារអាមេរិក ក្នុងឆ្នាំ2012 រហូតទទួលបានប្រមាណជាង 1.4 ពាន់លានដុល្លារអាមេរិកក្នុងឆ្នាំ2016៕

October 2, 2017

នៅកម្ពុជា…បើគ្មានវិធានការទប់ស្កាត់ ឧស្ម័នផ្ទះកញ្ចក់នឹងក្លាយជាបញ្ហាប្រឈមដ៏ធំមួយ

គ្រាដែលបញ្ហាការប្រែប្រួលអាកាសធាតុបាននិងកំពុងក្លាយជាបញ្ហាប្រឈមមួយដ៏ធំនៅក្នុងពិភពលោកជាពិសេសនៅកម្ពុជា។ យោងតាមការសិក្សាមួយបានបញ្ជាក់ថា បរិមាណបញ្ចេញឧស្ម័នផ្ទះកញ្ចក់នៅកម្ពុជានឹងកើនឡើងប្រហែល4ដងនៅឆ្នាំ 2030 និងបន្តកើនឡើងប្រហែល 24ដង នៅឆ្នាំ2050 បើធៀបទៅនឹងឆ្នាំ2010 នេះបើគ្មានវិធានការទប់ស្កាត់។

ឯកឧត្តម ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាពនៃក្រសួងបរិស្ថាន លើកឡើងថា បច្ចុប្បន្នការប្រែប្រួលអាកាសធាតុ បាននិងកំពុងក្លាយជាបញ្ហាប្រឈមមួយដ៏ធំ នៅក្នុងពិភពលោកដែលទាមទារឱ្យមានការចូលរួមពីគ្រប់ភាគីទាំងអស់ដើម្បីដោះស្រាយជាបន្ទាន់។ ដូច្នេះទើបក្រុមប្រឹក្សាជាតិអភិវឌ្ឍន៍ដោយចីរភាពនៃក្រសួងបរិស្ថាន សហការជាមួយវិទ្យាស្ថានយុទ្ធសាស្ត្របរិស្ថានសកលនៃប្រទេសជប៉ុនបានរៀបចំកម្មវិធីសិក្ខាសាលាមួយស្តីពី ការកសាងសមត្ថភាពស្តីពីការអភិវឌ្ឍបញ្ចេញកាបូនតិចសម្រាប់ប្រទេសកម្ពុជា ឡាវ និងមីយ៉ាន់ម៉ា។ កម្មវិធីនេះធ្វើឡើងដើម្បីពិភាក្សាថា តើត្រូវពង្រឹងសហគមន៍ស្រាវជ្រាវដែលគាំទ្រដល់ការធ្វើសេចក្តីសម្រេចចិត្ត និងការអនុវត្តសកម្មភាពនានា ដោយផ្អែកលើវិទ្យាសាស្ត្រនៅប្រទេសកម្ពុជា ឡាវ និងមីយ៉ាន់ម៉ានាពេលអនាគតយ៉ាងដូចម្តេច? ។

ឯកឧត្តមបានបន្តថា ប្រទេសនៅតំបន់អាស៊ីអាគ្នេយ៍រួមទាំងកម្ពុជាផង បាននិងកំពុងប្រឈមនឹងផលប៉ះពាល់ពីការប្រែប្រួលអាកាសធាតុដែលបណ្តាលឱ្យបាត់បង់ជិវិតមនុស្ស សត្វ ហេដ្ឋារចនាសម្ព័ន្ធរូបវន្តធនធានធម្មជាតិ និងប៉ះពាល់ដល់ការអភិវឌ្ឍសេដ្ឋកិច្ចជាតិ និងសង្គមយ៉ាងធ្ងន់ធ្ងរ។ ជាក្ដីរំពឹងតាមរយៈការសិក្សាមួយនេះពិតជាបានឆ្លើយតបទៅតាមតម្រូវការចាំបាច់ជាក់ស្តែង និងការចែករំលែកនូវចំណេះដឹង បទពិសោធពីគោលនយោបាយ និងផែនការអភិវឌ្ឍន៍បញ្ចេញកាបូនតិច និងវិធានការដោះស្រាយការប្រែប្រួលអាកាសធាតុនៅបណ្តាប្រទេសមួយចំនួននៅតំបន់អាស៊ី និងផ្តល់ឱកាសឱ្យអ្នកចូលរួមស្វែងយល់កាន់តែច្បាស់ អំពីសារៈសំខាន់នៃការរៀបចំផែនការអភិវឌ្ឍបញ្ចេញកាបូនិក នៅតាមបណ្តាទីក្រុងនៅតំបន់អាស៊ី ជាពិសេសប្រទេសកម្ពុជា ឡាវ និងមីយ៉ាន់ម៉ា ។

គួរបញ្ជាក់ថា ដោយសារតែបម្រែបម្រួលអាកាសធាតុទឹកជំនន់ឆ្នាំ2013 បានធ្វើឱ្យកម្ពុជាបាត់បង់ថវិកាប្រមាណ 360លានដុល្លារ ស្មើនឹង10% នៃថវិកាជាតិ និងនៅឆ្នាំ2050 ការបាត់បង់សេដ្ឋកិច្ចជាតិដោយសារការប្រែប្រួលអាកាសធាតុអាចកើនដល់ប្រមាណ 3,5% នៃ GDP ប្រសិនបើពុំមានចាត់វិធានការណាមួយ ។យោងតាមរបាយការណ៍របស់អន្តរដ្ឋាភិបាលស្តីពីការប្រែប្រួលអាកាសធាតុលើកទី5 បានបង្ហាញថា ផែនដីកំពុងបន្តឡើងកម្តៅ ផលប៉ះពាល់ពីការប្រែប្រួលអាកាសធាតុទៅលើការអភិវឌ្ឍសេដ្ឋកិច្ច-សង្គម និងបរិស្ថានពិភពលោកកាន់តែធ្ងន់ធ្ងរឡើងៗ ។ ឧស្ម័នផ្ទះកញ្ចក់នៅលើពិភពលោកបានកើនឡើងជិត2ដងក្នុងរយៈពេល2ទសវត្សរ៍ចុងក្រោយនេះ ពីឆ្នាំ1990ដល់ឆ្នាំ 2010 បរិមាណនេះនឹងបន្តកើនឡើងកាន់តែខ្ពស់ប្រសិនបើគ្មានវិធានការកាត់បន្ថយសមស្របនោះទេ ។

ពាក់ព័ន្ធការប្រែប្រួលអាកាសធាតុ ស្ថាប័នរូបីយវត្ថុអន្តរជាតិ(IMF) ធ្លាប់បានប្រាប់ទៅកាន់ប្រទេសអ្នកមានឱ្យទៅជួយប្រទេសអ្នកក្រីក្រដើម្បីដោះស្រាយផលប៉ះពាល់ដោយការប្រែប្រួលអាកាសធាតុ ឬជាប្រទេសមានការរីកចម្រើនយឺតយ៉ាវ ឬក៏ប្រទេសដែលមានលំហូរជនភៀសខ្លួនច្រើន។

ស្ថាប័នអន្តរជាតិមួយនេះ បានលើកឡើងថា ប្រទេសក្រីក្រដែលមានចំណូលតិចតួច គឺបានបញ្ចេញឧស្ម័នផ្ទះកញ្ចក់តិចតួចតែប៉ុណ្ណោះ ដូច្នេះប្រទេសធំៗត្រូវតែចូលរួមផ្តល់ជំនួយក្នុងនាមជាប្រទេសដែលបានបញ្ចេញឧស្ម័នផ្ទះកញ្ចក់ច្រើន។ IMF លើកឡើងថា ការកើនឡើងនូវកម្ដៅរបស់ផែនដីបានជះឥទ្ធិពលមិនស្មើគ្នាឡើយ ហើយប្រទេសក្រីក្រនឹងលំបាកក្នុងការដោះស្រាយចំពោះផលប៉ះពាល់ដោយសារការប្រែប្រួលអាកាសធាតុនេះ។

ពាក្យ «ឧស្ម័នផ្ទះកញ្ចក់» Greenhouse gas (GHG) ជាឧស្ម័នដែលមាននៅក្នុងបរិយាកាស ដែលកើតឡើងដោយធម្មជាតិឬដោយសកម្មភាពមនុស្ស ហើយដែលស្រូបយក និងបញ្ចេញរស្មីតាមជំហានរលកជាក់លាក់ក្នុងជំហានរលកនៃរំភាយរស្មីកម្តៅក្រហមអាំងហ្វ្រាដែលភាយចេញពីផ្ទៃផែនដីបរិយាកាស និងពពក។ បាតុភូតទាំងនេះបង្កឱ្យមានផលផ្ទះកញ្ចក់។

ចំហាយទឹក (H2O)ឧស្ម័នកាបូនិក(CO2) ឌីអាសូតម៉ូណូអុកស៊ីត (N2O)មេតាន(CH4)និងអូសូន (O3) ជាឧស្ម័នផ្ទះកញ្ចក់ចម្បងៗនៅក្នុងបរិយាកាស របស់ផែនដី។ ក្រៅពីនេះ មានឧស្ម័នផ្ទះកញ្ចក់មួយចំនួននៅក្នុងបរិយាកាស ដែលបង្កើតឡើងដោយមនុស្សទាំងស្រុង ដូចជាហាឡូកាបួ និងសារធាតុដទៃទៀតដែលផ្ទុកក្លរនិងប្រូម គឺស្ថិតក្រោមការគ្រប់គ្រងនៃពិធីសារម៉ុងរ៉េអាល់។ ក្រៅពី CO2 N2O និង CH4ពិធីសារក្យូតូ គ្រប់គ្រងឧស្ម័នផ្ទះកញ្ចក់ដទៃទៀត ដូចជា ស៊ុលភួអ៊ិចសាភ្លុយអរីត (SF6) អ៊ីដ្រូភ្លុយអរ៉ូកាបួ (HFCs) និងពែរភ្លុយអរ៉ូកាបួ (PFCs)៕

October 2, 2017

មនុស្សជាច្រើនសុទ្ធតែចង់មានទម្លាប់អាន តែមិនដឹងចាប់ផ្តើមដោយវិធីណា

ការអានសៀវភៅ ឬអានអ្វីមួយ គឺជារឿងមួយដែលមនុស្សស្ទើរគ្រប់គ្នាទទួលស្គាល់ថាសំខាន់ ប៉ុន្តែពួកគេតែងមានឧបសគ្គមួយដែលមិនអាចធ្វើឱ្យពួកគេក្លាយជាអ្នកអានដ៏ល្អបាន នោះគឺ ការគ្មានទម្លាប់អាន ហើយតែងងងុយគេងរៀងរាល់ពេលដែលពួកគេកាន់សៀវភៅអាន។

ដើម្បីដោះស្រាយបញ្ហាទាំងអស់នេះ ឡារ៉ែន សូមជូននូវដំណោះស្រាយមួយចំនួនដើម្បីជាវិធីសាស្ត្រសម្រាប់អនុវត្តចំពោះអ្នកដែលចង់បង្កើតទម្លាប់នៃការអាន។

ឯកសារសម្រាប់អាន

មនុស្សម្នាក់ៗ ពេលធ្វើអ្វីមួយ តែងតែចង់ចាប់ផ្តើមភ្លាមៗ និងទទួលបានជោគជ័យភ្លាមៗតែម្ដង។ ដូចជាអ្នកហាត់ប្រាណថ្ងៃទី1 ហើយចង់បានសាច់ដុំពោះ 6កង់តែម្តងជាដើម។ វាមិនអាចទៅរួចទេ ហេតុនេះការអានក៏ដូចគ្នាដែរ គ្មានមនុស្សណាម្នាក់មិនចង់អានឯកសារសំខាន់ៗដើម្បីជាប្រយោជន៍ភ្លាមៗនោះទេ តែនៅពេលដែលពួកគាត់ខ្វះទម្លាប់នៃការអាន គាត់អាចនឹងធុញ ហើយបោះបង់ការអានចោលវិញយ៉ាងងាយ។

ជាវិធីសាស្ត្រល្អមួយសម្រាប់អ្នកអាន គឺត្រូវស្វែងរកឱ្យឃើញនូវឯកសារដែលខ្លួនចូលចិត្តអាន ចាប់ពីសៀវភៅដែលមានរូបច្រើនអក្សរតិច រហូតដល់សៀវភៅ ឫឯកសារដែលមានសុទ្ធតែអក្សរទាំងអស់។ ក្រៅពីនេះ ការអានទស្សនាវដ្តីកម្សាន្ត ការអានរឿងប្រលោមលោក រឿងកំប្លែងសប្បាយៗក៏អាចជាចំណុចមួយដែលធ្វើឱ្យអ្នកចូលចិត្តអានសៀវភៅបានដែរ ហេតុនេះសូមអានអ្វីក៏ដោយឱ្យអ្នកតែពេញចិត្ត រហូតដល់មានទម្លាប់អានដោយរីករាយហើយ សឹមប្តូរគោលដៅទៅអានសៀវភៅឯកសារដែលមានប្រយោជន៍ នោះយើងនឹងអាចក្លាយជាអ្នកអានម្នាក់ដែលខុសប្លែកពីពេលមុនមិនខាន។

នៅឱ្យឆ្ងាយពីរបស់ដែលអ្នកធ្លាប់ញៀន បើសិនចង់អានសៀវភៅបានយូរ

ពាក្យថា ញៀន គឺមានច្រើន អ្នកខ្លះញៀនស្រា ញៀនល្បែង ញៀនថ្នាំញៀន ដែលសុទ្ធតែជាបញ្ហាធ្ងន់ធ្ងរ ព្រោះជាទូទៅមនុស្សដែលញៀនរបស់ទាំងអស់នេះប្រហែលជាមិនសូវចង់អានសៀវភៅប៉ុន្មានទេ តែញៀនដែលយើងចង់និយាយនៅទីនេះគឺញៀនរបស់កំប៉ិកកំប៉ុក ដូចជាញៀន Facebook ញៀនហ្គេមទូរស័ព្ទដៃ ញៀនជជែកលេងតាមទូរស័ព្ទ ឬញៀនការនិយាយដើមគេជាដើម។

ការដកខ្លួនចេញពីរបស់ដែលអ្នកធ្លាប់ជក់ចិត្តដែលមិនមែនជាការអាននេះមួយរយៈ អាចធ្វើឱ្យអារម្មណ៍របស់អ្នកស្ងប់ស្ងាត់ ហើយមានចន្លោះល្អមួយសម្រាប់ការអភិវឌ្ឍខ្លួនតាមរយៈការអាន។ ហេតុនេះប្រសិនបើចង់មានទម្លាប់អានសៀវភៅ សូមនៅឱ្យឆ្ងាយពីរឿងទាំងឡាយណាដែលធ្វើឱ្យយើងគិតថា រំខាន ឬជាគ្រឿងអូសទាញឱ្យអ្នកបោះសៀវភៅចោល។

កុំបង្ខំអាន និងកុំអានទាំងបង្ខំ

អ្នកដែលចង់បង្កើតទម្លាប់អានដំបូងៗ គេមិនអានទាំងបង្ខំភ្លាមៗ ឬនៅកន្លែងណាក៏អានបានដែរនោះទេ តែគេអាចចាប់ផ្តើមពីការសម្រួលអារម្មណ៍ឱ្យបានល្អជាមុនសិន។ ដើម្បីឱ្យងាយស្រួលអាន អ្នកអាចស្វែងរកពេលសម្រាកដ៏សមរម្យណាមួយជាប្រចាំ បើទោះបីជាពេលនោះខ្លីក៏ដោយ តែឱ្យតែស្ថិតក្នុងបរិយាកាសមិនមានឮសំឡេងរំខានខ្លាំង មិនហប់ ឬមិនមានការធុញថប់អារម្មណ៍ជាដើម។

សូមចាប់ផ្តើមអានសៀវភៅក្នុងបរិយាកាសស្ងប់ស្ងាត់ និងរីករាយ មុនពេលឈានដល់ការក្លាយជាអ្នកអានម្នាក់ដែលអាចអានបានគ្រប់ពេលវេលា និងគ្រប់ទីកន្លែង៕

October 2, 2017

បើមិនប្រយ័ត្ន និស្សិតអាចជ្រើសយកជំនាញតាមក្តីសុបិនក្លែងក្លាយ

ជារៀងរាល់ឆ្នាំ និស្សិតដែលបានបញ្ចប់ការសិក្សានៅមហាវិទ្យាល័យមួយចំនួនតែងតែត្អូញត្អែរចំពោះការដែលខ្លួនបានសិក្សាចំជំនាញដែលធ្លាប់នឹកស្រមៃតាំងពីតូច ឬបានធ្វើការងារដែលធ្លាប់បានស្រមៃទុកហើយ តែបែរជាមិនសប្បាយចិត្តសោះ ហើយទីបំផុតក៏ងាកទៅរកជំនាញមួយផ្សេង ខុសពីមុខជំនាញដែលរៀននៅមហាវិទ្យាល័យ។

ពាក់ព័ន្ធនឹងបញ្ហានេះ កញ្ញា អៀង លីនដា គ្រូបង្វឹកកម្មវិធី Life Coach បានលើកឡើងថា ការដែលយុវជនមិនទាន់រកឃើញសក្តានុពលរបស់ខ្លួនឯង ឬសិក្សាលើជំនាញមួយដែលធ្លាប់គិតថា ចង់រៀន តែបែរជាមិនសូវពូកែ ហើយបោះបង់ចោលវិញនោះ អាចមកពីពួកគេរកមិនទាន់ឃើញក្តីសុបិនពិតប្រាកដ។ មនុស្សជាច្រើនបានសម្លឹងមើលតែលើរូបភាពខាងក្រៅនៃអាជីពមួយ ដូចជាមើលឃើញពីការប្រែប្រួលនៃជីវភាព ឬមើលឃើញតែពីសម្ភាររបស់មនុស្សណាម្នាក់ក្រោយពេលដែលមានជំនាញមួយ ហើយគិតថា ប្រសិនបើខ្លួនបានធ្វើដូចមនុស្សម្នាក់នោះប្រហែលជាអាចមានរបស់ទាំងអស់នោះដូចគ្នា ដោយមិនបានគិតពីចំណង់ចំណូលចិត្តពិតប្រាកដរបស់ខ្លួន ដែលធ្វើឱ្យពួកគេមិនអាចសម្រេចក្តីសុបិនពិតប្រាកដបាន។

កញ្ញា អៀង លីនដា បាននិយាយថា៖ «ពេលខ្លះនិស្សិតចូលចិត្តចំណាយពេលច្រើនដើម្បីស្តាប់គំនិតពីមនុស្សជុំវិញខ្លួន ឬមើលមនុស្សជុំវិញខ្លួនច្រើនពេក ហើយភ្លេចគិតពីខ្លួនឯង»។

អ្នកបណ្តុះបណ្តាលខាងលើបានលើកឡើងផងដែរថា សំឡេងខាងក្រៅថ្វីត្បិតតែល្អសម្រាប់យុវវ័យម្នាក់ៗក្នុងការកំណត់ទិសដៅអនាគតមែន តែសូមកុំធ្វើតាមទាំងស្រុងហើយភ្លេចគិតពីខ្លួនឯង។ ជាធម្មតា អ្នកខាងក្រៅអាចមើលយើងឃើញតែមួយជ្រុងប៉ុណ្ណោះ តែស្ថានភាពពិត គឺមានតែខ្លួនយើងទេដែលជាអ្នកស្គាល់ខ្លួនឯងច្បាស់។

កញ្ញាលីនដា បានផ្តល់ដំណោះស្រាយថា ដើម្បីដោះស្រាយបញ្ហាជ្រើសរើសជំនាញខុសនេះ យុវជនគួរតែស្រង់យកមតិពីអ្នកជុំវិញខ្លួនសម្រាប់ជាមតិដើម្បីពិចារណា ហើយធ្វើការសម្រេចដោយខ្លួនឯងផ្ទាល់ទើបជាការប្រសើរបំផុត។ ចំណុចសំខាន់ដែលត្រូវធ្វើ គឺចំណាយពេលវេលាមួយចំនួនដើម្បីស្តាប់បេះដូងខ្លួនឯង ហើយពិចារណាឱ្យបានដិតដល់ថា តើយើងស្រឡាញ់អ្វីឱ្យពិតប្រាកដ មុននឹងជ្រើសរើសជំនាញសិក្សានៅមហាវិទ្យាល័យ៕

October 2, 2017

Newcastle ធ្វើឲ្យ Liverpool ខកចិត្ត ទោះបី Coutinho រកបានគ្រាប់បាល់

ការស៊ុតបាល់ពីចម្ងាយចូលទីយ៉ាងល្អឥតខ្ចោះពីសំណាក់ខ្សែបម្រើឆ្នើម Philippe Coutinho បានជួយឲ្យក្រុម Liverpool បញ្ចប់ក្នុងលទ្ធផលស្មើ 1-1 នៅលើទឹកដីក្រុម Newcastle United កាលពីថ្ងៃអាទិត្យ ប៉ុន្តែ នេះគឺជាលទ្ធផលដ៏គួរឲ្យខកចិត្តមួយផ្សេងទៀតសម្រាប់អ្នកចាត់ការទូទៅរបស់ពួកគេគឺលោក Jurgen Klopp។

ការទទួលជ័យជម្នះនឹងធ្វើឲ្យពួកគេឡើងទៅឈរពីលើក្រុមម្ចាស់ការពារតំណែងជើងឯក Chelsea និងស្ថិតក្នុងចំណាត់ថ្នាក់កំពូលទាំង4នៃក្របខ័ណ្ឌ Premier League ប៉ុន្តែ ផ្ទុយទៅវិញក្រុម Liverpool បានជួបភាពត្រដាបត្រដួសម្តងទៀតក្នុងការរកគ្រាប់បាល់បញ្ចូលទី។ ក្រុមរបស់លោក Klopp មានភាគរយនៃការគ្រប់គ្រងបាល់ច្រើនជាងដល់ទៅ2ដងបើធៀបទៅនឹងក្រុម Newcastle ប៉ុន្តែបានខ្ជះខ្ជាយឱកាសជាច្រើន និងត្រូវតែពឹងផ្អែកទៅលើគ្រាប់បាល់បញ្ចូលទីពីចម្ងាយរបស់ Coutinho ក្នុងការទទួលបាន1ពិន្ទុនាកីឡដ្ឋាន St James’ Park។ ក្រុម Newcastle ដែលត្រូវបានដឹកនាំដោយអតីតគ្រូបង្វឹករបស់ Liverpool គឺលោក Rafael Benitez នោះ បានរក្សាកំណត់ត្រា100ភាគរយ ខណៈដែលពួកគេបានធ្វើការការពារយ៉ាងរឹងមាំ និងបានរកគ្រាប់បាល់បញ្ចូលទី នៅពេលដែល Joselu បានស៊ុតបាល់បំប៉ោងសំណាញ់ដើម្បីរកគ្រាប់បាល់តាមស្មើវិញ នៅមុនពេលបញ្ចប់តង់ទី1។

លោក Klopp បានប្រាប់ទូរទស្សន៍ BBC ថា៖ «ខ្ញុំពិតជាខកចិត្តណាស់ និងឆ្អែតចិត្តចំពោះអ្វីដែលអ្នកចង់បាន។ ពួកគេ (ក្រុម Newcastle) មានឱកាសតែ1លើកគត់ និងបានស៊ុតបាល់បញ្ចូលទីតែម្តង។ បញ្ហានោះធ្វើឲ្យខ្ញុំមានអារម្មណ៍ថា មិនយុត្តិធម៌សោះ។ ប្រសិនបើអ្នកមិនជួយខ្លួនអ្នក គ្មាននរណាម្នាក់ជួយអ្នកបានឡើយ។ វានឹងបន្តបែបនេះរហូតលុះត្រាតែយើងរកបានគ្រាប់បាល់បញ្ចូលទី»៕

ប្រភពពី៖ Sports.yahoo

October 2, 2017

កម្ពុជាមានលទ្ធភាពនាំគ្រឿងសមុទ្ររាប់សិបតោនទៅក្រៅប្រទេស

ភ្នំពេញ៖ បច្ចុប្បន្នគេសង្កេតឃើញថា កម្ពុជាហាក់មានកង្វះខាតក្នុងការផ្តត់ផ្គង់គ្រឿងសមុទ្រ នៅលើទីផ្សាររបស់ខ្លូននៅឡើយ ពិសេសនៅរដូវបុណ្យទានម្តងៗ តម្លៃគ្រឿងសមុទ្រឡើងថ្លៃខ្ពស់ តែថ្មីៗនេះក្រសួងពាណិជ្ជកម្មកម្ពុជាបានបញ្ចេញរបាយការណ៍ដែលបង្ហាញថា កម្ពុជាអាចនាំគ្រឿងសមុទ្រទៅក្រៅប្រទេសរាប់សិបតោនក្នុងមួយឆ្នាំ។

យោងតាមរបាយការណ៍របស់ក្រសួងពាណិជ្ជកម្មបានឱ្យដឹងថា ជារៀងរាល់ឆ្នាំកម្ពុជាបាននាំចេញផលនេសាទសមុទ្រទៅកាន់ប្រទេសចិន សិង្ហបុរី ជប៉ុនកូរ៉េខាងត្បូងអូស្ត្រាលី សហរដ្ឋអាមេរិក ថៃឡង់ដ៏ និងវៀតណាមក្នុងចន្លោះពី 25តោន ទៅ30ពាន់តោន ហើយជប៉ុន គឺជាប្រទេសដែលនាំចូលពីកម្ពុជាធំជាងគេ។ យុទ្ធសាស្ត្រសមាហរណកម្មពាណិជ្ជកម្មកម្ពុជា CTIS ដែលធ្វើបច្ចុប្បន្នភាព ដោយរាជរដ្ឋាភិបាលកាលពីដើមឆ្នាំ 2014 វិស័យជលផលត្រូវបានចាត់ទុកជាផលិតផលអាទិភាព ដែលមានសក្តានុពលក្នុងការនាំចេញទៅកាន់ទីផ្សារពិភពលោក ខណៈដែលប្រទេសកម្ពុជាកំពុងមានតម្រូវការ និងនាំចូលពីប្រទេសជិតខាងទៀតផង។

ក្នុងយុទ្ធសាស្ត្រនាំចេញផលនេសាទនេះ កាលពីថ្ងៃទី29 ម្សិលមិញនេះ នៅក្នុងទីរួមខេត្តកំពតក្រសួងពាណិជ្ជកម្មបានបើកសម្ភោធផ្សាររួមដំបូងគេជាផ្លូវការរបស់សម្ព័ន្ធសមាគមជលផលសមុទ្រកម្ពុជា ដើម្បីបង្កើនចង្វាក់តម្លៃ និងពង្រីកការនាំចេញជលផលសមុទ្រកម្ពុជាទៅកាន់ទីផ្សារជាតិ និងអន្តរជាតិ។

ផ្សាររួមនេះ ត្រូវបានបង្កើតឡើងក្រោមហិរញ្ញប្បទានរបស់គម្រោងជលផលសមុទ្រ នៃកម្មវិធីពិពិធកម្ម និងពង្រីកការនាំចេញកម្ពុជា (CEDEP II) ដំណាក់កាលទី2 ក្នុងទំហំទឹកប្រាក់ 5,000ដុល្លារសហរដ្ឋអាមេរិក ដែលមាននាយកដ្ឋានសហប្រតិបត្តិការអន្តរជាតិនៃក្រសួងពាណិជ្ជកម្មជាអ្នកសម្របសម្រួល និងអនុវត្តដោយអភិវឌ្ឍន៍វិស័យឯកជន សហការជាមួយអង្គការសហប្រជាជាតិអភិវឌ្ឍន៍ឧស្សាហកម្ម (UNIDO)។

នៅក្នុងឱកាសនោះ ឯកឧត្តម ប៉ាន សូរស័ក្តិ បានគូសបញ្ជាក់ថា វិស័យជលផលគឺជានិមិត្តរូបតំណាងឱ្យប្រភពដ៏សំខាន់នៃរូបិយប័ណ្ណជាតិ ដែលបានផ្ដល់ផលចំណេញដល់ប្រជានេសាទ និងភាគីពាក់ព័ន្ធនៅក្នុងប្រទេសកម្ពុជា ប្រមាណជាង6លាននាក់។ ឯកឧត្តមបានបន្តទៀតថា ផ្សាររួមនេះនឹងដើរតួជាមជ្ឈមណ្ឌលសេវាកម្ម និងផ្តល់ព័ត៌មានរវាងអ្នកលក់ និងអ្នកទិញផលនេសាទសមុទ្រ ជាពិសេសផ្តល់ឱកាសជូនប្រជានេសាទ និងសមាជិកសម្ព័ន្ធសមាគមជលផលសមុទ្រកម្ពុជា ធ្វើការដាក់លក់ជលផលសមុទ្រ ដើម្បីបង្កើនប្រាក់ចំណូលសម្រាប់ទ្រទ្រង់សេដ្ឋកិច្ចគ្រួសារ “ខ្ញុំសូមជូនពរឲ្យដំណើរការលក់ក្នុងផ្សាររួមនេះ ប្រព្រឹត្តទៅដោយរលូន និងបានជាឧត្តមប្រយោជន៍សម្រាប់ប្រជានេសាទ និងសមាជិកសម្ព័ន្ធសមាគមជលផលសមុទ្រកម្ពុជា” ឯកឧត្តមរដ្ឋមន្ត្រី មានប្រសាសន៍។

ទន្ទឹមគ្នានេះ ឯកឧត្តម ចាន់ ជេស្តា ក៏បានសម្តែងការស្វាគមន៍ចំពោះវត្តមានរបស់ផ្សាររួមនៃសម្ព័ន្ធសមាគមជលផលសមុទ្រកម្ពុជា និងបានបង្ហាញជំនឿថា ផ្សាររួមនេះនឹងជួយបង្កើតការងារ និងប្រាក់ចំណូលបន្ថែមជូនប្រជាជន ព្រមទាំងបង្កើនសកម្មភាពពាណិជ្ជកម្មនៅក្នុងខេត្តកំពតផងដែរ។ ឯកឧត្តមអភិបាលខេត្ត ក៏បានថ្លែងអំណរគុណដល់ក្រសួងពាណិជ្ជកម្ម និងអង្គការ UNIDO ព្រមទាំងសម្ព័ន្ធសមាគមជលផលសមុទ្រកម្ពុជា ដែលបានសហការបង្កើតឲ្យមានផ្សាររួមនេះឡើង។

អ្នកសេដ្ឋកិច្ចនិយាយថា បច្ចុប្បន្នកម្ពុជាកំពុងមានតម្រូវការគ្រឿងសមុទ្រនៅលើទីផ្សារខ្លួន ដែលរដ្ឋាភិបាលគួរកាត់បន្ថយការនាំចេញ និងផ្គត់ផ្គង់នៅលើទីផ្សារក្នុងស្រុក ចែកចាយដល់ប្រជាពលរដ្ឋរបស់ខ្លួនឱ្យមានចំនួនច្រើនឡើងដើម្បីកាត់បន្ថយ ការនាំចូលគ្រឿងសមុទ្រពីក្រៅប្រទេស ដែលមួយចំនួនជាគ្រឿងសមុទ្រអសុវត្ថិភាពទៀតផង៕

October 2, 2017

កម្ពុជាកំពុងប្រឹងប្រែងដើម្បីសម្រេចឱ្យបានផែនការតភ្ជាប់អាស៊ាន 2025

ភ្នំពេញ- តាមរយៈកិច្ចប្រជុំអាស៊ាន+3 (ចិន ជប៉ុន កូរ៉េ) ស្តីពីការលើកកម្ពស់ការតភ្ជាប់ក្នុងតំបន់ និងឆ្ពោះទៅសហគមន៍អាស៊ីខាងកើត កម្ពុជាបានបង្ហាញពីការត្រៀមខ្លួនក្នុងការជួយដល់អាស៊ាន ពិសេសដើម្បីអនុវត្តផែនការថ្មីស្តីពីការតភ្ជាប់អាស៊ាន 2025។

លោក គង់ សុផល អគ្គនាយករងដឹកជញ្ជូនផ្លូវគោក បានលើកឡើងពីការខិតខំប្រឹងប្រែងរបស់កម្ពុជា ក្នុងរយៈពេល2ទសវត្សរ៍កន្លងមកក្នុងការអភិវឌ្ឍប្រទេស ពិសេសតាមរយៈយុទ្ធសាស្ត្រចតុកោណដែលរាជរដ្ឋាភិបាលបានដាក់ជាអាទិភាពលើការស្តារវិស័យដឹកជញ្ជូន ទាំងផ្លូវគោក ផ្លូវដែក ផ្លូវអាកាស កំពង់ផែ និងជាពិសេសបណ្តាញផ្លូវជាតិដែលធ្វើការអភិវឌ្ឍ និងតភ្ជាប់ទៅអនុតំបន់ ឬតំបន់ផ្សេងទៀត។

ក្នុងកិច្ចប្រជុំអាស៊ាន+3 (ចិន ជប៉ុន កូរ៉េ) ស្តីពី ការលើកកម្ពស់ការតភ្ជាប់ក្នុងតំបន់ និងឆ្ពោះទៅសហគមន៍អាស៊ីខាងកើតដែលប្រព្រឹត្តទៅនៅទីក្រុងបាងកក ប្រទេសថៃ។ នាថ្ងៃទី29 ខែកញ្ញា ឆ្នាំ2017 ក៏មានការចូលរួមពីតំណាងធនាគារធំៗ ដូចជា ធនាគារអភិវឌ្ឍន៍អាស៊ី (ADB), ធនាគារអភិវឌ្ឍន៍ចិន (CDB), ធនាគារវិនិយោគហេដ្ឋារចនាសម្ព័ន្ធអាស៊ី (AIIB)។

អគ្គនាយករងដឹកជញ្ជូនផ្លូវគោក បន្ដថា បច្ចុប្បន្ននេះ បណ្តាញគមនាគមន៍កម្ពុជាអាចមានសមត្ថភាពគ្រប់គ្រាន់ក្នុងការតភ្ជាប់ទៅបណ្តាប្រទេសជិតខាង និងក្នុងតំបន់ដោយមិនមានបង្កជាឧបសគ្គឡើយ។ ស្របពេលជាមួយគ្នានេះ កម្ពុជាក៏បានដាក់ជាយុទ្ធសាស្ត្រក្នុងការសាងសង់ផ្លូវតាមបណ្តោយព្រំដែនក្នុងគោលបំណងពង្រីកចំណងមិត្តភាពសហប្រតិបត្តិការ តាមព្រំដែនប្រទេសជិតខាង ដែលមកដល់ពេលនេះបានរួចរាល់ប្រមាណ70% ហើយ ដែលធ្វើឱ្យការតភ្ជាប់តាមផ្លូវគោកកាន់តែមានភាពល្អប្រសើរជាងមុន ។

ក្នុងឱកាសនោះដែរកម្ពុជាបានស្នើឲ្យបណ្តាប្រទេសជាសមាជិកខិតខំសហការគ្នាដើម្បីចាប់ផ្តើមអនុវត្តកិច្ចព្រមព្រៀងសម្របសម្រួលការងារដឹកជញ្ជូននានាដែលបានចុះហត្ថលេខាកន្លងមក ដូចជាកិច្ចព្រមព្រៀង ស្តីពីការសម្របសម្រួលការងារដឹកជញ្ជូនឆ្លងកាត់ក្នុងមហាអនុតំបន់មេគង្គ (GMS Cross Border Transport Facilitation Agreement) កិច្ចព្រមព្រៀង ស្តីពីការសម្របសម្រួលការងារដឹកជញ្ជូនទំនិញឆ្លងកាត់ក្នុងតំបន់អាស៊ាន (ASEAN Framework Agreement on the Facilitation of Goods in Transit, AFAFGIT) និងកិច្ចព្រមព្រៀងដទៃៗទៀតដែលថ្នាក់ដឹកនាំបានឯកភាព និងទទួលបានសច្ចាប័នពីស្ថាប័ននីតិបញ្ញត្តិ រួចរាល់ហើយ។

ជាងនេះទៅទៀតកម្ពុជាក៏បានស្នើឲ្យបញ្ចូលមន្ត្រីបច្ចេកទេសនៃបណ្តាប្រទេសអាស៊ីខាងកើតទាំង3ចូលរួមជាមួយក្រុមការងារជំនាញនានារបស់អាស៊ានដើម្បីសហការអនុវត្តសេចក្ដីសម្រេចរួម កិច្ចព្រមព្រៀង និងផែនការនានាដែលអនុម័តដោយថ្នាក់ដឹកនាំអាស៊ាន+3 កន្លងមកទៀតផង៕

October 2, 2017

អ្នកគាំទ្រ Real ប្រឆាំងប្រជាមតិនៅ Catalonia ខណៈ Barcelona លេងគ្មានអ្នកទស្សនា

អ្នកគាំទ្ររបស់ក្រុម Real Madrid បានធ្វើការតវ៉ាប្រឆាំងនឹងការធ្វើប្រជាមតិដណ្តើមឯករាជ្យនៅតំបន់ Catalonia ក្នុងពេលក្រុមយក្សរបស់អេស្ប៉ាញមួយនេះ បានយកឈ្នះលើក្រុម Espanyol ក្នុងលទ្ធផល 2–០ ក្នុងការប្រកួតក្របខ័ណ្ឌ La Liga តាមរយៈការលើកទង់ជាតិរបស់អេស្ប៉ាញ ពីលើក្បាលរបស់ពួកគេ កាលពីថ្ងៃអាទិត្យ។

ការតវ៉ានេះ បានកើតឡើងត្រឹមតែរយៈពេលប៉ុន្មានម៉ោង ក្រោយពីក្រុម Barcelona ត្រូវបានបង្ខំឲ្យលេងក្នុងការប្រកួតរបស់ពួកគេជាមួយនឹងក្រុម Las Palmas នៅកីឡដ្ឋានដែលបិទជិតគ្មានអ្នកទស្សនា ដោយសារតែបារម្ភពីសុវត្ថិភាព។

នៅត្រឹមនាទីទី12នៃការប្រកួតនៅឯកីឡដ្ឋាន Bernabeu ទង់ជាតិអេស្ប៉ាញ បានបង្ហាញខ្លួនជុំវិញកីឡដ្ឋានរបស់ក្រុម Real Madrid ទាំងអស់ ស្របពេលដែលអ្នកគាំទ្ររបស់ Real បានសម្រេចចិត្តក្នុងការបង្ហាញពីការគាំទ្ររបស់ពួកគេទៅលើរដ្ឋាភិបាលដែលពួកគេកំពុងតែពឹងផ្អែក។ រដ្ឋាភិបាលអេស្ប៉ាញ ដែលមានមូលដ្ឋាននៅទីក្រុងម៉ាឌ្រីដ បានបញ្ជាក់ថា ការបោះឆ្នោតធ្វើប្រជាមតិដើម្បីផ្តាច់តំបន់ Catalonia ចេញពីអេស្ប៉ាញ គឺជារឿងមិនស្របច្បាប់។

បញ្ហានេះ បានបង្កើតឲ្យមានការប៉ះទង្គិចគ្នាជុំវិញតំបន់ Catalonia រវាងប៉ូលិស និងអ្នកគាំទ្រដែលទាមទារឯករាជ្យ។ យ៉ាងហោចណាស់មនុស្សចំនួន91នាក់បានរងរបួស ស្របពេលដែលប៉ូលិសប្រឆាំងកុប្បកម្មបានបាញ់គ្រាប់កាំភ្លើងជ័រ និងបានបង្ខំចិត្តចូលទៅធ្វើអន្តរាគមន៍នៅឯស្ថានីយបោះឆ្នោតរបស់ក្រុមសកម្មជន ជុំវិញការបោះឆ្នោតទាមទារឯករាជ្យ។

លោក Josep Maria Bartomeu ប្រធានក្លិប Barcelona បានបញ្ជាក់ថា ក្លិបបានធ្វើការសម្រេចចិត្តក្នុងការលេងនៅកីឡដ្ឋាន Camp Nou ដោយគ្មានអ្នកទស្សនា ស្របពេលដែលការតវ៉ាប្រឆាំងនឹងការប៉ះទង្គិចដោយហិង្សាត្រូវបានធ្វើឡើង ជាងការបារម្ភទៅលើបញ្ហាសន្តិសុខ។ Barcelona បានឲ្យដឹងក្នុងសេចក្តីថ្លែងការណ៍មួយថា៖ «ក្លិប FC Barcelona សូមធ្វើការប្រកាសថ្កោលទោសចំពោះបញ្ហានេះ ដែលបានកើតឡើងនៅកន្លែងជាច្រើនក្នុងតំបន់ Catalonia នៅថ្ងៃនេះ ក្នុងគោលបំណងក្នុងការរារាំងប្រជាជនមិនឲ្យទទួលបានសិទ្ធិប្រជាធិបតេយ្យ ក្នុងការសម្តែងមតិដោយសេរី»៕

ប្រភពពី៖ The Sun

October 2, 2017

Author: វល័ក្ខ