វល័ក្ខ - La Reine Media

អាហាររបស់អ្នកមានផ្ទៃពោះ 9 ខែ… គួរ និងមិនគួរទទួលទានអ្វីខ្លះ?

អំឡុងពេលប្រសូតកាន់តែខិតចូលមកជិតហើយ ស្ត្រីមានផ្ទៃពោះជិតប្រសូតគួរបណ្តោយផ្លូវចិត្តឱ្យធូរស្រាល ព្រោះមិនប៉ុន្មានថ្ងៃទៀតទេ នឹងបានឃើញមុខកូនតូចជាទីស្រឡាញ់ហើយ តែទោះជាផ្លូវចិត្តនឹងធូរស្រាលក៏ដោយ ក៏ផ្ទៃរបស់អនាគតអ្នកម្តាយនៅត្រូវទ្រាំទ្រនឹងទម្ងន់ខ្លួនរបស់កូនដែលធំប៉ុនផ្លែឪឡឹកដដែល ដូច្នេះរឿងការទទួលទានអាហារក៏អាចនឹងធ្វើឱ្យស្ត្រីមានគភ៌តឹងតែងក្បាលពោះបានដែរ ដូច្នេះស្ត្រីមានគភ៌គួរជ្រើសរើសទទួលទានតែអាហារដែលល្អ និងចាំបាច់ដល់រាងកាយតែប៉ុណ្ណោះ។

អាយុគភ៌ 9ខែ អាហារដែលគួរទទួលទានដើម្បីបំប៉នគភ៌មានដូចខាងក្រោមនេះ៖

1. ធញ្ញជាតិ និងធញ្ញជាតិដែលមិនសម្រិតសម្រាំងពណ៌ ឬនំប៉័ង៖ បែងជាពេលទទួលទានតូចៗ 6-11ពេលក្នុងមួយថ្ងៃ។

2. ផ្លែឈើ ៖ 2-4ដងក្នុងមួយថ្ងៃ។

3. បន្លែ ៖ ច្រើនជាង4ដងក្នុងមួយថ្ងៃ។

4. ផលិតផលធ្វើពីទឹកដោះ ៖ ប្រមាណ4ដងក្នុងមួយថ្ងៃ។

5. អាហារដែលសម្បូរដោយវីតាមីន ៖ ទទួលទាន3ដងក្នុងមួយថ្ងៃ។

6. ខាបូហាយដ្រេត ៖ បែងជាពេលទទួលទានតូចៗយ៉ាងតិច3-4ដងក្នុងមួយថ្ងៃ។

7. ទឹកត្រជាក់ ៖ យ៉ាងតិចមួយថ្ងៃ1លិត្រ។

អាយុគភ៌9ខែ អាហារដែលគួរចៀសវាង និងមិនគួរទទួលទាន៖

1. កាហ្វេ ៖ ក្នុងត្រីមាសទី3 ស្ត្រីមានគភ៌ភាគច្រើនតែងតែមាន អាការគេងមិនលក់ស្រាប់ទៅហើយ អាចដោយសារតែអ័រម៉ូន និងក្តីកង្វល់រឿងទារក និងការប្រសូត ទើបធ្វើឱ្យគេងមិនលក់ បើទទួលទានកាហ្វេ ឬភេសជ្ជៈដែលមានជាតិកាហ្វេអីុនចូលទៅទៀតអាច ធ្វើឱ្យមានអាការគេងមិនលក់កាន់តែខ្លាំងឡើង។ ដូច្នេះស្ត្រីមានគភ៌ដែលចូលចិត្តទទួលទានកាហ្វេ មិនគួរទទួលទានលើសពី1កែវក្នុងមួយថ្ងៃឡើយ។

2. អាហារសមុទ្រខ្លះមានសារធាតុបារ៉ត ៖ អាហារទាំងនេះនឹងធ្វើឱ្យប្រព័ន្ធប្រសាទ និងខួរក្បាលរបស់កូនតូចក្នុងផ្ទៃត្រូវបំផ្លាញ។

3. ស៊ុតឆៅ ៖ ស៊ុតស្ទើរឆៅ ស្ទើរឆ្អិនអាចមានមេរោគបាក់តេរី ដែលជាមូលហេតុធ្វើឱ្យស្ត្រីមានគភ៌មានអាការពុលអាហារ។

4. ការជក់បារី និង ការទទួលទានទឹកភេសជ្ជៈដែលមានជាតិអាល់កុល ៖ វត្ថុ2នេះអាចធ្វើឱ្យស្ត្រីមានគភ៌មានសភាវប្រថុយនឹងការប្រសូតមុនកំណត់ និងអាចបំផ្លាញប្រព័ន្ធប្រសាទ និងខួរក្បាលរបស់កូនតូច។

ក្នុងអំឡុងខែចុងក្រោយនេះស្ត្រីមានគភ៌អាចបន្ថែមដោយជាតិកាល់ស្យូម និងធាតុដែកឱ្យច្រើនជាពិសេស និងក្រោយប្រសូតក៏គួរទទួលទានជាតិកាល់ស្យូម និងធាតុដែកប្រមាណជា3ខែទៀតដែរ ជាពិសេសស្ត្រីដែលត្រូវបំបៅដោះកូន។

ពេលនេះទារកក្នុងគភ៌ល្អពេញលេញឥតខ្ចោះហើយ ត្រៀមរួចជាស្រេចក្នុងការប្រសូតចេញមកគ្រប់ពេលវេលា ស្ត្រីមានគភ៌ត្រូវជ្រើសរើសទទួល ទានអាហារឱ្យច្រើនឡើង ទទួលទានឱ្យទទួល បានគុណប្រយោជន៍ច្រើនបំផុត និងមិនគួរបណ្តោយឱ្យទម្ងន់ខ្លួនកើនឡើងខ្លាំងជ្រុលពេកទេ ព្រោះក្នុងខែនេះស្ត្រីមានគភ៌ជាច្រើននាក់ច្រើនតែមានទម្ងន់ខ្លួនស្ទុះឡើងខ្លាំងបំផុត ប្រព័ន្ធរំលាយអាហារក៏ធ្វើការយឺត ហើយដែលសំខាន់គួរជ្រើសរើសទទួលទានអាហារដែលផ្តល់កម្លាំងថាមពលខ្ពស់ ព្រោះនឹងបានមានកម្លាំងប្រសូតបុត្រនៅពេលថ្ងៃប្រសូតមកដល់៕

October 14, 2017

កូរ៉េបណ្តាក់ទុន 600លានដុល្លារធ្វើរោងចក្រដំឡើងរថយន្តនៅស្រុកខ្មែរ

ក្នុងការចូលរួមលើកម្ពស់សេដ្ឋកិច្ច ក៏ដូចជាការចូលរួមផ្តល់ការងារដល់ពលរដ្ឋខ្មែរ ក្រុមវិនិយោគិនកូរ៉េ បានបោះទុនវិនិយោគក្នុងទឹកប្រាក់ប្រមាណជា 600លានដុល្លារអាមេរិកសម្រាប់បង្កើតរោងចក្រផលិតសម្លៀកបំពាក់ និងដំឡើងរថយន្ត (Hyundai) នៅកម្ពុជា។

គម្រោងនេះបានលើកមកពិភាក្សា ក្នុងជំនួបរវាងឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្ម ជាមួយឯកឧត្តម Chan byoung Wan ប្រធានគណៈកម្មាធិការផ្នែកពាណិជ្ជកម្ម ឧស្សាហកម្ម ថាមពល សហគ្រាសធុនតូច និងមធ្យម និងវិនិយោគរបស់សាធារណរដ្ឋកូរ៉េ នៅឯក្រុងសេអ៊ូល ប្រទេសកូរ៉េ ក្នុងន័យពង្រឹងចំណងកិច្ចសហប្រតិបត្តិការរវាងប្រទេសទាំងពីរបន្ថែមទៀត លើវិស័យឧស្សាហកម្ម និងពាណិជ្ជកម្មរបស់កូរ៉េមកកម្ពុជា ឱ្យបានទំហំ 1ពាន់លានដុល្លារនាឆ្នាំខាងមុខ។

ឯកឧត្តមទេសរដ្ឋមន្ត្រីបានរំលឹកថា កន្លងមកការវិនិយោគរបស់កូរ៉េមកកម្ពុជា មានទំហំទឹកប្រាក់ចំនួន 600លានដុល្លារអាមេរិក លើវិស័យផលិតសម្លៀកបំពាក់ និងដំឡើងរថយន្ត(Hyundai)។ ជាមួយគ្នានេះ ឯកឧត្តមបានស្នើឱ្យភាគីកូរ៉េ ចាប់អារម្មណ៍វិនិយោគបន្ថែមទៀត ផ្នែកឧប្បករណ៍អេឡិចត្រូនិច និងបរិក្ខាអគ្គិសនី ជាដើម ដោយសារកម្ពុជាមានលក្ខណៈអំណោយផល និងឱកាសវិនិយោគដ៏ប្រសើរ មានសុខសន្តិភាព និងភាពអនុគ្រោះពាណិជ្ជកម្ម ដែលកម្ពុជាទទួលបានពីប្រទេសអភិវឌ្ឍ និងជាប្រទេសដៃគូផ្សេង អនុញ្ញាតឱ្យទំនិញរាប់ពាន់មុខពីកម្ពុជា នាំចេញដោយរួចពន្ធនិងមិនជាប់កូតា រួមទាំងនាំចេញទៅប្រទេសកូរ៉េផងដែរ ។

ឯកឧត្តម Chan byoung Wan បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ ហើយកម្ពុជា-កូរ៉េ នឹងខិតខំពង្រឹងពង្រីកកិច្ចសហប្រតិបត្តិការល្អនេះបន្ថែមទៀត និងមានច្រើនវិស័យដូចជា៖ថាមពលកកើតឡើងវិញ ប្រព័ន្ធហេដ្ឋារចនាសម្ព័ន្ធ កិច្ចសហការលើជំនាញបច្ចេកទេស ការបង្កើតសួនឧស្សាហកម្ម និងបច្ចេកវិទ្យា ជាពិសេសការអភិវឌ្ឍន៍វិស័យសហគ្រាសធុនតូច និងមធ្យម ដែលភាគីកូរ៉េចាត់ទុកជាអាទិភាពសម្រាប់គាំទ្រ ឧស្សាហកម្ម ធន់ស្រាល និងធ្ងន់ និងជាសរសៃឈាមចូលរួមអភិវឌ្ឍសេដ្ឋកិច្ចជាតិផងដែរ ។

ជាការកត់សំគាល់ កំណើនទេសចរណ៍ជនជាតិកូរ៉េមកកម្ពុជា មានការកើនឡើងដែលឆ្នាំកន្លងទៅមានចំនួន 4សែននាក់ ដែលធ្វើឱ្យជើងហោះហើរដោយផ្ទាល់ពីកូរ៉េមកកម្ពុជា មានចំនួន35ជើងក្នុងមួយសប្តាហ៍។ ដោយឡែកពលករកម្ពុជាទៅធ្វើការនៅប្រទេសកូរ៉េ ប្រមាណជិត 8ម៉ឺននាក់ ដែលជាសក្តានុពលមួយ ពីព្រោះពួកគេបានទទួលបទពិសោធន៍ ចំណេះដឹង និងការអនុវត្តន៍ផ្ទាល់ នឹងក្លាយជាកម្លាំងចូលរួមយ៉ាងសំខាន់ ក្រោយពួកគេត្រឡប់មកកម្ពុជាវិញ ដែលអាចចូលរួមបម្រើការងារនៅក្រុមហ៊ុន កូរ៉េ នៅកម្ពុជា នាពេលអនាគតបន្តបន្ទាប់៕

October 13, 2017

USAID ផ្តល់ 3លានដុល្លារសម្រាប់គម្រោងទឹកស្អាត និងអនាម័យនៅកម្ពុជា

ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) បានប្រកាសផ្តល់ជំនួយ 3លានដុល្លារអាមេរិកដល់កម្ពុជា ដើម្បីជួយកសាងសមត្ថភាពនៃការផ្គត់ផ្គង់ទឹក និងសេវាអនាម័យ ក្នុងការបង្កើនលទ្ធភាពប្រើប្រាស់ទឹកដល់ជនបទ។

គម្រោងផ្តួចផ្តើមថ្មីមួយដែលមានឈ្មោះថា WASH-FIN Cambodia នឹងត្រូវអនុវត្តរយៈពេល 3 ឆ្នាំចាប់ពី ខែតុលា ឆ្នាំ2017 ហើយប្រតិបត្តិករទឹកឯកជន នឹងទទួលបានអត្ថប្រយោជន៍ពីគំនិតផ្តួចផ្តើមនេះ តាមរយៈការកសាងសមត្ថភាពចំណេះដឹង និងផែនការមេសម្រាប់ការកសាងអាងស្តុប និងការតភ្ជាប់ទុយោដល់គ្រួសារប្រជាពលរដ្ឋតាមជនបទ ដែលនេះជាការលើកឡើងរបស់ទីប្រឹក្សាគម្រោង។

លោក មិន មុន្នី មន្ត្រីទីប្រឹក្សាគម្រោងរបស់ USAID មានប្រសាសន៍ថា «ថវិកានេះនឹងត្រូវបានប្រើប្រាស់ ដើម្បីពង្រឹងសមត្ថភាពអ្នកប្រតិបត្តិការទឹកឯកជន នៅតាមតំបន់ជនបទដែលគ្មានលទ្ធភាពទទួលបានការផ្គត់ផ្គង់ទឹករបស់រដ្ឋ»។ តាមរយៈគម្រោងនេះ ប្រតិបត្តិករផ្គត់ផ្គង់ទឹកនៅក្នុងតំបន់គោលដៅ នឹងអាចមានសមត្ថភាពពេញលេញ តាមរយៈការបណ្តុះបណ្តាលដែលទីភ្នាក់ងារ USAID បានផ្តល់ឱ្យលើសេវាកម្មផ្គត់ផ្គង់ទឹក និងអនាម័យដល់ប្រជាជននៅតាមជនបទ។ លោកបន្ថែមថា ប្រតិបត្តិករទាំងនោះក៏អាចស្នើសុំប្រាក់កម្ចីពីធនាគារ និងគ្រឹះស្ថានមីក្រូហិរញ្ញវត្ថុ ដើម្បីទទួលបានសេវាហិរញ្ញវត្ថុ សម្រាប់ពង្រីកអាជីវកម្មរបស់ខ្លួនថែមទៀត។

គូរបញ្ជាក់ថាគោលបំណងចំបងនៃគម្រោង WASH-FIN Cambodia គឺគាំទ្រដល់ប្រតិបត្តិករទឹកឯកជន ឱ្យទទួលបានប្រាក់ដែលពួកគេត្រូវការ ដើម្បីពង្រីកនិងកែលម្អលទ្ធភាពទទួលបានទឹកនិងអនាម័យនិងសេវាកម្ម។ ហើយវានឹងផ្តល់ជំនួយបច្ចេកទេស និងជួយពង្រឹងប្រតិបត្តិករទឹកឯកជននៅតាមខេត្ដជាច្រើន, ស្ថាប័នមីក្រូហិរញ្ញវត្ថុក្នុងស្រុក និងតួអង្គផ្សេងៗទៀតក្នុងវិស័យទឹកនិងអនាម័យ។ ហើយក៏ជួយគាំទ្រដល់ការប្រើប្រាស់ឥណទានបន្ថែម ដែលមានដូចជាមូលនិធិឥណទានអភិវឌ្ឍន៍របស់ USAID ដើម្បីបង្កើនឱកាសបន្ថែមទៀតសម្រាប់ហិរញ្ញវត្ថុ ពាណិជ្ជកម្ម។

លោកស្រី Polly Dunford នាយកបេសកកម្ម USAID ប្រចាំនៅកម្ពុជា មានប្រសាសន៍ថា “ទីភ្នាក់ងារ USAID មានមោទនភាពក្នុងការលើកទឹកចិត្តដល់វិស័យឯកជន ក្នុងការផ្តល់កម្ចីដល់វិស័យ WASH របស់ប្រទេសកម្ពុជា” ។ «ទឹកស្អាតនិងអនាម័យស្អាត គឺជាកត្តាសំខាន់ចំពោះសហគមន៍ ហើយយើងជឿជាក់ថា វានឹងជួយដល់កំណើនសេដ្ឋកិច្ចដ៏ធំធេងរបស់ប្រទេសកម្ពុជា ក៏ដូចជាសុខភាពប្រជាពលរដ្ឋរបស់ខ្លួនផងដែរ»។

លោក ហោ ឃីកេង នាយកប្រតិបត្តិនៃសមាគមផ្គត់ផ្គង់ទឹកកម្ពុជា (CWA) បានមានប្រសាសន៍ថា ប្រតិបត្តិករទឹកឯកជននឹងអាចពង្រីកសមត្ថភាពរបស់ខ្លួន ក្នុងការផ្គត់ផ្គង់ទឹកស្អាតដល់ប្រជាពលរដ្ឋឱ្យបានទូលំទូលាយ ពីព្រោះឥឡូវនេះមានចំនួនសេវាទឹកស្អាត និងប្រតិបត្តិករទឹកឯកជននៅតាមតំបន់ជនបទ។ លោកមានប្រសាសន៍ថា «ខ្ញុំជឿជាក់ថាក្រោមការផ្តួចផ្តើមនេះប្រតិបត្តិករទឹកឯកជននៅតំបន់ជនបទ នឹងកសាងសមត្ថភាពរបស់ពួកគេ ក្នុងការកែលំអរទឹក ជាពិសេសពួកគេអាចមានលទ្ធភាពទទួលបានសេវាហិរញ្ញវត្ថុ ដើម្បីពង្រីកប្រតិបត្តិការរបស់ខ្លួន” ៕

October 13, 2017

ហេតុអ្វីក្មេងត្រូវអានសៀវភៅសម្រាប់កុមារ?

ក្មេងៗជាអនាគតធនធានមនុស្សយ៉ាងសំខាន់របស់សង្គម ហើយនៅពេលដែលក្មេងតូចត្រូវបានអភិវឌ្ឍបានល្អ ពួកគេនឹងអាចក្លាយជាមនុស្សដែលពោរពេញទៅដោយសមត្ថភាពលើគ្រប់ផ្នែក ឬអាចក្លាយជាសម្រេចក្តីស្រមៃឪពុកម្តាយបានយ៉ាងល្អបំផុត។

ដើម្បីអភិវឌ្ឍសមត្ថភាពក្មេង ការអាន ជាគន្លឹះសំខាន់មួយដែលមិនអាចខ្វះបានសម្រាប់ពួកគេ ព្រោះថានៅពេលដែលពួកគេចាប់ផ្តើមចេះអាន ឬចូលចិត្តអាន ពួកគេនឹងអាចទទួលបាននូវប្រយោជន៍ជាច្រើនពីតម្លៃអប់រំនៃមេរៀននោះ។

កញ្ញា ហ៊ីង ស្រីរ័ត្ន អ្នកនិពន្ធសៀវភៅកុមារសម្រាប់គ្រឹះស្ថានបោះពុម្ពផ្សាយមួយចំនួននៅកម្ពុជា បាន ប្រាប់ថា កុមារមានគំនិតប្លែកខុសពី មនុស្សធំ ហើយពេលខ្លះការដោះស្រាយបញ្ហាបែបកុមារអាចធ្វើឱ្យមនុស្សធំមានការភ្ញាក់ផ្អើល។ ការតែងនិពន្ធសៀវភៅរឿងសម្រាប់កុមារគឺត្រូវទាមទារឱ្យមានដំណោះស្រាយបញ្ហាដែលត្រូវបានបង្កើតឡើងដោយអ្នកនិពន្ធ តែពេលខ្លះអ្នកនិពន្ធមិនអាចឆ្លើយបានល្អបំផុតនោះទេសម្រាប់ការបញ្ចប់រឿងរបស់ខ្លួន។ ហេតុនេះអ្នកនិពន្ធត្រូវចូលទៅជិតកុមារបំផុតដើម្បីធ្វើការសាកសួរ ហើយដកស្រង់យកគំនិតដែលប្លែក ឬល្អបំផុតដែលខ្លួននឹកស្មានមិនដល់ដើម្បីអប់រំដល់កុមារជាច្រើនផ្សេងទៀតដែលបានអាន។

កញ្ញា ស្រីរ័ត្ន បាននិយាយថា៖ “នៅពេលដែលកុមាររីករាយជាមួយនឹងការ អាន និងចេះវិធីសាស្ត្រដោះស្រាយបញ្ហាបានល្អ ពួកគេនឹងយកសកម្មភាពទាំងអស់នេះទៅអនុវត្តក្នុងការរស់នៅរបស់គេ ដែលធ្វើឱ្យពួកគេចេះដោះស្រាយបញ្ហាបានល្អបំផុត ឬដកស្រង់គំនិតទាំងអស់នេះជាមូលដ្ឋានដើម្បីបង្កើតដំណោះស្រាយថ្មីៗប្រកបដោយភាពឆ្លាតវៃ ដែលគ្រប់គ្នា នឹកស្មានមិនដល់»។

បើតាមអ្នកនិពន្ធវ័យក្មេងខាងលើ ការ បណ្តុះ គំនិតច្នៃប្រឌិត និងភាពវៃឆ្លាតរបស់ កុមារកម្ពុជា ជាការកសាងគ្រឹះមួយយ៉ាងរឹងមាំសម្រាប់អនាគតរបស់យុវជននៅក្នុងសង្គម។

ស្រដៀងគ្នានេះដែរ លោក ឈូ ជីនិត អ្នកនិពន្ធសៀវភៅកុមារបានលើកឡើងថា សៀវភៅអប់រំសម្រាប់កុមារមានគុណតម្លៃខ្ពស់ដើម្បីបណ្តុះផ្នត់គំនិត និងចរិតលក្ខណៈឱ្យកុមារចេះយល់ដឹងដោយខ្លួនឯងនូវទង្វើទាំងឡាយណាដែលគួរធ្វើ និងទង្វើទាំងឡាយណាដែលមិនគួរធ្វើ។ ជាធម្មតាកុមារៗដែលចូលចិត្តអានសៀវភៅ គឺជាកុមារក្លាហាន និងមានភាពវៃឆ្លាតជាងកុមារដែលមិនចូលចិត្តអាន។ គំនិតរបស់កុមារដែលធ្លាប់បានអានមានលក្ខណៈទូលំទូលាយ និងមានទម្លាប់ល្អជាងកុមារដែលមិនចូលចិត្តអានសៀវភៅ៕

October 13, 2017

ស្មាតហ្វូនកាមេរ៉ា 4 របស់ Huawei បង្ហាញខ្លួនលើកដំបូងនៅកម្ពុជា តម្លៃត្រឹមតែ 329 ដុល្លារ

ភ្នំពេញ៖ ទីបំផុតក្រុមហ៊ុនស្មាតហ្វូនលំដាប់ពិភពលោក Huawei ប្រចាំកម្ពុជា ដាក់បង្ហាញវត្តមាន និងឲ្យប្រើប្រាស់សាកល្បងនូវស្មាតហ្វូនស៊េរីថ្មី កាមេរ៉ា 4 nova 2i លើកដំបូងក្នុងពិធីជំនួប បណ្តាញប្រព័ន្ធផ្សព្វផ្សាយ និងតារាល្បីៗ នៅថ្ងៃទី 12 ខែតុលា ឆ្នាំ 2017។

កម្មវិធីនេះ ធ្វើឡើងនៅក្នុងទីស្នាក់ការ ក្រុមហ៊ុន Huawei ផ្ទាល់ជាមួយនឹងភ្ញៀវកិត្តិយស អ្នកសារព័ត៌មាន និងតារាល្បីៗ សរុបប្រមាណជាង 20នាក់។ មានវត្តមានជាភ្ញៀវកិត្តិយសនៃកម្មវិធីដ៏វិសេសនេះ តារាសម្តែង និងបង្ហាញម៉ូដល្បីឈ្មោះ កញ្ញា ភី យ៉ា វេកា និង មុន្នី រត្ន័ លើកសរសើរមិនដាច់ពីមាត់ ពីរូបរាងពិតរបស់ស្មាតហ្វូន ស៊េរីថ្មី Huawei nova 2i ថា “រាងស្អាត អេក្រង់ធំពេញភ្នែក ថតរូបច្បាស់ស្អាតទាំងមុខក្រោយ ពិតជាល្បីដូចឈ្មោះមែន! ទ្រាំអត់បានទេ កម្ម៉ងទុកមួយដែរសិន។

Huawei nova 2i ត្រូវបានរចនាឡើងជាមួយនឹង អេក្រង់ធំ ពេញភ្នែក ពេញគែម 5.9 អ៊ីញ (HUAWEI FullView Display) ជាមួយនឹងសមត្ថភាព កំពូលនៃកាមេរ៉ាភ្លោះមុខ 13MP/2MP ភ្ជាប់ជាមួយនឹង Smart Selfie Toning Flash ឯកទេសអ្នក Selfie មួយគ្មានពីរ អាចផ្តិតយករូបភាពច្បាស់ស្រស់ស្អាត Pro Mode បែបសិល្បៈ portrait, Wide Aperture, Effect, Bokeh ស៊ីវិល័យ និងរស់រវើក។ ចំណែកឯ កាមេរ៉ាភ្លោះ ខាងក្រោយវិញ 16MP/2MP មានសមត្ថភាពខ្លាំង អាចផ្តិតយករូបភាព បែបសិល្បៈ ស៊ីវិល័យ កម្រិតខ្ពស់ ព្រាលផ្ទៃខាងក្រោយបានស្រស់ស្អាតល្អ (bokeh) និងជួយបន្ថែមពន្លឺ សម្រាប់ទីតាំង ដែលមាន ពន្លឺខ្សោយ ដូចកាមេរ៉ាអាជីព។ HUAWEI nova 2i ត្រូវបានបំពាក់ដោយបន្ទះឈីប Octa-core Kirin 659, មានរ៉េម (RAM) 4GB និង រ៉ូម (ROM) 64GB ប្រើប្រាស់ប្រព័ន្ធប្រតិបត្តិការ Android-7 ជាមួយនឹងថាមពលថ្មធំមហិមា 3,340mAh ស៊ីមពីរ ល្បឿនអ៊ីនធើណិតលឿនកប់ Best 4G LTE Smart Ever ផ្តល់ជូននូវបទពិសោធន៍ថ្មីអស្ចារ្យ កាន់តែលឿន និង អស់កង្វល់រឿងអស់ថ្ម ល្អប្រើ មិនមែនល្អមើល ប្រើអស់ចិត្ត តែមិនអស់ថ្ម ។

លោក អែម យុទ្ធូ ប្រធានផ្នែកទីផ្សារជាន់ខ្ពស់ របស់ ក្រុមហ៊ុន Huawei កម្ពុជាបានឲ្យដឹងថា មកទល់ពេលនេះ យើងទទួលបានការម្ម៉ង់ទុក សម្រាប់ស្មាតហ្វូន Huawei nova 2i លើសពីការរំពឹងទុកសម្រាបស្តុកដំបូង។ លោក អែម យុទ្ធូ បន្ថែមថា៖ “ក្រោយពីដាក់បង្ហាញនូវរូបរាងពិត គុណភាពល្អជាងគេ ទំនើបជាងគេ ថតស្អាតជាងគេ កាមេរ៉ាដល់ទៅ 4 សេវាកប់ ថ្មកាន់បានយូរជាងគេ តម្លៃល្អជាងគេ គឺត្រឹមតែ 329ដុល្លារ ខ្ញុំជឿថាក្រុមហ៊ុន Huawei នឹងទទួលជោគជ័យខ្លាំងសម្រាប់ស្មាតហ្វូនស៊េរីថ្មីកាមេរ៉ា៤ nova 2i ជាក់ជាពុំខាន ”។

សម្រាប់ អតិថិជនដែលពុំទាន់បានធ្វើការកម្ម៉ង់ទុកមុន នូវស្មាតហ្វូនស៊េរីថ្មី Huawei nova 2i សូមប្រញាប់រួសរាន់ឡើង ចាប់ផ្តើមកក់ទុកមុនភ្លាម នឹងទទួលបានកាដូយ៉ាងច្រើន សន្ធឹកសន្ធាប់ ពីក្រុមហ៊ុន Huawei រួមមាន ដងថតរូប (Selfie Stick), ក្រវិលទម្រទូរសព្ទ (Phone Ring), កាសធំពាក់ក្បាល សម្រាប់ស្តាប់តន្ត្រី (Big Head Ear Phone) និងស៊ីមស្មាតជាមួយនឹងកញ្ចប់សេវាកម្ម ធំម្ម៉ង់រយៈពេល 24សប្តាហ៍ ឥតគិតថ្លៃ និងតម្លៃពិសេសត្រឹមតែ 329ដុល្លារ។ អតិថិជន អាចអញ្ជើញសាកសួរព័ត៌មានអំពី កម្មវិធី កម្ម៉ង់ទុកមុន សម្រាប់ស្មាតហ្វូន Huawei ស៊េរីថ្មី កាមេរ៉ាភ្លោះមុខ ភ្លោះក្រោយ nova 2i នៅតាមបណ្តាហាង សាខាលក់ទូរស័ព្ទ ដែលមាន ភ្នាក់ងារបុគ្គលិកលក់ ឬ ស្លាកសញ្ញា Huawei ចាប់ពីថ្ងៃនេះតទៅ។

គួរបញ្ជាក់ថា រាល់អតិថិជនដែលបានធ្វើការបញ្ជាទុកមុន នឹងអាចទទួលបានកាដូយ៉ាងច្រើនសន្ធឹកសន្ធាប់ និងស្មាតហ្វូនស៊េរីថ្មី Huawei nova 2i កាមេរ៉ាបួន នៅថ្ងៃទី 25 ឬ 26 ខែតុលា 2017។ ព័ត៌មានលម្អិតសូមសាកសួរ ហាងលក់ទូរសព្ទដែលមានស្លាកសញ្ញា Huawei ឬ បុគ្គលិកលក់ Huawei។ Huawei ប្រូម៉ូសិនយក្ស គឺជាកម្មវិធី ថែមធំៗ ថែមឥតល្ហែ ថែមមួយកំប្លេរ ថែមមិនសំចៃ តម្លៃកប់ពេញចិត្តស្តូក ចាប់ពីថ្ងៃនេះ រហូតដល់ថ្ងៃទី 31 ធ្នូ ឆ្នាំ 2017 ឫកាដូអស់ពីស្តុក។ អតិថិជន នឹងទទួលបានកាដូភ្លាមៗ ច្រើនកប់ចិត្ត ដោយគ្រាន់តែជាវ ស្មាតហ្វូន រឺថេប្លេត Huawei ម៉ូដែលណាមួយក៏បាន នៅតាមហាងលក់ទូរស័ព្ទនានា ដែលមានភ្នាក់ងារបុគ្គលិកលក់ រឺស្លាកសញ្ញា Huawei៕

October 13, 2017

បណ្ឌិតតាន់ មុនីវណ្ណ៖ គ្រាន់តែមានទ្រព្យសម្បត្ដិ មិនទាន់រាប់ជាបុគ្គលដ៏អស្ចារ្យទេ

បច្ចុប្បន្នមានបុគ្គលជាច្រើនតែងតែចង់ក្លាយជាអ្នកដឹកនាំដ៏អស្ចារ្យ។ លោកបណ្ឌិត តាន់ មុនីវណ្ណ លើកឡើងថា វាមិនមែនរឿងងាយស្រួលនោះទេ ដើម្បីក្លាយជាបុគ្គលដ៏អស្ចារ្យ ក្រៅពីត្រូវមានគតិបណ្ឌិតអស្ចារ្យ បុគ្គលម្នាក់នោះក៏ត្រូវមានសកម្មភាពអស្ចារ្យ ឬល្អជាងអ្នកដទៃផងដែរ។ តើធ្វើដូចម្ដេចដើម្បីមានចំណុចពិសេសទាំងនេះ?

លោកបណ្ឌិត តាន់ មុនីវណ្ណ បញ្ជាក់ដើម្បីក្លាយខ្លួនជាអ្នកបុគ្គលមានគតិបណ្ឌិតអស្ចារ្យ និងមានសកម្មភាពអស្ចារ្យ មិនមែនយើងត្រូវធ្វើនៅពាក់កណ្ដាលអាយុនោះទេ។ នៅប្រទេសជឿនលឿននៅពេលគេឱ្យតម្លៃបុគ្គលម្នាក់អស្ចារ្យគេត្រូវពិនិត្យមើលទង្វើររបស់គាត់តាំងពីក្មេងមកម្ល៉េះ។ ប្រសិនបើយើងធ្វើអ្វីមិនល្អ យើងនឹងមិនអាចក្លាយជាបុគ្គលដ៏អស្ចារ្យបានឡើយ ដូច្នេះអ្នកជំនាន់ក្រោយគួរតែសំអាតគំនិតពីក្មេងឱ្យបានល្អជា មុននឹងត្រូវគិតលើបញ្ហានេះឱ្យច្បាស់លាស់។

លោកបណ្ឌិតបន្ដថា៖ «ដូចជារូបខ្ញុំ នៅពីក្មេងមិនមែនជាមនុស្សល្អពេកទេ តែខ្ញុំបានកំណត់ខ្លួនឯងតាំងពីក្មេងមកថា មិនចង់ធ្វើអ្វីខុស ហើយអ្វីធ្វើឱ្យខ្ញុំមិនបានល្អឥតខ្ចោះពីក្មេងនោះ មិនមែនមកពីខ្ញុំមិនបានគិតទេ គឺដោយសារតែខ្ញុំមានការចេះដឹងតិច ឬកម្រិតជីវភាពមានការខ្វះចន្លោះ តែយ៉ាងហោចណាស់ខ្ញុំបានព្យាយាមធ្វើអ្វីមិនឱ្យរំលងផ្លូវច្បាប់ដែរ»។

ទោះជាយ៉ាងណាលោកបណ្ឌិត តាន់ មុនីវណ្ណ បញ្ជាក់ថា យោងតាមស្ថាភាពបច្ចុប្បន្ន ពាក់ព័ន្ធសមត្ថភាព ប្រជាជនកម្ពុជាអាចនឹងពិបាកក្លាយខ្លួនជាបុគ្គល ឬអ្នកដឹកនាំដ៏អស្ចារ្យបានណាស់។ ប៉ុន្ដែមិនមែនមានន័យថា បុគ្គលទាំងអស់នោះមិនអាចធ្វើសម្មភាពល្អបាន ឬមិនអាចបំពេញនូវចំណុចខាងលើមិនបានខ្លះនោះទេ។ ឧទារហណ៍ដូចជារូបលោករស់នៅឈរលើគោលការណ៍ត្រឹមត្រូវរបស់ខ្លួន ដូច្នេះទោះមានមិត្ដភ័ក្ដិ ឬអ្នកផ្សេងទាញលោកដើរចេញពីគោលការណ៍ដែលយល់ថា មិនត្រឹមត្រូវគឺលោកមិនធ្វើជាដាច់ខាត ។ ប្រជាជនកម្ពុជាមិនទាន់អាចក្លាយជាអ្នកដឹកនាំដ៏អស្ចារ្យបានគឺមិនមែនជាកំហុសរបស់នរណាម្នាក់។

ជាមួយគ្នានេះលោកបណ្ឌិតបញ្ជាក់ថា នៅក្នុងភាសាជាសាកលមនុស្ស ឬបុគ្គលដែលអស្ចារ្យមិនមែនសំដៅលើមនុស្សមានទ្រព្យសម្បត្ដិនោះទេ។ មនុស្សមានកន្លែងរស់នៅល្អ មានហូបចុកគ្រប់គ្រាន់នោះជារឿងគ្រប់គ្រាន់សម្រាប់មនុស្សទៅហើយ។

លោកបន្ដថា៖ «នៅក្នុងសង្គមមនុស្សប្រសិនបើយើងយល់ខុសថា លុយកាក់ អំណាច ឬអ្វីផ្សេងអស្ចារ្យគឺសង្គមគ្មានក្ដីសុខទេ។ ភាពអស្ចារ្យសម្រាប់ខ្ញុំ ហើយសាកលលោកក៏ត្រូវការដែរនោះគឺសកម្មភាពនៃភាពត្រឹមត្រូវ និងក្រមសីលធម៌របស់ខ្លួនយើង។ ជាការគិតសម្រាប់ខ្ញុំ ខ្ញុំតែងអភ័យទោសឱ្យអ្នកដទៃច្រើនបើគាត់មិនចេះគឺគាត់ធ្វើខុស តែចំពោះខ្លួនខ្ញុំ គឺខ្ញុំមិនងាយអភ័យទោសឱ្យខ្លួនឯងទេ ប្រសិនបើខ្ញុំធ្វើខុសប្រាប់ខ្លួនឯងថា កំហុសនេះមិនគួរឱ្យកើតមានម្ដងទៀតឡើយ »៕

October 13, 2017

NBC នឹងតម្រូវឱ្យគ្រឹះស្ថានហិរញ្ញវត្ថុសិក្សាពីប្រភពរូបិយបណ្ណចំណូលរបស់អតិថិជនមុនផ្តល់ឥណទាន

ដើម្បីលើកស្ទួយការប្រើប្រាស់ប្រាក់រៀលឱ្យបានកាន់តែទូលំទូលាយបន្ថែមទៀតនោះ នៅក្នុងកិច្ចប្រជុំស្តីពីតួនាទី និងគោលនយោបាយរបស់ធនាគារជាតិនៃកម្ពុជា ថ្នាក់ដឹកនាំជាន់ខ្ពស់ធនាគារជាតិនៃកម្ពុជា (NBC) បានជំរុញឱ្យគ្រឹះស្ថានហិរញ្ញវត្ថុទាំងអស់នៅកម្ពុជាត្រូវសិក្សាពីតម្រូវការប្រើប្រាស់របស់អ្នកខ្ចីឱ្យបានច្បាស់លាស់ក្នុងការប្រើប្រាស់រូបិយបណ្ណ។

លោកជំទាវ ជា សេរី អគ្គនាយកបច្ចេកទេសនៃធនាគារជាតិនៃកម្ពុជា បានប្រាប់ឱ្យដឹងថា ធនាគារនិងគ្រឹះស្ថានមីក្រូហិរញ្ញវត្ថុទាំងអស់គួរតែពិនិត្យមើលប្រភពចំណូល និងប្រភពចំណាយអតិថិជនរបស់ខ្លួនឱ្យបានច្បាស់លាស់ជាមុន ថាតើរូបិយបណ្ណប្រភេទណា ជាប្រាក់រៀល ឬក៏ដុល្លារអាមេរិក ដែលគេប្រតិបត្តិសម្រាប់ការប្រកបអាជីវកម្ម? ការធ្វើបែបនេះគឺដើម្បីកុំឱ្យអ្នកខ្ចីប្រាក់ប្រឈមនឹងការខាតបង់នៅពេលសងត្រឡប់ទៅកាន់ធនាគារវិញ ខណៈដែលអត្រាប្តូរប្រាក់នៅលើទីផ្សារមានការប្រែប្រួល។

លោកជំទាវមានប្រសាសន៍ថា៖“តាមការអង្កេតចំណូល និងចំណាយរបស់ប្រជាជនយើង គឺប្រាក់រៀល តែនៅពេលទៅខ្ចីប្រាក់ពីធនាគារ ឬគ្រឹះស្ថានមីក្រូហិរញ្ញវត្ថុ គេបែរជាជំរុញឱ្យពួកគាត់យកជាប្រាក់ដុល្លារ។ តាមការសង្កេតរបស់ធនាគារជាតិនៃកម្ពុជា នាពេលបច្ចុប្បន្ននេះប្រជាពលរដ្ឋនៅតាមបណ្តាខេត្ត ជាពិសេសនៅតាមទីជនបទប្រភពចំណូល និងចំណាយរបស់ពួកគាត់ភាគច្រើនបំផុតជាប្រាក់រៀល ប៉ុន្តែនៅពេលពួកគាត់ទៅខ្ចីប្រាក់ពីធនាគារ ឬគ្រឹះស្ថានមីក្រូហិរញ្ញវត្ថុ បែរជាត្រូវបានផ្តល់ភាគច្រើនឱ្យជាប្រាក់ដុល្លារអាមេរិកទៅវិញ ដែលជាហេតុអាចធ្វើឱ្យពួកគាត់ត្រូវខាតបង់ទៅលើអត្រាប្តូរប្រាក់។

លោកជំទាវអគ្គនាយកបច្ចេកទេស បានអះអាងថា ធនាគារជាតិនៃកម្ពុជានឹងធ្វើការងារនេះដើម្បីជំរុញឱ្យគ្រឹះស្ថានធនាគារ និងមីក្រូហិរញ្ញវត្ថុ ទាំងអស់គួរធ្វើការស្វែងយល់អំពីតម្រូវការប្រើប្រាស់ថវិកាអតិថិជនរបស់ខ្លួនឱ្យបានច្បាស់ ដើម្បីធានាថាការផ្តល់ឥណទានជូនពួកគាត់មានប្រសិទ្ធភាព និងចំទិសដៅពិតប្រាកដ ខណៈការយល់ដឹងរបស់ប្រជាពលរដ្ឋខ្មែរនៅតាមតំបន់ជនបទអំពីរូបិយបណ្ណឥណទាននៅមានកម្រិត។

លោកជំទាវ ជា សេរី បានបញ្ជាក់ថា៖“យើងនឹងធ្វើការងារនេះជាមួយវិស័យធនាគារ និងគ្រឹះស្ថានមីក្រូហិរញ្ញវត្ថុ។ អតិថិជនភាគច្រើនមិនសូវយល់ពីរឿងហិរញ្ញវត្ថុទេ ដូច្នេះវាជាបញ្ហា។ អតិថិជនអាចរត់ទៅរកកម្ចីពីស្ថាប័នហិរញ្ញវត្ថុមួយទៅមួយ យើងត្រូវតែធ្វើការងាររួមគ្នាថា មុននឹងផ្តល់ប្រាក់កម្ចី ទាំងអស់គ្នាត្រូវតែមើលប្រាក់ចំណូលរបស់អតិថិជន ហើយការឱ្យប្រាក់កម្ចីត្រូវតែផ្តល់តាមប្រភពប្រាក់ចំណូលនោះ។ ធនាគារជាតិនៃកម្ពុជាជឿថា វិធានការនេះនឹងរួមចំណែកដ៏សំខាន់ក្នុងការជំរុញឱ្យមានការប្រើប្រាស់ប្រាក់រៀលកាន់តែច្រើនឡើងថែមទៀត។

ប្រធានសមាគមមីក្រូហិរញ្ញវត្ថុកម្ពុជា និងជាប្រធានអគ្គនាយកគ្រឹះស្ថានមីក្រូហិរញ្ញវត្ថុ ហត្ថាកសិករ លីមីធីត លោកឧកញ៉ា ហួត អៀងតុង បានគាំទ្រចំពោះការលើកឡើងរបស់មន្ត្រីជាន់ខ្ពស់នៃធនាគារជាតិ តែលោកឧកញ៉ាបានយល់ឃើញថា ការអនុលោមតាមប្រាក់ចំណូលរបស់ប្រជាពលរដ្ឋមិនមែនជាកត្តាសត្យានុម័តក្នុងការប្រើប្រាស់ប្រាក់កម្ចីនោះទេ ដោយសារការប្រើប្រាស់ប្រាក់កម្ចីដូចជា ការទិញសម្ភារប្រើប្រាស់សំខាន់ៗជាដើម គឺត្រូវអនុវត្តជាប្រាក់ដុល្លារ។

ទោះបីជាយ៉ាងណាក៏ដោយលោកឧកញ៉ាចង់ឱ្យមានការប្រើប្រាស់ប្រាក់រៀលឱ្យបានច្រើន ជាជាងការប្រើប្រាស់រូបិយវត្ថុបរទេស ព្រោះថាការប្រើប្រាស់រូបិយវត្ថុរបស់ជាតិនឹងធ្វើឱ្យយើងងាយស្រួលក្នុងការគ្រប់គ្រងសេដ្ឋកិច្ច។

ឧកញ៉ា ហួត អៀងតុង បញ្ជាក់ថា៖“ការលើកឡើងនេះជារឿងល្អមួយ តែយើងសង្កេតឃើញថា អ្នកខ្ចីប្រាក់ដែលមានប្រភពចំណូលជាប្រាក់រៀល មិនប្រាកដថាគាត់ត្រូវយកប្រាក់រៀលនោះទេ ដោយសារការវិនិយោគជំហានដំបូងគឺប្រើប្រាស់ប្រាក់ដុល្លារអាមេរិក។

បើតាមលោកជំទាវ ជា សេរី ដើម្បីជំរុញឱ្យមានការប្រើប្រាស់លុយរៀលកាន់តែច្រើន ធនាគារជាតិនៃកម្ពុជា បានចេញសេចក្តីប្រកាសតម្រូវឱ្យគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុទាំងអស់ត្រូវបង្កើនទំហំឥណទានជាប្រាក់រៀលឱ្យបានយ៉ាងតិច 10%នៃឥណទានសរុបរបស់ខ្លួននៅត្រឹមឆ្នាំ2019 ខាងមុខ៕

October 13, 2017

កម្ពុជា-អាស៊ាន ព្រមព្រៀងគ្នាលើការតភ្ជាប់ផ្លូវគោក ផ្លូវទឹក និងផ្លូវអាកាស

រដ្ឋមន្ត្រីដឹកជញ្ជូនអាស៊ាន-ចិន ដោយរួមមានរដ្ឋមន្ត្រីក្រសួងសាធារណៈ និងដឹកជញ្ជូនកម្ពុជាផង នៅថ្ងៃទី12 ខែតុលាម្សិលមិញនេះ បានរៀបចំកិច្ចប្រជុំរួមគ្នាមួយថ្មី នៅប្រទេសសឹង្ហបូរី ដើម្បីពិភាក្សាលើគម្រោងតភ្ជាប់បណ្តាញផ្លូវដឹកជញ្ជូនគ្នាទៅវិញទៅមក។

ឯកឧត្តម Khaw Boon Wan រដ្ឋមន្ត្រីសម្របសម្រួលទទួលបន្ទុកហេដ្ឋារចនាសម្ព័ន្ធ និងជារដ្ឋមន្ត្រីដឹកជញ្ជូនសឹង្ហបុរី ព្រមទាំងឯកឧត្តម Dai Dongchang អនុរដ្ឋមន្ត្រីដឹកជញ្ជូនចិន ជាសហប្រធានដឹកនាំកិច្ចប្រជុំ ក្នុងនោះរដ្ឋមន្ដ្រីអាស៊ានបានគាំទ្រការឯកភាពគ្នា នៅក្នុងសេចក្តីប្រកាសរួមនៃកិច្ចប្រជុំតុមូលថ្នាក់ដឹកនាំស្តីពីវេទិកាខ្សែក្រវ៉ាត់ និងផ្លូវសម្រាប់កិច្ចសហប្រតិបត្តិការអន្តរជាតិ ដែលបានប្រព្រឹត្តទៅចាប់ពីថ្ងៃទី14-15 ខែឧសភា ឆ្នាំ2017 នៅទីក្រុងប៉េកាំង សាធារណរដ្ឋប្រជាមានិតចិន និងបានបញ្ជាក់ជាថ្មីនូវការប្តេជ្ញាចិត្តរបស់ខ្លួនក្នុងការបង្កើនការតភ្ជាប់រវាងរដ្ឋជាសមាជិកអាស៊ាន និងសាធារណរដ្ឋប្រជាមានិតចិន។

លោករដ្ឋមន្ដ្រីបានឯកភាពប្រគល់ភារកិច្ច ជូនឯកឧត្តមមន្ត្រីចិន-អាស៊ី និងក្រុមការងារពាក់ព័ន្ធធ្វើការពិភាក្សា អំពីសកម្មភាពតាមដានរបស់ខ្លូនក្នុងការពង្រឹងកិច្ចសហប្រតិបត្តិការ លើវិស័យផ្លូវថ្នល់ ផ្លូវដែក កំពង់ផែ ការដឹកជញ្ជូនតាមផ្លូវទឹក ផ្លូវសមុទ្រ និងផ្លូវអាកាស ដើម្បីជំរុញកំណើនលំហូរពាណិជ្ជកម្ម និងវិនិយោគ នៅក្នុងតំបន់។

រដ្ឋមន្ត្រីអាស៊ានក៏បានពិភាក្សា និងផ្តល់អនុសាសន៍ណែនាំ លើការអនុវត្តន៍ឯកសារសំខាន់ៗដូចខាងក្រោម៖ 1.កិច្ចព្រមព្រៀងដឹកជញ្ជូនតាមផ្លូវអាកាស អាស៊ាន-ចិន 2.កិច្ចព្រមព្រៀងដឹកជញ្ជូនតាមផ្លូវសមុទ្រ អាស៊ាន-ចិន 3.យន្តការពិគ្រោះយោបល់លើបញ្ហាពាក់ព័ន្ធផ្លូវសមុទ្រ អាស៊ាន-ចិន 4.ផែនការយុទ្ធសាស្ត្រកែសម្រួលសម្រាប់កិច្ចសហប្រតិបត្តិការដឹកជញ្ជូនអាស៊ាន-ចិន, និង 5.សកម្មភាពរួមអាស៊ាន-ចិនសម្រាប់ឆ្នាំ2018។

ក្រោយកិច្ចប្រជុំរដ្ឋមន្ដ្រីអាស៊ានបានអនុម័តលើ អនុស្សរណៈយោគយល់ រវាងអាជ្ញាធរទទួលបន្ទុកស៊ើបអង្កេតគ្រោះថ្នាក់អាកាសយាន នៃរដ្ឋជាសមាជិកអាស៊ាន និងរដ្ឋបាលអាកាសចរណ៍ស៊ីវិលចិន ស្តីពីកិច្ចសហប្រត្តិបត្តិការទាក់ទងនឹងការស៊ើបអង្កេតឧប្បត្តិហេតុ និងគ្រោះថ្នាក់អាកាសយាន ដែលត្រូវចុះហត្ថលេខាដោយស្ថាប័នពាក់ព័ន្ធ៕

October 13, 2017

Barcelona ធ្វើដំណើរទៅកាន់ទឹកដី Atl. Madrid ក្នុងពេលមានវិបត្តិនៅ Catalonia

ការប្រកួតដ៏ធំបំផុតនៃក្របខ័ណ្ឌ La Liga ក្នុងរដូវកាលកមទល់ពេលនេះ នឹងត្រូវប្រព្រឹត្តទៅស្របពេលមានវិបត្តិនយោបាយដ៏តានតឹង ខណៈដែលក្រុម Barcelona នឹងធ្វើដំណើរទៅជួបក្រុម Atletico Madrid នៅថ្ងៃសៅរ៍នេះ ក្នុងការធ្វើដំណើរជាលើកទី1 របស់ពួកគេទៅកាន់រដ្ឋធានីរបស់អេស្ប៉ាញ ចាប់តាំងពីការធ្វើប្រជាមតិទាមទារឯករាជ្យនៅតំបន់ Catalonia ដែលត្រូវបានរំខានដោយអំពើហិង្សា។

Barca បានលេងការប្រកួតជាលើកចុងក្រោយរបស់ពួកគេ នៅកីឡដ្ឋានបិទជិតគ្មានអ្នកទស្សនា ខណៈដែលការធ្វើប្រជាមតិកាលពីថ្ងៃទី1 ខែតុលា ដែលត្រូវបានចាត់ទុកថា ជាទង្វើខុសច្បាប់ដោយរដ្ឋាភិបាលអេស្ប៉ាញ បានកើតឡើង ស្របពេលមានហេតុការណ៍ដ៏ជ្រួលច្របល់ ខណៈដែលប៉ូលិ បានរឹបអូសយកសន្លឹកឆ្នោត និងបានប៉ះទង្គិចជាមួយនឹងអ្នកបោះឆ្នោតជាច្រើននាក់ ដែលបានធ្វើឲ្យមនុស្ស92នាក់រងរបួស។

ខ្សែបម្រើ Andres Iniesta ដែលជាប្រធានក្រុមរបស់ក្លិប Barcelona បានប្រាប់ស្ថានីយវិទ្យុ Catalunya នៅសប្តាហ៍នេះថា៖ «វាជាពេលវេលាមួយក្នុងចំណោមពេលវេលាដ៏អាក្រក់បំផុតដែលខ្ញុំបានជួប»។ Iniesta វ័យ33ឆ្នាំ បានចុះហត្ថលេខាលើកុងត្រាអស់មួយជីវិតនៅឯក្លិប Barcelona កាលពីសប្តាហ៍មុន ពោលគឺរយៈពេល1ថ្ងៃ ក្រោយពីបានធ្វើការកៅអីឲ្យភាគីនយោបាយទាំងពីរ ធ្វើការចរចាគ្នា។ ប៉ុន្តែ ទោះបីជាយ៉ាងណា ការបែងចែកបក្សពួកគ្នានៅតែកើតមាន បើទោះបីលោក Carles Puigdemont ប្រធានាធិបតីរបស់តំបន់ Catalonia បានសម្រេចចិត្តក្នុងការព្យួរការប្រកាសឯករាជ្យដោយឯកតោភាគី កាលពីថ្ងៃអង្គារក៏ដោយ។ Iniesta បានបន្ថែមទៀតថា៖ «វាបានឈានដល់ចំណុចមួយដែលមិនល្អសម្រាប់គ្រប់គ្នាទាល់តែសោះ។ បញ្ហាដែលកំពុងតែកើតឡើង ត្រូវតែមានការដោះស្រាយ»។ សបុត្រចូលទស្សនាត្រឹមតែ250សន្លឹកប៉ុណ្ណោះត្រូវបានលក់ទៅឲ្យអ្នកគាំទ្រក្រុមក្រៅដី នៅកីឡដ្ឋាន Wanda Metropolitano របស់ក្លិប Atletico។ ការប្រកួតនេះនឹងចាប់ផ្តើមនៅម៉ោង1៖45ទៀបភ្លឺ៕

ប្រភពពី៖ Sky Sports

October 13, 2017

ការចាប់អារម្មណ៍ផ្សេងៗធ្លាក់ទៅលើលោក Mourinho ខណៈ Man Utd ទៅជួប Liverpool

លោក Jose Mourinho នឹងវិលទៅកាន់កីឡដ្ឋាន Anfield នាថ្ងៃសៅរ៍នេះ ជាមួយនឹងក្រុម Manchester United របស់លោក ដែលកំពុងតែស្ថិតក្នុងទម្រង់លេងល្អប្រសើរជាងការធ្វើដំណើរជាលើកចុងក្រោយរបស់ពួកគេទៅកាន់ទឹកដីក្រុម Liverpool កាលពីរយៈពេល 12ខែមុនទៅទៀត។

Man United បានជួបភាពត្រដាបត្រដួសកាលពីខែតុលា ឆ្នាំ2016 ខណៈដែលការរងបរាជ័យជាបន្តបន្ទាប់នៅពេលប្រកួតជាមួយនឹងក្រុម Manchester City និង Watford បានលុបចោលសុទិដ្ឋិនិយមរបស់ពួកគេកាលពីដើមរដូវកាលតែម្តង មុននឹងបានបញ្ចប់ក្នុងលទ្ធផលស្មើ ០-០ ជាមួយនឹងក្រុម Liverpool។ រយៈពេល 1ឆ្នាំក្រោយមក ពួកគេស្ថិតក្នុងទម្រង់លេងយ៉ាងមុតស្រួច ដោយបានកត់ត្រាជ័យជម្នះ 6លើក និងស្មើ 1លើក ក្នុងការប្រកួតបើកឆាក 7លើកនៃក្របខ័ណ្ឌ Premier League ដើម្បីធ្វើឲ្យពួកគេតាមស្មើពិន្ទុជាមួយនឹងក្រុមកំពុងនាំមុខ Manchester City។

ក្រុមរបស់លោក Mourinho ក៏មានទម្រង់លេងដ៏រឹងមាំដូចគ្នាក្នុងក្របខ័ណ្ឌ Champions League ដោយបានស៊ុតបាល់បញ្ចូលទី7គ្រាប់ក្នុងពេលយកឈ្នះលើក្រុម Basel និង CSKA Moscow និងបានរកគ្រាប់បាល់បញ្ចូលទីជាមធ្យមចំនួន 3,2គ្រាប់ក្នុងមួយប្រកួតក្នុងរាល់យុទ្ធនាការទាំងអស់។ ក្រោយពីបានស្ថិតក្នុងដំណាក់កាលនៃការប្រជែងចំណាត់ថ្នាក់លេខ1កាលពីឆ្នាំមុន បច្ចុប្បន្ន ក្រុម Liverpool កំពុងតែជួបភាពត្រដាបត្រដួសវិញ។

ការរកបាន 5ពិន្ទុពីការប្រកួតលីក 4លើកចុងក្រោយរបស់ពួកគេ បានធ្វើឲ្យក្រុមហង្សក្រហមមួយនេះឈរក្នុងចំណាត់ថ្នាក់លេខ7 នៅលើតារាង ខណៈដែលពួកគេបានបញ្ចប់ក្នុងលទ្ធផលស្មើក្នុងការប្រកួតក្របខណ្ឌ Champions League ទាំង2 លើកដំបូងរបស់ពួកគេមកទល់ពេលនេះ និងបានធ្លាក់ចេញពីពាន League Cup ក្រោមស្នាដៃក្រុម Leicester City។ ការរងរបួសទៅលើ Sadio Mane បានធ្វើឲ្យលោក Jurgen Klopp អវត្តមានខ្សែប្រយុទ្ធដ៏ឆ្នើមម្នាក់ ហើយទាំងកីឡាករ Philippe Coutinho និង Roberto Firmino អាចនឹងស្រុតចុះកម្លាំង ក្រោយពីទើបតែបំពេញការតព្វកិច្ចសម្រាប់ក្រុមជម្រើសជាតិប្រេស៊ីល។ ការប្រកួតនេះនឹងចាប់ផ្តើមនៅម៉ោង 6៖30ល្ងាច៕

ប្រភពពី៖ Sport24

October 13, 2017

Author: វល័ក្ខ