វល័ក្ខ - La Reine Media

ព្រឹត្តិការណ៍ប្រគំតន្ត្រី Smart Mega Concert ដ៏ធំអស្ចារ្យមិនធ្លាប់មាននៅក្រុងសៀមរាមក្នុងឱកាសព្រះរាជពិធីបុណ្យអុំទូកខាងមុខនេះ

ភ្នំពេញ៖ ក្រុមហ៊ុន Smart ជាប្រតិបត្តិករទូរគមនាគមន៍ដ៏ធំបំផុតនៅកម្ពុជានឹងរៀបចំព្រឹត្តិការណ៍ Smart Mega Concert ដែលជាកម្មវិធីប្រគំតន្ត្រីដ៏ធំអស្ចារ្យមិនធ្លាប់មាននៅក្រុងសៀមរាម ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ចាប់ពីថ្ងៃទី 2 ដល់ថ្ងៃទី 4 ខែវិច្ឆិកា ឆ្នាំ2017ខាងមុខនេះ។ កម្មវិធីនេះមានការចូលរួមសហការឧបត្ថម្ភពីក្រុមហ៊ុន AIA Cambodia ជាក្រុមហ៊ុនធានារ៉ាប់រងអាយុជីវិតដ៏ធំមួយនៅកម្ពុជា ក្រុមហ៊ុន VKSC Investment ដែលក្រុមហ៊ុននាំចូលចែកចាយផលិតផលនំ Manora និងក្រុមហ៊ុន Worldwide Motor Company Ltd (WMC) ដែលជាក្រុមហ៊ុនដ៏ធំមួយបានទទួលសិទ្ធិផ្តាច់មុខក្នុងការនាំចូល និងចែកចាយរថយន្តថ្មីទំនើប HAWTAI A25 នៅក្នុងប្រទេសកម្ពុជា ។

កម្មវិធីប្រគំតន្ត្រី Smart Mega Concert នឹងមានការចូលរួមសម្ដែង ដោយតារាអន្តរជាតិល្បីឈ្មោះដូចជាលោក Alek Teeradetch ដែលជាតារាសម្តែងល្បីប្រចាំព្រះរាជាណាចក្រថៃ ព្រមទាំង តារាល្បីៗប្រចាំព្រះរាជាណាចក្រកម្ពុជា រួមមាន៖ លោក នីកូ លោក ណា ខុន លោក Step អ្នកនាង សួស វីហ្សា កញ្ញា ស៊ុន ស្រីពេជ្រ កញ្ញា លាង សុផាឡែន លោក ខាន់ ជែម ជាពិសេសក៏មានវត្តមានតារាចម្រៀងរបស់ខ្មែរដែលគេស្គាល់ថាជាក្រុមតារាចម្រៀង Original Song ដូចជា Jimmy Kiss, Adda, Chen khan Na, វ៉ាន់ ចេស្តា, និងក្រុមតន្ត្រី SWSB ( Small world Small Band ) និងឌីជេ Maily តារាចម្រៀងរ៉ែប និងឌីជេ លោក ប្រុសឡា និងក្រុមតារាកំប្លែង កាតុ និងក្រុមតារាកំប្លែងជើងចាស់ លោក ចាប ចៀន ដែលនឹងធ្វើឲ្យទស្សនិកជនផ្ទុះសំណើចជាក់ជាពុំខាន។

កម្មវិធីប្រគំតន្ត្រី Smart Mega Concert នឹងចាប់ផ្តើមពីម៉ោង 5ល្ងាចតទៅ នៅបរិវេណមាត់ស្ទឹងក្រុងសៀមរាប ចាប់ពីថ្ងៃទី 2 ដល់ថ្ងៃទី 4 ខែវិច្ឆិកា ឆ្នាំ2017ខាងមុខនេះ។

កម្មវិធីដ៏ពិសេសនេះក៏នឹងផ្សាយបន្តផ្ទាល់នៅលើកញ្ចក់ទូរទស្សន៍ PNN ចាប់ពីម៉ោង 7 យប់ដល់ម៉ោង 9 យប់ផងដែរ។

ដូច្នេះសូមកុំភ្លេចចូលរួមទស្សនាឲ្យបានច្រើនកុះករ និងជួបជាមួយនឹងតារាក្នុងដួងចិត្តរបស់លោកអ្នក!!!

November 1, 2017

ទឹកខាត់ណា ជំនួយឆ្អឹង និងភ្នែក ទប់ទល់នឹងជំងឺមហារីកតាមបែបធម្មជាតិ

នៅក្នុងខាត់ណាសម្បូរទៅដោយវីតាមីន A ផូស្វ័រ កាល់ស្យូម និងវីតាមីន C ដែលបន្ថែមនូវប្រសិទ្ធភាពក្នុងការបំប៉នដល់ភ្នែក ឆ្នឹង និងទប់ទល់ជាមួយជំងឺមហារីក ព្រមទាំងបំបាត់អាការស្រែកទឹកបានទៀតផង។ សម្រាប់អ្នកដែលមិនសូវចូលចិត្តពិសាទឹកខាត់ណាដែលមានកាក ថ្ងៃនេះ ឡារ៉ែន បានពាំនាំនូវគន្លឹះក្នុងការធ្វើទឹកខាត់ណាដ៏មានឱជារសឆ្ងាញ់ពិសា និងមានគុណប្រយោជន៍មកចែកជូនប្រិយមិត្តទាំងអស់គ្នាដូចខាងក្រោមនេះ។

គ្រឿងផ្សំ
ដើមខាត់ណា ហាន់ជាចំណិតតូចៗ 1 ពែង
ទឹកឃ្មុំ 2 ស្លាបព្រាបាយ
ទឹកក្រូចឆ្មារ 1 ស្លាបព្រាបាយ
អំបិលម៉ដ្ឋ 1/4 ស្លាបព្រាកាហ្វេ
ទឹកបរិសុទ្ធ 1 ពែង

វិធីធ្វើ
1. លាងដើមខាត់ណាឱ្យស្អាត ហាន់ជាចំណិត
តូចៗ ហើយយកមកក្រឡុកជាមួយទឹកបរិសុទ្ធ ក្នុងម៉ាស៊ីនទឹកក្រឡុក ហើយសម្រិតកាកចេញយកតែទឹក។
2. យកទឹកខាត់ណា មកលាយជាមួយទឹកឃ្មុំ អំបិល ទឹកក្រូចឆ្មារ រួចទទួលទានជាមួយទឹកកកជាការស្រេច៕

November 1, 2017

គំនិតចៅចាក់ស្មុគអាចជួយមនុស្សឱ្យអភិវឌ្ឍបាន បើសិនចេះប្រើវា

មនុស្សម្នាក់ៗមានវិធីគិតផ្សេងៗគ្នា ហើយវិធីប្រើប្រាស់គំនិតទាំងអស់នោះជាប្រភពដំបូងបំផុតដែលអាចធ្វើឱ្យមនុស្សណាម្នាក់ទទួលលទ្ធផលល្អ ឬមិនល្អ។

លោក សោម សុធា ប្រធានផ្នែកបណ្តុះបណ្តាលធនធានមនុស្សនៃក្រុមហ៊ុន Forval (Cambodia) Co., Ltd បានលើកឡើងថា វិធីគិតបែបគំនិតចាក់ស្មុគជាគំនិតមួយដែលអាចធ្វើឱ្យមនុស្សអភិវឌ្ឍបាន។ គំនិតនេះជាប្រភពដែលអាចធ្វើឱ្យមនុស្សរំភើប រីករាយ ហើយមានក្តីសង្ឃឹមពីព្រោះថា យើងបានឃើញនូវអ្វីដែលយើងចង់បាន និងកើតនៅក្នុងជីវិតរបស់យើង។ លោកជឿជាក់ថា គំនិតទាំងអស់នេះអាចក្លាយជាការពិតបាន ប្រសិនបើយើងមានឆន្ទៈ និងចំណង់គ្រប់គ្រាន់ដើម្បីធ្វើនូវអ្វីដែលធ្លាប់តែស្រមៃចង់បាននោះ។

លោក សោម សុធា បាននិយាយថា៖ «ការគិតស្រមើស្រមៃពីរូបភាពតូចៗ អាចជំរុញឱ្យសកម្មភាពធំៗដើរបាន ហើយដើម្បីអនុវត្តវាឱ្យបានជោគជ័យ ខ្ញុំបានអនុវត្តដោយប្រើរបស់សំខាន់ៗចំនួន3យ៉ាងគឺ ការវិនិយោគលើ ពេលវេលា ធនធាន និងខួរក្បាល»។

លោក សុធា បានលើកឡើងផងដែរថា ការវិនិយោគពេលវេលា គឺមានសារៈសំខាន់ខ្លាំងណាស់សម្រាប់មនុស្សទូទៅ បើទោះបីជាការគ្រប់គ្រងពេលវេលាផ្ទាល់ខ្លួន ពេលខ្លះបានជះផលអវិជ្ជមានខ្លះៗក៏ដោយ។ ពេលខ្លះការកម្រិតពេលវេលាឱ្យមានប្រយោជន៍អាចបាត់បង់មិត្តភ័ក្តិអស់ខ្លះ អាចបាត់ពេលវេលាឯកជននៃភាពជាយុវវ័យអស់ខ្លះ និងអាចធ្វើឱ្យយើងមានអារម្មណ៍មិនល្អខ្លះ តែបើយើងទ្រាំវាឱ្យបានយើងនឹងទទួលបាននូវលទ្ធផលប្លែក ហើយវិជ្ជមាន ដែលអាចធ្វើឱ្យយើងភ្ញាក់ផ្អើលបាន។

ក្រៅពីនេះ ធនធានក៏ជារបស់សំខាន់ដែលមនុស្សគ្រប់គ្នាត្រូវចេះគ្រប់គ្រងឱ្យបានល្អដែរ ប្រសិនបើចង់ក្លាយជាមនុស្សដែលគិត និងមានក្តីស្រមៃខ្លាំង។ ការស្រមៃខ្ពស់ ឬការមានអារម្មណ៍ចង់បានរបស់អ្វីមួយខ្លាំងក្លាអាចធ្វើឱ្យមនុស្សហ៊ានលះបង់ខ្ពស់ ហើយរិតត្បិតចំណូលមួយចំនួនដើម្បីទទួលបាននូវរបស់ទាំងអស់នោះមក។ ទន្ទឹមនឹងនេះ ការប្រើប្រាស់ខួរក្បាលឱុ្យអស់លទ្ធភាពដោយការប្រើប្រាស់ក្តីស្រមៃមកលួងចិត្ត ហើយខិតខំច្នៃគំនិតដើម្បីបង្កើតការអនុវត្តប្រកបដោយភាពវិជ្ជមាន៕

October 31, 2017

វិធីងាយៗបំបាត់ស្នាមខ្មៅជាំនៅលើស្បែកដៃ និងជើង

ដៃ និងជើងរបស់អ្នកជាផ្នែកមួយដែលនៅក្រៅសម្លៀកបំពាក់ ទើបវាមិនចម្លែកទេដែលស្បែកនៅបរិវេណនោះមានស្នាមខ្មៅនៅជាប់បរិវេណនោះរហូតក៏ដោយសារតែកម្ដៅនៃពន្លឺព្រះអាទិត្យបានដុតឱ្យស្បែកផលិតជាតិមេឡានីនចេញមកការពារស្បែក ហើយបណ្ដាលឱ្យស្បែកប្រែជាពណ៌ខ្មៅនឹងស្បែកមានសភាពក្រិនតិចៗ។ ដោយសារតែស្បែកត្រូវខូចបែបនេះហើយក៏នៅមានភាវៈកខ្វក់ជាតិពុលក្នុងបរិយាកាស និងសារធាតុគីមីផ្សេងៗ ក៏ជាមូលហេតុចូលរួមធ្វើឱ្យស្បែករបស់អ្នកខូចបានផងដែរ។ ខណៈដែលស្បែកដៃ និងជើងអ្នកខ្មៅមិនស្អាត វាក៏អាចធ្វើឱ្យអ្នកមិនសប្បាយចិត្តគ្មានកម្លាំងចិត្តទៀត-ឡើយ ទើបពេលនេះ ឡារ៉ែន បានពាំនាំនូវគន្លឹះខ្លះៗដើម្បីកែប្រែស្បែកជាំខ្មៅឱ្យក្លាយជាសស្អាតឡើងវិញ ព្រមទាំងមិនចំណាយថវិកាអស់ច្រើនទៀតផង។

ក្រូចឆ្មារ
សាកល្បងយកក្រូចឆ្មាររោយជាមួយស្ករសមកខាត់នៅស្បែក ដើម្បីជម្រុះកោសិកាស្បែកចាស់ចេញ ដោយខាត់រយៈពេល10នាទី និងផ្អាប់ចោល1-2ម៉ោង។ ចូរអនុវត្តបែបនេះពេញមួយសប្ដាហ៍ នោះអ្នកនឹងសង្កេតឃើញថា ស្បែកនឹងសស្អាតដូចសភាពដើមជាមិនខានឡើយ។

ទឹកដោះគោជូរ
គុណប្រយោជន៍នៃទឹកដោះគោជូរ គឺជារូបមន្ដខាត់ស្បែកតាមបែបធម្មជាតិមួយដែរ ដោយយកវាមកលាប និងម៉ាស្សានៅលើបរិវេណស្បែកខ្មៅៗ ខាតទុករយៈពេល10-15នាទី បន្ទាប់មកលាងចេញដោយទឹកស្អាតជាការស្រេច។ ដោយអ្នកគួរតែធ្វើជាប្រចាំ1-2ដងក្នុង1ថ្ងៃ ដើម្បីឱ្យស្បែកមានសំណើម។

ត្រសក់
យកត្រសក់មកចិតជាចំណិតៗ ហើយយកមកបិទនៅលើស្បែកដែលជាំខ្មៅរយៈពេល20នាទីអាចធ្វើបែបនេះ2-3ដងក្នុងមួយថ្ងៃ ឬអ្នកអាចប្រើទឹកត្រសក់លាយជាមួយទឹកក្រូចឆ្មារផ្សំគ្នាយកមកម៉ាស្សានៅបរិវេណស្បែកដៃ និងជើងរយៈពេល10-15នាទីបន្ទាប់មកសឹមលាងចេញជាមួយទឹកត្រជាក់ ដោយធ្វើបែបនេះក្នុងមួយថ្ងៃ2ដង។

ប្រទាលកន្ទុយក្រពើ
យកជែលប្រទាលកន្ទុយក្រពើត្រដុសពីលើស្បែកដៃ និងជើងរយៈពេល5-10នាទី ហើយផ្អាប់ទុករយៈពេល30នាទី ក្រោយមកសឹមលាងទឹកឱ្យស្អាត ហើយនៅពេលអនុវត្តវិធីនេះហាមចេញទៅក្រៅក្រោមកម្ដៅថ្ងៃជាដាច់ខាត។

ម្សៅសម្បកក្រូច
ម្សៅសម្បកក្រូច 2ស្លាបព្រាបាយផ្សំជាមួយទឹកដោះគោជូរ ឬទឹកដោះគោស្រស់កូរឱ្យសព្វ ហើយយកម កលាបលើស្បែកដែលមានចំណុចខ្មៅៗ រួចផ្អាប់ទុករយៈពេល20នាទី។ អាចធ្វើបែប-នេះ 1-2ដងក្នុងមួយសប្ដាហ៍។

ប៉េងប៉ោះ
ប៉េងប៉ោះពុះជាពីរយកពាក់កណ្តាលផ្លែ បន្ទាប់មកយកមកត្រដុសម្រាមដៃ និងម្រាមជើង រួចផ្អាប់ទុករយៈពេល2-3នាទី ហើយវិធីនេះអ្នកអាចធ្វើវាជារៀងរាល់ថ្ងៃមុនពេលអ្នកងូតទឹកពេលយប់៕

ុ

October 31, 2017

សេដ្ឋកិច្ចអាស៊ី និងពិភពលោក៖ អាស៊ីក្លាយជាតំបន់ដែលមានមហាសេដ្ឋីលុយពាន់លានច្រើនជាងសហរដ្ឋអាមេរិក

ជារឿងមួយដែលគួរឱ្យចាប់អារម្មណ៍បំផុត ខណៈដែលពេលនេះមហាសេដ្ឋីដែលមានប្រាក់លំដាប់ពាន់លានដុល្លារអាមេរិកឡើងទៅ ត្រូវបានគេរកឃើញថា ស្ថិតនៅក្នុងទ្វីបអាស៊ីច្រើនជាងសហរដ្ឋអាមេរិក។

របាយការណ៍មួយចេញផ្សាយដោយ UBS និង Price Water House Coopers បានបង្ហើបឱ្យដឹងថា ក្នុងឆ្នាំ 2016 កន្លងទៅ មានមហាសេដ្ឋីថ្មីកើនឡើងប្រមាណជា 17% គិតជាទឹកប្រាក់ប្រមាណជា 6 លានលានដុល្លារសហរដ្ឋអាមេរិក ដោយការរីកធំធាត់នេះ ភាគច្រើនបានមកពីផ្នែកធុរកិច្ចនៅក្នុងប្រទេសចិនជាចម្បង ដែលរឿងនោះបានធ្វើឱ្យកើតមានមហាសេដ្ឋីជនជាតិចិនមានប្រាក់លំដាប់ “ពាន់លាន” មានចំនួនច្រើនជាងសហរដ្ឋអាមេរិកជាលើកដំបូង តែទោះជាយ៉ាងដូច្នេះមែន ក៏មហាសេដ្ឋីសញ្ជាតិអាមេរិកនៅតែគ្រប់គ្រងភាពជាអ្នកមានទ្រព្យសម្បត្តិរឹងមាំខ្លាំងជាងក្នុងរង្វង់ 2.8 លានលានដុល្លារអាមេរិកដែរ ចំណែកអាស៊ីនៅតែតាមពីក្រោយក្នុងរង្វង់ 1.9 លានលានដុល្លារអាមេរិកដដែល។

ខណៈពេលជាមួយគ្នា ការកើនឡើងនៃសេដ្ឋកិច្ចក្នុងអឺរ៉ុបវិញ បែរជាមើលទៅគ្មានការប្រែប្រួលអ្វីជាដុំកំភួនឡើយ។ ទាំងអស់នេះ UBS បានវិភាគថា ដោយសារតែបណ្ដាប្រទេសក្នុងទ្វីបអឺរ៉ុបមានការធ្វើធុរកិច្ចបែបជាអនុរក្សនិយម រួមទាំងមានច្បាប់វិន័យដែលម៉ឺងម៉ាត់ខ្លាំង ទើបក្លាយជារឿងពិបាកដែលចំនួនមហាសេដ្ឋីនឹងពង្រីកខ្លួននៅពេលប្រៀបធៀបជាមួយទ្វីបអាស៊ី។

យ៉ាងណាក៏ដោយ ភាពគួរឱ្យចាប់អារម្មណ៍របស់របាយការណ៍នោះគឺ អាស៊ីបានក្លាយជាភូមិភាគដែលមានការរីកច្រើនឡើងរបស់មហាសេដ្ឋីថ្មីៗរៀងរាល់ 3 សប្ដាហ៍ ដែលបណ្ដាលមកពីការវិនិយោគទុនរបស់រដ្ឋក្នុងប្រទេសចិន ជាពិសេសនយោបាយការវិនិយោគក្រោមឈ្មោះរដ្ឋរបស់លោក ស៊ី ជីនភីង ដែលទើបនឹងបានទទួលការជ្រើសតាំងឱ្យគ្រប់គ្រងតំណែងបន្តទៀត 5 ឆ្នាំទៀតផងនោះ ក៏នឹងរឹតតែធ្វើឱ្យឱកាសនៃការរីកធំធាត់របស់មហាសេដ្ឋីចិននៅតែកើនឡើងជាបន្តបន្ទាប់។

យ៉ាងណាក៏ដោយ នៅមានរឿងដែលគួរឱ្យចាប់អារម្មណ៍មួយប្រការទៀត នោះគឺ បណ្ដាក្រុមអ្នកមានក្នុងយុគបច្ចុប្បន្នកំពុងផ្ដល់ចំណាប់អារម្មណ៍ទៅលើផ្នែកសិល្បៈ និងកីឡាយ៉ាងខ្លាំងទៀតផង ជាពិសេសផ្នែកសិល្បៈ អាចរាប់បានថា ជាការលើកកម្រិតឡើងទាំងក្នុងន័យឋានៈ និងទ្រព្យសម្បត្តិ ដូចជាការដេញថ្លៃផ្ទាំងគំនូររបស់វិចិត្រករ Jean-Michel Basquiat ដែលមានតម្លៃខ្ពស់ដល់ទៅ 110.5 លានដុល្លារអាមេរិក រួមទាំង ក្លិបកីឡាកំពូលៗទាំង 140 លើពិភពលោក ក៏មានមហាសេដ្ឋីល្បីៗដល់ទៅ 109 នាក់កំពុងធ្វើជាម្ចាស់ផងដែរ៕

ប្រភព៖ Bloomberg

ប្រែសម្រួលដោយ៖ តាវ៉ែនតា

October 31, 2017

Man Utd សម្លឹងរកកៅអីវគ្គ16ក្រុម ខណៈ Juventus រំពឹងផ្តួល Sporting

ក្រុមបិសាចក្រហម Manchester United របស់លោក Jose Mourinho នឹងសម្លឹងរកការឈ្នះកៅអីទៅប្រកួតវគ្គ16ក្រុមចុងក្រោយនៃក្របខ័ណ្ឌ Champions League នៅពេលដែលពួកគេធ្វើជាម្ចាស់ផ្ទះទទួលក្រុមបាតតារាង Benifica ក្នុងការប្រកួតពូល A នៅរាត្រីនេះ។

ក្រុមរបស់លោក Mourinho អាចនឹងឈ្នះកៅអីទៅលេងក្នុងវគ្គ16ក្រុម ដោយការនៅសល់2ប្រកួតទៀត តាមរយៈការយកឈ្នះនៅកីឡដ្ឋាន Old Trafford ប្រសិនបើ Basel គេចផុតពីបរាជ័យពេលប៉ះក្រុម CSKA Moscow។ Man Utd មិនស្គាល់ចាញ់សោះលើទឹកដីខ្លួនឯង ពីការជួបប្រកួតជាមួយនឹងក្រុមមកពីព័រទុយហ្គាល់ចំនួន12លើក ខណៈដែលការចាញ់ជាលើកចុងក្រោយរបស់ពួកគេលើទឹកដីខ្លួនឯងក្នុងក្របខ័ណ្ឌអឺរ៉ុប បានកើតឡើងក្នុងលទ្ធផល 2-1 ពេលជួបក្រុម Real Madrid កាលពីរដូវកាលឆ្នាំ2012-2013។

Benfica ហាក់កំពុងតែឆ្ពោះទៅកាន់ការធ្លាក់ចេញ ក្រោយពីចាញ់3លើកពីការប្រកួតបើកឆាកទាំង3លើករបស់ពួកគេ ហើយនិងលេងដោយគ្មានខ្សែការពារជើងចាស់ Luisao ក្រោយពីការរងពិន័យកាតក្រហម ក្នុងពេលក្រុមខ្លួនចាញ់ Man United 1-0 ក្នុងក្រុង Lisbon កាលពី2 សប្តាហ៍មុន។ ខ្សែប្រយុទ្ធសញ្ជាតិប្រេស៊ីល Jonas បានរកគ្រាប់បាល់បញ្ចូលទីក្នុងការប្រកួតលីកលើកទី12របស់គេ ក្នុងពេលក្រុមខ្លួនទទួលជ័យជម្នះ 1-0 លើក្រុម Feirense កាលពីថ្ងៃសុក្រ ខណៈដែលក្រុម Man United បានស្តារមុខមាត់ពីការរងបរាជ័យក្រោមស្នាដៃក្រុម Huddersfield Town តាមរយៈការផ្តួលក្រុម Tottenham 1-0 កាលពីថ្ងៃសៅរ៍ តាមរយៈគ្រាប់បាល់ឈ្នះរបស់ Anthony Martial។ ស្របពេលជាមួយគ្នានេះ Sporting Lisbon និង Juventus នឹងត្រូវប្រជែងយកចំណាត់ថ្នាក់លេខ2ក្នុងពូល D បន្ទាប់ពី Barcelona ខណៈការប្រកួតនៅរាត្រីនេះ គឺជាការប្រកួតដ៏សំខាន់ ក្រោយពីក្រុមយក្សរបស់អ៊ីតាលី បានយកឈ្នះ 2-1 កាលពីជើងមុន ក្នុងទីក្រុង Turin។

ក្រុម Sporting កំពុងតែសម្លឹងរកការតាមស្មើពិន្ទុរបស់គូប្រកួតខ្លួន បើទោះបី Juventus នឹងស្ថិតយ៉ាងប្រកៀកក្នុងការទៅវគ្គបន្ត ប្រសិនបើឈ្នះក៏ដោយ។ Juventus ទើបតែបានកត់ត្រាជ័យជម្នះ6លើកជាប់ៗគ្នានេះ ក្នុងក្របខ័ណ្ឌ Serie A ហើយពួកគេបានកម្តៅសាច់ដុំសម្រាប់ការប្រកួតនេះ តាមរយៈការផ្តួលក្រុម AC Milan 2-០ កាលពីថ្ងៃសៅរ៍កន្លងទៅ។ ការប្រកួតទាំងពីរគូនឹងចាប់ផ្តើមនៅម៉ោង 2:45ទៀបភ្លឺ៕

ប្រភពពី៖ Sport 24

October 31, 2017

ថ្នាក់ដឹកនាំជំរុញឱ្យប្រជាជនខ្មែរបន្តគាំទ្រ និងប្រើប្រាស់ផលិតផលក្នុងស្រុក

ភ្នំពេញ៖ ឯកឧត្ដម ប៊ិន ឈិន ឧបនាយករដ្ឋមន្ត្រីប្រចាំការ និងជារដ្ឋមន្ត្រីស្តីទីនៃទីស្តីការគណៈរដ្ឋមន្ត្រីបានអំពាវនាវឱ្យប្រជាជនខ្មែរបន្តគាំទ្រ និងប្រើប្រាស់ផលិតផលក្នុងស្រុក ដើម្បីពង្រឹងចង្វាក់ផលិតកម្មជាតិ សំដៅបង្កើតឱកាសការងារជូនប្រជាជន និងរួមចំណែកកាត់បន្ថយភាពក្រីក្រ។

ឯកឧត្ដមឧបនាយករដ្ឋមន្ត្រី បានមានប្រសាសន៍ដូច្នេះនៅក្នុងឱកាសអញ្ជើញជាអធិបតីភាព ពិធីបើកសម្ពោធ “ពិព័រណ៍ពាណិជ្ជកម្មផលិតផលខ្មែរ ក្នុងយុទ្ធនាការទិញផលិតផលខ្មែរ ឆ្នាំ2017” ដែលរៀបចំឡើងដោយអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម កាលពីរសៀលថ្ងៃទី26 ខែតុលា ឆ្នាំ2017 នៅឯមជ្ឈមណ្ឌលវិមានសុភមង្គលស្ទឹងមានជ័យ រាជធានីភ្នំពេញដែលពិព័រណ៍នេះនឹងត្រូវបញ្ចប់នៅថ្ងៃទី29 តុលា។

ឯកឧត្តមឧបនាយករដ្ឋមន្ត្រី ប៊ិន ឈិន បានកោតសរសើរចំពោះការផ្តួចផ្តើមរបស់ក្រសួងពាណិជ្ជកម្មដែលបានដាក់ចេញនូវយុទ្ធនាការទិញផលិតផលខ្មែរ ក្នុងក្របខ័ណ្ឌទូទាំងប្រទេស ដើម្បីបំផុសឱ្យពលរដ្ឋកម្ពុជាចូលរួមប្រើប្រាស់ផលិតផលខ្មែរ ជំនួសផលិតផលនាំចូលពីបរទេស។ តាមរយៈការរៀបចំ និងការចូលរួមពិព័រណ៍ពាណិជ្ជកម្មជាតិ និងអន្តរជាតិ បានធ្វើឱ្យទំហំពាណិជ្ជកម្មកម្ពុជា មានកំណើនកាន់តែប្រសើររៀងរាល់ឆ្នាំ។

ទន្ទឹមគ្នានេះ ឯកឧត្តមរដ្ឋមន្ត្រី ប៉ាន សូរស័ក្តិ បានគូសបញ្ជាក់ថា ក្រសួងពាណិជ្ជកម្មបានរៀបចំដោយជោគជ័យនូវយុទ្ធនាការទិញផលិតផលខ្មែរ រដូវកាលទី1នៅរាជធានីភ្នំពេញ ខេត្តសៀមរាប ខេត្តកំពង់ចាម និងខេត្តព្រះសីហនុ។ សម្រាប់រដូវកាលទី2នេះ ក្រសួងនឹងបន្តធ្វើឱ្យបាននៅក្នុងខេត្ត-ក្រុងចំនួន 4ទៀត ដើម្បីទាក់ទាញការគាំទ្រកាន់តែច្រើនពីប្រជាជន ចំពោះផលិតផលខ្មែរ។

សូមបញ្ជាក់ថា នៅក្នុងពិព័រណ៍ពាណិជ្ជកម្មថ្ងៃនោះ មានក្រុមហ៊ុនចូលរួមចំនួន 194ក្រុមហ៊ុន និងមានស្តង់លក់សរុបចំនួន 200ស្តង់ ហើយក្នុងនោះក៏មានរៀបចំសិក្ខាសាលា កម្មវិធីជំនួបពិភាក្សារវាងអ្នកផលិត-អ្នកផ្គត់ផ្គង់ និងអ្នកបញ្ជាទិញ-អ្នកប្រើប្រាស់ផលិតផលខ្មែរ ព្រមទាំងការប្រគំតន្ត្រី ដែលមានការចូលរួមសម្តែងពីសិល្បករ និងសិល្បការិនីល្បីៗនៅក្នុងព្រះរាជាណាចក្រកម្ពុជាផងដែរ៕

October 31, 2017

គណៈប្រតិភូចិននៃខេត្ដគុនមិញ មើលឃើញឱកាសវិនិយោគលើវិស័យទេសចរណ៍នៅកម្ពុជា

ភ្នំពេញ – ស្របតាមការអនុវត្ដគោលនយោបាយទាក់ទាញភ្ញៀវទេសចរ«China Ready» ដែលកម្ពុជារំពឹងថា នៅឆ្នាំ2020 អាចនឹងស្រូបយកបានភ្ញៀវទេសចរចិនប្រមាណ2លានក្នុងមួយឆ្នាំ គណៈប្រតិភូចិននៃខេត្តគុនមិញ បានសម្ដែងនូវចំណាប់អារម្មណ៍ និងកំពុងតែសម្លឹងឃើញឱកាសនៃការវិនិយោគលើវិស័យទេសចរណ៍នៅកម្ពុជា ខណៈកម្ពុជាជាប្រទេសមានសក្ដានុពលខាងផ្នែកទេសចរណ៍បែបវប្បធម៌ និងអេកូទេសចរណ៍។

លោករដ្ឋមន្ត្រី ថោង ខុន បានលើកឡើងថា ការសម្រេចចិត្តរបស់គណៈប្រតិភូចិននៃខេត្ដគុនមិញ ដែលមានបំណងមកវិនិយោគនៅកម្ពុជាលើវិស័យទេសចរណ៍ គឺជាការសម្រេចចិត្តមួយដ៏ត្រឹមត្រូវ ព្រោះកម្ពុជាជាប្រទេសមានសក្តានុពលខ្ពស់ផ្នែកទេសចរណ៍ ពិសេសប្រទេសកម្ពុជាទាំងមូលពោរពេញទៅដោយសុខសន្តិភាព ស្ថិរភាពនយោ បាយ និងច្បាប់វិនិយោគក៏អំណោយផល និងផ្តល់ការអនុគ្រោះដល់វិយោគិនផងដែរ។ ឯកឧត្ដមបន្ដ កម្ពុជាក៏មានកិច្ចសហប្រតិបត្តិការល្អជាយុទ្ធសាស្ត្រគ្រប់ជ្រុងជ្រោយ ជាមួយសាធារណរដ្ឋប្រជាមានិតចិន និងជាសមាជិកនៃប្រទេសតាមបណ្តោយផ្លូវសូត្រសមុទ្រ ដែលនឹងអាចទទួលបានផលប្រយោជន៍យ៉ាងច្រើន ក្នុងក្របខ័ណ្ឌនៃកិច្ចសហប្រតិបត្តិការនេះ។ ដូច្នេះកំណើនភ្ញៀវទេសចរនៅកម្ពុជា មិនអាចកាត់ផ្តាច់ចេញបានពីទេសចរចិនបានឡើយ។

នៅឆ្នាំ2016 កម្ពុជាទទួលបានភ្ញៀវទេសចរចិន 83ម៉ឺននាក់ ហើយនៅឆ្នាំ2020 ខាងមុខ កម្ពុជាកំពុងរៀបចំខ្លួនជាច្រើនដើម្បីទាក់ទាញ និងស្រូបយកភ្ញៀវទេសចរចិនឲ្យបានយ៉ាងតិច2លាននាក់ ជាមួយកំណើននៃភ្ញៀវទេសចរបរទេសប្រមាណ7លាននាក់។ តាមរយៈការមានកំណើនភ្ញៀវទេសចរបរទេសនៅឆ្នាំ2020 កម្ពុជានឹងត្រូវការកម្លាំងពលកម្មបម្រើការងារផ្នែកទេសចរណ៍ជិត1លាននាក់ ស្របពេលដែលឆ្នាំ2017នេះ មានមនុស្សម្រើការងារដោយផ្ទាល់ក្នុងឧស្សាហកម្មទេសចរណ៍នេះជាង 62ម៉ឺននាក់ និងដោយប្រយោលរាប់សិបម៉ឺននាក់ទៀត។

ជាមួយគ្នាលោក វ៉ាង យូ ជុង អនុប្រធានគណៈកម្មាធិការរដ្ឋបាលរមណីយដ្ឋានជាតិខេត្តគុនមិញ សាធារណរដ្ឋប្រជាមានិតចិន បានបង្ហាញពីឆន្ទៈ និងគោលបំណងនៃការវិនិយោគលើវិស័យទេសចរណ៍នៅកម្ពុជា។ ពិសេសក៏បានអញ្ជើញរដ្ឋមន្ដ្រីក្រសួងទេសចរណ៍ទៅទស្សនកិច្ចនៅតំបន់រមណីយដ្ឋាននៅខេត្ដគុនមិញផងដែរ ដើម្បីផ្លាស់ប្ដូរបទពិសោធគ្នាទៅវិញទៅមក។

គួររំឭកថា តាមការព្យាកររបស់អង្គការទេសចរណ៍ពិភពលោក ឆ្នាំ2020 ខាងមុខ ភ្ញៀវទេសចរចិនរហូតដល់ទៅ ជាង 200លាននាក់នឹងចេញទៅក្រៅប្រទេសដែលមានការចំណាយរហូតជាង 420 ពាន់លានដុល្លារអាមេរិក ក្នុងនោះ 70ភាគរយមកអាស៊ី។ ក្នុងចំណោមបណ្តាប្រទេសអាស៊ានទាំង10 ទើប បានទទួលភ្ញៀវទេសចរចិនជាង20លាននាក់ប៉ុណ្ណោះ ក្នុងនោះប្រទេសថៃ និងម៉ាឡេស៊ី ទទួលបានភ្ញៀវទេសចរចិនច្រើនជាងគេ។

សាធារណរដ្ឋប្រជាមានិតចិន មានទីតាំងស្ថិតនៅក្នុងតំបន់អាស៊ីបូព៌ា ដែលមានផ្ទៃដីសរុបធំលំដាប់ថ្នាក់ទី3 និងជាប្រទេសមហាអំណាចសេដ្ឋកិច្ចពិភពលោក ជាប់ចំណាត់ថ្នាក់ទី2 បន្ទាប់ពីសហរដ្ឋអាមេរិក ដោយមានផលិតផលក្នុងស្រុកសរុប (GDP) ជាង10ទ្រីលានដុល្លារ នៃផលិតផលក្នុងស្រុកសរុប នៅឆ្នាំ2014 ដែលមានអត្រាកំណើនជាមធ្យម 7.4% ក្នុងមួយឆ្នាំ និងនៅឆ្នាំ2015 មានចំនួន11ទ្រីលានដុល្លារ នៃផលិតផលក្នុងស្រុកសរុប ដែលមានកំណើន6.8%៕

October 31, 2017

ក្រុមហ៊ុន Taixi របស់ថៃចង់ចូលមកទីផ្សារប្រទេសកម្ពុជា

ភ្នំពេញ៖ លោកសាស្ត្រាចារ្យ Oudom Wang ប្រធានក្រុមហ៊ុន Taixi Development Group Co.,Ltd. បានដឹកនាំគណៈប្រតិភូមួយក្រុមចូលជួបពិភាក្សាស្ថានភាពទីផ្សារក្នុងប្រទេសកម្ពុជា ជាមួយឯកឧត្តម ចម ប្រសិទ្ធ ទេសរដ្ឋមន្ត្រីរដ្ឋមន្ត្រីក្រសួងឧស្សហកម្ម និងសិប្បកម្ម មុននឹងក្រុមហ៊ុននេះសម្រេចចិត្តចូលមកវិនិយោគនៅលើទីផ្សារក្នុងប្រទេសកម្ពុជា។

លោកសាស្ត្រាចារ្យ Oudom Wang បានវាយតម្លៃខ្ពស់ចំពោះភាពរីកចម្រើន និងស្ថានភាពទីផ្សាររបស់កម្ពុជានាពេលបច្ចុប្បន្ន។ លោកបានជម្រាបជូនពីកម្រងក្រុមហ៊ុនរបស់ខ្លួន ដោយបានបញ្ជាក់ថា ក្រុមហ៊ុនរបស់លោកបានចុះបញ្ជីការតាមផ្លូវច្បាប់នៅប្រទេសថៃដែលមានទុនចុះបញ្ជីចំនួន20លានដុល្លារសហរដ្ឋអាមេរិក មានក្រុមហ៊ុនជាបុត្រសម្ព័ន្ធរបស់ខ្លួនចំនួន 13 និងសាខាចំនួន25 ។ ក្នុងនោះក្រុមហ៊ុន Taixi Development Group កាន់ភាគហ៊ុន 100% និងជាង 50% នៅប្រទេសចិន និងអាស៊ីអាគ្នេយ៍។ ក្រុមហ៊ុនមាននិយោជិតជាង 1,600 នាក់ មានកម្មវត្ថុអាជីវកម្មដូចជា ការវិនិយោគពាណិជ្ជកម្ម អចលនទ្រព្យ ដឹកជញ្ជូនផ្លូវអាកាស ចំណីអាហារ សណ្ឋាគារ អភិវឌ្ឍន៍កសិកម្ម សំណង់ ឧបករណ៍សុខាភិបាល ផលិតផលសុខភាពប្រព័ន្ធផ្សព្វផ្សាយ ទេសចរណ៍ ថាមពលបៃតង ដំណាំ និងផលិតផលកៅស៊ូ ជាដើម ។

លោកបញ្ជាក់បន្ថែមថា ប្រធានកិត្តយសរបស់ក្រុមហ៊ុនគឺ ឯកឧត្តម Chavalit Yongchaiyudh អតីតនាយករដ្ឋមន្ត្រីនៃរាជាណាចក្រថៃ ។ ហើយគោលបំណងនៃជំនួបថ្ងៃនេះ គឺពិនិត្យលទ្ធភាពវិនិយោគនៅកម្ពុជា ហើយនៅថ្ងៃមុខនឹងមានប្រតិភូក្រុមហ៊ុនវិនិយោគ ជាពិសេសផ្នែកវិស័យរោងចក្រនឹងមកសិក្សាស្វែងយល់ពីសក្តានុពលវិនិយោគនៅកម្ពុជា គឺអនុវត្តតាមគោលនយោបាយរបស់រដ្ឋចិនក្នុងការជំរុញឱ្យក្រុមហ៊ុនវិនិយោគរបស់ចិនមកបណ្តាក់ទុននៅក្រៅប្រទេសឱ្យបានច្រើន។ ជាពិសេសនាឱកាសនេះគឺ ចង់បានការណែនាំពីឯកឧត្តមទេសរដ្ឋមន្ត្រី ចម ប្រសិទ្ធ ពីស្ថានភាពទូទៅរបស់កម្ពុជា ។

ជាមួយនឹងការលើកឡើងខាងលើ ឯកឧត្តមទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៍ និងចាត់ទុកគោលនយោបាយផ្លូវមួយខ្សែក្រវាត់មួយរបស់ចិនជាស្ពានចម្លងដ៏សំខាន់នៃទំនាក់ទំនងសេដ្ឋកិច្ចប្រសើរនៅក្នុងតំបន់ និងប្រទេសជាមិត្ត។ ឯកឧត្តមទេសរដ្ឋមន្ត្រី បានជម្រាបជូនពីស្ថានភាពទូទៅរបស់កម្ពុជាដោយលើកកត្តា 3 យ៉ាងជាសំខាន់ដែលជាមូលដ្ឋានបង្កបរិយាកាសវិនិយោគយ៉ាងប្រពៃរួមមាន៖ កម្ពុជាមានស្ថិរភាពនយោបាយ និងម៉ាក្រូសេដ្ឋកិច្ច តម្លាភាពនៃក្របខ័ណ្ឌច្បាប់ និងភាពអនុគ្រោះពាណិជ្ជកម្មដែលអនុញ្ញាតឱ្យទំនិញនាំចេញពីកម្ពុជាដោយរួចពន្ធ និងមិនជាប់កូតាទៅកាន់ប្រទេសអភិវឌ្ឍន៍ និងប្រទេសដៃគូជាច្រើនរួមទាំងប្រទេសចិនផងដែរ ។

កម្ពុជាមានការរីកចម្រើនស្ទើរគ្រប់វិស័យ ជាពិសេសរោងចក្រកាត់ដេរសម្លៀកបំពាក់ និងស្បែកជើងដែលបច្ចុប្បន្នមានជិត1ពាន់រោងចក្រ នេះដោយសារកម្ពុជាទទួលបានភាពអនុគ្រោះពាណិជ្ជកម្មនេះឯង។ ឯកឧត្តមទេសរដ្ឋមន្ត្រី ចម ប្រសិទ្ធ បានណែនាំឱ្យប្រតិភូក្រុមហ៊ុនចាប់អារម្មណ៍នៅទីតាំងខេត្តព្រះសីហនុដែលរាជរដ្ឋាភិបាលបានកំណត់ជាតំបន់សេដ្ឋកិច្ចពិសេសពហុបំណងក្នុងខេត្តទាំងមូលតែម្តង ពីព្រោះជាខេត្តដែលមានកំពង់ផែទឹកជ្រៅ មានផ្លូវ រថភ្លើង និងព្រលានយន្តហោះ៕

October 31, 2017

លោក Puel ជួបការរីករាយថ្ងៃបើកឆាក ខណៈ Leicester ផ្តួល Everton

លោក Claude Puel ដែលជាអ្នកចាត់ការទូទៅថ្មីរបស់ក្រុម Leicester បានបញ្ជាក់ថា ការទទួលជ័យជម្នះលើក្រុមទូកក្តោង Everton ក្នុងលទ្ធផល 2-0 កាលពីថ្ងៃអាទិត្យ គឺជាវិធីសាស្ត្រដ៏ល្អបំផុតក្នុងការចាប់ផ្តើមការងារក្នុងនាមជាគ្រូបង្វឹករបស់លោក។

អតីតគ្រូបង្វឹករបស់ក្លិប Southampton រូបនេះ ដែលត្រូវបានតែងតាំងកាលពីថ្ងៃពុធ ដើម្បីជំនួសកន្លែងរបស់លោក Craig Shakespeare នោះ បានឃើញ Jamie Vardy បង្ហាញពីទម្រង់លេងយ៉ាងល្អ ក្នុងតំបន់ប្រយុទ្ធ ហើយកីឡាករ Demarai Gray បានធ្វើឲ្យកីឡាករ Jonjoe Kenny ស៊ុតបាល់ចូលទីរបស់ខ្លួនឯងមួយគ្រាប់។

លោកគ្រូបង្វឹកសញ្ជាតិបារាំងរូបនេះ ដែលក្រុមរបស់លោកបានឡើងទៅឈរក្នុងចំណាត់ថ្នាក់លេខ11នៅលើតារាងក្របខ័ណ្ឌ Premier League នោះ បានឲ្យដឹងថា៖ «ខ្ញុំបានឃើញក្រុមមួយក្នុង Leicester មានស្មារតីប្រយុទ្ធល្អ មានការរៀបចំល្អ និងមានសាមគ្គីភាពដ៏រឹងមាំ»។ លោក Puel បានបន្ថែមទៀតថា៖ «ខ្ញុំពិតជាចាប់អារម្មណ៍ទៅនឹងទម្រង់លេងរបស់កីឡាករ។

ខ្ញុំសង្ឃឹមថា វាគ្រាន់តែជាការចាប់ផ្តើមនៃរឿងមួយប៉ុណ្ណោះ»។ ដោយឡែក ក្រុម Everton ក្រោមការដឹកនាំរបស់លោកគ្រូបង្វឹកបណ្តោះអាសន្ន David Unsworth ក្រោយពីការបណ្តេញលោក Ronald Koeman កាលពីថ្ងៃចន្ទនោះ នៅតែស្ថិតក្នុងតំបន់កាត់ចោលដដែល។ បច្ចុប្បន្ន ក្រុម Leicester ដែលជាម្ចាស់ជើងឯកក្របខ័ណ្ឌ Premier League រដូវកាលឆ្នាំ2015-2016 កត់ត្រាជ័យជម្នះ3លើកជាប់ៗគ្នា ក្នុងក្របខ័ណ្ឌកំពូល និងពាន Carabao Cup ដោយជ័យជម្នះពីរលើកបានកើតឡើងក្រោមការដឹកនាំរបស់លោក Michael Appleton និង1លើកទៀតក្រោមការដឹកនាំរបស់លោក Puel៕

ប្រភពពី៖ BBC

October 31, 2017

Author: វល័ក្ខ