វល័ក្ខ - La Reine Media

អត្ថប្រយោជន៍ទ្វេដង សន្សំសំចៃរហូតដល់ 70% ជាមួយនឹងម៉ាស៊ីនត្រជាក់ LG dual inverter compressor ជំនាន់ថ្មី

អត្ថប្រយោជន៏សម្រាប់អ្នកប្រើប្រាស់

សន្សំសំចៃថាមពលបាន 70%

ជាមួយនិងបច្ចេកវិទ្យា Dual Cool របស់ LG លោកអ្នកអាចសន្សំសំចៃការចំនាយទៅលើអគ្គីសនីរហូតដល់ទៅ 70% បើប្រៀបធៀបទៅនិងម៉ាស៊ីនត្រជាក់ធម្មតាដែលគ្មាន dual កុំប្រេសស័រ ដោយសារតែ Inverter កុំប្រេសស័រពីរ តែងតែផ្លាស់ប្តូរ និងបទបែនល្បឿនបានល្អ ដើម្បីរក្សាកម្រិតសីតុណ្ហភាពដែលលោកអ្នកចងបាន។

កាន់តែឆាប់ត្រជាក់ 40%

Dual Inverter Compressor របស់ LG ជួយអោយម៉ាស៊ីនត្រជាក់អាចដំណើរការកាន់តែឆាប់ត្រជាក់ជាងមុនរហូតដល់ 40% នេះដោយសារតែ Dual Inverter Compressor មានសមត្ថភាពខ្ពស់ក្នុងការបន្ថែមល្បឿន និងសាយភាយខ្យល់ត្រជាក់បានលឿនជាងមុន។

គុណភាពខ្ពស់ ប្រើប្រាស់បានយូរអង្វែង (កុំប្រេសស័រធានា10 ឆ្នាំ)

Dual Inverter Compressor របស់ LGមានគុណភាពល្អ ការប្រើប្រាស់បានយូរអង្វែង ហើយអ្វីដែលពិសេសនោះគឺ ទទួលបានការធានារហូតដល់ 10 ឆ្នាំមុនគេបង្អស់ និង ពុំធ្លាប់មានពីមុនមក។ LG បានបន្ថែមនូវទុយោស្ពាន់ និងកញ្រ្ចែងស្ពាន់ដែលមានគុណភាព គ្មានការកាន់ច្រេះ ដែលជាហេតុធ្វើអោយម៉ាស៊ីនឆាប់ពុកខូច។

កាន់តែមានភាពងាយស្រួលជាងមុន

LG បានបំពាក់បន្ថែមនូវ Wifi Control សម្រាកដាក់ដំណើរការ smart ThinQ, មានបន្ថែមនូវប្រព័ន្ធត្រួតពិនិត្យសីតុណ្ហភាព។ កាត់បន្ថយសម្លេងរំខាន និងមានប្រព័ន្ធ Comfort Air សម្រាប់រក្សាសីតុណ្ហភាពអោយមានលំនឹង។ លើសពីនេះក៏មានបន្ថែមនូវមុខងារ Healthcare ការពារប៉ាកតេរី និង លម្អងធូលីផងដែល។

អត្ថប្រយោជន៏សម្រាប់ជាងតម្លើង

ងាយស្រួលក្នុងការជួសជុល

ងាយស្រួលក្នុងការផ្តូហ្គ្រាស់ និងមានផ្ជាប់នូវ SIMs 2.0 សម្រាប់ត្រូតពិនិត្យប្រព័ន្ធ និងការរាំងស្ទះផ្សេងនៅក្នុងម៉ាស៊ីនត្រជាក់។ SIMs 2.0 មានផ្ជាប់នូវ wireless communication Module តរផ្ជាប់ជាមួយស្មាតហ្វូតសម្រាប់ដំណើការត្រូតពិនិត្យផ្សេងៗនៅក្នុងម៉ាស៊ីនត្រជាក់។

ងាយស្រួលក្នុងការដំឡើង

ក្បាលក្តៅរបស់ម៉ាស៊ីនត្រជាក់មានលក្ខណះតូច ស្តើង ដែលធ្វើអោយការតំឡើងមានភាពងាយស្រួល ឆាប់រហ័ស ដែលជាហេតុជួយកាត់បន្តយកំលាំងពលកម្ម និង ពេលវេលា។

***ចុចមើលវីឌីអូដើម្បីមើលលំអិត

https://www.youtube.com/watch?v=dWgep5wa9WQ

January 10, 2018

អ្នកជំនាញប្រាប់ពីវិធីសន្សំប្រាក់ដើម្បីជីវិតរុងរឿង

មនុស្សជាច្រើននៅកម្ពុជាបានអភិវឌ្ឍសមត្ថភាព រួមទាំងលទ្ធភាពក្នុងការស្វែងរកប្រាក់ចំណូលរបស់ខ្លួនបានយ៉ាងល្អស្របពេលដែលសង្គមកំពុងមានការវិវឌ្ឍទៅជាមួយនឹងចរន្តនៃសាកលភាវូបនីយកម្ម ពាណិជ្ជកម្ម និងវិទ្យាសាស្ត្រ តែទោះជាយ៉ាងនេះក្តី ពាក់ព័ន្ធនឹងការគ្រប់គ្រងថវិកា គឺនៅតែជាប្រធានបទសំខាន់មួយដែលត្រូវបានគេលើកឡើង ខណៈមនុស្សមួយចំនួនមានប្រាក់ខែតិច តែអភិវឌ្ឍបានលឿន ឯអ្នកខ្លះទៀតមានប្រាក់ចំណូលខ្ពស់ តែបែរជាមានការលំបាកក្នុងការអភិវឌ្ឍទៅវិញ។

គន្លឹះក្នុងការសន្សំលុយដើម្បីក្លាយជាមនុស្សដែលមានសុភមង្គល និងភាពថ្កុំថ្កើងក្នុងជីវិត លោក Boon Song អគ្គនាយកក្រុមហ៊ុន La Fete បានលើកឡើងថា លុយមិនមែនជាអ្វីគ្រប់យ៉ាងសម្រាប់ជីវិតនោះទេ តែប្រសិនបើគ្មានលុយ យើងក៏មានភាពលំបាកក្នុងការរស់នៅដែរ។ ការគ្រប់គ្រងលុយកាក់គឺជារឿងសំខាន់មួយដែលទាមទារឱ្យមានចំណេះដឹងច្បាស់លាស់ ទើបអាចទទួលបានទាំងទ្រព្យសម្បត្តិ ចំណេះដឹង សេចក្តីសុខផ្នែកផ្លូវចិត្ត សុភមង្គលក្នុងគ្រួសារ និងការទទួលស្គាល់ពីសង្គម។

លោក Boon Song បាននិយាយថា ៖ “ខ្ញុំកើតក្នុងត្រកូលក្រីក្របំផុតនៅក្នុងឆ្នាំ1975 នៅប្រទេសម៉ាឡេស៊ី ហើយពេលនោះខ្ញុំគ្មានអ្វីទាំងអស់ តែអ្វីដែលខ្ញុំមាន គឺលោកឪពុកដែលពូកែខាងសន្សំលុយបំផុត ទើបអាចធ្វើឱ្យខ្ញុំមានឱកាសចេញទៅរៀននៅប្រទេសអូស្ត្រាលី ក្លាយជាវិស្វករនៅទីក្រុងឌូបៃ និងក្លាយជាសហគ្រិនម្នាក់។ គ្រួសាររបស់ខ្ញុំតស៊ូខ្លាំងបំផុតក្នុងការប្រើប្រាស់លុយយ៉ាងហ្មត់ចត់ដើម្បីផ្លាស់ប្តូរជីវិត ហើយខ្ញុំតែងតែចែករំលែកវិធីទាំងអស់នោះដើម្បីឱ្យមនុស្សជាច្រើនផ្សេងទៀតផ្លាស់ប្តូរជីវិតផងដែរ។

អ្នកជំនាញផ្នែកសន្សំលុយខាងលើក៏បានលើកឡើងផងដែរថា ការសន្សំ គឺទាមទារឱ្យមានទម្លាប់សន្សំ និងទ្រាំឱ្យបានសម្រាប់ទម្លាប់ថ្មីនេះយ៉ាងហោចណាស់1ខែ។ វាអាចជារឿងលំបាកក្នុងការតាំងចិត្តបង្កើតទម្លាប់ថ្មី ដើម្បីសន្សំលុយព្រោះយើងមិនធ្លាប់ធ្វើវាពីមុនមក ហើយយើងត្រូវការកាត់បន្ថយទម្លាប់មិនល្អមួយចំនួនចោលក្នុងរយៈពេលវែង។

វិធីដែលលោក Boon Song លើកឡើង គឺមាន 6ផ្នែកធំៗ ដែលទាមទារឱ្យយើងត្រូវដឹងពីហេតុផលពិតប្រាកដនៃការបែងចែកលុយទៅតាមផ្នែកនីមួយៗ ព្រោះថា ប្រសិនបើយើងដឹងពីវិធីច្បាស់លាស់ហើយ យើងនឹងមើលឃើញថា ការសន្សំគឺសំខាន់ជាងអ្វីដែលយើងកំពុងតែចង់បានដែលវាមិនសូវចាំបាច់ ហើយយើងនឹងក្លាយជាមនុស្សដែលអាចគ្រប់គ្រងខ្លួនឯងក្នុងការចាយលុយមិនត្រូវខ្ទង់បានទៀតផង ព្រោះយើងមានរឿងសំខាន់ជាងនេះដែលត្រូវធ្វើ។

-ផ្នែកទី1 ដែលយើងត្រូវបែងចែកគឺ ត្រូវទុកលុយចំណាយ 55% សម្រាប់ប្រតិបត្តិការដែលចាំបាច់បំផុតសម្រាប់ការរស់នៅប្រចាំថ្ងៃ (NEC)ដូចជា ចំណាយលើថ្លៃទូរស័ព្ទ ចំណាយលើការធ្វើដំណើរ ចំណាយលើអាហារ និងសម្លៀកបំពាក់ដែលចាំបាច់ជាដើម។ លោកបានបញ្ជាក់ថា មនុស្សជាច្រើនសុខចិត្តធ្វើការងារប្រចាំថ្ងៃ ទាំងជួនកាលការងារនោះមិនត្រូវនឹងចំណូលចិត្តរបស់ខ្លួនក៏ដោយដើម្បីតែរកលុយមកផ្គត់ផ្គង់ឱ្យគ្រប់លើតម្រូវការចំណាយមួយនេះ ខណៈអ្នកខ្លះចាយមិនចង់គ្រប់ផងក្នុងមួយខែ។ សម្រាប់លោកគឺលោកចង់ឱ្យយើងបែងចែកផែនការឱ្យបានច្បាស់លាស់ដើម្បីធ្វើយ៉ាងណាគ្រប់គ្រងឱ្យបាននូវប្រភពចំណូលពិតប្រាកដដើម្បីធានាថាមានខ្ទង់ចំណាយត្រឹមត្រូវ ហើយយើងអាចមានលទ្ធភាពសល់លុយសម្រាប់សន្សំដើម្បីត្រៀមថវិកាមួយចំនួនសម្រាប់ការអភិវឌ្ឍផ្នែកផ្សេងៗទៀត។

-ទី2 គឺត្រូវបែងចែកលុយចំនួន 10% សម្រាប់ការអប់រំ (EDU)ព្រោះថា ការអប់រំគឺជាកូនសោយ៉ាងសំខាន់សម្រាប់បន្តភាពថ្កុំថ្កើង។ មិនថាវ័យណាក៏ដោយ ការអប់រំតែងតែត្រូវការជាចាំបាច់សម្រាប់មនុស្សគ្រប់គ្នា ហើយការរៀនអាចធ្វើឱ្យយើងក្លាយជាមនុស្សដែលខ្លាំងឡើងគ្រប់ពេលវេលា មិនថាស្ថិតក្នុងកាលៈទេសៈណាក៏ដោយ។ ការរៀននៅទីនេះ គឺមិនសំដៅតែលើការរៀនក្នុងសាលាតែមួយមុខនោះទេ តែវាសំដៅលើការរៀនពីគ្រប់មជ្ឈដ្ឋានទៅតាមលទ្ធភាពដែលយើងមាន ដូចជាប្រើលុយដែលយើងមានសម្រាប់ទិញសៀវភៅ ចូលរួមវគ្គសិក្ខាសាលាមួយចំនួនដែលមានតម្លៃសមរម្យ ឬទិញស៊ីឌីដែលសំខាន់សម្រាប់បង្ហាញពីការរស់នៅ និងអាជីពជាក់ស្តែងជាដើម។

-ទី3 គឺត្រូវបែងចែកលុយ 10% សម្រាប់បម្រុងទុក (LTSS) ថវិកាផ្នែកនេះគឺយើងអាចសន្សំសម្រាប់ទិញនូវរបស់មួយចំនួនដែលជីវិតរបស់យើងត្រូវការ ដូចជាទិញឡានថ្មី គ្រឿងសង្ហារិមទំនើបសម្រាប់លម្អផ្ទះ ធ្វើដំណើរកម្សាន្តទៅបរទេស ឬសម្រាប់បញ្ចូនកូនទៅរៀននៅមហាវិទ្យាល័យល្អៗជាដើម។ នៅពេលដែលយើងមានថវិកាមួយចំនួនសម្រាប់បម្រុងទុកត្រឹមត្រូវហើយ ជីវិតយើងនឹងកាន់តែមានលក្ខណៈប្រសើរឡើង ហើយទទួលបាននូវសមិទ្ធផលថ្មីៗកើនឡើងជាលំដាប់សម្រាប់ការរស់នៅ ចំណែកឯកម្រិតងាយស្រួលក្នុងការរស់នៅក៏កាន់តែប្រសើរផងដែរ។

-ទី4 គឺត្រូវបែងចែកលុយ 10% សម្រាប់វិនិយោគ ឬធ្វើអ្វីដែលមានប្រយោជន៍សម្រាប់បង្កើតលុយបន្តទៀត (FFA)។ ថវិកានេះ គឺត្រូវជាលុយដែលអ្នកអាចមានសេរីភាពគ្រប់គ្រាន់សម្រាប់ប្រើប្រាស់វា ដោយមិនខ្លាចខាតបង់ ព្រោះបើខាតបង់លុយក្នុងទំហំនេះក៏មិនធ្វើឱ្យយើងលំបាកខ្លាំងនោះដែរ។ ហេតុនេះយើងគួរតែសន្សំ 10% សម្រាប់ការសាកល្បងវិនិយោគលើគំនិតអាជីវកម្មដែលឆ្លាតវៃ ហើយស្របទៅតាមលទ្ធភាពដែលខ្លួនមាន។ វាអាចជាការបោះជំហានមួយថ្មីទៀតដើម្បីគ្រប់គ្រងជោគវាសនាដោយខ្លួនឯង និងដើម្បីជួយដល់អ្នកដទៃផ្សេងទៀតឱ្យមានការងារធ្វើតាមរយៈការបង្កើតសហគ្រាស ឬអាជីវកម្មរបស់យើង។

-ទី5 គឺចំណាយថវិកា 10% សម្រាប់ការកម្សាន្ត (ENTERTAIN) ឬធ្វើឱ្យជីវិតស្រស់បំព្រងដើម្បីជាកម្លាំងក្នុងការបន្តដំណើរដ៏ស្វិតស្វាញបន្តទៀត។ នៅពេលដែលយើងមានថវិកាកំណត់មួយសម្រាប់ចំណាយលើការកម្សាន្ត នោះយើងនឹងមិនមានការលំបាកក្នុងការគ្រប់គ្រងពេកនោះទេ ព្រោះថា មនុស្សណាក៏ចង់សប្បាយដែរ តែប្រសិនបើសប្បាយភ្លេចខ្លួន យើងនឹងជួបបញ្ហាហិរញ្ញវត្ថុជាក់ជាមិនខាន។

-ទី6 គឺចំណាយ 5% សម្រាប់ការបរិច្ចាគ ឬការធ្វើទាន (GIVE) ព្រោះថា មនុស្សម្នាក់ៗមិនអាចរស់នៅលើពិភពលោកដោយមានសេចក្តីសុខតែម្នាក់ឯងនោះទេ ហេតុនេះការជួយគ្នាគឺជារឿងដែលធ្វើឱ្យយើងមានសេចក្តីសុខផ្នែកផ្លូវចិត្តផងដែរ។ ពេលដែលយើងបានជួយមនុស្សដទៃដែលកំពុងត្រូវការជំនួយ ហើយឃើញគេមានសភាពប្រសើរឡើងនោះ យើងក៏មានចិត្តរីករាយ ហើយជំរុញទឹកចិត្តរបស់យើងឱ្យខិតខំកាន់តែខ្លាំងឡើងដែរ៕

January 10, 2018

មន្ទីរពេទ្យគន្ធបុប្ផា បានចំណាយថវិកា 36លានដុល្លារអាមេរិក សម្រាប់ផ្ដល់សេវាសុខភាពជូនកុមារកម្ពុជា ក្នុងឆ្នាំ 2017

ភ្នំពេញ៖ លោកវេជ្ជបណ្ឌិត Denis Laurent អ្នកគ្រប់គ្រងមន្ទីរពេទ្យកុមារគន្ធបុប្ផាប្រចាំនៅកម្ពុជា បានឱ្យដឹងថា ក្នុងមួយឆ្នាំ2017 កន្លងទៅនេះ មន្ទីរពេទ្យគន្ធបុប្ផា បានផ្តល់សេវាសុខភាពជូនកុមារកម្ពុជានៅក្នុងមន្ទីរពេទ្យបានចំនួន 909.192នាក់ និងបានសម្រាកព្យាបាលជំងឺចំនួន 167.790នាក់ ហើយមន្ទីរពេទ្យបានចំណាយថវិការអស់ប្រមាណ 36លានដុល្លារអាម៉េរិក សម្រាប់កិច្ចដំណើរការព្យាបាលជួយសង្គ្រោះជីវិតកុមារកម្ពុជា ឱ្យរួចផុតពីការគំរាមកំហែងនៃជំងឺគ្រប់ប្រភេទ។ នេះបើយោងតាមការចេញផ្សាយរបស់ AKP នៅថ្ងៃទី 10 ខែមករា ឆ្នាំ 2018។

លោកវេជ្ជបណ្ឌិត Denis Laurent បានបញ្ជាក់បន្ថែមទៀតថា ភាគច្រើនកុមារដែលមានជំងឺមកទទួលសេវាព្យាបាលនៅមន្ទីរពេទ្យគន្ធបុប្ផា គឺជាកុមារជាកូនចៅគ្រួសារប្រជាពលរដ្ឋក្រីក្រដែលពួកគេត្រូវបានទទួលការពិនិត្យ និងសម្រាកព្យាបាលនៅក្នុងមន្ទីរពេទ្យគន្ធបុប្ផាគ្រប់ទីកន្លែង ទាំងនៅរាជធានីភ្នំពេញ និងនៅខេត្តសៀមរាប ដោយឥតគិតថ្លៃ ហើយថវិកាសម្រាប់ចំណាយទាំងអស់ គឺបានមកពីរាជរដ្ឋាភិបាលកម្ពុជា កាកបាទក្រហមកម្ពុជា គ្រឹះស្ថានអង្គរ ជំនួយពីប្រទេសស្វីស និងការបរិច្ចាគដោយសប្បុរសជនក្នុងស្រុក។

ជាក់ស្តែងថ្មីៗនេះ សមាគមប្រតិបត្តិករទេសចរ ខេត្តសៀមរាប បានផ្តល់ថវិកាចំនួន 1ម៉ឺនដុល្លាដល់មន្ទីរពេទ្យគន្ធាបុប្ផាខេត្តសៀមរាប ដើម្បីជួយដល់កុមារនៅកម្ពុជាផងដែរ៕

January 10, 2018

ដាំត្រសក់លើដី15 អា មួយថ្ងៃបេះលក់បានប្រាក់ពី 15 – 20ម៉ឺនរៀល

ត្រសក់ជាប្រភេទបន្លែម្យ៉ាងដែលមានតម្រូវការទទួលទានខ្ពស់គ្រប់ក្រុមគ្រួសារដោយសារតែវាអាចយកទៅច្នៃធ្វើជាម្ហូបបានច្រើនប្រភេទ ដូចជាធ្វើជាបន្លែឆា ធ្វើជាអន្លក់ ឬធ្វើបន្លែជ្រក់ក៏បាន។ ដោយសារតែតម្រូវការបែបនេះហើយ ទើបធ្វើឱ្យកសិករបោះបង់ការដាំដំណាំផ្សេងៗ ហើយបែរមកប្រកបរបរដាំត្រសក់វិញ។

កសិករដាំត្រសក់នៅក្នុងភូមិពាមសាលា ឃុំស្អាងភ្នំ ស្រុកស្អាង ខេត្តកណ្តាល លោកទុន ចាន់ណាបានឱ្យដឹងថា កន្លងមកគ្រួសារគាត់ក៏ដូចជាគ្រួសារកសិករដទៃទៀតដែរចូលចិត្តដាំបន្លែម្រះ និងត្រឡាច ដោយសារបន្លែប្រភេទនេះមានតម្លៃសមរម្យនៅលើទីផ្សារ ក៏ប៉ុន្តែដោយសារហាងឆេងឡើងចុះមិនទៀងទាត់ គ្រួសារគាត់ និងអ្នកភូមិមួយចំនួនបានងាកមកដាំត្រសក់ជំនួសវិញប្រមាណជាជិត 2ឆ្នាំចុងក្រោយនេះ ហើយលក់ចេញបានតម្លៃសមរម្យអាចទទួលយកបានដែលជាកត្តាធ្វើឱ្យពួកគាត់បន្តដាំត្រសក់រហូតមកទល់បច្ចុប្បន្ន។

កសិករខាងលើបន្តថា បន្ទាប់ពីប្រកបមុខរបរដាំត្រសក់រយៈ2ឆ្នាំមក ឃើញថាត្រសក់គឺជាដំណាំងាយស្រួលដាំ ហើយទទួលបានផលខ្ពស់ទៀតផងបើប្រៀបធៀបជាមួយដំណាំផ្សេងៗ ដោយដាំលើផ្ទៃដីតែប្រមាណ14អា ក៏ក្នុងមួយថ្ងៃអាចបេះបានចន្លោះពី 200 ទៅ300គីឡូក្រាមក្នុងមួយថ្ងៃជាប្រចាំដែរ ដោយក្នុង1គីឡូក្រាមអាចលក់បានចន្លោះពី800រៀល ទៅ1.000រៀល និងលក់ដាច់ជាប្រចាំដោយសារពួកគាត់មានបច្ចេកទេសដាំដុះ ដោយមិនប្រើប្រាស់ថ្នាំគីមីនាំឱ្យប៉ះពាល់សុខភាពគ្រួសារពួកគាត់ និងអ្នកទទួលទានឡើយ ដោយសារមានការបណ្តុះបណ្តាលបច្ចេកទេសដាំដុះថ្មីពីអង្គការ“លាស់ថ្មី។

ប៉ុន្តែយ៉ាងណាក៏ដោយ កសិករក្នុងភូមិពាមសាលាបានត្អូញត្អែរថា ដោយសារតែឆ្នាំនេះផ្លែត្រសក់ពួកគាត់ធ្លាក់ថ្លៃជាងឆ្នាំមុន ដោយកាលពីពេលកន្លងទៅពួកគាត់អាចលក់បានក្នុងតម្លៃចន្លោះពី1.500រៀលដល់1.700រៀល និងមានម៉ូយមកទទួលយកដល់កន្លែងទាំងអស់ទៀតផង។ តែឥឡូវនេះពួកគាត់អះអាងថា ដោយសារមានបន្លែនាំចូលពីប្រទេសជិតខាងច្រើនពេក ជាពិសេសប្រទេសវៀតណាម។

របរដាំត្រសក់មិនត្រឹមតែរកចំណូលឱ្យអ្នកដាំបានដោយស្រួលប៉ុណ្ណោះទេ សូម្បីតែអ្នកមើលថែចម្ការឱ្យគេក៏អាចរកប្រាក់កម្រៃផ្គត់ផ្គង់ជីវភាពគ្រួសារបានដែរ។ លោកអុំ ជឿនសុផល អ្នកមើលថែចម្ការខាងលើបានប្រាប់ឱ្យដឹងដែរថា គាត់មិនមានដីដាំបន្លែនឹងគេទេ ប៉ុន្តែក្នុងមួយព្រឹកគាត់អាចរកចំណូលពីការស៊ីឈ្នួលធ្វើស្មៅ និងកាត់ស្លឹកត្រសក់ឱ្យគេក៏បាន2ម៉ឺនរៀលដែរក្នុងមួយថ្ងៃ ហើយពេលទំនេរពីការធ្វើស្មៅ គាត់អាចទៅស៊ីឈ្នួលកាត់បន្លែឱ្យគេដើម្បីរកចំណូលបន្ថែមបានទៀតផង។

គួរបញ្ជាក់ថា ត្រសក់គឺជាប្រភេទដំណាំងាយស្រួលដាំដុះមិនពិបាកថែទាំច្រើននោះទេ ហើយក៏មិនសូវប្រើជី ឬបាញ់ថ្នាំគីមីដើម្បីសម្លាប់សត្វល្អិតច្រើនពេកដែរ និយាយរួមទៅគឺចំណាយដើមទុនអស់តិច តែប្រមូលផលបានយូររហូតជាង1ខែឯណោះ ទើបដើមទុំចាស់ងាប់ស្លឹក ហើយសឹមរៀបចំដាំថ្មីឡើងវិញ។

ចំណែកឯវិធីដាំដុះវិញកសិករដដែលនោះបានប្រាប់ថា មុនពេលដាំគេត្រូវភ្ជួររាស់ដី ហើយហាលដីចោលរយៈពេលមួយសប្តាហ៍ ទើបភ្ជួរពូនជារងបន្ទាប់មកយកគ្រាប់កប់ដាំតែម្តង។ នៅពេលមិនទាន់ដុះ ក្នុងមួយថ្ងៃគេត្រូវស្រោចទឹកវា3ដងគឺពេលព្រឹក ថ្ងៃត្រង់ និងល្ងាច លុះកូនត្រសក់ដុះហើយគឺស្រោចទឹកតែ2ដងប៉ុណ្ណោះក្នុងមួយថ្ងៃ។ លុះដល់ពេលត្រសក់ឡើងទ្រើង កសិករអាចយកជី និងថ្នាំជំនួយត្រួយមកដាក់ត្រាំក្នុងទឹកស្រះដើម្បីបូមស្រោចតាមគុម្ពត្រសក់ទាំងនោះរយៈពេលមួយសប្តាហ៍ រហូតដល់អាយុបាន1ខែ ត្រសក់អាចចេញផ្កា និងក្ដិប ហើយយើងអាចបន្តបេះវាបានរហូតដល់ 1ខែ ឬ1ខែកន្លះឯណោះទើបរើទ្រើងដាំសាជាថ្មី។

ប្រធានការិយាល័យកសិកម្មស្រុកស្អាង លោក អ៊ុក សុគន្ធ មានប្រសាសន៍ថា ផ្ទៃដីដាំបន្លែចម្រុះនៅក្នុងស្រុកស្អាងមានប្រមាណ2.037ហិកតា ហើយក្នុងមួយថ្ងៃទូទាំងស្រុកផលិតបន្លែគ្រប់ប្រភេទនាំចេញទៅលក់លើទីផ្សារបានពី50-60តោន។ លោកបានបន្តទៀតថា កសិករគួរមានទម្លាប់ផ្លាស់ប្តូរប្រភេទដំណាំ និងគួរដាំដំណាំណាដែលមានតម្រូវការទីផ្សារ ចៀសវាងការដាំដុះតាមៗគ្នាដែលនាំឱ្យបរិមាណផ្គត់ផ្គង់ច្រើនលើសតម្រូវការដែលនាំឱ្យបន្លែនោះធ្លាក់ថ្លៃ៕

January 10, 2018

Tevez វិលទៅកាន់ក្លិប Boca Junior ដើម្បីធ្វើជាស្ពានសម្រាប់ World Cup

ខ្សែប្រយុទ្ធ Carlos Tevez សង្ឃឹមថា អាចនឹងវិលទៅកាន់ភាពជោគជ័យ និងប្រើប្រាស់ការវិលត្រឡប់របស់គេទៅកាន់ក្លិប Boca Juniors ដើម្បីធ្វើជាស្ពានក្នុងការវិលទៅចូលរួមក្នុងក្រុមជម្រើសជាតិអាហ្សង់ទីនវិញ សម្រាប់ព្រឹត្តិការណ៍ World Cup ក្នុងប្រទេសរុស្ស៊ី នៅឆ្នាំនេះ។

Tevez បានឲ្យដឹងថា៖ «ខ្ញុំនៅសល់រយៈពេល2ទៅ3ឆ្នាំទៀត ហេតុនេះ ការចូលរួមក្នុងការប្រកួត World Cup សម្រាប់កីឡាករម្នាក់ដែលមានវ័យដូចខ្ញុំនឹងក្លាយជារឿងដ៏ពិសេសមួយ»។

អតីតខ្សែប្រយុទ្ធរបស់ក្លិប Manchester United និង Juventus ដែលនឹងឈានចូលវ័យ34ឆ្នាំនៅខែក្រោយរូបនេះ បានលេងជាលើកចុងក្រោយសម្រាប់ក្រុមជម្រើសជាតិកាលពីខែតុលា ឆ្នាំ2015។ ប៉ុន្តែ Tevez នឹងរីករាយក្នុងការកាត់បន្ថយចំណូល ដើម្បីទទួលបានឱកាសលេងកាន់តែច្រើន ក្រោយពីការផ្ទេរដែលផ្តល់ប្រាក់ចំណូលដ៏ច្រើនសន្ធឹកសន្ធាប់ក្នុងរយៈពេល12ខែជាមួយនឹងក្លិបបាល់ទាត់របស់ចិន Shanghai Shenhua។

ខណៈដែលរូបគេត្រូវបានឲ្យធ្វើការបង្ហាញខ្លួនជាសាធារណៈនៅក្លិបរបស់គេ ក្រោយពីការផ្ទេរកាលពីសប្តាហ៍មុននោះ Tevez បានឲ្យដឹងថា៖ «ខ្ញុំចង់រីករាយជាមួយនឹងរយៈពេលប៉ុន្មានឆ្នាំខាងមុខទៀត ជាមួយនឹង Boca ពីព្រោះវាជារឿងចុងក្រោយដែលខ្ញុំនៅសល់។ វាកាន់តែងាយស្រួល ប្រសិនបើខ្ញុំរីករាយ ហើយខ្ញុំពិតជារីករាយណាស់»។ កីឡាកររូបនេះ បច្ចុប្បន្នកំពុងតែហ្វឹកហាត់ជាមួយនឹងក្លិបកាលពីកុមារភាពរបស់គេនៅខាងក្រៅទីក្រុង Buenos Aires៕

ប្រភពពី៖ Sport24

January 10, 2018

ផ្នែកឯកជនស្នើឱ្យរាជរដ្ឋាភិបាលបង្កើតតំបន់ SME ដើម្បីងាយស្រួលទទួលបានឥណទាន

អ្នកប្រកបធុរកិច្ចក្នុងផ្នែកឯកជនបានស្នើទៅរដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ ដែលគេជឿថាជាតួអង្គសំខាន់មួយដែរក្នុងការចរចាបង្កើតគោលនយោបាយអភិវឌ្ឍន៍សហគ្រាសខ្នាតតូច និងមធ្យមតាមរយៈគម្រោងបង្កើតធនាគារសហគ្រាសខ្នាតតូច និងមធ្យម(SME Bank) ដែលមានដើមទុនដំបូង100លានដុល្លារ។

ក្នុងវេទិកាស្ដីពីកសិកម្ម រុក្ខាប្រមាញ់ និងនេសាទ នៅថ្មីៗនេះ លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកសំណើដល់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទដើម្បីជួយដោះស្រាយបញ្ហាកង្វះដើមទុនក្នុងការកែច្នៃផលិតផលកសិកម្ម ដោយអនុញ្ញាតឱ្យសហគ្រិនអាចមានលទ្ធភាពទទួលបានកម្ចីពីស្ថាប័នហិរញ្ញវត្ថុរបស់រាជរដ្ឋាភិបាលដែលទើបផ្តួចផ្តើមនឹងបង្កើតនាពេលឆាប់ៗនេះ។

លោកឧកញ៉ា លឹម ហេង បញ្ជាក់ថា៖ “វាជាប់ពាក់ព័ន្ធដល់វិស័យកសិកម្ម យើងច្រើននោះគឺការអភិវឌ្ឍផ្នែកសិប្បកម្ម និងឧស្សាហកម្មធុនតូច និងមធ្យម ដោយហេតុថា ថ្មីៗនេះសម្តេចនាយករដ្ឋមន្ត្រីហ៊ុន សែន មានគម្រោងដើម្បីបង្កើតនូវធនាគារ អេស អឹម អុី (SME) ដូច្នេះអ្វីដែលសំខាន់ដែលយើងចង់ដឹងនោះគឺ តើសហគ្រាសខ្នាតតូច និងមធ្យមនេះ អាចទទួលបាននូវឥណទានពីធនាគារនោះតាមរបៀបណា?”

លោកឧកញ៉ា បានអះអាងថា វិស័យកសិកម្មនៅកម្ពុជាគ្របដណ្តប់ភាគច្រើន ទាំងផលិតកម្ម ទាំងធនធានមនុស្ស និងកម្លាំងពលកម្ម ព្រោះហេតុដូចនេះ ដើម្បីឲ្យវិស័យកសិកម្មមានដំណើរឆ្ពោះទៅរកការអភិវឌ្ឍល្អ វាមានភាពចាំបាច់ក្នុងបង្កើតតំបន់អភិវឌ្ឍន៍សហគ្រាសខ្នាតតូច និងមធ្យមមួយឡើង។ ការបង្កើតតំបន់នេះ ត្រូវបានគេជឿថា នឹងផ្តល់ភាពងាយស្រួលដល់សហគ្រាសខ្នាតតូច និងមធ្យមក្នុងការទទួលបានដើមទុនសម្រាប់អភិវឌ្ឍអាជីវកម្មរបស់ខ្លួនតាមរយៈការទទួលបានកម្ចី ការអនុគ្រោះផ្សេងៗ មានពន្ធ និងតម្លៃភ្លើងអគ្គិសនីជាដើម។

ឧកញ៉ា លឹម ហេង បានបន្ថែមថា៖ “ដើម្បីងាយស្រួលឲ្យសហគ្រាសធុនតូច និងមធ្យមទទួលបានកម្ចីយើងស្នើសុំឲ្យឯកឧត្តម (វេង សាខុន)ជួយ ព្រោះឯកឧត្តមច្បាស់ជាមានការចូលរួមជជែកជាមួយរដ្ឋាភិបាល និងស្ថាប័នពាក់ព័ន្ធដើម្បីជំរុញធនាគារអេសអឹមអុីនេះឱ្យកើតឡើង ហើយខ្ញុំស្នើសុំឯកឧត្តមជួយជំរុញដល់ការបង្កើតតំបន់សិប្បកម្ម និងឧស្សាហកម្មខ្នាតតូច និងមធ្យម (អេសអឹមអុី)ផង”។

មូលហេតុដែលត្រូវបង្កើតតំបន់នេះ ព្រោះថាបើនៅរាយប៉ាយដូចសព្វថ្ងៃ គឺមិនងាយនឹងទទួលបានឥណទាននោះទេ។ លោកឧកញ៉ា បានលើកឧទាហរណ៍ថា ដូចការទិញបុរី ឬសំណង់ផ្សេងៗអ៊ីចឹង ដែលគេងាយស្រួលទទួលបានឥណទានពីស្ថាប័នហិរញ្ញវត្ថុ ព្រោះគេធ្វើការងារដោយផ្ទាល់ជាមួយម្ចាស់គម្រោងសំណង់តាមរយៈការបង់រំលស់។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានទទួលយកសំណើរបស់តំណាងសភាពាណិជ្ជកម្ម ដោយបានឆ្លើយតបទៅវិញថា គំនិតបង្កើតធនាគារ អេស អឹម អុីនេះ គឺត្រូវបានប្រមុខរដ្ឋាភិបាលប្រកាសជាសាធារណៈហើយ ក្រោយការជួបប្រជុំជាមួយផ្នែកឯកជនកាលពីប៉ុន្មានសប្តាហ៍មុន។ ឯកឧត្តមរដ្ឋមន្ត្រីបានបញ្ជាក់ថា វិស័យកសិកម្មរបស់ប្រទេសកម្ពុជានឹងដួលរលំ បើសិនជាគ្មានការកែច្នៃផលិតផលសម្រាប់នាំចេញទេនោះ។ ការកែច្នៃគឺត្រូវពឹងផ្អែកលើទីតាំងណាមួយជាក់លាក់ដែលថាមពលអគ្គិសនីមានតម្លៃថោក មានទីតាំងសម្រាប់កែច្នៃប្រកបដោយស្តង់ដារអនាម័យខ្ពស់ ហើយជាពិសេសបំផុតនោះគឺ មានភាពងាយស្រួលក្នុងការទទួលបានឥណទានសម្រាប់ប្រតិបត្តិការតែម្តង។

ជាបញ្ចប់ ឯកឧត្តមរដ្ឋមន្ត្រីបានអះអាងថា៖“ក្រោយពីយើងប្រជុំជាមួយផ្នែកឯកជននិយាយពីការធ្វើកសិកម្មតាមកិច្ចសន្យារួចហើយ យើងចង់បានការផ្តល់ឥណទាននេះ។ ខ្ញុំនិយាយពិត និងត្រង់ទៅ គឺខ្ញុំចង់ជំរុញរឿងនេះ…”។

សូមរំឭកថា កាលពីថ្ងៃទី20 ខែធ្នូ ឆ្នាំ2017 ដែលទើបកន្លងផុតទៅថ្មីៗនេះ សម្តេចនាយករដ្ឋមន្ត្រីហ៊ុន សែន បានលើកឡើងថា នៅពេលខាងមុខកម្ពុជានឹងបង្កើតឱ្យមានធនាគារសហគ្រាសធុនតូច និងមធ្យមមួយទៀត ដើម្បីឈានទៅផ្តល់កម្ចីឥណទានដល់ម្ចាស់អាជីវកម្ម និងម្ចាស់សហគ្រាសទាំងឡាយណាដែលមានគំនិតចង់បង្កើតសហគ្រាសឬអាជីវកម្មខ្នាតតូច និងមធ្យម ដែលនេះជាការជំរុញការបង្កើនផលិតផលប្រើប្រាស់ក្នុងស្រុក។

សម្តេចនាយករដ្ឋមន្ត្រី ហ៊ុន សែន ថែមទាំងបានអះអាងថា រាជរដ្ឋាភិបាលនឹងឈានទៅបង្កើតឱ្យមានធនាគារសម្រាប់សហគ្រាសធុនតូច និងមធ្យមដែលមានដើមទុន 100លានដុល្លារអាមេរិក ដែលរំពឹងថា វានឹងកាត់បន្ថយសម្ពាធពីការខ្វះដើមទុន និងសម្ពាធពីការប្រកួតប្រជែងថ្លៃដើម៕

January 10, 2018

នេះជាលើកទី1ហើយ ដែល Samsung ទទួលបានប្រាក់ចំណេញប្រតិបត្តិការច្រើនយ៉ាងនេះ

សេអ៊ូល៖ ក្រុមហ៊ុនបច្ចេកវិទ្យាយក្សរបស់កូរ៉េខាងត្បូង Samsung Electronics បានប្រកាសឱ្យដឹងថា នៅក្នុងឆ្នាំ 2017 កន្លងទៅនេះ ទទួលបានប្រាក់ចំណេញប្រតិបត្តិការប្រចាំរហូតដល់ 46,9ពាន់លានដុល្លារអាមេរិក តិចជាងការព្យាករណ៍។

យោងតាមការចេញផ្សាយរបស់សារព័ត៌មាន Korea Herald ចេញផ្សាយនៅថ្ងៃទី 10 ខែមករា ឆ្នាំ 2018 បានឱ្យដឹងថា នេះជាលើកដំបូងហើយដែលក្រុមហ៊ុន Samsung ទទួលបានប្រាក់ចំណេញប្រតិបត្តិការប្រចាំឆ្នាំរហូតដល់ 46,9ពាន់លានដុល្លារអាមេរិក ដែលតួលេខនេះមិនធ្លាប់កើតមានឡើងចាប់តាំងពីក្រុមហ៊ុនត្រូវបានបង្កើតនៅក្នុង 1969។

ក្រុមហ៊ុន Samsung នៅមិនទាន់បង្ហាញរបាយការណ៍ហិរញ្ញវត្ថុប្រចាំឆ្នាំ 2017 ទាំងមូលនោះទេ ប៉ុន្តែបានធ្វើការព្យាករណ៍ថា ប្រាក់ចំណេញប្រចាំត្រីមាសទី3 ចន្លោះខែតុលា-ធ្នូ ឆ្នាំ 2017 នឹងទទួលបាន 14,1ពាន់លានដុល្លារអាមេរិក ខណៈដែលក្រុមអ្នកតាមដានបានព្យាករណ៍ថា មានត្រឹមតែ 12,8ពាន់លានដុល្លារអាមេរិកប៉ុណ្ណោះ៕

January 10, 2018

Everton ត្រៀមលក់ Niasse ទៅឲ្យ Crystal Palace, Brighton ឬ West Brom

Oumar Niasse នឹងត្រូវចាកចេញពីក្លិប Everton នៅខែមករានេះ ខណៈដែលក្លិប Crystal Palace, Brighton & Hove Albion និង West Bromwich Albion សុទ្ធសឹងបានបង្ហាញពីការចាប់អារម្មណ៍របស់ពួកគេទៅលើកីឡាកររូបនោះ។

ក្លិបទូកក្តោង Everton មានបំណងលក់ខ្សែប្រយុទ្ធអន្តរជាតិសេណេហ្គាល់រូបនេះ ហើយពួកគេបានដាក់តម្លៃខ្លួន13លានផោន (ស្មើនឹង17.6លានដុល្លារអាមេរិក) ខណៈដែលក្លិបទាំង3សុទ្ធសឹងមានបំណងយល់ព្រមលើតម្លៃខ្លួនតាមការស្នើសុំនេះទាំងអស់។

ហេតុនេះ Niasse មានជម្រើសក្នុងការសម្រេចចិត្តធ្វើដំណើរទៅកាន់ក្លិបណាមួយ ហើយនិងត្រូវធ្វើការសម្រេចចិត្តរបស់គេដោយផ្អែកទៅលើទីតាំងដែលរូបគេត្រូវលេង។ ខ្សែប្រយុទ្ធវ័យ27ឆ្នាំរូបនេះ បានបង្ហាញពីទម្រង់លេងដ៏គួរឲ្យចាប់អារម្មណ៍នៅពាក់កណ្តាលនៃរដូវកាលនេះ បើទោះបីជាបានចូលលេងក្នុងជម្រើសទាំង11នាក់ដំបូងមិនបានគ្រប់ការប្រកួត និងពេលខ្លះបានចូលលេងក្នុងនាមជាកីឡាករបម្រុងចំនួន9លើកផ្សេងទៀតក៏ដោយ។ រូបគេបានស៊ុតបាល់បញ្ចូលទី6គ្រាប់ ពោលគឺជាមធ្យមរូបគេរកបាន1គ្រាប់ក្នុងរយៈពេល101.6នាទី។

ក្លិប Everton ទើបតែបានចុះហត្ថលេខាជាមួយនឹងខ្សែប្រយុទ្ធអន្តរជាតិតួកគី Cenk Tosun មកពីក្លិប Besiktas ក្នុងតម្លៃខ្លួន27លានផោន ហើយអ្នកចាត់ការទូទៅរបស់ពួកគេលោក Sam Allardyce អាចនឹងសម្លឹងរកការទិញចូលកីឡាករថ្មីបន្ថែមទៀត នៅមុនពេលបិទទីផ្សារដោះដូរកីឡាករនាពេលបច្ចុប្បន្ន។ Everton បានទិញយក Niasse ពីក្លិប Lokomotiv Moscow ក្នុងតម្លៃខ្លួន13.5លានផោន កាលពីខែកុម្ភៈ ឆ្នាំ2016៕

ប្រភពពី៖ The Guardian

January 9, 2018

ទំហំពាណិជ្ជកម្មកម្ពុជាទាបជាងចិនជិត 4ពាន់លានដុល្លារក្នុងឆ្នាំ2017

ភាពខុសគ្នារវាងទំហំពាណិជ្ជកម្មកម្ពុជា និងចិននៅតែឆ្ងាយពីគ្នារហូតដល់ជិត4ពាន់លានដុល្លារខណៈរដ្ឋាភិបាលនៃប្រទេសទាំងពីរបេ្តជ្ញាបង្កើនទំហំពាណិជ្ជកម្មឱ្យកាន់តែធំបន្ថែមទៀតនៅឆ្នាំថ្មីនេះ និងឆ្នាំបន្តបន្ទាប់។

យោងតាមទិន្នន័យការនាំចេញ និងនាំចូលរបស់អគ្គនាយកដ្ឋានកម្ពុជាត្រួតពិនិត្យទំនិញនីហរ័ណ អាហរ័ណ និងបង្ក្រាបការក្លែងបន្លំ (កាំកុងត្រូល) នៃក្រសួងពាណិជ្ជកម្មបានបង្ហាញថា មានទំនិញយ៉ាងហោចណាស់ 13 មុខត្រូវបាននាំចេញទៅប្រទេសចិន ដែលមានទំហំទឹកប្រាក់សរុបជិត 634លានដុល្លារ ក្នុងរយៈពេល11ខែក្នុងឆ្នាំ2017។ មុខទំនិញសំខាន់ដែលត្រូវបាននាំចេញទៅកាន់ទីផ្សារចិន រួមមាន ៖ ផលនេសាទ ដំឡូងមីស្ងួត ម្សៅដំឡូងមី គ្រាប់ស្វាយចន្ទី អង្ករប្រេងដូងមិនទាន់ចម្រាញ់ ម្សៅកាកាវ កៅស៊ូក្រែប ឈើកែច្នៃ ដែលសរុបជាទឹកប្រាក់មានជាង 110 លានដុល្លារ។ ទំនិញខាងលើមានមូលដ្ឋានដាំដុះ ផលិតនិងកែច្នៃបឋមនៅកម្ពុជា។ ក្នុងចំណោមផលិតផលរបស់កម្ពុជាទាំងនោះ អង្ករជាទំនិញសំខាន់ជាងគេក្នុងការនាំចេញទៅកាន់ប្រទេសចិន ដោយមានចំនួនទឹកប្រាក់ជិត 90លានដុល្លារអាមេរិក។

កម្ពុជាក៏មាននាំចេញផលិតផលខ្លះទៀតទៅកាន់ទីផ្សារចិនដែរ ដូចជាក្រណាត់ ស្បែក ស្បែកកែច្នៃ សម្លៀកបំពាក់របស់វាយនភណ្ឌ និងស្បែកជើង និងទំនិញផ្សេងៗទៀត ដែលមានទឹកប្រាក់សរុប ជិត 524លានដុល្លារអាមេរិក។ ផលិតផលទាំងនេះ ភាគច្រើនកម្ពុជានាំវត្ថុធាតុដើមចូល ហើយកម្ពុជាគ្រាន់តែលក់កម្លាំងពលកម្មសម្រាប់កាត់ដេរប៉ុណ្ណោះ។

របាយការណ៍របស់កាំកុងត្រូលដដែលបានបង្ហាញថា កម្ពុជានាំចូលទំនិញពីចិនមិនតិចតួចនោះទេ ដែលមានទឹកប្រាក់សរុបរហូតដល់ទៅជិត 4.481លានដុល្លារអាមេរិកក្នុងរយៈពេល 11ខែក្នុងឆ្នាំ2017។ ទំនិញដែលកម្ពុជានាំចូលពីចិនមកវិញ មានទាំងទំនិញកសិកម្ម និងទំនិញធុនធ្ងន់ ដែលរួមមាន៖ សាច់ស្រស់ ផលនេសាទ ទឹកដោះ និងផលិតផលពីទឹកដោះ បន្លែស្រស់ ផ្លែឈើស្រស់ ស្រូវសាលី និងទំនិញកសិកម្មផ្សេងៗទៀត។ ក្រៅពីទំនិញខាងលើ នៅមានទំនិញជាច្រើនទៀតដែលចិននាំចូលមកកាន់ទីផ្សារកម្ពុជា ដូចជាចំណីសត្វ ថ្នាំជក់ និង បារី ឧស្ម័ន សារធាតុគីមី សេរ៉ូម និងឱសថ ជីកសិកម្មសម្ភារកាត់ដេរ ស្បែកជើង វត្ថុធាតុដើមផលិតស្បែកជើង សម្ភារសំណង់ រថយន្ត ម៉ូតូ និង ផ្សេងៗទៀត។

ឯកឧត្តម កឹម ស៊ីថន រដ្ឋលេខាធិការក្រសួងពាណិជ្ជកម្មក្នុងជំនួបជាមួយ ឯកឧត្តម WANG Bingnan អនុរដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិន កាលពីខែវិច្ឆិកាក្នុងឆ្នាំ2017 បានរំពឹងថា ទំហំពាណិជ្ជកម្មនៃប្រទេសទាំងពីរនឹងកើនឡើងលើស 5ពាន់លានដុល្លារក្នុងឆ្នាំ2018 ព្រមទាំងនឹងរីកធំរហូតដល់ 6ពាន់លានដុល្លារនៅឆ្នាំ2020 ខាងមុខ។

ឯកឧត្តម ស៊ាង ថៃ អគ្គនាយកនៃអគ្គនាយកដ្ឋានជំរុញពាណិជ្ជកម្ម និងជាអ្នកនាំពាក្យក្រសួងពាណិជ្ជកម្មបានអះអាងថា ដើម្បីពង្រីកទីផ្សារនាំចេញផលិតផលវាយនភណ្ឌដែលមានសម្លៀកបំពាក់ និងស្បែកជើង ក្រសួងពាណិជ្ជកម្មនឹងខិតខំចរចាដើម្បីបើកច្រកពាណិជ្ជកម្មជាមួយសហភាពសេដ្ឋកិច្ចអឺរ៉ុបអាស៊ី (EAEU) ដែលមានសមាជិកចំនួន 5 ប្រទេសគឺ រួមមានរុស្ស៊ី បេឡារុស កាហ្សាក់ស្ថាន គីហ្ស៊ីស្ថាន និងអាមេនីបន្ថែមទៀត ព្រោះកន្លងមកទំហំពាណិជ្ជកម្មរវាងកម្ពុជា និងទីផ្សារនៃប្រទេសទាំងនោះស្ថិតនៅតូចនៅឡើយ។

សម្រាប់ទីផ្សារប្រទេសចិន ថ្វីដ្បិតតែចិនអនុញ្ញាតឱ្យផលិតផលកសិកម្មកម្ពុជារាប់រយមុខនាំចូលទៅកាន់ទីផ្សារចិនដោយទទួលបានការលើកលែងពន្ធមែន ប៉ុន្តែមានទំនិញតែមិនប៉ុន្មានមុខប៉ុណ្ណោះដែលចិនអនុញ្ញាតឱ្យនាំចូល៕

January 9, 2018

ទាំងនេះគឺជាបុគ្គលិក 10រូប ដំបូងគេបំផុតរបស់ Facebook

ពិភពលោកបានទទួលស្គាល់ និងដឹងច្បាស់ថា លោក Mark Zuckerberg គឺជាក្បាលម៉ាស៊ីនធំដែលដឹកនាំបណ្ដាញសង្គម Facebook រហូតទទួលបានជោគជ័យ ដែលបច្ចុប្បន្នមានអ្នកប្រើច្រើនជាង 2ពាន់លាននាក់។ ថ្ងៃនេះ ឡារ៉ែន នឹងនាំលោកអ្នកទៅស្គាល់បុគ្គលិក 10រូបដំបូងបំផុតរបស់ Facebook។

1 – លោក Gilles Mischler

លោក Gilles Mischler ជាបុគ្គលិកជំនាញ IT ដោយបានចូលបម្រើការងារនៅក្នុងបណ្ដាញសង្គម Facebook នៅខែមិថុនា ឆ្នាំ2005 ។ វិស្វករជំនាញម្នាក់នេះបានជួយរចនា និងបង្កើតនូវអ្វីថ្មីៗជាច្រើន សម្រាប់ Facebook ប៉ុន្តែនៅឆ្នាំ2010 លោកបានលាឈប់ ដោយទៅបង្កើតគេហទំព័រ SiteOps ដែលផ្ដោតសំខាន់លើជំនាញ IT និងបានធ្វើការក្រៅម៉ោងនៅក្នុងក្រុមហ៊ុន Disney, Playdom និងចុងក្រោយគឺនៅ Nokia។

2 – លោក Aaron Sittig

មិនច្បាស់ថា បុរសម្នាក់នេះ ចូលធ្វើការនៅក្រុមហ៊ុន Facebook ក្នុងខែណានោះទេ គ្រាន់តែដឹងថា ចូលក្រោយលោក Mischler តែនៅក្នុងឆ្នាំ 2005។ លោក Aaron Sittig បានចាកចេញពី Facebook វិញនៅចុងឆ្នាំ 2010។ លោក Aaron Sittig គឺជាអ្នកបង្កើតមុខងារ Tagging និង Liking សម្រាប់ការ Post នៅលើបណ្ដាញ Facebook។ បើតាមការបញ្ជាក់ពីមនុស្សជំនិត Mark Zuckerberg បានឱ្យដឹងថា មានតែ Aaron Sittig ដែលជាអតីតបុគ្គលិកFacebook ដំបូងម្នាក់ប៉ុណ្ណោះ ដែលបានទៅចូលរួមមង្គលការរបស់ Mark Zuckerberg។

3 – លោក Chris Hughes

ជាមនុស្សម្នាក់ដែលស្និទ្ធនឹង Mark Zuckerberg តាំងពីបង្កើត Facebook ដោយមានតួនាទី ជាអ្នកនាំពាក្យរបស់ Facebook។ នៅក្នុងពេលបម្រើការងារនៅ Facebook លោក Chris Hughesបានដើរតួនាទីជាអ្នកនាំពាក្យរបស់ Facebook បានយ៉ាងល្អ ប៉ុន្តែនៅឆ្នាំ2012 លោកបានចាកចេញពីបណ្ដាញសង្គមមួយនេះ ដោយទៅបម្រើការងារនៅក្នុងកាសែត The New Republic ក្នុងតួនាទីជានិពន្ធនាយករង។

4 – លោក James Pereira

មិនច្បាស់ថ្ងៃចូលធ្វើការនៅ Facebook ប៉ុន្តែគេដឹងច្បាស់ថា គាត់បានចាកចេញនៅឆ្នាំ2007 ក្នុងតួនាទីជាវិស្វករ។ ក្រោយចាកចេញពី Facebook ពុំមានព័ត៌មានទាក់ទងនឹងលោកឡើង ប៉ុន្តែតាមរយៈ Facebook Page របស់គាត់បានឱ្យដឹងថា គាត់បានបញ្ចប់បរិញ្ញាបត្រនៅ Pacific Northwest College of Art ក្នុងឆ្នាំ2010 និងបច្ចុប្បន្នរស់នៅក្នុងទីក្រុង Portland។

5 – លោក Steve Chen

ជាបុគ្គលិកផ្នែកវិស្វកម្មកំពូលរបស់ Facebook នៅក្នុងឆ្នាំ2005 ប៉ុន្តែគួរឱ្យស្ដាយគាត់បានចាកចេញពី Facebook ដោយទៅបង្កើត YouTube រហូតក្លាយជាមហាសេដ្ឋី ព្រោះ YouTube ត្រូវបាន Google ទិញយកនៅខែវិច្ឆិកា ឆ្នាំ2006 ក្នុងតម្លៃ 1,65ពាន់លានដុល្លារអាមេរិក។

6 – លោក Eduardo Saverin

ត្រូវបានគេស្គាល់ថា ជាសហស្ថាបនិកមួយរូបក្នុងចំណោម 5រូប ដែលបានបង្កើត Facebook រហូតត្រូវបានគេដាក់ឈ្មោះឱ្យគាត់ថា “The Social Network”។ លោក Eduardo Saverin ជាបុគ្គលិកមួយរូប ដែលមានភាគហ៊ុននៅ Facebook ច្រើនជាងគេរហូតដល់ 30ភាគរយ នៃភាគហ៊ុន Facebook ទាំងមូល ប៉ុន្តែក្រោយមក លោកបានលក់ភាគហ៊ុន ដោយទុកត្រឹមតែ 5ភាគរយប៉ុណ្ណោះ។

7 – លោក Daniel Neff

លោក Daniel Neff ជាបុគ្គលិកម្នាក់ក្នុងចំណោមបុគ្គលិកដំបូងគេរបស់ Facebook ដែលបានចូលមប្រើការងារតាំងពីឆ្នាំ2005 ប៉ុន្តែគាត់បានចាកចេញពី Facebook ទៅបម្រើការងារនៅ Adobe Systems ជាប្រធានប្រតិបត្តិការ។

08 – លោក Karel Baloun

ជាបុគ្គលិកផ្នែកវិស្វករនៅ Facebook ប៉ុន្តែបានចាកចេញវិញនៅឆ្នាំ2006 ជាមួយនឹងពាក្យចចាមអារ៉ាមថា គាត់បានចាកចេញដើម្បីបង្កើតកម្មវិធី i2we ដែលជាក្រុមហ៊ុនមួយបង្កើតរាល់ App សម្រាប់បណ្ដាញសង្គម ប៉ុន្តែក្រោយមក មានព័ត៌មានថា គាត់គឺជាសហស្ថាបនិកក្រុមហ៊ុនលក់ទំនិញតាមទូរស័ព្ទដៃ Leap Commerce។

9 – លោក Adam D’Angelo

ជាមិត្តភ័ក្តិកាលពីក្មេងរបស់ Mark Zuckerberg ហើយត្រូវបានចូលបម្រើការងារនៅ Facebook ក្នុងចុងឆ្នាំ2006 ជាប្រធានបច្ចេកវិទ្យា និងជាអ្នកបង្កើត App ឱ្យ Facebook ដំបូងគេ។ គាត់បានចាកចេញពី Facebook នៅក្នុងឆ្នាំ2008 ជាមួយនឹងភាគហ៊ុន 8ភាគរយ ដែលមានតម្លៃប្រមាណជា 680លានដុល្លារអាមេរិក ដោយទៅបង្កើតគេហទំព័រសំណួរ-ចម្លើយ Quora។

10 – លោក Honorable Menion: Joe Green

ជាបុគ្គលមួយរូប ដែលជួយ Mark Zuckerberg បង្កើត “Facemash” (ឈ្មោះដំបូងរបស់ Facebook) តាមការជួយណែនាំពីឪពុករបស់ Mark Zuckerberg ប៉ុន្តែក្រោយមកមិនដឹងថា គាត់ទៅណានោះទេ៕

January 9, 2018

Author: វល័ក្ខ