វល័ក្ខ - La Reine Media

រកឱ្យឃើញសក្តានុពលពិតរបស់ខ្លួនជាមុនសិន សឹមសម្រេចចិត្តជ្រើសរើសសាកលវិទ្យាល័យ

ការស្វែងរកសក្តានុពលពិតរបស់ខ្លួនឯង ជាធាតុសំខាន់មួយដែលសិស្សត្រូវតែដឹងមុនពេលជ្រើសរើសជំនាញសិក្សានៅកម្រិតមហាវិទ្យាល័យ តែគួរឱ្យសោកស្ដាយណាស់ដែលមានសិស្សជាច្រើនមិនសូវបានរកឃើញក្តីស្រមៃពិតប្រាកដ ដែលកត្តានេះហើយធ្វើឱ្យពួកគេជ្រើសរើសជំនាញខុសពេលសិក្សានៅមហាវិទ្យាល័យ។

ស្ថាប័នអប់រំសំខាន់នានាលើពិភពលោក បានបង្ហាញពីវិធីផ្សេងៗគ្នា ដែលសូម្បីតែគេហទំព័រអប់រំធំៗជាច្រើនបានបង្ហាញនូវវិធីខុសៗគ្នា តែជារួមវិញ យើងឃើញថា វិធីស្វែងរកសក្តានុពលរបស់មនុស្សមានដូចខាងក្រោមនេះ៖

1. ស្វែងយល់ខ្លួនឯងដោយយកទ្រឹស្តីពហុបញ្ញាជាគោល

មនុស្សម្នាក់ៗមានសក្តានុពលផ្សេងៗគ្នា តែនៅក្នុងនោះលោក Howard Gardner ដែលជាអ្នកចិត្តសាស្ត្រល្បីល្បាញមួយរូប បានសង្ខេបពីសក្តានុពលសំខាន់ៗរបស់មនុស្សទាំងអស់ជា 8 ផ្នែកគឺ

ផ្នែកទី1 មនុស្សពូកែផ្នែកភាសា

ផ្នែកទី2 មនុស្សពូកែផ្នែកតក្កវិទ្យា និងគណិតវិទ្យា

ផ្នែកទី3 មនុស្សពូកែផ្នែកតន្ត្រី

ផ្នែកទី4 មនុស្សពូកែផ្នែករាងកាយ និងចលនា

ផ្នែកទី5 មនុស្សពូកែក្នុងការស្មានពីទ្រង់ទ្រាយក្នុងលម្ហ

ផ្នែកទី6 មនុស្សពូកែយល់ពីខ្លួនឯង

ផ្នែកទី7 មនុស្សពូកែទំនាក់ទំនងបុគ្គលដទៃ ឬពូកែស្វែងយល់ពីអ្នកដទៃ

និងផ្នែកទី8 គឺមនុស្សពូកែផ្នែកធម្មជាតិ។

នៅក្នុងផ្នែកទាំងអស់នេះ មនុស្សម្នាក់ៗតែងតែមានជំនាញ ឬមានសក្តានុពលខ្លាំងបំផុត 1 ហើយបូករួមទាំងសក្តានុពលបន្ទាប់បន្សំដែលបូកបញ្ចូលជាមួយនឹងផ្នែកផ្សេងៗមួយចំនួនទៀត ដែលទាមទារឱ្យមនុស្សម្នាក់ៗ ជាពិសេសសិស្សដែលត្រៀមជ្រើសរើសជំនាញសិក្សាត្រូវសង្កេតឱ្យបានដិតដល់ថា តើខ្លួនឯងជាមនុស្សប្រភេទណា។

2. រកឱ្យឃើញនូវអ្វីដែលខ្លួនចូលចិត្តបំផុត

ការស្រឡាញ់ ជំរុញឱ្យមនុស្សមានសក្តានុពល ព្រោះនៅពេលដែលមនុស្សស្រឡាញ់អ្វីមួយខ្លាំង គេនឹងហ៊ានធ្វើអ្វីគ្រប់យ៉ាងដើម្បីសម្រេច ឬយកឱ្យបាននូវអ្វីដែលខ្លួនស្រឡាញ់នោះ។ សម្រាប់សិស្សនិស្សិតក៏ដូចគ្នាដែរ សូមអ្នកស្វែងរកឱ្យឃើញនូវទម្លាប់សាមញ្ញៗទាំងឡាយណាដែលអ្នកគិតថា ធ្វើវាហើយសប្បាយចិត្តបំផុត ដូចជាការចូលចិត្តសរសេរខ្លាំង ចូលចិត្តប្រើឧបករណ៍អេឡិចត្រូនិកខ្លាំង ចូលចិត្តរៀបចំផ្ទះខ្លាំង ចូលចិត្តអានសៀវភៅខ្លាំង ចូលចិត្តធ្វើលំហាត់ខ្លាំង ឬចូលចិត្តការនិយាយខ្លាំងជាដើម។ បន្ទាប់មកអ្នកអាចស្វែងយល់ឱ្យកាន់តែលម្អិតលើជំនាញមួយចំនួនថា មានជំនាញអ្វីខ្លះដែលត្រូវនឹងចំណូលចិត្ត ហើយដែលអ្នកគិតថា បានធ្វើវាហើយនឹងមិនចេះធុញទ្រាន់អស់មួយជីវិត។

3. ព្យាយាមស្គាល់អាជីពឱ្យបានច្រើន

អាជីពនៅលើពិភពលោកមានច្រើនណាស់ ហើយក៏មានអាជីពជាច្រើនដែលមនុស្សមិនបានដឹងពីសារៈសំខាន់របស់វា ហេតុនេះហើយទើបមានអាជីពខ្លះមិនសូវសំខាន់តែមានមនុស្សរៀនច្រើន ហើយខ្លះទៀតសំខាន់ហើយល្អ តែមនុស្សមិនព្រមរៀន។ តាមពិតទៅ តាមការស្រាវជ្រាវរបស់អ្នកអប់រំនៅកម្ពុជាជាច្រើនសុទ្ធតែបានសន្និដ្ឋានដូចគ្នាថា ការជ្រើសរើសមុខវិជ្ជាខុសរបស់និស្សិតកម្ពុជាអាចមកពីកត្តាមិនស្គាល់ពីគុណតម្លៃពិតប្រាកដរបស់មុខវិជ្ជាឱ្យបានច្រើន ដែលជាហេតុធ្វើឱ្យពួកគេខ្វះជម្រើសក្នុងការសិក្សាអ្វីដែលថ្មី ត្រូវនឹងចំណង់ចំណូលចិត្ត ហើយសង្គមកំពុងត្រូវការខ្លាំង៕

October 12, 2017

ចិននឹងបោះទុន $700លាន សង់មជ្ឈមណ្ឌលទេសចរណ៍នៅកម្ពុជា

ភ្នំពេញ៖ ក្រុមហ៊ុនចិនដ៍ដំមួយគ្រោងបោះទុនវិនិយោគរបស់ខ្លួនក្នុងទឹកប្រាក់ប្រមាណជា 700លានដុល្លារអាមេរិក ដើម្បីសាងសង់មជ្ឈមណ្ឌលទេសចរណ៍ និងវប្បធម៌ដ៏ធំមួយនៅក្នុងទឹកដីប្រាសាទអង្គរ ខេត្តសៀមរាបនៅដើមឆ្នាំ 2018 ខាងមុខ។

ក្នុងដំណើរទស្សនកិច្ចទៅកាន់ប្រទេសចិន កាលពីថ្ងៃទី11 ខែតុលា ម្សិលមិញនេះលោកឧបនាយករដ្ឋមន្ត្រី ហោ ណាំហុង បានអញ្ជើញទៅទស្សនាផ្ទាល់នៅក្រុមហ៊ុន USunhome ដែលស្ថិតនៅក្នុងខេត្តSichuan ប្រទេសចិន ដែលក្នុងដំណើរទស្សនកិច្ចនោះ ក្រុមហ៊ុនចិនបានស្នើសុំសាងសង់មជ្ឈមណ្ឌលទេសចរណ៍ និងវប្បធម៌ដ៍ធំមួយក្នុងខេត្តសៀមរាបនៃប្រទេសកម្ពុជា។

ឆ្លើយតបសំណើនេះ លោកឧបនាយករដ្ឋមន្ត្រី ហោ ណាំហុង បានស្នើទៅវិញឱ្យក្រុមហ៊ុនធ្វើការសាងសង់គម្រោងមជ្ឈមណ្ឌលនេះឱ្យបានឆាប់ ដើម្បីឱ្យអ្នកទេសចរចិន និងអ្នកទេសចរបរទេសផ្សេងៗទៀត មកទស្សនានៅកម្ពុជាឱ្យបានកាន់តែច្រើន។

ទំព័រហ្វេសប៊ុកផ្លូវការរបស់លោកឧបនាយករដ្ឋមន្ត្រី ហោ ណាំហុង បានឱ្យដឹងថា វិនិយោគិនចិននៅកម្ពុជាឈរលើលំដាប់លេខ1ក្នុងឆ្នាំ2016 មានទឹកប្រាក់វិនិយោគប្រមាណ11ពាន់លានដុល្លារលើវិស័យកសិកម្ម ឧស្សាហកម្ម ថាមពល សេវាកម្ម សំណង់ និងវិស័យផ្សេងៗទៀត ជាពិសេសក្នុងការកសាងផ្លូវថ្មីៗ និងស្ពានឆ្លងកាត់ទន្លេមេគង្គ ទន្លេសាប និងទន្លេបាសាក់ ព្រមទាំងវារីអគ្គិសនីជាច្រើនទៀតដែលនាំឱ្យតម្លៃអគ្គិសនីនៅកម្ពុជាកាន់តែចុះថោក។ ទន្ទឹមនឹងនេះ ចិនក៏បានផ្តល់ហិរញ្ញប្បទានឥតសំណង ឥណទាន សម្បទាន និងជំនួយផ្សេងៗដ៏ច្រើនសន្ធឹកសន្ធាប់ដល់កម្ពុជាផងដែរ។

គួររំឭកថា ក្នុងឆ្នាំ2016កន្លងទៅ កម្ពុជាបានទទួលអ្នកទេសចរចិនចំនួនជាង 80ម៉ឺននាក់ ហើយ សង្ឃឹមថា នឹងទាក់ទាញភ្ញៀវទេសចរចិនប្រមាណ 1លាននាក់ ក្នុងឆ្នាំ2017នេះ និងប្រមាណ 2លាននាក់នៅឆ្នាំ2020៕

October 12, 2017

ការព្យាករ៖ វិស័យឧស្សាហកម្មកាត់ដេរ ឆ្នាំ2017ធ្លាក់ចុះជាងឆ្នាំមុន

ភ្នំពេញ៖ ការព្យាករថ្មីមួយបានបង្ហាញថា កំណើនក្នុងវិស័យឧស្សាហកម្មមានការធ្លាក់ចុះជាងឆ្នាំមុនដោយសារការធ្លាក់ចុះនៃវិស័យកាត់ដេរ ដែលកើតចេញពីកត្តាផ្សេងៗមួយចំនួន ដូចជាកត្តាប្រាក់ឈ្នួល (ប្រាក់ខែកម្មករ) និងការបញ្ជាទិញរបស់វិនិយោគិនក្រៅប្រទេស ជាដើម។

របាយការណ៍របស់ក្រសួងសេដ្ឋកិច្ច និងហិរញ្ញវត្ថុ ប្រចាំឆមាសទី1 ឆ្នាំ2017នេះ បង្ហាញថា វិស័យឧស្សាហកម្មត្រូវបានព្យាករថា នឹងមានការថយចុះបន្តិចក្នុងអត្រា9.2% នៅឆ្នាំ2017 ដោយសារការធ្លាក់ចុះនៃកំណើនក្នុងវិស័យកាត់ដេរ ដែលទាមទារឱ្យមានការប៉ះប៉ូវឡើងវិញពីវិស័យឧស្សាហកម្មដែលមិនមែនកាត់ដេរ និងវិស័យសំណង់ជាដើម។

ការព្យាករនេះបង្ហាញថា វិស័យកាត់ដេររំពឹងថានឹងថយចុះមកនៅត្រឹម 5.8% ដែលស្តែងចេញតាមរយៈការធ្លាក់ចុះនៃការនាំចេញផលិតផលកាត់ដេរ និងការនាំចូលវត្ថុធាតុដើម ដែលរងនូវសម្ពាធមួយចំនួន ដូចជាការបន្តកើនឡើងនៃប្រាក់ឈ្នួលអប្បបរមា ការប្រកួតប្រជែងខ្លាំងជាងមុនពីប្រទេសមីយ៉ាន់ម៉ា(ភូមា) បង់ក្លាដែស និងវៀតណាម និងភាពស្ទាក់ស្ទើរនៃការបញ្ជាទិញផលិតផលកាត់ដេររបស់អ្នកវិនិយោគក្រៅប្រទេសមួយចំនួនដែលត្រូវប្រើរយៈពេលផលិតខ្លី ដោយសារការបារម្ភរបស់អ្នកបញ្ជាទិញ និងភាពមិនប្រាកដប្រជានៃការបញ្ជូនទំនិញទាន់ពេលវេលា។

ចំណែកវិស័យសំណង់វិញ ទោះជាមានការលើកឡើងពីកំណើនរឹងមាំមែន ប៉ុន្តែធាតុពិតបានធ្លាក់ចុះមកនៅត្រឹម14.4% ដោយសារឥរិយាបថរង់ចាំមើលរបស់វិនិយោគិនចំពោះព្រឹត្តិការណ៍បោះឆ្នោតដែលខិតជិតមកដល់ និងវិធានការរឹតត្បិតរបស់ធនាគារជាតិនៃកម្ពុជា។ ជាមួយគ្នានេះការថមថយនៃវិស័យឧស្សាហកម្មជារួមក៏បានបំពេញវិញខ្លះដែរដោយកំណើនខ្ពស់នៃវិស័យឧស្សាហកម្មមិនមែនកាត់ដេរ គ្រឿងផ្គុំអេឡិចត្រូនិក គ្រឿងបន្លាស់ ចំណីអាហារ និងភេសជ្ជៈ កង់ និងគ្រឿងសង្ហារិមក្នុងអត្រាប្រមាណ 12.5% ដែលត្រូវបានឆ្លុះបញ្ចាំងតាមរយៈកំណើនតម្លៃផលិតកម្ម និងការនាំចេញ។

ទោះជាវិស័យឧស្សាហកម្មធ្លាក់ចុះមែន ប៉ុន្តែបើក្រឡេកមើលពីវិស័យសេវាកម្មវិញ ត្រូវបានព្យាករថា នឹងមានកំណើនល្អប្រសើរជាងឆ្នាំ2016 ដោយនឹងអាចសម្រេចបានក្នុងរង្វង់ 7.23% ក្នុងឆ្នាំ2017នេះ ដោយសារភាពរឹងមាំនៃវិស័យទេសចរណ៍ និងវិស័យលក់ដុំ និងលក់រាយ ទោះបីជាវិស័យដឹកជញ្ជូន និងគមនាគមន៍ និងវិស័យអចលនទ្រព្យមានការធ្លាក់ចុះបន្តិចក៏ដោយ៕

October 12, 2017

ឆាប់ៗខាងមុខនេះ ប្រជាជនកម្ពុជានឹងអាចធ្វើដំណើរតាមរថភ្លើងទៅដល់ប្រទេសចិន

ភ្នំពេញ – ដើម្បីតភ្ជាប់ប្រព័ន្ធផ្លូវដែកកម្ពុជាទៅកាន់បណ្ដាប្រទេសក្នុងតំបន់អាស៊ាន កម្ពុជាគ្រោងនឹងសាងសង់ផ្លូវដែកថ្មីពីស្ថានីយបាត់ដឹង ខេត្តកំពង់ស្ពី ដើម្បីតភ្ជាប់ទៅប្រទេសវៀតណាម និងឆ្ពោះទៅប្រទេសចិន ដែលផ្លូវដែកនេះនឹងធ្វើការអភិវឌ្ឍទៅតាមលក្ខណៈស្ដង់ដារ។

បើយោងតាមលោក ចាន់ សំនៀង ប្រធាននាយកដ្ឋានផ្លូវដែកកម្ពុជា បានលើកឡើងថា មិនយូរប៉ុន្មានទៀតទេ រាជរដ្ឋាភិបាលកម្ពុជាមានគម្រោងកសាងផ្លូវដែកថ្មីពីស្ថានីយបាត់ដឹង ឆ្ពោះទៅប្រទេសវៀតណាមដែលមានចម្ងាយផ្លូវ 257គីឡូម៉ែត្រដែលត្រូវចំណាយថវិកាច្រើន ដើម្បីសាងសង់ឱ្យត្រឹមត្រូវតាមស្ដង់ដារ។

គម្រោងនេះបង្កើតឡើងក្នុងគោលបំណងតភ្ជាប់កម្ពុជាទៅនឹងបណ្ដាប្រទេសក្នុងតំបន់អាស៊ានទាំងអស់ ឆ្ពោះទៅកាន់ខេត្ដឃុននីង នៃប្រទេសចិន។ គម្រោងនេះនឹងធ្វើទៅតាមស្ដង់ដារទំហំហ្គេដដែលមានទទឹង1,435 មីល្លីម៉ែត្រ ដែលបណ្ដាប្រទេសក្នុងតំបន់អាស៊ានកំពុងតែអនុវត្ដទៅតាមស្ដង់ដារនេះទាំងអស់ ខណៈប្រទេសកម្ពុជា និងប្រទេសមួយចំនួនក្នុងតំបន់អាស៊ានកំពុងតែបន្ដប្រើប្រាស់ទំហំផ្លូវក្នុងខ្នាត1,000មីល្លីម៉ែត្រ។

លោកបន្ដថា ជាមួយគ្នានេះកម្ពុជាក៏កំពុងតែស្ដារប្រព័ន្ធផ្លូវដែកកម្ពុជាតភ្ជាប់ទៅប្រទេសថៃដោយជួសជុលផ្លូវដែកពីប៉ោយប៉ែតទៅមង្គលបុរី និងជួសជុលផ្លូវដែកពីមង្គលបុរីទៅបាត់ដំបង ដែលគ្រោងនឹងបញ្ចប់ក្នុងឆ្នាំនេះ។ ជាមួយគ្នានេះ ការជួសជុលផ្លូវដែកពីខេត្ដពោធិ៍សាត់ទៅបាត់ដំបងក៏គ្រោងនឹងបញ្ចប់នៅខែមេសា ឆ្នាំ2018ខាងមុខនេះផងដែរ។ ក្នុងករណីមានថវិកាគ្រប់គ្រាន់កម្ពុជាក៏នឹងអាចបញ្ចប់ការជួសជុសផ្លូវដែកពីពោធិ៍សាត់មកស្ថានីយបាត់ដឹង ដើម្បីជួយសម្រួលការធ្វើដំណើរ និងដឹកទំនិញតាមផ្លូវដែកពីប្រទេសកម្ពុជាទៅប្រទេសថៃឱ្យកាន់តែមានភាពងាយស្រួលឡើង៕

October 12, 2017

តើគួរទិញអចលនទ្រព្យមុនពេលបោះឆ្នោត ឬត្រូវរង់ចាំក្រោយបោះឆ្នោត?

ជាទូទៅនៅពេលការបោះឆ្នោតជិតចូលមកដល់ម្តងៗគេសង្កេតឃើញថា សកម្មភាពក្នុងវិស័យអចលនទ្រព្យតែងមានការប្រែប្រួលដោយចៀសមិនផុតនោះឡើយ។ នៅឆ្នាំ2018 ខាងមុខកម្ពុជានឹងរៀបចំការបោះឆ្នោតជាតិម្តងទៀត។ តើវិស័យអចលនទ្រព្យនៅកម្ពុជាអាចនឹងមានការប្រែប្រួលបែបណា?

លោកស្រី តាំង ហួរ អគ្គនាយិកាក្រុមហ៊ុន អមតៈប្រផឹធី សឺវីស បានប្រាប់ថា នៅពេលការបោះឆ្នោតជិតចូលមកដល់ មិនថាប្រទេសណានោះទេគឺតម្លៃអចលនទ្រព្យអាចនឹងស្ថិតនៅទ្រឹងមួយរយៈដោយសារតែគ្រប់គ្នាសុទ្ធតែរង់ចាំមើលការបោះឆ្នោតរួចរាល់។ បន្ទាប់ពីការបោះឆ្នោតរួចរាល់ សកម្មភាពទិញ លក់ នឹងមានភាពមមាញឹកឡើងវិញ។

ករណីនេះលោកស្រី តាំង ហួរ បានអះអាងថា បើក្រឡេកមើលទីផ្សារអចលនទ្រព្យនៅកម្ពុជាបច្ចុប្បន្នបើទោះបីជាការបោះឆ្នោតជិតឈានចូលមកដល់ក៏ដោយ ប៉ុន្តែសកម្មភាពទិញ លក់ ដីធ្លី និងអចលនទ្រព្យនានានៅមានភាពផុលផុសនៅឡើយគ្រាន់តែថាហាក់ថយចុះជាងមុនបន្តិច។ ចំណែកការប្រកួតប្រជែងគឺមានយុទ្ធសាស្ត្ររៀងៗខ្លួនដោយក្រុមហ៊ុនខ្លះលក់ក្នុងតម្លៃសមរម្យ ហើយក្រុមហ៊ុនខ្លះលក់ក្នុងតម្លៃខ្ពស់ ដើម្បីចាប់យកអតិថិជនលំដាប់ផ្សេងៗគ្នា។

ទោះបីជាយ៉ាងណា លោកស្រីអគ្គនាយិកាក្រុមហ៊ុន អមតៈ ប្រផឹធី សឺវីស បានបញ្ជាក់ថា៖“សម្រាប់ក្រុមហ៊ុនដែលលក់ក្នុងតម្លៃសមរម្យនឹងមានការគាំទ្រច្រើនជាងក្រុមហ៊ុនលក់ក្នុងតម្លៃខ្ពស់។

កន្លងមកនៅពេលការបោះឆ្នោតជិតចូលមកដល់ប្រជាជនខ្មែរតែងមានការយល់ឃើញផ្សេងៗគ្នា ដោយអ្នកខ្លះមិនហ៊ានទិញដីធ្លី ឬផ្ទះនោះទេ ព្រោះខ្លាចមានបញ្ហាអស្ថិរភាពសង្គម ប៉ុន្តែអ្នកខ្លះទៀតបែរជាគិតថាជាឱកាសទៅវិញ ដោយសារតម្លៃអចលនទ្រព្យមិនសូវឡើងខ្លាំង។

លោក សន សៀប អគ្គនាយកក្រុមហ៊ុន ឃីរៀលអុីស្ទេត បាននិយាយថា នៅពេលការបោះឆ្នោតឆ្នាំ2018 កាន់តែខិតជិតមកដល់ គេសង្កេតឃើញថាសកម្មភាពនៃការទិញលក់ ដីធ្លី អគារ ផ្ទះល្វែង នៅកណ្តាលក្រុងហាក់មានសភាពស្ងាត់ជាងមុនបន្តិច ដោយសារពួកគេរង់ចាំមើលសភាពការណ៍ក្រោយពេលបោះឆ្នោត។

លោកបាននិយាយថា៖ “បច្ចុប្បន្នអ្នកមានលុយគេមានទឹកមាត់ក្នុងការចរចា បើគេចង់ទិញលុះត្រាតែមានការទម្លាក់តម្លៃចន្លោះពី 20%ទៅ30% បើមិនដូច្នេះគេមិនទិញទេ ដោយគេរង់ចាំឱកាសចូលមកដល់។

អគ្គនាយកក្រុមហ៊ុន ឃី រៀលអុីស្ទេត បានបន្តថា កត្តាដែលធ្វើឱ្យវិស័យអចលនទ្រព្យនៅកណ្តាលក្រុងនាពេលនេះហាក់មានភាពស្ងាត់ជាងមុននេះគឺដោយសារកត្តាអាកាសធាតុមានភ្លៀងធ្លាក់ច្រើននិងរដូវកាលបោះឆ្នោតជិតចូលមកដល់។ តែយ៉ាងណាសកម្មភាពទិញលក់អចលនទ្រព្យនៅតំបន់ជាយក្រុងនៅមានភាពប្រសើរដដែល ពិសេសភាគខាងលិចឆៀងខាងជើងនៃរាជធានីនៅត្រង់ចំណុចផ្សារទំនើប Aeon ទី2 និងភាគខាងលិចឆៀងខាងត្បូងក៏មានសកម្មភាពស្ទុះឡើងគួរសមដែរ ខណៈរដ្ឋាភិបាលត្រៀមសាងសង់ផ្លូវក្រវាត់ក្រុងទី3 ចេញពីផ្លូវទំនប់កប់ស្រូវ កាត់តាមខេត្តកណ្តាល ឆ្ពោះទៅកំពង់ផែនៅផ្លូវជាតិលេខ1 ក្នុងស្រុកកៀនស្វាយ។

លោក សន សៀប បានលើកឡើងពីបទពិសោធន៍កន្លងមកថា នៅរដូវកាលបោះឆ្នោតឆ្នាំ2003 វិស័យអចលនទ្រព្យមានភាពល្អប្រសើរឡើងបន្តិចម្តងៗទាំងមុន និងក្រោយពេលបោះឆ្នោត រហូត

ដល់ឆ្នាំ2008 វិស័យនេះបានធ្លាក់ចុះមួយរយៈដោយសារវិបត្តិសេដ្ឋកិច្ចពិភពលោក។ បន្ទាប់ពីស្ទុះងើបឡើងវិញបានមួយរយៈ នៅឆ្នាំ2013 ស្ថានភាពវិស័យអចលនទ្រព្យបានស្ងប់ស្ងាត់សាជាថ្មីម្តងទៀត ដោយសារឥទ្ធិពលនយោបាយ។ ក្រោយពេលស្ថានភាពនយោបាយមានភាពល្អប្រសើរ វិស័យអចលនទ្រព្យក៏ចាប់ផ្តើមមានដំណើរការល្អរហូតដល់ពេលនេះ។

យ៉ាងណាក៏ដោយ លោកអគ្គនាយកក្រុមហ៊ុន ឃី រៀលអុីស្ទេត បានអះអាងថា ដោយសារកម្ពុជាមានភាពចាស់ទុំផ្នែកនយោបាយនោះ គេរំពឹងថាសកម្មភាពអចលនទ្រព្យនឹងមានភាពប្រសើរឡើងវិញនៅក្រោយបោះឆ្នោតឆ្នាំ2018។

សូមជម្រាបថា ទោះជាវិស័យអចលនទ្រព្យនាពេលនេះហាក់មានភាពស្ងប់ស្ងាត់ជាងមុនបន្តិច ប៉ុន្តែសកម្មភាពសាងសង់ផ្សេងៗនៅតែរីកចម្រើនទៅមុខគួរឱ្យកត់សម្គាល់៕

October 12, 2017

គន្លឹះ 9យ៉ាងដើម្បីសុខភាពល្អ

បញ្ហាសុខភាពគឺជារឿងមួយដែលមនុស្សយើងគិតគូរខ្លាំងណាស់នាពេលបច្ចុប្បន្ននេះ អាចសង្កេតឃើញបានតាមរយ:ពេលធ្វើបុណ្យសុំពរ ឬជូនពរគ្នាទៅវិញទៅមកជាដើម ពាក្យថា “សូមឱ្យមានសុខភាពរឹងមាំ” តែងបានឮជាប់ជានិច្ច។ កន្លងមកនេះ ទស្សនាវដ្តីសុខភាព H to H Magazine នៅក្នុងសហរដ្ឋអាមេរិក បានសរសេអត្ថបទសុខភាពមួយដែលមានចំណងជើងថា “គន្លឹះ9យ៉ាង ដើម្បីសុខភាពល្អ” ដែល ឡារ៉ែន សូមនាំមកជម្រាបប្រិយមិត្តអ្នកអានជាបន្ត ដើម្បីសាកល្បងអនុវត្តតាម ព្រោះមិនមែនជារឿងពិបាកឡើយ។

1/ ផ្លែប៉ោម

មួយថ្ងៃមួយផ្លែពាក្យស្លោកដែលថា «An apple a day, keeps doctor away» គឺជារឿងត្រឹមត្រូវជានិច្ច។តាមរយ:ការសិក្សាស្រាវជ្រាវរបស់មហាវិទ្យា-ល័យ ឡុនដុន បានរកឃើញថា ការទទួលទានផ្លែប៉ោមមួយថ្ងៃមួយផ្លែ នឹងធ្វើឱ្យការធ្វើការងាររបស់សួតកាន់តែល្អប្រសើរឡើង។ ដោយសារ អ៊ែនទីអុកស៊ីឌែនត៍ និងសារធាតុនៅក្នុងផ្លែប៉ោមដែលហៅថា Quercetin នឹងជួយធ្វើឱ្យសួតរឹងប៉ឹង និងធ្វើការបានយ៉ាងត្រឹមត្រូវ។

2/ ដកដង្ហើមវែងៗយើងគួរដកដង្ហើមឱ្យបានវែងៗ

ដើម្បីពង្រីកការធ្វើការងាររបស់សួត និងធ្វើឱ្យរាងកាយបានទទួលអុកស៊ីហ្ស៊ែនយ៉ាងគ្រប់គ្រាន់ផង តែរៀងរាល់ថ្ងៃនេះយើងច្រើនតែដកដង្ហើមខ្លីៗ ដោយសារតែធ្វើការនៅក្នុងកន្លែងតូចហប់ ឬព្រោះតែមិនបានដឹងក៏មានដែរ ដូច្នេះហើយក្នុងមួយថ្ងៃៗចូរសាកល្បងដកដង្ហើមវែងៗឱ្យបានយ៉ាងតិចណាស់ក្នុងមួយថ្ងៃ10ដង ដោយត្រូវដកដង្ហើមចូលឱ្យពោះឡើងប៉ោង និងដកដង្ហើមចេញវិញឱ្យពោះឡើងផតទើបត្រឹមត្រូវតាមវិធី។

3/ ចៀសវាងយកបន្លែទៅដាក់ចម្អិនក្នុងឆ្នាំងម៉ៃក្រូវេវតាមរយ

ការស្រាវជ្រាវវិភាគរបស់ប្រទេសអេស្បាញបានរកឃើញថា ការចម្អិនបន្លែឱ្យឆ្អិននៅក្នុងឆ្នាំងម៉ៃក្រូវេវនឹងធ្វើឱ្យសារជាតិអាហារបាត់អស់ដល់ទៅ97% ដូច្នេះហើយអ្នកគួរជ្រើសរើសទទួលទានបន្លែស្រស់ទើបប្រសើរជាង។

4/ កម្រើកខ្លួនជានិច្ច

អ្នកដែលកម្រើខ្លួន ឬធ្វើចលនាជាប់ជានិច្ចនឹងមានប្រព័ន្ធរំលាយអាហារល្អជាងអ្នកដែលគិតតែអង្គុយតែមួយកន្លែង។ វិធីនេះជួយការពារអាការចុកឆ្អល់ពោះ រួមទាំងរោគពុកឆ្អឹងទៀតផង។

5/ ប្រយោជន៍របស់ទឹកដូង

ទឹកដូងគឺជាទឹកផ្លែឈើដែលល្អបំផុតមួយប្រភេទ មានផ្ទុកសារធាតុរ៉ែដែលរាងកាយត្រូវការគ្រប់ទាំងអស់ដូចជា ប៉ូតាស្យូម ជាតិដែក សូដ្យូម កាល់ស្យូម ផូស្វ័រ អាស៊ីតអ:មីណូ និងវីតាមីន B ហើយថែមទាំងមានជាតិស្ករគ្លូខូសដែលរាងកាយអាចបឺតយកទៅប្រើជាថាមពលបានភ្លាមតែម្តង មានសារធាតុខ្លាញ់ដែលមានប្រយោជន៍ដល់រាងកាយ និងមានប្រយោជន៍ក្នុងការបណ្តេញសារជាតិពុលចេញពីរាងកាយទៀតផង។

6/ ពេលគ្រុនក្តៅខ្លួន មិនគួរទទួលទានផ្លែត្របែកទេ

នៅក្នុងផ្លែត្របែកមានរ៉ែប៉ូតាស្យូមខ្ពស់។ នៅពេលគ្រុន រាងកាយនឹងមានសីតុណ្ហភាពឡើងខ្ពស់ ការទទួលទានអាហារដែលមានប៉ូតាស្យូមខ្ពស់ អាចនឹងហុចផលឱ្យកើតអាការប្រកាច់បាន។

7/ ទទួលទានក្រូចជួយកែអាការធុញទ្រាន់ នឿយណាយបាន

ការទទួលទានផ្លែក្រូចដោយបកសម្បកខ្លួនឯង នឹងបានធុំក្លិនក្រូចដែលនឹងជួយឱ្យមានអា-រម្មណ៍ធូរស្រាល ហើយវីតាមីន C ដែលរាងកាយបានទទួលពីផ្លែក្រូចក្នុងបរិមាណដែលគ្រប់គ្រាន់ នឹងជួយជម្រុញឱ្យខួរក្បាលបញ្ចេញអ័រម៉ូនដែលធ្វើឱ្យបាត់ភាពធុញថប់តឹងតែងក្នុងចិត្តបានល្អទៀតផង។

8/ ទទួលទានអាហារពេលព្រឹកជួយការពាររោគភ្លេចភ្លាំង

អាហារពេលព្រឹកជួយប្រឆាំងការបង្កកខ្លួនរបស់ឈាម ព្រោះឈាមនៅពេលព្រឹកនឹងងាយបង្កកខ្លួនជាងពេលប្រក្រតី ដូច្នេះគួរទទួលទានអាហារពេលព្រឹកឱ្យបានទៀងទាត់ ដើម្បីឱ្យខួរក្បាលទទួលបានឈាមហូរទៅចិញ្ចឹមយ៉ាងគ្រប់គ្រាន់ នោះខួរក្បាលនឹងបានភ្លឺថ្លាមានការចងចាំល្អប្រសើរឡើង។

9/ សូកូឡាខ្មៅប្រឆាំងអនុមូលឥស្សរ

តើមិត្តអ្នកអានដឹងទេថា សូកូឡាប្រភេទផ្សេងៗនោះស្ទើរតែគ្មានចំណែកផ្សំរបស់កូកូឡើយ មានតែសូកូឡាខ្មៅមួយប៉ុណ្ណោះដែលជាសូកូឡាសុទ្ធពិត និងថែមទាំងមានប្រយោជន៍ដល់រាងកាយទៀតផង ព្រោះមានសារធាតុ Flavonoid ដែលជួយបង្កើនប្រព័ន្ធឈាមរត់បានល្អឡើង។ គួរទទួលទានសូកូឡាខ្មៅក្នុងមួយថ្ងៃប្រមាណកន្លះ អនស៍ (Ounce = 0.0296លីត្រ)៕

October 12, 2017

លោក Mourinho ត្រៀមចុះកុងត្រាថ្មីជាមួយ Man Utd ក្នុងចំណូល 65លានផោន

ក្លិបបិសាចក្រហម Manchester United ពិតជាចង់ចងជើងរបស់លោក Jose Mourinho ឲ្យជាប់តាមរយៈការផ្តល់កុងត្រាថ្មីរយៈពេល 5ឆ្នាំដែលផ្តល់ចំណូលជាទឹកប្រាក់ 65លានផោន (ស្មើនឹង 86លានដុល្លារអាមេរិក)។

គ្រូបង្វឹករបស់ក្រុមបិសាចក្រហមរូបនេះ ត្រៀមលក្ខខណៈរួចរាល់ហើយក្នុងការបន្តកុងត្រាថ្មី ដើម្បីធ្វើឲ្យពេលវេលារបស់លោកនៅឯកីឡដ្ឋាន Old Trafford ក្លាយជាពេលវេលាដ៏យូរអង្វែងបំផុតក្នុងអាជីពរបស់លោក។ លោក Mourinho វ័យជាងសែសិបឆ្នាំ គឺ ជាអ្នកចាត់ការទូទៅដែលមានចំណូលខ្ពស់ជាងគេបំផុតក្នុងពិភពកីឡាបាល់ទាត់ រួមជាមួយនឹងលោក Pep Guardiola ដែលជាអ្នកចាត់ការទូទៅរបស់ក្លិប Man City ខណៈដែលគ្រូបង្វឹកទាំងពីរសុទ្ធសឹងទទួលបានចំណូល25ម៉ឺនផោន ក្នុងមួយសប្តាហ៍ដូចគ្នា។

ប្រាក់បៀវត្សរ៍ជាមូលដ្ឋាននេះ នឹងរក្សានៅដដែល ប៉ុន្តែកញ្ចប់ថវិកាលើកទឹកចិត្តរបស់គ្រូបង្វឹកសញ្ជាតិព័រទុយហ្គាល់រូបនេះ សម្រាប់ការឈ្នះពាននានា និងពានរង្វាន់ធំៗ នឹងស្ថិតក្នុងចំនួនមួយដ៏ខ្ពស់។ សេចក្តីលម្អិតចុងក្រោយនៅតែត្រូវរង់ចាំការយល់ព្រម ខណៈដែលលោក Mourinho បានចុះហត្ថលេខារយៈពេល3ឆ្នាំកាលពីរដូវក្តៅ ឆ្នាំ២០១។ បើទោះបីក្រុមប្រឹក្សារបស់ក្លិប Man United មានការជឿជាក់ថា ពួកគេមានមនុស្សដ៏ឆ្នើមម្នាក់ក៏ដោយ ប៉ុន្តែភាគីទាំងពីរពិតជារីករាយជាមួយនឹងរយៈពេលនៃកិច្ចសន្យានោះ ដោយរង់ចាំមើលកម្រិតនៃការវិវឌ្ឍឆ្ពោះទៅមុខសិន។ ប៉ុន្តែ ប្រធានក្លិប Man United ពិតជាចាប់អារម្មណ៍ទៅលើរបៀបដែលលោក Mourinho បានផ្លាស់ប្តូរក្លិបនេះក្នុងរយៈពេលតិចជាង1ឆ្នាំកន្លះកន្លងមកនេះ។

កាលពីរដូវកាលមុន រូបគាត់បានផ្សារភ្ជាប់ទំនាក់ទំនងដ៏ធំមួយជាមួយនឹងអ្នកគាំទ្ររបស់ Man United។ គ្រូបង្វឹករូបនេះ ក៏បានឈ្នះពានធំពីរក្នុងរដូវកាលទី1របស់លោកផងដែរ ពោលគឺពាន EFL Cup និងពានក្របខ័ណ្ឌ Europa League៕

ប្រភពពី៖ The Sun

October 12, 2017

យុវតីកម្ពុជានឹងកាន់តែខ្លាំង តាមរយៈការរៀនដោយផ្ទាល់ពីអ្នកជំនាញសំខាន់ៗ

ដោយសារតែចរន្តនៃបច្ចេកវិទ្យាព័ត៌មានវិទ្យា និងការអប់រំមានការអភិវឌ្ឍ ស្ត្រីកម្ពុជាដែលធ្លាប់ស្ថិតក្នុងគំនាបប្រពៃណី និងទំនៀមទម្លាប់យ៉ាងតឹងតែង បានអភិវឌ្ឍយ៉ាងលឿនជាមួយនឹងការយកចិត្តទុកដាក់ពីគ្រប់ភាគីក្នុងសង្គម។

ថ្មីៗនេះ អង្គការ Plan international Cambodia បានបង្កើតកម្មវីធីមួយឈ្មោះថា «ខ្ញុំដើម្បីខ្ញុំ» ដើម្បីជំរុញឱ្យក្មេងសម្រេចក្តីស្រមៃរបស់ខ្លួននៅថ្ងៃអនាគតក្នុងការចូលរួមចំណែកក្នុងវិស័យសំខាន់ៗរបស់សង្គម។ កម្មវិធីនេះបានប្រមូលក្មេងស្រីយ៉ាងតិច 20នាក់មកពីតំបន់ដាច់ស្រយាលនៃប្រទេសកម្ពុជាឱ្យបានជួបជាមួយនឹងរដ្ឋមន្ត្រី ព្រឹទ្ធបុរសនៃសាកលវិទ្យាល័យ ប្រធានគ្រប់គ្រងក្រុមហ៊ុនឯកជន និងនាយកអង្គការមិនមែនរដ្ឋភិបាល ដើម្បីផ្តល់ឱកាសដល់ពួកគេបានស្គាល់ពីតួនាទី និងត្រៀមខ្លួនសម្រួចគោលដៅរបស់ខ្លួនឆ្ពោះទៅកាន់តំណែងសំខាន់ៗទាំងអស់នោះ។

លោក Jan Japp Kleinrensink នាយកប្រចាំប្រទេសនៃអង្គការ Plan international Cambodia បានថ្លែងថា ក្មេងស្រីនៅតែប្រឈមនឹងការរារាំងនៅក្នុងជីវិតរបស់ពួកគេសម្រាប់ការអភិវឌ្ឍ និងការសម្រេចជោគជ័យ ដើម្បីទទួលបានក្តីស្រមៃរបស់ខ្លួន។ ក្មេងស្រីនៅតែមានអំណាចតិចតួចក្នុងការសម្រេចចិត្ត ឬបង្កើតជម្រើសសម្រាប់ខ្លួនឯង។

លោកបញ្ជាក់ថា កម្មវិធី «ខ្ញុំដើម្បីខ្ញុំ» គឺផ្តោតសំខាន់ទៅលើអំណាច និងសក្តានុពលរបស់ក្មេងស្រី។ នៅពេលក្មេងស្រីមានឱកាស និងជម្រើសក្នុងជីវិត ពួកគេអាចប្រែក្លាយជីវិតរស់នៅ និងសហគមន៍របស់ពួកគេបាន។

កាលពីឆ្នាំមុន អង្គការភ្លែនអន្តរជាតិកម្ពុជា បានចាប់ផ្តើមកម្មវិធី «ខ្ញុំដើម្បីខ្ញុំ» ដែលបានអនុវត្តនៅតែក្នុង សហគមន៍ប៉ុណ្ណោះ ដោយបានជ្រើសរើសក្មេងស្រី 6នាក់ មកពីតំបន់ដាច់ស្រយាលនៃខេត្តចំនួន3គឺ ខេត្តសៀមរាប ត្បូងឃ្មុំ និងខេត្តរតនគិរី។

ទន្ទឹមនឹងកម្មវិធីនេះ នៅកម្ពុជាក៏មានអង្គការមួយចំនួនទៀតផងដែរដែលផ្តល់ឱកាសឱ្យក្មេងស្រីជួបជាមួយនឹងអ្នកជំនាញមកពីវិស័យសំខាន់ៗនៅលើពិភពលោក។

លោក Mario Ferro នាយកប្រតិបត្តិនៃអង្គការ Wedu ដែលមានបេសកកម្មពង្រឹងភាពជាអ្នកដឹកនាំដល់ស្ត្រីនៅអាស៊ីតាមរយៈកម្មវិធីប្រឹក្សាយោបល់ពីអ្នកជំនាញនៅក្នុងបណ្តាប្រទេសទាំងឡាយនៅអឺរ៉ុប និងនៅសហរដ្ឋអាមេរិក និងជាអតីតម្ចាស់ជយលាភីលើគម្រោងអាជីវកម្ម នៅសាកលវិទ្យាល័យខេមប្រីដត៍ )Cambridge) ដ៏ល្បីល្បាញរបស់ពិភពលោកបានផ្តួចផ្តើមបង្កើតគម្រោងអប់រំមួយ ដើម្បីផ្តល់ឱកាសដល់ យុវជនក្នុងប្រទេសកំពុងអភិវឌ្ឍន៍ឱ្យមានឱកាសទទួលបានការប្រឹក្សាយោបល់ពីបណ្តាអ្នកជំនាញដែលកំពុងបំពេញការងារនៅទ្វីបអឺរ៉ុប និងនៅសហរដ្ឋអាមេរិក។

កាលពីឆ្នាំ 2013 នាយកប្រតិបត្តិ និងជាស្ថាបនិកនៃអង្គការអន្តរជាតិរូបនេះ បានមកទស្សនកិច្ចនៅប្រទេសកម្ពុជា ហើយបាននាំយកគម្រោងដ៏មានសារៈសំខាន់មួយនេះមកជាមួយផងដែរ។ លោកថែមទាំងបានជួយស្ត្រីកម្ពុជាចំនួន3រូបដែលទទួលបានការប្រឹក្សាយោបល់ពីគម្រោងរបស់ Wedu ឱ្យមានការផ្លាស់ប្តូរពីបុគ្គលធម្មតា និងមានភាពខ្មាសអៀនច្រើនឱ្យក្លាយជានិស្សិតដែលទទួលបានអាហារូបករណ៍ទៅសិក្សានៅសាកលវិទ្យាល័យល្បីៗទាំងក្នុង និងក្រៅប្រទេស។

លោក Mario បានថ្លែងថា កម្មវិធី Wedu ត្រូវបានបង្កើតឡើងដើម្បីជួយយុវជនដែលជាស្ត្រីនៅអាស៊ីក្នុងការពង្រឹងសមត្ថភាពនៃភាពជាអ្នកដឹកនាំសម្រាប់រួមចំណែកជួយដឹកនាំសង្គមរបស់ពួកគេ។ ហេតុផលដែលត្រូវជ្រើសរើសយកស្ត្រីនៅអាស៊ី ព្រោះលោកបានស្រាវជ្រាវឃើញថា សមត្ថភាពនៃភាពជាអ្នកដឹកនាំរបស់ស្ត្រីនៅអាស៊ីនៅមានកម្រិតនៅឡើយ ហើយចំនួនស្ត្រីនៅក្នុងស្ថាប័នដឹកនាំក៏មានចំនួនតិចតួចបើប្រៀបធៀប នឹងបណ្តាប្រទេសនៅអឺរ៉ុប ឬនៅសហរដ្ឋអាមេរិកជាដើម។

លោក Marrio Ferro មានប្រសាសន៍ថា៖ «ខ្ញុំចង់ឃើញស្ត្រីនៅកម្ពុជាមានភាពជាអ្នកដឹកនាំដើម្បីផ្លាស់ប្តូរសង្គមរបស់គាត់ឱ្យកាន់តែប្រសើរឡើង»។

ស្ថាបនិកអង្គការដែលជួយដល់យុវជនជាលក្ខណៈអន្តរជាតិរូបនេះ បានបង្ហាញថា រហូតមកដល់ពេលបច្ចុប្បន្ន គម្រោងរបស់ Wedu មានអ្នកជំនាញជាច្រើននៅលើពិភពលោកដែលមានអាជីពផ្សេងៗគ្នាបានចុះឈ្មោះធ្វើជាអ្នកប្រឹក្សាយោបល់ )Mentor) ដើម្បីជួយជាគំនិតដល់បណ្តាស្ត្រីនៅអាស៊ីឱ្យបានយល់ដឹងពីការធ្វើការងារ និងវិធីសាស្ត្រ ក្នុងការគិតដែលមានលក្ខណៈជាសកល។ លោកបានបន្តថា យុវជនដែលចង់សិក្សាលើគ្រប់ផ្នែក នឹងទទួលបានការប្រឹក្សាយោបល់ពីអ្នកជំនាញលើអាជីពដែលគេកំពុងសិក្សានោះ៕

October 11, 2017

ក្រសួងការងារ កំពុងសាងកម្លាំងពលកម្ម ដើម្បីអាចទៅប្រកួតប្រជែងជាមួយប្រទេសក្នុងតំបន់

ភ្នំពេញ – ដើម្បីកសាងកម្លាំងជំនាញ និងឱ្យស្របទៅតាមទីផ្សារការងារ ថ្មីៗនេះកម្ពុជាបានដាក់ចេញនូវគោលនយោបាយជាតិ ស្តីពីការអប់រំ និងបណ្តុះបណ្តាលវិជ្ជាជីវៈ ឆ្នាំ2017-2025 ធ្វើយ៉ាងណាឱ្យកម្ពុជាអាចមានកម្លាំងពលកម្មជំនាញតម្រូវទៅតាមទីផ្សារការងារ។

សម្ដេចអគ្គមហាសេនាបតីតេជោ ហ៊ុន សែន បានលើកឡើងថា ការបង្កើតគោលនយោបាយជាតិស្ដីពីការអប់រំបណ្ដុះបណ្ដាលវិជ្ជាជីវៈថ្នាក់ជាតិ 2017-2025 គឺជាដំណើរការនៃការកសាងកម្លាំងជំនាញឱ្យមានសមត្ថភាព និងលទ្ធភាពអាចប្រើប្រាស់បច្ចេកវិទ្យាកម្រិតខ្ពស់ ដែលជាកាតព្វកិច្ចដ៏សំខាន់ដើម្បីឈានទៅដល់ការអភិវឌ្ឍកំណើនសេដ្ឋកិច្ច និងស្ថិរភាពសង្គមប្រកបដោយចីរភាព។

ជាមួយគ្នានេះសម្ដេច ហ៊ុន សែន បញ្ជាក់ថា ដើម្បីធានាឱ្យគោលនយោបាយស្ដីពីការអប់រំបណ្ដុះបណ្ដាលបច្ចេកទេស 2017-2025 អនុវត្ដឱ្យកាន់តែមានប្រសិទ្ធភាព ត្រូវបន្ដពង្រឹងការអប់រំ បណ្ដុះបណ្ដាលបច្ចេកទេស និងវិជ្ជាជីវៈ ដោយបន្ដអនុវត្ដប្រព័ន្ធធានាគុណភាព ពង្រឹងគរុកោសល្យ និងបច្ចេកទេសរបស់គ្រូបណ្ដុះបណ្ដាលហេដ្ឋារចនាសម្ព័ន្ធ រួមទាំងធនធានមូលដ្ឋានសម្រាប់រៀន និងបង្រៀន ដោយឆ្លើយតបការអភិវឌ្ឍបច្ចេកវិទ្យាថ្មីសម្រាប់តម្រូវការទីផ្សារការងារ។

ឯកឧត្ដម អ៊ិត សំហេង រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈបានលើកឡើងថា ការបង្កើតគោលនយោបាយនេះបានបង្ហាញពីភាពចាំបាច់នៃការបង្កើតយុទ្ធសាស្ដ្រនៃការអប់រំ បណ្ដុះបណ្ដាលបច្ចេកទេស និងវិជ្ជាជីវៈដល់កម្លាំងពលកម្មធ្វើយ៉ាងណាឱ្យឆ្លើយតបទៅនឹងទីផ្សារការងារ។ ពិសេសវាបានរួមចំណែកក្នុងការអភិវឌ្ឍដល់វិស័យឧស្សាហកម្មបង្កើតការងារ និងធានាបានគុណភាពផលិតភាពខ្ពស់របស់កម្លាំងពលកម្មដែលអាចប្រកួតប្រជែងកាន់តែប្រសើរជាងមុនជាមួយបណ្ដាប្រទេសក្នុងតំបន់។ ក្នុងនោះឯកឧត្ដមបន្ដថា ក្នុងបរិបទនៃការប្រកួតប្រជែងឥតឈប់ឈរ និងស្វែងរកឧត្ដមភាព ទាមទារឱ្យកម្ពុជាកាន់តែប្រឹងប្រែងបង្កើនគុណភាពក្នុងផលិតផល និងសេវាកម្មរបស់ខ្លួនឱ្យបានកម្រិតអតិបរមា៕

October 11, 2017

កម្ពុជាទទួលបានទឹកប្រាក់ 7.5លានដុល្លារ សម្រាប់ពង្រឹងសុវត្ថិភាពម្ហូបអាហារ

ភ្នំពេញ៖ ដើម្បីអភិវឌ្ឍផលិតកម្ម និងសេវាកម្ម និងការពង្រឹងសុវត្ថិភាពម្ហូបអាហារឱ្យកាន់តែប្រសើរឡើង កម្ពុជាទទួលបានជំនួយឥតសំណងប្រមាណជា 7.5 លានដុល្លារ ពីគម្រោងកម្មវិធីពង្រឹងក្របខ័ណ្ឌសមាហរណកម្ម (EIF) របស់អង្គការពាណិជ្ជកម្មពិភពលោក។

ថ្លែងក្នុងកិច្ចប្រជុំ ក្រុមប្រឹក្សាភិបាលនៃកម្មវិធីពង្រឹងក្របខ័ណ្ឌសមាហរណកម្ម (EIF) លើកទី25 ដោយមានការចូលរួមពីតំណាងឯកអគ្គរដ្ឋទូតអ៊ឺរ៉ុប និងតំណាងបេសកកម្មអចិន្ត្រៃយ៍អង្គការពាណិជ្ជកម្មពិភពលោក (WTO) នៅឯខេត្តសៀមរាប នៅថ្ងៃទី11 ខែតុលានេះ ឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មបានឱ្យដឹងថា កម្មវិធី EIF ដែលអនុវត្តនៅក្នុងប្រទេសកម្ពុជា មានទឹកប្រាក់ឥតសំណងសរុប7.5លានដុល្លារ ហើយបានធ្វើការលើគម្រោងធំៗរួមមានការអភិវឌ្ឍផលិតផល និងសេវាកម្ម ការសម្របសម្រួល និងជំរុញនាំចេញ និងការពង្រឹងហេដ្ឋារចនាសម្ព័ន្ធ, សុវត្ថិភាពម្ហូបអាហារ និងភូតគាមអនាម័យ។

ឯកឧត្តមមានប្រសាសន៍ថា “តាមរយៈជំនួយនេះ កម្ពុជាអាចបន្តដើរតួជាប្រទេសជោគជ័យមួយសម្រាប់កម្មវិធី EIF នៅលើពិភពលោក។ យុទ្ធសាស្ត្រDTIS មិនត្រឹមតែបម្រើដល់ការរៀបចំវិស័យសំខាន់ៗប៉ុណ្ណោះទេ ប៉ុន្តែថែមទាំងកំណត់ពីចំណុចខ្វះខាតសមត្ថភាព ទាំងនៅកម្រិតស្ថាប័ន និងធនធានមនុស្ស ដើម្បីបម្រើការអភិវឌ្ឍវិស័យពាណិជ្ជកម្ម។

បន្ថែមលើនេះ ឯកឧត្តមរដ្ឋមន្ត្រីក៏បានស្នើដល់ក្រុមប្រឹក្សាEIF បន្តជួយប្រទេសកម្ពុជា និងប្រទេសអភិវឌ្ឍន៍តិចតួច (LDCs) ឆ្ពោះទៅសម្រេចគោលដៅអភិវឌ្ឍន៍ទាំងឡាយ ដើម្បីធានានិរន្តរភាពលទ្ធផលក្នុងរយៈពេលយូរអង្វែងដែលនឹងជួយឱ្យកម្ពុជាអាចសម្រេចបាននិរន្តរភាពកំណើនសេដ្ឋកិច្ច និងការកាត់បន្ថយភាពក្រីក្រ។
ឯកឧត្តម ចច អេតហ្គា ឯកអគ្គរដ្ឋទូតអឺរ៉ុបប្រចាំនៅកម្ពុជាបានលើកឡើងពីសារៈសំខាន់នៃជំនួយសម្រាប់ពាណិជ្ជកម្ម (AfT) ដើម្បីធានានិរន្តរភាពសេដ្ឋកិច្ច និងកាត់បន្ថយភាពក្រីក្រនៅតាមប្រទេស LDCs ហើយចាប់តាំងពីឆ្នាំ2007 ដល់2015 សហគមន៍អឺរ៉ុប និងរដ្ឋសមាជិក បានផ្តល់ AfTដល់ប្រទេស LDCs ចំនួន 96,8 ប៊ីលានអឺរ៉ូ ដែលចំនួននេះស្មើនឹង 1/3 នៃទឹកប្រាក់ AfTពិភពលោក។ លើសពីនេះ សហគមន៍អឺរ៉ុបក៏បានអនុញ្ញាតឱ្យប្រទេស LDCs ចំនួន 47 រួមទាំងកម្ពុជាអាចនាំចេញទំនិញទៅកាន់ទីផ្សារអឺរ៉ុបក្រោមប្រព័ន្ធអនុគ្រោះពន្ធ “អ្វីគ្រប់យ៉ាងលើកលែងតែអាវុធ (EBA)” ចាប់តាំងពីឆ្នាំ 2001មក។

សម្រាប់ប្រទេសកម្ពុជា ឯកឧត្តម ឯកអគ្គរដ្ឋទូត បានគូសបញ្ជាក់ថា សហគមន៍អឺរ៉ុប បានផ្តល់ AfTដើម្បីគាំទ្រចំពោះវិស័យសំខាន់ៗចំនួន 5 ដូចបានកំណត់នៅក្នុង DTIS គឺ៖ អង្ករ សូត្រប្រណីត ដំឡូងមី ជលផលសមុទ្រ និងបដិសណ្ឋារកិច្ច ហើយទន្ទឹមគ្នាសហគមន៍អឺរ៉ុប នឹងបន្តជួយអភិវឌ្ឍសង្គមសេដ្ឋកិច្ចកម្ពុជា និងប្រទេសជាសមាជិក EIF តាមរយៈវិស័យពាណិជ្ជកម្មផងដែរ។

ទន្ទឹមគ្នានេះ ឯកឧត្តម អ៊ីឡយ ឡាអ៊ូរូ ប្រធានក្រុមប្រឹក្សាភិបាលកម្មវិធី EIF និងជាតំណាងបេសកកម្មអចិន្ត្រៃយ៍ប្រទេសបេនីន ប្រចាំអង្គការពាណិជ្ជកម្មពិភពលោក (WTO) បានទទួលស្គាល់ថា កម្ពុជាគឺជាប្រទេស (EIF) ដែលទទួលបានជោគជ័យខ្លាំង ក្នុងការប្រើប្រាស់របៀបវារៈពាណិជ្ជកម្មដើម្បីពន្លឿនកំណើនសេដ្ឋកិច្ច និងកាត់បន្ថយភាពក្រីក្រ ដែលជាលទ្ធផលចាកចេញពីប្រទេសដែលមាន “ប្រាក់មានចំណូលទាប” ទៅជាប្រទេសដែលមាន “ប្រាក់ចំណូលមធ្យមកម្រិតទាប” ដោយជោគជ័យ។ ហើយក្រុមប្រឹក្សា EIF មកទីនេះ ក្នុងគោលបំណងរៀនសូត្រអំពីភាពជោគជ័យរបស់កម្ពុជា ដើម្បីចែករំលែកជូនប្រទេសដែលជាសមាជិក EIF ផ្សេងៗលើពិភពលោក។

ឯកឧត្តម អ៊ីឡយ បានបន្តទៀតថា ក្រុមប្រឹក្សា EIF ក៏នឹងធ្វើការពិភាក្សាស្វែងរកវិធីសាស្ត្រនានាដើម្បីជួយគាំទ្រប្រទេស LDCs នៅឯកិច្ចប្រជុំថ្នាក់រដ្ឋមន្ត្រី នៃអង្គការ WTO លើកទី11 ដែលនឹងរៀបចំឡើងនៅក្នុងទីក្រុងប៊ុយណូហ្ស៊ែរ ប្រទេសអាហ្សង់ទីន ដើម្បីធ្វើសមាហរណកម្មចូលទៅក្នុងប្រព័ន្ធពាណិជ្ជកម្មសកល និងទាញយកអត្ថប្រយោជន៍អតិបរិមាពីប្រព័ន្ធអនុគ្រោះពន្ធ និងការចូលទីផ្សារថ្មីៗ សំដៅកាត់បន្ថយភាពក្រីក្រ និងសម្រេចគោលដៅសហសវត្សរ៍ប្រកបដោយចីរភាព៕

October 11, 2017

Author: វល័ក្ខ