Author: វល័ក្ខ

ណាហ្គាវើលដ៍ រៀបចំតន្ត្រីឆ្លងឆ្នាំធំបំផុតចំនួន 2
សាធារណជនរាប់ម៉ឺននាក់ បានចូលរួមទស្សនាតន្ត្រីនៅសាលមហោស្រព NABA នៅ ណាហ្គាទី 2 និងនៅសួនច្បារសម្តេច ហ៊ុន សែន ដើម្បីស្វាគមន៍ឆ្នាំថ្មី ២០១៨
មានសាធារណជន និងទស្សនិកជនដែលជាប្រជាពលរដ្ឋរស់នៅរាជធានីភ្នំពេញ និងទេសចរជាតិ-អន្តរជាតិរាប់ម៉ឺននាក់ បានរីករាយទស្សនាតន្ត្រីឆ្លងឆ្នាំធំបំផុតពីររៀបចំឡើងដោយណាហ្គាវើលដ៍នៅថ្ងៃទី 31 ធ្នូ ដើម្បីស្វាគមន៍ឆ្នាំថ្មី 2018 ។ ការប្រគំតន្ត្រីទីមួយ ត្រូវបានធ្វើឡើងនៅសាលមហោស្រព NABA នៅណាហ្គាទី 2 និងមួយទៀតធ្វើឡើងនៅសួនច្បារសម្តេច ហ៊ុន សែន ដែលចូលរួមសម្តែងដោយកំពូលតារាចម្រៀងជួរមុខប្រចាំព្រះរាជាណាចក្រកម្ពុជា និងអ្នកសម្តែងអន្តរជាតិប្រចាំណាហ្គាវើលដ៍ផងដែរ ។ ការប្រគំតន្ត្រីឆ្លងឆ្នាំដ៏ពិសេសនេះ ត្រូវបានផ្តល់កិត្តិយសចូលរួមជាអធិបតីដោយឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ព្រមទាំងថ្នាក់ដឹកនាំ និងភ្ញៀវកិត្តិយសជាច្រើនទៀតផង។
តន្ត្រីឆ្លងឆ្នាំដែលធ្វើនៅសាលមហោស្រព NABA នៅណាហ្គាទី 2 ដែលមាន 2000 កៅអីនេះ ចូលរួមសម្តែងដោយកំពូលតារាចម្រៀង ម៉េង កែវពេជ្ជតា មាស សុខសោភា និងទេព បូព្រឹក្ស ហើយណាហ្គាវើលដ៍បានចែកជូនសំបុត្រដើម្បីឲ្យពុកម៉ែបងប្អូនបានចូលរួមរីករាយដោយសេរី។
តន្ត្រីឆ្លងឆ្នាំដ៏កក្រើកនៅសាលមហោស្រព NABA នៅណាហ្គាទី 2 ដែលមានរយៈពេល 90នាទីនេះ មានការសម្តែងបទចម្រៀងដែលមានការពេញនិយមកាលពី3ទសវត្សរ៍មុន និងបទចម្រៀងសម័យបច្ចុប្បន្នផងដែរ ។ អ្វីដែលអស្ចារ្យផងដែរនោះ គឺមានការចាក់បញ្ចាំងរូបភាពវីដេអូ 3D-mapping ដោយម៉ាស៊ីនបញ្ចាំងដែលមានបច្ចេកវិទ្យាទំនើបចុងក្រោយ និងដំបូងគេបង្អស់ក្នុងព្រះរាជាណាចក្រកម្ពុជា!
ភាពរីករាយ បានបន្តកាន់តែខ្លាំងនៅក្នុងតន្ត្រីឆ្លងឆ្នាំដ៏មហស្ចារ្យនៅសួនច្បារសម្តេច ហ៊ុន សែន ដែលចូលរួមសម្តែងដោយកំពូលតារាចម្រៀងជួរមុខ លោក ព្រាប សុវត្ថិ និងសិល្បករ-សិល្បការិនីប្រចាំណាហ្គាវើលដ៍ដែលរួមមានអ្នកលេងភ្លេង អ្នកចម្រៀង អ្នករាំ និងអ្នកសម្តែងសៀករហ័សកម្ម ។ មិនតែប៉ុណ្ណោះក៏មានវត្តមានរបស់កញ្ញា សួស វីសា ក្រុមក្មេងខ្មែរ ព្រមទាំងពិធីករ-ពិធីការិនីល្បីឈ្មោះ លោក ជា វណ្ណារិទ្ធ និង កញ្ញា ហ៊ិន ចាន់នីរ័ត្ន ព្រមទាំងមានហ្គេមកម្សាន្តចន្លោះការសម្តែងនីមួយៗដែលពុកម៉ែបងប្អូនបានឈ្នះរង្វាន់ធំជាច្រើនទៀតផង ។
ភាពសប្បាយរីករាយបំផុតនេះ បានបន្តរហូតដល់វិនាទី ទី 1 នៃឆ្នាំថ្មីដោយមានការរាប់ថយក្រោយការបាញ់កាំជ្រួច និងការបញ្ចាំងភ្លើង LED ដ៏មហស្ចារ្យជុំវិញណាហ្គាទី 2 ដែលមានពន្លឺភ្លើងរត់ជុំវិញអាគារដ៏ទាក់ទាញ និងលេចធ្លោក្នុងរាជធានីភ្នំពេញដើម្បីស្វាគមន៍ឆ្នាំថ្មី 2018 ជាមួយទស្សនិកជនក៏ដូចជាប្រជាជនក្នុងព្រះរាជាណាចក្រកម្ពុជា និងពិភពលោកផងដែរ ៕
January 2, 2018
កម្មវិធីឆ្លងឆ្នាំថ្មីរបស់ស្រាបៀរ HEINEKEN ទទួលបានការចាប់អារម្មណ៍យ៉ាងខ្លាំង
នៅថ្ងៃអាទិត្យទី31 ខែធ្នូ ឆ្នាំ2017 Heineken ដែលជាស្រាបៀរលំដាប់ថ្នាក់អន្តរជាតិដ៏ល្បីល្បាញបំផុតក្នុងពិភពលោក បានរៀបចំកម្មវិធីឆ្លងឆ្នាំថ្មីទីតាំងពិសេសដ៏ទំនើបចំនួន2កន្លែង ដោយទទួលបានការចាប់អារម្មណ៍យ៉ាងខ្លាំងពីអ្នកគាំទ្ររបស់ខ្លួន ដែលទទួលបានបទពិសោធន៍ឆ្លងឆ្នាំថ្មីលំដាប់ថ្នាក់ខ្ពស់ជាពិសេសនៅចំកណ្តាលបេះដូងនៃទីក្រុងភ្នំពេញ។
ឆ្នាំនេះគឺជាឆ្នាំកាន់តែពិសេសដែលស្រាបៀរ Heineken បានលើកទឹកចិត្តអ្នកគាំទ្ររបស់ខ្លួនចូលរួមកម្មវិធីឆ្លងឆ្នាំថ្មីនៅទីខ្ពស់ចំកណ្តាលក្រុង ដូច្នេះពួកគេអាចរាំរែកកម្សាន្តសប្បាយជាមួយតារាល្បីៗ ដោយជ្រើសរើសទីតាំងកម្សាន្តពេលរាត្រីដ៏ល្អបំផុត (និងខ្ពស់បំផុត) ចំនួន2កន្លែង គឺ ក្លិប Eclipse Skybar នៅជាន់ទី 22 នៃអគារ Phnom Penh Tower និង Le Moon Sky Terrace ដែលមានទេសភាពស្រស់ស្អាតដ៏អស្ចារ្យបំផុតសម្រាប់ពិធីអបអរឆ្លងឆ្នាំថ្មីនៅមាត់ទន្លេ។
កម្មវិធីឆ្លងឆ្នាំថ្មីទាំង2របស់ស្រាបៀរ Heineken នេះ ទទួលបានជោគជ័យយ៉ាងខ្លាំងដោយមានមនុស្សចូលរួមច្រើនពេញទីតាំងទាំង2តែម្ដង ដែលបានប្រព្រឹត្តធ្វើឡើងទៅស្របពេលជាមួយគ្នានៅតាមទីតាំងនីមួយៗ ដោយមានការចូលរួមសម្តែងពីសំណាក់ឌីជេ និងតារាល្បីៗ ប្រចាំព្រះរាជាណាចក្រកម្ពុជាដូចជា ៖ ឌីជេ Avida, ឌីជេ Cathrin, Chat Kanhchna Khmeng Khmer និងទស្សនីយភាពដ៏ទាក់ទាញពីក្រុមរាំ LED។
ជាមួយនឹងភាពល្បីល្បាញដោយសាររសជាតិ និងមានលក់នៅលើទីផ្សារក្នុងបណ្តាប្រទេសជាង192 ស្រាបៀរ Heineken បានប្តេជ្ញាចិត្តក្នុងការបង្កើតទស្សនីយភាពពេលរាត្រីលំដាប់កំពូលនៅក្នុងរាជធានីភ្នំពេញ និងបណ្តាខេត្តក្រុងសំខាន់ៗដទៃទៀតតាមរយៈការរួមបញ្ចូលគ្នានូវកម្មវិធីលំដាប់អន្តរជាតិបង្កប់ដោយគំនិតច្នៃប្រឌិតថ្មី និងបទពិសោធន៍ពិសេសដ៏ល្អឯក។
ដើម្បីស្វែងយល់ព័ត៌មានបន្ថែមអំពីស្រាបៀរ Heineken នៅកម្ពុជា សូមចូលគេហទំព័រហ្វេសប៊ុកផ្លូវការ ៖ www.facebook.com/heineken/

សូមរីករាយពិសាស្រាបៀរ Heineken ដោយការទទួលខុសត្រូវ
January 2, 2018
ភាពខុសគ្នាដែលឪពុកម្តាយមិនបានដឹងរវាងកូនតូចចូលរៀនតាំងពីអាយុ 2ឆ្នាំ និងចូលរៀននៅអាយុ 6ឆ្នាំ
សំណួរដែលអាណាព្យាបាលជាច្រើនចាប់អារម្មណ៍ចង់ដឹងនាពេលបច្ចុប្បន្ននេះគឺ តើរវាងកុមារតូចដែលចូលរៀនតាំងពីអាយុ 2-3ឆ្នាំ និងកុមារតូចដែលចូលរៀននៅអាយុ 6ឆ្នាំ មានភាពខុសគ្នាដូចម្តេចខ្លះ? សំណួរនេះត្រូវបានគេលើកឡើងស្របពេលដែលមានសាលាជាច្រើននៅកម្ពុជាចាប់ផ្តើមបង្កើតសេវាកម្មទទួលមើលថែទាំ និងបង្រៀនក្មេងតូចៗតាំងពីអាយុ6ខែឡើងទៅខណៈដែលឪពុកម្តាយជាច្រើនជាប់រវល់ធ្វើការដោយមិនមានពេលនៅមើលថែទាំកូនបានគ្រប់គ្រាន់។
ពាក់ព័ន្ធនឹងបញ្ហានេះ លោកស្រី គឹម សុជាតា នាយិកាសាលាអន្តរជាតិ សាស្តា បានលើកឡើងថា ក្មេងតូចៗដែលបានចូលសាលាតាំងពីអាយុ2-3ឆ្នាំមានភាពរហ័សរហួនជាងក្មេងដែលចូលសាលានៅអាយុ6ឆ្នាំ ព្រោះថាក្មេងតូចអាយុក្រោម 6ឆ្នាំត្រូវការការគាំពារច្រើនពីការមើលថែទាំផ្នែកសុខភាពទាំងសុខភាពផ្លូវកាយ និងផ្លូវចិត្ត ទាំងចំណីអាហារ ការហ្វឹកហាត់ឥរិយាបទ និងត្រូវបង្រៀនពីរបៀបនៃការរស់នៅផ្សេងៗទៀត។
លោកស្រី គឹម សុជាតា បាននិយាយថា ៖ ប្រសិនបើអាណាព្យាបាលមិនសូវបានគិតគូរខ្វល់ពីរឿងរបបអាហាររបស់កូនតូចនោះទេ អាចធ្វើឱ្យសុខភាពរបស់ក្មេងខ្សោយ ហើយកាលណាសុខភាពខ្សោយ ខួរក្បាលក៏មិនសូវរហ័សរហួនតាមនោះដែរ។
លោកស្រីបានលើកឡើងថា អាណាព្យាបាលគួរចេះជ្រើសរើសសាលាដែលល្អអាចទុកចិត្តបានប្រសិនបើចង់ដាក់កូនឱ្យចូលរៀនតាំងពីអាយុ2-3ឆ្នាំ ព្រោះគេមានអ្នកជំនាញផ្នែកអាហារដែលធ្វើតម្រូវទៅតាមលក្ខខណ្ឌសុខភាព និងវ័យរបស់ក្មេងតូច។ ជាទូទៅក្មេងតូចៗត្រូវការអាហារ និងវីតាមីនច្រើនប្រភេទក្នុងមួយថ្ងៃដែលយើងត្រូវផ្តល់ឱ្យគាត់ ដោយមានតុល្យភាពត្រឹមត្រូវ មិនអាចខ្វះ ឬលើសច្រើនពេកនោះទេ បើពុំនោះទេ វាអាចនឹងប៉ះពាល់ដល់ការរីកលូតលាស់របស់ក្មេង។ លោកស្រីបានបន្តថា កុមារតូចៗដែលទទួលបានការមើលថែទាំដិតដល់ដោយអ្នកជំនាញនៅក្នុងសាលានឹងអាចក្លាយជាមនុស្សដែលមានភាពឈ្លាសវៃ ក្លាហាន និងរហ័សរហួន ចំណែកកុមារដែលមានសុខភាពមិនល្អដោយសារកង្វះការថែទាំភាគច្រើនជាក្មេងដែលមិនសូវស្វាហាប់ មិនសូវចុះចំណោមនៅពេលដែលក្មេងដទៃកំពុងលេង។
ស្រដៀងគ្នានេះដែរ លោក ប៉ិច ប៉ូឡែន អគ្គនាយកក្រុមហ៊ុន វេសឡាញ អេឌ្យូខេសិនគ្រុប បានលើកឡើងថា កុមារតូចៗដែលទទួលបានការបង្រៀនត្រឹមត្រូវនៅក្នុងសាលាបណ្តុះបណ្តាលនៅវ័យ2-3ឆ្នាំ គឺមានភាពឆ្លាតវៃ ហើយមានការទទួលខុសត្រូវខ្ពស់ជាងកុមារដែលចូលរៀននៅវ័យធំស្រាប់អាយុ6ឆ្នាំឡើង ព្រោះថាកុមារត្រូវការការយកចិត្តទុកដាក់ និងមើលថែទាំដោយអ្នកជំនាញច្បាស់លាស់។
លោក ប៉ូឡែន បាននិយាយថា ៖ ជាទូទៅការបង្រៀនកុមារតូចៗគឺមានលក្ខណៈខុសគ្នាពីការបង្រៀនកុមារធំៗ ព្រោះថាកុមារខ្លះមិនទាន់ចេះនិយាយ ឬមិនទាន់យល់ច្រើនដូចកុមារធំៗដែលមានវ័យ5-6ឆ្នាំនៅឡើយ តែអ្នកជំនាញនឹងបង្រៀនពួកគាត់ដោយការលេងល្បែងដែលអាចបណ្តុះសមត្ថភាពដល់ពួកគាត់ផ្នែកគំនិតស្មារតីឱ្យចេះមានការទទួលខុសត្រូវ និងរៀនតាមរយៈកាយវិការ ក៏ដូចជាការលេងជាដើម។
អគ្គនាយកក្រុមហ៊ុន វេសឡាញ អេឌ្យូខេសិនគ្រុប បានបន្ថែមទៀតថា កុមារតូចៗដែលទទួលបានការបណ្តុះបណ្តាលផ្នែកគំនិតបានល្អ គាត់នឹងអាចងាយស្រួលក្នុងការបណ្តុះបណ្តាលឱ្យក្លាយជាមនុស្សពូកែនៅពេលដែលគាត់ឈានដល់វ័យចូលរៀននៅបឋមសិក្សា ព្រោះថានៅពេលដែលគាត់បានឆ្លងកាត់ការបណ្តុះបណ្តាលពីអ្នកជំនាញ ការគិត និងកម្រិតខួរក្បាលរបស់គាត់គឺត្រូវបានអភិវឌ្ឍជាដំណាក់កាលៗ ចាប់តាំងពីទារករហូតដល់ក្លាយជាសិស្សពេញវ័យ។ ជាទូទៅ ក្មេងដែលទទួលបានការបណ្តុះបណ្តាលបានល្អតាំងពីតូចមក ច្រើនមានភាពជាអ្នកដឹកនាំខ្ពស់ មានគំនិតច្រើនដែលអាចធ្វើការដោះស្រាយបញ្ហាបានលឿន។
លោកស្រី ឡាយ មុនីរ័ត្ន ជាអ្នកម្តាយដែលមានកូនប្រុសច្បងបានចាប់ផ្តើមចូលរៀននៅវ័យ6ឆ្នាំ និងកូនប្រុសប្អូនចូលរៀននៅមុនអាយុ3ឆ្នាំ បានលើកឡើងថា កាលណោះសាលាឯកជនមិនទាន់មានច្រើនដូចពេលបច្ចុប្បន្ន ដូច្នេះកូនប្រុសច្បងរបស់លោកស្រីបានចូលរៀននៅសាលាបឋមសិក្សាអាយុ6ឆ្នាំតែម្តង ខុសពីកូនប្អូនដែលបានចូលរៀនមត្តេយ្យតាំងពីអាយុតិចជាង3ឆ្នាំ។ ជាការសង្កេត លោកស្រីមើលឃើញថា កូនដែលបានចូលរៀននៅវ័យតិចជាង3ឆ្នាំ មានភាពក្លាហាន និងមានការទទួលខុសត្រូវច្រើនជាកូនដែលចូលរៀននៅវ័យ6ឆ្នាំ។
លោកស្រី ឡាយ មុនីរ័ត្ន បានអះអាងថា ៖ “ជាការសង្កេត ខ្ញុំឃើញថាកូនប្អូនដែលបានចូលរៀនតាំងពីតូច គាត់មានភាពខុសប្លែកមួយចំនួន ដូចជាការធ្វើអ្វីមួយគាត់មិនសូវពឹងមនុស្សធំនោះទេ គឺគាត់ចូលចិត្តធ្វើអ្វីៗដោយខ្លួនឯង ដូចជាការរៀបចំសម្ភាររៀនរបស់គាត់ គាត់មិនចង់ឱ្យយើងរវល់ជាមួយគាត់នោះទេ គាត់តែងតែទារចង់ធ្វើដោយខ្លួនឯង ដើម្បីបង្ហាញថាគាត់ធំដឹងក្តីហើយ បើទោះបីជាគាត់ទើបនឹងរៀនថ្នាក់ទី1ក៏ដោយ។
លោកស្រីក៏បានប្រាប់ផងដែរថា កូនដែលចូលរៀននៅវ័យធំហើយ គាត់មិនខុសពីយើងនៅក្មេងៗប៉ុន្មានឡើយ មានការអៀនច្រើន ខ្លាចជួបមនុស្សឬធ្វើអ្វីមួយចាំបាច់ត្រូវពឹងមនុស្សធំ គាត់ហាក់មិនសូវមានភាពជឿជាក់លើខ្លួនឯងប៉ុន្មានឡើយ។ តែទោះជាយ៉ាងណាក៏យើងមិនអាចបន្ទោសគាត់បានដែរ ព្រោះនៅពេលដែលគាត់នៅក្មេងយើងមិនបានដាក់គាត់ឱ្យរៀនសាលាល្អ ហេតុនេះមានតែខំគ្រប់លទ្ធភាពដើម្បីផ្តល់ឱ្យគាត់នូវក្តីស្រឡាញ់ និងការលើកទឹកចិត្តឱ្យគាត់ក្លាយជាមនុស្សម្នាក់ដែលមានភាពជឿជាក់ខ្លាំងជាងមុន តែសម្រាប់កូនប្អូនវិញ គឺមិនពិបាកនិយាយច្រើននោះទេ ព្រោះគាត់មានទម្លាប់ល្អច្រើនពីក្មេងរួចទៅហើយ ហេតុនេះអ្វីដែលឪពុកម្តាយត្រូវធ្វើ គឺជួយតម្រង់ទិស និងបង្កើនភាពស្និទ្ធស្នាលដើម្បីផ្តល់ភាពកក់ក្តៅ ក៏ដូចជាសហការល្អជាមួយសាលាជាដើម៕
January 2, 2018
ការផ្លាស់ប្តូរនៃវិស័យអចលនទ្រព្យកាលពី 20ឆ្នាំមុនធៀបនឹងពេលបច្ចុប្បន្ន
ធ្វើការជាភ្នាក់ងារទិញ លក់អចលនទ្រព្យ ជួនកាលមានឱកាសទទួលបានជោគជ័យ ប៉ុន្តែក៏មានមួយចំនួនមិនមានឱកាស ក៏ដូចជាកង្វះសមត្ថភាពក្នុងការប្រកួតប្រជែង ហើយក៏បរាជ័យនៅលើអាជីពរបស់ខ្លួនទៅវិញ។ ចង់ដឹងថា តើកាលពី20ឆ្នាំមុន មុខរបររកស៊ីលើវិស័យអចលនទ្រព្យ មានភាពងាយស្រួល ឬលំបាកយ៉ាងណានោះ អ្នកយកព័ត៌មាននៃកាសែត ឡារ៉ែន ពាណិជ្ជ បានជួបសម្ភាសន៍ជាមួយ លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យកម្ពុជា CPL ដែលជាក្រុមហ៊ុនអចលនទ្រព្យបង្កើតឡើងដំបូងគេនៅកម្ពុជា ដើម្បីចែករំលែកបទពិសោធ និងចំណេះដឹងជូនដល់អ្នករកស៊ីខាងវិស័យអចលនទ្រព្យ ក៏ដូចជាអ្នកអានឱ្យបានដឹង។
លោកឧកញ៉ា បានមានប្រសាសន៍ថា ការងាររកទទួលទានផ្នែកអចលនទ្រព្យបើប្រៀបធៀបកាលពីមុន និងពេលបច្ចុប្បន្នគឺវាមានភាពងាយស្រួល និងលំបាកប្រហាក់ប្រហែលគ្នា។ រំលឹកទៅដល់បទពិសោធកាលពី20ឆ្នាំមុន ឃើញថារបរផ្នែកនេះមានភាពទូលំទូលាយ ពោលគឺមិនសូវមានការប្រកួតប្រជែងដូចពេលនេះទេ ដោយសារពេលនោះប្រទេសកម្ពុជាទើបនឹងចាប់ផ្តើមដំបូងលើការវិនិយោគវិស័យដីធ្លី។
នៅពេលនោះមានក្រុមហ៊ុនចំនួន2 បានបង្កើតឡើងដំបូងគេ គឺក្រុមហ៊ុនអចលនទ្រព្យ CPL និងក្រុមហ៊ុនអចលនទ្រព្យ King Group ប៉ុន្តែបច្ចុប្បន្នក្រុមហ៊ុន King Group បានបាត់ឈ្មោះទៅហើយ នៅសល់តែក្រុមហ៊ុន CPL ដែលរស់រានមានជីវិតមកទល់សព្វថ្ងៃ ហើយអាចនិយាយបានថាជាក្រុមហ៊ុនមានវ័យចំណាស់ជាងគេ និងជាក្រុមហ៊ុននាំមុខគេនៅក្នុងឧស្សាហកម្មដីធ្លីនៅកម្ពុជាផងដែរ។ លោកឧកញ៉ាបន្តថា សម័យកាលដំបូងនោះភ្នាក់ងារអចលនទ្រព្យ រួមនឹងប្រជាពលរដ្ឋជាម្ចាស់ដីឬម្ចាស់ផ្ទះ មិនសូវយល់ដឹងពីច្បាប់ទម្លាប់និងមិនសូវ
មានក្រមសីលធម៌ក្នុងការនិយាយស្តីនោះទេ ដោយភាគច្រើននិយាយភាសាសាមញ្ញ “អញ ឬឯង” ហើយក៏មិនបានដឹងតម្លៃនៃកម្រៃជើងសារនោះដែរ។ កម្រៃជើងសារ ក្នុងការលក់អចលនទ្រព្យនាពេលនោះ គឺផ្តល់ជូនអាស្រ័យទៅលើការចរចាផ្ទាល់មាត់ ដោយមិនដូចពេលបច្ចុប្បន្នដែលកំណត់យក 3%នៃតម្លៃដី ឬផ្ទះដែលលក់ចេញទៅឱ្យអតិថិជននោះទេ ហើយសម័យនោះដែរ ម្ចាស់ផ្ទះ ឬម្ចាស់ដីមិនសូវគោរពពាក្យសំដីរបស់ខ្លួននោះទេ ជួនកាលមុនលក់បានសន្យាថា ផ្តល់កម្រៃជើងសារឱ្យ3% លុះពេលលក់ដាច់បែរជាថាឱ្យតែ1.5%វិញ ជួនកាលដល់ពេលទៅយកប្រាក់ឱ្យតែ1% វិញក៏មានដែរ។
អគ្គនាយកក្រុមហ៊ុនអចលនទ្រព្យកម្ពុជា CPL បានបន្តថា ទោះជាការនិយាយស្តីនៅសម័យនោះមនុស្សមិនសូវមានក្រមសីលធម៌ក៏ដោយ តែដោយសារចង់ជោគជ័យលើអាជីពនេះ លោកតែងតែជម្នះគ្រប់យ៉ាង សំខាន់ឱ្យតែលក់ដី លក់ផ្ទះ ឬជួលផ្ទះឱ្យអតិថិជនបានជោគជ័យ។ ក្រោយមកក៏មានជនបរទេសជាច្រើនបានចូលមកធ្វើការ និងខ្លះទៀតបានមករកស៊ីដីធ្លីនៅកម្ពុជា ដោយនាំមកទាំងចំណេះដឹង និងបទពិសោធពីក្រៅស្រុកមកចែករំលែកដល់ភ្នាក់ងារអចលនទ្រព្យក្នុងស្រុកយើង។ ពួកគាត់ប្រាប់ថា នៅប្រទេសគេពេលជួលផ្ទះបាន គេឱ្យកម្រៃជើងសារមួយខែ បើលក់ផ្ទះ ឬដីបានគេផ្តល់ជូន3% ហើយជួនកាលក្រុមហ៊ុនខ្លះគេយកកម្រៃជើងសារទាំងអ្នកលក់ និងអ្នកទិញផងក៏មាន។ ក្រោយមកទើបយើងនិយាយតម្លៃកម្រៃជើងសារប្រាប់ទៅម្ចាស់ផ្ទះ ឬម្ចាស់ដី ដោយអ្នកខ្លះយល់ព្រមហើយអ្នកខ្លះទៀតក៏មិនយល់ព្រម ព្រោះពួកគាត់គិតថា ការផ្តល់ជូនកម្រៃជើងសារដល់ភ្នាក់ងារនោះមានចំនួនច្រើនពេក តែយើងប្រាប់គាត់វិញថា ភ្នាក់ងារអចលនទ្រព្យធ្វើការមិនមានប្រាក់ខែ ហើយទោះជាផ្តល់ឱ្យប្រាក់កម្រៃជើងសារច្រើន ប៉ុន្តែប្រាក់ដែលយើងទាក់ទងឈ្មួញមកទិញក៏ច្រើនដែរ ធ្វើឱ្យការជជែកដេញដោលឈានដល់ការយល់ចិត្តគ្នាបន្តិចម្តងៗ និងមានភាពប្រសើររហូតទល់សព្វថ្ងៃ។
សម្រាប់បទពិសោធរបស់ លោកឧកញ៉ា ចេង ខេង វិញ មិនមានការកំណត់យកប្រាក់កម្រៃជើងសារពីអ្នកទិញទេ កម្រៃជើងសារជាទូទៅគឺបានពីអ្នកលក់ប៉ុន្តែក៏មានអ្នកទិញខ្លះធ្លាប់បានផ្តល់ប្រាក់កម្រៃជើងសារនេះម្តងម្កាលឱ្យភ្នាក់ងាររបស់លោកដែរ ដោយសារភ្ញៀវខ្លះគេមានលុយ គេចង់បានទីតាំងដីមួយកន្លែងប្រញាប់ ដើម្បីយកទៅសាងសង់ផ្ទះ ឬទុកលក់បន្តបានប្រាក់ចំណេញច្រើន។
សព្វថ្ងៃភ្នាក់ងារអចលនទ្រព្យ និងអតិថិជនមានការយល់ចិត្តគ្នាកាន់តែច្រើនឡើងៗ ហើយក៏មានការគោរពពាក្យសម្តីគ្នាទៅវិញទៅមក រហូតឈានដល់មានការចុះហត្ថលេខាព្រមព្រៀងគ្នាជាមុន មុននឹងឈានដល់ការចាប់ផ្តើមនាំអតិថិជនទៅទិញអចលនទ្រព្យរបស់គាត់ រហូតដល់មានការកំណត់ដោយច្បាប់ត្រឹមត្រូវដែលធ្វើឱ្យយើងមានមោទនភាពចំពោះកិច្ចប្រឹងប្រែងរបស់ភ្នាក់ងារអចលនទ្រព្យរបស់យើង។
ដោយសារមុខរបរដីធ្លីនេះមានភាពងាយស្រួលក្នុងការធ្វើ អាចនិយាយបានថា បុគ្គលិកក្រុមហ៊ុនដែលមានបទពិសោធនាំភ្ញៀវទិញ លក់ ឬជួល ពេលដែលឈប់ធ្វើការ ក៏អាចមានសមត្ថភាពក្នុងការបើករកស៊ីដោយខ្លួនឯងបានដែរ សំខាន់ឱ្យតែមានទំនាក់ទំនងស្គាល់ភ្ញៀវច្រើន និងមានព័ត៌មានអចលនទ្រព្យច្រើន គឺអាចធ្វើបានហើយ ដូច្នេះទើបបច្ចុប្បន្នយើងឃើញថាក្រុមហ៊ុនក៏ដូចជាភ្នាក់ងារអចលនទ្រព្យបានបង្កើតឡើងច្រើននៅកម្ពុជា ទាំងក្រុមហ៊ុនក្នុងស្រុក និងក្រៅស្រុក។
លោកឧកញ៉ាបញ្ជាក់ថា ទោះជាមានក្រុមហ៊ុន ក៏ភ្នាក់ងារអចលនទ្រព្យច្រើនយ៉ាងណាក៏ដោយ ប៉ុន្តែវាពិបាកឈានទៅរកភាពជោគជ័យណាស់ បើសិនជាមិនមានដើមទុនគ្រប់គ្រាន់ ក៏ដូចជាខ្វះភាពជឿជាក់ ទាំងការផ្តល់ទំនុកចិត្ត និងភាពស្មោះត្រង់នៅមានកម្រិត។ ដូច្នេះក្រុមហ៊ុនអចលនទ្រព្យទាំងឡាយ ត្រូវតែខិតខំប្រឹងប្រែងកសាងទំនុកចិត្តទៅដល់អតិថិជនឱ្យបានច្រើន ទើបអាចទទួលបានជោគជ័យនៅលើទីផ្សារ៕
January 2, 2018
កាសែតឡារ៉ែន ពាណិជ្ជ លេខ 108
[easy_media_download url=”https://www.lareine.com.kh/wp-content/uploads/2018/01/LRPN_108-for-web.pdf” force_dl=”1″]
January 2, 2018
Costa និង Vitolo ត្រូវបានប្រកាសជាកីឡាកររបស់ក្លិប Atletico ជាផ្លូវការ
ខ្សែប្រយុទ្ធអេស្ប៉ាញដើមកំណើតប្រេស៊ីល Diego Costa បានបង្ហាញខ្លួនទៅកាន់អ្នកគាំទ្រនៃក្លិប Atletico Madrid រួមជាមួយនឹងខ្សែបម្រើស្លាបអន្តរជាតិអេស្ប៉ាញម្នាក់ទៀតគឺ Vitolo ក្រោយពីក្លិបយក្សអេស្ប៉ាញមួយនេះ បានប្រកាសពីការផ្ទេរកីឡាករទាំងពីរជាផ្លូវការកាលពីថ្ងៃអាទិត្យ។
តារាឆ្នើម Costa បានសម្រេចក្តីសុបិនរបស់គេក្នុងការវិលទៅកាន់ក្លិប Atletico ក្រោយពីបានចំណាយពេលអស់៣ឆ្នាំ ជាមួយនឹងក្លិប Chelsea និងឈ្នះពានក្របខ័ណ្ឌ Premier League ចំនួន2លើក។ នៅពេលដែលត្រូវបានចោទសួរថា តើពេលវេលារបស់គេជាមួយនឹងក្លិប Chelsea យ៉ាងម៉េចដែរ រូបគេបានសើច និងនិយាយថា៖ «ខ្ញុំបានរៀនភាសាអង់គ្លេសនៅទីនោះ។ អ្នកគាំទ្រ មនុស្សក្នុងក្លិប និងមិត្តរួមក្រុមរបស់ខ្ញុំបានជួយខ្ញុំយ៉ាងច្រើន។ Chelsea ជាក្លិបដ៏អស្ចារ្យមួយហើយខ្ញុំមានការចងចាំដ៏ល្អនៅទីនោះ»។
Costa វ័យ29ឆ្នាំ មិនអាចលេងឲ្យក្រុម Atletico របស់លោក Diego Simeone បានឡើយ ដោយសារតែក្លិបនេះជាប់ពិន័យព្យួរលើការទិញចូលកីឡាករថ្មី មុននឹងការពិន័យនេះ បានបញ្ចប់កាលពីថ្ងៃទី1 ខែមករា ម្សិលមិញ។ កាលពីខែកញ្ញា ក្លិប Atletico បានប្រកាសពីការចុះហត្ថលេខាជាមួយនឹង Costa ខណៈដែលបណ្តាញសារព័ត៌មានអេស្ប៉ាញ បានបញ្ជាក់ថា ពួកគេបានយល់ព្រមចំណាយប្រាក់ឲ្យ Chelsea 60លានអឺរ៉ូ (ស្មើនឹង71.3លានដុល្លារអាមេរិក) ដើម្បីនាំយកកីឡាករម្នាក់ ដែលធ្លាប់ជាតារាឆ្នើមរបស់ពួកគេ ក្នុងពេលពួកគេបានឈ្នះពាន La Liga និងឈានទៅប្រកួតវគ្គផ្តាច់ព្រ័ត្រនៃក្របខ័ណ្ឌ Champions League ក្នុងរដូវកាលឆ្នាំ2013-2014។ ស្របពេលជាមួយគ្នានេះ Atletico ក៏យល់ព្រមលើតម្លៃខ្លួន37.5លានអឺរ៉ូ ដើម្បីចុះហត្ថលេខាយក Vitolo ពីក្លិប Sevilla ផងដែរ។ Vitolo បានចំណាយពេលពាក់កណ្តាលរដូវកាលនេះក្នុងនាមជាកីឡាករកម្ចីនៅឯក្លិប Las Palmas បើទោះបីរូបគេបានអវត្តមានកាលពេលថ្មីៗនេះ ដោយសារតែបញ្ហារបួសភ្លៅក៏ដោយ៕
ប្រភពពី៖ The Sun
January 2, 2018
ភ្ញៀវទេសចរអន្តរជាតិ និងភ្ញៀវទេចរជាតិ ប្រមាណជាង 33ម៉ឺននាក់ បានចូលរួមឆ្លងឆ្នាំសកលនៅខេត្តសៀមរាប
ភ្នំពេញ៖ នៅក្នុងឱកាសឆ្លងឆ្នាំសកល ឆ្នាំ2017 ចូល 2018 នៅខេត្តសៀមរាប មានភ្ញៀវទេសចរអន្តរជាតិ និងភ្ញៀវទេចរជាតិ មកពីបណ្តាប្រទេស និងខេត្តផ្សេងៗរួមជាមួយបងប្អូនប្រជាពលរដ្ឋ នៅក្នុងខេត្តសៀមរាម សរុបប្រមាណជាង 33ម៉ឺននាក់ ដែលបានចូលរួមឆ្លងឆ្នាំសាកលនៅខេត្តសៀមរាប ដោយចំនួននេះ មានការកើនឡើងជាងឆ្នាំ មុនប្រមាណជិត 75ភាគរយ។ នេះបើយោងតាមការចេញផ្សាយរបស់ AKP នៅថ្ងៃទី 02 ខែមករា ឆ្នាំ 2018។
ឯកឧត្តម ឃឹម ប៊ុនសុង អភិបាលខេត្តសៀមរាប បានអះអាងថា នៅក្នុងឱកាសឆ្លងឆ្នាំសកលឆ្នាំ2017 ចូលឆ្នាំ2018 នេះ អាជ្ញាធរបានរៀបចំឱ្យមាន កន្លែងកម្សាន្តជាច្រើន គឺនៅតាមសណ្ឋាគារ នៅសួនច្បាមុខព្រះរាជដំណាក់ និងតំបន់ផប់ស្ទ្រីត ផ្សារចាស់ ផ្សាររាត្រី តំបន់អង្គរឃ្យុងយូ នៅផ្សារកុងតឺន័រ ហើយកន្លែង ដែលភ្ញៀវសម្រុកទៅសប្បាយច្រើនជាងគេគឺ នៅតំបន់ផប់ស្ទ្រីត ផ្សារចាស់ និងផ្សាររាត្រី។ ចំណែកសន្តិសុខវិញ អាជ្ញាធរបានដាក់ពង្រាយសត្ថកិច្ចជាច្រើន ដើម្បីធ្វើយ៉ាងណាធានាឱ្យបាននូវសុវត្ថិភាពជូនប្រជាពលរដ្ឋ ក៏ដូចជាភ្ញៀវទេសចរដែលបានមកកម្សាន្ដនៅក្នុងខេត្ដសៀមរាប។
ឯកឧត្តម អភិបាលខេត្ដ បានបន្ដថា ក្នុងឆ្នាំនេះមើលឃើញថា ប្រជាពរដ្ឋខ្មែរមកពីតាមបណ្តា ខេត្តនានាបាន មកកម្សាន្តនៅខេត្តសៀមរាបច្រើនជាងបណ្តាឆ្នាំមុនៗ ដោយសារតែឆ្នាំនេះ អាជ្ញាធរខេត្តបានរៀបចំឱ្យមាន កន្លែងសប្បាយច្រើន និងតុបតែងភ្លើងលម្អក្រុងបានស្អាតជាង ឆ្នាំមុនផងដែរ។ ទន្ទឹមនេះ សម្រាប់សន្តិសុខ សណ្ឋាប់ធ្នាប់ សមត្ថកិច្ចការពារយ៉ាងយកចិត្តទុក ដាក់បំផុតមិនមានបញ្ហាអ្វីកើតឡើងនោះទេ។ រីឯតម្លៃសេវា ផ្សេងៗដូចជាសណ្ឋាគារ ម្ហូប អាហារ ក៏មិនមានការឡើងថ្លែហូសហេតុដែរ ពីព្រោះក្រុមមន្ត្រីជំនាញបាន ចុះទៅផ្សព្វផ្សាយ ណែនាំឱ្យអាជីវករទាំងអស់មិនឱ្យឡើងថ្លៃជាប្រចាំ។
យោងតាមរបារការណ៍របស់មន្ទីរទេសចរណ៍ខេត្តសៀមរាបបានបង្ហាញថា ភ្ញៀវទេសចរអន្តរជាតិ និងភ្ញៀវទេចរ ជាតិ ដែលបានមកចូលរួមឆ្លងឆ្នាំសកល2018 នៅខេត្តសៀមរាប មានសរុបចំនួនប្រមាណ 333.085នាក់ មានការកើនឡើង 74.91ភាគរយ ក្នុងនោះភ្ញៀវ ទេសចរអន្តរជាតិមានចំនួន 33.085នាក់ មានការកើន ឡើង 9.38ភាគរយ ភ្ញៀវទេសចរ ជាតិមានប្រមាណ 300.000នាក់ មានការកើនឡើង 76.47ភាគរយ៕
January 2, 2018
លោក Mourinho កោតសរសើរ Lingard ក្រោយ Man Utd ផ្តួល Everton
លោក Jose Mourinho បានកោតសរសើរចំពោះការអភិវឌ្ឍរបស់ Jesse Lingard ក្រោយពីខ្សែបម្រើស្លាបរូបនេះរកបានគ្រាប់បាល់ស៊ុតបញ្ចូលទីយ៉ាងល្អ និងបានជួយឲ្យក្រុម Manchester United ដណ្តើមបានជ័យជម្នះ 2-០ នៅលើទឹកដីក្រុម Everton កាលពីថ្ងៃចន្ទ។
ក្នុងពេលក្រុមរបស់លោក Mourinho កំពុងតែនាំមុខ1គ្រាប់ តាមរយៈគ្រាប់បាល់របស់ខ្សែប្រយុទ្ធ Anthony Martial ពេលនោះ Lingard បានគ្រប់គ្រងបាល់យ៉ាងល្អក្នុងរយៈពេល9នាទីចុងក្រោយ នៅកីឡដ្ឋាន Goodison Park។ រយៈពេលប៉ុន្មានវិនាទីក្រោយមក ខ្សែបម្រើវ័យ25ឆ្នាំរូបនេះ បានបណ្តើរបាល់ផុតតំបន់ការពាររបស់ក្រុម Everton និងបានស៊ុតបាល់បញ្ចូលទីយ៉ាងល្អតែម្តង។ វាជាគ្រាប់បាល់ទី10របស់ Lingard នៅរដូវកាលនេះ និងជាគ្រាប់បាល់ទី4របស់គេក្នុងការបង្ហាញខ្លួន5លើកចុងក្រោយរបស់គេ។
ក្រោយពីបានចំណាយពេលជាច្រើនអាជីពក្នុងក្លិប Man United របស់គេ។ ដោយការប្រជែងយកកៅអីក្នុងជម្រើសដំបូង Lingard បានបង្ហាញពីទម្រង់លេងយ៉ាងល្អ ក្រោមការដឹកនាំរបស់លោក Mourinho ដែលបានកោតសរសើរយ៉ាងខ្លាំងទៅលើការអភិវឌ្ឍរបស់គេ។ លោក Mourinho បានឲ្យដឹងថា៖ «រឿងមួយគឺទេពកោសល្យរបស់កីឡាករវ័យក្មេងម្នាក់ ហើយរឿងមួយទៀត គឺការក្លាយជាកីឡាករដ៏ឆ្នើមម្នាក់។ កីឡាករខ្លះមិនមានសមត្ថភាពបោះជំហានទៅកាន់កម្រិតនោះឡើយ។
ពួកគេចេញពីសក្តានុពលដ៏អស្ចារ្យ ដើម្បីក្លាយជាកីឡាករធម្មតាម្នាក់។ ប៉ុន្តែ Lingard កំពុងតែបោះជំហានដ៏ធំមួយឆ្ពោះទៅមុខ»។ ស្របពេលជាមួយគ្នានេះ Liverpool ដណ្តើមបាន3ពិន្ទុពេញ តាមរយៈការផ្តួលក្រុមឡើងទម្រង់លេង Burnley 2-1 បើទោះបី Philippe Coutinho និង Mohamed Salah បានអវត្តមានដោយសារតែបញ្ហារបួសភ្លៅ និងក្រលៀនរៀងៗខ្លួនក៏ដោយ៕
ប្រភពពី៖ Daily Nations
January 2, 2018
Samsung ចេញមុខប្រកាសថា ខ្លួនមិនបានធ្វើដូច Apple ឡើយ ដូច្នេះអ្នកប្រើទាំងអស់កុំបាម្ភ
សេអ៊ូល៖ ក្រុមហ៊ុនបច្ចេកវិទ្យាយក្សរបស់កូរ៉េខាងត្បូង Samsung បានចេញមុខប្រកាសក្ដែងៗថា ខ្លួនមិនបានកាត់បន្ថយល្បឿនដំណើរការរបស់ទូរស័ព្ទម៉ូដែលចាស់ៗ ដូចទៅនឹងក្រុមហ៊ុន Apple ធ្វើនៅលើ iPhone ឡើយ ផ្ទុយទៅវិញខ្លួនក៏គ្មានគម្រោងធ្វើបែបនេះទៅថ្ងៃអនាគតផងដែរ។
សារព័ត៌មាន GSM Arena បានចេញផ្សាយថា មិនមែនមានតែក្រុមហ៊ុន Samsung តែមួយប៉ុណ្ណោះទេ ដែលចេញមុខអះអាងបែបនេះ គឺនៅមានក្រុមហ៊ុន LG, HTC និង Motorola ក៏បានចេញមុខអះអាងប្រាប់អតិថិជនរបស់ខ្លួនកុំឲ្យខ្វល់ខ្វាយ ឬមានចម្ងល់ទៅលើបញ្ហានេះ ព្រោះថា ក្រុមហ៊ុនរបស់ពួកគេមិនធ្វើដូច Apple ឡើយ។
ការលើកឡើងរបស់ក្រុមហ៊ុនផលិតស្មាតហ្វូនដែលប្រើប្រាស់ប្រព័ន្ធដំណើរការ Android ទាំងនេះ ត្រូវបានធ្វើឡើងបន្ទាប់ពីក្រុមហ៊ុន Apple បានសារភាពថា ខ្លួនពិតជាបានកាត់បន្ថយល្បឿនដំណើរការបស់ iPhone ម៉ូដែលចាស់ៗទៅតាមអាយុកាលនៃថ្មពិតមែន ហើយជាការឆ្លើយតបទៅនឹងបញ្ហានេះ Apple បានស្នើដល់អ្នកប្រើ ទៅធ្វើការប្ដូរថ្មថ្មី ក្នុងតម្លៃទាប ជាពិសេសគឺនៅដើមឆ្នាំ 2018 នេះ Apple នឹងចេញ Software ថ្មី ដើម្បីឲ្យអ្នកប្រើអាចតាមដានអាយុកាលរបស់ថ្មបាន៕
January 2, 2018
ទម្លាប់ល្អ ១០ យ៉ាង ដែលមហាសេដ្ឋីតែងតែធ្វើជាប្រចាំ
ដូចពាក្យមួយគេនិយាយថា បើសិនជាយើងចង់ក្លាយជាវិស្វករ យើងត្រូវរៀនជំនាញវិស្វករ បើសិនជាយើងចង់ក្លាយជាគ្រូពេទ្យ យើងត្រូវរៀនជំនាញពេទ្យ។ យ៉ាងណាមិញបើសិនជាយើងចង់ក្លាយជាអ្នកមាន យើងត្រូវរៀនពីអ្នកមាន ដើម្បីក្លាយជាអ្នកមាន។
ខាងក្រោមនេះគឺជាទម្លាប់ជាទូទៅដែលក្រុមមហាសេដ្ឋីតែងតែធ្វើ និងធ្វើជាប្រចាំថ្ងៃ៖
1) បន្តការសិក្សា
ពួកសេដ្ឋីដែលចាប់ផ្ដើមដោយខ្លួនឯង តែងតែបន្តការសិក្យារៀនសូត្រជាប់ជានិច្ច ដូចជា ការចូលរួមសិក្ខាសិលា អានសៀវភៅ និងមានគ្រូបង្វឹក។ល។ ព្រោះការសិក្សាគ្មានដែនកំណត់ ហើយវាក៏ជាមូលដ្ឋានសម្រាប់យកទៅអនុវត្តន៍ដើម្បីជួយឱ្យពួកគេទទួលបានជោគជ័យ។
2) ធ្វើលំហាត់ប្រាណ 30នាទីជារៀងរាល់ថ្ងៃ
នៅពេលដែលពួកគេធ្វើលំហាត់ប្រាណ 30នាទីជារៀងរាល់ថ្ងៃ នឹងជួយឱ្យពួកគេមានសុខភាពល្អ និងពោរពេញទៅដោយថាមពលក្នុងការបំពេញកិច្ចការរបស់ពួកគេផងដែរ។
3) បង្កើតទំនាក់ទំនងល្អជាមួយនឹងមនុស្សដែលជោគជ័យ
នៅពេលដែលពួកគេមានទំនាក់ទំនងល្អជាមួយនឹងបុគ្គលដែលជោគជ័យ ពួកគេនឹងទទួលបានគំនិតល្អៗពីបុគ្គលទាំងនោះ ហើយពួកគេនឹងអាចធ្វើឱ្យគោលដៅរបស់ពួកគេឆាប់ទទួលបានជោគជ័យ។
4) តែងតែគិតអំពីគោលដៅ
ពួកគេតែងតែគិតអំពីគោលដៅរបស់ពួកគេជាប់ជានិច្ច មិនថាពួកគេស្ថិតនៅក្នុងកាលៈទេសៈណានោះទេ។ ពួកគេតែងតែនិយាយ និងនឹកទៅដល់គោលដៅ ជាពិសេសគឺស្វែងរកយុទ្ធសាស្ត្រ និងវិធីសាស្ត្រល្អដើម្បីឱ្យសម្រេចបានគោលដៅ។
5) ស្រមៃអំពីគោលដៅ បន្ទាប់មករៀបចំផែនការសម្រាប់ធ្វើវា
មានមនុស្សជាច្រើនដែលមានក្ដីស្រមៃដ៏អស្ចារ្យ ប៉ុន្តែពួកគេមិនដែលបានរៀបចំផែនការសម្រាប់ធ្វើគោលដៅទាំងនោះឱ្យទទួលបានជោគជ័យនោះទេ។ ប៉ុន្តែសម្រាប់ពួកសេដ្ឋី តែងតែគិតរកមធ្យោបាយធ្វើយ៉ាងណាឱ្យគោលដៅរបស់ពួកគេជោគជ័យ។
6) ស្វែងរកគ្រូបង្វឹក និងបុគ្គលដែលជោគជ័យមកធ្វើជាគ្រូ
គ្រូបង្វឹកមានន័យថា គឺជាមនុស្សដែលដឹកនាំអ្នកឱ្យធ្វើអ្វីមួយ ព្រមទាំងផ្ដល់យុទ្ធសាស្ត្រនានាដល់អ្នកក្នុងការសម្រេចគោលដៅដែលអ្នកចង់បាន។
7) កុំចំណាយពេលជាមនុស្សដែលបំផ្លាញពេលវេលារបស់អ្នក
មនុស្សជាច្រើនតែងតែនិយាយថា ពួកសេដ្ឋី រាប់អានតែពួកសេដ្ឋីដូចគ្នា។ ហេតុផលនោះគឺងាយទេ ដោយសារតែពួកគេដឹងថា ពួកសេដ្ឋីគឺទុកពេលវេលាជាមាស ជាប្រាក់។ ដូច្នេះហើយបើសិនជាចង់ក្លាយជាសេដ្ឋី កុំចំណាយពេលវេលារបស់យើងជាមួយនឹងមនុស្សដែលមិនបានការ ជាពិសេសគឺមនុស្សដែលបំពេញពេលវេលារបស់យើង។
8) ក្រោកពីគេងឱ្យបានឆាប់
ពួកមហាសេដ្ឋីតែងតែភ្ញាក់ពីគេងនៅពីព្រលឹម ដើម្បីជួយធ្វើឱ្យពួកគេមានពេលវេលាច្រើនក្នុងការបំពេញការងារ ជាពិសេសការឆាប់ភ្ញាក់ពីគេងគឺធ្វើឱ្យមានអារម្មណ៍ល្អ និងបង្កើតជាទម្លាប់ល្អ។
9) មានប្រភពប្រាក់ចំណូលឱ្យបានច្រើន
ពួកមហាសេដ្ឋីតែងតែមានប្រភពប្រាក់ចំណូលច្រើនជាងមួយ ដែលប្រភពប្រាក់ចំណូលទាំងអស់នោះ បានមកពីការធ្វើការងារ ការធ្វើជំនួញ ការវិនិយោគ ឬក៏អចលនទ្រព្យជាដើម។
10) ផ្ដល់អនុភាពដោយផ្ដល់ការងារទៅឱ្យអ្នកដទៃធ្វើជំនួស
ពួកមហាសេដ្ឋីតែងតែមិនព្យាយាមធ្វើការងារគ្រប់បែបយ៉ាងដោយខ្លួនឯងនោះទេ ពួកគេនឹងប្រើប្រាស់អនុភាព ដោយផ្ដល់ការងារទៅឱ្យអ្នកដទៃធ្វើជំនួសវិញ រួចហើយពួកគេអង្គុយមើលពីលើបន្ត ម្យ៉ាងទៀតការធ្វើបែបនេះ គឺពួកគេសល់ពេលទៅធ្វើការងារផ្សេងទៀតបាន៕
December 30, 2017