វល័ក្ខ - La Reine Media

ផែនការចំណាយថវិកាជាតិកើនឡើងខ្ពស់ ខណៈ IMF ព្រមានពីវិបត្តិហិរញ្ញវត្ថុនៅកម្ពុជា

ភ្នំពេញ៖ សម្រាប់ឆ្នាំ2018 ចំណាយសរុបថវិការដ្ឋ ឬចំណាយសរុបថវិកាជាតិត្រូវបានរដ្ឋគ្រោងចំនួន 24,375,102 លានរៀល កើនឡើងប្រមាណជា 24.59% នៃផលិតផលសរុបក្នុងស្រុក(ផសស) គឺមានកំណើន15,2% ធៀបនឹងច្បាប់ឆ្នាំ2017ដែលជាហេតុធ្វើឱ្យស្ថាប័នមូលនិធិរូបិយវត្ថុអន្តរជាតិ (IMF)អំពាវនាវឱ្យរដ្ឋាភិបាលកម្ពុជាត្រៀមខ្លួនទប់ស្កាត់វិបត្តិហិរញ្ញវត្ថុរបស់ខ្លួន។

យោងតាមសេចក្តីព្រាងច្បាប់ថវិកាជាតិឆ្នាំ2018 របស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ចំណាយសំខាន់ៗរួមមានៈ

1.គឺចំណាយលើចរន្តថវិការដ្ឋមានចំនួន 15,945,218 លានរៀលស្មើនឹង16.09% នៃផសស គឺមានកំណើន15.6% ធៀបនឹងឆ្នាំ2017។

និង 2.ចំណាយមូលធនថវិការដ្ឋមានចំនួន 8,429,684 លានរៀលត្រូវជា 8.5% នៃផសស ដែលមានកំណើន14.6% ធៀបនឹងច្បាប់ឆ្នាំ2017។

របាយការណ៍ដដែលបង្ហាញថា ថវិកាឆ្នាំ2018មានទិសដៅប្រើប្រាស់ជាយុទ្ធសាស្ត្រកំណត់ចំណាយថវិកាជាតិឱ្យស្ថិតក្នុងកម្រិតចំនួន 23,428,298 លានរៀលត្រូវជា23.64% នៃផសស មានកំណើន16.1% ធៀបនឹងឆ្នាំ2017 ដែលក្នុងនោះចំណាយចរន្តថ្នាក់ជាតិមានចំនួន 15.218.166 លានរៀល និងចំណាយមូលធនថ្នាក់ជាតិមានចំនួន 8,210,132លានរៀលដែលជាថវិកាចំណាយទៅលើប្រាក់ខែ និងប្រាក់ឧបត្ថម្ភមន្ត្រីរាជការ។ ជារួមនៅឆ្នាំ2018 បៀវត្សរ៍អប្បបរមារបស់មន្ត្រីរាជការស៊ីវិល និងកងកម្លាំងប្រដាប់អាវុធត្រូវបានកើនឡើងជិត3ដង ធៀបនឹងឆ្នាំ2013។

ជាមួយគ្នានេះ ថវិកានេះនឹងត្រូវបែងទៅលើការចំណាយមិនមែនបុគ្គលិកចំនួន 7,303,243 លានរៀល មានសមាមាត្រស្មើនឹង 48% នៃចំណាយថវិកាថ្នាក់ជាតិ ត្រូវជា 7.37% នៃផសស គឺមានកំណើន16.9% ធៀបនឹងច្បាប់ឆ្នាំ2017 ហើយបានវិភាជដោយផ្អែកលើតម្រូវការ និងអាទិភាពចាំបាច់លើវិស័យរដ្ឋនានា ដូចជារដ្ឋបាលទូទៅ វិស័យការពារជាតិ សន្តិសុខសណ្តាប់ធ្នាប់ វិស័យសង្គមកិច្ច វិស័យសេដ្ឋកិច្ច។

និងការចំណាយអាទិភាពមួយទៀតគឺ ត្រូវបានគ្រោងចំនួន 8,210,132 លានរៀល មានសមាមាត្រស្មើនឹង 35,0% នៃចំណាយថវិកាថ្នាក់ជាតិសរុបត្រូវជា 8.28% នៃផសស គឺមានកំណើន 15.1% ធៀបនឹងច្បាប់ឆ្នាំ2017។ ចំណាយនេះមានគោលដៅផ្តល់ហិរញ្ញប្បទានដល់គម្រោង/ ក្នុងកម្មវិធីវិស័យអាទិភាព ដោយផ្តោតទៅលើការទ្រទ្រង់កំណើនសេដ្ឋកិច្ច ការលើកកម្ពស់ភាពប្រកួតប្រជែង និងផលិតភាពសេដ្ឋកិច្ច។

ពាក់ព័ន្ធទៅលើការចំណាយថវិការដ្ឋខាងលើ ត្រូវបានមូលនិធិរូបិយវត្ថុអន្តរជាតិ (IMF) កម្ពុជាគួរត្រៀមខ្លួនក្នុងលក្ខខណ្ឌដែលប្រឈមនឹងវិបត្តិហិរញ្ញវត្ថុ ដោយសារកំណើនសេដ្ឋកិច្ចធ្លាក់ចុះ ដោយសាររដ្ឋាភិបាលកម្ពុជាបានដំឡើងប្រាក់បៀវត្សរ៍ដល់មន្ត្រីរាជការ និងការចំណាយសម្រាប់ការរៀបចំបោះឆ្នោតក្រុមប្រឹក្សាឃុំ-សង្កាត់ក្នុងឆ្នាំ2017 បានធ្វើឲ្យចំណាយខ្ពស់ជាងចំណូល។ ការចំណាយលើសប្រាក់ចំណូល ជាហេតុនាំឱ្យមានឱនភាពប្រចាំឆ្នាំធ្លាក់ចុះ ដោយសារផលិតផលក្នុងស្រុកសរុប GDP ក្នុងឆ្នាំ2016 ធ្លាក់ចុះ 2.8% បើប្រៀបធៀបទៅនឹងឆ្នាំមុនគឺអត្រា1.6%។ បន្ថែមពីនេះគឺដោយសារការធ្លាក់ចុះនៃវិនិយោគិនបរទេស។

ចំពោះចំណូលក្នុងប្រទេស ថវិការដ្ឋត្រូវបានគ្រោងចំនួនតែ18,587,003លានរៀលចំណែកចំណាយសរុបថវិការដ្ឋត្រូវគ្រោងដល់ទៅ 24, 375,102លានរៀលដែលបង្ហាញថា ចំណាយធំជាងចំណូល។ យ៉ាងណាក៏ដោយក្រសួងសេដ្ឋកិច្ចអះអាងថា ការរៀបចំថវិកាឆ្នាំ2018 ទោះបីជួបប្រទះនឹងបញ្ហាប្រឈមនឹងហានិភ័យមួយចំនួនក្តី ក៏បញ្ហាទាំងអស់ត្រូវបានដោះស្រាយ ហើយថវិកាត្រូវបានវិភាជជាឧបករណ៍សម្រាប់អាទិភាពគោលនយោបាយសំខាន់ជាសារវ័ន្ត៕

November 13, 2017

តម្រេកតណ្ហាចេញមកពីណា?

គេតែងច្រើននិយាយថាចំណុច G គឺជាកន្លែងសំខាន់បំផុតនៅក្នុងប្រតិបត្តិការសិច ឬតណ្ហាផ្លូវភេទសម្រាប់នារីៗ នោះគឺឆ្តេញ (Clitoris)។ ប៉ុន្តែ តើ “របស់” នោះនៅឯណា? ហេតុអ្វីបានជាអ្នកស្រាវជ្រាវឱ្យតម្លៃខ្ពស់មេ្ល៉ះ ខណៈពេលដែលមនុស្សភាគច្រើនមិនបានយល់ដឹងច្បាស់ពីវាផងនោះ?តាមពិតទៅចំណុច G ឬឆ្ដេញនេះ វាស្ថិតនៅក្រោមឆ្អឹងថ្ងាស់នៃប្រដាប់ភេទ ប៉ុន្តែបើសម្លឹងមើលពីក្រៅវាដូចជាឡេវអាវមួយរាងពើតឡើងបន្តិច។ នៅក្នុងនោះមានផ្ទុកនូវចុងសរសៃប្រសាទដ៏ច្រើនដែលអាចឡើងរឹង ហើយតម្លើងទំហំផ្ទៃដល់ទៅទ្វេដង។ ថ្វីដ្បិតអត្ថបទមួយនេះ អាចទៅហាក់បីដូចជាពិបាកស្ដាប់ ឬអាសអាភាសបន្ដិចសម្រាប់មនុស្សដែលមានចរិតរម្យទម ប៉ុន្ដែទោះជាយ៉ាងណា វាក៏មានប្រយោជន៍ច្រើនសម្រាប់ជីវិតជាគូរបស់លោកអ្នកដែលចាំបាច់គូតែដឹង។

តាមការពិសោធ ចំណុច G (Clitoris) ថ្វីបើវាតូច ហើយកប់ចូលក្នុងជ្រៅក៏ដោយ តែវាត្រូវបានធ្វើការស្រាវជ្រាវវិភាគយ៉ាងច្រើនពីសមត្ថភាពដែលនាំមកនូវតម្រេកតណ្ហាកំពូលរបស់នារី។ លោកវេជ្ជបណ្ឌិត និងជាអ្នកតណ្ហាវិទ្យាសញ្ជាតិបារាំង Gerard Leleu បានសរសេរសៀវភៅដ៏ល្បីៗជាច្រើនពីតណ្ហាវិទ្យារហូតដល់ថ្នាក់គេហៅគាត់ថា ជាអ្នកនាំពាក្យរបស់ក្តីទន្ទឹងរង់ចាំរបស់ស្ត្រីទាំងឡាយ ខណៈដែលលោកបានចំណាយពេលវេលាសិក្សាយ៉ាងល្អិតល្អន់អំពីវា។នៅក្នុងនិក្ខេបបទស្រាវជ្រាវនោះ លោកបានសន្និដ្ឋានថា ឆ្តេញ ឬ G គឺជាផ្នែកដ៏អស្ចារ្យមួយដែលមិនត្រឹមតែនាំមកនូវអារម្មណ៍ត្រេកត្រអាលមួយភ្លែតប៉ុណ្ណោះទេ តែវាបានស្រោចស្រពទៅលើផ្លូវភេទស្ត្រីឱ្យមាំមួនទៀតផង។ ដូច្នេះលោកមិនស្តីបន្ទោសទៅលើការ “ស្វ័យសម្រេចកាម” របស់នារីៗទេ ថែមទាំងចាត់ទុកថា នេះជាទង្វើស្វែងយល់ពីខ្លួនឯងរាវរកឃើញនូវចំណុចត្រេកត្រអាលដែលត្រូវបានលាក់កំបាំង។ ជាក់ស្តែងមានកំណត់ត្រាថា មានស្ត្រីប្រមាណ95% អាចឡើងដល់ចំណុចកំពូលក្នុងរង្វង់តែប៉ុន្មាននាទីក្រោយពីត្រូវបានរំញោចដោយខ្លួនឯង។ នេះឯងក៏ជាសមាមាត្រក្នុងការរួមភេទជាមួយដៃគូ ប្រសិនបើដៃគូអនុវត្តបាននូវការ “បើកឆាក” ត្រឹមត្រូវតាមបទដ្ឋាន “រំញោច” នោះ។ ប្រការគួរឱ្យសោកស្តាយគឺបុរស ដើមទ្រូង5ហត្ថជាច្រើនមិនអាចយល់នូវកាតព្វកិច្ចសំខាន់មួយនេះបានទេ។

បើតាមលោកវេជ្ជបណ្ឌិត Gerard Leleu បានឱ្យដឹងទៀតថា ស្ត្រីគ្រប់រូបសុទ្ធសឹងមាន“ពហុកំពូល” ពីទីតាំងបញ្ចេញនូវអារម្មណ៍ត្រេកត្រអាល។ ស្ត្រីពុំត្រឹមតែមានអារម្មណ៍ត្រេកត្រអាលនៅត្រង់ចំណុចឆ្តេញ (Clitoris) ប៉ុណ្ណោះទេ តែវានៅរួមទាំងទ្វារមាសផងដែរ។ ទំនាក់ទំនងរវាងចំណុចត្រេកត្រអាលទាំង2នេះមានភាពស្អិតរមួតណាស់។ ប្រសិនបើឆ្តេញដើរតួនាទីដាស់ “ទេពអប្សរក្នុងព្រៃឱ្យភ្ញាក់” នោះទ្វារមាសគឺជាដំណើរឈានទៅកាន់តម្រេកកំពូល។ ប្រសិនបើអ្នកចង់ទទួលបានផលត្រេកត្រអាលទាំង2នេះវាតម្រូវឱ្យមានការចែករំលែក និងស្វែងយល់ពីគ្នា។ ការសិក្សាស្រាវជ្រាវរបស់បណ្ឌិតLeleu គឺជាសារមួយផ្ញើដល់គូស្នេហ៍ទាំងឡាយថា ការនៅស្ងៀម ឬអៀនខ្មាសគឺជាទង្វើខុសឆ្គងហើយវាក៏ជាការគ្រវាត់ចោលដោយខ្លួនឯងនូវសិទ្ធិទទួលបានសុភមង្គលក្នុងតម្រេកតណ្ហានៃអាពាហ៍ពិពាហ៍៕

November 13, 2017

ខ្យងខ្ចប់សាច់ជ្រូកចិញ្ច្រាំស្លឹកគ្រៃ

បច្ចុប្បន្ននេះ ខ្យងស្រែ ឬខ្យងបឹងត្រូវបានក្លាយទៅជាប្រភេទអាហារសម្រន់ ឬច្នៃចេញជាមុខម្ហូបសម្រាប់ទទួលទានជាមួយអាហារពេលធំៗយ៉ាងមានប្រជាប្រិយភាព រហូតមានទីតាំងខ្លះបានសម្រេចជ្រើសយកពាក្យថា “ខ្យង” មកធ្វើជាយីហោអាហារដ្ឋានថែមទៀតផង។ ដោយឡែកពេលនេះ ដោយសម្លឹងឃើញពីការនិយមចូលចិត្តទទួលទានពីសំណាក់មនុស្សទូទៅ ជាពិសេសអ្នករស់នៅក្នុងតំបន់ទីប្រជុំជននៃរាជធានីភ្នំពេញ ភោជនីយដ្ឋានលក្ខណៈខ្មែរ ដែលស្ថិតនៅអគារលេខ 81 E2 (ជាន់ទី2) តាមផ្លូវ ព្រះមុនីវង្ស (ទល់មុខធនាគារ កាណាឌីយ៉ា) ខណ្ឌដូនពេញ រាជធានីភ្នំពេញ ដែលទើបតែចាប់បើកដំណើរការបម្រើសេវាកម្មម្ហូបអាហារបែបអ្នករស់នៅតាមដងទន្លេមេគង្គ រួមមាន អាហារបែបជនជាតិខ្មែរ វៀតណាម ថៃ ឡាវ និងចិននោះ បានយកខ្យងមកច្នៃធ្វើជាអាហារដ៏មានរសជាតិឈ្ងុយឆ្ងាញ់ប្លែក ជាប់ចិត្ត ក្រោយគំនិងច្នៃប្រឌិតរបស់មេចុងភៅជាជនជាតិខ្មែរ គឺ មុខម្ហូប “ខ្យងខ្ចប់សាច់ជ្រូកចិញ្ច្រាំស្លឹកគ្រៃ”។

គ្រឿងផ្សំ
• ខ្យង
• សណ្ដែកដីលីង
• សាច់ជ្រូកចិញ្ច្រាំ
• ស្លឹកគ្រៃ
• ខ្ទឹមស
• ខ្ទឹមក្រហម
• ទឹកជ្រលក់
រសជាតិជូរ ផ្អែម ហឹរ

របៀបចម្អិន
បើទោះបីជាវាជាអាហារដែលមានរសជាតិឈ្ងុយឆ្ងាញ់ប្លែកមាត់ និងទទួលបានការចូលចិត្តទទួលទានពីសំណាក់អតិថិជនបែបនេះក៏ដោយ ប៉ុន្តែសម្រាប់របៀបធ្វើ ឬវិធីចម្អិនវិញហាក់មិនពិបាកនោះឡើយ ដោយលោកអ្នកក៏អាចធ្វើនៅតាមលំនៅឋានផ្ទាល់ខ្លួនក៏បាន។ ជាដំបូង លោកអ្នកគ្រាន់តែរកទិញខ្យងស្រស់ល្អ (ខ្យងនៅរស់) មកលាងសម្អាត រួចចំហុយឱ្យឆ្អិន។ បន្ទាប់មកយកសាច់ជ្រូកចិញ្ច្រាំ សណ្ដែកដីលីង ខ្ទឹមស ខ្ទឹមក្រហម រួមជាមួយសាច់ខ្យងដែលបានចម្អិន មកចិញ្ច្រាំបញ្ចូលគ្នា រួចច្រកចូលទៅក្នុងសម្បកខ្យង ហើយធ្វើការចម្អិន ដោយចំហុយសាជាថ្មី ដោយដាក់គល់ស្លឹកគ្រៃចូលជាមួយ ដើម្បីទទួលបានក្លិនឈ្ងុយប្រហើរគួរឱ្យចង់ទទួលទានជាការស្រេច។ លុះពេលទទួលទាន លោកអ្នកគ្រាន់តែធ្វើទឹកជ្រលក់ដែលមានរសជាតិជូរ ផ្អែមល្មម ហើយម្ទេសហឹរៗតាមចំណូលចិត្ត ឬអាចទិញទឹកត្រីម្ទេស (ទឹកត្រីកោះកុង) មកទទួលទានជាមួយក៏បាន។ ឃើញទេ! ងាយៗ ប៉ុន្តែអាចទទួលបានអាហារចម្អិនពីសាច់ខ្យងយ៉ាងឆ្ងាញ់ជក់មាត់ទទួលទានទៅហើយ។ សូមសាកល្បងធ្វើទាំងអស់គ្នាណា៎…៕

November 13, 2017

កម្ពុជារំពឹងទទួលបានទេសចរជប៉ុន 30ម៉ឺននាក់ នៅឆ្នាំ 2020

នៅខែមករា ឆ្នាំ2018 ខាងមុខនេះ ជប៉ុនគ្រោងនឹងបើកស្ថានកុងស៊ុលរបស់ខ្លួនប្រចាំនៅខេត្តសៀមរាប ដើម្បីសម្រួល និងពង្រឹងបន្ថែមនូវភាពជាដៃគូយុទ្ធសាស្ត្ររវាងកម្ពុជា-ជប៉ុន និងបង្កើនកំណើនភ្ញៀវទេសចរជប៉ុនមកកាន់កម្ពុជា។

ឯកឧត្ដមថោង ខុន រដ្ឋមន្ដ្រីក្រសួងទេសចរណ៍ បានលើកឡើងក្នុងពិធីបើកពិព័រណ៍ទេសចរណ៍ជប៉ុនលើកដំបូង នឹងការប្រារព្ធខួប1ឆ្នាំនៃការហោះហើរត្រង់មកកាន់កម្ពុជារបស់ក្រុមហ៊ុនអាកាសចរណ៍ ANA ថា តាមរយៈលទ្ធផលជោគជ័យនៃដំណើរទស្សនកិច្ចរបស់ប្រមុខរដ្ឋាភិបាលកម្ពុជាទៅកាន់ប្រទេសជប៉ុនកាលពីពេលកន្លងទៅ កាន់តែធ្វើឱ្យជប៉ុនក្លាយជាដៃគូវិនិយោគពាណិជ្ជកម្ម ទេសចរណ៍ និងជាម្ចាស់ជំនួយដ៏ធំមួយសម្រាប់កម្ពុជា។

រដ្ឋមន្ដ្រីក្រសួងទេសចរណ៍បន្ដថា នៅក្នុងឆ្នាំ 2016 កន្លងមកវិនិយោគទុនជប៉ុននៅកម្ពុជាបានកើនឡើងដល់ចំនួនជាង 800 លានដុល្លារ ដែលអាចបង្ហាញឱ្យឃើញពីចំណុចវិជ្ជមាន និងការជឿជាក់យ៉ាងមុតមាំថា ប្រទេសទាំងពីរនឹងនៅតែបន្តរួមគ្នាពង្រឹង និងពង្រីកទំនាក់ទំនងដ៏ល្អនាពេលអនាគតប្រកបដោយភាពជឿទុកចិត្តគ្នា។

ឯកឧត្ដមថោង ខុន បានបន្ដថា នៅឆ្នាំ 2016 កម្ពុជាទទួលបានទេសចរអន្តរជាតិជាង5លាននាក់ ក្នុងនោះទេសចរជប៉ុនមកកម្ពុជាមានចំនួនជាង19ម៉ឺននាក់។ តាមការព្យាករកម្ពុជានឹងទទួលបានទេសចរអន្តរជាតិប្រមាណ 5.6លាននាក់នៅឆ្នាំ 2017 នេះ និងប្រមាណ 7លាននាក់នៅឆ្នាំ 2020 ក្នុងនោះកម្ពុជាសង្ឃឹមថា នឹងរៀបចំឱ្យមានការទាក់ទាញដើម្បីទទួលបានភ្ញៀវទេសចរជប៉ុនប្រមាណ 30ម៉ឺននាក់នៅឆ្នាំ2020។ រយៈពេល 9ខែនៃឆ្នាំ2017 នេះ យើងទទួលបានទេសចរអន្តរជាតិជាង 3.9លាននាក់ក្នុងកំណើន 11.5% ក្នុងនោះទេសចរជប៉ុនមានចំនួនជាង14ម៉ឺន 6ពាន់នាក់ ស្ថិតក្នុងកំណើន6.8% ។

រដ្ឋមន្រី្ដក្រសួងទេសចរណ៍ ថោង ខុន បានបញ្ជាក់ថា កំណើនដ៏ល្អនៃការមកដល់របស់ទេសចរអន្តរជាតិ ពិសេសកំណើននៃទេសចរជប៉ុនមកទស្សនាកម្ពុជា គឺពិតជាមិនអាចកាត់ផ្តាច់ចេញពីការបង្កើនការតភ្ជាប់ និងការសម្រួលការធ្វើដំណើររវាងប្រទេសទាំងពីរបានឡើយ ដូច្នេះការហោះហើរដោយត្រង់ពីជប៉ុនមកកាន់កម្ពុជារយៈពេល1ឆ្នាំតាមរយៈក្រុមហ៊ុនអាកាសចរណ៍ ANA គឺពិតជាមានសារៈសំខាន់ខ្លាំងណាស់ក្នុងការជួយជំរុញឱ្យមានការធ្វើដំណើរត្រង់ពីជប៉ុនមកកម្ពុជាដែលជាការចូលរួម ជំរុញកំណើនទេសចរជប៉ុនមកកាន់កម្ពុជាផងដែរ៕

November 13, 2017

គន្លឹះសំខាន់3យ៉ាងជួយឱ្យសិចកាន់តែប្រសើរ

សម្រាប់តម្រូវការលើគ្រែគូស្នេហ៍រមែងមានពេលស្រណុកសុខស្រួលស្កប់ស្កល់ និងភាពខ្វះចន្លោះដែលបណ្ដាលមកពីអារម្មណ៍តានតឹងដូចជា សម្ពាធការងារ កម្លាំងថាមពលថមថយ និងបរិយាកាសជុំវិញជាដើម។ ដូច្នេះដើម្បីជំរុញឱ្យការប្រព្រឹត្តសកម្មភាពសិចប្រសើរឡើង សូមស្វែងយល់ជាមួយចំណុចខាន់ចំនួន3 ដែលមានប្រសិទ្ធភាពបង្កើនភាពល្អប្រសើរដល់ជីវិតសិចរបស់អ្នក ៖

របបអាហារប្រចាំថ្ងៃ
មនុស្សជាច្រើនតែងតែមើលរំលង ឬមិនបានខ្វាយខ្វល់ចំពោះបញ្ហានៃរបបអាហារដែលអាចជះឥទ្ធិពលដល់ជីវិតសិចនោះទេ។ ការកង្វះជីវជាតិ ឬបរិភោគអាហារមិនត្រឹមត្រូវអាចនាំទៅរកភាពកង្វះថាមពល ដែលឈានទៅរកការបញ្ចេញសមត្ថភាពនៅលើគ្រែជាមួយដៃគូមិនបានពេញលេញ។ ដូច្នេះដើម្បីកែខៃនូវចំណុចអវិជ្ជមាន អ្នកត្រូវគិតដល់ការទទួលទានអាហារឱ្យបានសមស្របជារៀងរាល់ថ្ងៃ។ ពាក្យថាសមស្របនេះ គឺសំដៅដល់បរិមាណអាហារល្មម និងមានតុល្យភាព ដែលអ្នកត្រូវទទួលទានច្រើនដងក្នុងមួយថ្ងៃ ដើម្បីបង្ការការនឿយហត់អស់កម្លាំង។ អាហារដែលសម្បូរដោយវីតាមីនកាបូនអីុត្រាត ផ្លែឈើស្រស់ៗ និងបន្លែពណ៌បៃតងគឺជាប្រភពនៃថាមពល។ បន្ថែមពីនេះ ធញ្ញជាតិ ខ្លាញ់ត្រី ប្រេងអូលីវ ប្រេងដូង និងផ្លែប៊័រ ក៏ជាប្រភពដ៏ល្អក្នុងការផ្ដល់កម្លាំងថាមពលសិចដល់
រាងកាយយ៉ាងប្រសើរផងដែរ។

គ្រប់គ្រងស្ត្រេស និងធ្វើឱ្យចិត្តស្ងប់
ស្ដ្រេសជារបាំងធំបំផុតក្នុងបញ្ហាលើគ្រែ។ កាលណាអ្នកមានអារម្មណ៍តានតឹងខ្លាំងពីការងារនោះ អ្នកប្រាកដជាមិននឹកនាដល់សិចឡើយ។ដូច្នេះការកាត់បន្ថយស្ត្រេស និងធ្វើឱ្យចិត្តស្ងប់ជាការល្អក្នុងការកែខៃជីវិតសិចរបស់អ្នក។ តើគួរធ្វើបែបណា? ដំណោះស្រាយដ៏ល្អគឺ បែងចែកពេលវេលាឱ្យបានច្បាស់លាស់។ ចាត់ទុកការងារជារឿងមួយ និងសុភមង្គលគ្រួសារជារឿងផ្សេងគ្នា។ ដូច្នេះមិនថាអ្នកមានបញ្ហាពីកន្លែងការងារក៏ដោយនៅពេលប្រតិបត្តិការជាមួយដៃគូត្រូវគិតពីភាពសុខស្រួលរបស់ដៃគូជាង ដោយបំភ្លេចចោលរឿងការងារមួយឡែកសិន។

ហាត់ប្រាណជាមួយដៃគូ
ការហាត់ប្រាណតាមរយៈសកម្មភាពផ្សេងៗជាមួយដៃគូ ដូចជា ការរត់ ការជិះកង់ ឬការហាត់កាយសម្ពន្ធរួមគ្នាវាអាចនឹងជួយជំរុញឱ្យរាងកាយមាំមួន និងពង្រឹងចំណង់ផ្លូវភេទបាន។ តាមរយៈការហាត់ប្រាណទាំងនេះអ្នកនឹងកើតមានចំណង់ផ្លូវភេទទ្វេដង ហើយអាចឱ្យអ្នកបញ្ចេញសមត្ថភាពបានប្រសើរនៅក្នុងសមរភូមិក្ដៅសាច់ជាមួយដៃគូ ដោយសារការហាត់ប្រាណជួយបញ្ចេញសារជាតិគីមី និងអ័រម៉ូនមិនល្អចេញពីក្នុងរាងកាយមកខាងក្រៅ។
សូមចាប់ផ្តើមអនុវត្តពីពេលនេះទៅ នោះអ្នកនឹងបានដឹងពីប្រសិទ្ធភាពនៃគន្លឹះទាំង3ខាងលើនេះជាក់ជាមិនខាន៕

November 13, 2017

មុនចេញរកស៊ីគួរប្រើសមត្ថភាពរបស់ខ្លួនឯងឱ្យអស់សិន

សហគ្រិនភាព ជាអ្វីដែលមនុស្សសម័យថ្មីចាប់អារម្មណ៍បំផុត ព្រោះថា ភាពជាសហគ្រិនគឺអាចឱ្យគេកំណត់វាសនាជីវិតដោយផ្ទាល់ខ្លួន អាចជួយឱ្យអ្នកដទៃមានការងារធ្វើ និងហើយថែមទាំងអាចជួយសង្គមជាតិបានទៀតផង។

ដោយសារតែចរន្តនៃការកែប្រែខ្លួនពីអ្នកធ្វើការងារឱ្យគេ មកក្លាយជាម្ចាស់អាជីវកម្មខ្លួនឯង បានធ្វើឱ្យមនុស្សមួយចំនួនជោគជ័យទាំងផ្នែកហិរញ្ញវត្ថុ ជីវិតគ្រួសារ និងកេរ្តិ៍ឈ្មោះក្នុងសង្គមធ្វើឱ្យយុវជនមួយចំនួនចាប់ផ្តើមបង្កើតអាជីវកម្មដោយខ្លួនឯង តែជាអកុសលអាជីវកម្មមួយចំនួនធំត្រូវបានបិទទៅវិញក្នុងរយៈពេលដ៏ខ្លី។

ពាក់ព័ន្ធនឹងបញ្ហានេះ លោក ឆាក់ សុជាតិ ម្ចាស់ក្រុមហ៊ុនសេដ្ឋីនី បានលើកឡើងថា មានមូលដ្ឋានគ្រឹះច្រើនដែលអាចជាចំណុចសំខាន់ៗសម្រាប់ការធ្វើជំនួញ តែក្នុងនោះការតាំងចិត្ត និងការប្រើប្រាស់ឱ្យអស់ពីសមត្ថភាពខ្លួនឯងជារឿងសំខាន់មួយដែលត្រូវយកចិត្តទុកដាក់សម្រាប់អ្នកដែលចង់ក្លាយជាសហគ្រិន។

លោក ឆាក់ សុជាតិ បាននិយាយថា៖ «អ្នករកស៊ី គឺជាអ្នកដែលមានការតស៊ូ និងប្រើប្រាស់សមត្ថភាពរបស់ខ្លួនបានច្រើនបំផុតតាមដែលអាចធ្វើទៅបាន។ តែមនុស្សទូទៅហាក់មិនបានខ្វល់ខ្វាយពីរឿងនេះទេ ព្រោះថា ពេលខ្លះពួកគេចង់បានរបស់ថ្មី ចង់បង្កើតអាជីវកម្មថ្មី តែរបស់ដែលគេមានរាល់ថ្ងៃនេះប្រើវាមិនអស់ផង តើនឹងបានរបស់ថ្មីមកពីណាកើត?»។

ចំណុចនេះ លោក សុជាតិ បានបញ្ជាក់ផងដែរថា នៅពេលដែលមនុស្សទូទៅ ឬបុគ្គលិកដែលមានបំណងចង់ប្រែខ្លួនពីអ្នកធ្វើការឱ្យគេទៅជាសហគ្រិន គាត់តែងតែស្រមៃឃើញរូបភាពធំៗហួសពីអ្វីដែលគាត់អាចធ្វើបាន បន្ទាប់មកក៏បរាជ័យ។ តាមពិតទៅ គន្លឹះសំខាន់ដើម្បីឈានទៅរកភាពជាសហគ្រិនជោគជ័យ ឬទទួលបានសមិទ្ធផលថ្មីក្នុងជីវិត គឺការប្រើប្រាស់សមត្ថភាពរបស់ខ្លួនឯងផ្ទាល់។

មនុស្សម្នាក់ៗមានសមត្ថភាពផ្ទាល់ខ្លួន ដូចជាអ្នកខ្លះពូកែទំនាក់ទំនង ពូកែនិយាយ ពូកែសរសេរ ឬពូកែផ្នែកបច្ចេកវិទ្យាជាដើម តែប្រសិនបើយើងមិនបានប្រើប្រាស់នូវបំណិនជីវិតទាំងអស់នោះឱ្យអស់ពីលទ្ធភាពទេ យើងក៏មិនអាចទទួលបាននូវភាពជោគជ័យដែរ។ លោកថា មនុស្សទូទៅ ចង់ក្លាយជាបុគ្គលដែលខ្លាំង មានរបស់ដែលមិនធ្លាប់មាន តែពួកគេមិនព្រមផ្លាស់ប្តូរឥរិយាបថផ្ទាល់ខ្លួន មិនព្រមខិតខំឱ្យខ្លាំង និងមិនព្រមធ្វើសកម្មភាពឱ្យបានច្រើនបំផុតតាមដែលអាចធ្វើទៅបានទេ តែបែរជានៅតែបន្តធ្វើរឿងដដែលៗ និងមិនព្រមខិតខំ។

លោក ឆាក់ សុជាតិ បាននិយាយផងដែរថា ៖ «ជាក់ស្តែង យើងទាំងអស់គ្នាសុទ្ធតែដឹងហើយពីរឿងមិនជួនគ្នាមួយ រវាងការយល់ខុសរបស់អ្នកគ្រប់គ្រង និងបុគ្គលិក។ អ្នកគ្រប់គ្រងគិតថា ទាល់តែបុគ្គលិកខំ ទើបដំឡើងប្រាក់ខែឱ្យ តែបុគ្គលិកបែរជាគិតថា ទាល់តែមេបើកប្រាក់ខែឱ្យទើបខំ ដោយភ្លេចគិតថា ជោគជ័យគ្រប់យ៉ាងពីមួយដំណាក់កាលទៅមួយដំណាក់កាល គឺអាស្រ័យលើការប្រឹងប្រែងរបស់គាត់ផ្ទាល់ដោយមិនស្ថិតលើបរិស្ថានខាងក្រៅ ឬអ្នកដទៃនោះទេ»។

សហគ្រិនខាងលើបានលើកឡើងផងដែរថា មនុស្សម្នាក់ៗមានសមត្ថភាពច្រើនហួសពីការស្មាន គ្រាន់តែពេលខ្លះពួកគេមិនដឹងខ្លួនថា គេខ្លាំងតែប៉ុណ្ណោះ ហេតុនេះជាដំណោះស្រាយសំខាន់ដែលគេអាចធ្វើបានគឺ ខំធ្វើឱ្យច្រើនបំផុតតាមដែលអាចធ្វើទៅបាន ទាំងនៅក្នុងការងារ ឬក្នុងអាជីវកម្ម។ នៅពេលដែលមនុស្សដាក់គោលដៅថា ចង់ធ្វើអ្វីមួយឱ្យរីកចម្រើន យើងត្រូវតែគិតឱ្យបានគ្រប់វិធី ហើយធ្វើយ៉ាងណាប្រើប្រាស់សមត្ថភាពផ្ទាល់ខ្លួនដើម្បីជម្នះគ្រប់ឧបសគ្គដែលកំពុងជួបប្រទះ ទីបំផុត ក្រោយទៅដល់គោលដៅ ឬក្លាយជាសហគ្រិនម្នាក់ យើងនឹងមើលឃើញថា យើងបានរកឃើញនូវសក្តានុពលដ៏ខ្លាំងក្លារបស់ខ្លួនឯងផ្ទាល់ហើយ៕

November 13, 2017

ប្រយោជន៍ថ្មីៗទៀតរបស់ថ្នាំអាស្ពីរីនដែលបងៗស្ត្រីមេផ្ទះមិនធ្លាប់ដឹង

របស់ប្រើប្រាស់នៅក្នុងផ្ទះនីមួយៗអាចមានប្រយោជន៍ច្រើនជាងដែលយើងធ្លាប់ដឹងទៅទៀត ដូចជា ថ្នាំអាស្ពីរីន(Aspirin) ជាដើម ដែលក្រៅពីសម្រាប់លេបព្យាបាលជំងឺហើយនោះ នៅអាចនាំយកមកច្នៃប្រើជាមួយនឹងការងារក្នុងផ្ទះបានទៀតផង មិនថាតែជួយកម្ចាត់ស្នាមកខ្វក់ ជួយឱ្យផ្កាក្នុងថូនៅស្រស់បានយូរ ការពារមេរោគផ្សិតនៅក្នុងសួនច្បារ និងផ្សេងៗទៀតជាច្រើន ដូច្នេះបើបងៗស្រី្តមេផ្ទះចង់ដឹងថា តើអាថ្នាំគ្រាប់តូចៗនោះអាចប្រើការអ្វីបានទៀតនោះ សូមតាមដានជាបន្តជាមួយឡារ៉ែនដូចតទៅ។

1- កម្ចាត់ស្នាមញើសជាប់នៅលើអាវពណ៌ស
សម្រាប់អ្នកដែលមិនហ៊ានទាញយកអាវពណ៌សមកពាក់ ព្រោះតែមានប្រឡាក់ស្នាមញើសរហូតធ្វើឱ្យបាត់បង់ទំនុកចិត្តលើខ្លួនឯងនោះ ចូរកិនថ្នាំអាស្ពីរីន2គ្រាប់ឱ្យម៉ដ្ឋ លាយជាមួយទឹកក្តៅឧណ្ហៗកន្លះពែង រួចយកមកបៀក
លាបលើបរិវេណដែលមានស្នាមប្រឡាក់ញើសនោះ ទុកចោលប្រមាណជា2-3ម៉ោង រួចហើយសឹមបោកសម្អាតតាមធម្មតា។
2- រក្សាភាពស្រស់ថ្មីរបស់ផ្កា
ចំណែករឿងបញ្ហាផ្កាដែលដោតតាំងលម្អនៅក្នុងថូឆាប់រុះរោយស្រពោននោះ មិនពិបាកទេ គ្រាន់តែកិនថ្នាំអាស្ពីរីន 2-3គ្រាប់ឱ្យម៉ដ្ឋ ហើយលាយជាមួយទឹកនៅក្នុងថូដាក់ផ្កានោះទៅ ផ្កាស្រស់ទាំងនោះនឹងនៅស្រស់បានយូរមិនខាន តែសូមកុំភ្លេចប្តូរទឹករៀងរាល់2-3ថ្ងៃម្តងផង។
3- កម្ចាត់មេរោគផ្សិតនៅក្នុងដីដំណាំ
ថ្នាំប្រភេទនេះមិនមែនត្រឹមតែជួយព្យាបាលជំងឺរបស់មនុស្សប៉ុណ្ណោះទេ តែនៅជួយកម្ចាត់មេរោគផ្សិតនៅក្នុងដីបានទៀតផង ដោយគ្រាន់តែលាយថ្នាំអាស្ពីរីនជាមួយទឹកក្នុងបរិមាណ1គ្រាប់ក្នុងទឹក1លិត្រ ហើយយកទៅស្រោចនៅ
លើដីដែលសម្បូរដោយមេរោគផ្សិតដាំអ្វីក៏មិនបាននោះទៅជាការស្រេច។ តែសូមប្រយ័ត្នក្នុងការប្រើថ្នាំនេះបន្តិច ព្រោះបើមានជាតិថ្នាំច្រើនពេកនឹងធ្វើឱ្យដំណាំងាប់ដើមបាន។
4- សម្អាតស្នាមច្រែះ
ស្នាមច្រែះក៏ជាបញ្ហាមួយដែលពិបាកកែដែរតែក៏មិនមែនថាគ្មានវិធីសម្អាតបាននោះដែរ បងៗស្ត្រីមេផ្ទះអាចសម្អាតបានដោយយកថ្នាំអាស្ពីរីនមកកិនឱ្យម៉ដ្ឋ(ប្រមាណជា 2-3គ្រាប់) បន្ទាប់មកយកទឹកមកស្រោចពីលើបរិវេណដែលមានស្នាមច្រែះនោះ រួចហើយរោយកម្ទេចថ្នាំនោះពីលើឱ្យសព្វ ទុកចោលប្រមាណ10នាទី រួចយកក្រណាត់អេប៉ុងជ្រលក់ទឹកដុសចេញ តែប៉ុណ្ណឹងជាការស្រេច។
5- ញ៉ុករន្ធ ឬស្នាមចោះរន្ធតូចៗនៅលើជញ្ជាំង
ការលុបបំបាត់ស្នាមចោះរន្ធតូចៗនៅលើជញ្ជាំងជារឿងងាយបំផុត មិនចាំបាច់ទៅទិញស៊ីម៉ងត៍សមួយបាវមកប្រើទេ គ្រាន់តែយកថ្នាំអាស្ពីរីន 4-5គ្រាប់មកកិនឱ្យក្លាយជាម្សៅ ហើយលាយជាមួយទឹកឱ្យខាប់ៗ រួចយកទៅបៀកបិទពីលើរន្ធ ឬស្នាមចោះរន្ធតូចៗនោះ ហើយទុកចោលរហូតដល់ស្ងួត យើងនឹងបានជញ្ជាំងរាបស្មើស្អាតដូចមុនបាត់ទៅហើយ។
6- ជាជំនួយការលាងសម្អាតបន្ទប់ទឹកពេលបន្ទាន់
បើសិនជាថ្ងៃនេះដល់ពេលត្រូវលាងសម្អាតបន្ទប់ តែទឹកសាប៊ូលាងបន្ទប់ទឹកស្រាប់តែអស់រលីងនោះ បងៗស្ត្រីមេផ្ទះមិនចាំបាច់ចេញទៅទិញភ្លាមៗទេ ព្រោះអាចប្រើថ្នាំអាស្ពីរីនជំនួសមួយគ្រាក៏បាន។ ចាប់ផ្តើមដោយការកិនថ្នាំអាស្ពីរីន 2-3គ្រាប់ ហើយលាយជាមួយទឹកក្តៅឧណ្ហៗ រួចលាងសម្អាតបន្ទប់ទឹកតាមវិធីធម្មតា នោះបន្ទប់ទឹកនឹងស្អាតឡើងវិញ គ្មានទាំងបន្សល់នូវកំណកសាប៊ូឱ្យឃើញទៀតផង។
7- បោកសម្អាតស្នាមប្រឡាក់ស៊ុតមាន់នៅលើខោអាវ
បងៗស្ត្រីមេផ្ទះកុំអាលគិតថា ពិបាកបោកឱ្យជ្រះណាស់ បើមិនទាន់បានសាកល្បងប្រើវិធីនេះ ដំបូងគឺកិនគ្រាប់ថ្នាំអាស្ពីរីនឱ្យម៉ដ្ឋ(ប្រមាណ1-2គ្រាប់) ហើយលាយជាមួយក្រែម អហ្វ ថារ៍-ថារ៍(Cream of Tartar ម្សៅដែលគេលាយជាមួយស៊ុតក្រឡុកដើម្បីឱ្យចៀនទៅឡើងប៉ោងល្អអាចរកទិញបានតាមហាង ផ្សារទំនើប) បន្តិចរួចចាក់ទឹកចូលទៅបន្តិច លាយឱ្យចូលគ្នាសព្វហើយយកទៅលាបពីលើស្នាមប្រឡាក់ស៊ុតលើខោអាវនោះ ទុកចោលប្រមាណ30នាទី។ នៅពេលគ្រប់កំណត់ម៉ោងហើយ ចូរស្រោចទឹកក្តៅឧណ្ហៗលាងល្បាយនោះចេញឱ្យអស់ មុននឹងយកទៅបោកគក់តាមប្រក្រតី៕

November 13, 2017

តំបន់ពិសេសរបស់ក្រុងកូឡាឡាំពួរ2កន្លែង ដែលអ្នកទេសចរមិនត្រូវរំលង

កូឡាឡាំពួរ គឺជាទីក្រុងដ៏ស្រស់ស្អាតមួយដែលស្ថិតនៅក្នុងក្រសែភ្នែកបណ្តាភ្ញៀវទេសចរចម្រុះជាតិសាសន៍នៅលើសាកលលោក ហើយក៏ជាក្រុងដែលធំជាងគេបំផុតប្រៀបបានទៅនឹងបេះដូងរបស់ប្រទេសម៉ាឡេស៊ីផងដែរ។ ជាមួយគ្នានេះ ទីក្រុងកូឡាឡាំពួរ ដែលពោរពេញទៅដោយរូបសម្រស់ឆើតឆាយលម្អទៅដោយផ្លូវកាត់ខ្វាត់ខ្វែង និងតួអគារខ្ពស់ៗស្កឹមស្កៃឈរបង្ហាញរាងក្នុងនាមជាមជ្ឈមណ្ឌលពាណិជ្ជកម្មលំដាប់កំពូលរបស់ពិភពលោកនោះ បានផ្ដល់នូវរសជាតិជីវិតថ្មីដល់បណ្តាភ្ញៀវទេសចរ តាមរយៈនៃការបង្ហាញពីការអភិវឌ្ឍយ៉ាងអស្ចារ្យនៃស្ថាបត្យកម្មសំណង់បែបទាន់សម័យ ក៏ដូចជាវប្បធម៌ដ៏យូរលង់របស់ខ្លួន រួមផ្សំនឹងភាពរួសារាយរាក់ទាក់របស់ប្រជាពលរដ្ឋ ក៏ដូចជាបានភ្លក្សអាហារបែបប្រពៃណីនៃជនជាតិភាគតិចប្រចាំតំបន់។ អ្វីដែលកាន់តែជារឿងអស្ចារ្យ និងមនភាពល្បីល្បាញស្ទើរទូទាំងសាកលលោកនោះ គឺតំបន់ទេសចរណ៍សំខាន់ចំនួន2ទីតាំង ដែលអ្នកទេសចរមិនត្រូវរំលងបាននោះ គឺបេះដូងរបស់ប្រទេសម៉ាឡេស៊ី ដែលតាំងខ្លួនជាមជ្ឈមណ្ឌលពាណិជ្ជកម្ម “ប៉មអគារភ្លោះ ប៉េត្រូណាស់” និង “ភ្នំបាទូ” ដែលជាជម្រុកនៃវប្បធម៌ និងជាតំបន់មានអំណោយផលពីធម្មជាតិជាមួយរូបភាពជារូងភ្នំរាប់រយកន្លែង។

ប៉មអគារភ្លោះ ប៉េត្រូណាស់ ប៉េត្រូណាស់ គឺជាអគារភ្លោះដ៏ធំ ខ្ពស់ស្កឹមស្កៃដែលមានកម្ពស់រហូតដល់170ម៉ែត្រ និងមានស្ពានឆ្លងពីតួអគារមួយទៅកាន់តួអគារមួយទៀត ហើយក៏ជាប់ចំណាត់ថ្នាក់ជាស្ពាន2ជាន់ ដែលខ្ពស់ជាងគេបំផុតក្នុងពិភពលោកផងដែរ។ នៅទីនេះ ត្រូវបានគេដាក់បម្រាមយ៉ាងម៉ត់ចត់ចំពោះអ្នកខ្លាចទីខ្ពស់ មិនអនុញ្ញាតឱ្យឡើងនោះឡើយ ប៉ុន្តែបើចំពោះអ្នកមានភាពក្លាហានមិនញញើតជាមួយអគារដ៏ខ្ពស់សន្លឹមមួយនេះ នឹងបានទស្សនាពីទិដ្ឋភាពដ៏ស្រស់ស្អាតនៃទីក្រុងកូឡាឡាំពួរទាំងមូល ជាពិសេសសម្រស់នាពេលរាត្រី ដែលពោរពេញទៅដោយពន្លឺភ្លើងពណ៌ចម្រុះនៅតាមអគារនានាក្នុងតំបន់។

ភ្នំបាទូ
រូងភ្នំបាទូ គឺជាទីសក្ការៈដ៏ពិសិដ្ឋសម្រាប់ពលរដ្ឋដែលកាន់សាសនាហិណ្ឌូដែលរស់នៅក្នុងប្រទេសម៉ាឡេស៊ី មានចម្ងាយប្រមាណជាង12គីឡូម៉ែត្រ ខណៈដែលអ្នកទាំងនោះសុទ្ធតែមានជំនឿជឿជាក់ថា រូងភ្នំបាទូ ជាកន្លែងដែលមានឫទ្ធិបារមីពូកែស័ក្តិសិទ្ធិបំផុត ហើយជារៀងរាល់ឆ្នាំ នៅពេលចូលដល់វេលាកំណត់អ្នកមានជំនឿរាប់ម៉ឺននាក់ តែងនាំគ្នាមកប្រារព្ធពិធីតាមទំនៀបទម្លាប់នៅទីនេះមិនដែលខាន។ ដោយឡែកសម្រាប់អ្នកដែលចង់ឡើងទៅទស្សនារូងភ្នំបែបអច្ឆរិយៈមួយនេះ ត្រូវធ្វើដំណើរដោយថ្មើរជើងតាមជណ្ដើរថ្មចំនួន272កាំ។ លុះក្រោយពេលឡើងទៅដល់គោលដៅនឹងបានឃើញពីភាពអស្ចារ្យជាច្រើន ដែលក្រៅពីមានរូងភ្នំធំៗចំនួន3 រូងភ្នំតូចៗរាប់សិបកន្លែង ថែមទាំងបានទស្សនារូបចម្លាក់យ៉ាងស្អេកស្កះក្នុងលក្ខណៈបែបសាសនាហិណ្ឌូ ជាពិសេសរូបសំណាកព្រះទេវៈយ៉ាងធំឈរចង្រឹងនៅចំពីមុខច្រកចូលដែលមានកម្ពស់ប្រមាណ42ម៉ែត្រ។
ចង់ដឹងថា តំបន់ទេសចរណ៍កម្សាន្តទាំង2ទីតាំងនេះមានទិដ្ឋាភាពបែបណា សូមទស្សនាកម្រងរូបភាពដូចតទៅ៕

November 13, 2017

Buffon ជំរុញអ៊ីតាលី កុំឲ្យភិតភ័យពេលប៉ះ ស៊ុយអែត រាត្រីនេះ

អ្នកចាំទី Gianluigi Buffon បានបញ្ជាក់ថា ក្រុមបាល់ទាត់ជម្រើសជាតិអ៊ីតាលី មិនត្រូវស្លន់ស្លោឡើយ ខណៈដែលពួកគេនឹងត្រូវប្រជែងគេចឲ្យផុតពីការអវត្តមានក្នុងយុទ្ធនាការ World Cup ជាលើកទី1ក្នុងរយៈពេល60ឆ្នាំ ក្រោយពីការរងបរាជ័យ 1-0 ក្រោមស្នាដៃក្រុមជម្រើសជាតិស៊ុយអែត ក្នុងជើងទី1នៃវគ្គ Playoff បានធ្វើឲ្យពួកគេស្ថិតយ៉ាងប្រកៀកក្នុងការធ្លាក់ចេញ។

ប្រធានក្រុម Buffon ដែលកំពុងតែសម្លឹងរកការបង្ហាញខ្លួនក្នុងយុទ្ធនាការ World Cup ជុំផ្តាច់ព្រ័ត្រ ជាលើកទី6 របស់ខ្លួននៅរុស្ស៊ីនោះ គឺជាកីឡាករម្នាក់ក្នុងចំណោមកីឡាករដែលនៅតែមានវត្តមានពីក្រុមដែលបានឈ្នះពាន World Cup ឆ្នាំ2006។ ប៉ុន្តែ ទម្រង់លេងរបស់ក្រុមដែលមានរហស្សនាមថា Azzurri មួយនេះ ត្រូវបានចាត់ទុកថា ជាទម្រង់លេងមួយដ៏អន់ និងមិនច្បាស់លាស់ដែលធ្វើឲ្យអ៊ីតាលី ត្រូវតែធ្វើឲ្យបានល្អក្នុងការប្រកួតជើងទី2នៅរាត្រីនេះ ក្នុងទីក្រុង Milan ដើម្បីគេចឲ្យផុតពីការខកខានក្នុងការឈ្នះកៅអីទៅលេងក្នុងយុទ្ធនាការ World Cup ជុំផ្តាច់ព្រ័ត្រ ជាលើកទីដំបូងបើគិតចាប់តាំងពីឆ្នាំ1958មក។ Buffon ដែលបានបណ្តោយឲ្យមានគ្រាប់បាល់ចូលទីរបស់ខ្លួនពីការស៊ុតរបស់កីឡាករបម្រុង Jakob Johansson នៃក្រុមស៊ុយអែតក្រោយពីប្លាតចេញពីជើងរបស់ខ្សែការពារ Daniele De Rossi នោះ បាននិយាយថា៖ «យើងត្រូវតែមានអារម្មណ៍ល្អតាមដែលអាចធ្វើបានក្នុងការទៅកាន់ World Cup»។ អ្នកចាំទីចាស់វស្សារូបនេះបានប្រាប់បន្តថា៖ «យើងដឹងថា យើងបានរងបរាជ័យ ប៉ុន្តែ យើងមានរយៈពេល90នាទីផ្សេងទៀតក្នុងការជម្នះលើស្ថានភាពដ៏ស្មុគស្មាញនេះ។ គោលការណ៍ទី1 គឺមិនត្រូវមានការស្លន់ស្លោឡើយ»។

Buffon បានបន្ថែមទៀតថា៖ «ខ្ញុំរំពឹងទុកថា អ្នកគាំទ្រដ៏ច្រើនកុះករនៅកីឡដ្ឋាន San Siro នឹងជួយឲ្យក្រុមយើងបានទៅវគ្គបន្ត។ ខ្ញុំគិតថា វាមិនមែនជាការប្រកួតដ៏សំខាន់បំផុតប្រចាំជីវិតឡើយ ប៉ុន្តែ ខ្ញុំជឿជាក់ថា យើងនឹងធ្វើបាន ក្រោមជំនួយពីអ្នកគាំទ្រ»។ ការប្រកួតនេះនឹងចាប់ផ្តើមនៅម៉ោង2:45ទៀបភ្លឺ៕

ប្រភពពី៖ Daily Stars

November 13, 2017

Walmart ក្រុមហ៊ុនយក្សរបស់អាមេរិក កំពុងពិចាណា ដើម្បីបោះទុនវិនិយោគនៅកម្ពុជា

Walmart ដែលជាក្រុមហ៊ុនលក់ទំនិញអនឡាញរបស់អាមេរិក បានបង្ហាញចំណាប់អារម្មណ៍ និងស្វែងយល់ឱ្យកាន់តែច្បាស់ពាក់ព័ន្ធទៅនឹងច្បាប់ និងបទដ្ឋាននានាក្នុងការគ្រប់គ្រងទៅលើកម្លាំងពលកម្ម ច្បាប់ស្តីពីការងារ និងបរិយាកាសការងារ ដើម្បីបោះទុនវិនិយោគលើអាជីវកម្មរបស់ខ្លួននៅក្នុងប្រទេសកម្ពុជា។

ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក៏បានផ្ដល់នូវអនុសាសន៍ និងការចែករំលែកព័ត៌មានពាក់ព័ន្ធគោលនយោបាយបើកទូលាយក្នុងការប្រកបអាជីវកម្ម ពាណិជ្ជកម្ម និងវិនិយោគ ជាពិសេសកិច្ចសម្រួលពាណិជ្ជកម្ម ដែលរាជរដ្ឋាភិបាលកម្ពុជាបាននិងកំពុងអនុវត្តប្រកបដោយ និងទទួលបានការស្វាគមន៍យ៉ាងកក់ក្តៅពីអ្នកវិនិយោគទាំងក្នុង និងក្រៅប្រទេស។

រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបន្ថែមថា តាមរយៈយុទ្ធសាស្ត្រចតុកោណរបស់រាជរដ្ឋាភិបាលដំណាក់កាលទី3 រួមទាំងការអនុវត្តប្រកបដោយផ្លែផ្កានូវផែនការយុទ្ធសាស្ត្រគោលនយោបាយជាតិ ស្តីពីមុខរបរ និងការងារ គោលនយោបាយអភិវឌ្ឍន៍វិស័យឧស្សាហកម្មកម្ពុជា គោលនយោបាយស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិគាំពារសង្គម។ គួបផ្សំនឹងការពង្រឹងការអនុវត្តច្បាប់ស្តីពីការងារ និងច្បាប់ស្តីពីសហជីព លក្ខខណ្ឌការងារបានផ្ដល់ជូនបងប្អូនកម្មករនិយោជិតកាន់តែល្អប្រសើរ ការបន្តដំឡើងប្រាក់ឈ្នួលអប្បបរមា មានសុវត្ថិភាព និងសន្តិសុខការងារល្អ មានរបបសន្តិសុខសង្គមផ្នែកហានិភ័យការងារ និងថែទាំសុខភាព មានកន្លែងទទួលទានអាហារ មានកន្លែងស្នាក់នៅ មានមធ្យោបាយធ្វើដំណើរ។ ការទំនាក់ទំនងរវាងកម្មករនិយោជិត ជាមួយម្ចាស់រោងចក្រ មានភាពជិតស្និតល្អ ប្រកបដោយការយោគយល់គ្នា បង្កើតនូវបរិយាកាសសុខដុមរមនា។

ក្រុមហ៊ុន Walmart មានទីស្នាក់ការធំនៅ ទីក្រុង Bentonville រដ្ឋ Arkansas ហើយបច្ចុប្បន្នមានហាងលក់ទំនិញយីហោ Walmart រហូតដល់ជាង 6200 ហាងនៅសហរដ្ឋអាមេរិក និងជាង 850,000 ហាងទៀត នៅក្នុង 27ប្រទេស។ ក្រុមហ៊ុន Walmart មានចំណូលច្រើនជាងគេក្នុងពិភពលោក ប្រហែល480 ពាន់លានដុលារអាមេរិក ហើយក៏ជាក្រុមហ៊ុនដែលមានកម្មករនិយោជិតច្រើនជាងគេនៅលើពិភពលោកផងដែរ ប្រមាណ2,3 លាននាក់។

លោក Scott Price អនុប្រធានប្រតិបត្តិ និងជាប្រធានរដ្ឋបាលនៃក្រុមហ៊ុន Walmart អន្តរជាតិ បានសម្ដែងនូវអារម្មណ៍រីករាយចំពោះការយកចិត្តទុកដាក់របស់រាជរដ្ឋាភិបាលកម្ពុជាក្នុងការគាំពារដល់វិស័យឯកជន ព្រមទាំងវាយតម្លៃខ្ពស់ចំពោះគោលនយោបាយដ៏ល្អរបស់រាជរដ្ឋាភិបាលកម្ពុជាក្នុងការបន្តធានានូវលក្ខខណ្ឌការងារល្អប្រសើរ ដែលជាប្រភពទំនិញស្អាតស្អំ គ្មានការកេញប្រវ័ញ្ចកម្លាំងពលកម្មពីកម្មករនិយោជិត ហើយកម្មករនិយោជិតទទួលបាននូវប្រាក់ឈ្នួលអប្បបរមាល្អប្រសើរ។

ប្រធានរដ្ឋបាលនៃក្រុមហ៊ុន Walmart អន្តរជាតិ បន្ថែមថា ទាំងនេះជាកត្តាដ៏ចម្បង សម្រាប់ក្រុមហ៊ុន Walmart អាចរក្សាបាននូវស្តង់ដារបស់ខ្លួន ដែលអតិថិជនរបស់ Walmart នឹងពេញចិត្តនូវប្រភពទំនិញ Walmart បញ្ជាទិញ ពីកម្ពុជាសម្រាប់ចែកចាយតាមហាងនានា នៅសហរដ្ឋអាមេរិក កាណាដា និងប្រទេសនានាទូទាំងពិភពលោក។

លោក Scott Price បន្ថែមថា តាមរយៈសក្តានុពល និងស្ថានភាពវិវត្តន៍រីកចម្រើនសេដ្ឋកិច្ចរបស់ប្រទេសកម្ពុជា ដែលជាឱកាសដ៏ល្អសម្រាប់ក្រុមហ៊ុន Walmart អន្តរជាតិធ្វើការពិចារណាក្នុងការបណ្តាក់ទុននៅកម្ពុជា។ ជាងនេះក្រុមហ៊ុននឹងបន្តបង្កើនការបញ្ជាទិញទំនិញផលិតផលសំលៀកបំពាក់ និងស្បែកជើងពីកម្ពុជា រួមទាំងទំនិញសម្ភារៈធ្វើដំណើរដែលកម្ពុជាទើបតែទទួលបាន ភាពអនុគ្រោះពាណិជ្ជកម្មពីសហរដ្ឋអាមេរិក៕

November 13, 2017

Author: វល័ក្ខ