នៅសម័យបច្ចេកវិទ្យាទំនើបនេះ វិស័យវិទ្យាសាស្ត្រ និងសហគ្រិនភាព ជាផ្នែកដែលលេចធ្លោ និងមានប្រជាប្រិយភាពបំផុតនៅលើពិភពលោក។ ដោយសារតែវិស័យនេះមានតម្រូវការខ្ពស់ក្នុងសង្គម ហើយជាផ្នែកដែលអាចជំរុញខ្លាំងដល់ការអភិវឌ្ឍ។ ប្រទេសទាំងអស់តែងតែជំរុញឱ្យមនុស្សគ្រប់វ័យ ជាពិសេសយុវជនជំនាន់ថ្មីដែលនៅសិ្នទ្ធជាមួយនឹងបច្ចកវិទ្យាឱ្យចាប់អារម្មណ៍ និងបង្កើនសមត្ថភាពរបស់ខ្លួនឱ្យកាន់តែខ្លាំងដើម្បីអភិវឌ្ឍសហគ្រិនភាពបែបវិទ្យាសាស្ត្រ។
ដោយមើលឃើញពីសារៈសំខាន់ទាំងនេះ វិទ្យាស្ថានបច្ចេកវិទ្យាកម្ពុជាបានបង្កើតកម្មវិធីមួយដែលមានឈ្មោះថា Techno Innovation Challenge ដើម្បីជំរុញឱ្យយុវជនកម្ពុជាប្រកួតប្រជែងគម្រោងអាជីវកម្មលើជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា STEM ដែលក្នុងនោះគេហទំព័រ ឡារ៉ែន បានធ្វើការសម្ភាសកញ្ញា សៀក ឡេង អ្នកសម្របសម្រួលកម្មវិធី Techno Innovation Challenge ដូចខាងក្រោមៈ
- អ្វីទៅជាកម្មវិធី Techno Innovation Challenge?
ការប្រកួត Techno Innovation Challenge Cambodia 2017 គឺជាការប្រកួតប្រជែងមួយទៅលើសមិទ្ធផលពីវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ដែលមានភាពច្នៃប្រឌិតខ្ពស់បំផុត សម្រាប់ដោះស្រាយបព្ហាជាក់ស្តែងក្នុងប្រទេស ដែលកម្មវិធីនេះរៀបចំឡើងដោយ វិទ្យាស្ថានបច្ចេកវិទ្យាកម្ពុជា (សាលាតិចណូ) ។
- ហេតុអ្វីបានជាកម្មវីធីនេះត្រូវបានបង្កើតឡើង?
កម្មវិធីនេះត្រូវបានបង្កើតឡើង ដើម្បីជំរុញសហគ្រិនភាព (Entrepreneurship) ពីវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ក្រោមគំនិតផ្តួចផ្តើមរបស់គម្រោងមួយឈ្មោះថា USAID Connecting the Mekong through the Education and Training (USAID COMET) ដែលបានគាំទ្រស្ថាប័នអប់រំថ្នាក់ឧត្តមនៅប្រទេសក្នុងតំបន់មេគង្គ ដូចជាប្រទេសថៃ មីយ៉ាន់ម៉ា វៀតណាម និងកម្ពុជា ឲ្យធ្វើការរៀបចំការប្រកួត Innovation Challenge ដើម្បីលើកស្ទួយសមត្ថភាព និងសហគ្រិនភាពរបស់និស្សិត។ ក្នុងនោះយើងបានជ្រើសរើសវិទ្យាស្ថានបច្ចេកវិទ្យាកម្ពុជា(សាលាតិចណូ) ជាអ្នករៀបចំការប្រកួតនេះឡើង ប្រចាំប្រទេសកម្ពុជាតែម្តង។
- តើវាបានផ្តល់ផលប្រយោជន៍អ្វីខ្លះសម្រាប់និស្សិត វិស័យអប់រំ និងប្រទេសកម្ពុជា?
កម្មវិធីនេះបានផ្ដល់អត្ថប្រយោជន៍ជាច្រើនដល់និស្សិតដែលបានចូលរួមប្រកួត ដូចជាទទួលបានវគ្គបណ្តុះបណ្តាល និងប្រឹក្សាយោបល់ល្អៗ ទាំងផ្នែកបច្ចេកទេស និងទីផ្សារ ព្រមទាំងការធ្វើបទបង្ហាញផ្សេងៗ ពីអ្នកជំនាញ។ លើសពីអ្វីដែលពួកគាត់រៀន គឺពួកគាត់អាច apply អ្វីដែលគាត់រៀន និងគំនិតរបស់ពួកគាត់បាន ដើម្បី Challenge ខ្លូនឯងថា អាចធ្វើបានកម្រិតណា ឈានដល់លទ្ធផលកម្រិតណា ដែលទាំងនេះជាការបណ្តុះភាពជាអ្នកដឹកនាំ និងសហគ្រិនភាពទៅថ្ងៃខាងមុខ។ អ្វីដែលពិសេសជាងនេះទៀតនោះគឺ ទទួលបានការគាំទ្រ បច្ចេកទេស សម្ភារ ដូចជាឯកសារ និងមន្ទីរពិសោធវិស្វកម្ម ឧបករណ៏សំរាប់តេស្ត ហើយនឹងការពិគ្រោះប្រឹក្សាពីបច្ចេកទេស ពីអ្នកជំនាញបច្ចេកទេសនៅសាលាតិចណូនេះផ្ទាល់ និងដៃគូផ្សេងៗ រួមមាន អ្នកជំនាញបច្ចេកទេសពីក្រុមហ៊ុនលំដាប់ថ្នាក់ពិភពលោក Intel Cooperation ជាដើម។ បើឈ្នះ នឹងទទួលបានលុយ និងរង្វាន់ផ្សេងៗទៀត ហើយពួកគាត់អត់មានត្រូវចំណាយអ្វីច្រើននោះទេ។
តាមរយៈបទពិសោធចូលរួមក្នុងកម្មវិធីមួយនេះនិស្សិតដែលបានចូលរួមប្រកួតអាចពង្រឹងជំនាញបច្ចេកទេស សហគ្រិនភាព ភាពច្នៃប្រឌិតថ្មីៗ សមត្ថភាពក្នុងការដោះស្រាយបព្ហា និងការធ្វើបទបង្ហាញ ឱ្យកាន់តែប្រសើរឡើង។ ថែមទាំងពង្រឹងឥរិយាបថភាពស្វាហាប់ សមត្ថភាពធ្វើការងារជាក្រុម ភាពជាអ្នកដឹកនាំ និងភាពជឿជាក់លើខ្លូនឯងផងដែរ។ ហើយកម្មវិធីនេះនឹងជាសារមួយបញ្ជូនទៅដល់សាធារណជនឱ្យបានដឹងពីសក្តានុពល និងចំណុចពិសេសរបស់ពួកគាត់ដែលបានឆ្លងកាត់ការប្រកួតប្រជែងយ៉ាងស្វិតស្វាញ។
ក្រៅពីនេះ កម្មវិធីនេះក៏បានជួយជំរុញវិស័យអប់រំ និងប្រទេសកម្ពុជាឱ្យមានភាពរីកចម្រើន ឱ្យកាន់តែសម្បូរធនធានមនុស្សដែលមានជំនាញបច្ចេកទេស បូកនឹងសហគ្រិនភាព មានភាពច្នៃប្រឌិតបង្កើតថ្មី ប្រកបដោយសក្តានុពល អាចបង្កើតសមិទ្ធផលផ្សេងៗក្នុងវិស័យ STEM ជូនសង្គម និងមនុស្សជាតិនៅថ្ងៃខាងមុខ។
- តើកម្មវិធីនេះត្រូវបានធ្វើឡើងជាប៉ុន្មានដំណាក់កាល ហើយដំណាក់កាលនីមួយៗ បេក្ខជនត្រូវធ្វើអ្វីខ្លះដើម្បីទទួលបានជ័យជម្នះ?
កម្មវិធីនេះត្រូវបានធ្វើឡើងជា 5 ដំណាក់កាល។
Shortlisting ៖ និស្សិតត្រូវធ្វើការដាក់ពាក្យតាមអនឡាញរៀងៗខ្លួន ឲ្យបានមុនថ្ងៃផុតកំណត់។ ការដាក់ពាក្យចួលរួមកម្មវិធីប្រកួត មិនតម្រូវចាំបាច់ឱ្យមានក្រុមឱ្យហើយ និងការពន្យល់គំនិតជំនួញ របស់ខ្លួនណាមួយឡើយ។ ការជម្រុះ និងជ្រើសរើសបេក្ខភាពចូលរួមប្រកួត គឺផ្តោតសំខាន់ទៅលើជំនាញ និងការបេ្តជ្ញាចិត្តរបស់បេក្ខជនម្នាក់។
Team up and Solution ៖ បេក្ខភាពដែលបានជាប់វគ្គជម្រុះ (shortlisted) នឹងបានចូលរួមក្នុងកម្មវិធី ហើយត្រូវបង្កើតក្រុម និងពិភាក្សារិះរកគំនិតបង្កើតអ្វីមួយផ្អែកលើជំនាញរបស់ពួកគាត់ ដែលអាចយកទៅប្រើ និងដោះស្រាយបញ្ហាណាមួយបាន។ បេក្ខភាពនឹងទទួលបានការផ្តល់មតិយោបល់ពីគំនិតរបស់ពួកគាត់ ពីអ្នកប្រឹក្សា (Mentors) មកពីវិស័យធុរកិច្ច និងវិស័យដែលពាក់ព័ន្ធ។
Build Prototyping ៖ បេក្ខភាពត្រូវធ្វើការផលិតជាផលិតផលគំរូប៉ាន់Prototypeនៃគម្រោងរបស់ពួកគាត់ ដែលអាចតេស្តបានជាក់ស្តែង។ ក្នុងដំណើរការផលិត Prototype បេក្ខភាពនឹងទទួលបានការផ្តល់សម្ភារ បច្ចេកទេស ឧបករណ៍តេស្ត អ្នកប្រឹក្សាផ្នែកបច្ចេកទេស និងថវិកាមួយចំនួនដែលចាំបាច់ក្នុងការផលិតជាផលិតផលគំរូប៉ាន់Prototype សម្រាប់គំនិតគម្រោងរបស់ពួកគាត់។
Business Model ៖ បេក្ខភាពត្រូវសិក្សាអំពីម៉ូដែលជំនួញ និងទីផ្សារគម្រោង ឬផលិតផលរបស់ពួកគាត់។
Pitch and Showcase ៖ រាល់ក្រុមរបស់បេក្ខភាពចូលរួមតម្រូវឱ្យបង្កើតវីដេអូខ្លី 90វិនាទីឡើង ការពារពីដំណោះស្រាយ និងដាក់បង្ហាញសមិទ្ធផលរបស់ពួកគាត់នៅចំពោះមុខចៅក្រមដែលមកពីវិស័យស្ថាប័នរដ្ឋ ក្រុមហ៊ុនឯកជន និងសង្គមស៊ីវិលនានា នៅវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ។
- ក្រោយពេលទទួលបានជោគជ័យពីកម្មវិធីនេះ តើបេក្ខជននឹងទទួលបានអ្វីខ្លះ?
បេក្ខភាពដែលទទួលបានចំណាត់ថ្នាក់ល្អទាំង 6ក្រុម នឹងទទួលបានកន្លែង និងការជួយគាំទ្រផ្សេងៗ សម្រាប់ធ្វើការបន្តគម្រោងរបស់ពួកគាត់ឱ្យចេញជាអាជីវកម្មពិតប្រាកដ ដោយស្វ័យប្រវត្តិមិនគិតថ្លៃ ក្នុងរយៈពេលមួយឆ្នាំនៅសាលាតិចណូ។ ថែមទាំងមានឱកាសជួបជាមួយក្រុមបច្ចេកទេស អ្នកជំនួញ និងក្រុមអ្នកវិនិយោគ ដែលអាចទទួលបានការវិនិយោគដើម្បីចាប់ផ្តើមអាជីវកម្មនៅថ្ងៃខាងមុខ។
សម្រាប់បេក្ខភាពដែលទទួលបានជយលាភីចំនួន 3ក្រុម នឹងត្រូវទទួលរង្វាន់ជាទឹកប្រាក់ដែលជយលាភីលេខ1 នឹងទទួលបាន 1,000 ដុល្លារ រីឯជយលាភីលេខ2ទទួលបាន 750 ដុល្លារ ហើយជយលាភីលេខ3ទទួលបាន 500 ដុល្លារ និងរង្វាន់ផ្សេងៗជាច្រើនទៀត ក្រោមការចូលរួមគាំទ្រពីក្រុមហ៊ុន EZECOM ក្រុមហ៊ុនទូរគមនាគមន៍កម្ពុជា និងបណ្តាដៃគូផ្សេងៗទៀត។
- ហើយនឹងមានគម្រោង ឬចក្ខុវិស័យអ្វីបន្តទៀតដែរឬទេ?
យើងមានគម្រោង និងចក្ខុវិស័យក្នុងការចែករំលែក និងជួយគាំទ្រដល់សាកលវិទ្យាល័យនានា នៅក្នុងប្រទេសកម្ពុជា និងនៅបណ្តាប្រទេសក្នុងតំបន់មេគង្គក្នុងការរៀបចំកម្មវិធីប្រកួតនេះ ហើយនិងពង្រីកសហប្រតិបត្តិការជាមួយស្ថាប័នរដ្ឋ ក្រុមហ៊ុនឯកជន និងសង្គមស៊ីវិលឱ្យកាន់តែទូលំទូលាយ ដើម្បីជំរុញ ភាពជាសហគ្រិនដល់និស្សិតជាពិសេស និស្សិតវិស្វកម្មតែម្តង៕
