វល័ក្ខ - La Reine Media

PSG ត្រៀមវិលទៅកាន់ការប្រជែងលើកពានវិញ ពេលប៉ះ Nantes ថ្ងៃអាទិត្យនេះ

Neymar និង Paris Saint-Germain នឹងវិលទៅកាន់ការប្រជែងរបស់ពួកគេឆ្ពោះទៅកាន់ការឈ្នះពានក្របខ័ណ្ឌ Ligue 1 របស់បារាំង ក្រោយពីការសម្រាករយៈពេល 3សប្តាហ៍នារដូវរងា នៅពេលដែលពួកគេធ្វើដំណើរទៅជួបក្រុម Nantes ដែលឈរលេខ5 នៅចុងសប្តាហ៍នេះ។

PSG នឹងធ្វើដំណើរទៅកាន់ទឹកដីក្រុម Nantes ក្រោយពីបានកត់ត្រាជ័យជម្នះ 6 -1 លើក្រុម Rennes ក្នុងការប្រកួតពាន French Cup និងបន្ទាប់ពីបានកត់ត្រាជ័យជម្នះ 2-0 លើក្រុម Amiens កាលពីពាក់កណ្តាលសប្តាហ៍នេះដើម្បីឈានទៅវគ្គពាក់កណ្តាលផ្តាច់ព្រ័ត្រនៃពាន League Cup។ Neymar បានរកគ្រាប់បាល់បញ្ចូលទីក្នុងពេលក្រុមខ្លួនដណ្តើមបានជ័យជម្នះទាំងពីរលើកនោះ ប៉ុន្តែ ខ្សែប្រយុទ្ធ Edinson Cavani ដែលជាអ្នករកបានគ្រាប់បាល់ច្រើនជាងគេក្នុងក្របខ័ណ្ឌលីក បានអវត្តមានក្រោយវិលពីការសម្រាកនៅថ្ងៃបុណ្យណូអែល និងចូលឆ្នាំថ្មីរបស់គេក្នុងប្រទេសអ៊ុយរូហ្គាយ យឺតពេល។

ខ្សែបម្រើអន្តរជាតិអាហ្សង់ទីន Javier Pastore ក៏ត្រូវបានមើលរំលងសម្រាប់ការប្រកួតកាលពីថ្ងៃពុធ ផងដែរ ក្រោយពីវិលពីការសម្រាកវិស្សមកាលរបស់គេយឺតពេលដូចគ្នា ខណៈដែលកីឡាករទាំងពីរ ត្រូវបានចាត់ទុកថា មិនទាន់ត្រៀមលក្ខណៈរួចរាល់ដោយលោកគ្រូបង្វឹក Unai Emery។ ខ្សែការពារ Thiago Silva ដែលជាប្រធានក្រុមរបស់ PSG បានបង្កើតឱ្យមានភាពស្រពេចស្រពិលជុំវិញអនាគតរបស់ Pastore នៅឯក្លិបនេះ នៅពេលដែលរូបគេបាននិយាយថា៖ «ខ្ញុំជឿជាក់ថា Pastore បានប្រាប់ក្លិបថា រូបគេចង់ចាកចេញ ប៉ុន្តែទីបំផុត ពួកគេមិនអាចឈានដល់ការព្រមព្រៀងគ្នាណាមួយនៅឡើយ»។

Pastore បានច្រានចោលថា រូបគេចង់ចាកចេញពីក្លិបនេះ។ Pastore ដែលបានចូលរួមជាមួយ PSG កាលពីឆ្នាំ2011នោះ បានឱ្យដឹងថា៖ «ខ្ញុំស្រឡាញ់ទីក្រុងប៉ារីស ហើយខ្ញុំស្រឡាញ់ PSG»។ ការប្រកួតនេះនឹងចាប់ផ្តើមនៅម៉ោង 3ទៀបភ្លឺ៕

ប្រភពពី៖ Sports.yahoo

January 12, 2018

ក្លិប Leipzig ថា Keita នឹងមិនចូលរួមជាមួយ Liverpool នៅខែមករានេះទេ

ក្លិប RB Leipzig បានបញ្ជាក់ប្រាប់ទូរទស្សន៍ BBC Sport ថា ពួកគេមិនមានបំណងក្នុងការអនុញ្ញាតឲ្យក្លិប Liverpool បំពេញការចុះហត្ថលេខាជាមួយនឹងខ្សែបម្រើដ៏មានឥទ្ធិពល Naby Keita នៅមុនពេលបញ្ចប់រដូវកាលនេះឡើយ។

កាលពីខែសីហា ឆ្នាំមុន Liverpool បានយល់ព្រមលើតម្លៃខ្លួន51លានផោន (ស្មើនឹង69លានដុល្លារអាមេរិក) សម្រាប់ខ្សែបម្រើអន្តរជាតិហ្គីណេវ័យ22ឆ្នាំរូបនេះ ដែលនឹងត្រូវចូលរួមជាមួយនឹងក្រុមហង្សក្រហមនៅខែកក្កដា។ ព័ត៌មានជាច្រើននៅសប្តាហ៍នេះបានចេញផ្សាយថា រូបគេអាចនឹងចូលរួមជាមួយនឹងក្លិប Liverpool នៅខែមករានេះ សម្រាប់ការផ្តល់តម្លៃខ្លួនបន្ថែម18លានផោនទៀត។ ប៉ុន្តែ លោក Ralph Hasenhuttl គ្រូបង្វឹករបស់ Leipzig បានប្រាប់ BBC ថា៖ «ស្ថានភាពគឺដូចគ្នាកាលពីមុនអ៊ីចឹង។

វាគ្មានហេតុផលសម្រាប់យើងក្នុងការអនុញ្ញាតឲ្យ Naby Keita ចាកចេញឆាប់ៗនោះឡើយ»។ ក្លិបនេះ បានបន្ថែមទៀតថា៖ «គ្មានអ្វីបានប្រែប្រួលឡើយ ហើយជំហររបស់យើងក៏មិនបានផ្លាស់ប្តូរដែរ»។ Liverpool បានបង្កើតទំនាក់ទំនងយ៉ាងល្អជាមួយនឹងក្លិប RB Leipzig អំឡុងពេលនៃការពិភាក្សាផ្សេងៗ ជុំវិញការផ្ទេរ Keita កាលពីរដូវក្តៅមុន ហើយនិងមិនព្យាយាមបង្ខំឲ្យមានការផ្ទេរនេះឡើយ ប្រសិនបើពួកគេមិនទទួលបានការលើកទឹកចិត្តដោយក្លិបរបស់ក្របខ័ណ្ឌ Bundesliga មួយនេះទេនោះ។

ទោះបីជាយ៉ាងណា Liverpool ពិតជារីករាយក្នុងការបំពេញការផ្ទេរនេះឲ្យបានឆាប់តាមដែលអាចធ្វើទៅបាន ហើយជំហរនេះអាចនឹងផ្លាស់ប្តូរ ប្រសិនបើក្លិប RB Leipzig ផ្លាស់ប្តូរជំហររបស់ពួកគេនៅខែមករានេះ ហើយលក្ខខណ្ឌថ្មី ក៏អាចនឹងឈានដល់ការព្រមព្រៀងគ្នាផងដែរ៕

ប្រភពពី៖ BBC

January 12, 2018

4 ជំនាញចាំបាច់សម្រាប់ការងារ Sales

Sales Skills គឺជាជំនាញសំខាន់របស់អ្នកដែលធ្វើការខាងផ្នែកលក់។ ដើម្បីឱ្យការធ្វើការងារកើតមានប្រសិទ្ធភាព អ្នកដែលធ្វើការងារផ្នែកនេះត្រូវតែមានការកែសម្រួល និងអភិវឌ្ឍសក្ដានុពលការធ្វើការងារលើផ្នែកនេះជាប់ជានិច្ច ដែលមិនត្រឹមតែនឹងធ្វើឱ្យការធ្វើការងារល្អឡើងនោះទេ តែបុគ្គលិកផ្នែកលក់ដែលមាន Sales Skills ល្អនឹងអាចយល់ពីតម្រូវការរបស់អតិថិជនបានយ៉ាងច្បាស់ទៀតផង ដែលវានឹងក្លាយជាប្រយោជន៍ដល់ការបង្កើនចំនួនលក់ដែលបានកំណត់ទុកក្នុងមួយខែៗបានយ៉ាងល្អប្រសើរ។

ដោយលក្ខណៈរបស់ការងារលក់ដែលមានភាពពាក់ព័ន្ធជាមួយនឹងសមត្ថភាពក្នុងការទាក់ទាញ និងបញ្ចុះបញ្ចូលអតិថិជន ធ្វើឱ្យអតិថិជនមានការយល់ឃើញតាម រហូតដល់ចង់ទិញទំនិញ ឬសេវាកម្មរបស់យើង អ្នកដែលធ្វើការផ្នែកលក់នេះចាំបាច់ត្រូវប្រើសិល្បៈក្នុងការលក់ដែលមិនមែនគ្រាន់តែជាការទិញ-លក់ទំនិញគ្នាធម្មតាៗនោះទេ តែត្រូវតែជាការលក់ដែលកើតចេញពីការរៀបចំកលយុទ្ធក្នុងការលក់យ៉ាងស័ក្តិសមទៀតផង ទើបធ្វើឱ្យការលក់ទទួលបានជោគជ័យ។

ជំនាញក្នុងការលក់ដែលអ្នកលក់មានឥទ្ធិពលចំពោះអ្នកទិញដោយការទំនាក់ទំនង ឬផ្ដល់ព័ត៌មានដែលចាំបាច់មុនការសម្រេចចិត្តទិញទំនិញ។ យើងនាំគ្នាមកមើលថា តើមានជំនាញអ្វីខ្លះដែលចាំបាច់សម្រាប់ការងារ Sales?

រៀនយល់ដឹងអំពីអតិថិជន

មុននឹងធ្វើការលក់ យើងត្រូវដឹងជាមុនថា តើអតិថិ-ជនរបស់យើងជានរណា និងកំពុងសម្លឹងរកមើលទំនិញប្រភេទណា។ យើងអាចរកអតិថិជនបានដោយការប្រមូលរួបរួមព័ត៌មានពីសៀវភៅបញ្ជីឈ្មោះផ្សេងៗក្នុងពិធីបង្ហាញមុខទំនិញ (ពិធីតាំងពិព័រណ៍) សមាគមពាណិជ្ជកម្ម តាមរយៈការដែលអតិថិជនចាស់ ឬអ្នកស្គាល់គ្នាណែនាំអ្នកដែលចាប់អារម្មណ៍ឱ្យ ឬតាមវេបសាយផ្សេងៗជាដើម។ វិធីនេះនឹងជួយឱ្យយើងទទួលបានអតិថិជនដែលត្រូវនឹងគោលដៅកាន់តែងាយឡើង បន្ទាប់ពីនោះទើបដំណើរការទាក់ទងតាមទូរស័ព្ទ ឬបណ្ដាញសង្គមអនឡាញដើម្បីផ្ដល់ព័ត៌មានបឋមទៅអតិថិជន និងណាត់ជួបជជែកគ្នាជាបន្ត។

2 .បើកឆាកការលក់ដើម្បីសាងភាពពេញចិត្ត

មុនពេលដែលយើងនឹងបើកឆាកការលក់ យើងត្រូវប្រាកដក្នុងចិត្តជាមុនសិនថា យើងមានព័ត៌មានពាក់ព័ន្ធនឹងអតិថិជនច្រើនគ្រប់គ្រាន់ហើយ ហើយសឹមរៀបផែនការកលយុទ្ធក្នុងការលក់។ នៅពេលយើងបើកការលក់ យើងត្រូវធ្វើឱ្យអតិថិជនកើតមានភាពពេញចិត្ត និងត្រូវមានសុជីវធម៌ដែលល្អក្នុងការលក់ ត្រូវមិនធ្វើឱ្យអតិថិជនមានអារម្មណ៍ធុញទ្រាន់ ទើសទាល់ដោយការបើកការលក់ដែលម៉ឺងម៉ាត់ខ្លាំងជ្រុលពេកនោះទេ។

សាងចំណាប់អារម្មណ៍នៅពេលបើកការលក់

ការណែនាំស្នើការលក់ដោយបរិយាយពាក់ព័ន្ធនឹងមុខទំនិញ ឬសេវាកម្មនោះ យើងត្រូវធ្វើឱ្យអតិថិជនមានអារម្មណ៍ជំពប់ចិត្ត ឬភ្ញាក់ផ្អើលក្នុងរឿងដែលយើងនិយាយរហូតនាំទៅដល់ការចាប់អារម្មណ៍លើមុខទំនិញ ហើយទើបជំរុញឱ្យកើតមានតម្រូវការដើម្បីឱ្យអតិថិជនសម្រេចចិត្តទិញ។ អ្នកលក់គួរព្យយាមសាងសេចក្ដីត្រូវការឱ្យកើតមានឡើងចំពោះអតិថិជន ចង្អុលឱ្យឃើញពីចំណុចល្អរបស់ទំនិញ ឬសេវាកម្មរបស់យើង ដោយបកស្រាយយ៉ាងត្រង់ទៅត្រង់មកដើម្បីឱ្យអតិថិជនកើតមានភាពជឿជាក់លើមុខទំនិញ និងសេវាកម្មរបស់យើង។ ក្នុងអំឡុងពេលចរចាលក់ អតិថិជនអាចនឹងមានចំណុចងឿងឆ្ងល់ក្នុងច្រើនរឿង មិនថាតែ តម្លៃរបស់ទំនិញដែលខ្ពស់ពេក ឬនៅមិនទាន់ត្រូវចិត្តជាមួយមុខទំនិញជាដើម ដូច្នេះអ្នកលក់ត្រូវព្យយាមរក្សាបរិយាកាសឱ្យមានភាពវិជ្ជមានឱ្យបានច្រើនបំផុត និងឆ្លើយតបចំណុចងឿងឆ្ងល់ទាំងនោះយ៉ាងចិត្តត្រជាក់ៗ និងបង្ហាញពីភាពជឿជាក់លើមុខទំនិញរបស់ខ្លួនឱ្យអតិថិជនបានឃើញ។

4 . បិទឆាកការលក់យ៉ាងឆ្លាតវៃ

ក្នុងអំឡុងការសន្ទនាដើម្បីបើកការលក់ នៅពេលដែលគ្រប់យ៉ាងដំណើរការទៅដោយប្រពៃ និងអតិថិជនមានអកប្បកិរិយាថានឹងទិញទំនិញ ឬសេវាកម្មរបស់យើងហើយនោះ យើងគួរប្រើឱកាសនោះបិទឆាកការលក់ភ្លាមតែម្ដង តែមិនត្រូវប្រញាប់ប្រញាល់ជ្រុលពេកនោះទេ។ យើងគួរសរុបឱ្យអតិថិជនសម្រេចចិត្តទិញមុខទំនិញរបស់យើង ដោយបង្ហាញពីជម្រើសឱ្យបានឆាប់រហ័ស និងងាយស្រួលឡើង។

ប្រាប់អតិថិជនថា គាត់នឹងទទួលបានអ្វីខ្លះ និងអាចនឹងមានការផ្ដល់សំណូមពរពិសេស ដូចជា គិតតម្លៃពិសេសជូន បញ្ចុះតម្លៃជូន ឬមានរបស់ថែម ជាដើម។ ត្រឹមតែប៉ុណ្ណឹង អតិថិជនក៏នឹងកើតមានក្ដីពេញចិត្តក្នុងការលក់របស់យើងហើយ។ សមត្ថភាពក្នុងការទាក់ទាញចិត្តអតិថិជន អាចនិយាយបានថាជាបេះដូងសំខាន់សម្រាប់អ្នកដែលធ្វើការផ្នែក Sales តែត្រូវមិនធ្វើដោយភាពប្រញាប់ប្រញាល់នោះទេ និងបើយើងត្រូវការបិទការលក់លឿនជ្រុលពេក អតិថិជននឹងមានអារម្មណ៍ទើសទាល់ និងអាចនឹងលែងទិញទំនិញរបស់យើងទៀតក៏អាចថាបានដែរ ដូច្នេះក្នុងការលក់គ្រប់ពេល យើងត្រូវនឹកដល់ចិត្តគេ ចិត្តយើងឱ្យបានច្រើនបំផុត ដើម្បីឱ្យអតិថិជនកើតមានភាពពេញចិត្ត និងទិញទំនិញ ឬសេវាកម្មរបស់យើងយូរតទៅទៀត៕

January 12, 2018

ទិចនិកបន្ថែមភាពផ្អែមល្ហែមដល់ «ជីវិតគូ»

រវាងគូស្នេហ៍ ឬស្វាមីភរិយា ក្រៅពីមាន «ការដឹងចិត្តគ្នាទៅវិញទៅមក» ជាគោលការណ៍សំខាន់ហើយនោះ ការថែបំប៉នសេចក្តីស្នេហាឱ្យផ្អែមល្ហែមត្រជាក់ត្រជុំ ក៏ជាបច្ច័យមួយដែលជួយឱ្យសម្ព័ន្ធភាពកាន់តែស្អិតរមួតឡើងទៀតដែរ ដែលរឿងខ្លះអាចត្រូវរង់ចាំឱ្យមានឱកាសល្អៗជាមុនសិនក្នុងការសាងភាពពេញចិត្ត តែក៏នៅមានទិចនិកជាច្រើនទៀតដែលអាចបង្កើនភាពផ្អែមល្ហែមឱ្យក្តីស្នេហាត្រជាក់ពេញបេះដូងបានជារៀងរាល់ថ្ងៃដែរ។

ដូចជាការឱប ថើបគ្នាមុនពេលចេញទៅធ្វើការ រហូតទៅដល់ការប្រើភាសាកាយក្នុងស្ថានការណ៍ផ្សេងៗដូចជា ខ្សែភ្នែកបារម្ភ ចាប់ក្តោបបាតដៃ ទះស្មាថ្នមៗ ឬសូម្បីតែការនែបនិត្យនៅក្នុងរង្វង់ដៃឱបរបស់គូស្នេហ៍ក្នុងពេលអង្គុយមើលទូរទស្សន៍ជាមួយគ្នាក៏ដោយ ទាំងអស់នេះមិនត្រឹមតែផ្តល់នូវអារម្មណ៍រ៉ូមែនទិកប៉ុណ្ណោះទេ តែវានៅផ្តល់នូវភាពកក់ក្តៅក្នុងចិត្តយ៉ាងមិនគួរឱ្យជឿទៀតផង។

ក្រៅពីនេះការរកពេលវេលាក្នុងការចម្អិនម្ហូបអាហារថ្មីៗ ឬនំឆ្ងាញ់ៗទុកស៊ើផ្រៃគូស្នេហ៍ពេលត្រឡប់មកដល់ផ្ទះវិញក៏ជាការបង្ហាញនូវភាពស្និទ្ធស្នាល និងយកចិត្តទុកដាក់ចំពោះគ្នាមួយដែរ។ រួមទាំងការនិយាយសរសើរគូស្នេហ៍នៅក្នុងឱកាសផ្សេងៗ ដូចជា គេ/នាងតែងខ្លួនបានស្អាត ឬសង្ហាជាពិសេស ឬការសម្តែងក្តីសោមនស្សរីករាយចំពោះជោគជ័យក្នុងតួនាទីការងាររបស់គូស្នេហ៍ជាដើម។ ការសម្តែងភាពស្មោះស្ម័គ្រដោយពាក្យសម្តីបែបវិជ្ជមាននេះ គឺជាអ្វីមួយគួរឱ្យស្រឡាញ់ និងថែមជាការផ្តល់នូវកម្លាំងចិត្ត និងជួយសាងនូវភាពជឿជាក់ដល់គូស្នេហ៍បានកាន់តែខ្លាំងឡើងផងដែរ។

ហើយនិងការមានពេលវេលាសម្រាប់និយាយចែករំលែកទុក្ខ – សុខក្នុងមួយថ្ងៃៗរួមគ្នា ទាំងរឿងដែលគួរឱ្យចាប់អារម្មណ៍ឬជជែកពិភក្សាគ្នាពីបញ្ហាដែលម្នាក់ៗជួបប្រទះមក ជួយគ្នាគិតបន្ធូរបន្ថយសម្រាលឧបសគ្គទាំងនោះឱ្យវារំលងផុតទៅនៅលើគ្រឹះនៃការមានហេតុផល និងស្មោះស្ម័គ្រ។ មនុស្សជាច្រើននិយាយថា នេះគឺជាការជួយបន្ថែមកម្លាំងចិត្តដ៏ល្អ និងដឹងពីភាពយកចិត្តទុកដាក់ទៀតផង។

អ្វីដែលសំខាន់ គឺកុំភ្លេចខ្លួនបណ្តោយឱ្យបណ្តាញប្រព័ន្ធសង្គមអនឡាញ ឬសូស្យៀល ណេតវើក ចូលមកមានតួនាទីក្នុងជីវិតប្រចាំថ្ងៃច្រើនជ្រុលពេករហូតដល់ខ្វះការប្រើពេលវេលានៅជុំគ្នាជាមួយគូស្នេហ៍ឱ្យសោះ ព្រោះវាអាចនឹងធ្វើឱ្យកើតភាពឆ្ងាយពីគ្នា និងកើតមានចន្លោះរវាងសម្ព័ន្ធភាពឡើងបាន។

ក្តីស្នេហ៍ដែលរឹងមាំ ផ្អែមល្ហែម សូមកុំភ្លេចការយកចិត្តទុកដាក់ចំពោះគ្នាទៅវិញទៅមក ព្រោះវាជាកូនសោសំខាន់ក្នុងការធ្វើឱ្យក្តីស្នេហាមើលទៅនៅតែថ្មី និងរំភើបញាប់ញ័រជាប់ជានិច្ច៕

January 12, 2018

អត្ថប្រយោជន៍នៃការប្រើសេវាកម្មក្រុមហ៊ុនអចលនទ្រព្យស្របច្បាប់

ស្របពេលដែលវិស័យអចលនទ្រព្យមានការរីកចម្រើនខ្លាំងនៅលើទីផ្សារក្នុងប្រទេសកម្ពុជា គេសង្កេតឃើញថាសកម្មភាពទិញ-លក់ ជួលដី-ផ្ទះ ខុនដូ អគារការិយាល័យមានការរីកដុះដាលយ៉ាងខ្លាំងនៅរយៈពេលប៉ុន្មានឆ្នាំចុងក្រោយនេះ។ មានចម្ងល់ជាច្រើនជុំវិញការរកស៊ីទិញ-លក់ ជូលអចលនទ្រព្យនេះដែលតែងតែលើកឡើងថា តើយើងគួរដាក់ស្លាកលក់ ឬជួលអចលនទ្រព្យរបស់យើងដោយខ្លួនឯង ឬព្រមអនុញ្ញាតឱ្យក្រុមហ៊ុនអចលនទ្រព្យស្របច្បាប់ដាក់លក់ ឬជួលអចលនទ្រព្យរបស់យើង? ព្រោះបើយើងប្រើសេវាក្រុមហ៊ុនអចលនទ្រព្យ យើងនឹងត្រូវចំណាយប្រាក់បង់ថ្លៃសេវានៃការលក់3% ឬសេវាលើការជួល1ខែជាដើម ដូច្នេះតើអត្ថប្រយោជន៍អ្វីខ្លះដែលយើងនឹងទទួលបានពីការប្រើសេវារបស់ក្រុមហ៊ុនអចលនទ្រព្យស្របច្បាប់ទាំងនោះ?

លោក ម៉ាន់ ចាន់ឌី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA) និងជាអគ្គនាយកក្រុមហ៊ុន Premium Housing មានប្រសាសន៍ថា ការប្រើភ្នាក់ងារអចលនទ្រព្យដែលមានអាជ្ញាប័ណ្ណត្រឹមត្រូវពីក្រសួងពាណិជ្ជកម្ម និងក្រសួងសេដ្ឋកិច្ចឱ្យជួយលក់ ឬជួលដី-ផ្ទះ អគារខុនដូ ក៏ដូចជាអគារការិយាល័យជាដើមនោះ ម្ចាស់អចលនទ្រព្យនឹងទទួលបានអត្ថប្រយោជន៍ 2យ៉ាង ក្នុងនោះរួមមាន ៖

ភ្នាក់ងារអចលនទ្រព្យទទួលបានការបណ្តុះបណ្តាលសមត្ថភាពផ្សេងៗជាច្រើន មុននឹងទទួលបានអាជ្ញាប័ណ្ណពីក្រសួងដើម្បីប្រកបការងារជាភ្នាក់ងារលក់អចលនទ្រព្យដែលមានជំនាញមួយច្បាស់លាស់ ហើយភ្នាក់ងារអចលនទ្រព្យមានបណ្តាញទំនាក់ទំនងការងារច្រើនរវាងភ្នាក់ងារនឹងភ្នាក់ងារ រវាងក្រុមហ៊ុននឹងក្រុមហ៊ុន មានអតិថិជននៅក្នុងដៃស្រាប់។ នៅពេលមានព័ត៌មានលក់អចលនទ្រព្យណាមួយ គាត់អាចចែករំលែកព័ត៌មាននោះទៅបណ្តាញរបស់គាត់ ដោយធ្វើការចែករំលែកនូវកម្រៃជើងសារជាមួយគ្នា ពេលនោះនឹងធ្វើឱ្យការលក់ ឬជួលអចលនទ្រព្យនីមួយៗនោះផ្សព្វផ្សាយបានទូលំទូលាយ និងលក់ ឬជួលឆាប់ដាច់ ។

ទី2. ឆ្លងកាត់បទពិសោធច្រើនឆ្នាំ ភ្នាក់ងារអចលនទ្រព្យមានទេពកោសល្យក្នុងការចរចារពន្យល់ពីហេតុផល និងអត្ថប្រយោជន៍ផ្សេងៗដើម្បីឱ្យអ្នកលក់ជឿទុកចិត្ត តែប្រសិនបើម្ចាស់អចលនទ្រព្យដាក់ស្លាកលក់ ឬជួលដី-ផ្ទះដោយខ្លួនឯងនោះ វានឹងបង្កការរំខានច្រើនចំពោះខ្លួនឯងតាមរយៈការទូរស័ព្ទសាកសួរព័ត៌មានផ្សេងៗពីអតិថិជនដែលពេលខ្លះបានត្រឹមតែសួរចោលតែប៉ុណ្ណោះ។

ចំណែកលោក ខាត់ សុវណ្ណ សមាជិកក្រុមប្រឹក្សាភិបាលសមាគមCVEA និងជានាយកក្រុមហ៊ុន Camtop Property Group ក៏បានលើកឡើងដែរថា នៅមានហេតុផលមួយចំនួនទៀតដែលម្ចាស់ផ្ទះ ឬម្ចាស់គម្រោងផ្សេងៗត្រូវប្រើភ្នាក់ងារលក់ ដូចជាទី1. ពួកគាត់មានជំនាញច្បាស់លាស់ក្នុងការវាយតម្លៃដី-ផ្ទះ ក៏ដូចជាអគារសម្រាប់លក់ចេញ ឬជួលបន្តទៅឱ្យអតិថិជន តើគួរលក់ ឬជួលក្នុងតម្លៃប៉ុន្មានដើម្បីឱ្យស្របនឹងទីផ្សារ។ ជួនកាលការលក់ថ្លៃលើសតម្លៃទីផ្សារខ្លាំងពេកក៏លក់មិនដាច់ ឬបើលក់ទាបពេកនាំឱ្យខាតប្រយោជន៍ម្ចាស់អចលនទ្រព្យ ឬគម្រោងនោះ។ ហេតុផលមួយទៀតគឺ មុននឹងនាំអតិថិជនទៅពិនិត្យមើលផ្ទះ ឬគម្រោងផ្សេងៗនោះ ភ្នាក់ងារលក់បានពិនិត្យមើលលក្ខខណ្ឌច្រើនចំណុចទៅលើអ្នកទិញ បើពិនិត្យឃើញថា គាត់ចង់ទិញ ឬជួលពិតប្រាកដទើបគេនាំទៅ ប៉ុន្តែសម្រាប់ម្ចាស់ផ្ទះជួនកាលមិនបានដឹងទេ គ្រាន់តែគេមកពិនិត្យមើលផ្ទះក៏អនុញ្ញាតឱ្យចូល ជួនកាលមានហានិភ័យកើតឡើងដោយមិនដឹងខ្លួន ដូចជាករណីចាប់ជំរិត ឬប្លន់ផ្សេងៗកើតឡើងក៏អាចថាបានដែរ។

លោកថា ភាពទទួលខុសត្រូវគឺជារឿងសំខាន់ ដូច្នេះនៅពេលដែលម្ចាស់ដី ឬម្ចាស់ផ្ទះប្រើភ្នាក់ងារអចលនទ្រព្យដែលមានច្បាប់អនុញ្ញាតត្រឹមត្រូវ នឹងធ្វើឱ្យការលក់ប្រកបដោយតម្លាភាព មានការទទួលខុសត្រូវទៅតាមផ្លូវច្បាប់។

លោកស្រី Grace Rachny Fong អនុប្រធានសមាគម CVEA និងជានាយិកាក្រុមហ៊ុន Century21 Cambodia បានលើកឡើងផងដែរថា ឆ្លងតាមបទពិសោធជាច្រើនឆ្នាំកន្លងមកមិនថាតែប្រទេសកម្ពុជានោះទេ សូម្បីនៅលើទីផ្សារអចលនទ្រព្យក្រៅប្រទេសដែលរួមមានដូចជា ជប៉ុន និងអាមេរិកជាដើមនោះ ម្ចាស់អចលនទ្រព្យតែងលក់គម្រោង លក់ផ្ទះ ឬដីធ្លីដោយខ្លួនឯង ដោយសារពួកគាត់គិតថា មិនចង់ខាតបង់លើកម្រៃជើងសារ។ ជួនកាលពួកគាត់មានបទពិសោធធ្លាប់ជួបភ្នាក់ងារអចលនទ្រព្យដែលមិនល្អ ហើយពេលខ្លះគាត់មិនចង់ឱ្យមានភាគីទី3ចូលមកជ្រៀតជ្រែកដឹងឮក្នុងការរកស៊ីរបស់ពួកគាត់នាំមានភាពរំខានជាដើម។ គាត់អាចគិតថា ខ្លួនគាត់ក៏មានសមត្ថភាពអាចទំនាក់ទំនងអតិថិជនបានច្រើនដោយខ្លួនឯងបានដែរ។ ប៉ុន្តែយ៉ាងណានោះលោកស្រីលើកឡើងថា មានអត្ថប្រយោជន៍ 7 ចំណុចដែលម្ចាស់អចលនទ្រព្យគួរតែប្រើភ្នាក់ងារអចលនទ្រព្យគឺ ទី1. ភ្នាក់ងារអចលនទ្រព្យមានជំនាញក្នុងការពិគ្រោះ និងផ្តល់ការប្រឹក្សាយោបល់ផ្សេងៗឱ្យបានដឹងច្បាស់ទៅលើតម្លៃលក់នៅលើទីផ្សារដើម្បីឱ្យលក់ឆាប់ដាច់ និងតើគួរលក់ក្នុងតម្លៃទីផ្សារ ឬក្រោមតម្លៃទីផ្សារ។ ទី2. ជួនកាលម្ចាស់ផ្ទះមិនដឹងថាគួររៀបចំផ្ទះដោយរបៀបណានោះទេដើម្បីឱ្យមានការចាប់អារម្មណ៍ពីអ្នកទិញ ដូច្នេះភ្នាក់ងារលក់អាចមានសមត្ថភាព ឬអាចផ្តល់ជាយោបល់ក្នុងការរៀបចំតុបតែងផ្ទះឱ្យមានភាពទាក់ទាញពីអ្នកទិញដើម្បីលក់ឱ្យឆាប់ដាច់។ ទី3. ម្ចាស់ផ្ទះអាចមានពេលវេលាទៅធ្វើការរកស៊ីមុខរបរផ្សេងៗទៀតប្រសើរជាជាងខាតពេល និងជួបការរំខានពីការសាកសួរព័ត៌មានតាមទូរស័ព្ទ។

ទី4. ការទិញ-លក់អចលនទ្រព្យប្រមាណ99% ដែលត្រូវការកម្ចីពីធនាគារ ដូច្នេះភ្នាក់ងារអចលនទ្រព្យមានទំនាក់ទំនងដៃគូល្អជាមួយខាងធនាគារដើម្បីចាំជួយសម្រួលការទិញ-លក់ឱ្យដំណើរការបានលឿន។ ទី5. ភ្នាក់ងារអចលនទ្រព្យសុទ្ធតែមានមេធាវីចាំជួយលើការប្រឹក្សាតាមផ្លូវច្បាប់ដើម្បីធ្វើការដោះស្រាយនៅពេលការទិញ-លក់មានភាពមិនប្រក្រតីណាមួយកើតឡើង។ ទី6. មុននឹងនាំអតិថិជនទៅទិញ ភ្នាក់ងារបានធ្វើការសិក្សាច្បាស់លាស់ជាមុន បើសិនជាមានប្លង់ត្រឹមត្រូវ មិនជាប់ពាក់ព័ន្ធរឿងក្តីក្តាំផ្សេងៗទើបនាំអតិថិជនឱ្យទៅទិញ។ ទី7. ភ្នាក់ងារអចលនទ្រព្យរង់ចាំសម្របសម្រួលតាមផ្លូវច្បាប់ជានិច្ច រហូតដល់ដំណើរការទិញ-លក់បានចប់សព្វគ្រប់ ហើយនៅបន្តមានទំនាក់ទំនងល្អសម្រាប់ការងារក្រោយៗទៀត។

ចំណែកលោក ស៊ារ ឆៃលីន សមាជិកក្រុមប្រឹក្សាភិបាលសមាគម CVEA និងជាអគ្គនាយកក្រុមហ៊ុនស៊ីអិល រៀលធី ក៏មានប្រសាសន៍ដែរថា ក្នុងនាមម្ចាស់គម្រោងមិនគួរចំណាយពេលចាំទទួលទូរស័ព្ទសាកសួរព័ត៌មានពីអតិថិជននោះទេ ពួកគាត់គួរចំណាយពេលដើររកគម្រោងផ្សេងៗសម្រាប់ទិញ-លក់បន្តដែលទទួលបានអត្ថប្រយោជន៍ច្រើនជាងការមកអង្គុយលក់គម្រោងដោយខ្លួនឯង៕

January 12, 2018

Neymar រកបានគ្រាប់បាល់ ខណៈ PSG ឈានទៅវគ្គ1/2 នៃ League Cup

Neymar បានស៊ុតបាល់ប៉េណាល់ទី1គ្រាប់ក្នុងតង់ទី2 ខណៈដែលក្រុមម្ចាស់ការពារតំណែងជើងឯក4សម័យកាល Paris Saint-Germain បានជួបភាពស្វិតស្វាញ នៅមុនពេលយកឈ្នះលើក្រុម Amiens ដែលនៅសល់សមាជិកត្រឹមតែ10នាក់ក្នុងលទ្ធផល 2-០ ដើម្បីឈានទៅវគ្គពាក់កណ្តាលផ្តាច់ព្រ័ត្រនៃពាន League Cup របស់បារាំង កាលពីថ្ងៃពុធ។

PSG បានលេងដោយគ្មានខ្សែប្រយុទ្ធរកបានគ្រាប់បាល់ឈានមុខ Edinson Cavani ម្តងទៀត ខណៈដែលរូបគេក៏មានវត្តមានក្នុងពេលក្រុមខ្លួនបានយកឈ្នះលើក្រុម Rennes ក្នុងពាន French Cup ផងដែរ ក្រោយវិលពីការសម្រាកវិស្សមកាលនៃបុណ្យណូអែល និងថ្ងៃចូលឆ្នាំថ្មីក្នុងប្រទេសអ៊ុយរូហ្គាយ។ ក្តីសង្ឃឹមរបស់ក្រុម Amiens ដែលថានឹងបង្កើតលទ្ធផលដ៏គួរឲ្យភ្ញាក់ផ្អើលនោះត្រូវបានបញ្ចប់ ដោយសារតែការពិន័យកាតក្រហមទៅលើអ្នកចាំទី Regis Gurtner នៅនាទីទី34 សម្រាប់ការប្រព្រឹត្តកំហុសទៅលើខ្សែប្រយុទ្ធ Kylian Mbappe ក្រោយពីបានរត់ចេញពីប្រអប់នៃទីតាំងរបស់គេ។

ក្រោយមក Neymar ក៏បានផ្តល់ការមានប្រៀបដល់ក្រុមភ្ញៀវ តាមរយៈការស៊ុតបាល់បញ្ចូលទីយ៉ាងល្អពីចំណុចពិន័យ11ម៉ែត្រ នៅដើមតង់ទី2 នាកីឡដ្ឋាន Stade de la Licorne។ Adrien Rabiot បានបំពេញជ័យជម្នះដល់ក្រុមខ្លួននៅនាទីទី78 ក្រោយពីទទួលបាល់ពីការបញ្ជូនរបស់ Angel Di Maria។

Monaco បានក្លាយជាក្រុមដំបូងគេក្នុងការឈានទៅវគ្គ4ក្រុមចុងក្រោយនៃយុទ្ធនាការនេះ កាលពីថ្ងៃអង្គារ ខណៈដែលគ្រាប់បាល់ស៊ុតបញ្ចូលទីពីសំណាក់កីឡាករ Thomas Lemar និង Adama Diakhaby បានជួយឲ្យក្រុមរបស់លោក Leonardo Jardim យកឈ្នះលើក្រុម Nice ក្នុងលទ្ធផល 2-1 នាកីឡដ្ឋាន Allianz Riviera៕

ប្រភពពី៖ Sport24

January 11, 2018

ចង់សម្រេចក្តីសុបិន ត្រូវស្គាល់ខ្លួនឯងឱ្យច្បាស់ជាមុនសិន

មនុស្សមួយចំនួនបាន និងកំពុងតែចាប់ផ្តើមមើលឃើញឱកាសកាន់តែទូលំទូលាយក្នុងការអភិវឌ្ឍសមត្ថភាពដើម្បីសម្រេចឱ្យបាននូវផែនការជីវិតរបស់ពួកគេ ខណៈដែលមានមនុស្សមួយចំនួនទៀតបែរជាបណ្តោយខ្លួនឱ្យស្ថិតក្នុងភាពស្រពេចស្រពិល ហើយក៏មិនបានត្រៀមរៀបចំផែនការជីវិតអ្វីទាល់តែសោះ។

ពាក់ព័ន្ធនឹងបញ្ហានេះ កញ្ញានាង សុវាតនា ដែលយុវវ័យជាច្រើនស្គាល់ថាជា DJ Nana បានលើកឡើងថា បើនិយាយពីចំនួនយុវវ័យដែលបានរៀបចំគោលដៅជីវិតរួចរាល់នោះ កញ្ញាមិនមានទិន្នន័យតាមរយៈការស្រាវជ្រាវណាមួយទេ តែបើសង្កេតតាមរយៈការជជែក និងប្រឹក្សាយោបល់ជាមួយយុវជនជាច្រើនដែលជាអ្នកគាំទ្ររូបខ្លួនវិញនោះកញ្ញាអាចសន្និដ្ឋានបានថា មានយុវជនតិចជាង 50ភាគរយបានរៀបចំផែនការជីវិត។

កត្តាដែលធ្វើឱ្យយុវជនកម្ពុជាជាច្រើនមិនទាន់បានរៀបចំផែនការជីវិតនោះ គឺថា ពួកគាត់ភាគច្រើនរស់នៅក្នុងគ្រួសារដែលមានឪពុកម្តាយធ្លាប់ឆ្លងកាត់សម័យសង្គ្រាម មិនសូវមានចំណេះដឹងក្នុងការអប់រំណែនាំ និងតម្រង់ទិសកូន ចំណែកឯមួយចំនួនទៀតគឺរស់នៅក្នុងគ្រួសារដែលមានជីវភាពក្រីក្រ ហើយមួយចំនួនទៀតអាណាព្យាបាលស្រឡាញ់កូនជ្រុលពេក ផ្តល់អ្វីៗគ្រប់យ៉ាងដែលកូនចង់បាន ចង់ឱ្យកូនរស់នៅក្នុងភាពសុខស្រួល តែបែរជាមិន-បានផ្តល់សិទ្ធិសម្រេចចិត្តគ្រប់គ្រាន់ដល់កូនតាំងពីតូចមកទេ។

កញ្ញានាង សុវាតនា បាននិយាយថា៖ “សិទ្ធិសម្រេចចិត្តនេះជារឿងសំខាន់ណាស់សម្រាប់កុមារ ព្រោះថា នៅកម្ពុជាក្មេងជាច្រើនត្រូវបានកម្រិតសិទ្ធិដោយឪពុកម្តាយ។ ម៉ែឪមិនដែលសួរថា កូនចង់ស្លៀកពាក់បែបណា ឬចង់ធ្វើអ្វីនោះទេ ភាគច្រើនគឺឪពុកម្តាយតែងតែទិញឱ្យគ្រប់យ៉ាងពេលនៅវ័យក្មេង ហេតុនេះទម្លាប់នៃការមិនបានសម្រេចចិត្តនេះអាចរុញច្រានឱ្យគាត់មិនសូវហ៊ានសម្រេចចិត្តក្នុងផែនការជីវិតនៅពេលអនាគត។

កញ្ញានាង សុវាតនា បានលើកឡើងផងដែរថា តាមរយៈការរកឃើញរបស់គ្រូពេទ្យបានឱ្យដឹងថា កុមារចាប់ផ្តើមកសាងអត្តចរិតនៅវ័យ1ឆ្នាំ ដល់5ឆ្នាំ ដែលឪពុកម្តាយជាច្រើនមិនសូវបានដឹងរឿងហ្នឹងទេ ហេតុនេះនៅពេលដែលកូនតូចៗចាប់ផ្តើមធំធាត់ឡើង គឺស្ថិតនៅក្នុងវ័យដែលឪពុកម្តាយរៀបចំឱ្យគាត់គ្រប់យ៉ាងដែលធ្វើឱ្យគាត់ចងចាំ និងទទួលយកស្ថានភាពបែបនេះរហូតដល់យុវវ័យ។

កត្តាមួយផ្សេងទៀតដែលធ្វើឱ្យយុវវ័យមួយចំនួនមិនបានបង្កើតគោលដៅជីវិតឱ្យបានល្អ គឺអាចបណ្តាលមកពីពួកគេជាសិស្សរៀនតែក្នុងសាលាច្រើនពេក ហើយពួកគេមិនបានស្វែងយល់ពីពិភពខាងក្រៅឱ្យបានច្រើន ខណៈប្រព័ន្ធអប់រំនៅក្នុងសាលាអាចនៅមានកម្រិតលើផ្នែកខ្លះនោះ។ ជាដំណោះស្រាយ ពិធីការិនីដ៏មានប្រជាប្រិយភាពខាងលើបានលើកឡើងថា យុវជនកម្ពុជាគួរតែចេះស្វែងរកពិភពពិតនៃការរស់នៅឱ្យបានច្រើននៅពេលដែលពួកគេកំពុងសិក្សានៅថ្នាក់វិទ្យាល័យ ព្រោះសម័យនេះគាត់ចេះប្រើភាសាអង់គ្លេស គាត់ចេះប្រើបច្ចេកវិទ្យា ហេតុនេះគាត់អាចមានភាពងាយស្រួលក្នុងការចេញទៅក្រៅប្រទេស ឬការស្រាវជ្រាវនានាដែលមានប្រយោជន៍សម្រាប់ជីវិត។

កត្តាទាំងអស់នេះហើយទើបនាពេលបច្ចុប្បន្នគេលើកទឹកចិត្តឱ្យឪពុកម្តាយនាំកូនតូចៗទៅលេងនៅបរទេសឱ្យបានច្រើនដើម្បីឱ្យកូនរបស់គាត់បានឃើញពិភពខាងក្រៅដែលអាចធ្វើឱ្យពួកគេមានគំនិតទូលំទូលាយឡើង។ ទន្ទឹមនឹងនេះដែរអាណាព្យាបាលក៏គួរតែផ្តល់ឱកាសឱ្យកុមារតូចៗធ្វើការសម្រេចចិត្តដោយខ្លួនឯងឱ្យបានច្រើនដើម្បីបណ្តុះគំនិតរបស់ពួកគេឱ្យមានការទទួលខុសត្រូវ និងមានសេចក្តីក្លាហានគ្រប់គ្រាន់សម្រាប់សម្រេចចិត្តលើការគ្រប់គ្រងដំណើរជីវិតរបស់ខ្លួនឆ្ពោះទៅសម្រេចគោលដៅប្រកបដោយប្រសិទ្ធភាព។

បង្ហាញលើចំណុចនេះដែរ លោកជី សិលា នាយកក្រុមហ៊ុន Sabay Digital Corporation បានលើកឡើងថា តាមពិតទៅមនុស្សណាក៏មានគោលដៅដែរ ហើយមនុស្សណាក៏មានសុបិនដែរ គ្រាន់តែមនុស្សខ្លះសម្រេចបាន ហើយមនុស្សមួយចំនួនទៀតមិនអាចសម្រេចបានតែប៉ុណ្ណោះ ហេតុនេះអ្វីដែលត្រូវគិតជាសំខាន់គឺ វិធីសាស្ត្រក្នុងការសម្រេចក្តីសុបិននោះ។ លោកជី សិលា បានលើកឡើងថា ៖ “តាមពិតទៅការសម្រេចក្តីសុបិនគឺជារឿងសាមញ្ញបំផុត ព្រោះវាមិនខុសអ្វីពីការរៀនឡើយ។ មុខវិជ្ជាដែលយើងរៀននៅក្នុងសាលាគឺហាក់បីដូចជាសុបិនដែលមិនមានរូបភាពពិតនោះទេ ហេតុនេះអ្វីដែលសំខាន់គឺយើងត្រូវចេះអនុវត្តជាក់ស្តែងទើបធ្វើឱ្យសុបិននោះក្លាយជាការពិត។

លោកជី សិលា បានបន្ថែមទៀតថា ការអនុវត្តនៅក្នុងសង្គមជាក់ស្តែងគឺជារឿងសំខាន់មួយដែលយុវជនត្រូវដឹង ហើយពួកគេចាំបាច់ត្រូវស្គាល់ខ្លួនឯងឱ្យបានច្បាស់ជាមុនសិនទើបអាចធ្វើឱ្យសុបិនរបស់ខ្លួនអាចសម្រេចបានដោយរលូន។ នាពេលបច្ចុប្បន្ននេះ មានរឿងមួយចំនួនដែលធ្វើឱ្យយុវជនបង្កើតក្តីស្រមៃច្រើនតែពួកគេមិនអាចសម្រេចបាន ដោយសារគាត់ចេះតែស្រមៃ ហើយក្តីស្រមៃរបស់គាត់មិនមានចំណុចចាប់ផ្តើមត្រឹមត្រូវ។ គាត់ច្រើនមើលឃើញតាមរយៈអីុនធើណិត ឬតាមរយៈការមើលឃើញជាក់ស្តែងចំពោះបុគ្គលដែលកំពុងមានសក្តានុពលក្នុងសង្គមហើយក៏ចង់ធ្វើដូចគេ តែគាត់មិនបានគិតនៅឡើយទេថា ស្ថានភាពនៃការចាប់ផ្តើមរបស់បុគ្គលទាំងអស់នោះខុសពីគាត់អ្វីខ្លះ។ គាត់ត្រូវតែដឹងឱ្យច្បាស់ថាខ្លួនគាត់មានភាពខ្លាំង និងភាពខ្សោយអ្វីខ្លះខុសពីអ្នកដែលគាត់ចង់ធ្វើតាម ហើយគាត់ស្ថិតក្នុងស្ថានភាព និងជីវភាពបែបណា?។

នៅមានរឿងរ៉ាវជាច្រើនទៀត ដូច្នេះដើម្បីស្វែងយល់កាន់តែច្បាស់ពីការសម្រេចក្តីសុបិនបានដោយជោគជ័យ អ្នកអាចមកចូលរួមស្តាប់វាគ្មិនល្បីៗដែលនឹងមកបង្ហើបប្រាប់ពីគន្លឹះ និងចែករំលែកបទពិសោធផ្សេងៗក្នុងការធ្វើយ៉ាងណាកុំឱ្យយើងមើលឃើញតែពីគេច្រើនពេក ដោយគួរងាកត្រឡប់មកចាប់ផ្តើមបង្កើតក្តីស្រមៃផ្អែកលើភាពខ្លាំងរបស់យើងផ្ទាល់វិញ គឺចាប់ផ្តើមអភិវឌ្ឍក្នុងរូបភាពពិត ធ្វើការងារពិត និងពឹងផ្អែកលើស្ថានភាពពិតប្រាកដរបស់យើងដើម្បីបន្តដំណើរពីមួយជំហានទៅមួយជំហាន ដែលកម្មវិធីនេះធ្វើឡើងនៅថ្ងែទី13 ខែមករា ឆ្នាំ2018 នៅវិទ្យាស្ថានតិចណូកម្ពុជា ក្រោមប្រធានបទ “សុបិនខ្ញុំមិនមែនសុបិនអ្នក” ចាប់ពីម៉ោង8ព្រឹក ដល់ម៉ោង5ល្ងាច។ សូមចូលរួមកុំបីខាន៕

January 11, 2018

លោក Wenger បញ្ជាក់ថា Coquelin នឹងចូលរួមជាមួយ Valencia

លោក Arsene Wenger បានប្រកាសថា ខ្សែការពារ Francis Coquelin របស់ក្លិប Arsenal នឹងត្រូវចូលរួមជាមួយនឹងក្លិប Valencia របស់អេស្ប៉ាញ ខណៈដែលការផ្ទេរនេះអាចនឹងមានតម្លៃខ្លួន12លានផោន (ស្មើនឹង16លានដុល្លារអាមេរិក)។

Coquelin ត្រូវបានទាក់ទងឲ្យផ្ទេរទៅកាន់ក្លិបដែលលេងក្នុងក្របខ័ណ្ឌ La Liga មួយនេះ មុនពេលទីផ្សារដោះដូរកីឡាករនឹងបើកនៅខែមករានេះ ក្រោយពីបានបង្ហាញខ្លួនក្នុងការប្រកួតក្របខ័ណ្ឌ Premier League តែមួយលើកគត់ជាមួយក្រុម Arsenal នៅរដូវកាលនេះ។

ខ្សែបម្រើសញ្ជាតិបារាំងវ័យ26ឆ្នាំរូបនេះត្រូវបានគេឱ្យដឹងថា ក៏កំពុងស្ថិតក្នុងរ៉ាដារបស់ក្លិប West Ham និង Crystal Palace ផងដែរ ក្រោយពីការវិលត្រឡប់ទៅរកទម្រង់លេងដ៏ល្អវិញ តែ Jack Wilshere និងក្រុម Arsenal បានរារាំងឱកាសរបស់ Coquelin តែម្តង។ ក្រោយពីត្រូវបានលុបឈ្មោះចេញពីក្រុម Arsenal សម្រាប់ការប្រកួតពាន League Cup វគ្គពាក់កណ្តាលផ្តាច់ព្រ័ត្រជើងទី1 កាលពីថ្ងៃពុធជាមួយនឹងក្រុម Chelsea លោក Wenger បានបញ្ជាក់ថា នឹងផ្ទេរ Coquelin ទៅកាន់ប្រទេសអេស្ប៉ាញ។
ក្រោយពីបានបញ្ចប់ក្នុងលទ្ធផលស្មើ ០-០ ជាមួយនឹងក្រុម Chelsea លោក Wenger បានប្រាប់អ្នកយកព័ត៌មានថា៖ « Coquelin នឹងផ្ទេរទៅកាន់ក្លិប Valencia។ រូបគេមិនបានប្រកួតគ្រប់គ្រាន់សម្រាប់យើងនៅរដូវកាលនេះឡើយ។ គេមានឱកាសមួយ ហើយខ្ញុំអនុញ្ញាតឲ្យរូបគេចាកចេញ»។ ខ្សែការពារអន្តរជាតិបារាំងរូបនេះធ្លាប់បានជួបភាពរីករាយជាមួយនឹងការបង្ហាញខ្លួនជាញឹកញាប់ក្រោមការដឹកនាំរបស់លោក Arsene Wenger ក្រោយពីការវិលត្រឡប់របស់គេពីការខ្ចីជើងនៅឯក្លិប Charlton Athletic កាលពីខែកញ្ញា ឆ្នាំ2014 ជាពិសេសនៅពេលដែលរូបគេបានចាប់ដៃគូជាវិជ្ជមានជាមួយនឹងខ្សែបម្រើប្រយុទ្ធ Santi Cazorla។

Valencia កំពុងតែស្ថិតក្នុងចំណាត់ថ្នាក់លេខ3នៅលើតារាងក្របខ័ណ្ឌ La Liga ហើយពួកគេបានធ្វើការពិចារណាយ៉ាងប្រុងប្រយ័ត្នមុននឹងព្យាយាមតាមប្រមាញ់ទិញ Coquelin ពីអង់គ្លេស៕

ប្រភពពី៖ worldsoccertalk

January 11, 2018

មេធំ Samsung បញ្ជាក់ថា Galaxy S9 នឹងបង្ហាញខ្លួនក្នុងព្រឹត្តិការណ៍ MWC

អាមេរិក៖ មានប្រភពព័ត៌មានចចាមអារ៉ាមជាច្រើនបានចេញផ្សាយថា ក្រុមហ៊ុន Samsung នឹងប្រកាសបង្ហាញកំពូលស្មាតហ្វូនថ្មីរបស់ខ្លួននៅដើមឆ្នាំ 2018 ដើម្បីវាយលុយទីផ្សារ ប៉ុន្តែនៅពេលនេះ វាមិនមែនជាព័ត៌មានចចាមអារ៉ាមទៀតទេ ព្រោះមេធំ Samsung បានបញ្ជាក់យ៉ាងច្បាស់។

យោងតាមការចេញផ្សាយរបស់គេហទំព័រ Phone Arena បានឱ្យដឹងថា លោក DJ Koh នាយកអាជីវកម្មទូរស័ព្ទចល័តរបស់ក្រុមហ៊ុន Samsung បានបញ្ជាក់ថា Galaxy S9 នឹងបង្ហាញខ្លួននៅក្នុងព្រឹត្តិការណ៍សមាជទូរស័ព្ទពិភពលោក (MWC) ដែលនឹងធ្វើទៅនៅខែកុម្ភៈខាងមុខនេះ។

នៅឆ្នាំនេះ ហាក់ប្លែកពីឆ្នាំមុន ដោយសារតែ Galaxy S8 ត្រូវបានក្រុមហ៊ុន Samsung ប្រកាសបង្ហាញនៅខែមីនា ឆ្នាំ 2017 ហើយចេញលក់នៅខែមេសា ប៉ុន្តែសម្រាប់ឆ្នាំនេះ Samsung ប្រកាសបង្ហាញ Galaxy S9 នៅខែកុម្ភៈ ហើយទំនងជាចេញលក់នៅខែមីនា។

បើសិនជាដូចអ្វីទៅនឹងពាក្យចចាមអារ៉ាម Samsung Galaxy S9 គឺជាស្មាតហ្វូនដំបូងគេបង្អស់ដែលមានមេម៉ូរ៉ីក្នុងម៉ាស៊ីនរហូតដល់ 512GB ៕

January 11, 2018

តើការជួលផ្ទះគេនៅ និងការទិញផ្ទះបង់រំលស់មួយណាចំណេញជាង?

បច្ចុប្បន្ននិន្នាការនៃការទិញផ្ទះបង់រំលស់សម្រាប់រស់នៅកំពុងមានភាពផុសផុលយ៉ាងខ្លាំង ខណៈដែលក្រុមហ៊ុនសំណង់ផ្ទះល្វែងជាច្រើនបានសហការជាមួយធនាគារផ្តល់លទ្ធភាពឱ្យពលរដ្ឋអាចទិញផ្ទះបង់រំលស់បានយូរឆ្នាំ ទន្ទឹមគ្នានេះដែរក៏មានប្រជាពលរដ្ឋជាច្រើនទៀតនៅតែជ្រើសយកការជួលផ្ទះគេស្នាក់នៅ ដោយគិតថាមិនចង់ជាប់ជំពាក់បំណុលធនាគារ។ ដូច្នេះទើបគេសួរថា តើការទិញផ្ទះបង់រំលស់ និងការជួលផ្ទះគេនៅ មួយណាចំណេញជាង?

លោកស្រី ឃិត សុភ័ក្ត្រ ដែលសព្វថ្ងៃជាប្រជាពលរដ្ឋរស់នៅក្នុងតំបន់ភ្នំពេញថ្មីស្នាក់នៅផ្ទះជួលមួយកន្លែងបាននិយាយថា រាល់ថ្ងៃលោកស្រីបានជួលផ្ទះគេនៅដែលមានតម្លៃ 200ដុល្លារ ក្នុងមួយខែ។ លោកស្រីមិនមានលទ្ធភាពក្នុងការទិញផ្ទះនៅខ្លួនឯងនោះទេ បើទោះជាត្រូវទិញ ដោយការបង់រំលស់ក៏តម្រូវឱ្យមានប្រាក់ផ្ទាល់ខ្លួនយ៉ាងហោចណាស់30%ដើម្បីបង់ដំណាក់កាលដំបូងដែរ ហើយលក្ខខណ្ឌនៃការខ្ចីប្រាក់ពីធនាគារមានភាពសាំញ៉ាំច្រើន ប្រសិនបើជ្រើសរើសបង់រំលស់ជាមួយម្ចាស់បុរីវិញ យើងពិបាកក្នុងការជ្រើសរើសទីតាំងផ្ទះដែលយើងចង់ទិញ ព្រោះថា ម្ចាស់បុរីខ្លះមិនទទួលយកការបង់រំលស់នេះទេ មានម្ចាស់បុរីតិចតួចទេ ដែលទទួលឱ្យបង់រំលស់ តែការប្រាក់ថ្លៃចន្លោះពី12%-15%ក្នុងមួយឆ្នាំ ហើយការបង់មានរយៈពេលខ្លី ដូច្នេះប្រសិនបើប្រៀបធៀបជាមួយការជួលផ្ទះគេនៅគឺ ត្រូវចំណាយខ្ពស់ជាងថ្លៃ ឈ្នួល 2-3ដងឯណោះ ហេតុនេះហើយទើបលោកស្រីសម្រេចជួលផ្ទះគេនៅបណ្តោះអាសន្នសិន។

លោកស្រី តាំង ហ៊ួ ប្រធានក្រុមហ៊ុន AMATAK Property Service មានប្រសាសន៍ថា នៅរយៈពេលប៉ុន្មានឆ្នាំចុងក្រោយនេះ ទំនោរនៃការទិញផ្ទះបង់រំលស់មានការកើនឡើងយ៉ាងខ្លាំងគួរឱ្យកត់សម្គាល់ ខណៈដែលម្ចាស់សំណង់បុរី និងអគារផ្ទះល្វែងមួយចំនួនប្រកាសលក់ផ្ទះដោយមិនមានប្រាក់កក់ ឬមានប្រាក់កក់ត្រឹមតែ20%ទៅ30% អាចចូលរស់នៅផ្ទះថ្មីបានដោយបង់រំលស់ជាមួយធនាគារ ដែលមានការប្រាក់ទាបសមរម្យអាចទទួលយកបាន។

លោកស្រីបានបញ្ជាក់ថា សម្រាប់គូស្រករដែលទើបរៀបការរួច ហើយមានការងារធ្វើទាំងពីរនាក់ ពួកគេតែងតែយកប្រាក់ខែខាងណាមួយទៅបង់រំលស់ផ្ទះថ្មី និងទុកប្រាក់ខែម្នាក់ទៀតសម្រាប់ចាយវាយប្រចាំថ្ងៃ ដែលធ្វើឱ្យពួកគេមានការចាយវាយត្បិតត្បៀត ចេះសន្សំសំចៃ និងមិនសូវចាយវាយខ្ជះខ្ជាយដូចកាលពីមុន។ វិធីមួយនេះបានធ្វើឱ្យពួកគេទទួលបានផលចំណេញត្រឡប់មកវិញ ដែលចំណេញ ទី1 គឺទោះជាជួលផ្ទះគេបង់ប្រចាំខែយូរប៉ុនណាក៏នៅតែជាផ្ទះគេ ទី2.បើសិនជាទិញផ្ទះបង់រំលស់ ជួនកាលបើទិញត្រូវតំបន់ ផ្ទះនឹងឡើងថ្លៃលក់បានប្រាក់ចំណេញ ទី3.បើសិនជាគិតថាមិនចង់ជំពាក់គេ ហើយរង់ចាំសន្សំប្រាក់គ្រប់ចាំទិញតែម្តង ដូចជាលំបាកខ្លាំង ដោយសារតម្លៃដីធ្លី ផ្ទះល្វែងឡើងថ្លៃជារៀងរាល់ឆ្នាំ ហើយមិនមានពេលធ្លាក់ថ្លៃនោះទេ។

ទោះយ៉ាងណាលោកស្រី តាំង ហ៊ួ លើកទឹកចិត្តឱ្យប្រជាពលរដ្ឋទិញផ្ទះបង់រំលស់ជាមួយធនាគារ ប្រសើរជាជាងបង់រំលស់ជាមួយម្ចាស់បុរី ឬអគារផ្ទះល្វែង ដោយសារធនាគារអាចផ្តល់ទំនុកចិត្តខ្ពស់ហើយមានអត្រាការប្រាក់ទាបជាងម្ចាស់បុរី ឬក្រុមហ៊ុនផ្ទះល្វែងទាំងនោះ។

ជាមួយគ្នានេះដែរអ្នកនាង Grace Rachny Fong នាយិកាប្រតិបត្តិក្រុមហ៊ុន Century21 Cambodia ដែលជាក្រុមហ៊ុនអចលនទ្រព្យមួយនៅកម្ពុជាមានប្រសាសន៍លើកទឹកចិត្តដល់ប្រជាពលរដ្ឋខ្មែរថា បើសិនទិញផ្ទះបង់រំលស់គួរបង់ជាមួយធនាគារប្រសើរជាងបង់ជាមួយម្ចាស់បុរីផ្ទះល្វែង ដោយសាររយៈពេលកន្លងមកមានភាពអសកម្មមួយចំនួនដោយសារតែម្ចាស់សំណង់ផ្ទះល្វែងខ្លះបានលក់ផ្ទះបង់រំលស់ទៅឱ្យអតិថិជនរួចហើយ តែបែរជាយកប្លង់ទៅដាក់នៅធនាគារយកលុយចាយអស់ធ្វើឱ្យកើតមានរឿងប្តឹងផ្តល់គ្នាទៀតផង។ លើសពីនេះ មុននឹងទិញត្រូវស៊ើបមើលពីប្រវត្តិរបស់បុរី ឬផ្ទះល្វែងនោះឱ្យច្បាស់ទើបមិនមានហានិភ័យ ហើយបើចង់ទិញឱ្យបានប្រាក់ចំណេញត្រឡប់មកវិញ គួរស្វែងរកការប្រឹក្សាជាមួយភ្នាក់ងារអចលនទ្រព្យទើបមិនខកបំណង។

លោក ចូ ហ្វីឡេន (Joe Phelan)នាយកសេវាធនាគារសម្រាប់អតិថិជនបុគ្គលនៃធនាគារ ហុង លីអុង (ខេមបូឌា) ភីអិលស៊ី ក៏បានផ្តល់យោបល់ផងដែរថា ការជួលផ្ទះសម្រាប់នៅពិតជាត្រូវចំណាយច្រើន ហើយមិនងាយស្រួលដូចនៅផ្ទះផ្ទាល់ខ្លួននោះទេ ដូច្នេះការទិញផ្ទះដោយបង់រំលស់ចំណេញច្រើនជាង។ បច្ចុប្បន្ននេះការប្រាក់ធនាគារក៏មិនសូវជាខ្ពស់ខ្លាំងដូចកាលពីពេលមុនដែរ ជាពិសេសធនាគារភាគច្រើនក៏បានលើកទឹកចិត្ត និងផ្តល់លក្ខខណ្ឌល្អដល់អតិថិជនសម្រាប់កម្ចីទិញផ្ទះនេះដែរ ជាក់ស្តែងធនាគារ ហុង លីអុង ក៏បានបង្កើតការផ្តល់

ជូនជាពិសេសសម្រាប់អតិថិជនដែលចង់ទិញផ្ទះជាមួយអត្រាការប្រាក់យ៉ាងទាបត្រឹមតែ Honey Moon Rate 6.99 ភាគរយសម្រាប់ 3ឆ្នាំដំបូង សម្រាប់ទិញគេហដ្ឋាន និងខុនដូ។ លោកបន្តថា៖ “ពុំទាន់មានធនាគារណាដែលផ្តល់ជូននូវការប្រាក់ទាបបែបនេះទេ ដូច្នេះហើយយើងទទួលបានការចាប់អារម្មណ៍ និងមានអតិថិជនទិញផ្ទះតាមរយៈឥណទានទិញគេហដ្ឋានបានក្លាយជាម្ចាស់ផ្ទះក្នុងក្តីស្រមៃជាច្រើននាក់រួចមកហើយ។

លោកបានបន្តថា៖ “ធនាគារ ហុង លីអុង បានសហការជាមួយបុរីធំៗជាច្រើននៅទីក្រុងភ្នំពេញជាដៃគូ ដែលការសហការនេះបានផ្តល់ជូននូវជម្រើសដ៏ពិសេសដល់គ្រប់អតិថិជន ជាមួយនឹងអត្រាការប្រាក់ទាប និងអាចខ្ចីបានរហូតដល់ 80%នៃតម្លៃផ្ទះ ឬអាចជ្រើសយកកម្ចីដែលមានរយៈពេលរហូតដល់ 25ឆ្នាំ ដែលអតិថិជនអាចខ្ចីបានចាប់ពី10,000 ដុល្លារឡើងទៅទៀតផង។

ប្រសិនបើអតិថិជនចង់ស្នើកម្ចីឥណទានទិញគេហដ្ឋានជាមួយធនាគារ ហុង លីអុង ចំពោះអតិថិជនដែលកំពុងធ្វើការងារនៅក្រុមហ៊ុន យើងតម្រូវឱ្យមានកិច្ចសន្យាការងារ និងលិខិតបញ្ជាក់ប្រាក់ខែ។ ចំពោះអតិថិជនអ្នករកស៊ី ឬអ្នកជំនួញតម្រូវឱ្យភ្ជាប់មកជាមួយនូវរបាយការណ៍ហិរញ្ញវត្ថុចំនួន 3ឆ្នាំចុងក្រោយ៕

January 11, 2018

Author: វល័ក្ខ