វល័ក្ខ - La Reine Media

សាច់ស្អាត និងសុខភាពល្អគ្រប់ឥរិយាបទនៅក្នុងផ្ទះ

ភាពស្រស់ស្អាតមិនមែនរកបានដោយងាយៗនោះទេ ដូច្នេះអ្នកត្រូវដឹងពីវិធីក្នុងការទាញយកនូវភាពស្រស់ស្អាតពីគ្រប់ឥរិយាបទរបស់អ្នក ទោះជានៅក្នុងផ្ទះក៏ដោយក៏អ្នកអាចស្រស់ស្អាតបានគ្រប់ពេល និងគ្រប់ទីកន្លែងដែរ សូមតាមដានជាមួយនឹងគន្លឹះសំខាន់ៗដូចខាងក្រោមនេះ ៖

ក្នុងបន្ទប់ទឹក
ត្រាំទឹកក្តៅឧណ្ហៗ : ត្រាំខ្លួននៅក្នុងទឹកក្តៅឧណ្ហៗ ដែលមានសីតុណ្ហភាពប្រមាណជា32-37អង្សា បន្តក់ទឹកប្រេងក្រអូប រ៉ូសមែរី ឬមីនត៏ដើម្បីបង្កើនការហូរវិលរបស់លោហិត ដែលរ៉ូសមែរីនឹងជួយជំរុញរន្ធរោមឱ្យបណ្តេញវត្ថុកខ្វក់ចេញមកក្រៅ ដោយត្រាំខ្លួនប្រមាណជា20នាទីនឹងជួយសម្រួលស្បែកដែលហត់នឿយ ឬទ្រុឌទ្រោមឱ្យល្អឡើងវិញ។

ដុសខាត់ស្បែក : ក្រៅពីធ្វើការសម្អាតស្បែកយ៉ាងហ្មត់ចត់ហើយ បើចង់បង្អួតស្បែកល្អនោះត្រូវតែកម្ចាត់កោសិកាស្បែកចាស់ចោលជាមុនសិន ដែលផ្លែប៉េងប៉ោះគឺជាតួឯកនៃការមានស្បែកស្អាត សុខភាពល្អ ដោយយកប៉េងប៉ោះ 2ផ្លែ មកខ្វេះយកគ្រាប់ចេញ រួចកិនឱ្យល្អិត ហើយបន្ថែមម្សៅសាលីម៉ដ្ឋចូលទៅ រួចយកមកខាត់ស្បែកជារង្វង់មូលឱ្យសព្វ ទុកចោល5-10នាទី សាច់ប៉េងប៉ោះនឹងជួយព្យាបាលស្បែកដែលខូចខាត ហើយពណ៌របស់វានឹងធ្វើឱ្យស្បែកឡើងសលាយផ្កាឈូកទៀតផង។

ក្នុងចង្ក្រានបាយ

ស្បែកដៃឡើងស្អាត ពណ៌សលាយផ្កាឈូកនៅតែស្រស់ស្អាតជានិច្ច អាស្រ័យលើការមើលថែពីខាងក្នុងរាងកាយ ដូច្នេះពេលទិញបន្លែយកមកទុកក្នុងទូទឹកកកលើកក្រោយ សូមកុំភ្លេចបន្លែខាងក្រោមនេះផង ៖

ស្ពៃ : ឧត្តមសម្បូរទៅដោយវីតាមីន A ការបរិភោគស្ពៃនឹងធ្វើឱ្យស្បែកស និងរាបស្មើតតាមបែបធម្មជាតិ។
គ្រាប់សណ្តែកហោឡាំងតៅ : សម្បូរទៅដោយវីតាមីន A ដែលនឹងធ្វើឱ្យស្បែកមុខកាន់តែរាបម៉ដ្ឋខៃឡើង។
ដំឡូងបារាំង : មានប្រូតេអីុន និងវីតាមីន C អាចកាត់បន្ថយកូលេស្តេរ៉ូល និងខ្លាញ់នៅក្រោមស្បែកបាន ជួយឱ្យស្បែកស្រស់ភ្លឺថ្លា។
មើមការ៉ុត : ផ្តល់ប្រយោជន៍ដល់ស្បែកយ៉ាងល្អ សម្បូរទៅដោយភែកទីនដែលជួយកម្ចាត់សារធាតុពុលចេញពីរាងកាយ និងធ្វើឱ្យស្បែកមើលទៅរាបម៉ដ្ឋខៃពណ៌ផ្កាឈូកខ្ចី។
សណ្តែកបណ្តុះ : អាចការពារការកើតស្នាមជាំ អាចម៍រុយ និងជួយឱ្យស្បែកស្រស់ថ្លាឡើង។
ត្រសក់ : មានសារជាតិអាស៊ីត អាមីណូ ដែលជួយលុបបំបាត់ស្នាមជាំអុចខ្មៅ ធ្វើឱ្យស្បែកឡើងស ភ្លឺរលោង និងកាត់បន្ថយអាការប្រត្តិកម្មរបស់ស្បែកបានទៀតផង។

ក្នុងបន្ទប់ទទួលភ្ញៀវ

ការហាត់ប្រាណជាប់ជាប្រចាំមិនត្រឹមតែជួយឱ្យមានសុខភាពល្អប៉ុណ្ណោះទេ តែនៅបានជួយឱ្យឈាមរត់បានល្អ និងជួយបណ្តេញជាតិពុលចេញមកតាមរយៈញើសទៀតផង។ ការហាត់ប្រាណត្រឹមតែ20នាទីនៅថ្ងៃធម្មតា និង 60នាទីនៅថ្ងៃឈប់សម្រាក ចង់ហាត់ប្រាណបែបពេញទំហឹង ឬហាត់ប្រាណលើផ្នែកណាមួយនៃរាងកាយក៏បាន ឱ្យអត្រាការលោតរបស់បេះដូងកើនឡើង40-60% រួចសឹមបន្ថែមឡើងសន្សឹមៗតាមភាពរឹងមាំនៃរាងកាយរបស់អ្នក។

ក្នុងបន្ទប់គេង

បំប៉នឱ្យពេញទំហឹង គេងឱ្យបានឆ្អែត គ្មានអ្វីសំខាន់ជាងការគេងឱ្យបានគ្រប់គ្រាន់នោះទេហើយបន្ទាប់មក គឺការជ្រើសរើសប្រើឡេថែបំប៉នស្បែក ដែលក្រៅពី វ៉ៃថេននីង ហើយគួររកមើលវីតាមីន B3, C និង E ផង នឹងរឹតតែជួយឱ្យស្បែកមុខភ្លឺថ្លា និងតឹងណែនទៀតផង៕

January 26, 2018

ក្រុមហ៊ុន Havas Riverorchid Cambodia បាននាំបុគ្គលិកធ្វើដំណើរកម្សាន្តទៅកាន់ ខេត្តកោះកុង ព្រមជាមួយការបរិច្ចាគជាសម្ភារៈសិក្សាដល់សាលាបឋមសិក្សាតាតៃ

ក្រុមហ៊ុន Havas Riverorchid Cambodia ដែលជាក្រុមហ៊ុនផ្សព្វផ្សាយពាណិជ្ជកម្មឈានមុខគេនៅកម្ពុជា បានចាប់ផ្តើមឆ្នាំថ្មី ឆ្នាំ2018 ដោយការរៀបចំដំណើរកម្សាន្តប្រចាំឆ្នាំទៅកាន់ខេត្តកោះកុង។

ខេត្តកោះកុងត្រូវបានជ្រើសរើសជាទិសដៅដំណើរកម្សាន្ត ក្នុងន័យប្តេជ្ញាចិត្ត របស់ក្រុមហ៊ុន Havas Riverorchid ក្នុងការភ្ជាប់ទំនាក់ទំនង និងពង្រីកការយល់ដឹងបន្ថែមពីកម្ពុជាទាំងមូល រួមទាំងតំបន់ដាច់ស្រយាល។

Havas Riverorchid Cambodia បានប្តេជ្ញាចិត្តចូលរួមក្នុងសកម្មភាពមនុស្សធម៌ ក្នុងន័យផ្តល់នូវការឧបត្ថម្ភគាំទ្រដល់ប្រជាជនជួបការលំបាកក្នុងប្រទេសកម្ពុជា។

ក្នុងការចូលរួមចំណែកនៃសកម្មភាពនេះ ក្រុមហ៊ុន Havas Riverorchid Cambodia បាន បរិច្ចាគសម្ភារៈសិក្សា និងថវិការមួយចំនួនដល់សិស្សានុសិស្សចំនួន 188នាក់ នៅបឋមសិក្សាតាតៃ។ ក្នុងនោះក្រុមហ៊ុន Unilever Cambodia ដែលជាអតិថិជនរបស់ Havas Riverorchid Cambodia ក៏រីករាយចូលរួមបរិច្ចាគផលិតផលមួយចំនួនដូចជាថ្នាំដុសធ្មេញស៊ីកណល អំបិល ម្លួរ និងសាប៊ូដុសខ្លួនកម្ចាត់មេរោគឡៃប៊យ ដល់សិស្សានុ សិស្ស និងគ្រូបង្រៀននៅទីនោះផងដែរ។

លោក Anthony Keck អគ្គនាយកក្រុមហ៊ុន Havas Riverorchid ប្រចាំកម្ពុជាបានមាន ប្រសាសន៍ថា “យើងទទួលបានសមិទ្ធផលជាច្រើនពីការងារនៅកម្ពុជា។ ការអភិវឌ្ឍន៍ និង ភាពរស់រវើកនៃប្រទេសបានធ្វើឱ្យការងាររបស់យើងកាន់តែមានភាព ភ្ញាក់ផ្អើល ហើយវាពិតជាមានតម្លៃណាស់ ក្នុងបង្ហាញដល់អតិថិជនរបស់យើង និងយុទ្ធនាការនានារបស់ពួកគេ។ លោក Anthony Keck បានបន្ថែមថា “វាពិតជាត្រឹមត្រូវណាស់ដែលយើងអាចបរិច្ចាកបន្តិចបន្តួចពេលយើងមានឱកាស ហើយយើងពិតជារីករាយណាស់ដែលពេលនេះយើងមានឱកាសឧបត្ថម្ភដល់កុមារដែលត្រូវការជំនួយពីយើង។

យើងមានបុគ្គលិកខ្មែរ ឆ្នើមជាច្រើននាក់ ដែលកំពុងបម្រើការងារនៅគ្រប់ផ្នែក និងគ្រប់កម្រិត នៅក្នុងក្រុមហ៊ុនរបស់យើង ហើយប្រហែលជាកុមារ ទាំងនេះ អាចនឹងមកបន្តដំណែងពួកគេនៅថ្ងៃអនាគត។

ក្នុងកម្មវិធីដំណើរកម្សាន្តនេះ បុគ្គលិកសរុប 115 នាក់ បានចូលរួមលែងល្បែងកម្សាន្តនានាដើម្បីពង្រឹងសាមគ្គីភាព និងរីករាយជាមួយការកម្សាន្តនៅតំបន់ទេសចរពិសេសរយៈពេល 3ថ្ងៃ នៅខេត្តកោះកុង៕

January 26, 2018

ថី្ម! ម៉ាស៊ីនម៉ាស៊ូតគូបូតា ZT ខ្លាំងពេញកម្លាំងសម្រាប់ការងារជាអតិបរិមា

ស្យាមគូបូតា ខបភឺរ៉េសិន ដែលជាអ្នកនាំមុខគេខាងផ្នែកគ្រឿងយន្តកសិកម្ម មានមោទនភាពបង្ហាញជូនម៉ាស៊ីនម៉ាស៊ូតគូបូតាថ្មី ZT Series ដែលមានទិន្នផលកម្លាំង 10-15.5កម្លាំងសេះ រចនារូបរាងថី្ម មានផាសុខភាព និងសុវត្ថិភាពយ៉ាងពេញលេញ។ ជាមួយនឹងបចេ្ចកវិទ្យាផ្តាច់មុខ “K-Tech” ម៉ាស៊ីនម៉ាស៊ូតថ្មីនេះមានកម្លាំងកាន់តែខ្លាំង កាន់តែធន់ និងកាន់តែសន្សំសំចៃប្រេង មានសមត្ថភាពលើការងារធ្ងន់ៗ អាចធ្វើដំណើរលើចម្ងាយផ្លូវឆ្ងាយ និង បូមទឹកបានយ៉ាងពេញកម្លាំង។

លោក សំសាក ម៉ូថន អនុប្រធានប្រតិបត្តិជាន់ខ្ពស់ ស្យាមគូបូតា ខបភឺរ៉េសិន បានថ្លែងថា ការវិវត្តន៏ និង បច្ចេកវិទ្យាថ្មីនៃគ្រឿងយន្តកសិកម្ម បានក្លាយជាកត្តាដ៏សំខាន់ដែលនិងជួយប្រជាកសិករទទួលបានប្រសិទ្ធិភាព និងភាពងាយស្រួលក្នុងការធ្វើការងារជាអតិបរមា។ ថ្មីៗនេះក្រុមហ៊ុនបានសម្ពោធម៉ាស៊ីនម៉ាស៊ូតគូបូតា ZT Series ជាម៉ូដែលថ្មីដែលមានកម្លាំងកាន់តែខ្លាំង កាន់តែធន់ និងកាន់តែសន្សំសំចៃប្រេង ស្របតាមស្តង់ដារគូបូតាសម្រាប់ធ្វើការងារធ្ងន់ៗ ជាមួយនឹងភាពរលើបរលោង និង មានរចនារូបរាងកាន់តែល្អប្រសើរក្នុងការធ្វើការងារ។

លោក សំសាក បានបនែ្ថមទៀតថា “សព្វថ្ងៃនេះ ម៉ាស៊ីនម៉ាស៊ូតគូបូតាជាម៉ាកសញ្ញានាំមុខគេនៅទីផ្សារកម្ពុជា។ រូបរាងថី្មទាំងស្រុង ត្រូវបានអភិវឌ្ឍន៏ដើម្បីបម្រើតម្រូវការអតិថិជនក្នុងនាមជាអ្នកនាំមុខគេយ៉ាងពិតប្រាកដ។ យើងបានធ្វើឱ្យប្រសើរនូវរចនារូបរាង ដែលកាន់តែរលើបរលោង និងកាន់តែទំនើបជាមួយនិងកំរបកោង។ យើងក៏បានដំឡើងអំពូលភ្លើងមុខ និង អំពូលភ្លើងពិល LED ដែលធ្វើអោយកាន់តែមានសុវត្ថិភាពសម្រាប់ការងារពេលយប់។ ជាងនេះទៅទៀត ដើម្បីផ្តល់នូវរចនាបថជីវិតទំនើប និងពង្រឹងភាពងាយស្រួល យើងបានដំឡើងរន្ធ USB សម្រាប់ប្រើប្រាស់ឧបក្ករណ៏អេឡិចត្រូនិច និង ឧបក្ករណ៏វាស់ស្ទង់កំរិតប្រេងដែលអាចអោយអ្នកប្រើប្រាស់ពិនិត្យមើលកំរិតប្រេងដោយមិនចាំបាច់បើកកំរបប្រេងមើល។ ចំពោះការបំពេញការងារ ការយកចិត្តទុកដាក់ជាចំបងរបស់យើងគឺការទទួលបានប្រសិទ្ធិភាពការងារជាអតិបរមា និង មានភាពធន់សម្រាប់ការងារធ្ងន់ៗ ដោយបានដោះស្រាយបញ្ហាឡើងកំដៅខ្លាំង និងម៉ាស៊ីនដែលភ្ជាប់រន្ធទុយោច្រើន ដែលធ្វើអោយប្រដាប់បាញ់ទឹកនៅក្នុងកន្លែងចំហេះ កាន់តែប្រសើរ និងបាញ់ទឹកកាន់តែលឿន ដោយបង្កើនប្រសិទ្ធិភាពចំហេះនិងកាត់បន្ថយការប្រើប្រាស់ប្រេង។ នេះនិងផ្តល់បទពិសោធន៏អោយអ្នកប្រើប្រាស់មួយកំរិតថែមទៀត។ សូមទទួលយកបទពិសោធន៏ថ្មីនេះសម្រាប់ការងារកសិកម្ម សម្រាប់ការធ្វើដំណើរ ឫ សម្រាប់ការងារបាញ់ទឹក។ ម៉ាស៊ីនម៉ាស៊ូតគូបូតាថ្មីនេះមិនត្រឹមតែរលើបរលោង កម្លាំងកាន់តែខ្លាំង និង កាន់តែធន់នោះទេ តែក៏អាចផ្តល់ទិន្នផលកាន់តែច្រើនថែមទៀតផង។ ជាពិសេសជាងនេះទៅទៀត មានការធានារយះពេល៣ឆ្នាំសម្រាប់សេវាកម្មក្រោយការលក់។

ម៉ាស៊ីនម៉ាស៊ូតគូបូតាថ្មីនេះមានលក់នៅលើទីផ្សារហើយ។ សម្រាប់ព័ត៍មានបនែ្ថមពីម៉ាស៊ីនម៉ាស៊ូតគូបូតា ZT នេះ សូមទាក់ទងភ្នាក់ងារចែកចាយម៉ាស៊ីនម៉ាស៊ូត និងគោយន្តដើរតាម ត្រាឆាង ដែលនៅជិតលោកអ្នក ឫ ទូរស័ព្ទទៅកាន់ផែ្នកសេវាកម្មបន្ទាន់គូបូតាលេខ 1800-20-1747 (ឥតគិតថ្លៃ)៕

January 25, 2018

អាមេរិក នឹងបិទក្រុមហ៊ុនដែលប្រើតិចណូឡូជីឧបករណ៍របស់ Huawei និង ZTE

មើលទៅហាក់ដូចជាការពង្រីកទីផ្សារស្មាតហ្វូនរបស់ចិនចូលទៅក្នុងប្រទេសសហរដ្ឋអាមេរិកនឹងកាន់តែពិបាកឡើងហើយ ក្រោយពីស្ថាប័នទូរគមនាគមន៍ AT&T របស់សហរដ្ឋអាមេរិក បានបដិសេធក្នុងការចំណាយស្មាតហ្វូន Hauwei។

ថ្មីៗបំផុតនេះ លោក ម៉ៃខ៍ ខូណាវេយ៍ សមាជិកសភាតំណាងរាស្ត្រសហរដ្ឋអាមេរិក និងជាអ្នកតំណាងផ្នែកច្បាប់នៃគណបក្សសាធារណរដ្ឋ បានពិចារណាលើសេចក្ដីព្រាងច្បាប់ (Bill Proposal) ដើម្បីការពារមិនឱ្យរដ្ឋាភិបាលកណ្ដាលធ្វើការរួមជាមួយក្រុមហ៊ុនដែលប្រើប្រាស់សេវាកម្ម ឬឧបករណ៍ដែលផលិតដោយតិចណូឡូជីរបស់ Hauwei និង ZTE របស់ចិន។

សេចក្ដីព្រាងច្បាប់ដែលថានេះបានបង្ហាញខ្លួនឡើងកាលពីពេលថ្មីៗបន្ទាប់ពី AT&T បានបដិសេធក្នុងការលក់ស្មាតហ្វូន Hauwei ដោយសង្កត់ធ្ងន់លើចំណុចដែលថា ត្រូវបានចូលស៊ើបទិន្នន័យ ដែលត្រូវបានអះអាងតាមរយៈរបាយការណ៍មួយរបស់គណៈកម្មាធិការផ្នែកព័ត៌មាន (House Intelligence Committee) កាលពីឆ្នាំ2012 ដែលបានបញ្ជាក់ថា Hauwei និង ZTE គឺជាគ្រោះថ្នាក់ដែលគំរាមសហរដ្ឋអាមេរិក។

លោក ម៉ៃខ៍ ខូណាវេយ៍ បាននិយាយថា “តិចណូឡូជីដែលផលិត និងលក់ដោយប្រទេសចិនគឺជាឧបករណ៍ដែលរដ្ឋាភិបាលចិនប្រើប្រាស់សម្រាប់ស៊ើបការណ៍ពីក្រុមមន្ត្រីរដ្ឋាភិបាលរបស់សហរដ្ឋអាមេរិក ដែលជាគ្រោះថ្នាក់គំរាមដល់សន្តិសុខរបស់ប្រទេសជាតិ។ ការអនុញ្ញាតឱ្យ Hauwei និង ZTE និងស្ថាប័នដទៃទៀតដែលពាក់ព័ន្ធចូលដល់ប្រព័ន្ធការផ្សព្វផ្សាយរបស់រដ្ឋាភិបាលសហរដ្ឋបាននោះ នឹងប្រៀបដូចជាការអញ្ជើញឱ្យប្រទេសចិនចូលមកត្រួតពិនិត្យការធ្វើការងាររបស់យើងបានយ៉ាងលម្អិតដូច្នោះដែរ។ បើសិនជាសេចក្ដីព្រាងច្បាប់នោះត្រូវបានទទួលការធានា និងអនុម័តហើយនោះ នឹងធ្វើឱ្យក្រុមហ៊ុនជាច្រើនដែលប្រើប្រាស់ឧបករណ៍របស់ Hauwei និង ZTE ទាំងប៉ុន្មានមិនអាចធ្វើកិច្ចការជំនួញ (Transaction) ជាមួយរដ្ឋាភិបាលសហរដ្ឋអាមេរិកបានទៀតឡើយ តែ Hauwei និង ZTE នឹងនៅតែអាចលក់ទូរស័ព្ទស្មាតហ្វូនរបស់ខ្លួននៅក្នុងប្រទេសនេះបានដដែល៕

January 25, 2018

ស្លៀកពាក់ទៅប្រសូតបែបណាត្រឹមត្រូវ និងបែបណាមិនគួរស្លៀក?

បើស្ត្រីមានគភ៌ជិតប្រសូតកំពុងរៀបចំកាបូបខោអាវត្រៀមខ្លួនទៅប្រសូត និងត្រៀមរបស់របរប្រើប្រាស់ដែលចាំបាច់សម្រាប់ខ្លួនឯង និងកូនតូចនោះ នៅមានរឿងសំខាន់ម្យ៉ាងទៀតដែលស្ត្រីមានគភ៌មិនគួរភ្លេចភ្លាំង នោះគឺ ការស្លៀកពាក់តែងខ្លួនទៅប្រសូត។ ដូច្នេះយើងនាំគ្នាមកមើលថា តើត្រូវស្លៀកពាក់តែងខ្លួនយ៉ាងណាឱ្យស័ក្តិសម សមរម្យ និងងាយស្រួលទាំងម្ដាយ និងកូនដូចតទៅ។

គួរ ឬមិនគួរ… តើត្រូវស្លៀកពាក់តែងខ្លួនបែបណានៅថ្ងៃឆ្លងទន្លេ?

អំឡុងពេលនេះជាអំឡុងពេលដែលច្របូកច្របល់ និងរហេនរហន់ខ្លាំងបំផុត បើកើតអាការបែកទឹកភ្លោះបែបទាន់ហន់ដោយមិនបានដឹងខ្លួនមុនផងនោះ ហ្នឹងគឺជាការបញ្ជូនសញ្ញាថា ពេលប្រសូតបានមកដល់ហើយ ដូច្នេះសម្លៀកបំពាក់ដែលត្រៀមទុកសម្រាប់ស្លៀកទៅប្រសូតសំខាន់បំផុតនាពេលនេះ ៖

គួរ៖ ជាឈុតដែលងាយស្រួលស្លៀកពាក់ សាច់ក្រណាត់ពាក់ទៅស្រួល ហើយដែលសំខាន់គឺ ស្ត្រីមានគភ៌គួរតែត្រៀមការទុកជាមុន ដោយការរៀបចំឈុតសម្រាប់ស្លៀកពេលទៅប្រសូតព្យួរទុកជាស្រេច។

មិនគួរ៖ សម្លៀកបំពាក់ដែលមានខ្សែរណេងរណោង មានឡេវច្រើន ឬត្រូវរូតខ្សែរូតចុះឡើង ព្រោះនៅពេលទៅដល់មន្ទីីរពេទ្យ អ្នកនឹងត្រូវផ្លាស់ស្លៀកឈុតរបស់មន្ទីរពេទ្យហើយ។

គ្រឿងតុបតែង ឬគ្រឿងអលង្ការ

គួរ៖ ក្នុងអំឡុងពេលដ៏សែនកោលាហលនេះ បណ្ដាគ្រឿងអលង្ការដែលស្ត្រីមានគភ៌ធ្លាប់ពាក់ មិនថាតែក្រវិល ខ្សែក ឬចិញ្ចៀន-ល- គួរតែដោះទុកសិន ព្រោះក្រៅពីមិនចាំបាច់សោះក្នុងអំឡុងពេលហ្នឹងហើយ អាចនឹងធ្វើឱ្យកើតមានគ្រោះថ្នាក់ដល់ខ្លួនឯង ឬអាចនឹងរបូតជ្រុះបាត់ក៏មានដែរ។

មិនគួរ៖ មិនគួរពាក់គ្រឿងអលង្ការមានតម្លៃថ្លៃៗ ដូចជា ពេជ្រ មាស-ល- ព្រោះអាចធ្វើឱ្យបាត់បង់ដោយមិនដឹងខ្លួនបាន។

លាបថ្នាំក្រចក? អត់ទេណា៎ កុំ!

គួរ៖ ក្នុងអំឡុងពេលដែលគ្រូពេទ្យត្រូវពិនិត្យមើលកម្រិតអុកស៊ីហ្ស៊ែនក្នុងរាងកាយ ដំណាក់កាលដំបូងគ្រូពេទ្យនឹងពិនិត្យមើលការប្រែប្រួលរបស់ពណ៌ក្រចក។ ដូច្នេះសូមអ្នកគិតទៅមើល! ចុះបើក្រចកពណ៌ក្រហម បៃតង លឿងវិញនោះតើវានឹងធ្វើឱ្យការធ្វើការរបស់គ្រូពេទ្យពិបាកប៉ុនណាទៅ? ដូច្នេះដើម្បីសុវត្ថិភាព និងការធ្វើការងាររបស់ក្រុមគ្រូពេទ្យមានភាពងាយស្រួល គួរតែលាងសម្អាតថ្នាំក្រចកចេញឱ្យស្អាត។

មិនគួរ៖ បច្ចុប្បន្នការតុបតែងក្រចក លាបពណ៌ក្រចកឱ្យស្អាតៗ មានច្រើនម៉ូដច្រើនម៉ាក តែចូរកុំសោកស្ដាយដែលត្រូវលាងវាចេញនោះ ព្រោះពេលនេះ វាជារឿងមួយដែលមិនចាំបាច់ទាល់តែសោះ។

បន្ថែម៖ ត្រៀមរៀបចំកាបូបខោអាវពេលទៅប្រសូត សម្រាប់អ្នកម្ដាយ

ប័ណ្ណពិនិត្យគភ៌ និងអត្តសញ្ញាណប័ណ្ណ។
ឈុតខាងក្នុង និងសំឡីអនាម័យ៖ អាវទ្រនាប់ សម្រាប់ពាក់នៅថ្ងៃត្រឡប់ទៅផ្ទះវិញ គួរតែជាអាវទ្រនាប់ដែលងាយស្រួលបើកឱ្យកូនតូចបៅដោះបានស្រួល។ ខោទ្រនាប់ គួរត្រៀមខោទ្រនាប់រាងធំៗជាងខ្លួនបន្តិច និងមានពណ៌ដិតៗឱ្យបានច្រើន សម្រាប់ស្លៀកពេលគេងសម្រាកក្រោយពេលប្រសូតនៅមន្ទីរពេទ្យ។ គួរជ្រើសរើសប្រើខោទ្រនាប់បែបស្លៀកទៅស្រួលសប្បាយខ្លួន ធូររលុងៗ ដើម្បីឱ្យខ្យល់អាកាសចេញចូលស្រួល។
សម្លៀកបំពាក់សម្រាប់អ្នកម្ដាយស្លៀកពេលចេញពីមន្ទីរពេទ្យ។
ស្បែកជើងផ្ទាត់។

សម្រាប់កូនតូច

ក្រណាត់កន្ទបស្អាត។
ខោអាវកូនតូចខ្នាតទើបនឹងកើត ស្រោមដៃ ស្រោមជើង និងមួក។
កន្សែងសម្រាប់រុំខ្លួនកូនត្រឡប់ទៅផ្ទះត្រៀមខ្លួនរួចរាល់ហើយមែនទេសម្រាប់ការត្រៀមខ្លួនទៅប្រសូត? សូមឱ្យអ្នកម្ដាយ និងកូនតូចមានសុខភាពរឹងប៉ឹង និងកុំភ្លេចស៊ែររូបកូនតូចមកឱ្យអ្នកគ្រូ ឆវី បានមើល និងជួយត្រេកអរផងណា៎ចា៎ស៕

January 25, 2018

ស្បែកប្រះ បែកស្រកា នៅក្នុងរដូវរងា គួរដោះស្រាយបែបណា?

រដូវរងា ជារដូវដែលចាស់ៗជំនាន់មុនតែងបង្គាប់ឱ្យកូនកំលោះរបស់ខ្លួនសង្កេតមើលកូនស្រីក្រមុំនៅក្នុងភូមិ ថាតើនារីណាមួយ ដែលមានរូបឆោមសម្បុរស្រស់ស្អាតនៅក្នុងអំឡុងរដូវនេះ គឺមិនសំដៅតែលើរូបរាងខាងក្រៅតែម្យ៉ាងនោះទេ ពោលគឺចាស់ៗចង់បញ្ជាក់ឱ្យសង្កេតពីការថែរក្សាសុខភាពស្បែក និងភាពឧស្សាហ៍របស់នារីម្នាក់នោះ។

នៅពេលដែលរដូវរងាឈានចូលមកដល់ ស្បែករបស់យើងគ្រប់គ្នាតែងតែជួបបញ្ហាស្ងួត ខ្វះជាតិសំណើមដោយសារតែខ្យល់។ ជាពិសេស ប្រសិនបើអ្នកបណ្តែតបណ្តោយមិនចេះរក្សាស្បែកឱ្យបានទៀងទាត់ទេនោះ ស្បែកស្ងួតកាន់តែខ្លាំង រហូតប្រេះបែកស្រកាជាមិនខាន។ ទោះជាយ៉ាងណាកុំបារម្ភ ថ្ងៃនេះ ទស្សនាវដ្តី ឡារ៉ែន នឹងធ្វើការចែករំលែកនូវវិធីសាស្ត្រងាយៗក្នុងការថែរក្សាស្បែកមិនឱ្យស្ងួតប្រេះក្នុងរដូវរងាឡើយ ដោយប្រើប្រាស់ផ្លែឈើសាមញ្ញៗដូចខាងក្រោមនេះ។

1/ ផ្លែក្រូចពណ៌លឿង
របៀបផ្សំ និងការអនុវត្ត

លាយសាច់ប្រទាលកន្ទុយក្រពើ 2ស្លាបព្រាកាហ្វេ ជាមួយនឹងទឹកក្រូចពណ៌លឿង 1ស្លាបព្រាកាហ្វេ ឱ្យម៉ដ្ឋក្លាយជាល្បាយតែមួយ។
រួចលាបនៅលើផ្ទៃមុខរបស់អ្នកឱ្យសព្វល្អ ហើយរងចាំឱ្យល្បាយនេះធ្វើសកម្មភាពរយ:ពេល10នាទី។
បន្ទាប់មកសឹមលាងសម្អាតជាមួយនឹងទឹកក្តៅឧណ្ហៗ ហើយកុំភ្លេចប្រើក្រែមផ្តល់សំណើមតាមក្រោយផង។
ចូរអនុវត្តវិធីនេះយ៉ាងហោចណាស់3ដងក្នុងមួយសប្តាហ៍ នោះស្បែករបស់អ្នកនឹងចៀសផុតពីភាពស្ងួត និងបែកស្រកាជាមិនខាន។

2/ ផ្លែចេក
របៀបផ្សំ និងការអនុវត្ត

1.គ្រាន់តែបកយកចេកមួយផ្លែ លាយជាមួយនឹងប្រេងដូងមួយស្លាបព្រាកាហ្វេ កូរលាយចូលគ្នាឱ្យក្លាយជាល្បាយតែមួយ។

រួចលាបនៅលើផ្ទៃមុខ ហើយទុកឱ្យស្ងួត បន្ទាប់មកចាំទៅលាងជម្រះដោយប្រើទឹកក្តៅឧណ្ហៗជាការស្រេច។
បន្ទាប់មក ចូរប្រើកន្សែងស្អាតជូតឱ្យស្អាតសព្វ រួចប្រើក្រែមផ្តល់សំណើម ដើម្បីការពារស្បែកស្ងួតដោយសារតែទឹកក្តៅ។
ប្រើរូបមន្តមួយនេះមួយសប្តាហ៍2ដង នោះស្បែករបស់អ្នកនឹងចៀសផុតពីបញ្ហាស្បែកស្ងួតជាមិនខាន។

3/ គ្រាប់ផ្លែប៊័រ
របៀបផ្សំ និងការអនុវត្ត

ពុះផ្លែប៊័រយកតែគ្រាប់ រួចហាន់ជាចំណិតៗ ក្រឡុកជាមួយទឹកក្រូចឆ្មារ 2-3 ស្លាបព្រាបាយ ឱ្យម៉ដ្ឋក្លាយជាល្បាយតែមួយ។
លាប និងខាត់ ម៉ាស្សាថ្នមៗនៅលើដងខ្លួន ដៃ និងជើងរបស់អ្នកឱ្យសព្វល្អ ហើយរងចាំឱ្យល្បាយស្ងួតប្រហែលរយ:ពេល10នាទី។
បន្ទាប់មកលាងសម្អាតជាមួយនឹងទឹកក្តៅឧណ្ហៗជាការស្រេច។
រួចប្រើឡេលាបស្បែក រាល់ពេលមុនចូលគេងនិងឡេលាបការពារកម្ដៅថ្ងៃរាល់ពេលចេញដំណើរទៅកន្លែងធ្វើការ ឬនៅពេលស្ថិតនៅក្រោមកម្ដៅថ្ងៃ និងកម្លាំងខ្យល់។

4/ ផ្លែប៉ោមខៀវ
របៀបផ្សំ និងការអនុវត្ត

ផ្លែប៉ោមខៀវ មានសារធាតុវីតាមីន C ច្រើនស្រាប់ ដូច្នេះអ្នកគ្រាន់តែហាន់ផ្លែប៉ោមខៀវក្រឡុកជាមួយទឹកឃ្មុំ 2ស្លាបព្រាកាហ្វេតែប៉ុណ្ណោះ។
រួចខាត់ម៉ាស្សាលើស្បែកខ្លួនរបស់អ្នកថ្នមៗ ហើយផ្អាប់ទុករហូតដល់ស្ងួត។
បន្ទាប់មកសម្អាតខ្លួនចេញជាមួយទឹកក្ដៅឧណ្ហៗ ហើយយកកន្សែងស្អាតជូតខ្លួនឱ្យស្អាត។
ដូចគ្នានេះដែរ ត្រូវលាបឡេការពារស្បែកនាពេលរាត្រីមុនពេលចូលគេង និងឡេលាបការពារកម្ដៅថ្ងៃនៅរាល់ពេលថ្ងៃ និងពេលស្ថិតនៅក្រោមកម្ដៅថ្ងៃ ឬពេលរងសម្ពាធខ្យល់ខ្លាំង។ ក្នុងចំណោមវិធីខាងលើនេះ អ្នកអាចប្រើប្រាស់មួយណាក៏បានដែរ ក៏ប៉ុន្តែដើម្បីទទួលបាននូវប្រសិទ្ធភាព សូមអនុវត្តជារៀងរាល់ពេលល្ងាចឱ្យបានទៀងទាត់ទើបជាការល្អបំផុត៕

January 25, 2018

Chelsea និង Roma យល់ព្រមលើការផ្ទេរ Dzeko និង Palmieri

ក្លិប Chelsea និង Roma បានយល់ព្រមទៅលើលក្ខខណ្ឌផ្សេងៗក្នុងការផ្ទេរមួយដែលនឹងធ្វើឲ្យខ្សែប្រយុទ្ធ Edin Dzeko ធ្វើដំណើរទៅកាន់កីឡដ្ឋាន Stamford Bridge។ នេះបើយោងតាមទូរទស្សន៍ Sky Sports News ក្នុងប្រទេសអ៊ីតាលី។

បណ្តាញសារព័ត៌មាន Sky Sports News បានចេញផ្សាយកាលពីថ្ងៃអង្គារថា ក្លិបទាំងពីរកំពុងតែស្ថិតយ៉ាងប្រកៀកក្នុងការឈានដល់ការព្រមព្រៀងគ្នាមួយលើការផ្ទេរកីឡាករពីរនាក់ គឺខ្សែប្រយុទ្ធអន្តរជាតិបូស្នី Dzeko និងមិត្តរួមក្រុមរបស់គេ Emerson Palmieri ដែលជាខ្សែការពារស្លាបឆ្វេងសញ្ជាតិប្រេស៊ីល។ បើយោងតាមការចេញផ្សាយរបស់កាសែត The Guardian ក្លិប Chelsea បានយល់ព្រមលើតម្លៃខ្លួន 44លានផោន (ស្មើនឹង 62.67លានដុល្លារអាមេរិក) បូកទាំងប្រាក់ឧបត្ថម្ភចំនួន13.2លានផោនទៀត ដើម្បីនាំយកកីឡាករទាំងពីរនាក់ពីក្លិប Roma។

តែទោះបីយ៉ាងណា Chelsea មិនទាន់ឈានដល់ការព្រមព្រៀងលើលក្ខខណ្ឌផ្ទាល់ខ្លួនជាមួយនឹង Dzeko នៅឡើយទេ។ វាមិនទាន់ច្បាស់នៅឡើយថា បញ្ហានៃការមិនទាន់ព្រមព្រៀងគ្នានេះ ដោយសារតែរយៈពេលនៃកុងត្រា ឬទំហំនៃប្រាក់បៀវត្សរ៍ ឬយ៉ាងណាឡើយ។ ប៉ុន្តែ វាត្រូវបានគេយល់ឃើញថា ការផ្ទេររបស់ Emerson ផ្តល់លក្ខខណៈងាយស្រួលជាង ខណៈដែលខ្សែការពារវ័យ 23ឆ្នាំរូបនេះបានត្រៀមខ្លួនរួចរាល់ហើយក្នុងការធ្វើដំណើរទៅកាន់ទីក្រុងឡុងដ៍ ដើម្បីបំពេញការផ្ទេររបស់គេ។

Dzeko ត្រូវបានបញ្ចូលឈ្មោះក្នុងក្រុមរបស់ Roma ដែលបានធ្វើការប្រកួតជាមួយនឹងក្រុម Sampdoria កាលពីថ្ងៃពុធ ខណៈដែលលោក Monchi ប្រធានផ្នែកកីឡារបស់ក្លិបនេះបានបញ្ជាក់ថា រូបគេមិនទាន់យល់ព្រមទៅលើលក្ខខណ្ឌផ្ទាល់ខ្លួននៅឡើយទេ។ លោកបានប្រាប់ទូរទស្សន៍ Mediaset Premium ថា៖ «Roma ដូចនឹងក្លិបទាំងអស់ក្នុងពិភពលោកដែរ ដោយស្តាប់សំណើផ្សេងៗ ដែលផ្តល់ឲ្យកីឡាករ មិនមែនត្រឹមតែ Edin Dzeko ប៉ុណ្ណោះទេ ប៉ុន្តែ គ្រប់គ្នាទាំងអស់នៅក្នុងក្រុមនេះ»៕

ប្រភពពី៖ Sky Sports

January 25, 2018

Xhaka ជួយឲ្យ Arsenal ផ្តួល Chelsea ដើម្បីទៅជួប Man City ក្នុង League Cup

Granit Xhaka បានរកគ្រាប់បាល់ឈ្នះឲ្យក្រុមខ្លួន ខណៈដែលក្រុម Arsenal បានធ្វើការវាយបកដេញតាមពីក្រោយ ដើម្បីផ្តួលក្រុម Chelsea 2-1 ក្នុងការប្រកួតពាន League Cup វគ្គពាក់កណ្តាលផ្តាច់ព្រ័ត្រ ជើងទី2 នាកីឡដ្ឋាន Emirates កាលពីថ្ងៃពុធ និងដើម្បីឈានទៅវគ្គផ្តាច់ព្រ័ត្រ ក្រោយពីបានបញ្ចប់ក្នុងលទ្ធផលស្មើ ០-០ កាលពីជើងទី1។

ខ្សែបម្រើអន្តរជាតិស្វ៊ីសរូបនេះ បានរកគ្រាប់បាល់ឈ្នះឲ្យក្រុមរបស់ខ្លួននៅនាទីទី60 ដើម្បីបើកផ្លូវឲ្យពួកគេធ្វើដំណើរទៅកាន់វគ្គផ្តាច់ព្រ័ត្រ ដើម្បីជួបជាមួយក្រុម Manchester City នាកីឡដ្ឋាន Wembley នៅថ្ងៃទី25 ខែកុម្ភៈ ខាងមុខនេះ។ ក្រុម Man City របស់លោក Pep Guardiola បានឈានទៅកាន់កីឡដ្ឋាន Wembley កាលពីថ្ងៃអង្គារ តាមរយៈការផ្តួលក្រុម Bristol City របស់ក្របខ័ណ្ឌ Champion ship ក្នុងការប្រកួតជើងទី2 នៃវគ្គពាក់កណ្តាលផ្តាច់ព្រ័ត្ររបស់ពួកគេ និងឈ្នះទាំងពីរជើង 5-3 ដើម្បីរក្សាការស្ថិតលើផ្លូវឆ្ពោះទៅកាន់ការប្រជែងដណ្តើមពាន 4 ក្នុងរដូវកាលតែមួយ។

ជ័យជម្នះនេះពិតជាសំខាន់ណាស់សម្រាប់លោក Wenger ក្នុងសប្តាហ៍មួយ ដែលក្រុមកាំភ្លើងធំមួយនេះប្រឈមមុខនឹងភាពត្រដាបត្រដួសក្នុងការប្រជែងយកកៅអីទៅលេងក្នុងក្របខ័ណ្ឌ Champions League ដោយសារបាត់បង់ Sanchez ដែលជាខ្សែប្រយុទ្ធដ៏មុតស្រួចបំផុតរបស់ពួកគេ។

លោក Wenger បានទទួលស្គាល់ថា ភាពមិនច្បាស់លាស់នៃការផ្ទេររបស់ Sanchez បានធ្វើឲ្យក្រុមរបស់លោករង្គោះរង្គើ ក្នុងរយៈពេលប៉ុន្មានសប្តាហ៍ចុងក្រោយនេះ។ គ្រូបង្វឹកវ័យ 68 ឆ្នាំរូបនេះបានឲ្យដឹងថា៖ «យើងបានបាត់បង់កីឡាករដ៏អស្ចារ្យម្នាក់គឺ Alexis Sanchez ហើយក្រុមមួយដែលមិនដឹងពីអ្វីដែលនឹងកើតឡើងនៅបន្ទប់ប្តូរសម្លៀកបំពាក់ នឹងខ្វះនូវការផ្តោតអារម្មណ៍ផ្សេងៗលើទម្រង់លេង»៕

ប្រភពពី៖ The Sun

January 25, 2018

4 វិធីគិត ជួយធុរកិច្ចឱ្យរុងរឿង

ក្រៅពីចំណេះ និងការយល់ដឹងក្នុងធុរកិច្ចដែលខ្លួនកំពុងធ្វើហើយនោះ វិធីគិតដែលល្អៗ ក៏ហុចផលដល់ភាពជោគជ័យរបស់ធុរកិច្ចបានដូចគ្នា ព្រោះវិធីគិតប្រៀបដូចជាខ្សែផ្លូវដែលនឹងនាំសហគ្រិនឆ្ពោះទៅរកជ័យជម្នះ ហើយ 4វិធីគិតដែលឡារ៉ែននឹងណែនាំតទៅនេះ គឺជាវិធីគិតដែលសហគ្រិនគ្រប់រូបចាំបាច់ត្រូវតែមាន។

ត្រៀមកែសម្រួលវិធីគិតគ្រប់ពេលវេលា

ការប្រកាន់ខ្ជាប់ជាមួយវិធីគិតដដែលៗដែលធ្លាប់បានសាងភាពជោគជ័យដល់យើងនោះមិនមែនជារឿងខុសឆ្គងទេប៉ុន្តែបើសិនថ្ងៃណាមួយ ដែលវិធីគិតទាំងនោះមិនអាចសាងភាពជោគជ័យបានតទៅទៀត ឬប្រើសម្រាប់កែខៃបញ្ហាលែងបានហើយនោះ សហគ្រិនត្រូវតែកែសម្រួលវិធីគិតជាថ្មី ដោយវិធីគិតបែបថ្មីនេះ ត្រូវតែអាចកែខៃបញ្ហាដែលកើតឡើងនៅខណៈពេលនោះឱ្យបាន។

សម្លឹងមើលអនាគតរបស់ធុរកិច្ចឱ្យធ្លុះ

ព្រោះវានឹងធ្វើឱ្យសហគ្រិនអាចកំណត់ខ្សែផ្លូវនៃការដំណើរការធុរកិច្ចរបស់ខ្លួនបានច្បាស់លាស់ និងដឹងថា ត្រូវដំណើរការធុរកិច្ចទៅក្នុងទិសដៅណាទើបទទួលបានជោគជ័យតាមគោលដៅដែលបានកំណត់ទុក។ ផ្ទុយទៅវិញ បើសហគ្រិនសម្លឹងមើលអនាគតរបស់ធុរកិច្ចមិនធ្លុះ ច្បាស់ជានឹងដំណើរការធុរកិច្ចទៅមុខយ៉ាងគ្មានគោលដៅ ដែលនឹងហុចផលឱ្យធុរកិច្ចនោះដួលរលំបាន។

មានផែនការបម្រុង ទុកសម្រាប់ហេតុការណ៍ដែលមិននឹកស្មានដល់

យើងមិនដឹងថានៅពេលអនាគត ធុរកិច្ចរបស់យើងនឹងទទួលបានជោគជ័យ ឬបរាជ័យ ហើយនឹងមានបញ្ហាអ្វីខ្លះឱ្យយើងដោះស្រាយនោះទេ ដូច្នេះហើយទើបវិធីការពារដែលល្អបំផុត ប្រហែលជាគេចមិនផុតពីការត្រូវតែមានផែនការបម្រុង ទុកប្រើក្នុងពេលអាសន្នហ្នឹងឯង (ចំណុចនេះចាំបាច់ត្រូវតែមាន)។

4 . ធ្វើធុរកិច្ចដោយទ្រឹស្ដី Game Theory

ព្រោះនឹងធ្វើឱ្យសហគ្រិនសម្លឹងមើលធ្លុះថា គូប្រជែងរបស់ធុរកិច្ចខ្លួនឯងគឺនរណា? ការប្រកួតប្រជែងលើកនេះនឹងមានលទ្ធផលឈ្នះចាញ់យ៉ាងណា? និងមានភាពមានប្រៀបលើការប្រកួតប្រជែងច្រើនតិចប៉ុនណា?។ នៅពេលសម្លឹងមើលធ្លុះហើយ ក៏នឹងអាចវាយតម្លៃស្ថានការណ៍នៃការប្រកួតប្រជែងបាន និងដឹងថា ត្រូវទប់ទល់នឹងគូប្រជែងយ៉ាងណាទើបទទួលបានជ័យជម្នះ?៕

រៀបរៀងដោយ តាវ៉ែនតា

January 25, 2018

តើកត្តាអ្វីខ្លះដែលធ្វើឱ្យកសិកម្មនៅកម្ពុជាមានភាពទន់ខ្សោយ?

មន្ត្រីជំនាញកសិកម្មបានលើកឡើងថា យ៉ាងហោចណាស់ក៏កម្ពុជាត្រូវការបន្លែ ត្រី សាច់ ប្រមាណជា1លានតោនដែរក្នុងមួយឆ្នាំដើម្បីផ្គត់ផ្គង់តម្រូវការនៅលើទីផ្សារបស់ខ្លួន ដោយក្នុងនោះមានប្រមាណជា 55ភាគរយត្រូវបាននាំចូលពីប្រទេសជិតខាង និង45ភាគរយផលិតបាននៅក្នុងស្រុក។

លោក តាន់ ព្រឿន កសិករវ័យចំណាស់នៅឃុំបឹងព្រះ ស្រុកបាភ្នំ ខេត្តព្រៃវែង មានប្រសាសន៍ថា ការប្រកបរបរដាំដំណាំកសិកម្មរបស់ពួកគាត់ហាក់ពុំសូវបានទទួលផលចំណេញប៉ុន្មានទេ ដោយសារតែធ្វើទៅតាមទម្លាប់ពីបុរាណ មិនមានមន្ត្រីជំនាញកសិកម្មរបស់រដ្ឋចុះមកបង្រៀន ឬបណ្តុះបណ្តាលជំនាញកសិកម្មដល់ពលរដ្ឋនៅក្នុងមូលដ្ឋាននោះឡើយ ដែលត្រង់នេះលោកបានបញ្ជាក់យ៉ាងដូច្នេះថា “មានម្តងម្កាលដែរដែលមន្ត្រីជំនាញបានចុះមកអប់រំណែនាំអំពីបច្ចេកទេសនៃការដាំដុះដើម្បីឱ្យទទួលបានផលល្អ ប៉ុន្តែមិនមែនជាមន្ត្រីជំនាញរបស់រដ្ឋទេ មានតែមន្ត្រីអង្គការក្រៅរដ្ឋាភិបាលសហការជាមួយក្រុមហ៊ុនលក់សម្ភារកសិកម្ម ពិសេសក្រុមហ៊ុនលក់ជីនេះតែម្តង ដែលមកផ្សព្វផ្សាយផលិតផលជីរបស់គេ ហើយប្រាប់ថាប្រើជីនោះទៅកសិកម្មនឹងទទួលបានផលច្រើន តែដូចជាមិនមានប្រសិទ្ធភាពឡើយ។

កសិករដដែលបានលើកឡើងទៀតថា នៅក្នុងមូលដ្ឋានរបស់គាត់មានជួបការលំបាកជាច្រើនដូចជា ពិបាកផ្លូវធ្វើដំណើរ ខ្វះខាតប្រព័ន្ធធារាសាស្ត្រពិសេសប្រព័ន្ធប្រឡាយទឹកពុំអនុគ្រោះឱ្យពួកគាត់អាចប្រកបរបរដាំំដំណាំកសិកម្មបានទាំងពីររដូវ គឺប្រាំង និងវស្សាដូចប្រទេសជិតខាងបានឡើយ។ អ្វីដែលជាឧបសគ្គខ្លាំងសម្រាប់ការដាំដុះនោះ គឺកសិករនៅក្នុងមូលដ្ឋានត្រូវការចំណាយដើមទុនច្រើនសម្រាប់ទិញសម្ភារកសិកម្ម ពិសេសថ្លៃជី និងប្រេងជាដើម ដែលមានតម្លៃថ្លៃជាងប្រទេសជិតខាង ហើយពេលផលិតបានផល បែរជាជួបបញ្ហាកង្វះទីផ្សារ ឬត្រូវឈ្មួញទម្លាក់តម្លៃជាដើម។ ឆ្នាំខ្លះប្រមូលផលបានហើយលក់ចេញវិញចំណេញបានតិចតួច ឆ្នាំខ្លះលក់ចេញវិញខាតដើមក៏មានដែរដែលជាហេតុធ្វើឱ្យសេដ្ឋកិច្ចគ្រួសាររបស់គាត់ និងប្រជាពលរដ្ឋនៅតាមមូលដ្ឋាននៅតែមានជីវភាពខ្សត់ខ្សោយ។

ជាមួយគ្នានេះដែរ លោក សម វិទូ នាយកប្រតិបត្តិនៃមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាមានប្រសាសន៍ថា មានកត្តាជាច្រើនដែលធ្វើឱ្យវិស័យកសិកម្មរបស់យើងនៅតែមានភាពទន់ខ្សោយ គឺដោយសារ៖

1.ចំណេះដឹងអំពីកសិកម្មរបស់កសិករកម្ពុជា៖ ភាគច្រើនធ្វើកសិកម្មទៅតាមទម្លាប់ពីបុរាណ ឬធ្វើទៅតាមៗគ្នា ឃើញអ្នកណាធ្វើអ្វីមួយបានក៏នាំគ្នាធ្វើតាម លុះដល់ពេលធ្វើច្រើនលើសកម្រិត មិនមានតម្រូវការលើទីផ្សារ។

2.កត្តារួមចំណែកខាងផលិតកម្ម៖ មិនមានការគាំទ្របណ្តុះបណ្តាលជំនាញបច្ចេកទេសដល់កសិករឬមានដែរ តែមានតិចតួចនៅក្នុងតំបន់ខ្លះ ដែលជាហេតុនាំឱ្យរបរដាំដុះមិនទទួលបានលទ្ធផលល្អ។

3.ហេដ្ឋារចនាសម្ព័ន្ធ៖ មិនមានប្រព័ន្ធធារាសាស្ត្រគ្រប់គ្រាន់សម្រាប់ឱ្យកសិករដាំដុះបានគ្រប់រដូវកាល ពោលគឺ កសិករកម្ពុជាភាគច្រើនធ្វើស្រែ ឬដាំដំណាំបានតែម្តងក្នុងមួយឆ្នាំ ខុសពីកសិកម្មនៅស្រុកគេធ្វើបានទាំងរដូវប្រាំង និងរដូវវស្សា។

4.ធាតុផ្សំនៃផលិតកម្ម៖ ដូចជាជី ថ្នាំគីមី ប្រេងសាំង ឬប្រេងម៉ាស៊ូតសម្រាប់បូមទឹកស្រោចដំណាំមានតម្លៃថ្លៃជាងប្រទេសជិតខាង ជាហេតុធ្វើឱ្យកសិករចំណាយថ្លៃដើមខ្ពស់ ពេលលក់ចេញមិនសូវបានប្រាក់ចំណេញ។

5.មួយវិញទៀតកសិករនៅតាមតំបន់មិនបានចងក្រងគ្នាជាក្រុមដើម្បីឱ្យមានអ្នកតំណាងចុះធ្វើការទំនាក់ទំនងជាមួយគ្រឹះស្ថានមីក្រូហិរញ្ញវត្ថុដើម្បីទទួលបានកម្ចីអត្រាការប្រាក់ទាបជាង10%ក្នុងរយៈពេលមួយឆ្នាំនោះទេ។

ការចងក្រងជាសហគមន៍នេះមានសារៈសំខាន់ណាស់ គឺដើម្បីពិភាក្សាគ្នារៀបចំផែនការច្បាស់លាស់ដើម្បីរកទីផ្សារជាមុន មុននឹងសម្រេចធ្វើកសិកម្មលើផ្នែកណាមួយ។ សម្រាប់ប្រទេសជិតខាងដូចជាថៃ និងវៀតណាមជាដើម រដ្ឋាភិបាលរបស់គេជួយអន្តរាគមន៍ឱ្យមានកម្ចីការប្រាក់ទាបសម្រាប់កសិករ ហើយជួយបណ្តុះបណ្តាលជំនាញបច្ចេកទេសច្បាស់លាស់ ទើបកសិកម្មស្រុកគេមានភាពប្រសើរជាងកម្ពុជា ហើយវាជារឿងធម្មតាទេដែលទឹកនៅទីតាំងខ្ពស់ជាងតែងហូរចុះមករកទីតាំងដែលទាបជាង កសិកម្មក៏ដូចគ្នាដែរ ប្រទេសជិតខាងគេមានភាពល្អប្រសើរជាងយើង ទើបធ្វើឱ្យកសិផលរបស់គេហូរចូលមកក្នុងទីផ្សាក្នុងស្រុកយើងដើម្បីបំពេញតម្រូវការប្រើប្រាស់ប្រចាំថ្ងៃ។

ដើម្បីលើកកម្ពស់ដំណាំកសិកម្ម លោក សម វិទូ មានប្រសាសន៍ស្នើឱ្យរដ្ឋាភិបាលរៀបចំកែលម្អប្រព័ន្ធធារាសាស្ត្រឱ្យបានល្អ ជួយអន្តរាគមន៍តម្លៃជីគីមីឱ្យមានតម្លៃទាបដូចប្រទេសជិតខាង ជាពិសេសជួយរៀបចំសហគមន៍កសិករ ធ្វើយ៉ាងណាឱ្យពួកគាត់មានក្រុមដឹកនាំសហគមន៍ដើម្បីស្នើសុំកម្ចីបានក្នុងអត្រាការប្រាក់ទាបសម្រាប់ធ្វើកសិកម្ម។ ជាមួយគ្នានេះដែរកសិករគួរត្រូវចេះគណនាថ្លៃដើមនៃការផលិត ហើយទូទាត់នៅពេលលក់កសិផលចេញទៅវិញ ថា តើបានផលចំណេញ ឬមិនចំណេញ? ហើយបើមិនចំណេញគួរផ្លាស់ប្តូរយុទ្ធសាស្ត្រដាំដុះរបៀបណាវិញ?។

គួរបញ្ជាក់ផងដែរថា មកទល់ពេលបច្ចុប្បន្ននេះ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាបានចងក្រង សហគមន៍កសិកម្មបានជាង 100 សហគមន៍ហើយ ដោយផ្តោតលើការផលិតដាំដុះស្រូវ បន្លែ ផ្លែឈើ និងចិញ្ចឹមត្រីសាច់បានជាច្រើនប្រភេទនៅក្នុងខេត្តចំនួន12ជុំវិញបឹងទន្លេសាបនិងខេត្តមានសក្តានុពលកសិកម្មផ្សេងៗទៀតសម្រាប់ផ្គត់ផ្គត់ទីផ្សារកសិកម្មសរីរាង្គនៅក្នុងស្រុក និងសម្រាប់នាំចេញទៅក្រៅប្រទេសផងដែរ។

លោក សម វិទូ នាយកប្រតិបត្តិនៃមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជារំពឹងថា នៅត្រឹម 3ឆ្នាំខាងមុខទៀតមជ្ឈមណ្ឌលនឹងពង្រីកសមាជិកឱ្យបានដល់5.000នាក់៕

January 25, 2018

Author: វល័ក្ខ