ដោយមើលឃើញអំពីកំណើនប្រជាពលរដ្ឋថ្នាក់កណ្តាល ការកើនឡើងចំណូលប្រជាជនជាមួយនិងកំណើនសេដ្ឋកិច្ចដ៏រឹងមាំក្នុងរយៈពេលបីទសវត្សចុងក្រោយនេះក៏ដូចជាការកើនឡើងនៃចំនួនភ្ញៀវទេសចរបរទេសជាពិសេសភ្ញៀវទេសចរចិន ក្រុមហ៊ុន HGB Group ដែលជាក្រុមហ៊ុនក្នុងស្រុកបានសហការជាមួយ Yum China ដែលជាក្រុមហ៊ុនភោជនីយដ្ឋានឈានមុខគេរបស់ប្រទេសចិននាំយកនូវភោជនីយដ្ឋានលំដាប់ពិភពលោកដែលមានឈ្មោះថា «Little Sheep» មកកាន់ប្រទេសកម្ពុជាក្នុងថ្ងៃនេះ ។
ភោជនីយដ្ឋាន Little Sheep Hot Pot បានទទួលជោគជ័យយ៉ាងធំធេងក្នុងរយៈពេល 18ឆ្នាំមកហើយ។ ជាមួយនឹងបណ្តាញទូទាំងពិភពលោកនៅ 120ក្នុងតំបន់និងទីក្រុងនានាដែលមានហាងជិត300 នៅតាមទីក្រុងធំៗដូចជា សៀងហៃ ហុងកុង តូក្យូ ញូវយ៉ក និងតូរ៉ុនតូជាដើម។ ភោជនីយដ្ឋានយីហោ The Little Sheep ត្រូវបានគេស្គាល់ថា “មានមុខម្ហូបពិសេស ” និង “សាច់ដ៏ល្អឥតខ្ចោះ” ដែលគ្មានពីរបានបង្ហាញខ្លួនពាសពេញពិភពលោក។
ឥឡូវនេះ មុខម្ហូបពិសេសៗទាំងនេះបានមកដល់ព្រះរាជាណាចក្រកម្ពុជាយើងហើយ ដើម្បីបម្រើជូនដល់បងប្អូនជាលក្ខណៈគ្រួសារ និងភ្ញៀវទេសចរចិនក៏ដូចជាភ្ញៀវទេសចរបរទេសដទៃទៀតភ្លក្សនូវរសជាតិពិសេសៗទាំងនេះនៅរាជធានីភ្នំពេញ ។
លោក Herfried Hasenoehrl នាយកប្រតិបត្តិនៃក្រុមហ៊ុន HGB Group បានមានប្រសាសន៍ថាជាមួយនឹងវត្តមានរបស់ Little Sheep Hot Pot នឹងផ្តល់ជូននូវរសជាតិពិសេស និងថ្មីមួយទៀតសម្រាប់ប្រជាជនកម្ពុជា និងភ្ញៀវទេសចរចិនដែលកំពុងកើនឡើង ។ ទន្ទឹមនឹងនេះ Little Sheep នឹងជួយទាក់ទាញភ្ញៀវទេសចរចិនទាំងនោះឱ្យស្នាក់កម្ពុជាកាន់តែយូរជាងមុន។
លោកបានមានប្រសាសន៍ថា “ទីផ្សារគោលដៅរបស់យើងគឺភ្ញៀវជាលក្ខណៈគ្រួសារ និងភ្ញៀវចិននៅក្នុងប្រទេសកម្ពុជា។ ហើយវត្តមានភោជនីយដ្ឋាន The Little Sheep ក៏ជួយ និងលើកទឹកចិត្តឱ្យភ្ញៀវទេសចរចិនស្នាក់នៅប្រទេសកម្ពុជាយូរជាងមុនផងដែរ” ។
លោកបានមានប្រសាសន៍បន្ថែមទៀតថា៖ «ក្រុមហ៊ុន HGB មានការចាប់អារម្មណ៍ក្នុងការនាំយកភោជនីយដ្ឋាន «The Little Sheep» ចូលមកកាន់ប្រទេសកម្ពុជា មិនត្រឹមតែដោយសារតែវាជាស្លាកសញ្ញាលំដាប់ពិភពលោកប៉ុណ្ណោះទេ ក៏ប៉ុន្តែយើងចង់ឱ្យប្រជាជនកម្ពុជាមានជម្រើសកាន់តែច្រើននៅពេលពួកគាត់ចង់ចេញមកបរិភោគម្ហូបអាហារនៅខាងក្រៅ»។
យោងតាមទិន្នន័យពីក្រសួងសេដ្ឋកិច្ច និងហិរញ្ញវត្ថុ បានព្យាករណ៍ថាកំណើនសេដ្ឋកិច្ចរបស់ប្រទេសកម្ពុជានឹងសម្រេចបានប្រហែល 7ភាគរយនៅក្នុងឆ្នាំនេះ និង ឆ្នាំក្រោយ ខណៈដែលផលិតផលក្នុងស្រុកសរុបសម្រាប់មនុស្សម្នាក់ៗនឹងកើនឡើងដល់ 1422ដុល្លារនៅដំណាច់ឆ្នាំនេះដោយកើនពី 1302ដុល្លារកាលពីឆ្នាំមុន។
កាលពីឆ្នាំមុនប្រទេសកម្ពុជាបានស្វាគមន៍ភ្ញៀវទេសចអន្តរជាតិប្រមាណជាជាង 3លាននាក់ដែលភ្ញៀវទេសចរចិនឈានមុខគេ ខណៈដែលរដ្ឋាភិបាលកម្ពុជាបានផ្តេជ្ញាថានឹងទាក់ទាញភ្ញៀវទេសចរចិនអោយបាន2 លាននាក់ក្នុងមួយឆ្នាំ។ ថ្លែងនៅក្នុងវេទិកាទេសចរណ៍សកលលោកលើកទី4 នៅទីក្រុងម៉ាកាវកាលពីឆ្នាំ2015
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវឱ្យមានការសម្រួលដល់ការប្រើប្រាស់ប្រាក់យន់នៅក្នុងប្រទេសកម្ពុជាដើម្បីទាក់ទាញភ្ញៀវទេសចរ និងវិនិយោគិនចិនមកកាន់ព្រះរាជាណាចក្រកម្ពុជាកាន់តែច្រើនថែមទៀត។
លោក Herfried Hasenoehrl ក៏បានមានប្រសាសន៍អោយដឹងផងដែរថា ភោជនីយដ្ឋាន Little Sheep នេះនឹងផ្តល់ជម្រើសទូទាត់ច្រើនសម្រាប់អតិថិជន និងក៏ផ្តល់ជូនពិសេសដល់គ្រប់អតិថិជនខ្លួនផងដែរ។
លោកមានប្រសាសន៍យ៉ាងដូច្នេះថា៖«យើងទទួលយកការទូទាត់តាម Union Pay, Visa, និង Master។ ប៉ុន្តែយើងមិនទាន់មានការផ្តល់ជូនពិសេសតាមរយៈ ធនាគារនៅឡើយទេនាពេលបច្ចុប្បន្ននេះ»។
លោកក៏បានមានប្រសាសន៍បន្តទៀតថា៖ «រាល់ភ្ញៀវ VIP ទាំងអស់នឹងទទួលបានអត្ថប្រយោជន៍ពិសេសដូចជាអាទិភាពក្នុងការតម្រង់ជួរជាដើម»។
លោកថា “Little Sheep Hot Pot” ក៏ចង់ផ្តល់ជាយោបល់ដល់អតិថិជនអោយសាកមកភ្លក្សនូវរសជាតិពិសេសៗជាច្រើនទៀតដែលភោជនីយដ្ឋានផ្តល់ជូន។
លោកបានមានប្រសាសន៍យ៉ាងដូច្នេះថា៖«មុខម្ហូបពិសេសៗដែល Little Sheep Hot Pot ផ្តល់ជូនអតិថិជនរួមមានសាច់ចៀមពិសេសមកពីអង់គ្លេស អូស្ត្រាលី សាច់ចៀមអាំង និង តៅហ៊ូបំពងពិសេស»។
យោងតាមការសិក្សាថ្មីមួយស្តីអំពីផ្នែកអាហារ និងភេសជ្ជៈបានបង្ហាញថាប្រហែល 1.53លានដុល្លារត្រូវបានចំណាយជារៀងរាល់ថ្ងៃសម្រាប់អាហារពេលព្រឹក និងអាហារថ្ងៃត្រង់នៅតាមទីក្រុងធំៗនៅប្រទេសកម្ពុជា ជាពិសេសនៅរាជធានីភ្នំពេញ។ បើយោងតាមរបាយការណ៍នេះ គិតត្រឹមដំណាច់ឆ្នាំ2015 ត្រឹមតែនៅរាជធានីភ្នំពេញមានភោជនីយដ្ឋានចំនួន 2180 កន្លែងដោយកើនឡើងពីចំនួន 1726 កន្លែងក្នុងឆ្នាំ 2014។ (https://www.phnompenhpost.com/business/eating-out-capital)
ភោជនីយដា្ឋន Little Sheep តែងតែធ្វើការផ្សព្វផ្សាយនិង លើកកម្ពស់អំពីមុខម្ហូបពិសេសៗ ទាំងនេះដែលមានដើមកំណើតពីទឹកដីវាលស្មៅរបស់ប្រទេសម៉ុងហ្គោលី។ Little Sheep បានបង្កើតឡើងជាង 18ឆ្នាំមកហើយនៅតាមដងវិថីអាល់លែនលេខ22 ក្នុងទីក្រុងប៊ាវទូ នៃរដ្ឋម៉ុងហ្គោលី ក្នុងប្រទេសចិន។
ភោជនីយដា្ឋន Little Sheep បានទទួលស្គាល់ និងមានកេរ្តិ៍ឈ្មោះយ៉ាងឆាប់រហ័សសម្រាប់មុខម្ហូបពិសេសៗដោយគ្មានទឹកជ្រលក់របស់ខ្លួន។ ការជម្រុះចោលនូវទម្លាប់នៃការដាក់ទឹកជ្រលក់ទៅលើមុខម្ហូប Little Sheep បានបង្ហាញនូវនិន្នាការថ្មីមួយដោយកែប្រែទម្លាប់ចាស់នៃការញុំាមកបង្កើតនូវរសជាតិចំនួនប្រាំបញ្ចូលតែមួយ និងភាពដូចគ្នានៃគ្រឿងទេស 7មុខអោយមកតែមួយ។ រាល់អាហារគ្រប់មុខត្រូវបានបម្រើជូននូវមុខម្ហូបថ្មីៗនិងស្រស់។ ទាំងនេះគឺជាការរួមបញ្ចូលគ្នាដ៏ល្អឥតខ្ចោះនៃមូលដ្ឋាននៃការចម្អិនជាមួយ និងការផ្សំគ្រឿងតាមបែបម៉ុងហ្គោលីបានផ្លាស់ប្តូរលំនាំនៃមុខម្ហូបលំដាប់ពិភពលោក៕
