ថ្នាក់ដឹកនាំជាន់ខ្ពស់កម្ពុជា និងឥណ្ឌា បានបង្ហាញពីគោលជំហរសហការគ្នាក្នុងការជំរុញចរន្តលំហូរទេសចរណ៍ និងអ្នកវិនិយោគរវាងប្រទេសទាំងពីរឱ្យបានច្រើនបន្ថែមទៀត ខណៈចំនួនភ្ញៀវទេសចរនៃប្រទេសទាំងពីរនៅមានកម្រិតនៅឡើយ។
ក្នុងជំនួបទ្វេភាគីជាមួយ លោកជំទាវ ប្រាមីឡា រ៉ានីប្រាម៉ា រដ្ឋមន្ត្រីបរិស្ថាន និងព្រៃឈើ នៃរដ្ឋអាសាន់របស់សាធារណរដ្ឋឥណ្ឌា ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា ថ្វីត្បិតភ្ញៀវទេសចរឥណ្ឌាមកទស្សនាកម្ពុជានៅមានចំនួនតិច បើធៀបនឹងអត្រាប្រជាជននៃប្រទេសឥណ្ឌាយ៉ាងណាក៏ដោយ ប៉ុន្តែនិន្នាការនៃភ្ញៀវទេសចរឥណ្ឌាមកកាន់ប្រទេសកម្ពុជាបានបង្ហាញពីសក្តានុពលនៃការកើនឡើងជាបន្តបន្ទាប់។
ឯកឧត្តមរដ្ឋមន្ត្រី បានមានប្រសាសន៍ថា កម្ពុជាសូមស្វាគមន៍ចំពោះភ្ញៀវទេសចរ និងវិនិយោគិនឥណ្ឌាក្នុងការធ្វើដំណើរមកកាន់ប្រទេសកម្ពុជា។ កម្ពុជាក៏ស្នើឱ្យភាគីឥណ្ឌាជួយជាជំនួយផ្នែកបច្ចេកទេសក្នុងការរៀបចំ និងអភិវឌ្ឍន៍បន្ថែមលើផ្នែកអេកូទេសចរណ៍ ទេសចរណ៍វប្បធម៌ ទេសចរណ៍សត្វព្រៃពិសេសការនាំយកសត្វខ្លាធំពីរដ្ឋអាសាន់ មកព្រលែង និងអភិរក្សឡើងវិញនៅកម្ពុជាផងដែរ។
ក្នុងជំនួបនោះភាគីទាំងពីរក៏បានជំរុញឱ្យមានការហោះហើរត្រង់ពីកម្ពុជាឆ្ពោះទៅកាន់រដ្ឋអាសាន់ ព្រោះរដ្ឋដែលស្ថិតនៅភាគឦសានរបស់ប្រទេសឥណ្ឌាមួយនេះ ប្រៀបដូចជាច្រកតភ្ជាប់អាស៊ាន និងកម្ពុជាយ៉ាងដូច្នេះដែរ ហើយការតភ្ជាប់នេះអាចជាផ្នែកមួយនៃការជំរុញវិនិយោគថ្មីបន្ថែមទៀត។
យោងតាមស្ថិតិភ្ញៀវទេសចររបស់ក្រសួងទេសចរណ៍ ភ្ញៀវទេសចរឥណ្ឌា ចូលមកកម្ពុជាមានកំណើនជិត26% ក្នុងឆ្នាំ2016 ធៀបនឹងឆ្នាំ2015។ ទិន្នន័យបង្ហាញថា កាលពីឆ្នាំ2016 ជនជាតិឥណ្ឌាដែលបានចូលមកកម្ពុជា មានចំនួន46,131នាក់ ខណៈកាលពីឆ្នាំ2015 មានចំនួន36,671នាក់។ ភ្ញៀវទេសចរឥណ្ឌា មកកាន់ប្រទេសកម្ពុជាស្មើនឹង0.9%នៃចំនួនភ្ញៀវទេសចរសរុបកាលពីឆ្នាំ2016 ដែលមានចំនួនជាង5លាននាក់។
យោងតាមជំនួបទ្វេភាគីនោះ កម្ពុជា និងឥណ្ឌា នឹងចុះអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យទេសចរណ៍ជាមួយគ្នានាពេលខាងមុខ ដោយគណៈប្រតិភូក្រសួងទេសចរណ៍កម្ពុជា នឹងទៅចូលរួមក្នុងកិច្ចប្រជុំកំពូលវិនិយោគិនសកល ដែលនឹងប្រារព្ធឡើងនាថ្ងៃទី3-4 ខែកុម្ភៈ ឆ្នាំ2018 ខាងមុខ ក្នុងរដ្ឋអាសាន់ ប្រទេសឥណ្ឌា ដែលមានប្រទេសជាច្រើនទូទាំងពិភពលោកចូលរួម។
កម្ពុជា ជាប្រទេសតូច មានប្រជាជនតិច ប៉ុន្តែកម្ពុជាជាទីផ្សារទេសចរណ៍ដ៏មានសក្តានុពលសម្រាប់ឥណ្ឌា ដោយសារប្រជាជនកម្ពុជាជាពុទ្ធសាសនិក ហើយមនុស្សវ័យចំណាស់ជាច្រើន រួមទាំងព្រះសង្ឃខ្មែរផង តែងជ្រើសរើសដំណើរទៅទស្សនាពុទ្ធដា្ឋននានានៅប្រទេសឥណ្ឌា៕
