វល័ក្ខ - La Reine Media

កម្ពុជាទទួលបានអ្វីខ្លះពីយុទ្ធសាស្ដ្រខ្សែក្រវាត់មួយ ផ្លូវមួយ

ភ្នំពេញ – ខណៈកម្ពុជាបាននិងកំពុងគាំទ្រយុទ្ធសាស្ដ្រនៃប្រទេសចិនខ្សែក្រវាត់ ឬខ្សែក្រវាត់មួយ ផ្លូវមួយដែលជាគំនិតផ្ដួចផ្ដើមរបស់លោកប្រធានាធិបតី ស៊ី ជីនភីង (Xi Jinping) នៃសាធារណរដ្ឋប្រជាមានិតចិន ក៏មានការលើកជាចម្ងល់ឡើងដែរថា តើគោលនយោបាយនេះបានផ្ដល់សារៈសំខាន់អ្វីខ្លះដល់កម្ពុជា?

ក្នុងឱកាសចូលរួមកិច្ចប្រជុំថ្នាក់តំបន់អាស៊ី-ប៉ាស៊ីហ្វិក (Asia-Pacific Regional Conference) ឆ្នាំ2017ដែលរៀបចំឡើងដោយសភាពាណិជ្ជកម្មអាល្លឺម៉ង់-អូស្ត្រាលី សហការជាមួយរដ្ឋាភិបាលអូស្ត្រាលី ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានលើកឡើងពីសារៈសំខាន់នៃកិច្ចផ្ដួចផ្ដើមផ្លូវ និង គំនិតផ្ដួចផ្ដើមនៃការបង្កើតខ្សែក្រវាត់ ឬខ្សែក្រវាត់មួយ ផ្លូវមួយនេះ ព្រោះវាមិនត្រឹមតែនាំមកនូវឧត្ដមប្រយោជន៍ជូនប្រទេសពាក់ព័ន្ធប៉ុណ្ណោះទេ តែនឹងក្លាយជាយុទ្ធសាស្ត្ររយៈពេលវែងក្នុងការជំរុញការតភ្ជាប់ និងសហប្រតិបត្តិការលើគ្រប់វិស័យរួមមានហេដ្ឋារចនាសម្ព័ន្ធ សេដ្ឋកិច្ច វិនិយោគ និងហិរញ្ញវត្ថុ ក៏ដូចជាពង្រឹងទំនាក់ទំនងរវាងប្រជាជន និងប្រជាជនផងដែរ។តាមរយៈគំនិតផ្ដួចផ្ដើមកម្ពុជា និងចិនបានចុះហត្ថលេខាលើអនុស្សរណៈយោគយល់គ្នាស្ដីពីកិច្ចពង្រឹងសហប្រតិបត្តិការ និងវិនិយោគលើវិស័យឧស្សាហកម្ម នៅថ្ងៃទី15 ខែតុលា ឆ្នាំ2015 នៅទីក្រុងប៉េកាំង។

ពាណិជ្ជកម្មមួយចំនួនដែលកម្ពុជាទទួលបានតាមរយៈគំនិតផ្ដួចផ្ដើមផ្លូវ និងខ្សែក្រវាត់នេះ មានដូចខាងក្រោម៖

1) ការវិនិយោគរួមរវាងក្រុមហ៊ុន China Huanneng Group របស់ចិនជាមួយក្រុមហ៊ុន Royal Group របស់កម្ពុជា ដើម្បីសាងសង់រោងចក្រវារីអគ្គិសនីទំហំ400MW នៅទន្លេសេសានក្រោម ដែលនឹងក្លាយជារោងចក្រវារីអគ្គិសនីធំជាងគេនៅកម្ពុជា ដោយមានទុនវិនិយោគប្រមាណ 900 លានដុល្លារអាមេរិក។

2) ការវិនិយោគប្រមាណ 1,4 ប៊ីលានដុល្លារអាមេរិក ដើម្បីសាងសង់រោងចក្រវារីអគ្គិសនីទំហំ246MW នៅស្ទឹងតាតៃ ដែលនឹងមានសមត្ថភាពចែកចាយអគ្គិសនីចំនួន30 ភាគរយនៃអគ្គិសនីត្រូវការសរុប។

3) វិនិយោគលើគម្រោងផ្លូវចំនួន16 ខ្សែក្រោមតម្លៃសរុប1,6 ប៊ីលានដុល្លារអាមេរិក។

4) វិនិយោគលើគម្រោងសាងសង់អាកាសយានដ្ឋានថ្មីនៅទីក្រុងសៀមរាប ដែលមានតម្លៃ880 លានដុល្លារអាមេរិក។

5) ចិនទទួលទិញអង្ករពីកម្ពុជាប្រមាណ 300,000 តោនក្នុងឆ្នាំ2018

យុទ្ធសាស្ដ្រខ្សែក្រវាត់ ឬខ្សែក្រវាត់មួយ ផ្លូវមួយ (Road and Belt Initiative or One Belt One Road) ដែលជាគំនិតផ្ដួចផ្ដើមរបស់លោកប្រធានាធិបតី ស៊ី ជីនភីង (Xi Jinping) នៃសាធារណរដ្ឋប្រជាមានិតចិន នៅឆ្នាំ២០១៣ ដែលមានគោលបំណងពង្រីកប្រព័ន្ធហេដ្ឋារចនាសម្ព័ន្ធពាណិជ្ជកម្ម ដើម្បីតភ្ជាប់ទ្វីបអាស៊ី ជាមួយអឺរ៉ុប និងអាហ្វ្រិក តាមផ្លូវពាណិជ្ជកម្មសូត្រពីជំនាន់មុន៕

November 6, 2017

កាសែតឡារ៉ែន ពាណិជ្ជ លេខ 98

[easy_media_download url=”https://www.lareine.com.kh/wp-content/uploads/2017/11/LRPN_98-for-web.pdf” force_dl=”1″]

November 6, 2017

ស្រូវក្រអូបចាប់ផ្តើមប្រមូលផល ជាមួយតម្លៃសមរម្យក្នុងឆ្នាំនេះ

រដូវប្រមូលផលស្រូវផ្កាម្លិះក្នុងឆ្នាំនេះបានចូលមកដល់ជាមួយតម្លៃស្រូវខ្ពស់ជាងឆ្នាំមុន ស្របពេលការនាំចេញអង្ករទៅកាន់ទីផ្សារអន្តរជាតិមានសន្ទុះវិជ្ជមាន ដោយកើនឡើងទាំងតម្លៃ និងបរិមាណដែលបង្កើតជាក្តីសង្ឃឹមថ្មីមួយទៀតសម្រាប់ប្រជាកសិករខ្មែរ។

ម្ចាស់រោងម៉ាស៊ីនដែលមានមូលដ្ឋាននៅខេត្តភាគពាយព្យបានកត់សម្គាល់ថា ស្រូវផ្កាម្លិះបានចាប់ផ្តើមជាមួយតម្លៃប្រសើរជាងរដូវកាលមុន ព្រោះតម្លៃស្រូវសើមបានចាប់ផ្តើមជិត1,200រៀលក្នុង1គីឡូក្រាម ខណៈរោងម៉ាស៊ីនជាច្រើនបានត្រៀមខ្លួនទិញស្រូវផ្កាម្លិះសម្រាប់កិនកែច្នៃ ដើម្បីបម្រើដល់ទីផ្សារនាំចេញ និងលក់ចែកចាយក្នុងស្រុក។

នាយកក្រុមហ៊ុនថ្មគោល រ៉ាយស៍ នៅខេត្តបាត់ដំបង លោក ហេង ផេង បានប្រាប់ទៀតថា ការប្រមូលផលស្រូវផ្កាម្លិះនឹងមានភាពមមាញឹកខ្លាំងនាពាក់កណ្តាលខែវិច្ឆិកា។ ការប្រមូលទិញស្រូវផ្កាម្លិះត្រូវបានគេធ្វើឡើងតាមរូបភាពជាច្រើន ដោយម្ចាស់រោងម៉ាស៊ីនខ្លះចុះទៅទិញដោយផ្ទាល់ ខ្លះពឹងឈ្មួញកណ្តាលឱ្យដឹកមកដល់រោងម៉ាស៊ីន ហើយក៏មានកសិករខ្លះដឹកមកលក់ដល់រោងម៉ាស៊ីនដោយផ្ទាល់ដែរ ដោយអ្នកដែលមានរថយន្តដឹកដោយខ្លួនឯងអាចបង្កើតប្រាក់ចំណេញបានច្រើនជាងអ្នកដែលពឹងផ្អែកលើឈ្មួញកណ្តាល។

លោក ហេង ផេង បានអះអាងថា៖“អ្នកមានរថយន្តដឹកខ្លួនឯង គេងាយលុកលុយទៅទិញដល់ទីតាំងច្រកល្ហកផ្សេងៗ នៅពេលដែលមានអ្នកផ្តល់ដំណឹង។ បើគេពឹងឈ្មួញកណ្តាល ឈ្មួញកណ្តាលបានចំណេញលើការដឹកជញ្ជូន និងចំណេញលើក្បាលកាក់បន្ថែមទៀត។ លោក រុន ចាន់ណយ ម្ចាស់រោងម៉ាស៊ីននៅខេត្តបន្ទាយមានជ័យ ក៏បានអះអាងពីការកើនឡើងតម្លៃស្រូវនៅក្នុងឆ្នាំនេះផងដែរ។ ចំណែក លោក ហ៊ុល ខ្លែម ប្រធានសហគមន៍កសិកម្ម សង្ហាផល នៅខេត្តបាត់ដំបង បាននិយាយថា នៅសហគមន៍របស់លោកមិនទាន់ប្រមូលផលស្រូវផ្កាម្លិះទេ គឺរហូតដល់ចុងសប្តាហ៍ទី1នៃខែវិច្ឆិកាទើបការប្រមូលផលចាប់ផ្តើម។ តម្លៃស្រូវដែលចាប់ផ្តើមឡើងជាង1,000រៀលក្នុង1គីឡូក្រាម នេះគឺជាតម្លៃដែលកសិករអាចទទួលយកបាន។ លោកបន្តថា តម្លៃស្រូវផ្កាម្លិះ ឬផ្ការំដួលនេះ បានហក់ឡើងរហូតដល់ 1,500-1,600រៀលក្នុង1គីឡូក្រាម កាលពីប៉ុន្មានឆ្នាំមុន តែក្រោយមកវាបានធ្លាក់ចុះរហូត។

លោក ហ៊ុន ខ្លែម បានថ្លែងថា៖“ខ្ញុំឆ្ងល់ណាស់ កម្ពុជាឮថាខ្វះអង្ករសម្រាប់នាំចេញរហូត តែដល់ពេលកសិករប្រមូលផល បែរជាតម្លៃធ្លាក់ចុះ ហើយអ្នកខ្លះបង្អង់មិនទិញដោយរង់ចាំឱ្យស្រូវធ្លាក់គុណភាពទើបនាំគ្នាទិញ។ ស្រូវនៅកម្ពុជាយើងតិចណាស់ហេតុអ្វីគេវាយតម្លៃតួលេខនេះមិនត្រូវ?។ តួលេខនាំចេញអង្ករបានបង្ហាញពីការងើបឡើងច្រើនគួរឱ្យកត់សម្គាល់ក្នុងរយៈពេល9ខែកន្លងទៅដោយមានកំណើនរហូតជិត17% បើធៀបនឹងរយៈពេលដូចគ្នាកាលពីឆ្នាំមុន។ ការនាំចេញអង្កររយៈពេល9ខែឆ្នាំ2017 នេះមានបរិមាណជាង42ម៉ឺនតោន ខណៈបរិមាណនាំចេញក្នុងរយៈពេលដូចគ្នាកាលពីឆ្នាំមុនមានត្រឹមជាង 36ម៉ឺនតោនប៉ុណ្ណោះ៕

November 6, 2017

លោក Guardiola សរសើរទម្រង់លេងរបស់ Man City ក្រោយលត់ Arsenal ចាស់ដៃ

លោក Pep Guardiola អ្នកចាត់ការទូទៅរបស់ក្រុម Manchester City បានកោតសរសើរចំពោះការបង្ហាញពីទម្រង់លេងយ៉ាងល្អរបស់ក្រុមលោក ក្រោយពីពួកគេបានផ្តួលក្រុម Arsenal យ៉ាងចាស់ដៃក្នុងលទ្ធផល 3-1 កាលពីថ្ងៃអាទិត្យ ដើម្បីបង្កើនការនាំមុខរបស់ពួកគេរហូតដល់ទៅ8ពិន្ទុនៅលើកំពូលតារាងនៃក្របខ័ណ្ឌ Premier League។

Man City បានកត់ត្រាជ័យជម្នះក្នុងការប្រកួតលីក 9លើកជាប់ៗគ្នា ដែលជាកំណត់ត្រាមួយសម្រាប់រដូវកាលតែមួយ ខណៈដែលពួកគេក៏បានឈានទៅប្រកួតក្នុងវគ្គ16ក្រុមចុងក្រោយនៃក្របខ័ណ្ឌ Champions League និងឈានទៅវគ្គ8ក្រុមចុងក្រោយនៃពាន Carabao Cup ផងដែរ។ លោក Guardiola បានបញ្ជាក់ថា៖ «យើងមិនអាចបដិសេធបានឡើយថា រយៈពេល2ខែចុងក្រោយនេះ ពិតជាអស្ចារ្យណាស់។ យើងបានដឹងពីសារៈសំខាន់នៃការប្រកួតនេះ ហើយយើងបានត្រៀមលក្ខណៈយ៉ាងល្អ។ កីឡាករទាំងអស់បានបង្ហាញពីទម្រង់លេងយ៉ាងអស្ចារ្យ»។

ការរកគ្រាប់បាល់បញ្ចូលទីរបស់ Kevin de Bruyne និងគ្រាប់បាល់ប៉េណាល់ទីរបស់ Sergio Aguero បានជួយឲ្យក្រុម Man City គ្រប់គ្រងទាំងស្រុង ហើយបើទោះបីខ្សែប្រយុទ្ធបម្រុង Alexandre Lacazette បានវាយបក1គ្រាប់វិញសម្រាប់ក្រុម Arsenal ក៏ដោយ ប៉ុន្តែ Gabriel Jesus បានបំពេញជ័យជម្នះរបស់ក្រុមខ្លួនតាមរយៈការស៊ុតបាល់បញ្ចូលទីយ៉ាងល្អ។ Arsenal បានសម្តែងនូវការតវ៉ាយ៉ាងខ្លាំងចំពោះគ្រាប់បាល់ប៉េណាល់ទី ហើយទាំង Jesus និង David Silva ហាក់បានស្ថិតក្នុងជំហរ Offside ក្នុងពេលរកគ្រាប់បាល់ទី3 ប៉ុន្តែ ក្រុមភ្ញៀវ ក៏មិនបានបង្ហាញពីទម្រង់លេងល្អឡើយ។ លោក Arsene Wenger អ្នកចាត់ការទូទៅរបស់ក្រុម Arsenal បានឲ្យដឹងថា៖ «វាពិតជាមិនសំណាងឡើយដែលការប្រកួតនេះបានបញ្ចប់បែបនេះ។ អ្នកអាចទទួលយកបានប្រសិនបើ Man City ឈ្នះដោយភាពត្រឹមត្រូវ ប៉ុន្តែ នេះគឺជារឿងមិនអាចទទួលយកបានឡើយ»៕

ប្រភពពី៖ BBC

November 6, 2017

ស្លាកស្នាមក្រោយកើតមុនអាចបំបាត់បានទេ?

វាជារឿងមួយសំណាងណាស់ ប្រសិនបើស្បែករបស់អ្នកមិនដែលបន្សល់ទុកនូវស្លាកស្នាមបន្ទាប់ពីកើតមុនរួច ប៉ុន្តែសំណាងនេះមិនកើតមានចំពោះមនុស្សស្រីភាគច្រើននោះទេ ហេតុដូច្នេះហើយបានជាពួកគាត់តែងតែខិតខំធ្វើគ្រប់មធ្យោបាយ ដើម្បីការពារកុំឱ្យកើតមុន ក៏ដូចជាខិតខំប្រើប្រាស់ផលិតផលជាច្រើនប្រភេទទាំងផលិតផលបែបធម្មជាតិ និងលាយជាតិគីមី ដើម្បីបំបាត់ចោលនូវរាល់ស្លាកស្នាមដែលនឹងកើតមានឡើងបន្ទាប់ពីកើតមុនរួច។

ស្លាកស្នាមអាចកើតមាននៅលើស្បែក ដោយសារតែវាជារឿងធម្មតាដែលតែងតែកើតឡើង ឬអាចបណ្តាលមកពីការព្យាបាលដែលមិនត្រឹមត្រូវ រហូតបណ្តាលឱ្យក្លាយជាស្លាកស្នាម។ស្នាមដែលកើតមានបន្ទាប់ពីកើតមុនរួចនេះបណ្តាលមកពីការបំផ្លាញនៃស្រទាប់ស្បែក។

ស្នាមដែលបន្សល់ទុកក្រោយកើតមុនជាទូទៅតែងតែកើតមាននៅលើមុខ ខ្នង ស្មា និងផ្នែកផ្សេងទៀតនៃរាងកាយ។ ស្នាមទាំងនេះត្រូវបានចែកចេញជាពីរប្រភេទគឺ ស្នាមសើៗលើស្បែកនិងស្នាមដែលចូលជ្រៅទៅក្នុងសាច់។ ស្នាមសើៗនៅលើស្បែកជាស្នាមតូចៗដែលអាចមើលឃើញតាមរយៈការឆ្លុះកញ្ចក់ពិនិត្យមើល ហើយការព្យាបាលក៏មានប្រសិទ្ធភាពខ្ពស់ដែរ ប៉ុន្តែប្រសិនបើវាជាស្នាមជ្រៅវិញនោះ(ស្នាមធំខូងជ្រៅទៅក្នុងស្បែក) វាមានការពិបាកក្នុងការព្យាបាល ឬអាចនឹងព្យាបាលមិនបាត់តែម្តង ប្រសិនបើអ្នកមិនរួសរាន់ក្នុងការព្យាបាលវាទេនោះ។

ការព្យាបាលតាមបែបគីមី ៖ ការព្យាបាលបែបនេះភាគច្រើនត្រូវបានយកមកអនុវត្តសម្រាប់អ្នកដែលមានស្នាមជ្រៅ (ទទួលបានលទ្ធផលល្អច្រើន) ហើយរយៈពេលនៃការព្យាបាលគឺអាស្រ័យលើទំហំ និងជម្រៅនៃស្លាកស្នាម។ ប្រសិនបើអ្នកចង់ទទួលការព្យាបាលតាមបែបគីមីដែរនោះ អ្នកគួរតែស្វែងរកអ្នកដែលមានជំនាញច្បាស់លាស់ក្នុងការព្យាបាលទើបជាការប្រសើរ។

ការព្យាបាលដោយឡាស៊ែរ ៖ នេះក៏ជាវិធីព្យាបាលមួយទៀតដែលតែងតែផ្តល់នូវប្រសិទ្ធភាពសម្រាប់អ្នកដែលមានបញ្ហាស្នាមគ្រប់ប្រភេទ ជាពិសេសស្នាមធំៗ ឬខូងចូលជ្រៅទៅក្នុងសាច់ជាដើម។

ការព្យាបាលដោយផលិតផលកម្ចាត់ស្នាម ៖ វាអាចមិនមានប្រសិទ្ធភាពលឿនដូចការព្យាបាលដោយគីមី ឬដោយឡាស៊ែរនោះទេ ប៉ុន្តែវាមានភាពងាយស្រួល ហើយសូមកុំបារម្ភខ្លាំងពេកអីព្រោះបច្ចុប្បន្ននេះមានផលិតផលខ្លះមានសមត្ថភាពខ្ពស់ណាស់ ក្នុងការជួយព្យាបាលបញ្ហាស្នាមហើយក៏មិនប្រើពេលវេលាយូរពេកនោះដែរ។

ព្យាបាលតាមបែបធម្មជាតិ ៖ ភាគច្រើនការព្យាបាលស្នាមដែលកើតមានបន្ទាប់ពីកើតមុនរួចតាមវិធីធម្មជាតិត្រូវបានគេអនុវត្តនៅពេលវាទើបតែកើតថ្មីៗ ហើយជាស្នាមដែលមានទ្រង់ទ្រាយតូច។ មិនពិបាកណាស់ណាទេ បើអ្នកចង់ព្យាបាលដោយវិធីធម្មជាតិ ដោយធ្វើតាមដំណាក់កាលមួយចំនួនដូចជា លាងសម្អាតមុខឱ្យស្អាត ជូតមុខឱ្យស្ងួត រួចយកសំឡីមួយដុំតូចជ្រលក់ក្នុងទឹកក្រូចឆ្មារដែលមានលាយជាមួយទឹកបន្តិច មកជូតពីលើស្បែកត្រង់កន្លែងដែលមានស្នាម រួចទុកចោល15នាទី ឬពេញមួយយប់ក៏បាន បន្ទាប់មកសឹមលាងសម្អាតចេញជាការស្រេច។ វិធីនេះអាចប្រើពេលវេលាយូរបន្តិចហើយ តែទទួលបានលទ្ធផលជាទីពេញចិត្តបន្ទាប់ពីព្យាបាលរួច៕

November 6, 2017

Morata រកបានគ្រាប់បាល់ ខណៈ Chelsea ផ្តល់ការខកចិត្តធំដល់ Man United

ខ្សែប្រយុទ្ធ Alvaro Morata របស់ក្រុម Chelsea បានធ្វើឲ្យលោក Jose Mourinho រងបរាជ័យយ៉ាងខកចិត្តមួយផ្សេងទៀតនៅពេលប្រកួតជាមួយនឹងអតីតក្លិបរបស់លោក ខណៈដែលក្រុមម្ចាស់ការពារតំណែងជើងឯកមួយនេះ បានកត់ត្រាជ័យជម្នះដ៏សំខាន់ក្នុងលទ្ធផល 1-០ លើក្រុម Manchester United កាលពីថ្ងៃអាទិត្យ។

Morata បានបង្ហាញពីទម្រង់លេងយ៉ាងល្អ សម្រាប់ក្រុមរបស់លោក Antonio Conte ខណៈដែលខ្សែប្រយុទ្ធអន្តរជាតិអេស្ប៉ាញរូបនេះបានតែតបាល់បញ្ចូលទីយ៉ាងល្អឥតខ្ចោះនៅដើមតង់ទី2 នាកីឡដ្ឋាន Stamford Bridge។ ក្រោយពីបានរងបរាជ័យពីរលើកនៅលើទឹកដីក្រុម Chelsea ក្នុងរដូវកាលទី1របស់លោកក្នុងនាមជាគ្រូបង្វឹករបស់ Man United លោក Mourinho ដែលបានឈ្នះពានកំពូលអង់គ្លេស3លើកក្នុងពេលដឹកនាំក្រុម Chelsea 2លើកនោះ កំពុងតែស៊ាំនឹងការខកចិត្តដោយការចាកចេញពីទីក្រុងឡុងដ៍ប៉ែកខាងលិចនេះដោយគ្មានអ្វីសោះក្នុងដៃ។ នេះគឺជាការខកចិត្តដ៏ធំមួយសម្រាប់លោក Mourinho ខណៈដែលការរងបរាជ័យជាលើកទី2ក្នុងចំណោមការប្រកួតក្របខ័ណ្ឌ Premier League 3លើកចុងក្រោយរបស់ពួកគេ ធ្វើឲ្យក្រុមឈរលេខ2 Man United ដេញតាមពីក្រោយក្រុមកំពុងនាំមុខ Manchester City រហូតដល់ទៅ8ពិន្ទុ។ ស្របពេលជាមួយគ្នានេះ លោក Antonio Conte ក៏បានបង្កើតជម្លោះកាន់តែខ្លាំងជាមួយនឹងលោក Mourinho ក្រោយពីបានព្រងើយកន្តើយនឹងការចាប់ដៃជាមួយនឹងគ្រូបង្វឹកសញ្ជាតិព័រទុយហ្គាល់រូបនេះ តាមរយៈការធ្វើជារត់ទៅអបអរជាមួយនឹងកីឡាកររបស់លោក និងអ្នកគាំទ្រនៅលើទីលានទៅវិញ។

នៅពេលដែលត្រូវបានចោទសួរពីការមិនចាប់ដៃនេះ លោក Conte បានបង្ហើបថា ការមិនផ្តល់ការគោរពរបស់លោកទៅកាន់ Mourinho គឺជាហេតុផលនៃការមិនចាប់ដៃរបស់លោក៕

ប្រភពពី៖ Sport24

November 6, 2017

ស្រាបៀរថៃហ្គ័រចាប់ឆ្នោតវគ្គផ្តាច់ព្រ័ត្រជូនគូស្វាមីភរិយាថ្មីក្នុងកម្មវិធីអាពាហ៍ពិពាហ៍ស្រាបៀរថៃហ្គ័រ ឆ្នាំ 2017

ភ្នំពេញ៖ កាលពីថ្ងៃទី 29 ខែតុលា ឆ្នាំ2017 ស្រាបៀរថៃហ្គ័រ (Tiger Beer) បានរៀបចំកម្មវិធីចាប់ឆ្នោតផ្តាច់ព្រ័ត្ររដូវកាលឆ្នាំ 2017 នៅស្ថានីយទូរទស្សន៍ PNN ដើម្បីផ្តល់រង្វាន់ជូនដល់គូស្វាមីភរិយាថ្មីទាំងអស់ដែលបានជាវស្រាបៀរថៃហ្គ័រក្នុងកម្មពិធីអាពាហ៍ពិពាហ៍ក្នុង ឆ្នាំ 2017 ។

កម្មវិធីចាប់ឆ្នោតផ្តាច់ព្រ័ត្រនេះត្រូវបានរៀបចំឡើងជាពិសេសសម្រាប់អតិថិជនរបស់ស្រាបៀរថៃហ្គ័រក្នុងគោលបំណង ថ្លែងអំណរគុណដ៏ជ្រាលជ្រៅ និងបង្ហាញពីការយកចិត្តទុកដាក់ខ្ពស់របស់ក្រុមហ៊ុនស្រាបៀរថៃហ្គ័រចំពោះអតិថិជនដែលតែងតែគាំទ្រ និងនិយមជាវស្រាបៀរថៃហ្គ័ររក្នុងកម្មពិធីអាពាហ៍ពិពាហ៍របស់ខ្លួន។ រង្វាន់ដែលបានចាប់ឆ្នោតលើកវគ្គផ្តាច់ព្រ័ត្រនេះរួមមាន រង្វាន់ធំ រថយន្ត AUDI Q5 ស៊េរីឆ្នាំ 2016 ដ៏ថ្មីសន្លាងចំនួន 1 រង្វាន់ iPhone 7 ចំនួន 2 រង្វាន់ ទូរទស្សន៍ Smart TV ចំនួន 2 រង្វាន់ និងទូរទឹកកក ចំនួន 5 រង្វាន់ ។

លោកអ្នកអាចស្វែងរកឈ្មោះរបស់លោកអ្នកនៅលើគេហទំព័រ Facebook (Tiger Beer KH)។

ចំពោះគូស្វាមីដែលមានភ័ព្វសំណាងឈ្នះរង្វាន់ ក្រុមហ៊ុននឹងទាក់ទងទៅដោយផ្ទាល់។ ដើម្បីបើករង្វាន់ សូមភ្ជាប់មកជាមួយនូវសំបុត្រអាពាហ៍ពិពាហ៍ អត្តសញ្ញាណប័ណ្ណ សន្លឹកឆ្នោតឈ្នះរង្វាន់ វិក្កយបត្រទិញផលិតផល លិខិតអញ្ជើញអាពាហ៍ពិពាហ៍ និងរូបថតអាពាហ៍ពិពាហ៍ចំនួន 1សន្លឹក។

គួររម្លឹកផងដែរថា ស្រាបៀរថៃហ្គ័រគឺជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានលក់ច្រើនជាង 70 ប្រទេសដែលកំពុងទទួលបានការគាំទ្រកាន់តែខ្លាំងឡើងជារៀងរាល់ថ្ងៃពីអតិថិជនទាំងនៅលើទីផ្សារកម្ពុជា និង ពិភពលោក ហើយជាពិសេស Tiger ជាស្រាបៀរដែលសក្ត័សមបំផុតសម្រាប់ទទួលភ្ញៀវក្នុងពិធីអាពាហ៍ពិពាហ៍ និងកម្មវិធីផ្សេង។ សម្រាប់ឆ្នាំ 2017-2018 នេះ អតិថិជនដែលជាវស្រាបៀរ Tiger និង Tiger Crystal សម្រាប់កម្មវិធីអាពាហ៍ពិពាហ៍ លោកអ្នកនឹងទទួលបានការផ្ដល់ជូនរង្វាន់ភ្លាមៗជាច្រើនដូចជា សៀវភៅកត់ចំណងដៃ និងប៊ិច ដ៏ស្រស់ស្អាត អាវរងាគូសេ្នហ៍ កាបូបធ្វើដំណើរ និងសន្លឹកឆ្នោតផ្សងសំណាងដើម្បីមានឱកាសឈ្នះដំណើរកម្សាន្តក្រេបច័ន្ទទឹកឃ្មុំនៅប្រទេសជប៉ុន។ ឆ្លុះបញ្ចាំងភាពអស្ចារ្យនៃអាពាហ៍ពិពាហ៍របស់អ្នកជាមួយស្រាបៀរ Tiger និងមានឱកាសឈ្នះដំណើរកម្សាន្តក្រេបច័ន្ទទឹកឃ្មុំនៅប្រទេសជប៉ុន ជាមួយបទពិសោធន៍ដ៏រំភើបរីករាយនៃការជិះស្គីទឹកកក រួមជាមួយទឹកប្រាក់$1,500 ចំនួន 15 រង្វាន់។

កម្មវិធីនេះចាប់ផ្តើមពីថ្ងៃទី 01 តុលា 2017 ដល់ ថ្ងៃទី 30 កញ្ញា 2018

សម្រាប់ព័ត៌មានបន្ថែមសូមទំនាក់ទំនង: 011 222 400 ឬ 011 333 500។

ឆ្លុះបញ្ចាំងភាពអស្ចារ្យនៃអាពាហ៍ពិពាហ៍ ជាមួយស្រាបៀរ Tiger!

ពិសាដោយការទទួលខុសត្រូវ

November 1, 2017

កំណើនការនាំចេញផលិតផលក្នុងតំបន់សេដ្ឋកិច្ចពិសេស ធ្វើឱ្យកម្មករ កម្មការិនី ជិត1សែននាក់មានស្ថិរភាព

ភ្នំពេញ – ខណៈការនាំចេញផលិតផលពីតំបន់សេដ្ឋកិច្ចពិសេសទូទាំងប្រទេសមានការកើនឡើងត្រូវគេរំពឹងថា កម្មករ កម្មការិនីជិត1សែននាក់កំពុងតែរក្សាបានស្ថិរភាពការងារយ៉ាងល្អ។

កាលពីពេលថ្មីៗនេះឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំគណៈប្រតិភូក្រសួងពាណិជ្ជកម្ម អញ្ជើញចុះទស្សនកិច្ចនៅរោងចក្រមួយចំនួនក្នុងតំបន់សេដ្ឋកិច្ចពិសេស មេនហាតធេន-ស្វាយរៀង និងតាយសេង បាវិត ក្រុងបាវិត ខេត្តស្វាយរៀង។

ក្នុងដំណើរទស្សនកិច្ចរយៈពេលខ្លីនេះ គណៈប្រតិភូបានចុះពិនិត្យខ្សែចង្វាក់ផលិតកម្មរបស់ក្រុមហ៊ុនផលិតកង់ Speedtech Industrial Co., Ltd រោងចក្រផលិតស្បែកជើង Kingmaker (Cambodia) Footwear Co., Ltd និង Kaoway Sports Ltd និងរោងចក្រកាត់ដេរសម្លៀកបំពាក់មុជទឹក Sheico (Cambodia) Co., Ltd និងក្រុមហ៊ុនចំនួន2 ទៀតនៅតំបន់សេដ្ឋកិច្ចពិសេស តាយសេង-បាវិតដែលរួមមាន ក្រុមហ៊ុនផលិតកង់ A and J (Cambodia) Co., Ltd និងរោងចក្រផលិតតួកង់ធ្វើពីកាបោន Tentech Composite (Cambodia) Co., Ltd ។

ជាលទ្ធផលសន្ទស្សន៍នៃការនាំចេញផលិតផលក្នុងតំបន់សេដ្ឋកិច្ចពិសេស មានកំណើនឡើងគួរឱ្យកត់សម្គាល់ដែលជំរុញកំណើនសេដ្ឋកិច្ច និងរក្សាបានស្ថិរភាពការងារដល់កម្មករ កម្មការិនី ដែលកំពុងបម្រើការងារនៅក្នុងតំបន់សេដ្ឋកិច្ចពិសេសនេះ។

បច្ចុប្បន្នកម្ពុជាមានតំបន់សេដ្ឋកិច្ចពិសេសកំពុងដំណើរការដោយមានការិយាល័យច្រកចេញ-ចូលតែមួយចំនួន12តំបន់ មានក្រុមហ៊ុនកំពុងដំណើរការវិនិយោគផលិតកម្ម និងនាំចេញចំនួន157 ក្រុមហ៊ុន ប្រើប្រាស់បុគ្គលិក-កម្មករសរុប ប្រមាណ 88,177នាក់។ ក្នុងនោះក្រុមហ៊ុនបុគ្គលិក-កម្មករនៅតំបន់សេដ្ឋកិច្ចពិសេស មេនហាធេន-ស្វាយរៀង សរុបចំនួន 25,852នាក់ និងតាយសេង-បាវិត ចំនួន9,413នាក់។

សម្រាប់ឆ្នាំ2016 ទឹកប្រាក់សរុបដែលបានពីការនាំចេញក្រោមប្រព័ន្ធអនុគ្រោះពន្ធទូទៅ (GSP) ពីតំបន់សេដ្ឋកិច្ចពិសេសទាំងនេះមានតម្លៃប្រមាណ 1,354លានដុល្លារអាមេរិក កើនឡើងពី 1,116 លានដុល្លារអាមេរិក បើប្រៀបធៀបនឹងរយៈពេលដូចគ្នាក្នុងឆ្នាំ2015 ស្មើនឹងកំណើនចំនួន 238 លានដុល្លារអាមេរិក ឬ 21,29%។

ក្នុងរយៈពេល9ខែដំបូងនៃឆ្នាំ2017 ក៏ឃើញមានកំណើនគួរឲ្យកត់សម្គាល់ផងដែរ បើប្រៀបធៀបនឹង9ខែដំបូងនៃឆ្នាំ2016 ដោយក្នុងឆ្នាំ2017 ទឹកប្រាក់នាំចេញមានតម្លៃប្រមាណ 1,073 លានដុល្លារអាមេរិក កើនឡើងចំនួន106 លានដុល្លារអាមេរិកស្មើនឹង 10.89% បើប្រៀបធៀបនឹងរយៈពេលដូចគ្នាក្នុងឆ្នាំ2016 ដែលមានត្រឹមតែ 967 លានដុល្លារអាមេរិក៕

November 1, 2017

សាលារាជធានីបង្កើតលេខទូរស័ព្ទថ្មីសម្រាប់ផ្តល់ព័ត៌មានហេតុការណ៍បន្ទាន់

ភ្នំពេញ៖ ដើម្បីឱ្យប្រជាពលរដ្ឋអាចផ្តល់ព័ត៌មានទាន់ហេតុការណ៍ 24ម៉ោងលើ 24ម៉ោង ពិសេសក្នុងឱកាសបុណ្យអុំទូកដែលនឹងចូលមកដល់នៅថ្ងៃស្អែកនេះ សាលារាជធានីភ្នំពេញបានបង្កើតលេខទូរស័ព្ទថ្មីចំនួនមួយខ្សែដើម្បីឱ្យប្រជាពលរដ្ឋអាចរាយការណ៍អំពីហេតុការណ៍មិនប្រក្រតីណាមួយ ដែលកើតឡើងជុំវិញខ្លួន។

ខ្លឹមសារនៃសេចក្តីជូនដំណឹងរបស់សាលារាជធានីភ្នំពេញបានលើកឡើងថា រដ្ឋបាលរាជធានីភ្នំពេញត្រូវបានពង្រីកព្រំប្រទល់រដ្ឋបាលពី 375គីឡូម៉ែត្រការ៉េរហូតដល់ 692.64 គីឡូម៉ែត្រការ៉េ ជាហេតុធ្វើឱ្យវិសាលភាពនៃការគ្រប់គ្រងរដ្ឋបាល ការទទួលពាក្យបណ្តឹង សំណូមពរ និងតម្រូវការចាំបាច់ចំពោះមុខដែលកើតមានឡើងក្នុងជីវភាពប្រចាំថ្ងៃរបស់ប្រជាពលរដ្ឋ ពិសេសអ្នករស់នៅជុំវិញ និងជាយរាជធានីភ្នំពេញដែលនៅមិនទាន់បានល្អប្រសើរនៅឡើយ។

ដើម្បីឆ្លើយតបទៅនឹងសំណូមពររបស់ប្រជាពលរដ្ឋឱ្យបានទាន់ពេលវេលានូវបញ្ហាចាំបាច់នានា ពិសេសសម្រាប់ព័ត៌មានទាន់ហេតុការណ៍ងាយស្រួលក្នុងការដោះស្រាយសភាពការណ៍ដែលកើតមានបន្ទាន់ៗ ទាក់ទងនឹងអំពើចោរកម្ម លួច ឆក់ ប្លន់ ជួញដូរគ្រឿងញៀន សណ្តាប់ធ្នាប់ចរាចរណ៍ សណ្តាប់ធ្នាប់សាធារណៈ បាតុភាពនានា និងសំណូមពរស្នើសុំអាជ្ញាធរមានសមត្ថកិច្ចជួយអន្តរាគមន៍ ឬសង្គ្រោះ ព្រមទាំងសុវត្ថិភាពសង្គមក្នុងរាជធានីភ្នំពេញ រដ្ឋបាលរាជធានីបានបង្កើតប្រព័ន្ធទូរស័ព្ទមួយខ្សែដែលមានលេខ 1299 សម្រាប់ទទួលព័ត៌មានទាន់ហេតុការណ៍ដែលកើតឡើងក្នុងរាជធានីភ្នំពេញ ដែលទូរស័ព្ទមួយខ្សែនេះមិនមានការបង់ប្រាក់នៅពេលធ្វើការទំនាក់ទំនងហៅចូលពីគ្រប់ប្រព័ន្ធនោះទេ។

រដ្ឋបាលរាជធានីភ្នំពេញសង្ឃឹមជឿជាក់ថា បងប្អូនប្រជាពលរដ្ឋទាំងអស់នឹងចូលរួមផ្តល់ព័ត៌មានទាន់ហេតុការណ៍ 24ម៉ោង ដោយស្មារតីទទួលខុសត្រូវខ្ពស់។ សេចក្តីជូនដំណឹងនេះ បានដាក់ឱ្យស្នងការនគរបាលរាជធានីភ្នំពេញ មេបញ្ជាការកងរាជអាវុធហត្ថរាជធានី អភិបាលខណ្ឌ និងអាជ្ញាធរពាក់ព័ន្ធគ្រប់លំដាប់ថ្នាក់ ត្រូវចូលរួមផ្សព្វផ្សាយជូនប្រជាពលរដ្ឋ និងត្រៀមសហការជាមួយប្រជាពលរដ្ឋឱ្យមានប្រសិទ្ធភាពខ្ពស់បំផុត៕

November 1, 2017

តាមដានស្ថានការណ៍ពិភពលោក៖ ស្ត្រីនៅលើបល្ល័ង្ករបស់កូរ៉េខាងជើង

គីម ជុង អ៊ុន មេដឹកនាំផ្ដាច់ការរបស់ប្រទេសកូរ៉េខាងជើងកំពុងសាងគ្រឹះអំណាចថ្មីដោយការរុញប្អូនស្រីឱ្យឡើងអង្គុយកៅអីតំណែងសំខាន់ក្នុងការគ្រប់គ្រងប្រទេស។

គីម យ៉ូ ចង គឺប្អូនស្រីបង្កើតរបស់គីម ជុង អ៊ុន ដែលកាលពីពេលមុននេះធ្លាប់បានរួមដំណើរជាមួយបងប្រុសទៅត្រួតពិនិត្យកិច្ចការរដ្ឋនៅតាមទីកន្លែងផ្សេងៗ គួបផ្សំនឹងការធ្វើការងារនៅក្នុងផ្នែកឃោសនាការរបស់បក្ស។ កាលពីថ្ងៃសៅរ៍ដើមខែកន្លងទៅ នាងបានទទួលការតែងតាំងពីបងប្រុសឱ្យចូលទទួលមុខតំណែងជាន់ខ្ពស់របស់បក្ស ដែលមានប្រធានាធិបតីជាប្រធាន។ អ្នកវិភាគនយោបាយលោកខាងលិចជឿថា នេះគឺជាការចែករំលែកអំណាចការគ្រប់គ្រងរបស់គីម ជុង អ៊ុន។

ក្រៅពីប្អូនស្រីវ័យ 28 ឆ្នាំរបស់គេនេះហើយ ប្រធានាធិបតីផ្ដាច់ការកូរ៉េខាងជើងនេះនៅបានតែងតាំង គីម ចង ស៊ិក និង រី ព្យុង សល ចូលទៅកាន់តំណែងថ្មី រួមទាំង រី យ៉ង់ ហូ រដ្ឋមន្ត្រីក្រសួងការបរទេសម្នាក់ទៀតដែលធ្លាប់បានហៅ លោក ដូណាល់ ត្រាំ ក្នុងអំឡុងពេលថ្លែងសុន្ទរកថាក្នុងកិច្ចប្រជុំអង្គការសហប្រជាជាតិថា ជា “ប្រធានាធិបតីបិសាច” ផងដែរ។

ខណៈដែលស្ថានការណ៍ភាពតានតឹងរវាងកូរ៉េខាងជើង និងសហរដ្ឋអាមេរិកនៅមិនទាន់បានធូរស្រាលនិងនៅមានការគំរាមកំហែងដោយអាវុធនុយក្លេអ៊ែរដាក់គ្នានោះ រឿងការតែងតាំងអ្នកនយោបាយចូលទៅកាន់តំណែងជាន់ខ្ពស់របស់បក្សកុម្មុយនីស្តកូរ៉េខាងជើងនៅតែជារឿងដែលត្រូវតាមសង្កេតមើលជានិច្ច។

ជាពិសេស គីម យ៉ូ ចង ដែលជាប្អូនស្រីបង្កើត ដែលក្នុងពេលអនាគតដ៏ខ្លីនេះ ពិភពលោកកំពុងតាមសម្លឹងមើលឥរិយាបថថា នឹងចូលមកជំនួស ឬក៏ដើរតាមគន្លងផ្លូវរបស់បងប្រុសប៉ុនណា ឬយ៉ាងណាដែរ?៕

ប្រភព Manager.com

ប្រែសម្រួលដោយ តាវ៉ែនតា

November 1, 2017

Author: វល័ក្ខ