វល័ក្ខ - La Reine Media

អ៊ីតាលី បណ្តេញលោក Ventura ក្រោយខកខានការឈ្នះកៅអីទៅ World Cup

សហព័ន្ធកីឡាបាល់ទាត់អ៊ីតាលី បានបណ្តេញលោក Gian Piero Ventura ចេញពីតំណែងអ្នកចាត់ការទូទៅ ក្រោយពីបានរងបរាជ័យទាំង2ជើងក្នុងលទ្ធផល 1-០ ក្រោមស្នាដៃក្រុមជម្រើសជាតិស៊ុយអែត ក្នុងការប្រកួតជម្រុះ World Cup វគ្គ Playoff ដែលបានធ្វើឲ្យក្រុមម្ចាស់ជើងឯកពិភពលោក4សម័យកាលមួយនេះ ខកខានក្នុងការឈានទៅជុំផ្តាច់ព្រ័ត្រ ជាលើកទី1ក្នុងរយៈពេល60ឆ្នាំ។

ក្នុងសេចក្តីថ្លែងការណ៍មួយកាលពីរាត្រីថ្ងៃពុធ សហព័ន្ធកីឡាបាល់ទាត់អ៊ីតាលី បានប្រកាសថា រជ្ជកាលនៃការដឹកនាំរយៈពេល16ខែរបស់លោក Ventura បានបញ្ចប់ហើយ។ សហព័ន្ធកីឡាបាល់ទាត់អ៊ីតាលី បានឲ្យដឹងបន្ទាប់ពីកិច្ចប្រជុំមួយថា៖ «ក្នុងចំណុចទីមួយនៃរបៀបរបស់យើង លោក Carlo Tavecchio ដែលជាប្រធានសហព័ន្ធ បានធ្វើការពិភាក្សាទៅលើការសម្រេចចិត្តមួយរបស់គណៈកម្មការដឹកនាំ ហើយចាប់ពីពេលនេះតទៅ លោក Gian Piero Ventura លែងជាគ្រូបង្វឹកនៃក្រុមជម្រើសជាតិទៀតហើយ»។ លោក Ventura វ័យ69ឆ្នាំ បាននិយាយបន្ទាប់ការប្រកួតជាមួយនឹងក្រុមស៊ុយអែតថា៖«ខ្ញុំសុំអភ័យទោសសម្រាប់លទ្ធផលនេះ ប៉ុន្តែ មិនមែនសម្រាប់ការខិតខំព្យាយាម និងការការពារដ៏លំបាកនោះឡើយ។ ខ្ញុំដឹងថា លទ្ធផលនេះពិតជារឿងដ៏សំខាន់បំផុត»។

ការសម្រេចចិត្តក្នុងការជ្រើសរើសគ្រូបង្វឹកថ្មីម្នាក់មកជំនួសកន្លែងរបស់លោក Ventura មិនទាន់ត្រូវបានធ្វើឡើងនៅឡើយ ខណៈដែលលោក Tavecchio បានប្រាប់អ្នកយកព័ត៌មានបន្ទាប់ពីកិច្ចប្រជុំថា សហព័ន្ធកីឡាបាល់ទាត់អ៊ីតាលី កំពុងតែធ្វើការពិចារណាទៅលើ «គ្រូបង្វឹកសំខាន់» ដើម្បីជំនួសលោក Ventura។ លោក Carlo Ancelotti ដែលអស់ការងារធ្វើចាប់តាំងពីត្រូវបានបណ្តេញចេញដោយក្លិប Bayern Munich កាលពីដើមរដូវកាលនេះ គឺជាបេក្ខភាពឈានមុខគេក្នុងការចូលកាន់តំណែងនេះ៕

ប្រភពពី៖ The Guardian

November 16, 2017

ចំណុចល្អ និងចំណុចមិនល្អរបស់ការមានកូនពេលអាយុច្រើន

ក្នុងពេលបច្ចុប្បន្ននេះមានស្ត្រីចំនួន1ភាគ5 ដែលពន្យារការមានគភ៌ទៅដល់អាយុ35ឆ្នាំឡើងនិងចំនួនស្ត្រីដែលមានកូនក្នុងវ័យ40ឆ្នាំបានកើនឡើងទ្វេដងខុសកាលពី20ឆ្នាំមុន។ ការកើនឡើងនៃចំនួនស្ត្រីដែលយកកូនបែបនេះ ធ្វើឱ្យកើតមានជាសំណួរមួយឡើងថា តើអាយុប៉ុន្មានទើបហៅថា ចាស់ហួសនឹងមានកូន? ហើយតើការមានកូននៅពេលអាយុច្រើន មានចំណុចល្អ និងមិនល្អយ៉ាងណាខ្លះ? ឡារ៉ែន មានចម្លើយសម្រាប់សំណួរនេះមកជូនមិត្តអ្នកអាននៅពេលនេះ…។

ចំណុចល្អនៃការមានកូននៅពេលអាយុច្រើន
-មានប្រាក់ចំណូលច្រើនឡើង និងស្ថិតស្ថេរហើយ។
-យល់ដឹងពីការមើលថែទាំសុខភាពច្រើនឡើងហើយ។
-អាយុច្រើន ចេះគិតគូរបានច្រើនឡើងហើយ។
-ចេះដំណើរការជីវិតយ៉ាងប្រយ័ត្នប្រយែងខ្លាំងឡើងហើយ។
-មានអារម្មណ៍ថា ត្រៀមខ្លួនជាស្រេចក្នុងការធ្វើជាម្ដាយគេរួចរាល់ហើយ។
-មានការសោកស្ដាយតិចបំផុត នៅពេលដែលបាត់បង់សេរីភាព ឬការស្វែងរកភាពកម្សាន្តសប្បាយ (មិនអាចដើរលេងបានតាមចិត្ត ព្រោះមានកូនត្រូវមើលថែ)។
-មានភាពរឹងមាំឡើង និងដឹងពីតួនាទីនៃភាពជាម្ដាយ។
-ចិត្តធ្ងន់ និងអាចចាត់ការភាពរញ៉េរញ៉ៃ វីវក់បានយ៉ាងមានស្មារតីនឹងនរ។

ចំណុចមិនល្អនៃការមានកូនពេលអាយុច្រើន
-មិនសូវមានកម្លាំងលេងជាមួយកូន ឬដេញតាមចាប់កូន។
-មិនមានឱកាសបានឃើញដំណើរជីវិតរបស់កូននៅវ័យកណ្ដាលមនុស្ស។
-មិនមានឱកាសបានជួយមើលថែចៅ។
-ក្មេងខ្លះខ្មាសមិត្តភក្តិដែលខ្លួនមានឪពុកម្ដាយជាមនុស្សចាស់។
– អាចនឹងពិបាកមានកូន ឬប្រើពេលវេលាយូរទម្រាំនឹងមានកូនតាមវិធីធម្មជាតិ ព្រោះឱកាសក្នុងការតាំងគភ៌ក្នុងវ័យ30ឆ្នាំឡើងគឺ ប្រមាណ25% ចំណែកក្នុងវ័យ40ឆ្នាំឡើងឱកាសតាំងគភ៌ថយចុះមកនៅត្រឹមតែ5%ប៉ុណ្ណោះ។
-អ្នកដទៃនឹងច្រឡំហៅអ្នកថាជាលោកយាយច្រើនជាងហៅថា ម្ដាយរបស់កូន៕

November 16, 2017

ត្រកួន មិនត្រឹមតែជាបន្លែ តែជាឱសថបុរាណដ៏ពូកែ

ត្រកួន គឺជាបន្លែពេញនិយមមួយប្រភេទ ដែលប្រជាជនខ្មែរយើងយកមកចម្អិនជាម្ហូបអាហារជាច្រើនមុខ ហើយក្រៅពីជាបន្លែហើយនោះ ត្រកួនក៏ជាឱសថបុរាណមួយប្រភេទដែលអាចព្យាបាលជំងឺបានជាច្រើនមុខ ដែលយើងមិនធ្លាប់បានដឹងពីមុនមក។ គុណប្រយោជន៍របស់ត្រកួនមានដូចខាងក្រោមនេះ៖

1- ការពារជំងឺហើមពោះ ៈ ត្រកួនជាប្រភពរបស់ជាតិសរសៃច្រើនបំផុត វាមានប្រសិទ្ធភាពជាថ្នាំរលាយកាកសំណល់ទន់ៗ ជួយឱ្យការបន្ទោបង់បានងាយស្រួល។ វាជួយការពារ និងព្យាបាលជំងឺទល់លាមក ហើមពោះ និងជួយកាត់បន្ថយហានិភ័យនៃការកើតជំងឺឫសដូងបាតបាន ពោលគឺ ការទទួលទានបន្លែត្រកួនជាប្រចាំថ្ងៃ នឹងជួយសម្អាតរាល់កាកសំណល់ និងជាតិពុលដែលធ្លាក់ទៅក្នុងពោះវៀនតូចឱ្យចេញមកក្រៅ ហើយជួយស្រូបយកសារធាតុចិញ្ចឹមដល់រាងកាយបានយ៉ាងល្អប្រសើរថែមទៀតផង។

2- ជំនួយភ្នែក ៈ ជាបន្លែដែលមានវីតាមីន A ច្រើន ជំនួយដល់ភ្នែក និងប្រស្រីភ្នែក ហើយមានគុណសម្បត្តិជួយដល់ប្រព័ន្ធប្រសាទ ធ្វើឱ្យអ្នកមានអារម្មណ៍ស្រស់ស្រាយ បំបាត់ភាពនឿយហត់ និងគេងលក់ស្រួល។

3- សម្រួលដំណេក ៈ នៅក្នុងត្រកួនមានសារធាតុ Selenium និងស័ង្កសី ដែលជួយឱ្យប្រព័ន្ធប្រសាទរបស់អ្នកបានសម្រាក ហើយធ្វើឱ្យអ្នកឆាប់គេងលក់ថែមទៀតផង។

4- ជំនួយគ្រាប់ឈាម ៈ ត្រកួនមានធាតុដែក ជាសារធាតុចិញ្ចឹមដែលមានសារសំខាន់ចំពោះប្រព័ន្ធឈាម និងចលនារបត់ឈាម វាជួយបង្កើតអេម៉ូក្លូប៊ីននៅក្នុងឈាម ទើបអាចការពារជំងឺអប្បលោហិតបានផងដែរ។

5- ជួយលាងជាតិពុលនៅក្នុងខ្លួន ៈ ត្រកួននៅមានគុណប្រយោជន៍ជួយលាងសារជាតិពុលក្នុងរាងកាយដូចជាថ្លើមជាដើម ព្រមទាំងជាសារធាតុពួករ៉ាឌីកាល់សេរី ដែលជួយការពារកោសិកាមិនឱ្យទទួលរងនូវការបំផ្លាញ ហើយជួយការពារថ្លើមថែមទៀតផង។

6- បន្ថយជាតិស្ករនៅក្នុងឈាម ៈ បច្ចុប្បន្ននេះមានការស្រាវជ្រាវរកឃើញថា ត្រកួនមានសារធាតុស្រដៀងនឹង Insulin ដែលមានសមត្ថភាពជួយកាត់បន្ថយជាតិស្ករនៅក្នុងឈាម និងជួយបន្ថយការស្រូបយកសារធាតុចិញ្ចឹមរបស់ក្លុយកូសនៃរាងកាយបាន។ ដូច្នេះអ្នកជំងឺទឹកនោមផ្អែម គួរតែទទួលទានត្រកួនជារៀងរាល់ថ្ងៃ ដើម្បីជួយកាត់បន្ថយជាតិស្ករនៅក្នុងឈាម។

7- ជួយសម្រកទម្ងន់ ៈ ជាប្រភេទបន្លែពណ៌បៃតង ដែលជាអាហារសម្រកទម្ងន់ដែលទទួលបានលទ្ធផលល្អជាទីគាប់ចិត្ត វាមានបរិមាណអាហារសរសៃច្រើន មានកាល់ឡូរីទាប ទទួលទានហើយឆ្អែតបានថែមទៀតផង។

8- បញ្ចុះជាតិកូឡេស្តេរ៉ូល ៈ អាហារសរសៃ និងវីតាមីន ដែលមាននៅក្នុងត្រកួន ជាផ្នែកមួយដែលសំខាន់បំផុតក្នុងការបន្ថយសារជាតិកូឡេស្តេរ៉ូល និងទ្រីគ្លីសេរីដ (ខ្លាញ់អាក្រក់) ក្នុងរាងកាយបាន ទើបវាបានហុចផលល្អសម្រាប់ប្រព័ន្ធសរសៃឈាម និងបេះដូង។

9- ការពារជំងឺបេះដូង និងសរសៃឈាម ៈត្រកួនមានវីតាមីន A, វីតាមីន C, Beta និង Carotene ដែលជួយប្រឆាំងអ៊ុកស៊ីតកម្ម ហើយការពារកោសិកា ជួយកាត់បន្ថយសារជាតិកូឡេស្តេរ៉ូលការពារការកើតជំងឺបេះដូង គាំងបេះដូង និងជំងឺដាច់សរសៃឈាមខួរក្បាល។ ក្រៅពីនោះ វាមានសារធាតុដែកមានសារសំខាន់ក្នុងការបង្កើតឈាមក្រហម និងមានម៉ាញ៉េស្យូមជួយកាត់បន្ថយសម្ពាធឈាមដែលជួយការពារមិនឱ្យកើតជំងឺបេះដូង។

10- ការពារជំងឺមហារីក ៈ នៅក្នុងត្រកួនមានសារធាតុចិញ្ចឹមជាង13ប្រភេទ ដែលវាប្រឆាំងអុកស៊ីតកម្ម និងការពារកោសិកាមិនឱ្យកើតជំងឺមហារីក ជាពិសេសជំងឺមហារីកពោះវៀនធំ ក្រពះ ស្បែក និងមហារីកសុដន់ជាដើម៕

November 16, 2017

បន្លែពោតបារាំងកំពុងទទួលបានការគាំទ្រខ្លាំងនៅលើទីផ្សារ

ភ្នំពេញ៖ ពោតបារាំងជាបន្លែមួយប្រភេទដែលគេអាចយកទៅធ្វើម្ហូបដូចជា ស្ងោរ ឆា ឬអាំងទៅតាមចំណង់ចំណូលចិត្ត ហើយដោយសារតែរសជាតិផ្អែមឆ្ងាញ់របស់វាបានធ្វើឱ្យពោតបារាំងកំពុងតែមានការគាំទ្រនៅលើទីផ្សារកាន់តែច្រើនឡើង។

លោក Yone Ji ប្រធានផ្នែកបច្ចេកទេសដាំដុះរបស់ក្រុមហ៊ុន Japan Farm Product ប្រចាំនៅកម្ពុជាបានប្រាប់តាមរយៈអ្នកបកប្រែថា ដោយសារសណ្ឋានដីនៅកម្ពុជាអំណោយផល និងដោយសារវាជាដំណាំថ្មីសម្រាប់កម្ពុជា ដូច្នេះហើយទើបក្រុមហ៊ុន Japan Farm Product ចាប់អារម្មណ៍ដាំពោតបារាំងសម្រាប់ដាក់លក់នៅលើទីផ្សារក្នុងប្រទេសកម្ពុជានេះ។ លោកថាក្រោយពីធ្វើការពិសោធដាំដុះដំណាំពោតបារាំងបានមួយរយៈពេលខ្លីមក ក្រុមហ៊ុនក៏សម្រេចចិត្តទិញដីចំនួនជាង1ហិកតា នៅក្នុងភូមិបឹងធំ សង្កាត់ពោធិ៍សែន និងជិត 1ហិកតាទៀត នៅម្តុំរោងចក្រ Tiger ក្នុងស្រុកកៀនស្វាយសម្រាប់ធ្វើការដាំដុះ។

លោកថា គិតចាប់តាំងពីពេលបណ្តុះកូនរហូតទទួលបានផល គឺត្រូវប្រើរយៈពេល50ថ្ងៃ ហើយអាចប្រមូលផលបានរយៈពេល 3ខែ។ ក្នុងអំឡុងពេលប្រមូលផល ដំណាំពោតបារាំងហុចផលឱ្យអាចបេះលក់បានជាប្រចាំរៀងរាល់ថ្ងៃ ក្នុងមួយថ្ងៃមួយដើមបេះបាន1ផ្លែឬ2ផ្លែ និងយ៉ាងតិចបំផុតទទួលបានទិន្នផលជាមធ្យម30គីឡូក្រាមក្នុងមួយហិកតា ហើយបច្ចុប្បន្នបន្លែពោតបារាំងនេះ ត្រូវបានក្រុមហ៊ុនដាក់លក់នៅតាមផ្សារទំនើបនានានៅក្នុងទីក្រុងភ្នំពេញ មានដូចជាផ្សារឡាក់គី ផ្សាផេនសល ផ្សាអារ៉ូណា ផ្សារថៃហួតជាដើម។

ពោតបារាំងជាចំណាប់អារម្មណ៍របស់អតិថិជនមកពីក្រៅប្រទេស ដូចជាអ៊ឺរ៉ុប អាមេរិក ជប៉ុន កូរ៉េ ចិន និងវៀតណាមជាដើម ហើយសម្រាប់ប្រជាជនខ្មែរវិញក៏កំពុងមានការនិយមទទួលទានកាន់តែច្រើនឡើងៗផងដែរ ដោយសារវាបានក្លាយជាបន្លែប្រចាំថ្ងៃសម្រាប់ពលរដ្ឋខ្មែរធ្វើម្ហូបពិសាបានច្រើនយ៉ាង ដូចជាយកទៅធ្វើជាបន្លែស្ងោ ស្ល ឬឆា ហើយជាពិសេសគេអាចយកវាទៅស្ងោធ្វើជាបន្លែអន្លក់ក៏បាន។

ចំណែកបច្ចេកទេសដាំដុះវិញគេមិនប្រើជីគីមីដូចបន្លែផ្សេងៗមួយចំនួនទៀតនោះទេ ពោលមុនដំបូងគេត្រូវភ្ជួរាស់ដីដោយបាចជីលាមកគោ ហើយហាលដីឱ្យស្ងួតរយៈពេលមួយសប្តាហ៏ក្រោយមកទៀតទើបគេត្រូវលើកជារង ដោយត្រូវបាចជីលាមកគោពូនជារងម្តងទៀត មុននឹងដាក់គ្រាប់ដាំ។ ក្រោយពីដាំហើយ គេត្រូវស្រោចទឹកវាព្រឹកល្ងាចជាប្រចាំដូចបន្លែផ្សេងៗដែរ ប៉ុន្តែសម្រាប់រដូវវស្សា កសិករត្រូវចេះមើលដីថា តើពេលណាត្រូវស្រោចទឹក ពេលណាមិនត្រូវស្រោច។ ក្នុងដំណាក់កាលលូតលាស់ គេត្រូវថែវាជាប្រចាំព្រោះថា ដំណាំប្រភេទនេះក៏ងាយទទួលរងកាយាយីពីសត្វល្អិតមួយចំនួនដូចជាស្រមោច និងដង្កូវជាដើមដែរ។ វិធីសាស្ត្រកម្ចាត់សត្វល្អិតចង្រៃទាំងនេះ គេមិនប្រើជីគីមីនោះទេ កសិករគ្រាន់តែយកស្លឹកស្តៅដាក់ត្រាំលាយជាមួយស្លឹកគ្រៃ និងផ្លែម្ទេសលាយគ្នាក្នុងទឹកល្បាយនោះរួចយកមកបាញ់ស្រោចពីលើដំណាំ វាមានប្រសិទ្ធភាពបំផុតក្នុងការកម្ចាត់សត្វល្អិតទាំងនោះ ហើយវាក៏មិនធ្វើឱ្យប៉ះពាល់ដល់អ្នកទទួលទានវាដែរ។ ដំណាំប្រភេទនេះមិនសូវរើសដីនោះទេ ទោះជាប្រភេទដីក្រហម ឬប្រភេទដីខ្មៅក៏អាចដាំបានដែរ លើកលែងតែដីល្បាយខ្សាច់ដែលមានលក្ខណៈស្ងួតប៉ុណ្ណោះមិនអំណោយផលក្នុងការដាំដុះទេ។

លោក Yone Ji ដដែលបានបន្តទៀតថា តាមពិតទៅមិនមែនថា ពោតបារាំងនេះទើបតែមាននោះទេ ពោលគឺប្រជាជនខ្មែរបានដាំជាយូរមកហើយនៅលើទឹកដីរបស់ខ្លួន គ្រាន់តែថា ជាការដាំគ្រាន់តែទុកសម្រាប់ហូបជាលក្ខណៈក្រុមគ្រួសារ ឬដាំនៅក្បែររបងដែលគេទុកចោលប៉ុណ្ណោះ មិនបានដាំវាសម្រាប់ធ្វើអាជីវកម្មទ្រង់ទ្រាយជាលក្ខណៈក្រុមហ៊ុនដូច្នេះទេ។ ប៉ុន្តែយ៉ាងណានោះ លោកនៅតែលើកទឹកចិត្តឱ្យប្រជាពលរដ្ឋខ្មែរចេះដាំពោតបារាំងនេះដើម្បីទុកជារបរបន្ថែមពីលើមុខរបរដែលមានសព្វថ្ងៃក្នុងការរកចំណូលបន្ថែមប្រចាំគ្រួសារ។ ប៉ុន្តែយ៉ាងណាក៏ដោយ វាទាមទារឱ្យការដាំដុះ ត្រូវគោរពតាមលក្ខខណ្ឌស្តង់ដារនៃការដាំដុះ ចៀសវាងដាច់ខាតពីការប្រើជីគីមីដែលនាំឱ្យខូចគុណភាពបន្លែ និងប៉ះពាល់ដល់សុខភាពអ្នកទទួលទានទៀតផង៕

November 16, 2017

ឱក សុគន្ធកញ្ញា ចូលរោងការនៅដើមឆ្នាំក្រោយ

នៅមុននេះបន្តិច មហាជនទូទៅ ជាពិសេសបណ្តាអ្នកគាំទ្រតែម្ដង បានសម្ដែងនូវភាពភ្ញាក់ផ្អើលយ៉ាងខ្លាំងនៅពេលដែលបានឃើញបណ្តាញសារព័ត៌មានក្នុងស្រុកជាច្រើនចេញផ្សាយជាបន្តបន្ទាប់ថា កំពូលតារាចម្រៀងស្រីល្បីឈ្មោះប្រចាំនៅក្នុងផលិតកម្មហង្សមាស កញ្ញា ឱក សុគន្ធកញ្ញា បានភ្ជាប់ពាក្យជាមួយកូនប្រុសច្បងរបស់ម្ចាស់ក្រុមហ៊ុនហង្សមាស ជាមួយនឹងការទទួលបានតំណែងថ្មីជានាយិកាគ្រប់គ្រងផលិតកម្មដ៏ធំមួយនេះផងដែរ។ ប៉ុន្តែក្រោយមកបន្តិច ព័ត៌មានមួយនេះត្រូវបានសាច់ញាតិ ជាពិសេស អ្នកម្តាយរបស់កំពូលតារាចម្រៀងរូបនេះចេញមុខធ្វើការបដិសេធទាត់ចោលទាំងស្រុង ជាមួយនឹងការបញ្ជាក់ថា វាគ្រាន់តែជាព័ត៌មានប្រឌិតតែប៉ុណ្ណោះ។

ដោយឡែកពេលនេះ ខណៈដែលព័ត៌មាននិយាយពីការភ្ជាប់ពាក្យមិនទាន់បានសាបរលាបទៅវិញផងនោះ ស្រាប់តែមានការទម្លាយចេញពីប្រភពដែលជាអ្នករួមក្រុមការងារក្នុងផលិតកម្មតែមួយបង្ហើបថា ប្រសិនបើមិនមានអ្វីប្រែប្រួលនោះទេ គឺនៅសល់មិនយូរនោះឡើយ ពោលគឺត្រឹមដើមឆ្នាំ2018ឆាប់ៗខាងមុខនេះ ទស្សនិកជន ក៏ដូចជាមហាជននឹងមានភាពភ្ញាក់ផ្អើលកាន់តែខ្លាំងនៅពេលដែលកំពូលតារាស្រីមានប្រជាប្រិយភាពខ្ពស់ម្នាក់នេះ លាចាកភាពនៅលីវដោយការបោះជំហានដើរចូលរោងការ ខណៈបុរសដែលមានសំណាងបានក្លាយជាកូនកំលោះគឺគ្មានអ្នកណាក្រៅពីកូនប្រុសសំណព្វរបស់កំពូលអ្នកជំនួញផ្នែកសិល្បៈកម្សាន្តក្រុមហ៊ុនហង្សមាសដូចពាក្យចចាមអារ៉ាមនោះឡើយ។

ទោះជាយ៉ាងណាក៏ដោយ ជាមួយនឹងដំណឹងចុងក្រោយនេះថា ឱក សុគន្ធកញ្ញា គ្រោងនឹងចូលរោងការនៅដើមឆ្នាំ2018ឆាប់ៗខាងមុខនេះ គេនៅមិនទាន់អាចជឿជាក់បាន100%នៅឡើយនោះទេ ដូច្នេះ សូមរង់ចាំតាមដានទាំងអស់គ្នាណា៎…៕

November 16, 2017

រុក្ខជាតិបណ្ដេញសត្វមូស ដ៏ពូកែដែលអ្នកគួរដាំនៅក្នុងផ្ទះ

សត្វមូស ចូលចិត្តរស់នៅកន្លែងដែលមានទឹកដក់ និងនៅតាមកន្លែងដែលស្តុក ព្រោះកន្លែងទាំងនោះគឺជាជម្រក និងជាកន្លែងបង្កកំណើតសត្វមូសជាច្រើនពាន់ច្រើនមឺុនក្បាល។ ក៏ប៉ុន្ដែនៅក្នុងចំណោមសត្វមូសទាំងអស់នោះគឺមាន សត្វមូសខ្លាដែលជាសត្វចម្លងមេរោគគ្រុនឈាមដ៏សាហាវ។ ដូច្នេះហើយនៅរដូវភ្លៀងធ្លាក់ អ្នកចាំបាច់ត្រូវតែប្រុងប្រយ័ត្នជាមួយនឹងសត្វមូស មិនត្រូវបណ្ដោយឱ្យសត្វកំណាចនេះ បានចាប់កំណើតនៅក្នុងបរិវេណផ្ទះរបស់អ្នកនោះទេ ដើម្បីការពារបុត្រធីតារបស់អ្នកមិនឱ្យសត្វមូសខាំ ព្រោះវាជាមូលហេតុបង្កឱ្យកើតមានជំងឺគ្រុនឈាម និងជំងឺគ្រុនក្ដៅផ្សេងៗ។

គ្រោះថ្នាក់ដែលកើតពីសត្វមូសខាំមានច្រើនណាស់ដូចជា៖
• ជំងឺគ្រុនឈាម ជាជំងឺដ៏កាចសាហាវមួយដែលចម្លងដោយសត្វមូសខ្លាញី វាអាចមានគ្រោះថ្នាក់ដល់ជីវិតរបស់មនុស្សថែមទៀតផង។
• ជំងឺរលាកខួរក្បាល ប្រភេទ JE ក៏ជាប្រភេទជំងឺដែលកើតឡើងដោយសាសត្វមូសជាភ្នាក់ងារចម្លងដូចគ្នាដែរ។
• ជំងឺហើមជើងដំរី ក៏បណ្ដាលមកពីសត្វមូសខាំដែរ។
• ជំងឺស៊ីកា គឺជាជំងឺដ៏គ្រោះថ្នាក់ថ្មីមួយទៀតដែលអ្នកគួរតែប្រុងប្រយ័ត្ន។

ដូច្នេះហើយនៅក្នុងខែថ្មីនេះ ឡារ៉ែន សូមលើកយកនូវឥទ្ធិពលរបស់រុក្ខជាតិមួយចំនួនដែលមានសមត្ថភាពក្នុងការបណ្ដេញសត្វមូសកំណាចចេញពីផ្ទះរបស់អ្នកបានតាមរយៈក្លិនរបស់វា។ ដូច្នេះសូមតាមដាន និងស្វែងយល់ទាំងអស់គ្នាដូចតទៅ។

1- Rosemary
រុក្ខជាតិមួយប្រភេទនេះ មិនមែនមានគុណប្រយោជន៍តែជាគ្រឿងទេសសម្រាប់ធ្វើម្ហូបនោះទេ វាក៏មានប្រសិទ្ធភាពក្នុងការបណ្ដេញសត្វមូសឱ្យចេញពីលំនៅឋានរបស់អ្នកផងដែរ ដោយគ្រាន់តែដាំរុក្ខជាតិប្រភេទនេះ នៅក្នុងសួនច្បារជាមួយរុក្ខជាតិ ឬដើមផ្កាផ្សេងៗជាការស្រេច។

2- ស្លឹកគ្រៃ
ស្លឹកគ្រៃ គឺជាប្រភេទរុក្ខជាតិដែលមានក្លិនក្រអូប តែផ្ទុយទៅវិញក្លិនរបស់វាមានឥទ្ធិពលអាចបណ្ដេញសត្វមូសយ៉ាងពូកែ។ ម្យ៉ាងវិញទៀតការដាំស្លឹកក្រៃនៅក្បែរផ្ទះ គឺជារឿងដ៏ប្រសើរបំផុត ព្រោះវាអាចជួយបណ្ដេញសត្វកំណាចមួយចំនួនបានដូចជា សត្វពស់ សត្វក្អែប និងសត្វមូសជាដើម។

3- ជីអង្កាម
ជារុក្ខជាតិឱសថបុរាណមួយប្រភេទ ដែលមានសមត្ថភាពអាចបណ្ដេញសត្វមូសបាន ដោយនៅក្នុងជីអង្កាមមានក្លិនម៉ុងតុល ឬក្លិនប្រហើររសជាតិហឹរតិចៗ ដែលធ្វើឱ្យមូសចាញ់ក្លិន និងអាចឱ្យមូសស្លាប់បាន។ មិនត្រឹមតែមូសនោះទេ នៅមានសត្វស្រមោច សត្វកន្លាត និងសត្វឃ្មុំក៏ចាញ់ក្លិននេះដែរ។

4- ជីនាងវង
ជនជាតិខ្មែរយើងពេញនិយមជាមួយនឹងក្លិនជីនាងវងនៅក្នុងការបង់សម្លរ ឬស្ងោរជ្រក់ជាដើម តែអាថ៌កំបាំងរបស់ជីមួយប្រភេទនេះ ក៏អាចជួយកម្ចាត់សត្វមូសឱ្យចេញពីផ្ទះរបស់អ្នកផងដែរ។

5- ជីបហោ
ជីបហោ មិនត្រឹមតែជាឱសថបុរាណព្យាបាលជំងឺប្រព័ន្ធផ្លូវដង្ហើមនោះទេ វាក៏អាចកម្ចាត់សត្វមូសបាន ព្រមទាំងធ្វើឱ្យអ្នកមានសុខភាពល្អថែមទៀតផង៕

November 16, 2017

ប្រេងស្លឹកប្រេងខ្យល់! ប្រសិទ្ធភាពកម្ចាត់ស្នាមផ្លែលើស្បែកដោយនឹកស្មានមិនដល់

ស្នាមផ្លែលើសាច់ បានក្លាយជាផ្នែកមួយដែលធ្វើឱ្យស្ត្រីមួយចំនួនត្រូវសម្រចចិត្តជ្រើសរើសទិញ និងស្លៀកពាក់សម្លៀកបំពាក់មួយចំនួនទាំងដែលខ្លួនមិនបានស្រឡាញ់ពេញចិត្ត ហេតុផលក៏ព្រោះតែដើម្បីបិទបាំងស្នាមផ្លែដ៏អាក្រក់មើលនៅលើស្បែក។ ស្នាមផ្លែនេះភាគច្រើនកើតឡើងក្រោយពីការមានរបួសស្នាមផ្សេងៗ ប៉ុន្តែវាមិនមែនកើតឡើងលើសាច់មនុស្សគ្រប់គ្នានោះទេ។ ក្រោយពីកើតមានសភាពបែបនេះហើយ មានមនុស្សមួយចំនួនបានខិតខំព្យាបាលដោយវិធីផ្សេងៗគ្នា ខ្លះក៏បានទទួលផលជាទីពេញចិត្ត ខ្លះទៀតក៏បានតិចតួច ចំណែកអ្នកខ្លះទៀតក៏មិនទទួលបានផលអ្វីទាល់តែសោះ ព្រោះតែគាត់ខ្វះសេចក្តីព្យាយាមក្នុងការព្យាបាល ឬខ្វះលទ្ធភាពក្នុងការចំណាយជាដើម។ ប្រេងដែលចម្រាញ់ចេញពីរុក្ខជាតិម្យ៉ាងដែលមានឈ្មោះថា ដើមប្រេងខ្យល់ (Tea Tree Oil) ត្រូវបានរកឃើញថាមានប្រសិទ្ធភាពក្នុងការព្យាបាលស្នាមផ្លែនៅលើស្បែកគួរឱ្យកត់សម្គាល់។

បើទោះជាអ្នកស្រាវជ្រាវបានកំណត់ថា ប្រេងស្លឹកប្រេងខ្យល់បានផ្តល់នូវគុណប្រយោជន៍មួយចំនួនចំពោះសុខភាពក៏ពិតមែន ប៉ុន្តែវាក៏ត្រូវបានគេកំណត់ថា ជាប្រេងរុក្ខជាតិដែលអាចជួយព្យាបាលបញ្ហានៅលើស្បែកដូចជា ស្នាម ស្នាមដាច់រយះ ស្នាមផ្លែ និងស្នាមមុនជាដើមផងដែរ។ ចង់ជ្រាបកាន់តែច្បាស់ថា តើអ្នកត្រូវធ្វើដូចម្តេចខ្លះ ដើម្បីឱ្យប្រេងប្រភេទនេះជួយកម្ចាត់ផ្លែលើស្បែករបស់អ្នកបាននោះ សូមអានអត្ថបទខាងក្រោមនេះដូចតទៅ៖

ប្រេងស្លឹកប្រេងខ្យល់ និងថ្នាំអាស្ពេរីន ៈ យកថ្នាំអាស្ពេរីនចំនួន4គ្រាប់ កិនវាឱ្យបែក លាយជាមួយទឹក3-4ដំណក់ កូរវាឱ្យរលាយសព្វចូលគ្នា។ យកល្បាយដែលលាយរួចទៅលាបលើស្បែកត្រង់កន្លែងដែលមានផ្លែ រួចទុកចោល15-30នាទី រហូតដល់វាស្ងួត។ បន្ទាប់មកលាងសម្អាតជាតិថ្នាំនោះចេញជាមួយទឹកស្អាត រួចបន្តដោយការយកប្រេងស្លឹកប្រេងខ្យល់2-3ដំណក់លាបត្រង់កន្លែងផ្លែលើស្បែក (មិនបាច់លាងចេញទៀតទេ)។ថ្នាំអាស្ពេរីន គឺជាសារធាតុផ្សំដែលអាចជួយសម្អាតស្បែកជាមួយសារធាតុផ្សំសកម្ម ដែល
មិនត្រឹមតែអាចព្យាបាលស្នាមនោះទេ តែវាថែមទាំងអាចព្យាបាលមុន និងបញ្ឈប់ការរីករាលដាលនៃផ្លែសាច់បានថែមទៀតផង។

ប្រេងស្លឹកប្រេងខ្យល់ អំបិល និងប្រទាលកន្ទុយក្រពើ ៈ អំបិល គឺជាភ្នាក់ងារសម្លាប់មេរោគដ៏អស្ចារ្យ។ ដាក់ទឹក2ស្លាបព្រាបាយ និងអំបិល1ស្លាបព្រាបាយ ដាំលើភ្លើង រួចកូររហូតដល់អំបិលរលាយ។ ជ្រលក់សំឡីមួយដុំតូចចូលទៅក្នុងទឹកនោះ រួចយកវាមកសង្កត់ពីលើសាច់ផ្លែនោះប្រហែល5នាទី សឹមយកសំឡីនោះចេញ ហើយលាបប្រេងស្លឹកប្រេងខ្យល់(3-5ដំណក់) ពីលើ។ រង់ចាំប្រមាណជា5នាទី រហូតទាល់តែប្រេងស្លឹកប្រេងខ្យល់នោះត្រូវបានស្រូបចូលទៅក្នុងស្បែក រួចលាបប្រទាលកន្ទុយ-ក្រពើ កន្លះស្លាបព្រាកាេហ្វពីលើជាការស្រេច។ជាតិអន្ធិលនៃប្រទាលកន្ទុយក្រពើ ធ្វើការជាមួយប្រេងស្លឹកប្រេងខ្យល់ ដើម្បីទប់ស្កាត់ការរីករាលដាលនៃការរលាកហើមផ្សេងៗនៅលើស្បែកដែលមានផ្លែ។

ប្រេងស្លឹកប្រេងខ្យល់ និងប្រេងវីតាមីន E ៈ ប្រេងស្លឹកប្រេងខ្យល់ និងប្រេងវីតាមីន E លាយចូលគ្នាក្នុងបរិមាណស្មើគ្នា រួចយកមកលាបត្រង់សាច់ផ្លែ ហើយទុកវាចោលក្នុងរយៈពេលយូរប៉ុណ្ណាក៏បាន ប៉ុន្តែមុនអនុវត្តសូមសម្អាតស្បែករបស់អ្នកឱ្យបានស្អាជាមុនសិន។
វីតាមីន E ជាប្រភពនៃ Antioxidants ដែលអាចជួយស្បែកប្រឆាំងនឹងការបំផ្លាញនានា។

សូមបញ្ជាក់ថាសម្រាប់វិធីនីមួយៗខាងលើនេះត្រូវធ្វើឱ្យបានម្តងក្នុងមួយថ្ងៃ ហើយត្រូវធ្វើវាឱ្យបានទៀងទាត់ជារៀងរាល់ថ្ងៃ។ ប្រេងស្លឹកប្រេងខ្យល់ប្រហែលជាមិនអាចព្យាបាលសាច់ផ្លែបានទាំងស្រុងនោះទេ ប៉ុន្តែសូមចាំថាយ៉ាងហោចណាស់វាក៏អាចបន្ថយការបង្ហាញចេញ និងរារាំងមិនឱ្យផ្លែសាច់រីកលូតលាស់កាន់តែធំបានដែរ ហើយប្រសិនបើអ្នកធ្វើវាឱ្យបានទៀងទាត់នោះ រយៈពេល3-4សប្តាហ៍ក្រោយមកអ្នកនឹងបានឃើញពីភាពខុសប្លែកគ្នារវាងពេលមុន និងក្រោយពេលអនុវត្តជាមិនខាន៕

November 16, 2017

នី មុន្នីនាថ ជាប់ចោទពីបទឆបោក

មុននេះបន្តិច អ្នកណាៗក៏សុទ្ធតែបានលើកសរសើរ និងស្ញប់ស្ញែងចំពោះជោគវាសនារបស់កំពូលតារាសម្ដែងសម្បុរស្រអែមមានជំនាញខាងសម្រក់ទឹកភ្នែក នី មុន្នីនាថ ដែលចៀសផុតពីរឿងអាស្រូវ ជាពិសេស ថែមទាំងមានគូដណ្ដឹងជាអាណិកជន មានទ្រព្យធនរាប់ម៉ឺនដុល្លារ និងមានសមត្ថភាពអាចធានារូបនាងឱ្យទៅរស់នៅស្របច្បាប់នៅសហរដ្ឋអាមេរិកថែមទៀតផង។

ដោយឡែកពេលនេះ មិនថាចំពោះតែអ្នកធ្លាប់កោតសរសើរដែលស្ថិតនៅក្នុងចង្កោមអ្នកមានអាជីពសិល្បៈនោះទេ សូម្បីតែមហាជនទូទៅក៏នាំគ្នាបើកភ្នែកធំបង្ហាញពីភាពភ្ញាក់ផ្អើលយ៉ាងខ្លាំង ខណៈដែលធ្លាយដំណឹងដ៏ក្ដៅគគុកមកថាពេលនេះ នី មុន្នីនាថ បាននិងកំពុងជាប់ចោទពីបទឆបោក និងរំលោភលើសេចក្ដីទុកចិត្ត ដែលដើមបណ្ដឹងគឺជាគូដណ្ដឹងរបស់នាង គឺលោក អឹុង សូឡា ដែលទើបតែផ្តាច់ពាក្យថ្មីៗនោះតែម្ដង។ ចំពោះអង្គហេតុក្នុងពាក្យបណ្ដឹងដែលតម្កល់នៅសាលាដំបូងរាជធានីភ្នំពេញខាងលើបានលើកឡើងថា ដើមចមរហូតឈានដល់ដំណាក់កាលប្ដឹងផ្តល់នេះ គឺបណ្តាលមកពី នី មុន្នីនាថ មិនគោរពតាមការសន្យា ដែលកាលដើមឡើយ បន្ទាប់ពីអ្នកទាំងពីរមានទំនាក់ទំនងគ្នាជ្រាលជ្រៅ ភាគីខាងបុរស គឺលោក អឹុង សូឡា បានចំណាយពេលនិងថវិកា ក្នុងការចុះឡើងរវាងកម្ពុជា-អាមេរិក ដើម្បីរត់ការធានា នី មុន្នីនាថ ទៅរស់នៅអាមេរិកស្របច្បាប់ លុះក្រោយមក នី មុន្នីនាថ មិនព្រមចេញទៅតាមការរត់ការច្បាប់នោះទេ ហើយថែមទាំងព្យាយាមពន្យារពេលម្ដងហើយម្ដងទៀត រហូតកើតមានបញ្ហា។

យ៉ាងណាក៏ដោយ ពាក់ព័ន្ធទៅនឹងការប្ដឹងផ្តល់ខាងលើនេះ នី មុន្នីនាថ ហាក់មិនបានបង្ហាញពីភាពខ្លាចរអារនោះទេ ដោយនាងថែមទាំងបានបញ្ជាក់ថា មិនថារឿងនេះដំណើរការយ៉ាងណានោះទេ នាងក៏នៅតែមិនព្រួយបារម្ភនោះដែរ ប៉ុន្តែបើឈានដល់ដំណាក់កាលដែលទ្រាំលែងបាន នាងនឹងដាក់ពាក្យប្ដឹងបកវិញជាក់ជាមិនខាន ដើម្បីបញ្ជាក់ពីភាពស្អាតស្អំរបស់នាង មិនជាប់ពាក់ព័ន្ធទៅនឹងការចោទប្រកាន់នោះទេ៕

November 16, 2017

រមណីយដ្ឋាន «ឋានសួគ៌បូកគោ» នាំយកថវិកាសប្បុរសធម៌ប្រគល់ជូនមន្ទីរពេទ្យគន្ធបុប្ផា

បន្ទាប់ពីប្រមូលបានថវិកាពីកម្មវិធី និងមហាព្រឹត្តិការណ៍សប្បុរសធម៌លើកទី4 នៃការរត់ប្រណាំងអន្តរជាតិពាក់កណ្តាលម៉ារ៉ាតុង និងប្រណាំងកង់ឋានសួគ៌បូកគោ ដែលស្ថិតនៅលើភ្នំបូកគោ ក្នុងខេត្តកំពត កាលពីថ្ងៃទី 28-29 ខែតុលា ឆ្នាំ2017 កន្លងទៅនោះ នៅរសៀលថ្ងៃទី15 ខែវិច្ឆិកា ក្រុមហ៊ុនបាននាំយកថវិកាចំនួន 4700 ដុល្លារ ទៅប្រគល់ជូនមន្ទីរពេទ្យគន្ធបុប្ផា ។

តំណាងឱ្យក្រុមហ៊ុន លោក កែវ សិទ្ធ នាយកផ្នែកលក់បានលើកឡើងថា ជារៀងរាល់ឆ្នាំ រមណីយដ្ឋានឋានសួគ៌បូកគោ តែងតែរៀបចំព្រឹត្តិការណ៍សប្បុរសធម៌ គឺការរត់ប្រណាំងអន្តរជាតិពាក់កណ្តាលម៉ារ៉ាតុង និងប្រណាំងកង់ឋានសួគ៌បូកគោនៅលើភ្នំបូកគោ ដើម្បីប្រមូលថវិកាសម្រាប់ជួយឧបត្ថម្ភដល់មន្ទីរពេទ្យគន្ធបុប្ផាដែលជាក្តីសង្ឃឹមរបស់កុមារក្រីក្រកម្ពុជា។ នេះជាសកម្មភាពលើកទី 4 ហើយ ដែលខាងឋានសួគ៌បូកគោ បានរៀបចំសកម្មភាពមហាព្រឹត្តិការណ៍សប្បុរសធម៌ដោយការរត់ប្រណាំងអន្តរជាតិពាក់កណ្តាលម៉ារ៉ាតុង និងប្រណាំងកង់ឋានសួគ៌បូកគោ ដើម្បីចូលរួលគាំទ្រដល់មន្ទីរពេទ្យគន្ធបុប្ផា ក្រោមការចូលរួមយ៉ាងសកម្មពីបណ្តាសណ្ឋាគារសុខាទាំងអស់ រួមជាមួយបណ្តាក្រុមហ៊ុនដៃគូសហការនានាផងដែរ ។

លោកបានបន្តទៀតថា ៖ ជាការពិតសម្រាប់ថវិកាខាងលើនេះ វាមានចំនួនតិចពិតមែន ប៉ុន្តែយ៉ាងហោចណាស់ក៏បានចូលរួមចំណែក និងជួយ សម្រាលបន្ទុកលើការចំណាយទាំងស្រុងរបស់មន្ទីរពេទ្យដែរ ។ ឆ្នាំនេះយើងប្រមូលបានថវិកាចំនួន 4700 ដុល្លារ ហើយយើងរំពឹងថាឆ្នាំក្រោយអាចមានចំនួនកើនឡើងច្រើនជាងនេះ ដើម្បីជម្រុញការជួយដល់កុមារ ដែលជាធនធានមនុស្សសម្រាប់អភិវឌ្ឍប្រទេសកម្ពុជាឱ្យកាន់តែមានការរីកចម្រើនបន្តទៀត ហើយវាក៏ជាគំរូមួយដ៏ល្អដែលបង្ហាញឱ្យឃើញពីសណ្តានចិត្តខ្មែរចេះជួយខ្មែរ៕

November 15, 2017

បកស្រាយចម្ងល់iPhone 9 បាត់ទៅណា?

ដូចដែលយើងបានដឹងតាំងពីអំឡុងពេលបង្ហាញខ្លួនហើយថា Apple ប្រកាសឈ្មោះហៅរបស់ Apple ស៊េរីថ្មីថា Apple ten ដោយសារស្ថិតក្នុងឋានៈជា Apple ស៊េរីអាយុគ្រប់1ទសវត្សរ៍ ទន្ទឹមគ្នានឹង iPhone 8 និង iPhone8 Plus ដែលទោះជាក្នុងផ្លូវទិចនិកវិញ លក្ខណៈសម្បត្តិដែលចេញមកនោះ យើងអាចប្រាប់បានថា វាគួរតែជា iPhone 7s និង iPhone 7s Plus ច្រើនជាងក៏ដោយ។ ដូច្នេះនៅពេល Apple បង្ហាញផលិតផលចេញមកបែបនេះហើយ ក៏មានន័យថា Apple មានចេតនាឈានរំលងឈ្មោះរបស់ iPhone 9 ទៅហើយឬយ៉ាងណា?

ប្រភពព័ត៌មាន The Verge បានផ្តល់បទវិភាគមួយដ៏គួរឱ្យចាប់អារម្មណ៍ថា អ្វីៗទាំងអស់នោះគឺមកពីយុទ្ធសាស្ត្រទីផ្សារដ៏ឈ្លាសវៃរបស់Apple ដែលជ្រើសរើសប្រើឈ្មោះរបស់ iPhoneX តាំងពីក្នុងអំឡុងពេលពិធីសម្ពោធបង្ហាញខ្លួន និងធីហ្ស៊ើរ៍ផ្សេងៗដើម្បីឱ្យអ្នកប្រើប្រាស់បានដឹងថា វាមានភាពពិសេសខ្លាំងជាងស៊េរី iPhone 8។

ទោះជាក្នុងផ្នែកទិចនិក ពួកគេនឹងបញ្ចេញសំឡេង iPhone X ថាជា iPhone ten ក៏ដោយ តែក៏អ្នកប្រើប្រាស់នឹងហៅ iPhone ស៊េរីនេះថាជា iPhone X តាំងពីមុនរួចមកហើយ និងមូលហេតុសំខាន់ដែល Apple មិនប្រើឈ្មោះថា iPhone ten តែម្ដងទៅនោះ គឺដោយសារថា បើសិនជាធ្វើបែបនោះ iPhone 8 និង iPhone8 Plus នឹងក្លាយជាទំនិញដែលចាស់ជាង iPhone10 ភ្លាមតែម្ដងហ្នឹងឯង។

ប្រាកដណាស់ថា ល្បិចខាងទីផ្សារទាំងនេះមិនមែនជារឿងថ្មីនោះទេ ព្រោះកាលពីពេលមុននេះ Microsoft ក៏ធ្លាប់បានធ្វើរួចមកហើយក្នុងការបង្ហាញខ្លួន Windows 10 ដែលពួកគេក៏បានរំលង Windows 9 ចោលដូចគ្នា ដែលការជ្រើសរើសធ្វើបែបនេះ គឺដើម្បីជាចិត្តសាស្ត្រឱ្យអតិថិជនដែលកំពុងប្រើ Windows 7 នោះ មានអារម្មណ៍ថា Windows ដែលខ្លួនឯងកំពុងប្រើនេះ វាចាស់ហើយ និងត្រូវប្រញាប់អាប់ហ្ក្រេតទៅប្រើ Windows 10 ហ្នឹងឯង។

នៅពេលពិចារណាពីផ្នត់គំនិតខាងលើនោះហើយ វាជារឿងមួយដែលអាចទៅរួចខ្លាំងណាស់ថា iPhone 9 អាចនឹងមិនបានត្រូវរំលងចោលរហូតទៅនោះទេ តែអាចនឹងត្រូវប្រើជាមួយ iPhone ថ្មីណាមួយក្នុងឆ្នាំ2018ខាងមុខនេះ៕

November 15, 2017

Author: វល័ក្ខ