វល័ក្ខ - La Reine Media

ក្រសួងទេសចរណ៍ដាក់ផែនការយុទ្ធសាស្ដ្រ បង្កើតការងារផ្ទាល់ឱ្យបាន1លាននាក់ក្នុងឆ្នាំ2020

ភ្នំពេញ – ដើម្បីបង្កើតធនធានមនុស្សក៏ដូចជាការងារបន្ថែមលើជំនាញ ក្រសួងទេសចរណ៍ និងប្រធានគណៈកម្មាធិការជាតិអ្នកជំនាញទេសចរណ៍ បានប្រកាសអនុវត្តផែនការយុទ្ធសាស្ត្រអភិវឌ្ឍន៍ធនធានមនុស្ស ក្នុងវិស័យទេសចរណ៍ 2017-2025ដើម្បីបង្កើតការងារឲ្យបានជាង1.2លាននាក់នៅឆ្នាំ2025 និង1.7លាននាក់ នៅឆ្នាំ2030។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍មានប្រសាសន៍ថា ផែនការយុទ្ធសាស្ត្រនេះរៀបចំឡើងជាផែនទីសម្រាប់ចង្អុលទិសក្នុងការបង្កើតការងារ និងជំនាញជូនយុវជនកម្ពុជាស្របតាមស្តង់ដារជាតិ និងអាស៊ាន និងចូលរួមសម្រេចគោលដៅអភិវឌ្ឍន៍ប្រកបដោយនិរន្តរភាព 2020-2030 (SDGs) របស់អង្គការសហប្រជាតិ តាមរយៈវិស័យទេសចរណ៍ ពោលគឺអនុលោមតាមសេចក្តីថ្លែងការណ៍របស់អង្គការសហប្រជាជាតិ ឆ្នាំ2015 ដែលប្រកាសថា៖ «2017 ជាឆ្នាំអន្តរជាតិស្ដីពីទេសចរណ៍ ដើម្បីការអភិវឌ្ឍប្រកបដោយនិរន្តរភាព»។

ឯកឧត្ដមបន្ដថា ដើម្បីសម្រេចនូវគោលនយោបាយខាងលើ ក្រសួងទេសចរណ៍បានដាក់ចេញនូវគោលដៅរួមមួយចំនួនបន្ថែមទៀត ជាការរំពឹងទុកដែលកើតចេញពីការអនុវត្តផែនការយុទ្ធសាស្ត្រខាងលើ ក្នុងនោះរួមមាន៖

1៖ ឆ្នាំ2020 ក្រសួងទេសចរណ៍ និងភាគីពាក់ព័ន្ធត្រូវសហការចូលរួមបង្កើតការងារផ្ទាល់ឲ្យបានប្រមាណ 1លាននាក់ ហើយត្រូវជំរុញឲ្យមានអ្នកជំនាញយ៉ាងតិច 50% ត្រូវមានវិញ្ញាបនបត្រ ឬសញ្ញាបត្របញ្ជាក់សមត្ថភាពស្របតាមស្តង់ដារជាតិ និងអាស៊ាន តាមរយៈការបណ្តុះបណ្តាល ឬការវាយតម្លៃសមត្ថភាព។

2៖ ឆ្នាំ2025 ក្រសួងទេសចរណ៍ និងភាគីពាក់ព័ន្ធត្រូវសហការចូលរួមបង្កើតការងារផ្ទាល់ឲ្យបានប្រមាណ1.2លាននាក់ និងត្រូវសម្រេចឲ្យបានយុទ្ធនាការ «បុគ្គលិកម្នាក់ ជំនាញមួយ» ពោលគឺជំរុញឲ្យអ្នកជំនាញទេសចរណ៍ទាំងអស់ (100%) ឲ្យមានវិញ្ញាបនបត្រ ឬសញ្ញាបត្របញ្ជាក់សមត្ថភាពស្របតាមស្តង់ដារជាតិ និងអាស៊ាន។

3៖ ឆ្នាំ2030 ក្រសួងទេសចរណ៍ និងភាគីពាក់ព័ន្ធត្រូវសហការចូលរួមសម្រេចឲ្យបានគោលដៅអភិវឌ្ឍន៍ប្រកបដោយនិរន្តរភាព SDG4 «ធានាឲ្យបាននូវការអប់រំបណ្តុះបណ្តាល ប្រកបដោយគុណភាព សមធម៌ និងបរិយាប័ន្ន ព្រមទាំងលើកកម្ពស់ឱកាសសិក្សាពេញមួយជីវិតដល់ជនគ្រប់រូប» និង SDG8 «ជំរុញកំណើនសេដ្ឋកិច្ច និងការងារសមរម្យដល់ជនគ្រប់រូប» ក្នុងវិស័យទេសចរណ៍កម្ពុជា តាមរយៈការអភិវឌ្ឍធនធានមនុស្សក្រោមបរិបទជាតិ និងតំបន់។

នៅឆ្នាំ2016កន្លងទៅ វិស័យទេសចរណ៍កម្ពជាសម្រេចបានកំណើន 5% ដែលនាំចំណូលចូលសេដ្ឋកិច្ចប្រមាណ 3,400លានដុល្លារអាមេរិក ស្មើនឹង 12% នៃផលិតផលក្នុងស្រុកសរុប (GDP) ហើយបង្កើតការងារផ្ទាល់បានប្រមាណជាង62 ម៉ឺននាក់។ ដោយឡែកក្នុងរយៈពេល9ខែនៃឆ្នាំ2017 កម្ពុជាទទួលបានភ្ញៀវទេសចរអន្តរជាតិចំនួន 3,912,761នាក់ កើនឡើង11.5% ធៀបនឹងរយៈពេលដូចគ្នាក្នុងឆ្នាំ2016។ នៅឆ្នាំ2017 នេះក្រសួងទេសចរណ៍រំពឹងថា នឹងទទួលបានភ្ញៀវទេសចរ 5 លាន 6សែននាក់។

ជាងនេះ ឯកឧត្ដម ថោង ខុន បានបន្ថែមថា ដើម្បីសម្រេចបាននូវចក្ខុវិស័យដូចការរំពឹងទុកខាងលើ ក្រសួងទេសចរណ៍បានដាក់ចេញនូវទិសដៅសកម្មភាពសម្រាប់ឆ្នាំ2018 នាពេលខាងមុខ រួមមាន៖

ទី1៖ សហការគាំទ្រអនុវត្តកម្មវិធី 2018ជាឆ្នាំសម្រាប់ស្តង់ដារ និងវាយតម្លៃអ្នកជំនាញទេសចរណ៍ ឆ្ពោះទៅកាន់ការសិក្សាពេញមួយជីវិត សំដៅអភិវឌ្ឍកម្មវិធីបណ្តុះបណ្តាលដែលមានស្តង់ដារខ្ពស់ មានការទទួលស្គាល់ពីគ្រប់ភាគីពាក់ព័ន្ធ និងធ្វើការវាយតម្លៃទទួលស្គាល់សមត្ថភាពអ្នកជំនាញទេសចរណ៍ ដែលកំពុងបម្រើការងារបច្ចុប្បន្ន តាមរយៈការវាយតម្លៃការសិក្សាពីមុនឲ្យទទួលបានគុណវុឌ្ឍិជាក់លាក់ ដើម្បីតម្រង់ទិសអាជីពការងារពេញមួយជីវិត។

ទី2៖ ដាក់ចុះនូវគម្រោងសាកល្បងកម្មវិធីហ្វឹកហាត់ការងារ ដើម្បីបណ្តុះបណ្តាលអ្នកជំនាញកម្ពុជាឲ្យមានជំនាញវិជ្ជាជីវៈពិតប្រាកដ ស្របតាមទស្សនទានសកល «រៀនបណ្តើរ ធ្វើការបណ្តើរ»។ កម្មវិធីហ្វឹកហាត់ការងារក៏នឹងចូលរួមជំរុញឲ្យយុវជនក្រីក្រអាចមានលទ្ធភាពធ្វើការ និងសិក្សាក្នុងពេលតែមួយ ហើយទទួលបានវិញ្ញាបនបត្រ ឬសញ្ញាបត្រទទួលស្គាល់កម្រិតជាតិ និងអាស៊ាន។

ទី3៖ អនុវត្តគម្រោងបណ្តុះបណ្តាលជំនាញវិជ្ជាជីវៈទេសចរណ៍ដល់ពលករចំណាកស្រុក ដើម្បីផ្តល់ឱកាសការងារក្នុងវិស័យទេសចរណ៍ដល់ពលករទាំងនេះ។

ទី4៖ សហការជាមួយភាគីពាក់ព័ន្ធ និងអ្នកជំនាញ ដើម្បីអភិវឌ្ឍជំនាញទេសចរណ៍ផ្នែកស្ប៉ា និងសុខុមាលភាព សំដៅលើកកម្ពស់ជំនាញវិជ្ជាជីវៈនេះ ឲ្យមានការទទួលស្គាល់កម្រិតជាតិ និងអាស៊ាន។

ទី5៖ ដាក់ចុះការអនុវត្តកម្មវិធីបណ្តុះបណ្តាលជំនាញទេសចរណ៍អាស៊ានតាមវិទ្យាល័យចំណេះទូទៅ និងបច្ចេកទេសទូទាំងប្រទេស ដោយសហការជាមួយក្រសួងអប់រំ យុវជន និងកីឡា និងក្រសួងជំនាញផ្សេងៗទៀត។ កម្មវិធីបណ្តុះបណ្តាលនេះនឹងចូលរួមផ្តល់ជំនាញទេសចរណ៍ដល់យុវជនកម្ពុជា តាំងពីវ័យក្មេងកម្រិតវិទ្យាល័យ ដែលជាមូលដ្ឋានក្នុងការអភិវឌ្ឍអាជីពពេញមួយជីវិត។

ទី6៖ ជំរុញកម្មវិធីឥណទានដល់សិស្សនិស្សិតរៀនជំនាញវិជ្ជាជីវៈទេសចរណ៍ ដើម្បីសម្រួលជីវភាពសិក្សា និងលើកទឹកចិត្តសិស្សានុសិស្សជាពិសេស សិស្សបោះបង់ការសិក្សា ពលករចំណាកស្រុកដែលត្រឡប់មកវិញ និងយុវជនស្ថិតក្នុងគ្រួសារក្រីក្រ ឱ្យចាប់យកជំនាញវិជ្ជាជីវៈទេសចរណ៍កាន់តែផុលផុសថែមទៀត។

ទី7៖ បន្តជំរុញអនុវត្ត និងប្រើប្រាស់សៀវភៅជំនាញទេសចរណ៍ សម្រាប់កត់ត្រាគុណវុឌ្ឍិរបស់អ្នកជំនាញដែលបានបញ្ចប់ការសិក្សា និងទទួលការវាយតម្លៃរួចហើយសម្រាប់រកការងារធ្វើ និងអភិវឌ្ឍខ្លួនក្នុងវិស័យទេសចរណ៍បានយ៉ាងល្អប្រសើរ។

ទី8៖ បន្តពង្រឹងសមត្ថភាពគ្រឹះស្ថានបណ្តុះបណ្តាលជំនាញវិជ្ជាជីវៈទេសចរណ៍ គ្រូបង្គោល និងអ្នកវាយតម្លៃបង្គោលឱ្យមានសមត្ថភាពកាន់តែល្អប្រសើរ ចូលរួមអនុវត្តផែនការយុទ្ធសាស្ត្រដែលបានដាក់ចុះ៕

November 30, 2017

លោក កឹម អឿន៖ មនុស្សគួរដកអត្តសញ្ញាណទុកទៅម្ខាងសិន ហើយទទួលយករឿងល្អគ្រប់យ៉ាង

នៅក្នុងការរស់នៅ មនុស្សម្នាក់ៗមានវិធីរៀងៗខ្លួនក្នុងការអភិវឌ្ឍខ្លួនឯងឆ្ពោះទៅរកភាពជាបុគ្គលអស្ចារ្យ ឬបុគ្គលដែលទទួលបានការគោរព និងឱ្យតម្លៃពីសង្គម។ ក្នុងចំណោមវិធីទាំងអស់ក្នុងការអភិវឌ្ឍខ្លួនឯង ការបើកចិត្តឱ្យទូលាយជារឿងសំខាន់ចម្បងមួយដែលជាចំណុចបើកផ្លូវទៅកាន់ភាពជាអ្នកដែលមានគុណតម្លៃជាលក្ខណៈសកល។

លោក កឹម អឿន នាយកប្រតិបត្តិនៃវិទ្យាស្ថានសិក្សាដើម្បីជោគជ័យ បានលើកឡើងនៅក្នុងវេទិកាភាពជាអ្នកដឹកនាំថា អ្នកដែលមនុស្សគ្រប់គ្នាគួរតែត្រៀមចាត់ទុកថា ជាមនុស្សសកលដែលមានតម្លៃសម្រាប់សង្គម និងមនុស្សទូទៅ គឺមនុស្សដែលបើកចំហ និងទទួលយកបាននូវអ្វីដែលល្អ និងមានភាពទទួលខុសត្រូវ។ ភាពជាប្រជាជនសកលគឺជារឿងសំខាន់មួយដែលអាចធ្វើឱ្យយើងងាយស្រួលក្នុងការរស់នៅ ឬធ្វើការងារដោយអាចប្រើគំនិតប្រកបដោយភាពទូលំទូលាយ និងមានភាពជាអ្នកដឹកនាំដ៏ល្អថែមទៀតផង។

លោក កឹម អឿន បាននិយាយថា៖ «ដើម្បីក្លាយខ្លួនជាមនុស្សដ៏អស្ចារ្យ និងមានតម្លៃម្នាក់ យើងម្នាក់ៗគួរទុកអត្តសញ្ញាណ (identity) ទៅម្ខាងសិន ហើយទទួលយករឿងគ្រប់យ៉ាង»។

ជាការពិតណាស់ បើតាមលោក កឹម អឿន មនុស្សជាច្រើនតែងតែប្រកាន់ខ្លួនថា ខ្លួនឯងជាអ្នកចេះ ជាមនុស្សមានសមត្ថភាពស្រាប់ហើយ ជាមនុស្សដែលជំនាញផ្នែកនេះ ឬជំនាញផ្នែកនោះជាដើម ហើយព្យាយាមប្រើតែសមត្ថភាពដែលខ្លួនមាន និងមិនព្រមទទួលយកនូវអ្វីដែលថ្មីពីមជ្ឈដ្ឋានខាងក្រៅនោះទេ បើទោះបីជាដឹងថា រឿងនោះជារឿងល្អក៏ដោយ។ តាមពិតទៅប្រសិនបើមនុស្សអាចដកអត្តសញ្ញាណរបស់ខ្លួនទុកមួយឡែកសិន បន្ទាប់មកពិចារណាទទួលយករឿងល្អៗពីគ្រប់ទីកន្លែង គេនឹងអាចក្លាយជាមនុស្សដែលមានទាំងជំនាញគោល និងជំនាញទូទៅ ឬជំនាញទន់ ដែលពិភពលោកកំពុងត្រូវការ៕

November 30, 2017

ការសាកល្បងដាំពូជស្រូវថ្មីរបស់ជប៉ុននៅកម្ពុជាទទួលបានជោគជ័យខ្ពស់

ភ្នំពេញ៖ លោកសាស្ត្រាចារ្យ Qi Shaowu នាយកមជ្ឈមណ្ឌលវិទ្យាស្ថានស្រាវជ្រាវពូជស្រូវ China National Hybrid Rice R&D Center បានថ្លែងឱ្យដឹងថា ការសាកល្បងដាំស្រូវប្រភេទថ្មីនាំមកពីប្រទេសជប៉ុនកំពុងទទួលបានជោគជ័យខ្លាំងនៅក្នុងប្រទេសកម្ពុជា។

លោកបញ្ជាក់ថា ការសាកល្បងដាំដុះពូជអង្ករគ្រាប់ឃ្លីនៅកម្ពុជាទទួលបានលទ្ធផលល្អប្រសើរខ្លាំងជាងពូជស្រូវដទៃ ដោយក្នុង1ហិកតាទទួលផលបានប្រមាណជា 7.7តោននៅក្នុងខេត្តកំពង់ស្ពឺ និង 7.4តោននៅក្នុងខេត្តពោធិ៍សាត់។ លក្ខណៈពិសេសរបស់ពូជស្រូវជប៉ុនប្រភេទនេះមានចំនួន4យ៉ាងដែលត្រូវបានជ្រើសរើសយកមកដាំនៅប្រទេសកម្ពុជាដោយពូជនីមួយៗអាចធន់នឹងទឹកជំនន់ ធន់នឹងជំងឺឆ្លង និងត្រូវការប្រើប្រាស់សារធាតុជីតិចបំផុត ជាពិសេសធន់នឹងអាកាសធាតុក្តៅ។ បច្ចុប្បន្នប្រភេទពូជស្រូវជប៉ុននេះកំពុងមានតម្រូវការទីផ្សារខ្ពស់ទូទាំងពិភពលោក ជាពិសេសប្រទេសចិនដែលកំពុងមានការខ្វះខាតអង្ករប្រភេទនេះជាង3លានតោនក្នុងមួយឆ្នាំ។

ឯកឧត្តមវេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ បានថ្លែងកោតសសើរ និងវាយតម្លៃខ្ពស់ចំពោះមជ្ឈមណ្ឌលវិទ្យាស្ថានស្រាវជ្រាវពូជស្រូវ China National Hybrid Rice R&D Center ជាពិសេសលោកសាស្ត្រាចារ្យ Qi និងសហការីដែលបានមកសិក្សាស្រាវជ្រាវពូជអង្ករគ្រាប់ឃ្លីថ្មីនេះនៅប្រទេសកម្ពុជា និងមានបំណងវិនិយោគ និងសហការជាមួយក្រសួងក្នុងការផ្លាស់ប្តូបទពិសោធការងារដើម្បីអភិវឌ្ឍវិស័យស្រូវអង្ករនៅកម្ពុជាឱ្យកាន់តែមានកិត្យានុភាពលើទីផ្សារស្រូវអង្ករពិភពលោកដែលស្របជាមួយគោលដៅអាទិភាពរបស់រាជរដ្ឋាភិបាលក្នុងការធានាសន្តិសុខស្បៀង និងបង្កើតការនាំចេញអង្ករកម្ពុជាឱ្យបានលើសពី 1លានតោនក្នុង1ឆ្នាំ។

ឯកឧត្តមរដ្ឋមន្ត្រីក៏បានផ្តល់អនុសាសន៍ណែនាំមួយចំនួនដល់លោកសាស្ត្រាចារ្យ Qi និងសហការី ត្រូវរៀបចំសេចក្តីព្រាងអនុស្សរណៈនៃការយោគយល់គ្នា3ភាគី រវាងក្រុមហ៊ុនទទួលទិញអង្ករនេះទៅកាន់ទីផ្សារចិន ខណៈមជ្ឈមណ្ឌលវិទ្យាស្ថានស្រាវជ្រាវ និងក្រសួងកសិកម្ម រុក្ខាប្រមាញ់ និងនេសាទ នឹងត្រូវចុះហត្ថលេខានៅពាក់កណ្តាលខែធ្នូខាងមុខ។

ទន្ទឹមនឹងនេះត្រូវអនុវត្តនូវយុទ្ធសាស្ត្រមួយចំនួនគឺ

ទី1.គិតគូរពីការអនុវត្តដោយផ្សារភ្ជាប់វិស័យឯកជន និងកសិករតាមរយៈធ្វើការដាំដុះ និងផ្គត់ផ្គង់តាមកិច្ចសន្យា។

ទី2. ផ្តល់ស្រូវដែលមានតម្រូវការទីផ្សារខ្ពស់ដល់កសិករខ្មែរ។

ទី3.កំណត់តំបន់ដាំដុះដែលមានសក្តានុពលខ្ពស់ដើម្បីបង្កើនប្រសិទ្ធភាព និងគុណភាពអង្ករ។ ទី4.បន្តកិច្ចសហប្រតិបត្តិការល្អរវាងមជ្ឈមណ្ឌលវិទ្យាស្ថានស្រាវជ្រាវពូជស្រូវ និងក្រសួងដោយការបង្កើតក្រុមការងារ និងគណៈកម្មការ។

លោកសាស្ត្រាចារ្យ Qi Shaowu និងតំណាងក្រុមហ៊ុនចិនបានបញ្ជាក់យ៉ាងមុតមាំថា ក្រុមហ៊ុននឹងប្រមូលទិញប្រភេទស្រូវខាងលើទាំងអស់សម្រាប់នាំចេញទៅកាន់ទីផ្សារប្រទេសចិន នៅពេលកសិករកម្ពុជាផលិតបាន៕

November 30, 2017

ស្រាបៀរ HEINEKEN រៀបចំកម្មវិធី «កន្លែងចាស់ មិត្តចាស់»

ភ្នំពេញ៖ ស្រាបៀរ Heineken ដែលជាស្រាបៀរគុណភាពលំដាប់ថ្នាក់អន្តរជាតិក្នុងពិភពលោក នឹងរៀបចំកម្មវិធីពិសេសដ៏អស្ចារ្យមួយ ដែលមានឈ្មោះថា «កន្លែងចាស់ មិត្តចាស់ (Old Place Old Friend)» នៅយប់ថ្ងៃទី 30 ខែវិច្ឆិកា ឆ្នាំ 2017 នៅ Apros Pub (អាប្រុសផាប់) ក្នុងទីក្រុងភ្នំពេញ។

កម្មវិធីកន្លែងចាស់ មិត្តចាស់ គឺជាកម្មវិធីពិសេស ហើយប្លែក ដែលបានរៀបចំឡើង ក្នុងគោលបំណងរម្លឹកដល់អនុស្សាវរីយ៍ចាស់ៗដែលធ្លាប់មានកន្លងមក ជាមួយមិត្តភ័ក្តិដែលបានរៀននៅវិទ្យាល័យ មហាវិទ្យាល័យ មិត្តភ័ក្តិរួមការងារ ក៏ដូចជាមិត្តភ័ក្តិកាលពីកុមារភាព ។ ក្នុងឱកាសពិសេសនេះផងដែរ ប្រិយមិត្តក៏ដូចជាអតិថិជនរបស់ស្រាបៀរ Heineken អាចធ្វើការណាត់ជួបនៅ Apros Pub ក៏ដូចជាស្តាប់នូវកម្រងបទចម្រៀងមនោសញ្ចេតនារបស់តារាចម្រៀង សំឡេងស្រទន់ លោក ដួង វិរៈសិដ្ឋ និងកញ្ញា វី ឌីណែត ព្រមទាំងរីករាយក្រេបនូវរសជាតិដ៏ល្បីល្បាញនៃស្រាបៀរ Heineken។

កម្មវិធីពិសេសនេះនឹងចាប់បើកពីម៉ោង 5 ល្ងាចរហូតដល់យប់ជ្រៅ នៅ Apros Pub ទីតាំងផ្ទះលេខ 21Eo ផ្លូវ322 សង្កាត់បឹងកេងកង1 ខ័ណ្ឌចំការមន រាជធានីភ្នំពេញ។ដោយពាំនាំមកនូវបទចម្រៀងមនោសញ្ចេតនារម្លឹកដល់អនុស្សាវរីយ៍ចាស់ៗសម្រាប់អ្នកគាំទ្រស្រាបៀរ Heineken ។

តោះយើងនាំគ្នាចែករំលែក ឬទូរស័ព្ទប្រាប់មិត្តភ័ក្តិរបស់អំពីកម្មវិធីពិសេសនេះ និងណាត់គ្នា ដើម្បីរម្លឹកដល់អនុស្សារីយ៍ចាស់ៗ ភាពសប្បាយរីករាយរបស់អ្នក។

សព្វថ្ងៃនេះ ស្រាបៀរ Heineken មានលក់នៅក្នុងបណ្តាប្រទេសជាង 192 នៅជុំវិញពិភពលោក។ ស្រាបៀរ Heineken គឺជាស្រាបៀរស្រាលស្រទន់ មានគុណភាពខ្ពស់ និងមានរសជាតិឆ្ងាញ់ ហើយក៏ជាស្រាបៀរល្បីរន្ទឺនៅទូទាំងពិភពលោកដោយសារតែគំនិត
ផ្តួចផ្តើមច្នៃប្រឌិតថ្មីរបស់ខ្លួន។

ចំពោះព័ត៌មានបន្ថែមអំពីកម្មវិធីពិសេសនេះសូមទំនាក់ទំនងតាមរយៈលេខ 097 490 9999 និង 097 608 5050 ឬកាន់គេហទំព័រផ្លូវការ៖

https://www.facebook.com/heineken

Heineken – Open Your World

សូមពិសាស្រាបៀរ Heineken ដោយទទួលខុសត្រូវ

November 30, 2017

បិតាស្ថាបនិក Android ដើរចេញពី Google បន្ទាប់ពីផ្ទុះរឿងអាស្រូវផ្លូវភេទជាកូនចៅ

យោងតាមការចេញផ្សាយរបស់សារព័ត៌មាន The Information បានឲ្យដឹងថា លោក Andy Rubin បិតាស្ថាបនិក Android បានដើរចេញពីក្រុមហ៊ុន Google បន្ទាប់ពីផ្ទុះរឿងអាស្រូវផ្លូវភេទជាមួយបុគ្គលិកក្រោមបង្គាប់។

ប្រភពខាងលើបានបញ្ជាក់ថា នៅពេលនេះ លោក Rubin បានចាកចេញពី Google បន្ទាប់ពីក្រុមហ៊ុនអ៊ីនធើណែតយក្សមួយនេះ បានចាប់ផ្ដើមបើកការស៊ើបអង្កេតផ្ទៃក្នុង ពាក់ព័ន្ធនឹងករណីលោក Rubin មានទំនាក់ទំនងផ្លូវភេទជាមួយនឹងស្ត្រីម្នាក់ដែលធ្វើការងារផ្ទាល់ជាមួយលោក។

ក្រោយពី The Information ចេញផ្សាយនូវព័ត៌មាននេះ លោក Mike Sitrick អ្នកនាំពាក្យរបស់លោក Rubin បានបញ្ជាក់ថា ការចាកចេញនោះមិនមែនពាក់ព័ន្ធនឹងករណីខាងលើឡើយ ពោលគឺលោកចាកចេញដោយសារហេតុផលផ្ទាល់ខ្លួន។ លោក Sitrick បានបញ្ជាក់បន្ថែមទៀតថា ស្ត្រីនោះបានធ្វើការនៅក្នុងក្រុម Android តាំងពីឆ្នាំ 2013 តែទំនាក់ទំនងរបស់អ្នកទាំងពីរគឺត្រឹមតែជាមេ និងកូនចៅប៉ុណ្ណោះ។

ទោះជាយ៉ាងនេះក្ដី ខាងក្រុមហ៊ុន Google នៅមិនទាន់មានប្រតិកម្ម ឬការឆ្លើយតបណាមួយឡើយ៕

November 30, 2017

HUAWEI សហការណ៍ឧបត្ថម្ភក្រុមហ៊ុន Smart ក្នុងការប្រគំតន្ត្រីដ៏អស្ចារ្យប្រចាំឆ្នាំ

HUAWEI ដែលគឺជាក្រុមហ៊ុនស្មាតហ្វូនលំដាប់ពិភពលោក ដែលកំពុងឡើងកូដ និងទទួលបានការពេញនិយមនៅទូទាំងពិភពលោក ក៏ដូចជានៅកម្ពុជាដែលទទួលបានចំណាត់ទី 2 ក្នុងបរិមាណលក់នាពេលថ្មីៗនេះ បានសហការណ៍ឧបត្ថម្ភជាមួយក្រុមហ៊ុន Smart ដែលជាក្រុមហ៊ុនទូរសព្ទ័ចល័តឈានមុខ និង តែងតែផ្តល់នូវបច្ចេកវិទ្យាឈានមុខគេនៅកម្ពុជា ក្នុងការប្រគំតន្ត្រីប្រចាំឆ្នាំដ៏កក្រើក នៅតាមបណ្តាខេត្តក្រុងធំៗ ចំនួន 5 ដូចជា កំពង់ចាម បាត់ដំបង បន្ទាយមានជ័យ ស្វាយរៀង និងកំពង់ស្ពឺ ។ គួរកត់សំគាល់ថា HUAWEI បានធ្វីឲ្យកក្រើក រញ្ផួយទីផ្សារស្មាតហ្វូន តាមរយៈការចេញ លក់ HUAWEI nova 2i ស៊េរីថ្មី ដែលមានរហ័សនាម «អាភ្នែក4» ពោល គឺអតិថិជន អ្នកលក់ ម្ចាស់ហាងទូរស័ព្ទ ពេញចិត្តគ្រប់បែបយ៉ាងនូវអ្វីដែល HUAWEI Nova 2i មាន និងពេលស្តុកមក ដល់អស់ ដល់អស់ 4 ដងមកហើយ រហូតបំបែកកំណត់ត្រាមិនដែលធ្លាប់មានពីមុនលើតួរលេខលក់ ភាពពុះកព្រោលពីអ្នកលក់ និងម្ចាស់ហាង ស្ទើរគ្រប់ៗ គ្នា គ្រប់ 25 ខេត្តក្រុងនៅកម្ពុជា ។

Huawei nova 2i គឺជាស្មាតហ្វូនថ្មីកាមេរ៉ា4 ដំបូងគេបង្អស់លើពិភពលោក ក្រោមរបកគំហើញថ្មីចុងក្រោយ របស់ក្រុមហ៊ុន Huawei ។ HUAWEI nova 2i បំពាក់អេក្រង់ធំ 5.9 អ៊ីញ ពេញចិត្ត ពេញភ្នែក ពេញគែម ច្បាស់ថ្លាឆ្វង់កម្រិត 2K (1080×2160) ងាយស្រួលក្នុងការទស្សនាភាពយន្ត តន្ត្រី យូធូប បណ្តាញសង្គម ពិសេស Live Facebook រឺ Video Calls រាងស្អាត ស្តើង ស្រាល ធន់ មាំ ងាយស្រួលកាន់ដោយដៃម្ខាង ជាពិសេសមានកាមេរ៉ាភ្លោះមុខក្រោយ អាចថតរូបភាពច្បាស់ស្រស់ស្អាត Pro Mode បែបសិល្បៈ Portrait, Wide Aperture, ថតរូបកំប្លែងៗបន្ថែម Effect, Bokeh ប្រហាក់ប្រហែលនឹងកាមេរ៉ាអាជីព ។

លោក អែម យុទ្ធូ នាយកជាន់ខ្ពស់ផ្នែកទីផ្សារបានឲ្យដឹងថា ក្រោយពីបើកការកម្ម៉ងទុកមុន រយៈពេល 4 សប្តាហ៍មក ក្រុមហ៊ុនទទួលបានស្តុកពីការកម្ម៉ង កើនលើស 4 ដងលើសការព្យាករណ៍ និង ក្រោយពីពិធីសម្ពោធផ្លូវការ នាថ្ងៃ 25 និង 26 ដ៏កក្រើកថ្មីៗនេះជាមួយប្រ៉ូម៉ូសិនយក្ស Huawei nova 2i លើសពីនេះក្រុមហ៊ុនក៏នឹងបន្ត សកម្មភាពទីផ្សារ ប្រ៉ូម៉ូសិនយក្ស និង ការឧបត្ថម្តដៃគូរសហការណ៍ ដើម្បីជំរុញ Huawei nova2i និងនាមសញ្ញា Huawei អោយកាន់តែទទួលបាននូវការពេញនិយមចូលចិត្តពីគ្រប់អតិថិជនគ្រប់ស្រទាប់វណ្ណៈ គ្រប់ទីកន្លែង គ្រង់ខេត្តក្រុង ដូចជា ទី1 ចូលរួមឧបត្ថម្ភ ជាមួយក្រុមហ៊ុនស្មាតក្នុងការប្រគំតន្ត្រីដ៏អស្ចារ្យប្រចាំឆ្នាំដ៏កក្រើក ទី 2 កម្មវិធីប្រកួតថតរូបដើម្បី អបអរស្វាគមន៍ឆ្នា៎ថ្មីឆ្នាំ 2018 ដែលមានឈ្មោះថា Huawei Photo Contest កាមេរ៉ា4 ពោលគឺ ថត 4ពេល 4ប៉ុស្តិ៍ រយៈពេលប្រកួត4សប្តាហ៏ 4ជ័យលាភី ទី 3 ចូលរួមឧបត្ថម្ភជាមួយក្រុមហ៊ុនស្មាតក្នុងការប្រគំតន្ត្រីដ៏អស្ចារ្យលំដាប់អន្តរជាតិដោយមានតារា Lee Chae-rin ដែលមហាជនស្គាល់ថា CL នៅថ្ងៃទី 09 ខែ ធ្នូ ឆ្នាំ 2017 នេះនាទីក្រុងភ្នំពេញផងដែរ។

ក្នុងការប្រគំតន្ត្រីដ៍កក្រើក Smart (Smart Mega Concert) នេះដែរ ក៏មានកម្មវិធីចាប់រង្វាន់ដ៏ច្រើនសន្ធឹក សន្ធាប់ ដោយគ្រាន់តែជាវកាតកោសស្មាត ទិញលេខស្មាតបញ្ចូលលុយ និងមានឱកាសឈ្នះរង្វាន់ធំ Huawei P10 Plus 1 រង្វាន់ Huawei nova2i 5រង្វាន់ Huawei Power Bank (13000 mAh) 5រង្វាន់ Huawei Bluetooth Speaker 5 រង្វាន់ និងរង្វាន់ច្រើនសន្ធឹកសន្ធាប់ទៀត ក្នុងមួយកន្លែង៕

November 30, 2017

លោក Pardew ត្រៀមពង្រឹងតំបន់ប្រយុទ្ធ ក្រោយតែងតាំងជាគ្រូបង្វឹក West Brom

លោក Alan Pardew ដែលជាគ្រូបង្វឹកទើបតែតែងតាំងថ្មី បានបញ្ជាក់ថា West Brom «នឹងលេងប្រកបដោយការវាយសម្រុកជានិច្ច» បើទោះបីការព្យាយាមនោះនឹងធ្វើឲ្យពួកគេអាចនឹងហូរឈាមតាមច្រមុះក៏ដោយ។

គ្រូបង្វឹកវ័យ56ឆ្នាំរូបនេះបានចូលមកជំនួសកន្លែងរបស់លោក Tony Pulis គ្រូបង្វឹកចាស់ដែលត្រូវបានបណ្តេញចេញកាលពីថ្ងៃពុធ ក្នុងកិច្ចសន្យាមួយដែលនឹងបន្តរហូតដល់ចុងរដូវកាលឆ្នាំ2019-2020។ លោក Pulis ត្រូវបានគេរិះគន់ទៅលើទម្រង់លេងរបស់ក្រុម ខណៈដែលពួកគេបានស៊ុតបាល់បញ្ចូលទីបានត្រឹមតែ9គ្រាប់គត់ ក្នុងចំណោមការប្រកួតលីក12លើកចុងក្រោយរបស់ពួកគេ។

លោក Pardew បានឲ្យដឹងថា៖ «រឿងដ៏សំខាន់បំផុតនោះគឺការឈ្នះការប្រកួត។ លោក Tony បានដឹកនាំយ៉ាងល្អ និងមានលក្ខណៈផ្សេងពីខ្ញុំ។ ខ្ញុំសង្ឃឹមថា នឹងធ្វើឲ្យក្រុមនេះមានសេរីភាពជាងមុនបន្តិច»។ West Brom បានកត់ត្រាជ័យជម្នះក្នុងការប្រកួតលីក2លើកដំបូងរបស់គេនៅរដូវកាលនេះ ប៉ុន្តែ ចាប់តាំងពីពេលនោះមក មិនបានទទួលជ័យជម្នះឡើយ និងបន្តជួបភាពត្រដាបត្រដួសជាបន្តបន្ទាប់ ដែលនាំឲ្យមានការបណ្តេញលោក Pulis ចេញពីតំណែងតែម្តង ក្រោយពីពួកគេរកបានត្រឹមតែ 12ពិន្ទុគត់ពីការប្រកួត 21លើក។ លោក Pardew បានឲ្យដឹងថា៖ «ចំណុចដ៏ខ្លាំងបំផុតរបស់ខ្ញុំ គឺផ្តោតទៅលើការលេងទៅមុខជានិច្ច និងព្យាយាមយ៉ាងខ្លាំងដើម្បីធ្វើឲ្យក្រុមជាច្រើនស្ថិតក្រោមសម្ពាធ។ ពេលខ្លះ អ្នកនឹងត្រូវឈាមច្រមុះក្នុងការធ្វើបែបនោះ ហើយនោះគឺជាអ្វីដែលខ្ញុំនឹងផ្តល់ឲ្យនៅទីនេះក្នុងក្លិប West Brom»។

គ្រូបង្វឹករូបនេះបានបន្ថែមទៀតថា៖ «បញ្ហាប្រឈមមុខភ្លាមៗពេលនេះ គឺការផ្អាកការធ្លាក់ចុះជាបន្តបន្ទាប់ ទទួលបានពិន្ទុនៅលើតារាង និងធ្វើឲ្យខ្លួនយើងស្ថិតក្នុងទីតាំងដែលយើងអាចព្យាយាមប្រជែងចំណាត់ថ្នាក់កំពូលទាំង1០ ប្រសិនបើអាច»៕

ប្រភពពី៖ BBC

November 30, 2017

លោក Conte រងពិន័យកាតក្រហម ឯ Sterling សង្គ្រោះ Man City ម្តងទៀត

Chelsea បានធ្វើឲ្យក្តីសង្ឃឹមនៃការប្រជែងពានក្របខ័ណ្ឌ Premier League របស់ខ្លួននៅតែបន្ត ក្រោយពីបានកត់ត្រាជ័យជម្នះក្នុងលទ្ធផល 1-០ លើក្រុម Swansea ខណៈដែលគ្រូបង្វឹកនៃក្រុមតោខៀវមួយនេះគឺលោក Antonio Conte ត្រូវបានបណ្តេញឲ្យទៅអង្គុយនៅកៅអីរបស់អ្នកទស្សនា សម្រាប់ការសម្តែងកំហឹងយ៉ាងខ្លាំងក្លានៅក្បែរខ្សែបន្ទាត់នៃទីលានប្រកួត។

លោក Conte បានបាត់បង់ការគ្រប់គ្រងអារម្មណ៍របស់លោកក្នុងតង់ទី1 នាកីឡដ្ឋាន Stamford Bridge ក្រោយពីបានសម្តែងនូវការខឹងសម្បាយ៉ាងខ្លាំង និងបានធ្វើការរិះគន់ទៅលើអាជ្ញាកណ្ដាលទី4លោក Lee Mason ក្រោយពីលោកអាជ្ញាកណ្តាល Neil Swarbrick មិនបានផ្តល់បាល់ជ្រុងឲ្យក្រុមរបស់ខ្លួន។ Chelsea មិនបានបាក់ស្មារតីដោយសារតែការអវត្តមានរបស់អ្នកចាត់ការទូទៅរបស់ខ្លួនឡើយ និងដណ្តើមបាន3ពិន្ទុពេញក្នុងតង់ទី2 នៅពេលដែលខ្សែការពារអន្តរជាតិអាល្លឺម៉ង់ Antonio Rudiger បានរកគ្រាប់បាល់បញ្ចូលទីក្នុងការប្រកួតលីកជាលើកទី1របស់គេ ចាប់តាំងពីផ្ទេរមកពីក្លិប Roma មុនពេលបើករដូវកាល។ ស្របពេលជាមួយគ្នានេះដែរ ខ្សែបម្រើឡើងទម្រង់លេង Raheem Sterling បានរកគ្រាប់បាល់ឈ្នះដ៏មិននឹកស្មានដល់នៅនាទីទី96 ដោយបានធ្វើឱ្យក្រុម Manchester City យកឈ្នះលើក្រុម Southampton ទាំងប្រផិតប្រផើយក្នុងលទ្ធផល1-0 កាលពីថ្ងៃពុធ ដើម្បីរក្សាការនាំមុខពិន្ទុដាច់នៅលើកំពូលតារាងនៃក្របខ័ណ្ឌ Premier League។

ក្រុមរបស់លោក Pep Guardiola ហាក់ដូចជាត្រូវបាត់បង់ពិន្ទុទៅហើយ ក្រោយពីខ្សែប្រយុទ្ធ Oriol Romeu បានរកគ្រាប់បាល់តាមស្មើគ្រាប់បាល់បើកឆាករបស់ខ្សែបម្រើ Kevin De Bruyne មុនពេល Sterling បានជួយឲ្យក្រុម Man City កត់ត្រាជ័យជម្នះជាលើកទី19ជាប់ៗគ្នា ក្នុងរាល់យុទ្ធនាការទាំងអស់ និងជាលើកទី12ជាប់ៗគ្នា ក្នុងក្របខ័ណ្ឌលីក។ វាជាគ្រាប់បាល់ឈ្នះជាលើកទី3របស់ Sterling ពីការប្រកួតទាំង3លើកចុងក្រោយនៃក្រុមរបស់គេ៕

ប្រភពពី៖ The Straits Times

November 30, 2017

12 ចំណុចខាងក្រោមនេះ បើស្រីៗយើងធ្វើបាន…ប្រុសៗស្រឡាញ់ស្លាប់ហើយ!!!

ស្រីៗត្រូវតែដឹងណា៎ ថានិស្ស័យរបស់មនុស្សយើងមិនដូចគ្នាទេ តែទាំងអស់គ្នាអាចផ្លាស់ប្តូរបាន ដើម្បីឱ្យមនុស្សដែលយើងស្រឡាញ់ ឬអ្នកជុំវិញខ្លួនយើង គេស្រឡាញ់យើង។ វាអាចជារឿងតូចតាចដែលពេលខ្លះយើងភ្លេចខ្លួន ច្រឡំធ្វើរឿងមិនល្អ ឬមិនសមរម្យណាមួយទៅដោយមិនបានតាំងចិត្ត នាំឱ្យមានការឃ្នើសរអើសចិត្តរវាងយើង និងមនុស្សដែលយើងស្រឡាញ់ ដូច្នេះហើយទើបថ្ងៃនេះ ឡារ៉ែន សូមនាំយកទង្វើល្អៗ ចំនួន 12 យ៉ាងមកជម្រាបជូនប្អូននារីៗយើងដើម្បីធ្វើឱ្យជីវិតមានសេចក្តីសុខជាមួយគ្នា និងអាចប្រើជាមួយមនុស្សដែលយើងស្រឡាញ់ ដែលវានឹងទទួលបានលទ្ធផលល្អខ្លាំងណាស់ តើមានអ្វីខ្លះនោះ យើងតាមតាមដានទាំងអស់គ្នា…ព្រោះបើស្រីៗយើងធ្វើបានដូច 12 ចំណុចខាងក្រោមនេះប្រុសៗច្បាស់ជាស្រឡាញ់យើងរហូតមិនខាន។

1. មិនចិត្តរាយមាយ មិនសម្លឹងមនុស្សប្រុសណាផ្សេង មិនយកមនុស្សដែលយើងស្រឡាញ់ទៅប្រៀបធៀបនឹងបុរសដទៃ។

2. បារម្ភអំពីគេ មិនថាគេនៅទីណា យ៉ាងណា ជាមួយនរណាឡើយ តែយើងនឹងនៅរង់ចាំធេកឃែរ៍គេជានិច្ច។

3. នៅក្បែរគេជានិច្ចក្នុងពេលដែលគេអស់សង្ឃឹម អាចនិយាយបានថា សុខក៏សុខជាមួយគ្នា ទុក្ខក៏ទុក្ខជាមួយគ្នាហ្នឹងឯង។

4. (ចំណុចមួយនេះរាងសំខាន់បន្តិច) នឹងប្រាប់អ្នកជានិច្ចថា ខ្ញុំនឹងទៅណា ទៅជាមួយអ្នកណា និងត្រឡប់មកវិញពេលណា ម៉ោងប៉ុន្មានជានិច្ច។

5. នឹងមិនភូតកុហក ឬលាក់បាំងឡើយ មិនថារឿងអ្វីក៏ដោយ មានអ្វីក៏ប្រាប់គ្នាតាមត្រង់ មិនក្លែងបន្លំ។

6. នឹងមិនធ្វើឱ្យអ្នកមានអារម្មណ៍មិនល្អថា ដូចជាអាចនឹងត្រូវលែងគ្នា ឬលបលួចបែកចិត្តទៅមានអ្នកថ្មីឡើយ។

7. នឹងមិននិយាយសុំបែកពីអ្នកមុនឡើយ ទោះជាមានរឿងអ្វីកើតឡើងក៏ដោយ។

8. នឹងមិនខឹងមួម៉ៅស្រែកឡូឡា ឬជះអារម្មណ៍មិនល្អដាក់អ្នកឡើយ។

9. នឹងនៅចាំប្រាប់ថា «ស្រឡាញ់» នៅចាំប្រាប់ថា «នឹក» គ្រប់ពេលវេលា។

10. ថ្ងៃដែលមានអារម្មណ៍នឿយហត់ជាមួយនឹងរឿងអ្វីម្យ៉ាង គឺបុរសម្នាក់នេះឯងដែលនឹងធ្វើឱ្យខ្ញុំបាត់នឿយហត់។

11. ទោះជាថ្ងៃនោះមិនទំនេរក៏ដោយ តែក៏នឹងព្យាយាមរកពេលទំនេរ ដើម្បីនឹងបាននិយាយជាមួយគ្នាដែរ។

12. នឹងធ្វើជាផ្នែកមួយរបស់ក្រុមគ្រួសាររបស់អ្នកជានិច្ច៕

ដោយ ៖ អ្នកគ្រូ ឆវី

November 30, 2017

SKY LAND ខុនដូ នឹងបង្ហាញភាពដ៏អស្ចារ្យនៅក្នុងតំបន់ វិហារសួគ៍

ស្ថិតនៅក្រោមស្ថេរភាព នយោបាយ ដ៏ ល្អប្រសើរ រួមជាមួយនឹង ការរក្សាបាននូវកំណើនសេដ្ឋកិច្ច ក្នុងរយៈពេលជិត20ឆ្នាំចុងក្រោយនៅក្នុងការកេីនឡេីងប្រមាណ 7%ជា រៀងរាល់ឆ្នាំ បានធ្វើឱ្យលំហូរ នៃ ការវិនិយោគពីសំណាក់បណ្តា វិនិយោគិន អន្តរជាតិ បានមកបង្ហាញវត្តមាន ជា ហូរហែនៅកម្ពុជា ជាមួយនឹង ការជ្រើសតាំង មជ្ឈមណ្ឌល ពាណិជ្ជកម្ម របស់ខ្លួន នៅ តំបន់ ទីប្រជុំជននានា ជាពិសេសនៅក្នុង តំបន់រាជធានី ភ្នំពេញតែម្ដង ។ ប្រការនេះ បាន ជម្រុញ ឱ្យ តម្លៃ ដីធ្លី នៅរាជធានីភ្នំពេញមានការ កើនឡើង យ៉ាងខ្លាំង ហើយក៏បន្តជំរុញឱ្យវិស័យសាងសង់សំណង់អគារនានារីករាលដុះដាលច្រើនឡើងៗ ខណៈដែលវិស័យសំណង់លំនៅដ្ឋានបានងាកឆ្ពោះទៅកាន់តំបន់ជាយក្រុងវិញម្ដង។

អាស្រ័យដោយភាពជាក់ស្ដែងនៃបរិបទសេដ្ឋកិច្ច ក៏ដូចជាវិស័យសំណង់ខាងលើនេះហើយ បច្ចុប្បន្ន អ្នកវិនិយោគលើផ្នែកអចលនទ្រព្យ បាន និងកំពុងផ្តោតសំខាន់ទៅកាន់តំបន់មានសក្ដានុពល វិហារសួគ៌ ដែលស្ថិតនៅទិសខាងកើត ឆៀងខាងជើងរាជធានីភ្នំពេញ ។ គម្រោងអភិវឌ្ឍដ៏អស្ចារ្យជាច្រើនដែលនឹងលេចចេញជារូបរាងយ៉ាងប្រាកដនៅទីនេះរួមមានដូចជា ៖ គម្រោងផ្ទះល្វែងរបស់បុរីចតុមុខ, គម្រោង The Evergreen , គម្រោង Chaktomuk City View , គម្រោង Sky Villa , គម្រោង Sky មេគង្គ រួមជាមួយនឹងគម្រោងSky Land ខុនដូ និង គម្រោង Star Land ដែលមានកិច្ចសហការរួមគ្នារវាងក្រុមហ៊ុន Jet’s Group ជាក្រុមហ៊ុនរបស់ជនជាតិខ្មែរ និងក្រុមហ៊ុនរបស់ឥណ្ឌា STAR5 Developers Pvt.Ltd ។ នៅក្នុងចំណោមគម្រោងធំៗទាំងអស់នេះ Sky Land ខុនដូត្រូវបានគេមើលឃើញថា ជាគម្រោងដ៏អស្ចារ្យ ដែលអាចជួយពន្លើនការអភិវឌ្ឍក្នុងតំបន់វិហារសួគ៌បានយ៉ាងប្រសើរ ព្រោះតែគម្រោងមួយនេះ មានភាពឆើតឆាយ ស្រស់ស្អាត ទាន់សម័យបែប Life style និងហ៊ុំព័ទ្ធជុំវិញទៅដោយពិភពបៃតង ជាពិសេស មានលក្ខណៈពិសេស និងអំណោយផលខ្លាំងពីធម្មជាតិ។

អ្នកតំណាងក្រុមហ៊ុនអភិវឌ្ឍគម្រោង Sky Land បានបញ្ជាក់ឱ្យដឹងថា នៅត្រឹមពេលដ៏ខ្លីឆាប់ៗខាងមុខនេះ តំបន់វិហារសួគ៌ នឹងក្លាយទៅជាតំបន់ទីប្រជុំជនដ៏អ៊ូរអរជាងគេបើប្រៀបធៀបជាមួយតំបន់ជាយក្រុងផ្សេងទៀត ព្រោះទីនេះក្រៅពីមានសំណង់អគារលំនៅដ្ឋានយ៉ាងស្អេកស្កះ ក៏ដូចជាសំណង់មជ្ឈមណ្ឌលពាណិជ្ជកម្ម គឺនៅមានការបង្កើតជាកន្លែងកម្សាន្ត កន្លែងហាត់ប្រាណ អាងហែលទឹកដ៏ធំប្រចាំតំបន់ មន្ទីរពេទ្យ ទីផ្សារលក់ទំនិញចម្រុះ ផ្សារលើទឹកដំបូងគេនៅកម្ពុជា សាលារៀនកម្រិតអន្តរជាតិ ភោជនីយដ្ឋាន ដែលទាំងអស់នេះនឹងជួយឱ្យមានភាពទាក់ទាញកាន់តែខ្លាំង។ អ្នកតំណាងក្រុមហ៊ុនដដែលក៏បានបន្តឱ្យដឹងទៀតថា ភាពល្អប្រសើរសម្រាប់ការវិនិយោគផ្សេងៗមកកាន់វិហារសួគ៌ នៅតែមានភាពល្អប្រសើរ ព្រោះទី1- តម្លៃដីនៅវិហារសួគ៌ នៅមានតម្លៃទាបនៅឡើយ ហើយមានទំហំធំទូលាយ ខុសប្លែកពីរាជធានីភ្នំពេញ ដែលតម្លៃដីមានកម្រិតខ្ពស់រហូតដល់6000ដុល្លារក្នុង1ម៉ែត្រការ៉េ ហើយមានទំហំតូច។ ទី2- បរិយាកាសល្អស្រស់ស្រាយបែបធម្មជាតិ, ទី3- មិនចង្អៀត មិនស្ទះចរាចរណ៍ រួមជាមួយនឹងចំណុចប្រសើរជាច្រើនទៀត ដែលអាចធ្វើឱ្យតម្លៃដី ក៏ដូចជាសំណង់លំនៅដ្ឋានមានការកើនឡើងរហូតដល់3ដង ក្រោយពេលបញ្ចប់គម្រោងសាងសង់ Sky Land ខុនដូ។ អ្នកអភិវឌ្ឍន៍គម្រោង Sky Land ខុនដូ បាននិយាយថា អតិថិជនអាចមានជម្រើសច្រើនក្នុងការទូទាត់ ដែលអាចបត់បែនបានដោយមិនមានការប្រាក់រហូតដល់ 3 ឆ្នាំ ។ សម្រាប់អតិថិជន ដែលមានបំណងចងធ្វើការវិនិយោគបន្ត “ការលក់ត្រឡប់មកវិញ ” គឺកាន់តែមានភាពងាយស្រួល ហើយអាចទទួលបានចំណេញខ្ពស់ ចាប់ពី 35% ទៅ 50% បន្ទាប់ពីបញ្ចប់គម្រោង2ឆ្នាំ។

សូមបញ្ជាក់ផងដែរថា អគារទាំងនេះនឹងត្រូវបានគ្រប់គ្រងដោយក្រុមអ្នកជំនាញដែលមានសមត្ថភាពខ្ពស់ ដើម្បីធ្វើឱ្យប្រាកដថា គម្រោងទាំងអស់ដំណើរការយ៉ាងរលូន និងមានប្រសិទ្ធភាពខ្ពស់ ដែលអាចនិយាយបានថា តំបន់ វិហារសួគ៌ នឹងក្លាយទៅជាទីក្រុងថ្មីមួយទៀតបន្ទាប់ពីរាជធានីភ្នំពេញ ។ ដោយឡែកសម្រាប់ឱកាសនៃការតាំងពិព័រណ៍ និងបង្ហាញផលិតផលពាក់ព័ន្ធនឹងវិស័យអចលនទ្រព្យ ដែលនឹងប្រព្រឹត្តទៅនៅថ្ងៃទី02 ក្នុងសាលពិព័រណ៍កោះពេជ្រ លោកអ្នកក៏នឹងទទួលបានការលក់បញ្ចុះតម្លៃពិសេស រហូតដល់20ភាគរយ សម្រាប់ការកក់ទុករបស់លោកអ្នក ។ អាចទាក់ទង Star5 Developers តាមរយៈអាសយដ្ឋាន អគារលេខ124, ផ្លូវសុធារស់ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ឬតាមរយៈ Email: [email protected] ទូរស័ព្ទលេខ ៖ 023 622 4555 / 081255 455 / 081 355 455

គណៈគ្រប់គ្រង STAR5 Developers Pvt.Ltd
MD: Kiran Kumar Reddy
CEO: Alexander Evengroen
CSO: Mohan Gunti

November 29, 2017

Author: វល័ក្ខ