វល័ក្ខ - La Reine Media

វគ្គសិក្សាសរសេរផែនការអាជីវកម្ម និងប្រើប្រាស់ Business Model Canvas វិភាគរកចំណុចស្រង់ដើម

វគ្គសិក្សាសរសេរផែនការអាជីវកម្ម និងការប្រើប្រាស់ Business Model Canvas ដើម្បីវិភាគរកចំណុចស្រង់ដើម (Break-even Point) សម្រាប់ឆ្នាំ 2018។ នេះជាវគ្គសិក្សា ដែលនឹងត្រូវរៀបចំយ៉ាងពិសេស នៅមុនដំណាច់ឆ្នាំ2017 ដែលគ្រោងរៀបចំឡើងនៅថ្ងៃទី24 ខែធ្នូ ឆ្នាំ2017 ពេញមួយថ្ងៃតែម្ដង នៅផាកកាហ្វេ សាខាពេទ្យកាល់ម៉ែត្រ។

ក្នុងវគ្គសិក្សានេះ លោកអ្នកនឹងទទួលបានការផ្ដល់ជូនជាពិសេស មានសៀវភៅសិក្សា ឯកសារជា Soft Copy, លិខិតបញ្ជាក់ការចូលរួម (Certificate) សៀវភៅអេឡិចត្រូនិក អាហារសម្រន់ និងអាហារថ្ងៃត្រង់ បញ្ចូលក្នុង Group Facebook ដែលមានសមាជិកជាម្ចាស់អាជីវកម្មជាង 300នាក់ និងឱកាសបង្កើតបណ្ដាញអាជីវកម្មជាច្រើនទៀត។

លោកអ្នកនឹងទទួលបានការសិក្សាដែលផ្ដោតលើការសរសេរផែនការអាជីវកម្មឱ្យមានលក្ខណៈអាជីពដោយមានការអនុវត្តដោយផ្ទាល់តែម្ដង ហើយថែមទាំងមានបង្ហាញជូននូវ ខ្លឹមសារនៃការប្រើប្រាស់ម៉ូដែល Business Model Canvas ថែមទៀតផង។

ខ្លឹមសារសំខាន់ៗ ដែលត្រូវសិក្សារួមមាន ហេតុផលអ្វីទើបគួរវិវត្តន៍ខ្លួនទៅជាអ្នករកស៊ី និងអ្នកវិនិយោគ (វិភាគទៅលើទ្រឹស្ដីរបស់លោក Robert Kiyosaki) ធាតុផ្សំទាំង 11 យ៉ាងរបស់ផែនការអាជីវកម្ម និងការប្រើប្រាស់ Business Model Canvas ដើម្បីវិភាគរកចំណុចស្រង់ដើម ឬចំណុចរួចខ្លួន និងទ្រឹស្ដីអាជីវកម្មសំខាន់ៗជាច្រើនទៀត។

លម្អិតនិងអនុវត្តន៍ដោយផ្ទាល់ទៅនឹងធាតុផ្សំទាំង 11យ៉ាងនៃផែនការអាជីវកម្ម រួមមាន៖
1) តិចនិកនៃការសរសេរ Executive Summary អមជាមួយឧទាហរណ៍មួយចំនួន
2) ការសរសេរអំពីការបរិយាយ និងពិពណ៌នាខ្លឹមសាររួមអំពីក្រុមហ៊ុន(General Company Description) អមមកជាមួយឧទាហរណ៍ខ្លីៗមួយចំនួន
3) ការសរសេរអំពីការពិពណ៌នាអំពីផលិតផល និងសេវាកម្ម (Products & Services)
4) ការធ្វើផែនការធ្វើទីផ្សារ (Marketing Plan) ដែលនឹងផ្ដោតទៅលើ ការស្រាវជ្រាវទីផ្សារ (Market Research), របៀបនៃការស្រាវជ្រាវទីផ្សារ (Market Research-How), វិភាគនិងវិនិច្ឆ័យទៅលើលក្ខខណ្ឌសេដ្ឋកិច្ច (Economics), ផលិតផល (Products), អតិថិជន (Customers), ការប្រកួតប្រជែង (Competition), ទីផ្សារគោលដៅ (Niche Market), យុទ្ធសាស្ត្រផ្សព្វផ្សាយ និងការកំណត់ថ្លៃជាដើម (Pricing)
5) ផែនការប្រតិបត្តិការ (Operational) ដែលនឹងផ្ដោតសំខាន់ទៅលើ ផលិតផលកម្ម (Production) ការជ្រើសរើសទីតាំង (Location), ឯកសារផ្លូវច្បាប់ដែលតម្រូវមួយចំនួន (Legal environment) បុគ្គលិក (Personnel), ការគ្រប់គ្រងសន្និធិ (Inventory), អ្នកផ្គត់ផ្គង់ (Suppliers), គោលការណ៍នៃការបង់ប្រាក់ពីសំណាក់អតិថិថិជន (Credit policies) តិចនិកគ្រប់គ្រងគណនេយ្យអតិថិជនជំពាក់ (Account Receivable), តិចនិចគ្រប់គ្រងគណនេយ្យដែលយើងជំពាក់គេ (Account Payable)
6) ការគ្រប់គ្រងស្ថាប័ន(Organization and Management)៖ ការរៀបចំរចនាសម្ព័ន្ធបុគ្គលិក និងតួនាទីច្បាស់លាស់ដើម្បីធានាបាននូវប្រសិទ្ធភាព និងប្រសិទ្ធផល (Organizational Management)
7) របាយការណ៍ហិរញ្ញវត្ថុរបស់ម្ចាស់ភាគ (Personal Financial Statement)
8) ផែនការនៃការចំណាយសំខាន់ៗ និងការប្រមូលទុន (Startup Expenses & Capitalization)
9) ផែនការហិរញ្ញវត្ថុ (Financial Plan)
10) ឧបសម្ពន្ធ (Appendices)
11) ការកំណត់ពីគោលបំណងលម្អិត ការធ្វើផែនការអាជីវកម្មរបស់យើង (Refining the Plan)
និងចំណុចចុងក្រោយគឺការវិភាគរកចំណុចស្រង់ដើម (Break-even point) ដោយសិក្សាលម្អិតអំពីទ្រឹស្ដី Business Model Canvas។

ខាងក្រោមនេះ គឺជាប្រវត្តិសង្ខេបរបស់គ្រូបណ្ដុះបណ្ដាល៖

សូមបញ្ជាក់៖ វគ្គសិក្សានេះ មានលក់សំបុត្រសម្រាប់ចូលរួមជាមុន ដែលមានតម្លៃ 65ដុល្លារសម្រាប់មនុស្សម្នាក់។ ព័ត៌មានផ្សេងៗ និងអំពីការទិញសំបុត្រសូមទាក់ទង កញ្ញាចាន់ថា មានលេខទូរស័ព្ទ 017/0969 49 59 60 | 010 24 33 44 | 015 22 42 99 | 012 666 104 ឬ email to [email protected] or md.bizkhmer@ gmail.com

December 19, 2017

មានតែសេវាកម្មផ្ទេរប្រាក់ប៉ុណ្ណោះ មានការប្រើប្រាស់ច្រើនសម្រាប់ Mobile Banking

ធនាគារជាតិនៃកម្ពុជា (NBC) កំពុងជំរុញការធ្វើប្រតិបត្តិការសេវាហិរញ្ញវត្ថុតាមប្រព័ន្ធអេឡិចត្រូនិក ជាពិសេសតាមរយៈទូរស័ព្ទដៃ ខណៈដែលការធ្វើប្រតិបត្តិការតាមមធ្យោបាយនេះនៅមានកម្រិតនៅឡើយ បើទោះបីជាការប្រើប្រាស់ទូរស័ព្ទទំនើបរបស់ប្រជាជនខ្មែរមាននិន្នាការកើនឡើងច្រើនក៏ដោយ។

នៅក្នុងសន្និសីទប្រចាំឆ្នាំស្តីពីតួនាទីរបស់បច្ចេកវិទ្យាក្នុងការលើកកម្ពស់វិស័យហិរញ្ញវត្ថុ កាលពីពេលថ្មីៗនេះ មន្ត្រីជាន់ខ្ពស់ធនាគារជាតិនៃកម្ពុជា បានលើកឡើងពីតួនាទីដ៏សំខាន់របស់បច្ចេកវិទ្យាក្នុងការប្រតិបត្តិសេវាហិរញ្ញវត្ថុនាពេលបច្ចុប្បន្ននេះ។ គោលបំណងនៃសិក្ខាសាលានេះគឺជំរុញឱ្យមានការសិក្សាស្រាវជ្រាវពាក់ព័ន្ធវិស័យសេដ្ឋកិច្ច និងហិរញ្ញវត្ថុនៅកម្ពុជា។

លោកជំទាវ ជា សិរី អគ្គនាយិកាបច្ចេកទេសធនាគារជាតិនៃកម្ពុជា បានឱ្យដឹងថា ការរៀបចំសិក្ខាសាលាក្នុងឆ្នាំនេះ គឺតួនាទីនៃបច្ចេកវិទ្យាក្នុងការជំរុញបរិយាបន្នហិរញ្ញវត្ថុ ដែលបច្ចេកវិទ្យាកំពុងត្រូវបានគេយកចិត្តទុកដាក់ស្រាវជ្រាវជាសកល។ តាមរយៈសិក្ខាសាលាដែលរៀបចំឡើងដោយធនាគារជាតិនៃកម្ពុជាប្រធានបទដែលបានធ្វើបទបង្ហាញពីតួនាទីរបស់ទូរស័ព្ទចល័ត តើប្រជាជនដែលប្រើប្រាស់ទូរស័ព្ទដៃអាចមានលទ្ធភាពទទួលបានសេវាកម្មហិរញ្ញវត្ថុច្រើនជាង ដែលគ្មានទូរស័ព្ទដៃ ឬយ៉ាងដូចម្តេច?

សម្រាប់បរិបទនៃប្រទេសកម្ពុជា អ្នកប្រើប្រាស់សេវាហិរញ្ញវត្ថុតាមរយៈទូរស័ព្ទដៃមានការកើនឡើង ប៉ុន្តែមានតែសេវាកម្មខ្លះប៉ុណ្ណោះដែលត្រូវបានអ្នកប្រើប្រាស់ចូលរួម ខណៈដែលសេវាកម្មជាច្រើនទៀតមិនទទួលបានការចាប់អារម្មណ៍។

លោកជំទាវអគ្គនាយិកាបច្ចេកទេស បានមានប្រសាសន៍ថា៖“ការប្រើប្រាស់បច្ចេកវិទ្យាសម្រាប់ខ្ចីលុយក្នុងប្រទេសកម្ពុជា ខ្ញុំយល់ថាមានល្បឿនលឿនគួរសម ព្រោះឥឡូវនេះមានអ្នកផ្តល់សេវាក្នុងនាមជាភាគីទី3ច្រើន ប៉ុន្តែការប្រើប្រាស់បច្ចេក-វិទ្យាដើម្បីធ្វើប្រតិបត្តិការធនាគារដូចជា ការមើលសមតុល្យក្នុងគណនីរបស់គាត់ ឬក៏របៀបប្រតិបត្តិការផ្សេងៗទៀត គឺនៅមានកម្រិត។ លោកជំទាវបានបន្ថែមថា៖“យើងលឿនក្នុងការផ្ទេរលុយ ប៉ុន្តែយើងមានផលិតផល និងសេវាកម្មជាច្រើនទៀតតាមបច្ចេកវិទ្យាទូរស័ព្ទដៃ មិនទាន់ត្រូវបានប្រើប្រាស់ច្រើននៅឡើយ។

លោកឧកញ៉ា ហួត អៀងតុង ប្រធានសមាគមមីក្រូហិរញ្ញវត្ថុកម្ពុជា និងជានាយកប្រតិបត្តិគ្រឹះស្ថានមីក្រូហិរញ្ញវត្ថុ ហត្ថាកសិករ បានឱ្យដឹងថា អតិថិជនហិរញ្ញវត្ថុនៅកម្ពុជាកំពុងតែបន្សាំខ្លួនចំពោះរបត់ថ្មីនៃការប្រើប្រាស់បច្ចេកវិទ្យាក្នុងវិស័យហិរញ្ញវត្ថុ ដោយសារការរីកចម្រើនខ្លាំងនៃការប្រើប្រាស់បច្ចេកវិទ្យា។ សម្រាប់គ្រឹះស្ថានមីក្រូហិរញ្ញវត្ថុ ហត្ថាកសិកររហូតមកដល់ពេលនេះមានអតិថិជនរបស់ខ្លួនប្រមាណ 8,000នាក់បានចុះឈ្មោះប្រើប្រាស់សេវាហិរញ្ញវត្ថុតាមទូរស័ព្ទដៃ ដោយភាគច្រើននៃអ្នកប្រើប្រាស់ បានប្រតិបត្តិការសម្រាប់ផ្ទេរប្រាក់ និងបញ្ចូលកាតទូរស័ព្ទ ដោយឡែកសេវាកម្មផ្សេងៗទៀតមិនទាន់មានប្រើប្រាស់ច្រើននោះទេ។

លោកឧកញ៉ា ហួត អៀងតុង បាននិយាយថា៖ “តាមរយៈ Mobile Banking យើងក៏អនុញ្ញាតឱ្យមានការស្នើប្រាក់កម្ចីតាមទូរស័ព្ទបាន ប៉ុន្តែរាល់ដំណើរការត្រួតពិនិត្យគឺនៅអនុវត្តតាមរបៀបចាស់ដដែល ដោយតម្រូវឱ្យភ្នាក់ងារឥណទានចុះទៅដល់ផ្ទះរបស់អតិថិជន ដើម្បីពិនិត្យមើលពីការរីកចម្រើនក្នុងអាជីវកម្ម និងលទ្ធភាពទទួលកម្ចីជាក់ស្តែង។ គិតត្រឹមពាក់កណ្តាលឆ្នាំ2017 នេះប្រព័ន្ធធនាគារនៅកម្ពុជា រួមមាន ធនាគារពាណិជ្ជ39 ធនាគារឯកទេស15 គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជន7 គ្រឹះស្ថានមីក្រូហិរញ្ញវត្ថុ 66ប្រតិបត្តិករឥណទានជនបទ267 ក្រុមហ៊ុនភតិសន្យាហិរញ្ញវត្ថុ12 អ្នកដំណើរការតតិយភាគី13ក្រុមហ៊ុន ក្រេឌីតប្យូរ៉ូកម្ពុជា1 ការិយាល័យ តំណាងធនាគារបរទេស 6 និងអាជីវករប្តូរប្រាក់ 2,437៕

December 18, 2017

ស្ត្រីមានគភ៌ដូចយើង…ធ្វើម៉េចដឹងថា កូនក្នុងគភ៌រឹងមាំ?

ក្នុងអំឡុងពេលតាំងគភ៌ ក្ដីវិតក្កកង្វល់ ក្ដីតានតឹងក្នុងអារម្មណ៍តែងតែកើតឡើងចំពោះស្ត្រីមានគភ៌បានយ៉ាងងាយជាងប្រក្រតីជាកង្វល់ពាក់ព័ន្ធនឹងកូនថា តើកូននឹងយ៉ាងម៉េចដែរ? រឹងមាំឬទេ? មានអវយវៈគ្រប់32 ឬទេ? រាប់សិបរាប់រយកង្វល់ដែលស្ត្រីមានគភ៌នឹកបារម្ភ គឺដោយសារតែសេចក្ដីស្រឡាញ់ដែលមានចំពោះកូនតូចក្នុងផ្ទៃហ្នឹងឯង។ តើស្ត្រីមានគភ៌ទាំងអស់ចង់ដឹងទេថា តើយើងធ្វើម៉េចនឹងដឹងបានទៅថា កូនតូចក្នុងផ្ទៃរបស់យើងហ្នឹងរឹងមាំល្អដែរឬទេ? សូមតាមដានជាបន្ត…។

ធ្វើម៉េចនឹងដឹងបានទៅថា កូននៅក្នុងផ្ទៃមានសុខភាពល្អ និងរឹងមាំ?

ទារកតូចនៅក្នុងគភ៌នឹងរឹងប៉ឹងមាំមួនល្អឬទេនោះ មួយផ្នែកមកពីសុខភាពរបស់អ្នកម្ដាយ ដូច្នេះពេលទៅជួបគ្រូពេទ្យ ដើម្បីពិនិត្យសុខភាព មិនថាតែការពិនិត្យសម្ពាធឈាម ពិនិត្យទឹកមូត្រពិនិត្យឈាមមើលថា តើស្លេកស្លាំងឬទេ? ហើមឬទេ? ពិនិត្យមើលទម្ងន់ដែលកើនច្រើនឡើងរួមទាំងការសាកសួរពីអាការខុសប្រក្រតីផ្សេងៗនោះទេ អ្វីដែលសំខាន់លំដាប់ដំបូងៗមុនគេនោះគឺ ការពិនិត្យគភ៌ នៅពេលដែលដឹងថា ខ្លួនឯងច្បាស់ជាមានផ្ទៃពោះហើយ។

ការពិនិត្យគភ៌គឺជាជម្រើសមួយដែលគួរធ្វើខ្លាំងបំផុត បើសិនជាស្ត្រីមានគភ៌ទៅពិនិត្យគភ៌ និងទៅជួបគ្រូពេទ្យតាមការណាត់ជាប់លាប់ នៅពេលមានសញ្ញាដាស់តឿនដែលអាចកើតមានភាពខុសប្រក្រតីណាមួយដែលបង្ហាញថា ទារកអាចនឹងមានសុខភាពមិនរឹងមាំ ដូចជា ទម្ងន់ខ្លួនកើនឡើងតិចជាងប្រក្រតី ទំហំស្បូនរីកធំយឺត កូនលែងសូវរើ ស្ត្រីមានគភ៌ខ្លួនឯងមានអាការហើមខ្លួនខ្លាំង ឬមានសម្ពាធឈាមឡើងខ្ពស់ គ្រូពេទ្យនឹងបានជ្រើសរើសវិធីការត្រួតពិនិត្យព្យាបាលដែលត្រឹមត្រូវស័ក្តិសមនឹងសភាវខុសប្រក្រតីផ្សេងៗដែលកើតឡើងនោះ។

ការពិនិត្យវិនិច្ឆ័យថា តើកូនក្នុងគភ៌រឹងមាំឬទេ?

បច្ចុប្បន្ននេះ ឧបករណ៍ដែលប្រើប្រាស់ក្នុងការពិនិត្យមើលទារកក្នុងគភ៌មានភាពទាន់សម័យខ្លាំងណាស់ តាមរយៈការវិវឌ្ឍតិចណូឡូជីខាងផ្នែកវេជ្ជសាស្ត្រ ដូចជា៖

ការពិនិត្យមើលអេកូដែលអាចសាងរូបភាព 4D របស់ទារកបានមើលធ្លុះចូលទៅក្នុងផ្ទៃ ទៅដល់ស្បូនដោយផ្ទាល់រហូតអាចមើលឃើញរូបរាងរបស់ទារកច្បាស់លាស់ សឹងតែដឹងតែម្ដងថា ទារកនោះមានមុខមាត់ស្រដៀងឪពុក ឬម្ដាយ ហើយថែមទាំងអាចពិនិត្យមើលប្រព័ន្ធហូរវិលរបស់ឈាមតាមអវយវៈផ្សេងៗ តាំងពីសុក ទងសុក បេះដូង ឬសូម្បីតែខួរក្បាលទៀតផង ដើម្បីពិនិត្យមើលថា កូនតូចរបស់អ្នករឹងប៉ឹង និងមានសុវត្ថិភាពល្អ។

ការពិនិត្យស្ដាប់សំឡេងបេះដូងទារក និងកត់ត្រាចេញមកជាគំនូសហ្ក្រាហ្វិក ដើម្បីប្រើក្នុងការពិនិត្យសុខភាពរបស់ទារក។ ក្នុងករណីទូទៅ ការពិនិត្យគភ៌ប្រក្រតី គ្រូពេទ្យពិនិត្យមើលខ្នាតរបស់ស្បូន និងទារកដោយការប្រើដៃស្ទាប រួមជាមួយការស្ដាប់សំឡេងការលោតរបស់បេះដូងដែលទៀងទាត់ក្នុងរយៈពេលខ្លីៗ ក៏អាចប្រាកដក្នុងចិត្តបានទៅហើយថា កូនតូចមានសុខភាពល្អ។

ករណីដែលពិនិត្យឃើញថា កើតមានភាពខុសប្រក្រតី ឬកូនតូចមានភាពប្រថុយប្រថានក្នុងការកើតមានគ្រោះថ្នាក់ណាមួយ ឬប្រថុយប្រថាននឹងការស្លាប់ គ្រូពេទ្យនឹងប្រញាប់ផ្ដល់ការជួយសង្គ្រោះ ហើយបើសិនស្ថិតក្នុងរយៈប្រសូតដែលសុវត្ថិភាព គ្រូពេទ្យក៏នឹងអាចជួយដោយការវះកាត់ប្រសូតបានភ្លាមៗទាន់ពេលវេលាផងដែរ។

អ្វីដែលសំខាន់ ក្នុងអំឡុងពេលតាំងគភ៌ ក្រៅពីការទៅពិនិត្យគភ៌តាំងពីដំបូងៗហើយ ស្ត្រីមានគភ៌ត្រូវថែរក្សាសុខភាព អនាម័យឱ្យបានរឹងមាំខ្ជាប់ខ្ជួន ទទួលទានអាហារឱ្យគ្រប់5ប្រភេទក្រុម ដូចជា ប្រូតេអីុន ខាបូហាយដ្រេត (ធញ្ញជាតិ បាយម្សៅ ស្ករ-ល-) សារធាតុរ៉ែ (បន្លែ ផ្លែឈើ) វីតាមីននិងខ្លាញ់។ ក្រៅពីនេះត្រូវទទួលទានទឹក សម្រាកឱ្យបានគ្រប់គ្រាន់ ធ្វើចិត្តឱ្យស្រស់ស្រាយសប្បាយៗ និងមិនធុញថប់តានតឹង អាចធ្វើការងារស្រាលៗ ស្ដាប់បទភ្លេង ឬអានសៀវភៅជាដើម។ ការហែលទឹក ការដើរតិចៗ និងហាត់យ៉ូហ្គា គឺជាការធ្វើលំហាត់ប្រាណដែលស័ក្តិសមបំផុតសម្រាប់ស្ត្រីមានផ្ទៃពោះ រួមទាំងការចៀសវាងពីអ្វីដែលបង្កឱ្យកើតមានគ្រោះថ្នាក់ ដូចជា ភេសជ្ជៈដែលមានជាតិអាល់កុល ផ្សែងបារី អាហារដែលមិនល្អ ការអង្គុយ ឬឈរយូរៗ គឺសុទ្ធតែហុចផលអាក្រក់ដល់ស្ត្រីមានគភ៌ និងទារកក្នុងផ្ទៃទាំងអស់ ដូច្នេះហើយទើបគួរចៀសវាង ដើម្បីឱ្យទារកតូចក្នុងគភ៌មានសុខភាពរឹងមាំល្អ៕

December 18, 2017

អាថ៌កំបាំងជួយឱ្យស្បែកមុខ «ស» ស្អាតជាទីគាប់ចិត្ត

មិនមានអ្នកណាបដិសេធមិនចង់បានស្បែកស្រស់ស្អាតនោះទេ មិនថាអ្នកនោះស្ថិតក្នុងវ័យក្មេង ចាស់ ប្រុស ឬស្រីនោះទេ ឱ្យតែមានគេសួរថា ចង់បានស្បែកស្រស់ស្អាតឬអត់ ពិតជាឆ្លើយថាចង់គ្រប់តែគ្នាហ្នឹង។ បើដូច្នេះមែន សូមសាកល្បងធ្វើតាមការណែនាំខាងក្រោមនេះ ដើម្បីទទួលបានផ្ទៃមុខដ៏ស្រស់ផូរផង់ដូចបំណង។

ស្បែកស្រស់ស្អាតចាប់ផ្តើមឡើងជាមួយការលាងសម្អាត៖ ការសម្អាតស្បែកមុខតាមបែបធម្មជាតិទាំងពេលព្រឹក និងពេលរាត្រីគឺជារឿងដ៏សំខាន់ដែលអ្នកគ្រប់គ្នាគួរតែបានដឹង និងត្រូវតែធ្វើ។ ការលាងសម្អាតស្បែកលើបរិវេណផ្ទៃមុខតាមវិធីធម្មជាតិមានភាពងាយស្រួលបំផុត ដោយគ្រាន់តែយកទឹកឃ្មុំបន្តិចទៅលាយជាមួយទឹកដោះគោឆៅ1ស្លាបព្រាបាយ ហើយយកវាទៅកម្តៅ 23វិនាទី រួចសឹមយកមកលាបលើផ្ទៃមុខ និងក ហើយលាងសម្អាតចេញដោយទឹកក្តៅឧណ្ហៗជាការស្រេច។

ចំហុយស្បែកមុខ៖ ចំហុយស្បែកមុខរបស់អ្នករាល់មួយសប្តាហ៍ម្តងដើម្បីសម្លាប់ជាតិពុលដែលមាននៅលើស្បែកមុខ កម្ចាត់មុនក្បាលខ្មៅ និងស្នាមជាំផ្សេងៗពីស្បែកមុខ។ បន្ថែមដោយការលាបប្រេងដែលត្រឹមត្រូវទៅតាមប្រភេទស្បែករបស់អ្នកគឺកាន់តែប្រសើរ។ សូមចងចាំថា ការចំហុយផ្ទៃមុខជួយឱ្យស្បែកមុខរបស់អ្នកភ្លឺថ្លា និងរលោងស្រស់ស្អាតដូចបំណងប្រាថ្នា។

គ្រឿងខាត់ស្បែកធ្វើដោយខ្លួនឯង៖ ដុសខាត់សម្អាតស្បែកជាមួយនឹងគ្រឿងខាត់ស្បែកដែលធ្វើឡើងដោយខ្លួនឯង 1 ឬ2ដងក្នុងមួយសប្តាហ៍ ដើម្បីជួយកម្ចាត់កោសិកាស្បែកចាស់ៗចោល នាំមកនូវសភាពស្បែកដែលមានតែភាពរលោងស្អាត ដោយយកប្រេងអូលីវបន្តិចលាយជាមួយស្ករក្រហមបន្តិច រួចយកវាមកត្រដុសថ្នមៗលើស្បែក ហើយសឹមសម្អាតវាចេញឱ្យស្អាតជាមួយនឹងទឹកក្តៅតិច។ យកទឹកត្រជាក់មកលាបលើផ្ទៃមុខតិចៗដើម្បីបិទរន្ធរោមជាការស្រេច។

រក្សាសំណើមផ្ទៃមុខជានិច្ច៖ ប្រេងបន្លែគឺជាសារធាតុផ្សំដែលមានប្រយោជន៍បំផុតក្នុងការជួយផ្តល់សំណើមដល់ស្បែក ការពារស្បែកពីភាពជ្រីវជ្រួញ។

កុំភ្លេចម៉ាសបិទមុខ៖ ម៉ាសបិទមុខតាមបែបធម្មជាតិជួយការពារអ្នកពីបញ្ហាផ្សេងៗដែលតែងកើតឡើងលើផ្ទៃមុខ។ អនុវត្តយ៉ាងតិចណាស់មួយសប្តាហ៍ម្តង បើចង់ឱ្យក្តីបារម្ភចំពោះស្បែកមុខរបស់អ្នកត្រូវកម្ចាត់ចោល។

ស្បែកមុខស្រស់ស្រាយ៖ សម្រាប់អ្នកដែលចង់បានស្បែកមុខស្រស់ស្អាត ឡារ៉ែន សូមណែនាំវិធីងាយបំផុត ព្រមទាំងមិនប៉ះពាល់ដល់សុខភាពស្បែកមួយវិធីគឺ លាងមុខជាមួយទឹកសម្បកក្រូចមួយសប្តាហ៍ម្តង។ យកសម្បកក្រូចទៅស្ងោរជាមួយទឹកប្រមាណ5នាទី រួចទុកវាឱ្យត្រជាក់។ បន្ទាប់មកយកទឹកស្ងោរសម្បកក្រូចនេះទៅលាបលើផ្ទៃមុខរបស់អ្នក។ វិធីមួយនេះហាក់ដូចជាប្លែកជាងវិធីរាល់ដងដែលអ្នកធ្លាប់ជួប ប៉ុន្តែអ្នកដែលធ្លាប់បានអនុវត្តតាមវិធីនេះបានប្រាប់ថា វាជួយឱ្យស្បែកមុខមើលទៅមានភាពស្រស់ស្រាយជាងការដែលអ្នកមិនធ្វើអ្វីទាល់តែសោះ។ សូមសាកល្បងបន្តិចមើល!

សូមចងចាំផងដែរថា ការប្រើក្រែមការពារកម្តៅថ្ងៃជារៀងរាល់ថ្ងៃ ការមិនជក់បារី ការទទួលទានទឹកឱ្យបានច្រើន តែបុរាណ និងទឹកផ្លែឈើស្រស់ក៏ជាជំនួយការដ៏សំខាន់ចំពោះសម្រស់ស្បែកមុខរបស់អ្នកដូចគ្នាដែរ៕

December 18, 2017

កាសែតឡារ៉ែន ពាណិជ្ជ លេខ 106

[easy_media_download url=”https://www.lareine.com.kh/wp-content/uploads/2017/12/LRPN_106-for-web.pdf” force_dl=”1″]

December 18, 2017

ចង់បានស្នាមញញឹមស្រស់ស្អាត កុំភ្លេចទទួលទានអាហារទាំងនេះ

ប្រាកដណាស់ថា ស្នាមញញឹមរបស់នារីៗគឺជាមន្តស្នេហ៍មួយសម្រាប់អ្នកដែលបានឃើញដូច្នេះអ្នកត្រូវតែមានវិធីមើលថែទាំធ្មេញរបស់អ្នកឱ្យស្អាត ស និងរឹងមាំ ត្រៀមជានិច្ចសម្រាប់ការញញឹមយ៉ាងស្រស់ស្រាយឱ្យអ្នកដែលនៅជុំវិញខ្លួនឈ្លក់វង្វេង តែតើត្រូវទទួលទានអ្វីខ្លះ ដើម្បីឱ្យធ្មេញសស្អាត និងរឹងមាំនោះ សូមតាមដានជាបន្ត…។

អាហារពពួក ខាបូហាយដ្រេត

អាហារពពួក ខាបូហាយដ្រេត ដែលមានដូចជា ម្សៅ បាយ និងនំប៉័ងជាដើម ច្រើនតែជាប់នៅតាមប្រឡោះជើងធ្មេញ ឬបរិវេណអញ្ចាញធ្មេញ បន្ទាប់ពីនោះម្សៅនឹងបំបែកខ្លួនក្លាយជាស្ករមានមេរោគបាក់តេរី ធ្វើឱ្យកើតស្នាមកំណក និងអាចកើតជំងឺអញ្ចាញធ្មេញបាន ហើយក៏អាចធ្វើឱ្យធ្មេញពុកបានដែរ ដូច្នេះសម្រាប់អាហារប្រភេទ ខាបូហាយដ្រេត នេះគួរទទួលទានចំពោះតែពេលអាហារចម្បងៗដូចជា ពេលព្រឹក ពេលថ្ងៃ និងពេលល្ងាចបានហើយ ចៀសវាងទទួលទានលេងនៅចន្លោះពេលអាហារទាំងនោះ ព្រោះថានៅក្នុងពេលអាហារចម្បងៗទាំងនោះ អ្នកនឹងបញ្ចេញទឹកមាត់មកច្រើនណាស់ ទើបកម្ទេចកំណកអាហារទាំងនោះត្រូវបានលាងសម្អាតចេញអស់ដោយងាយ។

គួរទទួលទានទឹកតែជាប្រចាំ

មិនថាតែធម្មតា តែខ្មៅ ឬតែបៃតងនោះទេសុទ្ធតែមានសារធាតុ ផូលីហ្វើណូល ដែលជាសារធាតុប្រឆាំងអនុមូលឥស្សរៈពីរុក្ខជាតិដែលការពារមិនឱ្យកំណកកខ្វក់លឿងៗមកតោងជាប់នៅលើធ្មេញ ជួយកាត់បន្ថយឱកាសក្នុងការកើតរោគធ្មេញពុក ឬរោគអញ្ចាញឱ្យថយចុះបាន។ ក្រៅពីនេះ វានៅអាចកាត់បន្ថយក្លិនមាត់ ដោយមានគុណសម្បត្តិទប់ស្កាត់ការរីកធំធាត់របស់មេរោគបាក់តេរីដែលជាមូលហេតុរបស់ក្លិនមាត់ថែមទៀត ហើយទឹកតែភាគច្រើននៅមាន ភ្លូអរ៉ាយដ៍ ដែលបានមកពីស្លឹកតែទៀតផង។

ទទួលទានវីតាមីន C ឱ្យបានគ្រប់គ្រាន់

វីតាមីន C ប្រៀបដូចជាស៊ីម៉ង់ត៍ដែលភ្ជាប់កោសិកាផ្សេងៗឱ្យចូលមកជាប់ជាមួយគ្នា វាចាំបាច់ចំពោះស្បែកដូចគ្នានឹងសាច់ភ្នាសរបស់អញ្ចាញធ្មេញផងដែរ។ អ្នកដែលទទួលទានវីតាមីន C តិចជាង60មីល្លីក្រាមក្នុងមួយថ្ងៃ នឹងមានឱកាសកើតរោគអញ្ចាញធ្មេញខ្ពស់ជាងអ្នកដែលទទួលទានវីតាមីន C 180 មីល្លីក្រាម ឬច្រើនជាងនេះ 25% ដូច្នេះហើយទើបវីតាមីន C ជាចំណែកមួយដ៏សំខាន់ដែលជួយមើលថែទាំធ្មេញឱ្យរឹងមាំឡើង។

ត្រឹមតែវិធី3យ៉ាងងាយៗនេះ ធានាថា ធ្មេញរបស់អ្នកនឹងស្រស់ស្អាត ភ្លឺស និងរឹងមាំ ត្រៀមជាស្រេចសម្រាប់ការញញឹមដ៏ស្រស់ស្រាយ និងមានមន្តស្នេហ៍យ៉ាងពិតប្រាកដ៕

December 18, 2017

Ronaldo សម្លឹងរកពានបន្ថែមទៀត ក្រោយពីជួយឲ្យ Real ការពារពាន Club World Cup

ខ្សែប្រយុទ្ធ Cristiano Ronaldo រំពឹងទុកថា នឹងបន្តស្ថិតនៅលើផ្លូវនៃជ័យជម្នះរបស់គេ និងឈ្នះពានបន្ថែមទៀតនៅឯក្លិប Real Madrid ក្រោយពីបានរកគ្រាប់បាល់ក្នុងពេលក្រុមខ្លួនទទួលជ័យជម្នះ 1-០ លើក្រុម Gremio ក្នុងការប្រកួតពាន Club World Cup វគ្គផ្តាច់ព្រ័ត្រ កាលពីថ្ងៃសៅរ៍។

ខ្សែប្រយុទ្ធអន្តរជាតិព័រទុយហ្គាល់វ័យ32ឆ្នាំរូបនេះ បានស៊ុតបាល់ពិន័យ Free-kick កោងចូលទីយ៉ាងល្អ ខណៈដែល Real បានក្លាយជាក្រុមដំបូងគេក្នុងការឈ្នះពាន Club World Cup ពីរលើកជាប់ៗគ្នា។ Ronaldo ទើបតែបានឈ្នះពានបាល់មាស Ballon d’Or ជាលើកទី5របស់គេកាលពីដើមខែនេះ ហើយក៏បានឈ្នះពានកីឡាករឆ្នើមបំផុតក្នុងប្រវត្តិសាស្ត្រផងដែរ។ កីឡាកររូបនេះបានឲ្យដឹងថា៖ «ចំនួននៃការឈ្នះពាននឹងប្រាប់ដោយខ្លួនឯង។ ខ្ញុំពិតជារីករាយណាស់ ខ្ញុំនៅតែមានការលើកទឹកចិត្ត ដើម្បីរក្សាការឈ្នះពានផ្សេងៗ ពោលគឺទាំងពានជាក្រុម និងពានឯកជន»។ Ronaldo បានបន្ថែមទៀតថា៖ «យើងចង់ឈ្នះ ពីព្រោះ Real Madrid មិនធ្លាប់បានឈ្នះពានចំនួន5ក្នុងឆ្នាំតែមួយឡើយ។ ខ្ញុំគិតថា យើងបានលេងក្នុងការប្រកួតយ៉ាងល្អ និងពិតជាស័ក្តិសមក្នុងការដណ្តើមបានជ័យជម្នះ»។ បច្ចុប្បន្ន Ronaldo បានស៊ុតបាល់បញ្ចូលទី15គ្រាប់ហើយ ក្នុងការបង្ហាញខ្លួន20លើកសម្រាប់ក្រុម Real Madrid នៅរដូវកាលនេះ បើទោះបីហាក់ដូចជាធ្លាក់ចុះទម្រង់លេងបន្តិចក្នុងក្របខ័ណ្ឌ La Liga ក៏ដោយ៕

ប្រភពពី៖ BBC

December 18, 2017

Liverpool លត់ Bournemouth ចាស់ដៃ ខណៈ Man Utd ផ្តួល West Brom

ក្រុមហង្សក្រហម Liverpool បានវិលទៅឈរក្នុងចំណាត់ថ្នាក់លេខ4វិញ ក្រោយពីបានផ្តួលក្រុម Bournemouth យ៉ាងរាបដូចកន្ទេលក្នុងលទ្ធផល 4-០ ខណៈដែលក្រុម Manchester United បានរក្សាក្តីសង្ឃឹមនៃការប្រជែងក្របខ័ណ្ឌ Premier League របស់ពួកគេតាមរយៈការផ្តួលក្រុម West Bromwich Albion 2-1 កាលពីថ្ងៃអាទិត្យ។

ស្របពេលដែលក្រុម Manchester City កំពុងតែមានពិន្ទុនាំមុខដាច់យ៉ាងឆ្ងាយនៅលើកំពូលតារាងនោះ ក្រុម Man United ត្រូវតែដណ្តើមជ័យជម្នះឲ្យបាននៅកីឡដ្ឋាន Hawthorns ដើម្បីមានឱកាសណាមួយក្នុងការដេញតាមឲ្យទាន់គូប្រជែងក្នុងតំបន់តែមួយរបស់ពួកគេ។ ខ្សែប្រយុទ្ធ Romelu Lukaku បានជួយឲ្យក្រុមរបស់លោក Jose Mourinho មានគ្រាប់បាល់នាំមុខមុននៅនាទីទី27 ហើយខ្សែបម្រើ Jesse Lingard រកបាន1គ្រាប់ទៀតដើម្បីបន្ថែមការនាំមុខរបស់ក្រុមខ្លួននៅនាទីទី35។ ប៉ុន្តែ Man United មិនបានកត់ត្រាជ័យជម្នះយ៉ាងងាយស្រួលឡើយ ក្រោយពីខ្សែបម្រើ Gareth Barry បានធ្វើការវាយបកបាន1គ្រាប់វិញសម្រាប់ក្រុមម្ចាស់ផ្ទះនៅនាទីទី77។ ប៉ុន្តែ Man United នៅតែបានបញ្ចប់ការប្រកួតនេះតាមរយៈការដណ្តើមបានជ័យជម្នះមួយដែលបានធ្វើឲ្យពួកគេរក្សាការដេញតាមពីក្រោយក្រុម Man City ចំនួន11ពិន្ទុ។ លោក Mourinho បានឲ្យដឹងថា៖ «ខ្ញុំគិតថា យើងពិតជាស័ក្តិសមក្នុងការឈ្នះហើយ។ យើងគឺជាក្រុមខ្លាំងបំផុត។ យើងបានគ្រប់គ្រងការប្រកួតនេះអស់រយៈពេលជាយូរ។ ភាពស្វិតស្វាញក្នុងតង់ទី1 មិនដូចភាពស្វិតស្វាញក្នុងតង់ទី2ឡើយ»។

ស្របពេលជាមួយគ្នានេះ ខ្សែបម្រើប្រយុទ្ធ Mohamed Salah និង Philippe Coutinho បានជួយឲ្យក្រុម Liverpool ដណ្តើមបានជ័យជម្នះយ៉ាងកក់ក្តៅក្នុងលទ្ធផល 4-០ នៅលើទឹកដីក្រុម Bournemouth ខណៈដែលក្រុមហង្សក្រហមមួយនេះបានវិលទៅឈរក្នុងចំណាត់ថ្នាក់លេខ4នៅលើតារាងក្របខ័ណ្ឌ Premier League វិញ៕

ប្រភពពី៖ Sport24

December 18, 2017

ការប្រើប្រាស់ភាសាខ្មែរខុសលើបណ្តាញសង្គមអាចជាចំណុចគ្រោះថ្នាក់

«វប្បធម៌រលត់ជាតិរលាយ វប្បធម៌ពណ្ណរាយជាតិថ្កើងថ្កាន» នេះជាសុភាសិតដែលប្រជាជនខ្មែរគ្រប់គ្នាបានដឹង បានចាំ និងបានឮយ៉ាងហោចណាស់ម្តងក្នុងជីវិត តែថ្មីៗនេះយើងមើលឃើញជាទូទៅថា ការប្រើប្រាស់ភាសាខ្មែរដែលជាផ្នែកមួយយ៉ាងសំខាន់របស់វប្បធម៌ ហាក់ត្រូវបានគេប្រើប្រាស់ខុសច្រើននៅក្នុងបណ្តាញសង្គម ជាពិសេសនៅក្នុងបណ្តាញ Facebook។

អ្នកដែលបានប្រើភាសាខ្មែរខុសនោះមានទាំងយុវជន និស្សិត អ្នកជំនាញបច្ចេកទេស អ្នកធ្វើការងារក្នុងស្ថាប័នសាធារណៈ ស្ថាប័នឯកជន និងអ្នកខ្លះទៀតជាអ្នកដែលមានប្រជាប្រិយភាពក្នុងសង្គមថែមទៀតផង ដែលចំណុចទាំងអស់នេះបានជំរុញឱ្យមានការយល់ច្រឡំ និងបញ្ហាកើតឡើងសម្រាប់វិស័យអក្សរសាស្ត្រខ្មែរ។

ពាក់ព័ន្ធនឹងបញ្ហានេះ ឡារ៉ែន ពាណិជ្ជ បានជួបសម្ភាសន៍ជាមួយលោក ឈិន សីហា ប្រធានស្ថាបនិកក្លិបអក្សរសាស្ត្រខ្មែរ ដើម្បីបង្ហាញពីផលលំបាកនៃការប្រើប្រាស់ភាសាខុស និងគន្លឹះដើម្បីដោះស្រាយបញ្ហាប្រឈមទាំងអស់នៅក្នុងសង្គម៖

តើការប្រើប្រាស់ភាសាខុសក្នុងបណ្តាញសង្គមបានជះផលប៉ះពាល់អ្វីខ្លះដល់សង្គម?

ការប្រើប្រាស់ភាសាខុសជារឿងគ្រោះថ្នាក់មួយសម្រាប់វិស័យអក្សរសាស្ត្រជាតិ ព្រោះថានៅពេលដែលយើងទាំងអស់គ្នាជាមនុស្សទូទៅដែលមិនស្ថិតក្នុងចំណាប់អារម្មណ៍របស់សាធារណជនសរសេរខុសវាមិនសូវជាបញ្ហាប៉ុន្មាននោះទេ តែប្រសិនបើមនុស្សដែលមានប្រជាប្រិយភាពសរសេរខុសវិញនោះ គេគ្រប់គ្នានឹងគិតថាសំណេរនោះត្រូវ ហើយនឹងអនុវត្តតាម។ ការអនុវត្តតាមគ្នានេះអាចធ្វើឱ្យមនុស្សទូទៅលែងស្គាល់ពាក្យត្រឹមត្រូវពិតប្រាកដ ហើយក្លាយជារឿងខុសដោយមិនដឹងខ្លួន។ ម្យ៉ាងវិញទៀត ពេលខ្លះយើងក៏ឃើញមានស្ថាប័នសាធារណៈមួយចំនួនបានសរសេរផ្ទាំងផ្សព្វផ្សាយរបស់ខ្លួនដោយមានកំហុសអក្ខរាវិរុទ្ធផងដែរ ដែលជាហេតុធ្វើឱ្យប្រជាជនមានការយល់ច្រឡំ។

តើគួរធ្វើយ៉ាងណាដើម្បីដោះស្រាយបញ្ហាពាក្យខុសនេះក្នុងស្ថាប័នសាធារណៈ?

ចំពោះការសរសេរខុស នៅក្នុងស្ថាប័នសាធារណៈគឺជារឿងមួយដែលមិនគួរកើតឡើងនោះឡើយព្រោះការផ្សព្វផ្សាយរបស់គាត់ជាការផ្សព្វផ្សាយផ្លូវការដែលមនុស្សជឿទុកចិត្តច្រើន ហេតុនេះនៅពេលដែលគាត់សរសេរខុស ប្រជាជននឹងយល់ថាត្រូវ ហើយនៅពេលដែលឃើញពាក្យត្រូវវិញប្រជាជនអាចគិតថាខុស។ ហេតុនេះដើម្បីដោះស្រាយ ក្រសួងស្ថាប័នពាក់ព័ន្ធគួរមានវិធានការក្នុងការធ្វើវិក្រឹតការផ្នែកអក្សរសាស្ត្រដើម្បីឱ្យមន្ត្រី ឬបុគ្គលិកបានយល់ច្បាស់ពីការប្រើប្រាស់ភាសា ឬចំណុចមួយចំនួនដែលមានការយល់ច្រឡំ ហើយចៀសវាងកំហុសដទៃទៀត។ ក្រៅពីនេះយើងក៏អាចធ្វើសិក្ខាសាលាមួយចំនួនដោយអញ្ជើញអ្នកជំនាញអក្សរសាស្ត្រដើម្បីធ្វើបទបង្ហាញពីការប្រើប្រាស់អក្សរសាស្ត្រជាទៀងទាត់ តែកុំឱ្យរំខានច្រើនដល់ការធ្វើកិច្ចការងាររបស់គាត់ ដើម្បីផ្តល់ឱកាសឱ្យគាត់បានស្វែងយល់ពីអក្សរសាស្ត្រឱ្យបានទូលំទូលាយ។ លើសពីនេះទៅទៀត ការធ្វើសេចក្តីណែនាំជាលាយលក្ខអក្សរ ឬជាការពិន័យរដ្ឋបាលចំពោះកំហុសដដែលៗអាចជាវិធីសាស្ត្រមួយក្នុងការជំរុញឱ្យមានការប្រុងប្រយ័ត្នខ្ពស់ចំពោះការប្រើប្រាស់ភាសាក្នុងការផ្សព្វផ្សាយរបស់ស្ថាប័នសាធារណៈ។

តើធ្វើយ៉ាងណាដើម្បីជំរុញឱ្យសាធារណជនទូទៅប្រើប្រាស់ភាសាឱ្យបានត្រឹមត្រូវ ជាពិសេសក្នុងបណ្តាញសង្គម Facebook?

ការប្រើប្រាស់ភាសាខុសក៏ជាកត្តាប្រឈមផងដែរដែលកំពុងជួបប្រទះក្នុងសង្គមរបស់យើង ព្រោះនៅពេលបច្ចុប្បន្ននេះយើងទាំងអស់គ្នាបានឃើញហើយថាការប្រើប្រាស់ភាសារបស់ប្រជាជនខ្មែរយើងនៅមានកម្រិត ដែលមនុស្សមួយចំនួនកំពុងប្រើប្រាស់ភាសាខុសលើសំណេររបស់ខ្លួន ហើយតែងតែបង្ហាញជាសាធារណៈនៅក្នុងបណ្តាញសង្គម។ បញ្ហាទាំងអស់នេះអាចបណ្តាលមកពីពួកគាត់មិនសូវយកចិត្តទុកដាក់ក្នុងការប្រើប្រាស់ភាសាខ្មែរឱ្យបានត្រឹមត្រូវ តែវាក៏អាចមកពីយើងមិនទាន់មានយន្តការក្នុងការដោះស្រាយបញ្ហាអក្សរសាស្ត្រក្នុងបណ្តាញបច្ចេកវិទ្យាផងដែរ។

ជាដំណោះស្រាយ យើងឃើញហើយថាសម្រាប់ភាសាបរទេសមួយចំនួនគេមានកម្មវិធីកែតម្រូវលើបណ្តាញបច្ចេកវិទ្យា រួមទាំងកម្មវិធីបង្ហាញកំហុសអក្ខរាវិរុទ្ធ ដោយដាក់សញ្ញាផ្សេងៗដើម្បីបង្ហាញថាសំណេរនោះមិនត្រឹមត្រូវ ខណៈកម្មវិធីមួយទៀតគឺបានបិទមិនឱ្យសរសេរពាក្យខុសនោះថែមទៀតផង។ សម្រាប់ភាសាខ្មែរយើង តាមពិតទៅយើងក៏អាចធ្វើបែបនោះបានដែរដើម្បីដោះស្រាយបញ្ហាប្រឈមនានាពាក់ព័ន្ធនឹងអក្សរសាស្ត្រ។

ប្រសិនបើយើងកំណត់ឱ្យពាក្យខុសក្នុងបណ្តាញបច្ចេកវិទ្យាមិនអាចសរសេរបាន នោះប្រជាជនយើងនឹងស្វែងរកពាក្យត្រូវមកសរសេរវិញ ខណៈពេលខ្លះកម្មវិធីបង្ហាញពាក្យខុសមួយចំនួនក៏អាចជាដំណោះស្រាយលើកត្តាប្រឈមផងដែរ ដែលអាចធ្វើឱ្យប្រជាជនខ្មែរយើងដឹងខ្លួនភ្លាមៗបន្ទាប់ពីគាត់បានសរសេរខុស ហើយងាយកែតម្រូវវិញ៕

December 18, 2017

គុណភាពសេវាកម្មវិស័យទេសចរណ៍នឹងកាន់តែល្អប្រសើរ

វិស័យទេសចរណ៍នៅកម្ពុជាទទួលបានកំណើនភ្ញៀវអន្តរជាតិជាបន្តបន្ទាប់ ប៉ុន្តែវិស័យនេះហាក់នៅតែមិនទាន់រៀបរយបានល្អនោះទេលើផ្នែកមួយចំនួនដូចជា ការផ្តល់សេវាប្រកបដោយគុណភាព និងការប្រកួតប្រជែងប្រកបដោយតម្លាភាព រហូតដល់ចុងក្រោយនេះអាជ្ញាធរបានលូកដៃចូលដោយបង្កើតក្រមប្រតិបត្តិសម្រាប់អ្នកប្រកបអាជីវកម្មក្នុងវិស័យទេសចរណ៍ ដែលជាវិស័យសំខាន់មួយក្នុងចំណោមវិស័យបីផ្សេងទៀតនាំកំណើនសេដ្ឋកិច្ចដល់ប្រទេសកម្ពុជា។

នាពេលកន្លងមកផ្នែកឯកជនធ្លាប់បានលើកឡើងពីគុណវិបត្តិនៃការប្រកួតប្រជែងដែលតែងកើតមាននៅក្នុងវិស័យទេសចរណ៍ ដូចជា ការលក់បញ្ចុះតម្លៃទាបខ្លាំងនៅពេលមានភ្នាក់ងារទិញណាមួយចរចាតម្លៃជាមួយក្រុមហ៊ុននានាក្នុងស្រុក ដោយអ្នកប្រកបអាជីវកម្មក្នុងស្រុកបញ្ចុះតម្លៃដ៏ទាបក្នុងន័យទាក់ទាញអតិថិជនឱ្យមកទទួលសេវារបស់ខ្លួន ប៉ុន្តែនៅពេលដែលភ្ញៀវទទួលសេវា អ្នកផ្តល់សេវាបានកាត់បន្ថយគុណភាពសេវាកម្មរបស់ខ្លួនយ៉ាងច្រើនដើម្បីទប់ទល់ការខាតតម្លៃដើម ឬទទួលបានប្រាក់ចំណេញ។ ផ្នែកឯកជនក្នុងវិស័យទេសចរណ៍ក៏ធ្លាប់បានស្នើជាច្រើនលើកអំពីការបញ្ឈប់ការប្រកួតប្រជែងគ្នាឯងដោយបន្ទាបតម្លៃ ឬបន្ថយគុណភាពសេវាកម្ម។

ដើម្បីជួយសម្រួលដល់បញ្ហាទាំងអស់នោះក្រសួងទេសចរណ៍ កាលពីពេលកន្លងមក បានចេញសេចក្តីប្រកាសមួយស្តីពីការដាក់ឱ្យអនុវត្តន៍ក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈសម្រាប់ការីទេសចរណ៍ និងភ្នាក់ងារទេសចរណ៍នៃព្រះរាជាណាចក្រកម្ពុជា។ ប្រកាសនេះបានចែងលម្អិតនូវចំណុចមួយចំនួនដូចជា ក្រមប្រតិបត្តិវិជ្ជាជីវៈការីទេសចរណ៍ និងភ្នាក់ងារទេសចរណ៍ ដែលមានគោលបំណងការពារ និងពង្រឹងប្រសិទ្ធភាពនៃការប្រតិបត្តិវិជ្ជាជីវៈការីទេសចរណ៍ និងភ្នាក់ងារទេសចរណ៍ ព្រមទាំងធានាឱ្យបាននូវសេចក្តីថ្លៃថ្នូររបស់ការីទេសចរណ៍ និងភ្នាក់ងារទេសចរណ៍ក្នុងការប្រកបរបរវិជ្ជាជីវៈដើម្បីបង្កើននូវជំនឿទុកចិត្តពីភ្ញៀវទេសចរ។ ប្រកាសនោះក៏បានចែងដែរថា ត្រូវដាក់ឱ្យអនុវត្តក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈសម្រាប់ការីទេសចរណ៍ និងភ្នាក់ងារទេសចរណ៍ ដើម្បីចូលរួមពង្រឹងគុណភាពក្នុងការផ្តល់សេវាកម្មទេសចរណ៍ លើកកម្ពស់សីលធម៌សង្គម និងលើកស្ទួយវិស័យទេសចរណ៍នៃព្រះរាជាណាចក្រកម្ពុជា ពិសេសការអនុវត្តក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈ ក្នុងនាមជាការីទេសចរណ៍ និងភ្នាក់ងារទេសចរណ៍ប្រកបដោយតម្លាភាព និងប្រសិទ្ធភាពចំពោះភ្ញៀវដែលបានទិញសេវាកម្ម ឬកញ្ចប់ខ្សែទស្សនកិច្ចផ្សេង។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) បានថ្លែងថា ក្រមសីលធម៌ដែលក្រសួងទេសចរណ៍ប្រកាសនេះជារឿងល្អ ព្រោះវាមិននាំឱ្យខាតបង់ដល់អ្នកប្រកបអាជីវកម្មក្នុងវិស័យទេសចរណ៍នោះទេ ប៉ុន្តែវាទាមទារឱ្យអនុវត្តឱ្យបានព្រមគ្នាទាំងមន្ត្រី និងទាំងវិស័យឯកជន។

លោក ស៊ីណាន បានបញ្ជាក់ថា៖“រឿងនេះត្រូវតែអនុវត្តឱ្យបានទាំងអស់គ្នាទាំងអ្នកប្រកបអាជីវកម្ម និងអ្នកអនុវត្តច្បាប់។ បើមានច្បាប់ អនុវត្តតាមច្បាប់ វានឹងជួយឱ្យពាណិជ្ជកម្មល្អ ព្រមទាំងធ្វើឱ្យបរិយាកាសអាជីវកម្មមានលក្ខណៈល្អប្រសើរសម្រាប់ប្រទេសជាតិ។

យោងតាមស្ថិតិរបស់ក្រសួងទេសចរណ៍ បានឱ្យដឹងថា គិតមកដល់ពេលនេះមានអាជីវកម្មការីទេសចរណ៍ និងភ្នាក់ងារទេសចរណ៍នៅកម្ពុជាសរុបចំនួន 682ក្រុមហ៊ុន ក្នុងនោះសាខាមានចំនួន88។ ក្រសួង បានផ្តល់អាជ្ញាប័ណ្ណដល់ការីទេសចរណ៍នាំភ្ញៀវចូលក្នុងប្រទេសចំនួន487 ការីទេសចរណ៍នាំភ្ញៀវចេញក្រៅប្រទេសចំនួន49 ការីទេសចរណ៍នាំភ្ញៀវកម្សាន្តក្នុងស្រុកចំនួន44 និងភ្នាក់ងារទេសចរណ៍ ចំនួន238៕

December 18, 2017

Author: វល័ក្ខ