វល័ក្ខ - La Reine Media

Tiger Street Football Festival ឆ្នាំ 2018 បានមកដល់ខេត្តព្រះសីហនុហើយ!!!

ព្រះសីហនុ៖ ព្រឹតិ្តការណ៍ Tiger Street Football Festival បានមកដល់ខេត្តព្រះសីហនុហើយនៅថ្ងៃទី20 ដល់ថ្ងៃទី 21ខែមករា នេះ ជាមួយនឹងក្រុមចូលរួម 54ក្រុម ដើម្បីប្រកួតដណ្តើម៦កៅអីសម្រាប់ទៅវគ្គផ្តាច់ព្រ័ត្រនៅរាជធានីភ្នំពេញ។

ព្រឹតិ្តការណ៍ Tiger Street Football Festival គឺជាការប្រកួតកីឡាហ្វ៊ូតសាលដំបូង និងធំជាងគេនៅក្នុងប្រទេសកម្ពុជា ហើយបានប្រារព្ធធ្វើឡើងជារៀងរាល់ឆ្នាំចាប់តាំងពីឆ្នាំ2013 មកម្លេះ។ កម្មវិធីនេះត្រូវបានរៀបចំឡើងដោយក្រុមហ៊ុនស្រាបៀរថៃហ្គ័រដើម្បីចូលរួមចំណែកក្នុងការលើកកម្ពស់សកម្មភាពកីឡាក៏ដូចជាវេទិកាមួយសម្រាប់កីឡាករបាល់ទាត់ និងអ្នកស្នេហាវិស័យបាល់ទាត់ដើម្បីបង្ហាញទេពកោសល្យ ផ្លាស់ប្តូរបទពិសោធន៍ និងរៀនពីទម្រង់ថ្មីៗនៃការលេង។

អ្នកស្រី ថោង បវរលក្ខិណា ដែលជានាយកម៉ាកផលិតផលស្រាបៀរថៃហ្គ័រ បានថ្លែងក្នុងពិធីសន្និសីទសារព័ត៌មានកាលពីរសៀលថ្ងៃទី 19 ខែមករា នេះឲ្យដឹងថា ព្រឹត្តិការណ៍ប្រកួតបាល់ទាត់ Tiger Street Football Festival ប្រចាំឆ្នាំ 2018 រដូវកាលទី6 បានត្រឡប់មកវិញទៀតហើយ និងកាន់តែជាព្រឹត្តិការណ៍ដ៏ធំអស្ចារ្យ ក្រុមចូលរួមប្រកួតកាន់តែច្រើន និងមានប្រាក់រង្វាន់សរុបរហូតដល់ 50000ដុល្លារ។

Tiger Street Football Festival ឆ្នាំ2018 នេះ មណ្ឌលប្រកួតកើនឡើងរហូតដល់ប្រាំបីខេត្តក្រុងទូទាំងប្រទេស រួមមាន ខេត្តព្រះសីហនុ ខេត្តកំពង់ស្ពឺ ខេត្តបាត់ដំបង ខេត្តសៀមរាប ក្រុងប៉ោយប៉ែត ខេត្តកំពង់ចាម ក្រុងតាខ្មៅខេត្តកណ្តាល និងរាជធានីភ្នំពេញ។ រង្វាន់សរុបកាន់តែធំអស្ចារ្យ រហូតដល់ 50000ដុល្លារ។ ក្រុមជាង500ក្រុម ត្រូវបានរំពឹងថា នឹងចូលរួមការប្រកួតដណ្ដើមតំណែងជើងឯក Tiger Street Football Festival ឆ្នាំ 2018 នេះ ។ ជាពិសេសមានឱកាសជួបផ្ទាល់ជាមួយកំពូលតារាបាល់ទាត់អន្តរជាតិ Ryan Giggs នៅថ្ងៃប្រកួតផ្តាច់ព្រ័ត្រនៅរាជធានីភ្នំពេញ ថ្ងៃទី10 និងទី11 មីនា 2018 ខាងមុខនេះ។

ដូច្នេះសូមកុំភ្លេចចូលរួមទស្សនាកម្មវិធីព្រឹត្តិការណ៍ប្រកួតបាល់ទាត់ Tiger Street Football Festival 2018 ជាពិសេសកម្មវិធីប្រកួតជម្រុះមណ្ឌលដំបូងនៅឆេ្នរអូរឈើទាល ទីរួមខេត្ត ព្រះសីហនុ នាព្រឹកថ្ងៃទី 20 ដល់ 21 ខែមករា ឆ្នាំ2018 នេះតទៅ ដោយមាន54ចូលរួមប្រកួតសម្រាប់មណ្ឌលដំបូងនេះ។

ព័ត៌មានលម្អិតបន្ថែមអំពី Tiger Street Football Festival 2018 សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
#TSFF20

សូមពិសាដោយការទទួលខុសត្រូវ

January 20, 2018

YouTube ចេញគោលការណ៍ថ្មី ដែលនាំឱ្យអ្នករកលុយ អាចនឹងបាត់បង់ចំណូល

អាមេរិក៖ ក្រុមហ៊ុនវីដេអូយក្ស YouTube បានចាប់ផ្ដើមអនុវត្តន៍នូវគោលការណ៍របស់ខ្លួន ដោយធ្វើការរឹងបន្តឹងទៅលើការត្រួតពិនិត្យវីដេអូ ដែលគោលការណ៍ថ្មីនេះ អាចធ្វើឱ្យអ្នកបង្កើតវីដេអូរកលុយតាមរយៈ YouTube អាចធ្លាក់ចំណូល ជាពិសេសគឺសម្រាប់ YouTube Channels ល្បីៗតែម្ដង។

យោងតាមការចេញផ្សាយរបស់សារព័ត៌មាន The Guardian បានឱ្យដឹងថា ក្រុមហ៊ុន YouTube បានចាប់ផ្ដើមអនុវត្តន៍គោលការណ៍ថ្មី ដោយប្រើប្រាស់មនុស្សដើម្បីធ្វើការត្រួតពិនិត្យទៅលើវីដេអូ ហើយបើត្រឹមត្រូវទៅតាមលក្ខណៈហើយនោះ ទើបក្រុមហ៊ុន YouTube អនុញ្ញាតិឱ្យចេញផ្ទាំងផ្សាយពាណិជ្ជកម្ម។

នៅក្នុងគោលការថ្មីនេះផងដែរ បណ្ដាក្រុមហ៊ុនផ្សព្វផ្សាយផ្សេងៗ មានសិទ្ធិក្នុងការសម្រេចចិត្តជ្រើសរើសដាក់ផ្ទាំងពាណិជ្ជកម្មរបស់ខ្លួននៅលើវីដេអូទាំងឡាយណាដែលមានសញ្ញា Google Preferred ព្រោះរាល់វីដេអូដែលមានសញ្ញានេះ គឺសុទ្ធតែត្រូវបានត្រួតពិនិត្យ និងបំពេញតាមលក្ខខណ្ឌត្រឹមត្រូវរបស់ YouTube។

ក្រុមហ៊ុន YouTube បានបញ្ជាក់នៅក្នុងសេចក្ដីប្រកាសរបស់ខ្លួនផងដែរថា ការត្រួតពិនិត្យទៅលើ YouTube Channels ដើម្បីដាក់ចេញនូវសញ្ញា Google Preferred និងត្រូវបញ្ចប់នៅពាក់កណ្ដាលខែកុម្ភៈសម្រាប់ Channels ដែលមានទីតាំងនៅសហរដ្ឋអាមេរិក ហើយសម្រាប់ក្រៅពីសហរដ្ឋអាមេរិក នឹងត្រូវបញ្ចប់នៅចុងខែមីនា។

ពីដំបូងឡើយ ដើម្បីបង្កើត YouTube Channels រកលុយបានជាមួយនឹង YouTube Partner Program (YPP) ពួកគេចាំបាច់ត្រូវមានអ្នក Views វីដេអូរហូតដល់ជាង 10,000 views ប៉ុន្តែសម្រាប់គោលការណ៍ថ្មី គឺត្រូវមានអ្នក Subscribers ទៅលើ Channels 1,000នាក់ និងត្រូវមានអ្នក Views វីដេអូរហូតដល់ 4,000ម៉ោង ក្នុងរយៈពេល 12ខែចុងក្រោយ បើមិនគ្រប់លក្ខខណ្ឌនេះទេ នោះមិនអាចយករកលុយបានឡើយ។

គោលការណ៍ និងលក្ខខណ្ឌថ្មីនេះហើយ ដែលធ្វើឱ្យអ្នករកលុយតាមបណ្ដាញ YouTube អាចនឹងធ្លាក់ចំណូល ឬអាចបាត់បង់ចំណូលតែម្ដង ហើយការចេញគោលការណ៍ថ្មីនេះផងដែរ គឺក្រោយពេលកើតមានរឿងអាស្រូវស្ដេចរកលុយ YouTube ដែលមានឈ្មោះថា Logan Paul ដែលបានបង្ហោះរូបភាពជនរងគ្រោះដោយអំពើអត្តឃាតក្នុងវីដេអូរបស់លោក ជាហេតុនាំឱ្យមានការផ្ទុះកំហឹងពីសាធារណជន៕

January 20, 2018

ស៊ុបមាន់ខ្មៅចំហុយថ្នាំចិន

ស៊ុបសុខភាពមួយមុខទៀតពីអាហារដ្ឋាន គ្រួសាររីករាយ ដែលស្ថិតនៅលើផ្លូវកោសដូង សម្រាប់សមាជិកគ្រួសារជាទីស្រឡាញ់របស់អ្នក ដូច្នេះសូមរៀនធ្វើមុខម្ហូប “ស៊ុបមាន់ខ្មៅចំហុយថ្នាំចិន” ទាំងអស់គ្នា ដែលជាការណែនាំពីម្ចាស់អាហារដ្ឋានផ្ទាល់តែម្តង។

គ្រឿងផ្សំ

– មាន់ខ្មៅ 1ក្បាល (1គីឡូ-1,3គីឡូ)

– គ្រឿងផ្សំថ្នាំចិនមួយកញ្ចប់ មានដូចជា យិនសិុន ដំឡូង ខ្មៅស្អិត គ្រាប់ក្រហម គ្រាប់ពុទ្រាក្រហម និងចំណិតចេក (អាចរកទិញបាននៅហាងចិនសែ)

– ដុំស៊ុបខ្នរ 1ដុំ

– ស្ករស 1ស្លាបព្រាកាហ្វេ

របៀបធ្វើ

ដំបូងត្រូវដាក់ទឹក រួចដាក់ថ្នាំចិនទាំងអស់ចូល ដាំឱ្យចេញជាតិ។ បន្ទាប់មកត្រូវលាងមាន់ខ្មៅឱ្យស្អាត រួចកាប់មាន់ខ្មៅជាដុំៗ ដាក់ចូលទៅក្នុងឆ្នាំងរំងាស់ពី2-3ម៉ោងរហូតដល់មាន់ខ្មៅផុយល្អ រួចសឹមដាក់ស្ករស និងដុំស៊ុបខ្នរចូល ចូរកូរឱ្យសព្វភ្លក្សរសជាតិតាមចំណង់ចំណូលចិត្ត ជាចុងក្រោយដួសស៊ុបដាក់ចានជាការស្រេច៕

January 19, 2018

10 រូបមន្តចងចិត្តស្វាមី ពីភរិយាមហាសេដ្ឋី ជែក ម៉ា ជូនចំពោះស្ត្រីទូទាំងពិភពលោក

តើមិត្តអ្នកអានជឿឬទេថា នៅពីក្រោយភាពជោគជ័យដ៏ធំធេងរបស់ Jack Ma (ជែក ម៉ា) មហាសេដ្ឋីលំដាប់លេខ1របស់ចិន និងជាសហស្ថាបនិកក្រុមហ៊ុនលក់ទំនិញតាមអនឡាញយក្ស Alibaba មានភរិយាដ៏ស្រស់ស្អាត “ចាង យីង” ជាអ្នកនៅពីក្រោយខ្នងជួយគាំទ្រផ្នែកកម្លាំងចិត្ត និងនៅក្បែររូបគាត់ក្នុងគ្រប់ស្ថានការណ៍ ធ្វើឱ្យគាត់ទទួលបានភាពជោគជ័យក្នុងអាជីព និងក្លាយជាទីទទួលស្គាល់របស់មនុស្សទូទាំងពិភពលោកដូចសព្វថ្ងៃនេះ។

ទាំងគូជាមិត្តភក្តិសម័យរៀនមហាវិទ្យាល័យជាមួយគ្នា ហើយរៀបការនឹងគ្នាភ្លាមតែម្ដងនៅពេលបញ្ចប់ការសិក្សា ដោយ ចាង យីង បានបង្ហើបឱ្យដឹងថា “ជែក ម៉ា មិនមែនជាមនុស្សរូបសង្ហាសោះឡើយ ហើយថែមទាំងដូចជារាងអាក្រក់បន្តិចទៀតផង តែរឿងដែលខ្ញុំពេញចិត្តចំពោះខ្លួនគាត់នោះគឺ គាត់អាចធ្វើអ្វីបានជាច្រើនខណៈដែលបុរសរូបសង្ហាទាំងឡាយមិនចាប់អារម្មណ៍នឹងធ្វើ។ ខ្ញុំមិនបានសម្រេចចិត្តខុសឡើយ ធុរកិច្ចអាលីបាបារបស់គាត់ក្លាយជាវត្ថុដ៏មហស្ចារ្យក្នុងពិភពធុរកិច្ចអនឡាញ អ្នកណាៗក៏ហៅគាត់ថា “មហាមនុស្សនៃការបង្កើតមុខជំនួញ” ដែរ ដែលវាបានសាងនូវមោទនភាពចំពោះខ្ញុំខ្លាំងណាស់។

ខាងក្រោមនេះគឺ 10ចំណុចដាស់តឿនចិត្តរបស់ឧត្តមភរិយារបស់ ជែក ម៉ា ដែលត្រូវការប្រាប់ដល់ស្ត្រីទូទាំងពិភពលោកដូចខាងក្រោមនេះ៖

1/ ក្រោយពេលរៀបការ អ្នកនឹងប្ដូរឋានៈទៅជាឧត្ដមភរិយា និងជាម្ដាយរបស់កូន។ ចូរកុំគិតតែពីចិត្តខ្លួនឯងដូចកាលពីសម័យមុនរៀបការ មើលថែទាំស្វាមី ថែទាំកូន ជួយជាកម្លាំងគាំទ្រដល់ស្វាមី។

2/ បើស្រឡាញ់ស្វាមី ត្រូវស្រឡាញ់ឪពុកម្ដាយរបស់ស្វាមីជាមុន ព្រោះបើគ្មានឪពុកម្ដាយគាត់ ក៏គ្មានរូបគាត់មកឱ្យយើងស្រឡាញ់ដែរ ហើយកុំយកទស្សនគតិ ឬទង្វើរបស់ឪពុកម្ដាយរបស់ស្វាមីដែលធ្វើចំពោះយើងទៅប្រៀបធៀបជាមួយនឹងអ្វីដែលយើងបានទទួលពីឪពុកម្ដាយបង្កើតរបស់យើងជាដាច់ខាត។

3/ រួមកាយ រួមចិត្ត កុំសួរដេញដោលគ្រប់រឿងគ្រប់រ៉ាវ រឿងខ្លះជាគោលការណ៍ ឬជាវិធីការផ្ទាល់ខ្លួនក្នុងការធ្វើការងាររបស់គាត់ ដែលមិនចាំបាច់ត្រូវអធិប្បាយឱ្យយើងដឹងគ្រប់រឿងនោះទេ។ នៅចាំផ្ដល់កម្លាំងចិត្ត និងនៅចាំជួយផ្ដល់ការជួយយកអាសា ក៏គ្រប់គ្រាន់ហើយ។

4/ ស្វាមីដែលត្រូវបានត្រួតត្រា ចុះចាញ់អ្នកតែមាត់ តែស្វាមីដែលត្រូវបានស្រឡាញ់ ចុះចាញ់អ្នកដោយដួងចិត្ត។ ស្រឡាញ់គេទៅ កុំគិតតែពីចង់គ្រប់គ្រងគេឱ្យជាប់អី។ រឹតតែនៅចំពោះមុខក្រុមមិត្តភក្តិស្រីៗដូចគ្នាផងនោះ ភរិយាដែលល្អនឹងមិននិយាយដើមប្ដីឱ្យអ្នកដទៃស្ដាប់ជាដាច់ខាត។

5/ កុំគិតចង់ផ្លាស់ប្ដូរគាត់ តែអាចសាងកម្លាំងជំរុញចិត្តដល់គាត់ ព្រោះជាទូទៅបុរសៗច្រើនតែខ្ជិល មិនសូវជាស្រឡាញ់ភាពស្អាតបាតប៉ុន្មានទេ។ ការងារតូចតាចនៅក្នុងផ្ទះមិនចាំបាច់បង្ខំតឿនឱ្យគាត់ធ្វើទេ ទុកឱ្យគាត់ប្រើសមត្ថភាពក្នុងរឿងធ្វើការរកស៊ីឱ្យបានពេញទំហឹងវិញប្រសើរជាង។

6/ ពេលស្វាមីត្រឡប់មកផ្ទះ ភរិយាគួរនៅផ្ទះ។ ស្វាមីត្រឡប់មកផ្ទះប្រហែលជាចង់ឃើញមុខភរិយា ចង់ឮសំឡេងភរិយាចង់ជជែកគ្នាដោយក្ដីយល់ចិត្តយល់ថ្លើម តែមិនមែនបានឮតែសំឡេងរអ៊ូរទាំរបស់ភរិយានោះទេ។

7/ កុំយកក្ដីសង្ស័យរបស់ខ្លួនឯងធ្វើជាចំណុចសម្រេចលើរឿងអ្វីមួយ។ កុំគិតតែម្នាក់ឯង រួចអុឺអើតែម្នាក់ឯងជាដាច់ខាត កុំយកក្ដីសង្ស័យមកគិតធ្វើជារឿងពិតឱ្យសោះ ព្រោះវានឹងក្លាយជារឿងប៉ះពាល់ដែលមិនល្អដល់ស្វាមី ហើយរូបអ្នកនឹងក្លាយជាភរិយាដែលគ្មានភាពជឿជាក់លើខ្លួនឯង។

8/ កុំធ្វើខ្លួនជាសត្វកាំប្រមា។ បើធ្វើខ្លួនជាសត្វកាំប្រមាដែលចាំតែចាក់ដោតស្វាមីគ្មានស្វាមីណាចង់នៅជិតអ្នកទេ ប្រៀបដូចភ្លើង និងចំបើងស្ងួត នៅជាមួយគ្នាមិនបានទេ។

9/ កុំព្យាយាមប្រកែកតវ៉ានឹងស្វាមីខ្លួនឯង និងហាមជេរប្រមាថស្វាមីជាដាច់ខាត រឹតតែប្រកែកតវ៉ាស្វាមីច្រើនប៉ុនណា ក៏រឹតតែសាងនូវក្ដីមិនពេញចិត្តឱ្យខ្លួនឯងកាន់តែច្រើនប៉ុននោះដែរ ហើយការជេរប្រមាថស្វាមី មិនថាត្រូវ ឬខុសក៏ដោយ នឹងមានផលអាក្រក់ជះត្រឡប់ទៅរកខ្លួនអ្នកវិញយ៉ាងប្រាកដ។

10/ សេចក្ដីស្រឡាញ់ប្រៀបដូចជាគ្រាប់ខ្សាច់ ចាប់កាន់បាន តែចងភ្ជាប់មិនបាន។ កុំគិតតែព័ទ្ធចាប់ស្វាមី ព្រោះព័ទ្ធចាប់អាចបានតែខ្លួនគាត់ ដូច្នេះស៊ូបានដួងចិត្តគាត់មកគ្រប់គ្រងវិញនឹងប្រាកដច្បាស់ជាង។ បង្រៀនកូននៅមុខអ្នកដទៃបានតែពេលស្ងាត់ៗចូរប្រឹក្សាជាមួយស្វាមី។ ហាមបំបាក់មុខស្វាមីនៅចំពោះមុខអ្នកដទៃជាដាច់ខាត។

បុរសដែលជាអ្នកធ្វើការរកស៊ីនៅក្នុងសង្គមរឿងដែលសំខាន់បំផុតនោះគឺ មុខមាត់ និងកិត្តិយសរបស់គាត់ ហើយបុរសគ្រប់រូបក៏ហួងហែង និងថែរក្សារឿងទាំងអស់នេះខ្លាំងណាស់។ ភរិយាដែលចេះរៀបចំដាក់ខ្លួនបានល្អ ជីវិតនឹងមានសេចក្ដីសុខ តែភរិយាដែលមានតែក្ដីមិនពេញចិត្តរកសេចក្ដីស្ងប់សុខក្នុងជីវិតមិនបានឡើយ៕

January 19, 2018

ក្រុមហ៊ុន អ៊សខ្មែរ ទទួលសិទ្ធិនាំចូល និងចែកចាយស្រាវីស្គីដ៏ល្បីម៉ាក Macallan

ភ្នំពេញ៖ ក្រុមហ៊ុន អ៊សខ្មែរ ត្រូវបានបង្កើតឡើងតាំងពីឆ្នាំ2001 ដែលដំណើរការទៅលើការចែកចាយផលិតផលម្ហូបអាហារ និងភេសជ្ជៈនានាដែលមានគុណភាពខ្ពស់គ្រប់ប្រភេទនៅក្នុងព្រះរាជាណាចក្រកម្ពុជា ដើម្បីឆ្លើយតប និងបម្រើទៅតាមសេចក្ដីត្រូវការ ក៏ដូចជាកំណើននៃចំនួនអតិថិជនក្នុងវិស័យនេះ ដែលជាការរួមចំណែកមួយនៅក្នុងចលករសំខាន់ៗជួយជំរុញកំណើនសេដ្ឋកិច្ចកម្ពុជាផងដែរ ។

ផលិតផលទាំងអស់របស់ក្រុមហ៊ុន អ៊សខ្មែរ រួមមានសាច់ដែលមានគុណភាពខ្ពស់ដូចជា សាច់គោអូស្ត្រាលី និងអាមេរិក សាច់ចៀមអូស្ត្រាលី អយស្ទ័របារាំង ថ្លើមក្ងាន ពងត្រីកាវីយ៉ា ផលិតផលគ្រឿងផ្សំដុតនំដែលមានគុណភាព ឈីស ស្រាបៀរនាំចូលមកពីប្រទេសប៊ែលហ្សីក រួមជាមួយស្រាក្រហម និងស្រាវីស្គីជាច្រើនមុខទៀតផងដែរ។ ដោយឡែកម៉ាកសញ្ញានៃផលិតផលមួយក្នុងចំណោមផលិតផលទាំងអស់របស់ក្រុមហ៊ុន អ៊សខ្មែរ ដែលទទួលបានសិទ្ធិនាំចូល និងចែកចាយផ្ដាច់មុខនៅក្នុងប្រទេសកម្ពុជា គឺផលិតផលស្រាវីស្គីម៉ាក Macallan ។ រាល់អតិថិជនទាំងអស់នៅក្នុងប្រទេសកម្ពុជាអាចជឿជាក់បានថា ស្រាវីស្គីម៉ាក Macallan ដែលចេញពីក្រុមហ៊ុន អ៊សខ្មែរ គឺជាផលិតផលសុទ្ធល្អយ៉ាងពិតប្រាកដ។ សូមទាក់ទងមកកាន់ក្រុមហ៊ុនដោយផ្ទាល់ដើម្បីទទួលបានព័ត៌មានលម្អិតបន្ថែម ។

នៅក្នុងពិធីសន្និសីតសារព័ត៌មានប្រកាសជាផ្លូវការនៃទទួលសិទ្ធិនាំចូល និងចែកចាយនូវប្រភេទស្រាវីស្គីដ៏ល្បីល្បាញម៉ាក Macallan កាលពីព្រឹកថ្ងៃទី19 ខែមករា ឆ្នាំ2018 កន្លងទៅនេះ លោក Vincent Ng ជានាយកគ្រប់គ្រងទូទៅនៃក្រុមហ៊ុន អ៊សខ្មែរ បានលើកឡើងថា ក្រុមហ៊ុន អ៊សខ្មែរ មានបទពិសោធន៍ច្បាស់លាស់លើការនាំចូល និងចែកចាយនូវផលិតផលម្ហូបអាហារ និងភេសជ្ជៈដែលនាំចូលមកពីបណ្តាប្រទេសនានានៅជុំវិញពិភពលោក។ ដោយឡែកសម្រាប់ព្រឹកនេះ យើងមានសេចក្ដីសោមនស្សរីករាយក្នុងការប្រកាសជាសាធារណៈដែលបានទទួលសិទ្ធិនាំចូល និងចែកចាយនូវប្រភេទស្រាវីស្គីម៉ាក Macallan ដែលជាប្រភេទស្រាមានឈ្មោះបោះសំឡេងយ៉ាងខ្លាំងជាសាកលក្រោមការទទួលស្គាល់ស្របច្បាប់ពីស្ថាប័នពាក់ព័ន្ធនៅក្នុងព្រះរាជាណាចក្រកម្ពុជា។ ជាមួយនឹងវត្តមានថ្មីនៃស្រាវីស្គីពិត រសជាតិពិតរបស់ស្រាវីស្គីម៉ាក Macallan នាពេលនេះ អតិថិជនទាំងអស់អាចមកស្វែងរក និងទទួលយកនូវបទពិសោធន៍ថ្មីនៃការទទួលទានស្រាដ៏ល្បី ស័ក្ដិសមនឹងកិត្តិយសដ៏ថ្លៃថ្នូររបស់លោកអ្នក ។

នៅក្នុងឱកាសនោះផងដែរ លោក យ៉ុន យុត្ថាណា នាយកគ្រប់គ្រងផ្នែកអភិវឌ្ឍពាណិជ្ជកម្ម ក៏បានថ្លែងផងដែរថា សម្រាប់ក្រុមហ៊ុន អ៊សខ្មែរ ពិតជាមានកិត្តិយសដែលមានការទទួលស្គាល់ និងផ្តល់សិទ្ធិសពីសំណាក់ក្រុមហ៊ុនស្រាវីស្គីម៉ាក Macallan ។ យើងជឿជាក់ថាកាលពីពេលកន្លងទៅ គឺមានអតិថិជនមួយចំនួនទិញប៉ះចំស្រាវីស្គីមិនសុទ្ធ ឬក្លែងក្លាយច្រើននៅតាមបណ្តាហាង ឬទីកន្លែងលក់ផ្សេងៗ ប៉ុន្តែសម្រាប់ស្រាវីស្គីដែលនាំចូលគ្រប់ប្រភេទរបស់ក្រុមហ៊ុន អ៊សខ្មែរ គឺធានាសុទ្ធ 100% គ្មានការក្លែងបន្លំនោះឡើយ ហើយក្រៅពីប្រភេទស្រាវីស្គី យើងនៅមានស្រាផ្សេងៗជាច្រើនទៀត ដែលក្នុងនោះរាប់ទាំងប្រភេទស្រាក្រហម ដ៏ដូចជាភេសជ្ជៈផ្សេងៗផងដែរ ។ សូមមកទទួលយកនូវផលិតផលពិត ផលិតផលសុទ្ធ មានគុណភាពខ្ពស់របស់ក្រុមហ៊ុន អ៊សខ្មែរ ទាំងអស់គ្នា ។

សូមបញ្ជាក់ផងដែរថា ផលិតផលម្ហូបអាហាររបស់ក្រុមហ៊ុន អ៊សខ្មែរ ក៏មានដាក់តាំងលក់នៅក្នុងហាង THE PROVIDORE ដែលមានទីតាំងស្ថិតនៅអគារលេខ 67 ផ្លូវសុធារស់ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ៕

January 19, 2018

សូមមកទទួលយកនូវភាពរីករាយក្នុងរាត្រីដ៏អស្ចារ្យជាមួយនឹងកម្មវិធី WINE & CHEESE

ភ្នំពេញ៖ មកទទួលយកនូវភាពសប្បាយរីករាយក្នុងរាត្រីដ៏អស្ចារ្យជាមួយនឹងកម្មវិធី WINE & CHEESE ដែលស្ថិតនៅកណ្តាលនៃរាជធានីភ្នំពេញ។ ព្រឹត្តិការណ៍មួយនេះមានប្រជុំនូវស្រាក្រហមដែលល្បីៗ ជាច្រើនប្រភេទខុសៗគ្នា ជារៀងរាល់ខែ ហើយនៅក្នុងនោះដែផងរលោកអ្នកនឹងទទួលបានឱកាសដើម្បីជ្រើសរើសស្រាក្រហមដែលចូលចិត្តមកពីជុំវិញពិភពលោកផងដែរ។

សូមបង្វែរអារម្មណ៍មកធ្វើដំណើរជាមួយយើងខ្ញុំទៅកាន់ប្រទេស CHILE ដើម្បីទទួលយកភាពឈ្ងុយឆ្ងាញ់នៃស្រាក្រហម CHILEAN រួមទាំង BALDUZZI ដែលបានត្រៀមជាស្រេចយ៉ាងល្អបំផុត ហើយក៏ការបន្តដំណើរទៅប្រទេស South Africa ដើម្បីភ្លក្សរសជាតិស្រាក្រហមដ៏ឈ្ងុយឆ្ងាញ់។ ស្រាក្រហមសាកសមយ៉ាងល្អឥតខ្ចោះ ហើយពេញលក្ខណៈបើបានញាំជាមួយនឹងឈីសដែលមានរសជាតិឈ្ងុយឆ្ងាញ់មកពីគ្រប់តំបន់នៅក្នុងពិភពលោក។

យើងខ្ញុំបាននាំយកមកតែឈីសដែលមានស្តង់ដារអន្ដរជាតិល្អៗតែប៉ុណ្ណោះ ហើយស្រាក្រហមនិមួយៗត្រូវបានរៀបគូជាស្រេចជាមួយនឹងឈីសថ្មីៗដ៏គួរឱ្យចង់ទទួលទាន។

A RACLETTE STATION ការប្រគុំតន្ត្រី និងមិត្តភក្តិល្អៗ វាជាគ្រឿងផ្សំយ៉ាងអស្ចារ្យដែលធ្វើឱ្យរាត្រីនៃ WINE & CHEESE ក្លាយជារាត្រីមួយដែលមិនអាចបំភ្លេចបាន។ សំបុត្រមានលក់ម្នាក់ត្រឹមតែ 35 ដុល្លារអាមេរិច (សម្រាប់ការកក់ទុកមុន) និងតម្លៃ 40 ដុល្លារអាមេរិចសម្រាប់ការទិញនៅក្នុងថ្ងៃកម្មវិធី។

ព្រឹត្តិការណ៍បន្ទាប់ នឹងប្រារព្វនៅថ្ងៃទី7 ខែកុម្ភៈ និងថ្ងៃទី7 ខែមីនា ឆ្នាំ2018 ចាប់ពីម៉ោង 6:30ល្ងាច រហូតដល់ម៉ោង 9:00យប់៕

January 19, 2018

លោក កែវ ឡង់ឌី “ចង្ក្រានជើង3 បាក់អស់ សល់តែជើង1 តែនៅតែអាចចម្អិនបាន”

ជាអ្នកជំនួញមួយរូបដែលកំពុងទទួលបានការគាំទ្រ និងយកចិត្តទុកដាក់ពីសាធារណជនជាច្រើននៅកម្ពុជា លោក កែវ ឡង់ឌី ម្ចាស់អាជីវកម្មនៃក្រុមហ៊ុន Baby Outlet និងជាស្ថាបនិកក្រុមហ៊ុន ស្រមោច Trading Solution បានអភិវឌ្ឍខ្លួនពីកុមារភាពដ៏ជូចត់ តែបុរសរូបនេះអាចគ្រប់គ្រងស្ថានការណ៍បានយ៉ាងល្អ ហើយថែមទាំងបំប្លែងការឈឺចាប់នានាឱ្យក្លាយជាគុណសម្បត្តិថែមទៀតផង។

ជីវិត និងការសិក្សាលោក កែវ ឡង់ឌី បានកើតនៅឆ្នាំ1983 ក្នុងគ្រួសារដែលមានកម្រិតជីវភាពក្រោមមធ្យមមួយនៅរាជធានីភ្នំពេញដែលផ្តល់តម្លៃខ្លាំងបំផុតលើការអប់រំ។ កាលនៅជាកុមារ លោកបានជួបរឿងមួយដែលធ្វើឱ្យលោកចងចាំមិនភ្លេច និងធ្វើឱ្យលោកចាប់ផ្តើមដឹងច្បាស់ពីការលំបាករបស់គ្រួសារដែលមិនសូវមានថវិកាសម្រាប់ឱ្យលោកបានរៀនសូត្រ។ នៅពេលនោះ លោកចូលរៀនថ្នាក់ភាសាខ្មែរផង និងភាសាចិនផង ដោយថ្នាក់ភាសាចិនគឺត្រូវចំណាយប្រមាណតែ 35ដុល្លារប៉ុណ្ណោះក្នុងមួយខែតែឪពុករបស់លោកមិនមានលទ្ធភាពដើម្បីបង់នោះទេ។

លោកបានលើកឡើងថា ៖ “កាលនោះខ្ញុំនៅក្មេងខ្ញុំចេះតែឆ្ងល់ថា ហេតុអ្វីបានជាគាត់ចេះតែពន្យារពេលបង់ថ្លៃសាលាមួយថ្ងៃហើយមួយថ្ងៃទៀតដែលធ្វើឱ្យខ្ញុំមិនចង់ហ៊ានចូលរៀន តែក្រោយមកទើបខ្ញុំដឹងច្បាស់នៅពេលដែលគាត់យកចិញ្ចៀនរបស់គាត់ទៅលក់ដើម្បីបង់ថ្លៃសាលាឱ្យខ្ញុំ។ ចាប់ពីថ្ងៃនោះមក ខ្ញុំតាំងចិត្តថា ខ្ញុំត្រូវតែខំរៀនឱ្យខ្លាំង ព្រោះបើខ្ញុំមិនខំ មិនដឹងជាគាត់ខកចិត្តប៉ុនណាទេ។ ដោយមានការតាំងចិត្ត លោកឡង់ឌី បានទទួលលទ្ធផលនៃការសិក្សាល្អគួរសម រហូតបានជោគជ័យក្នុងការប្រឡងបញ្ចប់មធ្យមសិក្សាទុតិយភូមិនៅឆ្នាំ2001។ ក្រោយប្រឡងជាប់បាក់ឌុប លោកមិនដែលស្រមៃថា លោកនឹងបានចូលរៀនមហាវិទ្យាល័យនោះទេ ព្រោះលោកដឹងយ៉ាងច្បាស់ពីកម្រិតជីវភាពនៃគ្រួសារ។ បន្ទាប់មកលោកបានប្រឡងជាប់នៅវិទ្យាស្ថានភាសាបរទេស (IFL) ដែលនិស្សិតភាគតិចណាស់អាចមានសមត្ថភាពប្រឡងជាប់នៅសាលានេះ តែបើទោះជាប្រឡងជាប់ក៏នៅតែតម្រូវឱ្យបង់ថ្លៃសាលាដែរ។

ភាពស្ទាក់ស្ទើរនៅពេលនោះ បានធ្វើឱ្យបងប្រុសរបស់លោកសម្រេចចិត្តឈប់រៀន ហើយចេញធ្វើការរកប្រាក់ចំណូលដើម្បីខ្លួនឯងផង និងសម្រាប់បង់ថ្លៃសិក្សាឱ្យប្អូនផង។ តែជាអកុសល បងប្រុសរបស់លោកបានទទួលមរណភាពនៅពេលដែលលោកទើបនឹងចូលរៀនបានមួយត្រីមាសតែប៉ុណ្ណោះ មិនទាន់ទាំងបានបង់ថ្លៃសិក្សាឱ្យលោកសូម្បីតែម្តងផង។ លោកឡង់ឌីនៅពេលនោះជានិស្សិតឆ្នាំទី1 បានស្វែងរកការងារដោយខ្លួនឯង លោកបានសម្រេចចិត្តខំអស់លទ្ធភាពដើម្បីចេញបង្រៀននៅសាលាចំនួន 6កន្លែងផ្សេងគ្នា ដើម្បីផ្គត់ផ្គង់ការសិក្សារបស់ខ្លួននៅមហាវិទ្យាល័យ។ ទីបំផុត លទ្ធផលនៃការខិតខំប្រឹងប្រែងបានត្រដែតឡើងនៅឆ្នាំ2005។ លោក កែវ ឡង់ឌី បានបញ្ចប់ការសិក្សាជាស្ថាពរនៅកម្រិតមហាវិទ្យាល័យដែលលោកមិនធ្លាប់សូម្បីតែស្រមៃថាមានថ្ងៃនេះ។ តែនៅឆ្នាំដដែលនោះឪពុករបស់លោកបានទទួលមរណភាពម្នាក់ទៀត ធ្វើឱ្យលោកអស់សង្ឃឹមសាជាថ្មី។ នៅពេលនោះស្ថានភាពគ្រួសារបានចាប់ផ្តើមធ្លាក់ចុះយ៉ាងខ្លាំង ដែលជំរុញឱ្យលោកចាប់ផ្តើមគិត និងជំរុញខ្លួនឯងឱ្យខំកាន់តែខ្លាំងឡើងដែរ។ លោក កែវ ឡង់ឌី បានរំឭកថា ៖ “នៅពេលនោះខ្ញុំបានគិតសាជាថ្មីម្តងទៀតថា ចង្ក្រានជើង3 ទើបចម្អិនបាន តែនៅពេលនេះចង្ក្រាននៅសល់តែជើង1ប៉ុណ្ណោះ ហេតុនេះដើម្បីចម្អិនបានលុះត្រាតែចង្ក្រាននោះខ្លាំងបំផុត។

ជីវិតការងារ និងការតស៊ូលោក កែវ ឡង់ឌី បាននិយាយថា ការគិតបែបវិជ្ជមានជារឿងសំខាន់បំផុតដែលរុញច្រានលោកឱ្យមានថ្ងៃនេះ។ លោកបានចាប់ផ្តើមចូលធ្វើការនៅសាលាអន្តរទ្វីបអាមេរិកាំងក្នុងឆ្នាំ2005 ដែលពេលនោះលោកមិនទាន់បានបញ្ចប់ការសិក្សាទាំងស្រុងនៅសាកលវិទ្យាល័យនៅឡើយទេ។ ពេលនោះអ្វីដែលលោកធ្វើបានគឺការខំប្រឹងប្រែងឱ្យអស់លទ្ធភាព មិនខ្លាចការនឿយហត់ និងការបើកចិត្តឱ្យទូលាយទទួលយករឿងថ្មី។ មានថ្ងៃមួយគ្រូបង្រៀនទាំងអស់គេបានសួរគ្នាថា ម្នាក់ៗទទួលបានប្រាក់ម៉ោងប៉ុន្មាន? មានអ្នកខ្លះប្រាប់ថា គេទទួលបានប្រាក់ម៉ោង 3ដុល្លារ អ្នកខ្លះទទួលបានប្រាក់ម៉ោង 2.5ដុល្លារ ខណៈលោកខ្លួនឯងបានទទួលត្រឹមតែ 2ដុល្លារប៉ុណ្ណោះក្នុងមួយម៉ោង។ ហើយចម្លើយនៃសំណួរទាំងអស់នោះអាចជារឿងវាយប្រហារមួយមកលើរូបលោក តែលោកនៅតែញញឹម ហើយនៅតែគិតវិជ្ជមានសម្រាប់ខ្លួនលោកជានិច្ច។

លោក កែវ ឡង់ឌី បាននិយាយថា ៖ “នៅពេលនោះខ្ញុំគិតឡើងវិញថា គ្រូដែលនិយាយថាបាន 3ដុល្លារនោះគេមានបទពិសោធបង្រៀនពីរបីឆ្នាំរួចហើយ ហើយគ្រូដែលបាន 2.5ដុល្លារនោះគេបានបញ្ចប់ការសិក្សាយូរគួរសមដែរ ហើយសម្រាប់ខ្ញុំវិញ ខ្ញុំមិនទាន់រៀនចប់ស្រួលបួលផង បានប៉ុណ្ណឹងគឺជារឿងល្អខ្លាំងណាស់ ខ្លាចតែគេមិនព្រមទទួលឱ្យមកបង្រៀនផង។

ចាប់ពីពេលនោះមក លោកក៏បានជំរុញខ្លួនឯងឱ្យខំប្រឹងប្រកបដោយការគិតបែបវិជ្ជមានតាមរយៈការខិតខំធ្វើការងារទាំងឡាយណាដែលថ្មី និងលំបាករហូតទទួលបានលទ្ធផលល្អជាបន្តបន្ទាប់។ លោកបានចាប់ផ្តើមពីគ្រូបង្រៀនធម្មតា មកបន្ថែមការងារជាអ្នកប្រឹក្សាសេវាកម្មអប់រំជាមួយអាណាព្យាបាល រហូតក្លាយជាអ្នកគ្រប់គ្រងលើសាលារៀនទាំងអស់ដែលកំពុងមានការអភិវឌ្ឍយ៉ាងរីកចម្រើន។

កត្តាទាំងអស់នេះគឺកើតចេញពីការខិតខំប្រឹងប្រែង និងរក្សានូវគំនិតបែបវិជ្ជមានខ្ពស់បំផុត ក្នុងការគិត និងរាល់ពេលជួបការលំបាកទាំងឡាយក្នុងដំណើរជីវិត។

បច្ចុប្បន្ន លោក កែវ ឡង់ឌី បានចាប់ផ្តើមអាជីវកម្មផ្ទាល់ខ្លួន គឺក្រុមហ៊ុន Baby Outlet និងក្រុមហ៊ុន ស្រមោច Trading Solution ដែលមានបុគ្គលិកដល់ទៅ 140នាក់៕

January 19, 2018

តើអ្វីជាឧបសគ្គនៃការនាំ ចេញផលិតផលកម្ពុជា?

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ឧបសគ្គសំខាន់នៃការនាំផលិតផលកសិកម្មរបស់កម្ពុជាទៅកាន់ទីផ្សារ បណ្តាលមកពីមធ្យោបាយដឹកជញ្ជូនថ្លៃខ្ពស់ពេក ដោយសារការចំណាយលើការលើកដាក់ច្រើនដងមុនទៅដល់ប្រទេសគោលដៅ។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា កម្ពុជាខ្វះមធ្យោបាយដឹកជញ្ជូនទំនិញដែលរហ័ស ព្រមទាំងមានតម្លៃសមរម្យ ឆ្លើយតបទៅនឹងការចង់បានរបស់អ្នកនាំចេញ និង ប្រទេសដែលត្រូវការទំនិញ។ ឯកឧត្តម រដ្ឋមន្ត្រីបានអះអាងដែរថា មូលហេតុសំខាន់បំផុតមួយទៀតក្នុងការនាំចេញផលិតផលកម្ពុជាទៅកាន់ទីផ្សារបរទេស ដោយសារកម្ពុជាគ្មានកំពង់ផែទឹកជ្រៅ ដែលអាចឲ្យកប៉ាល់ធំៗចូលចត និងដឹកទំនិញចេញ។ ដោយសារឧបសគ្គចំពោះមុខនេះ ឯកឧត្តមរដ្ឋមន្ត្រីក្រសួងកសិកម្ម ក៏បានប្រាប់ពីមូលហេតុចម្បងនេះទៅកាន់ នាយករដ្ឋមន្ត្រី ដើម្បីរកដំណោះស្រាយ។

ឯកឧត្តម វេង សាខុន បញ្ជាក់ថា “យើងត្រូវរុញល្បឿននៃការអភិវឌ្ឍកំពង់ផែទឹកជ្រៅឲ្យបានលឿនបំផុត តាមដែលអាចធ្វើទៅបាន ព្រោះបណ្តាវិនិយោគិនបានរាងចាល ដោយសារការនាំចេញ

ព្រោះគេត្រូវផ្ទេរនៅប្រទេសសិង្ហបុរី ព្រោះវាចាំបាច់ណាស់រឿងកំពង់ផែទឹកជ្រៅនេះ ដោយត្រូវតែធ្វើឲ្យបាន។ វិស័យឯកជនធ្លាប់បានត្អូញត្អែរពីការលំបាកក្នុងការនាំចេញផលិតទៅកាន់ទីផ្សារបរទេស។

ឧកញ៉ា កែវ មុំ នាយិកាក្រុមហ៊ុននំស្រួយលីលីដែលបាននាំផលិតផលរបស់ខ្លួនទៅកាន់ប្រទេសជាង10 សម្រាប់សាកល្បងទីផ្សារ ធ្លាប់បានបញ្ជាក់ថា ដោយសារឧបសគ្គនៃការដឹកជញ្ជូននេះ ខ្លួនបានសុខចិត្តបោះបង់ទីផ្សារខ្លះនៅក្នុងតំបន់ ដូចជាទីផ្សារប្រទេសមីយ៉ាន់ម៉ា ជាដើម។ ឧកញ៉ា កែវ មុំ បញ្ជាក់ថា៖ “ខ្ញុំសង្កេតឃើញថាការដឹកជញ្ជូននេះស្មុគស្មាញ ដោយខ្ញុំនាំផលិតផលនំស្រួយលីលីទៅកាន់មីយ៉ាន់ម៉ា យើងត្រូវផ្ទេរទំនិញនៅសិង្ហបុរី ព្រោះតែយើងគ្មានការដឹកជញ្ជូនត្រង់រវាងប្រទេសទាំងពីរ។ វាមិនត្រឹមតែចំណាយខ្ពស់ប៉ុណ្ណោះទេសូម្បីពេលវេលានៃការដឹកជញ្ជូនក៏ប្រើពេលយូរដែររហូតដល់1ខែអីឯណោះ រីឯចិនដឹកទៅមីយ៉ាន់ម៉ា ប្រើពេលតែមួយថ្ងៃឬពីរថ្ងៃដល់ទៅហើយ។

កម្ពុជាទំនងជាត្រូវរង់ចាំរហូតដល់4ឬ5ឆ្នាំទៀត គឹរហូតដល់ឆ្នាំ2022 ដើម្បីមានកំពង់ផែទឹកជ្រៅសម្រាប់បញ្ជូនទំនិញទៅកាន់ទីផ្សារអន្តរជាតិបាន ដោយមិនពឹងផ្អែកលើការផ្ទេរទំនិញនៅប្រទេសណាមួយដែលមានកំពង់ផែទឹកជ្រៅ និងមានកប៉ាល់ដឹកជញ្ជូនខ្នាតធំចូលចតផ្ទុកទំនិញបាន។

ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងកាលពីខែឧសភា ឆ្នាំ2016កន្លងមកថា កំពង់ផែស្វយ័តក្រុងព្រះសីហនុ នឹងមានកំពង់ផែទឹកជ្រៅ នៅឆ្នាំ 2022 ខាងមុខ ហើយគ្រោងចំណាយសរុបប្រមាណ 200លានដុល្លារអាមេរិក ដោយរដ្ឋាភិបាលខ្ចីប្រាក់ពីអង្គការ JICA ជប៉ុនជាង170លានដុល្លារអាមេរិក និងប្រាក់បដិភាគរបស់កំពង់ផែស្វយ័តក្រុងព្រះសីហនុជាង22លានដុល្លារអាមេរិក។

តាមការសិក្សាក្នុងពេលកន្លងមក កំពង់ផែដែលគ្រោងសាងសង់នោះ មានប្រវែង 250ម៉ែត្រ និងមានជម្រៅទឹក 14.5ម៉ែត្រ ព្រមទាំបំពាក់ដោយគ្រឿងចក្រទំនើបៗ ដើម្បីបម្រើដល់សកម្មភាពលើកដាក់ទំនិញប្រកបដោយប្រសិទ្ធភាព និង ឆ្លើយតបទៅនឹងកំណើននៃការដឹកជញ្ជូន៕

January 19, 2018

ម៉ូដសក់ត្រូវតែស្រស់ស្អាតជាគូជាមួយនឹងម៉ូដសម្លៀកបំពាក់

បន្ទាប់ពីបានជ្រើសរើសម៉ូដសម្លៀកបំពាក់ដ៏ស្រស់ស្អាតបានហើយ ចូលមកដល់ការតុបតែងម៉ូដសក់វិញម្តង គឺម៉ូដសក់ត្រូវតែជ្រើសរើសឱ្យសីុគ្នាជាមួយនឹងម៉ូដសម្លៀកបំពាក់របស់អ្នក នោះអ្នកនឹងក្លាយជានារីដ៏ទាន់សម័យ និងស្រស់សោភាបំផុតនៅក្នុងឆ្នាំថ្មីនេះជាមិនខាន។

កុំភ្លេចណា៎ ជ្រើសរើសម៉ូដសក់ឱ្យត្រូវជាមួយនឹងស្តាយរបស់អ្នក ហើយបង្ហាញទៅដល់មនុស្សទាំងអស់បានឃើញពីភាពស្រស់ស្អាតរបស់អ្នក និងភាពសីុវីល័យរបស់អ្នកជាមួយនឹងម៉ូដសក់ និងម៉ូដសម្លៀកបំពាក់របស់អ្នកសម្រាប់រដូវរងានេះដូចតទៅ៕

January 19, 2018

កញ្ញា ផៃ ច័ន្ទរ៉ានូ ជោគជ័យលើការសិក្សាថ្នាក់អនុបណ្ឌិតផ្នែករដ្ឋបាលសាធារណៈ

គ្រាន់តែបាត់មុខពីវិស័យសិល្បៈក្នុងចង្កោមតារាបង្ហាញម៉ូដដ៏ស្រស់ស្អាតមួយរយៈតូចតែប៉ុណ្ណោះ ពេលនេះ កញ្ញា ផៃ ច័ន្ទរ៉ានូ បានបង្ហាញមុខយ៉ាងរីករាយជាមួយនឹងការទទួលបានជំនាញផ្នែករដ្ឋបាលសាធារណៈថ្នាក់អនុបណ្ឌិតយ៉ាងពេញមុខនៅសាកលវិទ្យាល័យ CUS ខណៈដែលបច្ចុប្បន្នក៏កំពុងតែបម្រើការងារជាមន្ត្រីរាជការក្របខណ្ឌមួយរូបនៅក្នុងមន្ទីរសាធារណៈការ និងដឹកជញ្ជូនផងដែរនោះ។ យ៉ាងណាក៏ដោយ បើទោះបីជាពេលនេះកញ្ញាបានបញ្ចប់ការសិក្សាថ្នាក់អនុបណ្ឌិតក៏ដោយ ប៉ុន្តែចំពោះការងារជាអ្នកសិល្បៈនេះគឺនៅតែព្យាយាមថែរក្សាដដែល រហូតអស់ពេលចូលប្រឡូកទើបសម្រេចចិត្តសាជាថ្មី។

ជាទូទៅ សម្រាប់វត្តមានរបស់កញ្ញា ផៃ ច័ន្ទរ៉ានូមិនសូវបានបង្ហាញមុខមាត់ជាសាធារណៈឱ្យទូលាយ និងញឹកញាប់ដូចបណ្តាអ្នកសិល្បៈដទៃទៀតនោះទេ ដ្បិតអីកញ្ញាមិនមានចំណូលចិត្តទៅលើការសម្ដែង និងចម្រៀងនោះទេ ម្យ៉ាងក៏មិនមានការពេញចិត្តពីសំណាក់សមាជិកគ្រួសារជាពិសេសឪពុកម្តាយតែម្ដង។ ប៉ុន្តែបើចំពោះការដើរបង្ហាញម៉ូដវិញ រ៉ានូ ពិតជាឧស្សាហ៍ឡើងបង្ហាញសមត្ថភាព និងរូបសម្រស់នៅលើឆាកធំៗទាំងកម្មវិធីថ្នាក់ជាតិ ក៏ដូចជាអន្តរជាតិ ដែលចេញទៅបង្ហាញម៉ូដជាក្រុម ដើម្បីជាការផ្សព្វផ្សាយពីវប្បធម៌របស់កម្ពុជាទៅកាន់បណ្តាប្រទេសនានាតាមរយៈការគាំទ្រ និងជំរុញពីសំណាក់ក្រសួងពាក់ព័ន្ធ ដូចជា ក្រសួងទេសចរណ៍ និងក្រសួងពាណិជ្ជកម្មជាដើម។

ស្រីស្រស់ ច័ន្ទរ៉ានូ បានបង្ហើបថា តាមការពិតទៅសមាជិកក្នុងគ្រួសារ ក៏ដូចជាសែស្រឡាយក្នុងវង្សត្រកូលទាំងអស់មិនមានអ្នកណាម្នាក់ជាប់ពាក់ព័ន្ធទៅនឹងការងារជាអ្នកសិល្បៈនោះទេ ហើយសម្រាប់សមាជិកក្នុងផ្ទះក៏មិនសូវមានអ្នកមានចំណូលចិត្តផ្នែកខាងហ្នឹងដែរ ពោលគឺមានតែកញ្ញាម្នាក់ប៉ុណ្ណោះ ដែលស្នេហាវិស័យនេះ។ កញ្ញាបានបញ្ជាក់ថា “ដំបូងឡើងនៅពេលដែលអ្នកផ្ទះបានឮថាខ្ញុំចង់ចូលប្រឡូកក្នុងវិស័យសិល្បៈ គឺគ្មានអ្នកគាំទ្រនោះទេ ប៉ុន្តែក្រោយៗមកខ្ញុំចេះតែព្យាយាមជម្នះរហូតពួកគាត់ទន់ចិត្តព្រមតាមសំណើររបស់ខ្ញុំ។ ប៉ុន្តែទោះជាយ៉ាងណា ក៏មិនព្រមឱ្យខ្ញុំចូលប្រឡូកឱ្យកប់ជ្រៅខ្លាំងនោះដែរ ពោលគឺអនុញ្ញាតត្រឹមតែជាអ្នកបង្ហាញម៉ូដនៅក្រុម Cambodia Super Model ដែលមានអ្នកនាង ឌួង ហ្សូរីដា ជាប្រធានក្រុម។

ជាការពិតណាស់ រហូតមកដល់ពេលនេះ កញ្ញា ផៃ ច័ន្ទរ៉ានូ ទើបតែមានអាយុត្រឹម26ឆ្នាំតែប៉ុណ្ណោះ ហើយក្រៅពីមានអាជីពជាតារាបង្ហាញម៉ូដដ៏ស្រស់ស្អាត និងវ័យក្មេងនោះ កញ្ញាក៏ជាមន្ត្រីរាជការមួយរូបផងដែរ ខណៈដែលសមាជិកក្នុងគ្រួសារ ដែលរួមមានបងប្អូន3នាក់ រួមជាមួយឪពុកម្តាយ សុទ្ធតែជាអ្នកបម្រើការងារជាមន្ត្រីក្នុងជួររដ្ឋាភិបាលទាំងអស់។ សម្រាប់គោលបំណងទៅថ្ងៃអនាគត ក្រៅពីចង់បម្រើការងារនៅក្នុងនាមជាមន្ត្រីរាជការដែលមានស្នាដៃ ជាប្រយោជន៍ដល់ប្រជាពលរដ្ឋទូទៅនោះ កញ្ញាក៏ចង់មានមុខជំនួញផ្ទាល់ខ្លួនដែលមានទំហំមធ្យមមួយ ដើម្បីជាចំណូលបន្ទាប់បន្សំសម្រាប់ផ្គត់ផ្គង់កម្រិតជីវភាពឱ្យល្អប្រសើរនៅក្នុងសង្គមផងដែរ៕

January 19, 2018

Author: វល័ក្ខ