វល័ក្ខ - La Reine Media

ស្រាបៀរអាន់ឆ័រនឹងចាប់ឆ្នោតផ្តាច់ព្រ័ត្ររដូវកាលថ្មីចុងសប្តាហ៍នេះជាមួយក្រុមតារាចម្រៀងកូរ៉េ Six Bomb

រាជធានីភ្នំពេញ៖ នៅថ្ងៃទី 22 ខែតុលា ឆ្នាំ2017 ខាងមុខនេះ ស្រាបៀរអាន់ឆ័រនឹងរៀបចំកម្មវិធីចាប់រង្វាន់ផ្តាច់ព្រ័ត្រក្នុងកម្មវិធីអាពាហ៍ពិពាហ៍របស់ស្រាបៀរអាន់ឆ័រឆ្នាំ 2017 រដូវកាលថ្មី ដោយមានការអញ្ជើញចូលរួមសម្តែងពីតារាចម្រៀងជាតិ និងអន្តរជាតិជាច្រើនរូប។

កម្មវិធីចាប់រង្វាន់ផ្តាច់ព្រ័ត្រសម្រាប់រដូវកាលថ្មីនេះនឹងធ្វើការផ្សាយផ្ទាល់នៅស្ថានីយទូរទស្សន៍ PNN ក្នុងកម្មវិធីតន្ត្រី Anchor Fun Zone នៅវេលាម៉ោង 8:00-10:00 យប់។ តារាល្បីជាច្រើនរូបប្រចាំព្រះរាជាណាចក្រកម្ពុជា និងប្រចាំប្រទេសកេរ៉ូ ដែលនឹងមានវត្តមានក្នុងកម្មវិធីពិសេសនេះ មានដូចជា លោក ខេម កញ្ញា យូរី លោក Step និងក្រុមតារាចម្រៀងល្បីអន្តរជាតិគឺក្រុមតារាចម្រៀងកូរ៉េ K-Pop band Six Bomb។

កម្មវិធីនេះធ្វើឡើងសម្រាប់តែអតិថិជនដែលបានជាវស្រាបៀរអាន់ឆ័រសម្រាប់កម្មវិធីអាពាហ៍ ពិពាហ៍របស់ខ្លួន ដើម្បីផ្តល់រង្វាន់ផ្តាច់ព្រ័តជូនដល់គូស្វាមីភរិយាថ្មីទាំងអស់ មានដូចជារង្វាន់ដំណើរកម្សាន្តក្រេបច័ន្ទទឹកឃ្មុំនៅឆ្នេរឋានសួគ៏ Krabi ចំនួន 15 រង្វាន់ រួមជាមួយរង្វាន់ជាច្រើនទៀតដូចជាទូរទស្សន៍ Smart TV 55“ ចំនួន 11 រង្វាន់ និងកាម៉េរា Sony Alpha ចំនួន 13 រង្វាន់។

តើគូស្វាមីភរិយារូបណាខ្លះនឹងមានសំណាងឈ្នះរង្វាន់លាភមង្គលទាំងនេះ? សូមចូលរួមទស្សនា និងតាមដានកម្មវិធីពិសេសជាមួយនឹងការសម្តែងដ៏អស្ចារ្យពីក្រុមតារាចម្រៀងកូរ៉េ K-Pop band Six Bomb ចាប់ពីម៉ោង 8 យប់ ដល់ 10 យប់ នៅថ្ងៃទី 22 ខែតុលា ឆ្នាំ2017 ខាងមុខនេះ។

គួរម្លឹកថា ស្រាបៀរ អាន់ឆ័រ បានជ្រើសរើសលោក លី ម៉ិញ ហូ ដែលជាកំពូលតារាអន្តរជាតិកូរ៉េដ៏ល្បីល្បាញ ធ្វើជាទូតសុឆន្ទ:របស់ស្រាបៀរ អាន់ឆ័រ និងមានវត្តមាននៅក្នុងស្ពតពាណិជ្ជកម្មថ្មីរបស់ស្រាបៀរ អាន់ឆ័រ ។ ស្រាបៀរ អាន់ឆ័រ ជាស្រាបៀរដែលពេញនិយមបំផុតសម្រាប់យុវវ័យសម័យថ្មី គុណភាពខ្ពស់ស្តង់ដារអន្តរជាតិដែលឈ្នះពានរង្វាន់ផ្នែកគុណភាពជាបន្តបន្ទាប់សរុបជាង 30 មេដាយ រសជាតិស្រទន់លើសគេ ផ្តល់នូវអារម្មណ៍រីករាយស្រស់ថ្លា ស័ក្តិសមបំផុតសម្រាប់គ្រប់ទីកន្លែង គ្រប់កម្មវិធី។

រីករាយស្រស់ថ្លា ចាប់ផ្តើមជាមួយស្រាបៀរ អាន់ឆ័រ!

ពិសាដោយការទទួលខុសត្រូវ៕

October 20, 2017

ផាកកាហ្វេ ពង្រីកសាខាបន្ថែមចំនួន 5ទីតាំង ក្នុងរយៈពេល 2ឆ្នាំចុងក្រោយនេះ

បន្ទាប់ពីបានបើកដំណើរការនូវភោជនីយដ្ឋានចំនួន3កន្លែងកាលពីឆ្នាំ 2016កន្លងទៅនោះ ផាកកាហ្វេ បានបើកដំណើរការចំនួន2ទីតាំងបន្ថែមទៀតនៅឆ្នាំ2017នេះ ។ ទន្ទឹមនឹងការពង្រីកសាខាជាបន្តបន្ទាប់នេះ លោក ហេង សេងលី ដែលជានាយកគ្រប់គ្រងរបស់ផាកកាហ្វេ បានលើកឡើងឱ្យដឹងថា ក្រៅពីរៀបចំហាងថ្មី Design ថ្មី យើងនៅតែផ្ដោតសំខាន់លើគុណភាពអាហារ សេវាកម្ម និងអនាម័យទូទៅនៅក្នុងហាង ជាពិសេស អាហារគ្មានប៊ីចេង ដែលល្អបំផុតសម្រាប់អ្នកបរិភោគទាំងអស់។

លោកបានបន្ថែមទៀតថា បន្ទាប់ពីបើកសាខា ផាក កាហ្វេ នៅ ព្រលានយន្តហោះអន្តរជាតិភ្នំពេញមក លោកសង្កេតឃើញថា ក្រៅពី model stand alone នៅតាម Office Building និង Shopping Mall គឺជាទិសដៅបន្ទាប់របស់ក្រុមហ៊ុន ដូចជា AOEN MALL, TK Avenue, Exchange Square និងកន្លែងផ្សេងៗទៀតផងដែរ។ លោកក៏បានបង្ហើបថា បច្ចុប្បន្ន ក្រុមហ៊ុន កំពុងតែធ្វើការជាមួយខេត្តមួយចំនួនដូចជា ខេត្ត កំពង់ចាម សៀមរាប បន្ទាយមានជ័យ បាត់ដំបង បើគ្មានអ្វីប្រែប្រួលទេ ក្នុងខេត្តទាំងនោះ នឹងមានវត្តមាន ភោជនីយដ្ឋាន ផាក កាហ្វេ បើក បម្រើអតិថិជនយើង យ៉ាងយូរបំផុតនៅឆ្នាំ ២០១៨ខាងមុខនេះ។

ជាទីបញ្ចប់ លោក ហេង សេងលី ក៏បានថ្លែងអំណរគុណដល់អតិថិជនទាំងអស់ដែលបានគាំទ្រ ផាកកាហ្វេ តាំងពីថ្ងៃដំបូង ហើយក៏សូមអភ័យទោសចំពោះចន្លោះខ្វះខាតមួយចំនួនដែលបានកើតមានដោយអចេតនាកាលពីពេលកន្លងទៅ ហើយបុគ្គលិក ផាក កាហ្វេ ទាំងអស់នឹងប្រឹងប្រែង និងអភិវឌ្ឍន៍នូវរាល់ចំណុចដែលខ្វះខាត ដើម្បីឲ្យកាន់តែប្រសើរ និងដើម្បីឲ្យម៉ាកសញ្ញា(Brand) របស់កម្ពុជាមួយនេះអាចប្រកួតប្រជែងនៅលើទីផ្សារ ជាមួយម៉ាកសញ្ញា(Brand) របស់បរទេសមួយចំនួន ។ ដោយឡែក នៅពេលអនាគត ផាក កាហ្វេ មានចក្ខុវិសយពង្រីកខ្លួន ឲ្យក្លាយជាភោជនីយដ្ឋានលំដាប់លេខ១នៅ កម្ពុជា តាមរយៈការ អភិវឌ្ឍន៍ គុណភាពម្ហូបអាហារ គុណភាពសេវាកម្ម គុណភាពអនាម័យ និងការរចនា ភោជនីយដ្ឋានឲ្យកាន់តែទំនើប ព្រមទាំងការបើកសាខាបន្ថែមឲ្យបាន ៣១សាខា នៅរាជធានីភ្នំពេញ និងតាមបណ្ដាខេត្តនានា នៅ ឆ្នាំ ២០២។

គួររំលឹកផងដែរថា ផាក កាហ្វេ បានបើកសាខា ដំបូងនៅឆ្នាំ ២០០៤ ហើយរហូតដល់បច្ចុប្បន្ននេះ ផាក កាហ្វេ មានបទពិសោធន៍ក្នុងវិស័យ ម្ហូបអាហារ ជាពិសេស គុយទាវ ភ្នំពេញ និងកាហ្វេបុរាណ បែបទំនើប ជាង១៣ឆ្នាំ និងមានសាខា១១កន្លែងនៅ ទីក្រុងភ្នំពេញ ដែលផ្ដល់ការងារ ជូនប្រជាជនកម្ពុជា ប្រមាណជា ៣៧០នាក់ និងបង្កើនការងារប្រមាណ ១០០ កន្លែង ទៀតនៅតាមបណ្ដាខេត្តដែលគ្រោងមានវត្តមាន នៅឆ្នាំក្រោយនេះ៕

October 20, 2017

កម្ពុជាត្រូវមានមណ្ឌលទេសចរណ៍ធំៗដើម្បីទាក់ទាញភ្ញៀវឱ្យបានច្រើន

ភ្នំពេញ៖ ថ្លែងក្នុងវេទិកាសេដ្ឋកិច្ចទេសចរណ៍សកលឆ្នាំ2017 រដ្ឋមន្ត្រីក្រសួងទេសចរណ៍ឯកឧត្តម ថោង ខុន មានប្រសាសន៍ថា កម្ពុជាត្រូវមានមណ្ឌលទេសចរណ៍ធំៗដើម្បីទាក់ទាញភ្ញៀវទេសចរមកទស្សនាកម្ពុជាឱ្យបានកាន់តែច្រើន។

ក្នុងនាមជាវាគ្មិនកិត្តិយស ប្រតិភូក្រសួងទេសចរណ៍ដែលចូលរួមក្នុងវេទិកាសេដ្ឋកិច្ចទេសចរណ៍ពិភពលោកលើកទី6 នៅទីក្រុងម៉ាកាវ ប្រទេសចិន ឯកឧត្តម ថោង ខុន បានមានប្រសាសន៍ជំរុញឱ្យមានការផ្តល់ឱកាសដើម្បីចែករំលែកពីអ្វីដែលកម្ពុជាបានធ្វើនៅក្នុងក្របខ័ណ្ឌកិច្ចសហប្រតិបត្តិការតំបន់អាស៊ានក្នុងការសម្រួលការធ្វើដំណើរឆ្លងកាត់ព្រំដែន។ ឯកឧត្តមបានថ្លែងថា នៅក្នុងបរិបទកម្ពុជា រាជរដ្ឋាភិបាលបានបង្កើតគណៈកម្មាធិការសម្រួលការធ្វើដំណើរ និងដឹកជញ្ជូនទេសចរតាមច្រកទ្វារអន្តរជាតិ ដែលរួមមានសមាសភាពមកពីវិស័យពាក់ព័ន្ធ និងអនុវត្តយន្តការនេះដោយបានដោះស្រាយបញ្ហាប្រឈម ដូចជាការកាត់បន្ថយរបាំងមិនចាំបាច់នានានៅតាមច្រកទ្វារអន្តរជាតិ ពិសេសកម្ពុជាបានអនុវត្តគោលនយោបាយផ្តល់ទិដ្ឋាការនាពេលមកដល់ (Visa on arrival)។

ឯកឧត្តមបានលើកទស្សនទានធំៗពីរឆ្លើយតបទៅនឹងសំណួររបស់ប្រព័ន្ធផ្សព្វផ្សាយពាក់ព័ន្ធទៅនឹងទម្រង់ភាពជាដៃគូរដ្ឋ-ឯកជនបែបណាដែលកម្ពុជាបានអនុវត្តដើម្បីធានាលទ្ធផលយូរអង្វែងសម្រាប់ការអភិវឌ្ឍទេសចរណ៍។ ឯកឧត្តមថ្លែងថា កន្លងមកមានការជជែកគ្នាថា រវាង មេមាន់ និងពងមាន់ តើណាមួយកើតមុន? ជាចម្លើយក្នុងវិស័យទេសចរណ៍ គឺចាំបាច់ត្រូវបង្កើតឱ្យបានមេមាន់ជាមុន ពោលគឺទាល់តែមានផលិតផលទេសចរណ៍ ដូចជាហេដ្ឋារចនាសម្ព័ន្ធ ផ្លូវថ្នល់ កំពង់ផែ អាកាសយានដ្ឋាន មណ្ឌលកម្សាន្តទេសចរណ៍ធំៗ សណ្ឋាគារ ផ្សារលក់ទំនិញទំនើបៗ សួនកម្សាន្តធំៗ (Theme Park)-ល- ទើបអាចទាក់ទាញភ្ញៀវទេសចរបាន។

ដូច្នេះរដ្ឋត្រូវតែមានប្លង់មេ ផែនការយុទ្ធសាស្ត្រអភិវឌ្ឍន៍ទេសចរណ៍ថ្មីស្របទៅតាមតម្រូវការទីផ្សារ (បច្ចេកវិទ្យា និងនវានុវត្តន៍) រៀបចំតំបន់អភិវឌ្ឍន៍ទេសចរណ៍ (Zoning and Master Plan)ឱ្យបានច្បាស់លាស់។

ទី2៖ បន្ទាប់មករដ្ឋាភិបាលត្រូវឱ្យគោលការណ៍ទៅផ្នែកឯកជនដើម្បីស្វែងរកដៃគូវិនិយោគ រកដៃគូអភិវឌ្ឍន៏ដ៏ពិតប្រាកដមួយដើម្បីបង្កើតផលិតផលទេសចរណ៍ប្រកបដោយភាពទាក់ទាញ និងគិតគូរហ្មត់ចត់ដល់កិច្ចការពារបរិស្ថាន ដោយត្រូវធានាថា ការអភិវឌ្ឍនឹងប្រព្រឹត្តទៅប្រកបដោយនិរន្តរភាព។

សូមបញ្ជាក់ថា ក្នុងវេទិកានោះរដ្ឋមន្ត្រីទេសចរណ៍នៃប្រទេសអឺរ៉ុបខាងកើត អឺរ៉ុបកណ្តាលក៏បានស្នើសុំឱ្យកម្ពុជាជួយចែករំលែកក្នុងការរៀបចំផែនការយុទ្ធសាស្ត្រទាក់ទាញទេសចរចិនផងដែរ ខណៈដែលប្រទេសទាំងនោះបានមើលឃើញពីកំណើនខ្ពស់នៃទេសចរចិនមកកម្ពុជាជាង40%កាលពីឆ្នាំ2016៕

October 20, 2017

Everton ចាញ់ Lyon ទាំងចម្រូងចម្រាស ខណៈ Giroud ជួយ Arsenal

ភាពត្រដាបត្រដួសរបស់ក្រុមទូកក្តោង Everton ក្នុងក្របខ័ណ្ឌ Europa League នៅតែមានបន្ត ខណៈដែលពួកគេបានរងបរាជ័យក្នុងលទ្ធផល 2-1 ក្នុងផ្ទះខ្លួនឯងក្រោមស្នាដៃក្រុម Olympique Lyonnais កាលពីថ្ងៃព្រហស្បតិ៍ និងនៅតែស្ថិតនៅបាតតារាងនៃពូលរបស់ពួកគេដដែល។ ស្របពេលជាមួយគ្នានេះ ក្រុម Arsenal បានផ្តួលក្រុម Red Star Belgrade ក្នុងលទ្ធផល 1-០ ក្រោយពីការស៊ុតបាល់បញ្ចូលទីយ៉ាងល្អរបស់ខ្សែប្រយុទ្ធ Olivier Giroud។

ក្រុម Everton ត្រូវការឈ្នះជាដាច់ខាតនៅពេលប្រកួតជាមួយនឹងក្រុម Lyon ក្រោយពីទទួលបានត្រឹមតែ1ពិន្ទុពីការប្រកួត2លើកដំបូងរបស់ពួកគេ ប៉ុន្តែ ពួកគេបានថ្លោះធ្លោយឲ្យមានគ្រាប់បាល់ចូលទីខ្លួនឯងភ្លាមៗ ក្រោយពីលេងបាន6នាទី តាមរយៈការស៊ុតបាល់ប៉េណាល់ទីរបស់កីឡាករ Nabil Fekir។

ខ្សែការពារ Ashley Williams បានតែតបាល់បញ្ចូលទីដើម្បីជួយឲ្យក្រុមរបស់ខ្លួនតាមស្មើវិញនៅនាទីទី69 មុនពេលខ្សែប្រយុទ្ធ Bertrand Traore បានជួយឲ្យក្រុម Lyon ដណ្តើមបានការនាំមុខ និងឈ្នះក្នុងការប្រកួតនេះតែម្ដង។ ប៉ុន្តែ អ្វីដែលគួរឲ្យចាប់អារម្មណ៍នោះគឺ ការផ្ទុះជម្លោះរវាងកីឡាករនៃក្រុមទាំងពីរ។ Williams ដែលជាប្រធានក្រុម Everton បានរុញអ្នកចាំទី Anthony Lopes របស់ Lyon ដែលបានបង្កើតឲ្យមានការប៉ះទង្គិចគ្នារវាងកីឡាករនៅមុខអ្នកគាំទ្រ។ ស្របពេលដែលក្រុមកីឡាករទាំងអស់បានព្យាយាមរត់ទៅជួយសម្រាលស្ថានការណ៍ផ្សេងៗនោះ អ្នកគាំទ្រម្នាក់ដែលកំពុងតែកាន់កូនរបស់ខ្លួននៅក្នុងដៃបានព្យាយាមដាល់ទៅលើអ្នកចាំទីរូបនោះ។ ក្រោយមក លោក Koeman បានបញ្ជាក់ថា លោកអាជ្ញាកណ្តាលសញ្ជាតិហូឡង់ Bas Nijhuis ក៏អាចនឹងត្រូវស្តីបន្ទោសផងដែរសម្រាប់ការផ្ទុះជម្លោះនៅឯកីឡដ្ឋាន Goodison មួយនេះ។

គ្រូបង្វឹករូបនេះបានឲ្យដឹងថា៖ «ខ្ញុំបានប្រាប់មន្ត្រីប្រចាំការប្រកួតពីអ្វីដែលខ្ញុំបានគិតក្នុងពេលបញ្ចប់ការប្រកួតនេះ។ ខ្ញុំដឹងថា អាជ្ញាកណ្តាលមានសញ្ជាតិហូឡង់ ប៉ុន្តែ គាត់មិនអាចផ្តល់ការពិន័យចំពោះកីឡាករ Nabil Fekir ដែលបានធ្វើពុតជាដួលចំនួន10លើកនោះឡើយ»៕

ប្រភពពី៖ BBC

October 20, 2017

តម្លៃអចលនទ្រព្យនៅសិង្ហបុរី នឹងងើបឡើងវិញ

បន្ទាប់ពីតម្លៃផ្ទះនៅប្រទេសសិង្ហបុរីបានធ្លាក់ចុះមួយរយៈរួចមក ក្រុមអ្នកវិភាគបានព្យាកណ៍ថា តម្លៃផ្ទះនៅទីនោះនឹងងើបឡើងវិញ បើទោះបីជាវិធានការទប់ស្កាត់របស់រដ្ឋាភិបាលនៅតែបន្តអនុវត្តក៏ដោយ។

លោក Vikrant Pandey អ្នកវិភាគផ្នែកអចលនទ្រព្យនៃក្រុមហ៊ុន UOB Kay Hian Pte បាននិយាយថា តម្លៃអចលនទ្រព្យនៅសិង្ហបុរី នឹងកើនឡើងចន្លោះពី5% ទៅ10% នៅឆ្នាំបន្ទាប់ ក្រោយពីការធ្លាក់ចុះយ៉ាងច្រើនក្នុងឆ្នាំ2017។ នាដើមខែតុលានេះស្ថាប័ន Morgan Stanley បានឱ្យដឹងថា តម្លៃផ្ទះនឹងឡើង2% វិញនៅក្នុងឆ្នាំនេះ ហើយវានឹងបន្តឡើង10%ទៀតនៅចុងឆ្នាំ2018 ខាងមុខ ដែលនេះអាចនិយាយថា មាននិន្នាការកើនឡើងខ្ពស់ជាងអ្វីដែលគេរំពឹងទុកពីមុន។

លោក Pandey និយាយថា៖“យើងមើលឃើញនូវការរើបឡើងវិញថ្មីៗ ដែលរីករាលដាលទៅដល់ផ្នែកឈ្មួញកណ្តាល និងអ្នកប្រើប្រាស់ចុងក្រោយ។ លោកបន្ថែមថា កិច្ចសន្យាអភិវឌ្ឍន៍ឡើងវិញ ដែលមានទាំងម្ចាស់ផ្ទះលក់អាផាតមិនក្នុងអគារចាស់ៗទៅឱ្យអ្នកអភិវឌ្ឍន៍ មានតម្លៃរហូតដល់ 2.2ប៊ីលានដុល្លារនៅក្នុងឆ្នាំនេះ គឺលើសតម្លៃអន្តរកាលមធ្យម ក្នុងរយៈពេល4ឆ្នាំមុន។ ការទទួលបានលុយពីការលក់គម្រោងអភិវឌ្ឍន៍ឡើងវិញទាំងនេះ អ្នកទិញនឹងបង្កើនតម្រូវការពីឈ្មួញកណ្តាលទៅកាន់អ្នកប្រើប្រាស់ចុងក្រោយ។

លោកនិយាយថា ការបញ្ជាទិញពីសំណាក់ជនបរទេសរំពឹងថានឹងកើនឡើង បើទោះបីការបង់ពន្ធបន្ថែមរហូតដល់15%លើការទិញលក់ អចលនទ្រព្យក៏ដោយ។ ការកម្រិតតម្លៃពន្ធចំពោះជនបរទេសកំពុងបង្កើតឱ្យមានការអំពាវនាវជាប្រព័ន្ធសម្រាប់វិស័យអចលនទ្រព្យនៅសិង្ហបុរី៕

October 20, 2017

មជ្ឈមណ្ឌលផលិតភាពជាតិ តម្រង់ទិសឱ្យសហគ្រាសផលិតគិតពីបរិស្ថាន

មជ្ឈមណ្ឌលផលិតភាពជាតិកម្ពុជានៃក្រសួងឧស្សាហកម្ម និងសិប្បកម្ម កាលពីពេលថ្មីៗនេះបានបើកវគ្គបណ្តុះបណ្តាលគ្រូបង្គោលមួយដោយផ្តោតលើប្រព័ន្ធគ្រប់គ្រងបរិស្ថានផ្អែកលើស្តង់ដារ ISO 14000 ដែលមានការចូលរួមពីវិស័យសាធារណៈ និងឯកជន ក្រុមហ៊ុន និងសហគ្រាសផលិតជាច្រើន។

តាមការអះអាងរបស់អ្នកជំនាញ ប្រធានបទបរិស្ថានក្នុងសង្វាក់ផលិតកម្មផលិតផលគ្រប់ប្រភេទកំពុងក្លាយជាកាតព្វកិច្ចដ៏សំខាន់សម្រាប់ម្ចាស់សហគ្រាសទាំងអស់។ វគ្គបណ្តុះបណ្តាលគ្រូបង្គោលស្តីពីប្រព័ន្ធគ្រប់គ្រងបរិស្ថានផ្អែកលើស្តង់ដារ ISO 14000 នេះទទួលបានការឧបត្ថម្ភដោយអង្គការផលិតភាពអាស៊ី (Asian Productivity Organization=APO) ដែលមានលេខាធិការដ្ឋាននៅទីក្រុងតូក្យូ ប្រទេសជប៉ុន តំណាងឱ្យប្រទេសជាសមាជិក APO ចំនួន19ប្រទេសនៅក្នុងតំបន់អាស៊ី។

លោក ហេង អៀង ប្រធានមជ្ឈមណ្ឌលផលិតភាពជាតិកម្ពុជា បានអះអាងថា វគ្គបណ្តុះបណ្តាលនេះ គឺផ្តោតទៅលើការលើកកម្ពស់ផលិតភាព គុណភាព និងកម្រិតនៃការប្រកួតប្រជែងសហគ្រាសនៅកម្ពុជា តាមរយៈការលើកកម្ពស់ផលិតភាពបៃតង និងការគ្រប់គ្រងគុណភាពបរិស្ថានសម្រាប់ប្រតិបត្តិនៅក្នុងដំណើរការក្រុមហ៊ុន ឬសហគ្រាសរបស់ពួកគេ។

លោកបញ្ជាក់ថា៖“បច្ចុប្បន្នក្រសួងឧស្សាហកម្ម និងសិប្បកម្ម កំពុងតែផ្សព្វផ្សាយកម្មវិធីបម្រែបម្រួលអាកាសធាតុ និងឧស្សាហកម្មបៃតង ទាំងក្នុងសហគ្រាសធុនតូច មធ្យម និងធំ។ លោក ហេង អៀង បានបន្ថែមថា មជ្ឈមណ្ឌលផលិតភាពជាតិ ចង់ពង្រីកនូវសេវាប្រឹក្សាយោបល់របស់ខ្លួនទៅលើស្តង់ដារប្រព័ន្ធគ្រប់គ្រងអន្តរជាតិ ដើម្បីគ្រប់ដណ្តប់លើប្រព័ន្ធគ្រប់គ្រងគុណភាពបរិស្ថាន។ ដូចនេះហើយប្រព័ន្ធដែលត្រឹមត្រូវបំផុតនោះគឺ ស្តង់ដារ ISO 14000 នេះតែម្តង។

ឯកឧត្តម ភោគ សុវណ្ណរិទ្ធ រដ្ឋលេខាធិការនៃក្រសួងឧស្សាហកម្ម និងសិប្បកម្ម ក៏បានជំរុញឱ្យសិក្ខាកាមចូលរួមស្វែងយល់ឱ្យបានស៊ីជម្រៅពីនិន្នាការវិវត្តថ្មីៗនៃលក្ខខណ្ឌតម្រូវដែលគិតគូរដល់បរិស្ថាន។ ឯកឧត្តមបញ្ជាក់ថា៖“ ផលិតផលដែលមានផលប៉ះពាល់ដល់បរិស្ថាន នឹងមិនមាននិរន្តរភាពទេ ព្រោះនិន្នាការរបស់អ្នកប្រើប្រាស់គឺគាំទ្រផលិតផលណាដែលធម្មជាតិ មិនប៉ះពាល់ដល់សុខភាព ទោះបីក្នុងរយៈពេលណាក៏ដោយ។

លោក Yong Kok Seng អ្នកជំនាញរបស់អង្គការផលិតភាពអាស៊ី (APO) បាននិយាយថា សហគ្រាសនៅកម្ពុជានៅមានភាពក្មេងខ្ចីនៅឡើយ ដូច្នេះគេអាចគិតគូរបញ្ហាបរិស្ថាននេះទៅក្នុងគោលនយោបាយសហគ្រាសរបស់គេ ព្រោះបរិស្ថានត្រូវបានគេគិតគូរជាសកល។

តាមរយៈការបណ្តុះបណ្តាលនោះ មជ្ឈមណ្ឌលផលិតភាពជាតិ រំពឹងថាខ្លួននឹងបង្កើនការណែនាំ និងតម្រូវការនៃការអនុវត្តស្តង់ដារគ្រប់គ្រងគុណភាព ISO 14000 នៅប្រទេសកម្ពុជា ពង្រឹង និងអភិវឌ្ឍសមត្ថភាពនៃគ្រូបង្វឹក និងអ្នកពិគ្រោះយោបល់ វិស្វករនិងអ្នកគ្រប់គ្រងផលិតកម្ម ដើម្បីអនុម័តនៃការប្រើប្រាស់វិធីសាស្ត្រអនុវត្តជាក់ស្តែងនៃការគ្រប់គ្រងបរិស្ថាន និងតម្រូវឱ្យសិក្ខាកាមយល់ពីគោលការណ៍និងមេរៀននៃការគ្រប់គ្រងបរិស្ថាន វិធីសាស្ត្រសម្រាប់អនុវត្តប្រព័ន្ធគុណភាពបរិស្ថាន និងបច្ចេកទេសអនុវត្តនៃការប្រឹក្សាយោបល់នៅក្នុងការគ្រប់គ្រងប្រព័ន្ធនេះ៕

October 20, 2017

ក្រសួងពាណិជ្ជកម្មពន្លឿន ការរៀបចំសៀវភៅបន្ទុកសម្រាប់សមាគមម្រេចកម្ពុជា

ស្របពេលដែលការដាំដុះដំណាំម្រេចកាន់តែមានការកើនឡើង ហើយទីផ្សារមានកម្រិតនោះ ក្រសួងពាណិជ្ជកម្មបាននឹងកំពុងរៀបចំចងក្រងបង្កើតលក្ខខណ្ឌដាំដុះម្រេច (Good Agricultural Practice) ដើម្បីទាក់ទាញទំនុកចិត្តពីអ្នកនាំចេញផងដែរ។

សៀវភៅបន្ទុកថ្មីមួយដែលរៀបចំឡើងដោយអ្នកមានបទពិសោធក្នុងការដាំដុះម្រេច និងអង្គការក្រៅរដ្ឋាភិបាលដែលធ្វើការពាក់ព័ន្ធវិស័យកសិកម្ម បានរៀបរាប់ពីលក្ខខណ្ឌនានាចាប់ពីការដាំដុះបច្ចេកទេសដាំដុះ ថែទាំ ការប្រមូលផល ការទុកដាក់ទិន្នផល ការត្រួតពិនិត្យ និងការអញ្ជើញភាគីខាងក្រៅមកពិនិត្យ ជាដើម។ នេះបើយោងតាមការអះអាងរបស់ឯកឧត្តម វ៉ា រុតសាន ប្រធានទីប្រឹក្សាក្រសួងពាណិជ្ជកម្ម និងជាអ្នកផ្តួចផ្តើមឱ្យមានសៀវភៅបន្ទុកនេះ។

ឯកឧត្តម វ៉ា រុតសាន បានលើកឡើងថា សៀវភៅបន្ទុកដែលអនុវត្តតាម GAP នឹងត្រូវផ្តល់ជូនដល់ប្រជាកសិករ និងម្ចាស់កសិដ្ឋាន ដើម្បីអនុវត្ត ស្របពេលដែលក្រសួងពាណិជ្ជកម្មត្រៀមបង្កើតសហព័ន្ធម្រេច និងដាក់បញ្ចូលផលិតផលម្រេចទៅជាផលិតផលសក្តានុពលសម្រាប់ការនាំចេញ។ ឯកឧត្តម បានបន្តថា សៀវភៅបន្ទុកនេះនឹងដើរតួនាទីយ៉ាងសំខាន់ក្នុងការដាំដុះម្រេចប្រកបដោយនិរន្តរភាព ដោយរាប់ចាប់តាំងពីការដាំដុះ ការប្រមូលផល ការប្រើប្រាស់ជី និងការទុកដាក់ផលិតផលក្រោយប្រមូលផល សុទ្ធតែបានចែងនៅក្នុងសៀវភៅបន្ទុកដែលរៀបចំថ្មីនេះ។

ឯកឧត្តម វ៉ា រុតសាន មានប្រសាសន៍ថា៖“អ្នកដាំដុះអាចមើលសៀវភៅនេះ ហើយអាចកែសម្រួលចំណុចខ្លះទៅតាមលទ្ធភាពដែលគាត់អាចធ្វើបានដោយគាត់អនុវត្តស្រាលជាងសៀវភៅបន្ទុក ឬក៏ត្រូវចងឱ្យតឹងជាងនេះ។ ទៅអនាគតអ្នកដាំដុះម្រេចអាចដាំដុះដោយមានរបៀប និងគំរូច្បាស់លាស់។ ការដាំដុះច្រើនក្នុងរយៈពេលប៉ុន្មានឆ្នាំចុងក្រោយនេះបានធ្វើឱ្យទិន្នផលម្រេចហក់ឡើងរហូតដល់ប្រមាណ2ម៉ឺនតោន ដោយមានការដាំដុះនៅក្នុងខេត្តចំនួន19 ទូទាំងប្រទេសកម្ពុជា។

ជាមួយទិន្នផលកើនឡើងខ្ពស់ និងតម្រូវការប្រើប្រាស់មានកម្រិត ថ្នាក់ដឹកនាំជាន់ខ្ពស់ក្រសួងពាណិជ្ជកម្ម ក៏បានត្អូញតែ្អរពីផលលំបាកក្នុងការរកទីផ្សារឱ្យផលិតផលម្រេចផងដែរ។ កាលពីថ្ងៃទី11 ខែសីហា ឆ្នាំ2017 នៅទីស្តីការក្រសួងពាណិជ្ជកម្ម បានរៀបចំសិក្ខាសាលាថ្នាក់ជាតិមួយស្តីពីពាណិជ្ជកម្មម្រេច និងការផ្លាស់ប្តូរបទពិសោធរបស់សហគមន៍ម្រេចអន្តរជាតិ ក្នុងការកសាងទំនុកចិត្តឆ្ពោះទៅកាន់និរន្តរភាពនៃផលិតកម្មម្រេចកម្ពុជា។

នាឱកាសនោះ ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បានអះអាងថា ការដាំដុះម្រេចរបស់កម្ពុជាមានសន្ទុះខ្លាំងក្លាក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីមានស្ថិរភាពតម្លៃធៀបនឹងផលិតផលផ្សេងៗទៀត។ បច្ចុប្បន្ននេះក្នុង1ឆ្នាំកម្ពុជាអាចប្រមូលផលម្រេចបានប្រមាណ2ម៉ឺនតោន ខណៈកាលពីអំឡុងទសវត្សរ៍ ឆ្នាំ60 បានបរិមាណត្រឹមតែ2,000តោនប៉ុណ្ណោះ។

ឯកឧត្តម ម៉ៅ ថូរ៉ា បានអះអាងថា ម្រេចជាផលិតផលសំខាន់មួយក្នុងចំណោមទំនិញទាំង19មុខរបស់កម្ពុជាដែលជាអាទិភាពសម្រាប់ការនាំចេញ។ ផលិតផលម្រេចប្រមាណ300តោនសម្រាប់បំពេញតម្រូវការទីផ្សារក្នុងស្រុក ហើយទិន្នផលសេសសល់ត្រូវពឹងលើការនាំចេញ ដោយនាំចេញទៅប្រទេសវៀតណាមច្រើនជាងគេ ក្រៅពីនោះមានទីផ្សារប្រទេសជប៉ុន កូរ៉េ អាមេរិក និងកាណាដាជាដើម។

ឯកឧត្តមបានថ្លែងថា៖“ការកើនឡើងខ្ពស់នៃទិន្នផលនេះបានបង្កក្តីលំបាកដល់ការរកទីផ្សារ។ យើងដឹងហើយថា ម្រេចតែមួយក្តាប់គេអាចប្រើបានស្ទើរមួយភូមិ ដូចនេះការរកទីផ្សារពិតជាពិបាក។ នៅចំពោះមុខការលំបាកនេះ និងដើម្បីដោះស្រាយស្ថានភាពប្រឈមនៅពេលខាងមុខ ក្រសួងពាណិជ្ជកម្ម គ្រោងនឹងបង្កើតសហគមន៍ម្រេចឱ្យមាននៅគ្រប់ខេត្តទាំងអស់19 ដែលមានការដាំដុះម្រេចដើម្បីឈានទៅបង្កើតសហព័ន្ធម្រេចនៅថ្ងៃអនាគត ខណៈបច្ចុប្បន្នមានតែខេត្តចំនួន5ប៉ុណ្ណោះដែលមានសហគមន៍ម្រេច។ ការប្រកបអាជីវកម្មម្រេចត្រូវបានធ្វើឡើងដោយឡែកៗពីគ្នារវាងកសិករម្នាក់ទៅកសិករម្នាក់ទៀត ដែលជាកត្តាពិបាក និងការចំណាយខ្ពស់។

យោងតាមការសិក្សា កសិករលក់ម្រេចភ្លាមៗក្រោយប្រមូលផល ដោយសារគ្មានឃ្លាំងស្តុក និងត្រូវការទុនបង្វិល។ អ្នកដាំដុះម្រេច ត្រូវចំណាយថវិកាប្រមាណចន្លោះពី2-3ម៉ឺនដុល្លារក្នុង1ហិកតាសម្រាប់ការដាំដុះម្រេចរហូតដល់ប្រមូលផល៕

October 20, 2017

តើគួរធ្វើយ៉ាងណានៅពេលដែលក្អកមិនបាត់?

អាការក្អក អាចកើតឡើងច្រើនបែបអាស្រ័យលើមូលហេតុរបស់វា មនុស្សយើងមិនអាចជ្រើសរើសថានឹងក្អកបែបណាបាននោះទេ តែជ្រើសរើសក្នុងការចាត់ការវាឱ្យធូរស្រាលទៅវិញយ៉ាងឆាប់រហ័សបាន។ ដូច្នេះហើយទើបខាងវេជ្ជសាស្ត្របែងចែកអាការក្អកចេញជាច្រើនបែបច្រើនយ៉ាង ដូចជា ក្អកស្ងួត និងក្អកមានស្លេស្ម៍ ឬក្អករយៈពេលខ្លី និងក្អករ៉ាំរ៉ៃជាដើម។ មនុស្សក្នុងយុគសម័យនេះកើតអាការក្អកច្រើនគ្នាណាស់ ដោយសារតែបច្ច័យអាកាសធាតុ និងបច្ច័យខាងក្នុងរាងកាយគឺ ប្រព័ន្ធប្រឆាំងជំងឺចុះខ្សោយ ទើបចេះតែក្អកមិនបាត់។

ក្នុងខាងវេជ្ជសាស្ត្របានបែងចែក “អាការក្អក” ចេញជា2បែប ដើម្បីឱ្យលោកអ្នកសម្រេចចិត្តថា នឹងចាត់ការជាមួយវាយ៉ាងដូចម្ដេចដូចតទៅនេះ ៖

1/ ក្អកទូទៅ៖ គឺក្អកដោយសារប្រព័ន្ធដកដង្ហើមមានបញ្ហា ដូចជា ក្អកដោយសារឈ្លក់នឹងល្អងធូលីដី ឬផ្សែងអ័ព្ធជាដើម ក្អកដោយសារកើតជំងឺផ្តាសាយតឹងច្រមុះធម្មតា ឬក្អកដោយសារកើតប្រតិកម្មចាញ់ទីកន្លែង។ល។

2/ ក្អកមួយទៀតដែលត្រូវប្រយ័ត្ននោះគឺថា តើត្រូវទៅរកគ្រូពេទ្យឬក៏អត់ គឺក្អករ៉ាំរ៉ៃយូរអង្វែង ក្អករួមជាមួយហត់ដង្ហក់ដកដង្ហើមមិនរួច ក្អកដោយសារឆ្លងមេរោគចូលធ្ងន់ធ្ងរ ឬមានគ្រុនក្តៅខ្លួនផង ដែលទាំង3រោគសញ្ញានេះគឺជាអាការហើមសួត (សួតឆ្លងមេរោគ)។

ការរក្សាព្យាបាលអាការក្អកបែបទី1 (ក្អកទូទៅ) មានការបឋមព្យាបាលដោយខ្លួនឯងបែបងាយៗដូចតទៅ ៖

• ចាប់ផ្តើមដោយការគេងសម្រាកឱ្យបានច្រើន ចូលគេងយ៉ាងយូរបំផុតនៅម៉ោង10យប់ ដើម្បីឱ្យរាងកាយជួយពង្រឹងប្រព័ន្ធប្រឆាំងជំងឺ។

• ពាក់ស្រោមជើងពេលគេងយប់ ព្រោះបើចង់ឱ្យសុខភាពល្អ ត្រូវតែឱ្យចុងជើងក្តៅឧណ្ហៗជានិច្ច។

• ទទួលទានផ្លែត្របែក ផ្លែប៉េងប៉ោះស្រស់ៗ និងទទួលទានទឹកផ្លែក្រូចវល្លិ៍ (ផ្លែផាសិន) ឱ្យបានញឹកញាប់។

• ផ្លុំសក់ ឬជូតសក់ឱ្យស្ងួតមុនពេលគេង ហាមគេងទាំងសក់ក្បាលសើមជាដាច់ខាត ព្រោះភាពសើមនឹងធ្វើឱ្យមេរោគផ្តាសាយរីកសាយភាយបានល្អនៅក្នុងច្រមុះ និងផ្លូវដង្ហើម។

សម្រាប់ករណីនេះ មានរូបមន្តភេសជ្ជៈពិសេសការពារអាការក្អកបានពិតៗគឺ “ទឹកឃ្មុំផ្សំជាមួយទឹកក្រូចឆ្មារ” ដោយផ្សំក្នុងអត្រាស្មើគ្នា និងមានគន្លឹះពិសេសមួយគឺ មិនលាយជាមួយទឹក ឬដាក់ទឹកកកឡើយ គ្រាន់តែកូរឱ្យចូលគ្នាសព្វ ផ្អែមជូរៗ រួចហើយក្រេបបំបាត់អាការក្អកបាន។

ចំណែកអាការក្អកបែបទី2 គួរតែទៅជួបគ្រូពេទ្យ បើមានអាការបន្ថែមដូចខាងក្រោម ៖

• ក្តៅខ្លួន38.9អង្សា C ឡើង
• ក្អកមានស្លេស្ម៍ លាយឈាម មានពណ៌ក្រហមៗ ឬខៀវ
• មានអាការហត់ដង្ហក់
• ពិបាកដកដង្ហើម
• ឈឺដើមទ្រូងខ្លាំងទាំងពេលក្អក និងមិនក្អក
• ក្អកជាប់ៗគ្នាយូរជាង2សប្តាហ៍

តែជាសរុបទៅ បើលោកអ្នកនៅតែមិនបានធូរស្រាលពីអាការក្អកសោះនោះ គួរតែទៅជួបលោកគ្រូពេទ្យជាបន្ទាន់ ហើយកុំភ្លេចរៀបរាប់អំពីអាការក្អកឱ្យបានលម្អិតផង ព្រោះអ្វីដែលអ្នករៀបរាប់ប្រាប់លោកគ្រូពេទ្យនោះអាចជួយក្នុងការវិនិច្ឆ័យរោគ និងការព្យាបាលបានច្រើនណាស់៕

October 20, 2017

កុមារនៅអាស៊ីទទួលរងអំពើហិង្សាច្រើនជាងគេលើពិភពលោក

ការប្រើអំពើហិង្សាលើកុមារជារឿងដែលពិភពលោកកំពុងយកចិត្តទុកដាក់ខ្លាំងបំផុត ព្រោះថា កុមារជាធនធានដែលមានសារៈសំខាន់បំផុតសម្រាប់កំណត់អនាគតរបស់ពិភពលោក។

ទម្លាប់នៃការប្រើប្រាស់ហិង្សាដើម្បីអប់រំកុមារ រួមទាំងសកម្មភាពផ្សេងៗជាច្រើនទៀត ដែលត្រូវបានគេមើលឃើញថាសុទ្ធសឹងជារូបភាពអំពើហិង្សាដែលអាណាព្យាបាលភាគច្រើនបានធ្វើដោយមិនដឹងខ្លួន។ សកម្មភាពទាំងអស់នេះត្រូវបានគេមើលឃើញថា អាចបណ្តាលឱ្យកុមារត្រូវស្ថិតក្នុងស្ថានភាពបាក់ស្បាត បាត់បង់ការចងចាំ រួមទាំងប៉ះពាល់ដល់ការរីកលូតលាស់នៃគំនិតប្រាជ្ញារបស់កុមារថែមទៀតផង។

យោងតាមទិន្នន័យរបស់អង្គការទស្សនៈពិភពលោក World Vision បានបង្ហាញថា កុមារប្រមាណជាង 1ពាន់លាននាក់លើពិភពលោកបានទទួលរងនូវអំពើហិង្សាជារៀងរាល់ឆ្នាំ ហើយក្នុងចំណោមកុមារដែលទទួលរងនូវអំពើហិង្សាទាំងអស់នោះ ត្រូវបានគេរកឃើញថា ស្ថិតនៅក្នុងទ្វីបអាស៊ីច្រើនជាងគេ។

អង្គការដដែលបានបង្ហាញផងដែរថា កុមារប្រមាណជាង 77.7លាននាក់នៅតំបន់អាស៊ីប៉ាស៊ីហ្វិក ដែលក្នុងនោះមានកម្ពុជាផងដែរ បានទទួលរងគ្រោះពីការរំលោភបំពានលើកម្លាំងពលកម្ម។

ការទប់ស្កាត់អំពើហិង្សាត្រូវបានស្ថាប័នរដ្ឋ ឯកជន រួមទាំងអង្គការសង្គមស៊ីវិលផង ព្យាយាមគ្រប់លទ្ធភាពដើម្បីធ្វើយ៉ាងណាបង្ហាញពីផលប៉ះពាល់នៃកត្តាអវិជ្ជមានទាំងនេះដល់អាណាព្យាបាលភាគច្រើនឱ្យបានដឹង តែទោះជាយ៉ាងនេះក្តី ក៏គេសង្កេតឃើញថា នៅតំបន់ដាច់ស្រយាល ជាពិសេសតំបន់ដែលប្រព័ន្ធផ្សព្វផ្សាយមិនអាចទៅដល់នៅតែប្រឈមនឹងបញ្ហាអំពើហិង្សាលើកុមារច្រើននៅឡើយ។ ផ្ទុយមកវិញ នៅតំបន់ប្រជុំជន ចាប់ផ្តើមមានស្ថានភាពប្រសើរឡើងច្រើន ព្រោះមនុស្សចាប់ផ្តើមយល់ដឹងពីផលវិបាកនៃការប្រើប្រាស់អំពើហិង្សាលើកុមារ រួមទាំងយល់ដឹងផងដែរនូវវិធីសាស្ត្រដើម្បីបញ្ចៀសអំពើហិង្សាលើពួកគេ៕

October 19, 2017

មិនធម្មតាទេ…សម្បុកសត្វត្រចៀកកាំ1គីឡូលក់បាន1000ដុល្លារ

ភ្នំពេញ៖ មុខរបរចិញ្ចឹមសត្វត្រចៀកកាំយកទឹកមាត់ គឺជាអាជីវកម្មលាក់មុខមួយនៅកម្ពុជា មិនសូវសម្បូរអ្នកចិញ្ចឹមប៉ុន្មានទេ ប៉ុន្តែអាចរកប្រាក់ចំណេញបានច្រើន ដោយក្នុងមួយគីឡូក្រាមមានតម្លៃទាបបំផុត គឺមួយពាន់ដុល្លារ ហើយកំពុងត្រូវប៉ាន់បំផុតនៅក្នុងទីផ្សារបរទេស។

លោក មៀវ សុខទ្រី អគ្គលេខាធិការសហព័ន្ធសត្វត្រចៀកកាំកម្ពុជា បានបញ្ជាក់ឱ្យដឹងថា បច្ចុប្បន្ននេះតម្លៃសម្បុកសត្វត្រចៀកកាំក្នុងមួយគីឡូក្រាមប្រហែល1,000ដុល្លារ ក្នុងនោះទីផ្សារនាំចេញសម្បុកសត្វត្រចៀកកាំធំជាងគេគឺប្រទេសចិន បន្ទាប់មកប្រទេសវៀតណាម ម៉ាឡេស៊ី និងប្រទេសថៃ ដែលការនាំចេញសម្បុកសត្វត្រចៀកកាំក្នុងមួយខែៗប្រមាណជាជាង10តោន ហើយក្នុងមួយឆ្នាំសរុបប្រមាណជាជាង100តោន។

លោកបញ្ជាក់ថា បច្ចុប្បន្នការចិញ្ចឹមសត្វត្រចៀកកាំនៅកម្ពុជាកំពុងមានការកើនឡើងខ្លាំងដោយសារតែសម្បុកសត្វត្រចៀកកាំកំពុងតែមានតម្លៃថ្លៃ និងតម្រូវការខ្ពស់ ហើយការចិញ្ចឹមសត្វត្រចៀកកាំមិនត្រូវការចំណាយពេលវេលាច្រើនដូចការធ្វើអាជីវកម្មផ្សេងៗនោះទេ ដោយគ្រាន់តែរៀបចំសាងសង់ផ្ទះដើម្បីទុកឱ្យសត្វត្រចៀកកាំរស់នៅ ហើយនឹងចាំទទួលបាននូវអនុផលដោយគ្រាន់តែសត្វត្រចៀកកាំបញ្ចេញទឹកមាត់ធ្វើសម្បុកនៅក្នុងផ្ទះនោះតែប៉ុណ្ណោះ។

ការចិញ្ចឹមសត្វត្រចៀកកាំនេះ គឺមានរហូតដល់រាប់ពាន់ផ្ទះដែលភាគច្រើនចិញ្ចឹមនៅក្នុងខេត្ដព្រះសីហនុ កំពត និងខេត្ដកោះកុង ដែលជាខេត្ដនៅជាប់ឆ្នេរសមុទ្រដែលផ្ដល់ភាពអនុគ្រោះច្រើនដល់ការចិញ្ចឹមសត្វត្រចៀកកាំ។

ជាមួយគ្នានេះលោកបានអំពាវនាវដល់សមាជិកសហព័ន្ធសត្វត្រចៀកកាំកម្ពុជា និងម្ចាស់អាជីវកម្មសត្វត្រចៀកកាំទាំងអស់អាចមកចុះឈ្មោះចូលរួមវគ្គបណ្ដុះបណ្ដាលទាក់ទងនឹងការថែទាំផ្ទះសត្វត្រចៀកកាំ និងការចិញ្ចឹមសត្វត្រចៀកកាំ ទាក់ទងនឹងការថែទាំ ការបង្កើនទិន្នផលសម្បុកសត្វត្រចៀកកាំឱ្យទទួលបានផលកាន់តែច្រើន និងមានគុណភាពល្អ ខណៈដែលសហព័ន្ធបានសហការជាមួយអ្នកជំនាញសត្វត្រចៀកកាំមកពីប្រទេសម៉ាឡេស៊ីធ្វើការបណ្ដុះបណ្ដាលនៅថ្ងៃទី22 ខែវិច្ឆិកា ឆ្នាំ2917ខាងមុខនេះ នៅខេត្ដព្រះសីហនុ៕

October 19, 2017

Author: វល័ក្ខ