អ្នកជំនាញក្នុងវិស័យអចលនទ្រព្យបានអះអាងថា ចរន្តអាជីវកម្មក្នុងវិស័យអចលនទ្រព្យតែងតែទទួលរងឥទ្ធិពលពីនយោបាយពិសេសនៅពេលជិតបោះឆ្នោត ប៉ុន្តែស្ថានភាពបែបនេះនឹងថយឥទ្ធិពលទៅវិញនៅពេលស្ថានភាពនយោបាយអាចគ្រប់គ្រងបាន។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុនខ្មែររៀលអុីស្ទេត លោកបណ្ឌិត គីម ហ៊ាង បាននិយាយថា ការបោះឆ្នោតតែងតែប៉ះពាល់ដល់វិស័យផ្សេងៗ ហើយវាមិនមែនកើតឡើងតែនៅប្រទេសកម្ពុជានោះទេ។ ភាពជាប់គាំង ឬការដើរ ថយក្រោយនោះ គឺកើតមានស្ទើរ
គ្រប់ប្រទេសទាំងអស់លើពិភពលោក។
ទាក់ទងនឹងស្ថានភាពវិស័យអចលនទ្រព្យនៅកម្ពុជានាពេលនេះ លោកបណ្ឌិត បានបញ្ជាក់ថា ការអភិវឌ្ឍវិស័យអចលនទ្រព្យនៅកម្ពុជាមិនមែនជាប់គាំង ឬដើរថយក្រោយដោយសារកត្តានយោបាយនោះទេ ប៉ុន្តែតម្លៃដីធ្លីនាពេលនេះគឺបានហាក់ឡើងខ្ពស់ខុសពីតម្លៃពិតជាក់ស្តែង ដោយសារម្ចាស់ដីធ្លីទាមទារតាមចិត្តរបស់គាត់ចង់បាន ដូចនេះអ្នកមានលុយត្រូវរក្សាលុយទុកសិន រហូតដល់ខ្លួនអាចស្វែងរកតម្លៃណាដែលសមរម្យបាន។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបញ្ជាក់ថា៖“តម្លៃដីធ្លីនៅកម្ពុជាពេលនេះ បានហក់ឡើងខ្ពស់រហូតដល់កម្រិតមួយដែលពិបាកទិញលក់ ប៉ុន្តែតម្លៃហក់ឡើងនេះមិនមែនជាតម្លៃពិតនោះទេ។ តម្លៃពិត គឺជាតម្លៃដែលអ្នកលក់ចង់លក់ និងអ្នកទិញចង់ទិញ ខណៈបច្ចុប្បន្នតម្លៃស្ថិតនៅលើមាត់អ្នកលក់ដែលតែងតែទាមទារតាមចិត្តគាត់ចង់។ បើសិនគាត់លក់ក្នុងតម្លៃធម្មតា អ្នកដែលត្រូវការប្រាកដជាមានច្រើន។
លោកបណ្ឌិត គីម ហ៊ាង ក៏បានផ្តល់យោបល់ដល់អ្នកដែលប្រកបអាជីវកម្មក្នុងវិស័យអចលនទ្រព្យ គួរតែទិញដីនៅពេលជិតបោះឆ្នោត ព្រោះស្ថានភាពតម្លៃដីធ្លីអាចធ្លាក់ចុះបន្តិច ដោយសារមានអ្នកត្រូវការលុយច្រើន។
លោកបណ្ឌិតបានអះអាងថា៖“ជិតបោះឆ្នោតតម្លៃដីធ្លាក់ចុះ ងាយស្រួលទិញ។ បើទិញពីឥឡូវក្នុងរយៈពេល1ឆ្នាំ ឬ 2ឆ្នាំក្រោយតម្លៃដីនឹងហក់ឡើងវិញ។ ជិតបោះឆ្នោតមនុស្សត្រូវការលុយច្រើន តម្លៃដីធ្លីអាចធ្លាក់ចុះ។
តួលេខរបស់ក្រសួងសេដ្ឋកិច្ច និងហិរញ្ញវត្ថុ បានបង្ហាញថា គិតពីឆ្នាំ2010 រហូតមកដល់ខែកញ្ញា ឆ្នាំ 2017 ក្រសួងសេដ្ឋកិច្ច និងហិរញ្ញវត្ថុ បានផ្តល់អាជ្ញាបណ្ណដល់ក្រុមហ៊ុនអភិវឌ្ឍលំនៅឋាន សរុបចំនួន 213គម្រោង។ ក្នុងចំណោមគម្រោងដែលទទួលបានអាជ្ញាបណ្ណ ក្នុងនោះគម្រោងបុរីមានចំនួន132គម្រោងស្មើនឹង31,997ផ្ទះ និងអគារសហកម្មសិទ្ធិមានចំនួន 81គម្រោង ស្មើនឹង29,612បន្ទប់ (យូនីត)។
លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានអះអាងកាលពីពេលថ្មីៗនេះថា វិស័យសំណង់គឺជាចំណុចស្នូលដ៏សំខាន់នៃការផ្លាស់ប្តូរនៅក្នុងប្រទេសកម្ពុជា។ មកទល់បច្ចុប្បន្នឧស្សាហកម្មសំណង់នៅប្រទេសកម្ពុជា បានរួមចំណែកប្រមាណមួយភាគដប់នៃផលិតផលក្នុងស្រុកសរុបរបស់ប្រទេស និងបានបង្កើតការងារដោយផ្ទាល់ និងមិនផ្ទាល់សម្រាប់ពលរដ្ឋជាច្រើន។ លើសពីនេះដោយសារវិស័យសំណង់មានការចូលរួមច្រើនពីសំណាក់សហគ្រាសធុនតូច និងមធ្យមដូច្នេះវិស័យនេះបានបង្កើតប្រាក់ចំណូលដែលត្រូវបានបែងចែកទូលំទូលាយ ធ្វើឱ្យកំណើនសេដ្ឋកិច្ចកម្ពុជាកាន់តែប្រកបដោយបរិយាប័ន្ន។
លោកជំទាវ បានមានប្រសាសន៍ថា៖“ស្ថិតក្នុងបរិការណ៍នេះ ខ្ញុំសូមលើកទឹកចិត្តដល់អ្នកអភិវឌ្ឍលំនៅឋានទាំងអស់ ដែលបាននិងកំពុងធ្វើប្រតិបត្តិការនៅក្នុងព្រះរាជាណាចក្រកម្ពុជា ឱ្យយកចិត្តទុកដាក់ដល់ការធ្វើពិពិធកម្ម និងពង្រីកវិសាលភាពនៃការស្ថាបនាគម្រោងរបស់ខ្លួនឱ្យបានកាន់តែទូលំទូលាយដល់តំបន់ និងទីតាំងសំខាន់ផ្សេងៗទៀត ដែលជាហេដ្ឋារចនាសម្ព័ន្ធសេដ្ឋកិច្ចរូបវ័ន្តរបស់យើង។ ការចូលរួមយ៉ាងសកម្មរបស់អ្នកអភិវឌ្ឍលំនៅឋាននៅក្នុងវិស័យអចលនវត្ថុ និងសំណង់នៅកម្ពុជា គឺជាការជួយជ្រោមជ្រែងអនុវត្តគោលនយោបាយអភិវឌ្ឍសេដ្ឋកិច្ច និងសង្គមកម្ពុជាឱ្យមានសន្ទុះកាន់តែលឿនថែមទៀត”៕
