វល័ក្ខ - La Reine Media

សូមប្រយ័ត្ន! បញ្ហាកូនបងច្រណែនកូនប្អូន

បញ្ហាមួយប្រការទៀតដែលឪពុកម្តាយច្រើនតែភ្លេចគឺ ភ្លេចនឹកដល់កូនច្បងដែលនៅឯផ្ទះ ព្រោះកំពុងតែសប្បាយចិត្ត និងរំភើបនឹងកូនពៅដែលទើបនឹងកើត ធ្វើឱ្យភ្លេចកូនដទៃទៀតអស់មួយរយៈ។ បញ្ហានេះជាបញ្ហាធំមួយដែលគួរតែប្រយ័ត្នឱ្យបានល្អ ព្រោះការនាំកូនពៅទើបនឹងកើតទៅផ្ទះវិញ អាចនឹងធ្វើកូនបងៗខ្លះមិនសប្បាយក្នុងអារម្មណ៍ប៉ុន្មានទេ ព្រោះមានអារម្មណ៍ថា ខ្លួនឯងត្រូវបានប៉ាម៉ាក់បំភ្លេចចោល ព្រោះឃើញឪពុកម្តាយ ឬសូម្បីតែសាច់ញាតិឯទៀតតាំងពីលោកតា លោកយាយរវល់តែយកចិត្តទុកដាក់នឹងកូនពៅតូច ហើយអ្នកម្តាយក៏រវល់តែវីវក់ជាមួយកូនពៅ និងគិតថា កូនបងៗប្រហែលជាអាចជួយខ្លួនឯងបានហើយ មិនចាំបាច់មើលថែទាំអីច្រើនទេ។ ការគិត និងការធ្វើបែបនេះអាចធ្វើឱ្យក្មេងគិតថា “ម៉ាក់បោះបង់យើងចោលហើយ បានជាមិនរវល់ជាមួយយើង”។

ដូច្នេះហើយទើបគេព្យាយាមទាមទារការចាប់អារម្មណ៍ផ្សេងៗ ដើម្បីឱ្យប៉ាម៉ាក់ងាកមកចាប់អារម្មណ៍រូបគេវិញដូចជា កូនបងៗទាំងនោះអាចមានអាការឆាប់មួម៉ៅ រករឿង តោងដៃតោងជើងឪពុកម្តាយ ឬអ្វីដែលធ្លាប់ជួយខ្លួនឯងបាន ដូចជា ធ្លាប់តែទៅនាមបានដោយខ្លួនឯង ក៏បែរជានោមដាក់ពូក ឬនោមដាក់ខោ ដើម្បីឱ្យម្តាយមកជួយ ឬមកនៅក្បែរជាដើម។ រឿងទាំងអស់នេះ សំខាន់គឺអ្នកម្តាយគួរយល់ពីទង្វើទាំងនោះ និងងាកមកផ្តល់នូវការចាប់អារម្មណ៍យ៉ាងពិតប្រាកដ មិនគួរស្តីបន្ទោស វាយ ឬដាក់ទោសកូនបងទាំងនោះទេ
មិនដូច្នោះទេបញ្ហាអាចនឹងរីករាលដាលធំឡើងក្លាយជាបញ្ហាបងច្រណែនប្អូនពិបាកដោះស្រាយជាមិនខាន។

ឪពុកម្តាយគួរតែត្រៀមឱ្យហើយតាំងពីពេលមានគភ៌ ឱ្យកូនបងបានដឹងជាស្រេចថា នឹងមានប្អូនថ្មីម្នាក់កើតឡើង និងបើមានឱកាស ចូរឱ្យគេបានទៅសួរសុខទុក្ខប្អូននៅមន្ទីរពេទ្យផងរឹតតែល្អ (តែបើកំពុងឈឺ កុំឱ្យទៅជិតប្អូន)។ អ្វីដែលសំខាន់នោះគឺ ឪពុកម្តាយ និងសាច់ញាតិឯទៀតគួរសម្តែងឱ្យឃើញថា សេចក្តីស្រឡាញ់ដែលមានចំពោះកូនបងៗមិនប្រែប្រួលឡើយ។ ឪពុកម្តាយគួរបែងចែកពេលវេលាឱ្យកូនបង និងប្រតិបត្តិជាមួយគេយ៉ាងជាប់លាប់ ធ្វើឱ្យគេជឿជាក់ថា យើងមិនបានបោះបង់រូបគេចោលទេ និងព្យាយាមទាញ
គេឱ្យមកមានចំណែកទទួលខុសត្រូវក្នុងការមើលថែទាំប្អូនតូចផង ដូចជា ជួយម៉ាក់កាន់ដបទឹកដោះគោ ជួយយកកន្ទបមកផ្លាស់ ឬបើប្អូនតូចយំ ជំនួសឱ្យអ្នកម្តាយដែលត្រូវប្រញាប់រត់ទៅមើលតែឯងនោះ គួរតែដឹកដៃគេទៅមើលប្អូនដែរ ដោយប្រាប់ថា “តោះ! យើងទៅមើលមើល៍ ម៉េចបានប្អូនយំ?” ជាដើម។ ការប្រតិបត្តិបែបនេះនឹងធ្វើឱ្យកូនបងមានភាពជឿជាក់លើប៉ាម៉ាក់កាន់តែខ្លាំងឡើង និងមានអារម្មណ៍ល្អជាមួយប្អូនតូចទៀតផង។

មានចំណុចណែនាំមួយដែលលោកឪពុកអ្នកម្តាយអាចនាំយកទៅប្រតិបត្តិ និងជួយឱ្យកើតផលល្អបានគឺ នៅពេលនាំកូនពៅទើបនឹងកើតចេញពីពេទ្យមកដល់ផ្ទះភ្លាម ឪពុក ឬម្តាយមិនគួរគិតតែពីរោមយកចិត្តទុកដាក់លើកូនតូចតែម្នាក់នោះទេ។ រឿងដំបូងពេលដែលមកដល់ផ្ទះ អ្នកម្តាយគួរតែប្រញាប់ស្ទុះទៅឱបកូនបងជាមុនសិន ហើយប្រាប់គេថា ម៉ាក់ និងប៉ានាំអាអូនមកឱ្យកូនឯងហើយ និយាយងាយៗគឺផ្តល់ចំណាប់អារម្មណ៍លើកូនបងមុន តែបើបញ្ហាបងច្រណែនប្អូននេះមិនអាចដោះស្រាយបានមែនទែននោះ គួរទៅប្រឹក្សាជាមួយគ្រូពេទ្យ ដើម្បីសេចក្តីសុខក្នុងគ្រួសារ៕

November 10, 2017

លទ្ធផលស្រាវជ្រាវអះអាងថាកូនបែបនេះឯង ដែលធំឡើងនឹងក្លាយជាបង្គោលគ្រួសារ

អ្នកម្តាយដែលមានកូនតែម្នាក់អាចនឹងមិនចាំបាច់គិតអ្វីច្រើនឡើយ ព្រោះយ៉ាងណាក៏ដោយ គឺកូនមួយនេះឯងដែលឪពុកម្តាយនឹកសង្ឃឹមឱ្យក្លាយជាសសរគោលរបស់គ្រួសារនៅចាំជួយមើលថែទាំឪពុកម្តាយពេលចាស់ ឬឈឺថ្កាត់ផ្សេងៗនោះ តែសម្រាប់ឪពុកម្តាយដែលមានកូន2 កូន3 ឬច្រើនជាងនោះ តើត្រូវសង្កេតមើលយ៉ាងម៉េចនឹងដឹងទៅថា តើកូនមួយណានឹងធំទៅក្លាយជាសសរបង្គោលរបស់គ្រួសារបាននោះ?

ថ្ងៃនេះ ឡារ៉ែន មានចំណុចពិសោធពីខាងវិទ្យាសាស្ត្រដែលបានអះអាងថា ក្មេងដែលជាកូនច្បងក្នុងគ្រួសារនឹងមានឱកាសក្នុងការក្លាយជាសសរគោលរបស់គ្រួសារច្រើនជាងបងប្អូនឯទៀតរបស់គេ ព្រោះថា ៖

1- ព្រោះកូនច្បងបានរៀនយល់ដឹងពីរឿងភាពសំខាន់របស់គ្រួសារ មានភាពទទួលខុសត្រូវ និងបានទទួលជោគជ័យក្នុងជីវិតមុនប្អូនៗហ្នឹងឯង។ លទ្ធផលនៃការសិក្សាស្រាវជ្រាវរបស់ ចេហ្វ្រ៊ីយ៍ គ្លូហ្គើរ អ្នកនិពន្ធសៀវភៅ The Sibling Effect បានរកឃើញថា កូនច្បងនឹងស្តាប់បង្គាប់ និងជឿលើពាក្យប្រៀនប្រដៅរបស់ឪពុកម្តាយខ្លាំងជាងកូនបន្ទាប់ៗ និងតែងធ្វើជាបងដែលមានតួនាទីជួយប៉ាម៉ាក់មើលថែប្អូនៗ ទើបក្លាយជាក្មេងដែលមានភាពទទួលខុសត្រូវតាំងពីអាយុនៅតិច។

2- ព្រោះកូនច្បងតែងជឿ និងស្តាប់បង្គាប់ពាក្យប្រៀនប្រដៅ និងធ្វើតាមរបៀបវិន័យនៅក្នុងផ្ទះ ខណៈដែលកូនប្អូនៗច្រើនតែជាក្មេងឌឺ។ លទ្ធផលនៃការងារស្រាវជ្រាវដែលបានបោះពុម្ពផ្សាយក្នុងឆ្នាំ2003 របស់អ្នកចិត្តវិទ្យាជនជាតិបែលហ្ស៊ិកបានសរុបថា កូនច្បងនឹងមានភាពទទួលខុសត្រូវ និងមានទង្វើតាមបែបផែនដើម្បីធ្វើជាគំរូដែលល្អៗសម្រាប់ប្អូនៗ ខណៈដែលកូនប្អូនព្យាយាមសាងភាពខុសប្លែកចេញពីរបៀបវិន័យ និងលក្ខខណ្ឌដោយភាពលេងច្រើន ឡេះឡោះ រពឹស រហូតមើលទៅហាក់ដូចជាក្មេងឌឺ រឹងខ្លាំងជាងកូនច្បង។

3- ព្រោះកូនច្បងកើតមកដើម្បីធ្វើជាអ្នកដឹកនាំពីធម្មជាតិ និងច្រើនតែទទួលបានជោគជ័យក្នុងតួនាទីការងារយ៉ាងងាយ ដោយភាពជាកូនច្បងដែលត្រូវនៅចាំមើលថែទាំប្អូនៗ ដែលអាចរាប់បានថាជារឿងសំខាន់មួយដែលជួយបង្កើនជំនាញភាពជាអ្នកដឹកនាំជាប់នឹងខ្លួនតាំងពីនៅតូចដែលទាំងអស់នេះនឹងក្លាយជាប្រយោជន៍នាពេលអនាគតទាំងក្នុងរឿងការសិក្សារៀនសូត្រ ការធ្វើការងារ និងហុចផលឱ្យកូនច្បងមានភាពក្លៀវក្លាស្វាហាប់ខ្លាំងជាពិសេសទៀតផង។

4- ព្រោះកូនច្បងឆ្លាតជាងកូនប្អូន។ តាមរយៈការសិក្សាស្រាវជ្រាវរបស់អ្នកវិទ្យាសាស្ត្រជនជាតិន័រវេសបានរកឃើញថា កូនច្បងមាន IQ ជាមធ្យមខ្ពស់ជាងកូនប្អូនៗដល់ទៅ2.3ចំណុច ដែលវាអាចជាបែបហ្នឹងមែន ព្រោះវាអាចកើតចេញពីអ្វីដែលបងច្បងត្រូវអប់រំប្រដៅ ឬជួយប្អូនរំឭកមេរៀន ឬអ្វីផ្សេងៗទៀតដល់ប្អូនៗ ទើបធ្វើឱ្យកូនច្បងមានសតិបញ្ញាល្អជាង និងឆ្លាតជាងកូនប្អូនហ្នឹងឯង។

5- ព្រោះកូនច្បងជាមនុស្សដែលមានចិត្តគំនិតល្អ។ លទ្ធផលពីការងារស្រាវជ្រាវរបស់មហាវិទ្យាល័យ អុីលលិណយស៍ ក្នុងឆ្នាំ2015 បានរកឃើញថា “និស្ស័យរបស់កូនច្បងនឹងមានភាពទៀងត្រង់ ស្តាប់បង្គាប់ និងហ៊ានប្រឈម ដោយមិនញាប់ញ័រចំពោរឿងអ្វីៗឡើយ ដែលទាំងអស់នេះវាអាចកើតចេញពីការដែលខ្លួនគេជាកូនច្បងដែលត្រូវតែមើលថែទាំប្អូន នៅចាំជួយដោះស្រាយបញ្ហា ទើបធ្វើឱ្យកូនច្បងក្លាយជាបងធំចិត្តល្អ និងជាទីពឹងពាក់របស់ប្អូនបាន”៕

November 10, 2017

គន្លឹះមួយចំនួនសម្រាប់អ្នកចង់ក្លាយជាអ្នកសម្របសម្រួលកិច្ចពិភាក្សា

ដោយសារតែកំណើនៃសិក្ខាសាលា និងកម្មវិធីវេទិកាតុមូល (penal discussion) នាពេលបច្ចុប្បន្ននេះ យុវជនមួយចំនួនចាប់ផ្តើមបានស្គាល់ពីតម្លៃនៃចំណេះដឹង និងការចែករំលែកនូវមេរៀនជីវិត ក៏ដូចជាជំនាញបច្ចេកទេសជាច្រើនពីអ្នកជំនាញ។

សិក្ខាសាលាមួយ ឬកិច្ចពិភាក្សាមួយអាចមានភាពរស់រវើកទៅបាន លុះត្រាតែមានអ្នករៀបចំកម្មវិធី ដែលក្នុងនោះក៏មានអ្នកសម្របសម្រួលកម្មវិធីជជែកពិភាក្សាដែរ ព្រោះពួកគេជាអ្នកដាស់ភាពរស់រវើក និងឆ្កឹះចំណុចរសើបក្នុងប្រធានបទដើម្បីឱ្យវាគ្មិនឆ្លើយបកស្រាយ។

ខាងក្រោមនេះជាវិធីសាស្ត្រមួយចំនួនសម្រាប់អ្នកដែលចង់ក្លាយជាអ្នកសម្របសម្រួលកម្មវិធីកិច្ចពិភាក្សានានា។

1.ស្គាល់ប្រធានបទ និងវាគ្មិន

អ្នកសម្របសម្រួលកិច្ចពិភាក្សា (moderator) ជាអ្នកដែលដឹកនាំកម្មវិធីពិភាក្សាទាំងមូលឱ្យមានរបៀបរៀបរយ និងបំផុសឱ្យអ្នកចូលរួមមានចម្ងល់ ឬរីករាយតាមការកែច្នៃជាក់ស្តែងរបស់គាត់ទៅតាមស្ថានការណ៍នៅលើឆាក។ ដើម្បីបង្កើត និងដឹកនាំកិច្ចពិភាក្សាបានល្អ លុះត្រាតែអ្នកសម្របសម្រួលស្គាល់ប្រធានបទច្បាស់ និងវាគ្មិនឱ្យបានច្រើនតាមដែលអាចធ្វើទៅបាន។

ការស្គាល់ប្រធានបទច្បាស់ អាចកើតចេញពីការពិភាក្សាជាមួយអ្នករៀបចំប្រធានបទសម្រាប់វាគ្មិនម្នាក់ៗ និងសិក្សាស្រាវជ្រាវពីរឿងរ៉ាវសំខាន់ៗពាក់ព័ន្ធនឹងប្រធានបទដែលវាក៏ជាតម្លៃសំខាន់មួយសម្រាប់អ្នកសម្របសម្រួលផងដែរក្នុងការតម្រង់ទិសវេទិកាប្រសិនបើវាគ្មិនឆ្លើយមិនស្របនឹងស្ថានភាពជាក់ស្តែង ឬខុសពីអ្វីដែលជាការពិត។ ម្យ៉ាងវិញទៀត ការស្គាល់ និងភាពប៉ិនប្រសប់ក្នុងការមើលមនុស្ស ជាចំណុចសំខាន់មួយដែលអ្នកសម្របសម្រួលត្រូវតែចេះ ព្រោះថា វាគ្មិនអាចមានចរិតផ្សេងគ្នា ដោយអ្នកខ្លះចូលចិត្តឱ្យមានការសួរដេញដោលលើចំណុចរសើប អ្នកខ្លះចូលចិត្តលេងសើច អ្នកខ្លះប្រកាន់ច្រើន ឬអ្នកខ្លះទៀតចូលចិត្តពង្វាងចម្លើយជាដើម។ នៅពេលដែលអ្នកសម្របសម្រួលស្គាល់ពីស្ថានភាពរបស់អ្នកឆ្លើយបានហើយ គាត់នឹងអាចច្នៃសំណួរ និងប្រើប្រាស់ពាក្យពេចន៍ដើម្បីធ្វើយ៉ាងណាដឹកនាំកិច្ចពិភាក្សាឱ្យទទួលបានជោគជ័យ។

ចាប់ចំណុចមិនសូវច្បាស់ ឬចំណុចរសើបដើម្បីសួរលម្អិត

នៅក្នុងសង្គមជាក់ស្តែង មានរឿងជាច្រើនដែលជាចម្ងល់សម្រាប់មនុស្សទូទៅ ហើយចម្ងល់ទាំងអស់នោះក៏អាចជាចម្ងល់របស់អ្នកចូលរួមស្តាប់កិច្ចពិភាក្សាដែរ ហេតុនេះប្រសិនបើអ្នកជាអ្នកសម្របសម្រួលល្អម្នាក់ អ្នកចាំបាច់ត្រូវតែស្រាវជ្រាវព័ត៌មានឱ្យបានច្បាស់ ហើយដាក់សំណួរឱ្យវាគ្មិនបកស្រាយបន្ថែមលើគំនិតដែលស្រពេចស្រពិលទាំងអស់នោះ។ អ្នកសួរអាចចាប់ផ្តើមដោយពាក្យថា «ខ្ញុំមិនច្បាស់ថា» រួចបង្កើតជាសាច់រឿងមួយដែលគ្រប់គ្នាកំពុងគិត ហើយបញ្ចប់ដោយពាក្យថា «សូមវាគ្មិនបកស្រាយលើចំណុចដែលកំពុងខ្វែងគំនិត ឬមិនទាន់ច្បាស់លាស់នេះ» ដើម្បីស្វែងរកឱ្យឃើញនូវគំនិតយោបល់ពីអ្នកជំនាញសម្រាប់សាធារណជនជាពិសេសដើម្បីជាចំណុចចាប់ផ្តើមសម្រាប់បំផុសឱ្យអ្នកចូលរួមកាន់តែមានគំនិតច្រើនក្នុងការចូលរួមចោទសួរ។

ការធ្វើបែបនេះ អាចធ្វើឱ្យវេទិកាមួយចាប់ផ្តើមមានសកម្មភាព និងគុណតម្លៃស្របគ្នាដែលវាគ្មិនក៏អាចសប្បាយចិត្ត មិនមែនសួរឱ្យតែបានសួរនោះទេ។

3.ចេះបង្វែរស្ថានការណ៍ និងគ្រប់គ្រងពេលវេលាឱ្យបានល្អ

មនុស្សម្នាក់ៗមានគំនិតខុសគ្នា មានការយល់ឃើញផ្សេងគ្នាលើគ្រប់រឿងរ៉ាវដែលកើតមានឡើងនៅក្នុងការរស់នៅ ហេតុនេះការធ្វើប្រធានបទពិភាក្សាណាមួយមិនអាចចៀសផុតពីការខ្វែងគំនិត ឬនិយាយចេញនូវគំនិតដែលអាចប៉ះពាល់ ឬអាចចេញឆ្ងាយពីប្រធានបទ ហេតុនេះអ្នកសម្របសម្រួលមានតួនាទីក្នុងការហៅមកវិញនូវភាពវិជ្ជមានក្នុងកិច្ចពិភាក្សា និងគ្រប់គ្រងស្ថានការណ៍ឱ្យបាន។

វិធីសាស្ត្របង្វែរស្ថានការណ៍អាចធ្វើបានដោយការចោទជាសំណួរផ្ទុយ ឬបង្កើតសំណួរបន្ថែមដើម្បីរុញចំណុចសំខាន់ឱ្យចេញ។ វិធីសាស្ត្រមួយផ្សេងទៀត គឺអាចបង្វែរសំណួរទៅកាន់វាគ្មិនបន្ទាប់ ដោយការកាត់សាច់រឿងប្រកបដោយភាពសមរម្យមួយ ឬដោយការលើករឿងសាមញ្ញមួយដែលអស់សំណើចដើម្បីបង្វែរការគិតរបស់មនុស្សគ្រប់គ្នាមុននឹងឈានចូលសំណួរថ្មី។

ចំណែកឯបញ្ហាពេលវេលាក៏ជារឿងសំខាន់មួយដែរសម្រាប់ការផ្តល់ភាពស្មើគ្នាដល់វាគ្មិនម្នាក់ៗ អ្នកសួរ និងវេទិកាទាំងមូល ហេតុនេះអ្នកសម្របសម្រួលគឺត្រូវតែជាអ្នកមានភាពឆ្លាតវៃក្នុងការគ្រប់គ្រង ឬទប់អ្នកដែលកំពុងតែចង់ដឹងកុំឱ្យខឹង ឬអន់ចិត្ត នៅមុនពេលនឹងបញ្ចប់វេទិកា៕

November 10, 2017

ហេតុអ្វីបានជាបុគ្គលិកក្នុងស្ថាប័នមួយ ចេះតែចេញ-ចូលញឹកញាប់?

សកម្មភាពបុគ្គលិកចេញ-ចូលច្រើន ឬធ្វើការបានតែមួយរយៈពេលខ្លី ហើយផ្លាស់ពីកន្លែងមួយទៅកន្លែងមួយ ជាភាពអសកម្មមួយដែលក្រុមហ៊ុនជាច្រើននៅកម្ពុជាកំពុងជួបប្រទះ ហើយបញ្ហានេះបានធ្វើឱ្យប៉ះពាល់ដល់សកម្មភាពការងាររបស់ក្រុមហ៊ុន និងបុគ្គលិកនោះផ្ទាល់។

ពាក់ព័ន្ធនឹងបញ្ហានេះ លោក ងួន ប៊ុននិត អគ្គនាយកក្រុមហ៊ុនធនធានមនុស្ស Idea Plus បានលើកឡើងថា មានកត្តាសំខាន់ 2យ៉ាងដែលធ្វើឱ្យបុគ្គលិកចេញចូលច្រើននៅក្នុងស្ថាប័នមួយ។ កត្តាទី 1 គឺកត្តាផលប្រយោជន៍ (profit) និងកត្តាទី 2 គឺកត្តាអារម្មណ៍ ឬមនោសញ្ចេតនា (emotion)។ លោក ប៊ុននិត បានបញ្ជាក់ថា កត្តាផលប្រយោជន៍ភាគច្រើនអាចកើតមកពីការគិតរបស់មេដឹកនាំនៃស្ថាប័ននីមួយៗដែលតែងតែគិតថា មានលុយគឺប្រាកដជាអាចធ្វើអ្វីបានគ្រប់យ៉ាង តែតាមពិតទៅបុគ្គលិកម្នាក់ៗមិនប្រាកដថា ត្រូវការលុយទាំងស្រុងនោះទេ។ ក្រៅពីកត្តាលុយកាក់ បុគ្គលិកក៏ត្រូវការលក្ខខណ្ឌការងារល្អប្រសើរ ការយកចិត្តទុកដាក់ និងកត្តាមួយចំនួនទៀតផងដែរ។

លោក ងួន ប៊ុននិត បាននិយាយថា៖ «ភាពមានមនោសញ្ចេតនាក្នុងស្ថាប័ន និងកត្តាផលប្រយោជន៍ជាផ្នែកសំខាន់ដែលមិនអាចខ្វះបាន ព្រោះថា ប្រសិនបើមានតែមនោសញ្ចេតនា ហើយខ្វះលុយកាក់មនុស្សមិនអាចទ្រទ្រង់ជីវភាពបាននោះទេ តែប្រសិនបើមានតែលុយកាក់ ហើយខ្វះមនោសញ្ចេតនាមនុស្សក៏ធ្វើការមិនបានយូរដូចគ្នាដែរ»។

លោក ងួន ប៊ុននិត បានបន្ថែមទៀតថា ក្រៅពីកត្តាបរិស្ថានក្នុងក្រុមហ៊ុន កត្តាបុគ្គលិកក៏ជាផ្នែកមួយផងដែរនៃការផ្លាស់ប្តូរកន្លែងធ្វើការពីមួយកន្លែងទៅមួយកន្លែងរបស់មនុស្សម្នាក់។ ការដែលបុគ្គលិកមើលឃើញតែផលប្រយោជន៍ ឬធ្វើការដោយផ្តោតតែលើប្រាក់ខែខ្លាំងពេកក៏អាចធ្វើឱ្យពួកគេចាកចេញពីមួយកន្លែងទៅមួយកន្លែងបានដែរ ព្រោះថា ឱ្យតែក្រុមហ៊ុនណាហ៊ានចំណាយប្រាក់ខែឱ្យគាត់លើសកន្លែងចាស់បន្តិចបន្តួចគាត់នឹងទៅភ្លាម។ ម្យ៉ាងវិញទៀត ការធ្វើការដោយមិនស្គាល់ខ្លួនឯងច្បាស់ក៏ជាផ្នែកមួយអាចធ្វើឱ្យពួកគេត្រូវផ្លាស់ប្តូរការងារជាញឹកញាប់បានដែរ ព្រោះនៅពេលដែលធ្វើការងារមួយយូរៗទៅគាត់អាចនឹងមានអារម្មណ៍ថា មិនពេញចិត្ត ឬនឿយហត់ខ្លាំងប្រសិនបើការងារនោះមិនស្របជាមួយនឹងចំណង់ចំណូលចិត្តរបស់គាត់។

ប្រធានក្រុមហ៊ុនធនធានមនុស្សខាងលើបានផ្តល់ដំណោះស្រាយថា ដើម្បីកុំឱ្យខ្លួនត្រូវស្ថិតក្នុងស្ថានភាពផ្លាស់ប្តូរការងារពីមួយកន្លែងហើយទៅមួយកន្លែងទៀត សូមពិចារណាឱ្យបានច្បាស់លាស់មុនពេលសម្រេចចិត្តធ្វើការងារនៅក្នុងស្ថាប័នណាមួយ មិនមែនស្វែងរកការងារដើម្បីតែឱ្យបានធ្វើសិននោះទេ។ ចំណុចដែលត្រូវមើលជាដំបូងគឺទស្សនវិស័យរបស់ក្រុមហ៊ុន ថាតើមានលក្ខណៈស្របនឹងគោលដៅ និងចំណង់ចំណូលចិត្តរបស់យើងដែរឬទេ? ហើយវប្បធម៌ និងបរិស្ថាននៃការធ្វើការងារក្នុងស្ថាប័ននោះមានលក្ខណៈល្អប្រសើរស្របនឹងសមត្ថភាព ឬលក្ខណសម្បត្តិរបស់យើងដែរឬទេ?។

បង្ហាញលើចំណុចដូចគ្នានេះ លោក រិន រ៉ាវុធ ប្រធានការិយាល័យរដ្ឋបាល និងបុគ្គលិក នៃបេឡាជាតិសន្តិសុខសង្គមសម្រាប់មន្ត្រីរាជការស៊ីវិល និងជាសាស្ត្រាចារ្យផង បានលើកឡើងថា ការផ្លាស់ប្តូរការងារញឹកញាប់របស់បុគ្គលិកអាចមានផលប៉ះពាល់យ៉ាងច្រើនដល់ស្ថាប័ន និងបុគ្គលិកដែលដាក់ពាក្យធ្វើការងារនោះ។ សម្រាប់ស្ថាប័ន គឺលំបាកក្នុងការរៀបផែនការ ឬត្រូវចំណាយច្រើនទាំងពេលវេលា និងថវិកាដើម្បីជ្រើសរើសបុគ្គលិកថ្មី ហើយពេលខ្លះក៏អាចធ្វើឱ្យអាក់ខានដល់ដំណើរនៃការងាររបស់ក្រុមហ៊ុននោះថែមទៀតផង។ សម្រាប់បុគ្គលិកវិញ ក៏មិនខុសគ្នាប៉ុន្មានដែរ ព្រោះថា នៅពេលដែលគាត់ផ្លាស់ប្តូរកន្លែងធ្វើការងារច្រើន គាត់នឹងអាចមានបញ្ហាលើតម្លៃនៃខ្លួនគាត់សម្រាប់ស្ថាប័ននានាដែលគាត់ដាក់ពាក្យធ្វើការងារ។ នៅក្នុង CV ប្រសិនបើគាត់បង្ហាញការផ្លាស់ប្តូរកន្លែងធ្វើការងារច្រើន ស្ថាប័នថ្មីនោះអាចនឹងមិនហ៊ានទទួលយកគាត់ឱ្យធ្វើការនោះទេ ព្រោះគេខ្លាចគាត់ចូលបានតែក្នុងរយៈពេលខ្លី ហើយចេញទៅទៀតជាដើម។

លោក រិន រ៉ាវុធ បាននិយាយថា៖ «ដើម្បីកុំឱ្យខាតទាំងអស់គ្នា ទាំងស្ថាប័ន និងទាំងបុគ្គលិកខ្លួនឯង គួរគិតគូរឱ្យបានច្បាស់លាស់លើផ្នែកធនធានមនុស្ស ព្រោះថា ផ្នែកនេះជាផ្នែកសំខាន់សម្រាប់ដំណើរការការងាររបស់ក្រុមហ៊ុនទូទៅ»។

លោក រិន រ៉ាវុធ បានបន្ថែមទៀតថា ដើម្បីចៀសវាងបញ្ហាបុគ្គលិកផ្លាស់ប្តូរការងារញឹកញាប់ សម្រាប់ស្ថាប័នគួរផ្តល់ឱ្យនូវលក្ខខណ្ឌល្អប្រសើរ ហើយជ្រើសរើសតែបុគ្គលិកណាដែលមានឆន្ទៈអភិវឌ្ឍន៍សមត្ថភាពរបស់ខ្លួនយូរអង្វែង ឬជាអ្នកដែលមានបំណងកសាងអនាគតយូរអង្វែងជាមួយស្ថាប័ន។ ការជ្រើសរើសបុគ្គលិកដែលមានគោលដៅច្បាស់លាស់ ហើយជជែកគ្នាឱ្យច្បាស់ពីគោលបំណងរួមរបស់ស្ថាប័ន និងផ្តល់ផលប្រយោជន៍យូរអង្វែងទៅវិញទៅមករវាងស្ថាប័ន និងបុគ្គលិក ដែលវាក៏ជារឿងសំខាន់មួយដែលចាំបាច់ត្រូវតែធ្វើ ព្រោះថា បុគ្គលិកដែលយល់ពីតម្លៃរបស់ខ្លួននៅក្នុងស្ថាប័ន និងយល់ពីតម្លៃរបស់ស្ថាប័នចំពោះខ្លួន ភាគច្រើនជាអ្នកដែលវិនិយោគខ្លួនឯងយូរអង្វែងនៅក្នុងស្ថាប័នមួយបានច្រើនឆ្នាំ ដែលអាចនាំទាំងខ្លួនគេផ្ទាល់ និងស្ថាប័នឆ្ពោះទៅរកភាពជោគជ័យបាន៕

November 10, 2017

មែនឬទេ ដែលពាក្យចាស់លោកថា ម្តាយជ្រុះសក់ ក្រោយពេលឆ្លងទន្លេរួច ព្រោះតែកូនចាំមុខម្តាយ?

ស្ត្រីកូនខ្ចីស្ទើរតែគ្រប់រូបតែងជួបនឹងបញ្ហាសក់ជ្រុះក្រោយពេលឆ្លងទន្លេរួច តែនឹងជ្រុះច្រើនឬតិចនោះ វាអាស្រ័យលើបច្ច័យផ្សេងៗរបស់រាងកាយ ឬក៏កើតឡើងដោយសារតែទារកចំណាំមុខម្តាយបានហើយទើបធ្វើឱ្យសក់ជ្រុះដូចដែលចាស់បុរាណបានិយាយ? ភាពមិនច្បាស់លាស់ និងក្តីសង្ស័យមួយនេះអាចនិយាយបានថា មានគ្រប់យុគគ្រប់សម័យ ព្រោះអំឡុងពេលដែលសក់ក្បាលរបស់អ្នកម្តាយជ្រុះគឺស្ថិតក្នុងអំឡុងពេលប្រមាណជា3-4ខែក្រោយប្រសូត គឺចំពេលដែលកូនតូចអាចនឹងចំណាំមុខម្តាយបានហើយ
ហ្នឹងឯង អ៊ើ… តើវាជារឿងចៃដន្យ ឬជារឿងពិត យើងនាំគ្នាមកអានបន្តទាំងអស់គ្នាដូចខាងក្រោម។

ក្នុងផ្នែកវេជ្ជសាស្ត្រ សក់ជ្រុះក្រោយពេលឆ្លងទន្លេរួចបណ្តាលមកពីកម្រិតអ័រម៉ូនអេសត្រូជេនដែលថយចុះក្រោយពីសម្រាលបុត្ររួចហុចផលឱ្យបរិមាណនៃការហូរវិលរបស់លោហិតថយចុះដែរ ឈាមដែលទៅចិញ្ចឹមស្បែកក្បាលក៏ថយចុះទៅតាមនោះដែរ ទើបធ្វើឱ្យសរសៃសក់ដែលធ្លាប់តែខ្មៅក្រាស់តាំងពីពេលតាំងគភ៌នោះរបូតជ្រុះមកច្រើនជាងប្រក្រតី។

ការពិតទៅ ជាប្រក្រតីមនុស្សយើងនឹងជ្រុះសក់ក្នុងមួយថ្ងៃប្រមាណជា10សរសៃ តែក្នុងអំឡុងពេលជ្រុះសក់ក្រោយពេលសម្រាលបុត្ររួចនេះអាចនឹងកើនឡើងដល់40-50សរសៃក្នុងមួយថ្ងៃ តែមិនបានជ្រុះច្រើនបែបនេះរហូតនោះទេ ព្រោះនៅពេលអ័រម៉ូនចាប់ផ្តើមដំណើរការស្រួលបួលឡើងវិញ (រយៈពេលប្រមាណជា6-12ខែ) គ្រប់យ៉ាងនឹងវិលទៅរកសភាពប្រក្រតីវិញមិនខាន។ សក់របស់អ្នកម្តាយនឹងបន្ថយជ្រុះហើយសក់ថ្មីនឹងដុះឡើងជំនួសវិញ តែទាំងអស់នេះអាស្រ័យលើសភាពរាងកាយរបស់ស្ត្រីជាម្តាយម្នាក់ៗដែរ មិនកំណត់ថា ត្រូវតែ6-12ខែនោះទេ អ្នកខ្លះជ្រុះតែមួយខែហើយឈប់ជ្រុះទៀតក៏មានដែរ។

សម្រាប់ជំនឿដែលថា ជ្រុះសក់ដោយសារតែកូនចាំមុខម្តាយបានហើយនោះ ប្រហែលជាវាចៃដន្យទៅត្រូវគ្នានឹងអំឡុងពេលដែលវិវឌ្ឍនាការតាមវ័យរបស់ទារកដែលចាប់ផ្តើមចេះចំណាំផ្ទៃមុខម្តាយ ឬអ្នកនៅជិតដិតបានហើយ និងចំពេលដែលម្តាយស្ថិតក្នុងអំឡុងពេលសក់ជ្រុះក្រោយពេលឆ្លងទន្លេរួចដែរ ទើបក្លាយជាប្រភពនៃជំនឿដែលថា ជ្រុះសក់ក្រោយពេលសម្រាលកូនរួច ព្រោះតែកូនចំណាំមុខម្តាយបានហើយហ្នឹងឯង។

តើត្រូវមើលថែទាំអាការជ្រុះសក់ក្រោយពេលសម្រាលកូនរួចយ៉ាងណាស្រួល?
1- អ្នកម្តាយមួយចំនួនប្តូរម៉ូដសក់ថ្មី កែសម្រួលលក្ខណៈផ្ទាល់ខ្លួនឱ្យទៅជាអ្នកម្តាយស្រស់ស្អាតថ្មីម្នាក់ក៏ល្អម្យ៉ាងដែរ ព្រោះម៉ូដសក់ខ្លីងាយស្រួលមើលថែទាំ និងធ្វើឱ្យមើលមកឃើញសក់រាងក្រាស់ទៀតផង។

2- ការមើលថែទាំសរសៃសក់ដែលសំខាន់គឺជ្រើសរើសប្រើផលិតផលបែបធម្មជាតិដើម្បីថ្នមសរសៃសក់ ចៀសវាងការធ្វើម៉ាស្សាស្បែកក្បាល ឬសិតសក់ខ្លាំង។ ក្រោយពេលកក់សក់រួច ត្រូវជូតសក់ក្បាលយ៉ាងថ្នមដៃ ព្រោះសក់ដែលកំពុងទទឹកសើមមានឱកាសជ្រុះបានងាយណាស់ ការធ្វើបែបនេះនឹងជួយថ្នមសរសៃសក់បានកាន់តែល្អឡើង។

3- ទទួលទានអាហារដែលជួយបំប៉នសរសៃសក់ ដែលមានដូចជា ៖
• ស៊ុត មានចំណែកជួយបំប៉នសរសៃសក់ឱ្យភ្លឺរលោង ព្រោះក្នុងស៊ុតមានសារធាតុបៃអូឌីននិងវីតាមីន B។
• មើមការ៉ុត មានវីតាមីន A កាត់បន្ថយការជ្រុះរបស់សរសៃសក់ និងបំប៉នស្បែកក្បាល។
• បន្លែស្លឹកបៃតង សម្បូរទៅដោយវីតាមីន A និង C ដូចជា ស្លឹកផ្ទី ប្រូខូលី ស្ពៃក្តោប ជួយបំប៉នសរសៃសក់ និងស្បែកក្បាល។
• សាច់ត្រី ជាពិសេសត្រីសាល់ម៉ុន ជាប្រភពប្រូតេអីុន និងវីតាមីនD ថែមទាំងមានសារធាតុអាស៊ីតខ្លាញ់អូមេហ្កា3ដែលជួយបំប៉នស្បែកក្បាល កាត់បន្ថយការកើតអង្គែបានទៀតផង៕

November 10, 2017

អាល្លឺម៉ង់ផ្តល់ទឹកប្រាក់ជាង 9លានអ៊ឺរ៉ូ លើគម្រោងសម្រូលពាណិជ្ជកម្មនៅកម្ពុជា

ភ្នំពេញ៖ ដើម្បីសម្រូលដល់ពាណិជ្ជកម្មក្នុងគោលដៅដើម្បីជំរុញការតភ្ជាប់សេដ្ឋកិច្ចកម្ពុជាឱ្យកាន់តែរឹងមាំទៅនឹងបណ្តាប្រទេសនានាក្នុងតំបន់អាស៊ាន រដ្ឋាភិបាលអាល្លឺម៉ង់បានផ្តល់ហិរញ្ញប្បទានក្នុងទំហំទឹកប្រាក់ប្រមាណជា 9.35លានអ៊ឺរ៉ូសម្រាប់អនុវត្តគម្រោងខាងលើឱ្យកាន់តែប្រសើរឡើង។

គម្រោងនេះត្រូវបានប្រគល់ដល់កម្ពុជាតាមរយៈក្រសួងពាណិជ្ជកម្មដែលបានរៀបចំកិច្ចប្រជុំពិគ្រោះយោបល់មួយថ្មីៗនេះ ជាកិច្ចចាប់ផ្ដើមបេសកកម្មវាយតម្លៃគម្រោងថ្មីដែលរួមមានការផ្ដល់ហិរញ្ញប្បទានដោយសហគមន៍អឺរ៉ុប និងរដ្ឋាភិបាលប្រទេសអាល្លឺម៉ង់ និងអង្គការ GIZ ជាភ្នាក់ងារអនុវត្តគម្រោងផ្ទាល់។

លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្មបានឱ្យដឹងថា គោលបំណងធំរបស់គម្រោងថ្មីនេះ គឺដើម្បីជំរុញការតភ្ជាប់សេដ្ឋកិច្ចរបស់កម្ពុជាទៅនឹងការធ្វើសមាហរណកម្មអាស៊ាន ជាពិសេសដើម្បីឱ្យមានសមត្ថភាពពេញលេញក្នុងការចូលរួមសហគមន៍សេដ្ឋកិច្ចអាស៊ាន។

ក្រៅពីនេះដែរ គម្រោងនេះនឹងបន្តការងារដែលសម្រេចបានក្រោមការអនុវត្តកម្មវិធីគាំទ្រការអភិវឌ្ឍពាណិជ្ជកម្មដែលបានបញ្ចប់នៅឆ្នាំ2016 កន្លងទៅ ដើម្បីជំរុញសកម្មភាពទាំងនោះឱ្យអភិវឌ្ឍបន្ថែមមួយកម្រិតទៀតសំដៅទៅរកការទ្រទ្រង់កំណើនសេដ្ឋកិច្ចរបស់កម្ពុជា។ គម្រោងថ្មីនេះនឹងផ្ដោតទៅលើសមាសភាពចំនួន3គឺ៖

1.កិច្ចសម្រួលពាណិជ្ជកម្ម និងបញ្ហាអន្តរវិស័យនានា

2.គោលនយោបាយពាណិជ្ជកម្មសមាហរណកម្មអាស៊ាន ការពង្រឹងសមត្ថភាព និងការអនុវត្តច្បាប់

3.ពង្រឹងការចូលរួមរបស់វិស័យឯកជនក្នុងការងារអភិវឌ្ឍន៍ពាណិជ្ជកម្ម។

នៅក្នុងកិច្ចប្រជុំនេះដែរក៏មានការចូលរួមជាយោបល់បន្ថែមទៅលើការរៀបចំគម្រោងនេះពីបណ្ដានាយកដ្ឋានមួយចំនួនក្នុងក្រសួងពាណិជ្ជកម្ម ក៏ដូចជាតំណាងពីក្រសួង និងស្ថាប័នដទៃទៀតដែរ។ បេសកកម្មវាយតម្លៃគម្រោងនេះនឹងត្រៀមធ្វើការបូកសរុប នៅថ្ងៃទី16 ខែវិច្ឆិកា ឆ្នាំ2017 ខាងមុខ ដើម្បីឱ្យដឹងថា សកម្មភាពនេះអនុវត្តធ្វើឡើងទទួលបានផលបែបណាត្រឡប់មកវិញក្នុងគម្រោងជួយឱ្យដំណើរការសេដ្ឋកិច្ចកាន់តែប្រសើរឡើងនាពេលនេះ៕

November 10, 2017

ព្រឹត្តិការណ៍ប្រគំតន្ត្រី Smart Mega Concert បានធ្វើឲ្យកក្រើកក្រុងសៀមរាបយ៉ាងភ្លូកទឹកភ្លូកដីក្នុងឱកាសព្រះរាជពិធីបុណ្យអុំទូក

ភ្នំពេញ៖ នៅថ្ងៃទី02 រហូតដល់ថ្ងៃទី 04 ខែវិច្ឆិកា ឆ្នាំ 2017 ព្រឹត្តិការណ៍ប្រគំតន្ត្រី Smart Mega Concert បានបញ្ចប់ដោយទទួលបានជោគជ័យយ៉ាងគគ្រឹកគគ្រេងដែលបានធ្វើឲ្យកក្រើកក្រុងសៀមរាមក្រោមការចូលរួមចូលទស្សនាយ៉ាងភ្លូកទឹកភ្លូកដីពីសំណាក់ប្រជាពលរដ្ឋ ភ្ញៀវជាតិនិងអន្តរជាតិ។

ព្រឹត្តិការណ៍ប្រគំតន្ត្រី Smart Mega Concert ដែលជាកម្មវិធីប្រគំតន្ត្រីដ៏ធំអស្ចារ្យមិនធ្លាប់មាននៅក្រុងសៀមរាមដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលបាននាំមកជូនដោយក្រុមហ៊ុន ស្មាត អាស្យាតា (Smart) ជាប្រតិបត្តិករទូរគមនាគមន៍ដ៏ធំបំផុតនៅកម្ពុជា និងមានការចូលរួមសហការឧបត្ថម្ភពីក្រុមហ៊ុន AIA Cambodia ជាក្រុមហ៊ុនធានារ៉ាប់រងអាយុជីវិតដ៏ធំមួយនៅកម្ពុជា ក្រុមហ៊ុន VKSC Investment ដែលក្រុមហ៊ុននាំចូលចែកចាយផលិតផលនំ Manora និងក្រុមហ៊ុន Worldwide Motor Company Ltd (WMC) ដែលជាក្រុមហ៊ុនដ៏ធំមួយបានទទួលសិទ្ធិផ្តាច់មុខក្នុងការនាំចូល និងចែកចាយរថយន្តថ្មីទំនើប HAWTAI A25 នៅក្នុងប្រទេសកម្ពុជា ។

មុននឹងចាប់ផ្តើមកម្មវិធីប្រគំតន្ត្រី Smart Mega Concert កម្មវិធីជួបសំណេះសំណាលរវាងសិល្បករ និងមិត្តអ្នកគាំទ្របានរៀបចំឡើងដោយមានការចូលរួម និងស្វាគមន៍យ៉ាងកក់ក្តៅពីអ្នកគាំទ្រ និងអតិថិជន Smart ជាច្រើននៅហាង Smart Shop ក្នុងក្រុងសៀមរាប។ សិល្បករដែលអញ្ជើញចូលរួមកម្មវិធីសំណេះសំណាលរួមមាន លោក Alek Teeradetch លោក នីកូ លោក Step និងលោក ណា ខុន។ ក្នុងឱកាសនោះផងដែរ លោក Alek Teeradetch ដែលជាតារាសម្តែងល្បីប្រចាំព្រះរាជាណាចក្រថៃ បានមានប្រសាសន៍ថា លោកសប្បាយចិត្តដែលបានអញ្ជើញមកសម្តែងនៅប្រទេសកម្ពុជា ជាពិសេសនៅក្នុងខេត្តសៀមរាបសម្បូរដោយប្រាសាទបុរាណជាច្រើនជាពិសេសគឺប្រាសាទអង្គវត្តដ៏ល្បីល្បាញជុំវិញពិភពលោក ហើយលោកក៏បានថ្លែងអំណរគុណដល់ប្រជាជនកម្ពុជាដែលបានគាំទ្រការសម្តែងរបស់លោកតាមរយៈខ្សែភាពយន្តភាគ។

កម្មវិធីប្រគំតន្ត្រី Smart Mega Concert បានចាប់ផ្តើមពីម៉ោង 7យប់ រហូតដល់ម៉ោង12 អធ្រាត្រនៅបរិវេណមាត់ស្ទឹងក្រុងសៀមរាប ចាប់ពីថ្ងៃទី 2 ដល់ថ្ងៃទី 4 ខែវិច្ឆិកា ហើយកម្មវិធីពិសេសនេះក៏បានផ្សាយបន្តផ្ទាល់នៅលើកញ្ចក់ទូរទស្សន៍ PNN ចាប់ពីម៉ោង 7ដល់ម៉ោង 9 យប់ផងដែរ។

Smart Mega Concert ដែលជាកម្មវិធីប្រគំតន្ត្រីដ៏ធំអស្ចារ្យមិនធ្លាប់មានធ្វើឡើងនៅក្នុងទឹកដីអច្ឆរិយៈខេត្តសៀមរាប បានទាក់ទាញទស្សនិកជនទាំងជាតិ និងអន្តរជាតិចូលរួមទស្សនាយ៉ាងច្រើនកុះករ។ ពួកគេបានរីករាយទស្សនាការសម្តែងរបស់តារាអន្តរជាតិល្បីឈ្មោះ លោក Alek Teeradetch ដែលជាតារាសម្តែងល្បីជួរមុខប្រចាំព្រះរាជាណាចក្រថៃ ព្រមទាំងតារាល្បីៗប្រចាំព្រះរាជាណាចក្រកម្ពុជាដូចជា លោក នីកូ លោក Step អ្នកនាង សួស វីហ្សា កញ្ញា ស៊ុន ស្រីពេជ្រ កញ្ញា លាង សុផាឡែន លោក ខាន់ ជែម លោក ណា ខុន និងឌីជេ Maily ជាពិសេសក៏មានវត្តមានតារាចម្រៀងរបស់ខ្មែរដែលគេស្គាល់ថាជាក្រុមតារាចម្រៀង Original Song ដូចជា Jimmy Kiss, Adda, Chet Kanhna, Van Chesda ក្រុមតន្ត្រី SWSB ( Small world Small Band) ប្រុសឡា និងក្រុមតារាកំប្លែង អ្នកនាង កាតុ និងក្រុមតារាកំប្លែងជើងចាស់ លោក ចាប ចៀនដែលបានធ្វើឲ្យទស្សនិកជនផ្ទុះសំណើចសប្បាយរីករាយក្នុងអំឡុងកម្មវិធីរយៈពេលបីថ្ងៃ។

ទន្ទឹមនឹងនេះផងដែរ អ្នកទស្សនាទាំងអស់បានរីករាយលេងហ្គេមដើម្បីឈ្នះរង្វាន់យ៉ាងច្រើនសន្ធឹកសន្ធាប់ពីក្រុមហ៊ុន Smart ព្រមទាំងទស្សនាការតាំងបង្ហាញផលិតផលរបស់ក្រុមហ៊ុន AIA Cambodia ជាក្រុមហ៊ុនធានារ៉ាប់រងជីវិតតែមួយគត់នៅកម្ពុជា ដែលធានារ៉ាប់រងលើជំងឺធ្ងន់ធ្ងរ និងផ្តោតលើសុខភាពជាចំបង។ ការតាំងបង្ហាញផលិតផលពីក្រុមហ៊ុន VKSC Investment ដែលក្រុមហ៊ុននាំចូលចែកចាយផលិតផលនំ Manora ដែលមានរសជាតិឈ្ងុយឆ្ងាញ់ និងការតាំងបង្ហាញផលិតផលរថយន្តពីក្រុមហ៊ុន Worldwide Motor Company Ltd (WMC) ដែលជាក្រុមហ៊ុនដ៏ធំមួយបានទទួលសិទ្ធិផ្តាច់មុខក្នុងការនាំចូល និងចែកចាយរថយន្តថ្មីទំនើប HAWTAI A25 នៅក្នុងប្រទេសកម្ពុជា ដែលបានផ្តល់កម្មវិធីពិសេសសម្រាប់អតិថិជន គឺមានទឹកប្រាក់បង់ដំបូងតែ 3000ដុល្លារ(បីពាន់ដុល្លារ) ប៉ុណ្ណោះ អតិថិជនទាំងអស់នឹងទទួលបានរថយន្ត HAWTAI A25 ដ៏ថ្មីសន្លាងនេះភ្លាម៕

November 10, 2017

ស្ពានកោះកុងត្រូវបានប្រគល់ និងទទួលស្គាល់ជាផ្លូវការហើយនៅព្រឹកនេះ

ភ្នំពេញ៖ ពិធីប្រគល់-ទទួលស្ពានកោះកុង (ឬហៅថាស្ពានមិត្តភាពកម្ពុជា-ថៃ) ដើម្បីដាក់ឱ្យបងប្អូនប្រជាពលរដ្ឋឆ្លងកាត់ដោយឥតគិតថ្លៃ បានចាប់ផ្តើមជាផ្លូវការហើយនៅព្រឹកថ្ងៃទី10 ខែវិច្ឆិកា ឆ្នាំ2017នេះតទៅ។ នេះបើតាមការឱ្យដឹងពីអ្នកនាំពាក្យក្រសួងសាធារណការ និងដឹកជញ្ចួន។

ឯកឧត្តម វ៉ា ស៊ឹមសូរិយា អ្នកនាំពាក្យក្រសួងសាធារណការបានឱ្យដឹងថា ប្រជាពលរដ្ឋដែលរស់នៅខេត្តកោះកុង ប្រទេសកម្ពុជា ក៏ដូចជាប្រជាជនរស់នៅខេត្តត្រាត ប្រទេសថៃដែរនោះ បានសម្តែងការសាទរចំពោះចំណាត់ការរបស់រដ្ឋាភិបាលដែលបានទិញស្ពានមួយនេះពីក្រុមហ៊ុនលីយ៉ុងផាត់មកដាក់ជាសម្បត្តិសាធារណរបស់រដ្ឋ ដើម្បីឱ្យប្រជាពលរដ្ឋក៏ដូចជាអាជីវករទូទៅ ធ្វើដំណើរឆ្លងកាត់ទៅមកដោយមិនយកលុយ។

សម្រាប់តម្លៃដែលអ្នកធ្វើដំណើរឆ្លងកាត់ត្រូវបង់កាលពីពេលកន្លងមក ក្នុងនោះឡានតូចលក្ខណៈគ្រួសារត្រូវបានបង់ប្រាក់ចំនួន48បាត ឬស្មើនឹង5000រៀល ឡានធំត្រូវបង់ប្រាក់ថ្លៃឆ្លងកាត់ចំនួន9000រៀល និងម៉ូតូត្រូវបង់ប្រាក់1400រៀល ប៉ុន្តែ បន្ទាប់ពីរដ្ឋាភិបាលប្រកាសបើកឱ្យប្រជាពលរដ្ឋឆ្លងកាត់មកដោយមិនបាច់បង់ប្រាក់មក ប្រជាពលរដ្ឋនៅតំបន់នោះមានការសប្បាយរីករាយ ដោយបាននាំគ្នាជិះរថយន្ត ម៉ូតូ ទៅ-មកកម្សាន្តនៅតំបន់នោះដូចជាតំបន់ទេសចរណ៍មាត់ទន្លេនៅរាជធានីភ្នំពេញយើងដែរ។

ស្ពានកោះកុងត្រូវបានគេមើលឃើញថា ជាហេដ្ឋារចនាសម្ព័ន្ធតភ្ជាប់ផ្លូវដែនសមុទ្រភាគខាងត្បូងរបស់កម្ពុជាដែលមានសក្តានុពលខាងការដឹកជញ្ជូនផ្លូវជិតជាងគេពីប្រទេសថៃឆ្លងកាត់កម្ពុជាចេញចូលទៅប្រទេសវៀតណាម។ ឯកឧត្តម វ៉ា ស៊ឹម សូរិយា បានមានប្រសាសន៍បន្ថែមថា «នេះគឺជាគោលនយោបាយតភ្ជាប់ទំនាក់ទំនងក្នុងតំបន់នៅក្នុងសមាហរណកម្មសេដ្ឋកិច្ចអាស៊ាន» ។

គួរបញ្ជាក់ថា ស្ពានកោះកុង (ឬស្ពានមិត្តភាពកម្ពុជា-ថៃ) មានប្រវែងប្រមាណជា2,000ម៉ែត្រ ដែលជាស្ពានឆ្លងកាត់សមុទ្រវែងជាងគេនៅក្នុងប្រទេសកម្ពុជា ត្រូវបានសាងសង់ឡើងដោយក្រុមហ៊ុនលីយ៉ុងផាត់កាលពីឆ្នាំ2002៕

November 10, 2017

កម្ពុជានឹងបង្កើត “ឧទ្យានជាតិសមុទ្រកោះរ៉ុង”

ភ្នំពេញ – ខណៈភ្ញៀវទេសចរជាតិ និងអន្ដរជាតិកំពុងមានការពេញនិយមក្នុងការដើរកម្សាន្ដនៅក្នុងតំបន់អេកូទេសចរណ៍នានាដែលបានបង្កើតការងារ និងប្រាក់ចំណូលដល់សហគមន៍នោះ ថ្មីៗនេះថ្នាក់ដឹកនាំនៃក្រសួងបរិស្ថានត្រៀមនឹងបង្កើតឧទ្យានជាតិសមុទ្រនៅកោះរ៉ុង ខេត្តព្រះសីហនុ ជាលើកដំបូងក្នុងប្រវត្ដិសាស្ដ្រកម្ពុជា។

ឯកឧត្តម សាយ សំអាល់ រដ្ឋមន្ដ្រីក្រសួងបរិស្ថានបានលើកឡើងថា រាជរដ្ឋាភិបាលបានសម្រេចបង្កើតឧទ្យានជាតិសមុទ្រកោះរ៉ុង ដែលគម្រោងនេះនឹងដំណើរការក្នុងពេលឆាប់ៗខាងមុខ។ ឯកឧត្ដមបន្ដថា ឧទ្យានជាតិសមុទ្រកោះរ៉ុង បង្កើតឡើងដើម្បីគ្រប់គ្រងធនធានធម្មជាតិនៅទីនោះ ការបង្កើតឧទ្យានជាតិសមុទ្រនេះក៏ជាលើកដំបូងក្នុងប្រវត្តិសាស្ត្រអេកូទេសចរណ៍នៃប្រទេសកម្ពុជាផងដែរ។

រដ្ឋមន្ដ្រីក្រសួងបរិស្ថានបន្ថែមថា បច្ចុប្បន្នយើងកំពុងតែពិនិត្យមើលលទ្ធភាពដៃគូសហការដើម្បីជួយអភិវឌ្ឍធនធានមនុស្ស (អ្នកស្រាវជ្រាវ អ្នកវិទ្យាសាស្ត្រ) ដើម្បីកំណត់ព្រំប្រទល់ និងផែនការការពារ និងអភិរក្សធនធានធម្មជាតិជីវចម្រុះនៅតំបន់សមុទ្រ និងការពង្រឹងសមត្ថភាពឧទ្យានុរក្ស ដើម្បីពង្រឹងបណ្តាញការពារសមុទ្រ។

កន្លងមកក្រសួងបរិស្ថានបានធ្វើកិច្ចការទៅលើការអភិរក្ស និងការពារធនធានធម្មជាតិទទួលបានជោគជ័យយ៉ាងល្អ។ ក្នុងនោះបង្កើតបានជាតំបន់ការពារធម្មជាតិចំនួន 49កន្លែង និងមានផ្ទៃដីរហូតដល់ជាង7.5 លានហិកតា។

តំបន់ឧទ្យានជាតិសមុទ្រ មានធនធានធម្មជាតិ ដូចជាផ្កាថ្ម ស្មៅសមុទ្រ ព្រៃកោងកាងដែលជាសក្តានុពលសម្រាប់ពពួកត្រីសមុទ្រ ជាពិសេស គឺសម្រាប់សត្វជិតផុតពូជ ដូចជាផ្សោតជាដើម។ នៅពេលកម្ពុជាបង្កើតតំបន់ឧទ្យានជាតិសមុទ្រកោះរ៉ុងបានហើយនោះ អាចថា វានឹងក្លាយជាតំបន់សក្ដានុពលមួយក្នុងការទាក់ទាញភ្ញៀវទេសចរជាតិ និងអន្ដរជាតិឱ្យមកកម្សាន្ដនៅទីនោះ ដែលអាចជួយលើកកម្រិតជីវភាពប្រជាជនទូទាំងខេត្ដឱ្យកាន់តែមានលក្ខណៈល្អប្រសើរឡើងបាន។

ជាមួយគ្នានេះ នាយកអង្គការសត្វព្រៃ និងរុក្ខជាតិអន្តរជាតិ (FFI) លោក Ahab CW Downer បានលើកឡើងពីជំហររបស់ខ្លួនក្នុងការធ្វើសហប្រតិបត្តិការដើម្បីរៀបចំគម្រោងបង្កើតឧទ្យានជាតិសមុទ្រកោះរ៉ុងនេះជាមួយក្រសួងបរិស្ថានថា តាមរយៈបទពិសោធ និងការងាររបស់អង្គការលោកដែលធ្លាប់បានធ្វើនៅតាមតំបន់កោះរយៈពេល4ឆ្នាំ ដែលបានកំពុងសហការជាមួយស្ថាប័នពាក់ព័ន្ធ នឹងធ្វើការអភិរក្សធនធានសមុទ្រនៅក្នុងតំបន់កោះរ៉ុងមួយនេះឱ្យទទួលបាននិរន្ដរភាពនៃតំបន់អេកូទេសចរណ៍៕

November 10, 2017

អ៊ីតាលី ជឿជាក់ខ្ពស់ក្នុងពេលជួប ស៊ុយអែត ក្នុង World Cup វគ្គ Playoff រាត្រីនេះ

លោក Gian Piero Ventura គ្រូបង្វឹកនៃក្រុមបាល់ទាត់ជម្រើសជាតិអ៊ីតាលី បានបញ្ជាក់កាលពីដើមសប្តាហ៍នេះថា រូបលោកផ្ទាល់ និងក្រុមរបស់លោកមានភាពច្បាស់លាស់ថា ក្រុមដែលមានរហស្សនាមថា Azzurri មួយនេះនឹងឈ្នះកៅអីដើម្បីទៅធ្វើការប្រជែងដណ្តើមពាន World Cup ជាលើកទី5 ក្នុងប្រទេសរុស្ស៊ី នៅឆ្នាំក្រោយ ខណៈដែលពួកគេកំពុងត្រៀមធ្វើការប្រកួតវគ្គ Playoff ជាមួយនឹងក្រុមជម្រើសជាតិស៊ុយអែតនៅរាត្រីនេះ។

លោក Ventura បានប្រាប់សន្និសីទសារព័ត៌មាននៅឯទីលានហ្វឹកហាត់របស់ក្រុមនៅឯតំបន់ Coverciano ក្នុងទីក្រុង Tuscany ថា៖ «វាពិតជាពេលវលាដ៏សំខាន់សម្រាប់ខ្ញុំ សម្រាប់អាជីពខ្ញុំ និងសម្រាប់កីឡាកររបស់ខ្ញុំ។ ខ្ញុំមិនគិតពីការមិនអាចឆ្លងផុតវគ្គជម្រុះឡើយ។ ពិតណាស់ យើងនឹងទៅប្រទេសរុស្ស៊ី»។ ក្រុមជម្រើសជាតិអ៊ីតាលី នឹងធ្វើដំណើរទៅកាន់ទឹកដីរបស់ស៊ុយអែត ដើម្បីធ្វើការប្រកួតជើងទី1 នៃការប្រកួតវគ្គ Playoff របស់ពួកគេនៅថ្ងៃសុក្រនេះ ក្នុងទីក្រុង Stockholm ខណៈដែលការប្រកួតជើងទី2 នឹងត្រូវប្រព្រឹត្តទៅនាកីឡដ្ឋាន San Siro ក្នុងទីក្រុង Milan នៅថ្ងៃចន្ទ សប្តាហ៍ក្រោយ។ លោក Ventura វ័យ69ឆ្នាំ ដែលបានចូលកាន់តំណែងកាលពីខែមិថុនា ឆ្នាំ2016 នៅពេលដែលលោក Antonio Conte បានចាកចេញដើម្បីដឹកនាំក្លិប Chelsea នោះ បានបញ្ជាក់ថា៖ «ខ្ញុំបានរកឃើញក្រុមប្រកបដោយសុច្ឆន្ទៈដ៏អស្ចារ្យ និងលើកទឹកចិត្តមួយ។ ខ្ញុំមានអារម្មណ៍ស្ងប់ ពីព្រោះខ្ញុំមានកីឡាករអាចលេងបាន ហើយពីព្រោះអ៊ីតាលី តែងតែបោះជំហានទៅមុខក្នុងដំណាក់កាលដ៏សំខាន់ៗបែបនេះជានិច្ច»។

ស្របពេលជាមួយគ្នានេះ ខ្សែការពារពោរពេញដោយបទពិសោធ Leonardo Bonucci បាននិយាយថា៖ «យើងជាអ៊ីតាលី ហើយការអវត្តមានក្នុង World Cup មិនមែនជាជម្រើសមួយរបស់យើងស្រេចទៅហើយ»។ ការប្រកួតនេះនៅរាត្រីនេះនឹងចាប់ផ្តើមនៅម៉ោង2:45ទៀបភ្លឺ៕

ប្រភពពី៖ Sky Sports

November 10, 2017

Author: វល័ក្ខ