វល័ក្ខ - La Reine Media

ស្ត្រីមានគភ៌តែងខ្លួនបែបណាឱ្យមើលទៅស្អាតបែប Fashion

សូមទទួលស្គាល់ទៅថា ស្ត្រីៗយើងទោះជាកាលពីពេលមិនទាន់មានគភ៌ ធ្លាប់មានរូបរាងស្គមស្វែលស្អាតខ្ញង់លំដាប់បវរកញ្ញាខ្លាំងប៉ុនណាក៏ដោយ តែដល់ពេលមានផ្ទៃពោះច្បាស់ជាមើលទៅឃើញធាត់កន្ទ្រល និងថែមទាំងទ្រោមស្រពោនខុសកាលពីមុនទាំងស្រុង។ តែទោះជាយ៉ាងណាក៏ដោយ ក៏ស្ត្រីគ្រប់រូបនៅតែចង់ឱ្យខ្លួនឯងមើលមកស្រស់ស្អាតគ្រប់ពេលវេលាជានិច្ចដែរ ដូច្នេះមិនថាតែពេលមានគភ៌ ឬមិនមានក៏ដោយ ហើយដើម្បីជាការបន្ថែមភាពជឿជាក់លើខ្លួនឯង សូមស្ត្រីមានគភ៌ទាំងឡាយនាំយកតិចនិកការតុបតែងខ្លួនខាងក្រោមនេះទៅប្រើសាកលមើល ទោះជាក្នុងអំឡុងពេលមានគភ៌ក៏ដោយក៏ស្ត្រីយើងនៅតែមើលទៅស្អាតខ្ញង់ដែរ។

1/ តែងខ្លួនបែបងាយៗក្នុងថ្ងៃសប្បាយ៖ ក្នុងថ្ងៃធម្មតាដែលស្ត្រីមានគភ៌ចង់ចេញទៅទិញឥវ៉ាន់នៅខាងក្រៅផ្ទះបន្តិចបន្តួចនោះ ការពាក់យឺតវាលក្លៀកខ្លួនរាងវែងបន្តិច ជាមួយនឹងខោខូវប៊យចង្កេះធូរៗក៏គួរតែល្មមគ្រប់គ្រាន់ហើយ។ ព្រោះឈុតបែបនេះនឹងជួយឱ្យដងខ្លួនរបស់ស្ត្រីមានគភ៌មើលទៅឃើញរាងវែងខ្ពស់ឡើងរហូតមានអារម្មណ៍ថា រាងស្គម និងដើម្បីឱ្យរូបរាងមើលមកឃើញរាងស្វែលឡើងបន្តិចទៀតផង អ្នកគួរជ្រើសរើសស្លៀកពណ៌បែបដិតៗបន្តិច ដូចជា ពណ៌ខ្មៅ ឬពណ៌ទឹកប៊ិចចាស់ ព្រោះវានឹងជួយលាក់រូបរាងរបស់អ្នកបានយ៉ាងល្អ។

2/ ស្លៀកសំពត់ខ្លី៖ ក្នុងអំឡុងពេលមានផ្ទៃពោះអ្នកក៏អាចយកឈុតដ្រេសមកស្លៀកបានដូចគ្នាដោយគ្រាន់តែយកសំពត់ដ្រេសនោះមកចាប់គូជាមួយខោសាច់ក្រណាត់យឺតជើងវែង ក៏អូខេបាត់ទៅហើយ ឬចង់ស្លៀកជាមួយសំពត់វែងរាងស្មើចុះក្រោម ក៏មើលមកឃើញស្អាតម្យ៉ាងដែរ។

3/ ស្អាតស្រទន់ដោយសំពត់រ៉ូបវែង៖ សំពត់រ៉ូបវែង គឺជាឈុតដែលស្ត្រីមានផ្ទៃពោះគ្រប់រូបគួរមាននៅក្នុងទូសម្លៀកបំពាក់ ព្រោះស័ក្តិសមសម្រាប់មនុស្សមានផ្ទៃពោះបំផុត។ តាមរយៈសំពត់រ៉ូបមានលក្ខណៈវែងចុះក្រោម រីកធំទៅក្រោមចាប់តាំងពីទ្រូងចុះទៅបែបនេះ នឹងជួយលាក់រូបរាងរបស់ស្ត្រីមានគភ៌ឱ្យមើលទៅឃើញស្គមបាន ធ្វើឱ្យមិនមើលឃើញក្បាលពោះ និងត្រគាកច្បាស់នោះទេ ហើយឈុតនេះថែមទាំងមិនរឹបណែនរហូតធ្វើឱ្យធុញថប់ដូចឈុតផ្សេងទៀតផង។

4/ ចាប់គូសំពត់ខោអាវឱ្យត្រូវ៖ ព្រោះការជ្រើសរើសចាប់គូសំពត់ខោអាវនេះនឹងជួយធ្វើឱ្យរូបរាងរបស់ស្ត្រីមានគភ៌មើលមកមានរាងមានរៅល្អឡើង ដូច្នេះអ្នកគួរតែដឹងអំពីតិចនិកការចាប់គូសំពត់ខោអាវដើម្បីស្លៀកហើយឱ្យរូបរាងមើលហើយឃើញស្អាតដូចជា ចៀសវាងការពាក់អាវ ជាមួយសំពត់រលុងធំៗជាដើម ព្រោះនឹងធ្វើឱ្យរូបរាងរបស់ស្ត្រីមានគភ៌មើលមកឃើញធំណែន។

5/ គ្រឿងអលង្ការតុបតែងខ្លួនក៏សំខាន់៖ ជារឿងប្រក្រតីដែលផ្ទៃមុខរបស់ស្ត្រីនឹងមើលទៅឃើញទ្រោមស្រពោនក្នុងខណៈមានផ្ទៃពោះ ព្រោះស្ត្រីមានគភ៌នឹងមានអារម្មណ៍នឿយល្វើយគ្រប់ពេលវេលាហើយថែមទាំងពេលខ្លះនៅអាចកើតអាការចាញ់កូនខ្លាំងរហូតធ្វើឱ្យរាងកាយមើលទៅចុះទ្រុឌទ្រោម តែការបានពាក់គ្រឿងអលង្ការតុបតែងបន្តិចបន្តួច ដូចជា ចិញ្ចៀន ក្រវិល កងដៃ ឬដង្កៀបកៀបសក់ស្អាតៗ ក៏ជួយឱ្យស្ត្រីមានគភ៌មើលទៅស្អាតស្រស់ស្រាយបានដែរ៕

February 1, 2018

ជំងឺដ៏មានគ្រោះថ្នាក់ 3យ៉ាង ដែលបណ្តាលមកពី «មូស»

នៅក្នុងរដូវភ្លៀងដែលមានភ្លៀងធ្លាក់ស្ទើរតែរាល់ថ្ងៃរហូតដល់មានទឹកដក់សឹងគ្រប់ទីកន្លែងនោះ គឺជាប្រភពកំណើតយ៉ាងល្អដល់ពួកសត្រូវកំណាចដូចជាសត្វមូស។

ជាប្រក្រតី សត្វមូសមានវដ្តជីវិតក្នុងអំឡុងពេលនៅជាស៊ុតរហូតដល់ធំពេញវ័យក្នុងរយៈពេលពី 9 – 14 ថ្ងៃ ហើយមានតែមូសញីប៉ុណ្ណោះដែលបឺតឈាមជាអាហារ ចំណែកមូសឈ្មោលវិញបឺតទឹកដមពីកេសរផ្កាជាអាហារ ហើយក្រៅពីនេះសត្វមូសញីដែលធំពេញវ័យហើយមានអាយុវែងបានដល់ទៅ 1 – 3 ខែ ឯមូសឈ្មោលមានអាយុត្រឹមតែ 6 – 7ថ្ងៃប៉ុណ្ណោះ តែអ្វីដែលគួរឱ្យខ្លាចនោះគឺ ស៊ុតរបស់មូស ដោយមូសញីនឹងទម្លាក់ស៊ុតនៅក្នុងទឹកនឹង(អត់ហូរ) ស៊ុតនឹងអណ្តែតខ្លួននៅលើផ្ទៃទឹក។ មូសប្រភេទខ្លះប្រើពេលវេលាចាប់តាំងពីទម្លាក់ស៊ុតរហូតដល់ញាស់ត្រឹមតែ 24 ម៉ោងប៉ុណ្ណោះ។ ការទម្លាក់ស៊ុតរបស់សត្វមូសម្តងៗមានចំនួនស៊ុតចាប់តាំងពី50 រហូតដល់ 300 ស៊ុតឯណោះ ហើយមូសញីមួយក្បាល ក្នុងមួយជីវិតរបស់វាអាចទម្លាក់ស៊ុតបានចាប់ពី 1 – 7ដងឯណោះ និងអ្វីដែលសំខាន់នោះគឺ ស៊ុតរបស់មូសធន់នឹងសភាវស្ងួតក្រៀមក្រោះបានជាច្រើនខែ និងបើសឹនជាបានទទួលសំណើម ឬមានទឹកលិចស៊ុតម្តងទៀតនោះ ស៊ុតនឹងអាចញាស់ចេញជាសត្វមូសបានក្នុងរយៈពេលតែ 20 – 60 នាទីប៉ុណ្ណោះ។ ថ្ងៃនេះឡា រ៉ែនសូមនាំយកព័ត៌មានរបស់ជំងឺឆ្លងដែលបណ្តាលមកពីសត្វមូសចម្លងរោគមកជម្រាបជូនមិត្តអ្នកអាន ដើម្បីធ្វើជាចំណេះដឹងក្នុងការសង្កេតមើលអាការ និងការការពារជំងឺទាំងនោះដូចខាងក្រោម។

1 . ជំងឺគ្រុនឈាម
មូលហេតុ៖ បណ្តាលមកពីមេរោគវីរុសដោយមានមូសខ្លាជាភ្នាក់ងារចម្លងរោគ។
អាការ៖ បន្ទាប់ពីត្រូវមូសខ្លាដែលមានមេរោគខាំបានប្រមាណជា 5 – 8ថ្ងៃ នឹងកើតមានអាការគ្រុនក្តៅខ្លួនខ្លាំង(38.5 -40អង្សាសេ)ជាប់ៗគ្នា 2 – 7ថ្ងៃ មុខក្រហម ឈឺក្បាល ឈឺសាច់ដុំ ឈឺក្នុងឆ្អឹង ឈឺរង្វង់ភ្នែក អ្នកខ្លះមានអាការឈឺពោះ ក្អួតចង្អោ មិនឃ្លានអាហារ មានកើតស្នាមអុចក្រហមៗនៅលើដៃជើង ខ្លួន ក្លៀក អាចមានចេញឈាមតាមច្រមុះ និងតាមជើងធ្មេញ អាការទូទៅស្រដៀងជំងឺគ្រុនផ្តាសាយ តែគ្មានក្អក និងគ្មានហៀរសំបោរទេ។
សញ្ញាគ្រោះថ្នាក់នៅពេលកំដៅថយចុះ៖ បើមានអាការស្ងៀមស្ងាត់ ល្វើយខ្លាំង រសាប់រសល់ ត្រជាក់ដៃជើង ជីពចរលោតលឿនតែស្រាលៗ ចុកពោះទាន់ហន់ ស្រេកទឹក នោមតិច មានហូរឈាមតាមច្រមុះ ក្អួតចេញឈាម លាមកឡើងពណ៌ខ្មៅ បើឃើញមានអាការទាំងនេះ ចូរប្រញាប់នាំទៅមន្ទីពេទ្យដែលនៅជិតបំផុត បើអ្នកជំងឺឆាប់បានស្ថិតនៅក្រោមការមើលថែទាំរបស់គ្រូពេទ្យទាន់ពេលវេលាហើយនោះ ឱកាសក្នុងការបាត់បង់ជីវិតមានតិចណាស់។
ការការពារ៖ ដោយសារតែជំងឺនេះនៅមិនទាន់មានវ៉ាក់សាំងការពារនោះ ទើបវិធីការពារគឺ កុំឱ្យមូសខាំ កម្ចាត់ដង្កូវទឹក និងកំទេច ឬបំបាត់ប្រភពកំណើតរបស់មូសខ្លាទាំងអស់។

2 . ជំងឺគ្រុនរលាកខួរក្បាល
មូលហេតុ៖ បណ្តាលមកពីការឆ្លងមេរោគវីរុសដែលមានសត្វមូសរំខានជាភ្នាក់ងារចម្លងរោគដែលច្រើនតែបង្កើនពូជនៅក្នុងប្រភពទឹកតាមវាលស្រែ។ មូសប្រភេទនេះបានទទួលមេរោគគ្រុនរលាកខួរក្បាល ជេ អុី ខណៈពេលជញ្ជក់ឈាមពីសត្វ ជាពិសេសជ្រូកជាប្រភពមេរោគសំខាន់ បន្ទាប់ពីនោះ នៅពេលមូសមកខាំមនុស្សវានឹងបញ្ជូនមេរោគនេះចូលក្នុងរាងកាយមនុស្ស។
អាការ៖ ភាគច្រើនអ្នកឆ្លងមេរោគច្រើនតែគ្មានកើតអាការអ្វីឡើយ តែនៅលើអ្នកជំងឺដែលកើតមានអាការ នឹងមានកម្តៅឡើងខ្ពស់ ឈឺក្បាលខ្លាំង អស់កម្លាំងល្វើយ បើអាការធ្ងន់ធ្ងរ អ្នកជំងឺអាចលែងដឹងខ្លួន និងបាត់បង់ជីវិត ឬអ្នកខ្លះពេលជាសះស្បើយហើយអាចមានអាការពិការខាងខួរក្បាល សតិបញ្ញាចុះខ្សោយ ឬពិការខាងរាងកាយបាន។
ការការពារ៖ ជំងឺនេះអាចការពារបានដោយការការពារកុំឱ្យត្រូវមូសខាំ និងការចាក់វ៉ាក់សាំងការពារ ដូច្នេះអ្នកដែលស្ថិតក្នុងវ័យដែលត្រូវទទួលការចាក់វ៉ាក់សាំងការពារ ដូចជា កុមារតូចៗនោះ អាណាព្យាបាលត្រូវនាំទៅចាក់វ៉ាក់សាំងការពារនៅតាមមណ្ឌលសុខភាព ឬមន្ទីពេទ្យដែលនៅជិតគេហដ្ឋាន។

3 . ជំងឺគ្រុនចាញ់
មូលហេតុ៖ បណ្តាលមកពីមេរោគ ប្រូតូឈួ ដោយមូសដែកគោលញីដែលរស់នៅក្នុងព្រៃជាភ្នាក់ងារចម្លងរោគ។ នៅពេលត្រូវមូសដែកគោលខាំប្រមាណជា 15 – 30 ថ្ងៃក្រោយ នឹងកើតមានអាការជំងឺ។
អាការ៖ ជាប្រក្រតី អ្នកជំងឺច្រើនតែចាប់ផ្តើមមានអាការក្រោយពីបានទទួលមេរោគហើយប្រមាណជា 1សប្តាហ៍រហូតដល់2ខែ ដោយអ្នកជំងឺនឹងកើតមានអាការ ក្តៅខ្លួនខ្លាំង រងារញាក់ មិនឃ្លានអាហារ ឈឺចុករួយតាមរាងកាយ អ្នកខ្លះមានអាការចុកពោះរាក ចំពោះអ្នកជំងឺដែលធ្ងន់ធ្ងរនឹងមានអាការស្លេកស្លាំង ស្បែកឡើងលឿងខ្លាំង ស្ងាត់ស្ងៀម មានសភាវក្រលៀនលែងធ្វើការ និងអាចដល់ថ្នាក់ស្លាប់បាន។
ការការពារ៖ បច្ចុប្បន្ននេះនៅមិនទាន់មានវ៉ាក់សាំងដែលប្រើក្នុងការការពារជំងឺនេះទេ ហើយក៏មិនទាន់មានថ្នាំលេបការពារជាមុនណាដែលមានប្រសិទ្ធភាពខ្ពស់នៅឡើយដែរ ការការពារខ្លួនកុំឱ្យត្រូវមូសខាំ ជាវិធីដែលល្អបំផុតក្នុងខណៈពេលនេះ។

ឥលូវនេះអ្នកបានដឹងពីគ្រោះថ្នាក់ដែលបណ្តាលមកពីសត្វកំណាចខ្លួនតូចល្អឹតនេះហើយមែនទេ? ដូច្នេះយើងត្រូវការពារខ្លួនកុំឱ្យត្រូវមូសខាំ និងជួយគ្នាកម្ចាត់ប្រភពកំណើតរបស់សត្វសម្លងរោគដ៏ចង្រៃនេះឱ្យបានច្រើនបំផុត៕

February 1, 2018

ក្បាច់រួមភេទ ដ៏ល្អបំផុតសម្រាប់មនុស្សស្រី

បើយើងនិយាយអំពីក្បាច់រួមភេទ គឺគ្មានអ្វីដែលល្អជាងមនុស្សស្រីអង្គុយនៅពីលើនោះទេ ព្រោះវាងាយនឹងទទួលបានចំណុចកំពូល ហើយអាចគ្រប់គ្រងស្ថានការណ៍បានគ្រប់យ៉ាង ទាំងការភ្ញោចខាងក្រៅ ខាងក្នុង និងឱ្យខាងប្រុសរួមភេទបានកាន់តែយូរ។ ប៉ុន្តែក្បាច់តែមួយមុខនេះ គឺមិនគ្រប់គ្រាន់នោះទេ ដោយអ្នកគួរតែសិក្សាបន្ថែមទៀតអំពីវា។ ខាងក្រោមនេះអ្នកនឹងទទួលបាននូវការប្រើក្បាច់ ដើម្បីរួមភេទដោយខ្លួនឯង និងការណែនាំដើម្បីឱ្យទទួលបានចំណុចកំពូលកាន់តែស្រួល។

ចំណុចមូលដ្ឋាន

នៅពេលអ្នកឡើងជិះពីលើដៃគូហើយ អ្នកគួរតែមានជម្រើសខ្លះៗសម្រាប់ការកម្រើក ឬប្រើដៃ និងជើងទាំងសងខាងផង។ ជើងម្ខាងគួរតែលើគន្លងពីលើខាងប្រុសដែលកំពុងតែដេក ពេលនោះអ្នកនឹងទទួលបានអារម្មណ៍ដ៏អស្ចារ្យហើយ។ អ្នកក៏អាចលុតជង្គង់នៅពីលើខាងប្រុសក៏បានដែរ ព្រោះវាជាក្បាច់មួយដែលមិនសូវប្រើកម្លាំងសង្កត់ខ្លាំង និងផ្តល់ឱ្យអ្នកនូវជម្រើសជាច្រើនបន្ថែមទៀត។ វេជ្ជបណ្ឌិត សាឌី អាលីសុន (Dr. Sadie Allison) បានប្រាប់ថា ការដាក់ជើងរបស់អ្នកនៅលើកំពូលភ្លៅរបស់គាត់នឹងធ្វើឱ្យអ្នកមានលំនឹងកាន់តែច្រើន។ អ្នកក៏មានសេរីភាពក្នុងការប្រើដៃដែរ នៅពេលអង្គុយរួមភេទ។ អ្នកអាចដាក់ដៃនៅគ្រប់កន្លែងចាប់ពីទ្រូងរបស់គាត់ចុះមកក្រោម ឬអោបករបស់គាត់។ ទីតាំងរបស់ដៃក៏នឹងប៉ះពាល់ទៅលើភាពជិតគ្នាដែលអ្នកកំពុងតាំងនៅ និងមុំដែលគាត់អាចសូកបញ្ចូលលិង្គបាន។ ចូរសាកល្បងជម្រើសពីរ-បីបន្ថែមទៀត ដើម្បីមើលថាតើអ្វីដែលល្អបំផុត និងខុសគ្នាប៉ុណ្ណា។ ប្រសិនបើអ្នកត្រូវប្រើដៃភ្ញោចដោយខ្លួនឯង នៅកន្លែងដែលអ្នកមិនចង់ធ្វើ អ្នកក៏អាចប្រើដៃនោះទៅភ្ញោចឱ្យខាងប្រុសបន្ថែមទៀត។

កែទិកនិចបន្តិច

បន្ថែមពីលើការធ្វើចលនាដៃ និងជើង អ្នកក៏អាចសាកល្បងក្បាច់រួមភេទ Cowgirl ដោយត្រឡប់ក្រោយ។ សម្រាប់ដៃគូរួមភេទមួយចំនួន ក្បាច់មួយនេះអាចជួយឱ្យអ្នកវាយប្រហារទៅលើ G-spot និងផ្តល់អារម្មណ៍យ៉ាងល្អសម្រាប់ខាងប្រុសទៀតផង។ វេជ្ជបណ្ឌិត អាឡីសុន បានណែនាំថា ការធ្វើខ្នងឱ្យកោងវានឹងផ្តល់បានជាមុំកាន់តែល្អសម្រាប់ការស៊កបញ្ចូលលិង្គ និងឱ្យគាត់បានមើលឃើញនូវទិដ្ឋភាពដ៏អស្ចារ្យ។ មធ្យោបាយមួយផ្សេងទៀត សម្រាប់ការផ្លាស់ប្តូរទីកន្លែងការរួមភេទលើកៅអីប្រហែលជាល្អម្យ៉ាងដែរ។ វេជ្ជបណ្ឌិត ចយ ដាវីតសុន (Dr. Joy Davidson) ឯកទេសព្យាបាលជំងឺផ្លូវភេទ និងជាអ្នកបង្កើត The Joy Spot បាននិយាយថា សម្រាប់មនុស្សស្រី ក្បាច់រួមភេទមួយនេះ (អ្នកអាចអង្គុយនៅពីលើភ្លៅរបស់គាត់) អាចបង្កើតបាននូវអ្វីៗ ខុសប្លែកគ្នាទាំងអស់តែម្តង ហើយក៏ប្រហែលជាលែងសូវចូលចិត្តក្បាច់ Cowgirl ទៀតដែរ។ ដោយសារតែមុំនៃការស៊កបញ្ចូលលិង្គមានលក្ខណៈប្លែក ហើយអ្នកទាំងពីរនៅជិតគ្នាកាន់តែខ្លាំងទៀត វាពិតជាអាចឱ្យទទួលបាននូវអារម្មណ៍ថ្មី និងផ្តល់នូវការភ្ញោចលើ Clitoris (សេរ) កាន់តែច្រើន។

រឿងដែលសំខាន់

អ្នកប្រហែលជាធ្លាប់ឮពីភាពងាយស្រួលនៃការប្រើក្បាច់មួយនេះហើយ ព្រោះវាងាយនឹងទទួលបានចំណុចកំពូល ហើយឥឡូវនេះ យើងនឹងប្រាប់អ្នកពីរបៀបធ្វើវា។ គុណសម្បត្តិមួយនៃការប្រើក្បាច់ Cowgirl គឺថាដៃរបស់ដៃគូនៅទំនេរ ដូច្នេះចូរកុំឱ្យវាទំនេរអី! អាចប្រើដៃ ដើម្បីភ្ញោចអារម្មណ៍អ្នកបន្ថែមទៀតបាន។ ស្តាប់ទៅដូចជាធម្មតាទេ ប៉ុន្តែអ្វីដែលជាមុខសញ្ញា គឺអាចធ្វើឱ្យបរបេទ្វារមាសរបស់អ្នកផ្អឹបខ្លួនទៅនឹងថ្ងាស់ក្រោមរបស់គាត់។ ក្រោយមកទៀត ប្រសិនបើអ្នកធ្វើចលនាត្រគៀកជារង្វង់ អ្នកនឹងទទួលបាននូវការភ្ញោចលើសេរកាន់តែច្រើន ហើយខាងប្រុសអាចនឹងទទួលអារម្មណ៍ស្រួលផងដែរ។

តាំងអារម្មណ៍ឱ្យនឹង

ស្ត្រីមួយចំនួនមិនចង់ប្រើក្បាច់នេះរួមភេទទេ ដោយសារតែយល់ថា រាងកាយពួកគេមើលទៅមិនស្អាត ហើយវាក៏ជាការពិតមួយថា ពេលអ្នកអង្គុយដូច្នេះបាន វាពិតជាមើលទៅស្រស់ស្អាតទៅវិញទេ។ ប៉ុន្តែយើងមានអាថ៌កំបាំងមួយចំនួនដែលអ្នកសាកល្បងបាន ដើម្បីបង្កើនទំនុកចិត្តដល់ខ្លួនឯងកាន់តែច្រើន។ ការស្លៀកសម្លៀកបំពាក់ក្នុងស្អាតៗមួយចំនួនអាចឱ្យអ្នកមានអារម្មណ៍ថា មានផាសុកភាពបាន ហើយចូរឆ្លុះកញ្ចក់ទុកសិន មុនពេលឈានចូលប្រតិបត្តិការដែលពុះកញ្ជ្រោល។ អ្នកក៏អាចបង្កើនអារម្មណ៍ដោយប្រើពន្លឺភ្លើងទៀន ឬគ្មានពន្លឺតែម្តង ដូច្នេះអ្នកមិនមានអារម្មណ៍អៀនខ្មាសនូវរូបរាងមិនល្អដែរ។ ការអង្គុយលើកៅអីក៏ជាគំនិតមួយល្អដែរ ព្រោះមិនអាចមើលឃើញអ្វីបានច្រើនលើរាងកាយ។ ការចាក់សោរភ្នែកដៃគូរបស់អ្នកគឺជាវិធីមួយដ៏ល្អ ប្រសិនបើគាត់កំពុងតែមើលមុខរបស់អ្នក ហើយធ្វើយ៉ាងណាកុំឱ្យគាត់មើលទៅកន្លែងណាផ្សេងឱ្យសោះ ចូរចាប់ផ្តើមដោយយឺត។ ប្រសិនបើធ្វើបែបនេះហើយ នៅតែអៀនខ្មាសទៀត ចូរផ្លាស់ប្តូរក្បាច់ថ្មីវិញ។ អ្វីដែលសំខាន់គឺ ត្រូវតែទប់ស្កាត់ឱ្យបាននូវគំនិតអវិជ្ជមានចំពោះខ្លួនឯងក្នុងពេលរួមភេទ។ វេជ្ជបណ្ឌិត ដាវីតសុន បាននិយាយថា គំនិតទាំងនេះអាចបំផ្លាញអារម្មណ៍ ដែលអ្នកកំពុងតែមាន មានន័យថា ក្បាច់រួមភេទពិតប្រាកដនោះមិនអាចឱ្យអ្នកធ្វើវាបានឡើយ។ ដូច្នេះចូរផ្តោតទៅលើក្បាច់រួមភេទ និងសាតិអារម្មណ៍ដើរស្មើគ្នាក្នុងពេលរួមភេទ។ ហើយចូរប្រាប់ខ្លួនឯងថាដៃគូររបស់អ្នកមិនមែនកំពុងតែគិតអំពីក្បាលពោះដ៏ធំ ឬជំងឺស្បែកដែលអ្នកកំពុងតែមាននោះទេ គាត់គ្រាន់តែដឹងថា មានតែអ្នកទេទើបជួយដាស់អារម្មណ៍ពុះកញ្ជ្រោលរបស់គាត់បាន៕

January 30, 2018

ថែបំប៉នស្បែកដោយផ្លែឪឡឹក

វិធីធ្វើ គឺចិតសាច់ផ្លែឪឡឹកជាបន្ទះស្តើងៗ ធំល្មម ដោយជ្រើសយកតែសាច់ផ្នែកក្នុងបំផុត កុំយកសាច់ដែលនៅជាប់នឹងសម្បក ព្រោះសាច់នៅកន្លែងនេះមានសារជាតិអាស៊ីតច្រើន ហើយរឹងមិនស័ក្តិសមនឹងយកមកប្រើនោះទេ។ ពេលបានបន្ទះសាច់ឪឡឹកស្តើងៗមកហើយ ចូរយកមកដាក់តំរៀបនៅលើបន្ទះក្រណាត់សស្តើងដែលត្រៀមទុកជាស្រេចហើយ បន្ទាប់មកក៏លើកយកមកបិទពីលើផ្ទៃមុខឱ្យសព្វ ទុកចោលប្រមាណ10-15នាទី សឹមលាងមុខចេញដោយទឹកស្អាត។

លទ្ធផលដែលទទួលបានពីការថែបំប៉នស្បែកមុខដោយសាច់ផ្លែឪឡឹកនោះគឺភាពត្រជាក់របស់ឪឡឹកជួយបន្ធូរសភាពស្បែកឱ្យស្រស់ស្រាយ សារធាតុពណ៌ក្រហមរបស់សាច់ឪឡឹកដែលហៅថា ឡៃខូពីន ដែលមាន អ៊ែនធីអុកស៊ីឌែនក្រៅពីជួយក្នុងការថែបំប៉នបេះដូង រួមទាំងការពាររោគមហារីកហើយនោះ នៅអាចបឺតយកជាតិខ្លាញ់ដែលមាននៅលើផ្ទៃមុខបានយ៉ាងល្អ ហើយថែមទាំងសម្បូរទៅដោយប៉ូតាស្យូ៉មដែលនឹងជួយគ្រប់គ្រងប្រព័ន្ធការហូរវិលរបស់លោហិតនៅម្តុំផ្ទៃមុខឱ្យដំណើរការប្រក្រតី ជួយឱ្យរន្ធរោមមានភាពយឺតយារ ស្រស់បស់ ហើយនៅក្នុងទឹកឪឡឹកក៏មានម៉ូលេគូលរបស់ស្ករច្រើនសមល្មម រួមទាំងមានអាស៊ីត អាមីណូ បន្តិចបន្តួចដែលជួយក្នុងការថែបំប៉នស្បែកបានយ៉ាងល្អទៀតផង៕

January 30, 2018

ជួយយ៉ាងណា ពេលកូនឈ្លោះគ្នាជាមួយពួកម៉ាក?

មិត្តភាពរបស់ក្មេងវ័យជិតចូលវ័យជំទង់ច្រើនតែមិនសូវជាស្ថិតស្ថេរយូរអង្វែងប៉ុន្មានទេ ជាមធ្យមច្រើនតែសេពគប់គ្នាបានតែប្រមាណជា1ឆ្នាំប៉ុណ្ណោះ ព្រោះច្រើនតែមានមិត្តភក្តិថ្មីៗទៀតនៅពេលឡើងទៅថ្នាក់ខ្ពស់ ឬមានចំណាប់អារម្មណ៍ខុសប្លែកពីគ្នា តែកូនរបស់អ្នកអាចនឹងប្រេះធ្លាយបេះដូងនៅពេលមិត្តភក្តិដែលធ្លាប់តែនិយាយរកគ្នាបែរជាព្រងើយកន្តើយដាក់ ដោយសារតែការទាស់ចិត្តគ្នាក្នុងរឿងណាមួយ ដែលរឿងនេះក្នុងនាមអ្នកជាឪពុកម្ដាយត្រូវតែជួយកូនក្នុងការសម្រាលការខូចចិត្តក្នុងគ្រានេះ។

– ទទួលស្ដាប់កូនយ៉ាងអាណិតមេត្តា ព្រោះក្មេងវ័យនេះច្រើនតែចង់ឱ្យឪពុកម្ដាយយកចិត្តទុកដាក់ស្ដាប់ពីបញ្ហារបស់ខ្លួន។ បើកូនចង់និយាយអំពីរឿងដែលឈ្លោះគ្នាជាមួយមិត្តភក្តិនោះ អ្នកក៏គួរតែយកចិត្តទុកដាក់ស្ដាប់យ៉ាងពិតប្រាកដ និងកុំសម្រេចសេចក្ដីថា អ្នកណាខុស ឬត្រូវ ឬបញ្ចេញយោបល់ដូចជា “ម៉ាក់ថាហើយថា កូនឯងមិនគួរទៅសេពគប់ជាមួយម្នាក់ហ្នឹងទេ” ជាដើម ព្រោះមានតែនឹងធ្វើឱ្យកូនរឹតតែខឹង និងសោកស្ដាយកាន់តែខ្លាំងឡើង។ គ្រាន់តែងក់ក្បាលយ៉ាងយល់ចិត្ត និងនិយាយលួងលោមកូនថា “អ៊ើ ពិបាកមែនម៉ាក់ដឹងហើយថាកូនកំពុងមានអារម្មណ៍យ៉ាងណា។

– ផ្ដល់នូវពាក្យណែនាំនៅពេលកូនត្រូវការ តែកុំបង្ខំបើកូនមិនយល់ស្រប ព្រោះនឹងរឹតតែធ្វើឱ្យកូនកាន់តែមានអារម្មណ៍ខឹងខ្លាំងឡើង។ បើកូនរបស់អ្នកជាអ្នកខុស ចូរអធិប្បាយយ៉ាងសន្សឹមៗ មួយៗឱ្យគេបានយល់ ដើម្បីកុំឱ្យកូនធ្វើខុសឆ្គងម្ដងទៀត ដោយអាចនឹងនិយាយទៅកាន់កូនថា “កូនសាកល្បងគិតមើលទៅមើលថា បានធ្វើអ្វីខ្លះឱ្យពួកម៉ាកខូចចិត្តដែរឬទេ?” ជាដើម។

– កុំជ្រួលច្របល់រហូតជ្រុលពេក។ ការទូរស័ព្ទទៅមិត្តភក្តិរបស់កូន ឬឪពុកម្ដាយរបស់មិត្តភក្ដិកូនដែលឈ្លោះគ្នាដើម្បីរកខុស រកត្រូវ ឬកែសម្រួលសម្ពន្ធភាពឡើងវិញ ច្រើនតែធ្វើឱ្យរឿងរឹតតែច្របូលច្របល់រញ៉េរញ៉ៃកាន់តែធំឡើង ហើយកូនក៏ប្រហែលជាមិនពេញចិត្តដែរដែលអ្នកធ្វើបែបនេះ។

– ចែករំលែកបទពិសោធរបស់ខ្លួនឯងឱ្យកូនបានដឹង កូននឹងមានអារម្មណ៍ធូរស្រាលឡើងនៅពេលដឹងថា កាលពីអាយុនៅប្រហែលៗហ្នឹង អ្នកក៏ធ្លាប់ឈ្លោះជាមួយមិត្តភក្ដិដូចគ្នាដែរ និងអាចទប់ទល់នឹងបញ្ហានោះបានទៀតផង។

– ណែនាំឱ្យកូនរកមិត្តភក្តិថ្មី ដែលអាចនឹងជួយធ្វើឱ្យអារម្មណ៍របស់កូនបានល្អឡើងវិញ និងលែងសូវខូចចិត្តជាមួយនឹងរឿងចាស់ៗ និងកុំទៅកង្វល់ខ្វល់ខ្វាយនៅពេលឃើញថា កូនមានមិត្តភក្តិតែម្នាក់ ឬពីរនាក់នោះអី ព្រោះមិត្តភាពដែលល្អ មិនបានមានន័យថា ត្រូវតែមានមិត្តភក្ដិច្រើនៗជានិច្ចនោះទេ។

ឪពុកម្ដាយគឺជាមិត្តភក្ដិដំបូងគេរបស់កូន និងជាមនុស្សដែលកូនទុកចិត្តបំផុតនៅពេលមានបញ្ហាម្ដងៗ ដូច្នេះការទទួលស្ដាប់បញ្ហារបស់កូនយ៉ាងយល់ចិត្តដោយមិនចាំបាច់និយាយអ្វីក៏ធ្វើឱ្យកូនបានធូរស្បើយមួយកម្រិតដែរ ហើយអធិប្បាយពន្យល់កូនដោយក្ដីស្រឡាញ់ និងអាណិតអាសូរ គឺជាភារកិច្ចរបស់ឪពុកម្ដាយ៕

January 30, 2018

កម្ចាត់មុនខ្សាច់ស្អាតហ្មត់ចត់ ដោយចំណាយលុយតិចបំផុត

មុនដំបូងត្រូវត្រៀមឧបករណ៍ជំនួយទាំងអស់នេះជាមុនសិន៖

ក្រដាសជូតដៃប្រភេទដុំរមូរ ទាញផ្តាច់ចេញជាបន្ទះៗ ទុកឱ្យរួចជាស្រេច
ស៊ុតសឆៅ
កន្សែងពោះគោទន់ៗទុកជូតមុខ
ទឹកក្តៅឧណ្ហៗ

ដំណាក់ការអនុវត្ត៖

ប្រមូលសក់ចងទៅក្រោយកុំឱ្យបាំងផ្ទៃមុខ
យកកន្សែងពោះគោជ្រលក់ទឹកក្តៅឧណ្ហៗមកគ្របពីលើផ្ទៃមុខរបស់អ្នកប្រមាណជា5-10នាទី
បន្ទាប់មកលាងដៃរបស់អ្នកឱ្យស្អាត រួចយកចុងម្រាមដៃផ្តិតស៊ុតស យកមកលាបឱ្យសព្វពេញផ្ទៃមុខ ជាពិសេសបរិវេណដែលចង់បក មុនខ្សាច់ចេញ ដូចជា កៀនច្រមុះ និងថ្ងាសជាដើម។
យកក្រដាសជូតដៃដែលហែកជាបន្ទះៗទុកជាស្រេចហើយនោះ មកដាក់បិទពីលើផ្ទៃមុខរបស់អ្នកឱ្យសព្វ ហើយទុកចោលរហូតដល់មានអារម្មណ៍ថា ស៊ុតដែលលាបនោះស្ងួតអស់។
បកក្រដាសជូតដៃចេញម្តងមួយៗ ចាប់ពីចង្កា ដេញឡើងទៅដល់ថ្ងាស ដោយប្រើវិធីទាញបញ្ច្រាស់ឡើងលើ ថ្នមដៃបន្តិច ព្រោះអាចធ្វើឱ្យអ្នកឈឺបាន មុនខ្សាច់នឹងស្អិតជាប់ក្រដាសចេញមកជាមួយជាមិនខាន។

បន្ទាប់ពីនោះមក ចូរលាងសម្អាតមុខឱ្យស្អាត នោះអ្នកនឹងសង្កេតឃើញថា មុនខ្សាច់បានរបូតជ្រុះចេញអស់ពីផ្ទៃមុខរបស់អ្នកហើយ ហើយផ្ទៃមុខរបស់អ្នកនឹងហ្មត់ស្អាតរលោងឡើងគួរឱ្យចង់ស្ទាបអង្អែលជាមិនខាន៕

January 30, 2018

ម៉ូដសម្លៀកបំពាក់បុរសសម្រាប់រដូវរងាដ៏ទាន់សម័យ

រដូវរងានាដើមឆ្នាំ2018នេះ សូមសុភាពបុរសទាំងអស់រីករាយជាមួយនឹងម៉ូដសម្លៀកបំពាក់ដ៏ទាន់សម័យដែលមាននៅក្នុងទំព័រម៉ូដសម្លៀកបំពាក់បុរសក្នុងទស្សនាវដ្តី ឡារ៉ែន លេខថ្មីនេះទាំងអស់គ្នាណា៎ ដើម្បីផ្លាស់ប្តូរស្តាយល៍របស់អ្នកជាថ្មីឱ្យកាន់តែស្រស់សង្ហា និងកាន់តែទាន់សម័យឡើងប្រៀបដូចជាតារាបង្ហាញម៉ូដហូលីវូដដែរ។

សូមធ្វើការជ្រើសរើសម៉ូដសម្លៀកបំពាក់ដែលអ្នកពេញចិត្ត ហើយលេងម៉ូដតាមដូចតទៅ៕

January 30, 2018

ការទូទាត់ប្រាក់តាមប្រព័ន្ធអេឡិចត្រូនិកកើនឡើងជាង 50%នៅកម្ពុជា

ស្របពេលដែលបច្ចេកវិទ្យាមានការរីកចម្រើន បច្ចុប្បន្នគេមើលឃើញថា ការទូទាត់ប្រាក់ តាមប្រព័ន្ធអេឡិចត្រូនិកបានកើនឡើងខ្លាំងរហូតដល់ប្រមាណជាង 50% ក្នុងរយៈពេលប៉ុន្មានឆ្នាំចុងក្រោយនេះ។

លោក ឡាយ សុខហេង ប្រធានផ្នែកនៃខុទ្ទកាល័យធនាគារជាតិនៃកម្ពុជាមានប្រសាសន៍ថា បើតាមការស្រាវជ្រាវរបស់វិទ្យាស្ថាន Fin Trust នៃអង្គការ Fin scope បានបង្ហាញថា ការ ទូទាត់ប្រាក់តាមប្រព័ន្ធអេឡិចត្រូនិកមានការកើនឡើងប្រមាណជាង 50% នៅកម្ពុជា ដែលក្នុងនោះមានដូចជា ការទូទាត់ប្រាក់តាមរយៈការស្គែនបារ៍កូតក្នុងទូរស័ព្ទដៃ ការបង់វិក្កយបត្រទឹកភ្លើង ឬសេវា

អុីនធើណិតតាមរយៈទូរស័ព្ទដៃ ការប្រើ Visa Card ឬ Master Card សម្រាប់ទិញទំនិញតាមអនឡាញការទិញទំនិញនៅតាមហាង ឬផ្សារទំនើបនានាដោយទូទាត់ប្រាក់តាមរយៈ App Pay go ឬ Pi payក្នុងទូរស័ព្ទដៃ ដែលតម្រូវឱ្យដាក់ប្រាក់ចូលគណនីរបស់ខ្លួនជាមុនតាមរយៈម៉ាស៊ីនដាក់ប្រាក់ ឬហៅថាម៉ាស៊ីន Cash in ដែលមាននៅតាម Star Mart និងធនាគារ ABA គ្រប់ទីកន្លែង។

លោកបន្តថា អ្វីដែលធ្វើឱ្យការទូទាត់ប្រាក់តាមប្រព័ន្ធអេឡិចត្រូនិកមានការកើនឡើងខ្លាំងនៅកម្ពុជា គឺដោយសារតែប្រព័ន្ធទាំងនេះផ្តល់ភាពងាយស្រួលដល់អតិថិជន ដោយគ្រាន់តែអតិថិជនបើកគណនីប្រើប្រាស់សាច់ប្រាក់នៅក្នុងម៉ាស៊ីនទូទាត់ប្រាក់ណាមួយ ហើយយកប្រាក់ទៅដាក់ដោយខ្លួនឯង ឬផ្ទេរពីគណនីធនាគារចូលទៅម៉ាស៊ីន គឺអាចដកចាយបានគ្រប់ទីកន្លែងដែលមានម៉ាស៊ីន

នេះប្រើប្រាស់ ដូចជានៅតាមធនាគារ តាមផ្សារទំនើប តាម Star Mart នានាដែលមានវត្តមាននៅតាមទីប្រជុំជនទូទាំងរាជធានីភ្នំពេញ។

លោក ចាន់ សុវណ្ណៈ ប្រធានគ្រប់គ្រងផ្នែកលក់នៃក្រុមហ៊ុនអគ្គិសនីសឡា បានលើកឡើងថា តាមបទពិសោធ លោកមិនសូវកាន់ប្រាក់សុទ្ធដាក់តាមខ្លួននោះទេ ព្រោះថា ខ្លាចជួបហានិភ័យបាត់បង់ដោយប្រការណាមួយ ឬខ្លាចមានអំពើចោរកម្មឆក់ប្លន់ផ្សេងៗ ដូច្នេះលោកដាក់ប្រាក់បញ្ចូលក្នុងគណនីរបស់ខ្លួនតាមរយៈធនាគារ ឬម៉ាស៊ីនដាក់ប្រាក់ដើម្បីងាយស្រួលសម្រាប់ការចាយវាយផ្ទាល់ខ្លួនផ្សេង។

ជាមួយគ្នានេះដែរ លោក ជា សេរីវឌ្ឍ ជាអតីតប្រធានក្រុមហ៊ុន Blend Solutions Co, ltd ដែលសព្វថ្ងៃលោកជាប្រធានផ្នែក Business Process Automation នៃក្រុមហ៊ុន Microsoft ប្រចាំនៅកម្ពុជាបានបង្ហាញថា អ្វីដែលធ្វើឱ្យការទូទាត់ប្រាក់តាមប្រព័ន្ធអេឡិចត្រូនិកមានការកើនឡើងឆាប់រហ័សគឺដោយសារប្រជាជនភាគច្រើន(7,1លាននាក់)អាចប្រើប្រាស់ប្រព័ន្ធអុីនធើណែតតាមទូរស័ព្ទដៃបាន ហើយពួកគាត់មានជំនឿខ្លាំងលើប្រព័ន្ធនេះ ព្រោះពួកគាត់អាចឃើញរបាយការណ៍ភ្លាមៗ មិនត្រឹមតែប៉ុណ្ណោះវាផ្តល់ភាពងាយស្រួល ពោលគឺអតិថិជនមិនចាំបាច់កាន់ប្រាក់ច្រើនទៅតាមខ្លួននាំឱ្យលំបាកគ្រប់គ្រងប្រាក់រៀលតូចៗ ឬភ័យខ្លាចបាត់បង់នោះទេ ដោយសារប្រព័ន្ធ Payment តាមអេឡិចត្រូនិកនេះត្រូវគេបង្កើតឡើងដោយគិតគូរតាំងពីប្រាក់តិចតួចចាប់តាំងពីមួយកាក់មួយសេនឡើងទៅ ដោយមិនលម្អៀង ឬបាត់បង់ឡើយ មិនថាប្រាក់នោះមានចំនួនតិចប៉ុនណាក៏ដោយ ដែលធ្វើឱ្យអ្នកប្រើប្រាស់មានការទុកចិត្តខ្ពស់។

យ៉ាងណាក៏ដោយ លោកជឿជាក់ថា ប្រព័ន្ធ Payment តាមរយៈម៉ាស៊ីន Cash In នេះមិនប៉ះពាល់ទៅដល់ការប្រើ Visa Card ឬ Master Card របស់ធនាគារនោះឡើយ ដោយសារប្រព័ន្ធទាំងពីរនេះមានដែនវិសាលភាពផ្សេងៗ ដូចជាម៉ាស៊ីន Pay Go ឬ Pi Pay ភាគច្រើនត្រូវគេប្រើនៅក្នុងហាង ឬផ្សារទំនើបតែប៉ុណ្ណោះ ប៉ុន្តែសម្រាប់ Master Card ឬ Visa Card អាចប្រើប្រាស់ដកសាច់ប្រាក់បានគ្រប់ទីកន្លែងតាមម៉ាស៊ីន ATM ដែលប្រព័ន្ធនេះត្រូវបានដាក់ឱ្យប្រើប្រាស់រួមគ្នានៅក្នុងប្រទេសកម្ពុជាកាលពីពេលថ្មី។

យ៉ាងណាក៏ដោយលោក ជា សេរីវឌ្ឍ បានបញ្ជាក់ដែរថា បើតាមបទពិសោធរបស់ក្រុមហ៊ុន Alipay Wallet នៅប្រទេសចិនវិញ ប្រព័ន្ធទូទាត់សាច់ប្រាក់ទំនើបមួយនេះបានវាយប្រហារប្រព័ន្ធធនាគារស្ទើរតែរលំទៅហើយ។ លោកបញ្ជាក់ដូច្នេះថា “ការវាយប្រហារនេះ គឺដោយសារតែប្រព័ន្ធនេះមានភាពងាយស្រួល ដោយវាអនុញ្ញាតឱ្យអតិថិជន ទិញ-លក់បានស្ទើរគ្រប់ហាងទាំងអស់ សឹងតែមិនបាច់កាន់លុយសុទ្ធ មិនត្រឹមតែប៉ុណ្ណោះ Alipay Wallet នេះផ្តល់ការប្រាក់ដល់អតិថិជនក្នុងកម្រិតខ្ពស់បើប្រៀបធៀបនឹងធនាគារផងដែរ។ ករណីនេះជាបទពិសោធមួយដ៏ល្អសម្រាប់ប្រព័ន្ធធនាគារនៅកម្ពុជា ព្រោះថា បើសិនជាធនាគារ ឬគ្រឹះស្ថានមីក្រូហិរញ្ញវត្ថុមិនពិចារណាផ្លាស់ប្តូរទៅជាប្រព័ន្ធអេឡិចត្រូនិក (Electronic Banking)ទេ ហើយនៅតែរក្សាទម្រង់ដើមសម្រាប់តែផ្តល់កម្ចី ឬដាក់ប្រាក់បញ្ញើនោះ វាអាចនឹងដើរមិនទាន់សម័យកាលបច្ចេកវិទ្យានេះឡើយ។

លោកបានផ្តល់អនុសាសន៍ថា ទោះយ៉ាងណាការប្រែក្លាយខ្លួនទៅជា Electronic Banking ក៏មិនមែនងាយស្រួលនោះដែរ បើសិនជាប្រព័ន្ធគ្រប់គ្រងបច្ចេកវិទ្យាមានភាពទន់ខ្សោយ គឺគេអាច Hack បាន ដែលធ្វើឱ្យប៉ះពាល់យ៉ាងធ្ងន់ធ្ងរដល់ដំណើរការចរន្តសាច់ប្រាក់របស់ធនាគារទាំងមូល៕

January 30, 2018

Tottenham យល់ព្រមលើតម្លៃខ្លួន 25លានជាមួយ PSG ដើម្បីយក Moura

ក្លិបមាន់ខ្នាយមាស Tottenham បានឈានដល់ការព្រមព្រៀងគ្នាមួយជាមួយនឹងក្លិប Paris Saint-Germain ដើម្បីចុះហត្ថលេខាជាមួយនឹងខ្សែបម្រើ Lucas Moura។ នេះបើយោងតាមប្រភពព័ត៌មានរបស់ទូរទស្សន៍ Sky Sports។

LONDON, ENGLAND – NOVEMBER 23: Lucas of PSG celebrates scoring his sides second goal during the UEFA Champions League Group A match between Arsenal FC and Paris Saint-Germain at the Emirates Stadium on November 23, 2016 in London, England. (Photo by Shaun Botterill/Getty Images)

ការផ្ទេរដែលត្រូវបានគេមើលឃើញថា មានតម្លៃខ្លួន 25លានផោន (ស្មើនឹង 35.2លានដុល្លារអាមេរិក) នោះ រង់ចាំតែការបំពេញលក្ខខណ្ឌផ្ទាល់ខ្លួន និងការពិនិត្យសុខភាពប៉ុណ្ណោះ។ លោក Mauricio Pochettino ដែលជាគ្រូបង្វឹក បានបញ្ជាក់កាលពីចុងសប្តាហ៍មុនថា ក្លិប Tottenham នឹងសម្លឹងរកការចុះហត្ថលេខាជាមួយនឹងកីឡាករដ៏មានសក្តានុពលនៅថ្ងៃចុងក្រោយនៃការដោះដូរកីឡាករនាខែមករានេះ។

ខ្សែបម្រើវ័យ 25ឆ្នាំដែលបានបង្ហាញខ្លួនជាអន្តរជាតិចំនួន 36លើក និងបានស៊ុតបាល់បញ្ចូលទី 4គ្រាប់សម្រាប់ក្រុមបាល់ទាត់ជម្រើសជាតិប្រេស៊ីលរូបនេះ បានចាប់ផ្តើមអាជីពរបស់គេជាមួយនឹងក្លិប Sao Paulo និងធ្លាប់ត្រូវបានទាក់ទងឱ្យផ្ទេរទៅកាន់ក្លិប Manchester United កាលពីពេលមុន។

ប៉ុន្តែ រូបគេបានជ្រើសរើសចូលរួមជាមួយនឹង PSG កាលពីខែមករា ឆ្នាំ2013 ហើយចាប់តាំងពីពេលនោះមក រូបគេបានបង្ហាញខ្លួនច្រើនជាង 150លើកឱ្យក្រុមម្ចាស់ជើងឯកបារាំងមួយនេះ។ ក្រោយពីបានអនុញ្ញាតឱ្យកីឡាករ Georges-Kevin Nkoudou ចូលរួមជាមួយនឹងក្លិប Burnley កាលពីដើមសប្តាហ៍នេះ លោក Pochettino បានចាប់អារម្មណ៍ទៅលើការចុះហត្ថលេខាជាមួយនឹង Wilfried Zaha ប៉ុន្តែ ត្រូវបានបញ្ជាក់ដោយក្លិប Crystal Palace ថា ខ្សែប្រយុទ្ធអន្តរជាតិកូតឌីវ័ររូបនេះ មិនមែនសម្រាប់លក់ឡើយ៕

ប្រភពពី៖ Sky Sports

January 30, 2018

Tiger street Football Festival 2018 ប្រចាំមណ្ឌលកំពង់ស្ពឺរកឃើញជើងខ្លាំង 3ក្រុមឡើងទៅវគ្គផ្តាច់ព្រ័ត្រហើយ

កំពង់ស្ពឺ៖ ព្រឹត្តិការណ៍ប្រកួតបាល់ទាត់ Tiger Street Football Festival 2018 ប្រចាំខេត្តកំពង់ស្ពឺ ដែលជាមណ្ឌលទី2 បានរកឃើញម្ចាស់ជើងឯកហើយ ដោយបានទៅលើក្រុម ABA ( A) ក្រោយពីយកឈ្នះលើក្រុម Vitou MK ក្នុងលទ្ធផល 3-2។

មុនឈានមកដល់វគ្គផ្ដាច់ព្រ័ត្រនេះ ក្រុម ABA( A) បានយកឈ្នះលើក្រុម រដ្ឋាបាលស្រុកភ្នំស្រួច ដោយលទ្ធផល 8-4។ ចំណែកឯក្រុម Vitou MK បានយកឈ្នះលើក្រុម black Lion ក្នុងលទ្ធផល 4-1។ ជាហេតុធ្វើឲ្យក្រុមចាញ់ទាំងពីរ black Lion ត្រូវប្រកួតជាមួយក្រុម រដ្ឋាបាលស្រុកភ្នំស្រួច ដើម្បីស្វែងរក លេខ3 និង លេខ4។ ជាលទ្ធផល ក្រុម black Lion ដណ្តើមបានលេខ3 ក្រោយឈ្នះរដ្ឋាបាលស្រុកភ្នំស្រួច 4 ទល់និង 2។

សម្រាប់រង្វាន់ក្រុមជើងឯកប្រចាំមណ្ឌលខេត្តកំពង់ស្ពឺ ABA( A) ទទួលបានប្រាក់រង្វាន់ 1000ដុល្លារ ក្រុមជើងឯករង បានទៅលើក្រុម Vitou MK ប្រាក់រង្វាន់ 700ដុល្លារ ក្រុមចំណាត់ថ្នាក់លេខ3 បានទៅលើក្រុម black Lion ប្រាក់រង្វាន់ 350ដុល្លារក្រុមចំណាត់ថ្នាក់លេខ4 បានទៅលើ រដ្ឋាបាលស្រុកភ្នំស្រួច ប្រាក់រង្វាន់ 100ដុល្លារ និងស្រាបៀរថៃហ្គ័រ ។

ដោយឡែក សម្រាប់ខេត្តកំពង់ស្ពឺ ដែលជាមណ្ឌលទី2នេះ គណៈកម្មាធិការរៀបចំការប្រកួត យកតែ៣ក្រុមតែប៉ណ្ណោះ ដើម្បីឲ្យទៅចូលរួមការប្រកួតវគ្គផ្តាច់ព្រ័ត្រទូទាំងប្រទេស នៅរាជធានីភ្នំពេញ ថ្ងៃទី10 និងទី11 មីនា 2018 ខាងមុខនេះ។

ការប្រកួតជម្រុះក្នុងកម្មវិធី Tiger street Football Festival 2018 នឹងធ្វើឡើងនៅមណ្ឌលបន្ទាប់គឺ៖ ខេត្តបាត់ដំបង នៅថ្ងៃទី 3 – ទី 4 ខែកុម្ភៈឆ្នាំ 2018 នៅតារាងបាល់ទាត់វាលបែកចានទីរួមខេត្តបាត់ដំបង។

ដូច្នេះសូមកុំភ្លេចចូលរួមទស្សនាការប្រកួតជម្រុះនៅខេត្ត បាត់ដំបង ឲ្យបានច្រើនកុះករ។

ចំពោះសកម្មភាពផ្សេងៗនៃព្រឹត្តិការណ៍ Tiger street Football Festival 2018 នៅខេត្តកំពង់ស្ពឺ សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
#TSFF2018

សូមពិសាដោយការទទួលខុសត្រូវ

January 30, 2018

Author: វល័ក្ខ