វល័ក្ខ - La Reine Media

កម្ពុជានឹងលែងពឹងផ្អែកលើកំពង់ផែ Laem Chabang របស់ថៃ

រដ្ឋាភិបាលនឹងទម្លាក់ចោលការរំពឹងទុកលើការនាំចេញផលិតផលរបស់កម្ពុជាទៅកាន់ទីផ្សារអន្តរជាតិ ដោយប្រើប្រាស់ច្រកកំពង់ផែ Laem Chabang របស់ប្រទេសថៃ ដោយគ្រោងនឹងស្ថាបនាផ្លូវដឹកជញ្ជូនផ្ទាល់ខ្លួនមួយខ្សែពីខេត្តបាត់ដំបងឆ្ពោះទៅកាន់ខេត្តកោះកុង ជាទីដែលកម្ពុជានឹងស្ថាបនាកំពង់ផែអន្តរជាតិមួយដើម្បីនាំទំនិញចេញទៅកាន់ទីផ្សារអន្តរជាតិ។

កន្លងមកផ្នែកឯកជន ជាពិសេសអ្នកប្រកបអាជីវកម្មក្នុងវិស័យស្រូវអង្ករធ្លាប់បានស្នើឱ្យរដ្ឋាភិបាលចរចាជាមួយភាគីថៃ ដើម្បីដឹកជញ្ជូនកសិផលកម្ពុជាដែលមានអង្ករជាដើមទៅកាន់ប្រទេសទី3 ឆ្លងកាត់តាមច្រកកំពង់ផែ Laem Chabang ដែលស្ថិតនៅជិតទីក្រុងបាងកក។

អ្នកប្រកបកិច្ចការធុរកិច្ចកម្ពុជាធ្លាប់បានលើកឡើងថា ការដឹកជញ្ជូនផលិតផល និងទំនិញកសិផលរបស់កម្ពុជាពីខេត្តនៅភាគពាយព្យទៅកាន់កំពង់ផែខេត្តព្រះសីហនុដោយឆ្លងកាត់ក្រុងភ្នំពេញនឹងធ្វើឱ្យទំនិញរបស់កម្ពុជាកាន់តែឡើងថ្លៃខ្ពស់ដោយសារតែត្រូវដឹកជញ្ជូនផ្លូវឆ្ងាយ ប៉ុន្តែក្នុងករណីបើកម្ពុជាអាចចរចាជាមួយភាគីថៃសម្រាប់ដឹកទំនិញឆ្លងកាត់តាមកំពង់ផែរបស់ប្រទេសថៃបាននោះរយៈពេល និងចម្ងាយផ្លូវលើការដឹកជញ្ជូននឹងត្រូវកាត់បន្ថយ ហើយការចំណាយក៏នឹងធ្លាក់ចុះបន្តិចវិញដែរ។ ប៉ុន្តែ ការប៉ុនប៉ងចរចារបស់កម្ពុជានឹងភាគីថៃមិនអាចដំណើរការទៅមុខដើម្បីឈានទៅដល់កិច្ចព្រមព្រៀងប្រើប្រាស់កំពង់ផែ Laem Chabang នោះបានឡើយ។

ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា កម្ពុជានឹងមិនចាំបាច់ធ្វើការចរចាជាមួយភាគីថៃដើម្បីសុំប្រើប្រាស់កំពង់ផែរបស់ថៃនោះទៀតទេនៅពេលដែលកម្ពុជានឹងសាងសង់ផ្លូវមួយខ្សែភ្ជាប់ពីខេត្តបាត់ដំបងទៅកាន់ខេត្តកោះកុងដោយត្រង់នៅពេលអនាគត។

ឯកឧត្តម ស៊ុន ចាន់ថុល បានបញ្ជាក់ថា៖ “យើងកំពុងសិក្សាផ្លូវ 15-51ពីខេត្តបាត់ដំបងចុះទៅកាន់ខេត្តកោះកុង ដើម្បីឱ្យមានភាពងាយស្រួលក្នុងការដឹកកសិផលរបស់យើង ពីខេត្តបាត់ដំបង និងប៉ៃលិនជាដើម ចុះទៅកាន់កំពង់ផែរបស់យើងផ្ទាល់តែម្តង ដោយមិនប្រើកំពង់ផែ Laem Chabang របស់ថៃនោះទេ។

សូមបញ្ជាក់ថា មូលហេតុដែលអ្នកធុរកិច្ចកម្ពុជាចង់បានការនាំចេញកសិផលតាមច្រក Laem Chabang នោះ គឺដោយសារតែការដឹកជញ្ជូនតាមច្រកនោះមានចម្ងាយជិត ដោយប្រើប្រាស់ថេរវេលាប្រមាណតែ 5ម៉ោងប៉ុណ្ណោះ ពីក្រុងបាត់ដំបងទៅដល់កំពង់ផែនោះ ហើយវាមានរយៈចម្ងាយរឹតតែជិតទៅទៀតសម្រាប់ការដឹកកសិផលចេញពីតំបន់ព្រំដែន។

ការប៉ុនប៉ងចរចាជាមួយភាគីថៃបានកើតឡើងក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីការនាំចេញអង្កររបស់កម្ពុជាទៅកាន់ទីផ្សារអន្តរជាតិកាន់តែទទួលបានប្រជាប្រិយភាព និងមានបរិមាណកាន់តែច្រើនឡើង។ ប៉ុន្តែ ការប៉ុនប៉ងចរចាជាមួយសមភាគីថៃត្រូវគេពន្យារពេលម្តងហើយម្តងទៀតជាច្រើនលើកក្នុងឆ្នាំកន្លងទៅ ដោយសារមានមូលហេតុជាច្រើន ដូចជាការសោយទិវង្គតរបស់អតីតព្រះមហាក្សត្រថៃជាដើម។ នេះបើយោងតាមមន្ត្រីជាន់ខ្ពស់របស់ក្រសួងពាណិជ្ជកម្ម។

កម្ពុជាបាននាំចេញផលិតផលកសិកម្មសំខាន់ៗជាច្រើន រួមមាន អង្ករ ម្សៅដំឡូងមី និងកសិផលមួយចំនួនទៀត ដោយត្រូវចំណាយខ្ពស់ទៅលើមធ្យោបាយដឹកជញ្ជូន ជាហេតុធ្វើឱ្យផលិតផលរបស់កម្ពុជាលំបាកក្នុងការប្រកួតប្រជែងជាមួយផលិតផលរបស់ប្រទេសជិតខាងខ្លួន៕

February 10, 2018

ឧបករណ៍ផ្ទះបាយថ្មី ទំនើបៗ ដែលបងៗស្ត្រីមេផ្ទះគួរតែមានទុកប្រើក្នុងឆ្នាំថ្មីនេះ

ការធ្វើម្ហូបអាហារលែងជារឿងពិបាកទៀតហើយ ព្រោះបច្ចុប្បន្ននេះមានឧបករណ៍ប្រើប្រាស់ក្នុងផ្ទះបាយថ្មីៗចេញមក ដើម្បីជួយឱ្យការធ្វើម្ហូបអាហារកាន់តែងាយស្រួលឡើង។ ជាពិសេសឧបករណ៍ផ្ទះបាយដែល ឡារ៉ែន បានរួបរួមយកមកជម្រាបជូនក្នុងថ្ងៃនេះ ដែលធានាថា បងៗស្រីមេផ្ទះច្បាស់ជាចូលចិត្តមិនខាន ព្រោះវាមានមុខងារដែលឆ្លើយតបនឹងការធ្វើម្ហូបអាហារបានយ៉ាងច្រើនរូបបែប ទាំងលឿនរហ័ស ងាយស្រួល និងមិនបាច់ខាតពេលធ្វើយូរទៀតផង។

February 10, 2018

តើត្រូវទទួលទានយ៉ាងណាឱ្យ “ថ្លើម” រឹងប៉ឹង?

មិត្តអ្នកអានដឹងឬទេថា “ថ្លើម” គឺជាអវយវៈមួយក្នុងរាងកាយដែលត្រូវបានបំផ្លាញខ្លាំងបំផុត។ តាមរយៈការរស់នៅដែលមិនសូវជាសមរម្យរបស់មនុស្សយើង ទើបធ្វើឱ្យអត្រាផ្នែកនៃការកើតជំងឺដែលពាក់ព័ន្ធនឹងថ្លើមកើនឡើងខ្ពស់ជារឿយៗ ទាំងជំងឺក្រិនថ្លើម ខ្លាញ់រុំថ្លើម មហារីកថ្លើម ជាពិសេសជំងឺខ្លាញ់រុំថ្លើមតែងជួបប្រទះនៅលើប្រជាជនក្នុងភូមិភាគអាស៊ីអាគ្នេយ៍កាន់តែច្រើនឡើងជារឿយៗរៀងរាល់ឆ្នាំ។ មូលហេតុមួយ គឺបណ្ដាលមកពីកាទទួលទានភេសជ្ជៈដែលមានជាតិអាល់កុល ដែលអាចធ្វើឱ្យកើតការរលាក ហើយអាចនាំឆ្ពោះទៅរកជំងឺក្រិនថ្លើម ឬថ្លើមធ្វើការខុសប្រក្រតី ដែលបើមិនប្រញាប់ចូលទៅទទួលការព្យាបាលទេនោះ អាចមានផលប៉ះពាល់ដល់អាយុជីវិតបាន។

អាហារបំផ្លាញថ្លើម ដែលគួរចៀសវាង

ចម្បងៗមុនគេគឺ អាល់កុល អាហារជ្រក់ត្រាំដែលនឹងមានសារធាតុក្នុងក្រុមណៃត្រេត និងផ្សេងៗទៀតដែលបង្កគ្រោះថ្នាក់ដល់ថ្លើម រួមទាំងអាហារស្ទើរឆៅ ស្ទើរឆ្អិន ដូចជា ប្រហុក និងសាច់ត្រីឆៅជាដើម ដែលសុទ្ធតែជាមូលហេតុរបស់ជំងឺសត្វល្អិតនៅក្នុងថ្លើម ដែលអាចនាំឆ្ពោះទៅរកការកើតរោគមហារីកថ្លើម និងរលាកថ្លើមបានដូចគ្នាទាំងអស់។

ក្រៅពីនេះនៅមានអាហារដែលមានជាតិខ្លាញ់ខ្ពស់ អាហារដែលមានខ្លាញ់ច្រើន និងអាហារចៀនបំពង ដែលនឹងធ្វើឱ្យកើតការប្រមូលសន្សំរបស់ជាតិខ្លាញ់ រួមទាំងអាហារដែលមានការប្រឡាក់ប្រឡូសមេរោគផ្សិត ដូចជា Aflatoxin ជាមេរោគផ្សិតនៅក្នុងសណ្ដែកដែលនឹងធ្វើឱ្យកើតមហារីកថ្លើមបាន។

អាហារបំប៉នថ្លើម ដែលអ្នកគួរទទួលទាន

អាហារដែលអ្នកគួរទទួលទានគឺ អង្ករសំរូប ព្រោះនៅក្នុងអង្ករសំរូបនឹងមានសារធាតុអាហារច្រើនជាងអង្ករសធម្មតា ជាពិសេសកាកសរសៃអាហារ អាស៊ីតហ្វូលិក វីតាមីនផ្សេងៗ ដូចជា Gamma, Orissanol (សារធាតុប្រឆាំងអនុមូលឥស្សរៈពីគ្រាប់ធញ្ញជាតិ) វីតាមីន E រួមទាំងសារធាតុ Gaba ដែលសុទ្ធជាសារធាតុដែលមានប្រយោជន៍ដល់រាងកាយទាំងអស់។

ក្រៅពីនេះថែមទាំងគួរទទួលទានរុក្ខជាតិបន្លែផ្លែឈើ ដូចជា ស្ពៃក្ដោប មើមការ៉ុត ផ្លែឪឡឹក ទំពាំងបារាំង-ល- ព្រោះបន្លែ និងផ្លែឈើនឹងមានសារធាតុប្រឆាំងអនុមូលឥស្សរៈខ្ពស់ ជួយកាត់បន្ថយការរលាកដែលអាចបណ្ដាលមកពីបំផ្លាញរបស់អនុមូលឥស្សរៈ ហើយនៅមានកាកសរសៃអាហារច្រើនដែលជួយកាត់បន្ថយការកើតជាតិពុលចំពោះថ្លើមបាន។

ទទួលទានថ្លើមសត្វ ជួយបំប៉នថ្លើមមនុស្សឬ?

ថ្លើមជាប្រភពប្រមូលសន្សំរបស់វីតាមីន A និងមានសារធាតុដែកទៀតផង។ សារធាតុទាំងនេះមានប្រយោជន៍ចំពោះរាងកាយស្រាប់ទៅហើយ តែថ្លើមក៏មានកូឡេស្តេរ៉ូលខ្ពស់ដែរ ដូច្នេះការទទួលទានថ្លើមសត្វដើម្បីសង្ឃឹមលទ្ធផលក្នុងការបំប៉នថ្លើមមនុស្សយើងជាប់ជាប្រចាំនោះ អាចមានផលមិនល្អក្នុងរឿងជាតិខ្លាញ់ដែលនឹងវិលចូលមកក្នុងរាងកាយ ឬចូលទៅរុំថ្លើមវិញ ដូច្នេះត្រូវទទួលទានយ៉ាងប្រយ័ត្នប្រយែងបំផុត។

ទទួលទានភេសជ្ជៈផ្អែមៗ អាចជួយព្យាបាលថ្លើមឬ?

អ្នកដែលកើតរោគថ្លើម មានន័យថា ការធ្វើការងាររបស់ថ្លើមនឹងខុសប្រក្រតី ធ្វើឱ្យថ្លើមមិនអាចប្រមូលរក្សាជាតិគ្លុយខូស (ជាតិស្ករ)ទុកនិងនាំយកទៅរំលាយឱ្យក្លាយជាកម្លាំងថាមពលបានទេ ទើបធ្វើឱ្យអ្នកមានជំងឺថ្លើមអាចកើតអាការទន់ល្វើយគ្មានកម្លាំង និងចង់តែទទួលទានអាហារផ្អែមៗ ដូច្នេះនៅពេលទទួលទានអាហារផ្អែមៗចូលទៅ ក៏នឹងមានអារម្មណ៍ថាធូរស្រាលឡើង តែគ្រាន់តែជាអាការល្អប្រសើរឡើងបណ្ដោះអាសន្នប៉ុណ្ណោះ មិនមែនជាការព្យាបាលដែលត្រឹមត្រូវនោះទេ។ ក្រៅពីនេះការទទួលទានភេសជ្ជៈផ្អែមៗជាប្រចាំ អាចធ្វើឱ្យកើតជំងឺទឹកនោមផ្អែមតាមក្រោយ ឬជំងឺផ្សេងៗជាច្រើនទៀតផង៕

February 10, 2018

រដ្ឋមន្ត្រីក្រសួងទេសចរណ៍គ្រោងរៀបចំអារ៉ែងឱ្យកាន់តែទាក់ទាញសម្រាប់ទេសចរអន្តរជាតិ

សហគមន៍ទេសចរណអារ៉ែង ជាតំបន់ព្រៃត្រូពិកធំជាងគេនៅអាស៊ីអាគ្នេយ៍ ដែលមានទស្សនិយភាពទេសចរណ៍ប្រកបដោយភាពស្រស់បំព្រង និងពោរពេញទៅដោយធនធានធម្មជាតិយ៉ាងសំបូរបែប។

រដ្ឋមន្ត្រីក្រសួងទេសចរ ឯកឧត្តម ថោង ខុន បានលើកឡើងថា ក្រសួងទេសចរណ៍ និងទីភ្នាក់ងារទេសចរណ៍កម្ពុជា (CATA) នឹងជួយជ្រោមជ្រែងសហគមន៍ទេសចរណ៍អារ៉ែងឱ្យមានការរីកចម្រើនកាន់តែខ្លាំង ដំដៅជំរុញឱ្យប្រជាសហគមន៍ចូលរួមចំណែកការពារធនធានធម្មជាតិតាមរយៈការទាក់ទាញភ្ញៀវជាតិ និងអន្តរជាតិឱ្យមកលេងតំបន់នេះ។

ឯកឧត្តមថ្លែងថា ក្រសួងទេសចរណ៍បានបណ្តុះបណ្តាលលើជំនាញមគ្គុទេសក៍ទេសចរណ៍សហគមន៍ សុវត្ថិភាពចំណីអាហារ អនាម័យ និងបរិស្ថានដល់ប្រជាសហគមន៍នៅតំបន់នោះ។ ក្រៅពីនេះយើងក៏បាន និងកំពុងសាងសង់ហេដ្ឋារចនាសម្ព័ន្ធ ផ្លូវថ្នល់ បណ្តាញអគ្គិសនី ប្រព័ន្ធទូរគមនាគមន៍ មណ្ឌសុខភាព មណ្ឌលរដ្ឋបាល និងសកម្មភាពជាច្រើនទៀតដើម្បីជំរុញឱ្យកាន់តែមានភាពងាយស្រួលដល់ភ្ញៀវទេសចរដែលមានបំណងទៅទស្សនាតំបន់អារ៉ែង រួមទាំងប្រជាជនដែលរស់នៅតំបន់នេះផ្ទាល់។

បើតាមឯកឧត្តម ថោង ខុន ការអភិវឌ្ឍវិស័យទេសចរណ៍សហគមន៍នៅតំបន់នេះអាចនឹងទទួលបានផលប្រយោជន៍ច្រើនជាងការបរបាញ់សត្វ និងកាប់ព្រៃឈើ។ ជាបទពិសោធន៍ ដូចជានៅសហគមន៍អេកូទេសចរណ៍ជីផាត់ ប្រជាជនបានឈប់បាញ់សត្វ កាប់ព្រៃឈើ ហើយងាកមកប្រកបមុខរបរផ្តល់សេវាទេសចរណ៍ដូចជាមគ្គុទេសទេសចរ ចុងភៅចល័ត ផ្ទះស្នាក់នៅសហគមន៍ ផ្តល់សេវាម្ហូបអាហារ និងដឹកជញ្ជូនជាដើម។

ជាមួយគ្នានេះដែរ ក្រសួងទេសចរណ៍នឹងផ្តល់កុំព្យូទ័រចំនួន 4គ្រឿងដល់សហគមន៍ បំពាក់ឧបករណ៍សំឡេងចល័ត2គ្រឿង ផ្តល់ការបណ្តុះបណ្តាលមក្គទេសទេសចរណ៍ ជំនាញចំអិនម្ហូបអាហារ ផលិតចម្រៀងអំពីសក្តានុពលអេកូទេសចរណ៍ និងឧបត្ថម្ភអណ្តូងទឹកមួយចំនួនថែមទៀតផង។

កញ្ញា Suwanna Gauntlett ប្រធានអង្គការសម្ព័ន្ធមិត្តសត្វព្រៃ ដែលកំពុងធ្វើការងារនៅតំបន់អារ៉ែងបានលើកឡើងថា កញ្ញាចង់ឃើញភ្ញៀវទេសចរមកកម្សាន្តនៅតំបន់អារ៉ែងនេះ ព្រោះថានៅពេលដែលពួកគេបង្កើតតំបន់នេះទៅជាតំបន់ទេសចរណ៍ ប្រជាជននឹងបានមើលឃើញពីអត្ថប្រយោជន៍យ៉ាងសំខាន់របស់ធនធានធម្មជាតិ ហើយងាកពីរបរបរបាញ់សត្វ និងកាប់ព្រៃមកធ្វើជាមគ្គុទេសក៍ ឬប្រកបរបរដែលបម្រើឱ្យការងារទេសចរណ៍វិញ៕

February 9, 2018

ត្រី ប្លាធូ រឹតតែទទួលទាន រឹតតែជួយកាត់បន្ថយការកើតរោគបេះដូង

សម្រាប់អ្នកនិយមទទួលទានអាហារបែបខ្មែរយើង ប្រហែលជាធ្លាប់សាកល្បងភ្លក្សរសជាតិ “ទឹកគ្រឿងត្រីប្លាធូ” “ស្ងោជ្រក់ត្រីប្លាធូស្រស់” ឬសូម្បីតែត្រីប្លាធូចៀនធម្មតាៗជាមួយបាយក្ដៅៗហើយមើលទៅ។ ទាំងអស់នោះសុទ្ធតែជាម៉ឺនុយដែលនាំឱ្យស្រស់ទឹកមាត់គ្រប់ពេលដែលនឹកឃើញ ហើយប្រាកដណាស់ សម្រាប់ត្រីប្លាធូដែល ឡារ៉ែន នឹងលើកយកមកជម្រាបជូននៅថ្ងៃនេះ មិនមែនមានគុណសម្បត្តិត្រឹមតែភាពឈ្ងុយឆ្ងាញ់តែម្យ៉ាងនោះទេ តែត្រីប្លាធូនៅមានគុណសម្បត្តិ និងប្រយោជន៍ ព្រមទាំងសម្បូរទៅដោយគុណ-តម្លៃខាងភោជនាហារដែលមនុស្សជាច្រើនមិនធ្លាប់ដឹង។

ប្រយោជន៍ និងគុណតម្លៃខាងអាហារអំពីត្រីប្លាធូប្លាធូ

ជាត្រីដែលមានគុណប្រយោជន៍ និងសារធាតុអាហារដែលគ្រប់គ្រាន់ចំពោះរាងកាយដោយយើងសឹងតែមិនចាំបាច់ទទួលទានអាហារបំប៉នទៀតផង ព្រោះការទទួលទានត្រីប្លាធូតែមួយក្បាលនឹងទទួលបានសារធាតុអាហារយ៉ាងច្រើនដូចខាងក្រោមនេះ ៖

ត្រីប្លាធូ សម្បូរដោយ EPA និង DHA ដែលជាអាស៊ីតខ្លាញ់មិនបង្កកខ្លួន ដោយសារធាតុទាំងពីរប្រភេទនេះនឹងបំពេញតួនាទីកាត់បន្ថយការផ្ដុំខ្លួនរបស់គ្រាប់ឈាមដែលខុសប្រក្រតី ទើបនៅលើអ្នកខ្លះធ្វើឱ្យកើតសភាវរឹងសរសៃឈាម ឬប្រទះឃើញការរលាកជាដើម។ ក្រៅពីនោះ ទាំង EPA និង DHA នេះនៅមានចំណែកជួយក្នុងការបញ្ចុះកម្រិតជាតិខ្លាញ់ប្រភេទដែលធ្វើឱ្យកើតកំណកឈាម ឬសរសៃឈាមណែនស្ទះទៀតផង។
ត្រីប្លាធូមានប្រយោជន៍ព្រោះមានប្រូតេអីុនខ្ពស់ ដោយក្នុងត្រីប្លាធូ 1ក្បាលនឹងផ្ដល់ប្រូតេអីុនខ្ពស់ដល់ទៅ20ក្រាមក្នុងទម្ងន់ត្រី 100ក្រាម ហើយប្រូតេអីុនដែលបានពីត្រីប្លាធូគឺជាប្រូតេអីុនដែលងាយរំលាយ និងរាងកាយអាចនាំយកទៅប្រើជាប្រយោជន៍បានភ្លាមៗតែម្ដង។
គុណសម្បត្តិរបស់ត្រីប្លាធូគឺមានកាល់ស្យូម និងផូស្វ័រ ដោយបរិមាណកាល់ស្យូមក្នុងត្រីប្លាធូមានច្រើនដល់ទៅ 170មីលីក្រាមក្នុងត្រីប្លាធូស្រស់100ក្រាម ក្រៅពីនេះនៅសម្បូរទៅដោយផូស្វ័រដែលចាំបាច់ចំពោះរាងកាយ ដោយសារធាតុអាហារទាំងនេះនឹងមានចំណែកជួយក្នុងការបង្កើនភាពរឹងមាំរបស់ឆ្អឹង និងធ្មេញបានយ៉ាងល្អ ជាពិសេសនៅលើកុមារ និងមនុស្សចាស់។
ត្រីប្លាធូសម្បូរទៅដោយអូមេហ្កា3 និង6 ដែលមានចំណែកជួយក្នុងការធ្វើការរបស់ប្រព័ន្ធប្រសាទ និងខួរក្បាល ហើយថែមទាំងជាចំណែកប្រកបរបស់សាច់ភ្នាសកោសិកា ជួយបញ្ចុះកូលេស្តេរ៉ូល បន្ថយភាពប្រថុយទាំងជំងឺបេះដូង និងសរសៃឈាម។ ក្រៅពីនេះអូមេហ្កា3 និង6 នៅក្នុងត្រីប្លាធូថែមទាំងជាគ្រោងសាងដ៏សំខាន់របស់សាច់ភ្នាសបរិវេណផ្ទាំងប្រសាទកែវភ្នែក ឬ Retina ដែលជួយក្នុងការមើលឃើញទៀតផង។

ទទួលទានត្រីប្លាធូរាល់ថ្ងៃ ល្អចំពោះរាងកាយឬទេ?

ដូចដែលយើងទាំងអស់គ្នាបានដឹងហើយថា ត្រីប្រភេទនីមួយៗមានកម្រិតជាតិខ្លាញ់មិនស្មើគ្នាទេ បើទទួលទានត្រីដែលមានជាតិខ្លាញ់ខ្ពស់រៀងរាល់ថ្ងៃ ច្បាស់ជាហុចផលអាក្រក់ ច្រើនជាងផលល្អ ដូច្នេះបើសិនចង់បរិភោគត្រីឱ្យទទួលបានប្រយោជន៍ គួរជ្រើសរើសប្រភេទរបស់ត្រីឱ្យស័ក្តិសមជាមួយរាងកាយ និងតម្រូវការក្នុងវ័យនីមួយ។ ក្នុងផ្នែករបស់ត្រីប្លាធូវិញ យើងនឹងបានឃើញថា ជាត្រីដែលមានបរិមាណជាតិខ្លាញ់មិនខ្ពស់ខ្លាំងទេ ទើបអាចទទួលទានរាល់ថ្ងៃបានតែយ៉ាងណាក៏ដោយ ដើម្បីឱ្យបានភោជនាហារដែលសម្បូរបែប ទើបគួរទទួលទានត្រីប្រភេទផ្សេងៗ រួមទាំងសាច់សត្វប្រភេទផ្សេងៗរួមជាមួយផង។

ទទួលទានត្រីច្រើនប៉ុនណា ទើបហៅថាល្អ?

ជឿថា ហេតុផលក្នុងការទទួលទានត្រីរបស់មនុស្សជាច្រើន គឺមកពីត្រូវការ “ប្រូតេអីុន” ដែលមាននៅក្នុងសាច់ត្រីស្ទើរតែគ្រប់ប្រភេទ។ ជាធម្មតា មនុស្សយើងមានតម្រូវការប្រូតេអីុនខុសៗពីគ្នាក្នុងអំឡុងវ័យដូចតទៅនេះ ៖

*ក្មេងតូច-ក្មេងធំ នឹងត្រូវការប្រូតេអីុនពី 1-1.1ក្រាម ក្នុងទម្ងន់ខ្លួន 1គីឡូក្រាម។
*មនុស្សធំ ត្រូវការប្រមាណ 0.8ក្រាម
*ស្ត្រីមានគភ៌ ត្រូវការដល់ទៅ 1.3ក្រាម

ឧទាហរណ៍ដូចជា បើអ្នកបរិភោគមានទម្ងន់ខ្លួន 60គីឡូក្រាម រាងកាយនឹងត្រូវទទួលប្រូតេអីុនដល់ទៅ60ក្រាមឯណោះ ហើយប្រូតេអីុនដែលបានមកពីសាច់ត្រីឆ្អិនមានប្រហែលជា 15-30ក្រាមក្នុងទម្ងន់ត្រី 100ក្រាម ដូច្នេះបើត្រូវការប្រូតេអីុនពីត្រីតែម្យ៉ាងនោះ ត្រូវទទួលទានត្រីយ៉ាងតិច3-4ក្បាលឯណោះ។ ដូច្នេះ អ្នកទទួលទានគួរតែទទួលទានអាហារប្រភេទផ្សេងទៀតរួមជាមួយផង ដើម្បីបន្ថែមប្រូតេអីុន មិនថាតែ ស៊ុត ទឹកដោះ សណ្ដែក សាច់មាន់ ឬសូម្បីតែសាច់ជ្រូកដែលមិនជាប់ខ្លាញ់ ឬបើអ្នកណាចង់ទទួលទានតែត្រីម្យ៉ាង ហើយបានប្រូតេអីុនខ្ពស់នោះ គួរតែជ្រើសរើសប្រភេទត្រី និងវិធីចម្អិនឱ្យល្អ ដូចជា គួរជ្រើសរើសទទួលទានត្រីហាលស្ងួត ដូចជា ត្រីប្រឡាក់ ត្រីងៀត ឬទទួលទានបែបចំហុយ ដែលនឹងទទួលបានប្រូតេអីុនច្រើនជាងការស្ងោ អាំង ឬចៀនជាដើម។

តាមរយៈព័ត៌មានដែលយើងបាននាំយកមកជូននៅថ្ងៃនេះ សង្ឃឹមថា នឹងធ្វើឱ្យការទទួលទានត្រីប្លាធូរបស់លោកអ្នកកាន់តែឆ្ងាញ់ឡើង និងទទួលបានប្រយោជន៍ច្រើនឡើង បើមិនតិចក៏ច្រើនដែរ។ ចុងក្រោយនេះ ឡារ៉ែន ចង់ឱ្យមនុស្សជាច្រើនដែលមិនសូវចូលចិត្តទទួលទានត្រីប្លាធូបែរមកសាកល្បងភ្លក្សឱ្យបានម្ដង រួចហើយលោកអ្នកនឹងដឹងថា គុណសម្បត្តិ និងប្រយោជន៍របស់ត្រីប្លាធូ គឺជាកំពូលអាហារ និងជារបស់ល្អដែលមិនគួរមើលរំលងសូម្បីតែបន្តិច៕

February 9, 2018

ស៊ុន ចាន់ថុល៖ “រដ្ឋខាតបង់ដោយសារការរំលោភដីចំណីផ្លូវ”

រដ្ឋមន្ត្រីក្រសួងសាធារណការ និងដឹកជញ្ជូនបានអះអាងថា លោកនឹងសហការជាមួយក្រសួងដែនដី នគរូបនីយកម្ម និងសំណង់ ក្រសួង-ស្ថាប័ន និងអាជ្ញាធរពាក់ព័ន្ធផ្សេងទៀត ដើម្បីរៀបចំបង្កើតអនុក្រឹត្យមួយដើម្បីគ្រប់គ្រងដីចំណីផ្លូវ ខណៈដែលដីចំណីផ្លូវត្រូវបានគេរំលោភបំពាន និងយកធ្វើអាជីកម្មដោយចាត់ទុកជាកម្មសិទ្ធិផ្ទាល់ខ្លួន។

ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា បច្ចុប្បន្ននេះក្រសួងសាធារណការ និងដឹកជញ្ជូនកំពុងរៀបចំអនុក្រឹត្យគ្រប់គ្រងដីចំណីផ្លូវសាធារណៈដើម្បីបើកផ្លូវឱ្យមានការអភិវឌ្ឍសេវាសាធារណៈឱ្យបានល្អប្រសើរ និងបញ្ចៀសការបង្កជាឧបសគ្គដល់ការរៀបចំសណ្តាប់ធ្នាប់សាធារណៈ។

ឯកឧត្តមទេសរដ្ឋមន្ត្រី ស៊ុន ចាន់ថុល បានមានប្រសាសន៍បន្ថែមទៀតថា ៖ “យើងកំពុងរៀបចំអនុក្រឹត្យ ទាក់ទងនឹងការការពារដីចំណីផ្លូវរបស់យើង។ យើងត្រូវតែធ្វើឱ្យបាន ដោយសារយើងមានការលំបាកណាស់ពេលណាយើងធ្វើផ្លូវម្តងៗ រាជរដ្ឋាភិបាលយើងចំណាយច្រើនណាស់ ដើម្បីដោះស្រាយផលប៉ះពាល់ ជាពិសេសប្រជាជនខ្លះរស់នៅលើដីចំណីផ្លូវតែម្តង គាត់រស់នៅខុសច្បាប់រួចទៅហើយ ប៉ុន្តែដល់ពេលយើងឱ្យគាត់រើចេញ រដ្ឋត្រូវសងគាត់ទៀត។

ឯកឧត្តម បានបន្ថែមថា៖ “យើងត្រូវរៀបចំអនុក្រឹត្យឱ្យបានត្រឹមត្រូវ ដោយមានការចូលរួមពីក្រសួងរៀបចំដែនដី នគរូបនីយកម្ម ក្រសួងពាក់ព័ន្ធ និងអាជ្ញាធរដែនដីគ្រប់លំដាប់ថា្នក់ដើម្បីធ្វើយ៉ាងណាគ្រប់គ្រងឱ្យបានល្អ ដើម្បីគ្រប់គ្រងដីចំណីផ្លូវឱ្យបានល្អ ចៀសវាងគាត់យកដីដំណីផ្លូវទៅធ្វើជាកន្លែងលក់ដូរ កន្លែងចាក់សំរាមដែលនាំឱ្យស្ទះទាំងផ្លូវ និងស្ទះទាំងលូ”៕

February 9, 2018

SEATEL ចាប់ដៃជាមួយ MWDIS នាំចូលនូវទូរស័ព្ទដៃ Xiaomi ចូលប្រទេសកម្ពុជាជាលើកដំបូង

ព្រឹកថ្ងៃទី8 ខែកុម្ភៈ ឆ្នាំ2018 ក្រុមហ៊ុន SEATEL និងក្រុមហ៊ុន MWDIS International Co.,Ltd បានធ្វើសន្និសិទកាសែតស្តីពីកិច្ចសហការលើផលិតផលទូរស័ព្ទដៃ Xiaomi នៅឯការិយាល័យកណ្តាលក្រុមហ៊ុន SEATEL ។ ក្នុងនោះផងដែរ ក៏មានវត្តមានលោក យ៉ាង លិឈីង អគ្គនាយករងក្រុមហ៊ុន SEATEL និង លោក ផាបូរ៉ា អគ្គនាយកក្រុមហ៊ុន MWDIS ។

លោក យ៉ាង លិឈីង អគ្គនាយករងក្រុមហ៊ុន SEATEL បានមានប្រសាសន៍ថា ទូរស័ព្ទដៃ Xiaomi គឺជាម៉ូឌែលទូរស័ព្ទដែលល្បីឈ្មោះទូទាំងពិភពលោក ដោយមានសមត្ថភាពខ្ពស់ និងតម្លៃសមរម្យ ព្រមទាំងទទួលបានភាពជោគជ័យយ៉ាងខ្លាំងនៅលើទីផ្សារ ។ បច្ចុប្បន្ន ទូរស័ព្ទដៃ Xiaomi អាចប្រើប្រាស់ជាមួយនឹងបណ្តាញអ៊ិនធឺណិត SEATEL4G VoLTE ពេញលេញហើយ ។ ហើយការសហការរវាងក្រុមហ៊ុន SEATEL និងក្រុមហ៊ុន MWDIS ក៏បានបញ្ជាក់ថា ទូរស័ព្ទដៃ Xiaomi បានដាក់លក់ជាផ្លូវការនៅប្រទេសកម្ពុជាហើយ! ទន្ទឹមនឹងការថ្លែងអំណរគុណយ៉ាងជ្រាលជ្រៅចំពោះការគាំទ្រយ៉ាងពេញទំហឹងរបស់ក្រុមហ៊ុន MWDIS គាត់ក៏សម្តែងការជឿជាក់យ៉ាងមុតមាំថា ស្ថិតក្រោមការសហការរវាង SEATEL និង MWDIS នឹងធ្វើអោយអតិថិជនកាន់តែច្រើនអាចទទួលបាននូវបទពិសោធន៍ប្រើប្រាស់អ៊ិនធឺណិតល្បឿនលឿន និងការសន្ទនាសម្លេងច្បាស់របស់បណ្តាញទូរស័ព្ទ SEATEL ហើយទូរស័ព្ទដៃ Xiaomi នឹងក្លាយជាទូរស័ព្ទដៃដែលពេញនិយមខ្លាំងនៅក្នុងប្រទេសកម្ពុជា ។

លោក ផា បូរ៉ា អគ្គនាយកក្រុមហ៊ុន MWDIS បានមានប្រសាសន៍ថា ក្រុមហ៊ុន SEATEL គឺជាបណ្តាញទូរគមនាគមន៍ល្បីឈ្មោះនៅកម្ពុជា ហើយក៏ជាដៃគូរសហការដ៏មានទំនុកចិត្តខ្ពស់ ។ ការជ្រើសរើសការសហការជាមួយនឹងក្រុមហ៊ុន SEATEL ដើម្បីជម្រុញផលិតផលទូរស័ព្ទដៃ Xiaomi គឺមិនត្រឹមតែសំអាងទៅលើគុណភាពរបស់ទូរស័ព្ទតែប៉ុណ្ណោះទេ ថែមទាំងអោយតម្លៃខ្ពស់ចំពោះការសហការនៅថ្ងៃក្រោយជាមួយនឹងក្រុមហ៊ុន SEATEL ។ ក្រុមហ៊ុន MWDIS នឹងសហការសម្របសម្រួលជាមួយនឹងក្រុមហ៊ុន SEATEL ក្នុងការដាក់លក់នូវទូរស័ព្ទដៃ Xiaomi នៅកម្ពុជា ហើយការជាការជឿជាក់លើផលិតផលទូរស័ព្ទដៃ Xiaomi ផងដែរ ។

ភាគីទាំងពីរបានមានប្រសាសន៍ថា បច្ចុប្បន្ន ក្រុមហ៊ុន SEATELនិង MWDIS គឺជាដៃគូរសហការ និងជាតំណាងចែកចាយទូរស័ព្ទដៃ Xiaomi តែមួយគត់នៅកម្ពុជា ដោយមានដាក់លក់ទូរស័ព្ទបីម៉ូឌែលនៅគ្រប់បណ្តាហាង SEATEL Shop 30ហាងទូទាំងប្រទេស គឺ ម៉ូឌែល Redmi 5A ម៉ូឌែល Redmi Note 5A ម៉ូឌែល Redmi Note 5A Prime ដែលមានតម្លៃ $115 $125 $155 ។ លេខទំនាក់ទំនងបោះដុំទូរស័ព្ទដៃ Xiaomi៖ 0963 999 999 ។

គ្រាប់អតិថិជនទាំងអស់ដែលទិញទូរស័ព្ទដៃ Xiaomi នឹងទទួលបានកាដូដែលមានតម្លៃស្មើរ $142 ពីក្រុមហ៊ុន SEATEL ភ្លាមៗ ៕

February 9, 2018

ស្ទើរមិនជឿ! PCO ឈ្នះជើងឯក Tiger Street Football Festival 2018 ប្រចាំបាត់ដំបង

បាត់ដំបង៖ ក្រុម PCO បានទទួលចំណាត់ថ្នាក់លេខ1 គឺជើងឯកនៃការប្រកួតបាល់ទាត់ពានរង្វាន់នៃក្របខ័ណ្ឌ Tiger Street Football Festival 2018 ប្រចាំមណ្ឌលបាត់ដំបង។

បើនិយាយពីក្រុមជើងឯក PCO នេះស្ទើរគ្មានក្រុមណាមួយក្នុងខេត្តបាត់ដំបងយកទុកក្នុងកែវភ្នែកឡើយ។ ក្នុងព្រឹត្តិការណ៍ពានរង្វាន់ Tiger Street Football Festival ក្រុមមួយនេះធ្លាប់ចូលរួមប្រកួតកាលពីឆ្នាំ2017 ប៉ុន្តែបានធ្លាក់ចេញតាំងពីជុំដំបូង ប៉ុន្តែសម្រាប់ឆ្នាំនេះពួកគេបានធ្វើអោយទស្សនិកជនផ្ញាក់ផ្អើលយ៉ាង ដោយក្រុមនេះបានយកឈ្នះក្រុមខ្លាំងៗទាំងអស់ដែលធ្លាប់មានកេរ្តិ៍ឈ្មោះល្បីនៅខេត្តបាត់ដំបង។

ក្រុមខ្លាំងៗដូចជា ធនាគារស្រូវ សសយកបាត់ដំបង BMS Club និងក្រុម Battambang Town ជាដើមដែលធ្លាប់បានធ្វើដំណើរទៅប្រកួតភ្នំពេញច្រើនលើកនោះអត់បានទៅភ្នំពេញទេ ប៉ុន្តែនៅសល់តែ FC Crown A មួយប៉ុណ្ណោះដែលមានបទពិសោធទៅភ្នំពេញច្រើនលើក ហើយឆ្នាំ2018នេះបានទៅភ្នំពេញទៀត។

ចំពោះសកម្មភាពផ្សេងៗនៃព្រឹត្តិការណ៍ Tiger Street Football Festival 2018 នៅខេត្តបាត់ដំបងសូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
#TSFF2018

សូមពិសាដោយការទទួលខុសត្រូវ

February 9, 2018

Coutinho រកបានគ្រាប់បាល់ ខណៈ Barca ទៅជួប Sevilla ក្នុង Copa del Rey វគ្គផ្តាច់ព្រ័ត្រ

ខ្សែបម្រើប្រយុទ្ធដ៏មានឥទ្ធិពល Philippe Coutinho បានរកគ្រាប់បាល់បញ្ចូលទីសម្រាប់ក្លិបថ្មីជាលើកទី1 របស់គេ ខណៈដែលក្រុម Barcelona បានកក់កៅអីរបស់ពួកគេទៅកាន់វគ្គផ្តាច់ព្រ័ត្រនៃពាន Copa del Rey យ៉ាងងាយ កាលពីថ្ងៃព្រហស្បតិ៍។

អតីតតារាឆ្នើមរបស់ក្លិប Liverpool រូបនេះ បានរកគ្រាប់បាល់បញ្ចូលទីភ្លាមៗនៅនាទី ទី49 ក្រោយពីបានដាក់ឲ្យចូលលេងក្នុងតង់ទី2 នៅមុនពេលខ្សែបម្រើ Ivan Rakitic បានជួយឲ្យក្រុមខ្លួននាំមុខ 2-0 នៅរយៈពេល 8នាទីចុងក្រោយ ដើម្បីបំពេញការឈ្នះទាំងពីរជើងក្នុងលទ្ធផល 3-0។

បច្ចុប្បន្នក្រុម Barcelona របស់លោក Ernesto Valverde នឹងត្រូវឡើងទៅជួបជាមួយនឹងក្រុម Sevilla ក្នុងវគ្គផ្តាច់ព្រ័ត្រនាចុងសប្តាហ៍នៃថ្ងៃទី21 និងទី22 ខែមេសា ខាងមុខនេះ។ Coutinho បានប្រាប់ស្ថានីយទូរទស្សន៍របស់អេស្ប៉ាញ Gol ថា៖ «សម្រាប់ខ្ញុំ វាជាការប្រកួតវគ្គផ្តាច់ព្រ័ត្រ ជាលើកទី1របស់ខ្ញុំ ហេតុនេះ វាពិតជាពេលវេលាដ៏ពិសេសណាស់»។

កីឡាកររូបនេះ បានបន្ថែមទៀតថា៖ ខ្ញុំពិតជារីករាយណាស់។ ខ្ញុំបានស្វែងរកគ្រាប់បាល់នេះចាប់តាំងពីការប្រកួតដំបូងរបស់ខ្ញុំ។ នៅថ្ងៃនេះ ខ្ញុំបានគ្រាប់បាល់នេះហើយ ហើយវាបានជួយឲ្យក្រុមឈានទៅកាន់វគ្គផ្តាច់ព្រ័ត្រ។ Barcelona គឺជាម្ចាស់ជើងឯកនៃយុទ្ធនាការនេះរយៈពេល៣ឆ្នាំចុងក្រោយជាប់ៗគ្នា ខណៈដែលការដណ្តើមបានជ័យជម្នះរបស់ពួកគេមានន័យថា ក្រុមយក្សរបស់អេស្ប៉ាញមួយនេះ នឹងឈានទៅប្រកួតវគ្គផ្តាច់ព្រ័ត្រ៥លើកជាប់ៗគ្នា៕

ប្រភពពី៖ The Sun

February 9, 2018

ចំណូលទឹកប្រាក់ប្រមាណ 500លានដុល្លារបានពីការលក់អង្ករទៅបរទេស

កម្ពុជាទទួលបានចំណូលពីការនាំចេញអង្ករសរុបនៅក្នុងឆ្នាំ2017 កន្លងទៅ ប្រមាណជា 500លានដុល្លារសហរដ្ឋអាមេរិក ដោយក្នុងនោះការនាំចេញអង្ករក្រអូបរបស់កម្ពុជាមានបរិមាណច្រើនរហូតដល់ជាង 64% នៃការនាំចេញសរុប។

យោងតាមទិន្នន័យដែលចេញផ្សាយដោយសហព័ន្ធស្រូវអង្ករកម្ពុជាបានឱ្យដឹងថា អង្ករក្រអូបរបស់កម្ពុជាទទួលបានតម្លៃស្ថិតនៅក្នុងចន្លោះពី750 ដល់ 840ដុល្លារក្នុង1តោនសម្រាប់ប្រភេទអង្ករក្រអូប ខណៈអង្ករសធម្មតា មានតម្លៃក្បែរៗ 450ដុល្លារក្នុងមួយតោន។

កម្ពុជាបានសម្ពោធម៉ាកវិញ្ញាតកម្មអង្ករថ្មីមួយឈ្មោះថា “ម្លិះអង្គរ” ឬសរសេរជាភាសាអង់គ្លេសMALYS ANGKOR ដើម្បីជំរុញទីផ្សារលក់នៅក្រៅប្រទេសឱ្យកាន់តែមានប្រសិទ្ធភាពបន្ថែមទៀត ខណៈដែលថ្នាក់ដឹកនាំក្រសួងនានាបានរំពឹងទុកថា ផលិតកម្មស្រូវនឹងបន្តរីកចម្រើន និងមានលទ្ធភាពពង្រីកផលិតកម្មបន្ថែមទៀតក្នុងពេលអនាគត។

ម៉ាកវិញ្ញាតកម្ម “ម្លិះអង្គរ” ត្រូវបានសម្ពោធដាក់ឱ្យប្រើប្រាស់ជាម៉ាកសញ្ញាពាណិជ្ជកម្មរួមថ្មី1ទៀតរបស់កម្ពុជា ដែលមានសហព័ន្ធស្រូវអង្ករជាកម្មសិទ្ធិករ ដែលនឹងផ្តល់ការបញ្ជាក់នៅលើសម្បកវេចខ្ចប់នៃផលិតផលអង្ករនាំចេញ។ ទោះបីជាបែបនេះក្តី ការប្រើប្រាស់ម៉ាកវិញ្ញាតកម្មនេះនឹងត្រូវការពេល យូរបន្ថែមទៀត សម្រាប់ឱ្យអ្នកនាំចេញ និងទីផ្សារខាងក្រៅប្រទេសទទួលស្គាល់។

ឯកឧត្តម សុខ ពុទ្ធីវុធ ប្រធានសហព័ន្ធស្រូវអង្ករកម្ពុជា បានលើកឡើងក្នុងពិធីសម្ពោធម៉ាកអង្ករនេះថា នេះគ្រាន់តែជាចំណុចចាប់ផ្តើមប៉ុណ្ណោះសម្រាប់ម៉ាករួមមួយនេះ ដោយសហព័ន្ធត្រូវធ្វើការងារច្រើនទៀតជាមួយអ្នកនាំចេញ។ ឯកឧត្តមថ្លែងថា៖ “គាត់នៅប្រើម៉ាកសញ្ញារបស់គាត់ដដែលប៉ុន្តែគាត់នឹងប្រើម៉ាកសញ្ញានេះមួយទៀត ដើម្បីបញ្ជាក់ពីគុណភាពអង្ករនេះថា មានប្រភពពីប្រទេសកម្ពុជា ជាប្រភេទអង្ករក្រអូបរបស់កម្ពុជា។ រាល់ពេលដែលយើងធ្វើកម្មវិធីលើកកម្ពស់ទីផ្សារ យើងត្រូវផ្តោតលើម៉ាកសញ្ញាអង្ករ “ម្លិះអង្គរ”មួយនេះ។

ឯកឧត្តម បានបន្ថែមថា៖ “យើងនឹងចាប់ផ្តើមធ្វើនៅក្នុងឆ្នាំនេះតែម្តង វានឹងជួយជំរុញទីផ្សារបន្ថែមទៀត ប៉ុន្តែត្រង់ថាទទួលបានកំណើនប៉ុន្មានៗនោះ គឺវាអាស្រ័យទៅលើការចូលរួមអនុវត្តទាំងអស់គ្នាពីសំណាក់ក្រុមហ៊ុននាំចេញ។

លោក ឡាយ ឈុនហួរ នាយកក្រុមហ៊ុននាំអង្ករចេញ និងរោងម៉ាស៊ីន ស៊ីធីរ៉ាយស៍ ដែលមានមូលដ្ឋាននៅក្នុងស្រុកថ្មគោល ខេត្តបាត់ដំបង បានបញ្ជាក់ថា ការសម្ពោធម៉ាកវិញ្ញាតកម្មនេះ គឺជាការចាប់ផ្តើមដ៏ល្អមួយ ប៉ុន្តែវាត្រូវការពេលវេលាច្រើនថែមទៀត ដើម្បីឱ្យអ្នកប្រើប្រាស់ទទួលស្គាល់ និងទុកចិត្ត។ លោក ឡាយ ឈុនហួរ បានបញ្ជាក់ថា៖ “ខ្ញុំយល់ថា វាទើបតែជាការចាប់ផ្តើមប៉ុណ្ណោះ ប៉ុន្តែវាជារឿងល្អដែលយើងមានម៉ាករួមមួយសម្រាប់លើកស្ទួយ។ ទោះជាយ៉ាងណា ខ្ញុំជឿថា យើងត្រូវការពេលវេលាច្រើនបន្ថែមទៀតសម្រាប់លើកស្ទួយម៉ាកវិញ្ញាតកម្មថ្មីនេះ។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអះអាងថា ក្រសួងពាណិជ្ជកម្មនឹងសហការជាមួយគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បន្តខិតខំថែរក្សាទីផ្សារដែលមានស្រាប់និងចរចាពង្រីកទីផ្សារនាំចេញអង្ករបន្ថែមទៀត ខណៈកាលពីក្នុងឆ្នាំ2017 កម្ពុជាបាននាំចេញអង្ករចំនួនជាង 63ម៉ឺនតោនទៅកាន់ទីផ្សារចំនួន 60នៅលើពិភពលោក ពោលគឺបានកើនឡើងជាង 17% ធៀបនឹងឆ្នាំ2016 ដែលបានត្រឹមតែ 54ម៉ឺនតោន និងប្រហែលជាជាង 60% បើធៀបនឹងឆ្នាំ2010 ដែលបានត្រឹមតែ 10ម៉ឺនតោនប៉ុណ្ណោះ។

ឯកឧត្តម រដ្ឋមន្ត្រី បញ្ជាក់ថា៖ “តាមរយៈទីផ្សារដែលយើងពង្រីកបាន និងផលិតកម្មស្រូវ និងការកែច្នៃអង្ករទាំងសម្រាប់ការប្រើប្រាស់ក្នុងស្រុក និងការនាំចេញ ឃើញថា យើងបានបង្កើតការងារសម្រាប់ប្រជាជនប្រមាណជា 3លាននាក់ ឬស្មើនឹង 20% នៃចំនួនកម្លាំងពលកម្មសរុប។ ឯកឧត្តមរដ្ឋមន្ត្រី បានបន្ថែមថា៖ “ខ្ញុំសូមលើកទឹកចិត្តដល់សហព័ន្ធស្រូវអង្ករ និងសូមចូលរួមឱ្យបានសកម្មក្នុងសកម្មភាពនានាទាក់ទងនឹងការជំរុញការនាំចេញ។

យោងតាមផែនការយុទ្ធសាស្ត្រអភិវឌ្ឍន៍ថ្នាក់ជាតិឆ្នាំ 2014-2018 រាជរដ្ឋាភិបាលបានកំណត់គោលការណ៍កំណើនវិស័យកសិកម្មប្រចាំឆ្នាំចំនួន 5% ដើម្បីធ្វើឱ្យវិស័យកសិកម្មកាន់តែមានទំហំធំល្មមឡើង ក៏ប៉ុន្តែមានផលិតភាពកាន់តែខ្ពស់ ដែលគោលដៅនេះត្រូវសម្រេចឱ្យបាននៅឆ្នាំ2030។ យោងតាមការប៉ាន់ប្រមាណទុក កម្លាំងពលកម្មសរុបក្នុងវិស័យកសិកម្មនឹងត្រូវធ្លាក់ចុះ ខណៈដែលផលិតភាពនៃការប្រើប្រាស់ដីអាចនឹងមានកំណើនពី 1,300ដុល្លារ រហូតដល់ 2,700ដុល្លារក្នុង1ហិកតា ហើយផលិតភាពនៃកម្លាំងពលកម្មនឹងមានកំណើនពី 1,200ដុល្លារ រហូតដល់ 3,700ដុលា្លរសម្រាប់កសិករម្នាក់។ ក្នុងកាលៈទេសៈនេះក៏ដោយ កម្ពុជានៅមានលទ្ធភាពពង្រីកកំណើនក្នុងការបង្កើនទិន្នផលស្រូវ និងកំណត់ពូជស្រូវដែលអំណោយផលដល់ការធ្វើពិពិធកម្មនៃការនាំចេញអង្ករពីកម្ពុជា៕

February 9, 2018

Author: វល័ក្ខ