វល័ក្ខ - La Reine Media

Ronaldo ផ្តួល Messi ដើម្បីឈ្នះពានកីឡាករឆ្នើមបំផុតប្រចាំឆ្នាំរបស់ FIFA

ខ្សែប្រយុទ្ធ Cristiano Ronaldo បានជាប់ជាកីឡាករឆ្នើមប្រចាំឆ្នាំរបស់ពិភពលោកក្នុងកម្មវិធីប្រគល់ពានរង្វាន់ Best Fifa Football Awards ឆ្នាំ2017 ក្នុងទីក្រុងឡុងដ៍ កាលពីថ្ងៃចន្ទ។ ខ្សែប្រយុទ្ធអន្តរជាតិព័រទុយហ្គាល់របស់ក្លិប Real Madrid រូបនេះបានផ្តួលតារាឆ្នើម Lionel Messi របស់ក្លិប Barcelona និងខ្សែប្រយុទ្ធ Neymar របស់ក្លិប Paris St-Germain ដើម្បីឈ្នះពានកិត្តិយសពី FIFA។

Ronaldo វ័យ 32ឆ្នាំ បានជួយឲ្យក្រុម Real ឈ្នះពានទាំងពានក្របខ័ណ្ឌ Champions League និង La Liga ក្នុងរដូវកាលឆ្នាំ2016-2017។ ខ្សែបម្រើអន្តរជាតិហូឡង់ Lieke Martens របស់ក្លិប Barcelona បានជាប់ជាកីឡាការិនីឆ្នើមប្រចាំឆ្នាំរបស់ FIFA ស្របពេលដែលលោក Zinedine Zidane របស់ក្លិប Real Madrid បានឈ្នះពានគ្រូបង្វឹកឆ្នើមបំផុតប្រចាំឆ្នាំ ហើយអ្នកស្រី Sarina Wiegman សញ្ជាតិហូឡង់ ក៏បានជាប់ជាគ្រូបង្វឹកឆ្នើមផ្នែកនារីប្រចាំឆ្នាំផងដែរ។ ស្របពេលជាមួយគ្នានេះ ខ្សែប្រយុទ្ធ Olivier Giroud របស់ក្លិប Arsenal បានឈ្នះពាន Puskas សម្រាប់ការរកបានគ្រាប់បាល់ដ៏ល្អដាច់គេបំផុតក្នុងឆ្នាំ2017 តាមរយៈការប្រើកែងជើងទាត់បាល់បញ្ចូលទីក្នុងពេលប្រកួតជាមួយនឹងក្រុម Crystal Palace កាលពីខែមករា។

Ronaldo បានស៊ុតបាល់បញ្ចូលទីសរុប44គ្រាប់ ក្នុងការប្រកួត48លើកសម្រាប់ក្លិប និងប្រទេសរបស់គេក្នុងរដូវកាលមកទល់ពេលនេះ ក្នុងនោះរាប់បញ្ចូលទាំងការស៊ុតបាល់បញ្ចូលទី2គ្រាប់ក្នុងពេលក្រុមខ្លួនទទួលជ័យជម្នះ 4-1 លើក្រុម Juventus ក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ ក្នុងទីក្រុង Cardiff កាលពីថ្ងៃទី3 ខែមិថុនា ផងដែរ។ នេះគឺជាការឈ្នះពានកីឡាករឆ្នើមបំផុតប្រចាំឆ្នាំរបស់ពិភពលោកជាលើកទី5 របស់គេ ប៉ុន្តែតារាឆ្នើមរូបនេះនៅតែមិនទាន់ស្កប់ចិត្តឡើយ។ Ronaldo បានឲ្យដឹងថា៖ «ខ្ញុំចង់ឈ្នះពាននេះ7លើក។ ការឈ្នះពាននេះ5លើកគឺជារឿងដ៏ល្អ ប៉ុន្តែ លេខ7 គឺជាលេងនាំសំណាង ហេតុនេះ ការឈ្នះពាន7លើក នឹងក្លាយជារឿងដ៏ល្អអស្ចារ្យ»៕

ប្រភពពី៖ BBC

October 24, 2017

ដាច់ស្តុកកម្ម៉ងទុកមុនទី 1 អស់ម្ម៉ត់ Huawei nova 2i កាមេរ៉ា4 បើកទទួលកម្ម៉ងលើកទី 2

ក្រោយពីជោគជ័យខ្លាំង លើស្តុកទី1 រួចមក ក្រុមហ៊ុនស្មាតហ្វូនឈានមុខលំដាប់ពិភពលោក Huawei ប្រចាំកម្ពុជា បន្តទទួលកម្ម៉ង់ទុក ស្តុកទី2 របស់ស្មាតហ្វូនស៊េរីថ្មី កាមេរ៉ា 4 Huawei nova 2i តម្លៃត្រឹមតែ $ 329 មានថែមកាដូដ៍កក្រើក បញ្ចុះតម្លៃស្ទើរមិនគួរឱ្យជឿ ចាប់ពីថ្ងៃនេះ និងអាចទទួលទូរសព្ទ័បានចន្លោះពីថ្ងៃទី 05 ដល់ 10 វិច្ឆិកា ឆ្នាំ2017 ។

អតិថិជនដែលខកខានកម្ម៉ង់ពុំទាន់ស្តុកទី 1 របស់ស្មាតហ្វូន Huawei nova 2i អាចរួសរាន់ ធ្វើការកក់ទុកមុនសម្រាប់ស្តុកទី 2 ឥលូវនេះ នៅតាមបណ្តាហាងដែលមានបុគ្គលិកលក់ រឺ ស្លាកសញ្ញា Huawei ដើម្បីទទួលបានបទពិសោធន៍ថ្មី បច្ចេកវិទ្យាថ្មី អ្វីដែលថ្មី អ្វីដែលប្លែក និងលេចធ្លោរជាង ស្អាតជាង ល្អជាង ស្តើងជាង ស្រាលជាង ថតរូបច្បាស់ជាង អេក្រង់ច្បាស់ជាង ថាមពលថ្មប្រើបានយូរជាង អ៊ីនធឺណែតលឿនជាង សេវាខ្លាំងកប់ជាង មានកាដូច្រើនជាង តម្លៃពិសេសជាងស្មាតហ្វូនដទៃ ជាមួយនឹងកាដូថែមៗ : 1- ដងថតរូប (Original Selfie Stick), 2- កាសធំពាក់ក្បាល សម្រាប់ស្តាប់តន្ត្រី (Original Big Head Ear Phone), 3- ក្រវិលទម្រទូរស័ព្ទ (Phone Ring), 4- អាវយឺតកាលីប, 5- ស៊ីមស្មាតមួយ និងកពា្ចប់ធំម្ម៉ងរយៈពេល 12 សប្តាហ៍ឥតគិតថ្លៃ។

Huawei nova 2i គឺជាកំពូលស្មាតហ្វូនស៊េរីថ្មី កាមេរ៉ា 4 (ភ្លោះមុខ ភ្លោះក្រោយ) ដំបូងគេបង្អស់ ក្រោមរបកគំហើញថ្មី បច្ចេកវិទ្យាថ្មីរបស់ក្រុមហ៊ុន Huawei ។ Huawei nova 2i ត្រូវបានរចនាឡើងជាមួយនឹងអេក្រង់ធំ ពេញចិត្ត ពេញភ្នែក ពេញគែម 5.9 អ៊ីញ (HUAWEI FullView Display) ច្បាស់ថ្លាឆ្វង់កម្រិត 2K (1080*2160) ងាយស្រួលក្នុងការទស្សនាភាពយន្ត តន្រី្តចម្រៀង យូធូប បណ្តាញសង្គម និងកម្សាន្តគ្មានដែនកំណត់ ពិសេស Live Facebook រឺ Video Calls ច្បាស់កប់ ពេញបេះដូង លង់នឹងរាងស្អាត ស្តើង គែមស្អាត ស្រាល ធន់មាំ ងាយស្រួលកាន់ដោយដៃម្ខាង ជាមួយនឹងសមត្ថភាពកំពូលនៃកាមេរ៉ាភ្លោះមុខ 13MP/2MP ភ្ជាប់ជាមួយនឹង Smart Selfie Toning Flash ឯកទេសអ្នក Selfie មួយគ្មានពីរ អាចផ្តិតយករូបភាពច្បាស់ស្រស់ស្អាត Pro Mode បែបសិល្បៈ portrait, Wide Aperture, Effect, Bokeh ស៊ីវិល័យ និងរស់រវើក។

ចំណែកឯ កាមេរ៉ាភ្លោះ ខាងក្រោយវិញ 16MP/2MP មានសមត្ថភាពខ្លាំង អាចផ្តិតយករូបភាព បែបសិល្បៈ ស៊ីវិល័យ កម្រិតខ្ពស់ ព្រាលផ្ទៃខាងក្រោយបានស្រស់ស្អាតល្អ (bokeh) និងជួយបន្ថែមពន្លឺ សម្រាប់ទីតាំង ដែលមាន ពន្លឺខ្សោយ ដូចកាមេរ៉ាអាជីព។ HUAWEI nova 2i ត្រូវបានបំពាក់ដោយបន្ទះឈីប Octa-core Kirin 659, មាន រ៉េម (RAM) 4GB និង រ៉ូម (ROM) 64GB ប្រើប្រាស់ប្រព័ន្ធប្រតិបត្តិការ Android-7 ជាមួយនឹងថាមពលថ្មធំមហិមា 3,340mAh ស៊ីមពីរ ល្បឿនអ៊ីនធើណិតលឿនកប់ Best 4G LTE Smart Ever ផ្តល់ជូននូវបទពិសោធន៍ថ្មីអស្ចារ្យ កាន់តែលឿន និង អស់កង្វល់រឿងអស់ថ្ម ល្អប្រើ មិនមែនល្អមើល ប្រើអស់ចិត្ត តែមិនអស់ថ្ម ។

លោក អែម យុទ្ធូ ប្រធានផ្នែកទីផ្សារជាន់ខ្ពស់ ក្រុមហ៊ុន Huawei ប្រចាំកម្ពុជាបានឱ្យដឹងថា ស្មាតហ្វូនស៊េរីថ្មី កាមេរ៉ាភ្លោះមុខក្រោយ Huawei nova 2i កំពុងតែអង្រួនបេះដូងអ្នកប្រើប្រាស់ និងឆក់យកចំណែកទីផ្សារស្មាតហ្វូនបានយ៉ាងប្រសើរ។ មកទល់ពេលនេះ សម្រាប់ស្តុកទី 1 យើងទទួលបានការកក់ទុកមុនយ៉ាងច្រើនលើសលុបហួសពីការរំពឹងទុក បើទោះបីជា Huawei nova 2i ពុំទាន់បង្ហាញខ្លួនជាផ្លូវការក៏ដោយ អាស្រ័យហេតុនេះ ទើប Huawei ទទួលកម្ម៉ង់ទុកមុន ស្តុកទី 2 ចាប់ពីថ្ងៃនេះ ដោយអាចទទួលទូរសព្ទ័ថ្ងៃទី 05 ដល់ 10 វិច្ឆិកា ឆ្នាំ2017 ។

គួរបញ្ជាក់ថា រាល់អតិថិជនដែលបានកម្ម៉ង់ទុកមុន សម្រាប់ស្តុកទី 1 នឹងអាចទទួលបានកាដូយ៉ាងច្រើនសន្ធឹកសន្ធាប់ រួមទាំងស្មាតហ្វូនស៊េរីថ្មី Huawei nova 2i កាមេរ៉ា 4 នៅថ្ងៃទី 21 ដល់ 23 តុលា ស្អែកនេះ ។

Huawei nova 2i Video link: https://www.youtube.com/watch?v=O_xUWeUqQ4o&feature=youtu.behttps://www.youtube.com/watch?v=p7weIHj4JrY&feature=youtu.be

Giant PROMO Video link: https://www.youtube.com/watch?v=GexwNYCVNgY&feature=youtu.be

សម្រាប់ព័ត៌មានអំពីផលិតផល និងប្រូម៉ូសិនថ្មី

Huawei ប្រូម៉ូសិនយក្ស គឺជាកម្មវិធី ថែមធំៗ ថែមឥតល្ហែ ថែមមួយកំប្លេរ ថែមមិនសំចៃ តម្លៃកប់ពេញចិត្តស្តូក ចាប់ពីថ្ងៃនេះ រហូតដល់ថ្ងៃទី 31 ធ្នូ ឆ្នាំ 2017 ឫកាដូអស់ពីស្តុក។ អតិថិជន នឹងទទួលបានកាដូភ្លាមៗ ច្រើនកប់ចិត្ត ដោយគ្រាន់តែជាវ ស្មាតហ្វូន រឺថេប្លេត Huawei ម៉ូដែលណាមួយក៏បាន នៅតាមហាងលក់ទូរសព្ទនានា ដែលមានភ្នាក់ងារបុគ្គលិកលក់ រឺស្លាកសញ្ញា Huawei។

សម្រាប់ព័ត៌មានថ្មីៗពី Huawei
Youtube link: https://www.youtube.com/watch?v=wstAuSkfqLM&feature=youtu.bewww.youtube.com/c/HuaweiMobileKH
Instagram link: www.instagram.com/huaweimobilekh
Facebook: www.facebook.com/huaweimobilekh
អ្នកតំណាង៖ ង៉ោ ម៉េងហ៊ួង / 010 44 99 06 / អ៊ីមែល៖ [email protected]

October 22, 2017

អង្គការ JICA ផ្តើមសិក្ខាសាលាស្តីពីការអភិវឌ្ឍទឹកស្អាតនៅកម្ពុជា

ភ្នំពេញ៖ ក្នុងការចូលរួមលើកកម្ពស់សុខភាពប្រជាពលរដ្ឋ ក្រុមអ្នកជំនាញជប៉ុនមកពីទីក្រុង Kitakyushu និងអ្នកជំនាញអង្គការ JICA បានរួមគ្នាបើកសិក្ខាសាលាបណ្តុះបណ្តាលការអភិវឌ្ឍទឹកស្អាតនៅកម្ពុជាឱ្យកាន់តែមានភាពល្អប្រសើរឡើង។

ឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានចាត់ទុកការការបើកសិក្ខាសាលាស្តីពីបច្ចេកវិទ្យាវិស័យទឹកស្អាតរយៈពេល2ថ្ងៃ ចាប់ពីថ្ងៃទី21ដល់ថ្ងៃទី22នេះមានសារៈសំខាន់ណាស់ដើម្បីផ្តល់ជាចំណះដឹង និងបទពិសោធដល់ប្រតិបត្តិករទឹកស្អាត ទាំងរដ្ឋ និងឯកជនបានសិក្សាស្វែងយល់ពីបច្ចេកវិទ្យាថ្មីៗទំនើបរបស់ជប៉ុន ដែលឱកាសនោះ មានការដាក់តាំងបង្ហាញឧបករណ៍ សម្ភារផ្នែកវិស័យទឹកស្អាតផងដែរ ។

ដើម្បីឱ្យសិក្ខាសាលាទទួលបានជោគជ័យធំធេង និងបញ្រ្ជាបចំណេះដឹងដល់សិក្ខាកាម កាន់តែច្បាស់លាស់ ភាគីជប៉ុនសហការជាមួយមន្ត្រីជំនាញក្រសួងបានធ្វើការបកប្រែបទឧទ្ទេសនាមជាភាសាខ្មែរ ដើម្បីឱ្យប្រតិបត្តិករទឹកស្អាតទាំងអស់ដែលជាម្ចាស់ក្រុមហ៊ុន អង្គភាព ឬអ្នកមានតួនាទីក្នុងការសម្រេចចិត្តខ្ពស់ ពីព្រោះសិក្ខាសាលានេះជាការបញ្ជ្រាបចំណេះដឹង ដែលយើងផ្តល់តម្លៃខ្ពស់ដល់អ្នកជំនាញការមកពីប្រទេសជប៉ុន។

លោក TAKAYAMA Kazuo ប្រធានទទួលបន្ទុកផ្នែកគម្រោងអន្តរជាតិ នៃនាយកដ្ឋានគម្រោងអន្តរជាតិផ្នែកទឹកស្អាត និងទឹកកខ្វក់នៃទីក្រុង Kitakyushu ប្រទេសជប៉ុនថ្លែងថា សិក្ខាសាលានេះនឹងផ្តល់ចំណេះដឹង និងបទពិសោធ ពិសេសផ្តល់ជំនាញកាន់តែប្រសើរឡើងដើម្បីយកទៅប្រើប្រាស់ជាប្រយោជន៍នៅក្នុងអង្គភាព ក៏ដូចជាប្រជាពលរដ្ឋខ្មែរទូទៅដែរ៕

October 21, 2017

កុំឱ្យរំលង…ឱកាសការងារជាង 2ម៉ឺនមុខតំណែងបានមកដល់ហើយ!

ខណៈដែលកម្មវិធីពិព័រណ៍ការងារ និងផលិតភាពជាតិលើកទី7 ជិតខិតចូលមកដល់ត្រូវបានគេមើលឃើញថា កម្មវិធីនេះនឹងផ្ដល់អត្ថប្រយោជន៍ និងឱកាសការងារយ៉ាងល្អសម្រាប់យុវជនកម្ពុជាដើម្បីបង្កើនប្រាក់ចំណូល។

ឯកឧត្ដម ហៃ ហ៊ុនឡេង ទីប្រឹក្សាក្រសួងការងារ និងជាអនុប្រធានទីភ្នាក់ងារជាតិ និងមុខរបរនៃក្រសួងការងារបានលើកឡើងថា វេទិកាពិព័រណ៍ការងារបង្កើតឡើង ដើម្បីផ្ដល់កន្លែងជួបជុំគ្នារវាងនិយោជក និងអ្នកផ្ដល់ការអប់រំបណ្ដុះបណ្ដាល និងអ្នកស្វែងរកការងារធ្វើ ក៏ដូចជាចែករំលែកព័ត៌មានទីផ្សារការងារ ពិសេសចូលរួមលើកកម្ពស់ការងារ និងផ្ដល់ឱកាសការងារយ៉ាងទូលំទូលាយដល់កម្លាំងពលកម្មទាំងមានជំនាញ និងឥតជំនាញឱ្យទទួលបានការងារកាន់តែប្រសើរ និងចំណេញពេលវេលា និងទទួលបានប្រាក់ចំណូលខ្ពស់។

ដើម្បីងាយស្រួលទទួលបានឱកាសការងារភ្លាមៗនេះ យុវជន ក៏ដូចជាអ្នកចូលរួមក្នុងកម្មវិធីពិព័រណ៍ការងារនៅថ្ងៃទី27-28 តុលា ឆ្នាំ2017ខាងមុខ សូមភ្ជាប់មកនូវជាមួយប្រវត្ដិរូបរបស់ខ្លួនដើម្បីដាក់ស្នើសុំដោយផ្ទាល់ជាមួយនិយោជកដែលកំពុងតែត្រូវការកម្លាំងពលកម្ម នៅក្នុងកម្មវិធីពិព័រណ៍។ ក្នុងពិព័រណ៍ការងារឆ្នាំ2017នេះ មានឱកាសការងារប្រមាណ2ម៉ឺនមុខតំណែងដែលផ្ដល់ដោយក្រុមហ៊ុនធំៗជាង120 មកពីវិស័យសំខាន់ដូចជាធនាគារ មីក្រូហិរញ្ញវត្ថុ សំណង់ សណ្ឋាគារ បដិសណ្ឋារកិច្ច ទូរគមនាគមន៍ ការអប់រំ និងកាមន្ដសាលជាដើម។

ទីប្រឹក្សាក្រសួងការងារ និងជាអនុប្រធានទីភ្នាក់ងារជាតិបានបញ្ជាក់ថា វេទិកានេះក៏ជាការចូលរួមជំរុញយន្ដការការងាររាជរដ្ឋាភិបាលដើម្បីលើកកម្ពស់ការងារផងដែរ។ ក្រៅពីផលប្រ យោជន៍ទាំងនេះហើយ ពិព័រណ៍ការងារបានកាត់បន្ថយគម្លាតរវាងការផ្គត់ផ្គង់ និងតម្រូវការក្នុងទីផ្សារការងារព្រមទាំងបង្កភាពស្រួលដល់យុវជនដែលត្រូវឈានចូលទៅក្នុងទីផ្សារងារដើម្បីបានការងារបន្ទាប់ពីបញ្ចប់ការសិក្សាទៀតផង៕

October 20, 2017

កម្ពុជាចាប់ផ្តើមរៀបចំប្រព័ន្ធគ្រប់គ្រងទឹកកខ្វក់នៅតាមដងទន្លេសាប

ភ្នំពេញ៖ ដើម្បីលើកកម្ពស់សុខមាលភាពប្រជាពលរដ្ឋដែលរស់នៅតាមដងទន្លេសាប ក្រសួងសាធារណការ និងដឹកជញ្ជូនបានរៀបចំវគ្គបណ្តុះបណ្តាលដល់មន្ត្រីជំនាញនៅតាមបណ្តាខេត្តជាប់បឹងទន្លេសាបដើម្បីឱ្យមានសមត្ថភាពកាន់តែខ្លាំងឡើងក្នុងការគ្រប់គ្រងកាកសំណល់និងប្រព័ន្ធគ្រប់គ្រងទឹកកខ្វក់នេះ។

វគ្គបណ្តុះបណ្តាលស្តីពី “ការគ្រប់គ្រងទឹកកខ្វក់” នេះបានរៀបចំនៅក្នុងសណ្ឋាគារប៉ារ៉ាឌី ក្រុងសៀមរាប ខេត្តសៀមរាបដែលគោលបំណងសំខាន់នោះគឺ ដើម្បីពង្រឹងពង្រីកចំណេះដឹង និងសមត្ថភាពបន្ថែមដល់មន្ត្រីជំនាញនាយកដ្ឋាន មន្ត្រីមន្ទីរសាធារណការ និងដឹកជញ្ជូនខេត្ត មន្ត្រីមន្ទីរបរិស្ថានខេត្ត និងមន្ត្រីសាលាក្រុងនៃខេត្តចំនួន4ដែលនៅជាប់នឹងបឹងទន្លេសាប គឺខេត្ត កំពង់ធំ កំពង់ឆ្នាំង បន្ទាយមានជ័យ និងពោធិ៍សាត់ ។

កម្មវិធីនៃវគ្គបណ្តុះបណ្តាលរួមមាន ការគ្រប់គ្រងសំណល់ភក់ យន្តការនៃការបង្កើតអង្គភាពលូទឹក និងស្ថានីយចម្រោះសម្អាតទឹកសំណល់ ការកំណត់ថ្លៃសេវាចម្រោះទឹកសំណល់ ការសិក្សាគណនាប្រព័ន្ធប្រព្រឹត្តកម្មទឹកកខ្វក់ជាប្រភេទចម្រោះតាមបែបធម្មជាតិ Lagoon System ការចុះពិនិត្យទីតាំងស្ថានីយចម្រោះទឹកសំណល់ជាក់ស្តែង និងការចែករំលែកបទពិសោធគ្នាទៅវិញទៅមកតាមខេត្តនីមួយៗដែលខ្លួនគ្រប់គ្រងតាមរយៈការធ្វើបទបង្ហាញ បង្កើនចំណេះដឹង អនុវត្ត និងយុទ្ធនាការអប់រំផ្សេង។

គួរបញ្ជាក់ថា ប្រជាពលរដ្ឋរស់នៅតាមដងទន្លេសាបបានជួបការលំបាកដោយសារកង្វះខាតទឹកស្អាត និងបង្គន់អនាម័យប្រើប្រាស់ ដោយពលរដ្ឋរស់នៅលើទឹកមួយចំនួនបានបោះចោលកាកសំណល់ផ្សេង និងបន្ទោបង់នៅលើទឹក ហើយប្រើប្រាស់ទឹកនោះវិញដដែល ដែលពួកគាត់គិតថា កាកសំណល់ដែលគាត់ទម្លាក់ចោលនោះហូរទៅតាមទឹកអស់ហើយ តែធាតុពិតគឺវាបានបង្កភាពកខ្វក់ពីមនុស្សម្នាក់ទៅមនុស្សម្នាក់ទៅវិញទេ៕

October 20, 2017

អ្នកនិពន្ធកម្ពុជារៀបចំមហោស្រពអក្សរសិល្ប៍ខ្មែរដើម្បីលើកស្ទួយការសរសេរ

វិស័យអក្សរសិល្ប៍ខ្មែរ ធ្លាប់មានប្រវត្តិយូរលង់តាំងពីបុរាណកាល រហូតមកដល់ទសវត្សរ៍1970 និងបានងើបឡើងវិញបន្ទាប់ពីសម័យខ្មែរក្រហម។ បច្ចុប្បន្នស្នាដៃនិពន្ធ ឱកាស និងគុណតម្លៃរបស់អ្នកនិពន្ធ និងវិស័យបោះពុម្ពមានការរីកចម្រើនគួរឱ្យកត់សម្គាល់ ក៏ប៉ុន្តែវិស័យនេះទាមទារឱ្យមានការបន្តជ្រោមជ្រែង បង្កលទ្ធភាព និងឱកាសដល់អ្នកនិពន្ធ តាមរយៈពិព័រណ៍សៀវភៅ សិក្ខាសាលា សន្និសីទ និងមហោស្រពអក្សរសិល្ប៍ខ្មែរជាដើម។

ដោយមើលឃើញពីបញ្ហាទាំងអស់នេះ អ្នកនិពន្ធ សូ ភីណា រួមទាំងក្រុមស្ថាបនិកស្លាបប៉ាកកាខ្មែរ បានរៀបចំមហោស្រពអក្សរសិល្ប៍ខ្មែរឡើងដើម្បីរួមចំណែកលើកស្ទួយវិស័យអក្សរសិល្ប៍នៅកម្ពុជាតាមរយៈការបំផុសសកម្មភាពសាធារណជនឱ្យបានឃើញនូវស្នាដៃប្រកបដោយភាពច្នៃប្រឌិតរបស់អ្នកនិពន្ធកម្ពុជា។

កម្មវិធីនេះមានគោលបំណង បណ្តុះស្មារតីស្រឡាញ់អក្សរសិល្ប៍ជាតិ លើកកម្ពស់កិត្តិយស និងគុណតម្លៃរបស់អ្នកនិពន្ធខ្មែរនៅក្នុងសង្គមជាតិ និងជួយបង្កើនឱកាសដល់អ្នកនិពន្ធក្នុងការទំនាក់ទំនង និងទីផ្សារ។ ទស្សនវិស័យរបស់មហោស្រពអក្សរសិល្ប៍ខ្មែរគឺ ប្រជាជនកម្ពុជានឹងទទួលបាននូវអក្សរសិល្ប៍ខ្មែរល្អឯក និងលទ្ធភាពកាន់តែប្រសើរឡើងក្នុងការទទួលបានស្នាដៃនិងចំណេះដឹងអក្សរសិល្ប៍។ មហោស្រពនេះនឹងត្រូវបានរៀបចំឡើងលើកទី1នៅខេត្តសៀមរាប ដែលជាបណ្តុំវប្បធម៌ អរិយធម៌របស់ខ្មែរ។ កម្មវិធីនាឆ្នាំបន្ទាប់ នឹងរៀបចំឡើងទៅតាមបណ្តាខេត្តនានា ទៅតាមលទ្ធភាព និងស្ថានភាពជាក់ស្តែង។

មហោស្រពអក្សរសិល្ប៍ខ្មែរលើកទី1នេះ រួមមានកម្មវិធីជាច្រើន ដូចជា វេទិកាពិភាក្សាអំពីបរិបទសំខាន់ៗ ការសម្ពោធសៀវភៅ សិក្ខាសាលានិពន្ធ និងការសម្តែងសិល្បៈកម្សាន្តផងដែរ៕

October 20, 2017

ការងារស្ម័គ្រចិត្តមិនមែនចំណេញគ្រប់តែរឿងនោះទេ

យុវជននាពេលបច្ចុប្បន្ន តែងតែនិយមធ្វើការងារស្ម័គ្រចិត្តដើម្បីស្វែងរកបទពិសោធការងារ រួមទាំងការស្វែងរកឱកាសដើម្បីអនុវត្តជាក់ស្តែងនូវទ្រឹស្តីដែលធ្លាប់បានរៀន ដែលអាចធ្វើឱ្យពួកគេទទួលបានការងារល្អធ្វើនៅថ្ងៃអនាគត តែទោះជាយ៉ាងនេះក្តីការងារស្ម័គ្រចិត្ត មិនសុទ្ធតែល្អទាំងស្រុងនោះទេ ប្រសិនបើពួកគេមិនចេះមើលកាលៈទេសៈ។

លោក តន់ រតនា អនុប្រធានក្រុមយុវជនដើម្បីយុវជនបានយល់ថា បញ្ហាខាត ឬចំណេញនៅក្នុងការងារស្ម័គ្រចិត្ត គឺអាស្រ័យទៅលើបុគ្គលផ្ទាល់ក្នុងការគ្រប់គ្រងពេលវេលាទៅតាមកាលៈទេសៈ ដើម្បីទាញយកប្រយោជន៍ពីការងារស្ម័គ្រចិត្ត។ ផលចំណេញដែលកើតចេញពីការងារស្ម័គ្រចិត្ត គឺអាចធ្វើឱ្យយុវជនមានសមត្ថភាពជំនាញកាន់តែច្បាស់លាស់ មានសេចក្តីក្លាហាន និងចេះបត់បែនខ្ពស់លើគ្រប់កិច្ចការងារដើម្បីដោះស្រាយបញ្ហាដែលកើតមានឡើងនៅចំពោះមុខ។

លោក តន់ រតនា បាននិយាយថា៖ “ក្រៅពីការអភិវឌ្ឍសមត្ថភាពផ្នែកខាងក្នុង អ្នកធ្វើការងារស្ម័គ្រចិត្តអាចមានឱកាសទទួលបានអាហារូបករណ៍ ឬវគ្គផ្លាស់ប្តូរការសិក្សា (Exchange) នៅបរទេសថែមទៀតផង ព្រោះពួកគេភាគច្រើនជាបុគ្គលមានភាពជាអ្នកដឹកនាំដែលស្ថានទូត និងបណ្តាអង្គការអន្តរជាតិនានាចាប់អារម្មណ៍។

លោក តន់ រតនា បានបង្ហាញផងដែរថា ការងារស្ម័គ្រចិត្តទាមទារឱ្យយុវជនមានការខិតខំប្រឹងប្រែង និងអត់ធ្មត់ខ្ពស់ទើបទទួលបានជោគជ័យ ព្រោះថា ការស្ម័គ្រចិត្តធ្វើការលើគម្រោងណាមួយពួកគេនឹងមិនទទួលបានប្រាក់កម្រៃនោះទេ ម្យ៉ាងវិញទៀតគាត់ត្រូវចំណាយពេលវេលា និងថវិកាផ្ទាល់ខ្លួនមួយចំនួនថែមទៀតផង ដើម្បីដោះស្រាយបញ្ហាបន្ទាន់នៅក្នុងការងារបស់គាត់ ប្រសិនបើគាត់ខ្វះការព្យាយាម ហើយបោះបង់ការងារនោះចោលនៅកណ្តាលទី គាត់នឹងត្រូវខាតបង់គ្រប់យ៉ាង។

ពាក់ព័ន្ធនឹងបញ្ហានេះ លោក ហម សុខនី ប្រធានសហស្ថាបនិកក្រុមជំហានយុវជនកម្ពុជា បានលើកឡើងថា ការធ្វើការងារស្ម័គ្រចិត្តមិនប្រាកដថាចំណេញទាំងស្រុងនោះទេ តែវាទាមទារឱ្យអ្នកចូលរួម ជាពិសេសយុវជនមានបំណងច្បាស់លាស់ រួមទាំងមានគំនិតអភិវឌ្ឍន៍ខ្លួនពិតប្រាកដ ដោយធ្វើការមិនមែនដើម្បីតែទៅសប្បាយ ឬថតរូបបង្អួតគ្នានោះទេ៕

October 20, 2017

អ្វីទៅជាកម្មវិធី Time To Fashion Show?

កាលពីចុងសប្ដាហ៍មុន Ice Watch ជាម្ចាស់គេហទំព័រ Watch Empire បានរៀបចំសន្និសិទ្ធមួយ នៅសណ្ឋាគារ Sun & Moon កាលពីព្រឹកថ្ងៃទី 13 តុលាថ្មីៗ នេះ ស្ដីអំពីការបើកកម្មវិធី Time to Fashion Show។

ក្រុមហ៊ុនម៉ាកនាឡិកាដៃ ice-watch បានធ្វើសន្និសិទ្ធកាសែតនេះ ដើម្បីផ្សព្វផ្សាយពីកម្មវិធីថ្មីរបស់ខ្លួនមួយ ដែលមានឈ្មោះថា TIME OF FASHION SHOW។ បើតាមការបញ្ជាក់របស់លោក មុត បញ្ញា តំណាងអ្នករៀបចំកម្មវិធីមានប្រសាសន៍ថា កម្មវិធី Time of fashion នេះគឺជាកម្មវិធីបែប Fashion ទីមួយរបស់ក្រុមហ៊ុននាឡិការដៃដ៏ពេញនិយមមួយនេះ។ Time of Fashion Show នឹងធ្វើឡើងនាថ្ងៃទី 09 វិច្ឆិកា ឆ្នាំ2017 វេលាម៉ោង 5ល្ងាច នៅសណ្ឋាគារ Sun & Moon ដោយមានការចូលរួមពីអ្នកច្នៃម៉ូត វ័យក្មេងពីររូបគឺ លោក Yun Rottanak មកពី ROTTANAK shop និង លោក សីហា មកពី Victoria satani ។ Designer ទាំងពីររូបនេះនឹងលើយកគំនិតច្នៃប្រឌិតដ៏អស្ចារ្យ ពីការយកកញ្ចក់ និង ផ្កា sparkling apolo មកឆ្នៃជាសម្លៀកបំពាក់ក្នុងកម្មវិធី ។ កាន់តែពិសេស ice-watch នឹងបង្ហាញនាឡិកាម៉ូដែលថ្មីរបស់ខ្លួន ជាមួយការឆ្នៃម៉ូតរបស់ Designer ទាំងពីររូបនេះផងដែរ។

សូមបញ្ជាក់ផងដែលថា Time of Fashion Show ក៏មានការចូលរួមគាំទ្រយ៉ាងពេញទំហឹងពី សណ្ឋាគារ Sun&Moon ដែលជាដៃគូសហការក្នុងការផ្ដល់ទីតាំងរៀបចំកម្មវិធី ក្រុមហ៊ុន ឌីជី អ៊ីនធឺណិត និងមានការគាំទ្រពី Yves Rocher និង Alex buntha creative studio ។

តោះកុំភ្លេចណា៎ ថ្ងៃទី 9 វិច្ឆិកា 2017 នេះចូលរួមកម្មវិធីថ្មី ប្លែកបែប Fashion ដែលពិសេសឈុតនីមួយៗបង្កប់អត្ថន័យដ៏មានន័យ!

October 20, 2017

កម្ពុជា និងម៉ាឡេស៊ី ត្រៀមចុះអនុស្សរណៈស្តីពីការផ្ទេរបច្ចេកវិទ្យា

ភ្នំពេញ៖ ដើម្បីផ្ទេរបច្ចេកវិទ្យាដល់គ្នាទៅវិញទៅមកឱ្យបានដើរទាន់គ្នា ក្រសួងសិប្បកម្មនិងឧស្សាហកម្មនៃប្រទេសកម្ពុជា និងក្រសួងវិទ្យាសាស្ត្របច្ចេកវិទ្យា និងនវានុវត្តន៍ នៃប្រទេសម៉ាឡេស៊ីគ្រោងចុះអនុស្សរណៈយោគយល់គ្នា (MoU) មួយដើម្បីពង្រឹងបច្ចេកវិទ្យានៃប្រទេសទាំងពីរឱ្យកាន់តែប្រសើរឡើង។

ក្នុងជំនួបទ្វេភាគីរវាងឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មជាមួយឯកឧត្តម Datuk Seri Panglima Wilfred Madius Tangau រដ្ឋមន្ត្រីក្រសួងវិទ្យាសាស្ត្របច្ចេកវិទ្យា និងនវានុវត្តន៍នៃប្រទេសម៉ាឡេស៊ី ភាគីទាំងពីរបានអញ្ជើញចូលរួមកិច្ចប្រជុំថ្នាក់រដ្ឋមន្ត្រីអាស៊ានស្តីពីបច្ចេកវិទ្យា និងវិទ្យាសាស្ត្រ លើកទី 73 នៅប្រទេសមីយ៉ាន់ម៉ាបានផ្តោតការយកចិត្តទុកដាក់ទៅលើការពង្រឹងកិច្ចសហប្រតិបត្តិការផ្នែកវិទ្យាសាស្ត្រ បច្ចេកវិទ្យា និងនវានុវត្តន៍រវាងប្រទេសទាំងពីរឱ្យមានការរីក ចម្រើនក្នុងផលប្រយោជន៍ទៅវិញទៅមក។

គួរបញ្ជាក់ដែរថា ដើម្បីឱ្យកម្ពុជាមានការវិវឌ្ឍផ្នែកវិទ្យាសាស្ត្រ និងបច្ចេកវិទ្យាឱ្យដើរបានលឿនដូចប្រទេសក្នុងតំបន់ និងពិភពលោក កម្ពុជាត្រូវការកសាងសមត្ថភាពធនធានមនុស្ស ផ្នែកសិក្សាស្រាវជ្រាវ នវានុវត្តន៍ ហេដ្ឋារចនាសម្ព័ន្ធវិទ្យាសាស្ត្រ និងបច្ចេកវិទ្យាទាំងទន់ និងរឹង ។ ក្នុងនោះ ការផ្ទេរបច្ចេកវិទ្យា ការវិនិយោគបច្ចេកវិទ្យា យន្តការគាំទ្រ ការលើកទឹកចិត្តដល់ការស្រាវជ្រាវ ការចែករំលែកបទពិសោធចំណេះដឹង ការផ្ទេរបច្ចេកវិទ្យា ពិព័រណ៍បច្ចេកវិទ្យា ការភ្ជាប់ទំនាក់ទំនងអ្នកវិទ្យាសាស្ត្រវ័យក្មេងក្នុងក្របខ័ណ្ឌជាតិ និងអន្តរជាតិជាបញ្ហាគន្លឹះមួយដែលត្រូវមានយន្តការគាំទ្រសមស្រប និងសហប្រតិបត្តិការជាមួយប្រទេសជាដៃគូ។

ជាមួយគ្នានេះដែរ វិស័យសំខាន់ៗពាក់ព័ន្ធនឹងស្តង់ដារវាយតម្លៃទទួលស្គាល់ចំណីអាហារ កម្មសិទ្ធិបញ្ញា សួនឧស្សាហកម្ម មន្ទីរពិសោធ វិទ្យាស្ថានសិក្សាស្រាវជ្រាវ ថ្នាលបណ្តុះបច្ចេកវិទ្យា ធុរកិច្ច និងសហគ្រិនភាពជាកត្តាសំខាន់ដែលត្រូវពង្រឹងពង្រីក និងកសាងសមត្ថភាពឱ្យកាន់តែខ្លាំងឡើងថែមមួយកម្រិតទៀត៕

October 20, 2017

សហព័ន្ធកីឡាបាល់ទាត់កម្ពុជា ប្រកាសចែកផ្លូវជាមួយនឹងលោក Leonardo

កាលពីល្ងាចថ្ងៃម្សិលមិញនេះ សហព័ន្ធកីឡាបាល់ទាត់កម្ពុជា បានប្រកាសពីការចែកផ្លូវជាមួយគ្រូបង្វឹកនៃក្រុមជម្រើសជាតិរបស់ខ្លួនគឺលោក Leonardo Vitorino ខណៈដែលគ្រូបង្វឹករូបនេះក៏បានបញ្ជាក់ពីការចាកចេញរបស់លោកនៅលើបណ្តាញសង្គម Facebook របស់លោកផងដែរ។

មូលហេតុនៃការចែកផ្លូវនេះ ត្រូវបានគេដាក់ការសង្ស័យទៅលើភាពមិនជោគជ័យរបស់ក្រុមជម្រើសជាតិកម្ពុជាក្រោមការដឹកនាំរបស់លោក ក្រោយពីគ្រូបង្វឹកសញ្ជាតិប្រេស៊ីលរូបនេះបានចូលកាន់តំណែងបន្ទាប់ពីលោក Lee Tae Hoon កាលពីដើមឆ្នាំ2017មក។ លោក Vitrorino បានសរសេរនៅលើបណ្តាញសង្គម Facebook របស់លោកថា៖ «ខ្ញុំលែងជាគ្រូបង្វឹកបង្គោលនៃក្រុមបាល់ទាត់ជម្រើសជាតិកម្ពុជាទៀតហើយ។ សូមថ្លែងអំណរគុណដល់អ្នកគាំទ្រកម្ពុជាចំពោះពេលវេលាដ៏អស្ចារ្យនៅទីនេះ។

ខ្ញុំសូមថ្លែងអំណរគុណយ៉ាងខ្លាំងចំពោះមនុស្សទាំងអស់ដែលខ្ញុំមានឱកាសធ្វើការជាមួយនៅទីនេះ ដូចជាបុគ្គលិក មន្ត្រី កីឡាករ អ្នកចាត់ការទូទៅ និងគ្រូបង្វឹក។ សុំទោសចំពោះការមិនអាចផ្លាស់ប្តូរចំណុចមួយចំនួនឲ្យបាន»។ គ្រូបង្វឹករូបនេះបានបន្ថែមទៀតថា៖ «ខ្ញុំជូនពរឲ្យសហព័ន្ធកីឡាបាល់ទាត់កម្ពុជាជួបតែសំណាងល្អ និងអរគុណអ្នកចំពោះការផ្តល់ឱកាសក្នុងការដឹកនាំក្រុមជម្រើសជាតិនេះ។ ខ្ញុំនឹងមិនភ្លេចអ្នកគាំទ្ររបស់កម្ពុជាឡើយ»។

ក្រោមការដឹកនាំរបស់លោក ក្រុមជម្រើសជាតិបានទទួលលទ្ធផលដ៏គួរឲ្យកត់សម្គាល់តែមួយលើកគត់គឺការផ្តួលក្រុមជម្រើសជាតិអាហ្វហ្គានីស្ថាន 1-០ ក្នុងការប្រកួតជម្រុះ Asian Cup ហើយក្រៅពីនេះ ការប្រកួតភាគច្រើនរបស់លោកបានបញ្ចប់ក្នុងលទ្ធផលចាញ់៕

October 20, 2017

Author: វល័ក្ខ