វល័ក្ខ - La Reine Media

Hazard សម្លឹងរកការបង្កើតភាពអស្ចារ្យ ពេល Chelsea ជួប Roma នៅរាត្រីនេះ

ក្រោយពីជួបការខកចិត្តដោយសារតែការបរាជ័យរបស់គេកាលពីពេលមុន តារាឆ្នើម Eden Hazard របស់ក្លិប Chelsea ត្រូវបានជំរុញឲ្យបង្កើតភាពអស្ចារ្យរបស់គេក្នុងក្របខ័ណ្ឌ Champions League នៅរាត្រីនេះ។

ស្របពេលដែលខ្សែប្រយុទ្ធ Cristiano Ronaldo , Lionel Messi និង Neymar សុទ្ធសឹងបានពង្រឹងទីតាំងរបស់ពួកគេក្នុងនាមជាកីឡាករកំពូល តាមរយៈការបង្ហាញពីទម្រង់លេងយ៉ាងល្អឥតខ្ចោះក្នុងយុទ្ធនាការកំពូលអឺរ៉ុបនេះ Hazard នៅតែជួបការខកចិត្តក្នុងយុទ្ធនាការនេះ។ សមត្ថភាពរបស់ Hazard ពិតជាអស្ចារ្យ ហើយខ្សែបម្រើអន្តរជាតិបែលហ្ស៊ិករូបនេះ បានជាប់ឈ្មោះក្នុងបញ្ជីចម្រាញ់ចុងក្រោយរបស់បេក្ខភាពដែលត្រូវឈ្នះពាន Ballon d’Or ឆ្នាំ2017 ក្រោយពីបានលេងក្នុងតួនាទីដ៏សំខាន់ក្នុងពេលក្រុម Chelsea លើកពាន Premier League កាលពីរដូវកាលមុន និងទោះបីអាចទម្លុះតំបន់ការពារក្នុងការប្រកួតលីកក្នុងស្រុកជាច្រើនបានមែន ប៉ុន្តែចាប់តាំងពី Hazard ធ្វើការបង្ហាញខ្លួនជាលើកទី1របស់គេក្នុងក្របខ័ណ្ឌ Champions League ជាមួយនឹងក្រុម Lille កាលពីឆ្នាំ2011មក រូបគេបានបង្កើតឲ្យមានភាពអស្ចារ្យបន្តិចបន្តួចប៉ុណ្ណោះក្នុងក្របខ័ណ្ឌកំពូលរបស់អឺរ៉ុបមួយនេះ។ ហេតុនេះហើយ ការប្រកួតរបស់ក្រុម Chelsea ជាមួយនឹង Roma នៅរាត្រីនេះ នឹងផ្តល់ឱកាសដល់ Hazard ក្នុងការផ្លាស់ប្តូរសំណាងមិនល្អរបស់គេ។ ដោយដឹងថា Hazard បច្ចុប្បន្នកំពុងតែស្ថិតក្នុងឆ្នាំដ៏កំពូលរបស់គេ លោក Antonio Conte អ្នកចាត់ការទូទៅរបស់ក្រុម Chelsea បានលើកទឹកចិត្តឲ្យកីឡាកររូបនេះបង្ហាញពីសមត្ថភាពដ៏អស្ចារ្យរបស់ខ្លួន។

ក្រុម Chelsea នឹងឈានទៅកាន់ការប្រកួតនេះប្រកបដោយការជឿជាក់ ក្រោយពីបានកត់ត្រាជ័យជម្នះ2លើកពីការប្រកួតបើកឆាកក្នុងពូលទាំងពីរលើករបស់ពួកគេ ក្នុងនោះរាប់បញ្ចូលទាំងការយកឈ្នះលើក្រុម Atletico Madrid 2-1 កាលពី3សប្តាហ៍មុនផងដែរ។ ដោយឡែក ក្រុម Roma បច្ចុប្បន្នកំពុងតែស្ថិតក្នុងចំណាត់ថ្នាក់លេខ2ក្នុងពូលរបស់ខ្លួន ដោយមាន4ពិន្ទុពីការប្រកួតពីរលើក។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

ប្រភពពី៖ Sports.yahoo.com

October 18, 2017

បញ្ញា សិទ្ធ បញ្ជាក់ថា ការស្លាប់របស់អ្នកនាង សាន ស្រីឡៃ មិនពាក់ព័ន្ធនឹងខ្លួនទេ

នៅថ្ងៃទី17 ខែតុលា ឆ្នាំ2017 តារាចម្រៀង និងសម្ដែង បញ្ញា សិទ្ធ បានចេញមុខបកស្រាយជាវីដេអូ Live នៅលើបណ្ដាញទំនាក់ទំនងសង្គម Facebook អំពីរឿងការចោទប្រកាន់ពីសំណាក់មជ្ឈដ្ឋានមហាជនថា លោកមានទំនាក់ទំនងស្នេហាស៊ីជម្រៅជាមួយអ្នកនាង សាន ស្រីឡៃ ដែលជាមូលហេតុបង្កឱ្យភ្លើងប្រចណ្ឌឆាបឆេះឡើង រហូតដល់មានការបាញ់សម្លាប់យ៉ាងរន្ធត់ និងសង្វេគមួយនេះ។

តាមរយៈវីដេអូដែលបាន Live នៅវេលាម៉ោង 8:53 នាទីពេលយប់ លោក បញ្ញា សិទ្ធ បានបញ្ជាក់ថា “អ្នកទាំងអស់គ្នា ក៏ដូចជាបណ្ដាសារព័ត៌មានដែរ តើមានដឹងរឿងខ្ញុំច្បាស់ឬអត់ ដែលបានចោទប្រកាន់ថា ខ្ញុំមានទំនាក់ទំនងជាមួយប្អូនស្រី សាន ស្រីឡៃ តើមានដឹងរឿងច្បាស់អត់?! ជាពិសេសអ្នកដែលបាន Share និង Comment ថាឱ្យខ្ញុំជាមួយប្អូនស្រី សាន ស្រីឡៃ តើមានដឹងរឿងច្បាស់ឬអត់?!” ។ តារាប្រុសរូបនេះបានអះអាងថា លោកជាមួយនឹងអ្នកនាង សាន ស្រីឡៃ ព្រមទាំងតារាចម្រៀងជាច្រើនរូបទៀតគឺជាជាមិត្តរួមអាជីព ដែលបម្រើការច្រៀងនៅក្នុងក្លិបរាត្រីមួយ ហើយបានរាប់អានស្និទ្ធស្នាលនឹងគ្នាដូចជាបងប្អូនបង្កើត ដែលសូម្បីតែម្ដាយ បងប្អូនស្រីរបស់ស្រីឡៃ និងមិត្តភ័ក្ដិជាច្រើនទៀតនៅក្នុងចង្កោមសិល្បៈក៏បានដឹងច្បាស់អំពីរឿងនេះផងដែរ។

យ៉ាងណាមិញ តារាប្រុសស្រស់សង្ហារូបនេះបានសង្កត់ធ្ងន់ថា រឿងដែលចោទប្រកាន់នេះ ពោលគឺបានប៉ះពាល់ និងមានបញ្ហាដល់រូបលោកជាខ្លាំង ព្រោះថា លោកភ័យខ្លាចបងប្អូនខាងអតីតស្វាមីរបស់ សាន ស្រីឡៃ យល់ច្រឡំចំពោះរូបលោក ខណៈដែលបានឃើញបណ្ដាសារព័ត៌មានបានចុះផ្សាយអំពីលោក និងអ្នកនាងសាន ស្រីឡៃយ៉ាងដូច្នោះ។ លោក សិទ្ធ អះអាងថា “បើ ស្រីឡៃ គាត់នៅរស់ ហើយមានរឿងហ្នឹងកើតឡើងគាត់អាចបកស្រាយបាន ក៏ប៉ុន្ដែឥឡូវនេះ គាត់ទទួលមរណភាពទៅហើយ តើអ្នកណាគេជាអ្នកបកស្រាយ?”។

ជាចុងក្រោយ លោក បញ្ញា សិទ្ធ បានលើកម្រាមដៃដប់សំពះ និងអំពាវនាវថា “ខ្ញុំសូមឱ្យបណ្ដាសារព័ត៌មានទាំងអស់នៅក្នុងប្រទេសរបស់យើង មុននឹងចុះផ្សាយសូមទូរស័ព្ទមកសួរខ្ញុំជាមុនសិន សូមឱ្យខ្ញុំបានបកស្រាយខ្លះ កុំចេះតែសរសេរតាមគ្នា”។ ដើម្បីឱ្យកាន់តែជាក់ច្បាស់ សូមទស្សនាវីដេអូបកស្រាយខាងក្រោមនេះ៕

October 18, 2017

អ្នកធ្វើដំណើរតាមយន្តហោះនៅកម្ពុជាកើនឡើងខ្លាំងនៅត្រីមាសទី3

ភ្នំពេញ៖ ដោយឈរលើកំណើនសេដ្ឋកិច្ចរឹងមាំក្នុងរង្វង់7%ជារៀងរាល់ឆ្នាំក្នុងរយៈពេល2ទសវត្សរ៍ចុងក្រោយ បានធ្វើឱ្យអ្នកវិនិយោគក៏ដូចជាអ្នកទេសចរកម្ពុជាធ្វើដំណើរតាមជើងយន្តហោះមានការកើនឡើងខ្លាំងនៅត្រីមាសទី3 ឆ្នាំ2017នេះ។

តាមការឱ្យដឹងពីក្រុមហ៊ុន Vinci Airports ដែលជាក្រុមហ៊ុនមេរបស់ក្រុមហ៊ុន Cambodia Airports បានបង្ហាញថា ចំនួនអ្នកទេសចរ និងអ្នកវិនិយោគដែលធ្វើដំណើរតាមព្រលានយន្តហោះអន្តរជាតិទាំង3របស់កម្ពុជាមានការកើនឡើងប្រមាណជា25.7 % គិតត្រឹមត្រីមាសទី3 បើធៀបនឹងរយៈពេលដូចគ្នាកាលពីឆ្នាំ2016។

របាយការណ៍របស់ក្រុមហ៊ុន Vinci បានបង្ហាញថា អ្នកធ្វើដំណើរតាមព្រលានយន្តហោះអន្តរជាតិទាំង3របស់កម្ពុជាមានចំនួនកើនឡើងយ៉ាងខ្លាំងក្នុងអំឡុងត្រីមាសដំបូងក្នុងឆ្នាំនេះ ដោយចំនួននេះបើគិតជាភាគរយ គឺបានកើនឡើងដល់ 25.7% បើធៀបនឹងរយៈពេលដូចគ្នាកាលពីឆ្នាំមុន។

ក្នុងចំនួននេះ ព្រលានយន្តហោះអន្តរជាតិភ្នំពេញទទួលបានអ្នកដំណើរឆ្លងកាត់24.5% ព្រលានយន្តហោះអន្តរជាតិសៀមរាប 21.8% និងព្រលានយន្តហោះអន្តរជាតិក្រុងព្រះសីហនុ កើនឡើង16.2%។

លោក ខែក នរិន្ទដា នាយកផ្នែកទំនាក់ទំនងនៅក្រុមហ៊ុន Cambodia Airports បានប្រាប់អ្នកយកព័ត៌មានរដ្ឋ(AKP)ឱ្យដឹងថា ការកើនឡើងនៃចំនួនអ្នកដំណើរឆ្លងកាត់ព្រលានយន្តហោះទាំងបីរបស់កម្ពុជានាពេលនេះ បានមកពីកត្តារួមផ្សំគ្នារវាងស្ថានភាពសេដ្ឋកិច្ច និងកំណើនអ្នកដំណើរដ៏រឹងមាំរបស់កម្ពុជាដែលនៅតែបន្តកើនឡើងក៏ដូចជាការបើកជើងហោះហើរថ្មីៗបន្ថែមពីប្រទេសផ្សេងៗមកកាន់កម្ពុជាផងដែរ គួបផ្សំជាមួយនឹងការធ្វើដំណើរតាមផ្លូវអាកាសរបស់ពិភពលោក និងក្នុងតំបន់អាស៊ីប៉ាស៊ីហ្វិកដែលនៅតែបន្តបង្ហាញសញ្ញាកើនឡើង។ លោកបានបន្ដថា អាកាសចរណ៍កម្ពុជាបានដើរតួនាទីដ៏សំខាន់ក្នុងការលើកកម្ពស់វិស័យទេសចរណ៍ និងសេដ្ឋកិច្ច ដែលវាមិនគ្រាន់តែទាក់ទាញការមកដល់នៃភ្ញៀវទេសចរអន្តរជាតិប៉ុណ្ណោះទេ ប៉ុន្តែក៏ទាក់ទាញទេសចរក្នុងស្រុកផងដែរ។

សូមបញ្ជាក់ថា Vinci Airports ដែលជាក្រុមហ៊ុនមេរបស់ក្រុមហ៊ុន Cambodia Airports កំពុងគ្រប់គ្រងភាគហ៊ុន70% លើការវិនិយោគរួមគ្នាដែលកំពុងប្រតិបត្តិការនៅព្រលានយន្តហោះ អន្តរជាតិទាំង 3 របស់ប្រទេសកម្ពុជា ហើយក្រុមហ៊ុននេះក៏កំពុងវិនិយោគលើទឹកប្រាក់100 លានដុល្លារបន្ថែមក្នុងការបង្កើនសមត្ថភាពព្រលានយន្តហោះភ្នំពេញ និងសៀមរាបដើម្បីទទួលបានអ្នកដំណើរសរុប10លាននាក់ក្នុងមួយឆ្នាំ៕

October 18, 2017

បន្ដិចទៀត កម្ពុជាអាចគ្រប់គ្រងគម្របព្រៃឈើតាមរយៈប្រព័ន្ធផ្កាយរណបបានហើយ

ភ្នំពេញ – ដើម្បីចូលរួមថែរក្សាជីវចម្រុះ និងគម្របព្រៃឈើឱ្យមាននិរន្ដរភាព និងការពារបាននូវការបាត់បង់បន្ដទៅទៀត រាជរដ្ឋាភិបាលជប៉ុននឹងបញ្ចេញថវិកាដើម្បីទិញទិន្នន័យដែលសហរដ្ឋអាមេរិកថតទៅលើគម្របព្រៃឈើដែលអាចប្រើប្រាស់ក្នុងការគ្រប់គ្រងជាមួយប្រព័ន្ធផ្កាយរណបបាន។

ឯកឧត្តម Hidehisa HORINOUCHI ឯកអគ្គរាជទូតជប៉ុនប្រចាំកម្ពុជា បានមានប្រសាសន៍ថា រដ្ឋាភិបាលជប៉ុនបានចូលរួមជួយក្នុងកម្មវិធីនេះ គឺដើម្បីធ្វើយ៉ាងណាឱ្យកម្ពុជាកាន់តែមានភាពងាយស្រួលក្នុងការគ្រប់គ្រង និងការការពារអភិរក្សគម្របព្រៃឈើ ក៏ដូចជាការបង្កើនធនធានធម្មជាតិនៅកម្ពុជាឱ្យមានការកកើតឡើងវិញជាបន្ដបន្ទាប់ដែរ។

ការត្រួតពិនិត្យគម្របព្រៃឈើតាមរយៈផ្កាយរណបនឹងជួយឱ្យកម្ពុជាមានលទ្ធភាពទទួលបានទិន្នន័យច្បាស់លាស់ និងមានលទ្ធផលល្អ ព្រមទាំងឈានទៅដល់ការកាត់បន្ថយការបាត់បង់រេចរិល និងអាចគ្រប់គ្រងគម្របព្រៃឈើបានដោយនិរន្ដរភាពទៅថ្ងៃអនាគត។ ក្នុងនោះរដ្ឋាភិបាលជប៉ុន និងជួយចេញការចំណាយក្នុងការទិញទិន្នន័យដែលថតបានដោយសហរដ្ឋអាមេរិកសម្រាប់ត្រួតពិនិត្យគម្របព្រៃឈើនៅកម្ពុជា។

រហូតមកដល់ពេលនេះអង្គការJica និងអង្គការមួយចំនួនទៀតបានរួមគ្នាកសាងសមត្ថភាពបច្ចេកទេសផ្ដល់ឧបករណ៍វាស់វែង រាយការណ៍ ផ្ទៀងផ្ទាត់ព្រៃឈើ និងបង្កើតនូវប្រព័ន្ធតាមដានព្រៃឈើ និងផែនទីគម្របព្រៃឈើមួយដែលមានលក្ខណៈស្ដង់ដារអាចដឹងពីទិន្នន័យនៃការប្រែប្រួល និងមូលហេតុអ្វីខ្លះដែលធ្វើឱ្យគម្របព្រៃឈើមានការប្រែប្រួលដើម្បីចាត់វិធានការដោះស្រាយឱ្យបានទាន់ពេលវេលា។

ឯកឧត្តម យិន គឹមស៊ាន រដ្ឋលេខាធិការក្រសួងបរិស្ថានបានសម្ដែងនូវអារម្មណ៍រីករាយដែលជប៉ុនបានជំនួយដល់បច្ចេកទេស និងកិច្ចសហប្រតិបត្តិការកសាងសមត្ថភាពសម្រាប់កម្មវិធីរេដបូក ជាពិសេសការគាំទ្រដល់រាជរដ្ឋាភិបាលកម្ពុជាដែលបានឈានដល់ការបង្ហាញផែនទីគម្របដី/ការប្រើប្រាស់ដីចុងក្រោយរបស់ខ្លួន។

រដ្ឋលេខាធិការក្រសួងបរិស្ថានបានសម្ដែងការអបអរសាទរផងដែរ ដល់ក្រុមបច្ចេកទេស JICA ដែលនឹងជួយបញ្ចប់ការបង្កើតក្របខ័ណ្ឌរេដបូក ហើយប្រទេសជប៉ុននឹងបន្តជួយគាំទ្រដល់រដ្ឋាភិបាលកម្ពុជាបន្ថែមទៀតក្នុងការអនុវត្តកម្មវិធីរេដបូកនៅទីវាល និងជួយការពារប្រព័ន្ធជីវចម្រុះព្រៃឈើដ៏មានតម្លៃរបស់កម្ពុជា។

ជាមួយគ្នានេះដែរ ឯកឧត្តមរដ្ឋលេខាធិការ និងឯកឧត្តមឯកអគ្គរាជទូតជប៉ុនប្រចាំនៅកម្ពុជា រួមជាមួយនឹងអ្នកពាក់ព័ន្ធដ៏ទៃទៀតបានកៀរគរការគាំទ្របន្តទៀតដល់ការអនុវត្តកម្មវិធីរេដបូកសម្រាប់ការគ្រប់គ្រង និងអភិរក្សធនធានព្រៃឈើប្រកបដោយនិរន្តរភាព។ រដ្ឋាភិបាលជប៉ុននឹងបន្តពង្រឹងកិច្ចសហប្រតិបត្តិការជាមួយរាជរដ្ឋាភិបាលកម្ពុជាក្នុងការអនុវត្តសកម្មភាពការងារដោះស្រាយការបាត់បង់ព្រៃឈើនៅកម្ពុជា៕

October 18, 2017

ហេតុអ្វីបានគេថា មនុស្សដែលយកអ្នកណាម្នាក់ជាគំរូ (mentor) ភាគច្រើនជោគជ័យ?

នៅពីក្រោយមនុស្សជោគជ័យជាច្រើននៅលើពិភពលោកយើងនេះ ភាគច្រើនគេរកឃើញថា អ្នកទាំងនោះជាមនុស្សដ៏សាមញ្ញ ឬជាមនុស្សដែលមានលក្ខណៈពិសេសម្យ៉ាងដែលជាកម្លាំងជំរុញមនុស្សជាច្រើនឱ្យមានកម្លាំងចិត្តសម្រាប់ជម្នះឧបសគ្គរហូតទទួលបានជោគជ័យ។

លោក Mario Ferro នាយកប្រតិបត្តិនៃអង្គការ Wedu បានលើកឡើងថា ការដែលមនុស្សណាម្នាក់គួរមាននិមិត្តរូប ឬអ្នកប្រឹក្សាយោបល់ (mentor) ពាក់ព័ន្ធនឹងការសិក្សា ការងារ ការធ្វើអាជីវកម្ម ឬគំរូនៃការរស់នៅនោះ អាចធ្វើឱ្យគាត់មើលឃើញកាន់តែច្បាស់ពីគោលដៅនៃជីវិតរបស់គាត់។ នៅពេលដែលអ្នកណាម្នាក់ចង់បានជីវិត ឬឧត្តមភាពស្មើនឹងបុគ្គលម្នាក់ដែលគាត់គិតថាចង់យកធ្វើជាគំរូនោះ គាត់នឹងព្យាយាមទៅក្បែមនុស្សនោះ ហើយសង្កេតមើលគ្រប់សកម្មភាព រួមទាំងសួរយោបល់ដើម្បីដើរលើផ្លូវដូចដែលមនុស្សម្នាក់នោះធ្លាប់ដើរដោយជោគជ័យ និងសុភមង្គល។ ចំណុចនេះអាចនឹងជំរុញគាត់ឱ្យខិតខំប្រឹងប្រែងដើរលើផ្លូវមួយប្រកបដោយថាមពល និងកម្លាំងជំរុញខ្លាំងដែរ។

លោក Mario Ferro បាននិយាយថា៖ « ការជ្រើសរើសយកអ្នកណាម្នាក់ធ្វើជាគំរូ (mentor) ជាវិធីលើកទឹកចិត្ត និងអប់រំមួយបែបដែលជំរុញឱ្យខ្លួនឯងក្លាយជាមនុស្សដែលក្លាហាន ក្នុងការដោះស្រាយលើបញ្ហានានាក្នុងជីវិតឆ្ពោះទៅរកគោលដៅប្រកបដោយថាមពល»។

ស្រដៀងគ្នានេះដែរ លោកជំទាវ តាំង ហ្គិចលៀង អគ្គនាយិកានៃក្រុមហ៊ុនឌីហ្វើនីឈ័របានថ្លែងនៅក្នុងវេទិកាស្តីពីភាពជាអ្នកដឹកនាំថា ការដែលយើងយកអ្នកណាម្នាក់ធ្វើជាគំរូ គឺចំណេញច្រើនណាស់សម្រាប់យើងម្នាក់ៗ ព្រោះថា មនុស្សទាំងអស់ដែលយើងគោរព និងចង់ធ្វើតាមនោះ អាចជាគ្រូ ឬជាអ្នកជំរុញទឹកចិត្តខ្លាំង។ យោបល់ និងគំនិតល្អៗដែលគេធ្លាប់មានទាំងអស់នោះ នឹងក្លាយជាអាវុធសម្រាប់ត្រួសត្រាយឧបសគ្គលើដំណើរផ្លូវឆ្ពោះទៅកាន់ភាពជោគជ័យបាន។

លោកជំទាវ តាំង ហ្គិចលៀង បាននិយាយថា៖ «បើសិនចង់ក្លាយជាមនុស្សពូកែ យើងត្រូវទៅជិតមនុស្សពូកែ ហើយយកកូនសោរនៃភាពជោគជ័យរបស់គេយកមកដាក់ក្នុងខ្លួនយើងឱ្យបាន»។

សហគ្រិនខាងលើបានលើកឡើងផងដែរថា មនុស្សម្នាក់ៗមានគំនិត និងគន្លឹះរៀងៗខ្លួនដើម្បីទទួលបានជោគជ័យ ហេតុនេះការដែលយើងសាកសួរ ឬព្យាយាមគ្រប់លទ្ធភាពដើម្បីស្វែងយល់ និងរៀនតាមគន្លឹះសំខាន់ៗទាំងអស់នោះ វានឹងធ្វើឱ្យយើងម្នាក់ៗកាន់តែខ្លាំងឡើង៕

October 18, 2017

Liverpool លត់ Maribor ចាស់ដៃ ខណៈ Spurs ផ្តល់ការខកចិត្តដល់ Real

លោក Jurgen Klopp បានបញ្ជាក់ថា វាពិតជារឿងដ៏ល្អណាស់ក្នុងការបង្កើតប្រវត្តិសាស្ត្រ ក្រោយពីក្រុមហង្សក្រហម Liverpool របស់លោកបានលត់ក្រុម Maribor របស់ស្លូវេនី យ៉ាងចាស់ដៃ ដើម្បីកត់ត្រាជ័យជម្នះក្រៅទឹកដីដ៏ធំបំផុតរបស់ក្រុមអង់គ្លេសមួយនេះ ក្នុងប្រវត្តិសាស្ត្រនៃក្របខ័ណ្ឌកំពូលអឺរ៉ុប។

ខ្សែប្រយុទ្ធ Roberto Firmino និង Mohamed Salah សុទ្ធសឹងបានស៊ុតបាល់បញ្ចូលទី2គ្រាប់ដូចគ្នា ដើម្បីជួយឲ្យក្រុមរបស់ខ្លួនលត់ក្រុម Maribor យ៉ាងចាស់ដៃក្នុងលទ្ធផល 7-០ ក្នុងការប្រកួតក្របខ័ណ្ឌ Champions League កាលពីថ្ងៃអង្គារម្សិលមិញ។ ក្រោយពីបានបញ្ចប់ក្នុងលទ្ធផលស្មើក្នុងការប្រកួតបើកឆាកទាំងពីរលើករបស់ពួកគេ និងការធ្លាក់ចុះទម្រង់លេងក្នុងក្របខ័ណ្ឌ Premier League ក្រុម Liverpool បានធ្វើដំណើរទៅកាន់ប្រទេសស្លូវេនី ជាមួយនឹងការរិះគន់ជាច្រើនទាក់ទងនឹងការទិញចូលកីឡាករថ្មីរបស់លោក Klopp និងបច្ចេកទេសរៀបចំក្រុមរបស់លោក។

ជ័យជម្នះនេះ បានបំបែកកំណត់ត្រានៃការឈ្នះក្រៅទឹកដី 6-០ របស់ក្រុម Leeds United លើក្រុមន័រវែស Lyn កាលពីខែតុលា ឆ្នាំ1969 និងក្រុម Manchester United លើក្រុមអៀរឡង់ Shamrock Rovers កាលពីខែកញ្ញា ឆ្នាំ1957។ លោក Klopp បានឲ្យដឹងថា៖ «ខ្ញុំត្រូវបានគេបញ្ជាក់ប្រាប់ពីកំណត់ត្រានេះ បន្ទាប់ពីចប់ការប្រកួត ហើយខ្ញុំមិនបានដឹងមុនឡើយ។ ប្រវត្តិសាស្ត្រដ៏អស្ចារ្យនៃក្លិបនេះ អាចរំឭកដល់រឿងរ៉ាវចាស់ៗ ហេតុនេះ វាពិតជាល្អណាស់ក្នុងការបង្កើតប្រវត្តិសាស្ត្រដ៏ល្អមួយរបស់យើង»។

ស្របពេលជាមួយគ្នានេះ ខ្សែប្រយុទ្ធ Cristiano Ronaldo បានស៊ុតបាល់បញ្ចូលទី1គ្រាប់ពីចំណុច11ម៉ែត្រ ប៉ុន្តែក្រុមម្ចាស់ការពារតំណែងជើងឯក Real Madrid ត្រឹមតែអាចបញ្ចប់ក្នុងលទ្ធផលស្មើ 1-1 ប៉ុណ្ណោះនៅលើទឹកដីខ្លួនឯងពេលជួបក្រុម Tottenham Hotspur ក្នុងក្របខ័ណ្ឌ Champions League កាលពីថ្ងៃអង្គារ។ ការធ្វើឲ្យបាល់ចូលទីខ្លួនឯងរបស់ខ្សែការពារ Raphael Varane បានជួយឲ្យក្រុមមាន់ខ្នាយមាស Spurs មានគ្រាប់បាល់នាំមុខនៅនាទីទី28 នាកីឡដ្ឋាន Bernabeu ប៉ុន្តែ Ronaldo បានស៊ុតបាល់ប៉េណាល់ទីចូលទីយ៉ាងល្អនៅជិតបញ្ចប់តង់ទី1 ក្រោយពីមានការប្រព្រឹត្តកំហុសរបស់ខ្សែការពារ Spurs ទៅលើខ្សែបម្រើ Toni Kroos៕

ប្រភពពី៖ BBC

October 18, 2017

តើអ្នកចង់ឱ្យស្បែកសឆាប់រហ័ស តាមបែបធម្មជាតិដែរ ឬទេ?

សាកល្បងតែម្ដងទៅ ពិតជាឆាប់សស្អាតពិតមែន នេះជារូបមន្ដពិសេសសម្រាប់នារីដែលប្រាថ្នាចង់បានស្បែកឆាប់ស ដែល ឡារ៉ែន នឹងចែកជូននូវរូបមន្ដនេះ ដល់ប្រិយមិត្តអ្នកអានទាំងអស់គ្នាឱ្យបានជ្រាបដូចតទៅ។

រូបមន្ដ ខ្ញីខាត់ស្បែក
វត្ថុធាតុផ្សំដែលត្រូវត្រៀមរួមមាន៖

សាប់ខ្ញីប្រវែងមួយម្រាមដៃឱ្យម៉ដ្ឋល្អ ឬកិនក្នុងម៉ាស៊ីនទឹកក្រឡុកក៏បាន។
បន្ថែមម្សៅយិនស៊ិនចូល 1 ស្លាបព្រាបាយ ស្ករស 1 ស្លាបព្រាបាយ ទឹកប្រេងល្ង 4 ស្លាបព្រាបាយ ទឹកប្រេងកុលាប 1 ស្លាបព្រាបាយ ទឹកប្រេងក្រអូបមានក្លិនក្រូច 5-10ដំណក់ ហើយកូរឱ្យសព្វឱ្យក្លាយជាល្បាយតែមួយ។
ខណៈដែលអ្នកនៅក្នុងបន្ទប់ទឹក ឬក៏កំពុងតែងូតទឹកនៅក្រោមទឹកផ្កាឈូក ក៏អាចម៉ាស្សាជាមួយគ្រឿងផ្សំដែលបានត្រៀមទុកជាស្រេចនេះ នៅលើបរិវេណរាងកាយដែលអ្នកចង់ម៉ាស្សាឱ្យសស្អាតបានដែរ។ បន្ទាប់មក ត្រូវលាងទឹកឱ្យស្អាត នោះអ្នកនឹងសង្កេតឃើញថា ស្បែករបស់អ្នកទន់រលាង ហើយសម៉ដ្ឋគួរឱ្យទាក់ទាញបំផុត៕

October 18, 2017

កម្ពុជា-សិង្ហបុរី ពិភាក្សាគ្នាដើម្បីតភ្ជាប់ផ្លូវអាកាសប្រទេសទាំងពីរ

ភ្នំពេញ៖ ដើម្បីផ្តល់ភាពងាយស្រួលក្នុងការធ្វើដំណើរដល់អ្នកវិនិយោគ ក៍ដូចជាភ្ញៀវទេសចរ រវាងប្រទេសទាំងពីរឱ្យកាន់តែមានភាពល្អប្រសើរឡើង នៅព្រឹកថ្ងៃទី17 ខែតុលា ឆ្នាំ2017នេះប្រមុខការទូតកម្ពុជាឯកឧត្តមទេសរដ្ឋមន្ត្រី ប្រាក់ សុខុន បានជួបពិភាក្សាទ្វេភាគីជាមួយប្រមុខការទូតនៃប្រទេសសិង្ហបុរីឯកឧត្តមបណ្ឌិត វីវៀន បាឡាគ្រីស្សស្នាន រដ្ឋមន្ត្រីការបរទេសនៃសាធារណរដ្ឋសិង្ហបុរី ។

នៅក្នុងជំនួបដ៏កម្រនៅទីស្តីការក្រសួងការបរទេសកម្ពុជា ប្រមុខការបរទេសទាំងពីរបានពិភាក្សា និងយល់ស្របក្នុងការពង្រឹងបន្ថែមនូវកិច្ចសហប្រតិបត្តិការទ្វេភាគីលើវិស័យមួយចំនួនមានដូចជា ពាណិជ្ជកម្ម ការវិនិយោគ អប់រំ និងការអភិវឌ្ឍធនធានមនុស្ស ទេសចរណ៍ វប្បធម៌ ពលកម្ម ការតភ្ជាប់ផ្លូវអាកាស និងការថែទាំសុខភាព។

បន្ទាប់ពីបានពិភាក្សាយ៉ាងស៊ីជម្រៅពេញមួយព្រឹករួចមក ប្រមុខការទូតទាំងពីរប្រទេស បានឯកភាពគ្នាក្នុងការពង្រឹងពាណិជ្ជកម្មរវាងប្រទេសទាំងពីរឱ្យបានកាន់តែប្រសើរឡើង ពិសេសនឹងជំរុញឱ្យវិនិយោគិនសិង្ហបុរីចូលមកវិនិយោគនៅកម្ពុជាកាន់តែច្រើន។

ជាមួយគ្នានេះឯកឧត្តមទេសរដ្ឋមន្ត្រី ប្រាក់ សុខុន និងឯកឧត្តមបណ្ឌិត វីវៀន បាឡាគ្រីស្សស្នាន បានអញ្ជើញចុះហត្ថលេខាលើអនុស្សរណៈយោគយល់គ្នារវាងក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងក្រសួងការបរទេសនៃសាធារណរដ្ឋសិង្ហបុរី ស្តីពីការពិគ្រោះយោបល់ផ្នែកនយោបាយ។

គួររំឭកដែរថា ចាប់តាំងពីការភ្ជាប់ទំនាក់ទំនងការទូតនៅឆ្នាំ1965មក ប្រទេសទាំងពីមានកិច្ចសហប្រតិបត្តិការល្អប្រសើរតាមរយៈការផ្លាស់ប្តូរដំណើរទស្សនកិច្ចកម្រិតខ្ពស់ និងកំណើនពាណិជ្ជកម្មទៅវិញទៅមកគួរឱ្យកត់សម្គាល់ទាំងក្របខ័ណ្ឌទ្វេភាគី និងក្នុងតំបន់៕

October 17, 2017

ប្រេងម៉ាស៊ីន BCP Super 1 ផ្តល់រង្វាន់ម៉ូតូមួយគ្រឿងដល់អ្នកឈ្នះលើកដំបូង

ជាការអបអរសាទរចំពោះអតិថិជនដែលមានសំណាងបានឈ្នះរង្វាន់ធំពីប្រេងម៉ាស៊ីនដ៏ល្បីឈ្មោះម៉ាក ប៊ី ស៊ី ភី ស៊ូបភ័រ វ័ន (BCP Super 1) នូវម៉ូតូ Honda Dream 125 ស៊េរីឆ្នាំ2017 ជូនដល់អ្នកមានសំណាងនោះ នៅព្រឹកថ្ងៃទី 17 ខែតុលា កន្លងទៅនេះ ក្រុមហ៊ុន

The Bangchak Corporation Public Company limited, Thailand បានរៀបចំពិធីប្រគល់ដោយផ្ទាល់នៅក្នុងផ្សារទំនើបស៊ីធីម៉ល រាជធានីភ្នំពេញ ក្រោមការចូលរួមធ្វើជាសាក្សីពីសំណាក់អ្នកតំណាងក្រុមហ៊ុន មហាជនទូទៅ ព្រមទាំងបណ្តាអ្នកសារព័ត៌មានមកពីស្ថាប័នផ្សេងៗជាច្រើនទៀត ។

ជាមួយនឹងក្ដីរំភើបរីករាយជាមួយមហាសំណាងនាពេលនោះ លោក ពាង ពិសិទ្ធិ ដែលជាអ្នកឈ្នះរង្វាន់ម៉ូតូ Honda Dream 125 ស៊េរី ឆ្នាំ2017 បានរៀបរាប់ប្រាប់ឱ្យដឹងថា រូបលោកមានស្រុកកំណើតនៅ ភូមិខ្ពប ឃុំមហខ្ញូង ស្រុកកោះសូទិន ខេត្តកំពង់ចាម ប៉ុន្តែលោកបានផ្លាស់មករស់នៅ ម្ដុំខាំកូស៊ីធី ផ្លូវម៉ុង ឬទ្ធី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ លោកបានបញ្ជាក់ប្រាប់ទៀតថា ៖ គាត់និយាយលើកសរសើរពីភាពល្អប្រសើរ និងគុណភាពរបស់ប្រេងម៉ាស៊ីន ប៊ី ស៊ី ភី ស៊ូបភ័រ វ័ន (BCP Super 1) ពិតជាមានគុណភាពពិតៗប្រើប្រាស់បានយូរជាងប្រេងម៉ាស៊ីនដទៃទៀត ទើបរូបលោកតែងតែប្រើប្រេងម៉ាស៊ីនប្រភេទនេះជាប្រចាំ។ ប៉ុន្តែ អ្វីដែលធ្វើឱ្យមានភាពភ្ញាក់ផ្អើលនោះ គឺកាលពីពេលកន្លងទៅថ្មីៗនេះលោកក៏ធ្វើការប្ដូរប្រេងម៉ាស៊ីនម៉ូតូហើយស្រាប់តែ ក្រោយពេលផ្ទេរ ហើយពិនិត្យមើលក្នុងកំប៉ុង ស្រាប់តែឃើញមានរង្វាន់ម៉ូតូនៅក្នុងសម្បកកំប៉ុង ដែលធ្វើឱ្យមានការភ្ញាក់ផ្អើលពីញាតិមិត្តជិតខាងចូលរួមអបអរសាទរយ៉ាងរីករាយ ។

នៅក្នុងឱកាសនៃការប្រគល់រង្វាន់ធំលើកដំបូងនូវម៉ូតូ Honda Dream 125 ស៊េរីឆ្នាំ2017 ជូនដល់អ្នកមានសំណាងនោះលោក ឆុក ឆៃ តំណាងអោយក្រុមហ៊ុន The Bangchak Corporation Public company limited, Thailand.

បានឡើងថ្លែងបញ្ជាក់ប្រាប់ឱ្យដឹងថា ៖ «ប្រេងម៉ាស៊ីន BCP Super 1 គឺជាផលិតផលប្រេងថែរក្សាយានយន្តមួយក្នុងចំណោមប្រេងជាច្រើនប្រភេទទៀតដែលត្រូវបានផលិតឡើងដោយក្រុមហ៊ុនដ៏ល្បីឈ្មោះប្រចាំនៅក្នុងប្រទេសថៃដែលមានឈ្មោះថា The Bangchak Corporation Public company limited, Thailand.។ ជាមោទនភាពបំផុត ចាប់តាំងពីបាននាំចូល និងចែកចាយនៅលើទីផ្សារកម្ពុជា យើងទទួលបានការគាំទ្រពីសំណាក់អតិថិជនដែលជាអ្នកប្រើប្រាស់ផ្ទាល់ ក៏ដូចជាដៃគូចែកចាយបន្តយ៉ាងច្រើន។ ជាមួយគ្នានេះ ជាការលើកទឹកចិត្តដល់អ្នកប្រើប្រាស់ដែលតែងគាំទ្រផលិតផលរបស់យើង ក្រុមហ៊ុនបានបង្កើតជារង្វាន់ផ្តល់សំណាងយ៉ាងសន្ធឹកសន្ធាប់ជូនដល់អតិថិជនរបស់យើង ដែលក្នុងនោះរួមមាន ម៉ូតូ Honda Dream 125 ស៊េរីឆ្នាំ2017 និងប្រាក់ដុល្លារ ជាច្រើនរង្វាន់ ដែលអ្នកគ្រប់គ្នាសុទ្ធតែអាចមានសំណាងបានឈ្នះទាំងអស់»។

គួរបញ្ជាក់ផងដែរថា ក្រុមហ៊ុន The Bangchak Corporation Public company limited, Thailand.បានចូលខ្លួនមកដំណើរការនៅក្នុងវិស័យឧស្សាហកម្មប្រេង ក៏ដូចជាវិស័យយានយន្តជាយូរណាស់មកហើយ ជាពិសេស នៅឆ្នាំ1995 បាងចាក ក៏បានធ្វើការវិនិយោគបន្ថែមនៅលើវិស័យមួយនេះ ដើម្បីពង្រីកវិសាលភាពនៃចង្វាក់ផលិតកម្ម និងពង្រីកការចែកចាយឱ្យកាន់តែទូលំទូលាយនៅលើទីផ្សារសាកល ខណៈដែលទីតាំងចែកចាយនៅក្នុងស្រុកផ្ទាល់មានរហូតដល់ទៅជាង1000ស្ថានីយ៍ ។ សូមចូលរួមគាំទ្រផលិតផលប្រេងម៉ាស៊ីនថែរក្សាយានយន្ត BCP Super1 និងទទួលយកមហារង្វាន់យ៉ាងសន្ធឹកសន្ធាប់នេះទាំងអស់គ្នា ៕

October 17, 2017

នឹកស្មានមិនដល់! ពលករខ្មែរនៅថៃមានចំនួនច្រើនជាងកម្មករក្នុងរោងចក្រស្រុកខ្មែរ

ភ្នំពេញ៖ ជារឿងមួយដែលយើងនឹកស្មានមិនដល់ឡើយ ព្រោះមកទល់ឆ្នាំ2017នេះ ពលករខ្មែរដែលធ្វើចំណាកស្រុកទៅធ្វើការនៅប្រទេសថៃទាំងស្របច្បាប់ និងមិនស្របច្បាប់មានចំនួនច្រើនជាងកម្មករ-កម្មការិនីនៅក្នុងរោងចក្រក្នុងប្រទេសខ្លួនឯងទៅទៀត!។

ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារនៅចុងសប្តាហ៍នេះបានជួបសំណេះសំណាលជាមួយពលករខ្មែរនៅក្នុងប្រទេសថៃ ដោយឯកឧត្តមបានបញ្ជាក់ថា មកទល់បច្ចុប្បន្ន បងប្អូនពលករខ្មែរនៅប្រទេសថៃមានចំនួនជាង1លាននាក់ នៅប្រទេសជប៉ុនមានជិត5ពាន់នាក់ នៅកូរ៉េខាងត្បូងមានជាង5ម៉ឺននាក់ ក្នុងនោះបងប្អូនខ្មែរមានគ្រួសារជាជនជាតិកូរ៉េ 15.000នាក់ដែលមានចំណូលសរុបជាមធ្យមជិត 2ពាន់លានដុល្លារអាមេរិកក្នុងមួយឆ្នាំ។

ចំនួនជាក់ស្តែងពលករខ្មែរយើងនៅក្នុងប្រទេសថៃគឺ 1លាន5ម៉ឺននាក់ មានប្រាក់ឈ្នួលជាង300បាតក្នុងមួយថ្ងៃដែលមានការងារល្អ ជាការងារនៅមួយកន្លែងដែលបានរកចំណូលជួយគ្រួសារ និងលើកកម្ពស់ជីវភាពគ្រួសារឱ្យល្អប្រសើរឡើង កាត់បន្ថយភាពក្រីក្រ និងអភិវឌ្ឍភូមិឃុំរបស់ពួកគេ បង្កើនទំនាក់ទំនងមិត្តភាពតាមរយៈការទទួលបានមិត្តភ័ក្ដិថ្មីៗ មានប្រយោជន៍សម្រាប់សហប្រតិបត្តិការមិត្តភាពប្រជាជន និងប្រជាជន។ ពេលត្រឡប់មកកម្ពុជាវិញ បងប្អូនពលករយើងទាំងនោះ គឺជាធនធានមនុស្សដែលមានជំនាញខ្ពស់សម្រាប់កសាងប្រទេសជាបន្តតាមរយៈជំនាញរបស់ខ្លួន និងតាមរយៈការងារនៅក្នុងស្រុក។

សូមជម្រាបថា មកទល់បច្ចុប្បន្នក្នុងប្រទេសកម្ពុជាមានរោងចក្រកាត់ដេរសម្លៀកបំពាក់ និងស្បែកជើងចំនួន556រោងចក្រ មានកម្មករ-កម្មការិនីចំនួន65ម៉ឺននាក់ ក្នុងនោះកម្មការិនី88% និងប្រាក់ឈ្នួលអប្បបរមាកើនដល់170ដុល្លារ(សម្រាប់ឆ្នាំ2018) ដោយមិនរួមបញ្ចូលប្រាក់ថ្លៃធ្វើដំណើរ និងអត្ថប្រយោជន៍ផ្សេងៗចំនួន 17ដុល្លារផងនោះ បានជួយដល់អត្រាកំណើនសេដ្ឋកិច្ចមាន 7% អត្រាមានការងារធ្វើមាន 99.3%ដែលមានប្រាក់ចំណូលប្រហាក់ប្រហែលនឹងប្រាក់ខែមន្ត្រីរាជការដែរ គឺ80ម៉ឺនរៀល៕

October 17, 2017

Author: វល័ក្ខ