វល័ក្ខ - La Reine Media

កសាងផ្នត់គំនិតសហគ្រិនដើម្បីអាជីវកម្មជោគជ័យ

ជោគជ័យដាច់ខាតមិនមែនជាកម្មសិទ្ធរបស់សហគ្រិនដែលជួបបញ្ហាហើយ ក៏រាថយទេ ក៏គ្មានជោគជ័យ ដែលមានតម្លៃណា អាចកើតឡើងដោយមិនមានការតាំងចិត្តខ្ពស់ដែរ។ ចំពោះការតាំងចិត្ត ចង់ក្លាយជាសហគ្រិន អ្នកណាក៏អាច គ្រាន់តែនិយាយនៅពេលនេះថា “ខ្ញុំនឹងមិនចុះចាញ់ជាដាច់ខាត” ប៉ុន្តែអ្វីដែលសំខាន់ វាឋិតនៅត្រង់ថា តើអ្នកនឹងនៅតែនិយាយពាក្យដដែលនេះ ដោយក្លាវក្លាទៅកាន់ខ្លួនឯងទេ នៅពេលដែលមានឧបសគ្គនៅខាងមុខអ្នក ធំជាងខ្លួនអ្នក 10ដង ឬ20ដងនោះ? ការពិតនេះហើយ ដែលជារនាំងធ្វើអោយយុវជនជាច្រើន ចង់ ហើយក៏បោះបង់ក្តីស្រមៃក្លាយជាសហគ្រិនរបស់ខ្លួនទៅវិញ។

ការខ្វះការតាំងចិត្តនិងផ្នត់គំនិតអាជីវកម្ម ជាឧបសគ្គខាងក្នុង ដ៏ធំមួយដែលធ្វើអោយ យុវជននិងសហគ្រិន មួយចំនួនច្រើន បាត់បង់ឱកាសក្នុងការប្រើប្រាស់សក្តានុពលរបស់ខ្លួនអោយអស់លទ្ធភាព ដើម្បីជួយខ្លួនឯង និងបង្កើតការងារ ជួយយុវជនដ៏ទៃទៀត។ ប្រសិនបើ “ក្លាយជាសហគ្រិនជោគជ័យ” ជាគោលដៅ ជិវិតរបស់អ្នក អ្នកនឹងចាំបាច់ត្រូវតែស្វែងរក ការតាំងចិត្ត និង ការរស់នៅជាមួយផ្នត់គំនិតជាសហគ្រិននេះ។

ដោយឃើញពីការចាំបាច់ក្នុងការកសាងផ្នត់គំនិតអាជីវកម្ម និងស្វែងរកការតាំងចិត្តខ្ពស់ដើម្បីជោគជ័យ ក្នុងជិវិតជាសហគ្រិន ASEAN Business School Cambodia បានរៀបចំនូវវគ្គសិក្សា២ថ្ងៃមួយ ចាប់ពីថ្ងៃទី 27 ដល់ថ្ងៃទី28 ខែមករា ឆ្នាំ2018 ក្រោមប្រធានបទ “កសាងផ្នត់គំនិតសហគ្រិនដើម្បីអាជីវកម្មជោគជ័យ” ។

វគ្គសិក្សានេះ មានការចូលរួមបណ្តុះបណ្តាល និងផ្តល់យោបល់ពីអ្នកជំនាញក្នុងស្រុកនិងក្រៅស្រុកដូចជា លោក Soo Hoo Yoon Hunn លោក Leow Leik Hong និង លោក ឃីម សុខហេង ដែលជាអ្នកជំនាញ និងមានបទពិសោធជាច្រើនឆ្នាំក្នុងវិស័យនេះ។ សម្រាប់ព័ត៌មានបន្ថែមទាក់ទងនឹងវគ្គសិក្សានេះ អ្នកអាចស្វែងរកបាននៅក្នុងផ្ទាំងផ្សព្វផ្សាយ និងតំណរភ្ជាប់ខាងក្រោម៖

វិបសាយ៖ https://aseanbizcambodia.com/
Facebook: https://www.facebook.com/aseanbizcambodia/

January 24, 2018

ភោជនីយដ្ឋានបម្រើអាហារបែបចិនកំពុងពេញនិយម ខណៈទេសចរចិនកើនឡើង

មួយរយៈចុងក្រោយនេះ ភោជនីយដ្ឋានដែលបម្រើសេវាកម្មលើម្ហូបអាហារបែបចិនបានបើកដំណើរការយ៉ាងគគ្រឹកគគ្រេងនៅក្នុងប្រទេសកម្ពុជាខណៈកំណើននៃការទទួលទានម្ហូបអាហារបែបចិនរបស់ប្រជាជនកម្ពុជាក៏កំពុងមានការកើនឡើងដែរ ដូច្នេះហើយបានជាមានអ្នកជំនួញមួយចំនួនងាកមកចាប់អារម្មណ៍លើការវិនិយោគផ្នែកភោជនីយដ្ឋានបម្រើម្ហូបអាហារបែបចិន។

លោក Herfried Hasenoehrl នាយកប្រតិបត្តិនៃក្រុមហ៊ុន HGB Group ជាក្រុមហ៊ុននាំេប្រ៊នដ៍ភោជនីយដ្ឋានចិន Little Sheep Hot Pot មកកាន់កម្ពុជាមានប្រសាសន៍ថា ហាងលក់ម្ហូបអាហារបែបចិនដែលទើបបង្ហាញវត្ដមាននៅកម្ពុជាមួយនេះនឹងផ្តល់ជូននូវរសជាតិពិសេសថ្មីមួយទៀតសម្រាប់ប្រជាជនកម្ពុជា និងភ្ញៀវទេសចរចិនដែលកំពុងមានលំហូរមកកាន់ប្រទេសកម្ពុជាច្រើន និងជាចំណែកមួយក្នុងការទាក់ទាញភ្ញៀវទេសចរចិនទាំងនោះឱ្យស្នាក់កម្ពុជាបានកាន់តែយូរជាងពេលមុន។

លោកបន្ដថា “ទីផ្សារគោលដៅរបស់យើង គឺភ្ញៀវជាលក្ខណៈគ្រួសារ និងភ្ញៀវចិននៅក្នុងប្រទេសកម្ពុជា។ ហើយវត្តមានភោជនីយដ្ឋាន The Little Sheep បានជួយ និងលើកទឹកចិត្តឱ្យភ្ញៀវទេសចរចិនស្នាក់នៅប្រទេសកម្ពុជាបានយូរជាងមុនផងដែរ។ មូលហេតុដែលក្រុមហ៊ុន HGB ចាប់អារម្មណ៍នាំយកភោជនីយដ្ឋាន “The Little Sheep” ចូលមកកាន់ប្រទេសកម្ពុជានេះ មិនមែនត្រឹមតែដោយសារវាជាេប្រ៊នដ៍លំដាប់ពិភពលោកប៉ុណ្ណោះទេ ប៉ុន្តែយើងចង់ឱ្យប្រជាជនកម្ពុជាមានជម្រើសកាន់តែច្រើននៅពេលពួកគាត់ចង់ចេញមកបរិភោគម្ហូប
អាហារនៅខាងក្រៅផ្ទះ”។

Little Sheep Hot Pot ជាភោជនីយដ្ឋានដែលទទួលជោគជ័យយ៉ាងធំធេងក្នុងរយៈពេល 18 ឆ្នាំមកហើយនៅតាមដងវិថីអាល់លែន លេខ22 ក្នុងទីក្រុងបាវទូ នៃរដ្ឋម៉ុងហ្គោលី ជាមួយនឹងបណ្តាញទូទាំងពិភពលោកនៅក្នុង 120តំបន់ និងទីក្រុងនានាដែលមានហាងជិត 300កន្លែងទៀតនៅតាមបណ្ដាទីក្រុងធំៗ ដូចជាសៀងហៃ ហុងកុង តូក្យូ ញូវយ៉ក និងតូរ៉ុនតូជាដើម។

លោក ជី សិលា នាយកគ្រប់គ្រងទូទៅនៃក្រុមហ៊ុន យីនកុក ហ៊្វូដខប ជាសម្ព័ន្ធក្រុមហ៊ុនមេរបស់ភោជនីយដ្ឋាន The Asian kitchen ដែលបម្រើសេវាកម្មម្ហូបបែបអាស៊ាន និងចិនបានលើកឡើងថា មូលហេតុដែលយើងបង្កើត The Asian kitchen នៅក្នុងទីផ្សារម្ហូបអាហារកម្ពុជា ក៏ព្រោះតែវាជាភោជនីយដ្ខានបម្រើសេវាកម្មមុខម្ហូបបែបអាស៊ាន និងចិន ព្រោះយើងគិតថា ប្រភេទម្ហូបទាំងនេះវាសាមញ្ញដែលប្រជាពលរដ្ឋខ្មែរយើងទូទៅអាចហូបបាន និងកំពុងពេញនិយមសម្រាប់ប្រជាជនខ្មែរយើង។

លោកបានប្រាប់បន្ដថា បន្ទាប់ពីទទួលបានការគាំទ្រយ៉ាងច្រើនពីអតិថិជនចំពោះការបម្រើម្ហូបអាហាររបស់យើងហើយនោះ លោកក៏នឹងមានគម្រោងបើកនូវសាខាបន្ថែមទៀតដែលមានទីតាំងនៅ Exchange Square Mall ផងដែរ។

ទោះបីជាយ៉ាងណា លោក ជី សិលា បានសម្ដែងនូវគំនិតសុទិដ្ឋិនិយមទៅលើអតិថិជនក្នុងស្រុកចំនួន 90%ថានឹងអាចជំរុញភោជនីយដ្ឋាន The Asian Kitchen ឱ្យទទួលបានភាពជោគជ័យ និងឈានទៅដល់ការពង្រីកអាជីវកម្មបន្ដបន្ទាប់ទៀត ព្រោះអតិថិជនក្នុងស្រុកដែលមានអាយុក្រោម 30 ឆ្នាំ បច្ចុប្បន្នបានផ្លាស់ប្ដូររបៀបរស់នៅរបស់ពួកគេយ៉ាងលឿន ដោយនិយមចូលចិត្តការទទួលទានអាហារនៅក្រៅផ្ទះ ជាពិសេសអាហារបែបចិនតែម្ដង ខណៈដែលពួកគេជាប់រវល់ការងារ។

ភោជនីយដ្ឋាន The Asian Kitchen បើកបម្រើម្ហូបអាហារបែបអាស៊ាន ពិសេសត្រូវបានផ្ដោតទៅលើម្ហូបអាហារបែបចិន មានដូចជាជ្រូក មាន់ ទាខ្វៃ ជាដើម។ ភោជនីយដ្ឋាននេះត្រូវបានបង្កើតឡើងក្រោមកិច្ចសហការរវាងក្រុមហ៊ុនកម្ពុជា និងក្រុមហ៊ុនមកពីប្រទេសសិង្ហបុរី។

លោក គួច សុខលី ប្រធានសមាគមភោជនីយដ្ឋានកម្ពុជាបានលើកឡើងថា៖ “បច្ចុប្បន្នបើទោះជាចំនួនភោជនីយដ្ឋាននៅក្នុងប្រទេសកម្ពុជាមានការកើនឡើងជាបន្ដបន្ទាប់ ពិសេសនៅរាជធានីក្រុងភ្នំពេញក៏ដោយ ប៉ុន្ដែខ្ញុំយល់ថា ក៏វានៅតែមិនទាន់អាចបំពេញតម្រូវការសម្រាប់អតិថិជនដែលនិយមចេញមកទទួលទានអាហារនៅខាងក្រៅផ្ទះបានគ្រប់គ្រាន់នៅឡើយដែរ”។

ទោះបីជាមានភោជនីយដ្ឋានជាច្រើនមានបម្រើម្ហូបអាហារជាច្រើនមុខមកពីបណ្ដាប្រទេសផ្សេងៗគ្នានៅលើពិភពលោកដូចជា ចិន ជប៉ុន កូរ៉េ អឺរ៉ុបអុីតាលីជាដើមក៏ដោយ ក៏ពលរដ្ឋកម្ពុជានៅតែមានការពេញនិយមទៅលើម្ហូបអាហារបែបចិនច្រើនជាងម្ហូបអាហារមកពីប្រទេសផ្សេងៗដែរ ដោយសារតែគ្រឿងផ្សំ និងរបៀបរបបនៃការចម្អិនអាហារ និងរសជាតិអាចឱ្យពួកគេទទួលយកបាន និងមានការពេញនិយមទៀតផង។

អ្នកស្រី DENISE LUM នាយិកាគ្រប់គ្រងប្រតិបត្ដិការនៃភោជនីយដ្ឋាន Emperors of China បានបញ្ជាក់ថា ភោជនីយដ្ឋាននេះបើកដំណើរការតាំងពីឆ្នាំ2012មកម៉្លេះ ជាមួយនឹងគំនិតថ្មីៗនៃការច្នៃម្ហូបបែបក្វាងទុងសម័យទំនើប ដោយផ្ដោតទៅលើបរិបទថ្មីៗនៅទីក្រុងហុងកុង និងនៅតំបន់អាស៊ីអាគ្នេយ៍ដែលផ្ដល់នូវ“អាហារឌីមសាំ”ច្រើនជម្រើសជាមួយមុខម្ហូបឈ្ងុយឆ្ងាញ់ជាច្រើនទៀតដូចជា មាន់ ទា និងសាច់ជ្រូកខ្វៃ បាយមាន់ហៃណាំ ឈុតស៊ុបពិសេស ឈុតម៉ាឡា ស្លាបមាន់បំពងស្រួយ និងមុខម្ហូបជាច្រើនមុខផ្សេងទៀត។

នាយិកាគ្រប់គ្រងប្រតិបត្ដិការនៃភោជនីយដ្ឋាន Emperors of China បានបញ្ជាក់បន្ដថា មូលហេតុដែលអ្នកវិនិយោគសម្រេចចិត្តបោះទុនវិនិយោគបង្កើតភោជនីយដ្ឋានបែបចិននៅក្នុងទឹកដីកម្ពុជា គឺដោយសារតែពួកគេសង្កេតឃើញប្រជាជនកម្ពុជាកាន់តែមានការពេញនិយមទទួលទានម្ហូបអាហារបែបចិន ពិសេសស្របតាមគោលនយោបាយរបស់រាជរដ្ឋាភិបាលកម្ពុជាក្នុងការទាក់ទាញភ្ញៀវទេសចរចិនមកទស្សនាកម្ពុជាឱ្យបានច្រើន ដូច្នេះការបង្កើតភោជនីយដ្ឋានបែបចិនជាជម្រើសកាន់តែល្អប្រសើរមួយក្នុងការទាក់ទាញភ្ញៀវទេសចរទាំងនោះឱ្យកាន់តែចង់ស្នាក់នៅក្នុងប្រទេសកម្ពុជាបានយូរឡើង។

គួរបញ្ជាក់ផងដែរថា បច្ចុប្បន្ននេះប្រជាពលរដ្ឋកម្ពុជាមានការពេញនិយមទទួលទានអាហារចិនចំនួន 3មុខគឺ 1.អាហារឌីមសាំ 2.អាហារបែបខ្វៃ និង3.អាហារបែបស៊ុប៕

January 23, 2018

តើទិសនាំសំណាងតាមគោលការណ៍ហុងស៊ុយមានមែនឬទេ?

មនុស្សជាច្រើនអាចនឹងធ្លាប់បានឮរឿងទិសនាំលាភសំណាងថា មនុស្សម្នាក់ៗសុទ្ធតែមានទិសដែលល្អ និងមិនល្អសម្រាប់ខ្លួនឯងទាំងអស់។ តាមគោលការណ៍ហុងស៊ុយក៏មានជំនឿលើរឿងទិសនាំលាភសំណាងនេះដូចគ្នាដែរ ដូច្នេះតើទិសនាំលាភសំណាងគឺជាអ្វី? និងមានផលចំពោះខ្លួនយើងយ៉ាងណា? សូមនាំគ្នាតាមដានដូចតទៅ…។

ទិសនាំលាភសំណាងគឺជាអ្វី?

ផ្នត់គំនិតក្នុងរឿងទិសនាំលាភសំណាងតាមគោលការណ៍ហុងស៊ុយនេះ អាចនឹងធ្វើឱ្យមនុស្សជាច្រើនយល់ច្រឡំ អ្នកខ្លះនិយាយថា បើអ្នកបែរទៅរកទិសដែលមិនល្អសម្រាប់ខ្លួនឯង អ្នកនឹងសំណាងអាក្រក់។ ចំណុចនេះ ជារឿងដែលហុងស៊ុយបកស្រាយថា មិនមានជាហេតុផលត្រឹមត្រូវទេ។ ការពិតទៅ ទិសដែលល្អ ឬទិសដែលមិនល្អតាមគោលការណ៍ហុងស៊ុយវិញនោះគឺពាក់ព័ន្ធជាមួយការទទួលកម្លាំងថាមពលដែលល្អពីទិសដែលល្អ និងការទទួលថាមពលអវិជ្ជមានពីទិសដែលមិនល្អប៉ុណ្ណោះ តែមិនថាអ្នកនឹងបែរទៅក្នុងទិសដែលល្អ ឬមិនល្អក៏ដោយ វាមិនមែនជាបច្ច័យដែលសំខាន់ និងធានាដល់ភាពជោគជ័យរបស់កិច្ចការងាររបស់អ្នកនោះឡើយ ព្រោះនៅមានរឿងផ្សេងៗទៀតជាអង្គប្រកបរួមទៀតជាច្រើន។

ការស្វែងរកទិសនាំលាភសំណាង

ការដែលអ្នកដឹង និងបែរទៅរកទិសនាំលាភសំណាង នឹងជួយឱ្យអ្នកបានទទួលថាមពលដែលល្អ មានគុណភាព មានភាពសម្បូរឥតខ្ចោះ មានភាពស្ថិតស្ថេរគង់វង្ស។ បើផ្ទះ ឬកន្លែងធ្វើការរបស់អ្នកបែរមុខទៅរកទិសនាំលាភសំណាង អង្គុយធ្វើការក្នុងទិសនាំលាភសំណាង ឬគេងបែរមុខទៅរកទិសនាំលាភសំណាង អ្នកក៏នឹងបានទទួលថាមពលដែលល្អ។

ទិសនាំលាភសំណាងធ្វើឱ្យអ្នកសំណាងល្អមែនឬ?

គោលការណ៍ហុងស៊ុយប្រាប់ថា ទិសដែលល្អ នាំមកនូវសំណាងល្អ និងភាពជោគជ័យ ដោយគោលការណ៍ហុងស៊ុយដែលមានមកតាំងពីបុរាណក៏បានប្រាប់ដែរថា សំណាងដែលល្អនោះមានទាំងអស់ច្រើនកម្រិត។ អ្នកមិនអាចផ្លាស់ប្ដូរថ្ងៃខែឆ្នាំកំណើត និងទីកន្លែងកើតរបស់ខ្លួនឯងបានទេ ព្រោះនោះគឺជាសំណាងដែលមកពីឋានសួគ៌ តែអ្នកអាចបន្ថែមលាភសំណាងក្នុងកម្រិតផ្សេងបាន ដោយការបង្កើន និងផ្លាស់ប្ដូរដើម្បីទទួលថាមពលក្នុងផ្នែកដែលល្អ។

នឹងទៅជាយ៉ាងណា បើអ្នកបែរទៅក្នុងទិសដែលមិនមែនជាទិសនាំលាភសំណាង?

គោលការណ៍របស់ហុងស៊ុយមានឡើងដើម្បីអភិវឌ្ឍជីវិតរបស់អ្នកឱ្យរឹតល្អឡើង និងការមិនធ្វើឱ្យជីវិតរបស់អ្នកមានភាពច្របូកច្របល់។ ក្នុងករណីដែលអ្នកគេងបែរទៅក្នុងទិសដែលមិនល្អនិងមិនអាចផ្លាស់ប្ដូរបាន អ្នកក៏អាចរិះរកវិធីកែបានដែរ ដោយការប្រើសាស្ត្រាហុងស៊ុយក្នុងការបន្ថែមការរៀបទុកដាក់ ឬតុបតែងរបស់ផ្សេងៗចូលទៅបន្ថែម និងកែខៃបានតាមករណីនីមួយៗទើបការបែរខុសទិសមិនបានធ្វើឱ្យអ្វីៗគ្រប់យ៉ាងត្រូវតែអាក្រក់ទាំងអស់នោះទេ។

តើការនាំនិមិត្តសញ្ញាដែលមានអត្ថន័យល្អៗតាមគោលការណ៍ហុងស៊ុយមកប្រើ អាចជួយកែខៃបញ្ហាការបែរទៅក្នុងទិសដែលមិនល្អបាន ឬទេ?

ការពិតទៅ មនុស្សច្រើនតែមើលឃើញថា គោលការណ៍ហុងស៊ុយតែងមានការណែនាំឱ្យដាក់តាំង ឬរៀបចំទុកដាក់វត្ថុរបស់របរទៅក្នុងចំណុចមួយចំនួន ឬក្នុងទិសណាមួយរបស់ផ្ទះបន្ទប់ និងកន្លែងធ្វើការ។ ការធ្វើបែបនោះ គឺដើម្បីនាំមកនូវថាមពលដែលល្អហ្នឹងឯង តែទាំងអស់នេះ នឹងការរៀបចំទុកដាក់អ្វីមួយក្នុងទិសណាមួយ ក៏ត្រូវតែមានចំណេះដឹងដែលត្រឹមត្រូវជាក់ច្បាស់ក្នុងរឿងទិស និងនិមិត្តសញ្ញាតាមគោលការណ៍ហុងស៊ុយផងដែរ។

តើអ្នកចាំបាច់ត្រូវអង្គុយធ្វើការ និងគេងក្នុងទិសនាំលាភសំណាងឬទេ?

ប្រាកដណាស់ថា ការរកទិសនាំលាភសំណាង និងរៀបចំទុកដាក់តុធ្វើការ រួមទាំងគ្រែគេងឱ្យត្រូវទីតាំង អាចនឹងមិនមែនជារឿងងាយនោះទេ ព្រោះមនុស្សម្នាក់ៗ ផ្ទះមួយៗ ទីកន្លែងមួយៗសុទ្ធតែមានដែនកំណត់ តែទាំងអស់នេះ ទោះជាមិនបានរៀបចំទុកដាក់តុ និងគ្រែក្នុងទីតាំងនាំលាភសំណាងក៏ដោយ ក៏គួរតែជ្រើសរើសទីតាំងដែលល្អបំផុតតាមដែលអាចធ្វើបាន ព្រោះការស្ថិតនៅក្នុងទិសដែលល្អ ហុចផលដោយត្រង់ដល់ផ្លូវចិត្តរបស់អ្នកផងដែរ។

តើអ្នកនឹងរកទិសនាំលាភសំណាងរបស់អ្នកយ៉ាងណា?

រឿងនេះហាក់ដូចជានឹងធ្វើឱ្យកើតភាពច្របូកច្របល់បន្តិច ព្រោះការបែងចែកទិសក្នុងសាស្ត្រានីមួយៗ គោលការណ៍នីមួយៗមានភាពខុសប្លែកពីគ្នា ដូច្នេះអ្នកអាចនឹងជ្រើសរើសប្រើផែនទីថាមពលរបស់ហុងស៊ុយមកជួយក្នុងរឿងនេះបាន ហើយការរកទិសនេះ ចូរចាប់ផ្ដើមពីចំណុចកណ្ដាលរបស់ផ្ទះជានិច្ច៕

January 23, 2018

រឿង7យ៉ាង ដែលអ្នកមិនធ្លាប់ដឹង ពាក់ព័ន្ធនឹងទឹកភ្នែក…

មនុស្សយើងគ្រប់រូប ម្នាក់ៗសុទ្ធតែមានសម្ពន្ធភាពយ៉ាងស៊ីជម្រៅជាមួយទឹកភ្នែកពេញមួយជីវិតសាកល្បងគិតទៅមើល៍ នៅពេលកើតមកភ្លាម រឿងដំបូងគេដែលយើងធ្វើមុននឹងបើកភ្នែកមើលពិភពលោក គឺការហាមាត់ស្រែកយំ លុះដល់ធំឡើងយើងក៏ប្រើទឹកភ្នែកបង្ហាញពីអារម្មណ៍សោកស្ដាយខូចចិត្ត ឬត្រេកអរនៅពេលខ្លះ និងច្រើនដងណាស់ដែលវាហូរចេញមកប្រៀបដូចទឹកបាក់ទំនប់ ដោយសារគ្រាន់តែយើងហាន់មើមខ្ទឹមបារាំង។

មើលទៅវាហាក់ដូចជា តំណក់ទឹកថ្លាៗដែលហូរចុះមកលើថ្ពាល់របស់យើង តែវាមានរឿងរ៉ាវអាថ៌កំបាំងច្រើនគួរសម…

ដូច្នេះថ្ងៃនេះយើងនាំគ្នាមកមើលពីរឿង7យ៉ាងដែលយើងមិនធ្លាប់ដឹងពាក់ព័ន្ធនឹងទឹកភ្នែកនេះ ធានាថា លោកអ្នកច្បាស់ជានឹកចម្លែកចិត្តមិនខាន។

1/ ហៅថា “ទឹកភ្នែក” តែមិនមែនជា “ទឹក” ទេ
ទឹកដែលហូរចេញមកពីកែវភ្នែក វាត្រូវតែជាទឹកហ្នឹងហើយ! មិនខុសទេ! តែក៏មិនបានត្រឹមត្រូវទាំងអស់ដែរ។ ការពិតទៅ ទឹកភ្នែករបស់យើងមានលក្ខណៈដូចជាបន្ទះហ្វ៊ីលម៍ដែលដាក់ពីលើគ្នា3ជាន់។ ជាន់ក្រៅបំផុត ឬ “ស្រទាប់ខ្លាញ់” (Lipid layer) មានខ្លាញ់ជាផ្នែកផ្សំចម្បង មានតួនាទីការពារការហើរស្ងួតរបស់ទឹកភ្នែក បញ្ចៀសពន្លឺនិងជួយក្នុងការមើលឃើញ។

ជាន់ទីពីរ ហៅថា “ស្រទាប់សារធាតុទឹក” (Aqueous layer) ប្រាកដណាស់! មានទឹកជាចំណែកផ្សំចម្បង និងនៅមានផ្សំដោយសារធាតុសំខាន់ផ្សេងៗដូចជា អំបិលរ៉ែ ប្រូតេអីុន និងសារធាតុការពារជំងឺផ្សេងៗទៀតផង។ មុខនាទីរបស់ស្រទាប់សារធាតុទឹកភ្នែកដែលសំខាន់បំផុតគឺ ផ្ដល់អុកស៊ីែហ្សនដល់កែវភ្នែក និងជាប្រភពអាហារសំខាន់របស់កែវភ្នែក។

ជាន់ក្នុងបំផុត ជា “ស្រទាប់រំអិល” (Mucouslayer) ប្រកបដោយរំអិល ប្រូតេអីុន និងអំបិលរ៉ែ មានតួនាទីធ្វើឱ្យស្រទាប់កញ្ចក់ភ្នែករាប ជួយឱ្យសម្លឹងមើលឃើញច្បាស់ ជួយរំអិលស្រទាប់ផ្នែកខាងមុខកែវភ្នែក និងស្ទាក់ចាប់វត្ថុប្លែកចម្លែកជួយការពារមិនឱ្យភ្នែកជាប់មេរោគ។

2/ ច្រើនជាង1 តែមានដល់ទៅ3

ប្រយោគនេះមិនមែនជាការផ្សាយពាណិជ្ជ-កម្មលក់ទំនិញទេ តែជាប្រភេទ “ទឹកភ្នែក” របស់មនុស្សយើងហ្នឹងឯង។ ទោះជាមានសភាព និងរូបរាងទ្រង់ទ្រាយដូចគ្នាទាំងអស់មែន តែការពិតវិញ ទឹកភ្នែកមានដល់ទៅ3ប្រភេទឯណោះ។

– Basal Tear ទឹកភ្នែកដែលហូរចេញមកគ្រប់ពេលវេលា ដើម្បីផ្ដល់សំណើមដល់កែវភ្នែក និងការពារធូលីដី។

– Reflex Tear បើត្រឹមតែមានធូលីដីហើរចូលភ្នែក ហើយចេញទឹកភ្នែកនោះ ហ្នឹងហើយគឺ Reflex Tear។ ជាទឹកភ្នែកដែលហូរចេញមកក្នុងបរិមាណច្រើននៅពេលមានកម្ទេចអ្វីម្យ៉ាងចូលភ្នែក ឬនៅពេលមានអារម្មណ៍ថា ក្ដៅក្រហាយភ្នែក ដូចជា ពេលហាន់មើមខ្ទឹមបារាំង ឬប៉ះនឹងពន្លឺចាំងខ្លាំងៗជាដើម។

– Emotional Tear ជាទឹកភ្នែកដែលមានតែមនុស្សប៉ុណ្ណោះដែលអាចបង្ហូរចេញមកបាន។ វានឹងហូរចេញមកនៅពេលកើតមានអារម្មណ៍ផ្សេងៗ ដូចជា សោកសៅ ខូចចិត្ត អផ្សុក ខកបំណងស្នេហ៍ និងត្រេកអរខ្លាំងជាដើម តែភាគច្រើន… ប្រាកដណាស់! ជាទឹកភ្នែកនៃក្ដីសោកស្ដាយខូចចិត្ត។

3/ មិនយំ មិនមែនមានន័យថា មិនមានទឹកភ្នែកនោះទេ

កុំអាលភ្ញាក់ផ្អើលអី! ព្រោះអាចនឹងស្ដាប់មើលទៅរាងកម្សត់ តែវាជាសភាវប្រក្រតីរបស់រាងកាយមនុស្សយើង។ ទឹកភ្នែកប្រភេទ Basal Tear របស់យើងនឹងហូរចេញមក ដើម្បីថែរក្សាឮកែវភ្នែកឱ្យមានសំណើមគ្រប់ពេលវេលា តែហូរចេញមកក្នុងបរិមាណតិចបំផុត មួយថ្ងៃត្រឹមតែ5-10អនស៍ប៉ុណ្ណោះ ហើយនឹងហើរស្ងួតទៅវិញប្រមាណជា10%-20% គ្រប់ពេលដែលយើងបើកភ្នែក ទើបយើងស្ទើរតែមិនដឹងឡើយថា មានទឹកភ្នែកកំពុងថែទាំយើង។

4/ ទឹកភ្នែក និងទឹកសមុទ្រ… ដូចគ្នាទេ?

ហេតុអីបានជាទឹកភ្នែកមានរសជាតិប្រៃដូចទឹកសមុទ្រដែរ? ជាទឹកតែមួយដូចគ្នា ឬយ៉ាងណា? ចម្លើយគឺ ទេ… ខុសគ្នាស្រឡះ! ព្រោះនៅក្នុងទឹកភ្នែក និងទឹកសមុទ្រមានចំណែកផ្សំរបស់ “អំបិល” ឬសូដ្យូមខ្លូរ៉ាយដ៍ដូចគ្នាមែន តែកម្រិតជាតិប្រៃរបស់ទឹកភ្នែកខុសប្លែកពីគ្នាអាស្រ័យលើបច្ច័យជាច្រើន ដូចជា ការយំ និងការត្រេកអរ ឬរំភើបចិត្តជាដើម។

5/ គ្មានទឹកភ្នែក… អាចនឹងមើលឃើញមិនច្បាស់

អ្នកណាទៅដឹងថា វត្ថុសំខាន់មួយដែលធ្វើឱ្យមនុស្សយើងមើលឃើញបានច្បាស់នោះគឺ “ទឹកភ្នែក”?ក្រៅពីនឹងជួយឱ្យមានសំណើមដល់កែវភ្នែកហើយ ទឹកភ្នែកនៅជួយសម្អាតកញ្ចក់ភ្នែក ធ្វើឱ្យយើងមើលឃើញបានច្បាស់ល្អឡើង។ ដូច្នេះ យើងគួរមើលថែទាំសុខភាពកែវភ្នែកឱ្យមានទឹកភ្នែកចេញមកចិញ្ចឹមកែវភ្នែកជាប់ជានិច្ចដោយការឧស្សាហ៍ប្រិចភ្នែកឱ្យបានញឹកញាប់ចៀសវាងពីបរិស្ថាន និងទង្វើដែលធ្វើឱ្យទឹកភ្នែកងាយហើរស្ងួត ដូចជាការប្រើខ្សែភ្នែកយូរៗជាដើម។

6/ មានអារម្មណ៍តានតឹងពិបាកចិត្ត ក៏យំចេញមក!

ផ្នែកមួយពីការសិក្សាស្រាវជ្រាវរឿងទឹកភ្នែករបស់លោក William Frey អ្នកជីវគីមីនៃមជ្ឈមណ្ឌលវិភាគកែវភ្នែកបានប្រាប់ថា គ្រប់ពេលដែលយើងទួញយំ សារធាតុអេនដូហ្វ៊ីននឹងហូរចេញមក ជួយកាត់បន្ថយកម្រិតអ័រម៉ូននៃភាពតានតឹងពិបាកចិត្តបាន។ ដោយលទ្ធផលនៃការសិក្សាស្រាវជ្រាវរបស់ Frey ក៏បានរកឃើញទៀតថា មនុស្សប្រុសជាង73% និងស្ត្រីជាង 75% និយាយថា មានអារម្មណ៍ធូរស្រាល និងសប្បាយចិត្តឡើងវិញនៅពេលបានយំរួច។

7/ តើមនុស្សប្រុស និងមនុស្សស្រីយំដូចគ្នាឬទេ?

ការសិក្សាស្រាវជ្រាវពីស្ថាប័នជាច្រើនបានរកឃើញថា “ស្ត្រីមានសញ្ញាថានឹងយំញឹកញាប់ជាងបុរស” ដោយអ្នកគីមីវិទ្យា William Frey ប្រធានក្រុមអ្នកស្រាវជ្រាវដែលបានប្រើពេលវេលាសិក្សាអំពីទឹកភ្នែកជាពិសេសអស់រយៈពេលដល់ទៅ15ឆ្នាំបានរាយការណ៍ថា ក្នុង1ខែស្ត្រីយំ5.3ដង ចំណែកបុរសវិញយំប្រមាណតែ1.4ប៉ុណ្ណោះ។ ភាពញឹកញាប់នៃការយំដែលខុសប្លែកពីគ្នានេះ មួយផ្នែកកើតឡើងពី “អ័រម៉ូនប្រូលែកទីន” ដែលរាងកាយនឹងផលិតចេញមកនៅពេលដែលយើង “មានអារម្មណ៍ខ្លាំងដល់ទីបំផុត” ដូចជា ត្រេកអរបំផុត រំភើបចិត្តបំផុត ខូចចិត្ត ឬសោកស្ដាយបំផុត រហូតទៅដល់មួម៉ៅតានតឹងតែនិយាយមិនចេញ និងពិបាកចិត្តបំផុតជាដើម។ ក្នុងអំឡុងអារម្មណ៍បែបនេះ រាងកាយនឹងទម្លាយចេញមកជាដំណក់ទឹកភ្នែក ដើម្បីបញ្ចុះកម្រិតភាពតានតឹង ដោយស្ត្រីនឹងផលិតអ័រម៉ូននេះបានច្រើនជាងបុរសដល់ទៅ4ដង ទើបវាជាដើមហេតុឱ្យមនុស្សស្រីមានសញ្ញា និងទំនោរក្នុងការឆាប់ទួញយំ និងរំអួយជាងបុរស តែទាំងអស់នេះ វាអាស្រ័យលើែែហ្សន ខ្នាតរបស់បំពង់បង្ហូរទឹកភ្នែករបស់មនុស្សម្នាក់ៗ និងការចិញ្ចឹមមើលថែរបស់គ្រួសារផងដែរ។

ឃើញទេថា ទឹកភ្នែកដែលជាចំណែកតូចមួយរបស់រាងកាយយើង មានអ្វីដែលគួរឱ្យចាប់អារម្មណ៍ច្រើនណាស់ និងថែមទាំងបំពេញតួនាទីចម្បងៗ ជួយឱ្យយើងមើលឃើញបានយ៉ាងមានប្រសិទ្ធភាពទៀតផង។ បានដឹងបែបនេះហើយ ចូរកុំភ្លេចងាកមកយកចិត្តទុកដាក់មើលថែទាំកែវភ្នែក ដោយឧស្សាហ៍ទៅជួបគ្រូពេទ្យជំនាញខាងភ្នែក ដើម្បីទទួលយកការណែនាំក្នុងការមើលថែទាំសុខភាពកែវភ្នែក រួមទាំងពិនិត្យរកមើលអាការខុសប្រក្រតីផ្សេងៗ ដូចជា សភាវភ្នែកឡើងស្ងួតជាដើម។ ទាំងអស់នេះគឺដើម្បីប្រសិទ្ធភាពក្នុងការមើលឃើញដែលល្អបំផុត៕

January 23, 2018

និស្សិតនឹងក្លាយជាធនធានមនុស្សខ្លាំង បើចេះច្នៃពេលលេងទៅជាការសិក្សាតាមបច្ចេកវិទ្យា

នាពេលបច្ចុប្បន្ននេះ យើងសង្កេតឃើញថា បច្ចេកវិទ្យាបានដើរតួនាទីយ៉ាងសំខាន់ក្នុងការជំរុញឱ្យការរស់នៅរបស់មនុស្សកាន់តែមានលក្ខណៈប្រសើរឡើង ដោយក្នុងនោះរួមទាំងការអប់រំផងដែរ តែទោះបីជាយ៉ាងណាក៏ដោយ បណ្តាញដ៏អស្ចារ្យនេះក៏បានជះផលប៉ះពាល់មួយចំនួនផងដែរដល់យុវជន និងសង្គម។

លោកបណ្ឌិត សុក ស៊ីផាន់ណា ទីប្រឹក្សាជាន់ខ្ពស់នៃរាជរដ្ឋាភិបាលកម្ពុជា បានលើកឡើងថា បច្ចេកវិទ្យាជាបណ្តាញដែលអាចភ្ជាប់ទំនាក់ទំនងរវាងប្រជាជនកម្ពុជាជាមួយនឹងប្រជាជននៃបណ្តាប្រទេសអភិវឌ្ឍន៍នានានៅក្នុងតំបន់។ តែទោះជាយ៉ាងនេះក្តី ផលសំខាន់ដែលអាចទាញយកបានពីបច្ចេកវិទ្យា គឺអាស្រ័យលើអ្នកប្រើប្រាស់វាផ្ទាល់។ និស្សិតនិងយុវជនកម្ពុជាជាច្រើនទៀត ត្រូវតែចេះប្រើប្រាស់បណ្តាញបច្ចេកវិទ្យាឱ្យបានត្រឹមត្រូវដើម្បីចៀសវាងខាតបង់ទាំងពេលវេលា និងថវិកា។

លោកបណ្ឌិត បានមានប្រសាសន៍ថា ៖ “យុវជនគឺជាអ្នកដែលប្រើប្រាស់ឧបករណ៍បច្ចេកវិទ្យាច្រើនជាងគេ ហើយយុវជនក៏ជាអ្នកបន្តវេនយ៉ាងសំខាន់របស់សង្គមដែរ ហេតុនេះយើងគួរប្រើប្រាស់បច្ចេកវិទ្យាដើម្បីជាប្រយោជន៍ឱ្យបានច្រើនសម្រាប់ការរៀនសូត្រក៏ដូចជាការងារ ឬសម្រាប់ភ្ជាប់ទំនាក់ទំនងដ៏ល្អជាមួយមនុស្សជុំវិញខ្លួន ដើម្បីអភិវឌ្ឍខ្លួនឱ្យក្លាយជាធនធានមនុស្សដែលមានសក្តានុពលរបស់កម្ពុជាសម្រាប់ប្រកួតប្រជែងក្នុងសមាហរណកម្មអាស៊ាន។

លោកបណ្ឌិតបានបន្តថា នាពេលបច្ចុប្បន្ននេះ យើងមើលឃើញថា ឧបករណ៍អេឡិចត្រូនិកដែលយើងប្រើប្រាស់គឺមិនខុសពីសម្ភារទំនើបដែលគេប្រើប្រាស់នៅបណ្ដាប្រទេសអភិវឌ្ឍន៍នោះទេ នៅពេលដែលគេប្រើប្រាស់ទូរស័ព្ទទំនើប យើងក៏មានទូរស័ព្ទទំនើបប្រើ នៅពេលដែលប្រជាជននៃប្រទេសអភិវឌ្ឍន៍ប្រើផលិតផល Apple យើងក៏មាន Apple ប្រើហេតុនេះយើងត្រូវប្រើប្រាស់វាឱ្យមានប្រសិទ្ធភាព។

ពាក់ព័ន្ធនឹងបញ្ហានេះ ក្រសួងអប់រំ យុវជន និងកីឡា ក៏បានសហការជាមួយនឹងស្ថាប័ននានាដែលក្នុងនោះក៏មានអង្គការ STEM (Science, Technology, Engineering and Math) ដែលបានជំរុញឱ្យយុវជនកាន់តែយកចិត្តទុកដាក់ដើម្បីអភិវឌ្ឍសមត្ថភាពរបស់ខ្លួនជាមួយនឹងបច្ចេកវិទ្យា ដើម្បីក្លាយជាធនធានមនុស្សដែលសង្គមត្រូវការខ្លាំងនាពេលអនាគត។

រដ្ឋមន្ត្រីក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានលើកឡើងថា បច្ចុប្បន្ននេះជាសម័យបច្ចេកវិទ្យា ហេតុនេះស្ថាប័នអប់រំក៏បានប្រើប្រាស់បច្ចេកវិទ្យាជាច្រើនដើម្បីសម្រួលដល់ការសិក្សារបស់សិស្ស-និស្សិតកម្ពុជា ឱ្យពួកគាត់កាន់តែមានភាពងាយស្រួលក្នុងការស្រាវជ្រាវ ក៏ដូចជាការទាញយកឯកសារសំខាន់ៗពីគ្រឹះស្ថានសិក្សា និងក្រសួងដែលបានរៀបចំ និងដាក់ឱ្យប្រើប្រាស់។ ឯកឧត្តម បានលើកឡើងថា យើងចង់ឱ្យយុវជនកម្ពុជាចាប់ផ្តើមប្រើប្រាស់បច្ចេកវិទ្យាឱ្យមានប្រយោជន៍ ដោយដកពេលវេលាដ៏ច្រើនដែលតែងតែលេងនៅលើបណ្តាញទំនាក់ទំនង មកសិក្សា និងចែករំលែកចំណេះដឹងឱ្យបានច្រើនវិញ។

នាពេលបច្ចុប្បន្ននេះកម្ពុជាបានបង្កើតបណ្តាញអប់រំជាច្រើនដែលអាចអនុញ្ញាតឱ្យយុវជនកម្ពុជាទាញយកប្រយោជន៍ពីវាបានយ៉ាងទូលំទូលាយ តែជាទូទៅគេក៏សង្កេតឃើញផងដែរថា យុវជនកម្ពុជាមួយចំនួនបានចំណាយពេលវេលាច្រើនជាមួយនឹងបណ្តាញបច្ចេកវិទ្យាដែលមិនត្រឹមត្រូវ ហើយបណ្តោយឱ្យពេលវេលាជាច្រើនត្រូវបាត់បង់តាមរយៈការប្រើប្រាស់បណ្តាញសង្គមច្រើនជ្រុល ដោយចំណាយពេលតិចតួចប៉ុណ្ណោះសម្រាប់ការអប់រំ។

នាប៉ុន្មានឆ្នាំចុងក្រោយនេះសិស្ស-និស្សិតបានផ្លាស់ប្តូរវិធីសាស្ត្រក្នុងការស្រាវជ្រាវតាមបែបបុរាណមកស្រាវជ្រាវយ៉ាងទូលំទូលាយតាមបណ្តាញបច្ចេកវិទ្យា។ នៅបណ្តាប្រទេសជឿនលឿនមួយចំនួន ការសិក្សាតាមបែបបច្ចេកវិទ្យាគឺជាការសិក្សាដ៏ពេញនិយម និងទទួលជោគជ័យក្នុងការអភិវឌ្ឍ។

ឯកឧត្តម ហង់ ជួនណារ៉ុន បានមានប្រសាសន៍ថា ៖ “ក្រសួងអប់រំក៏បានបង្កើតកម្មវិធីសិក្សាតាមបែបអនឡាញ ដែលផ្តល់ជូននូវឯកសារជាច្រើនក្នុងកម្មវិធីសិក្សា ស្របពេលដែលមានកម្មវិធីមួយចំនួន គឺសិស្សអាចសាកល្បងសមត្ថភាពរបស់គាត់ផ្ទាល់តាមបណ្តាញបច្ចេកវិទ្យាបាន។

កញ្ញា អ៊ាន ម៉ានិត និស្សិតនៃសាកលវិទ្យាល័យបញ្ញាសាស្ត្រកម្ពុជា បានលើកឡើងថា ជាការមើលឃើញ និស្សិតជាច្រើនបានចំណាយពេលវេលាច្រើនជាមួយនឹងបណ្តាញបច្ចេកវិទ្យាដែលមិនត្រឹមត្រូវ ដូចជាការលេង Facebook រហូតដល់យប់ជ្រៅ ហើយមិនសូវរវល់ច្រើនជាមួយនឹងការសិក្សាទេ ដែលនេះជាហេតុធ្វើឱ្យគាត់បាត់បង់ឱកាសក្នុងការទាញយកផលវិជ្ជមានពីបណ្តាញសង្គម និងកម្មវិធីជាច្រើនផ្សេងទៀតដែលមាននៅក្នុងដៃរបស់គាត់។

កញ្ញា អ៊ាន ម៉ានិត បាននិយាយថា ៖ “នាពេលបច្ចុប្បន្ននេះ ជាមួយនឹងបណ្តាញបច្ចេកវិទ្យាយើងអាចស្រាវជ្រាវបានយ៉ាងទូលំទូលាយពីគ្រប់ទីកន្លែងនៅលើពិភពលោក។ ដើម្បីស្វែងរកឯកសារពីសាកលវិទ្យាល័យល្បីៗ ឬទិញសៀវភៅដែលយើងត្រូវការ យើងមិនចាំបាច់ត្រូវធ្វើដំណើរទៅដល់បរទេសនោះទេ យើងអាចប្រើប្រាស់បណ្តាញបច្ចេកវិទ្យាបាន ហេតុនេះយើងមានឱកាសច្រើនក្នុងការអភិវឌ្ឍសមត្ថភាពខ្លួនឯង តែពេលខ្លះដោយសារតែយុវជនមួយចំនួនមិនសូវយកចិត្តទុកដាក់ គេបែរជាចំណាយពេលវេលាច្រើនលើការប្រើប្រាស់បច្ចេកវិទ្យាបែបមិនត្រឹមត្រូវទៅវិញ។

កញ្ញា ម៉ានិត និស្សិតនៃសាកលវិទ្យាល័យបញ្ញាសាស្ត្រកម្ពុជា បានលើកឡើងផងដែរថា តាមពិតនៅពេលនេះ បច្ចេកវិទ្យាបានសម្រួលដល់ការរស់នៅច្រើនណាស់ តែអ្វីដែលគួរឱ្យស្តាយ នោះគឺយុវជនមួយចំនួនធំ បានប្រើប្រាស់បច្ចេកវិទ្យាខុសទំនងដែលធ្វើឱ្យយើងមានបញ្ហាក្នុងជីវិតទៅវិញហេតុនេះការដែលពិចារណាក្នុងការផ្លាស់ប្តូរពេលវេលាមួយចំនួនដែលគាត់ ចំណាយមិនត្រឹមត្រូវមកធ្វើការស្រាវជ្រាវតាមបណ្តាញបច្ចេកវិទ្យាវិញ អាចជាវិធីឆ្លាតវៃមួយដើម្បីក្លាយជាធនធានមនុស្សដែលសំខាន់សម្រាប់សង្គម៕

January 23, 2018

តើគួរដោះស្រាយបញ្ហាបបូរមាត់ដូចម្តេច?

ដូចជា បបូរមាត់ស្ងួតរហូតឡើងរបក ដោយភាគច្រើន ច្រើនកើតនៅលើអ្នកដែលមិនបានលាបក្រែមមាត់ បបូរមាត់ខ្វះសំណើមធ្វើឱ្យមើលទៅមិនពេញស្អាត ហើយបើស្ងួតខ្លាំងផងនោះ នឹងធ្វើឱ្យស្នាមឆ្នូតនៅលើបបូរមាត់លេចឡើងកាន់តែច្បាស់។

ជាប្រក្រតី ស្បែកគ្រប់កន្លែងរបស់រាងកាយមនុស្សយើងអាចរក្សាសំណើមបាន តែដោយសារបបូរមាត់ជាកន្លែងដែលគ្មានក្រពេញជាតិខ្លាញ់ និងមានកន្លែងដែលរក្សាជាតិទឹកនោះស្តើងពេក ទើបនៅពេលដែលជាតិសើមត្រូវហើរតាមខ្យល់អស់ បបូរមាត់នឹងឡើងស្ងួត និងប្រេះបែក ជាពិសេសរក្នុងដូវរងាបបូរមាត់នឹងស្ងួតខ្លាំងណាស់ ខ្លាំងជាងកន្លែងផ្សេងៗដល់ទៅ6ដងឯណោះ តែមិនបាច់កង្វល់ទេ ព្រោះអាចការពារបានដោយការលាបក្រែមរលោងឱ្យបានជាប់ជានិច្ច ដោយត្រូវជ្រើសរើសប្រើប្រភេទដែលមានជាតិប្រេងផ្សំជាមួយផង ទើបអាចជួយបាន ជាពិសេសបំផុតក្រោយពេលងូតទឹកគ្រប់ពេល នឹងអាចជួយការពារបានយ៉ាងល្អបំផុត។

វិធីជួយឱ្យបបូរមាត់មានភាពសើមជាប់ជានិច្ច

1/ ហាមលិទ្ធបបូរមាត់៖ ហាមយកអណ្តាតលិទ្ធបបូរមាត់ញឹកញាប់ អ្នកខ្លះចូលចិត្តលិទ្ធបបូរមាត់រហូតក្លាយជានិស្ស័យ វានឹងធ្វើឱ្យបបូរមាត់រឹតតែស្ងួតទៅវិញទេ ព្រោះពេលដែលអ្នកលិទ្ធនោះ វាសើមមែនហើយ តែភាពសើមនេះ នៅពេលត្រូវខ្យល់វានឹងរឹតតែធ្វើឱ្យបបូរមាត់កាន់តែស្ងួតខ្លាំងឡើង។

2/ ហាមលាបក្រែមរលោងច្រើនពេក៖ មិនគួរលាបក្រែមរលោងច្រើនពេកទេ ការលាបក្រែមរលោងញឹកញាប់ពេកក្នុងមួយថ្ងៃៗ ក៏អាចធ្វើឱ្យបបូរមាត់ស្ងួតបានដែរ ព្រោះពេលលាបនោះអ្នកត្រូវសង្កត់ក្រែមលើបបូរមាត់ទៅមកៗជាច្រើនដងក្នុងមួយថ្ងៃ ដូច្នេះមិនគួរលាបលើសពី3ដង ឬច្រើនបំផុត5ដងបានហើយ។

3/ ហាមខាំបបូរមាត់៖ មិនគួរខាំបបូរមាត់ញឹកញាប់ឡើយ ការខាំបបូរមាត់ញឹកញាប់រហូតក្លាយជាទម្លាប់នោះ ក៏អាចធ្វើឱ្យបបូរមាត់ស្ងួតបានដែរ ព្រោះបបូរមាត់គឺជាកន្លែងមួយដែលស្តើងខ្លាំងណាស់ និងអាចធ្វើឱ្យមានរបួស និងឆ្លងមេរោគបាន។

4/ លាបក្រែមរលោង៖ មុនលាបបបូរមាត់គួរលាបទ្រនាប់ដោយក្រែមរលោងជាមុនសិនការធ្វើដូច្នេះនឹងជួយឱ្យបបូរមាត់មានសំណើមល្អ រលោងស្អាត និងបបូរមាត់មិនឡើងខ្មៅផង។

កំណត់សំគាល់៖ គួរជ្រើសរើសប្រើក្រែមរលោងណាដែលមានចំណែកផ្សំរបស់ទឹកឃ្មុំ ដែលនឹងផ្តល់នូវសំណើម ហើយនិងសារជាតិប្រេងរបស់ផ្លែឈើ ឬគ្រាប់ធញ្ញជាតិ និងមាន SPF ការពារកម្ដៅថ្ងៃបានទៀតផង។

វិធីមើលថែទាំបបូរមាត់ដែលស្ងួត

1/ យកកន្សែងពោះគោដាក់ត្រាំក្នុងទឹកក្តៅប្រមាណជា 40អង្សា រួចស្រង់ឡើងយកមកពូតឱ្យស្ងួត។

2/ ដាក់ស្អំពីលើបបូរមាត់ដែលស្ងួតនោះប្រមាណ2-3នាទីរហូតដល់មានអារម្មណ៍ថា កន្សែងពោះគោលែងក្តៅហើយ។

3/ ដុសបបូរមាត់ថ្នមៗ យឺតៗដើម្បីឱ្យកម្ទេចស្បែកស្ងួតៗដែលជាប់នៅលើនោះរបូតជ្រុះចេញអស់ បន្ទាប់ពីនោះចូរលាបក្រែមរលោងភ្លាម។ វិធីនេះនឹងធ្វើឱ្យបបូរមាត់លែងស្ងួត និងមើលទៅពេញមូលក្លំ ពេលលាបក្រែមពណ៌នឹងមើលទៅឃើញស្អាត ហើយរលោងផង។

4/ អ្នកដែលមានបបូរមាត់ស្លេក មើលទៅភាគច្រើនៗមនុស្សដែលមានជំងឺប្រចាំកាយ ឬមនុស្សដែលមិនសូវមានឈាម ក្នុងករណីនេះ ត្រូវតែព្យាបាលសុខភាពឱ្យបានរឹងមាំ និងទទួលទានចំណីអាហារដែលមានប្រយោជន៍ ដូចជា ប្រភេទសារធាតុដែកជាដើម វានឹងជួយឱ្យលំហូរវិលរបស់លោហិតល្អអាចទៅចិញ្ចឹមបបូរមាត់ ធ្វើឱ្យបបូរមាត់ក្រហមឡើងវិញបាន។

5/ អ្នកដែលមានបបូរមាត់ពណ៌ស្រគាំខ្មៅ បើជាមនុស្សដែលមានសម្បុរខ្មៅនោះ មិនមែនជាបញ្ហាទេ ព្រោះជាធម្មជាតិរបស់វា តែបើមនុស្សសម្បុរ-សមានបបូរមាត់ខ្មៅវិញនោះ គឺពាក់ព័ន្ធនឹងការហូរវិលរបស់លោហិតដែលមិនសូវល្អប្រសើរប៉ុន្មាន ឬមនុស្សដែលជក់បារីជាប់ជាប្រចាំបបូរមាត់ក៏អាចឡើងខ្មៅបានដែរ ដូច្នេះគួរលាបក្រែមថែបំប៉នជាប្រចាំ និងធ្វើម៉ាស្សាបបូរមាត់ផង ដើម្បីឱ្យចរន្តលោហិតហូរបានល្អ ធ្វើឱ្យបបូរមាត់ពេញស្អាត និងមិនស្ងួតទៀតផង៕

January 23, 2018

ផ្លូវល្បឿនលឿន ភ្នំពេញ-ព្រះសីហនុ នឹងសាងសង់នៅឆ្នាំនេះ

ដោយទន្ទឹងរង់ចាំមើលអស់រយៈពេលជាច្រើនឆ្នាំមក ផ្លូវល្បឿនលឿនភ្នំពេញ-ព្រះសីហនុ ត្រូវបានកំណត់ពេលវេលាសាងសង់ជាផ្លូវការហើយ គឺនឹងចាប់ផ្តើមនៅក្នុងឆ្នាំ2018នេះតទៅ ក្នុងទំហំទឹកប្រាក់ប្រមាណជា 2ពាន់លានដុល្លារអាមេរិក។

គម្រោងផ្លូវល្បឿនលឿននេះត្រូវបានផ្សព្វផ្សាយក្រោយពីឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានចុះហត្ថលេខាលើកិច្ចព្រមព្រៀងសម្បទានសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវល្បឿនលឿនភ្នំពេញ-ព្រះសីហនុជាមួយសមភាគីចិន តំណាងដោយលោក Liu Qitao ប្រធានក្រុមហ៊ុនសំណង់គមនាគមន៍ចិន។ ពិធីចុះហត្ថលេខាខាងលើត្រូវបានប្រព្រឹត្តធ្វើឡើងក្រោមអធិបតីភាពដ៏ខ្ពង់ខ្ពស់របស់សម្តេចតេជោហ៊ុន សែន នាយករដ្ឋមន្ត្រី និងឯកឧត្តម លី ខឺឈាង នាយករដ្ឋមន្ត្រីនៃសាធារណរដ្ឋប្រជាមានិតចិន។

គម្រោងសាងសង់ផ្លូវល្បឿនលឿននេះនឹងត្រូវសាងសង់ដោយវិនិយោគិនចិនតាមរូបភាពវិនិយោគសាងសង់-ធ្វើអាជីវកម្ម-ផ្ទេរ (BOT) ជាផ្លូវ 4គន្លងមានប្រវែងសរុប 190.63 គីឡូម៉ែត្រ ចេញពីទីក្រុងភ្នំពេញរហូតដល់ខេត្តព្រះសីហនុ ជាផ្លូវថ្មីទាំងស្រុង ទ្រូងផ្លូវមានទទឹង 24ម៉ែត្រ ក្រាលកៅស៊ូ AC មានសួនច្បារខណ្ឌកណ្តាល មានផ្លូវបំបែកប្តូរទិស មានទីតាំងឈប់សម្រាក មានរបងបាំងសងខាងផ្លូវ និងមានហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត។

ក្រោយពេលសាងសង់រួច ផ្លូវល្បឿនលឿននេះនឹងជួយសម្រួលដល់ការធ្វើដំណើរទៅមករាជធានីភ្នំពេញ-ខេត្តព្រះសីហនុក្នុងរយៈពេលខ្លី កាត់បន្ថយហានិភ័យគ្រោះថ្នាក់ចរាចរណ៍ កាត់បន្ថយការកកស្ទះចរាចរណ៍ សម្រួលដល់ការដឹកជញ្ជូនទំនិញធ្វើឱ្យសេដ្ឋកិច្ចជាតិមានការរីកចម្រើនកាន់តែប្រសើរ។ លើសពីនេះទៀត ព្រះរាជាណាចក្រកម្ពុជានឹងទទួលបានផលចំណេញដែលមិនអាចកាត់ថ្លៃបានពីការអភិវឌ្ឍច្រករបៀងភ្នំពេញ-ព្រះសីហនុ។

លោក ហូ វណ្ឌី ប្រធានក្រុមហ៊ុន World Express Co,.Ltd មានប្រសាសន៍ថា ផ្លូវល្បឿនលឿនខាងលើ គឺជាសរសៃឈាមសេដ្ឋកិច្ចដ៏សំខាន់សម្រាប់ប្រជាពលរដ្ឋខ្មែរទាំងមូល។ លោកថា នៅពេលផ្លូវនេះសាងសង់រួច វានឹងផ្តល់អត្ថប្រយោជន៍ជាច្រើនទាំងវិស័យរដ្ឋ ឯកជន និងប្រជាពលរដ្ឋទូទៅពិសេសជួយសម្រួលដល់ការដឹកជញ្ជូនទំនិញផ្សេងៗ កាត់បន្ថយការចំណាយ កាត់បន្ថយពេលវេលា ជួយបង្កើនសុខុមាលភាព និងសុវត្ថិភាពជូនប្រជាពលរដ្ឋនៅពេលធ្វើដំណើរឆ្លងកាត់ម្តង។

លើសពីនេះ វាក៏បានជួយលើកកម្ពស់សេដ្ឋកិច្ចប្រជាពលរដ្ឋតាមមូលដ្ឋានសម្រាប់បង្កើតជាមុខរបរលក់ដូរផ្សេងៗ ដូចជាការលក់ដូរផលិតផលកសិកម្មប្រចាំភូមិឋានរបស់ពួកគេ ការបង្កើតភោជនីយដ្ឋានជាកន្លែងចតឈប់សម្រាកសម្រាប់ទទួលទានអាហារតាមផ្លូវ ហើយផ្លូវល្បឿនលឿនដំបូងនៅកម្ពុជានេះក៏អាចទាក់ទាញភ្ញៀវទេសចរឱ្យចូលមកកម្ពុជាបានកាន់តែច្រើនផងដែរ៕

January 23, 2018

NBC បន្តផ្អាកការផ្ដល់អាជ្ញាប័ណ្ណទទួលប្រាក់បញ្ញើដល់គ្រឹះស្ថានមីក្រូហិរញ្ញវត្ថុថ្មីក្នុងឆ្នាំ2018

ប្រតិបត្តិករហិរញ្ញវត្ថុឯកជនបានចាត់ទុកការសម្រេចរបស់ធនាគារជាតិកម្ពុជា (NBC )ចំពោះការរឹតបន្តឹងលើការទទួលប្រាក់បញ្ញើពីសាធារណជនរបស់គ្រឹះស្ថានមីក្រូហិរញ្ញវត្ថុតូចៗថា ជាសញ្ញាវិជ្ជមានមួយសម្រាប់គ្រប់គ្រងហានិភ័យក្នុងវិស័យហិរញ្ញវត្ថុនៅកម្ពុជា ស្របពេលដែលថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ គ្រោងរៀបចំគោលនយោបាយហិរញ្ញវត្ថុ ដោយកាត់បន្ថយការពឹងផ្អែកប្រភពហិរញ្ញវត្ថុពីក្រៅប្រទេស។

ធនាគារជាតិនៃកម្ពុជា នៅដើមឆ្នាំ2018នេះ បានប្រកាសបន្តផ្អាកការផ្តល់អាជ្ញាប័ណ្ណទទួលប្រាក់បញ្ញើពីសាធារណជនរបស់គ្រឹះស្ថានមីក្រូហិរញ្ញវត្ថុ ដើម្បីបង្កើនការប្រុងប្រយ័ត្នពីហានិភ័យក្នុងវិស័យនេះ ស្របពេលវិស័យគ្រឹះស្ថានមីក្រូហិរញ្ញវត្ថុទទួលប្រាក់បញ្ញើមានការរីកចម្រើនគួរឱ្យកត់សម្គាល់ទាំងទំហំ និងបណ្តាញប្រតិបត្តិការ។

លោក ស៊ីម សេនាជាតិ ប្រធាន និងជាអគ្គនាយកគ្រឹះស្ថានមីក្រូហិរញ្ញវត្ថុប្រាសាក់ ដែលជាគ្រឹះស្ថានមីក្រូហិរញ្ញវត្ថុឈានមុខមួយក្នុងចំណោមគ្រឹះស្ថានមីក្រូហិរញ្ញវត្ថុដែលទទួលបានអាជ្ញាប័ណ្ណទទួលប្រាក់បញ្ញើនៅកម្ពុជាបានឲ្យដឹងថា វាជាការល្អមួយដែលធនាគារជាតិសម្រេចចិត្តបែបនេះ។ លោកមានប្រសាសន៍ថា ការទទួលប្រាក់បញ្ញើ គឺជាការទទួលខុសត្រូវធំមួយ ព្រោះប្រាក់បញ្ញើរបស់អតិថិជន គឺជាក្តីសង្ឃឹម និងការជឿទុកចិត្តមកលើប្រព័ន្ធហិរញ្ញវត្ថុ។ លោកបានបន្ថែមថា គ្រឹះស្ថានមីក្រូហិរញ្ញវត្ថុខ្លះមានដើមទុនតិចតួច មិនស័ក្តិសមក្នុងការទទួលបានអាជ្ញាប័ណ្ណទទួលប្រាក់បញ្ញើនេះទេ ព្រោះវាមានហានិភ័យខ្ពស់សម្រាប់អតិថិជនដែលជាអ្នកដាក់ប្រាក់បញ្ញើ។

លោកអះអាងថា ប្រាសាក់បានទទួលអាជ្ញាប័ណ្ណទទួលប្រាក់បញ្ញើរបស់អតិថិជនតាំងពីឆ្នាំ2010 ហើយរហូតមកដល់ដំណាច់ឆ្នាំ2017 ប្រាក់បញ្ញើនៅគ្រឹះស្ថានមីក្រូហិរញ្ញវត្ថុប្រាសាក់បានកើនឡើងរហូតដល់ជាង 900លានដុល្លារអាមេរិក។ លោក ស៊ីម សេនាជាតិ មានប្រសាសន៍ទៀតថា៖ “ខ្ញុំយល់ថា វាជារឿងល្អ និងមានផលវិជ្ជមានសម្រាប់វិស័យហិរញ្ញវត្ថុ នៅពេលធនាគារជាតិសម្រេចបែបនេះ ព្រោះគ្រឹះស្ថានមីក្រូហិរញ្ញវត្ថុមានច្រើន ហើយគ្រឹះស្ថានខ្លះមានដើមទុនតិចតួច។

សេចក្តីជូនដំណឹងមួយចេញផ្សាយដោយធនាគារជាតិនៃកម្ពុជា ដែលជាបញ្ញត្តិករផ្នែកហិរញ្ញវត្ថុនៅកម្ពុជា បានបញ្ជាក់ថា បច្ចុប្បន្ន គ្រឹះស្ថានមីក្រូហិរញ្ញវត្ថុទទួលប្រាក់បញ្ញើអនុវត្តតាមបទប្បញត្តិប្រុងប្រយ័ត្នធូរស្រាលជាងធនាគារពាណិជ្ជ ដោយសារតែគ្រឹះស្ថានទាំងនោះបានប្រែក្លាយមកពីគ្រឺះស្ថានមីក្រូហិរញ្ញវត្ថុ។ ម្យ៉ាងទៀត គ្រឹះស្ថានមីក្រូហិរញ្ញវត្ថុទទួលប្រាក់បញ្ញើខ្លះបានក្លាយជាគ្រឹះស្ថានធំក្នុងចំណោមគ្រឹះស្ថានធនាគារ និងហិរញ្ញវត្ថុ ដោយផ្អែកលើទ្រព្យសកម្ម និងគ្រឹះស្ថានដទៃទៀតមានទ្រព្យសកម្មខ្ពស់ជាងធនាគារពាណិជ្ជដែលស្ថិតក្នុងលេខរៀងតូចបំផុតចំនួន10។

ធនាគារជាតិបានឲ្យដឹងថា តាមការសិក្សាយ៉ាងស៊ីជម្រៅរបស់ធនាគារជាតិនៃកម្ពុជា បានបង្ហាញថាភាពខុសគ្នារវាងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ និងធនាគារពាណិជ្ជមិនគួរឱ្យមានទៀតទេ ដោយសារតែគ្រឹះស្ថានទាំងពីរប្រភេទនេះ មានប្រតិបត្តិការប្រហាក់ប្រហែលគ្នា ដូច្នេះទាមទារឱ្យមានការកែសម្រួលបទប្បញ្ញត្តិឡើងវិញ។

ធនាគារជាតិនៃកម្ពុជាបានបន្ថែមថា ដើម្បីចៀសវាងភាពលម្អៀងផ្នែកបទប្បញ្ញត្តិ និងរក្សាបាននូវសុវត្ថិភាព និងភាពរឹងមាំនៃវិស័យធនាគារដែលអនុវត្តស្របតាមគោលការណ៍ត្រួតពិនិត្យប្រកបដោយភាពប្រុងប្រយ័ត្ន និងស្របតាមស្តង់ដារអភិក្រមក្នុងការទប់ស្កាត់នូវហានិភ័យ និងការពារសាធារណជនជាអ្នកផ្ញើប្រាក់ ធនាគារជាតិនៃកម្ពុជាសម្រេចផ្អាកជាបណ្តោះអាសន្នក្នុងការផ្តល់អាជ្ញាប័ណ្ណទទួលប្រាក់បញ្ញើពីសាធារណជនដល់គ្រឹះស្ថានមីក្រូហិរញ្ញវត្ថុ។

យោងតាមរបាយការណ៍ធនាគារជាតិនៃកម្ពុជាបានបង្ហាញថា គិតត្រឹមពាក់កណ្តាលឆ្នាំ 2017 ធនាគារពាណិជ្ជនៅកម្ពុជាមានចំនួន 39 ធនាគារឯកទេស15 គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជនចំនួន 7 គ្រឹះស្ថានមីក្រូហិរញ្ញវត្ថុចំនួន 66 និងប្រតិបត្តិករឥណទានជនបទចំនួន 267។

ថ្លែងនៅក្នុងឱកាសសន្និបាតធនាគារជាតិនៃកម្ពុជា កាលពីដើមខែមករានេះ ឯកឧត្តម ជា ចាន់តូទេសាភិបាលធនាគារជាតិនៃកម្ពុជា បានសម្ដែងក្តីរំពឹងថា វិស័យធនាគារនឹងបន្តរីកចម្រើនប្រកបដោយបរិយាប័ន្ន និង ផ្តល់សេវាហិរញ្ញវត្ថុដល់់វិស័យចម្បងនៃសេដ្ឋកិច្ច៕

January 23, 2018

LG ទទួលបានពានរង្វាន់ឆ្នើមនៃផលិតផលទូរទស្សន៍ល្អផ្តាច់គេនៅក្នុងព្រឹត្តិការណ៍ CES 2018

LG អេឡិចត្រូនិច មានកិត្តិយសជាខ្លាំងជាមួយនឹងការទទួលពានរង្វាន់ច្រើនជាង 90 នៅក្នុងព្រឹត្តិការណ៍ CES 2018 និង 4ឆ្នាំជាប់ៗគ្នា សម្រាប់ឆ្នាំនេះគឺទូរទស្សន៍ LG ស៊េរីថ្មី AI OLED Tv (model C8)។ LG ក៏ទទួលបាននូវកិត្តិយសជាច្រើនក្នុងការបង្ហាញទូរទឹកកក InstaView ThinQ™ និង LG 4K UHD Projector ផងដែរ។

LG ទទួលបាននូវពានរង្វាន់កំពូលៗពីស្ថាប័នដូចជា Engadget,The Verge, Digital Trends, Mashable, SlashGear, TechRadar, Pocket-lint, T3, Stuff Magazine និងលើសពីនេះទៅទៀត LG ក៏ទទួលបានពានរង្វាន់ទាំង19 CES Innovation Awards ពី Consumer Technology Association រាប់បញ្ចូលពានរង្វាន់ច្នៃប្រឌិតល្អផ្តាច់គេសម្រាប់ LG 4K UHD Projector និងឧបករណ៍ប្រើប្រាស់ និងគ្រឿងកម្សាន្តក្នុងគេហដ្ឋាន ហើយនិងទូរស័ព្ទដៃផងដែរ ។

ការច្នៃប្រឌិតថ្មីរបស់ក្រុមហ៊ុន LG ឆ្នាំ 2018 បានដាក់បង្ហាញនៅក្នុងព្រឹត្តិការណ៍ CES រួមបញ្ចូលទាំងផលិតផលប្រើប្រាស់ក្នុងផ្ទះ ឧបករណ៍កម្សាន្តតាមគេហដ្ឋានជាមួយនិង LG ThinQ AI រួមទាំងទូរទស្សន៍ដំបូងគេបង្អស់ដែលមានកម្មវិធីជំនួយ Google Assitant នៅក្នុងទូរទស្សន៍ LG SIGNATURE AI OLED TV W8 ដែលមានលក្ខណៈពិសេស ThinQ ដែលបានឈ្នះពានរង្វាន់ច្រើនជាង 10 នៅក្នុងព្រឹត្តិការណ៍ CES។ ទូរទឹកកក LG Instaview ThinQ ទទួលបានពានរង្វាន់ដែលផ្តល់នូវបទពិសោធន៍ថ្មីក្នុងការគ្រប់គ្រងអាហារតាមរយៈ WebOS របស់ LG និងរួមបញ្ចូលជាមួយ Amazon Alexa ដែលធ្វើអោយកាន់តែងាយស្រួលក្នុងការទិញអាហារ ចាក់ចម្រៀង ត្រួតពិនិត្យអាកាសធាតុ គ្រប់គ្រងប្រតិទិន និងផ្សេងៗទៀត។ក្រុមហ៊ុន LG ក៏បានបង្ហាញនូវបច្ចេកវិទ្យាថ្មីដែលមានឈ្មោះថា α (អាល់ហ្វា) 9 Processor ដែលជួយបង្កើនសមត្ថភាព LG AI OLED TVs របស់ខ្លួន និងបង្ហាញទូរស័ព្ទដៃ LG V30 ពណ៌ថ្មី Raspberry Rose ដ៏លេចធ្លោ។

ពានរង្វាន់កំពូលៗដែល LG ទទួលបាននៅក្នុងកម្មវិធី CES ឆ្នាំ 2018 មានដូចជា:

LG AI OLED TV C8: Engadget: Best of CES – Best TV Product / Reviewed.com: CES Editors’ Choice Awards

LG SIGNATURE AI OLED TV W8 with ThinQ / α (Alpha) 9 Processor: Consumer Technology Association 2018 CES Innovation Awards: Video Displays / Pocket-lint: Best TVs of CES / Techlicious CES Top Picks / TechRadar: The Best Tech at the Show / TWICE: Picks Awards

LG InstaView ThinQ Refrigerator: BGR: Best of CES / Consumer Technology Association 2018 CES Innovation Awards: Home Appliance / Gadgetmatch: Best of CES / Gear Diary: Best of CES / Reviewed.com: CES Editors’ Choice Awards / TWICE: Picks Awards

LG 4K UHD Projector: 9 to 5 Toys: Best of CES / Consumer Technology Association: 2018 CES Innovation Awards – Best of Innovation / TWICE: Top Picks Awards

LG 34-inch 5K UltraWide Monitor: MacRumors: CES 2018 – Best of CES Unveiled / SlashGear: Best of CES / The Verge: Awards at CES

LG V30 Smartphone: Consumer Technology Association 2018 CES Innovation Awards: Wireless Handsets and Accessories / Videomaker: Best Smartphone of CES

សំរាប់បញ្ចីពេញពានរង្វាន់របស់ក្រុមហ៊ុនLGនៅក្នុងកម្មវិធី CES 2018 និងព័ត៌មានបន្ថែមរបស់ផលិតផល LG នៅក្នុងកម្មវិធី CES សូមចូលទៅកាន់ www.LGnewsroom.com/ces2018.៕

January 22, 2018

ឈាមចេញតាមធ្មេញ គួរទៅរកទន្តពេទ្យដែរឬទេ?

សភាវឈាមចេញតាមធ្មេញ និងអញ្ចាញធ្មេញ ខណៈពេលដុសសម្អាតធ្មេញដោយប្រើកម្លាំងខ្លាំងៗ តើគួរតែទៅជួបទន្តពេទ្យដែរឬទេ? សភាវនេះអាចជាសញ្ញារបស់ជំងឺរលាកអញ្ចាញធ្មញ និងរលាកអាប់សែ។ ដូច្នេះហើយជំងឺរលាកអញ្ចាញធ្មេញនៅក្នុងអំឡុងពេលដំបូងៗ ប្រសិនបើអ្នកបណ្ដែតបណ្ដោយមិនព្រមទៅធ្វើការព្យាបាល ថែទាំទេនោះ រោគអាប់សែមួយនេះ អាចនឹងបណ្ដាលឱ្យមានគ្រោះថ្នាក់អាក្រក់ ហើយស្ថានភាពសុខភាពធ្មេញក៏កាន់តែដុនដាបអាក្រក់ឡើងៗ ហើយរលាកធ្ងន់ធ្ងរថែមទៀតផង។

យ៉ាងណាមិញ បើអ្នកបានទៅជួបព្យាបាលជាមួយទន្តពេទ្យកាន់តែលឿន គឺកាន់តែប្រសើរ ហើយងាយនឹងព្យាបាលថែមទៀតផង។ ទន្ដពេទ្យអាចជួយលោកអ្នកបានទៅតាមដំណាក់កាលនៃការរលាក ហើយទន្ដពេទ្យនឹងធ្វើការថែទាំអញ្ចាញធ្មេញរបស់អ្នកឡើងវិញ រហូតដល់មានសុខភាពធ្មេញល្អឡើងវិញ។

អញ្ចាញ និងការត្រួតពិនិត្យសុខភាពធ្មេញជាប្រចាំ

មិនថាមានឈាមចេញមកខណៈដែលអ្នកដុសសម្អាតធ្មេញឬអត់នោះទេ? អ្នកក៏គួរតែទៅជួបជាមួយទន្ដពេទ្យយ៉ាងហោចណាស់ជារៀងរាល់6ខែម្តង។ ការទៅជួបទន្ដពេទ្យជាទៀងទាត់ គឺអាចការពារ និងប្រយុទ្ធប្រឆាំងជាមួយជំងឺរលាកអញ្ចាញធ្មេញ ហើយមានមូលហេតុចាំបាច់ទាំង 2ប្រការនេះ។

មូលហេតុទីមួយគឺ នៅពេលអ្នកទៅពិនិត្យសុខភាពមាត់ធ្មេញ នោះទន្តពេទ្យនឹងធ្វើការពិគ្រោះថា តើអ្នកមានជំងឺរលាកអញ្ចេញធ្មេញ ឬមានជំងឺពុកធ្មេញដែរឬទេ? ហើយត្រូវពិនិត្យមើលអាការផ្សេងៗ ដើម្បីការពារសុខភាពមាត់ធ្មេញរបស់អ្នកបានខ្លះ។ ហេតុផលទីពីរគឺ ទន្ដពេទ្យនឹងជួយកម្ចាត់កំបោរ និងដង្កូវខ្មៅៗដែលមាននៅគល់ធ្មេញ និងលើអញ្ចាញធ្មេញ ដោយប្រើប្រាស់វិធីសាស្ត្រម្យ៉ាង ដែលទន្ដពេទ្យហៅថា សម្អាតធ្មេញ។

ក្រាកំបោរធ្មេញ គឺជាមូលហេតុមួយដែលបណ្ដាលឱ្យអ្នកមានជំងឺរលាកអញ្ចាញធ្មេញ បាក់តេរីដែលបានសម្ងំរស់នៅជាមួយក្រាកំបោរ វាអាចកកើតបាន ហើយបង្កើតមេរោគជំងឺរលាកអញ្ចាញ និងធ្វើឱ្យធ្មេញមានសភាពពុកផុយ ទាំងគល់ធ្មេញរហូតស៊ីចូលទៅដល់ផ្ទៃខាងក្នុងនៃឫសធ្មេញ។

ក្រៅពីការដុសសម្អាតធ្មេញជាមួយថ្នាំដុសធ្មេញជារៀងរាល់ថ្ងៃហើយនោះ អ្នកគប្បីត្រូវតែទៅជួបទន្តពេទ្យ ដើម្បីធ្វើការសម្អាតក្រាកំបោរចេញពីធ្មេញជារៀងរាល់ខែ ទៅតាមកំណកក្រាស់ ឬស្ដើង ដើម្បីកុំឱ្យមានបាក់តេរីជាប់នៅនឹងធ្មេញ។ ទន្តពេទ្យនឹងណែនាំថ្នាំដុសធ្មេញប្រភេទណាដែលស័ក្ដិសមទៅនឹងស្ថានភាពធ្មេញរបស់អ្នក ហើយថែមទាំងអាចការពារធ្មេញអ្នកបានថែមទៀតផង។

មូលហេតុនានាដែលធ្វើឱ្យមានឈាមហូរតាមចន្លោះធ្មេញ

ជំងឺរលាកអញ្ចាញធ្មេញ មិនមែនមានមូលហេតុតែម្យ៉ាងនៃការហូរឈាមតាមចន្លោះធ្មេញនោះទេ។ ការដែលទើបតែចាប់ផ្ដើមធ្វើការដុសសម្អាតធ្មេញជាលើកដំបូង ឬការប្រើប្រាស់ថ្នាំផ្សះមិនឱ្យហូរឈាមតាមអញ្ចាញធ្មេញ ក៏អាចធ្វើឱ្យកើតជាបញ្ហារលាកអញ្ចាញធ្មេញបានដែរ។

ប្រសិនបើអ្នកធ្វើការដុសសម្អាតធ្មេញ ហើយសង្កេតឃើញមានការហូរឈាមមិនឈប់ក្នុងរយៈពេលមួយសបា្តហ៍ នោះអ្នកត្រូវប្រញាប់ទៅរកទន្ដពេទ្យ ព្រោះជាទូទៅ ការដុសសម្អាតធ្មេញជាលើកដំបូង អាចនឹងមានឈាមហូរខ្លះ ហើយនឹងបាត់ទៅវិញក្នុងរយៈពេលមិនដល់មួយសប្តាហ៍ឡើយ។ នៅក្នុងករណីដែលទន្ដពេទ្យបានឱ្យថ្នាំដែលជួយផ្សះការហូរឈាមធ្មេញហើយនៅតែមិនមានប្រសិទ្ធភាពទៀតនោះ អ្នកត្រូវពិគ្រោះជាមួយពេទ្យក្នុងការផ្លាស់ប្ដូរថ្នាំ ជាពិសេសស្ត្រីមានផ្ទៃពោះ ត្រូវពិចារណាជាមួយគ្រូពេទ្យជំនាញជាមុនសិន។

ខណៈដែលស្ត្រីកំពុងតាំងគភ៌ មូលហេតុដែលបណ្ដាលឱ្យមានជំងឺនេះ អាចមកពីបំរែបំរួលអ័រម៉ូន បានធ្វើឱ្យអញ្ចាញធ្មេញទន់ខ្សោយ និងមានបាក់តេរីរស់នៅច្រើនផងដែរ។ ដូច្នេះហើយបើអ្នកសង្កេតឃើញថា អ្នកកំពុតែមានជំងឺរលាកអញ្ចាញធ្មេញ និងមានឈាមហូរនៅចន្លោះធ្មេញមិនបាត់ទេនោះ សូមប្រញាប់ទៅជួបទន្តពេទ្យ ដើម្បីធ្វើការព្យាបាលភ្លាម កុំបង្អង់យូរឱ្យសោះ៕

January 22, 2018

Author: វល័ក្ខ