វល័ក្ខ - La Reine Media

ស្រីស្រស់ គីមលាង មានមោទនភាពដែលក្លាយជាអ្នកតំណាងផលិតផលល្បីពីអីុតាលី

ចាប់តាំងពីបានបោះជំហានឈានជើងចូលមកប្រឡូកនៅក្នុងវិស័យសិល្បៈតាមរយៈការចូលហ្វឹកហាត់ខាងផ្នែករបាំបុរាណ ជាពិសេស បន្ទាប់ពីចាប់ទទួលការថតម៉ូដសម្លៀកបំពាក់បែបប្រពៃណីខ្មែរតែម្ដង កញ្ញា សុគា គីមលាង ហៅស្រីស្រស់Kon Ant ត្រូវបានគេកត់សម្គាល់ឃើញថា បាននិងកំពុងទទួលបានប្រជាប្រិយភាពខ្ពស់គួរសម ដែលក្នុងនោះភាគច្រើន គេតែងឃើញរូបភាពដ៏ស្រស់ស្អាតរបស់កញ្ញាផុសចេញនៅតាមបណ្តាផ្ទាំងផ្សព្វផ្សាយសម្អាងការផ្សេងៗ ក៏ដូចជាក្នុងសៀវភៅម៉ូដសម្លៀកបំពាក់ជាដើម។ បន្ថែមពីនេះ
អ្វីដែលកាន់តែជាមោទនភាពចំពោះតារាស្រីវ័យក្មេងមុខកូនកាត់រូបនេះ គឺកញ្ញាថែមទាំងទទួលបានការពេញចិត្ត និងផ្តល់ជាកិត្តិយសក្នុងនាមជាអ្នកតំណាងផលិតផលដ៏ល្បីឈ្មោះមកពីប្រទេសអីុតាលី ប្រចាំនៅកម្ពុជាថែមទៀតផង។

ថ្វីដ្បិតតែកញ្ញា សុគា គីមលាង ទើបតែបានបង្ហាញវត្តមានជាសាធារណៈត្រឹមមួយរយៈពេលខ្លីក្នុងនាមជាតារាស្រីផ្សព្វផ្សាយពាណិជ្ជកម្មផ្នែកសម្អាងការក៏ពិតមែន ប៉ុន្តែបើក្រឡេកមើលពីកិត្តិស័ព្ទរបស់កញ្ញាវិញគឺមានភាពល្បីខ្ចរខ្ចាយសាយភាយមិនចាញ់តារាជំនាន់មុនៗនោះឡើយ។ ផ្ទុយទៅវិញថែមទាំងមានឱកាសបានចាកចេញទៅសម្ដែងរបាំបែបបុរាណខ្មែរនៅក្រៅប្រទេសក្នុងនាមជាអ្នកតំណាង និងបង្ហាញពីវប្បធម៌ អរិយធម៌ និងប្រពៃណីទំនៀមទម្លាប់ខ្មែរ តាមរយៈក្រសួងទេសចរណ៍ និងក្រសួងពាណិជ្ជកម្មជាញឹកញាប់ ដែលក្នុងនោះរួមមានដូចជា ប្រទេសចិន វៀតណាម ថៃ និងប្រទេសជប៉ុនជាដើម។ បន្ថែមពីនេះ កាលពីពេលកន្លងទៅ កញ្ញា គីមលាង ថែមទាំងមានឱកាសទទួលបានកិត្តិយសក្នុងនាមជាអ្នកតំណាងផលិតផលដ៏ល្បីឈ្មោះមកពីប្រទេសអីុតាលី ប្រចាំនៅកម្ពុជាថែមទៀតផង។

សម្រាប់ស្រីស្រស់ Kon Ant ដែលមានអាយុត្រឹម20ឆ្នាំ និងទើបតែបានបញ្ចប់ការសិក្សាលើមុខជំនាញផ្នែករបាំបុរាណក្នុងនាមជានាដកានៅសាកលវិទ្យាល័យភូមិន្ទវិចិត្រសិល្បៈកាលពីពេលកន្លងទៅថ្មីៗនេះ បានបង្ហាញពីអារម្មណ៍រីករាយ និងរំភើបជាមួយនឹងសមិទ្ធផលផ្នែកសិល្បៈដែលខ្លួនកំពុងទទួលបាននាពេលនេះថា “ខ្ញុំពិតជាមានអារម្មណ៍ថារីករាយមែនទែន ព្រោះការងារទាំងនេះ សុទ្ធតែជាចំណូលចិត្តរបស់ខ្ញុំតាំងពីតូចមកម៉្លេះ ជាពិសេសគឺការងារជាអ្នករាំរបាំបុរាណ។ ប៉ុន្តែអ្វីដែលកាន់តែធ្វើឱ្យខ្ញុំមានមោទនភាពបំផុតនោះគឺ ថែមទាំងទទួលបានងារជាអ្នកតំណាងផលិតផលដ៏ល្បីឈ្មោះគឺកាបូបម៉ាក Cromia នាំចូលមកពីប្រទេសអីុតាលី និងធ្វើការចែកចាយផ្ដាច់មុខនៅកម្ពុជាដោយក្រុមហ៊ុន Unique Fashion Cambodia ដែលមានទីតាំងស្ថិតនៅផ្លូវត្រសក់ផ្អែម សង្កាត់បឹងកេងកង1ខណ្ឌចំការមន រាជធានីភ្នំពេញ”។

គួរបញ្ជាក់ផងដែរថា កញ្ញា គីមលាង ដែលបានក្លាយជាតារាមួយដួងស្ថិតនៅក្នុងចំណាប់អារម្មណ៍របស់មហាជនម្នាក់នេះ មានស្រុកកំណើតនៅក្នុងរាជធានីភ្នំពេញ ដោយមានឪពុកម្តាយគឺជាអ្នកប្រកបអាជីវកម្ម និងមានបងប្អូនចំនួន5នាក់ ក្នុងនោះប្រុស2នាក់ ស្រី3នាក់ ហើយកញ្ញាគឺជាកូនស្រីច្បងនៅក្នុងគ្រួសារ៕

November 14, 2017

ចិនសន្យាជំរុញគម្រោងផ្លូវល្បឿនលឿន ភ្នំពេញ-ព្រះសីហនុ ឱ្យឆាប់ចេញជារូបរាង

ក្នុងការជំរុញកំណើនសេដ្ឋកិច្ចកម្ពុជា ក៏ដូចកាន់តែបង្កើនកិច្ចសហប្រតិបត្ដិការរវាងកម្ពុជា-ចិន ភាគីចិនបានសន្យានឹងបង្កើនកិច្ចប្រឹងប្រែងដើម្បីពន្លឿនការសាងសង់ផ្លូវល្បឿនលឿនពីក្រុងភ្នំពេញទៅក្រុងព្រះសីហនុឱ្យបានឆាប់រហ័ស។

ក្នុងជំនួបពិភាក្សាទ្វេភាគីរវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាជាមួយឯកឧត្តម លី កឺឈៀង នាយករដ្ឋមន្ត្រីនៃសាធារណរដ្ឋប្រជាមានិតចិននៅក្នុងឱកាសនៃការអញ្ជើញចូលរួមកិច្ចប្រជុំកំពូលអាស៊ានលើកទី31 និងកិច្ចប្រជុំពាក់ព័ន្ធនៅទីក្រុងម៉ានីល ប្រទេសហ្វីលីពីនកាលពីថ្ងៃទី13 ខែវិច្ឆិកា ឆ្នាំ2017 ភាគីចិនបានសម្ដែងនូវសេចក្តីរីករាយ និងបង្ហាញពីភាពរឹងមាំនៃកិច្ចសហប្រតិបត្ដិការ និងភាពទុកចិត្ដចំពោះកម្ពុជាក្នុងនាមជាមិត្ដចាស់ និងបន្ដកិច្ចសហប្រតិបត្ដិការយ៉ាងស្អិតល្មួត និងជា ពិសេសភាគីចិនបានសន្យាថា នឹងពន្លឿនលើសាងសង់ផ្លូវល្បឿនលឿនឱ្យបានឆាប់រហ័ស។

ឯកឧត្តម លី កឺឈៀង បានលើកឡើងថា ទំនាក់ទំនងកម្ពុជា និងចិនគឺបានបង្ហាញយ៉ាងច្បាស់អំពីទំនាក់ទំនងយ៉ាងជិតស្និទ្ឋកាន់តែល្អប្រសើរជាលំដាប់រវាងកម្ពុជា និងប្រទេសចិន ជាពិសេសគឺរវាងសម្តេចតេជោនាយករដ្ឋមន្ត្រី និងថ្នាក់ដឹកនាំជាន់ខ្ពស់របស់ចិន។ ជាមួយគ្នានេះដែរ ឯកឧត្តមក៏បានបង្ហាញពីការប្តេជ្ញារួមគ្នាជំរុញទំនាក់ទំនងមិត្តភាពរវាងប្រទេសទាំងពីរឱ្យដល់កម្រិតកាន់តែខ្ពស់ថែមទៀត។

នៅក្នុងជំនួបនេះ ប្រមុខដឹកនាំនៃប្រទេសទាំងពីរក៏បានពិភាក្សាគ្នាអំពីការជំរុញការអនុវត្តគម្រោងកសាងផ្លូវល្បឿនលឿនភ្នំពេញ-ក្រុងព្រះសីហនុដែលជាផ្លូវសេដ្ឋកិច្ចដ៏សំខាន់មួយរបស់ព្រះរាជាណាចក្រកម្ពុជា។ ជាការឆ្លើយតប ភាគីចិនបានសន្យាថា នឹងខិតខំប្រឹងប្រែងឱ្យអស់ពីសមត្ថភាពក្នុងការជួយជំរុញឱ្យការកសាងផ្លូវល្បឿនលឿននេះបានសម្រចទៅឆាប់រហ័ស ដើម្បីចូលរួមវិភាគទានជំរុញកំណើនសេដ្ឋកិច្ច និងលើកតម្កើងជីវភាពរស់នៅរបស់ប្រជាជនកម្ពុជា។

ក្រៅពីនេះភាគីទាំងពីរក៏បានពិភាក្សាគ្នាអំពីការជំរុញការដោះមីន និងយុទ្ធភណ្ឌមិនទាន់ផ្ទុះនៅកម្ពុជា ដែលជាមរតកនៃសង្គ្រាមរ៉ាំរ៉ៃនៅកម្ពុជារាប់ទសវត្សរ៍កន្លងមកហើយ។ ភាគីចិនបានជម្រាបជូនសម្តេចតេជោថា ការដោះមីន និងយុទ្ធភណ្ឌមិនទាន់ផ្ទុះជាសកម្មភាពអាទិភាពដ៏សំខាន់មួយរបស់រដ្ឋាភិបាលចិនក្នុងការជួយប្រទេសនានាដែលកំពុងជួបប្រទះបញ្ហានេះ។

ជាងនេះទៅទៀត ចិនបានសន្យាថា នឹងជួយឱ្យអស់ពីលទ្ធភាពដើម្បីបោសសម្អាតមីន និងយុទ្ធភណ្ឌមិនទាន់ផ្ទុះឱ្យបានឆាប់រហ័ស និងស្នើឱ្យស្ថាប័នពាក់ព័ន្ធនៃប្រទេសទាំងពីរធ្វើការពិភាក្សាលើទិដ្ឋភាពជាក់ស្តែងហើយដាក់ជូនថ្នាក់ដឹកនាំទាំងពីរពិនិត្យ និងសម្រេចឱ្យបានមុនពេលទស្សនកិច្ចផ្លូវការរបស់ឯកឧត្តមនាយករដ្ឋមន្ត្រីចិននៅកម្ពុជានាពេលខាងមុខនេះ។

ជាការឆ្លើយតប សម្តេចតេជោនាយករដ្ឋមន្ត្រីក៏បានសម្តែងនូវការរីករាយ និងបានថ្លែងអំណរគុណយ៉ាងជ្រាលជ្រៅដល់មិត្តចិនដែលបានចាត់ទុកកម្ពុជាជាមិត្តចាស់ប្រកបដោយទំនុកចិត្តគ្នាទៅវិញទៅមកយ៉ាងខ្លាំងបំផុត។

កម្ពុជានឹងត្រូវធ្វើជាម្ចាស់ផ្ទះរៀបចំកិច្ចប្រជុំកំពូលមេគង្គ-ឡានឆាងលើកទី2 នៅរាជធានីភ្នំពេញនាខែមករា ឆ្នាំ2018 ខាងមុខនេះ សម្តេចតេជោនាយករដ្ឋមន្ត្រីបានអញ្ជើញឯកឧត្តមនាយករដ្ឋមន្ត្រី លី កឺឈៀង ចូលរួមក្នុងកិច្ចប្រជុំកំពូលនេះផង និងបំពេញទស្សនកិច្ចជាផ្លូវការនៅព្រះរាជាណាចក្រកម្ពុជាផង ដើម្បីបើកសករាជថ្មីនៃទំនាក់ទំនងមិត្តភាពល្អរវាងប្រទេសទាំងពីរ ស្របពេលនៃខួបអនុស្សាវរីយ៍ទី60 ឆ្នាំ នៃទំនាក់ទំនងការទូតកម្ពុជា-ចិន៕

November 14, 2017

ប្រជុំកំពូលអាស៊ានលើកទី31 នៅហ្វីលីពីន តើកម្ពុជាទទួលបានអ្វីខ្លះ?

ភ្នំពេញ៖ ក្នុងកិច្ចប្រជុំកំពូលអាស៊ានលើកទី31 នៅទីក្រុងម៉ានីល ប្រទេសហ្វីលីពីន កម្ពុជាទទួលបានផ្លែផ្កាថ្មីមួយទៀតហើយ សម្រាប់ធ្វើឱ្យលំហូរសេដ្ឋកិច្ចមានភាពកាន់តែប្រសើរឡើង តាមរយៈការចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងអាស៊ាន-ហុងកុង និងកិច្ចព្រមព្រៀងស្តីពី វិនិយោគរវាងអាស៊ាន និងហុងកុង។

ក្នុងអំឡុងពេលចូលរួមកិច្ចប្រជុំកំពូលអាស៊ានលើកទី31 និងកិច្ចប្រជុំពាក់ព័ន្ធនេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម រួមជាមួយរដ្ឋមន្ត្រីសេដ្ឋកិច្ចអាស៊ាន និងរដ្ឋលេខាធិការពាណិជ្ជកម្ម និងឧស្សាហកម្មចិនហុងកុងបានចុះហត្ថលេខាលើកិច្ចព្រមព្រៀងសំខាន់ចំនួនពីរគឺ កិច្ចព្រមព្រៀងពាណិជ្ជកម្មសេរីរវាងអាស៊ាន-ហុងកុង និងកិច្ចព្រមព្រៀងស្តីពីវិនិយោគរវាងអាស៊ាន និងហុងកុង។

ដែលនេះគឺជាជោគជ័យថ្មីមួយទៀតដែលក្រសួងពាណិជ្ជកម្ម និងស្ថាប័នពាក់ព័ន្ធរបស់កម្ពុជា ទទួលបានក្នុងការធ្វើសមាហរណកម្មសេដ្ឋកិច្ចទៅក្នុងសេដ្ឋកិច្ចតំបន់ និងពិភពលោក បន្ទាប់ពីរដ្ឋសភា និងព្រឹទ្ធសភាកម្ពុជាបានអនុម័តយល់ព្រមលើសេចក្តីព្រាងច្បាប់ស្តីពីឧបាស្រ័យពាណិជ្ជកម្ម និងអនុម័តយល់ព្រមលើពិធីសារនៃការអនុវត្តកិច្ចព្រមព្រៀងអាស៊ាន សាធារណរដ្ឋប្រជាមានិតចិនកាលពីខែតុលា ឆ្នាំ2017 កន្លងទៅ។

កិច្ចព្រមព្រៀងនេះ មានគោលបំណងសំខាន់ៗគឺ៖

ទី1.ដើម្បីកាត់បន្ថយរបាំងចំពោះលំហូរពាណិជ្ជកម្មទំនិញ សេវា និងវិនិយោគ ធើ្វឱ្យកាន់តែស៊ីជម្រៅ និងទូលំទូលាយនូវការផ្សារភ្ជាប់សេដ្ឋកិច្ច កាត់បន្ថយចំណាយសម្រាប់ធុរជន បង្កើនពាណិជ្ជកម្ម ពង្រឹងប្រសិទ្ធភាពសេដ្ឋកិច្ច និងបង្កើតទីផ្សារកាន់តែធំទូលាយជាមួយកាលានុវត្តភាពច្រើនជាងមុន និងសេដ្ឋកិច្ចមាត្រដ្ឋានកាន់តែធំសម្រាប់ធុរកិច្ច។

2.ធ្វើពិពិធកម្ម និងជំរុញពាណិជ្ជកម្មវិនិយោគ និងទំនាក់ទំនងសេដ្ឋកិច្ចរវាងភាគី។

3.ផ្តល់ការអនុគ្រោះពិសេស និងដោយឡែកចំពោះរដ្ឋជាសមាជិកអាស៊ានថ្មី ដូចជាកម្ពុជា ឡាវ មីយ៉ាន់ម៉ា និងវៀតណាម ដើម្បីបង្កើនការចូលរួមក្នុងសមាហរណកម្មសេដ្ឋកិច្ចកាន់តែខ្លាំងជាងមុន និងពង្រីកការនាំចេញតាមរយៈការបង្កើនសមត្ថភាព ប្រសិទ្ធភាព និងភាពប្រកួតប្រជែងក្នុងស្រុក។

4.ជួយទ្រទ្រង់ដល់ការធ្វើសមាហរណកម្មសេដ្ឋកិច្ចទៅក្នុងតំបន់ និងពិភពលោក និងទ្រទ្រង់ដល់ការអភិវឌ្ឍសេដ្ឋកិច្ចប្រកបដោយចីរភាព។

នៅពេលកិច្ចព្រមព្រៀងនេះចូលជាធរមាននឹងធ្វើឱ្យមានភាពល្អប្រសើរឡើងនូវលំហូរវិនិយោគ និងពាណិជ្ជកម្មរវាងភាគីទាំងពីរ ដែលនឹងផ្តល់អត្ថប្រយោជន៍ដល់ប្រជាជនអាស៊ាន រួមមានកម្ពុជាផងដែរ។ លើសពីនេះទៀតវានឹងបង្កើនការតភ្ជាប់សេដ្ឋកិច្ចរវាងអាស៊ាន-ហុងកុង តាមរយៈការធ្វើសេរីភាវូបនីយកម្មពាណិជ្ជកម្មទំនិញ សេវាកម្មនិងវិនិយោគ។ កម្ពុជានឹងទទួលបានផលប្រយោជន៍ច្រើនពីកិច្ចព្រមព្រៀងនេះ ដោយសារហុងកុងជាទីផ្សារមូលធនដ៏ធំ។

គួររំឭកថា កិច្ចព្រមព្រៀងសំខាន់ទាំងពីរត្រូវបានចាប់ផ្តើមចរចាដំបូងនៅឆ្នាំ2014 និងបានបញ្ចប់នាកិច្ចប្រជុំគណៈកម្មាធិការចរចាពាណិជ្ជកម្មអាស៊ាន-ហុងកុងលើកទី10នៅទីក្រុងបាងកក ថៃឡង់ដ៏ កាលពីខែកក្កដា ឆ្នាំ2017។ ក្រោយពីនោះ មានការងារបច្ចេកទេសលម្អិតជាច្រើនត្រូវបានបន្តធ្វើ ដូចជាការងាររៀបចំឱ្យមានការឯកភាពគ្នាក្នុងការប្រើប្រាស់ពាក្យពេចន៍គន្លឹះមួយចំនួន តារាងបញ្ចុះពន្ធគយចុងក្រោយ ទម្រង់រួមនៃតារាងពន្ធគយ។ល៕

November 14, 2017

លោក O’Neil បញ្ជាក់ថា អៀរឡង់ ត្រូវតែរកគ្រាប់បាល់ឲ្យបានពេលប៉ះ ដាណឺម៉ាក រាត្រីនេះ

លោក Martin O’Neil បានបញ្ជាក់ថា ក្រុមបាល់ទាត់ជម្រើសជាតិសាធារណរដ្ឋអៀរឡង់របស់លោក ត្រូវតែរកគ្រាប់បាល់បញ្ចូលទីឲ្យបានក្នុងការប្រកួត World Cup វគ្គ Playoff ជើងទី2 ជាមួយនឹងក្រុមជម្រើសជាតិដាណឺម៉ាក នាកីឡដ្ឋាន Aviva នារាត្រីនេះ។

ក្រុមជម្រើសជាតិអៀរឡង់ បានវិលទៅធ្វើការហ្វឹកហាត់នៅលើទីលាន Abbotstown កាលពីថ្ងៃចន្ទវិញហើយ ខណៈដែលលទ្ធផលនៃការប្រកួតជើងទី1 បានបញ្ចប់ក្នុងលទ្ធផលស្មើ ០-០ ក្នុងទីក្រុង Copenhagen ប្រទេសដាណឺម៉ាក កាលពីថ្ងៃសៅរ៍សប្ដាហ៍មុន។ គ្រូបង្វឹករបស់អៀរឡង់រូបនេះនឹងមានក្រុមដ៏ពេញលេញមួយក្នុងការជ្រើសរើស ព្រោះខ្សែការពារឆ្នើម David Meyler ក៏នឹងវិលមកចូលលេងវិញផងដែរ ក្រោយពីជាប់ពិន័យព្យួរ។ ខ្សែការពារ Shane Duffy របស់ក្លិប Brighton បានបញ្ជាក់ថា ក្រុមជម្រើសជាតិអៀរឡង់នឹងក្លាយជាក្រុមផ្សេងមួយទៀតពេលលេងលើទឹកដីខ្លួនឯង និងកំពុងតែជឿជាក់ថា អាចបង្កើតនូវការចងចាំក្នុងរាត្រីនេះបាន។ កីឡាកររូបនេះបានឲ្យដឹងថា៖ «យើងធ្លាប់បានបង្កើតឱកាសបានច្រើនជាង និងត្រូវតែបង្កើតឱកាសឲ្យបានច្រើនម្តងទៀត។ យើងមានឱកាសម្ដងទៀតនៅថ្ងៃអង្គារនេះ ដើម្បីឈ្នះការប្រកួត ហើយខ្ញុំសង្ឃឹមថា វាគឺជាពេលវេលាមួយផ្សេងទៀតដែលគ្រប់គ្នានឹងចងចាំទុក»។ ស្របពេលជាមួយគ្នានេះ លោក O’Neil បានជំរុញឲ្យក្រុមរបស់លោកបង្ហាញពីស្មារតីប្រយុទ្ធដូចក្នុងពេលយកឈ្នះលើក្រុមជម្រើសជាតិបូស្នី ក្នុងការប្រកួត Euro ឆ្នាំ2016 វគ្គ Playoff ជើងទី2 ដើម្បីឈានទៅជុំផ្តាច់ព្រ័ត្រ នៅប្រទេសបារាំង។

លោក O’Neill បានឲ្យដឹងថា៖ «យើងមានបទពិសោធកាលពីរយៈពេល2ឆ្នាំមុន នៅដំណាក់កាលដូចគ្នានេះ។ ថ្ងៃប្រកួតនៅទីក្រុង Dublin ពិតជាការប្រកួតដ៏អស្ចារ្យជាមួយនឹងក្រុមបូស្នី។ ខ្ញុំគិតថា កីឡាករមួយចំនួនអាចរំឭកដល់ការរីករាយនោះ ប៉ុន្តែ ខ្ញុំគិតថា ពួកគេនឹងព្យាយាមបង្កើតបទពិសោធផ្ទាល់ខ្លួនរបស់ពួកគេ»។ ការប្រកួតនេះនឹងចាប់ផ្តើមនៅម៉ោង2:45ទៀបភ្លឺ៕

ប្រភពពី៖ Sport24

November 14, 2017

អ៊ីតាលី ស្រក់ទឹកភ្នែក ក្រោយធ្លាក់ចេញពី World Cup ក្រោមស្នាដៃ ស៊ុយអែត

ក្រុមម្ចាស់ជើងឯកពិភពលោកបួនសម័យកាល អ៊ីតាលី បានខកខានក្នុងការឈ្នះកៅអីទៅលេងក្នុងយុទ្ធនាការ World Cup ជាលើកទី1 ចាប់តាំងពីឆ្នាំ1958 ក្រោយពីការបញ្ចប់ក្នុងលទ្ធផលស្មើ 0-0 ក្នុងការប្រកួតជើងទី2 នៃវគ្គ Playoff ជាមួយនឹងក្រុមជម្រើសជាតិស៊ុយអែតកាលពីថ្ងៃចន្ទ។

លទ្ធផលនេះមានន័យថា ក្រុមជម្រើសជាតិអ៊ីតាលីដែលមានរហស្សនាមថា Azzurri នឹងមិនបានបង្ហាញខ្លួនក្នុងយុទ្ធនាការ World Cup ជាលើកទី2ក្នុងប្រវត្តិសាស្ត្ររបស់ពួកគេ ក្រោយពីបានបដិសេធមិនចូលរួមលេងក្នុងព្រឹត្តិការណ៍ពិភពលោកលើកទី1 កាលពីឆ្នាំ1930។ គ្រាប់បាល់បញ្ចូលទី1គ្រាប់របស់ខ្សែបម្រើ Jakob Johansson របស់ស៊ុយអែតកាលពីការប្រកួតជើងទី1 បានក្លាយជាគ្រាប់បាល់កាត់សេចក្តី ខណៈដែលការប្រកួតជើងទី2នៅកីឡដ្ឋាន San Siro នាទីក្រុង Milan បានបញ្ចប់ដោយមិនមានក្រុមណាអាចរកបានគ្រាប់បាល់បញ្ចូលទីឡើយ។ បើទោះបីស្ថិតនៅចំពោះមុខអ្នកគាំទ្រដល់ទៅ 74,000នាក់ នាកីឡដ្ឋាន San Siro ក៏ដោយ ប៉ុន្តែម្ចាស់ជើងឯក World Cup ឆ្នាំ2006 មួយនេះ មិនបានរកឃើញផ្លូវទៅវគ្គបន្តបានឡើយ។ លទ្ធផលនេះក៏បង្ហាញពីការបញ្ចប់យុគសម័យកាលមួយសម្រាប់អ្នកចាំទីជើងចាស់ Gianluigi Buffon ដែលនឹងមិនអាចចូលប្រកួតក្នុង World Cup ជាលើកទី6របស់គេបានឡើយ។ ស្ថិតក្នុងវ័យ39ឆ្នាំ Buffon ដែលបានបង្ហាញខ្លួនជាអន្តរជាតិ 175លើក ធ្លាប់បានប្រកាសថា ជុំផ្តាច់ព្រ័ត្រនៅរុស្ស៊ី នឹងក្លាយជាការបង្ហាញខ្លួនជាលើកចុងក្រោយរបស់គេក្នុងនាមជាកីឡាករសម្រាប់ក្រុមជម្រើសជាតិ។

Buffon បាននិយាយទាំងទឹកភ្នែកថា៖ «ខ្ញុំសោកស្តាយមិនមែនសម្រាប់តែខ្ញុំឡើយ ប៉ុន្តែសម្រាប់រាល់កីឡាករយើងទាំងអស់ ពីព្រោះយើងបានបរាជ័យ និងសូម្បីតែក្នុងកម្រិតសង្គម លទ្ធផលនេះក៏អាចសំខាន់ផងដែរ»៕

ប្រភពពី៖ BBC

November 14, 2017

រៀន2មហាវិទ្យាល័យមិនប្រាកដថា ជាជម្រើសត្រឹមត្រូវនោះទេ

ដោយសារតែកំណើននៃមហាវិទ្យាល័យ និងភាពបើកទូលាយសម្រាប់ការជ្រើសរើសមហាវិទ្យាល័យ និស្សិតមួយចំនួននៅកម្ពុជាចាប់ផ្តើមជ្រើសរើសសិក្សា 2 មហាវិទ្យាល័យដែលសកម្មភាពនេះត្រូវបានគេមើលឃើញថា បានផ្តល់ផលល្អ និងផលអវិជ្ជមានមួយចំនួននៅក្នុងនោះ។

ថ្លែងនៅក្នុងសិក្ខាសាលាស្តីពីការជ្រើសរើសជំនាញនៅមហាវិទ្យាល័យ ឧកញ៉ា គួច ម៉េងលី បានលើកឡើងថា ការសិក្សា 2មហាវិទ្យាល័យមិនប្រាកដថា ជាជម្រើសល្អនោះទេ ព្រោះថា ការសិក្សានៅមហាវិទ្យាល័យតម្រូវឱ្យមានការអនុវត្តច្រើន ដែលទាមទារឱ្យនិស្សិតត្រូវចំណាយពេលសមល្មមនៅក្នុងសាលា ហើយចំណាយពេលច្រើនផ្សេងទៀតនៅក្នុងពិភពការងារជាក់ស្តែង។ ការសិក្សាតែ1មហាវិទ្យាល័យជាជម្រើសល្អបំផុតដែលអាចផ្តល់ពេលវេលាគ្រប់គ្រាន់សម្រាប់ការអនុវត្តនូវទ្រឹស្តីដែលបានរៀន តាមរយៈការធ្វើការងារស្ម័គ្រចិត្ត ឬដាក់ពាក្យធ្វើការងារហាត់ការក្នុងស្ថាប័នដែលត្រូវនឹងជំនាញដែលកំពុងសិក្សាប្រចាំថ្ងៃ។

លោកឧកញ៉ា គួច ម៉េងលី បាននិយាយថា៖ «អ្នករៀនម្នាក់ៗត្រូវតែមានគោលដៅច្បាស់លាស់ដើម្បីត្រៀមខ្លួនជាស្រេចសម្រាប់អាជីពការងារ។ ឆ្នាំទី1 ខំរៀនឱ្យខ្លាំងបំផុតពីមូលដ្ឋានគ្រឹះ ហើយធ្វើយ៉ាងណាឱ្យមានគ្រឹះរឹងមាំហើយ ឆ្នាំទី2 ត្រូវស្វែងរកការងារណាមួយដើម្បីធ្វើពីតំណែងតូចៗទៅឱ្យបានល្អបំផុត ចុងក្រោយយើងនឹងអាចមានទាំងបទពិសោធការងារមានទាំងចំណេះដឹងពិតប្រាកដ។ ហេតុនេះ ការរៀនតែមួយមហាវិទ្យាល័យ អាចធ្វើឱ្យយើងទទួលបានជោគជ័យខ្ពស់ជាង»។

ស្ថាបនិកគ្រឹះស្ថានអប់រំ Start Up Cambodia លោក គីម ដារ៉ា បានលើកឡើងផងដែរថា និស្សិតភាគច្រើននៅពេលបច្ចុប្បន្ននេះចូលចិត្តសិក្សា 2មហាវិទ្យាល័យ ដោយក្នុងនោះគាត់សិក្សារៀនមហាវិទ្យាល័យជំនាញមួយ និងរៀនភាសាអង់គ្លេសមួយទៀត។ ចំណុចនេះ ពេលខ្លះអាចធ្វើឱ្យគាត់ត្រូវចំណាយពេលវេលាច្រើនមិនចំគោលដៅ ព្រោះថា ការសិក្សាភាសានៅមហាវិទ្យាល័យគឺគេសិក្សាទូទៅ តែសម្រាប់អ្នកដែលមានគោលដៅច្បាស់លាស់គេរៀនអ្វីដែលត្រូវនឹងសមិទ្ធផលដែលគេចង់បានតែម្តង។

លោក គីម ដារ៉ា បាននិយាយថា៖ «ខ្ញុំធ្លាប់សិក្សាភាសាអង់គ្លេសទូទៅផង និងសិក្សាជំនាញដែលខ្ញុំស្រឡាញ់នៅមហាវិទ្យាល័យផង តែនៅពេលដែលខ្ញុំកំណត់គោលដៅចង់ប្រឡងអាហារូបករណ៍ទៅបរទេស ខ្ញុំឃើញថា ការសិក្សាទូទៅនេះខាតពេលច្រើន ហេតុនេះខ្ញុំចាប់ផ្តើមជ្រើសរើសវគ្គសិក្សាដែលត្រូវនឹងជំនាញតែម្តង»។

លោក គីម ដារ៉ា បានបន្ថែមទៀតថា ពេលខ្លះការដាក់គោលដៅច្បាស់លាស់សម្រាប់សិក្សា ហើយប្រើគ្រប់លទ្ធភាពដើម្បីសម្រួចឱ្យច្បាស់លាស់លើការសិក្សានៅមហាវិទ្យាល័យតែមួយអាចជំរុញឱ្យយើងដើរលឿនហើយឆាប់ដល់គោលដៅជាង៕

November 13, 2017

ទម្លាប់ជោគជ័យសម្រាប់អ្នកចង់ក្លាយជាអ្នកនិពន្ធ

មានយុវជន និងមនុស្សជាច្រើននាពេលបច្ចុប្បន្ននេះ ចាប់ផ្តើមចូលចិត្តការចែករំលែក ទាំងនៅលើវេទិកាសាធារណៈ និងនៅក្នុងពិធីផ្សេងៗ រួមទាំងបណ្តាញសង្គមផងដែរ។ អ្នកទាំងអស់នោះ មួយចំនួនចង់បង្កើតស្នាដៃនៃគំនិតដោយខ្លួនឯងតាមរយៈការសរសេរ តែពេលខ្លះពួកគាត់មិនទាន់មានទម្លាប់ល្អ រួមទាំងមិនទាន់ដឹងពីវិធីដើម្បីអនុវត្តយ៉ាងណាទើបក្លាយជាអ្នកនិពន្ធដែលអាចចែករំលែកនូវគំនិតរបស់ខ្លួនតាមរយៈការបង្កើតស្នាដៃសំណេរដែលមានប្រយោជន៍។

ខាងក្រោមនេះ ជាទម្លាប់មួយចំនួនរបស់អ្នកនិពន្ធភាគច្រើនដែលមានភាពល្បីល្បាញនៅលើពិភពលោក ដែលបានអនុវត្តជាប្រចាំរហូតទទួលបានជោគជ័យក្នុងកិច្ចការនិពន្ធរបស់ពួកគាត់។

1.សរសេររាល់ថ្ងៃ

ការសរសេរជារៀងរាល់ថ្ងៃជាទម្លាប់ល្អមួយរបស់អ្នកនិពន្ធជាច្រើនលើពិភពលោក។ លោក Stephen King សរសេរអត្ថបទប្រមាណជា 10ទំព័រជារៀងរាល់ថ្ងៃបើទោះបីជាថ្ងៃដែលគាត់សម្រាកលំហែរកាយក៏ដោយ ខណៈអ្នកនិពន្ធដែលជាម្ចាស់ពានរង្វាន់ណូបែល Earnest Hemingway សរសេរអត្ថបទយ៉ាងហោចណាស់ 500ពាក្យក្នុងមួយថ្ងែ។

ការសរសេររាល់ថ្ងៃ ឬដាក់កាលវិភាគដើម្បីសរសេរ អាចជួយឱ្យមានទម្លាប់ដែលអាចធ្វើឱ្យមានការផ្តោតអារម្មណ៍បានល្អ ហើយវាក៏ជាគន្លឹះដើម្បីបង្កើតភាពច្នៃប្រឌិតសម្រាប់ខ្លួនឯងផងដែរ នៅពេលដែលយើងអនុវត្តសកម្មភាពមួយជារៀងរាល់ថ្ងៃ ហើយបន្តវាជាភាគ ឬភ្ជាប់ការគិតដែលមានលក្ខណៈជាប្រព័ន្ធ។

ងើបពីព្រលឹម

មនុស្សជាច្រើនបានភ្ញាក់នៅពេលព្រលឹម តែពួកគេមិនសូវងើប ហើយបញ្ហានេះជាឧបសគ្គសម្រាប់មនុស្សជាច្រើនដែលចង់ក្លាយជាអ្នកនិពន្ធ។ តាមការរកឃើញរបស់អ្នកនិពន្ធនៅបច្ចឹមប្រទេសភាគច្រើន សង្កេតឃើញថា ការងើបពីម៉ោង 5:30នាទី ដើម្បីសរសេរ ជាពេលល្អបំផុតមួយដែលខួរក្បាលពោរពេញទៅដោយថាមពល និងភាពស្រស់ស្រាយ ដែលអាចធ្វើឱ្យអ្នកបញ្ជារនូវមនោសញ្ចេតនា ឬបង្កើតរូបភាពនៅក្នុងសំណេរបានយ៉ាងល្អ។ កត្តានេះ អាចធ្វើឱ្យអ្នកបង្កើតបានអត្ថបទប្រកបដោយភាពរស់រវើក ហើយធ្វើឱ្យអ្នកអាន អាចជក់ចិត្តខ្លាំងជាមួយនឹងអត្ថបទប្រកបដោយថាមពល និងរូបារម្មណ៍ល្អ។

យកឈ្នះទម្លាប់អាក្រក់របស់ខ្លួនឱ្យបាន

អ្នកនិពន្ធភាគច្រើនតែងតែមានទម្លាប់អារក្រក់មួយគឺភាពរារែក ដែលពេលខ្លះខ្លាចនេះ ខ្លាចនោះច្រើនពេកដែលធ្វើឱ្យពួកគេមិនអាចបញ្ចេញអស់នូវសក្តានុពលរបស់ខ្លួនក្នុងសំណេរ។ ពាក់ព័ន្ធនឹងបញ្ហានេះ លោក Bernard M. Baruch បាននិយាយថា «ធ្វើអ្វីដែលអ្នកចង់ធ្វើ ហើយនិយាយអ្វីដែលអ្នកចង់និយាយទៅ ព្រោះសំដីរបស់អ្នកតែងតែត្រូវគេសរសើរ និងរិះគន់ ទោះក្នុងលក្ខខណ្ឌណាក៏ដោយ»។

ការដែលចាប់ផ្តើមសរសេរដោយចេញពីចិត្តឱ្យបានសិន បន្ទាប់មកទើបពិនិត្យម្តងហើយម្តងទៀត អាចឱ្យអ្នកក្លាយជាអ្នកនិពន្ធដែលមានស្នាដៃច្រើន ព្រោះអ្នកនិពន្ធជាច្រើនអាចបង្កើតសៀវភៅបានលុះត្រាតែមានឯកសារជាគោលសិន បន្ទាប់មកទើបគេយកឯកសារដែលគេបានសរសេរទាំងអស់ ទាំងល្អ និងមិនល្អមកកែច្នៃសារជាថ្មីរហូតមានអត្ថន័យគ្រប់គ្រាន់។ ហេតុនេះបើអ្នកមិនចាប់ផ្តើមសរសេរ អ្នកក៏មិនអាចមានឯកសារគោលសម្រាប់កែច្នៃនោះដែរ៕

November 13, 2017

ឆាសាច់មាន់ជាមួយស្វាយទុំ និងគ្រាប់ស្វាយចន្ទី

ឆាសាច់មាន់ជាមួយស្វាយទុំ និងគ្រាប់ស្វាយចន្ទី ពិតជាចម្លែកបន្តិចហើយមើលទៅ ព្រោះមានទាំងរសជាតិផ្អែមនៃស្វាយទុំ រសជាតិឈ្ងុយនៃគ្រាប់ស្វាយចន្ទី ព្រមទាំងជាតិសាច់នៃសាច់មាន់រំលីងទៀត ពិតជាឆ្ងាញ់មាត់ហើយមុខម្ហូបមួយមុខនេះ។ ដូច្នេះចង់ដឹងពីវិធីចម្អិនមុខម្ហូបនេះសូមតាមដានជាមួយនឹងគ្រឿងផ្សំ និងវិធីធ្វើពីមេចុងភៅជំនាញនៃភោជនីយដ្ឋាន Eleven One Kitchenដូចតទៅ។

គ្រឿងផ្សំ
សាច់មាន់ 100ក្រាម
គ្រាប់ស្វាយចន្ទី 5គ្រាប់ (ពុះជា2)
ស្វាយទុំ 100ក្រាម (កាត់ជាដុំតូចៗល្មម)
ប្រេងខ្យង 1ស្លាបព្រាកាហ្វេ
ស្រាចិន 3-4ដំណក់
ទឹកត្រី 1ស្លាបព្រាបាយ
ស្ករស កន្លះស្លាបព្រាកាហ្វេ
ខ្ទឹមស 5ក្រាម
អំបិល ម្សៅពោត ម្រេច 1ស្លាបព្រាបាយ
ប្រេងឆា 2ស្លាបព្រាបាយ
ទឹកស៊ុបបន្លែ បន្តិច

វិធីចម្អិន
ដំបូងអ្នកត្រូវដាក់ខ្ទះឱ្យក្តៅ រួចចាក់ប្រេងឆាចូលក្នុងខ្ទះ ហើយសឹមដាក់សាច់មាន់ចូលរំលីងសាច់ឱ្យឆ្អិន50%។ បន្ទាប់មកដាក់ខ្ទឹមសចិញ្ច្រាំចូលលីងឱ្យឈ្ងុយ រួចដាក់ស្រាចិនចូលឆាចូលគ្នាឱ្យសព្វ។ រួចដាក់ប្រេងខ្យង ទឹកត្រី អំបិល ម្រេចទឹកស៊ុបបន្លែ និងម្សៅពោតចូលឆាចុះឡើងឱ្យចូលជាតិគ្នាល្អ សឹមដាក់ចំណិតស្វាយទុំ និងគ្រាប់ស្វាយចន្ទីដែលពុះហើយចូលជាការស្រេច៕

November 13, 2017

កម្ពុជា-ចិន ឯកភាពគ្នាធ្វើពាណិជ្ជកម្មតាមប្រព័ន្ធអេឡិចត្រូនិក

ភ្នំពេញ៖ ដើម្បីពង្រឹងពាណិជ្ជកម្មទ្វេភាគីឱ្យកាន់តែប្រសើរឡើង ក្រសួងពាណិជ្ជកម្មកម្ពុជា និងក្រសួងពាណិជ្ជកម្មរបស់ប្រទេសចិន បានឯកភាពគ្នាបង្កើតទំព័រប្រវត្តិសាស្ត្រថ្មីមួយទៀត ក្នុងយុគសម័យបច្ចេកវិទ្យានេះ ដោយបានចុះអនុស្សរណៈយោគយល់គ្នាស្តីពីកិច្ចសហប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក។

អនុស្សរណៈថ្មីនេះត្រូវបានចុះហត្ថលេខារវាងឯកឧត្តម កឹម ស៊ីថន រដ្ឋមន្ត្រីស្តីទីក្រសួងពាណិជ្ជកម្មកម្ពុជា និងឯកឧត្តម WANG Bingnan អនុរដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិន ដោយផ្តោតសំខាន់ទៅលើវិស័យពាណិជ្ជកម្មអេឡិចត្រូនិក (E-Commerce) ដើម្បីជំរុញវិស័យនេះឱ្យមានទំនាក់ទំនងកាន់តែប្រសើរឡើង ក៏ដូចជាផ្តល់ភាពងាយស្រួលសម្រាប់វិនិយោគិនប្រទេសទាំងពីរដែរ។

អនុស្សរណៈនៃការយោគយល់គ្នានេះគឺជាធាតុផ្សំដ៏សំខាន់មួយសម្រាប់យុទ្ធសាស្ត្រចតុកោណរបស់រាជរដ្ឋាភិបាលកម្ពុជា និងជាផ្នែកមួយនៃគំនិតផ្តួចផ្តើមផ្លូវមួយខ្សែក្រវាត់មួយ (One Belt One Road Initiative) របស់រដ្ឋាភិបាលចិន ដែលអាចទាក់ទាញការវិនិយោគកាន់តែច្រើនពីប្រទេសចិនមកកម្ពុជាដើម្បីពន្លឿនកំណើនសេដ្ឋកិច្ចរបស់កម្ពុជា។តាមរយៈអនុស្សរណៈនេះ ភាគីទាំងពីរនឹងសហការគ្នាដើម្បីបង្កើតបរិយាកាសឱ្យមានអំណោយផលសម្រាប់ការអភិវឌ្ឍពាណិជ្ជកម្មតាមអេឡិចត្រូនិក ក្រោមគោលបំណងទទួលបានផលប្រយោជន៍ទៅវិញទៅមកដូចខាងក្រោមនេះ៖

1.ស្វែងយល់គ្រប់ច្រកល្ហកក្នុងកិច្ចសហប្រតិបត្តិការលើពាណិជ្ជកម្មតាមអេឡិចត្រូនិក ដូចជាការសិក្សារួមកម្មវិធីបណ្ដុះបណ្ដាលសមត្ថភាព ជំនួយបច្ចេកទេសលើការបង្កើតក្របខ័ណ្ឌច្បាប់ និងការអនុវត្តច្បាប់ ព្រមទាំងចែករំលែកបទពិសោធស្ដីពីការកំណត់គោលនយោបាយ និងការគ្រប់គ្រងពាណិជ្ជកម្មតាមអេឡិចត្រូនិកដោយរដ្ឋាភិបាល។ល។

2.ភាគីទាំងពីរនឹងលើកទឹកចិត្តឱ្យសហគ្រាសធ្វើកិច្ចសហប្រតិបត្តិការលើពាណិជ្ជកម្មតាមអេឡិចត្រូនិក រួមមានការជំរុញពាណិជ្ជកម្មលើផលិតផលទៅវិញទៅមកពីសាមីប្រទេសរៀងៗខ្លួន តាមរយៈពាណិជ្ជកម្មតាមអេឡិចត្រូនិក។

3.ភាគីទាំងពីរនឹងគាំទ្រសកម្មភាពសហប្រតិបត្តិការលើពាណិជ្ជកម្មតាមអេឡិចត្រូនិក តាមរយៈការផ្លាស់ប្ដូរបទពិសោធអាជីវកម្ម ការបណ្ដុះបណ្ដាល និងការកសាងសមត្ថភាព និងការផ្លាស់ប្ដូរបទពិសោធអនុវត្តល្អៗ និងនវានុវត្ដន៍ថ្មី។

ដើម្បីឱ្យវិស័យពាណិជ្ជកម្មអេឡិចត្រូនិកល្អប្រសើរឡើង កម្ពុជានឹងត្រៀមខ្លួនរៀបចំដូចជា ៖

1-យុទ្ធសាស្ត្រពាណិជ្ជកម្មអេឡិចត្រូនិក

2-ហេដ្ឋារចនាសម្ព័ន្ធទំនាក់ទំនងទូរគមនាគមន៍

3-កិច្ចសម្រួលពាណិជ្ជកម្មអេឡិចត្រូនិក

4-Online Payment Gateway

និង 5-ធនធានមនុស្សលើវិស័យអេឡិចត្រូនិក។

ជាមួយគ្នានេះដែរ កម្ពុជាបានសំណូមពរឱ្យភាគីចិនបង្កើតកម្មវិធីទស្សនកិច្ចសិក្សា និងបណ្តុះបណ្តាលសមត្ថភាពដល់មន្ត្រីជំនាញពីក្រសួង ស្ថាប័នពាក់ព័ន្ធ ដូចជា ក្រសួងពាណិជ្ជកម្ម ក្រសួងប្រៃសណីយ៍ និងទូរគមនាគមន៍ ធនាគារជាតិ អគ្គនាយកដ្ឋានគយ និងរដ្ឋាករកម្ពុជា និងអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុជាដើម។

ឯកឧត្តម កឹម ស៊ីថន បានថ្លែងក្នុងពិធីចុះហត្ថលេខាខាងលើអំពីទំហំពាណិជ្ជកម្មសរុបរវាងកម្ពុជា-ចិនឆ្នាំ2016 ដែលមានចំនួន 4,760 លានដុល្លារអាមេរិក (កើនឡើងប្រមាណ 7.3% បើធៀបនឹងឆ្នាំ2015) ជាពិសេសរហូតមកដល់បច្ចុប្បន្នទំហំពាណិជ្ជកម្មរវាងកម្ពុជា និងចិនបានឈានឡើងលើសពី 5,000 លានដុល្លារអាមេរិកនៅឆ្នាំ2017 ដែលចំនួននេះ លើសពីការរំពឹងទុកដែលកំណត់ដោយថ្នាក់ដឹកនាំកំពូលនៃប្រទេសទាំងពីរ។

ចំណែកឯកឧត្តមអនុរដ្ឋមន្ត្រីចិន មានជំនឿថាក្រោយពីមានកិច្ចសហប្រតិបត្តិការលើវិស័យពាណិជ្ជកម្មអេឡិចត្រូនិកនេះ ទំហំពាណិជ្ជកម្មរវាងប្រទេសទាំងពីរនឹងកាន់តែមានសម្ទុះយ៉ាងខ្លាំងបន្ថែមទៀត ហើយនឹងកើនឡើងដល់ 6,000លានដុល្លារអាមេរិក នៅត្រឹមឆ្នាំ2020៕

November 13, 2017

ពងក្រួចខ្ចប់សាច់ជ្រូកចិញ្ច្រាំបំពងអំបុកបៃតង

ជាទូទៅ ពងក្រួចភាគច្រើនតែងត្រូវបានគេឃើញមានលក់នៅតាមបណ្តាទីប្រជុំជននានា ដោយគ្រាន់តែធ្វើការចម្អិនដោយស្ងោរតាមបែបធម្មតាៗ ហើយច្រកក្នុងថង់ប្លាស្ទីក រួមជាមួយអំបិលម្រេចតែប៉ុណ្ណោះ។ ដោយឡែកសម្រាប់ភោជនីយដ្ឋាន Labaab ដែលមានការតុបតែងលម្អលក្ខណៈបែបខ្មែរ ស្ថិតនៅអគារលេខ81E2 (ជាន់ទី2) តាមផ្លូវព្រះមុនីវង្ស (ទល់មុខធនាគារ កាណាឌីយ៉ា) ខណ្ឌដូនពេញ រាជធានីភ្នំពេញ ទើបតែចាប់បើដំណើរការបម្រើ អាហារបែបអ្នករស់នៅតាមដងទន្លេមេគង្គ រួមមានអាហារបែបជនជាតិខ្មែរ វៀតណាម ថៃ ឡាវ និងចិននោះ បានយកពងក្រួចនេះមកច្នៃធ្វើជាអាហារដ៏មានរសជាតិឈ្ងុយឆ្ងាញ់ប្លែក យ៉ាងជក់ចិត្ត ក្រោយគំនិងច្នៃប្រឌិតរបស់មេចុងភៅជាជនជាតិខ្មែរ នោះគឺ មុខម្ហូប “ពងក្រួចខ្ចប់សាច់ជ្រូកចិញ្ច្រាំបំពងអំបុកបៃតង”។

គ្រឿងផ្សំ
• ពងក្រួច
• សាច់ជ្រូកចិញ្ច្រាំ
• អំបុក
• ស្លឹកតើយ
• ប្រេងឆា
• ទឹកម្ទេស

របៀបចម្អិន
ជាដំបូងលោកអ្នកត្រូវយកពងក្រួចទៅចម្អិនឱ្យឆ្អិនល្មម រួចបកសម្បកទុកមួយអន្លើ។យកស្លឹកតើយច្របាច់យកទឹក ច្របល់ជាមួយអំបុកដែលបានត្រៀមទុកជាស្រេច។ យកសាច់ជ្រូកចិញ្ច្រាំខ្ចប់ពងក្រួច ហើយយកអំបុកដែលបានច្របល់ជាទឹកស្លឹកតើយច្របាច់ខ្ចប់ពីក្រៅធ្វើជាសម្បក រួចយកទៅបំពងជាមួយប្រេងឆាដែលបានត្រៀមនៅលើភ្លើងរហូតឆ្អិន ស្រួយល្អ ទើបស្រង់ចេញជាការស្រេច។ ឃើញទេ! មិនពិបាកធ្វើនោះទេ លោកអ្នកក៏អាចអនុវត្តបានដោយខ្លួនឯង សម្រាប់ទទួលទានជុំគ្រួសារនៅថ្ងៃឈប់សម្រាក់យ៉ាងរីករាយ ដោយការបន្ថែមទឹកម្ទេសធ្វើជាទឹកជ្រលក់៕

November 13, 2017

Author: វល័ក្ខ