វល័ក្ខ - La Reine Media

រូបមន្ដពិសេស ធ្វើឱ្យសក់ភ្លឺរលោងតាមបែបធម្មជាតិ

ជឿជាក់ថានារីគ្រប់រូបប្រហែលជាចង់បានសរសៃសក់ដែលរឹងមាំ មិនបែកចុង ព្រមទាំងមានភាពទន់ភ្លឺរលាង និងមិនជំពាក់គ្នាហើយ ដូច្នេះនៅថ្ងៃនេះគេហទំព័រ ឡារ៉ែន សូមនាំយកនូវវិធីសាស្ត្រមួយចំនួនដែលជាអាថ៌កំបាំងនៃការរក្សាសរសៃសក់ឱ្យមើលទៅមានសុខភាពល្អមកជម្រាបជូន។ ស្លឹកគ្រៃជាបន្លែឱសថបុរាណបែបធម្មជាតិ ដែលមាននៅក្នុងផ្ទះ ហើយមានប្រយោជន៍ដល់សរសៃសក់យ៉ាងពិតប្រាកដណាស់ ដូច្នេះសូមតាមដានជាបន្ត។

ស្លឹកគ្រៃ ជាបន្លែឱសថបុរាណមាននៅក្នុងផ្ទះ ដែលគុណសម្បត្តិរបស់វាជួយបំប៉នសរសៃសក់ ការពារសក់បែកចុង សក់ស្តើង សក់ជ្រុះ ជួយឱ្យសក់ទន់ភ្លឺរលោង ស្រស់ស្អាតបែបធម្មជាតិនិងជួយឱ្យសរសៃសក់មិនងាយជ្រុះ ដោយសារតែស្លឹកគ្រៃមានសារធាតុចិញ្ចឹម ដែលមានសារសំខាន់ដូចជា វីតាមីន C វីតាមីន A និងមានសារធាតុផ្សំនៅក្នុងប្រេងក្រអូបសម្រាប់ម៉ាស្សា ដូចជា ជាតិមេនថល កាបូន Citrus ជាដើម។

វិធីធ្វើ

យកស្លឹកគ្រៃលាងឱ្យស្អាតចំនួន3ដើម។
យកមកបុកឱ្យល្អិត រួចពូតយកតែទឹក។
បន្ទាប់ពីកក់សក់ឱ្យស្អាតរួចហើយ ចូរយកទឹកស្លឹកគ្រៃមកកក់ជាមួយសក់ឱ្យសព្វ ហើយម៉ាស្សាលើស្បែកក្បាលថ្មមៗ ទុករយៈពេល 10នាទី ទើបលាងទឹកចេញជាធម្មតា។

វិធីសាស្ត្រនេះ សូមណែនាំឱ្យធ្វើជាប្រចាំប្រមាណ2-3ខែ នោះអ្នកនឹងសង្កេតឃើញថា សក់របស់អ្នកប្រែមកជាមានសភាពទន់រលោងហើយរឹងមាំ ស្រស់ស្អាតតាមបែបធម្មជាតិទ្វេដងមិនខាន៕

October 17, 2017

មនុស្សដែលខ្វះការអាន អាចប្រឈមបញ្ហាក្នុងជីវិតច្រើនជាងអ្នកដែលចូលចិត្តអាន

ការអានជារឿងសំខាន់មួយដែលមនុស្សម្នាក់ៗគួរយកចិត្តទុកដាក់។ ថ្វីដ្បិតតែសម័យបច្ចុប្បន្ននេះ បច្ចេកវិទ្យាមានភាពទំនើប ដែលអាចស្តាប់ ទស្សនាវីដេអូ ឬតាមវិធីជាច្រើនទៀតដើម្បីទទួលយកចំណេះដឹងក៏ដោយ តែជាទូទៅ ការអាននៅតែមានលក្ខណៈស៊ីជម្រៅជាង ហើយមានតម្លៃប្រកបដោយគុណភាពជីវិតខ្ពស់ជាងការបញ្ចូលព័ត៌មានតាមបែបផ្សេងទៀត។

អ្នកនិពន្ធវ័យក្មេង លោក ឈិន សីហា បានលើកឡើងថា ការអានអាចធ្វើឱ្យមនុស្សទទួលបានពុទ្ធិខ្ពស់ក្នុងការអភិវឌ្ឍបញ្ញាស្មារតី ដែលធ្វើឱ្យមនុស្សក្លាយជាអ្នកដែលមានហេតុផលល្អក្នុងការដោះស្រាយបញ្ហាប្រចាំជីវិត។ ម្យ៉ាងវិញទៀត ចំពោះរាល់ការពិភាក្សា ការជជែកវែកញែកផ្សេងៗក្នុងការទំនាក់ទំនងរបស់មនុស្សដែលបានអានច្រើនក៏មានលក្ខណៈសន្តិភាពជាងអ្នកដែលមិនសូវបានអានដែរ។

លោក ឈិន សីហា បាននិយាយថា៖ « ការមិនទម្លាប់អានស្ទើរតែក្លាយជាវប្បធម៌មួយរបស់ប្រជាជនខ្មែរទូទៅមួយចំនួនទៅហើយ។ កត្តានេះបានធ្វើឱ្យគុណភាពនៃការគិតរបស់ប្រជាជនមានភាពទន់ខ្សោយនិងធ្វើសកម្មភាពអ្វីមួយដោយមិនមានហេតុផលច្រើន»។

ស្រដៀងគ្នានេះដែរអ្នកនិពន្ធ ឡុច ចន្ថា បានលើកឡើងថា ជាការកត់សម្គាល់លោកសង្កេតឃើញថា បុគ្គលដែលមិនចូលចិត្តអាន ភាគច្រើនជាអ្នកចូលចិត្តប្រើហិង្សា ដោយសារតែបុគ្គលទាំងអស់នោះមិនសូវបានអប់រំខ្លួនឯង។ តែសម្រាប់អ្នកដែលបានអានច្រើនវិញ គឺគាត់អាចអប់រំផ្លូវចិត្តបានល្អមានឱកាសអប់រំសីលធម៌ទទួលយកការកែប្រែឥរិយាបថឱ្យកាន់តែប្រសើរឡើង ចេះគ្រប់គ្រងខ្លួនឯងបានល្អ និងមានភាពបត់បែនក្នុងការរស់នៅ។

អ្នកនិពន្ធខាងលើបានលើកឡើងផងដែរថា បញ្ហាចម្បងនានានៅក្នុងសង្គមអាចនឹងត្រូវទប់ស្កាត់បានប្រសិនបើប្រជាជនភាគច្រើនបានអាន ហើយអប់រំចិត្តបានល្អ តែចំណុចប្រឈមដែលយើងមានគឺមិនទាន់មានការបំផុសការអានឱ្យបានគ្រប់គ្រាន់នៅឡើយ។ ស្ថាប័នរដ្ឋ និងឯកជនមិនទាន់បានផ្សព្វផ្សាយឬណែនាំប្រជាជនឱ្យស្គាល់ពីតម្លៃនៃការអាន ហើយឯកសារសម្រាប់អានទៀតសោតក៏នៅមានកម្រិតនៅឡើយ។

អ្នកនិពន្ធខាងលើបានសំណូមពរឱ្យប្រជាជនខ្មែរគួរព្យាយាមរកសៀវភៅណាដែលអាចដុសខាត់ខួរក្បាលខ្លួនឯងឱ្យមានទស្សនៈវែងឆ្ងាយ និងមានការគិតបានល្អិតល្អន់ ដូចជាសៀភៅទស្សនវិជ្ជាជាដើម។ ប្រជាជនខ្មែរក៏គួរតែអានឯកសារទាក់ទងនឹងការអប់រំចិត្តសាស្ត្រដើម្បីអប់រំចិត្តក្រោធខឹងរបស់ខ្លួនអប់រំពីការដោះស្រាយអារម្មណ៍ស្ត្រេស អប់រំសីលធម៌ និងការរៀនរស់នៅជាមួយអ្នកដទៃជាដើមផងដែរ៕

October 17, 2017

ការសិក្សានៅមហាវិទ្យាល័យត្រូវការការពិចារណាខ្ពស់ទើបជោគជ័យ

ការសិក្សានៅមហាវិទ្យាល័យ ជាជំហានថ្មីមួយឆ្ពោះទៅរកឧត្តមភាព និងភាពជាអ្នកដែលមានជំនាញច្បាស់លាស់មួយនៅថ្ងៃអនាគត។ សិស្សដែលទើបនឹងបានបញ្ចប់ការសិក្សានៅកម្រិតមធ្យមសិក្សាចាំបាច់ត្រូវយកចិត្តទុកដាក់ឱ្យបានច្បាស់លាស់លើដំណើរឆ្ពោះទៅកាន់ភាពជោគជ័យតាមរយៈការសម្រេចចិត្តត្រូវ ជ្រើសរើសត្រូវ និងសិក្សាត្រូវ។

ឯកឧត្តម អ៊ាង សុផល្លែត អនុរដ្ឋលេខាធិការក្រសួងកសិកម្ម រុក្ខា ប្រមាញ់ និងនេសាទ បានលើកឡើងនៅក្នុងពិព័រណ៍សាកលវិទ្យាល័យឆ្នាំ 2017 ថា ការសិក្សានៅថ្នាក់មហាវិទ្យាល័យត្រូវការឱ្យនិស្សិតមានគំនិតច្បាស់លាស់មានឯកសារយោង និងការសិក្សាស្រាវជ្រាវជាក់លាក់លើអ្វីដែលខ្លួនបានសរសេរ ឬបានសម្រេចឱ្យខ្លាំងឡើង។

ឯកឧត្តម អ៊ាង សុផល្លែត មានប្រសាសន៍ថា៖ «យុវជនកកម្ពុជាដែលត្រៀមខ្លួនចូលមហាវិទ្យាល័យ ត្រូវអភិវឌ្ឍខ្លួនឱ្យក្លាយជាមនុស្សដែលចេះគិតពិចារណា ពិចារណាលើការរិះគន់ រិះគន់លើការពិចារណា និងរិះគន់លើការរិះគន់»។

ឯកឧត្តម បានលើកឡើងផងដែរថា ការដែលសិស្សនិស្សិតចូលដល់ថ្នាក់មហាវិទ្យាល័យ គុណភាពរបស់ពួកគេនឹងកាន់តែកើនឡើងខ្លាំង តែមុននឹងសម្រេចចិត្តជ្រើសរើសជំនាញណាមួយ សិស្សក៏គួរតែសិក្សា និងពិចារណាឱ្យបានច្បាស់ផងដែរពីចំណង់ចំណូលចិត្ត ឧបនិស្ស័យ និងទេពកោសល្យពីកំណើតរបស់ខ្លួន ដើម្បីធានាថា យើងអាចសិក្សាលើជំនាញដែលត្រឹមត្រូវ។

ការជ្រើសរើសជំនាញ ទាមទារឱ្យមានការប្រឹក្សា ការយកចិត្តទុកដាក់ និងការផ្តោតសំខាន់លើភាពជាក់ស្តែងនៃអាជីពការងារដែលនឹងធ្វើនៅថ្ងៃអនាគត ដើម្បីត្រៀមខ្លួនក្លាយជាធនធានមនុស្សដែលមានតម្លៃសម្រាប់សង្គម និងចូលរួមចំណែកយ៉ាងសកម្មជាពលរដ្ឋល្អនៅគ្រប់វិស័យក្នុងសង្គម៕

October 17, 2017

Man City សម្លឹងរកជ័យជម្នះលើកទី3 ពេលជួបក្រុម Napoli នៅរាត្រីនេះ

ក្រុមកំពុងឡើងទម្រង់លេង Manchester City នឹងសម្លឹងរកការដណ្តើមបានជ័យជម្នះជាលើកទី3 ពីការប្រកួតក្របខ័ណ្ឌ Champions League ក្នុងវគ្គចែកពូលទាំង3លើក នៅពេលដែលពួកគេបើកទ្វារទទួលក្រុមកំពុងនាំមុខលើតារាង Serie A គឺ Napoli នៅរាត្រីនេះ។

ក្រុម Man City របស់លោក Pep Guardiola នឹងត្រូវឈានទៅកាន់ការប្រកួតនេះទាំងការជឿជាក់ ក្រោយពីបានលត់ក្រុម Stoke City យ៉ាងដំណំក្នុងលទ្ធផល 7-2 ក្នុងការប្រកួតក្របខ័ណ្ឌ Premier League កាលពីថ្ងៃសៅរ៍ ខណៈដែលក្រុម Napoli បានកត់ត្រាជ័យជម្នះ 1-០ នៅលើទឹកដីក្រុម Roma កាលពីចុងសប្តាហ៍ថ្មីៗនេះ។ ក្រុមយក្សរបស់អង់គ្លេសមួយនេះនឹងឈានទៅកាន់ការប្រកួតនេះ ដោយស្ថិតនៅលើកំពូលតារាងនៃពូល F ដោយមាន6ពិន្ទុក្នុង 2ប្រកួត ក្រោយពីបានយកឈ្នះលើក្រុម Feyenoord ក្នុងលទ្ធផល 4-០ កាលពីថ្ងៃបើកឆាក មុននឹងយកឈ្នះលើក្រុម Shakhtar Donetsk 2-០ នៅលើទឹកដីខ្លួនឯង កាលពី3សប្តាហ៍មុន។

ដោយឡែក ក្រុម Napoli បានរងបរាជ័យក្នុងលទ្ធផល 2-1 នៅលើទឹកដីក្រុម Shakhtar Donetsk កាលពីថ្ងៃបើកឆាក ប៉ុន្តែ ពួកគេមិនស្គាល់ចាញ់សោះក្នុងក្របខ័ណ្ឌរបស់អ៊ីតាលី ខណៈដែលការយកឈ្នះលើក្រុម Roma 1-០ កាលពីថ្ងៃសៅរ៍ គឺជាជ័យជម្នះជាលើកទី8របស់ពួកគេពីការប្រកួតទាំង8លើកក្នុងក្របខ័ណ្ឌ Serie A។ ប៉ុន្តែ ក្រុម Napoli មិនធ្លាប់ឈ្នះសោះពីការធ្វើដំណើរទៅប្រកួតនៅអង់គ្លេសចំនួន4លើកកាលពីពេលមុនៗរបស់ពួកគេ។ ទោះបីជាយ៉ាងណា លោក Guardiola បានបញ្ជាក់ថា លោកនឹងមិនអនុញ្ញាតឲ្យកីឡាករនៃក្រុម Man City របស់លោកធ្លាក់ចូលអន្ទាក់ដោយសារតែការជឿជាក់លើខ្លួនឯងខ្លាំងពេកនោះទេ។ គ្រូបង្វឹកសញ្ជាតិអេស្ប៉ាញរូបនេះបានឲ្យដឹងថា៖ «ប្រសិនបើពួកគេគិតបែបនោះ ពួកគេនឹងក្លាយជាមនុស្សល្ងង់។ ប៉ុន្តែបញ្ហានេះនឹងមិនកើតមានឡើងទេ»។

លោក Guardiola បានប្រាប់បន្តថា៖ «ខ្ញុំនឹងបង្ហាញដល់កីឡាកររបស់ខ្ញុំនៅថ្ងៃចន្ទ និងថ្ងៃអង្គារ ទៅលើរបៀបនៃការប្រកួតដ៏ល្អមួយដែលក្រុម Napoli នឹងត្រូវលេង។ ខ្ញុំនឹងបង្ហាញពួកគេ ដូចដែលខ្ញុំបានបង្ហាញពួកគេពីទម្រង់លេងរបស់ក្រុម Shakhtar Donetsk អ៊ីចឹង»។ ការប្រកួតនេះនឹងចាប់ផ្តើមនៅម៉ោង 1:45ទៀបភ្លឺ៕

ប្រភពពី៖ Sport24

October 17, 2017

Kane ប្រឈមមុខនឹងការសាកល្បងដ៏ធំ ពេល Spurs ប៉ះ Real រាត្រីនេះ

ខ្សែប្រយុទ្ធ Harry Kane ពិតជាអ្នកដើរតាមគន្លងរបស់តារាឆ្នើម Cristiano Ronaldo មែន ខណៈដែលរូបគេកំពុងសម្លឹងរកការកសាងកេរិ៍្តឈ្មោះឱ្យល្បីល្បាញដូចខ្សែប្រយុទ្ធអន្តរជាតិព័រទុយហ្គាល់រូបនោះក្នុងនាមជាកីឡាករដ៏ឆ្នើមបំផុតក្នុងពិភពលោកម្នាក់ដែរ ប៉ុន្តែសម្រាប់ពេលនេះ Ronaldo គឺជាអ្នកដែលកំពុងតែដេញតាមពីក្រោយរូបគេក្នុងការប្រជែងដើម្បីក្លាយជាខ្សែប្រយុទ្ធកំពូលក្នុងក្របខ័ណ្ឌ Champions League ។

Kane បានផ្លាស់ប្តូរទម្រង់លេងក្នុងក្របខ័ណ្ឌអឺរ៉ុបរបស់ក្រុម Tottenham Hotspur ពីការបរាជ័យកាលពីរដូវកាលមុន មកចាប់ផ្តើមយ៉ាងល្អឥតខ្ចោះ តាមរយៈការរកបានគ្រាប់បាល់បញ្ចូលទី5គ្រាប់ក្នុងចំណោមគ្រាប់បាល់សរុបទាំង6គ្រាប់របស់ក្រុម Spurs ក្នុងពេលពួកគេបានយកឈ្នះលើក្រុម Dortmund 3-1 និង APOEL 3-។ ការសាកល្បងដ៏ពិតប្រាកដសម្រាប់ Kane និងមិត្តរួមក្រុមរបស់គេ នឹងកើតឡើងនៅកីឡដ្ឋាន Santiago Bernabeu នៅរាត្រីនេះ ខណៈដែលក្រុម Real Madrid និង Ronaldo កំពុងតែរង់ចាំពួកគេ ក្រោយពីបានផ្តួលក្រុម Dortmund និង APOEL ក្នុងលទ្ធផល 3-1 និង 3-០ ដូចគ្នា ដោយ Ronaldo រកបាន4គ្រាប់ពីការប្រកួតទាំងពីរនោះ។

លោក Mauricio Pochettino អ្នកចាត់ការទូទៅរបស់ Spurs បានប្រាប់ស្ថានីយវិទ្យុរបស់អេស្ប៉ាញ នៅសប្តាហ៍នេះថា៖ «ពិតណាស់ វាគឺជាឱកាសមួយក្នុងការកំណត់ពីសមត្ថភាពរបស់យើង។ យើងនឹងត្រូវជួបក្រុមខ្លាំងបំផុតក្នុងពិភពលោក»។ គ្រូបង្វឹករូបនេះបានបន្ថែមទៀតថា៖ «យើងគឺជាក្រុមប្រជុំដោយកីឡាករវ័យក្មេង និងកីឡាករអន្តរជាតិជាច្រើន ប៉ុន្តែមិនមានបទពិសោធច្រើនក្នុងការលេងក្នុងប្រភេទនៃការប្រកួតបែបនេះឡើយ។ វាជាការសាកល្បងជាមូលដ្ឋានគ្រឹះមួយ»។

លោក Pochettino បានបន្ថែមទៀតថា៖ «Kane គឺជាខ្សែប្រយុទ្ធម្នាក់ក្នុងចំណោមខ្សែប្រយុទ្ធដែលមានទម្រង់លេងល្អបំផុតក្នុងពិភពលោក មានមនុស្សជាច្រើននិយាយពីចំណុចនេះរួចហើយ»។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

ប្រភពពី៖ Daily Stars

October 17, 2017

ថែរក្សាសុខភាព សម្ផស្ស បែបបច្ចេកវិទ្យាថ្មីចេញពីខាងក្នុង ពីគ្លីនិក Dr. Rich

ជាការឆ្លើយតបទៅនឹងតម្រូវការជាចាំបាច់ទៅលើការបម្រើសេវាផ្នែកថែរក្សាសុខភាព និងព្យាបាលសម្ផស្សឱ្យនៅតែមានភាពស្រស់ស្អាតក្មេងជាងវ័យនោះ អ្នកជំនាញផ្នែកសម្រស់មកពីប្រទេសថៃបានប្រកាសបើកសម្ពោធគ្លីនិក ថែរក្សាសុខភាព និងសម្ផស្ស Dr.Rich យ៉ាងឱឡារិកនៅសណ្ឋាគារជូលីណា ភ្នំពេញ ជាមួយនឹងការផ្តើមទទួលបម្រើលើសេវាដ៏ពេញនិយមមួយនេះនៅកម្ពុជា ដោយរាល់អ្នកដែលប្រាថ្នាចង់បានរូបសម្រស់ស្រស់ស្អាតគួរជាទីគយគន់ មិនចាំបាច់ចំណាយពេលវេលា និងថវិកាយ៉ាងសន្ធឹកសន្ធាប់ចាកចេញទៅក្រៅប្រទេស ដើម្បីស្វែងរកសេវាព្យាបាលសម្រស់នោះទៀតឡើយ ។

នៅល្ងាចថ្ងៃទី14 ខែតុលា ឆ្នាំ2017 កន្លងទៅនេះ ក្រោមការចូលរួមអបអរសាទរពីសំណាក់ភ្ញៀវកិត្តិយសជាតិ-អន្តរជាតិជាច្រើននាក់ រួមមានអ្នកតំណាងស្ថានទូតថៃប្រចាំនៅកម្ពុជា អ្នកជំនួញធំៗ តារាខ្មែរ-ថៃ ប្រុស-ស្រី ល្បីឈ្មោះជាច្រើនដួង រួមជាមួយបណ្តាអ្នកសារព័ត៌មានយ៉ាងកុះករ លោកស្រី IRADA BAMA នាយិកាគ្រប់គ្រងគ្លីនិកថែរក្សាសុខភាព និងសម្ផស្ស Dr.Rich បានបញ្ជាក់ថា៖ Dr.Rich គឺជាគ្លីនិកកែសម្ផស្សបែបថ្មី កម្រិត Premium ដែលរួមបញ្ចូលគ្នារវាងការថែរក្សាសុខភាពពីខាងក្នុង និងសុខភាពស្បែកឱ្យស្រស់ស្អាតជាមួយនឹងបច្ចេកទេសទំនើប មានសមត្ថភាពអាចកាត់បន្ថយភាពចាស់ជាងវ័យ ស្បែកជ្រីវជ្រួញ ឱ្យប្រែក្លាយមកស្រស់ស្អាតគួរជាទីទាក់ទាញបំផុត ។

លោកស្រី IRADA បានបន្តទៀតថា ៖ «ជាមួយនឹងការនាំយកបច្ចេកវិទ្យាទំនើបក្នុងការថែរក្សា និងព្យាបាលសម្ផស្ស ក្រោមភាពជំនាញរបស់អ្នកមានឯកទេសផ្នែកសម្ផស្សច្បាស់លាស់មកពីប្រទេសថៃប្រកបដោយវិជ្ជាជីវៈនាពេលនេះ យើងក៏មានសេវាកម្មតាមរបៀប Anti-Aging ដែលជាការទទួលពិនិត្យសុខភាពខាងក្នុងដោយជ្រើសរើសយកវីតាមីន និងអាហារបំប៉នសុខភាពមួយចំនួន មានលទ្ធភាពខ្ពស់ក្នុងការធ្វើឱ្យសុខភាពល្អ និងសម្រស់ស្រស់ស្អាតក្មេងជាងវ័យយ៉ាងមានប្រសិទ្ធភាពតាំងពីពេលចាប់ផ្តើមលើកដំបូង»។

សូមបង្កើនភាពស្រស់ស្អាតរបស់លោកអ្នកលោកជាមួយគ្លីនិក Dr. Rich ចាប់ពីពេលនេះតទៅ…

October 17, 2017

George Weah អតីតតារាបាល់ទាត់ឆ្នើម កំពុងប្រជែងតំណែងប្រធានាធិបតី នៅលីបេរីយ៉ា

អតីតតារាបាល់ទាត់ដ៏ឆ្នើមលោក George Weah ដែលក៏ធ្លាប់បានឈ្នះពានកីឡាករឆ្នើម Ballon d’Or ប្រចាំឆ្នាំរបស់ពិភពលោកផងដែរនោះនឹងត្រូវឈ្នះការប្រកួតជុំទី1នៃការបោះឆ្នោតជ្រើសរើសប្រធានាធិបតីក្នុងប្រទេសលីបេរីយ៉ា ក្រោយពីក្រុមប្រឹក្សារៀបចំការបោះឆ្នោតបានបញ្ជាក់កាលពីថ្ងៃអាទិត្យថា លោកកំពុងតែនាំមុខជាមួយនឹងសំឡេងឆ្នោត39ភាគរយ ខណៈសន្លឹកឆ្នោតដែលមិនទាន់រាប់នៅសល់ត្រឹមតែ5ភាគរយទៀតប៉ុណ្ណោះ។

លោក Weah នឹងត្រូវធ្វើការប្រជែងជាមួយនឹងអនុប្រធានាធិបតី គឺលោក Joseph Boakai ដែលកំពុងតែស្ថិតក្នុងចំណាត់ថ្នាក់លេខ 2ជាមួយនឹងសំឡេងឆ្នោត 29.1ភាគរយ ក្នុងការបោះឆ្នោតជុំទី2 នៅខែក្រោយនេះ។ លោក Boakai មានសំឡេងឆ្នោតច្រើនជាងបេក្ខភាពឈរក្នុងចំណាត់ថ្នាក់លេខ3គឺលោកមេធាវី Charles Brumskine ចំនួន២៨ម៉ឺនសន្លឹក។ លទ្ធផលចុងក្រោយ ដែលត្រូវបានផ្អែកទៅលើលទ្ធផលពីការបោះឆ្នោតកាលពីថ្ងៃអង្គារ នឹងត្រូវប្រកាសនៅត្រឹមថ្ងៃទី25 ខែតុលា ខាងមុខនេះ។ បេក្ខភាពសរុបចំនួន20នាក់បានចូលរួមប្រកួតប្រជែងក្នុងការបោះឆ្នោតកាលពីសប្តាហ៍មុនដើម្បីប្រជែងយកតំណែងពីលោក Ellen Johnson Sirleaf ម្ចាស់ពានណូបែលសន្តិភាពពិភពលោក ក្នុងការផ្លាស់ប្តូររបបនយោបាយប្រជាធិបតេយ្យជាលើកទី1ក្នុងប្រទេសលីបេរីយ៉ា ក្នុងរយៈពេលច្រើនជាង70ឆ្នាំមកហើយ។

សូមបញ្ជាក់ថា លោក Weah គឺជាខ្សែប្រយុទ្ធដ៏ឆ្នើមម្នាក់ ខណៈដែលលោកបានចាប់ផ្តើមអាជីពជាកីឡាបាល់ទាត់របស់លោកនៅក្នុងទ្វីបអឺរ៉ុប ជាមួយនឹងក្លិប Monaco របស់បារាំង ក្នុងឆ្នាំ1988។ ក្រោយមក លោកបានផ្ទេរទៅកាន់ក្លិប Paris Saint-German ក្នុងឆ្នាំ1992 មុននឹងផ្ទេរទៅកាន់ក្លិប AC Milan ក្នុងឆ្នាំ1995។ ជាមួយនឹងក្លិបយក្សរបស់អ៊ីតាលីមួយនេះ លោកបានជួយឲ្យពួកគេឈ្នះពានក្របខ័ណ្ឌ Serie A ក្នុងរដូវកាលទី1របស់លោក ខណៈដែលលោកបានបញ្ចប់ក្នុងនាមជាអ្នករកបានគ្រាប់បាល់ច្រើនជាងគេនៅរដូវកាលនោះ។

ក្រោយពីបានឈ្នះពានជាបន្តបន្ទាប់ និងទទួលបានភាពជោគជ័យដ៏អស្ចារ្យក្នុងក្លិប AC Milan លោក Weah បានឈ្នះពាន Ballon d’Or និងជាប់ជាកីឡាករឆ្នើមប្រចាំឆ្នាំក្នុងពិភពលោករបស់ FIFA ក្នុងឆ្នាំ1995 ដើម្បីក្លាយជាកីឡាករអាហ្វ្រិកដំបូងគេក្នុងការឈ្នះពាននេះ៕

ប្រភពពី៖ Sports.yahoo.com

October 17, 2017

ស្ពានអាកាសពីរទៀតនឹងបង្ហាញវត្ដមានក្នុងរាជធានីភ្នំពេញឆាប់ៗនេះ

ភ្នំពេញ – ជាដំណោះស្រាយក្នុងការជួយសម្រួលដល់ការលំបាកក្នុងការធ្វើដំណើរទៅមករបស់ប្រជាពលរដ្ឋក្នុងរាជធានីភ្នំពេញដោយសារតែមានការកកស្ទះស្ទើរតែរៀងរាល់ថ្ងៃនៅក្នុងត្រង់ចំណុចច្រមុះជ្រូក ឬកែងផ្លូវ271ជាមួយនឹងផ្លូវសម្ដេចតេជោ និងមួយទៀតត្រង់ចំណុចរង្វង់មូលចោមចៅនោះ រដ្ឋបាលសាលារាជធានីភ្នំពេញបានសម្រេចសាងសង់ស្ពានអាកាសត្រង់ចំណុច2នេះបន្ថែមទៀត។

ឯកឧត្ដម ឃួង ស្រេង អភិបាលរាជធានីភ្នំពេញមានប្រសាសន៍ថា នៅក្នុងរាជធានីភ្នំពេញបច្ចុប្បន្នមានប្រជាពលរដ្ឋរស់នៅ និងចេញចូលជាប្រចាំក្នុងរង្វង់ 3លាននាក់ ពិសេសរថយន្ដបានចេញចូលធ្វើចរាចរយ៉ាងច្រើនសន្ធឹកសន្ធាប់ និងមានប្រជាជនធ្វើដំណើរចេញចូលមកពីតាមបណ្ដាខេត្ដនានាយ៉ាងច្រើនទៀតផង ដូច្នេះក្នុងនាមសាលារាជធានីភ្នំពេញ យើងចាំបាច់ត្រូវតែគិតគូរបន្ថែមដើម្បីធ្វើយ៉ាងណាជូយសម្រួលដល់ការធ្វើដំណើរបស់ប្រជាពលរដ្ឋ និងនៅពេលមានការកកស្ទះចរាចរណ៍។

លោកអភិបាលរាជធានីភ្នំពេញ បញ្ជាក់ថា៖ «នៅក្នុងគម្រោងរបស់សាលារាជធានីភ្នំពេញ នៅពេលធ្វើស្ពានអាកាសផ្លូវចោមចៅ និងស្ពានអាកាសនៅត្រង់ម្ដុំច្រមុះជ្រូកជិតក្បាលថ្នល់ (ផ្លូវអគ្គមហាសេនាបតីតេជោហ៊ុនសែន កែងនឹងផ្លូវ271 )ហើយ យើងមានគម្រោងធ្វើស្ពានអាកាស ឬអាចធ្វើផ្លូវក្រោមដីបន្ថែមទៀត ធ្វើយ៉ាងណាឱ្យបងប្អូនពលរដ្ឋយើងអាចធ្វើដំណើរទៅមកបានដោយសុវត្ថិភាព និងមិនមានការកកស្ទះចរាចរណ៍»។

គួរបញ្ជាក់ថា នៅក្នុងរាជធានីភ្នំពេញមានស្ពានអាកាសសរុបចំនួន5ទីតាំងហើយ ក្នុងនោះមានដូចជាស្ពានអាកាសក្បាលថ្នល់ ស្ពានអាកាស7មករា ស្ពានអាកាសតិចណូ ស្ពានអាកាសស្ទឹងមានជ័យ និងស្ពានអាកាសផ្សារដីហុយដែលស្ថិតនៅលើផ្លូវសហព័ន្ធរុស្សី៕

October 17, 2017

គន្លឹះជោគជ័យក្នុងការធ្វើអាជីវកម្មសម័យ Digital

ក្នុងន័យផ្តល់ជាការចំលែកបទពិសោធន៍ក៏ដូចជាផ្តល់កម្លាំងចិត្តដល់ម្ចាស់អាជីវកម្មថ្មីៗ ក៏ដូចជាម្ចាស់អាជីវកម្មដែលកំពុងដំណើរការ និងត្រូវការពង្រីកអាជីវកម្មនោះ ជាថ្មីម្តងទៀតក្នុងខែតុលានេះ ផាកកាហ្វេ និងវិទ្យាស្ថានអភិវឌ្ឍន៍វិស័យអប់រំ មានកិត្តិយសអញ្ជើញវាគ្មិនដ៏ល្បីល្បាញចំនួន 02រូបមកធ្វើការបកស្រាយពីវិធីសាស្ត្រក្នុងការធ្វើអាជីវកម្ម ក៏ដូចជាចែករំលែកបទពិសោធន៍របស់លោកកន្លងមកក្នុងកម្មវិធីកិច្ចសន្ទនារពាណិជ្ជកម្មដែលនឹងប្រព្រឹត្តទៅក្រោមប្រធានបទ “គន្លឹះជោគជ័យក្នុងការធ្វើអាជីវកម្មសម័យ Digital” ។

វាគ្មិនកិត្តិយសកំពូលចំនួនពីររូបដែលនឹងមកចែករំលែកបទពិសោធន៍ដ៏មានតម្លៃរបស់

KHiM Sok HENG Founder & Chairman Learning for Success Institute
Chy Sila CEO Sabay Digital Corporation.

ស្វែងយល់កាន់តែច្បាស់អំពី៖
១. ហេតុអ្វីត្រូវសម្រេចចិត្តធ្វើអាជីវកម្ម?
២. អ្វីជាដើមទុនចម្បងក្នុងការធ្វើអាជីវកម្ម? រកទុននោះតាមវិធីណា?
៣. យុទ្ធសាស្ត្រ និងតិកនិកក្នុងការប្រើប្រាស់បណ្តាញសង្គម (Social Network) ក្នុងដំណើរការអាជីវកម្ម
៤. តើត្រូវពិនិត្យ និងធ្វើយ៉ាងណាដើម្បីដើរអោយទាន់សម័យ Digital?
៥. តើអាជីវកម្មថ្មីថ្មោងអាចរីកចម្រើនបានយ៉ាងដូចម្តេចនៅសម័យ Digital?
៦. តើយុទ្ធសាស្ត្រអ្វីដែរអនុញ្ញាតឲ្យក្រុមហ៊ុនមួយរីកចម្រើនខ្លាំងក្នុងសម័យ Digital?
៧. ស្រាយចម្ងល់ផ្សេងៗតាមរយៈការជជែកវែកញែកបន្ថែមជាមួយវាគ្មិននិងអ្នកចូលរួមជាច្រើនទៀត។

កុំភ្លេចជួបគ្នានៅ ផាកកាហ្វេ សាខាបឹងកេងកងត្រសក់ផ្អែម! Location Map: https://goo.gl/yzJjBX

កាលបរិច្ឆេទ ៖ ថ្ងៃទី25 តុលា 2017

ពេលវេលា៖ 05:30នាទី

តម្លៃសំបុត្រ៖ 15ដុល្លារ

ទំនាក់ទំនង ៖ 012 32 28 22/ 012 232 823

***បញ្ជាក់តម្លៃសំបុត្រនេះមានការរួមបញ្ចូលជាមួយនឹង Cocktail Networking រួចជាស្រាច់។

កុំស្ទាក់ស្ទើរ !បើចង់ចូលរួមសូមចុះឈ្មោះ ទីនេះ

October 17, 2017

ព្រឹត្តិការណ៍បាល់ទាត់ដណ្ដើមពាន BNI Cambodia ឆ្នាំ2017 ចាប់ផ្តើមធ្វើការជម្រុះ

ស្ថិតនៅលើគោលជំហរនៃការរឹតចំណងមិត្តភាព និងបង្កើនទំនាក់ទំនងឱ្យកាន់តែស្និទ្ធស្នាលរវាងបណ្តុំអ្នកជំនួញ ដែលជាម្ចាស់អាជីវកម្មក្នុងស្រុក សមាគម BNI Cambodia បានបង្កើតព្រឹត្តិការណ៍បាល់ទាត់ប្រចាំឆ្នាំ ប្រកួតដណ្ដើមពានរង្វាន់ ប៊ី អិន អាយ កម្ពុជា 2017 (BNI Cambodia 2017) ក្រោមការសម្របសម្រួលពីសំណាក់លោក អ៊ីវ គឹមសួរ អ្នកតំណាងអោយ BNI Cambodia ដែលមកពី Master Chapter ។ សម្រាប់ការប្រកួតដ៏ធំប្រចាំឆ្នាំរបស់សមាគម BNI Cambodia នេះ ត្រូវបានប្រារព្ធពិធីបើកវគ្គនៃរដូវកាលថ្មីកាលពីរសៀលថ្ងៃទី14 ខែតុលា ឆ្នាំ2017 នៅពហុកីឡដ្ឋាន វេស្ទើន រាជធានីភ្នំពេញ ។

លោក អ៊ីវ គឹមសួរ អ្នកសម្របសម្រួលព្រឹត្តិការណ៍បាល់ទាត់ដណ្ដើមពានរង្វាន់ប្រចាំឆ្នាំ2017 បានបញ្ជាក់ឱ្យដឹងថា ការប្រកួតដណ្ដើមពានរង្វាន់ប្រចាំឆ្នាំនាពេលនេះ គឺជាការបង្ហាញពីសមត្ថភាព និងកិច្ចសហការដ៏ល្អរបស់សមាជិកក្នុងក្រុមនីមួយៗ ។ សម្រាប់ក្រុមកីឡាករដែលចូលរួមប្រកួតទាំងអស់មានចំនួន 8 ក្រុម នឹងធ្វើការប្រកួតសន្សំពិន្ទុ និងជម្រុះវិលជុំ នៅរៀងរាល់ថ្ងៃសៅរ៍ និងថ្ងៃអាទិត្យ វេលាម៉ោង3 រហូតដល់ម៉ោង7យប់ ជាមួយនឹងការបើកយ៉ាងទូលាយសម្រាប់អ្នកចូលរួមទស្សនាដោយសេរី ព្រមទាំងទទួលបានភេសជ្ជៈទទួលទានដោយឥតគិតថ្លៃ។

សូមចូលរួមគាំទ្រវិស័យកីឡាបាលទាត់ទាំងអស់គ្នា…..

October 17, 2017

Author: វល័ក្ខ