វល័ក្ខ - La Reine Media

ក្រុម Hurricane A លើកពាន Tiger street Football Festival 2018 ប្រចាំមណ្ឌលព្រះសីហនុ

ព្រះសីហនុ៖ ការប្រកួតបាល់ទាត់ហ្វូតសាលនៃក្របខ័ណ្ឌពានរង្វាន់ Tiger Street Football Festival 2018 ប្រចាំមណ្ឌលព្រះសីហនុ បានរកឃើញម្ចាស់ជើងឯកឆ្នាំនេះហើយ ដោយបានទៅលើក្រុម Hurricane A ក្រោយពីយកឈ្នះលើក្រុម ស្នងការដ្ឋាននគរបាលខេត្តព្រះសីហនុ A ក្នុងលទ្ធផល ១-0។

ការប្រកួតយ៉ាងស្វិតស្វាញរយៈពេល២ថ្ងៃពេញនៅមណ្ឌលព្រះសីហនុដោយមានក្រុមចូលរួមដល់ទៅ៥៤ក្រុម។ ដោយឡែកនៅវគ្គផ្ដាច់ព្រ័ត្រកាន់តែស្វិតស្វាញថែមទៀត ដោយក្រុមខ្លាំង ស្នងការដ្ឋាននគរបាលខេត្តព្រះសីហនុ A ត្រូវការពារតំណែងជើងឯករបស់ខ្លួន តតាំងជាមួយក្រុម Hurricane A ។

មុនឈានមកដល់វគ្គផ្ដាច់ព្រ័ត្រនេះ ក្រុម Hurricane A បានយកឈ្នះលើក្រុមស្នងការដ្ឋាននគរបាលខេត្តព្រះសីហនុ B ក្នុងលទ្ធផល ៧-។ ចំណែកឯក្រុមស្នងការដ្ឋាននគរបាលខេត្តព្រះសីហនុ A បានយកឈ្នះលើក្រុម sihanoukville ស្វិតស្វាញមែនទែន ដោយត្រូវដកគ្នាដល់ទៅ២នាក់ ទើបអាចយកឈ្នះបាន។ ខណៈដែលក្រុម Nazaro Sport Club ក៏បានយកឈ្នះលើក្រុម ស្នងការដ្ឋានខេត្តកំពតA ក្នុងលទ្ធផល ៣ – ១ វគ្គពាក់កណ្ដាលផ្ដាច់ព្រ័ត្រ។ ហើយក្រុម Nazaro Sport Club បន្តយកឈ្នះក្រុម យុវជនកំពង់ផែ A ទើបអាចទទួលបានចំណាត់ថ្នាក់លេខ3។

សម្រាប់រង្វាន់ក្រុមជើងឯកនៅមណ្ឌលខេត្តព្រះសីហនុគឺ Hurricane A ទទួលបានប្រាក់រង្វាន់១ ៥០០ដុល្លារ

ក្រុមជើងឯករងបានទៅលើក្រុម ស្នងការដ្ឋាននគរបាលខេត្តព្រះសីហនុ A ប្រាក់រង្វាន់១ ០០០ដុល្លារ ក្រុមចំណាត់ថ្នាក់លេខ៣ បានទៅលើក្រុម Nazora Sport Club ប្រាក់រង្វាន់៥០០ដុល្លារ ក្រុមចំណាត់ថ្នាក់លេខ៤បានទៅលើ យុវជនកំពង់ផែ A ប្រាក់រង្វាន់ ២០០ដុល្លារ។
ដោយឡែក ក្រុមចំណាត់ថ្នាក់លេខ៥ គឺក្រុម Sihanoukville និងក្រុមចំណាត់ថ្នាក់លេខ៦ គឺក្រុមយុវជនកំពង់ផែ B ក៏មានសិទ្ធិចូលប្រកួតថ្នាក់ជាតិនៅរាជធានីភ្នំពេញ ដូចក្រុមលេខ១ដល់លេខ៤ដែរ។

គួររម្លឹកថា Tiger Street Football Festival មិនដូចបាល់ទាត់ធម្មតា ហ្វូតសាល និងបាល់ទាត់ប្រភេទផ្សេងទៀតទេ គឺជាការប្រកួតបាល់ទាត់នៅលើទីលានរាងទ្រវែងទំហំ២៥មx១៤.៥មដែលជាកន្លែងប្រមូលផ្តុំសកម្មភាពប្រកួតឥតឈប់ឈរ។ ហើយជាការ ប្រកួតដែលមានកីឡាករមិនលើសពី៥នាក់នៅលើទីលាន មានសកម្មភាពប្រកួតយ៉ាងស្វិតស្វាញ ឥតឈប់ឈរនឹងធ្វើឲ្យទស្សនិកជនរំភើបរីករាយទស្សនាការប្រកួត។ ការប្រកួតមានរយៈពេលសរុប១២នាទី ដែលបែងចែកជាពីរវគ្គមានរយៈពេល៦នាទីពីរដង ហើយមានការសម្រាក២នាទីនៅចន្លោះវគ្គ(៦នាទី)ទាំងពីរ។សម្រាប់ការប្រកួតចាប់ពីវគ្គពាក់កណ្តាលផ្តាច់ព្រ័ត្រ (បួនក្រុមចុងក្រោយ) ការប្រកួតនីមួយៗមានរយៈពេល ១០នាទីពីរវគ្គ និងមានរយៈពេលសម្រាកចន្លោះវគ្គចំនួន ៤នាទី។

ការប្រកួតជម្រុះក្នុងកម្មវិធី Tiger street Football Festival 2018 នឹងធ្វើឡើងនៅមណ្ឌលបន្ទាប់គឺ៖ ខេត្តកំពង់ស្ពឺ នៅថ្ងៃទី ២៨ ខែមករា ឆ្នាំ ២០១៨ នៅដីឡូ ឧកញ៉ាឈួន គឹមសាន្តទីរួមខេត្តកំពង់ស្ពឺ។

ដូច្នេះសូមកុំភ្លេចចូលរួមទស្សនាការប្រកួតជម្រុះនៅខេត្តកំពង់ស្ពឺឲ្យបានច្រើនកុះករ។

ចំពោះសកម្មភាពផ្សេងៗនៃព្រឹត្តិការណ៍ Tiger street Football Festival 2018 នៅខេត្តព្រះសីហនុ សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
#TSFF2018

សូមពិសាដោយការទទួលខុសត្រូវ

January 24, 2018

ពេជ្រ ពិសាល៖ ចង់ជោគជ័យត្រូវមើលឱ្យឆ្ងាយជាងអ្នកដទៃ

នៅពីក្រោយវេទិកាដែលមានអ្នកចូលរួមរហូតដល់រាប់ពាន់នាក់ និងមានវាគ្មិនជាពាណិជ្ជករជោគជ័យជាច្រើននាក់ដែលបានមកចែករំលែកបទពិសោធជីវិតរបស់ខ្លួនទៅកាន់យុវជនកម្ពុជាជំនាន់ថ្មី មានបុរសម្នាក់ដែលពោរពេញដោយភាពរឹងមាំ ដែលតែងតែខិតខំគ្រប់បែបយ៉ាងដើម្បីឱ្យវេទិកាដ៏រស់រវើកនេះកើតឡើង។

បុរសម្នាក់នោះគឺ លោក ពេជ្រ ពិសាល ស្ថាបនិកកម្មវិធី Daily Plus ដែលជាកម្មវិធីបណ្តុះបណ្តាលយុវជនកម្ពុជាឱ្យមានគំនិតវិជ្ជមាននៅក្នុងការសិក្សា ក្នុងការងារ ក្នុងជីវិតគ្រួសារ និងក្នុងសង្គមជាក់ស្តែង។ ស្ថាប័នដែលគ្រប់គ្នាបានឃើញនេះ បានបង្កើតបេសកកម្មជាច្រើនតាមរយៈការជំរុញយុវជនឱ្យចាប់ផ្តើមមើលពីគំរូល្អរបស់បុគ្គលខ្លាំងៗក្នុងសង្គម ហើយពិចារណាលើគោលដៅជីវិត និងសកម្មភាពផ្ទាល់ខ្លួន។ ផ្លាស់ប្តូរពួកគេពីមនុស្សម្នាក់ដែលអសកម្ម ឱ្យក្លាយជាមនុស្សសកម្ម ហើយចែករំលែកនូវផ្នត់គំនិតអប់រំ និងផ្តល់ឱកាសសម្រាប់អ្នកដែលជោគជ័យដើម្បីបន្តចែករំលែក។

1. កុមារភាព និងផ្នត់គំនិតអភិវឌ្ឍន៍
ជាកូនប្រុសម្នាក់ក្នុងចំណោមបងប្អូន 5នាក់ លោក ពេជ្រ ពិសាល បានកើតក្នុងគ្រួសារដែលមានកម្រិតជីវភាពមធ្យម ដោយឪពុកម្តាយជាម្ចាស់ចម្ការនៅស្រុកមេមត់ ខេត្តកំពង់ចាម ដែលបច្ចុប្បន្ននេះជាខេត្តត្បូងឃ្មុំ។

ក្នុងវ័យកុមារ បើទោះបីជា ពិសាល មានបងប្អូនច្រើនក៏ដោយ តែជាទូទៅនៅចំពោះមុខការទំនាក់ទំនងជាមួយមនុស្សដទៃ គេជាមនុស្សម្នាក់ដែលចូលចិត្តនៅតែម្នាក់ឯង ខ្លាចមនុស្ស ហើយមិនសូវចង់ទំនាក់ទំនងជាមួយមនុស្សដទៃនោះទេ។ នៅក្នុងកុមារភាពដ៏ទន់ខ្សោយនេះ មនុស្សទូទៅប្រហែលជាស្មានមិនត្រូវទេថា អនាគតរបស់គាត់នឹងអាចក្លាយជាអ្នកគ្រប់គ្រងគម្រោងប្រកបដោយភាពច្នៃប្រឌិតម្នាក់ បើគាត់មិនជួបរឿងវិជ្ជមានមួយចំនួននៅក្នុងដំណើរជីវិត ដែលបានបង្រៀនគាត់នៅពេលនោះ។ ក្នុងវ័យប្រហែល 10ឆ្នាំ រឿងមួយដែលធ្វើឱ្យកុមារ ពិសាល មានការផ្លាស់ប្តូរ និងបង្រៀនគាត់ពីមេរៀនយ៉ាងសំខាន់ក្នុងជីវិត គឺការប្រមូលកំប៉ុងភេសជ្ជៈក្នុងកម្មវិធីមង្គលការមួយ។ កាលនោះដោយវ័យនៅក្មេង ហើយជាមនុស្សមិនសូវចូលចិត្តជួបមនុស្សផង កុមារពិសាល បានរងការរិះគន់យ៉ាងច្រើនពីមនុស្សធំ និងអ្នកដែលនៅជុំវិញខ្លួន ព្រោះថា គាត់ជាកូនក្នុងគ្រួសារជីវភាពមធ្យម ដែលមិនមែនជារឿងចាំបាច់អីក្នុងការរកលុយពីការរើសកំប៉ុងលក់នោះទេ ហើយមានមនុស្សមួយចំនួនទៀតក៏បានស្តីឱ្យគាត់ខណៈគាត់នៅតែជម្នះប្រមូលវាឱ្យបាន ច្រើនរហូតដល់ពេញក្រោមផ្ទះ។

ក្រោយពេលចប់កម្មវិធីមង្គលការនោះ រឿងដែលធ្វើឱ្យគាត់ភ្ញាក់ផ្អើលគឺ មនុស្សជាច្រើនបានបង្វែរឥរិយាបថរបស់ពួកគេ ដោយបានចាប់ផ្តើមសរសើរពិសាលវិញថា គាត់ជាមនុស្សដែលមានគំនិតចេះប្រមូលទុកដាក់ និងរកលុយបានច្រើន។ មេរៀនមួយនេះ បានធ្វើឱ្យគាត់យល់ថា ជាទូទៅនៅពេលដែលយើងធ្វើអ្វីមួយ តែងតែមានមនុស្សដទៃជំទាស់ តែអ្វីដែលសំខាន់នោះគឺ តើយើងអាចធ្វើវាបានដោយចប់ចុងចប់ដើមដែរឬទេ? ប្រសិនបើយើងធ្វើវាហើយទទួលបានលទ្ធផលល្អ មនុស្សជាច្រើននឹងចាប់ផ្តើមឱ្យតម្លៃយើង ហេតុនេះរាល់ឧបសគ្គទាំងអស់នៅដំណាក់កាលដំបូងនៃការងារ គឺត្រូវជម្នះឱ្យបាន ហើយព្យាយាមគ្រប់លទ្ធភាពដើម្បីធ្វើវាឱ្យចប់ ព្រោះតម្លៃរបស់យើងនឹងទទួលបានមកវិញនៅពេលចុងក្រោយនេះឯង។

ចាប់ពីពេលនោះមក ពិសាល តែងតែព្យាយាមគ្រប់លទ្ធភាពដើម្បីអភិវឌ្ឍខ្លួនឯង ហើយចាប់ផ្តើមប្តូរគំនិតពីការខ្លាចមនុស្ស មកខិតខំប្រឹងប្រែងរៀនទាំងក្នុងសាលា និងជីវិតជាក់ស្តែង ទោះជាការសិក្សាមិនទទួលបានលទ្ធផលល្អឥតខ្ចោះក៏ដោយ។ ជាបន្តបន្ទាប់ គាត់ក៏ចាប់ផ្តើមក្លាយជាមនុស្សម្នាក់ដែលមានគំនិតដោយខ្លួនឯង ហើយចូលចិត្តធ្វើការងារទាំងឡាយណាដែលក្មេងដទៃធ្វើមិនកើត រហូតដល់គាត់ចម្រើនវ័យក្លាយជាយុវជនដែលសកម្មក្នុងការងារគម្រោងនានានៅថ្នាក់វិទ្យាល័យ។ មកដល់ថ្នាក់វិទ្យាល័យ គាត់ក៏បានចាប់ផ្តើមធ្វើរឿងលំបាកមួយទៀតដែលមនុស្សទូទៅ រួមទាំងអ្នករៀនថ្នាក់ធំជាងគាត់ព្យាយាមគេចវេះមិនព្រមធ្វើ នោះគឺការប្រមូលមនុស្សដើម្បីចូលរួមក្នុងសកម្មភាពសង្គម។ នៅថ្នាក់ទី11 តាមរយៈគម្រោងរបស់អង្គការមួយ លោកបានប្រមូលសិស្ស រួមទាំងនិស្សិតប្រហែលជា 300នាក់ដើម្បីទៅចូលរួមស្តាប់សវនាការនៅសាលាក្តីកាត់ទោសខ្មែរក្រហម។ នៅពេលដំបូងមនុស្សជាច្រើន រួមទាំងសិស្សច្បង\នៅមហាវិទ្យាល័យផងគិតថា គាត់មិនអាចធ្វើបាននោះទេ តែអ្វីដែលសំខាន់គឺគាត់ចង់សាកល្បងនូវអ្វីដែលមនុស្សទូទៅគិតថាគាត់ធ្វើមិនបាន ហេតុនេះគាត់ក៏បានសហការគ្នាជាមួយនឹងក្រុមសិស្សមួយចំនួននៅតាមវិទ្យាល័យ និងមហាវិទ្យាល័យដើម្បីផ្សព្វផ្សាយ និងប្រមូលមនុស្សធ្វើការងារសង្គម។ នៅពេលនោះ រឿងដ៏គួរឱ្យភ្ញាក់ផ្អើលមួយបានកើតឡើងចំពោះគាត់ ព្រោះថា មនុស្សចំនួនប្រមាណ300នាក់ បានប្រមូលផ្តុំគ្នានៅមុខសាលាខេត្តដើម្បីរួមដំណើរជាមួយគាត់ខណៈក្រុមការងារដែលជាសិស្សច្បងទាំងអស់បានរត់ចោលអស់ ពេលនោះមានអ្នកចូលរួមច្រើនហួសពីការស្មាន ដែលធ្វើឱ្យមនុស្សម្នានៅក្នុងខេត្តមានការភ្ញាក់ផ្អើល។ ជាដំណោះស្រាយ យុវជន ពិសាល ចាំបាច់ត្រូវតែស្ទុះស្ទាស្វែងរកជំនួយដើម្បីទាក់ទងអ្នករៀបចំឡានក្រុងដើម្បីដឹកអ្នកដំណើរទាំងអស់ឱ្យបានលឿន។

ចាប់ផ្តើមពីបញ្ហាមួយទៅបញ្ហាមួយ យុវសិស្សពិសាល បានបង្កើនភាពរឹងមាំកាន់តែខ្លាំងឡើងបើទោះបីជាខ្លួនកំពុងស្ថិតក្នុងកម្រិតមធ្យមសិក្សាក៏ដោយ ហើយក្រោយពេលដែលឆ្លងកាត់ការដោះស្រាយបញ្ហាដោយខ្លួនឯងបាន គាត់កាន់តែស្គាល់ពីការរស់នៅ និងការតស៊ូកាន់តែច្បាស់ រហូតគាត់កើតជាចិត្តស្រឡាញ់ការងាររៀបចំគម្រោងនេះ។

2. ការបង្កើតគម្រោង និងឧបសគ្គ
ដោយភាពប្រទាញប្រទង់គ្នារវាងក្តីស្រឡាញ់លើជំនាញរចនា (Architect Design) និងជំនាញនៃការរៀបចំគម្រោង លោក ពេជ្រ ពិសាល បានចាប់ផ្តើមចូលសិក្សានៅមហាវិទ្យាល័យផ្នែកស្ថាបត្យកម្ម ស្របពេលដែលលោកបានចូលរៀនថ្នាក់សហគ្រិន និងអភិវឌ្ឍន៍គំនិតរយៈពេលមួយឆ្នាំនៅវិទ្យាស្ថានមួយក្នុងទីក្រុងភ្នំពេញ។ នៅក្នុងថ្នាក់រៀន លោកបានរៀនចេះមុខវិជ្ជាជាច្រើនដែលពាក់ព័ន្ធនឹងការធ្វើទីផ្សារ និងការរៀបចំគម្រោង តែក្នុងក្រសែភ្នែករបស់មនុស្សគ្រប់គ្នានៅពេលនោះ គឺលោកតែងតែស្ថិតនៅលេខក្រោយគេជានិច្ច។

បើទោះជាបែបនេះក្តី បុរសមិនពូកែសម្តី តែពូកែអនុវត្តជាក់ស្តែងខាងលើ បានតាំងចិត្តរួចជាស្រេចថានឹងធ្វើឱ្យមនុស្សគ្រប់គ្នាមានមោទនភាពមកលើខ្លួនឱ្យបានបន្ទាប់ពីបញ្ចប់វគ្គសិក្សា ហេតុនេះបេសកកម្មរបស់គាត់គឺព្យាយាមរៀបចំបង្កើតគម្រោងដោយខ្លួនឯង បើទោះបីជាអ្នកដទៃមើលមកគាត់ថាយ៉ាងណាក៏ដោយ។ ស្ថិតក្នុងដំណាក់កាលនេះ លោកបានរៀបចំបង្កើតក្រុមការងារមួយដែលមានឈ្មោះថា The Road ដែលជាគម្រោងបង្កើតសកម្មភាពអប់រំ តាមរយៈសិក្ខាសាលា និងកម្មវិធីមួយចំនួនទៀតដើម្បីជំរុញសមត្ថភាពយុវវ័យ តែដោយសារតែបទពិសោធនៅតិច និងការទំនាក់ទំនងនៅស្ទើរ ក្រុមនោះក៏បរាជ័យ។ មេរៀនពីចំណុចនេះមិនបានធ្វើឱ្យគាត់ភ្ញាក់ផ្អើលនោះទេ ព្រោះបុរសដែលពោរពេញដោយភាពវិជ្ជមានរូបនេះតែងតែមើលឆ្ងាយមួយជំហានមុនមនុស្សដទៃជានិច្ច។

ក្រោយការបញ្ចប់គម្រោងដែលមិនបានទទួលលទ្ធផលល្អនោះមក លោក វិសាល ក៏ចាប់ផ្តើមជជែកជាមួយនឹងអ្នកខ្លាំងៗមួយចំនួនដែលសុទ្ធតែជាអ្នកធ្លាប់បង្កើតគម្រោងធំៗ និងអ្នកខ្លះថែមទាំងមានបទពិសោធក្នុងស្ថាប័នផ្សព្វផ្សាយទៀតផង តែដោយសារតែមនុស្សដែលមានសមត្ថភាពទាំងអស់នោះរវល់ខ្លាំងពេក ក៏ត្រូវបរាជ័យការងារនេះជាថ្មីម្តងទៀត។ មួយដងជាពីរដងដែលលោក ពិសាល បានជួបនឹងរឿងខកចិត្ត តែឧបសគ្គទាំងអស់នោះមិនអាចឱ្យលោកបញ្ចប់ការខិតខំប្រឹងប្រែងនោះទេ ហើយលោកក៏បានប្តូរវិធីសាស្ត្រវិញម្តង ពីការធ្វើការងារជាក្រុម មកធ្វើកាងារតែឯងម្តង។ កាលនោះ លោកចាប់ផ្តើមធ្វើការវិនិយោគលើគម្រោងតែម្នាក់ឯង ទាំងគាត់គ្មានលុយគ្រប់គ្រាន់ផង។ ជាដំណោះស្រាយលោកបានចូលធ្វើការងារក្នុងក្រុមហ៊ុន Pi pay ហើយទឹកចិត្តដែលចង់ជម្នះឧបសគ្គខ្លាំងឱ្យបាននោះ ធ្វើឱ្យលោកដាច់ចិត្តសុំខ្ចីលុយប្រធានរបស់លោកដើម្បីអនុវត្តគម្រោងរបស់ខ្លួន។

ការងារតែម្នាក់ឯងបានផ្តល់ឱ្យលោកនូវបទពិសោធជាច្រើន ដែលក្នុងនោះអ្វីដែលគាត់ទទួលបានគឺ ការរ៉ាប់រងគម្រោងតែម្នាក់ឯងគត់។ លោកបានចាប់ផ្តើមបង្កើតគេហទំព័រមួយសម្រាប់គម្រោង ដោយជួលអ្នកជំនាញឱ្យគេជួយធ្វើ ហើយបានចាប់ផ្តើមស្រាវជ្រាវ និងសរសេរពីអត្ថន័យលម្អិតនៃគម្រោងរបស់លោកនៅក្នុងនោះ ហើយយកវាទៅទាក់ទងវាគ្មិន និងអ្នកឧបត្ថម្ភមួយចំនួន។

លោក ពិសាល និយាយថា៖ “កាលនោះ ខ្ញុំម្នាក់ឯងធ្វើការស្មើមនុស្ស 10នាក់ តែយូរៗទៅខ្ញុំក៏អាចទទួលបានទំនុកចិត្តពីមនុស្សជាច្រើនបន្ទាប់មក ខ្ញុំក៏ចាប់ផ្តើមប្រមូលផ្តុំមនុស្សដូចៗគ្នាដែលម្នាក់ឯងធ្វើការងារបានច្រើន ព្រោះថា បើម្នាក់អាចធ្វើការងារស្មើនឹងមនុស្ស10នាក់បាន នោះ10នាក់នឹងអាចធ្វើការងារស្មើមនុស្ស 100នាក់បានហើយ”។

ជាលទ្ធផល សកម្មភាពដំបូងបំផុតបានចាប់ផ្តើមឡើងដោយលោកបានបង្កើតសិក្ខាសាលាមួយនៅខែវិច្ឆិកា ឆ្នាំ2016 ដោយមានអ្នកចូលរួមជិត 500នាក់ និងមានម្ចាស់អាជីវកម្មធំៗធ្វើជាវាគ្មិន ហើយជាបន្តបន្ទាប់គម្រោងរបស់លោកក៏ចាប់ផ្តើមត្រូវបានគេស្គាល់ច្រើនក្នុងចំណោមពាណិជ្ជករ និងយុវជន។ ហើយមកទល់នឹងពេលនេះយុវជនកម្ពុជា ដែលរួមមានទាំងសិស្ស និស្សិត បុគ្គលិកក្រុមហ៊ុន រួមទាំងម្ចាស់អាជីវកម្មចំនួនរាប់ម៉ឺននាក់ហើយដែលបានចូលរួមក្នុងសិក្ខាសាលាដែលបង្កើតឡើងដោយស្ថាប័នរបស់លោកតាំងពីចាប់ផ្តើមរហូតមក។

បច្ចុប្បន្នលោក ពេជ្រ ពិសាល ជាអ្នកគ្រប់គ្រងគម្រោង Daily Plus និងជាសហស្ថាបនិកស្ថាប័នទទួលគម្រោងផ្សព្វផ្សាយមួយដែលមានឈ្មោះថា Connect ដើម្បីជួយដល់ម្ចាស់អាជីវកម្មក្នុងការធ្វើទីផ្សារតាមបណ្តាញឌីជីថល៕

January 24, 2018

ដំណាំ ការុត

ការ៉ុតជាដំណាំហូបមើម 2រដូវកាល ដែលក្នុងរដូវកាលដំបូងនឹងលូតលាស់ធំធាត់ផ្នែកដើម ស្លឹក និងឫស ចំណែកក្នុងរដូវកាលទីពីរដំណាំការ៉ុតនឹងលូតលាស់ផ្នែកផ្កា និងគ្រាប់ (ដាំទុកយកគ្រាប់ធ្វើពូជ)។

លក្ខណៈរបស់ដើមការ៉ុតជាស្លឹកបន្ទះដែលនឹងដុះលូតលាស់ចេញពីដើម ជាក្រុមដំណាំដែលមានធាងស្លឹកវែង។ ពូជការ៉ុតដែលមានគុណភាពខ្ពស់នឹងមានបណ្ដូលតូច និងមានពណ៌ដូចគ្នានឹងសាច់ ឬមានផ្នែករបស់សាច់ច្រើនជាផ្នែករបស់បណ្ដូល។ កាដាំរដូវកាលទីពីរដើម្បីទទួលផលជាគ្រាប់ពូជនោះ ដើមការ៉ុតនឹងឈរឡើងត្រង់ ផលិតធាងស្លឹកវែងៗប្រវែង2-4ហ្វុ៊ត នៅខាងចុងមានកញ្ចុំផ្កា ដែលកញ្ចុំដំបូងនឹងដុះលូតលាស់ចេញពីផ្នែកកណ្ដាលរបស់ដើម បន្ទាប់ពីនោះកញ្ចុះដទៃទៀតនឹងដុះលូតលាស់មកតាមក្រោយ។ ការផ្សំលម្អងកេសរធ្វើឡើងបែបផ្សំចម្លង ដែលភាគច្រើនប្រើសត្វល្អិតជាអ្នកជួយផ្សំលម្អងកេសរ។

ការដាក់ដាំ
– ការត្រៀមដី៖ ផ្ទៃដីដែលស័ក្តិសមសម្រាប់ការបណ្ដុះដាំ គួរស្ថិតនៅខ្ពស់ជាងកម្រិតកម្ពស់ទឹកសមុទ្រប្រមាណ600-1,300 ម៉ែត្រ ដីគួរតែជាដីល្បាយលាយខ្សាច់។ មិនគួរដាក់ជីលាមកគោស្រស់ទេ ត្រូវធ្វើការលាយផ្សំ រួចដាក់ហាលថ្ងៃចោលមួយរយៈសិន។

ក្នុងដំណាក់កាលភ្ជួរដីត្រៀមលើកជារង ចូរជីកមុខដីរហូតដល់បែកត្រសុសជម្រៅមិនតិចជាង 40សង់ទីម៉ែត្រ លើកជារងទំហំទទឹង1ម៉ែត្រអាចដាំបាន3ជួរ។ បើជាដីស្អិត ត្រូវតែលាយផ្សំជាមួយជីធម្មជាតិផ្អាប់2គីឡូក្រាម ជាមួយផេះអង្កាម1ការ៉ុងដាក់លើផ្ទៃដី2ម៉ែត្របួនជ្រុង។

បន្ថែម៖ នៅក្នុងផ្ទៃដីដាំដុះ មិនគួរមានកម្ទេចឫសឈើធំៗ ក្រួសថ្មធំៗឡើយ។

– វិធីដាំ៖ អាចធ្វើបានដោយវិធីបណ្ដុះគ្រាប់ តែគ្រាប់ពូជការ៉ុតមានទំហំតូច និងទន់ខ្សោយណាស់។ មានការរួចផុតពីការស្អុយងាប់ក្រោយការបណ្ដុះជាកូនត្រឹមតែ50%ប៉ុណ្ណោះ ដូច្នេះគួរនាំយកគ្រាប់ពូជ3ចំណែក លាយជាមួយដីខ្សាច់ 1ចំណែកមុននឹងយកទៅព្រោះ។ ស្រោចទឹកលើរងឱ្យជោកមុននឹងចាប់ផ្ដើម ព្រោះគ្រាប់ពូជ ដើម្បីបិទរន្ធដី និងឱ្យដីរួមចូលគ្នាមិនឱ្យគ្រាប់ពូជធ្លាក់ចូលទៅក្នុងដីជ្រៅពេក។ បន្ទាប់ពីនោះបាចជីផ្អាប់ធម្មជាតិលាយផេះអង្កាមរោយតិចៗលើបរិវេណរង ស្រោចទឹកលាយទឹកជីសរីរាង្គ រួចហើយយកចំបើងស្ងួតមកគ្របលើរងមួយជាន់ទៀត។

ក្រោយពីព្រោះគ្រាប់ពូជ ក្នុងរយៈដំបូង នៅពេលដើមមានខ្នាតកម្ពស់5-7សង់ទីម៉ែត្រ ចូរដកដើមដែលដុះឡើងញឹកចេញខ្លះ ទុកចម្ងាយពីដើមមួយទៅដើមមួយប្រមាណ2-3សង់ទីម៉ែត្រ។ រង់ចាំរហូតដល់មានអាយុ20ថ្ងៃ កូនការ៉ុតមានខ្នាតកម្ពស់ប្រមាណ10-15សង់ទីម៉ែត្រអាចដកបំបែកដាំបាន ហើយចំណែកដើមដែលនៅតូចៗកម្ពស់ត្រឹមតែ1-1.5សង់ទីម៉ែត្រ គួរដកចោល។ ក្នុងដំណាក់កាលទីពីរ នៅពេលដើមមានអាយុប្រមាណ40-50ថ្ងៃ ក្នុងដំណាក់កាលនេះអាចដកយកមើមការ៉ុតមកទទួលទានបានខ្លះហើយ។ សម្រាប់ការដកយកទៅបំបែកដាំ គួរដាក់ដាំឱ្យឆ្ងាយពីគ្នា12-15សង់ទីម៉ែត្រ ហើយថែទាំបំប៉នតរហូតដល់ពេលប្រមូលផល។

– វិធីការថែទាំរក្សា

ការស្រោចទឹក៖ ត្រូវឧស្សាហ៍មើលថែស្រោចទឹករៀងរាល់ថ្ងៃ ព្រឹក-ល្ងាច។
ការដាក់ជី៖ នៅពេលកូនការ៉ុតអាយុបាន10-15ថ្ងៃ ចូរដាក់ជី 46-0-0 ក្នុងអត្រា3ស្លាបព្រាបាយក្នុងផ្ទៃដីមួយម៉ែត្រការ៉េ និងនៅពេលអាយុ30ថ្ងៃ ចូរដាក់ជីរូបមន្តស្មើ 16-16-16 ឬអាចប្រើជីសរីរាង្គក្នុងចន្លោះជួរដើមការ៉ុតចំនួន 300ក្រាមក្នុងផ្ទៃដីមួយម៉ែត្រការ៉េ និងដាក់រៀងរាល់20ថ្ងៃម្ដង។
ការការពារ និងកម្ចាត់សត្រូវដំណាំ៖ ការពារសត្វល្អិតសត្រូវដំណាំដោយទឹកត្រាំស្លឹកស្ដៅ និងទឹកត្រាំជីសរីរាង្គ ដោយត្រូវបាញ់ដាក់ដំណាំរៀងរាល់3-5ថ្ងៃម្ដងជាបន្តបន្ទាប់។

– វិធីការប្រមូលផល៖ ប្រមាណជា85-90ថ្ងៃ អ្នកអាចធ្វើការប្រមូលផលមើមការ៉ុតបានហើយ។ មុនការប្រមូលផល គួរស្រោចទឹកឱ្យដីសើមជោកជាំជាមុនសិន ដើម្បីបង្កើនភាពងាយស្រួលក្នុងការប្រមូលផល បន្ទាប់ពីនោះត្រូវយកដៃចាប់បួងស្លឹកទាំងអស់ រួចហើយព្យាយាមដកថ្នមៗជារាងបញ្ឆិត បន្ទាប់មកនាំយកមើមការ៉ុតទៅលាងទឹកសម្អាត ដាក់សំដឹលឱ្យស្ងួត។

មើមការ៉ុត យើងអាចរក្សាទុកក្នុងទូទឹកកកបានយូរប្រមាណជា1-2ខែ បើសិនបានរុំដោយថង់ជ័រប្លាស្ទិកខ្ចប់ម្ហូបអាហារ៕

January 24, 2018

នៅពេលកូនតូចឈានចូលខែទី6

លក្ខណៈរបស់កូនតូចពេលចូលដល់ខែទី6

មកដល់ខែនេះ អ្នកម្ដាយអាចសង្កេតឃើញថា ទឹកដោះរបស់ខ្លួនដែលធ្លាប់តែបំបៅកូនគ្រប់គ្រាន់នោះ បែរជាតិចទៅ។ ក្នុងអំឡុងខែនេះអ្នកម្ដាយអាចឱ្យកូនមឹមទឹកដោះគោឆុងបាន តែក្មេងដែលធ្លាប់បៅដោះម្ដាយមករហូតនោះអាចនឹងមិនព្រមបៅទឹកដោះគោពីដប ដូច្នេះសាកល្បងដាក់ក្នុងពែងឱ្យញ៉ាំក៏បាន ដោយស្មាន

បរិមាណទឹកដោះគោតាមរយៈអត្រាកើនឡើងរបស់ទម្ងន់ខ្លួន។ កូន6ខែ ទម្ងន់នឹងកើនឡើងជាមធ្យមមួយថ្ងៃប្រមាណជា15ក្រាម បើក្នុង10ថ្ងៃទម្ងន់កើនឡើងត្រឹមតែ120-130ក្រាម។ សាកល្បងបន្ថែមទឹកដោះគោឱ្យទៀតមួយថ្ងៃ2ដប គួរឱ្យមឹមក្រោយពេលញ៉ាំអាហារបន្ថែម។ បើមិនព្រមបៅទឹកដោះគោ សាកល្បងឱ្យបៅទឹកសណ្ដែកលឿង និងបង្កើនបរិមាណអាហារបន្ថែមដើម្បីឱ្យអាហារគ្រប់គ្រាន់ទៅនឹងតម្រូវការរបស់រាងកាយ។ ក្មេងណាដែលធ្លាប់តែក្អួតចេញមកវិញក្រោយពេលបៅរួច មកដល់ខែនេះអាការនេះនឹងបាត់លែងមានហើយ។

ដល់ពេលចាប់ផ្ដើមអាហារបន្ថែមហើយ

គួរចាប់ផ្ដើមឱ្យញ៉ាំនៅពេលដែលកូនបង្ហាញកាយវិការថាចង់ញ៉ាំ ដូចជា លូកដៃមកស្រវាចាប់ស្លាបព្រា កម្រើកមាត់ឮសូរជុបចាប់ជាដើម។ បើកូននៅមិនទាន់ដល់ពេលចង់ ទោះជាបញ្ចុក ក៏តែងតែប្រើអណ្ដាតទល់រុញចេញមកវិញដែរ និងមិនគួរបង្កើនបរិមាណអាហារបន្ថែមលឿនពេកទេ។ បើក្នុង10ថ្ងៃទម្ងន់ខ្លួនកើន300ក្រាមឡើងទៅ បង្ហាញថា កូនញ៉ាំអាហារច្រើនពេកហើយ និងមិនគួរបង្ខំឱ្យកូនញ៉ាំអាហារដែលមិនចូលចិត្តនោះទេ។ ចំណែកមូលហេតុដែលត្រូវឱ្យញ៉ាំអាហារបន្ថែមគឺ ទឹកដោះម្ដាយមានសារធាតុដែកកាន់តែតិចទៅ និងវិធីការពារជំងឺឈាមស្លេកដោយសារខ្វះសារធាតុដែកគឺ ញ៉ាំអាហារបន្ថែមដោយចាប់ផ្ដើមពីបបរកិនម៉ដ្ឋនៅពេលអាយុ6ខែ ហើយផ្លាស់ទៅជាបបរធម្មតានៅពេលអាយុ7-8ខែ ហើយបាយដូចមនុស្សធំនៅពេលអាយុបាន1ឆ្នាំ។

គោលការណ៍សំខាន់ក្នុងការឱ្យញ៉ាំអាហារបន្ថែម

– ឱ្យញ៉ាំអាហារណាដែលកូនចូលចិត្តដោយមិនបង្ខំ។ អាយុ6ខែ គួរឱ្យមួយថ្ងៃ1ពេល លើកលែងតែបៅទឹកដោះម្ដាយមិនគ្រប់គ្រាន់ និងមិនព្រមបៅទឹកដោះគោ។
– ឱ្យញ៉ាំមុនពេលបៅ និងមិនចាំបាច់ឱ្យញ៉ាំនៅពេលព្រឹកជានិច្ចនោះទេ ដូចជាចាប់ផ្ដើមពីម៉ោង10:00ជាដើម ព្រោះបើសិនកើតអាការរាករូសដោយសារអាហារមិនស្អាត នឹងបាននាំទៅពេទ្យបានងាយស្រួលជាងនៅពេលល្ងាច។
– ចាប់ផ្ដើមពី1-2ស្លាបព្រាកាហ្វេ បើមិនចូលចិត្តស៊ុបមាន់ស្ងោរ សាកល្បងធ្វើជាទឹកសម្លស្ងោរពងមាន់ក៏បាន។
– ពេលញ៉ាំបបរកិនជាមួយស៊ុតបានពូកែហើយ ចាប់ផ្ដើមឱ្យញ៉ាំបន្លែកិន ដោយចាប់ផ្ដើមពីល្ពៅស្ងោរកិន ដំឡូងបារាំងស្ងោរកិន និងការ៉ុតស្ងោរកិនជាដើម។
– ប្រកាន់យកភាពងាយស្រួល គឺមិនធ្វើអាហារសម្រាប់តែកូនតូចជាពិសេសទេ តែជ្រើសរើសយកពីអាហារដែលធ្វើឱ្យមនុស្សធំញ៉ាំ និងបែងឱ្យកូនតូចញ៉ាំ។
– បើបានទទួលទឹកដោះម្ដាយមិនគ្រប់គ្រាន់ និងមិនព្រមបៅទឹកដោះគោ ហើយទម្ងន់ខ្លួនកើនឡើងតិចជាងមួយថ្ងៃ10ក្រាម គួរជ្រើសរើសអាហារដែលមានកាឡូរីខ្ពស់ ដូចជា ស៊ុតក្រហម ថ្លើមស្ងោរកិន សាច់ស្ងោរកិន សាច់ត្រី និងសាច់មាន់។ល។
– អាហាររបស់មនុស្សធំដែលកូនតូចក្នុងវ័យនេះអាចញ៉ាំបានគឺ អាហារស៊ុតទាំងឡាយ សម្លស្ងោរធម្មតាទូទៅ និងស៊ុបផ្សេងៗ តៅហ៊ូ សាច់ត្រី សាច់គោ សាច់ជ្រូក សាច់មាន់ស្ងោរផុយ និងបន្លែស្ងោរជាដើម។

អាការដែលអាចកើតឡើង

* រាករូស
កូនអាចបន្ទោបង់មករាវ ព្រោះមានមេរោគបាក់តេរី ឬមេរោគវីរុសដោយសារអាហារមិនស្អាតគ្រប់គ្រាន់។ ពេលកូនរាក ក៏អាចមានក្ដៅខ្លួន អារម្មណ៍មិនល្អ មិនព្រមបៅទឹកដោះ និងក្អួតជាដើម។ បើរាកដោយសារអាហារមិនស្អាតគ្រប់គ្រាន់ គួរធ្វើឱ្យបានស្អាត មានអនាម័យ ឬបើកូនមិនដែលបានទទួលអាហារបែបនោះពីមុន នៅពេលញ៉ាំហើយរាក ចូរបញ្ឈប់អាហារនោះ រហូតដល់ពេលបាត់រាក សឹមឱ្យញ៉ាំជាថ្មី ដោយបន្ថយបរិមាណអាហារចុះឱ្យនៅសល់ពាក់កណ្ដាល។ តែបើនៅតែរាកមិនបាត់ ចូរប្រញាប់នាំកូនតូចទៅមន្ទីរពេទ្យ។

* ក្អកញឹកញាប់

នៅពេលអាការប្រែប្រួល កូនអាចមានអាការក្អក បើក្អកនៅពេលព្រលប់ អាចមានក្អួតទៀតផង បើវាស់សីតុណ្ហភាពហើយឃើញមិនមានក្ដៅខ្លួន កូនមិនយំរករឿង នៅលេងធម្មតា នៅបៅទឹកដោះបានធម្មតានោះបញ្ជាក់ថាកូនតូចមិនមានកើតអ្វីធ្ងន់ធ្ងរទេ។ អំឡុងពេលដែលកូនក្អកគួរចៀសវាងការងូតទឹកក្នុងពេលដែលមានធាតុអាកាសត្រជាក់ ព្រោះនឹងធ្វើឱ្យកើតស្លេស្ម៍ឡើងច្រើន។ គួរងូតទឹកឱ្យកូននៅពេលរសៀលៗនិងនាំកូនចេញទៅសំដិលថ្ងៃនៅខាងក្រៅផ្ទះ ដោយមិនបាច់ស្លៀកសម្លៀកបំពាក់ក្រាស់ឱ្យទេ ដើម្បីឱ្យសុខភាពស្បែករបស់កូនបានរឹងប៉ឹង។

* យំរករឿងនៅពេលយប់

មានមិនតិចទេដែលក្នុងមួយយប់ៗកូនភ្ញាក់យ៉ាងតិច2-3ដងនោះ។ មានក្មេងតិចណាស់ដែលស្រែកយំរំខាន ព្រោះឃ្លាន ដូច្នេះគួរបន្ថែមបរិមាណទឹកដោះគោឱ្យច្រើនឡើង ឬបន្ថែមពេលបៅនៅពេលយប់មួយពេលទៀតក៏បាន។

* កើតបូសនៅលើក្បាល

ក្មេងដែលស្បែកក្បាលរលាកក្លាយ ពេលអេះយូរទៅនឹងដាច់រលាត់ និងមានមេរោគចូលក្លាយជាបូស។ ក្មេងខ្លះអាចកើតពេញក្បាល និងច្រើនតែមានគ្រុនក្ដៅខ្លួនរួមជាមួយផង ហើយយំរករឿងរំខាន ដូច្នេះត្រូវការពារទុកជាមុនដោយការកាត់ក្រចកដៃកូនឱ្យខ្លីជាប់ជានិច្ច ឧស្សាហ៍ប្ដូរស្រោមខ្នើយ និងគួរប្រញាប់ព្យាបាលឱ្យឆាប់ជា។

វិវឌ្ឍនាការរបស់កូនតូច
* រាងកាយ
– ក្រឡាប់បានកាន់តែចំណានឡើង និងចាប់ផ្ដើមចេះលូនទៅខាងមុខ ឬមកក្រោយបានខ្លះហើយ។
– ចេះអង្គុយទប់លំនឹងខ្លួនបានល្អ និងបានយូរហើយ តែត្រូវមានអ្វីមកទល់ទប់ពីក្រោយ ព្រោះអាចនឹងផ្ងារក្រោយបានយ៉ាងងាយ។
– អាចកាន់ដបទឹកដោះគោបាន ចាប់របស់លេងបាន និងដូរពីដៃម្ខាងទៅដៃម្ខាងបានយ៉ាងស្រួល។
– ចេះបញ្ចេញសំឡេងបានច្រើនបែបហើយ ដោយចាប់ផ្ដើមបញ្ចេញសំឡេងដែលមានតួព្យញ្ជនៈ។
– ស្រវាចាប់អ្វីមួយបានចំៗ ហើយចេះលែងឱ្យធ្លាក់ទៅវិញបាន។
– ពេលគេងផ្ងារចូលចិត្តយកដៃចាប់ជើងលេង ឬយកជើងមកបៀម។
– ក្មេងខ្លះអាចនឹងចាប់ផ្ដើមមានដុះធ្មេញឡើងមក ឬមានអាការរមាស់អញ្ចាញធ្មេញខ្លះហើយ។

* សង្គមជុំវិញខ្លួន

– ចេះធ្វើត្រាប់តាមឥរិយាបថ ឬទឹកមុខរបស់មនុស្សជុំវិញខ្លួន។
– ចេះញែកថា នរណាជាមនុស្សចាស់ ឬនរណាជាកូនក្មេង។
– បញ្ចេញសំឡេងស្រែកនៅពេលត្រូវការជំនួយ តែជាការបញ្ចេញសំឡេងស្រែកបែបមានន័យ។
– ចូលចិត្តលេងជាមួយអ្នកដទៃច្រើនឡើង។
– ចូលចិត្តឈោងដៃចាប់មុខក្មេងៗដូចគ្នា។

* លេងជាមួយកូនញឹកញាប់

កូនតូចក្នុងវ័យនេះមានការចាប់អារម្មណ៍លើអ្វីជុំវិញខ្លួនច្រើន ដូច្នេះនៅថ្ងៃណាដែលធាតុអាកាសល្អ អ្នកម្ដាយសាកល្បងរកកន្លែងណាមួយនៅខាងមុខផ្ទះ ឬនៅលើវាលស្មៅ ក្រាលកន្ទេល ហើយដាក់កូនតូចឱ្យគេងផ្កាប់លេង មើលដើមឈើ ស្លឹកស្មៅ ឬមនុស្សដែលដើរទៅមកនៅមុខផ្ទះ។ កូននឹងមានអារម្មណ៍សប្បាយរីករាយ និងព្យាយាមរំកិលខ្លួនទៅខាងមុខ ដូចជាការហាត់ប្រាណម្យ៉ាងដែរ តែបើកូនតូចរបស់អ្នកជាក្មេងដែលមិនសូវកម្រើក គួរបង្ហាត់ឱ្យធ្វើកាយវិការតាមរយៈការលេងជាមួយកូនខ្លះផង។

ក្នុងវ័យនេះ នៅពេលកូនចាប់ផ្ដើមចេះធ្វើចលនាបានច្រើនឡើង ឧប្បត្តិហេតុក៏ងាយនឹងកើតឡើងដែរ ជាពិសេសការធ្លាក់ពីលើគ្រែ និងត្រូវប្រយ័ត្នមិនឱ្យមានវត្ថុគ្រោះថ្នាក់ណាមួយ

នៅក្បែរខ្លួនឱ្យសោះពេលដាក់កូននៅលើកម្រាលឥដ្ឋ មិនថាគេងលក់ ឬភ្ញាក់នោះឡើយ។ ត្រូវប្រមូលទុកដាក់របស់របរជុំវិញខ្លួនឱ្យអស់ ជាពិសេសរបស់គ្រោះថ្នាក់ដូចជា បារី កន្ទុយបារី ឈើគូស ខ្សែក្រវាត់ ម្ជុល ផ្លែឡាម ថ្នាំគ្រាប់ ឡេវអាវ កាក់ ធុងទឹកក្ដៅ ប្រអប់ធូបមូស និងរបស់លេងក៏មិនគួរជារបស់ដែលមានជ្រុងស្រួចៗឬផ្លាស្ទិកស្រួយៗដែលងាយបែកបាក់នោះដែរ ទាំងអស់នេះគឺសុទ្ធតែដើម្បីសុវត្ថិភាពរបស់កូនសម្លាញ់ក្នុងវ័យនេះ៕

January 24, 2018

ការប្រគំតន្ត្រី Tiger Street Football Festival 2018 ធ្វើឱ្យកក្រើកក្រុងព្រះសីហនុ

ព្រះសីហនុ៖ បន្ទាប់ពីទស្សនាការប្រកួតបាលទាត់ដ៏ស្វិតស្វាញ និងជក់ចិត្ត នៃពានរង្វាន់ Tiger Street Football Festival 2018 ប្រជាពលរដ្ឋដែលរស់នៅក្នុងខេត្តព្រះសីហនុ និងភ្ញៀវទេសចរទទួលបាននូវភាពសប្បាយរីករាយជាមួយនឹងទស្សនីយភាពប្លែកៗជាច្រើនដែលជាការរៀបចំពីក្រុមហ៊ុនស្រាបៀរថៃហ្គ័រ។

ជាក់ស្តែង ក្រៅពីការប្រកួតបាលទាត់ដ៏អស្ចារ្យ និងការសម្តែងក្បាច់រាំដ៏ស្រស់ស្អាត ក៏មានការបង្ហាញពីសមត្ថភាពត្រេះបាល់ដ៏អស្ចារ្យ ពីលោក Phillip Veron Gibson ដែលធ្លាប់ជាប់លំដាប់ថ្នាក់ទី៧ ពិភពលោកក្នុងការត្រេះបាល់។

លើសពីនេះនៅជុំវិញបរិវេណកន្លែងរៀបចំកម្មវិធី Tiger Street Football Festival 2018 ក៏មានកន្លែងលេងហ្គេមកម្សាន្តដ៏រីករាយដើម្បីទទួលបានវត្ថុអនុស្សាវរីយ៍ជាច្រើនពីស្រាបៀរថៃហ្គ័រ មានការដាក់តាំងលក់សម្ភារៈកីឡា ព្រមទាំងទទួលបានការភ្ជាប់អ៊ិនធើណែតដោយឥតគិតថ្លៃ (Free Wifi) នៅបញ្ជរ Digital Booth ផងដែរ។

អ្វីដែលកាន់តែទាក់ទាញ់នោះគឺ ការប្រគំតន្ត្រីដោយមានការចូលរួមពីសំណាក់កំពូលតារាចម្រៀងល្បីៗជាច្រើនរូបក្នុងប្រទេសកម្ពុជារួមមាន លោក ព្រាប សុវត្តិ សុគុន្ធ និសា ពេជ្រ សុភា ហ្សូណូ សុខ ស្រីនាង ឱក សុគន្ធកញ្ញា ឆន សុវណ្ណរាជ ទេព បូព្រឹក្ស កញ្ញា ឈិន ម៉ានិច ឃី សុគន្ធ ។ ហើយតារាចម្រៀងទាំងអស់បានលើកយកសុទ្ធសឹងជាបទញ៉ាក់កន្ត្រាក់អារម្មណ៍ ជាហេតុធ្វើឲ្យ អ្នកគាំទ្រនៅព្រះសីហនុសប្បាយរីករាយ និងរាំកម្សាន្តទៅតាមចង្វាក់ភ្លេងយ៉ាងសប្បាយរីករាយ គ្រប់គ្នាពេញមុខឆាកតន្ត្រី។ លើសពីនេះទៅទៀត អ្នកគាំទ្រទាំងអស់ក៏ទទួលបានកម្មវិធីលក់ជូនពិសេសសម្រាប់ការជាវស្រាបៀរ ថៃហ្គ័រ មកទទួលទានបណ្តើរ ទស្សនាការប្រគំតន្ត្រី Tiger Street Football Festival 2018។

សូមបញ្ជាក់ថា ការប្រកួតបាល់ទាត់ Tiger Street Football Festival 2018 នៅថ្ងៃចុងក្រោយ និងការប្រគំតន្ត្រីនៅរាត្រីចុងក្រៅប្រចាំមណ្ឌលព្រះសីហនុនេះ មានការផ្សាយផ្ទាល់ពីសា្ថនីយ៍ទូរទស្សន៍រស្មីហង្សមាសផងដែរ។

ការប្រកួតជម្រុះក្នុងកម្មវិធី Tiger street Football Festival 2018 នឹងធ្វើឡើងនៅមណ្ឌលបន្ទាប់គឺ៖ ខេត្តកំពង់ស្ពឺ នៅថ្ងៃទី ២៨ ខែមករា ឆ្នាំ ២០១៨ នៅដីឡូ ឧកញ៉ាឈួន គឹមសាន្តទីរួមខេត្តកំពង់ស្ពឺ។

ដូច្នេះសូមកុំភ្លេចចូលរួមទស្សនាការប្រកួតជម្រុះនៅខេត្តកំពង់ស្ពឺឲ្យបានច្រើនកុះករ។

ចំពោះសកម្មភាពផ្សេងៗនៃព្រឹត្តិការណ៍ Tiger Street Football Festival 2018 នៅខេត្តព្រះសីហនុ សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
#TSFF2018

សូមពិសាដោយការទទួលខុសត្រូវ

January 24, 2018

BNI ផ្តល់ការអភិវឌ្ឍខ្លាំងដល់ម្ចាស់អាជីវកម្មនៅកម្ពុជា

ស្របពេលដែលសង្គមកំពុងមានការអភិវឌ្ឍ យើងសង្កេតឃើញថា នៅកម្ពុជា ពីមួយថ្ងៃទៅមួយថ្ងៃអាជីវកម្មថ្មីៗបានកើតឡើង និងរីកដុះដាលដូចផ្សិតស្ទើរគ្រប់វិស័យ វាអាចជាឱកាសល្អសម្រាប់ពាណិជ្ជករថ្មីៗក្នុងការសាកល្បងតេស្តសមត្ថភាពចូលប្រកួតក្នុងទីផ្សារពាណិជ្ជកម្ម ដែលជាបញ្ហាក្នុងការបង្កើននូវការប្រកួតប្រជែងកាន់តែខ្លាំងសម្រាប់អាជីវកម្មចាស់ៗដែលបានបង្កើតឡើងយូរមកហើយ ហេតុនេះប្រសិនបើម្ចាស់អាជីវកម្មនីមួយៗមិនយកចិត្តទុកដាក់ក្នុងការស្វែងរកវិធីដោះស្រាយបញ្ហាលើការប្រកួតប្រជែងខាងផ្នែកទីផ្សារទេនោះ អាជីវកម្មរបស់គាត់អាចនឹងជួបឧបសគ្គខ្លាំង។

ពាក់ព័ន្ធនឹងបញ្ហានេះអ្នកយកព័ត៌មាននៃ កាសែត ឡារ៉ែនពាណិជ្ជ បានធ្វើបទសម្ភាសជាមួយនឹងលោក ឡុក សាមឌី ប្រធាន BNI ប្រចាំប្រទេសកម្ពុជា ដែលលោកនឹងបង្ហាញលម្អិតពីគំរូនៃការធ្វើអាជីវកម្មប្រកបដោយភាពឆ្លាតវៃ និងសារៈសំខាន់នៃ BNI ដែលអាចជួយដល់ម្ចាស់អាជីវកម្មជាច្រើននៅកម្ពុជាឱ្យមានការរីកចម្រើនជាលំដាប់។

1.តើអ្វីទៅជា BNI?

BNI គឺជាស្ថាប័នមួយដែលមកពីពាក្យពេញថាបណ្តាញពាណិជ្ជកម្មអន្តរជាតិ (Business Network International) ត្រូវបានបង្កើតឡើងដោយបណ្ឌិត Ivan Misner នៅឆ្នាំ1985 បើគិតមកដល់បច្ចុប្បន្ននេះគឺមានអាយុ 33ឆ្នាំហើយ។ សម្រាប់កម្ពុជា ខ្ញុំបាននាំ Franchise របស់ BNI ចូលនៅឆ្នាំ 2013។

2.តើមូលហេតុអ្វីបានធ្វើឱ្យលោកនាំ Franchise BNI មកកម្ពុជា?

បើនិយាយអំពីមូលហេតុ ដំបូងឡើយខ្ញុំសូមនិយាយពីរឿងដែលខ្ញុំស្គាល់ BNI ជាមុនសិន។ ខ្ញុំស្គាល់ BNI តាមរយៈមិត្តភ័ក្តិម្នាក់ដែលគាត់នៅប្រទេសវៀតណាម។ នៅថ្ងៃមួយគាត់បាននាំខ្ញុំទៅមើល Chapter មួយរបស់ BNI នៅប្រទេសវៀតណាម ដែលនៅពេលនោះខ្ញុំចេះតែឆ្ងល់ថា ហេតុអ្វីបានជាគេអាចហៅម្ចាស់អាជីវកម្មចាប់ពី 60 ទៅ 70អាជីវកម្មមកប្រជុំគ្នាជារៀងរាល់សប្តាហ៍បាន ព្រោះជាធម្មតាអ្នករកស៊ីប្រសិនបើឮពាក្យថាប្រជុំគាត់ប្រហែលជាមិនសូវចង់ចូលរួមនោះទេ។ ខ្ញុំចាប់ផ្តើមគិតភ្លាមថាច្បាស់ជាមានរឿងពិសេសអ្វីមួយដែលទាក់ទាញឱ្យមានការជួបជុំដ៏ល្អនេះហើយ។

នៅពេលខ្ញុំចូលមើលការប្រជុំនោះ ខ្ញុំក៏ឃើញគេបានផ្តល់ឱកាសឱ្យគ្នាទៅវិញទៅមកផងដែរហើយខ្ញុំចាប់ផ្តើមឆ្ងល់បន្ថែមទៀតថា ហេតុអ្វីបានជាគេអាចផ្តល់ឱកាសអាជីវកម្មឱ្យគ្នាបាន។ កត្តាទាំងអស់នេះ បានជំរុញឱ្យខ្ញុំចាប់ផ្តើមសិក្សាលើបញ្ហានានាពាក់ព័ន្ធនឹង BNI ហើយខ្ញុំក៏បានដឹងថា BNI ធ្លាប់ជួយម្ចាស់អាជីវកម្មបាន 73ប្រទេសនៅលើពិភពលោករួចមកហើយ ហេតុនេះខ្ញុំគិតថា វាក៏អាចជួយម្ចាស់អាជីវកម្មនៅស្រុកខ្មែរយើងបានដែរ។ ពេលនោះខ្ញុំក៏សម្រេចចិត្តទិញ Franchise BNI មកកម្ពុជាតែម្តង។

កាលនាំចូលដំបូងឡើយ ខ្ញុំមិនទាន់ដឹងថា BNI គឺជាអាជីវកម្មដែលអាចមានផលចំណេញ-ខាតយ៉ាងដូចម្តេចនោះទេ តែដោយសារតែខ្ញុំចង់ជួយសង្គម និងចង់ជួយមនុស្ស ខ្ញុំក៏សម្រេចចិត្តទិញ Franchise យកមកកម្ពុជា ហើយបន្ទាប់មកទើបដឹងថា វាជាប្រព័ន្ធដែលមានចំណូល។

3.ការនាំចូល Franchise មួយមិនមែនជារឿងងាយនោះទេ តើកត្តាប្រឈមអ្វីខ្លះដែលលោកជួបនៅពេលនាំចូលលើកដំបូង?

ចំពោះកត្តាប្រឈម គឺដំបូងឡើយប្រជាជនកម្ពុជាមិនទាន់ស្គាល់ច្បាស់នៅឡើយថា អ្វីទៅជា BNI ហើយកត្តាប្រឈមមួយទៀតគឺ មានមនុស្សមួយចំនួននៅកម្ពុជាបានធ្វើឱ្យខូចឈ្មោះពាក្យថា បណ្តាញ (Network)។ តាមពិតទៅ Network គឺល្អ តែមនុស្សខ្លះបានធ្វើឱ្យខូចឈ្មោះពាក្យ Network នេះ ដោយពាក់ព័ន្ធនឹងការលក់ផលិតផលបែប Network ហេតុនេះនៅពេលដែលខ្ញុំនាំចូល BNI មកកម្ពុជា ដំបូងគឺគេស្មានថា BNI ដូចជា ការលក់ជាលក្ខណៈ Network នោះដែរ ទើបធ្វើឱ្យមានកត្តាប្រឈមច្រើនមែនទែនទម្រាំនឹងបង្កើតចេញជា Chapter មួយឡើង ដែលពេលខ្លះ គឺអាចនិយាយបានថា ចង់យំ នៅពេលដែលនិយាយប្រាប់គេទៅគេបកត្រឡប់មកវិញថា BNI មិនអាចនាំចូលកម្ពុជាបានទេ ព្រោះ BNI ជារបស់អាមេរិក។ តែទោះជាយ៉ាងនេះក្តី ដោយសារតែចិត្តខ្ញុំចង់ជួយម្ចាស់អាជីវកម្មនៅកម្ពុជា ហើយចង់ឱ្យគាត់យល់ពីប្រព័ន្ធរបស់ BNIខ្ញុំក៏ព្យាយាមអស់ពីសមត្ថភាពដើម្បីពន្យល់ពួកគាត់អំពីអត្ថប្រយោជន៍របស់ BNI រហូតដល់មានអ្នកយល់ដឹងច្រើនហើយព្រមចូលរួមស្វែងយល់ ទើបដឹងពីសារៈប្រយោជន៍ជាច្រើនដែលអាចជួយដល់អាជីវកម្មឱ្យរីកលូតលាស់បាន។

4.តើ BNI មានអត្ថប្រយោជន៍អ្វីខ្លះសម្រាប់ម្ចាស់អាជីវកម្មទាំងអស់?

ខ្ញុំសូមបញ្ជាក់ផងដែរថា BNI មានរហូតដល់ទៅ 73ប្រទេសលើពិភពលោក ហើយបច្ចុប្បន្នមានសមាជិកជាង 22 ម៉ឺននាក់ នឹងមានរហូតដល់ទៅ 8,254 Chapter នៅលើពិភពលោក។ ការដែលមនុស្សជាង 22ម៉ឺននាក់សុខចិត្តបង់លុយឱ្យ BNI មិនមែនជារឿងងាយនោះទេ គាត់ហ៊ានចំណាយថវិកា លុះត្រាតែគាត់បានគិតល្អិតល្អន់ និងមើលឃើញពីផលប្រយោជន៍វិជ្ជមានជាច្រើនរបស់ BNI។

អត្ថប្រយោជន៍ទី1 គឺ មានក្រុមលក់ និងទីផ្សារដ៏ធំសម្រាប់ផ្តល់ឱកាសជូនម្ចាស់អាជីវកម្ម

ព្រោះបើមើលលើអាជីវកម្មបច្ចុប្បន្នយើងឃើញថា ការធ្វើអាជីវកម្មគឺមានកត្តាប្រកួតប្រជែងច្រើន (challenge)។ នៅពេលដែលម្ចាស់អាជីវកម្មចង់ពង្រីកអាជីវកម្មលុះត្រាតែគាត់ត្រូវបង្កើនក្រុមលក់ និងអ្នកធ្វើទីផ្សារ ប្រសិនបើគាត់មានអ្នកលក់ និងអ្នកធ្វើទីផ្សាររហូតដល់ទៅ 60-70នាក់ នោះនឹងជួយបង្កើនការលក់របស់គាត់ឱ្យទទួលបានផលចំណេញច្រើន តែបើគិតត្រឡប់មកវិញថា ក្នុងនាមជាអាជីវកម្មខ្នាតតូច និងមធ្យម (SME) តើគាត់មានថវិកាផ្គត់ផ្គង់ដល់បុគ្គលិកលក់របស់គាត់ 60-70នាក់ដែរឬទេ? ហេតុនេះ BNI បានមើលឃើញពីកត្តាប្រឈមនេះ ហើយអាចជួយធ្វើការដោះស្រាយតាមរយៈការផ្តល់ឱកាសឱ្យគាត់នូវក្រុមមនុស្សដែលមានគ្នាចាប់ពី 60-70នាក់ ដែលសុទ្ធតែជាម្ចាស់អាជីវកម្ម អាចជួយក្នុងការលក់ឱ្យគ្នាទៅវិញទៅមកបាន។ ហេតុនេះម្ចាស់អាជីវកម្មមិនចាំបាច់ប្រើលុយចំណាយជួលបុគ្គលិកលក់ដល់ទៅ60-70នាក់ នោះទេ។

អត្ថប្រយោជន៍ទី2 គឺទទួលបានសិទ្ធិផ្តាច់មុខក្នុងក្រុម

ម្ចាស់អាជីវកម្មនានាអាចនឹងមិនសប្បាយចិត្តនោះទេនៅពេលដែលទៅទីណាមួយមានគូប្រកួតប្រជែងអាជីវកម្មជាមួយគ្នា ហេតុនេះ BNI បានផ្តល់ជូននូវសិទ្ធិផ្តាច់មុខក្នុងអាជីវកម្ម ដោយក្នុង Chapter នីមួយៗមិនមានសមាជិកណាម្នាក់ដែលមានអាជីវកម្មដូចគ្នានោះទេ។ កត្តាទាំងនេះអាចធ្វើឱ្យយើងអាចរស់នៅជាមួយគ្នាបានយូរអង្វែងហើយមិនមានការប្រកួតប្រជែងនោះទេ គឺមានតែជួយគ្នាទៅវិញទៅមក។

ម្យ៉ាងវិញទៀត BNI គឺមានវិធីក្នុងការថែរក្សាអតិថិជនបានល្អ ហើយតាមរយៈវិធីនេះម្ចាស់អាជីវកម្មមិនបារម្ភថា បាត់អតិថិជននោះទេ តែអតិថិជនទៅវិញទេដែលខ្លាចបាត់យើង ព្រោះថា យើងបានផ្តល់ឱ្យនូវក្រុមដែលមានសមាជិកច្រើននាក់ដែលផ្តល់ឱ្យគ្នានូវគុណតម្លៃ និងព័ត៌មានជាច្រើន ហេតុនេះនៅពេលដែលគេចង់បានអ្វី គេគ្រាន់តែទាក់ទងមកយើង គឺបានដឹងពីព័ត៌មានទាំងអស់ ហេតុនេះគាត់ត្រូវការយើងរហូត។

អត្ថប្រយោជន៍ទី3 គឺម្ចាស់អាជីវកម្មនឹងទទួលបានប្រភពមិនចេះរីងស្ងួតនៃឱកាសអាជីវកម្ម

សមាជិកដែលនៅក្នុង BNI គឺជាអ្នកដែលក្តាប់បាននូវប្រភពអាជីវកម្មច្បាស់លាស់មុនគេ ហេតុនេះនៅពេលដែលប្រជុំ Chapter ម្តងៗ សមាជិកដទៃនៅក្នុង Chapter ជាមួយគ្នានឹងផ្តល់ឱកាសអាជីវកម្មឱ្យយើង ក្រោយពេលប្រជុំ យើងនឹងដឹងថាអ្នកណាខ្លះដែលយើងត្រូវទាក់ទង ហើយវាមានភាពងាយស្រួលខ្លាំងណាស់សម្រាប់ការលក់ ព្រោះថា យើងមិនបាច់ទាក់ទងលក់ឱ្យបានច្រើននោះទេម្ចាស់អាជីវកម្មទាំងអស់បានព្រមព្រៀងគ្នាទុកជាមុនហើយ ហេតុនេះអ្វីដែលយើងត្រូវធ្វើ គឺត្រៀមខ្លួនសម្រាប់ការចរចាតម្លៃ។ ពេលខ្លះបើយើងដាក់តម្លៃខ្ពស់ពេក គេមិនប្រើសេវាកម្ម ឬទិញផលិតផលយើងទេ នោះជារឿងរបស់យើងទៅវិញទេ។ ជារួមបើយើងមើលពីទិន្នន័យរបស់ BNI គឺយើងឃើញថា ការទំនាក់ទំនងនេះគឺធ្វើឱ្យអាជីវកម្មទទួលបានជោគជ័យប្រហែលជា 90% បាត់ទៅហើយ។

អត្ថប្រយោជន៍ទី4 គឺម្ចាស់អាជីវកម្មនឹងទទួលបានការអប់រំ និងបណ្តុះបណ្តាល

នៅ BNI យើងត្រូវរៀនដើម្បីអភិវឌ្ឍអាជីវកម្មរបស់យើង ហើយវគ្គបណ្តុះបណ្តាលទាំងអស់នោះគឺសុទ្ធតែមានសារៈសំខាន់ដែលអាចនាំឱ្យអាជីវកម្មទទួលបានជោគជ័យ ដូចជាការសិក្សាពីការប្រើប្រាស់ប្រព័ន្ធ(system) របស់ BNI និងផ្នែកសំខាន់ៗជាច្រើនទៀត។ ចំពោះការបណ្តុះបណ្តាលទាំងអស់នោះគឺមិនមានការបង់ថ្លៃនោះទេ តែសមាជិកប្រហែលជាមានកាតព្វកិច្ចរួមចំណែកចេញថ្លៃទីកន្លែង ដែលពេលខ្លះយើងសិក្សានៅសណ្ឋាគារ ដែលទាមទារឱ្យយើងចែករំលែកគ្នា (share) ចេញថ្លៃបន្ទប់សិក្សានោះ។

អត្ថប្រយោជន៍ទី5 គឺទទួលបានការទំនាក់ទំនងអាជីវកម្មយូរអង្វែង

នៅ BNI យើងមានកន្លែងសម្រាប់ចែករំលែក និងពង្រឹងទំនាក់ទំនងល្អ ព្រោះថា ការធ្វើអាជីវកម្មតែងតែជួបបញ្ហាកើតឡើង ដែលពេលខ្លះម្ចាស់អាជីវកម្មមួយចំនួនមិនហ៊ានពិភាក្សាជាមួយនឹងក្រុមគ្រួសារនោះទេ តែនៅ BNI យើងមានម្ចាស់អាជីវកម្មជាច្រើនសម្រាប់ប្រឹក្សាយោបល់ជាមួយពួកគាត់ ហើយគាត់អាចនឹងចែករំលែករឿងលំបាកនេះនៅក្នុងក្រុមបាន ព្រោះមិនមានដៃគូប្រកួតប្រជែងនៅក្នុងនោះទេ។ ហើយពេលខ្លះ សមាជិកមួយចំនួនក៏មានភាពចាស់ទុំផងដែរក្នុងការធ្វើអាជីវកម្ម ដែលកត្តានេះអាចធ្វើឱ្យគាត់ទទួលបាននូវការប្រឹក្សាយោបល់ប្រកបដោយប្រសិទ្ធភាព។

ខ្ញុំសូមបញ្ជាក់ផងដែរថា BNI គឺឈរលើទស្សនវិទ្យា 2ធំៗ គឺទី1 អ្នកឱ្យគឺជាអ្នកទទួល (Givers Gain) មានន័យថា អ្នកឱ្យកាន់តែច្រើន នោះយើងនឹងទទួលបានកាន់តែច្រើន ហើយទី2គឺ ធ្វើជាកសិករមិនមែនជាអ្នកប្រមាញ់ទេ (Farming not Hunting) ព្រោះប្រសិនបើយើងតាំងចិត្តជាអ្នកប្រមាញ់ នៅពេលដែលស្វែងរកមួយកន្លែងមិនបានគាត់នឹងបន្តទៅមួយកន្លែងផ្សេងទៀត ដល់ដំណាក់កាលចុងក្រោយគាត់នឹងអស់កន្លែងសម្រាប់ប្រមាញ់ តែសម្រាប់អ្នកធ្វើកសិកម្មវិញគឺគាត់ដាំដុះនៅទីនេះ គាត់ថែរក្សា ហើយប្រមូលផលនៅទីនេះដែលផលរបស់គាត់ប្រមូលមិនចេះរីងស្ងួត។

5.តើមកដល់បច្ចុប្បន្ននេះ BNI បានសម្រេចនូវសមិទ្ធផលសំខាន់ៗអ្វីខ្លះ?

បច្ចុប្បន្ននៅរាជធានីភ្នំពេញ គឺយើងបែងចែកជា 2តំបន់ ហើយយើងគ្រោងនឹងបង្កើតឱ្យមាន5តំបន់។ ចំណែកឯនៅខេត្តវិញ គឺមិនទាន់មាននៅឡើយទេ តែយើងក៏នឹងគ្រោងលក់ Franchise ទៅខេត្តផងដែរ។ នៅពេលនេះ BNI មានសមាជិកប្រមាណ 400នាក់ហើយ ដែលពួកគាត់សុទ្ធតែជាម្ចាស់អាជីវកម្ម ក្នុងនោះយើងបែងចែកជា 9 Chapters ហើយយើងក៏នឹងមានបន្ថែម 3 Chapters ទៀតនៅមុនពេលចូលឆ្នាំខ្មែរ។

នៅឆ្នាំ2018 នេះ យើងបង្កើតឱកាសអាជីវកម្មបាន 2,539 ខណៈចំណូល គឺទទួលបានប្រមាណជាជិត 20លានដុល្លារ។

ចំពោះសមិទ្ធផលដែលយើងយកបានពី BNI តាំងពីឆ្នាំ 2013 មកដល់បច្ចុប្បន្ន គឺយើងបង្កើតឱកាសអាជីវកម្មក្នុង BNI បានរហូតដល់ទៅ 40,965 ឱកាសអាជីវកម្មហើយ ដែលក្នុងនោះចំណូលសរុបគឺ មានចំនួនជាង 49លានដុល្លារ។

តើលោកមានអ្វីចង់បន្ថែមសម្រាប់ជាសារទៅកាន់សាធារណជនថែមទៀតទេ?

ខ្ញុំសូមជម្រាបជូនដល់ម្ចាស់អាជីវកម្មទាំងអស់ឱ្យបានដឹងថា BNI ជាទម្រង់ដែលអាចជួយឱ្យម្ចាស់អាជីវកម្មមានការរីកចម្រើនតាមរយៈការធ្វើការជាក្រុម។ ហើយកាលណាយើងធ្វើការជាក្រុមនៅក្នុង Chapter នីមួយៗ គឺយើងឈរលើគោលការណ៍ស្គាល់ (Know) ចូលចិត្ត(Like) និងជឿជាក់ (Trust)។

ការធ្វើការងារបែបនេះ គឺដំបូងឡើយគេស្គាល់យើង បន្ទាប់មកគេចូលចិត្តយើង ហើយបន្ទាប់មកទៀតគេនឹងជឿជាក់លើយើង។ តាមរយៈគោលការណ៍នេះ ម្ចាស់អាជីវកម្មនីមួយៗនឹងអាចធ្វើឱ្យអាជីវកម្មរបស់ខ្លួនអភិវឌ្ឍបានយ៉ាងឆាប់រហ័ស ព្រោះថា នៅពេលដែលគេមានជំនឿជាក់មកលើយើងកាន់តែខ្លាំងនោះ ការធ្វើអាជីវកម្មរបស់យើងក៏កាន់តែងាយស្រួលឡើងដែរ៕

January 24, 2018

អ្នកគាំទ្រវៀតណាមរាប់លាននាក់អបអរសាទរ ក្រោយពីក្រុមU23របស់ពួកគេបានឈានទៅវគ្គផ្តាច់ព្រ័ត្រនៃ AFC U23

ក្រុមបាល់ទាត់ជម្រើសជាតិវៀតណាមអាយុក្រោម 23ឆ្នាំ បានឈានទៅវគ្គផ្តាច់ព្រ័ត្រនៃព្រឹត្តិការណ៍ AFC U23 Championship ក្នុងប្រទេសចិន ក្រោយពីបានផ្តួលក្រុមជម្រើសជាតិកាតាអាយុក្រោម 23ឆ្នាំ ដោយការស៊ុតបាល់ប៉េណាល់ទីកាត់សេចក្តី កាលពីថ្ងៃអង្គារម្សិលមិញជាមួយនឹងជ័យជម្នះ 4-3 បន្ទាប់ពីទទួលបានលទ្ធផលស្មើ 2-2 នៅនាទីបន្ថែម 15នាទី 2ដងរួចមក។

វៀតណាម បានក្លាយជាក្រុមទៅពីតំបន់អាស៊ីអាគ្នេយ៍ដំបូងគេដែលបានឈានទៅដល់វគ្គផ្តាច់ព្រ័ត្រនៃយុទ្ធនាការនេះ។ បន្ទាប់ពីជ័យជម្នះនេះ អ្នកគាំទ្រកីឡាបាល់ទាត់វៀតណាមរាប់លាននាក់ បានប្រមូលផ្តុំគ្នាតាមដងវិថីនានា ដើម្បីអបអរជ័យជម្នះរបស់ក្រុមពួកគេ។ ជ័យជម្នះរបស់ក្រុមវៀតណាម U23 បានកើតឡើងមុនពេលក្រុមអ៊ូសបេគីស្ថាន U23 ផ្តួលកូរ៉េខាងត្បូង U23 ក្នុងលទ្ធផល 3-០ ក្នុងរយៈពេលបន្ថែម 15នាទី 2ដង ក្រោយពីបានបញ្ចប់ក្នុងលទ្ធផលស្មើ 1-1 ក្នុងរយៈពេល 90នាទី។

ក្រុមទាំងពីរនឹងត្រូវឈានទៅប្រកួតវគ្គផ្តាច់ព្រ័ត្រ នាថ្ងៃសៅរ៍ ទី27 ខែមករា ខាងមុខនេះ។ លោក Park Hang-seo គ្រូបង្វឹកសញ្ជាតិកូរ៉េខាងត្បូងរបស់ក្រុមជម្រើសជាតិវៀតណាម បានឲ្យដឹងថា៖ «វាគ្មានអ្វីស្រពេចស្រពិលទៀតឡើយ ពួកគេគឺជាអ្នកប្រយុទ្ធ។ នៅមុនពេលការប្រកួតនេះ យើងបានសន្យាចំពោះខ្លួនឯងថា យើងមិនអនុញ្ញាតឲ្យអ្នកគាំទ្ររបស់វៀតណាម បាក់មុខឡើយ។ ទីបំផុតយើងធ្វើបានសម្រេចមែន»៕

ប្រភពពី៖ e.vnexpress

January 24, 2018

Sanchez ចូលរួមជាមួយ Man Utd ខណៈ Mkhitaryan បំពេញការផ្ទេរទៅ Arsenal

Alexis Sanchez បានបំពេញការផ្ទេរជាផ្លូវការរបស់គេទៅកាន់ក្លិប Manchester United រួចហើយ និងបានធ្វើការរិះគន់ភ្លាមៗទៅកាន់អតីតកីឡាកររបស់ក្រុម Arsenal។

ការផ្ទេរដែលជាការដោះដូរកីឡាករគ្នានេះ បានកើតឡើងកាលពីថ្ងៃចន្ទ ខណៈដែល Sanchez ត្រូវបានគេជឿជាក់ថា បានចុះហត្ថលេខារយៈពេល 4ឆ្នាំកន្លះ ជាមួយនឹង Man Utd ហើយខ្សែបម្រើ Henrikh Mkhitaryan បានចូលរួមជាមួយនឹងក្លិប Arsenal។ Sanchez បានស៊ុតបាល់បញ្ចូលទី 80គ្រាប់ ចាប់តាំងពីផ្ទេរមកពីក្លិប Barcelona ក្នុងតម្លៃខ្លួន 30លានផោន កាលពីខែកក្កដា ឆ្នាំ2014 និងបានក្លាយជាអ្នករកគ្រាប់បាល់បានច្រើនជាងគេកាលពីរដូវកាលមុន ជាមួយនឹងការរកបាន 30គ្រាប់ក្នុងរាល់យុទ្ធនាការទាំងអស់។

ខ្សែប្រយុទ្ធអន្តរជាតិស៊ីលីរូបនេះ បានឲ្យដឹងថា៖ «ខ្ញុំពិតជារំភើបណាស់ ក្នុងការបានចូលរួមជាមួយនឹងក្លិបដ៏ធំបំផុតក្នុងពិភពលោកនេះ។ ឱកាសក្នុងការលេងនៅកីឡដ្ឋានជាប្រវត្តិសាស្ត្រ និងការធ្វើការជាមួយនឹងលោក Jose Mourinho គឺជារឿងមួយដែលខ្ញុំមិនអាចច្រានចោលបានឡើយ»។

តារាឆ្នើមរូបនេះបានឲ្យដឹងថា៖ «ខ្ញុំពិតជាមានមោទនភាពណាស់ដែលបានក្លាយជាកីឡាករស៊ីលីដំបូងគេដែលលេងឲ្យក្រុម Man United ហើយខ្ញុំសង្ឃឹមថា ខ្ញុំអាចបង្ហាញឲ្យអ្នកគាំទ្រទាំងអស់ក្នុងពិភពលោកបានឃើញពីមូលហេតុដែលក្លិបចង់បានរូបខ្ញុំឱ្យមកទីនេះ»។

ស្របពេលជាមួយគ្នានេះដែរ ខ្សែបម្រើស្លាបអន្តរជាតិអាមេនី Mkhitaryan វ័យ 29ឆ្នាំ ក៏បានចុះហត្ថលេខាជាមួយក្លិប Arsenal ផងដែរ ក្រោយពីរូបគេបានធ្លាក់ចេញពីការចាប់អារម្មណ៍របស់អ្នកចាត់ការទូទៅនៃក្លិប Man United គឺលោក Jose Mourinho បន្ទាប់ពីបានចំណាយពេលអស់ 18ខែនៅកីឡដ្ឋាន Old Trafford៕

ប្រភពពី៖ The Guardian

January 24, 2018

រោមដុះក្រោមច្រមុះដូចពុកមាត់ តើនារីៗ ត្រូវកែបញ្ហានេះយ៉ាងដូចម្តេច?

ដោយសារតែរោមនៅលើមុខដុះឡើងច្រើនជ្រុលពេក (អ្នកខ្លះដុះច្រើនខុសប្រក្រតី) ទើបធ្វើឱ្យនារីៗមិនតិចនាក់នោះទេដែលត្រូវបាត់បង់ភាពជឿជាក់លើខ្លួនឯងខ្លាំងមែនទែន ព្រោះមិនថា ខំព្យាយាមបិទបាំងយ៉ាងណាក៏ដោយ ក៏រោមពណ៌ខៀវស្តើងៗដែលដុះនៅក្រោមច្រមុះនោះ នៅតែលេចធ្លោទាក់ភ្នែក រហូតទាល់តែអ្នកណាៗក៏នាំគ្នាចំអន់ថា ស្រីអីដុះពុកមាត់អញ្ចឹង! ដូច្នេះបើអ្នកនាងកញ្ញាណាកំពុងតែខ្វល់ខ្វាយជាមួយនឹងការរិះរកវិធីចាត់ការរោមដូចពុកមាត់របស់ខ្លួនឯងនោះ លេខនេះទស្សនាវដ្តី ឡារ៉ែន សូមនាំយកវិធីជាច្រើនដែលអាចជួយកម្ចាត់ និងបិទបាំងរោមដូចពុកមាត់ចង្រៃនោះ មកជម្រាបជូនដូចតទៅ ៖

ប្រើការតុបតែងមុខជួយ
អាចនិយាយបានថាជាវិធីដ៏ងាយស្រួលមួយដែលអាចជួយកែបញ្ហានេះបានក្នុងរយៈដំបូងដោយគ្រាន់តែប្រើម្សៅទ្រនាប់ ប៊ីប៊ីគ្រីម ឬខនស៊ីលលើរ៍ដែលសង្កត់ធ្ងន់លើការបិទបាំង លាបនៅលើបរិវេណដែលមានពុកមាត់នោះ ហើយប្រើម្សៅហុយផាត់វាសជាន់ពីលើយ៉ាងស្រាលៗ ដើម្បីឱ្យមើលទៅឃើញដូចធម្មជាតិ និងកុំឱ្យមើលឃើញក្រាស់ខ្លាំងពេកជាការស្រេច។

ប្រើវិធីកម្ចាត់រោមបែបបណ្តោះអាសន្ត
គឺជាវិធីដែលទទួលបានការនិយមយ៉ាងច្រើននៅក្នុងចំណោមនារីទាំងឡាយ មិនថាតែរោមដៃ រោមជើង រោមក្លៀក ឬសូម្បីតែរោមនៅលើផ្ទៃមុខក៏ដោយ។ ការបករោម និងការប្រើគ្រីមកម្ចាត់រោមក៏អាចបំពេញតួនាទីកម្ចាត់រោមបានស្អាតហ្មត់ចត់យ៉ាងងាយស្រួលដែរ តែរោមនឹងដុះឡើងវិញក្នុងអំឡុង2–6សប្តាហ៍ ហើយសម្រាប់អ្នកដែលមានស្បែកខ្មៅស្រអែម ឬមានស្នាមដំបៅដោយសារមុន សូមណែនាំថា មិនគួរប្រើវិធីបករោមឡើយ ព្រោះវាអាចធ្វើឱ្យរបកស្បែកមានស្លាកស្នាម និងកើតអាការរលាកក្រហាយបាន។

ប្រើវិធីធ្វើឡាែហ្ស៊កម្ចាត់រោមបែបនិរន្ត
បច្ចេកវិទ្យាទំនើបខាងវេជ្ជសាស្ត្រដែលប្រើ ប្រាស់កាំរស្មីឡាែហ្ស៊ដើម្បីឱ្យកម្ដៅទៅបំផ្លាញការរីកធំធាត់របស់រោម រហូតអាចកម្ចាត់រោមឱ្យអស់បាននៅទីបំផុតនោះ មានដូចជា IPL, Gental YAG និង Alexandrite ដែលមានអ្នកខ្លះត្រូវទៅទទួលការធ្វើឡាែហ្ស៊ច្រើនជាងមួយដង ក៏មានដែរ ដោយសារតែភាពខុសប្លែកគ្នារបស់ទំហំសរសៃរោម និងភាពខ្មៅ-សនៃស្បែករបស់មនុស្សម្នាក់ៗ។

ទាំងអស់នេះគឺជាវិធីកម្ចាត់រោម ដែលមិនមែនជារឿងពិបាកនោះឡើយ គ្រាន់តែអ្នកត្រូវចេះជ្រើសយកវិធីណាមួយដែលស័ក្តិសមនឹងខ្លួនឯងប៉ុណ្ណោះ នោះអ្នកនឹងមានផ្ទៃមុខស្អាតរលោង គ្មានរោមមករំខានចិត្តទៀតឡើយ៕

January 24, 2018

សារៈសំខាន់នៃរបាយការណ៍ហិរញ្ញវត្ថុចំពោះកម្ចីពីធនាគារ

បច្ចុប្បន្ននេះ យើងសង្កេតឃើញថា គ្រប់អាជីវកម្មកំពុងរីកដុះដាលដូចផ្សិត តែភាគច្រើនអាជីវកម្មខ្នាតតូច និងមធ្យមមិនសូវបានគិតគូរពីបញ្ជីស្នាមគណនេយ្យតាមក្បួនខ្នាតហិរញ្ញវត្ថុច្បាស់លាស់នៅឡើយទេដោយសារតែម្ចាស់អាជីវកម្មនៅមិនទាន់យល់ច្បាស់ពីសារៈសំខាន់នៃរបាយការណ៍ហិរញ្ញវត្ថុនេះ។

តើអ្វីទៅជារបាយការណ៍ហិរញ្ញវត្ថុ?
សាស្ត្រាចារ្យផ្នែកពាណិជ្ជកម្ម និងធុរកិច្ច លោក ឃឹម សារិទ្ធ បានលើកឡើងថា របាយការណ៍ហិរញ្ញវត្ថុគឺជារបាយការណ៍ដែលរៀបចំឡើងដោយផ្អែកលើវិធីសាស្ត្រគណនេយ្យ ដែលឆ្លុះបញ្ជាំងឱ្យឃើញពីស្ថានភាពហិរញ្ញវត្ថុរបស់ក្រុមហ៊ុនមួយ ដូចជាចំណូល ចំណាយ ទ្រព្យសកម្ម ទ្រព្យអកម្ម និងលំហូរសាច់ប្រាក់ចេញ-ចូលជាដើម។ តាមរយៈរបាយការណ៍ហិរញ្ញវត្ថុយើងអាចដឹងពីចំណុចខ្លាំង និងចំណុចខ្សោយ រួមទាំងសក្តានុពលរបស់ក្រុមហ៊ុននោះទៀតផង។

លោកសាស្ត្រាចារ្យ ឃឹម សារិទ្ធ បាននិយាយថា៖ “របាយការណ៍ហិរញ្ញវត្ថុមានសារៈសំខាន់ណាស់សម្រាប់ម្ចាស់អាជីវកម្មផ្ទាល់ និងអង្គភាពខាងក្រៅដែលពាក់ព័ន្ធនឹងអាជីវកម្ម”។

អ្នកជំនាញខាងលើបានបញ្ជាក់ថា សម្រាប់ម្ចាស់ស្ថាប័នផ្ទាល់ គឺគាត់អាចនឹងរៀបចំគម្រោងហិរញ្ញវត្ថុបានល្អ ប្រសិនបើគាត់មានរបាយការណ៍ហិរញ្ញវត្ថុត្រឹមត្រូវ និងច្បាស់លាស់ ហើយពេលខ្លះគាត់ក៏អាចទាក់ទាញអ្នកវិនិយោគមកបណ្ដាក់ទុនបន្ថែមបានទៀតផង។ ម្យ៉ាងវិញទៀត សម្រាប់ភាគីពាក់ព័ន្ធដូចជាដៃគូអាជីវកម្ម និងម្ចាស់បំណុលជាដើម ក៏អាចនឹងប្រើរបាយការណ៍ហិរញ្ញវត្ថុនេះជាមូលដ្ឋានក្នុងការស្វែងយល់ពីស្ថានភាពរបស់ក្រុមហ៊ុននោះផងដែរ។

លោក សាន្ត ច័ន្ទកុម្ភៈ នាយកបណ្តុះបណ្តាលនៃវិទ្យាស្ថានហិរញ្ញវត្ថុកម្ពុជា បានលើកឡើងថា ថ្វីដ្បិតតែការផ្តល់កម្ចីនៅកម្ពុជាគេពឹងផ្អែកលើទ្រព្យតម្កល់ តែគេក៏ឱ្យតម្លៃលើរបាយការណ៍ហិរញ្ញវត្ថុផងដែរ ព្រោះថា គម្រោងកម្ចីសម្រាប់អាជីវកម្ម គឺទាមទារចាំបាច់ត្រូវដឹងពីស្ថានភាពអាជីវកម្មឱ្យបានច្បាស់លាស់ជាមុនសិន។

លោក សាន្ត ច័ន្ទកុម្ភៈ បាននិយាយថា៖ “ការដែលមានរបាយការណ៍ហិរញ្ញវត្ថុច្បាស់លាស់គឺជារឿងសំខាន់មួយដែលពាណិជ្ជករត្រូវដឹង ព្រោះថា ពួកគាត់អាចត្រូវការទុនបន្ថែមគ្រប់ពេល ហើយពេលខ្លះគាត់ត្រូវការខ្ចីលុយពីធនាគារ ដូច្នេះរបាយការណ៍ហិរញ្ញវត្ថុគឺជាទំនុកចិត្តមួយដែលអាចបញ្ជាក់ដល់ធនាគារថាគាត់មានភាពរឹងមាំផ្នែកហិរញ្ញវត្ថុដើម្បីសងត្រឡប់ទៅធនាគារវិញ ដែលធ្វើឱ្យគាត់ងាយទទួលបានជោគជ័យលើការស្នើសុំកម្ចី”។

លោក ច័ន្ទកុម្ភៈ បានបន្ថែមទៀតថា អ្នករកស៊ីគាត់អាចមានទ្រព្យបញ្ចាំមួយចំនួនដែលមានកម្រិតមិនច្រើនពេកនោះទេ តែតម្រូវការខ្ចីរបស់គាត់គឺលើសពីទ្រព្យបញ្ចាំទាំងអស់នោះទៅទៀត ហេតុនេះប្រសិនបើគាត់មានរបាយការណ៍ហិរញ្ញវត្ថុច្បាស់លាស់ និងអាជីវកម្មរឹងមាំល្អហើយ គាត់អាចនឹងទទួលបានលទ្ធភាពនៃការខ្ចីក្នុងចំនួនខ្ពស់បាន។ Accounting Partner នៃក្រុមហ៊ុន REACHS &Partner Co., Ltd លោក ស៊ឹម ចាន់គីរីរ័ត្ន បានលើកឡើងថា នាពេលបច្ចុប្បន្ននេះ អ្នករកស៊ីជាច្រើនបានធ្វើការរកស៊ីតាមទម្លាប់ ហើយមិនសូវខ្វាយខ្វល់ច្រើនពីរបាយការណ៍ហិរញ្ញវត្ថុប៉ុន្មាននោះទេ។ អ្នកកាន់បញ្ជីរបស់គាត់ ភាគច្រើនជាមនុស្សដែលម្ចាស់អាជីវកម្មទុកចិត្តបំផុត អាចជាកូន ជាប្រពន្ធ ឬជាសាច់ញាតិជាដើម ដែលពេលខ្លះគាត់ធ្វើការកត់ត្រាតែក្នុងសៀវភៅធម្មតា។ កត្តានេះធ្វើឱ្យគាត់មានផលលំបាកក្នុងការរៀបចំរបាយការណ៍ហិរញ្ញវត្ថុនៅពេលដែលគាត់ត្រូវការជាចាំបាច់។

លោក ស៊ឹម ចាន់គីរីរ័ត្ន បាននិយាយថា៖ ជាធម្មតាអ្នករកស៊ីតែងតែយកប្លង់ដី ឬប្លង់ផ្ទះទៅដាក់បញ្ចាំនៅធនាគារស្ទើរតែទាំងអស់ដើម្បីយកលុយមកប្រកបរបររកស៊ី តែនៅពេលដែលគាត់កំពុងកាក់កប ហើយចង់ពង្រីកអាជីវកម្មឱ្យធំឡើងបន្ថែមទៀតគាត់អាចនឹងមិនមានទុនគ្រប់គ្រាន់ដើម្បីធ្វើរឿងថ្មីនោះទេ ព្រោះគាត់គ្មានទ្រព្យបន្ថែមដើម្បីដាក់ទៅឱ្យធនាគារបន្តទៀតឡើយ តែប្រសិនបើគាត់មានរបាយការណ៍ហិរញ្ញវត្ថុត្រឹមត្រូវ នោះគាត់នឹងមិនទាល់លុយសម្រាប់រកស៊ីនោះឡើយ ព្រោះថា នៅពេលដែលគាត់ត្រូវការលុយរកសុីបន្ថែម របាយការណ៍ហិរញ្ញវត្ថុគឺជាឯកសារសំខាន់មួយដែលអាចធ្វើឱ្យធនាគារយល់ព្រមផ្តល់កម្ចីបន្ថែមសម្រាប់គាត់ដើម្បីពង្រីកអាជីវកម្ម៕

January 24, 2018

Author: វល័ក្ខ