វល័ក្ខ - La Reine Media

ក្រសូងបរិស្ថាន និងក្រុមហ៊ុមសុខាអូតែល រៀបចំព្រឹត្តការណ៍ដ៏អស្ចារ្យ «បរិស្ថានដើម្បីអនាគតយើង»

ដើម្បីចូលរូមអបអរពិធីបុណ្យសមុទ្រនៅខេត្តកែប និងកម្សាន្តសប្បាយក្នុងពិធីបុណ្យណូអែលឆ្នាំនេះ នៅលើភ្នំបូកគោ ក្រសូងបរិស្ថានបានសហការជាមូយក្រុមហ៊ុមសុខាអូតែល រៀបចំព្រឹត្តការណ៍ដ៏អស្ចារ្យ «បរិស្ថានដើម្បីអនាគតយើង» ដែលស្ថិតក្រោមប្រធានបទ «តោះទៅរាំនៅបូកគោ» នៅសណ្ឋាគារ ឋានសួគ៌សុខា ក្នុងឧទ្យានជាតិព្រះមុនីវង្សបូកគោ នាថ្ងៃទី24-25 ខែធ្នូឆ្នាំ2017។

កម្មវិធីរួមមាន ការប្រគំតន្ត្រីដ៏អស្ចារ្យ ដោយមានការចូលរួមពីតារាចម្រៀងល្បីៗនៃព្រះរាជាណាចក្រកម្ពុជា ក្រុមកំប្លែង ក្រុមបង្ហាញម៉ូតសម្លៀកបំពាក់ ល្បែងកម្សាន្តបែបអប់រំ ល្បែងប្រជាប្រិយ លំហាត់យោគៈនៅលើកំពូលភ្នំបូកគោ ការរតាំងបង្ហាញរថយន្ត ការបោះតង់ ស្តង់លក់ម្ហូបអាហារ ភេសជ្ជះនិងបង្អែមជាច្រើនមុខព្រមទាំងសកម្មភាពសប្បាយជាច្រើនទៀត។ ភ្ញៀវចូលរួមមិនត្រឹមតែទទួលបាននូវភាពសប្បាយរីករាយប៉ុណ្ណោះទេ ថែមទាំងបានចូលរួមចំណែកផ្សព្វផ្សាយ និងថែរក្សាការពារបរិស្ថាន ជាពិសេសគឺកម្មវិធីនេះក៏មានការចាក់ផ្សាយផ្ទាល់តាមទូរទស្សន៍ប៉ុស្តិ៍អប្សារាផងដែរ៕

December 25, 2017

ទុនវិនិយោគវិស័យសំណង់នៅកម្ពុជាកើនឡើងជិត30%

បើទោះបីជាសកម្មភាពនៃការទិញ លក់អចលនទ្រព្យហាក់មិនសូវមានភាពផុលផុសនារយៈពេលចុងក្រោយនេះក៏ដោយ ប៉ុន្តែទុនវិនិយោគក្នុងវិស័យសំណង់នៅកម្ពុជាត្រូវបានរកឃើញថា មានការកើនឡើងប្រមាណជិត30% ក្នុងរយៈពេល10ខែដំបូង នៃឆ្នាំ2017 នេះ។

រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ ឯកឧត្តម ប៉ែន សុផល បានឱ្យដឹងក្នុងពិធីបញ្ចុះបឋមសិលាសាងសង់លំនៅឋានបុរីប្រណីត អ & អេស្វ របស់ក្រុមហ៊ុន R&F Properties Hs (Cambodia) Co., Ltd ដែលស្ថិតនៅតាមបណ្តោយផ្លូវ60ម៉ែត្រ ក្នុងសង្កាត់ចាក់អង្រែលើ កាលពីសប្តាហ៍មុនថារយៈពេល10ខែ ឆ្នាំ2017 នេះវិស័យសំណង់កើនឡើងប្រមាណ27.68%។ ឯកឧត្តម បានបញ្ជាក់ថា ក្នុងឆ្នាំ2016 កន្លងទៅទុនវិនិយោគវិស័យសំណង់ មានប្រមាណ5,580 លានដុល្លារសហរដ្ឋ បើធៀបនឹងឆ្នាំ2015 កើនឡើងប្រមាណ67.15% និងនៅក្នុងរយៈពេល10ខែ នៃឆ្នាំ 2017 នេះមានប្រមាណ 6,267 លានដុល្លារ បើធៀបនឹងរយៈពេលដូចគ្នានៃឆ្នាំ2016 គឺមានកំណើនប្រមាណ 27,68% និងបង្កើតការងារជូនប្រជាពលរដ្ឋបានប្រមាណជាង200,000នាក់ក្នុងមួយថ្ងៃ។

ស្របនឹងការរីកចម្រើននេះ សហគ្រាសអាជីវកម្មក្នុងវិស័យសំណង់ បានចុះបញ្ជីនៅក្រសួង ដែលនៅមានសុពលភាពបានកើនដល់1,038 ក្រុមហ៊ុន ក្នុងនោះក្រុមហ៊ុនសិក្សាគម្រោងប្លង់មាន42 និងក្រុមហ៊ុនសាងសង់សរុបមានចំនួន996។ ទន្ទឹមនេះក្រសួងក៏បាននិងកំពុងពង្រឹងការគ្រប់គ្រងសំណង់ ពិសេសសំណង់អគារធំៗឱ្យអនុវត្តបានត្រឹមត្រូវទៅតាមបទដ្ឋានគតិយុត្តបច្ចេកវិទ្យាស្តង់ដារខ្ពស់ និងមានអត្តសញ្ញាណវប្បធម៌ជាតិ ដើម្បីធានាបាននូវសុវត្ថិភាព សោភណភាព បរិស្ថានបៃតង និងភាពសុខុដុមរមណីយកម្មទៅនឹងវប្បធម៌ប្រពៃណីខ្មែរ ក្នុងគោលដៅសម្រេចឱ្យបាននូវការអភិវឌ្ឍប្រកបដោយចីរភាព។

ឯកឧត្តម បានបន្ថែមទៀតថា តាមការសិក្សារបស់ក្រសួងអំពីក្របខណ្ឌយុទ្ធសាស្ត្រអភិវឌ្ឍទីក្រុងនៅកម្ពុជា ឃើញថាចំនួនប្រជាជនរស់នៅក្នុងរាជធានី-ក្រុង និងទីប្រជុំជននៅឆ្នាំ2014 មានចំនួនប្រមាណ4,5លាននាក់ត្រូវជា27,1% នឹងបានបន្តកើនឡើងដល់7,92លាននាក់ត្រូវជា44% នៅឆ្នាំ2030។ តាមទិន្នន័យនេះបង្ហាញឱ្យឃើញថា រយៈពេល15ឆ្នាំ (2015-2030) តម្រូវការលំនៅឋានសម្រាប់តំបន់រាជធានី ក្រុង និងទីប្រជុំជនមានប្រមាណ80ម៉ឺនលំនៅឋាន ដែលគិតជាមធ្យមមានតម្រូវការប្រមាណ5ម៉ឺនលំនៅឋានក្នុងមួយឆ្នាំៗ។

ឆ្លើយតបនឹងកំណើននេះ ក្រសួងបាននិងកំពុងសកម្មអនុវត្តគោលនយោបាយជាតិស្តីពីការរៀបចំដែនដី ក្នុងការកសាងផែនការរៀបចំដែនដី ប្លង់គោលនិងផែនការប្រើប្រាស់ដីគ្រប់កម្រិត និងគោលនយោបាយជាតិស្តីពីលំនៅឋានឱ្យស្របតាមតម្រូវការនៃការរីកលូតលាស់ផ្នែកនគរូបនីយកម្ម និងកំណត់តំបន់ទិសដៅយុទ្ធសាស្ត្រអភិវឌ្ឍក្រុង ពង្រីកទីក្រុង តំបន់ស្នាក់នៅ និងជាពិសេសលំនៅឋានដែលមានតម្លៃសមរម្យជូនមន្ត្រីរាជការ កងកម្លាំងប្រដាប់អាវុធនិងប្រជាពលរដ្ឋដែលមានប្រាក់ចំណូលមធ្យម ប្រាក់ចំណូលទាប និងជនងាយរងគ្រោះ ដើម្បីធានាការអភិវឌ្ឍប្រកបដោយចីរភាព និងសមធម៌៕

December 25, 2017

បន្លែសុវត្ថិភាពកំពុងទទួលបានការគាំទ្រនៅលើទីផ្សារកម្ពុជា

កសិករដាំដំណាំនៅក្នុងស្រុកស្អាង ខេត្តកណ្តាលបាននិយាយថា ការផ្លាស់ប្តូរទម្លាប់ដាំដំណាំតាមបែបបុរាណ មកដាំតាមបែបបច្ចេកវិទ្យាថ្មីដោយមិនមានសារធាតុគីមីកំពុងទទួលបានផលយ៉ាងច្រើន និងទទួលបានការគាំទ្រខ្លាំងនៅលើទីផ្សារទៀតផង។

លោក ជួង វ៉ុន កសិករដាំម្រះ នៅជើងភ្នំស្អាងក្នុងឃុំស្អាងភ្នំ ស្រុកស្អាង ខេត្តកណ្តាល បានសម្តែងនូវអារម្មណ៍រីករាយថា ក្នុងនាមជាកសិករគ្មានពេលណាសប្បាយចិត្តជាងពេលដែលដំណាំទទួលបានផលល្អ និងលក់បានថ្លៃនោះទេ ព្រោះវាជាការផ្តល់នូវកម្លាំងចិត្តដ៏ខ្លាំងសម្រាប់កសិករក្នុងការបន្តការដាំដុះ។ លោកបន្តថា គ្រួសាររបស់គាត់បានចាប់របរដាំបន្លែតាមទម្លាប់ចាស់ជាង10ឆ្នាំមកហើយ ដោយទើបតែបានប្តូរមកដាំតាមបច្ចេកទេសទំនើបបែបបន្លែសុវត្ថិភាពនេះជាង1ឆ្នាំប៉ុណ្ណោះ។ ការផ្លាស់ប្តូរទម្លាប់នេះ គឺក្រោយពីទទួលបានការបណ្តុះបណ្តាលពីអង្គការលាស់ថ្មី ដែលធ្វើឱ្យជីវភាពគ្រួសារកាន់តែប្រសើរ។

កសិករខាងលើបន្តថា តម្លៃផ្លែម្រះនៅឆ្នាំនេះបានថ្លៃគ្រាន់បើ ដោយកាលពីឆ្នាំមុន1គីឡូក្រាមលក់បានតម្លៃត្រឹមតែ1,000រៀលប៉ុណ្ណោះ ប៉ុន្តែឥឡូវបាន2,000រៀល តែក៏មានពេលខ្លះធ្លាក់មកនៅត្រឹមចន្លោះពី1,200-1,300រៀលផងដែរ។

ចំណែក លោកស្រី ជីវ ជីតា ដែលបានប្រកបរបរដាំម្រះ បានប្រាប់ដែរថា ម្រះមុននឹងដាំ គឺគេត្រូវភ្ជូរដីហាលចោលពី1-2សប្តាហ៍ដើម្បីឱ្យដីឆ្អិនល្អ ទើបផ្គុំរង និងបាចកំបោរសដើម្បីសម្លាប់មេរោគ ហើយចាប់ផ្តើមរាយបង្កប់ទុយោ ក្រាលកៅស៊ូលើរង និងដោតឫស្សីសម្រាប់ធ្វើទ្រើង។ បន្ទាប់មកគេយកកូនម្រះដែលបណ្តុះរួម មកដាំតាមប្រហោងដែលបានចោះទុក និងដាំឃ្លាតពីគ្នាប្រហែល20សង់ទីម៉ែត្រ។ មុននឹងបានកូនម្រះដំបូងគេត្រូវយកគ្រាប់ម្រះត្រាំក្នុងទឹកក្តៅអ៊ុនៗចន្លោះពី2-3ម៉ោង រួចយកទៅផ្អាប់ក្នុងដី2-3យប់ទើបយកដីមួយភាគ អាចម៍គោ2ភាគ និងផេះអង្កាម2ភាគ មកលាយចូលគ្នាហើយដាក់ចូលខ្ទះលីងប្រមាណ15នាទីទុកឱ្យត្រជាក់ទើបយកទៅដាក់ក្នុងត្រេដាក់គ្រាប់ម្រះចូលដើម្បីបណ្តុះ។ លោកស្រី បានបញ្ជាក់ថា ការដាំដោយក្រាលកៅស៊ូ និងបង្កប់ទុយោនេះ យើងមិនហត់ក្នុងការធ្វើស្មៅ ឬស្រោចទឹកទេ ហើយក្រោយដាំ1ខែ10ថ្ងៃ គឺអាចបេះបានហើយ ដោយ2ទៅ3ថ្ងៃបេះម្តង និងបន្តបេះរហូតដល់ទៅ1ខែឯណោះទើបគេរើដើមចាស់ចោលដាំសាជាថ្មី។

លោក ប៉ុល អភិរក្ស ប្រធានសាខាអង្គការលាស់ថ្មី ប្រចាំខេត្តកណ្តាល បាននិយាយថា អង្គការរបស់លោកមានគោលដៅជួយបង្រៀនកសិករឱ្យដាំបន្លែសុវត្ថិភាព ដើម្បីកាត់បន្ថយផលប៉ះពាល់ដល់សុខភាពទាំងអ្នកដាំក៏ដូចជាអ្នកទទួលទាន ដោយបង្រៀននូវបច្ចេកទេសដល់ពួកគាត់ ព្រមទាំងវិធីសាស្ត្រដាំដុះ ថែទាំ ក៏ដូចជាការប្រើប្រាស់ជី និងថ្នាំពុលគីមី ឱ្យបានត្រឹមត្រូវ និងជួយរកទីផ្សារឱ្យកសិករផងដែរ។

ប្រធានការិយាល័យកសិកម្ម ស្រុកស្អាង លោក អ៊ុក សុគន្ធ មានប្រសាសន៍ថា ស្អាងគឺជាស្រុកមួយក្នុងចំណោមស្រុកក្រុងទាំង11 របស់ខេត្តកណ្តាល ដែលមានសក្តានុពលក្នុងការផលិត និងផ្គត់ផ្គង់បន្លែនាំមុខគេក្នុងខេត្តកណ្តាល ដោយក្នុងមួយថ្ងៃអាចមានបរិមាណពី50-60តោន។ ទូទាំងស្រុកស្អាងមានផ្ទៃដីដាំបន្លែចម្រុះចំនួន2,037ហិកតា។ លោកបានបន្ថែមទៀតថា ដើម្បីកាត់បន្ថយផលប៉ះពាល់ដល់សុខភាព អ្នកទទួលទានទាំងអស់គួរតែងាកទៅរកការដាំដុះបែបបច្ចេកទេសទំនើប គឺបន្លែសុវត្ថិភាពដើម្បីទទួលបានការគាំទ្រនៅលើទីផ្សារ។

គួរបញ្ជាក់ថា បន្លែសុវត្ថិភាពមានលក្ខណៈខុសពីបន្លែសរីរាង្គ ដោយវាស្ថិតនៅចន្លោះបន្លែមានសារធាតុគីមី និងបន្លែសរីរាង្គដែលគ្មានជាតិគីមីសោះ។ លោក សុគន្ធា និយាយថា បន្លែសុវត្ថិភាពគេប្រើជីគីមីខ្លះដែរ ដើម្បីថែរក្សាដំណាំឱ្យល្អ ប៉ុន្តែគេប្រើក្នុងកម្រិតតិចតួចបំផុត ហើយមុននឹងកាត់យកទៅលក់ ឬទទួលទាន គេត្រូវបញ្ឈប់ការប្រើប្រាស់ថ្នាំគីមីជាច្រើនថ្ងៃ ដោយមិនដូចបន្លែគីមី ដែលជួនកាលពេលគេកាត់យកទៅលក់ហើយនោះ នៅតែបន្តជ្រលក់ថ្នាំគីមីបន្ថែមដើម្បីរក្សាសោភ័ណភាពឱ្យនៅបានយូរ៕

December 25, 2017

ការផ្ទេរប្រាក់របស់ពលករពីកូរ៉េ មកកម្ពុជា តាមរយៈធនាគារអេស៊ីលីដា បន្តកើនឡើង

ការផ្ទេរប្រាក់មកពីសាធារណរដ្ឋកូរ៉េ មកកាន់ប្រទេសកម្ពុជាតាមរយៈធនាគារអេស៊ីលីដា ភីអិលស៊ី ក្នុងឆ្នាំ2017 នេះបានកើនឡើងជាង12% បើធៀបទៅនឹងរយៈពេលដូចគ្នាកាលពីឆ្នាំ2016 ខណៈមានក្រុមហ៊ុន និងភ្នាក់ងារថ្មីៗជាច្រើនទៀតក៏ទទួលបម្រើសេវាដូចគ្នានេះដែរ។

យោងតាមទិន្នន័យដែលផ្តល់ដោយថ្នាក់ដឹកនាំជាន់ខ្ពស់របស់ធនាគារអេស៊ីលីដា បានបង្ហាញថា ការផ្ទេរប្រាក់ពីសាធារណរដ្ឋកូរ៉េ មកកម្ពុជា ក្នុងឆ្នាំនេះមានចំនួនជិត235លានដុល្លារអាមេរិក ដោយមានកំណើនប្រមាណ13% បើធៀបនឹងឆ្នាំ2016 ដែលមានចំនួនទឹកប្រាក់ជិត 208លានដុល្លារ។ ទិន្នន័យដដែលបង្ហាញថា តាមរយៈចំនួនទឹកប្រាក់ខាងលើនេះចំនួននៃការផ្ទេរប្រាក់ក៏បានកើនឡើងប្រមាណ15% រហូតដល់ចំនួន 84,057ដង ក្នុងឆ្នាំ2017 ធៀបនឹងឆ្នាំ2016 ដែលចំនួននៃការផ្ញើប្រាក់មានចំនួន73,146ដង។

លោកស្រីបណ្ឌិត សូ ផនណារី អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិប្រតិបត្តិការធនាគារអេស៊ីលីដា បានលើកឡើងថា ក្រោយពីមានកិច្ចសហប្រតិបត្តិការជាមួយធនាគារកូរ៉េ ក៏ដូចជាដៃគូដែលជាភ្នាក់ងារផ្ទេរប្រាក់ គឺពិតជាបានផ្តល់នូវភាពងាយស្រួលច្រើនដល់ការបម្រើសេវាផ្ទេរប្រាក់របស់ប្រជាពលករខ្មែរដែលកំពុងបម្រើការងារនៅសាធារណរដ្ឋកូរ៉េ។

លោកស្រីបណ្ឌិត បានបញ្ជាក់តាមសារអេឡិចត្រូនិកថា៖“ការផ្ទេរប្រាក់ពីសាធារណរដ្ឋកូរ៉េមកកាន់ប្រទេសកម្ពុជាតាមរយៈធនាគារអេស៊ីលីដា មានភាពងាយស្រួល ដោយសារធនាគារអេស៊ីលីដាជាធនាគារធំ មានបណ្តាញច្រើនរហូតដល់ចំនួន 260សាខានៅទូទាំងប្រទេសកម្ពុជា។ គេអាចផ្ទេរប្រាក់ប្រកបដោយភាពងាយស្រួល និងគ្មានបញ្ហាអ្វីនោះទេ។ ស្របពេលនៃការរីកចម្រើនលើសេវាផ្ទេរប្រាក់ពីសាធារណរដ្ឋកូរ៉េ ដោយសារមានប្រជាពលករខ្មែរយ៉ាងហោចណាស់ជាង4ម៉ឺននាក់កំពុងបម្រើការងារនៅទីនោះ ក៏មានក្រុមហ៊ុនថ្មីៗទៀតបានហក់ចូលប្រកួតប្រជែងក្នុងសេវាផ្ទេរប្រាក់នេះផងដែរ។

កាលពីថ្ងៃទី20 ខែធ្នូនេះ ធនាគារគូកមីនកម្ពុជា និងធនាគារឯកទេសវីង បានប្រកាសពីការដាក់ឱ្យដំណើរការនូវសេវាផ្ទេរប្រាក់ពីប្រទេសកូរ៉េខាងត្បូងមកប្រទេសកម្ពុជា ដែលជាផ្នែកមួយរបស់ធនាគារគូកមីន ដែលជាធនាគារពាណិជ្ជដ៏ធំមួយនៅប្រទេសកូរ៉េខាងត្បូង។

លោក អ៊ុក វ៉ាន់ដា អនុប្រធានធនាគារគូកមីនកម្ពុជា បានលើកឡើងថា ភាពជាដៃគូនេះនឹងធ្វើឱ្យសេវាកម្មផ្ទេរប្រាក់ពីសាធារណរដ្ឋកូរ៉េមកកាន់ប្រទេសកម្ពុជា កាន់តែមានភាពងាយស្រួល មានសុវត្ថិភាព និងលឿនជាងមុន។ លោកបានបន្តថាធនាគារគូកមីនកម្ពុជា មានចំនួនគណនីពលករខ្មែរដែលបម្រើការងារនៅប្រទេសកូរ៉េខាងត្បូងច្រើនជាងគេ ហើយចំនួនពលករខ្មែរនៅប្រទេសកូរ៉េ 90%បានផ្ញើប្រាក់មកស្រុកកំណើតតាមរយៈធនាគារគូកមីននៅប្រទេសកូរ៉េខាងត្បូង។

សកម្មភាពពលករខ្មែរនៅកូរ៉េខាងត្បូង រាំលេងកម្សាន្តក្នុងឱកាសបុណ្យចូលឆ្នាំខ្មែរ

លោក វ៉ាន់ដា បញ្ជាក់ថា ពលករខ្មែរនៅកូរ៉េ អាចផ្ញើប្រាក់តាមកម្មវិធីស្មាតហ្វូន Liiv KB Cambodia ដែលត្រូវបានដាក់បញ្ចូលជាមួយវីងឬដោយគ្រាន់តែទៅសាខាណាមួយ ក្នុងចំណោមសាខាប្រមាណ1,500កន្លែងនៅប្រទេសកូរ៉េ ហើយធ្វើប្រតិបត្តិការ ចំណែកឯការទទួលប្រាក់នៅប្រទេសកម្ពុជាវិញគឺកាន់តែងាយស្រួលជាងមុន ជាមួយបណ្តាញភ្នាក់ងារវីងប្រមាណ5,000កន្លែងទូទាំងប្រទេស។

លោក សុធី សុវិត្យា នាយកទទួលបន្ទុកផ្នែកផ្ទេរប្រាក់ពីក្រៅប្រទេសរបស់ធនាគារឯកទេសវីង បានអះអាងថា ការផ្ញើប្រាក់នេះកាន់តែងាយស្រួលដោយចំណាយពេលត្រឹមតែ10នាទីរវាងប្រទេសទាំងពីរ ហើយការចាប់ផ្តើមអនុវត្ត គឺចាប់ពីថ្ងៃទី20 ខែធ្នូនេះតទៅជាមួយតម្លៃសេវាសមរម្យចាប់ពី1ម៉ឺនរៀលឡើងទៅ។

ឯកឧត្តម ហេង សួរ ប្រធានអង្គភាពនាំពលករទៅក្រៅប្រទេស និងជាអ្នកនាំពាក្យរបស់ក្រសួងការងារ និងបណ្តុះបណ្តាលវិជ្ជាជីវៈ ធ្លាប់បានអះអាងថា ប្រាក់បៀវត្សខ្ពស់នៅប្រទេសកូរ៉េគឺជាមូលហេតុចម្បងនៃការទាក់ទាញពលករខ្មែរ ថ្វីត្បិតតែគេត្រូវចំណាយប្រាក់ជាច្រើនមុននឹងបានចេញទៅ ដោយពលករម្នាក់ត្រូវចំណាយយ៉ាងហោចណាស់1,000ដុល្លារដែរសម្រាប់លិខិតស្នាមផ្សេងៗមុននឹងបានចេញទៅ។

ឯកឧត្តម បានឱ្យដឹងថា ពលករខ្មែរដែលទៅបម្រើការនៅប្រទេសកូរ៉េក្នុងឆ្នាំដំបូងបានទទួលប្រាក់បៀវត្សយ៉ាងតិចចំនួន950ដុល្លារក្នុងមួយខែ។ នាពេលកន្លងមក ក្រសួងធ្លាប់បានធ្វើការស្ទង់មតិចំពោះកម្មករហើយដឹងថាកម្មករម្នាក់អាចសន្សំបានជាមធ្យម650ដុល្លារ ក្នុង1ខែ ដោយពួកគាត់អាចផ្ញើមកស្រុកវិញចំនួនប្រហែល 500ដុល្លារក្នុងមួយខែ៕

December 25, 2017

យុវជនមកពីគ្រប់មហាវិទ្យាល័យនឹងរួមគ្នាជជែកពិភាក្សា និងបង្ហាញទស្សនៈលើបញ្ហាសង្គម

មនុស្សគ្រប់រូបសុទ្ធតែជាកោសិកាដ៏សំខាន់ដែលមិនអាចខ្វះបាននៅក្នុងសង្គម ហើយសង្គមមួយអាចអភិវឌ្ឍ ឬមានបញ្ហាអាស្រ័យលើឥរិយាបថរបស់ប្រជាជនវិជ្ជមាន ឬអវិជ្ជមាន។ ដោយមើលឃើញពីកម្រិតនៃការយល់ដឹងរបស់ប្រជាជនខ្មែរ ពិសេសយុវជនដែលកំពុងសិក្សានៅគ្រឹះស្ថានឧត្តមសិក្សានានានៅកម្ពុជា កម្មវិធី The Perspectives Cambodia ត្រូវបានបង្កើតឡើងដើម្បីផ្តល់ឱកាសឱ្យយុវជនខ្មែរទាំងអស់បានបញ្ចេញមតិជាសាធារណៈ។

ប្រធានគ្រប់គ្រងកម្មវិធី The Perspectives Cambodia រដូវកាលទី2 លោក ហួរ តុលា បានលើកឡើងថាដោយសារការអប់រំនៅកម្ពុជាមានភាពប្រសើរឡើងជាលំដាប់ ហេតុនេះសមត្ថភាពរបស់យុវជនក៏មានការកើនឡើងស្របពេលដែលសង្គមកំពុងមានការអភិវឌ្ឍ តែបញ្ហាប្រឈមមួយចំនួនសម្រាប់យុវជនក៏កើតមានផងដែរ ពិសេសគឺភាពស៊ីជម្រៅនៃការគិត និងការបញ្ចេញមតិលើបញ្ហានានាក្នុងសង្គម។ សង្គមមួយអាចអភិវឌ្ឍទៅមុខបានលឿន គឺដោយសារតែសង្គមនោះមានប្រជាជនដែលមានទស្សនវិស័យ និងមានការគិតបែបវិជ្ជមានច្រើនដើម្បីរួមគ្នាកសាងសមត្ថភាពចូលរួមចំណែកអភិវឌ្ឍ និងដោះស្រាយបញ្ហាសង្គមនានាប្រកបដោយសន្តិភាព។

លោក តុលា បាននិយាយថា ៖ “ដើម្បីលើកកម្ពស់ការអភិវឌ្ឍ និងនិរន្តរភាពសង្គម ដោយឈរលើមូលដ្ឋានចំណេះដឹង ក្រុមការងារ The Perspectives Cambodia បានបង្កើតកម្មវិធីនេះឡើងដើម្បីផ្តល់ឱកាសដល់យុវជនខ្មែរឱ្យបានទទួលចំណេះដឹងពីអ្នកជំនាញសំខាន់ៗនៅកម្ពុជា ដើម្បីយកចំណេះដឹងទាំងអស់នោះទៅបង្ហាញជាសាធារណៈតាមរយៈការប្រកួតតស៊ូមតិលើបញ្ហាសំខាន់ៗនៅកម្ពុជា។

សមាជិកស្ថាបនិកនៃកម្មវិធីខាងលើបានលើកឡើងថា នៅប្រទេសអភិវឌ្ឍ គឺគេមានធនធានមនុស្សដែលពោរពេញដោយសមត្ថភាពក្នុងការបញ្ចេញទស្សនវិស័យដែលគេចង់ឃើញទៅកាន់សង្គមរបស់គេ។ ជាក់ស្តែងយុវជននៅប្រទេសសិង្ហបុរី គេមានក្រុមអ្នកចងក្រងទស្សនវិស័យ ហើយផ្តល់ឱកាសឱ្យយុវជនចូលរួមបង្ហាញពីទស្សនវិស័យផ្ទាល់ខ្លួនរបស់គេ ខណៈកម្ពុជាយើងក៏ចង់ឃើញយុវជនមានការគិតវែងឆ្ងាយ និងមានទស្សនវិស័យផងដែរ។ លើសពីនេះទៅទៀត ការគិតគឺជារឿងសំខាន់ណាស់សម្រាប់សង្គម ព្រោះប្រសិនបើយុវជន ដែលជាប្រជាជនសកម្មមានគំនិតប្រកបដោយគុណតម្លៃ សក្តានុពល និងសីលធម៌ នោះសង្គមរបស់យើងនឹងអាចអភិវឌ្ឍបានយ៉ាងលឿនប្រកបដោយសន្តិភាព។

ពាក់ព័ន្ធនឹងបញ្ហានេះដែរ លោក រិន រ៉ាវុធ ប្រធានក្រុមបច្ចេកទេសនៃកម្មវិធី The Perspectives Cambodia បានលើកឡើងថា ក្នុងគោលបំណងចង់កសាងវេទិកាសង្គមសម្រាប់យុវជន ដើម្បីកសាងសមត្ថភាព ចំណេះដឹង និងការចែករំលែក តាមរយៈការជជែកដេញដោល តស៊ូមតិ និងពិភាក្សាលើស្ថានភាពសង្គមជាក់ស្តែងនៃវិស័យអភិវឌ្ឍនានា យើងបានបង្កើតកម្មវិធី The Perspectives Cambodia ឡើងដែលកម្មវិធីនេះនឹងអាចបំផុសទឹកចិត្តយុវជនឱ្យកាន់តែមានភាពសកម្មក្នុងការចូលរួម។ តាមរយៈកម្មវិធីតស៊ូមតិដ៏មានសារៈសំខាន់នេះ យើងបានជ្រើសរើសបេក្ខជនដែលមានសមត្ថភាព និងសក្តានុពល ដើម្បីមកបណ្តុះបណ្តាលបន្ថែមជាមួយនឹងគ្រូបង្វឹកដែលសុទ្ធតែជាអ្នកជំនាញមកពីពហុវិស័យ មុននឹងឱ្យបេក្ខជននោះទៅតស៊ូមតិដណ្តើមយកពានរង្វាន់ថ្នាក់ជាតិលើការតស៊ូមតិ។

លោក រិន រ៉ាវុធ បានអះអាងថា ៖ “ក្រៅពីការផ្តល់ឱកាសឱ្យយុវជនមកពីគ្រប់សាកលវិទ្យាល័យបានសិក្សា និងប្រកួតតស៊ូមតិ យើងក៏ជួយពួកគាត់ក្នុងការបណ្តុះគំនិតសង្គមវិជ្ជមាននៃការរស់នៅជាមួយគ្នាក្នុងភាពចម្រុះនៃគំនិត។

លោក បានបន្ថែមថា នៅពេលដែលយុវជន ឬប្រជាជនខ្មែរមានសមត្ថភាពគ្រប់គ្រាន់ក្នុងការធ្វើការសម្រេចចិត្តនានា និងមានភាពក្លាហានក្នុងការជជែកពិភាក្សាលើបញ្ហាសង្គម នៅពេលនោះយើងនឹងបានឃើញភាពចម្រុះនៃគំនិតប្រកបដោយភាពវិជ្ជមានដែលអាចរុញច្រានឱ្យសកម្មភាពនានាក្នុងសង្គមនឹងវិវត្តន៍ឆ្ពោះទៅរកភាពវិជ្ជមាន។ ជាគោលដៅ និងជាគុណតម្លៃរបស់កម្មវិធី The Perspectives Cambodia គឺយើងចង់ឃើញយុវជន និងបណ្តុះបណ្តាលយុវជនឱ្យក្លាយជាមនុស្សមានសីលធម៌ ចេះគោរពគ្នា និងមានភាពជាអ្នកវិជ្ជាជីវៈនិយម។ លើសពីនេះទៅទៀត យើងក៏បណ្តុះបណ្តាលពួកគាត់ឱ្យមានសេចក្តីក្លាហានផងដែរ តាមរយៈការពង្រឹងគំនិត និងឥរិយាបថប្រកបដោយឆន្ទៈនៃការផ្លាស់ប្តូរឆ្ពោះទៅរកភាពវិជ្ជមាន និងជំរុញឱ្យគាត់ក្លាយជាមនុស្សដែលមានការយកចិត្តទុកដាក់ខ្ពស់លើការចូលរួម និងមានសតិសម្បជញ្ញៈក្នុងស្មារតីសាមគ្គីភាព ហើយទទួលយកនូវគំនិតចម្រុះពីគ្រប់មជ្ឈដ្ឋានដែលត្រឹមត្រូវ៕

December 25, 2017

10វិធី បំបាត់អាការ «ត្អើក» យ៉ាងមានប្រសិទ្ធភាព

«ត្អើក» ជាអាការដែលអាចកើតឡើងចំពោះមនុស្សគ្រប់គ្នា ដែលបណ្ដាលមកពីអាការដែលក្រពះអាហារកើតអាការក្រហាយ ធ្វើឱ្យសរសៃប្រសាទត្រូវជំរុញឱ្យធ្វើការខុសប្រក្រតី ហុចផលឱ្យសន្ទះបាំងខ្យល់ ឬសាច់ដុំដែលឃាំងកណ្ដាលរវាងប្រអប់ទ្រូង និងប្រអប់ពោះមានអាការបង្រួញខ្លួនឡើងរឹងជាចង្វាក់ៗ សាច់ដុំឆ្អឹងជំនីបានទទួលរងការញ័ររញ្ជួយឱ្យកើតការបង្រួញខ្លួនឡើងរឹងក្នុងលក្ខណៈដូចគ្នា។

មូលហេតុរបស់អាការត្អើក មានទាំងខាងសភាពរាងកាយ និងខាងអារម្មណ៍។ ខាងរាងកាយមានដូចជា ផលប៉ះពាល់បន្ទាប់បន្សំពីភាពខុសប្រក្រតីរបស់បំពង់ក និងដើមទ្រូង ដូចជា ឃើញមានដុំសាច់ដុះ ក្រពេញទឹករងៃរីកធំ ឬភាពខុសប្រក្រតីរបស់ប្រអប់ពោះ ដូចជា រលាកសាច់ភ្នាសប្រអប់ពោះ ឬអាការដែលកើតឡើងក្រោយការវះកាត់។ ចំណែកអាការត្អើកបណ្តាលមកពីខាងអារម្មណ៍ មានដូចជា ការភ្ញាក់ផ្អើលឡើងភ្លាមៗ ឬមានបញ្ហាធុញថប់តានតឹងរ៉ាំរ៉ៃជាដើម។

ក្រៅពីនេះ ការទទួលទានភេសជ្ជៈដែលមានហ្គាសច្រើន ដូចជា ស្រាបៀរ ស្រាសូដា ការទទួលទានអាហារច្រើនជ្រុលពេក ទទួលទានអាហាររសជាតិហឹរ ឬប្រៃខ្លាំង និងជក់បារីច្រើនក៏ជាមូលហេតុរបស់អាការត្អើកបានដូចគ្នា។

ជាប្រក្រតីអាការត្អើកនឹងបាត់ទៅវិញជាបណ្ដើរៗនៅពេលដែលពេលវេលាកន្លងផុតទៅបានមួយរយៈ តែបើសិនជាមានអាការត្អើកក្នុងអំឡុងពេលសំខាន់ៗ ដូចជា ស្ថិតក្នុងអំឡុងពេលប្រជុំ សម្ភាសចូលធ្វើការ ឬនៅទីសាធារណៈជាដើមនោះ អ្នកច្រើនតែចង់ឱ្យអាការត្អើកនេះឆាប់បាត់ទៅវិញឱ្យលឿនៗ ដូច្នេះចូរសាកល្បងធ្វើតាមវិធីខាងក្រោមទាំងអស់នេះសាកលមើល៖

ដកដង្ហើមក្នុងថង់ក្រដាស
ទំពានំប៉័ងក្រៀម
បង្អោនខ្លួនទទួលទានទឹកពីមាត់កែវដែលនៅខាងមុខ ឬខាងណាដែលនៅជិតបបូរមាត់
ក្រេបទឹកពីកែវលឿនៗ ច្រើនក្អឹក
លេបទឹកកកដែលកិនម៉ដ្ឋ
ធ្វើឱ្យភ្ញាក់ផ្អើលខ្លាំង ដូចជា ទះខ្នងស្រាលៗមិនឱ្យដឹងខ្លួនភ្លាមៗ
ច្របាច់ត្រង់សាច់ប៉ោងក្រោមម្រាមមេដៃរបស់ដៃម្ខាងទៀត ឬសង្កត់ម្ដុំស្នាមចង្អូរលើបបូរមាត់
យកម្រាមដៃញ៉ុករន្ធត្រចៀកប្រមាណជា 20-30នាទី
ក្រេបទឹកផ្លែក្រូចឆ្មារស្រស់
អត់ដង្ហើម ហើយរាប់លេខនៅក្នុងចិត្តពី1ដល់15

បើធ្វើអស់គ្រប់វិធីហើយ អាការត្អើកនៅតែមិនបាត់ទៀត សូមធ្វើចិត្តឱ្យត្រជាក់ៗ ហើយអង្គុយរង់ចាំមួយស្របក់ អាការត្អើកនឹងល្អប្រសើរឡើងវិញជាបណ្ដើរៗមិនខាន។ តែបើលោកអ្នកមានអាការត្អើកញឹកញាប់ ឬត្អើកខ្លាំងៗរហូតមានអាការឈឺ-ក ឈឺដើមទ្រូង ឬឈឺខ្នងនោះ គួរតែប្រញាប់ទៅជួបគ្រូពេទ្យ ដើម្បីពិនិត្យរាងកាយយ៉ាងលម្អិតជាថ្មីម្ដងទៀត៕

December 25, 2017

Austin ជាប់ពិន័យព្យួរ 3ប្រកួត ក្រោយពីទាត់លើផ្ទៃមុខរបស់អ្នកចាំទី Lossl

ខ្សែប្រយុទ្ធ Charlie Austin របស់ Southampton ត្រូវបានចោទប្រកាន់ពីបទប្រព្រឹត្តអំពើហិង្សា និងបានរងពិន័យព្យួរ3ប្រកួត ក្រោយពីបានទាត់អ្នកចាំទី Jonas Lossl របស់ក្រុម Huddersfield ចំផ្ទៃមុខ ក្នុងពេលក្រុមទាំងពីរបានបញ្ចប់ក្នុងលទ្ធផលស្មើ 1-1 កាលពីថ្ងៃសៅរ៍។ ខ្សែប្រយុទ្ធរបស់ក្រុម Southampton រូបនេះ ត្រូវបានមើលឃើញថា បានទាត់អ្នកចាំទី Lossl ចំច្រមុះ ដែលបានធ្វើឲ្យអ្នកចាំទីរូបនោះ ហូរឈាមពេញផ្ទៃមុខ និងត្រូវការការព្យាបាល់រយៈពេល 4នាទី។

Austin ដែលក្រោយមកត្រូវបានប្តូរចេញដោយសារតែរបួសសរសៃពួរគន្លាក់ជើងនោះ មិនត្រូវបានផ្តល់ការពិន័យដោយអាជ្ញាកណ្តាលភ្លាមៗឡើយ ប៉ុន្តែសហព័ន្ធកីឡាបាល់ទាត់អង់គ្លេសហៅកាត់ថា FA បានសម្រេចចិត្តដាក់ពិន័យព្យួរ 3ប្រកួត ក្រោយពីបានត្រួតពិនិត្យមើលលើឧប្បត្តិហេតុនេះ។ FA បានប្រកាសថា៖ Charlie Austin នឹងត្រូវជាប់ពិន័យព្យួរសម្រាប់ការប្រកួត 3លើកបន្ទាប់របស់ Southampton ក្រោយពីរូបគេត្រូវបានចោទប្រកាន់ពីបទប្រព្រឹត្តអំពើហិង្សា។

រូបគេបានទទួលការចោទប្រកាន់នេះ ប៉ុន្តែបានធ្វើការតវ៉ាថា ការដាក់ពិន័យព្យួរមានទំហំធំពេកហើយ។ ការតវ៉ានេះ ត្រូវបានច្រានចោលដោយក្រុមប្រឹក្សាវិន័យឯករាជ្យ។ Austin វ័យ 28ឆ្នាំនឹងត្រូវអវត្តមានក្នុងការប្រកួត 3លើកបន្ទាប់របស់ក្រុម Southampton ពោលគឺការប្រកួតនៅលើទឹកដីក្រុម Tottenham និង Manchester United ក៏ដូចជាការប្រកួតលើទឹកដីខ្លួនឯង ជាមួយនឹងក្រុម Crystal Palace នាថ្ងៃទី2 ខែមករា ឆ្នាំ2018៕

ប្រភពពី៖ The Sun

December 25, 2017

លោក Zidane បញ្ជាក់ថា Real Madrid នឹងមិនបោះបង់ការប្រជែងពានឡើយ

លោក Zinedine Zidane គ្រូបង្វឹករបស់ក្រុម Real Madrid បានបញ្ជាក់ថា ក្រុមរបស់លោកនឹងមិនយល់ព្រមចុះចាញ់ដោយងាយៗ និងបោះបង់ក្តីសង្ឃឹមនៃការប្រជែងពានរបស់ខ្លួនឡើយ បើទោះបីពួកគេបានជូបបរាជ័យយ៉ាងចាស់ដៃក្នុងលទ្ធផល 3-0 ក្នុងការប្រកួត El Clasico ក្រោមស្នាដៃក្រុម Barcelona កាលពីថ្ងៃសៅរ៍ ក៏ដោយ។

ការបរាជ័យនេះ បានធ្វើឲ្យក្រុមម្ចាស់ជើងឯកទ្វីបអឺរ៉ុប Real Madrid ដេញតាមពីក្រោយក្រុម Barcelona ដល់ទៅ14ពិន្ទុនៅលើកំពូលតារាងនៃក្របខ័ណ្ឌ La Liga បើទោះបីសល់មួយប្រកួតក្នុងដៃក៏ដោយ។ ប៉ុន្តែ ទោះបីជាយ៉ាងណា គ្រូបង្វឹកសញ្ជាតិបារាំងរូបនេះ បានបញ្ជាក់ថា Real នឹងមានភាពខ្លាំងជាងមុននៅឆ្នាំថ្មីនេះ ក្រោយពីការសម្រាកនារដូវរងារបស់ក្របខ័ណ្ឌ La Liga និងបានបដិសេធក្នុងការធ្វើការបោះបង់ពានរង្វាន់លីកទៅឲ្យក្រុម Barcelona។

លោក Zinedine Zidane គ្រូបង្វឹករបស់ Real បានឲ្យដឹងថា៖ យើងពិតជាខកចិត្ត ពីព្រោះវាជាការបរាជ័យមួយដែលធ្វើឲ្យឈឺចាប់។ Real មិនដែលបោះបង់ឡើយ ទោះបីមានអ្វីកើតឡើងក៏ដោយ។ វាជាពេលវេលាដ៏លំបាក ពីព្រោះយើងបានចាញ់ដោយគ្រាប់បាល់3គ្រាប់។ ខ្ញុំអាចនិយាយបានថា យើងមិនស័ក្តិសមចាញ់បែបនេះឡើយ ប៉ុន្តែ នោះគឺជាកីឡាបាល់ទាត់។ ការបរាជ័យនេះ ធ្វើឲ្យក្រុម Real Madrid នៅរក្សាការឈរក្នុងចំណាត់ថ្នាក់លេខ4 ខណៈដែលបច្ចុប្បន្នក្រុម Barcelona នាំមុខ 9ពិន្ទុដាច់លើក្រុមឈរលេខ2 Atletico Madrid។ ក្រោយពីបានបង្កើតឱកាសជាច្រើននៅតង់ទី1 ក្រុម Real Madrid មិនអាចទប់ស្កាត់ Lionel Messi បានឡើយ ខណៈដែលតារាឆ្នើមអន្តរជាតិអាហ្សង់ទីនរូបនេះ បានស៊ុតបាល់ប៉េណាល់ទី1គ្រាប់ ក្រោយពី Luis Suarez បានរកគ្រាប់បាល់បើកឆាក ហើយបន្ទាប់មក បានជួយឲ្យ Aleix Vidal រកគ្រាប់បាល់ទី3 សម្រាប់ក្រុម Barca នៅនាទីបន្ថែម៕

ប្រភពពី៖ Sport24

December 25, 2017

កាសែតឡារ៉ែន ពាណិជ្ជ លេខ 107

[easy_media_download url=”https://www.lareine.com.kh/wp-content/uploads/2017/12/LRPN_107-for-web.pdf” force_dl=”1″]

December 25, 2017

លើកោះ សាមុយ ជាមួយ Bangkok Airways ភាពពេញចិត្តដែលមិនអាចបំភ្លេចបាន

ក្រុមហ៊ុនអាកាសចរណ៍ដ៏ល្បីល្បាញប្រចាំភូមិភាគអាស៊ី-អាគ្នេយ៍ Bangkok Airways ម្ចាស់ពាក្យស្លោក “Asia’s Boutique Airline” កាលពីដើមខែធ្នូ កន្លងទៅថ្មីៗនេះ បានរៀបចំព្រឹត្តិការណ៍ដំណើរកម្សាន្តដ៏អស្ចារ្យមួយរយៈពេល 3ថ្ងៃ2យប់ នៅតំបន់ទេសចរណ៍ដ៏ល្បីល្បាញនៅក្នុងប្រទេសថៃ គឺកោះសាមុយ ដែលមានការចូលរួមដំណើរពីខាងក្រុមហ៊ុនទេសចរណ៍ និងអ្នកសារព័ត៌មានជាច្រើនរូប។

បន្ទាប់ពីធ្វើដំណើរដោយជំនឿទុកចិត្ត និងសប្បាយរីករាយតាមជើងហោះហើរ Bangkok Airways PG 938 (ភ្នំពេញ-បាងកក) និងបន្តដោយជើងហោះហើរលេខ PG 120 (បាងកក- សាមុយ) ក្រុមភ្ញៀវទេសចរបានមកដល់កោះសាមុយប្រកបដោយសុវត្ថិភាព និងក្ដីរីករាយបំផុត។

នៅថ្ងៃដំបូងក្រុមភ្ញៀវទេសចរទាំងឡាយត្រូវបាននាំធ្វើដំណើរកម្សាន្តដើម្បីទទួលយកបទពិសោធដ៏ស្រស់បំព្រងនៅលើទឹកដីកោះសាមុយ តាមរថយន្តទេសចរណ៍ទៅកាន់មណ្ឌលទេសចរណ៍ដ៏គួរឱ្យចាប់អារម្មណ៍ និងល្បីល្បាញបំផុតនៅលើកោះសាមុយ គឺ Hin Ta និង Hin yai (ថ្មតា ថ្មយាយ) ដែលស្ថិតនៅលើឆ្នេរសមុទ្រ និងបានបញ្ចប់ដំណើរទេសចរណ៍នៅថ្ងៃដំបូងនេះដោយការទៅទស្សនានៅមជ្ឈមណ្ឌលពាណិជ្ជកម្មដ៏ធំ និងសម្បូរបែបមួយនៅលើកោះសាមុយ នេះគឺ Central Festival Samui និងបន្ទាប់មកក៏បានធ្វើដំណើរត្រឡប់ទៅសម្រាកនៅក្នុងសណ្ឋាគារលំដាប់ផ្កាយ 5ដ៏ទំនើប និងល្បីល្បាញ Novotel Samui ដែលស្ថិតនៅជាប់នឹងមាត់សមុទ្រ។

ថ្ងៃទី8ធ្នូ ដែលជាថ្ងៃទី2 នៃដំណើរកម្សាន្តដ៏សែនអស្ចារ្យជាមួយក្រុមហ៊ុនអាកាសចរណ៍ល្បីល្បាញ និងប្រណីតឥតខ្ចោះ Bangkok Airways ភ្ញៀវទេសចរទាំងអស់ត្រូវបាននាំទៅកម្សាន្ត និងទស្សនាធម្មជាតិដ៏ស្រស់បំព្រងនៅលើរមណីយដ្ឋានកោះ តៅ និងកោះណាង យួន តាមរយៈទូកទេសចរណ៍ល្បឿនលឿន(Speed Boat) និងបានទៅដល់ អាវ មួង ឆ្នេរ ស្វាយ លើកោះ តៅ ដែលស្ថិតនៅកណ្ដាលផ្ទៃទឹកសមុទ្រដ៏ខៀវស្រងាត់ដើម្បីស្រូបយកខ្យល់អាកាសដ៏បរិសុទ្ធ មានមុជក្នុងទឹកជ្រៅ (Snorkeling) និងដើរទស្សនាកោះដ៏សែនស្រស់ស្អាតមួយនេះ។

ក្រោយពីទទួលទានអាហារថ្ងៃត្រង់ដ៏សែនឆ្ងាញ់ និងសម្បូរបែបនៅក្នុងភោជនីយដ្ឋានលើកោះ តៅរួចហើយភ្ញៀវទេសចរទាំងអស់ត្រូវបាននាំចេញដំណើរទៅកាន់ កោះ ណាង យួន ដែលស្ថិតនៅចម្ងាយតែ 480 ម៉ែត្រពីកោះ តៅប៉ុណ្ណោះ។ នៅទីនោះលោកអ្នកអាចសម្រាកកាយ បន្ធូរអារម្មណ៍ជាមួយនឹងបណ្ដុំផ្កាថ្មដ៏ស្រស់ស្អាត ប្លែកៗ និងកម្របានឃើញដ៏ច្រើនដែលត្រូវបានគេដាក់ឈ្មោះឱ្យថា “Crystal Clear” រួចហើយបន្តឡើងទៅលើកំពូលកូនភ្នំដើម្បីទស្សនាឆ្នេរកោះណាង យួនទាំងមូល និងថតរូបទុកជាអនុស្សាវរីយ៍។

ដោយភាពសម្បូរបែបខាងវិស័យទេសចរណ៍ដ៏ទំនើប និងស្រស់ស្អាត រាត្រីថ្ងៃទី2 នេះក្រុមភ្ញៀវទេសចរត្រូវបានខាងម្ចាស់កម្មវិធី គឺក្រុមហ៊ុនអាកាសចរណ៍ Bangkok Airways នាំទៅសម្រាកនៅឯ New Star Beach Resort ដែលជារីសតនៅជាប់នឹងឆ្នេរដ៏ស្រស់ត្រកាល ដ៏ទំនើប និងស្ថិតនៅកណ្ដាលធម្មជាតិដ៏គួរឱ្យចង់ស្នាក់នៅ។

នៅថ្ងៃបង្ហើយ (ទី9 ខែធ្នូ) បន្ទាប់ពីទទួលទានអាហារពេលព្រឹករួច ភ្ញៀវទេសចរទាំងអស់ត្រូវបាននាំទៅទស្សនាតំបន់ទេសចរណ៍រមណីយដ្ឋាន Pra Yai Temple និងពិសាអាហារថ្ងៃត្រង់នៅឯភោជនីយដ្ឋាន Khao Hom restaurant រួចហើយនៅវេលាម៉ោង13:00 ទាំងអស់គ្នាបានមកដល់អាកាសយានដ្ឋានសាមុយ និងធ្វើដំណើរត្រឡប់ទៅទីក្រុងបាងកក តាមជើងយន្តហោះ PG 134 និង PG 935 មកទីក្រុងភ្នំពេញវិញដោយសុវត្ថិភាព និងពោរពេញដោយក្ដីពេញចិត្ត និងជំនឿចិត្តយ៉ាងខ្លាំងចំពោះសេវាកម្មដ៏ល្អប្រណីតរបស់ក្រុមហ៊ុនអាកាសចរណ៍ Bangkok Airways “Asia’s Boutique Airline” ដ៏ល្បីល្បាញមួយនេះ៕

December 23, 2017

Author: វល័ក្ខ