វល័ក្ខ - La Reine Media

ឆ្នាំនេះក្រសួងអប់រំនៅតែចេញវិធានការទប់ស្កាត់ភាពមិនប្រក្រតីក្នុងថ្ងៃ 14កុម្ភៈ

ជារៀងរាល់ឆ្នាំ ក្រសួងអប់រំ យុវជន និងកីឡា តែងចេញសេចក្តីប្រកាសទប់ស្កាត់ភាពមិនប្រក្រតីនៅថ្ងៃទិវានៃសេចក្តីស្រឡាញ់ (Valentine Day)ដែលត្រូវបានគេមើលឃើញថា មានភាពមិនប្រក្រតីមួយចំនួនអាចធ្វើឱ្យប៉ះពាល់ដល់សណ្តាប់ធ្នាប់សង្គម និងប្រពៃណីខ្មែរ ដែលបង្កឡើងដោយយុវវ័យកម្ពុជានៅក្នុងទិវានោះ។

នៅឆ្នាំនេះ រដ្ឋមន្ត្រីក្រសួងអប់រំ យុវជន និងកីឡា បានចេញសេចក្តីណែនាំជាថ្មីដើម្បីទប់ស្កាត់បញ្ហាអវិជ្ជមានទាំងអស់នោះ ដោយក្នុងសេចក្តីណែនាំនោះបានបញ្ជាក់ថា កន្លងមកក្រសួងអប់រំ បានសង្កេតឃើញថា ជារៀងរាល់ឆ្នាំ នៅថ្ងៃទី14 កុម្ភៈ ដែលជាថ្ងៃទិវានៃសេចក្តីស្រឡាញ់ បានក្លាយជាឱកាសមួយដែលធ្វើឱ្យសិស្សមួយចំនួនច្រឡំថា ទិវានេះជាទិវានៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍ទៅវិញ។

នៅអំឡុងប៉ុន្មានឆ្នាំចុងក្រោយនេះ ទិវាមួយនេះបានធ្វើឱ្យយុវវ័យខ្លះភ្លើតភ្លើនភ្លេចការសិក្សា បាត់បង់កិត្តិយស ភាពស្អាតស្អំ និងសេចក្តីថ្លៃថ្នូររបស់ខ្លួន និងក្រុមគ្រួសារ ដោយប្រាសចាកពីវប្បធម៌ដ៏ល្អ និងប្រពៃណីដ៏ផូរផង់របស់ជាតិខ្មែរ។ ដើម្បីការពារថែរក្សានូវវប្បធម៌ និងប្រពៃណីដ៏ថ្លៃថ្លារបស់ជាតិ ក្រសួងអប់រំបានចេញសេចក្តីណែនាំឱ្យគ្រឹះស្ថានសិក្សាទាំងអស់ត្រូវផ្សព្វផ្សាយដល់សិស្សតាមគ្រប់មធ្យោបាយ ដូចជាតាមរយៈការប្រជុំនៅពេលគោរពទង់ជាតិ កុំឱ្យមានការយល់ខុសពីអត្ថន័យរបស់ទិវានៃសេចក្តីស្រឡាញ់នេះ។

ពង្រឹងការអនុវត្តបទបញ្ជាផ្ទៃក្នុងរបស់គ្រឹះស្ថានសិក្សាសាធារណៈឱ្យបានម៉ឺងម៉ាត់ ជាពិសេសលើការគ្រប់គ្រងសីលធម៌ និងវិន័យ ដោយការតាមដានវត្តមានរបស់សិស្សានុសិស្សជាប្រចាំ។ ជំរុញដំណើរការរបស់ក្រុមប្រឹក្សាយុវជន ក្រុមប្រឹក្សាកុមារប្រចាំសាលាដោយអនុវត្តសកម្មភាព “មិត្តអប់រំមិត្ត” និងត្រូវធ្វើការទំនាក់ទំនងយ៉ាងជិតស្និទ្ធជាមួយមាតាបិតា អាណាព្យាបាល ឬសហគមន៍ ដើម្បីផ្តល់ និងទទួលព័ត៌មាននានាពាក់ព័ន្ធនឹងសកម្មភាពមិនប្រក្រតី ដែលប្រព្រឹត្តដោយសិស្សដើម្បីសហការគ្នាទប់ស្កាត់ និងកែលម្អ៕

February 13, 2018

ទិញដី និងទិញផ្ទះ តើមួយណា បានប្រាក់ចំណេញច្រើនជាង?

បច្ចុប្បន្ននិន្នាការពុះដីឡូត៍លក់ និងការសង់បុរីលំនៅឋាននៅជាយក្រុងកំពុងរីកផុលផុសដុះដាលយ៉ាងខ្លាំង ខណៈដែលប្រជាពលរដ្ឋចូលមករស់នៅក្នុងទីក្រុងភ្នំពេញកាន់តែច្រើនឡើង រីឯអ្នកមានលុយកាក់មួយចំនួនក៏បានសម្រុកវិនិយោគលើការទិញដី ឬផ្ទះដើម្បីទុកលក់រកប្រាក់ចំណេញថ្ងៃក្រោយផងដែរ ដូច្នេះគេសួរថា ការទិញដី ឬទិញផ្ទះទុក តើមួយណានឹងទទួលបានប្រាក់ចំណេញច្រើនជាង សម្រាប់ថ្ងៃអនាគត?

លោក ស្រេង ភក្តី ជាបុគ្គលិកជាន់ខ្ពស់នៅក្នុងក្រុមហ៊ុនឯកជនមួយលើកឡើងថា លោកបានទិញផ្ទះចំនួនពីរល្វែង នៅក្នុងបុរីលំនៅឋានមួយកន្លែងស្ថិតនៅក្នុងសង្កាត់ដង្កោ ខណ្ឌដង្កោ ដើម្បីទុករស់នៅខ្លួនឯងមួយល្វែង និងសល់មួយល្វែងទៀតទុកជួលឱ្យគេ គ្រាន់បានលុយប្រចាំខែត្រឡប់មកវិញ។ កត្តាដែលជំរុញឱ្យលោកទិញផ្ទះក្នុងបុរី គឺដោយហេតុថាក្រែងលោអចលនទ្រព្យឡើងថ្លៃ លក់ទៅវិញក៏បានចំណេញដែរ តែបើមិនឡើងថ្លៃទេ អាចជួលឱ្យគេរស់នៅ ក៏រកចំណូលបានមកវិញខ្លះដែរ។

លោកបន្តថា កត្តាដែលលោកមិនទិញដីទុកលក់ដើម្បីរកប្រាក់ចំណេញនោះ ដោយហេតុថា ការទិញដីទុកជួនកាលកប់លុយចោលរាប់ឆ្នាំ ហើយខ្លាចក្រែងដីមិនឡើងថ្លៃ វានឹងធ្វើឱ្យយើងខាត និងកប់លុយចោលឥតប្រយោជន៍ ជាជាងយកលុយទៅរកស៊ីរបរផ្សេងវិញប្រសើរជាង។

ជាមួយគ្នានេះដែរ លោក លី សុទ្ឋារៈ ពលរដ្ឋនៅខណ្ឌពោធិ៍សែនជ័យបានលើកឡើងពីទស្សនៈផ្ទាល់ខ្លួនថា បើចំណាយលុយទិញផ្ទះមួយល្វែង គឺស្មើនឹងទិញដី 3 ទៅ4ល្វែងឯណោះ ដូច្នេះបើទិញផ្ទះ ចៃដន្យផ្ទះមិនឡើងថ្លៃនឹងខាតលុយច្រើន ហើយយូរទៅផ្ទះកាន់ចាស់ទៅ តែបើទិញដីវិញ ប្រសិនជាដីឡើងថ្លៃបានផលចំណេញច្រើនជាងទិញផ្ទះទ្វេមួយជាពីរក៏អាចថាបានដែរ។ លោកបាននិយាយដូច្នេះថា “ទិញផ្ទះជួលឱ្យគេមិនដឹងថ្ងៃណារួចខ្លួននោះទេ ហើយ15ឆ្នាំក្រោយមកផ្ទះចាស់អស់ លក់វិញមិនដឹងថាបានចំណេញឬមិនចំណេញនោះទេ ប៉ុន្តែបើទិញដីទុកមិនមានអ្វីខាតបង់ទេ បើដីមិនឡើងថ្លៃ គ្រាន់តែកប់លុយចោលប៉ុណ្ណោះ តែបើឡើងថ្លៃវិញយើងអាចបានលុយចំណេញក្រាស់ក្រែលជាងការទិញផ្ទះទុកលក់យកចំណេញទៅទៀត។

លោកថា បើទិញផ្ទះល្វែងទុកលក់យកចំណេញវិញពិតជាលំបាកណាស់ ព្រោះថា ម្ចាស់បុរីលំនៅឋានតែងបន្តការសាងសង់ផ្ទះលក់ឥតឈប់ ដូច្នេះអតិថិជនថ្មីមិនទិញផ្ទះបន្តពីគេទេ គឺសុខចិត្តទិញផ្ទះថ្មីផ្ទាល់ពីក្រុមហ៊ុនតែម្តង ដោយគិតថា ផ្ទះដែលគេទិញរួចហើយនោះ បើគេចង់លក់វិញលុះត្រាតែបានចំណេញទើបគេលក់។

ជាមួយគ្នានេះលោក ម៉ឹង លាងហ៊ន នាយកគ្រប់គ្រងក្រុមហ៊ុន Family Real Estate មានប្រសាសន៍ថា ការទិញដី និងទិញផ្ទះទុក មានឱកាសចំណេញប្រហាក់ប្រហែលគ្នា សំខាន់ឱ្យតែចេះមើលស្ថានភាពភូមិសាស្ត្រទីតាំងដី ឬផ្ទះដែលត្រូវទិញនោះថា តើអាចនឹងមានកត្តាអ្វីខ្លះដែលធ្វើឱ្យដី ឬផ្ទះនៅទីតាំងនោះឡើងថ្លៃទៅថ្ងៃខាងមុខ។ ឧទាហរណ៍ដូចរូបលោកផ្ទាល់ កាលពីប៉ុន្មានឆ្នាំកន្លងទៅនេះ ដោយសារមើលឃើញទីតាំងដីនៅជិតតំបន់សេដ្ឋកិច្ចពិសេសក្រុងភ្នំពេញអាចនឹងឡើងថ្លៃ ដោយសារនៅទីនោះមានរោងចក្រចូលមកវិនិយោគច្រើន ពលរដ្ឋក៏ដូចជាកម្មករនឹងមករកការងារធ្វើនៅទីនោះច្រើន ដូច្នេះដីប្រាកដជាឡើងថ្លៃមិនខាន ដូច្នេះលោកក៏សម្រេចចិត្តទិញដីទុកចំនួន 3ប្លង់ ហើយមិនដល់ 3ខែផង ក៏មានគេមកចរចាសុំទិញដីដែលលោកទុកសង់បន្ទប់ជួលឱ្យកម្មករនៅនោះ ដូច្នេះលោកក៏លក់ចេញវិញ បានប្រាក់ចំណេញជិត100% ត្រឹមតែរយៈពេល 3ខែប៉ុណ្ណោះ។

ក្នុងនាមជាអ្នកជំនាញផ្នែកអចលនទ្រព្យ លោកបានផ្តល់ជាអនុសាសន៍ថា ការទិញផ្ទះត្រូវចំណាយលុយច្រើន ហើយផ្ទះមិនសូវឡើងថ្លៃដូចដីនោះទេពិសេសផ្ទះក្នុងបុរីមិនងាយឡើងថ្លៃឡើយដោយសារតែបុរីផ្ទះល្វែងមានការសាងសង់ឥតឈប់ឈរ ពីមួយឆ្នាំទៅមួយឆ្នាំ ហើយមានការប្រកួតប្រជែងតម្លៃគ្នាទៀតផង។ តែយ៉ាងណានោះ បើចង់ទិញផ្ទះគឺគួរទិញក្រៅបុរី និងត្រូវចេះមើលថា តើសេដ្ឋកិច្ចតំបន់នោះនឹងអាចប្រែប្រួលឬទេទៅថ្ងៃអនាគត បើសិនជាទិញត្រូវតំបន់អភិវឌ្ឍន៍ផងនោះនឹងបានចំណេញច្រើនតែម្តង។

លោកបានបញ្ជាក់ដូច្នេះថា “សម្រាប់បទពិសោធលក់ផ្ទះឱ្យគេ ខ្ញុំធ្លាប់ជួបម្ចាស់ផ្ទះពីរនាក់ ម្ចាស់ផ្ទះម្នាក់ទិញផ្ទះ 2ល្វែងក្នុងបុរីតម្លៃ 13ម៉ឺនដុល្លារ រយៈពេល 4ឆ្នាំក្រោយមកលក់ចេញវិញបានតែ 17ម៉ឺនដុល្លារប៉ុណ្ណោះ ហាក់ដូចជាមិនបានច្រើនទេ ប៉ុន្តែសម្រាប់ម្ចាស់ផ្ទះម្នាក់ទៀតទិញផ្ទះតែ 1ល្វែងទេនៅតំបន់ទីប្រជុំជនក្នុងក្រុងភ្នំពេញ តម្លៃ 13ម៉ឺនដូចគ្នា ស្រាប់តែ 4ឆ្នាំក្រោយមកតំបន់នោះបានក្លាយជាមជ្ឈមណ្ឌលពាណិជ្ជកម្ម មានក្រុមហ៊ុន និងអ្នកជំនួញធំៗចូលមកស្នាក់នៅបណ្តាក់ទុនរកស៊ីនៅទីនោះធ្វើឱ្យតម្លៃដីឡើងថ្លៃ ហើយម្ចាស់ផ្ទះនោះលក់ទៅវិញបានថ្លៃដល់ 25ម៉ឺនដុល្លារ ដូច្នេះប្រាក់ចំណេញរវាងផ្ទះក្នុងបុរី និងក្រៅបុរីក៏មានគម្លាតខុសគ្នាខ្លាំងដែរ។

លោកបន្តថា សម្រាប់អ្នកមានលុយចង់រកស៊ីលើផ្នែកអចលនទ្រព្យ សំខាន់ត្រូវចេះមើលទីតាំង បើសិនដឹងពីគម្រោងពង្រីកទីក្រុងរបស់រដ្ឋាភិបាលទៀតផង រឹតតែល្អ ដូចជានៅខណ្ឌសែនសុខ បច្ចុប្បន្ននិន្នាការដីធ្លីកំពុងឡើងថ្លៃខ្លាំងដូចបាយកំពុងពុះ ដោយសារតែអគារ ផ្ទះល្វែងទំនើបៗ ពិសេសផ្សារខ្នាតអន្តរជាតិចូលទៅបោះទីតាំងនៅទីនោះច្រើន។ លើសពីនេះបើមានលុយ រង់ចាំទិញពីអ្នកចង់លក់ប្រញាប់ៗ ក៏រឹតតែបានផលចំណេញកាន់តែច្រើនឡើងដែរ៕

February 13, 2018

ផលិតផល Digital Signage របស់ LG ផ្តល់ជូននូវដំណោះស្រាយអាជីវកម្មឈានមុខគេ

នៅក្នុងព្រឹត្តិការណ៍ (ISE) 2018 ផលិតផល OLED របស់ក្រុមហ៊ុន LG ដែលឈានមុខគេនៅលើសកលលោក ជាមួយនឹងការផ្តល់ជូននូវភាពងាយស្រួលដ៏ប្រសើរបំផុតសំរាប់គ្រប់អាជីវកម្មទាំងការលក់រាយ និងក្នុងការរិយាល័យ។ ការដាក់តាំងបង្ហាញផលិតផលទូរទស្សន៍ OLED ដែលមើលឃើញយ៉ាងច្បាស់ល្អ និងមានរាងស្តើងបំផុតបានទទួលការចាប់អារម្មណ៍និងការសរសើរពីអ្នកចូលរួមនៅក្នុងព្រឹត្តការណ៍នោះគ្រប់ៗគ្នា។

អ្វីដែលសំខាន់នៅក្នុងកន្លែងព្រឹត្តិការណ៍នោះ គឺផលិតផលទូរទស្សន៍ដ៏ទំនើបអស្ចារ្យ OLED 55អុីញ ដែលមានកញ្ចក់យ៉ាងស្តើង និងកោងដែលទាក់ទាញអ្នកទស្សនាក្នុងព្រឹត្តិការណ៍នោះយ៉ាងខ្លាំង។ លើសពីនេះទៅទៀតនេះគឺ ការមើលឃើញធ្លុះទៅខាងក្រោយបាន។ ហើយបច្ចេកវិទ្យាដ៏អស្ចារ្យនេះ វាពិតសំខាន់សម្រាប់ការដាក់តាំងបង្ហាញនៅមុខហាងរបស់លោកអ្នក ព្រោះវាមិនធ្វើអោយបាំងរូបភាពនៅពីក្រោយ។

នៅក្នុងព្រឹត្តិការណ៍ (ISE) 2018 OLEDនឹងបង្ហាញសមត្ថភាពរបស់ខ្លួនដែលមានរាងប៉ោងចេញក្រៅដ៏ទាក់ទាញ និងកញ្ចក់របស់វាអាចបត់បែនបានទៅតាមស្ថានការហើយមានរូបភាពស្អាតនិងគុណភាពដ៏ល្អឥតខ្ចោះ ជាមួយរាង និងទំហំរបស់កញ្ចក់ដ៏ទូលាយ ដែលអាចកាត់និងប្រើប្រាស់បានយ៉ាងច្រើនបែប នៅគ្រប់ឧស្សាហកគ្រាស ដូចជាវីឌីអូដែលមានទំហំធំ និងការតាំងពត៏មានផ្សេងៗដែលអាចឌីសាញអោយត្រូវនិងទំហំកន្លែងផ្សាយពាណិជ្ចកម្មនោះ។

រឿងដ៏សំខាន់មួយទៀតនៅក្នុងព្រឹត្តការណ៍នោះគឺ Video ជាប់ជញ្ជាំងស្តើងដែលមានទំហំ 0.6mmផ្តល់បទពិសោធន៍នៃការទស្សនាមិនចេះជិនណាយ។ ស៊ុមដ៏តូចច្រឡឹងរបស់វាបានធ្វើអោយការរំខានមានតិច និងល្អសំរាប់ការផ្សព្វផ្សាយលើផលិតផលប្រើប្រាស់សំលៀកបំពាក់និងផលិតផលថែរក្សាសម្រស់។ LG ក៏បានបង្ហាញផងដែរនូវជញ្ជាំងខ្សែវីដេអូឌីជីថលដែលមានសមត្ថភាពផ្តល់នូវពន្លឺចំនួន 1,500 units ដើម្បីផ្តល់នូវរូបភាពភ្លឺច្បាស់ល្អទោះបីកន្លែងដែលមានពន្លឺខ្ពស់ក៏ដោយ។ ផលិតផលDigital Signage របស់ក្រុមហ៊ុន LG ផ្តល់ជូននូវភាពងាយស្រួយជាច្រើន ដែលអាចសម្របទៅនឹងអាជីវកម្មគ្រប់ប្រភេទហើយ LG បានបង្កើនសមត្ថភាពនេះដើម្បីផ្តល់ជូននូវដំណោះស្រាយងាយស្រួលសម្រាប់ការដឹកជញ្ជូនផងដែរ។ប្រព័ន្ធបង្ហាញព័ត៌មានជើងហោះហើររបស់ក្រុមហ៊ុន LG (FIDS) មានទំហំយ៉ាងទូលំទូលាយ ហើយលក្ខណះពិសេសរបស់មុខងារ anti-reflection អាចធ្វើអោយអ្នកដំណើរក្រឡេកមើលពត៏មានជើងហោះហើរបានយ៉ាងងាយស្រួយ ដោយមិនមានការចំនាំងផ្លាតអ្វីឡើយ។

អេក្រង់ដ៏ធំមហិមាទំហំ 86 អ៊ីង និង88អ៊ិញ របស់ក្រុមហ៊ុន LG គឺល្អឥតខ្ចោះសម្រាប់ការបញ្ជូនព័ត៌មានទិសដៅ ឬការជូនដំណឹងអំពីការត្រួតពិនិត្យជាភាសាបរទេសដ៏សំបូរបែបជាមួយនឹងមុខងាររបស់វា។ មុខងារ (IDB) ជាមួយនិងគុណភាពរូបភាពកម្រិត UHD ជួយអោយការងារមានប្រសិទ្ធិភាពជាមួយនិងឧបករណ៍សហការគ្នាដ៏មានឥទ្ធិពល។ បច្ចេកវិទ្យា IDB របស់ក្រុមហ៊ុន LG មានចំណុចប្រទាក់ដែលអាចប្រើ touch បានយ៉ាងល្អជាមួយនឹងការសរសេរដ៏ត្រឹមត្រូវដែលអនុញ្ញាតឱ្យអ្នកប្រើប្រាស់ច្រើននាក់សរសេរ និងចែករំលែកគំនិតរវាងគ្នាបាន ជាមួយបច្ចេកវិទ្យាបច្ចេកវិទ្យាប៉ះផ្ទាល់ ដើម្បីបង្កើនប្រសិទ្ធភាណ និងភាពងាយស្រួលបំផុត។

ក្រុមហ៊ុន LG ក៏នឹងបង្ហាញនូវ UHD Video ទំហំ 65 អ៊ីញ ដែលសហការ បង្កើតឡើងជាមួយក្រុមហ៊ុន Cisco ។ Advanced B2B Solution ដ៏ជឿនលឿននេះ បានរួមបញ្ចូលដោយ អេក្រង់កម្រិត UHDដ៏ស៊ីវីល័យរបស់ LG និងបច្ចេកវិទ្យាឈានមុខគេរបស់ Cisco ។

នៅពេលដែលសណ្ឋាគារបំពាក់ OLED TV វានឹងអាចទាក់ទាញភ្ញៀវអោយស្នាក់នៅបន្តទៀត ដែលនៅក្នុងនោះមាន Gallery mode បានដាក់បញ្ចូលគំនូររូបភាពនៃបន្ទប់ទទួលភ្ញៀវដែលមានគុណភាពនិងរូបភាពល្អឥតខ្ចោះ។ អ្នកគ្រប់គ្រងសណ្ឋាគារក៏ពេញចិត្តចំពោះទូរទស្សន៍ Pro:Centric® ដែលអាចកែសម្រួលរូបភាពងាយស្រួលទៅតាមតម្រូវការរបស់គ្រឹះស្ថាននីមួយ។ ហើយដំណោះស្រាយ IoT នៅក្នុងបន្ទប់ដែលមាននៅលើទូរទស្សន៍ Smart Hotel របស់ក្រុមហ៊ុន LG ភ្ញៀវអាចគ្រប់គ្រងវាំងននឥតខ្សែរ ចាក់សោរទ្វារ ភ្លើង និងផ្សេងៗទៀតដោយប្រើប្រាស់បច្ចេកវិទ្យា: Pro: Centric ។

លោក Koo kwang –mo ប្រធានផ្នែកពត៏មានរបស់ក្រុមហ៊ុន LG Electronic បានមានប្រសាសន៍ថា “ពួកយើងមានមោទនភាពយ៉ាងក្រៃលែងដែលយើងជាអ្នកឈានមុខគេនៅលើសកលលោកនៅក្នុងវិស័យB2B។ លើសពីនេះទៀតគឺយើងអាចផ្តល់ជូននូវដំណោះស្រាយប្រកបដោយភាពដ៏ច្នៃប្រឌិតដល់អតិថិជនរបស់យើង។ ” គោលបំណងរបស់យើងគឺ ដើម្បីអាចផ្តល់នូវដំណោះស្រាយតម្លៃជាក់ស្តែង និងមានប្រសិទ្ធភាពខ្ពស់ដល់អ្នកដែលពាក់ព័ន្ធរួមមានអ្នកលក់រាយ រដ្ឋាភិបាលបដិសណ្ឋារកិច្ច ការអប់រំ និងឧស្សាហកម្មដឹកជញ្ជូន “។

នៅឯស្តង់ក្នុងព្រឹត្តឹការណ៍ ISE ឆ្នាំ 2018 ក្រុមហ៊ុន LG នឹងមានបង្ហាញផលិតផលសំខាន់ៗជាច្រើនរួមទាំងផ្ទាំងកញ្ចក់ OLED Signage, Ultra Stretch, High Brightness Signage, ផ្លាកសញ្ញាពន្លឺទំហំ 1.5 m Pixel និងកញ្ចក់ LED ដែលមានពណ៌ថ្លា។

https://ggear.com.kh/tv-audio-video/tvs/oled-tvs/

*** ទំនាក់ទំនងហាងលក់រាយផលិតផលLG (LG BrandShop) 023 888 299
(#135A, Monivong Blvd, 7 Makara, Phnom Penh)

February 12, 2018

Apple ទំនងជាកែប្រែគំនិត ឈប់ពន្លឿនល្បឿន iPhone ម៉ូឌែលចាស់ៗ

អាមេរិក៖ បន្ទាប់ពីផ្ទុះរឿងអាស្រូវពាក់ព័ន្ធនឹងការកាត់បន្ថយល្បឿន iPhone ទៅតាមអាយុកាលរបស់ថ្មនោះ ក្រុមហ៊ុន Apple បានដាក់ចេញនូវដំណោះស្រាយពីរគឺទីមួយ បញ្ចុះតម្លៃទៅលើការប្ដូរថ្ម និងមួយទៀតគឺបញ្ចូល Software ថ្មី ដែលអាចឱ្យអ្នកប្រើប្រាស់មានលទ្ធភាពឆែកមើលអាយុកាលនៃថ្មទូរស័ព្ទ ប៉ុន្តែថ្មីៗនេះ ក្រុមហ៊ុន Apple ហាក់ដូចជាចង់កែប្រែគំនិត ឈប់ធ្វើបែបនេះសម្រាប់ iPhone ជំនាន់ក្រោយ។

យោងតាមការចេញផ្សាយរបស់សារព័ត៌មាន GSM Arena បានឱ្យដឹងថា ក្រុមហ៊ុន Apple បានឆ្លើយតបទៅនឹងសំណួររបស់ប្រធានគណកម្មការសភាទទួលបន្ទុកផ្នែកពាណិជ្ជកម្ម វិទ្យាសាស្រ្ត និងដឹកជញ្ជូនអាមេរិក ថាតើ Apple នឹងអនុវត្តវិធានការបែបនេះលើទូរស័ព្ទ iPhone ស៊េរីថ្មីៗ និងក្រោយៗទៀតដែរឬទេ? «ចំពោះ iPhone ម៉ូឌែល 8, 8 Plus, និង X ត្រូវបានរចនាជាមួយ Hardware ទំនើបជាងម៉ូឌែលមុនៗ ដែលអនុញ្ញាតឱ្យម៉ាស៊ីនវាអាចដំណើរការបានកាន់តែមានប្រសិទ្ធភាព និងបញ្ជៀសបញ្ហារលត់ជាយថាហេតុបាន»។ នេះជាចម្លើយរបស់ Apple។

ក្រុមអ្នកវិភាគ បានសន្និដ្ឋានបានថា Apple កំពុងបង្ហាញពីការប្តូរចិត្តរបស់ខ្លួន ដោយការព្យាយាមគ្រប់គ្រងតម្រូវការថាមពលថ្មពីម៉ាស៊ីនទូរស័ព្ទ iPhone ស៊េរីក្រោយៗ ជាជាងការដាក់បញ្ចូលកម្មវិធីដើម្បីបន្ថយល្បឿនដំណើរការរបស់វា ដែលនាំឱ្យមានការស្តីបន្ទោសយ៉ាងខ្លាំងនោះ។

គួរបញ្ជាក់ផងដែរថា នៅត្រីមាសចុងឆ្នាំ 2017 ការលក់ iPhone របស់ក្រុមហ៊ុន Apple មានការធ្លាក់ចុះ ដោយក្នុងនោះមូលហេតុដែលនាំឱ្យធ្លាក់ចុះគឺដោយសារតែ iPhone X មានតម្លៃថ្លៃ និងពុំសូវមានតម្រូវការ រហូតដល់ Apple ចេញមុខបញ្ជាក់ថា iPhone X ទំនងជាត្រូវកាត់បន្ថយការផលិត ឬបញ្ឈប់ការផលិតនៅមុនពេលវត្តមាន iPhone ជំនាន់ថ្មីមកដល់៕

February 12, 2018

បើកឆាក Tiger Street Football Festival 2018 នៅសៀមរាប

សៀមរាប៖ សម្រាប់ការប្រកួតនៅមណ្ឌលទី4 នេះដោយមានក្រុមប្រកួតច្រើន។ កាលពីឆ្នាំមុនមណ្ឌលនេះមានក្រុមចូលរួមចំនួន 108 ស្របពេលឆ្នាំនេះមានការកើនឡើងដល់ 112។ ដូចនេះហើយក្រុមគណៈកម្មការបានសម្រេចថា ការប្រកួតមិនសម្រាក ហើយបើកការប្រកួតពី ម៉ោង7 រហូតដល់ 6:30 ល្ងាច។

ក្នុងកិច្ចបើកឆាកដំបូងនាព្រឹកនេះក៏មានការចូលពីសំណាក់ថ្នាក់ដឺកនាំនៃក្រុមហ៊ុន CBL បានអញ្ជើញចូលផងដែល ។ ក្នុងឪកាសបើកឆាកប្រកួតដែលលោក វង់ សុងវៃ បានមានប្រសាសថា ខេត្តសៀមរាប ជាមណ្ឌលទី4 ហើយការប្រកួតមានលក្ខណៈធំជាងមុន យើងមានក្រុមប្រហែលជាង 500ក្រុម ។ ហើយកីឡាករមានរហូតដល់ 3500នាក់ សម្រាប់មណ្ឌលមានដល់ទៅ 8មណ្ឌល ។ ជាកិច្ចបញ្ចប់សូមឱ្យកីឡាករបញ្ចេញសមត្ថភាព នឹងទទួលបានជោកជ័យគ្រុប់ៗគ្នា ៕

ព័ត៌មានលម្អិតបន្ថែមអំពី Tiger Street Football Festival 2018 សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH

#TSFF2018
សូមពិសាដោយការទទួលខុសត្រូវ

February 12, 2018

មិនធម្មតា ត្រឹមតែជាង1ឆ្នាំ កញ្ញា រ៉ាស៊ីន វាយឡុកទីផ្សារសម្ដែង និងបង្ហាញម៉ូដយ៉ាងខ្លាំង

កញ្ញា រ៉ាស៊ីន គឺជាតារាបង្ហាញម៉ូដ និងសម្ដែងស្រីវ័យក្មេងមួយដួងដែលមានរូបសម្រស់ស្រស់ស្អាតគួរជាទីទាក់ទាញ ដែលបច្ចុប្បន្ននេះកំពុងតែបោះជំហាននៅលើវិថីសិល្បៈ និងចាប់យកទីផ្សារក្នុងវិស័យនេះបានយ៉ាងច្រើនក្នុងដៃ។ ជាក់ស្ដែង នៅត្រឹមរយៈពេលជាងមួយឆ្នាំនៃការចូលខ្លួនប្រឡូកជាមួយនឹងអាជីពជាតារាបង្ហាញម៉ូដ និងសម្ដែង កញ្ញា ទទួលបានការងារច្រើនគួរសមដែលក្នុងនោះរួមមានទាំងការងារផ្នែកបង្ហាញម៉ូដនៅក្នុងក្រុមតារាបង្ហាញម៉ូដ SUN Super Model ការថតស្ប៉តផ្សព្វផ្សាយពាណិជ្ជកម្ម ក៏ដូចជាការសម្ដែងនៅក្នុងខ្សែភាពយន្តភាគខ្មែរសម្រាប់ត្រៀមចាក់បញ្ចាំងនៅតាមបណ្តាស្ថានីយ៍ទូរទស្សន៍នានាផងដែរ។

បើគិតមកដល់ដើមឆ្នាំ2018នេះ បទពិសោធរបស់កញ្ញា រ៉ាស៊ីន ហាក់នៅមានភាពតិចតួចស្ដួចស្ដើងបន្តិចបើប្រៀបធៀបជាមួយបណ្តារៀមច្បងជំនាន់មុនៗ ប៉ុន្តែបើគេសម្លឹង និងវាយតម្លៃទៅលើសមិទ្ធផលការងារសិល្បៈដែលកញ្ញាធ្លាប់បានទទួល ក៏ដូចជាកំពុងមានកាន់នៅក្នុងដៃនាពេលបច្ចុប្បន្ននេះ គឺមានមិនចាញ់តារាល្បីឈ្មោះជំនាន់មុនៗដែលមានបទពិសោធខ្ពស់ និងប្រឡូកច្រើនឆ្នាំនោះទេ។ ជាក់ស្ដែង ចាប់តាំងពីទទួលបានឱកាសបានចូលមកបង្ហាញខ្លួនក្នុងវិស័យសិល្បៈតាមរយៈការផ្តល់ឱកាសពីសំណាក់អ្នកដឹកនាំក្រុមតារាបង្ហាញម៉ូដ SUN Super Model កាលពីឆ្នាំកន្លងទៅនោះ កញ្ញា រ៉ាស៊ីនបានបន្សាយកេរ្តិ៍ឈ្មោះរបស់ខ្លួនគួរជាទីមោទនៈ។

សម្រាប់បទពិសោធ ក៏ដូចជាការងារដែលអាចយឹតយោងសណ្តោងប្រជាប្រិយភាពរបស់កញ្ញាកាលពីពេលកន្លងទៅនេះ ក្រៅពីជាតារាបង្ហាញម៉ូដជាញឹកញាប់នោះ គឺនៅមានការថតស្ប៉តផ្សព្វផ្សាយពាណិជ្ជកម្មឱ្យក្រុមហ៊ុន និងផលិតផលល្បីៗមួយចំនួន ដូចជា ស្ប៉តថ្នាំថែរក្សា និងបំប៉នសម្រស់ Glow ស្ប៉តផលិតផលក្រុមហ៊ុនសេវាទូរស័ព្ទចល័ត Smart ស្ប៉តស្រាបៀរអង្គរ ក៏ដូចជាស្ប៉តដែលបង្ហាញពីការអប់រំនៅកម្ពុជា ដែលជាការផលិតឡើងរបស់បណ្តាអង្គការនានាជាដើម។

ដោយឡែក សម្រាប់ការងារនៅក្នុងវិស័យសម្ដែងវិញ បច្ចុប្បន្ននេះ កញ្ញា រ៉ាស៊ីន ដែលមានស្រុកកំណើតនៅឯស្រុកកណ្តាលស្ទឹង ខេត្តកណ្តាល ជាប់ព្រំប្រទល់ស្រុកបាទីខេត្តតាកែវ រូបនេះ ក៏មានភាពមមាញឹកគួរសមផងដែរ ដោយពេលនេះកញ្ញាកំពុងតែជាប់ដៃជាមួយការថតខ្សែភាពយន្តភាគខ្មែរចំនួន 2រឿងផងដែរ រួមមានរឿង “បីសាចគួរឱ្យស្រឡាញ់” សម្រាប់ត្រៀមចាក់បញ្ចាំងនៅលើកញ្ចក់ទូរទស្សន៍រស្មីហង្សមាស និងមួយរឿងទៀតកំពុងតែសម្រុកថត ដើម្បីត្រៀមចាក់បញ្ចាំងនៅស្ថានីយ៍ទូរទស្សន៍ CTN មានចំណងជើងថា “ជ្រោះស្នេហ៍។

ម្យ៉ាងវិញទៀត តារាស្រីវ័យក្មេងរូបនេះ ក៏ជាពិធីការិនីដែលសម្បូរសំនួនវោហារនៅក្នុងកម្មវិធីកម្សាន្តរបស់ស្ថានីយ៍ទូរទស្សន៍ថោន ដែលទើបបង្កើតថ្មី រួមជាមួយនឹងការងារជាពិធីការិនីប្រចាំផលិតផលសម្រស់ momo របស់អ្នកនាង គង់ ចាន់ស្រីមុំ ផងដែរ៕

February 12, 2018

គុណសម្បត្តិ និងគុណវិបត្តិ នៃការសម្រេចកាមដោយខ្លួនឯង

តាមរយៈការស្ទង់មតិជាច្រើនដែលធ្វើឡើងដោយក្រុមអ្នកស្ម័គ្រចិត្ត និងអ្នកជំនាញផ្នែកសុខភាពផ្លូវភេទបានបញ្ជាក់ឱ្យដឹងថា ការសម្រេចកាមដោយខ្លួនឯងគឺមានអត្រាខ្ពស់បំផុត ហើយក៏ជាវិធីសាស្ត្រដ៏ពេញនិយមទាំងមនុស្សស្រី ក៏ដូចជាមនុស្សប្រុសផងដែរ រហូតដល់អត្រាប្រមាណជាង 92% ខណៈដែលប្រមាណជា8%ផ្សេងទៀត លាចាកពីចំណង់ផ្លូវភេទដោយសារវ័យជរា និងជំងឺជាដើម។ ចង់ដឹងទេថា ការសម្រេចកាមដោយខ្លួនឯងមានគុណសម្បត្តិ និងគុណវិបត្តិអ្វីខ្លះ? បើចង់ជ្រាបច្បាស់សូមបន្តការអាននៅអត្ថបទខាងក្រោមនេះ។

អ្វីទៅជាការសម្រេចកាម? គឺជាការដាស់ចំណង់ផ្លូវភេទ ដោយការប្រើដៃក្ដោប ប្រើម្រាមដៃ ឬប្រើឧបករណ៍សិចសិប្បនិមិត្តផ្សេងៗច្រើនរូបភាពជាដើម។

គុណសម្បត្តិ

មានការលើកឡើងថា ការសម្រេចកាមដោយខ្លួនឯងមានចំណុចល្អជាច្រើន ដូចជា អាចបំពេញចំណងផ្លូវភេទរបស់ខ្លួនបានគ្រប់ពេលដែលនឹកចង់ និងគ្រប់ទីកន្លែង, មិនចំណាយថវិកា, មានសុវត្ថិភាពខ្ពស់ មិនឆ្លងរោគផ្សេងៗ ដូចជា មេរោគ HIV ដែលបណ្តាលអោយកើតជំងឺអេដស៍ ជំងឺកាមរោគ ជំងឺថ្លើមប្រភេទB, C, ជំងឺប្រមេះ, ជំងឺ Chlamydia និងជំងឺឆ្លងតាមការរួមភេទជាច្រើនទៀត។ មិនចាំបាច់ខាតពេលវេលា មិនសាំចិត្ត និងមិនអស់ប្រាក់កាសក្នុងការជួបជាមួយដៃគូ។ បន្ថែមពីនេះ សម្រាប់អ្នកដែលចូលចិត្តសម្រេចកាមអាចមានអត្រាចៀសឆ្ងាយពីជំងឺស្ត្រេស មិនសូវជួបបញ្ហានៃជំងឺផ្តាសាយ បំបាត់អារម្មណ៍តានតឹង ជាពិសេស អាចផ្លាស់ប្ដូររសជាតិនៃជីវិតសិចបានតាមរយៈឧបករណ៍ផ្សេងៗ តាមការចង់បានរបស់ខ្លួន។

គុណវិបត្តិ

បើទោះជាយ៉ាងណាក៏ដោយ ការសម្រេចកាមដោយខ្លួនឯងក៏មានផលប៉ះពាល់ដែលជាចំណុចអវិជ្ជមានផងដែរ ខណៈដែលមនុស្សមួយចំនួនគិតថាវាជាទង្វើអសីលធម៌ ប្រាសចាកពីគន្លងសាសនា និងជាសកម្មភាពខុសពីធម្មជាតិ។

អ្វីដែលជាការប៉ះពាល់បំផុតនោះគឺ នៅក្នុងអំឡុងពេលកំពុងប្រព្រឹត្តកាម ដំណើរឈាមក្រោមស្បែក (Ecchymosis) នៃសរីរាង្គប្រដាប់ភេទ អាចកើតឡើងទាំងបុរសទាំងស្ត្រី ជាពិសេសនៅពេលប្រើឧបករណ៍សិចសិប្បនិមិត្ត វាអាចនឹងធ្វើឱ្យឈឺចាប់ខ្លាំង ព្រោះវាមិនមានទឹករំអិលគ្រប់គ្រាន់។ បន្ថែមពីនេះ នៅពេលការសម្រេចកាមដោយខ្លួនឯងមានភាពងាយស្រួលពេក វាអាចបណ្តាលឱ្យមនុស្សដែលញាណកាម ចូលចិត្ត និងឧស្សាហ៍អនុវត្តញឹកញាប់ ដែលអាចបង្កឱ្យមានបញ្ហាផ្លូវចិត្ត ប្រព័ន្ធប្រសាទចុះខ្សោយ ប្រឈមនឹងភាពបាត់ការចងចាំ។

បញ្ជាក់ ៖ សម្រាប់ការសម្រេចកាមដោយខ្លួនឯង អាចប្រព្រឹត្តទៅបានចំពោះមនុស្សពេញវ័យ និងមនុស្សមានអាយុក្រោម40ឆ្នាំ ទើបមិនសូវមានផលប៉ះពាល់ខ្លាំង៕

February 12, 2018

15នាទីសំខាន់ ជួយមនុស្សគាំងបេះដូង

មានជាច្រើនដងណាស់ដែលយើងតែងបានឮពីព័ត៌មានមនុស្សដែលស្ថិតក្នុងវ័យកំលោះក្រមុំត្រូវស្លាប់បាត់បង់ជីវិតមុនវ័យដោយអាការគាំងបេះដូង ដែលកាលពីពេលមុនយើងធ្លាប់តែនាំគ្នាជឿថា អាការនេះកើតនៅលើតែមនុស្សដែលមានអាយុច្រើនប៉ុណ្ណោះ តែក្នុងពេលបច្ចុប្បន្ន ស្ថានភាពសង្គមដែលផ្លាស់ប្ដូរ វិធីការហូបចុក ការសម្រាករបស់មនុស្សទីក្រុងបានផ្លាស់ប្ដូរខុសពីអតីតកាលយ៉ាងស្រឡះ។

ខណៈដែលមនុស្សជាច្រើនលើកបន្ទុកក្នុងការព្យាបាលទៅឱ្យគ្រូពេទ្យទាំងក្នុងការពិតវិញនោះ គ្រូពេទ្យ និងបុគ្គលិកខាងវេជ្ជសាស្ត្រគឺជាចុងផ្លូវនៃការរក្សាជីវិត ព្រោះដើមផ្លូវនៃការរក្សាជីវិតឱ្យរស់នៅបានយ៉ាងល្អតាមអាយុខ័យនោះត្រូវចាប់ផ្ដើមពីយើងខ្លួនឯង ដូច្នេះយើងនាំគ្នាមកស្គាល់ រៀនយល់ដឹង និងការពារ រួមទាំងការជួយសង្គ្រោះអ្នកដែលត្រូវប្រឈមនឹងជំងឺបេះដូងឬអាការគាំងបេះដូងទាន់ហន់នៅក្នុងបន្ទាត់ខាងក្រោមនេះ។

អាការគាំងបេះដូង

“គាំងបេះដូង” មានន័យពីសរសៃឈាមបេះដូងត្រូវស្ទះទាំងអស់ បន្ទាប់ពីនោះសាច់ដុំបេះដូងនឹងចាប់ផ្ដើមឈប់ធ្វើការ អាការអាចនឹងយូរជាង15នាទី និងមិនធូរស្រាលដោយសារកោសិកាសាច់ដុំបេះដូងដែលខ្វះឈាមមកចិញ្ចឹមនោះនឹងចាប់ផ្ដើមស្លាប់ក្នុងរយៈពេលមិនប៉ុន្មាននាទីក្នុងម៉ោងដំបូងដែលកើតអាការឈឺចុកក្នុងបេះដូង។ អាការដែលបង្ហាញឱ្យឃើញគឺ ឈឺចុកដើមទ្រូង រាលមកបំពង់ក ដៃ និងធ្គាមនឹងមានញើសចេញមកច្រើនរហូតមានអារម្មណ៍ថារងាមួយកំណាត់ខ្លួនខាងលើ អាចមានអាការវិលមុខ ដកដង្ហើមមិនពេញរួមជាមួយទៀតផង។

វិធីជួយសង្គ្រោះនៅពេលជួបមនុស្សដែលមានអាការគាំងបេះដូង

ការជួយជីវិតបែបដែលហៅថា CARDIO PULMONARY RESUSCITATION (CPR) មានន័យថា ការជំរុញបេះដូង ឬផ្លុំខ្យល់បញ្ចូលសួតដើម្បីឱ្យជនរងគ្រោះមានជីវិតឡើងវិញ។ អាចរាប់ថា ជាការសង្គ្រោះជីវិតដែលសំខាន់ណាស់ ជាពិសេសក្នុងអំឡុងពេល 15នាទីដំបូងដែលអ្នកបានជួបមនុស្សដែលមានអាការគាំងបេះដូង អ្នកមានឱកាសជួយឱ្យគេរស់ឡើងវិញបាន។

ចាប់ផ្ដើមដំបូង ត្រូវព្យាយាមប្រាប់ឱ្យមនុស្សដែលមកចោមរោមមើលជនរងគ្រោះចេញឱ្យឆ្ងាយសិន បន្ទាប់មកពិនិត្យមើលថា ជនរងគ្រោះនៅដកដង្ហើមដែរឬទេ? ចូរដោះខ្សែក្រវាត់ និងឡេវអាវដើម្បីឱ្យជនរងគ្រោះបាត់ភាពថប់តានតឹងឱ្យបានច្រើនបំផុត បន្ទាប់ពីនោះធ្វើការម៉ាស្សាបេះដូង ដោយប្រើបាតដៃដាក់ពីលើគ្នាសង្កត់ទៅលើឆ្អឹងសន្ទះទ្រូង ខាងលើចុងដង្ហើមបន្តិចសង្កត់ហើយលែងជាចង្វាក់មិនតិចជាង100ដងក្នុងមួយនាទី ដើម្បីជាការធ្វើម៉ាស្សាបេះដូងឱ្យធ្វើការឡើងវិញ និងត្រូវប្រញាប់ហៅឡានពេទ្យភ្លាមៗនៅពេលឃើញមនុស្សកើតអាការគាំងបេះដូង។

បើមានភាពប្រថុយប្រថានក្នុងការគាំងបេះដូង និងនៅតែម្នាក់ឯង គួរធ្វើយ៉ាងណា?

បើលោកអ្នកជាមនុស្សដែលមានភាពប្រថុយប្រថានក្នុងការគាំងបេះដូងទាន់ហន់ ដែលមានន័យថា អ្នកមានអាការរបស់ជំងឺទឹកនោមផ្អែម លើសឈាម ធាត់ជ្រុល ឬធ្លាប់មានអាការនេះពីមុនមកនោះ ការរៀនយល់ដឹងក្នុងការដោះខ្លួនឱ្យរស់ពេលដែលនៅតែម្នាក់ឯងនោះគឺជារឿងសំខាន់។ ការណែនាំដំបូង បើសិនមានអារម្មណ៍ថា ចុកណែនដើមទ្រូង និងមានអាការស្រដៀងនឹងបេះដូងចង់គាំងនោះ ចូរចាប់ផ្ដើមក្អកបែបដែលហៅថា Cough CPR ភ្លាម ដោយដកដង្ហើមចូលឱ្យវែងគ្រប់ពេលមុនការក្អក និងក្អកឱ្យដូចមានស្លេស្ម៍ក្នុងបំពង់ក។

ការដកដង្ហើមចូលវែងៗ និងការក្អកត្រូវធ្វើជាបន្តបន្ទាប់រៀងរាល់2វិនាទី និងក្អកជារឿយៗអាចជួយសម្រាលអាការធ្ងន់ធ្ងរបាន និងធ្វើបែបហ្នឹងរហូតទាល់តែមានអ្នកមកជួយ ឬក៏បេះដូងដំណើរការជាប្រក្រតីឡើងវិញ ហើយក្រោយពីនោះត្រូវប្រញាប់ទៅមន្ទីរពេទ្យភ្លាមកុំបង្អង់យូរ។

បើមានថ្នាំ អាស្ពីរីន នៅក្នុងផ្ទះ នៅពេលចាប់ផ្ដើមមានអាការមិនស្រួល ការលេបថ្នាំអាស្ពីរីនអាចជួយឱ្យចរន្តឈាមរត់ហូរវិលបានល្អ មិនផ្ដុំគ្នាជាដុំ តែទាំងអស់នេះ វាត្រឹមតែជាការណែនាំក្នុងករណីដែលលោកអ្នកនៅតែម្នាក់ឯងប៉ុណ្ណោះឯវិធីដែលល្អបំផុតនោះគឺព្យាយាមកុំឱ្យខ្លួនឯងស្ថិតក្នុងសភាវប្រថុយប្រថានអីប្រសើរជាង៕

February 11, 2018

កាសែតឡារ៉ែន ពាណិជ្ជ លេខ 114

[easy_media_download url=”https://www.lareine.com.kh/wp-content/uploads/2018/02/LRPN_114_final-for-web.pdf” force_dl=”1″]

February 10, 2018

WhatsApp បានក្លាយជាកម្មវិធីផ្ញើសារតាមរយៈទូរស័ព្ទដៃដែលមានអ្នកប្រើច្រើនជាងគេបំផុតនៅដើមឆ្នាំ 2018

បច្ចុប្បន្ន កម្មវិធីផ្ញើសារតាមរយៈទូរស័ព្ទដៃ កំពុងតែទទួលបានការពេញនិយមជាខ្លាំង ព្រោះវាកម្មវិធីទាំងនោះបានផ្ដល់នូវភាពងាយស្រួលជាច្រើនដល់អ្នកប្រើប្រាស់ ជាពិសេសគឺលឿន រហ័ស ទាន់ចិត្ត ប៉ុន្តែលោកអ្នកមានដឹងថា កម្មវិធីណាមួយដែលមានចំនួនអ្នកប្រើច្រើនជាងគេ?

យោងតាមរបាយការណ៍របស់ Statistic បានឱ្យដឹងថា គិតត្រឹមដើមឆ្នាំ 2018 នេះ កម្មវិធី WhatsApp បានក្លាយជាកម្មវិធីដ៏ពេញនិយមបំផុតក្នុងការផ្ញើសារតាមរយៈទូរស័ព្ទដៃ ដោយមានចំនួនអ្នកប្រើរហូតដល់ 1300លាននាក់ ខណៈដែល Facebook Messenger កំពុងតែដេញប្រកិតនឹង WhatsApp ជិតស្មើ 1300លាននាក់។

ជាមួយគ្នានោះដែរ កម្មវិធិ WeChat របស់ចិន បានយោងតោងយកតំណែងលេខ 3 ដោយបានរុញច្រានកម្មវិធីផ្សេងៗដោយនៅក្រោមខ្លួន ជាមួយនឹងអ្នកប្រើចំនួន 980លាននាក់។ បើនិយាយពីកម្មវិធី Skype និង Viber វិញ ត្រូវបាន Statistic បញ្ជាក់ថា កំពុងឈរនៅលេខរៀងទី 5 និង 6 ខណៈដែល LINE និង Telegram ឈរនៅលេខរៀងទី 9 និង 10។

គួរបញ្ជាក់ផងដែរថា ចាប់ពី Facebook ទិញយក WhatsApp ក្នុងតម្លៃជាង 20ពាន់លានដុល្លារមក ចំនួនអ្នកប្រើ WhatsApp បានកើនឡើងជាបន្តបន្ទាប់ ជាពិសេសគឺនៅក្នុងរយៈពេល 2 ឆ្នាំចុងក្រោយនេះ ដោយបានស្ទុះឡើងយ៉ាងខ្លាំងលើសលុប៕

February 10, 2018

Author: វល័ក្ខ