វល័ក្ខ - La Reine Media

អ្នកគាំទ្រឈរតម្រៀបជួរគ្នា 30គីឡូម៉ែត្រ ស្វាគមន៍ក្រុម U23 វៀតណាម

អ្នកគាំទ្រកីឡាបាល់ទាត់ដ៏ច្រើនកុះករ បានប្រមូលផ្តុំគ្នានៅតាមដងវិថីនានាកាលពីព្រឹកថ្ងៃអាទិត្យ ម្សិលមិញ ដើម្បីស្វាគមន៍ការវិលត្រឡប់មកប្រទេសកំណើតវិញរបស់ក្រុមវីរបុរសវ័យក្មេងរបស់ពួកគេ និងតម្រូវឲ្យលោកនាយករដ្ឋមន្ត្រីរង់ចាំរហូតដល់ទៅ5ម៉ោងដើម្បីជួបជាមួយពួកគេ។

បើទោះបីបានរងបរាជ័យយ៉ាងខកចិត្តនៅនាទីចុងក្រោយក្រោមស្នាដៃក្រុមជម្រើសជាតិអ៊ូសបេគីស្ថានក្នុងវគ្គផ្តាច់ព្រ័ត្រនៃព្រឹត្តិការណ៍ AFC U23 Championship កាលពីថ្ងៃសៅរ៍ក៏ដោយ តែក៏ក្រុមជម្រើសជាតិវៀតណាម បានវិលទៅកាន់ប្រទេសខ្លួនវិញក្រោមការទទួលស្វាគមន៍យ៉ាងកក់ក្តៅដែរ។

ខណៈដែលត្រូវបានចាត់ទុកថាជាវីរបុរសជាតិ ក្រុមរបស់លោកគ្រូបង្វឹកសញ្ជាតិកូរ៉េខាងត្បូង Park Hang-seo បានបង្កើតប្រវត្តិសាស្ត្រក្នុងយុទ្ធនាការប្រចាំទ្វីបមួយនេះ តាមរយៈការដណ្តើមបានជ័យជម្នះដ៏រំភើបជាច្រើនលើក្រុមខ្លាំងៗដូចជាអូស្ត្រាលី អ៊ីរ៉ាក់ និងកាតា។ វាជាលើកទី1ហើយដែលក្រុមជម្រើសជាតិវៀតណាម បានឈានទៅវគ្គផ្តាច់ព្រ័ត្រនៃយុទ្ធនាការនេះ ដែលនាំឲ្យមានការចាប់អារម្មណ៍ពីអ្នកគាំទ្របាល់ទាត់ទូទាំងពិភពលោក។
អ្នកគាំទ្ររាប់ពាន់នាក់ បានប្រមូលផ្តុំគ្នាតាមដងវិថីនានាតាំងពីព្រលានយន្តហោះ Noi Bai រហូតដល់កណ្តាលទីក្រុងហាណូយ ដើម្បីស្វាគមន៍រថយន្តក្រុងរបស់ក្រុមវីរបុរស។

លោកនាយករដ្ឋមន្ត្រី Nguyen Xuan Phuc បាននិយាយថា៖ «ខ្ញុំត្រូវរង់ចាំពួកគេអស់រយៈពេល5ម៉ោង។ មិនធ្លាប់មាននាយករដ្ឋមន្ត្រីណាម្នាក់ត្រូវរង់ចាំនរណាអស់រយៈពេលយូរបែបនេះឡើយ ប៉ុន្តែ ខ្ញុំមានអារម្មណ៍ថា រីករាយខ្លាំងណាស់សម្រាប់ការរង់ចាំបែបនេះឡើយ»៕

ប្រភពពី៖ e.vnexpress.net

January 29, 2018

វិធីរៀបចំខ្លួន យ៉ាងស្រស់សង្ហាទៅសម្ភាសការងារ

វាពិតប្រាកដហើយ ដែលបុរសគ្រប់គ្នាចង់បានភាពជឿជាក់គ្រប់ជ្រុងជ្រោយពេលទៅសម្ភាសន៍ចូលធ្វើការនោះ ព្រោះថាក្រៅពីធ្វើឱ្យអ្នកមានអារម្មណ៍ថាសប្បាយស្រួលខ្លួន និងស្រួលចិត្តហើយ វានៅបានសាងនូវភាពពេញចិត្តដល់ចៅហ្វាយនាយដែលនឹងទទួលយកអ្នកឱ្យចូលធ្វើការនោះទៀតផង ដូច្នេះហើយទើបថ្ងៃនេះ ឡារ៉ែន សូមនាំយកទិចនិកក្នុងការរៀបចំខ្លួនឱ្យស្រស់សង្ហាដើម្បី ប្រុងប្រៀបខ្លួនចូលសម្ភាសចូលបម្រើការងារឱ្យទទួលបានជោគជ័យមកជម្រាបជូនដូចខាងក្រោមនេះ។

1/ កោរពុកមាត់ ពុកចង្កា ពីយប់ទុកឱ្យហើយ

ព្រោះថា ដល់ថ្ងៃដែលត្រូវចូលទៅសម្ភាសមែនទែននោះ អ្នកច្រើនតែរសាប់រសល់ ខ្វល់ខ្វាយ និងញាប់ញ័រនៅពេលព្រឹកមុននឹងចេញពីផ្ទះទៅ។ ដូច្នេះ ឡារ៉ែន សូមណែនាំថា អ្នកគួរកោរពុកមាត់ ពុកចង្កា និងរោមមុខតាំងពីពេលយប់ទុកឱ្យហើយ ដើម្បីបង្កើនភាពស្រស់ស្អាតនៅពេលព្រឹកស្អែក។ គួរកោរសម្អាតក្រោយពេលងូតទឹកហើយ និងគួរប្រយ័ត្នកុំឱ្យមុតមានស្នាមរបួស ព្រោះអ្នកប្រហែលជាមិនចង់ឱ្យអ្នកដែលសម្ភាសរូបអ្នកសម្លឹងស្នាមរបួសខ្លាំងជាងមើលផ្ទៃមុខដ៏ស្រស់សង្ហារបស់អ្នកឡើយ មែនទេ?

2/ កុំបណ្តោយឱ្យមានអង្គែជ្រុះ

ព្រោះការស្លៀកពាក់ឈុតដែលមានពណ៌ចាស់ដិត ដូចជា ពណ៌ខៀវទឹកប៊ិចចាស់ ឬខ្មៅ គឺជាពណ៌ដែលធ្វើឱ្យអ្នកមើលទៅថ្លៃថ្នូរ កាលីបនិងមើលទៅសមជាអ្នកមានចំណេះដឹង តែរឿងដែលមកបញ្ឈប់ភាពសង្ហារបស់អ្នកឱ្យឈប់ង៉ក់នោះគឺ អង្គែ សត្រូវដ៏កំណាចរបស់ស្បែកក្បាលរបស់អ្នកនឹងឯង។ អ្នកគួរធ្វើការកម្ចាត់អង្គែឱ្យអស់ពីក្បាល ដោយការកក់សក់នឹងសាប៊ូកក់សក់ដែលមានការការពារ និងកម្ចាត់អង្គែនៅពេលព្រឹកដែលត្រូវសម្ភាសនោះតែម្តង ហើយបើអ្នកមានបញ្ហាត្រង់ថាមានអង្គែច្រើននោះឡារ៉ែន ណែនាំឱ្យកក់សក់ដោយទឹកក្តៅឧណ្ហៗព្រោះវានឹងមិនធ្វើឱ្យស្បែកក្បាលរបស់អ្នកឡើងស្ងួតជ្រុលពេក និងកើតមានអង្គែតិចបំផុត។

3/ តុបតែងសក់ផ្នែកខាងក្រោយឱ្យស្អាតរៀបរយផង

មិនមែនតែសក់ផ្នែកខាងមុខនោះទេដែលអ្នកត្រូវមើលថែទាំ និងយកចិត្តទុកដាក់ជាពិសេសនោះ សក់ និងជើងសក់ផ្នែកខាងក្រោយក៏ដូចគ្នាដែរ បើសក់ខាងមុខស្អាតខ្ញង់ តែខាងក្រោយសំពោងដូចគូទទា ក៏អស់សង្ហាបានដូចគ្នា ដូច្នេះគួរតែកាត់តម្រឹមសក់ខ្លះ កុំឱ្យសក់ខាងក្រោយវែងលប់លើ-កអាវជ្រុលពេក នាំឱ្យមើលទៅគ្មានរបៀប។ វិធីដែលល្អបំផុត គឺគួរតែទៅកាត់សក់ឱ្យបានស្អាតមុនដល់ថ្ងៃសម្ភាស ដើម្បីភាពស្អាតសង្ហាបែបប្រាកដក្នុងចិត្ត៕

January 29, 2018

ក្រុមមណ្ឌលប្រចាំខេត្តកំពង់ស្ពឺ មានឱកាសដណ្តើមប្រាក់រង្វាន់ដ៏ច្រើនពី Tiger Street Football Festival 2018

កំពង់ស្ពឺ៖ កំពង់ស្ពឺគឺជាខេត្តទី2 បន្ទាប់ពីខេត្តព្រះសីហនុ ដែលក្រុមការងារ Tiger Street Football Festival 2018 បានមករៀបចំការប្រកួតកីឡាហ្វ៊ូតសាលដំបូង និងធំជាងគេនៅក្នុងប្រទេសកម្ពុជា ហើយបានប្រារព្ធធ្វើឡើងជារៀងរាល់ឆ្នាំចាប់តាំងពីឆ្នាំ 2013 មកម្លេះ។ ប៉ុន្តែសម្រាប់ឆ្នាំ2018 រង្វាន់សរុបទូទាំងប្រទេសកាន់តែធំអស្ចារ្យ រហូតដល់ 50000ដុល្លារ។

ចំពោះខេត្ត កំពង់ស្ពឺ ដែលជាមណ្ឌលថ្មីនេះមាន 35ក្រុមចូលរួមក្នុងការប្រកួតជម្រុះនា ថ្ងៃទី28 ខែមករានេះដើម្បីចូលរួមចំណែកក្នុងការលើកកម្ពស់សកម្មភាពកីឡាក៏ដូចជាវេទិកាមួយសម្រាប់កីឡាករបាល់ទាត់ និងអ្នកស្នេហាវិស័យបាល់ទាត់ដើម្បីបង្ហាញទេពកោសល្យ ផ្លាស់ប្តូរបទពិសោធន៍ និងរៀនពីទម្រង់ថ្មីៗនៃការលេង។

បើតាមអ្នកស្រី ថោង បវរលក្ខិណា ដែលជានាយកម៉ាកផលិតផលស្រាបៀរថៃហ្គ័រ បានលើកឡើងក្នុងពិធីសន្និសីទសារព័ត៌មានកាលពីរសៀលថ្ងៃទី27 ខែមករា នេះថា ព្រឹត្តិការណ៍ប្រកួតបាល់ទាត់ Tiger Street Football Festival ប្រចាំឆ្នាំ 2018 រដូវកាលទី6 បានត្រឡប់មកវិញទៀតហើយ និងកាន់តែជាព្រឹត្តិការណ៍ដ៏ធំអស្ចារ្យ ក្រុមចូលរួមប្រកួតកាន់តែច្រើន និងមានរង្វាន់សរុបរហូតដល់ 50000ដុល្លារ។ Tiger Street Football Festival ឆ្នាំ2018 នេះ មណ្ឌលប្រកួតកើនឡើងរហូតដល់ប្រាំបីខេត្តក្រុងទូទាំងប្រទេស រួមមាន ខេត្តព្រះសីហនុ ខេត្តកំពង់ស្ពឺ ខេត្តបាត់ដំបង ខេត្តសៀមរាប ក្រុងប៉ោយប៉ែត ខេត្តកំពង់ចាម ក្រុងតាខ្មៅខេត្តកណ្តាល និងរាជធានីភ្នំពេញ។ ក្រុមជាង 500 ក្រុមត្រូវបានរំពឹងថា នឹងចូលរួមការប្រកួតដណ្ដើមតំណែងជើងឯក Tiger Street Football Festival ឆ្នាំ2018 នេះ ។ និងមានឱកាសជួបផ្ទាល់ជាមួយកំពូលតារាបាល់ទាត់អន្តរជាតិ Ryan Giggs នៅថ្ងៃប្រកួតផ្តាច់ព្រ័ត្រនៅរាជធានីភ្នំពេញ ថ្ងៃទី10 និងទី11 មីនា 2018 ខាងមុខនេះ។

បន្ថែមពីលើនេះលោក ប៉ិច នី នាយកគ្រប់គ្រងសម្មភាពពាណិជ្ជកម្ម ថាព្រឹត្តិការណ៍ប្រកួតបាល់ទាត់ Tiger Street Football Festival រួមមានសកម្មភាពសប្បាយរីករាយជាច្រើនទាំងការប្រកួតបាល់ទាត់ ស្តង់លេងហ្គេមកម្សាន្ត ស្តង់សម្រាប់អ្នកគាំទ្រមានជាបដាសម្រាប់សរសេរគាំទ្រក្រុមរបស់ខ្លួន និងមានការគូរមុខគួរឲ្យទាក់ទាញ មានកន្លែងលក់វត្ថុអនុស្សាវរីយ៍ជាសម្ភារៈកីឡា កន្លែងថតរូបអនុស្សាវរីយ៍ និងកម្មវិធីប្រូម៉ូសិនពិសេសសម្រាប់ការជាវស្រាបៀរថៃហ្គ័រមកពិសាបន្ទាប់ពីការប្រកួតបាល់ទាត់។

នាយកគ្រប់គ្រងសម្មភាពពាណិជ្ជកម្ម បញ្ជាក់ថា អ្វីដែលកាន់តែអស្ចារ្យនោះគឺ កម្មវិធីប្រគំតន្ត្រីកាន់តែធំជាងមុន ឆាកតន្ត្រីកាន់តែទំនើប ភ្លើងពណ៌ចម្រុះ នឹងមានការអញ្ជើញចូលរួមសម្តែងពីសំណាក់តារាល្បីប្រចាំព្រះរាជាណាចក្រកម្ពុជា កាន់តែរំភើប កាន់តែអស្ចារ្យ ដែលញ៉ាំងឲ្យព្រឹត្តិការណ៍នេះកាន់តែជក់ចិត្ត និងដក់ជាប់អារម្មណ៍ដល់អ្នកទស្សនា។

សូមបញ្ជាក់ថា នេះជាលើកដំបូងសម្រាប់ក្រុមប្រចាំមណ្ឌលកំពង់ស្ពឺ ក្នុងការបង្ហាញសមត្ថភាពប្រកួតប្រជែង ដណ្តើមពានរង្វាន់បាល់ទាត់នៃក្របខ័ណ្ឌ Tiger Street Football Festival 2018 ដែលនឹងបើកការប្រកួតជាផ្លូវការនាព្រឹកថ្ងៃទី 28 ខែមករា ឆ្នាំ2018នេះ ដោយមាន 38ក្រុមចូលរួម៕

ព័ត៌មានលម្អិតបន្ថែមអំពី Tiger Street Football Festival 2018 សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
#TSFF2018

សូមពិសាដោយការទទួលខុសត្រូវ

January 29, 2018

វិធី 7 យ៉ាងបញ្ចុះជាតិស្ករ បន្ថយរោគា

ទោះជារសជាតិផ្អែមជួយបង្កើនភាពឈ្ងុយឆ្ងាញ់ដល់ម្ហូបអាហារក៏ដោយ តែបើបរិភោគក្នុងបរិមាណច្រើននឹងធ្វើឱ្យកើតរោគធាត់ រោគបេះដូង និងរោគលើសឈាមបាន ដូច្នេះវិធីងាយបំផុត និងឃើញលទ្ធផលល្អបំផុតក្នុងការសម្រកទម្ងន់ និងថាមពលគឺកាត់បន្ថយការទទួលទានស្ករចុះបន្តិចម្តងៗ ដូចជា បន្ថយបរិមាណស្ករនៅក្នុងទឹកតែ កាហ្វេ ឬអាចប្រើស្ករសិប្បនិមិត្ត និងចៀសវាងអាហារដែលមានស្ករច្រើន ដោយវិធីដូចខាងក្រោមនេះ

1 . កុំភ្លេចខ្លួនជឿពាក្យឃោសនាថា វាជា “ស្ករសុខភាព” ព្រោះមិនថាជាស្ករប្រភេទណាក៏ដោយ ក៏សុទ្ធតែផ្តល់នូវថាមពលស្មើគ្នាទាំងអស់ ។

2 . ទទួលទានផ្លែឈើជំនួសនំ ឬបង្អែម ព្រោះផ្លែឈើមានវិតាមីន សារធាតុរ៉ែ និងមានកាកសរសៃដែលជួយ ឬពន្យារការបឺតជ្រាបជាតិស្ករទៅក្នុងរាងកាយ និងខាបូហាយដ្រេតដែលជាមូលហេតុរបស់រោគធាត់ និងគួរចៀសវាងញ៉ាំទឹកផ្លែឈើកំប៉ុង ព្រោះនឹងទទួលបានជាតិស្ករលើសពីតំរូវការ ។

3 . បន្ថយ ឬកម្ចាត់ខាបូហាយដ្រេតបំប្លែង ពពួកនំប៉័ង និងនំបេឃើរីដែលនឹងប្រែក្លាយទៅជាស្ករនៅក្នុងឈាមបានលឿនប្រហាក់ប្រហែលគ្នានឹងការញ៉ាំ គ្លុយខូសដែរ ក្រៅពីនេះខាបូហាយដ្រេតដែលសល់ពីការប្រើប្រាស់នឹងត្រូវប្រមូលសន្សំជា Triglyceride ជាខ្លាញ់ដែលរាងកាយរក្សាទុកជាស្បៀង ។

4 . ប្រយ័ត្នអាហារចម្អាបគ្មានជាតិខ្លាញ់ តាមរយៈការជឿខុសៗដែលថា បើអាហារគ្មានជាតិខ្លាញ់ នឹងមិនធ្វើឱ្យធាត់ទេការពិតវិញ អាហារគ្មានជាតិខ្លាញ់ នៅមានស្ករ និងបរិមាណកាឡូរីខ្ពស់ផងដែរ ។

5 . អានស្លាកណែនាំរបស់អាហារដើម្បីរកមើលជាតិស្ករ និងជាតិខ្លាញ់មិនល្អ សម្រាប់អ្នកដែលកើតរោគទឹកនោមផ្អែម អាចប្រើប្រាស់សារធាតុផ្អែមប្រភេទផ្តល់ថាមពលតិច ដែលច្រើនមានបញ្ជាក់នៅលើស្លាកអាហារថា “គ្មានជាតិស្ករ” ឬ “Sugar free” ។

6 . ប្រយ័ត្នការប្រើសារធាតុផ្តល់ជាតិផ្អែមសិប្បនិមិត្ត ឬសារធាតុជំនួសភាពផ្អែមច្រើនលើសកំណត់ ព្រោះអាចធ្វើឱ្យរាងកាយកើតមានភាពចង់ញ៉ាំស្ករ ឬខាបូហាយដ្រេតកាន់តែខ្លាំងឡើង ។

7 . គណនាបរិមាណជាតិស្ករដោយអានព័ត៌មានភោជនាហារដែលបង្ហាញពីបរិមាណជាតិស្ករទាំងអស់ជាក្រាម រួចចែកជា 4នឹងបានស្មើនឹងចំនួនជាតិស្ករដែលយើងញ៉ាំចូលទៅជារង្វាស់ស្លាបព្រាកាហ្វេ៕

January 28, 2018

Forbes៖ Huawei នឹងមិនប្រកាសបង្ហាញស្មាតហ្វូនថ្មីនៅក្នុងព្រឹត្តិការណ៍ MWC 2018 ឡើយ

អាមេរិក៖ ប៉ុន្មានឆ្នាំកន្លងទៅនេះ ក្រុមហ៊ុនបច្ចេកវិទ្យាយក្សចិន Huawei នៅក្នុងព្រឹត្តិការណ៍ Mobile World Congress (MWC) តែងតែប្រកាសបង្ហាញស្មាតហ្វូនត្រកូល P របស់ខ្លួន ប៉ុន្តែនៅឆ្នាំនេះ មានព័ត៌មានជាច្រើនបានរាយការណ៍មកដូចគ្នាថា Huawei មិនបង្ហាញស្មាតហ្វូននៅក្នុងព្រឹត្តិការណ៍ MWC 2018 ឡើយ។

គេហទំព័របស់ Forbes បានចុះផ្សាយថា ព័ត៌មាននេះ ត្រូវបានគេទម្លាយឱ្យដឹងតាំងពីថ្ងៃទី 09 ខែមករាមកម្ល៉េះ ប៉ុន្តែគេមិនទាន់ជឿជាក់ទៅលើព័ត៌មាននោះទាំងស្រុងទេ រហូតដល់ថ្មីនេះ សារព័ត៌មានកូរ៉េ ET News បានចុះផ្សាយថា ក្រុមហ៊ុន Huawei នឹងមិនបង្ហាញស្មាតហ្វូននៅក្នុងព្រឹត្តិការណ៍ MWC 2018 ឡើយ។

នៅមុននេះមានព័ត៌មានចចាមអារ៉ាមថា Huawei នឹងបង្ហាញស្មាតហ្វូន P20 ឬ P11 ដើម្បីវាយលុយទីផ្សារស្មាតហ្វូននៅសហរដ្ឋអាមេរិក ប៉ុន្តែដោយសារមានបញ្ហាមួយចំនួនជាមួយនឹងក្រុមហ៊ុនក្នុងតំបន់ទើប Huawei ពន្យាពេលក្នុងការប្រកាសស្មាតហ្វូនថ្មី ហើយបើតាមប្រភពជិតស្និទ្ធបានលួចបន្ថែមទៀតថា រដ្ឋាភិបាលអាមេរិកមិនចង់ឱ្យឧបករណ៍អេឡិចត្រូនិករបស់ Huawei ហូរចូលទីផ្សារអាមេរិក៕

January 28, 2018

ពេលកូនសម្លាញ់មិនចង់ញ៉ាំ រើសច្រើន គួរធ្វើយ៉ាងម៉េចស្រួលទៅ?

អ្នកម្តាយភាគច្រើនមានកង្វល់ក្នុងចិត្តរឿងកូនតូចញ៉ាំអាហារមិនបានគ្រប់គ្រាន់ ព្រោះស្ទើរតែគ្រប់ពេល អ្នកម្តាយត្រូវទប់ទល់នឹងបញ្ហាដែលកូនតូចសម្លាញ់មិនព្រមញ៉ាំអាហារ ញ៉ាំតិច ញ៉ាំរើស និងបៀមបាយមិនព្រមទំពាលេប ដែលនឹងហុចផលអាក្រក់ដល់ការរីកចម្រើនធំធាត់ ការវិវឌ្ឍន៍ផ្នែកសតិបញ្ញា និងការរៀនយល់ដឹងរបស់កូនតូចក្នុងរយ:ពេលវែង។

តើកូនតូចសម្លាញ់របស់អ្នកមានទង្វើទាំងអស់នេះដែរ ឬទេ?
– កូនតូចធុញទ្រាន់នឹងអាហារ
កូនសម្លាញ់មានភាពឃ្លានអាហារតិច ទោះជាអ្នកម្តាយប្តូរមុខអាហារច្រើនយ៉ាងហើយក៏ដោយ។
– កូនតូចមិនងាយញ៉ាំអាហារ
កូនសម្លាញ់របស់អ្នកយំនៅពេលឃើញអាហារ ឬរករឿងងង៉ក់ពេលបញ្ចុកអាហារ ឬបដិសេធមិនញ៉ាំដោយការយកដៃខ្ទប់មាត់។
– កូនតូចមហារពឹសមិនព្រមញ៉ាំអាហារ
កូនសម្លាញ់របស់អ្នកចូលចិត្តលេងក្នុងពេលអ្នកបញ្ចុកអាហារ ឬពេលញ៉ាំបាយ។
– កូនសម្លាញ់រើសចំណី
កូនសម្លាញ់របស់អ្នកមិនចូលចិត្តអាហារមួយចំនួន ដោយសារតែក្លិន រសជាតិ ឬរូបរាងរបស់អាហារនោះ។

បើកូនរបស់អ្នកមានទង្វើដូចខាងលើត្រឹមតែ 1ចំណុចនោះ អាចសរុបបានថា កូនរបស់អ្នកមានបញ្ហារឿងការហូបចុក ដែលនឹងធ្វើឱ្យមានផលប៉ះពាល់ដល់ការរីកចម្រើនធំធាត់របស់រាងកាយ និងការវិវឌ្ឍន៍របស់ខួរក្បាលហើយ។

ការប៉ះពាល់ផ្នែករាងកាយ និងសុខភាព ៖
– បើកូនបានទទួលសារធាតុអាហារ និងថាមពលមិនគ្រប់គ្រាន់ នឹងហុចផលឱ្យកូនមានទម្ងន់ខ្លួន និងកម្ពស់ទាបជាងប្រក្រតីតាមអាយុ និងភេទ។
– កូនអាចនឹងខ្វះវិតាមីន និងសារធាតុរ៉ែសំខាន់ៗ ដែលហុចផលមិនល្អដល់ការធ្វើការងារជាប្រក្រតីរបស់រាងកាយ ដូចជាខ្វះសារធាតុដែកធ្វើឱ្យកើតសភាវលោហិតរាវស្លេក និងធ្វើឱ្យកុមារក្រធំ។
– កូនអាចនឹងមានសញ្ញាថា ឈឺញឹកញាប់ ដោយសារតែរាងកាយផលិតប្រព័ន្ធការពារជំងឺមិនបានពេញទំហឹង។

ការប៉ះពាល់ខាងផ្នែកការរៀនយល់ដឹង ៖
កូនបានទទួលវីតាមីន និងសារធាតុរ៉ែមិនគ្រប់គ្រាន់ ហុចផលប៉ះពាល់ដល់ការវិវឌ្ឍន៍ និងការរៀនយល់ដឹង ដូចជា ខ្វះសារធាតុដែកនឹងហុចផលឱ្យកូនមានការវិវឌ្ឍន៍ និងការរៀនយល់ដឹងយឺត និងស្ពឹកជាងកុមារឯទៀត។ ដូច្នេះអ្នកម្តាយដែលមានកូនតូចរីកចំរើនធំធាត់យឺតជាងអាយុ ឬមានទង្វើក្នុងការញ៉ាំមិនសមទំនងនោះ ការរិះរកអាហារ ដែលមានរូបមន្តគ្រប់គ្រឿងដើម្បីបង្កើនភាពជឿជាក់ក្នុងចិត្តថា កូនតូចពិតជាបានទទួលសារជាតិអាហារគ្រប់ប្រភេទក្រុមដែលមានតុល្យភាពចំពោះរាងកាយ ទាំងប្រូតេអ៊ីន កាបូហាយដ្រេត ខ្លាញ់ វីតាមីន និងសារធាតុរ៉ែ 28 ប្រភេទ រួមជាមួយនឹងការព្យាយាមកែសម្រួលទង្វើរបស់កូនតូចឱ្យអាចញ៉ាំបានយ៉ាងសមរម្យផងនោះ នឹងជួយឱ្យកូនតូចមានការរីកចម្រើនធំធាត់សមនឹងវ័យ មានការវិវឌ្ឍន៍ដ៏ល្អ និងមានសុខភាពរឹងមាំ ព្រមទាំងរៀនយល់ដឹងខាងផ្នែកផ្សេងៗបានយ៉ាងពេញសមត្ថភាពទៀតផង៕

January 28, 2018

កាសែតឡារ៉ែន ពាណិជ្ជ លេខ 112

[easy_media_download url=”https://www.lareine.com.kh/wp-content/uploads/2018/01/LRPN_112-Final-For-Web.pdf” force_dl=”1″]

January 28, 2018

ការលក់ស្មាតហ្វូននៅទីផ្សារចិនមានការធ្លាក់ចុះក្នុងឆ្នាំ 2017 ខណៈដែល Huawei នៅតែបន្តកើនឡើង

ចិន៖ យោងតាមរបាយការណ៍ស្រាវជ្រាវថ្មីមួយបានបង្ហាញថា ការលក់ស្មាតហ្វូននៅក្នុងប្រទេសចិន បានធ្លាក់ចុះរហូតដល់ 4% នៅក្នុងឆ្នាំ 2017 ដែលនេះជាតួលេខមិនធ្លាប់កើតមានឡើងសម្រាប់ទីផ្សារស្មាតហ្វូនយក្សនៅអាស៊ី ប៉ុន្តែសម្រាប់ក្រុមហ៊ុន Huawei វិញគឺកើនខ្ពស់។ នេះបើយោងតាមការចេញផ្សាយរបស់សារព័ត៌មាន Phone Arena នៅថ្ងៃទី 27 ខែមករា ឆ្នាំ 2018។

ក្រុមហ៊ុនស្រាវជ្រាវ Canalys បានបង្ហាញថា នៅក្នុងឆ្នាំ 2017 មានស្មាតហ្វូនត្រឹមតែ 459លានគ្រឿងប៉ុណ្ណោះត្រូវបានលក់នៅក្នុងប្រទេសចិន ជាពិសេសគឺតួលេខនៃការលក់បានធ្លាក់ចុះខ្លាំងនៅត្រីមាសទី4 ចុងឆ្នាំ 2017 តែម្ដង ដែលជាហេតុធ្វើឱ្យ តួលេខនៃការលក់ប្រចាំឆ្នាំធ្លាក់ចុះ 4% បើធៀបនឹងឆ្នាំ 2016។

នៅក្នុងរបាយការណ៍បានបង្ហាញថា ក្រុមហ៊ុនបច្ចេកវិទ្យាយក្សចិន Huawei លក់បានស្មាតហ្វូន 24លានគ្រឿងនៅក្នុងត្រីមាសទី4 ឆ្នាំ 2017 និងលក់បានជាង 90លានគ្រឿងក្នុងរយៈពេលចេញ1ឆ្នាំ 2017 ដែលតួលេខនេះ ត្រូវបានគេមើលឃើញថា កើនឡើងជាងឆ្នាំមុន។

ចំណែកក្រុមហ៊ុន Oppp វិញគឺតួលេខនៃការលក់បានធ្លាក់ចុះរហូតដល់ 16% បើធៀបនឹងឆ្នាំមុន ដោយទទួលបានត្រឹមតែ 19លានគ្រឿងនៅត្រឹមមាសទី4 ឆ្នាំ 2017 រីឯ Vivo វិញគឺបានធ្លាក់ចុះ 7% ដោយទទួលបានត្រឹមតែ 17លានគ្រឿងក្នុងត្រីមាសដូចគ្នា៕

January 27, 2018

មែនឬ? ស្ត្រីមានគភ៌ ស្អប់អ្នកណា ខឹងអ្នកណា កូនកើតមកនឹងដូចម្នាក់នោះ?

ជំនឿដែលថា បើស្ត្រីមានផ្ទៃពោះខឹងអ្នកណា ឬស្អប់អ្នកណា កូនកើតមកនឹងដូចម្នាក់នោះ វាអាចមើលទៅជារឿងមួយដែលស្ត្រីមានគភ៌មួយចំនួនក៏ជឿ តែខ្លះទៀតនិយាយថា វាមិនមានពាក់ព័ន្ធគ្នាទេ។

នៅក្នុងការពិតវិញ មូលហេតុដែលធ្វើឱ្យមានការនិយាយតៗគ្នាឡើងថា បើអ្នកមានផ្ទៃពោះស្អប់អ្នកណា កូនកើតមកនឹងស្រដៀងនឹងម្នាក់នោះ វាអាចជាឧបាយកលរបស់មនុស្សសម័យបុរាណដែលមិនចង់ឱ្យស្ត្រីមានផ្ទៃពោះមានសុខភាពផ្លូវចិត្តមិនល្អ និងមិនចង់ឱ្យមានភាពតានតឹង ធុញថប់ មួម៉ៅរហូតហុចផលមិនល្អទៅដល់ទារកនៅក្នុងគភ៌ហ្នឹងឯង។

មែនឬអត់? ស្ត្រីមានគភ៌សម្លឹងមើលរូបថតមនុស្សដែលខ្លួនឯងពេញចិត្ត កូនកើតមកនឹងមានមុខមាត់ដូចមនុស្សម្នាក់នោះ?

ក្នុងផ្លូវផ្ទុយគ្នាវិញ ជំនឿដែលថា បើអ្នកមានផ្ទៃពោះសម្លឹងមើលរូបថតមនុស្សដែលខ្លួនឯងពេញចិត្ត ឬនឹកឃើញរឿងដែលខ្លួនឯងចូលចិត្ត កូនប្រសូតចេញមកក៏នឹងមានមុខមាត់ដូចមនុស្សម្នាក់នោះ ឬចូលចិត្ត និងមានទេពកោសល្យក្នុងរឿងដែលម្ដាយតែងនឹកឃើញញឹកញាប់កាលពីពេលតាំងគភ៌នោះឯង។ ជំនឿនេះ ក៏អាចជាឧបាយកលមួយទៀតរបស់ចាស់ៗបុរាណដែលចង់ឱ្យស្ត្រីមានគភ៌មានសុខភាពផ្លូវចិត្តដែលល្អនឹកឃើញតែរឿងល្អៗនឹងបានសប្បាយចិត្តហ្នឹងឯង។

នៅក្នុងការពិតវិញ លក្ខណៈខាងរូបកាយរបស់កូននៅក្នុងផ្ទៃនោះ ត្រូវបានកំណត់ដោយមានតួហ្ស៊ែនជាច្រើនផ្គុំចូលគ្នា ដោយកូនតូចនឹងបានទទួលហ្ស៊ែនទាំងពីឪពុក និងម្ដាយ មិនមែនបានពីនរណាម្នាក់ផ្សេងឡើយ។ ទោះជាសម្លឹងមើលរូបថតមនុស្សដែលខ្លួនស្រឡាញ់ចូលចិត្តយូរប៉ុនណាក៏ដោយ ក៏មុខមាត់របស់កូនមិនខុសប្លែកពីហ្ស៊ែនដែលបានទទួលពីឪពុក និងម្ដាយដែរ។

អីចឹង តើចរិតនិស្ស័យរបស់កូនបានមកពីនរណា?

ចំណែកឯរឿងចរិតនិស្ស័យរបស់កូនវិញនោះ ទោះជាការចម្លងបន្តខាងពូជអម្បូរនឹងមានចំណែកកំណត់លក្ខណៈចរិតនិស្ស័យរបស់ក្មេងក៏ដោយ តែការចិញ្ចឹមមើលថែ និងសភាពបរិស្ថានជុំវិញខ្លួន ក៏ជាបច្ច័យចម្បងដែលហុចផលដល់ចរិតនិស្ស័យរបស់កូនបានដែរ។ ក្រៅពីនោះហើយ ការរស់នៅប្រចាំថ្ងៃរបស់ឪពុក និងម្ដាយអ្នកចិញ្ចឹមមើលថែ ឬឧបនិស្ស័យផ្ទាល់ខ្លួនខ្លះៗក៏អាចហុចផលដល់ចរិតនិស្ស័យរបស់ក្មេងបានដែរ។ បើកូនកើតមកហើយ កូនមើលឃើញទង្វើដូចជា ម្ដាយចូលចិត្តរអ៊ូរទាំ ឬនិយាយដើមនរណាម្នាក់ កូនក៏អាចនឹងជ្រួតជ្រាបចរិតនិស្ស័យផ្សេងៗទាំងនោះតាមបានជាបណ្ដើរៗដូចគ្នា។

ទារកក៏ដូចជាក្រណាត់សដូច្នោះដែរ ការដែលក្មេងនឹងមានចរិតនិស្ស័យល្អ ឆ្លាត វាងវៃបាននោះក្រៅពីហ្ស៊ែនពូជរបស់ឪពុក និងម្ដាយហើយនោះនៅត្រូវអាស្រ័យលើការចិញ្ចឹមមើលថែទាំដែលល្អ បរិស្ថានជុំវិញខ្លួនដែលល្អស័ក្តិសម និងការជំរុញដ៏ល្អពីក្រុមគ្រួសារផងដែរ៕

January 27, 2018

Samsung ត្រៀមផលិត Galaxy Note 8 Olympic Edition ស្វាគមន៍ការធ្វើជាម្ចាស់ផ្ទះអូឡាំពិកឆ្នាំនេះ

ដូចដែលយើងបានដឹងទាំងអស់គ្នាហើយថា ម្ចាស់ផ្ទះដែលនឹងប្រារព្ធពិធីប្រកួតអូឡាំពិករដូវរងាប្រចាំឆ្នាំ2018 នេះគឺប្រទេសកូរ៉េខាងត្បូង ហើយថ្មីៗនេះក្រុមហ៊ុនផលិតស្មាតហ្វូនដ៏ធំបំផុតរបស់កូរ៉េ Samsung ក៏បានត្រៀមនឹងបញ្ចេញស្មាតហ្វូនស៊េរីពិសេសមួយដើម្បីស្វាគមន៍ការប្រកួតកីឡាអូឡាំពិករដូវរងាដែលនឹងមកដល់ក្នុងឆ្នាំនេះដែរ នោះគឺ Samsung ស៊េរី Galaxy Note 8 Olympic Edition។

ដោយម៉ូដឌីហ្សាញរបស់ Samsung Galaxy Note 8 Olympic Edition នេះនឹងប្រកបដោយ តួគ្រឿងដែលនឹងមានពណ៌ស និងមានឡូហ្គោកង 5 ដែលជានិមិត្តសញ្ញារបស់ការប្រកួតកីឡាអូឡាំពិកឆ្លាក់ជាប់នៅលើផ្នែកខាងក្រោយនៃតួគ្រឿងទៀតផង។ ក្រៅពីនេះនៅមានវ៉លផេភើរ និង Application ពិសេសៗដើម្បីជាប្រយោជន៍ដល់ក្រុមការងារអូឡាំពិកផងដែរ។

តែ សម្រាប់សាវ័ក Samsung ទាំងឡាយ ព័ត៌មាននេះ គឺជារឿងមួយដែលគួរឱ្យស្ដាយជាទីបំផុត ព្រោះថា Galaxy Note 8 Olympic Edition នេះនឹងគ្មានការដាក់លក់ជាទូទៅទូទាំងពិភពលោកនោះឡើយ ព្រោះស៊េរីនេះត្រូវបានខាង Samsung ប្រកាសរួចហើយថា ខ្លួននឹងផលិតចេញមកដើម្បីផ្ដល់ឱ្យតែក្រុមការងារ និង Staff នៅក្នុងពិធីប្រកួតកីឡាអូឡាំពិក 2018 តែប៉ុណ្ណោះ ដែលមានទាំងអស់ត្រឹមតែ 4,000គ្រឿងប៉ុណ្ណោះទូទាំងពិភពលោក៕

January 27, 2018

Author: វល័ក្ខ