វល័ក្ខ - La Reine Media

តារាឆ្នើម Sanchez របស់ Man United ទទួលយកកាត់ទោសសម្រាប់ការបន្លំការបង់ពន្ធ

ខ្សែប្រយុទ្ធ Alexis Sanchez របស់ក្លិប Manchester United បានឈានដល់ការព្រមព្រៀងគ្នាមួយជាមួយនឹងអាជ្ញាធររបស់អេស្ប៉ាញ ក្នុងការទទួលយកការកាត់ទោសឱ្យជាប់ពន្ធនាគាររយៈពេល 16ខែ ប៉ុន្តែត្រូវព្យួរទាំងអស់ សម្រាប់ការបន្លំការបង់ពន្ធ និងការគេចវេះពីសវនាការ។

Sanchez ដែលបានចូលរួមជាមួយនឹង Man United ដោយចេញពីក្លិប Arsenal កាលពីខែមុននោះ បានប្រឈមមុខនឹងការកាត់ទោសជុំវិញការបន្លំលើការបង់ពន្ធក្នុងទឹកប្រាក់ 98.3ម៉ឺនអឺរ៉ូ (ស្មើនឹង 1.21លានដុល្លារអាមេរិក) ទាក់ទងនឹងសិទ្ធិលក់រូបភាព អំឡុងពេលរូបគេលេងឱ្យក្លិប Barcelona។ នេះបើយោងតាមសេចក្តីលម្អិតនៃការព្រមព្រៀងគ្នានេះ។

មន្ត្រីរដ្ឋអាជ្ញាអេស្ប៉ាញ បានបញ្ជាក់ថា ខ្សែប្រយុទ្ធអន្តរជាតិស៊ីលីវ័យ 29ឆ្នាំរូបនេះ មិនបានធ្វើការប្រកាសពីដំណើរការផ្នែកច្បាប់របស់ខ្លួនទាក់ទងនឹងការលក់សិទ្ធប្រើប្រាស់រូបភាពរបស់គេ កាលពីឆ្នាំ2012 និងឆ្នាំ2013 ហើយក៏មិនបានប្រកាសផងដែរថា រូបគេជាម្ចាស់ក្រុមហ៊ុនមួយដែលត្រូវបានបង្កើតក្នុងប្រទេសម៉ាលតិ៍ ដែលមានឈ្មោះថា Numidia Trading Limited ដែលជាម្ចាស់កម្មសិទ្ធិលើរូបភាពទាំងនោះ។

នៅពេលបង្ហាញខ្លួនក្នុងរូបភាពវីដេអូមួយពីទីក្រុងឡុងដ៍ Sanchez បានទទួលស្គាល់ថា រូបគេបានធ្វើការបង់ពន្ធដែលមិនមានភាពត្រឹមត្រូវ ហើយថា រូបគេបានដោះស្រាយបញ្ហានេះ ជាមួយនឹងអាជ្ញាធរពន្ធរួចរាល់ហើយ។ កីឡាកររូបនេះ ត្រូវបានកាត់ទោសឱ្យជាប់គុក ដែលជាការព្យួរទោសចំនួន 8ខែ 2លើកជាប់ៗគ្នា បើទោះបីរដ្ឋអាជ្ញាបានបញ្ជាក់ថា ទោសនេះនឹងត្រូវលើកលែងវិញ ក្រោយរយៈពេល 2ឆ្នាំ ប្រសិនបើរូបគេមិនបានធ្វើខុសម្តងទៀតក៏ដោយ៕

ប្រភពពី៖ Metro

February 8, 2018

ទិវាជាតិសុខភាពមាត់-ធ្មេញឆ្នាំ2018 “ដំណើរឆ្ពោះទៅកាន់ភាពគ្មានរោគពុកធ្មេញ”

ភ្នំពេញ៖ ដើម្បីលើកកម្ពស់ប្រជាជនកម្ពុជាឱ្យកាន់តែមានចំណេះដឹងអំពី ការថែទាំសុខភាពមាត់ធ្មេញឱ្យកាន់តែប្រសើជាងមុន ក្រុមហ៊ុន ខលហ្គេត ប៉ាម៉ូលីវ (Colgate-Palmolive) និងគណទន្តពេទ្យកម្ពុជា បានរៀបចំកម្មវិធីទិវាជាតិសុខភាពមាត់-ធ្មេញ ឆ្នាំ2018 ក្រោមប្រធានបទ “ដំណើរឆ្ពោះទៅកាន់ភាពគ្មានរោគពុកធ្មេញ” ស្ថិតក្នុងទីរួមខេត្តបាត់ដំបង កាលពីព្រឹកថ្ងៃទី02 ខែកុម្ភៈ ឆ្នាំ2018។ យុទ្ធនាការឆ្នាំនេះ ចាប់ផ្តើមពីថ្ងៃទី 01 ដល់ថ្ងៃទី 28 ខែកុម្ភៈ ឆ្នាំ2018 គឺដើម្បីពិនិត្យ និងពិគ្រោះជំងឺមាត់ធ្មេញដោយឥតគិតថ្លៃជូនដល់ប្រជាពលរដ្ឋ ដោយទន្តពេទ្យជំនាញមកពីគណទន្តពេទ្យ កម្ពុជា។

ក្នុងនាមជាក្រុមហ៊ុនដែលឈានមុខគេក្នុងពិភពលោក ផ្នែកសុខភាពមាត់ធ្មេញ ក្រុមហ៊ុនខលហ្គេត តែងតែរៀបចំកម្មវិធីទិវាជាតិសុខភាពមាត់ធ្មេញជារៀងរាល់ឆ្នាំ ជាមួយបណ្តាប្រទេសជាង80 នៅក្នុងពិភព លោក ដែលមានការសហការណ៍ជាមួយសមាគមទន្តពេទ្យក្នុងតំបន់ប្រចាំប្រទេសនីមួយៗ ដើម្បីអប់រំប្រជា ជនទូរទៅឱ្យយល់កាន់តែច្បាស់ពីការថែទាំសុខភាពមាត់ធ្មេញ។ តាមរយៈទិវាជាតិសុខភាពមាត់ធ្មេញក្នុង ខែកុម្ភៈ ឆ្នាំ2018នេះ ក្រុមហ៊ុនខលហ្គេតប្តេជ្ញាថានឹងចូលរួមចំណែកក្នុងការប្រឆាំងភាពគ្មានរោគពុក ធ្មេញ ដល់ប្រជាជនកម្ពុជា ហើយយុទ្ធនាការនេះមានគោលបំណងបង្កើនការយល់ដឹងបន្ថែមទៅលើ សុខភាពមាត់ធ្មេញ និងសកម្មភាពប្រចាំថ្ងៃដែលជាកត្តាបង្ករជាផលប៉ះពាល់ដល់សុខភាពទូទៅរបស់ ប្រជាជនកម្ពុជា។ ការស្រាវជ្រាវបានបង្ហាញថាមាត់ធ្មេញមានសុខភាពល្អពិតជាមានសារៈសំខាន់ណាស់ ព្រោះវាអាចជួយឱ្យរាង្គកាយរបស់យើងមានសុខភាពល្អ, ដែលនេះជាមូលហេតុដ៏សំខាន់មួយសម្រាប់ មនុស្សគ្រប់រូបគួរតែមានការថែរក្សា និងទទួលការពិនិត្យមាត់ធ្មេញឱ្យបានទៀងទាត់និងត្រឹមត្រូវ។

សកម្មភាពសំខាន់នៃយុទ្ធនាការនេះ គឺដើម្បីជំរុញទឹកចិត្តប្រជាពលរដ្ឋកម្ពុជាឱ្យទទួលបាន ការពិនិត្យ និងពិគ្រោះជំងឺមាត់ធ្មេញដោយឥតគិតថ្លៃនៅតាមបណ្តាគ្លីនិកមួយចំនួន ដែលមានដូចជាការជួយ វិនិច្ឆ័យ រោគសញ្ញាក្នុងដំណាក់កាលដំបូង ការព្យាបាលដែលមានប្រសិទ្ធិភាព ការផ្តល់ប្រឹក្សាយោបល់ ដែលមាន ជំនាញវិជ្ជាជីវៈ និងការចែកផលិតផល សាកល្បងសម្រាប់ការថែទាំមាត់ធ្មេញនៅក្នុងគ្រួសារ។ ជាមួយហ្នឹង ការគាំទ្ររនិងសហការណ៍យ៉ាងខ្លាំងក្លា ពីគណទន្តពេទ្យកម្ពុជា ក្រុមហ៊ុនខលហ្គេតបាន រៀបចំកម្មវិធីទិវាជាតិសុខភាពមាត់ធ្មេញអស់ជាច្រើនឆ្នាំ និងប្រកបទៅភាពជោគជ័យដោយមានការចូលរួម និងគាំទ្ររពី ប្រជាជនកម្ពុជាយ៉ាងច្រើន។ ហើយឆ្នាំនេះ ក្រុមហ៊ុនខលហ្គេត នឹងបន្តសកម្មភាពនេះឱ្យកាន់ តែច្រើនជាងមុន ព្រោះបើរាប់មកដល់ពេលនេះមានគ្លីនិកជាង២៧៥កន្លែងក្នុងក្រុងភ្នំពេញ និងខេត្តធំៗមួយ ចំនួនរួចមកហើយ ដែលទទួលពិនិត្យនិងពិគ្រោះ ជំងឺមាត់ធ្មេញដោយឥតគិតថ្លៃជូនដល់ប្រជាពលរដ្ឋ កម្ពុជា។

ក្រុមហ៊ុនខលហ្គេត រីករាយនឹងចែករំលែកនូវចំណេះដឹងផ្នែកសុខភាពមាត់ធ្មេញ ការចែកផលិតផល សាកល្បង និងការលើកកំពស់អនាម័យមាត់ធ្មេញ។ យើងទាំងអស់គ្នា ចូលរួមកម្ចាត់ភាពគ្មានរោគពុកធ្មេញ ទៅកាន់ប្រជាជនកម្ពុជាទាំងអស់ ឱ្យមានស្នាមញញឹមស្រស់ស្រាយ និងមាត់ធ្មេញមានសុខភាពល្អ៕

February 7, 2018

ក្រុមហ៊ុន Hyundai កំពុងសាងសង់មជ្ឈមណ្ឌលចែកចាយផ្លែឈើស្រស់នៅកម្ពុជា

ក្រុមហ៊ុនកូរ៉េ Hyundai Corporation Holding Co. បានសម្រេចចិត្តសាងសង់មជ្ឈមណ្ឌលចែកចាយផលិតផលកសិកម្មទំនើបរបស់ខ្លួន ដោយផ្តោតសំខាន់លើផ្លែឈើស្រស់ដំបូងបំផុតនៅកម្ពុជា។

ការបង្កើតមជ្ឈមណ្ឌលចែកចាយដ៏ធំនេះ បង្កើតឡើងក្រោមកិច្ចសហការរវាងក្រុមហ៊ុន Mao Legacy Co. របស់កម្ពុជា និងក្រុមហ៊ុនកូរ៉េ Korea’s Seowon Distribution Co. ដែលនឹងធ្វើឡើងនៅក្នុងខេត្តកំពង់ស្ពឺ លើផ្ទៃដី 3ហិកតា ក្រោមទុនវិនិយោគប្រមាណ 10លានដុល្លារ ដែលនឹងបញ្ចប់ការសាងសង់នៅចុងខែកញ្ញា ឆ្នាំ2018 ខាងមុខនេះ។

នៅក្នុងគម្រោងនេះក្រុមហ៊ុនបានដាក់ពាក្យស្នើសុំអាជ្ញាប័ណ្ណនាំចេញទៅប្រទេសកូរ៉េ និងជាការគ្រោងទុកក្រុមហ៊ុនបានត្រៀមនាំចេញផ្លែស្វាយប្រមាណ 1,700តោនទៅប្រទេសកូរ៉េ នៅឆ្នាំដំបូង ហើយមានគម្រោងបង្កើនចំនួនបន្ថែមឡើងទៀតឱ្យកាន់តែច្រើននៅឆ្នាំបន្តបន្ទាប់។

ក្រុមហ៊ុន Hyundai បានចេញសេចក្តីប្រកាសជាផ្លូវការថា៖ «យើងនឹងបន្ថែមបន្លែ និងផ្លែឈើស្រស់មួយចំនួនទៀតដូចជា ក្រូចឆ្មារ ទុរេន ល្ហុង នៅក្នុងតារាងចែកចាយរបស់យើង ហើយគម្រោងនេះនឹងចែកចាយទៅកាន់ប្រទេសផ្សេងទៀតនៅក្នុងតំបន់ ASEAN»។

លោក ម៉ៅ គន្ធពិសី តំណាងក្រុមហ៊ុន Mao Legacy បានលើកឡើងថា ក្រុមហ៊ុនរបស់លោកនឹងជួយរាជរដ្ឋាភិបាលកម្ពុជាដើម្បីផ្តល់ឱកាសការងារជូនប្រជាពលរដ្ឋរាប់ពាន់នាក់ និងនាំចេញផលិតផលខ្មែរទៅកាន់ទីផ្សារអន្តរជាតិ។

លោក ម៉ៅ គន្ធពិសី បាននិយាយថា៖ «ជាគម្រោងទី2 នៅក្នុងការវិនិយោគនេះ គឺផ្តោតលើការសម្ងួត និងក្លាស្សេសម្រាប់រោងចក្រកែច្នៃអាហារ ដើម្បីផលិតតំណាប់ផ្លែឈើកំប៉ុង។ គម្រោងនេះនឹងចាប់ផ្តើមបន្ទាប់ពីគម្រោងទី1 ធ្វើរួចរាល់»។

លោកបានបញ្ជាក់ផងដែរថា ទីផ្សារផលិតផលផ្លែឈើស្រស់នេះ មិនមែនសម្រាប់តែក្នុងប្រទេសកូរ៉េនោះទេ តែក្រុមហ៊ុន Hyundai មានសាខាចំនួន 44 នៅទូទាំងពិភពលោក ដែលបណ្តាញដ៏រឹងមាំនេះនឹងអាចនាំចេញអាហារដែលមានគុណភាពខ្ពស់បានកាន់តែច្រើនពីប្រទេសកម្ពុជា។ ក្រៅពីប្រតិបត្តិការដំបូង ដែលនាំចេញផ្លែឈើប្រមាណ 1,700តោនហើយនោះ យើងនៅមានគោលដៅនាំចេញផ្លែឈើឱ្យបានរហូត 50,000តោន ទៅកាន់ទីផ្សារអន្តរជាតិនៅពេលបន្តបន្ទាប់។

បច្ចុប្បន្ននេះ ក្រុមហ៊ុន Hyundai បានដាំដំណាំស្វាយប្រមាណ 400ហិកតា ខណៈក្រុមហ៊ុន Legacy ក៏បានដាំដុះដំណាំស្វាយលើផ្ទៃដីចំនួន 2,000ហិកតាផងដែរនៅខេត្តកំពង់ស្ពឺដើម្បីនាំចេញ៕

February 7, 2018

ត្រឹមរយៈពេលជាង1ខែរដ្ឋប្រមូលពន្ធបានជាង 100លានដុល្លារ

យោងតាមរបាយការណ៍សរុបលទ្ធផលការងាររបស់អគ្គនាយកដ្ឋានពន្ធដារបានឱ្យដឹងថា លទ្ធផលប្រមូលចំណូលពន្ធទទួលបានគួរជាទីមោទនៈដែលក្នុងខែធ្នូ ឆ្នាំ2017កន្លងទៅ ការប្រមូលចំណូលពន្ធ-អាករគ្រប់ប្រភេទមានចំនួនប្រមាណជា 444.30 ពាន់លានរៀល ស្មើនឹង 111.08លានដុល្លារអាមេរិក។

ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានពន្ធដារមានប្រសាសន៍ថា សម្រាប់រយៈពេលពេញមួយឆ្នាំ2017 ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបាន សរុបចំនួន 7,754.41ពាន់លានរៀល ឬប្រមាណជា1,938.71លានដុល្លារអាមេរិក ស្មើនឹង 113%នៃផែនការ។

ឯកឧត្តមបញ្ជាក់ថា ប្រសិនបើធៀបនឹងឆ្នាំ2016 ឃើញថា ការប្រមូលចំណូលពន្ធ-អាករគ្រប់ប្រភេទនៅឆ្នាំ2017 មានការកើនឡើងចំនួន 1,676.36ពាន់លានរៀល ឬប្រមាណជា 419.09លានដុល្លារដែលស្មើនឹង 27.89%។

ក្នុងឆ្នាំ2017កន្លងទៅ លទ្ធផលដែលសម្រេចបានគួរឱ្យកត់សម្គាល់នោះគឺ ការចូលរួមចំណែកដ៍សំខាន់នៃកំណើនចំណូលសំខាន់ៗ ធៀបនឹងការអនុវត្តនៅឆ្នាំ2016 ដែលក្នុងនោះរួមមានកំណើនប្រាក់ពន្ធលើប្រាក់ចំណូល 31.8% កំណើនអាករលើតម្លៃបន្ថែមមានចំនួន 31.05% កំណើនអាករពិសេស 17.9% និងកំណើនពន្ធលើប្រាក់បៀវត្សរ៍ចំនួន 10.5% ខណៈដែលពិតាននៃពន្ធលើប្រាក់បៀវត្សរ៍ត្រូវបានដំឡើង៕

February 7, 2018

មហោស្រព STEM ឆ្នាំនេះនឹងនាំសិស្ស-និស្សិតកម្ពុជាឱ្យស្គាល់ពិភពវិទ្យាសាស្ត្រកាន់តែច្រើន

ជារៀងរាល់ឆ្នាំមហោស្រព វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ត្រូវបានប្រារព្ធធ្វើឡើងដោយមានកិច្ចគាំទ្រពីក្រសួងអប់រំ យុវជន និងកីឡា និងស្ថាប័នឯកជនជាច្រើនផ្សេងទៀតដែលកំពុងចង់ជំរុញប្រជាជនកម្ពុជាឱ្យជ្រើសរើសជំនាញ STEM នេះសម្រាប់ធ្វើជាអាជីពនៅថ្ងៃអនាគត។

នៅឆ្នាំនេះ មហោស្រពវិទ្យាសាស្ត្រ និងវិស្វកម្មកម្ពុជា លើកទី4 នឹងប្រព្រឹត្តទៅនៅពហុកីឡដ្ឋានជាតិអូឡាំពិក ដោយចាប់ផ្តើមពីថ្ងៃទី1 ដល់ថ្ងៃទី3 ខែមិនា ឆ្នាំ2018 ក្នុងគោលបំណងជំរុញសិស្សានុសិស្ស យុវជន សាធារណជន អ្នកអប់រំ និងស្ថាប័នអប់រំទាំងអស់ឱ្យចាប់អារម្មណ៍កាន់តែខ្លាំងលើការអប់រំ ការបណ្តុះបណ្តាលការងារ អាជីពវិជ្ជាជីវៈ ការប្រកួតប្រជែង ការស្រាវជ្រាវ និងការរកឃើញថ្មីៗ (នវានុវត្តន៍) លើមុខជំនាញដែលទាក់ទងនឹងវិស្វកម្ម បច្ចេកវិទ្យា និងគណិតវិទ្យា។ មុខវិជ្ជាទាំងអស់នេះ ជាផ្នែកមួយយ៉ាងសំខាន់ ឬជាចំណែកមិនអាចខ្វះបានក្នុងការអភិវឌ្ឍសេដ្ឋកិច្ច តាមរយៈឧស្សាហកម្ម កសិ-ឧស្សាហកម្ម សេវាកម្ម និងពាណិជ្ជកម្មនៅកម្ពុជា។

នៅក្នុងមហាស្រព STEM នៅថ្ងៃនោះ នឹងមានសកម្មភាពសំខាន់ៗមួយចំនួន ដូចជាការតាំងពិព័រណ៍ផលិតផលវិទ្យាសាស្ត្រ ការប្រកួតរ៉ូបូតថ្នាក់ជាតិលើកទី1 នៅកម្ពុជា ការបង្ហាញគម្រោង STEM ដែលផ្តល់ឱកាសសម្រាប់ពិសោធដោយផ្ទាល់សម្រាប់អ្នកចូលរួមសិក្ខាសាលា និងវេទិកា STEM ការប្រកួតជើងឯក STEM ការប្រកួតគណិតវិទ្យា ដោយប្រើបច្ចេកវិទ្យា និងការប្រគុំតន្ត្រីខ្នាតធំ “STEM ដើម្បីអនាគតខ្ញុំ” ជាដើម។ល៕

February 7, 2018

រក្សាទុកថ្នាំពេទ្យនៅក្នុងទូទឹកកកមានគ្រោះថ្នាក់ដែរឬទេ?

ឡារ៉ែន គិតថា ប្រហែលវាជាគំនិតរបស់មនុស្សជាច្រើនដែលគិតថា ចង់យកស្អីទៅដាក់ក្នុងទូទឹកកកក៏បានដែរ វានឹងធ្វើឱ្យរបស់ទាំងអស់នោះក្រផុតកំណត់ ព្រោះភាពត្រជាក់ក្នុងទូទឹកកកនឹងជួយថ្នមវត្ថុអស់ទាំងនោះឱ្យនៅបានយូរឡើង ដែលថាៗទៅ សម្រាប់វត្ថុជាច្រើនអាចនឹងត្រឹមត្រូវ តែបើសិនជារឿងរបស់ “ថ្នាំពេទ្យ” វិញ តើវានឹងពិតដូចដែលគេនាំគ្នាជឿហ្នឹងឬយ៉ាងណា? ខាងក្រោមនេះគឺជាចម្លើយ…។

រក្សាទុកថ្នាំពេទ្យនៅក្នុងទូទឹកកកគឺជារឿងពិតមួយដែលអាចនិយាយបាន ធាតុអាកាសក្ដៅហប់អាចនឹងធ្វើឱ្យថ្នាំចុះខ្សោយប្រសិទ្ធភាពលឿនជាងប្រក្រតី តែក៏មិនបានមានន័យថា ការរក្សាទុកថ្នាំពេទ្យនៅក្នុងទូទឹកកកនឹងជួយបន្តអាយុរបស់ថ្នាំឱ្យទុកប្រើប្រាស់បានយូរឡើងដែរ ព្រោះក្រៅពីរក្សាទុកថ្នាំក្នុងកន្លែងដែលមានធាតុអាកាសត្រជាក់ខ្លាំងជ្រុលពេក អាចនឹងធ្វើឱ្យថ្នាំចុះខ្សោយប្រសិទ្ធភាពបានដូចគ្នាហើយនោះ នៅធ្វើឱ្យថ្នាំកើតសារធាតុពុលកើនឡើងបានទៀតផង ព្រោះនៅក្នុងទូទឹកកកក៏មានភាពសើមអាប់ខ្ពស់ដូចគ្នាដែរ ហើយភាពសើមអាប់នេះឯងដែលធ្វើឱ្យថ្នាំបាត់បង់ប្រសិទ្ធភាព។

លើកឧទាហរណ៍ដូចជា ថ្នាំអាស្ពីរីន នៅពេលប៉ះនឹងភាពសើមអាប់នៅក្នុងទូទឹកកកយូរៗទៅ អាចរលាយខ្លួនក្លាយជាអាស៊ីតសាលីស៊ីលិកនិងអាស៊ីត អាសេទិក ដែលនឹងធ្វើឱ្យថ្នាំលែងមានប្រសិទ្ធភាព រួមទាំងធ្វើឱ្យកើតមានជាតិពុលធ្វើឱ្យរាងកាយខ្វះអុកស៊ីែហ្ស៊ន ទៅជាប្រកាច់ និងបាត់បង់សតិស្មារតីបានទៀតផងបើរាងកាយទទួលក្នុងបរិមាណច្រើន។

ការរក្សាទុកដាក់ថ្នាំពេទ្យយ៉ាងត្រឹមត្រូវ

រក្សាទុកនៅក្នុងកន្លែងដែលមានខ្យល់អាកាសបក់ចេញចូលបានស្រួល មិនក្ដៅ មិនអាប់សើមជ្រុលពេក និងគ្មានពន្លឺថ្ងៃចាំងចូលដល់។
រៀបចំទុកដាក់តាមប្រភេទថ្នាំនីមួយៗរួមគ្នា និងអាចបែងចែកតាមប្រភេទរបស់ថ្នាំ ដូចជា ថ្នាំទឹក ឬថ្នាំគ្រាប់ ថ្នាំសម្រាប់លាបលើស្បែក ឬថ្នាំសម្រាប់លេបព្យាបាលក្នុងខ្លួន(ថ្នាំផ្សះ) ឬអាចបែងចែកតាមក្រុមថ្នាំដែលព្យាបាលអាការដូចគ្នា ដូចជា ថ្នាំបំបាត់ការឈឺចាប់(ឈឺក្បាល ឈឺពោះ ឈឺធ្មេញ) និងថ្នាំព្យាបាលរបួស ឬដំបៅជាដើម។

នៅពេលបានថ្នាំមក គួរពិនិត្យមើលថ្ងៃផុតកំណត់ ឬបើមិនដឹងទេ គួរសរសេរលើក្រដាសបិទលើដប ឬកញ្ចប់ថ្នាំនោះថា បានមកនៅថ្ងៃណា ហើយរកមើលព័ត៌មានថា ថ្នាំប្រភេទនោះអាចរក្សាទុកបានយូរប៉ុនណា (ភាគច្រើនបើឃើញមានតែថ្ងៃផលិត ចូររាប់ចាប់ពីថ្ងៃផលិតមក3ឆ្នាំទៀត នោះគឺថ្ងៃផុតកំណត់ហើយ តែទាំងអស់នេះអាស្រ័យលើប្រភេទរបស់ថ្នាំដែរ)។
រៀបចំការប្រើថ្នាំតាមលំដាប់ ពីថ្នាំដែលជិតផុតកំណត់មុនជានិច្ច។
នៅក្នុងទូថ្នាំ ឬប្រអប់ទុកដាក់ថ្នាំ គួរសរសេរបិទប្រាប់ពីប្រភេទថ្នាំឱ្យបានច្បាស់លាស់ ដើម្បីងាយក្នុងការចាប់យកមកប្រើ។
ថ្នាំដែលជាបន្ទះ មិនគួរកាត់ចេញមកជាគ្រាប់ ឬឆ្កឹះចេញពីបន្ទះនោះទេ គួររក្សាទុកទាំងបន្ទះ ដើម្បីទុកមើលថ្ងៃផុតកំណត់នៅលើបន្ទះនោះ។
បើថ្នាំនៅមិនទាន់ផុតថ្ងៃកំណត់ តែសង្កេតឃើញមានភាពខុសប្រក្រតីណាមួយដែលខុសប្លែកពីមុន ដូចជា ប្រែពណ៌ រូបរាងខុសពីមុន មានក្លិន និងរសជាតិប្លែកជាដើម-ល- មិនគួររក្សាទុកថ្នាំនោះទៀតទេ។

យ៉ាងណាក៏ដោយ ថ្នាំនីមួយៗអាចនឹងមានវិធីរក្សាទុកដាក់ខុសប្លែកពីគ្នា ដូច្នេះគួររកមើលវិធីថែរក្សាទុកថ្នាំនីមួយៗនោះនៅលើស្លាករបស់ផលិតផល ឬបើជាថ្នាំដែលគ្រូពេទ្យផ្សំមកឱ្យជាឈុតៗនោះ គួរតែទទួលទានតាមវេជ្ជបញ្ជាឱ្យអស់ កុំឈប់កណ្ដាលទីដែលនាំឱ្យថ្នាំនៅសល់ហើយគិតរក្សាថ្នាំនោះទុកដើម្បីលេបនៅពេលឈឺលើកក្រោយទៀតឱ្យសោះ ព្រោះក្រៅពីថ្នាំនោះអាចនឹងចុះខ្សោយប្រសិទ្ធភាពហើយនោះ នៅធ្វើឱ្យរាងកាយយើងឌឺថ្នាំ ដោយសារតែលេបមិនគ្រប់ចំនួនតាមគ្រូពេទ្យណែនាំទៀតផង៕

February 7, 2018

កញ្ញា ប៊ូ ច័ន្ទដាណែត តារាឯកស្រីក្នុងរឿង “ទឹកភ្នែកកក” កំពុងទាក់ទាញចំណាប់អារម្មណ៍ពីមហាជន

តាមរយៈខ្សែភាពយន្តភាគបែបមនោសញ្ចេតនារឿង “ទឹកភ្នែកកក” ដែលបានចាក់ផ្សាយនៅលើកញ្ចក់ទូរទស្សន៍បាយ័នកាលពីពេលកន្លងទៅនោះ តារាសម្ដែងជំនាន់ថ្មីវ័យក្មេងដែលមានឱកាសបានគ្រងតំណែងជាតារាឯកស្រីតាំងពីមានបទពិសោធលើកដំបូងក្នុងការសម្ដែងរបស់ខ្លួន កញ្ញា ប៊ូ ច័ន្ទដាណែត បាននិងកំពុងតែទទួលបានការចាប់អារម្មណ៍យ៉ាងខ្លាំងពីសំណាក់អ្នកទស្សនា ក៏ដូចជាអ្នកដឹកនាំសម្ដែងផងដែរ ខណៈដែលពេលបច្ចុប្បន្ននេះ មានការងារសម្ដែងជាច្រើនកំពុងតែសម្រុកធ្លាក់មកក្នុងរង្វង់ដៃរបស់នាងជាបន្តបន្ទាប់។

បើគិតមកដល់ដើមឆ្នាំ2018នេះ កញ្ញា ប៊ូច័ន្ទដាណែត ទើបតែមានអាយុត្រឹម 22ឆ្នាំតែប៉ុណ្ណោះ ហើយបើគិតពីបទពិសោធនៃការសម្ដែងក៏ដូចជាការងារជាតារាបង្ហាញម៉ូដវិញរឹតតែតិចតួចស្ដួចស្ដើងបំផុត ប៉ុន្តែបើគេក្រឡេកមកមើលពីទីផ្សារការងារនៅក្នុងអាជីពជាអ្នកសិល្បៈរបស់នាងវិញ គឺមានមិនចាញ់តារាសម្ដែងស្រីជំនាន់មុនៗនោះឡើយ។ ជាក់ស្ដែងបន្ទាប់ពីបានបង្ហាញវត្តមានជាលើកដំបូងនៅក្នុងវិស័យសម្ដែងតាមរយៈខ្សែភាពយន្តរឿងភាគខ្មែរបែបមនោសញ្ចេតនា ដែលចាក់បញ្ចាំងនៅលើកញ្ចក់ទូរទស្សន៍បាយ័នកាលពីពេលកន្លងទៅក្នុងរឿង “ទឹកភ្នែកកក” ក្នុងនាមជាតួឯកស្រីវ័យក្មេង ដែលត្រូវសម្ដែងជាមួយនឹងឈុតឆាកកម្សត់ៗសម្រក់ទឹកភ្នែកតាំងពីភាគដំបូងរហូតដល់ភាគបញ្ចប់នោះ ដាណែតបានទាក់ទាញនូវចំណាប់អារម្មណ៍របស់អ្នកទស្សនាជាខ្លាំង ហើយវាក៏ជាចំណុចពិសេសដែលជួយបង្កើននូវប្រជាប្រិយភាពរបស់នាងផងដែរ។

តារាសម្ដែងស្រីរូបនេះបានបង្ហើបប្រាប់ឱ្យដឹងយ៉ាងដូច្នេះថា “ចំពោះវិស័យសិល្បៈ ខ្ញុំទើបតែចូលប្រឡូកបានត្រឹមជាង1ឆ្នាំប៉ុណ្ណោះ ហើយរឿងដំបូងដែលខ្ញុំសម្ដែងគឺរឿងទឹកភ្នែកកក ហើយបានតំណែងជាតួឯកស្រីទៀត។ កញ្ញាបានបន្តទៀតថា “នៅក្នុងសាច់រឿងមួយហ្នឹង ខ្ញុំដូចជាមានទំនុកចិត្តលើខ្លួនឯង ព្រោះពេលសម្ដែងដូចមានអារម្មណ៍ងាយៗមិនពិបាក ជាពិសេសសូម្បីតែឈុតកម្សត់ៗដែលត្រូវយំឱ្យត្រូវនឹងសាច់រឿងគឺខ្ញុំអាចធ្វើបានទាំងអស់។ តាមការពិតទៅ បើតាមចំណូលចិត្ត និងចរិតពីធម្មជាតិរបស់ខ្ញុំ គឺខ្ញុំមាននិស្ស័យលេងសើចច្រើន ចូលចិត្តសប្បាយៗរួសរាយ និងក្រមិចក្រមើមច្រើនជាង ប៉ុន្តែពេលមកសម្ដែងជាតួបែបស្រគត់ស្រគំខ្ញុំនៅតែអាចធ្វើបាន។

កញ្ញា ច័ន្ទដាណែត បានបញ្ជាក់ថា “តាមរយៈរឿងទឹកភ្នែកកកនេះ បានលើកស្ទួយកេរ្តិ៍ឈ្មោះរបស់ខ្ញុំឱ្យបងប្អូនទស្សនិកជនស្គាល់ខ្ញុំបានច្រើនមែនទែន ព្រោះបន្ទាប់ពីរឿងមួយនេះបានចាក់បញ្ចាំងភ្លាម មានក្រុមហ៊ុនមួយចំនួនទាក់ទងមកខ្ញុំឱ្យថតផ្សព្វផ្សាយផលិតផលពាណិជ្ជកម្មជាហូរហែ ខណៈដែលសាច់រឿងភាគថ្មីក៏កំពុងសម្រុកថតបញ្ចប់ផងដែរនោះ។ សម្រាប់រឿងថ្មីដែលត្រៀមនឹងចាក់បញ្ចាំងនៅលើកញ្ចក់ទូរទស្សន៍បាយ័នក្នុងពេលដ៏ខ្លីឆាប់ៗខាងមុខនេះ គឺរឿង “ម្កុដកូនក្រមុំ” ដែលជាប្រភេទរឿងបែបកំប្លែង សប្បាយៗ មានឈុតឆាកនិយាយកាច់កុង និងលេងសើចច្រើន ហើយក្នុងនោះនាងខ្ញុំទទួលបានតំណែងជាតួឯកដដែល ហើយខ្ញុំជឿជាក់ថា សម្រាប់រឿងភាគថ្មីនេះ នឹងទទួលបានការគាំទ្រកាន់តែច្រើនពីសំណាក់បងប្អូនទូទៅ ជាពិសេសពីសំណាក់មិត្តយុវវ័យតែម្ដង ព្រោះវាជាប្រភេទរឿងបែបកំប្លែង។

ជាមួយនឹងការទទួលបានចំណែកទីផ្សារសម្ដែងច្រើននាពេលនេះ កញ្ញា ប៊ូ ច័ន្ទដាណែត ក៏បានប្រាប់ពីផលវិបាកក្នុងការបែងចែកពេលវេលា រវាងការសម្ដែង ការបង្ហាញម៉ូដ ជាមួយនឹងការសិក្សាផងដែរថា “វាហាក់លំបាកបន្តិចព្រោះឆ្នាំនេះជាឆ្នាំទី3 ដែលខ្ញុំត្រូវចំណាយពេលច្រើនជាមួយការរៀនត្រៀមបញ្ចប់ថ្នាក់បរិញ្ញាបត្រ ជំនាញផ្នែកទីផ្សារនៅសាកលវិទ្យាល័យ វេស្ទឺន ហើយត្រូវចំណាយពេលចេញថត ចេញដើរម៉ូដច្រើនទៀត ជាពិសេស គឺការងារថតម៉ូដសម្លៀកបំពាក់តែម្ដង ដែលខ្ញុំត្រូវថតជាប្រចាំឱ្យសម្លៀកបំពាក់ម៉ាក lookswomen ដែលជាប្រេ៊នសម្លៀកបំពាក់ល្បីនាំចូលផ្តាច់មុខពីប្រទេសហុងកុង មានដូចជា សម្លៀកបំពាក់ឈុតផ្កា ឈុតម៉ូដ ខោអាវម៉ូដ រ៉ូប និងលីអូ ដែលមានគុណភាពខ្ពស់ ងាយស្រួលស្លៀក និងអាចបត់បែនបានគ្រប់សកម្មភាព។ បើខ្ញុំមិនទទួលការងារសិល្បៈទាំងអស់នោះទេ ខ្លាចបាត់បង់ឱកាស បាត់បង់ទីផ្សារ ព្រោះគ្រាន់តែជាតារាជំនាន់ថ្មី គឺថ្មីមែនទែន ទើបតែមួយឆ្នាំប៉ុណ្ណោះ ដូច្នេះវាហាក់មានផលលំបាកបន្តិចដែរ។ ប៉ុន្តែខ្ញុំជឿថា បន្ទាប់ពីខ្ញុំបញ្ចប់ថ្នាក់បរិញ្ញាបត្រនៅត្រឹមឆ្នាំក្រោយនេះខ្ញុំនឹងពង្រឹងការងារផ្នែកសិល្បៈនេះឱ្យកាន់តែខ្លាំងឡើង។

គួរបញ្ជាក់ផងដែរថា កញ្ញា ប៊ូ ច័ន្ទដាណែត មានស្រុកកំណើតនៅក្នុងរាជធានីភ្នំពេញ មានបងប្អូនចំនួន2នាក់ ប្រុសម្នាក់ ដោយកញ្ញាគឺជាកូនស្រីច្បងនៅក្នុងគ្រួសារ។ សម្រាប់គោលបំណង ក្រៅពីប្រាថ្នាក្លាយជាតារាសម្ដែង និងបង្ហាញម៉ូដដ៏ល្បីឈ្មោះ ច័ន្ទដាណែត ក៏មានបំណងបង្កើតមុខជំនួញផ្ទាល់ខ្លួនមួយផងដែរ សម្រាប់ជាចំណូលទៅថ្ងៃអនាគត៕

February 7, 2018

ក្រុម PCO បានឈ្នះជើងឯកបាល់ទាត់ Tiger Street Football Festival 2018 នៅខេត្តបាត់ដំបង

បាត់ដំបង៖ ការប្រកួតបាល់ទាត់ពានរង្វាន់នៃក្របខ័ណ្ឌ Tiger Street Football Festival 2018 ប្រចាំមណ្ឌលបាត់ដំបងបានបញ្ចប់ដោយជោគជ័យ ដោយក្រុម PCO បានទទួលចំណាត់ថ្នាក់លេខ។ មណ្ឌលបាត់ដំបងនេះមានការប្រែប្រួលខ្លាំងសម្រាប់ក្រុមឡើងទៅភ្នំពេញបើប្រៀបធៀបនឹងលទ្ធផលកាលពីឆ្នាំ២០១។

ក្នុងការប្រកួតវគ្គផ្តាច់ព្រ័ត្រ ក្រុម FC Crown A បានយកឈ្នះក្រុម Chengdu FC 2-1 ហើយក្រុម Forest FC បានឈ្នះ ក្រុម Norea លទ្ធផល 1-0 ។ ក្រុម FCO ទទួលបានជ័យជម្នះលើក្រុម FC Zone FC ដោយលទ្ធផល 1-0 ខណៈដែលក្រុមយុវជនទួលតាយខបបានផ្តួលក្រុម Mario FC ដោយលទ្ធផល 4-0 ។

ក្រុម FC ភ្នំពេញក្រោនបានផ្តួលក្រុម Forest FC ក្នុងលទ្ធផល 3-0 ដើម្បីឡើងទៅវគ្គផ្តាច់ព្រ័ត្រខណៈការប្រកួតនៅវគ្គផ្តាច់ព្រ័ត្រ។ ក្រុម PCO ក៏បានឈានដល់វគ្គផ្តាច់ព្រ័ត្រផងដែរបន្ទាប់ពីឈ្នះក្រុមដែលមានបទពិសោធន៍ច្រើន Fox Zone FC ដោយលទ្ធផល 1- 0 ។

នៅក្នុងវគ្គផ្តាច់ព្រ័ត្រក្រុមខ្លាំង FC Crown A បានបរាជ័យក្នុងលទ្ធផល 1-0 ដើម្បីទទួលបានចំណាត់ថ្នាក់លេខ 2 ។ ចំណែកឯកីឡាការិនី Toul Taep B តាមរយៈការទទួលជ័យជម្នះលើក្រុម Forest FC ដោយលទ្ធផល 5-1 ។

ចំពោះក្រុមជ័យលាភី ក្រុមជើងឯក PCO ទទួលបាន ១៥០០ដុល្លារអាមេរិក
ក្រុមជើងឯករង FC Crown A ទទួលបាន ១០០០ដុល្លារអាមេរិក
ក្រុមលេខ៣ យុវជនទួលតាឯក B ទទួលបាន ៥០០ដុល្លារអាមេរិក
ក្រុមលេខ៤ Forest FC ទទួលបាន ២០០ដុល្លារអាមេរិក
ក្រុមលេខ៥៖ Norea Team និង ក្រុមលេខ៦៖ Fox Zone FC។

ការប្រកួតជម្រុះក្នុងកម្មវិធី Tiger street Football Festival 2018 នឹងធ្វើឡើងនៅមណ្ឌលបន្ទាប់គឺ៖ ខេត្តសៀមរាប ចាប់ពីថ្ងៃទី ៩ ដល់ថ្ងៃទី ១១ ខែកុម្ភៈ ឆ្នាំ ២០១៨ នៅទីលានអង្គរឃ្យុងយូ ទីរួមខេត្តសៀមរាប ដូច្នេះសូមកុំភ្លេចចូលរួមទស្សនាការប្រកួតជម្រុះនៅខេត្តសៀមរាបឲ្យបានច្រើនកុះករ។

ចំពោះសកម្មភាពផ្សេងៗនៃព្រឹត្តិការណ៍ Tiger street Football Festival 2018 នៅខេត្តបាត់ដំបងសូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
#TSFF2018

សូមពិសាដោយការទទួលខុសត្រូវ

February 7, 2018

អតីតតារាឆ្នើមៗរបស់ Man Utd រួមរំឭកខួបទី 60 នៃគ្រោះថ្នាក់យន្តហោះនៅទីក្រុង Munich

ទាំងអតីត និងតារាឆ្នើមៗនាពេលបច្ចុប្បន្នរបស់ក្លិប Manchester United បានសម្តែងនូវការកាន់ទុក្ខដល់ជនរងគ្រោះដែលបានស្លាប់កាលពី 60ឆ្នាំមុន កាលពីថ្ងៃអង្គារ ដោយសារតែគ្រោះថ្នាក់ផ្ទុះយន្តហោះនៅអាកាសយានដ្ឋាននៃទីក្រុង Munich។

យន្តហោះដែលផ្ទុះឆេះនៅប្រទេសអាល្លឺម៉ង់កាលនោះ បានសម្លាប់មនុស្សចំនួន 23នាក់ ក្នុងនោះរាប់បញ្ចូលទាំងកីឡាករ 8នាក់ និងសមាជិក 3នាក់ផ្សេងទៀតរបស់ក្លិបផងដែរ។ វាត្រូវបានគេចាត់ទុកថា ជាថ្ងៃដ៏ខ្មៅងងឹតបំផុតក្នុងពិភពកីឡាបាល់ទាត់របស់អង់គ្លេស ខណៈដែលសមាជិកស្នូលរបស់ក្រុមយុវជនដ៏ឆ្នើមបំផុតក្នុងប្រវត្តិសាស្ត្ររបស់ក្លិបបានស្លាប់បាត់បង់ជីវិត លាចាកពីអ្នកគាំទ្រ ក្រុមគ្រួសារ និងកីឡាបាល់ទាត់ពិភពលោក។ អ្នកគាំទ្រប្រមាណជា 1,000នាក់ បានធ្វើដំណើរទៅកាន់អាកាសយានដ្ឋាន Manchesterplatz ក្នុងទីក្រុង Munich ដើម្បីធ្វើការស្មឹងស្មាធិ៍ដ៏គួរឲ្យរំជួលចិត្តមួយ នៅមុនពេលការរៀបចំពិធីមួយនៅកីឡដ្ឋាន Old Trafford ដែលបានដឹកនាំដោយប្រធានសមាជិកក្លិបលោក Rev John Boyers។

លោក Alex Ferguson និងលោក Michael Edelson ក៏មានវត្តមានក្នុងកម្មវិធីក្នុងទីក្រុង Manchester នោះផងដែរ ខណៈដែលអ្នកគាំទ្រចំនួន 4,500នាក់ ក៏បានចូលរួមជាមួយពួកគាត់ផងដែរ៕

ប្រភពពី៖ The Sun

February 7, 2018

Di Maria រកបាន 3គ្រាប់ ខណៈ Marseille រកបានដល់ទៅ 9គ្រាប់

ខ្សែបម្រើអន្តរជាតិអាហ្សង់ទីន Angel Di Maria បានស៊ុតបាល់បញ្ចូលទី 3គ្រាប់ ខណៈដែលក្រុមម្ចាស់ការពារតំណែងជើងឯក Paris Saint-Germain បានផ្តួលក្រុមស្ថិតក្នុងក្របខ័ណ្ឌលំដាប់ទី2 Sochaux ក្នុងលទ្ធផល 4-1 កាលពីថ្ងៃអង្គារ ដើម្បីឈានទៅវគ្គ 8ក្រុមក្រោយនៃពាន French Cup។

ស្របពេលជាមួយគ្នានេះ ក្រុម Marseille បានផ្តួលក្រុមស្ថិតក្នុងក្របខ័ណ្ឌ Ligue 2 មួយផ្សេងទៀតគឺ Bourg-en-Bresse យ៉ាងចាស់ដៃក្នុងលទ្ធផល 9-។ ខ្សែបម្រើស្លាប Di Maria បានជួយឱ្យ PSG ដែលលេងដោយគ្មានខ្សែប្រយុទ្ធឆ្នើម Neymar មានគ្រាប់បាល់នាំមុខមុននៅនាទីទី1 នាកីឡដ្ឋាន Stade Bonal នៅភាគកើតនៃប្រទេសបារាំង ប៉ុន្តែ អតីតម្ចាស់ជើងឯក 2សម័យកាល Sochaux បានតាមស្មើវិញតាមរយៈកីឡាករ Florian Martin មុនឈានដល់នាទីទី15។

ខ្សែប្រយុទ្ធអន្តរជាតិអ៊ុយរូហ្គាយ Edinson Cavani បានរក្សាការនាំមុខរបស់ក្រុមលោក Unai Emery នៅនាទីទី27 នៅពេលដែលរូបគេបានទទួលបាល់ពីការបញ្ជូនឱ្យរបស់កីឡាករ Layvin Kurzawa មុននឹងស៊ុតបាល់បំប៉ោងសំណាញ់ទីយ៉ាងល្អ។

Di Maria បានបន្ថែមគ្រាប់បាល់ទី3 មុនពេលឈានដល់នាទីទី60 តាមរយៈការស៊ុតបាល់បញ្ចូលទីយ៉ាងល្អ ហើយរូបគេបានបណ្តើរបាល់ទម្លុះតំបន់ការពាររបស់ក្រុមម្ចាស់ផ្ទះ ក្រោយពីការបញ្ជូនបាល់ឱ្យពីសំណាក់ខ្សែបម្រើអ៊ីតាលី Marco Verratti។ កីឡាកររូបនេះបានបំពេញការរកគ្រាប់បាល់ទី3 របស់គេ ក្នុងរយៈពេល 3នាទីក្រោយមក តាមរយៈការបង្ខំឱ្យបាល់ផ្លាតចូលទី ក្រោយពីអ្នកចាំទី Lawrence Ati Zigi របស់ក្រុម Sochaux បានសង្គ្រោះបាល់ពីការស៊ុតយ៉ាងខ្លាំងរបស់ Cavani រួចមក៕

ប្រភពពី៖ Worldsoccertalk

February 7, 2018

Author: វល័ក្ខ